Narsai: On Samson - ܥܲܠ ܫܸܡܫܘܿܢ ܓܲܢ̄ܒܵܪܵܐ

1 :ܨܠܸܡ ܙܵܟܼܘܼܬܹܗ ܕܓܲܒܼܪܵܐ ܟܹܐܢܵܐ ܚܙܹ̇ܝܬܼ ܒܲܟܼܬܼܵܒܹ̈ܐ 2 ܕܨܝܼܪܵܐ ܒܕܲܦܵܐ ܢܵܡܘܿܣܵܝܵܐ ܕܬܲܪܬܹܿܝܢ ܕܸܡ̈ܘܵܢ ܀ 3 :ܒܪܹܫ ܦܵܣܘܿܩܵܐ ܚܙܹ̇ܝܬܼ ܨܘܼܪ̈ܵܬܼܵܐ ܫܲܦܝܼܪ̈ܵܬܼܵܐ 4 ܘܲܒܼܫܘܼܠܵܡܹܗ ܚܙܹ̇ܬܼ ܐܵܬܼ̈ܘܼܬܼܵܐ ܕܠܵܐ ܫܲܦܝܼܪ̈ܵܢ ܀ 5 :ܒܚܘܼܩܵܐ ܩܲܕܼܡ̇ܐ ܩܪܹܝܬܼ ܢܸܨܚܵܢܵܐ ܕܪܲܒܿܘܼܬܼ ܚܲܝܠܹܗ 6 ܘܲܒܼܗܵܘ̇ ܕܲܬܼܪܹܝܢ ܚܸܣܕܵܐ ܘܨܲܥܪܵܐ ܘܲܡܚܝܼܠܘܼܬܼܵܐ ܀ 7 :ܦܠܸܐ ܗ̄ܘ̣ܵܐ ܣܲܓܿܝܼ ܫܘܼܪܵܝ ܫܲܪܒܹܿܗ ܠܲܕܼܚܵܐܲ݁ܪ ܒܹܗ 8 ܘܲܫܟܼܝܼܪ ܗ̄ܘ̣ܵܐ ܛܵܒܼ ܫܘܼܠܵܡ ܫܲܪܒܹܿܗ ܠܲܕܼܫܵܡܲܪ ܠܹܗ ܀ 9 :ܠܵܐ ܫܲܘܝܘܼܬܼܵܐ ܡܸܬܚܲܙܝܵܐ ܒܹܗ ܒܫܲܪܒܹܿܗ ܕܟܹܐܢܵܐ 10 ܘܲܡܕܵܘܲܕܼ ܗ̄ܘ̣ܵܐ ܫܒܼܝܼܠ ܡܲܪܕܿܝܼܬܼܵܐ ܕܪܲܗܛܵܐ ܕܐܘܼܪܚܹܗ ܀ 11 :ܒܠܵܐ ܫܲܘܝܘܼܬܼܵܐ ܕܐܵܓܼܘܿܢ ܥܲܡܠܵܘ̈ܗܝ ܦܗ̣ܵܘ ܚܘܼܫܵܒܲܝ̈ 12 ܘܲܒܼܥܹ̇ܝܬܼ ܕܐܹܠܲܦ ܕܡ̇ܢܲܐ ܗ̄ܝܼ ܥܸܠܬܼܵܐ ܕܬܲܪܬܹܿܝܢ ܒܲܚܕܼܵܐ ܀ 13 :ܪܸܥܝܵܢܝ ܫܲܩ̣ܠܲܢܝ ܕܐܸܒܼܥܸܐ ܒܥܵܬܼܵܐ ܕܫܘܼܒܼܚܹܗ ܘܚܸܣܕܹܿܗ 14 ܘܓܼܪܼܓܼ ܐܲܥܠܲܢܝ ܠܓܼܵܘ ܡ̣ܢ ܬܲܪܥܵܐ ܕܣܸܦܪ̈ܲܝ ܪܘܼܚܵܐ ܀ 15 :ܒܒܹܝܬܼ ܐܵܬܼ̈ܘܵܬܼܵܐ ܕܲܟܼܬܼܝܼ̈ܒܼܵܬܼܵܐ ܥܸܠܹ̇ܬܼ ܩܵܡܹ̇ܬܼ 16 ܘܫܲܪܝܼܬܼ ܕܐܸܣܓܸܿܐ ܒܚܘܼܩܵܐ ܕܲܟܼܬܼܝܼܒܼ ܓܲܒܼܪܵܐ ܢܙܝܼܪܵܐ ܀ 17 :ܫܸܡ ܓܲܒܼܝܘܼܬܼܵܐ ܚܙܹ̇ܝܬܼ ܕܲܪܫܝܼܡܵܐ ܒܫܘܼܪܵܝ ܫܲܪܒܹܿܗ 18 ܘܡܸܫܬܿܥܸܐ ܠܹܗ ܚܲܕܼ ܪܘܼܚܵܢܵܐ ܩܕܼܵܡ ܒܸܣܪ̈ܵܢܹܐ ܀ 19 :ܓܼܒܼܪܵܐ ܕܪܘܼܚܵܐ ܚܙܹ̇ܝܬܼ ܕܲܡܣܲܒܲܪ ܒܲܛܢܹܗ ܘܝܲܠܕܹܿܗ 20 ܘܲܡܬܲܚܸܡ ܠܵܗ̇ ܠܫܸܡ ܓܼܒܼܝܘܼܬܹܗ ܒܫܸܡ ܒܵܪܘܿܝܵܐ ܀ 21 :ܒܫܸܡ ܒܵܪܘܿܝܵܐ ܩ̣ܪܵܝܗܝ ܪܘܼܚܵܢܵܐ ܠܦܲܓܼܪܵܢܵܝܵܐ 22 ܕܢܸܗܘ̤ܐ ܥܲܒܼܕܵܐ ܘܲܡܫܲܡܫܵܢܵܐ ܕܡܸܠܲܬܼ ܡ̇ܪܹܗ ܀ 23 :ܫܡܵܐ ܩܲܕܿܝܼܫܵܐ ܣܵܡ̣ ܠܹܗ ܒܪܹܫܹܗ ܒܲܕܼܡܘܼܬܼ ܛܲܒܼܥܵܐ 24 ܕܢܸܗܘܸܐ ܝܵ̇ܕܲܥ ܕܲܕܼܡܲܢ ܐܝܼܬܼܵܘܗܝ ܘܲܠܡܲܢ ܦܵܠܲ݁ܚ ܀ 25 :ܠܦܵܠܚܘܼܬܼ ܡܲܠܟܵܐ ܕܲܟܼܣܸܐ ܒܪܵܘܡܵܐ ܓܼܒܼܵܝܗܝ ܦܘܼܩܕܵܢܵܐ 26 ܘܐܲܝܟ ܕܲܠܦܵܠܚܵܐ ܚܲܙܩܹܗ ܒܙܲܝܢܵܐ ܕܲܢܙܝܼܪܘܼܬܼܵܐ ܀ 27 ܒܲܢܙܝܼܪܘܼܬܼܵܐ ܙܲܝܢܹܗ ܠܦܵܠܚܵܐ ܦܲܓܼܪܵܢܵܝܵܐ: pb. 304 28 ܕܢܸܕܲܥ ܟܠܢܵܫ ܕܙܲܝܢܹܗ ܕܪܘܼܚܵܐ ܗ̄ܘ̣ ܘܠܵܐ ܗ̄ܘ̣ܵܐ ܕܒܸܣܪܵܐ ܗ̄ܘ̣ ܀ 29 :ܪܘܼܚܵܢܵܐܝܼܬܼ ܥܬܼܝܼܕܼ ܗ̄ܘ̣ܵܐ ܕܢܲܩܪܸܒܼ ܥܲܡ ܕܲܠܩܘܼܒܼܠܵܐ 30 ܘܩܲܕܸܿܡ ܝܲܗ̣̄ܒܼܠܹܗ ܙܲܝܢܵܐ ܕܪܘܼܚܵܐ ܕܢܸܬܼܢܲܨܲܚ ܒܹܗ ܀ 31 :ܩܹܐܪܣܵܐ ܪܲܒܵܐ ܥܬܼܝܼܕܼ ܗ̄ܘ̣ܵܐ ܕܢܸܥܒܸܿܕܼ ܠܘܼܩܒܲܠ ܥܵܘ̣ܠܵܐ 32 ܘܲܕܼܠܵܐ ܢܲܫܦܸܠ ܝܲܩܪܹܗ ܒܕܲܪ̈ܓܹܐ ܕܪܵܡܝܼܢ ܡܸܢܹܗ ܀ 33 :ܥܝܼܪܵܐ ܫܲܕܲܪ ܘܣܲܒܲܪ ܒܲܛܢܹܗ ܘܝܼܠܝܼܕܼܘܼܬܹܗ 34 ܘܣܵܡ̣ ܠܹܗ ܒܪܹܫܹܗ ܟܠܝܼܠܵܐ ܪܲܒܵܐ ܕܲܢܙܝܼܪܘܼܬܼܵܐ ܀ 35 :ܐܲܝܟ ܪܲܒܿ ܚܲܝܠܵܐ ܓ̣ܒܼܵܝܗܝ ܡ̣ܢ ܥܲܡܵܐ ܪܦܸܐ ܪܸܥܝܵܢܵܐ 36 ܕܲܒܼܚܝܼܨܘܼܬܹܗ ܢܫܲܪܲܪ ܐܸܢܘܿܢ ܒܣܲܒܼܪܵܐ ܛܵܒܼܵܐ ܀ 37 :ܪܦܸܐ ܗ̄ܘ̣ܵܐ ܥܲܡܵܐ ܡ̣ܢ ܬܘܼܟܼܠܵܢܵܐ ܐܲܠܵܗܵܝܵܐ 38 ܘܲܒܼܝܲܕܼ ܫܸܡܫܘܿܢ ܚܲܝܼܨܹܗ ܠܠܸܒܹܿܗ ܒܕܼܚܠܲܬܼ ܩܘܼܫܬܵܐ ܀ 39 :ܚܹܝܠ ܥܘܼܕܼܪܵܢܹܗ ܣܵܡ̣ ܥܲܠ ܪܹܫܹܗ ܒܲܕܼܡܘܼܬܼ ܬܵܓܼܵܐ 40 ܘܫܲܠܛܹܗ ܕܲܢܕܼܘܼܢ ܠܲܟܼ̈ܢܵܘܵܬܹܗ ܕܠܵܐ ܫܘܼܣܪܵܢܵܐ ܀ 41 :ܠܕܼܝܼܢܵܐ ܕܥܲܡܵܐ ܘܩܹܐܪܣܵܐ ܕܥܲܡܡܹ̈ܐ ܩ̣ܪܵܝܗܝ ܘܐܲܩܝܼܡܹܗ 42 ܕܲܒܼܟܼܠ ܥܸܠ̈ܠܵܢ ܢܩܲܦܲܚ ܥܵܘ̣ܠܵܐ ܕܠܵܐ ܢܸܫܬܿܥܠܸܐ ܀ 43 :ܠܘܼܩܒܲܠ ܥܵܘ̣ܠܵܐ ܕܥܲܡܵܐ ܘܥܲܡܡܹ̈ܐ ܫܲܕܿܪܹܗ ܪܸܡܙܵܐ 44 ܘܓܲܢ̄ܒܵܪܵܐܝܼܬܼ ܫܲܕܿܪܹܗ ܕܢܲܩܪܸܒܼ ܒܪܹܫ ܬܲܟܼܬܿܘܼܫܹܐ ܀ 45 :ܠܘܼܩܒܲܠ ܥܲܡܡܹ̈ܐ ܚܙ̣ܵܐ ܩܲܕܼܡ̇ܝܲܬܼ ܨܸܒܼܝܵܢ ܢܲܦܫܹܗ 46 ܕܲܚ̣ܘܵܐ ܕܲܒܗܘܿܢ ܡܲܨܠܲܚ ܙܐܦܵܐ ܕܝܘܼܠܦܵܢ ܫܹܐܕܹ̈ܐ ܀ 47 :ܝܘܼܠܦܵܢ ܫܹܐܕܹ̈ܐ ܚܙ̣ܵܐ ܟܲܕܼ ܢܵܨܲܚ ܒܥܲܡܡܹ̈ܐ ܥܘܼܪ̈ܠܹܐ 48 ܘܛܲܢ ܘܐܸܬܼܥܲܙܲܙ ܠܡܸܥܒܲܕܼ ܥܲܡܗܘܿܢ ܩܹܐܪܣܵܐ ܩܲܫܝܵܐ ܀ 49 :ܠܩܹܐܪܣܵܐ ܕܥܲܡܡܹ̈ܐ ܥܲܬܸܿܕܼ ܢܲܦܫܹܗ ܦܵܠܚܵܐ ܚܝܼܨܵܐ 50 ܘܪܲܟܸܿܒܼ ܥܸܠܠܹ̈ܐ ܕܐܲܝܟܲܢ ܢܲܩܪܸܒܼ ܚܠܵܦ ܟܹܐܢܘܼܬܼܵܐ ܀ 51 :ܚܠܵܦ ܟܹܐܢܘܼܬܼܵܐ ܣܵܡ̣ ܠܹܗ ܢܝܼܫܵܐ ܠܡܸܬܼܟܲܬܵܫܘܼ 52 ܘܲܚ̣ܢܵܐ ܣܲܓܿܝܼ ܒܟܼܠܗܘܿܢ ܙܵܘܥܵܘ̈ܗܝ ܠܘܼܩܒܲܠ ܥܵܘ̣ܠܵܐ ܀ 53 :ܓܲܢ̄ܒܵܪܵܐܝܼܬܼ ܝܲܗ̣̄ܒܼ ܗ̄ܘ̣ܵܐ ܢܲܦܫܹܗ ܠܘܵܬܼ ܬܲܟܼܬܿܘܼܫܵܐ 54 ܕܲܒܼܟܼܠ ܦܘܼܪ̈ܣܝܼܢ ܨܒܼܵܐ ܕܲܢܪܲܡܪܸܡ ܫܸܡ ܟܹܐܢܘܼܬܼܵܐ ܀ 55 :ܦܘܼܪ̈ܣܹܐ ܨܢܝܼܥܹ̈ܐ ܪܲܟܸܿܒܼ ܠܸܒܹܿܗ ܚܲܟܿܝܼܡܵܐܝܼܬܼ 56 ܘܒܸܐܣܟܹܿܝܡ ܚܘܼܒܵܐ ܦܲܪܣܝܼ ܘܲܓܼܠܵܗ̇ ܠܕܲܓܵܠܘܼܬܼܵܐ ܀ 57 :ܐ̄ܣܟܹܿܡܵܐ ܕܚܘܼܒܵܐ ܠܒܸ݂ܫ ܚܲܟܿܝܼܡܵܐ ܨܢܝܼܥ ܠܲܩܪܵܒܼܵܐ 58 ܘܐܲܝܟ ܓܵܫܘܿܫܵܐ ܥܲܠ̣ ܨܹܝܕܼ ܥܘܼܪ̈ܠܹܐ ܘܓܲܫ̣ ܡܸܠܲܝ̈ܗܘܿܢ ܀ 59 :ܐܲܢ̄ܬܿܬܼܵܐ ܡܟܲܪ ܠܹܗ ܡ̣ܢ ܣܵܩܘܿܪܹ̈ܐ ܕܫܸܡ ܐܲܠܵܗܹܗ 60 ܕܲܒܼܚܲܕܼ ܐܲܢ̄ܬܿܬܼܵܐ ܡܢܲܟܸܿܟ ܛܘܼܥܝܲܝ ܕܫܸܡ ܐܲܠܵܗܹ̈ܐ ܀ pb. 305 61 :ܪܸܡܙܵܐ ܟܲܣܝܵܐ ܚܲܝܸܠ ܙܵܘܥܵܘ̈ܗܝ ܠܡܸܬܼܚܲܟܵܡܘܼ 62 ܘܐܸܡ݂ܲܪ ܠܐܲܒܼܘܼܗܝ ܕܣܲܒܼ ܠܝܼ ܐܲܢ̄ܬܿܬܼܵܐ ܡ̣ܢ ܒܢ̈ܬܼ ܥܘܼܪ̈ܠܹܐ ܀ 63 :ܠܵܐ ܠܲܡ ܝܼܕܲܥܘ ܐܲܒܼܘܼܗܝ ܘܐܸܡܹܗ ܕܡ̣ܢ ܐܲܠܵܗܵܐ ܗ̄ܝܼ 64 ܕܢܸܬܼܒܲܥ ܥܝܵܪܬܵܐ ܕܲܒܼܢܲܝ̈ ܥܲܡܹܗ ܡ̣ܢ ܦܠܸܫܬܵܝܹ̈ܐ ܀ 65 :ܥܝܵܪܬܵܐ ܕܥܲܡܹܗ ܬܒܲܥ̣ ܡ̣ܢ ܥܲܡܡܹ̈ܐ ܒܝܲܕܼ ܒܲܪ̄ܬܼ ܥܲܡܡܹ̈ܐ 66 ܘܐܘܼܡ̇ܢܵܐܝܼܬܼ ܚܢ̣ܵܐ ܨܸܒܼܝܵܢܹܗ ܠܢܝܼܫܵܐ ܕܡ̇ܪܹܗ ܀ 67 :ܚ̣ܙܲܩ ܡ̣ܢ ܥܲܡܹܗ ܕܢܹܐܠܲܙ ܘܢܸܡܟܿܘܿܪ ܠܒܲܪ̄ܬܼ ܢܘܼܟܼܪ̈ܵܝܹܐ 68 ܘܣܵܡ̣ ܠܹܗ ܡ̇ܪܹܗ ܢܝܼܫܵܐ ܒܐܘܼܪܚܵܐ ܕܢܸܒܼܩܸܐ ܚܲܝܠܹܗ ܀ 69 :ܓܘܼܪܝܵܐ ܕܐܲܪܝܵܐ ܦܓܲܥ̣ ܒܹܗ ܒܐܘܼܪܚܵܐ ܒܐܲܪܝܵܐ ܡܠܝܼܠܵܐ 70 ܘܲܦܫ݂ܲܚ ܘܲܫܕܵܝܗܝ ܐܲܝܟ ܕܲܠܓܲܕܼܝܵܐ ܠܓܼܘܼܫܡܵܐ ܩܲܫܝܵܐ ܀ 71 :ܒܚܲܝܠܵܐ ܕܐܲܪܝܵܐ ܢܲܣܝܹܗ ܠܚܲܝܠܹܗ ܕܓܼܢ̄ܒܵܪ ܚܲܝܠܵܐ ܗ̄ܘ̣ 72 ܘܝܼܕܲܥ ܕܲܡܨܸܐ ܠܡܹܐܪܲܥ ܩܹܐܪܣܵܐ ܕܥܲܡܡܹ̈ܐ ܥܘܼܪ̈ܠܹܐ ܀ 73 :ܕܠܵܐ ܣܲܦܣܹܪܵܐ ܘܲܕܼܠܵܐ ܚܘܼܛܪܵܐ ܩܲܛܠܹܗ ܠܐܲܪܝܵܐ 74 ܘܝܼܕܲܥ ܕܠܵܐ ܣܢܝܼܩ ܥܲܠ ܥܘܕܼܪܵܢܵܐ ܕܡ̇ܐܢܲܝ̈ ܙܲܝܢܵܐ ܀ 75 :ܥܲܠ̣ ܠܒܹܝܬܼ ܥܘܼܪ̈ܠܹܐ ܘܲܡ̣ܟܲܪ ܐܲܢ̄ܬܿܬܼܵܐ ܘܝܲܗ̣̄ܒܼ ܪܲܗܒܼܘܿܢܵܐ 76 ܘܲܦܢ̣ܵܐ ܠܥܲܡܹܗ ܟܲܕܼ ܡܸܬܼܚܲܫܲܒܼ ܕܢܸܓܼܡܘܿܪ ܡܸܠܵܘ̈ܗܝ ܀ 77 :ܪܸܢܝܵܐ ܕܐܲܢ̄ܬܿܬܼܵܐ ܫܵܚܹ̇ܩ ܗ̄ܘ̣ܵܐ ܠܹܗ ܠܵܐ ܗ̄ܘ̣ܵܐ ܕܐܲܢ̄ܬܿܬܼܵܐ 78 ܐܸܠܵܐ ܕܢܸܣܥܘܿܪ ܒܲܦܠܸܫܬܵܝܹ̈ܐ ܪܼܓܲܬܼ ܢܲܦܫܹܗ ܀ 79 :ܪܗܝܼܒܼ ܗ̄ܘ̣ܵܐ ܣܲܓܿܝܼ ܠܲܡܫܲܡܠܵܝܘܼ ܦܘܼܩܕܵܢ ܡ̇ܪܹܗ 80 ܘܡܸܬܼܝܲܐܲܒܼ ܗ̄ܘܑ̣ܵܐ ܕܢܸܬܼܒܲܥ ܥܝܵܪܬܵܐ ܕܲܒܼܢܲܝ̈ ܥܲܡܹܗ ܀ 81 :ܩܲܠܝܼܠܵܐܝܼܬܼ ܦܥ̣ܵܐ ܩܲܠܝܼܠܵܐ ܠܡܸܣܲܒܼ ܐܲܢ̄ܬܿܬܼܵܐ 82 ܘܛܲܝܸܒܼ ܕܵܫܢܹ̈ܐ ܕܲܟܼܣܸܐ ܗ̄ܘ̣ܵܐ ܒܗܘܿܢ ܚܸܣܕܵܐ ܘܨܲܥܪܵܐ ܀ 83 :ܚ̣ܙܲܩ ܓܼܢ̄ܒܵܪܵܐ ܒܐܘܼܪܚܵܐ ܕܬܸܡܢܲܬܼ ܠܡܸܣܥܲܪ ܐܘܼܪܚܹܗ 84 ܘܲܣܛ̣ܵܐ ܠܡܸܚܙܵܐ ܫܠܲܕܵܐ ܕܐܲܪܝܵܐ ܐܸܢ ܩܲܝܵܡܵܐ ܀ 85 :ܚ̣ܙܵܐ ܕܲܡܚܲܒܲܠ ܘܲܫܕܸܐ ܒܐܲܪܥܵܐ ܡܚܲܒܸܿܠ ܐ̄ܢܵܫܵܐ 86 ܘܒܲܫܪ̈ܲܕܿܘܼܕܼܵܘܗܝ ܡܲܩܸܢ ܥܵܘܦܵܐ ܕܕܸܒܿܘܿܪ̈ܝܼܬܼܵܐ ܀ 87 :ܚܙ̣ܵܐ ܕܡܲܗܸܠ ܒܵܗ̇ ܥܵܘܦܵܐ ܫܝܼܛܵܐ ܒܗܵܝ̇ ܩܲܫܝܼܘܼܬܼܵܐ 88 ܘܗܲܝܡܸܢ ܘܐܲܫܲܪ ܕܗܵܟܲܢ ܡܗܸܠ ܒܲܦܠܸܫܬܵܝܹ̈ܐ ܀ 89 :ܚܙ̣ܵܐ ܕܡ̣ܢ ܓܘܼܫܡܵܐ ܡܠܸܐ ܢܸܟܼܝܵܢܹ̈ܐ ܪܵܕܹܐ ܕܸܒܼܫܵܐ 90 ܘܲܩܢ̣ܵܐ ܣܲܒܼܪܵܐ ܕܢܲܚܸܐ ܥܲܡܹܗ ܡ̣ܢ ܐܘܼܠܨܵܢܵܐ ܀ 91 :ܐܵܘܫܸܛ ܐܝܼܕܹܗ ܢܙܝܼܪ ܒܲܓܼܒܼܝܼܬܼܵܐ ܠܓܼܘܼܫܡܵܐ ܛܲܡܠܵܐ 92 ܘܲܢܲܣܲܒܼ ܐܘܼܟܼܠܵܐ ܡܠܸܐ ܚܲܝܘܼܬܼܵܐ ܡ̣ܢ ܡܲܪܝܼܪܵܐ ܀ 93 :ܐܘܼܟܼܠܵܐ ܛܲܡܠܵܐ ܐܸܟܲܠ̣ ܕܲܟܼܝܵܐ ܘܠܵܐ ܐܸܬܿܛܲܡܲܐ 94 ܘܐܵܘܟܸܿܠ ܡܸܢܹܗ ܐܵܦ ܠܐܲܒܼܵܗܵܘ̈ܗܝ ܘܠܵܐ ܓܠ̣ܵܐ ܥܸܠܬܹܗ ܀ 95 :ܚܲܟܿܝܼܡܵܐܝܼܬܼ ܟܲܣܝܹܗ ܠܐ̄ܪܵܙܵܐ ܕܪܲܒܿܘܼܬܼ ܚܲܝܠܹܗ 96 ܕܠܵܐ ܢܼܬܿܬܿܫܝܼܛ ܠܹܗ ܡ̇ܐ ܕܡܸܬܿܬܲܢܸܐ ܒܦܘܼܡ ܣܲܓܿܝܼ̈ܠܹܐ ܀ pb. 306 97 :ܥܒ݂ܲܕܼ ܡܸܫܬܿܘܼܬܼܵܐ ܘܙܲܡܸܢ ܘܲܩܪ̣ܵܐ ܠܥܘܼܪ̈ܠܹܐ ܕܲܦܠܸܫܬܿ 98 ܘܲܒܼܫܵܪܘܼܬܼܗܘܿܢ ܪܲܟܸܿܒܼ ܡܲܬܼܠܵܐ ܕܩܸܛܠܹܗ ܕܐܲܪܝܵܐ ܀ 99 :ܪܵܢܹ̇ܐ ܗ̄ܘ̣ܵܐ ܓܼܝܼܪ ܕܲܒܼܝܲܕܼ ܩܸܛܠܹܗ ܠܗܘܿܢ ܩܵܛܹ̇ܠ ܗ̄ܘ̣ܵܐ 100 ܥܲܠ ܗܵܝ̇ ܪܲܟܸܿܒܼ ܡܲܬܼܠܵܐ ܕܐܲܪܝܵܐ ܘܐܘܼܟܼܠܵܐ ܕܡܸܢܹܗ ܀ 101 :ܡܲܬܼܠܵܐ ܐܲܡܬܸܿܠ ܡܠܸܐ ܒܘܼܝܵܢܵܐ ܩܕܼܵܡ ܗܸܕܼܝܘܿܛܹ̈ܐ 102 ܘܠܵܐ ܣܦ݂ܲܩܘ ܐܸܡ݂ܲܪܘ ܚܹܝܠ ܣܘܼܟܵܠܵܐ ܕܲܟܼܣܸܐ ܗ̄ܘ̣ܵܐ ܒܹܗ ܀ 103 :ܡ̣ܢ ܐܵܟܼܠܵܐ ܠܲܡ ܐܸܡ݂ܲܪ ܫܸܡܫܘܿܢ ܕܲܢܦ݂ܲܩ ܐܘܼܡܼܠܵܐ 104 ܘܡ̣ܢ ܡܲܪܝܼܪܵܐ ܪܕܲܬ̤ ܚܲܠܝܘܼܬܼܵܐ ܕܠܵܐ ܒܲܥܝܵܕܼܵܐ ܀ 105 :ܬܡܲܗܘ ܘܐܸܬܿܕܲܡܲܪܘ ܥܘܼܪ̈ܠܲܝ ܠܸܒܵܐ ܒܒܲܪ ܥܸܒܼܪ̈ܵܝܹܐ 106 ܕܲܟܼܡܵܐ ܚܲܟܿܝܼܡ ܘܲܟܼܡܵܐ ܟܲܣܝܵܐ ܒܥܵܬܼܵܐ ܕܡܸܠܵܘ̈ܗܝ ܀ 107 :ܒܬܲܗܪܵܐ ܪܲܒܵܐ ܐܲܩܝܼܡ ܐܸܢܘܿܢ ܒܪܘܼܟܵܒܼ ܡܸܠܵܘ̈ܗܝ 108 ܘܐܲܝܟ ܕܲܒܼܙܲܝܢܵܐ ܐܸܣܲܪ̣ ܐܸܢܘܿܢ ܒܠܵܐ ܝܼܕܲܥܬܼܵܐ ܀ 109 :ܠܐܲܢ̄ܬܿܬܹܗ ܫܲܓܸܿܫܘ ܕܬܹܐܠܲܦ ܡܸܢܹܗ ܘܬܲܠܸܦ ܐܸܢܘܿܢ 110 ܘܟܲܕܼ ܛܵܒܼ ܝܸܠܦܲܬ̤ ܘܐܲܠܦܲܬ̤ ܐܸܢܘܿܢ ܠܵܐ ܣܦܲܩ̣ܘ ܚܲܣܢ̣ܢܘܼܗܝ ܀ 111 :ܫܚܲܩܬܹܗ ܡܟܼܝܼܪܬܹܿܗ ܕܲܢܒܲܕܸܿܩ ܠܵܗ̇ ܐ̄ܪܵܙ ܦܸܠܐܬܹܗ 112 ܘܚܵܒܼ݂ ܨܸܒܼܝܵܢܹܗ ܡ̣ܢ ܫܘܼܓܵܫܹܝ̈ܗ̇ ܕܒܲܪ̄ܬܼ ܛܵܥܲܝܵ̈ܐ ܀ 113 :ܠܒܲܪ ܡ̣ܢ ܛܲܟܼܣܵܐ ܫܓܲܫܬܹܗ ܒܡܸܠܹ̈ܝܗ̇ ܡܥܝܼܩܵܢ̈ܝܵܬܼܵܐ 114 ܘܲܓܼܠ̣ܵܐ ܘܚܵܘܝܵܗ̇ ܐ̄ܪܵܙܵܐ ܕܲܟܼܣܸܐ ܡ̣ܢ ܐܲܒܼܵܗܵܘ̈ܗܝ ܀ 115 :ܡ̣ܢ ܟܲܪܝܘܼܬܼܵܐ ܓܠ̣ܵܐ ܘܒܲܕܹܿܩ ܠܵܗ̇ ܟܲܣܝܘܼܬܼ ܠܸܒܹܿܗ 116 ܗܘ̤ܝ ܒܲܕܸܿܩܬܹܗ ܠܲܒܼܢܲܝ̈ ܥܲܡܗ̇ ܢܲܟܿܘܼܠܬܼܵܢܹ̈ܐ ܀ 117 :ܒܝܵܘܡ̇ܐ ܕܫܲܒܼܥܵܐ ܙܟܼܵܘ ܚܲܝܵܒܹ̈ܐ ܠܓܲܢ̄ܒܵܪ ܚܲܝܠܵܐ 118 ܘܲܩܕܼܵܡ ܐܘܼܟܼܠܵܐ ܓܠ̣ܵܐ ܥܲܠ ܐܘܼܟܼܠܵܐ ܕܲܟܼܣܸܐ ܒܡܲܬܼܠܹܗ ܀ 119 :ܡ̇ܢܵܐ ܠܲܡ ܐܝܼܬܼ ܕܲܚܠܸܐ ܛܲܥܡܹܗ ܛܵܒܼ ܡ̣ܢ ܕܼܒܼܫܵܐ 120 ܐܵܘ ܡ̇ܢܵܐ ܐܝܼܬܼ ܕܡܲܪܝܼܪ ܘܲܩܫܸܐ ܡ̣ܢ ܦܘܼܡ ܐܲܪܝܵܐ ܀ 121 :ܚܙ̣ܵܐ ܚܲܟܿܝܼܡܵܐ ܕܚܲܣܢܘܼܗܝ ܟܲܟܼܠܹ̈ܐ ܒܐܝܼܕܼܵܐ ܕܐܲܢ̄ܬܿܬܼܵܐ 122 ܘܛܲܢ ܘܐܸܬܼܥܲܙܲܙ ܘܙܲܝܸܢ ܢܲܦܫܹܗ ܠܩܹܐܪܣܵܐ ܕܥܲܡܗܘܿܢ ܀ 123 :ܬܠܵܬܼܝܼܢ ܓܼܒܼܪ̈ܝܼܢ ܩ̣ܛܲܠ ܒܲܥܝܵܪܬܵܐ ܕܦܘܼܫܵܩ ܡܲܬܼܠܹܗ 124 ܘܲܢ̣ܣܲܒܼ ܡ̇ܐܢܗܘܿܢ ܘܐܲܦܝܼܣ ܐܸܢܘܿܢ ܐܲܝܟ ܕܲܠܣܲܟܼܠܹ̈ܐ ܀ 125 :ܐܘܼܪܚܵܐ ܕܪܲܫ ܠܹܗ ܒܐܲܢ̄ܬܿܬܼܵܐ ܘܡܲܬܼܠܹܗ ܠܘܵܬܼ ܬܲܟܼܬܿܘܼܫܵܐ 126 ܕܢܸܪܕܹܿܐ ܫܲܦܝܼܪ ܠܘܵܬܼ ܙܵܟܼܘܼܬܼܵܐ ܕܡܸܠܲܬܼ ܡ̇ܪܹܗ ܀ 127 :ܒܐܲܢ̄ܬܿܬܼܵܐ ܘܡܲܬܼܠܵܐ ܓܼܪܸܓܼ ܐܸܢܘܿܢ ܠܘܵܬܼ ܬܲܟܼܬܘܼܫܵܐ 128 ܘܲܒܼܟܼܠ ܥܸܠ̈ܠܵܢ ܚܵܘܝܼ ܚܲܝܠܵܐ ܕܲܟܼܣܸܐ ܒܢܲܦܸܫܹܗ ܀ 129 :ܒܝܲܕܼ ܥܸܠ̈ܠܵܬܼܵܐ ܓܲܪܸܓܼ ܥܲܡܗܘܿܢ ܩܹܐܪܣܵܐ ܩܲܫܝܵܐ 130 ܘܐܲܠܸܦ ܐܸܢܘܿܢ ܕܠܵܘ ܫܝܼܥܵܐܝܼܬܼ ܡܲܩܪܸܒܼ ܥܲܡܗܘܿܢ ܀ 131 ܬܠܵܬܼܡܠܵܐ ܬܲܥܠܝܼ̈ܢ ܨܵܪ ܨܲܝܵܕܼܵܐ ܕܕܸܚܠܲܬܼ ܩܘܼܫܬܵܐ: pb. 307 132 ܘܲܒܼܫܲܬܿܝܼܩܹ̈ܐ ܥܒ݂ܲܕܼ ܬܲܟܼܬܿܘܼܫܵܐ ܥܲܡ ܡܲܠܵܠܹ̈ܐ ܀ 133 :ܒܬܲܥܠܹ̈ܐ ܫܝܼܛܹ̈ܐ ܫܲܦܸܠ ܐܸܢܘܿܢ ܠܡܲܠ̈ܝܲܝ ܚܘܼܬܼܪܵܐ 134 ܘܠܵܐ ܐܸܫܟܲܚܘ ܩܵܡ̣ܘ ܩܕܼܵܡ ܨܸܒܼܝܵܢܵܐ ܕܡܲܩܪܸܒܼ ܗ̄ܘ̣ܵܐ ܒܹܗ ܀ 135 :ܛܢܵܢܵܐ ܕܪܘܼܓܼܙܵܐ ܠܒܸ݂ܫܘ ܚܵܪ̈ܝܵܢܹܐ ܥܲܠ ܚܘܼܒܵܠܗܘܿܢ 136 ܘܫܲܪܝܼܘ ܬܵܒܼܥ̇ܝܼܢ ܬܒܲܥܬܼܵܐ ܕܨܲܥܪܵܐ ܕܨܲܥܲܪ ܐܸܢܘܿܢ ܀ 137 :ܩܪܵܒܼܵܐ ܥܲܬܼܕܼܘ ܠܡܸܬܼܟܲܬܵܫܘܼ ܥܲܡ ܝܼܣܪܵܝܼܠ 138 ܕܕܼܵܡ ܒܲܩܪܵܒܼܵܐ ܢܨܘܼܕܼܘܼܢ ܫܸܡܫܘܿܢ ܕܫܲܦܸܠ ܐܸܢܘܿܢ ܀ 139 :ܥܝܵܪܬܵܐ ܕܕܸܡܗܘܿܢ ܣܒ݂ܲܪܘ ܕܡܸܬܼܢܲܩܹܝܢ ܡ̣ܢ ܒܲܪ ܐܲܒܼܪܵܡ 140 ܘܠܵܐ ܝܵܕܼܥ̇ܝܼܢ ܗ̄ܘ̣ܵܘ ܕܦܲܚܵܐ ܕܲܛܡ݂ܲܪܘ ܒܹܗ ܡܸܬܿܬܿܨܝܼܕܼܝܼܢ ܀ 141 :ܚܘܼܬܼܪܵܐ ܣܲܟܼܠܵܐ ܓܲܪܸܓܼ ܐܸܢܘܿܢ ܠܥܲܛܠܲܝ̈ ܠܸܒܵܐ 142 ܘܥܲܬܸܿܕܼܘ ܙܲܝܢܵܐ ܠܡܸܬܼܟܲܬܵܫܘܼ ܥܲܡ ܝܼܣܪܵܝܹܠ ܀ 143 :ܬܲܥܠܹ̈ܐ ܢܟܼܝܼܠܹ̈ܐ ܕܫܲܥܒܸܿܕܼܘ ܐܸܢܘܿܢ ܬܲܥܠܹ̈ܐ ܫܝܼܛܹ̈ܐ 144 ܫܲܪܝܼܘ ܡܲܗܠܹܝܢ ܥܲܠ ܡܲܠܟܿܘܼܬܼܵܐ ܡܬܼܝܼܠܲܬܼ ܒܐܲܪܝܵܐ ܀ 145 :ܒܩܵܠܵܐ ܓܼܠܝܵܐ ܩܥ̣ܵܘ ܣܸܕܼܪ݁ܲܝܗܘܿܢ ܕܲܦܠܸܫܬܵܝܹ̈ܐ 146 ܕܐܵܘ ܦܘܿܩܘ ܐܲܩܪܸܒܼܘ ܐܵܘ ܐܲܫܠܸܡܘ ܠܲܢ ܠܫܡܫܘܿܢ ܪܲܒܵܐ ܀ 147 :ܥܲܡܵܐ ܪܲܦܝܵܐ ܫܡ݂ܲܥ ܩܵܠ ܒܵܩܹ̈ܐ ܕܙܵܡ̈ܝܵܢ ܒܐܸܕܼܢܵܘ̈ܗܝ 148 ܘܲܕܼܚܸܠܘ ܘܐܲܫܦܸܠܘ ܘܐܲܪܟܸܿܢܘ ܟܲܬܼܦܵܐ ܠܡܸܫܬܲܥܒܵܕܼܘ ܀ 149 :ܫܒܲܩ̣ܘ ܬܘܼܟܼܠܵܢܵܐ ܕܫܸܡ ܒܵܪܘܿܝܵܐ ܕܪܲܡܪܸܡ ܐܸܢܘܿܢ 150 ܘܝܲܗ̣̄ܒܼܘ ܪܸܓܿܬܼܗܘܿܢ ܕܲܢܒܲܙܚܘܼܢ ܒܵܗ̇ ܛܲܡ̈ܐܲܝ ܢܲܦܫܵܐ ܀ 151 :ܫ̣ܒܲܩܘ ܕܲܢܦܝܼܣܘܼܢ ܦܝܵܣܵܐ ܕܲܦܠܸܐ ܠܚܲܝܠܵܐ ܕܲܒܼܗܘܿܢ 152 ܘܦܲܢܝܼܘ ܡܸܠܬܼܵܐ ܕܡܲܠܝܵܐ ܚܸܣܕܵܐ ܕܲܡܚܲܣܕܵܢܹ̈ܐ ܀ 153 :ܝܼܗ̣̄ܒܼܘ ܝܼܡܲܝܼܢܵܐ ܠܡܸܬܲܠ ܟܹܐܢܵܐ ܒܐܝܼܕܼܵܐ ܕܥܘܼܪ̈ܠܹܐ 154 ܘܠܵܐ ܒܗܸܬܼܘ ܣܲܟܼܠܹ̈ܐ ܕܠܦܵܪܘܿܩܗܘܿܢ ܢܚܲܝܒܼܘܼܢ ܡܲܓܵܢ ܀ 155 :ܠܵܐ ܠܲܡ ܝܵܕܼܥܲܬܿ ܠܫܵܡܫܘܿܢ ܐܸܡ݂ܲܪܘ ܦܠܝܼܓܲܝ̈ ܠܸܒܵܐ 156 ܕܲܦܠܸܫܬܵܝܹ̈ܐ ܫܲܠܝܼܛܝܼܢ ܒܲܢ ܒܗܵܝܵܐ ܙܲܒܼܢܵܐ ܀ 157 :ܠܡܵܢ ܐܲܪܡܝܼܬܿ ܠܲܢ ܗܵܕܹܐ ܒܝܼܫܵܐ ܥܲܡ ܣܵܩܘܿܪ̈ܲܝܢ 158 ܘܗܵܐ ܡܸܬܦܲܪܣܝܼܢ ܕܲܢܓܲܡܪܘܼܢܵܢ ܒܲܩܪ̈ܵܒܲܝܗܘܿܢ ܀ 159 :ܬܵܐ ܚܘܿܬܼ ܐܲܦܝܼܣ ܠܲܦܠܸܫܬܵܝܹ̈ܐ ܕܐܲܪܓܸܿܙܬܿ ܐܸܢܘܿܢ 160 ܘܫܲܠܵܐ ܡܸܢܲܢ ܩܪܵܒܼܵܐ ܕܐܲܥܝܼܪܬܿ ܥܲܠ ܫܲܪ݁ܒܼܵܬܲܢ ܀ 161 :ܝ̄ܡܵܘ ܠܝܼ ܒܡܵܪܝܵܐ ܐܸܡ݂ܲܪ ܟܹܐܢܵܐ ܠܲܒܼܢܲܝ̈ ܥܲܡܹܗ 162 ܕܠܵܐ ܬܲܟܿܘܿܢܵܢܝ ܘܐܸܢܵܐ ܐܸܚܘܿܬܼ ܕܠܵܐ ܦܘܼܠܵܓܼܵܐ ܀ 163 :ܐܲܣܪ̣ܘܼܗܝ ܣܲܟܼܠܹ̈ܐ ܐܲܝܟ ܕܲܠܒܼܝܼܫܵܐ ܠܪܹܫܵܐ ܕܥܲܡܗܘܿܢ 164 ܘܝܲܗ̣̄ܒܿܘܼܗܝ ܒܐܝܼܕܵܐ ܕܥܘܼܪ̈ܠܲܝ ܠܸܒܵܐ ܕܲܢܒܲܙܚܘܼܢ ܒܹܗ ܀ 165 :ܢܚܸܬܼ ܓܲܢ̄ܒܵܪܵܐ ܘܩܵܡ̣ ܒܹܝܬܼ ܣܸܟܪܹ̈ܐ ܕܲܩܪ̈ܲܒܼܬܼܵܢܹܐ 166 ܘܠܵܐ ܕܚܸܠ̣ ܘܐܲܫܦܸܠ ܟܲܕܼ ܛܵܒܼ ܣܝܼܡ ܗ̄ܘ̣ܵܐ ܡ̇ܘܬܹܿܗ ܩܕܼܵܡ̇ܘܗܝ ܀ pb. 308 167 :ܒܲܠܒܼܝܼܒܼܘܼܬܼܵܐ ܢܚܸܬܼ ܟܲܕܼ ܐܲܣܝܼܪ ܠܘܵܬܼ ܩܵܛܘܿܠܵܘ̈ܗܝ 168 ܘܠܵܐ ܐܸܬܼܦܲܠܲܓܼ ܥܲܠ ܥܘܼܕܼܪܵܢܵܐ ܕܲܠܘܸܐ ܗ̄ܘ̣ܵܐ ܠܹܗ ܀ 169 :ܬܲܗܪܵܐ ܪܲܒܵܐ ܡܠܸܐ ܚܘܼܡܣܵܢܹܗ ܕܲܒܼܪܹܗ ܕܲܡܢܘܿܚ 170 ܘܠܵܐ ܐܸܬܼܪܲܦܝܼ ܩܕܼܵܡ ܩܵܛܘܠܹ̈ܐ ܕܲܠܚܝܼܡܝܼܢ ܠܹܗ ܀ 171 :ܗܲܝܡܵܢܘܼܬܼܵܐ ܠܒܸ݂ܫ ܗ̄ܘ̣ܵܐ ܠܸܒܹܿܗ ܒܲܕܼܡܘܼܬܼ ܙܲܝܢܵܐ 172 ܘܲܡܚܲܙܲܩ ܗ̄ܘ̣ܵܐ ܒܣܲܒܼܪܵܐ ܛܵܒܼܵܐ ܒܫܘܼܘܕܵܝ ܡ̇ܪܹܗ ܀ 173 :ܥܲܠ ܗܵܘ̇ ܚܲܝܠܵܐ ܕܝܲܗ̣̄ܒܼ ܒܹܗ ܚܲܝܠܵܐ ܣܝܼܡ ܗ̄ܘ̣ܵܐ ܣܲܒܼܪܹܗ 174 ܡܸܛܠ ܗܵܕܹܐ ܢܚܸܬܼ ܟܲܕܼ ܐܲܣܝܼܪ ܠܘܵܬܼ ܩܵܛܘܼܠܵܘ̈ܗܝ ܀ 175 :ܒܚܹܝܠ ܗܵܝ̇ ܐܵܬܼܵܐ ܕܲܒܼܪܹܫ ܓܘܼܫܡܹܗ ܡܸܬܼܠܲܒܲܒܼ ܗ̄ܘ̣ܵܐ 176 ܘܛܵܒܼ ܡ̣ܢ ܙܲܝܢܵܐ ܚܬܼܝܼܪ ܗ̄ܘ̣ܵܐ ܒܣܲܥܪܵܐ ܕܲܢܙܝܼܪܘܼܬܹܗ ܀ 177 :ܚ̣ܙܵܐܘܼܗܝ ܥܘܼܪ̈ܠܹܐ ܕܐܲܣܝܼܪ ܦܲܓܼܪܹܗ ܐܲܝܟ ܪܸܓܼܬܼܗܘܿܢ 178 ܘܲܣܒ݂ܲܪܘ ܣܲܟܼܠܹ̈ܐ ܕܗܵܐ ܡ̣ܢ ܟܲܕܿܘܼ ܡ̇ܘܦܹܝܢ ܚܲܝܵܘ̈ܗܝ ܀ 179 :ܐܲܝܟ ܕܲܠܡܝܼܬܼܵܐ ܚܲܫܒ̣ܿܘܼܗܝ ܣܲܟܼܠܹ̈ܐ ܠܚܲܝ ܒܐܲܠܵܗܹܗ 180 ܘܠܵܐ ܝܵܕܼܥ̇ܝܼܢ ܗ̄ܘ̣ܵܘ ܕܗܸܢܘ̣ܿܢ ܚܵܛܝܼܢ ܒܹܪܵܐ ܕܲܚܦܲܪܘ ܀ 181 :ܒܫܵܥܬܼܵܐ ܕܲܣܒ݂ܲܪܘ ܕܗܵܐ ܕܡ̣ܢ ܟܲܕܿܘܼ ܡ̇ܘܦܹܝܢ ܚܲܝܵܘ̈ܗܝ 182 ܩܵܡ̣ ܡ̣ܢ ܫܸܠܝܵܐ ܘܛܲܠܸܩ ܐܸܢܘܿܢ ܡ̣ܢ ܚܲܝܘܼܬܼܵܐ ܀ 183 :ܗܸܢܘ̣ܿܢ ܐܲܪܝܼܡܘ ܣܲܝܦܵܐ ܠܛܝܼܫܵܐ ܠܥܸܠ ܡ̣ܢ ܪܹܫܹܗ 184 ܘܚܹܝܠ ܥܘܼܕܼܪܵܢܵܐ ܕܒܹܗ ܐܲܪܝܼܡܹܗ ܥܲܠ ܪܹ̈ܫܲܝܗܘܿܢ ܀ 185 :ܗܸܢܘ̣ܿܢ ܩܵܡ̣ܘ ܗ̄ܘ̣ܵܘ ܒܲܚܦܝܼܛܘܼܬܼܵܐ ܕܲܢܒܲܙܚܘܼܢ ܒܹܗ 186 ܘܲܫܡܵܐ ܕܚܝܼܠܵܐ ܚܵܘܝܼ ܚܲܝܠܹܗ ܘܐܲܒܼܗܸܬܼ ܐܸܢܘܿܢ ܀ 187 :ܚܲܝܠܵܐ ܕܪܘܼܚܵܐ ܐܲܙܝܼܥ ܢܲܦܫܹܗ ܕܓܼܢ̄ܒܵܪ ܚܲܝܠܵܐ 188 ܘܲܦܣ݂ܲܩ ܘܲܫܕܼܵܝܗܝ ܠܙܲܝܢܵܐ ܓܼܠܝܵܐ ܡ̣ܢ ܗܲܕܵܡ̇ܘ̈ܗܝ ܀ 189 :ܟܬܼܵܒܼܵܐ ܣܵܗܹ̇ܕܼ ܥܲܠ ܚܹܝܠ ܪܘܼܚܵܐ ܕܲܟܼܣܸܐ ܗ̄ܘ̣ܵܐ ܒܹܗ 190 ܕܒܲܕܼܡܘܼܬܼ ܚܘܼܛܹ̈ܐ ܗ̤ܘܲܝ̈ ܫܸܫ̈ܠܵܬܼܵܐ ܩܕܼܵܡ ܪܲܒܿܘܼܬܹܗ ܀ 191 :ܐܲܝܟ ܕܲܠܚܘܼܛܹ̈ܐ ܦܲܣܸܩ ܘܲܫܕܼܵܝܗܝ ܠܦܲܪܙܠܵܐ ܩܲܫܝܵܐ 192 ܘܩܵܡ̣ ܐܸܬܼܟܲܬܲܫ ܒܸܠܥܵܕܼ ܙܲܝܢܵܐ ܒܓܲܪܡ̇ܐ ܫܝܼܛܵܐ ܀ 193 :ܓܲܪܡ̇ܐ ܫܝܼܛܵܐ ܛܲܝܸܒܼ ܩܘܼܪܡ̇ܘܗܝ ܪܸܡܙܵܐ ܟܲܣܝܵܐ 194 ܘܐܲܝܟ ܕܲܒܼܣܲܝܦܵܐ ܚ̣ܪܲܒܼ ܒܹܗ ܣܸܕܼܪܹ̈ܐ ܕܲܩܪ̈ܲܒܼܬܼܵܢܹܐ ܀ 195 :ܓܼܪܡܵܐ ܛܲܡܠܵܐ ܐܸܚܲܕܼ ܒܐܝܼܕܹܗ ܩܲܕܿܝܼܫ ܢܲܦܫܵܐ 196 ܘܠܵܐ ܐܸܫܟܲܚܘ ܩܵܡ̣ܘ ܠܒܼܝܼ̈ܫܲܝ ܙܲܝܢܵܐ ܩܕܼܵܡ ܝܲܡܝܼܬܢܹܗ ܀ 197 :ܚܙܵܬܼܵܐ ܕܚܝܼܠܬܵܐ ܚܙ̣ܵܘ ܥܵܘܵܠܹ̈ܐ ܒܐܝܼܕܼܵܐ ܕܟܹܐܢܵܐ 198 ܘܲܥܪ݂ܲܩܘ ܘܲܛܫ̣ܵܘ ܡ̣ܢ ܩܲܫܝܼܘܼܬܼܵܠ ܕܡܸܕܹܿܡ ܕܲܚܙ̣ܵܘ ܀ 199 :ܓܲܪܡܵܐ ܠܒܼܝܼܟ ܗ̄ܘ̣ܵܐ ܒܲܪ ܥܸܒܼܪ̈ܵܝܹܐ ܐܲܝܟ ܣܲܦܣܹܪܵܐ 200 ܘܡܲܒܼܪܸܩ ܗ̄ܘ̣ܵܐ ܠܹܗ ܘܡܸܬܼܪܲܗܒܿܝܼܢ ܗ̄ܘ̣ܵܘ ܣܸܕܼܪܹ̈ܐ ܕܥܼܘܼܪ̈ܠܹܐ ܀ 201 ܕܚܝܼܠܵܐ ܗ̄ܘ̣ܵܐ ܛܵܒܼ ܚܙܵܬܼܵܐ ܕܓܲܪܡܵܐ ܠܵܐ ܗ̄ܘ̣ܵܐ ܕܓܲܪܡ̇ܐ: pb. 309 202 ܐܸܠܵܐ ܕܚܲܝܠܵܐ ܕܲܡܚܵܘܸܐ ܗ̄ܘ̣ܵܐ ܚܙܵܬܹܗ ܒܚܸܙܘܹܗ ܀ 203 :ܡ̇ܘܬܵܐ ܩܲܫܝܵܐ ܡܸܬܼܦܲܠܲܓܼ ܗ̄ܘ̣ܵܐ ܡ̣ܢ ܩܲܫܝܘܼܬܹܗ 204 ܘܚܲܪܝܼܦܵܐ ܗ̣̄ܘܵܬܼ ܡܚܘܿܬܼܵܐ ܕܡܸܢܹܗ ܛܵܒܼ ܡ̣ܢ ܣܲܝܦܵܐ ܀ 205 :ܡ̣ܢ ܩܲܫܝܘܼܬܹܗ ܡܸܬܼܒܲܠܗܹܝܢ ܗ̄ܘ̣ܵܘ ܩܲܫ̈ܝܲܝ ܠܸܒܵܐ 206 ܘܛܵܟ ܠܵܘ ܡܸܢܹܗ ܐܸܠܵܐ ܡ̣ܢ ܗܵܘ̇ ܕܐܲܚܝܼܕܼ ܗ̄ܘ̣ܵܐ ܠܹܗ ܀ 207 :ܕܚܝܼܠ ܗ̄ܘ̣ܵܐ ܣܲܓܿܝܼ ܓܲܪܡ̇ܐ ܘܐܝܼܕܼܵܐ ܕܐܲܚܝܼܕܼܵܐ ܠܹܗ 208 ܠܵܘ ܒܲܟܼܝܵܢܗܘܿܢ ܐܸܠܵܐ ܒܚܲܝܠܵܐ ܕܐܲܚܝܼܕܼ ܗ̄ܘ̣ܵܐ ܠܗܘܿܢ ܀ 209 :ܚܲܝܠܵܐ ܟܲܣܝܵܐ ܠܒܼܝܼܟ ܗ̄ܘ̣ܵܐ ܠܐܝܼܕܼܵܐ ܘܐܝܼܕܼܵܐ ܠܓܲܪܡ̇ܐ 210 ܘܚܵܪܹܒܼ ܗ̄ܘ̣ܵܐ ܠܗܘܿܢ ܠܡܲܠܝܲܝ̈ ܚܘܼܬܼܪܵܐ ܘܥܲܛܠܲܝ̈ ܠܸܒܵܐ ܀ 211 :ܚܲܪܝܼܦ ܗ̄ܘ̣ܵܐ ܛܵܒܼ ܡ̣ܢ ܣܲܦܣܹܪܵܐ ܕܲܬܼܪܹܝܢ ܦܘܼܡܹܝ̈ܗ̇ 212 ܘܡ̇ܐ ܕܚܵܪܹܒܼ ܗ̄ܘ̣ܵܐ ܬܘܼܒܼ ܚܵܪܹܦ ܗ̄ܘ̣ܵܐ ܠܡܸܚܕܲܒܼ ܦܲܓܼܪܹ̈ܐ ܀ 213 :ܚܘܼܪܦܹܗ ܒܲܠܚܘܿܕܼ ܡܸܬܿܩܲܪܲܒܼ ܗ̄ܘ̣ܵܐ ܠܓܼܘܼܫܡܹ̈ܐ ܥܘܼܪ݁ܠܹܐ 214 ܘܡܸܬܼܩܲܠܹܝܢ ܗ̄ܘ̣ܵܘ ܩܲܠܝܼܠܵܐܝܼܬܼ ܐܲܝܟ ܕܲܒܼܢܘܼܪܵܐ ܀ 215 :ܐܝܼܕܹܗ ܒܲܠܚܘܿܕܼ ܡܪܝܼܡ ܗ̄ܘ̣ܵܐ ܢܙܝܼܪܵܐ ܠܐܲܦܲܝ̈ ܣܸܕܼܪܹ̈ܐ 216 ܘܡܸܣܬܲܚܦܝܼܢ ܗ̄ܘ̣ܵܘ ܥܲܕܠܵܐ ܢܸܡܛܸܐ ܓܘܼܫܡܵܐ ܠܓܼܘܼܫܡܵܐ ܀ 217 :ܐܘܿ ܠܵܟ ܓܲܪܡ̇ܐ ܟܡܵܐ ܐܸܬܼܢܲܨܲܚܬܿ ܠܒܲܪ ܡ̣ܢ ܛܲܟܼܣܵܐ 218 ܠܵܐ ܠܵܟ ܐܸܡ̇ܪܹܬܼ ܐܸܠܵܐ ܠܐܝܼܕܼܵܐ ܕܐܲܚܝܼܕܼܵܐ ܠܵܟ ܀ 219 :ܐܘܿ ܠܹܟܼܝ ܐܝܼܕܼܵܐ ܟܡܵܐ ܐܸܬܼܚܲܝܲܠܬܿܝ ܕܠܵܐ ܡܘܼܫ̈ܚܵܬܼܵܐ 220 ܠܵܘ ܐܲܢ̄ܬܿܝ ܐܝܼܕܲܐ ܐܸܠܵܐ ܪܸܡܙܵܐ ܕܚܵܨ ܪܲܝܘܼܬܹܟܼܝ ܀ 221 :ܐܘܿ ܠܵܟ ܓܲܒܼܪܵܐ ܟܡܵ ܗܘ̤ܵܐ ܚܲܝܠܵܐ ܕܪܸ̈ܓܼܫܲܝ ܦܲܓܼܪܵܟ 222 ܠܵܐ ܗܘ̤ܵܐ ܕܦܲܓܼܪܵܟ ܐܸܠܵܐ ܕܚܲܝܠܵܐ ܕܚܲܝܸܠ ܙܵܘܥܲܝ̈ܟ ܀ 223 :ܐܘܿ ܠܵܟ ܫܸܡܫܘܿܢ ܫܡܵܐ ܕܲܟܼܣܸܐ ܒܹܥ ܫܸܡ ܐܲܠܵܗܹܗ 224 ܟܡܵܐ ܦܲܫܸܩܬܵܝܗܝ ܠܚܲܝܠܵܐ ܕܲܫܡܵܟ ܒܝܲܕܼ ܣܘܼܥܪ݁ܵܢܹܐ ܀ 225 :ܠܵܐ ܟܲܝ ܠܐܸܝܲܬ̤ ܐܝܼܕܼܵܟ ܓܼܒܼܪܵܐ ܐܲܚܝܼܕܼ ܓܲܪܡܵܐ 226 ܐܵܘ ܗܵܘ̇ ܓܲܪܡ̇ܐ ܠܵܐ ܟܲܝ ܐܵܘܦܝܼ ܒܗܵܘ̇ ܬܲܟܼܬܿܘܼܫܵܐ ܀ 227 :ܟܡܵܐ ܟܲܝ ܥܲܙܝܼ ܓܲܪܡܵܐ ܒܐܝܼܕܼܵܟ ܘܐܲܢ̄ܬܿ ܒܹܗ ܒܓܲܪܡ̇ܐ 228 ܘܠܵܘ ܗܘ̤ ܐܸܒܲܪ ܘܠܵܐ ܬܘܼܒܼ ܐܝܼܕܵܟ ܦܸܕܲܬ̤ ܡܸܢܹܗ ܀ 229 :ܐܲܝܟܲܢ ܟܲܝ ܩܵܡ̣ ܩܕܼܵܡ ܡܸܬܝܵܢܵܐ ܕܐܸܠܹܦ ܓܼܒܼܪ̈ܝܼܢ 230 ܘܒܲܐܝܢܵܐ ܚܲܝܠܵܐ ܡܲܟܸܿܟ ܚܲܝܠܵܐ ܕܩܲܢ̈ܝܲܝ ܥܘܼܫܢܵܐ ܀ 231 :ܐܵܠܹܦ ܓܼܒܼܪ݁ܝܼܢ ܩ̣ܛܲܠ ܒܵܟ ܓܼܒܼܪܵܐ ܓܲܪܡ̇ܐ ܫܝܼܛܵܐ 232 ܘܗܵܢܵܘ̇ ܬܲܗܪܵܐ ܕܠܵܐ ܠܐ̣ܝܼ ܓܲܒܼܪܵܐ ܘܠܵܐ ܐܲܢ̄ܬܿ ܐܸܒܲܕܲܬܿ ܀ 233 :ܬܲܗܪܵܐ ܪܲܒܵܐ ܡܠܸܐ ܣܘܼܥܪܵܢܵܐ ܕܐܸܫܬܿܡܲܫ ܒܵܟ 234 ܘܠܵܐ ܐ̄ܢܵܫ ܝܵ̇ܕܲܥ ܠܡܸܫܬܲܥܵܝܘܼ ܥܲܠ ܪܲܒܿܘܼܬܹܗ ܀ 235 :ܐܲܝܟ ܕܲܠܡܲܓܿܠܵܐ ܠܒܼܝܼܟ ܗ̄ܘ̣ܵܐ ܫܸܡܫܘܿܢ ܡܗܝܼܪ ܚܵܨܘܿܕܹ̈ܐ 236 ܘܚܲܨܕܹܿܗ ܠܚܲܩܠܵܐ ܕܲܦܠܸܫܬܵܝܹ̈ܐ ܒܲܚܕܼܵܐ ܫܵܥܵܐ ܀ pb. 310 237 :ܐܘܿ ܚܵܨܘܿܕܼܵܐ ܕܲܚܨܲܕ ܦܲܓܼܪܹ̈ܐ ܒܡܲܓܿܠܵܐ ܓܼܪܡ̇ܐ 238 ܘܠܵܐ ܩ̣ܗܵܐ ܦܲܪܙܠܹܗ ܒܐܵܠܹܗ ܟܲܦܝܼ̈ܢ ܡܲܠܵܠ̈ܬܼܵܐ ܀ 239 :ܐܸܠܹܦ ܟܲܦܝܼ̈ܢ ܫܕܼܵܐ ܩܲܠܝܼܠܵܐ ܒܲܚܕܼܵܐ ܓܗܵܢܬܵܐ 240 ܘܠܵܐ ܦܫ݂ܲܛ ܢܲܦܫܹܗ ܥܕܲܡ̇ܐ ܕܫܲܠܸܡ ܡܸܢܝܵܢ ܐܲܠܦܵܐ ܀ 241 :ܡ̣ܢ ܚܲܕܼ ܫܲܪܝܼ ܘܲܒܼܚܲܕܼ ܫܲܠܸܡ ܩܹܐܪܣܵܐ ܕܲܥܒ݂ܲܕ 242 ܘܠܵܐ ܐܸܬܼܢܲܟܼܝܲܬ̤ ܐܵܦܠܵܐ ܡܸܢܬܼܵܐ ܡ̣ܢ ܗܲܕܵܡ̇ܘ̈ܗܝ ܀ 243 :ܕܠܵܐ ܢܸܟܼܝܵܢܵܐ ܩܵܘܝܼ ܟܠܹܗ ܒܦܲܓܼܪܹܗ ܘܢܲܦܫܹܗ 244 ܘܠܵܐ ܙܵܥ ܚܲܝܠܹܗ ܘܠܵܐ ܐܸܬܼܪܲܦܝܼ ܡ̣̤ ܬܘܼܟܼܠܵܢܹܗ ܀ 245 :ܐܲܝܟ ܐܲܬܼܠܹܝܛܵܐ ܣܠܸ̣ܩ ܐܲܬܼܠܹܝܛܵܐ ܡ̣ܢ ܬܲܟܼܬܿܘܼܫܵܐ 246 ܘܣܝܼܡ ܗ̄ܘ̣ܵܐ ܒܪܹܫܹܗ ܟܠܝܼܠ ܡܸܢܝܵܢܵܐ ܕܐܵܠܹܗ ܩܸܛܠܝܼ̈ܢ ܀ 247 :ܒܫܘܼܠܵܡ ܩܹܐܪܣܵܐ ܨܗܝܼ ܘܐܸܬܿܛܲܪܲܦ ܓܼܢ̄ܒܵܪ ܚܲܝܠܵܐ 248 ܘܫܲܪܝܼ ܫܵܐܹ̇ܠ ܫܸܩܝܵܐ ܕܙܲܒܼܢܵܐ ܠܩܘܼܝܵܡ ܚܲܝܵܘ̈ܗܝ ܀ 249 :ܐܘܿܢ ܠܲܡ ܡܵܪܝܵܐ ܐܲܢ̄ܬܿ ܢܲܨܲܚܬܵܢܝ ܒܚܹܝܠ ܥܘܼܕܼܪܵܢܵܟ 250 ܗܲܒܼ ܠܝܼ ܫܸܩܝܵܐ ܐܲܝܟ ܢܸܨܚܵܢܵܐ ܕܲܣܥ݂ܲܪܬܿ ܒܐܝܼܕܲܝ̈ ܀ 251 :ܐܲܢ̄ܬܿ ܙܲܟܿܝܼܬܵܢܝ ܩܒܹܐܪܣܵܐ ܩܲܫܝܵܐ ܕܨܲܗ̈ܝܲܝ ܠܲܕܼܡ̇ܐ 252 ܠܵܐ ܬܲܗܡܸܐ ܡܹܢܝ ܘܢܹܐܒܲܕܼ ܢܸܨܚܵܢܝ ܒܐܝܼܕܵܝ̈ ܥܘܼܪ̈ܠܹܐ ܀ 253 :ܗܲܒܼ ܠܝܼ ܫܸܩܝܵܐ ܐܲܝܟ ܡ̇ܐ ܕܝܲܗ̣̄ܒܼܬܿ ܠܝܼ ܐܵܦ ܙܵܟܼܘܼܬܼܵܐ 254 ܕܲܠܡܵܐ ܐܹܡܘܼܬܼ ܘܢܲܗܠܘܼܢ ܣܲܟܼܠܹ̈ܐ ܒܲܫܡܵܟ ܪܲܒܵܐ ܀ 255 :ܫܡ݂ܲܥ ܒܵܥܘܼܬܹܗ ܡ̇ܪܵܐ ܛܵܒܼܵܐ ܕܥܲܒܼܕܵܐ ܟܹܐܢܵܐ 256 ܘܝܲܗ̣̄ܒܼ ܠܹܗ ܫܸܩܝܵܐ ܡ̣ܢ ܓܵܘ ܓܲܪܡ̇ܐ ܕܐܸܬܼܢܲܨܲܚ ܒܹܗ ܀ 257 :ܒܓܲܪܡ̇ܐ ܫܝܼܛܵܐ ܙܲܟܿܝܹܗ ܒܩܹܐܪܣܵܐ ܡ̇ܪܵܐ ܠܥܲܒܼܕܹܿܗ 258 ܘܡܸܢܹܗ ܝܲܗ̣̄ܒܼ ܠܹܗ ܫܸܩܝܵܐ ܚܲܠܝܵܐ ܕܢܸܬܼܒܲܣܲܡ ܒܹܗ ܀ 259 :ܫܸܩܝܵܐ ܚܲܠܝܵܐ ܪܕܼܵܐ ܡ̣ܢ ܓܲܪܡ̇ܐ ܕܠܵܐ ܒܲܥܝܵܕܼܵܐ 260 ܘܲܬܼܗܲܪ ܟܹܐܢܵܐ ܕܚܹܝܠ ܥܵܒܼܘܿܕܼܵܐ ܗ̄ܝܼ ܕܲܦܫܝܼܩ ܠܹܗ ܟܠ ܀ 261 :ܛܡܲܐ ܗ̄ܘ̣ܵܐ ܓܲܪܡ̇ܐ ܘܲܓܼܠܝܼܙ ܗ̄ܘ̣ܵܐ ܬܘܼܒܼ ܐܵܦ ܡ̣ܢ ܫܸܩܝܵܐ 262 ܘܲܠܬܪ̈ܬܲܝܗܹܝܢ ܙܟܼܵܐ ܨܸܒܼܝܵܢܵܐ ܕܫܲܠܝܛ ܥܲܠ ܟܠ ܀ 263 :ܡ̣ܢ ܐܲܝܟܵܐ ܟܲܝ ܪܕܼܵܘ ܗ̄ܘ̣ܵܘ ܡܲܝ̈ܵܐ ܒܓܼܵܘ ܝܲܒܿܝܼܫܵܐ 264 ܐܵܘ ܡܲܢ ܥܲܒܼܕܹܿܗ ܡܥܝܼܢ ܚܲܝܘܼܬܼܵܐ ܠܲܛܡܲܐ ܟܠܹܗ ܀ 265 :ܗܵܘ̇ ܦܘܼܩܕܵܢܵܐ ܕܐܲܪܕܿܝܼ ܡܲܝ̈ܵܐ ܡ̣ܢ ܛܲܪܵܢܵܐ 266 ܗܘ̤ ܐܲܣܸܢ ܒܹܗ ܪܲܛܝܼܒܼܘܼܬܼܵܐ ܕܠܲܝܬܿ ܗ̄ܘ̣ܵܐ ܒܓܼܵܘܹܗ ܀ 267 :ܗܵܘ̇ ܨܸܒܼܝܵܢܵܐ ܕܥܲܒܼ݂ܕܵܗ̇ ܠܟܹܐܦܵܐ ܢܸܒܼܥܵܐ ܠܡܲܝܵ̈ܐ 268 ܗܘ̤ ܬܘܼܒܼ ܥܲܒܼܕܹܿܗ ܠܓܲܪܡ̇ܐ ܛܲܡܠܵܐ ܫܸܩܝܵܐ ܠܟܹܐܢܵܐ ܀ 269 :ܗܵܘ̇ ܡܲܠܲܐܟܼܵܐ ܕܬܲܪܣܝܼ ܒܐܘܼܪܚܵܐ ܠܝܼܣܲܪ̈ܠܵܝܹܐ 270 ܗܘ̤ ܝܲܗ̣̄ܒܼ ܡܲܝܵ̈ܐ ܡ̣ܢ ܫܲܬܿܝܼܩܵܐ ܠܦܘܼܡ ܡܲܠܵܠܵܐ ܀ 271 :ܚܲܕܼ ܡ̣ܢ ܥܝܼܪܹ̈ܐ ܪܲܓܝܼ ܥܘܼܒܵܐ ܕܟܹܐܦܵܐ ܘܓܼܪܡ̇ܐ 272 ܘܐܵܘܠܸܕܼ ܡܸܢܗܘܿܢ ܥܘܸܠܹ̈ܐ ܪ̈ܓܲܝܵܐ ܕܠܵܐ ܒܲܥܝܵܕܼܵܐ ܀ pb. 311 273 :ܡ̣ܢ ܐܸܣܛܘܼܟܼܣܹ̈ܐ ܕܪܲܛܝܼܒܼܘܼܢ ܫܩ݂ܲܠ ܪܘܼܚܵܢܵܐ 274 ܘܙܵܘܸܓܼ ܐܸܢܘܿܢ ܥܲܡ ܐܸܣܛܘܼܣܹ̈ܐ ܕܝܲܒܿܝܼܫܘܼܬܼܵܐ ܀ 275 :ܩܲܛܝܼܢܵܐܝܼܬܼ ܫܵܘܬܸܿܦ ܐܸܢܘܿܢ ܚܲܕܼ ܥܲܡ ܚܲܒܼܪܹܗ 276 ܐܲܝܟ ܡ̇ܐ ܕܲܡܥܵܕܼ ܣܵܥܲ݁ܪ ܡܵܐ ܕܡܸܬܼܦܲܩܲܕܼ ܀ 277 :ܒܗܵܘ̇ ܐܸܣܟܹܿܡܵܐ ܕܡܲܛܥܸܢ ܡܲܝ̈ܵܐ ܠܥܸܠ ܡ̣ܢ ܪܘܼܚܵܐ 278 ܒܹܗ ܣܵܡ̣ ܐܸܢܘܿܢ ܒܟܹܐܦܵܐ ܘܓܲܪܡ̇ܐ ܩܲܛܝܼܢܵܐܝܼܬܼ ܀ 279 :ܠܲܢ ܗ̄ܘ̣ ܥܲܣܩܵܐ ܗܵܕܹܐ ܕܲܗܘ̤ܵܬܼ ܕܠܵܐ ܒܲܥܝܵܕܸܵܐ 280 ܠܲܫܡܲܝܵܢܹ̈ܐ ܣܲܓܿܝܼ ܦܫܝܼܩܵܐ ܠܘܵܬܼ ܛܲܟܼܣܲܝ̈ܗܘܿܢ ܀ 281 :ܚܲܝܠܵܐ ܪܲܒܵܐ ܢܣ݂ܲܒܼܘ ܡ̣ܢ ܚܲܝܠܵܐ ܕܬܲܩܸܢ ܟܠܵܐ 282 ܘܲܕܼܠܝܼܠܵܐ ܠܗܘܿܢ ܣܵܥܘܿܪܘܼܬܼܵܐ ܕܪܵܘܡ̇ܐ ܘܥܘܼܡܩܵܐ ܀ 283 :ܗܸܢܘ̣ܿܢ ܣܲܥܪ̣ܘܼܗ̇ ܠܗܵܕܹܐ ܕܲܗܘ̤ܵܬܼ ܥܲܡ ܟܠ ܕܲܗ̤ܘܲܝ̈ 284 ܗܸܢܘ̣ܿܢ ܣܲܥܪ̣ܘܼܗ̇ ܒܚܹܝܠ ܥܵܒܼܘܿܕܼܵܐ ܕܚܲܝܸܠ ܐܸܢܘܿܢ ܀ 285 :ܒܚܹܝܠ ܥܵܒܼܘܿܕܼܵܐ ܪܕܼܵܘ ܡ̣ܢ ܓܲܪܡ̇ܐ ܡܲܝܵ̈ܐ ܠܫܸܡܫܘܿܢ 286 ܘܲܒܼܥܘܼܕܼܪܵܢܹܗ ܙܟܼܵܐ ܘܐܸܬܼܢܲܨܲܚ ܕܠܵܐ ܣܲܦܣܹܪܵܐ ܀ 287 :ܕܠܵܐ ܣܲܦܣܹܪܵܐ ܙܟܼܵܐ ܙܲܟܵܝܵܐ ܠܡܲܠܝܲܝ̈ ܚܵܘ̈ܒܹܿܐ 288 ܘܲܕܼܠܵܐ ܦܘܼܠܵܓܼ ܩܲܒܸܿܠ ܫܸܩܝܵܐ ܡ̣ܢ ܦܘܼܡ ܓܼܪܡ̇ܐ ܀ 289 :ܡܲܝܵ̈ܐ ܕܟܲܝ̈ܵܐ ܐܸܫܬܿܝܼ ܕܲܟܼܝܵܐ ܡ̣ܢ ܦܘܼܡ ܛܲܡܠܵܐ 290 ܘܲܒܼܫܵܩܘܼܬܹܗ ܚܵܘܝܼ ܕܠܵܐ ܐܝܼܬܼ ܡܸܕܸܿܡ ܕܲܛܡܲܐ ܀ 291 :ܠܲܝܬܿ ܟܹܝܬܼ ܛܲܡܠܵܐ ܒܟܼܠ ܡ̇ܐ ܕܲܗܘ̤ܵܐ ܡ̣ܢ ܒܵܪܘܿܝܵܐ 292 ܕܗܵܐ ܐܵܦ ܐܲܝܕܵܐ ܕܠܲܢ ܛܲܡܠܵܐ ܗ̄ܘ̣ܵܬܼ ܚܵܘܝܼ ܕܕܲܟܼܝܵܐ ܗ̄ܝܼ ܀ 293 :ܒܫܸܩܝܹܗ ܕܫܸܡܫܘܿܢ ܢܚܘܼܪ ܟܠ ܕܲܡܗܝܼܪ ܒܗܲܝܡܵܢܘܼܬܼܵܐ 294 ܘܠܵܐ ܢܸܬܼܦܲܠܲܓܼ ܕܲܛܡܲܐ ܡܸܕܸܿܡ ܒܐܘܼܟܼܠܵܐ ܘܫܸܩܝܵܐ ܀ 295 :ܛܘܡܲܐ ܗ̄ܘ̣ܵܐ ܓܼܪܡ̇ܐ ܠܦܘܼܬܼ ܦܘܼܩܕܵܢܵܐ ܡܵܢܘܿܣܵܝܵܐ 296 ܘܲܕܼܟܸܐ ܗ̄ܘ̣ܵܐ ܛܵܒܼ ܠܦܘܼܬܼ ܨܸܒܼܝܵܢܵܐ ܐܲܠܵܗܵܝܵܐ ܀ 297 :ܨܸܒܼܝܵܢ ܟܲܣܝܵܐ ܕܲܟܿܝܼ ܘܛܲܡܲܐ ܠܦܘܼܬܼ ܪܸ̈ܥܝܵܢܹܐ 298 ܘܡܲܢ̣ܘܼ ܕܲܡܨܸܐ ܠܲܡܕܵܢ ܡ̇ܪܵܐ ܕܫܲܠܝܼܛ ܥܲܠ ܟܠ ܀ 299 :ܨܸܒܼܝܵܢ ܚܘܼܒܹܿܗ ܣܥ݂ܲܪ ܨܹܝܕܼ ܥܲܒܼܕܹܿܗ ܚܘܼܒܵܢܵܐܝܼܬܼ 300 ܘܙܲܟܿܝܹܗ ܒܩܹܐܪܣܵܐ ܘܝܲܗ̣̄ܒܼ ܠܹܗ ܫܸܩܝܵܐ ܐܲܝܟ ܕܲܫܦ݂ܲܪ ܠܹܗ ܀ 301 :ܬܡܝܼܗ ܗ̄ܘ̣ܵܐ ܩܹܐܪܣܵܐ ܕܲܥܒ݂ܲܕ ܒܐܲܪܥܵܐ ܒܲܪ ܥܸܒܼܪ̈ܵܝܹܐ 302 ܘܒܲܬܼܡܝܼܗܘܼܬܹܗ ܬܡܲܗܘ ܣܵܛܵܢܵܐ ܘܚܲܝܠ̈ܘܵܬܹܗ ܀ 303 :ܬܸܡܗܵܐ ܐܸܚܲܕܼ ܠܪܹܫܵܐ ܕܐܵܐܲܪ ܥܘܼܝܼܪ ܒܲܚܣܵܡܵܐ 304 ܥܲܠ ܬܲܟܼܬܿܘܼܫܵܐ ܕܲܥܒ݂ܲܕܼ ܐ̄ܢܵܫܵܐ ܒܚܹܝܠ ܥܵܒܼܘܿܕܼܵܐ ܀ 305 :ܒܓܹܐܪܹ̈ܐ ܕܝܲܨܪܹܗ ܒܠ݂ܲܥ ܒܲܚܣܵܡܵܐ ܣܵܢ̇ܠܵܐ ܕܐ̄ܢܵܫܵܐ 306 ܕܲܚܙ̣ܵܐ ܠܫܸܡܫܘܿܢ ܕܚܲܣܢܹܗ ܠܚܲܝܠܵܐ ܕܲܟܼܢܝܼܫ ܗ̄ܘ̣ܵܐ ܠܹܗ ܀ 307 :ܕܝܼܠܹܗ ܚܲܫܒ̣ܵܗ̇ ܠܚܲܪܒܵܐ ܕܲܥܒ݂ܲܕܼ ܒܲܦܠܸܫܵܝܹ̈ܐ 308 ܘܲܕܼܟܼܘܼܐܵܪܹܗ ܣܵܡ̣ܵܗ̇ ܠܚܵܘܒܿܬܼܵܐ ܕܲܡܫܲܡܫܵܢܵܘ̈ܗܝ ܀ 309 ܛܵܒܼ ܡ̣ܢ ܟܠܕܿܘܼܟ ܡܸܬܼܢܲܨܲܚ ܗ̄ܘ̣ܵܐ ܫܡܹܗ ܒܹܝܬܼ ܥܘܼܪ̈ܠܹܐ: pb. 312 310 ܘܕܲܚ̣ܵܙܵܐ ܕܲܒܼܗܸܬܼ ܒܛܘܼܥܝܲܝ ܕܲܫܡܹܗ ܠܲܒܼ݂ܫܹܗ ܪܘܼܓܼܙܵܐ ܀ 311 :ܛܢܵܢܵܐ ܕܪܘܼܓܼܙܵܐ ܠ̣ܒܸܫ ܣܵܛܵܢܵܐ ܠܘܼܩܒܲܠ ܫܸܡܫܘܿܢ 312 ܘܫܲܪܝܼ ܡܪܲܟܸܿܒܼ ܦܘܼܪ̈ܣܹܐ ܨܢܝܼܥܹ̈ܐ ܕܢܲܩܪܸܒܼ ܥܲܡܹܗ ܀ 313 :ܦܘܼܪ̈ܣܹܐ ܪܲܟܸܿܒܼ ܨܢܝܼܥ ܪܸܥܝܵܢܵܐ ܥܲܠ ܙܲܕܿܝܼܩܵܐ 314 ܕܲܚܙ̣ܵܐ ܕܠܵܐ ܡܨܸܐ ܕܢܸܥܒܸܿܕܼ ܥܲܡܹܗ ܩܹܐܪܣܵܐ ܒܓܸܠܝܵܐ ܀ 315 :ܦܲܚܹ̈ܐ ܕܪܸܓܿܬܼܵܐ ܥܲܡܸܩ ܘܲܛܡ݂ܲܪ ܩܕܼܵܡ ܗܲܠ̈ܟܼܵܬܹܗ 316 ܕܲܒܼܗܘܿܢ ܢܨܘܼܕܸܝܼܗ̇ ܠܩܲܠܝܼܠܘܼܬܹܗ ܕܛܲܒܼܝܵܐ ܢܙܝܼܪܵܐ ܀ 317 :ܡ̇ܐܢܲܝ̈ ܙܲܝܢܵܐ ܕܐܘܼܡ̇ܢܘܼܬܹܗ ܠܸܒܼ݂ܫ ܒܲܗܝܼܬܼܵܐ 318 ܘܫܲܪܝܼ ܡܚܲܠܸܕܼ ܒܝܲܕܼ ܢܸܩ̈ܒܼܵܬܼܵܐ ܐܲܝܟ ܢܵܡܘܿܣܹܗ ܀ 319 :ܠܐܲܢ̄ܬܿܬܼܵܐ ܫܲܕܲܪ ܐܲܝܟ ܓܵܫܘܿܫܵܐ ܠܘܵܬܼ ܬܲܡܝܼܡܵܐ 320 ܘܓܲܫܹܗ ܠܚܲܝܠܹܗ ܒܐܸܠܥܵܐ ܪܦܝܼܬܼܵܐ ܕܓܲܫ̣ ܒܵܗ̇ ܠܐܵܕܼܵܡ ܀ 321 :ܒܪܸܚܡܲܬܼ ܐܲܢ̄ܬܬܼܵܐ ܐܲܣܪܹܗ ܠܟܹܐܢܵܐ ܐܲܝܟ ܕܲܒܼܙܲܝܢܵܐ 322 ܘܒܲܫܓܼܝܼܫܘܼܬܼܵܗ̇ ܫܲܗܝܲܬ̤ ܠܬܼܘܼܩܦܵܐ ܕܓܲܢ̄ܒܵܪܘܼܬܹܗ ܀ 323 :ܐܲܢ̄ܬܿܬܼܵܐ ܪܚܸܫ ܠܹܗ ܫܸܡܫܘܿܢ ܪܵܚ̇ܡܵܐ ܕܕܸܚܠܲܬܼ ܩܘܼܫܬܵܐ 324 ܘܲܒܼܪܵܚܡܘܼܬܼܵܗ̇ ܫܪ̣ܵܝܗܝ ܠܐܲܣܵܪܵܐ ܕܒܹܝܬܼ ܠܹܗ ܠܡܵܪܹܗ ܀ 325 :ܥܲܡ ܒܲܪ̄ܬܼ ܥܲܡܡܹ̈ܐ ܥܒ݂ܲܕ ܪܵܚܡܘܼܬܼܵܐ ܒܲܪ ܐܲܒܼܪܵܗܵܡ 326 ܘܲܒܼܥܸܝܵܢܵܗ̇ ܛܥ̣ܵܐ ܥܸܢܝܵܢܵܐ ܕܒܹܝܬܼ ܐܲܒܼܵܗܵܘ̈ܗܝ ܀ 327 :ܐܲܝܟ ܕܲܒܼܫܸܒܼܝܵܐ ܕܒܲܪܬܹܗ ܐܲܢ̄ܬܿܬܼܵܐ ܠܫܵܒܹ̇ܐ ܥܲܡܡܹ̈ܐ 328 ܘܐܲܝܟ ܕܲܒܼܝܼܪܵܐ ܟܕܲܢܬܹܗ ܒܢܝܼܪܵܐ ܕܼܪ̈ܓܼܝܼܓܼܵܬܼܵܗ̇ ܀ 329 :ܒܟܼܠ ܐܸܣܟܹܿܡܝܼ̈ܢ ܫܚܲܩܬܹܗ ܠܠܸܒܹܿܗ ܕܬܲܩܝܼܢ ܗܵܘܢܵܐ 330 ܒܲܕܼ ܢܹܐܡܲܪ ܠܵܗ̇ ܕܡܵܢܵܘ̇ ܚܲܝܠܵܐ ܕܡܸܬܼܢܲܨܲܚ ܒܹܗ ܀ 331 :ܠܒܲܪ ܡ̣ܢ ܛܲܟܼܣܵܐ ܥܨܵܬܹܗ ܠܝܲܨܪܹܗ ܕܲܥܪܝܼܡ ܢܲܦܫܵܐ 332 ܥܕܲܡ̇ܐ ܕܚܵܘܝܵܗ̇ ܐ̄ܪܵܙܵܐ ܪܲܒܵܐ ܕܲܒܵܐ ܕܲܢܙܝܼܪܘܼܬܹܗ ܀ 333 :ܢܙܝܼܪܵܐ ܐ̄ܢܵܐ ܠܲܡ ܘܲܫܡܵܐ ܪܲܒܵܐ ܟܣܸܐ ܒܲܢܙܝܼܪܘܼܬܼܝ 334 ܘܐܸܢ ܫܵܩܹ̇ܠ ܐ̄ܢܵܐ ܟܠܝܼܠܵܐ ܕܲܒܼܪܹܫܝ ܡܸܫܬܿܦܲܠ ܐ̄ܢܵܐ ܀ 335 :ܟܠܝܼܠ ܙܵܟܼܘܼܬܼܵܐ ܝܲܗ̣̄ܒܼ ܠܝܼ ܐܲܠܵܗܝ ܟܠܝܼܠܵܐ ܕܲܒܼܪܹܫܝ 336 ܘܐܸܢ ܓܵܪܲܥ ܐ̄ܢܵܐ ܦܵܪܹܩ ܠܹܗ ܡܹܢܝ ܚܹܝܠ ܥܘܼܕܪܵܢܹܗ ܀ 337 :ܚܙܵܬ̤ ܫܵܛܝܼܬܼܵܐ ܕܲܚܼܠ̣ܵܐ ܘܚܵܘܝܵܗ̇ ܟܠܹܗ ܠܸܒܹܿܗ 338 ܘܢܸܟܼܠܲܬ̤ ܘܲܓܼܠܵܬ̤ ܠܐ̄ܪܵܙ ܡܘܼܟܵܟܹܗ ܠܲܒܼܢܲܝ̈ ܥܲܡܵܗ̇ ܀ 339 :ܐܲܝܟ ܕܲܠܫܲܒܼܪܵܐ ܩܪܵܬ̤ ܘܐܲܕܼܡܸܟܼܬܹܗ ܥܲܠ ܗܲܕܵܡܹܝ̈ܗ̇ 340 ܘܫܲܪܝܲܬ̤ ܒܵܙܵܐ ܣܝܼܡܲܬܼ ܚܲܝܠܵܐ ܕܲܟܼܣܸܐ ܒܪܹܫܹܗ ܀ 341 :ܐܲܝܟ ܗܸܕܼܝܘܿܛܵܐ ܛ̣ܒܲܥ ܚܲܟܿܝܼܡܵܐ ܒܢܲܗܪܵܐ ܕܫܸܢܬܼܵܐ 342 ܘܠܵܐ ܢܵܪ̣ ܘܐܲܪܓܸܿܫ ܒܚܘܼܠܵܨ ܓܲܙܵܐ ܕܲܢܙܝܼܪܘܼܬܹܗ ܀ 343 :ܐܲܝܟ ܕܲܒܼܫܸܩܝܵܐ ܕܚܲܡܪܵܐ ܩܲܫܝܵܐ ܒܗܸܠ ܘܐܸܫܬܲܬܲܩ 344 ܘܲܗܘ̤ܵܐ ܟܠܹܗ ܡܢܵܬܼܵܐ ܕܫܸܢܬܼܵܐ ܠܒܲܪ ܡ̣ܢ ܛܲܟܼܣܵܐ ܀ 345 ܓܪܲܥܬܹܗ ܠܪܹܫܹܗ ܚܲܪܡ̇ܢܵܐܝܼܬ ܡܲܠܝܲܬܼ ܥܵܘ̣ܠܵܐ: pb. 313 346 ܘܥܲܡܹܗ ܕܣܲܥܪܹܗ ܐܸܫܬܿܩܸܠ ܡܸܢܹܗ ܚܹܝܠ ܥܘܼܕܪܵܢܹܗ ܀ 347 :ܩܪܵܬ̤ ܘܐܲܥܝܼܪܬܹܗ ܟܪܘܿܡܬܼܵܢܝܼܬܼܵܐ ܐܲܝܟ ܡ̣ܢ ܚܘܼܒܵܐ 348 ܘܢ̣ܵܕܼ ܛܲܒܿܝܼܥܵܐ ܘܲܚܙ̣ܵܐ ܕܲܫܩܝܼܠ ܬܵܓܹܗ ܡܸܢܹܗ ܀ 349 :ܐܲܚܕܿܘܼܗܝ ܥܘܼܪ̈ܠܹܐ ܠܲܕܟܸܐ ܦܲܓܼܪܵܐ ܘܲܢܙܝܼܪ ܢܲܦܫܵܐ 350 ܘܥܵܘܵܪܘ ܥܲܝܢܵܘ̈ܗܝ ܚܲܪܡ̇ܢܵܐܝܼܬܼ ܕܠܵܐ ܚܵܘܣܵܢܵܐ ܀ 351 :ܣܲܡܝܵܐ ܥܲܒܼܕܿܘܼܗܝ ܠܢܲܗܝܼܪ ܗܵܘܢܵܐ ܣܲܡ̈ܝܲܝ ܗܵܘܢܵܐ 352 ܘܲܒܼܒܹܝܬܼ ܪܲܚܝܵܐ ܐܲܥܸܠܘ ܚܲܫܫܘܼܗܝ ܐܲܝܟ ܕܲܠܝܼܛܵܐ ܀ 353 :ܪܲܚܵܐ ܛܚܲܢ̣ܘ ܒܹܗ ܬܲܥܠܹ̈ܐ ܫܝܼܛܹ̈ܐ ܒܐܲܪܝܵܐ ܠܒܼܝܼܒܼܵܐ 354 ܘܲܒܼܚܸܫܘܿܟܼܵܐ ܫܲܬܸܿܩܘ ܩܵܠܵܐ ܕܓܲܢ̄ܒܵܪܘܼܬܹܗ ܀ 355 :ܠܒܲܪ ܡ̣ܢ ܛܲܟܼܣܵܐ ܒܲܙܲܚܘ ܘܐܲܗܸܠܘ ܒܹܗ ܘܲܒܼܡܵܪܹܗ 356 ܘܕܲܚܙ̣ܵܐ ܡ̇ܪܹܗ ܚܵܣ̣ ܥܲܠ ܫܸܦܠܹܗ ܘܩܲܦܲܚ ܐܸܢܘܿܢ ܀ 357 :ܥܹܐܕܼܵܐ ܪܲܒܵܐ ܥܒ݂ܲܕܼܘ ܛܵܥܲܝ̈ܵܐ ܠܐܲܠܵܗ ܛܘܼܥܝܲܝ 358 ܘܲܩܪ̣ܵܘ ܠܫܸܡܫܘܿܢ ܕܲܢܒܲܙܚܘܼܢ ܒܹܗ ܩܕܼܵܡ ܠܵܐ ܐܲܠܵܗ ܀ 359 :ܐܸܬܼܵܐ ܟܹܐܢܵܐ ܕܣܲܡܝܹܗ ܥܵܘ̣ܠܵܐ ܠܒܵܝܢܵܬܼ ܥܘܼܪ̈ܠܹܐ 360 ܘܫܲܪܝܼ ܡܪܲܩܸܕܼ ܟܢܝܼܟ ܪܸܥܝܵܢܵܐ ܩܕܼܵܡ ܙܲܠܝܼܠܹ̈ܐ ܀ 361 :ܪܸܩܕܼܵܐ ܬܲܒܼܥ̣ܘܼܗܝ ܚܲܪ̈ܡܹܐ ܠܢܲܟܼܦܵܐ ܒܲܣܡܵܟܲܝ̈ܗܘܿܢ 362 ܘܲܪܩܸܕܼ ܘܲܫܬܸ݂ܩ ܟܲܕܼ ܡܸܬܿܬܲܢܲܚ ܥܲܠ ܡܘܼܟܵܟܹܗ ܀ 363 :ܚܝܵܨܵܐ ܪܲܒܵܐ ܚܵܨ̣ ܦܵܪܘܿܫܵܐ ܒܓܼܵܘ ܪܸܥܝܵܢܹܗ 364 ܕܲܚ̣ܙܵܐ ܕܲܟܼܡܵܐ ܨܥܝܼܪ ܫܘܼܥܒܵܕܼܵܐ ܕܝܲܩܝܼܪܘܼܬܹܗ ܀ 365 :ܚܙ̣ܵܐ ܕܡܲܗܠܝܼܢ ܒܹܗ ܦܵܠ̈ܚܲܝ ܫܹܐܪܹ̈ܐ ܒܥܲܕܼܥܹܐܕܼ ܫܹܐܕܹ̈ܐ 366 ܘܲܩ̣ܪܵܐ ܠܡܵܪܹܗ ܕܲܢܦܲܥܸܐ ܠܹܗ ܚܲܝܠܵܐ ܕܐܵܘܒܸܿܕܼ ܀ 367 :ܒܒܼܵܥܘܼ ܐܲܠܵܗܝ ܐܸܡ݂ܲܪ ܟܹܐܢܵܐ ܠܘܵܬܼ ܐܲܠܵܗܹܗ 368 ܫܡܲܥܲܝܢܝ ܘܲܥܢܝܼܢܝ ܘܐܸܬܼܢܲܩܲܡ ܠܝܼ ܥܝܵܪܵܬܵܐ ܕܥܲܝ̈ܢܲܝ ܀ 369 :ܚܘܼܣ ܥܲܠ ܫܦܠܘܼܬܼܝ ܘܐܵܥܒܲܪ ܣܲܟܼܠܘܼܬܼܝ ܘܲܫܒܼܘܿܩ ܚܵܘܒܲܝ̈ 370 ܘܠܵܐ ܬܲܩܸܨ ܠܝܼ ܚܛܝܼܬܼܵܐ ܕܲܚܛܹ̇ܝܬܼ ܒܐ̄ܪܵܙ ܡ̇ܘܗܲܒܼܬܼܵܟ ܀ 371 :ܒܩܵܠܹ̈ܐ ܚܢܝܼ̈ܛܹܐ ܐܲܦܝܼܣ ܟܹܐܢܵܐ ܥܲܠ ܣܲܟܼܠܘܼܬܹܗ 372 ܘܫܲܡ̣ܥܹܗ ܡ̇ܪܹܗ ܘܝܲܗ̣̄ܒܼ ܒܹܗ ܚܲܝܠܵܐ ܐܲܝܟ ܕܲܒܼܩܲܕܼܡ̇ܐ ܀ 373 :ܦܢ̣ܵܐ ܥܘܼܕܼܪܵܢܵܐ ܕܲܠܘܸܐ ܗ̄ܘ̣ܵܐ ܠܹܗ ܘܲܫܪ̣ܵܐ ܒܪܸ̈ܓܼܫܵܘܗܝ 374 ܘܫܲܪܝܼ ܕܢܸܒܼܩܹܝܗ̇ ܠܫܲܪܝܼܪܘܼܬܹܗ ܒܝܲܕܼ ܢܸܣܝܵܢܵܐ ܀ 375 :ܬܪܹܝܢ ܥܲܡܘܼܕܹ̈ܐ ܠܒ݂ܲܟ ܓܲܢ̄ܒܵܪܵܐ ܒܬܲܪܬܹܿܝܢ ܐܝܼܕܼܵܘ̈ܗܝ 376 ܘܣܲܚܦܹܗ ܠܒܲܝܬܵܐ ܥܲܠ ܥܵܡ̇ܘܿܪ݁ܵܘܗܝ ܘܗܘ̤ ܒܲܡܨܲܥܬܼܵܐ ܀ 377 :ܬܡܘܼܬܼ ܢܲܦܫܝ ܐܸܡ݂ܲܪ ܥܲܡ ܦܠܸܫܬܵܝܹ̈ܐ ܥܘܼܪ̈ܠܲܝ ܠܸܒܵܐ 378 ܘܫܸܠܡܲܬ̤ ܡܸܠܬܹܗ ܒܝܲܕܼ ܣܘܼܥܪ̈ܵܢܹܐ ܐܲܝܟ ܡ̇ܐ ܕܐܸܡ݂ܲܪ ܀ 379 :ܡ̇ܘܬܵܐ ܚܢܝܼܓܼܵܐ ܡܝܼܬܼ ܙܲܕܿܝܼܩܵܐ ܥܲܡ ܪ̈ܲܫܝܼܥܹܐ 380 ܘܠܵܐ ܐܸܬܼܥܲܦܝܼ ܐܲܝܟ ܡ̇ܐ ܕܬܼܵܒܲܥ̇ ܛܲܟܼܣܵܐ ܕܐ̄ܢܵܫܵܐ ܀ 381 :ܓܲܢ̄ܒܵܪܵܐܝܼܬܼ ܡܝܼܬܼ ܓܲܢ̄ܒܵܪܵܐ ܥܲܡ ܚܲܠܵܫܹ̈ܐ 382 ܘܥܲܦ̣ ܢܸܨܚܵܢܵܐ ܕܲܒܼܝܘܿܡ ܡ̇ܘܬܹ̇ܗ ܠܗܵܘ̇ ܕܲܒܼܚܲܝܵܘ̈ܗܝ ܀ pb. 314 383 :ܣܓܼܝܼܘ ܠܲܡ ܡܝܼܬܹ̈ܐ ܕܲܒܼܝܘܿܡ ܡ̇ܘܬܹܿܗ ܛܵܒܼ ܡ̣ܢ ܚܲܝܘ̈ܗܝ 384 ܘܫܲܪܝܼ ܘܫܲܠܸܡ ܢܝܼܫܵܐ ܕܚܲܪܒܵܐ ܠܘܼܩܒܲܠ ܒܝܼܫܹ̈ܐ ܀ 385 :ܠܘܼܒܩܲܠ ܒܝܼܫܹ̈ܐ ܚ̣ܢܵܐ ܨܼܒܼܝܵܢܹܗ ܡ̣ܢ ܫܘܼܪܵܝܵܐ 386 ܘܟܲܕܼ ܛܵܒܼ ܐܲܣܟܼܵܠ ܘܠܵܐ ܦܵܫ̣ ܘܐܲܗܡܝܼ ܡ̣ܢ ܘܵܠܝܼܬܼܵܐ ܀ 387 :ܐܲܣܟܸܿܠ ܕܲܓܼܠ̣ܵܐ ܐ̄ܪܵܙ ܡ̇ܘܗܲܒܼܬܹܗ ܩܕܼܵܡ ܫܵܛܝܼܬܼܵܐ 388 ܘܚܲܫ̣ ܘܐܸܬܿܬܲܢܲܚ ܡܲܪܝܼܪܵܐܝܼܬܼ ܥܲܠ ܣܲܟܼܠܘܼܬܹܗ ܀ 389 :ܣܲܟܼܠܘܼܬܼ ܟܹܐܢܵܐ ܬܸܗܘܸܐ ܫܲܒܼܛܵܐ ܠܡܲܪܕܲܘܼܬܼ ܢܲܦܫܲܢ 390 ܘܲܒܼܓܼܠܝܘܼܬܼܵܗ̇ ܢܢܲܓܸܿܕܼ ܥܵܘ̣ܠܵܐ ܕܲܟܼܣܸܐ ܒܠܸܒܲܢ ܀ 391 :ܒܲܚܠܝܼܨܘܼܬܹܗ ܘܦܲܦܝܘܼܬܼ ܢܲܦܫܹܗ ܢܚܘܼܪ ܬܲܩܢܵܐܝܼܬܼ 392 ܘܠܵܐ ܢܸܫܬܲܒܼܗܲܪ ܡ̇ܐ ܕܩܵܢܹ̇ܝܢܲܢ ܫܲܦܝܼܪ̈ܵܬܼܵܐ ܀ 393 :ܟܝܵܢܵܐ ܗ̄ܘ̣ ܪܲܦܝܵܐ ܕܲܡܠܸܐ ܚܲܫܹ̈ܐ ܕܲܠܒܼܝܼܫܝܼܢܲܢ 394 ܘܩܲܠܝܼܠ ܨܵܡܲܚ̇ ܒܫܲܩܝܼܪ݁ܵܬܼܵܐ ܘܗܵܦܹ̇ܟ ܕܵܥܹ̇ܟ ܀ 395 :ܒܩܸܢܛܵܐ ܙܵܕܹܩ ܠܡܸܛܲܪ ܚܲܝܲܝ̈ܢ ܡ̣ܢ ܢܸܟܼܝܵܢܹ̈ܐ 396 ܘܲܒܼܚܹܐܪܘܼܬܼܵܐ ܠܡܸܛܲܪ ܓܲܙܵܐ ܕܚܹܐܪܘܼܬܼ ܢܲܦܫܲܢ ܀