Narsai. “On David and Saul - ܥܠ ܕܘܼܝܼܕ ܘܫܐܘܿ.” Based upon BL Or. 5463. Digital Syriac Corpus. Last modified April 26, 2019. https://syriaccorpus.org/102.
    
        
            
                ܥܠ ܕܘܼܝܼܕ ܘܫܐܘܿ
            
            
                 f.270r 

                ܀ ܢܗ܀ ܕܥܠ ܕܘܼܝܼܕ ܘܫܐܘܿܠ܀
                ܬܘܼܒܼ ܕܝܼܠܹܗ ܟܲܕ ܕܝܼܠܹܗ:
                ܡܸܐܡܪܵܐ ܕܚܲܡܫܝܼܢ ܘܚܲܡܫܵܐ܀
                ܕܲܥܒܝܼܕ ܠܹܗ ܥܲܠ ܕܵܘܝܼܕ ܘܫܵܐܘܿܠ܀
            
            
                 1 :ܠܘܝܼܬܵܐ ܦܐܝܼܬܼܵܐ ܕܕܘܼܒܵܪ ܟܐܢܹ̈ܐ ܐܫܟܚ ܪܸܥܝܵܢܝ
                 2 ܘܚܲܦܸܠ ܗܘ̤ ܠܹܗ ܠܡܚܙܲܩ ܥܲܡܵܗ̇ ܒܥܢܝܵܢ ܡܠܹ̈ܐ.
                 3 :ܚܙ̣ܵܐ ܕܬܪܝܼܨܵܐ ܐܘܪܚܵܐ ܕܥܡܠܹ̈ܐ ܕܪܲܥܝܼܢܲܗܘܿܢ
                 4 ܘܛܲܝܼܒܼ ܡܠܹ̈ܐ ܕܢܪܡܐ ܡܠܘܐܐ ܒܝܘܬܪ̈ܢܲܝܗܘܿܢ.
                 5 :ܠܢܝܼܫܵܐ ܕܡܲܠܟܵܐ ܚܙ̣ܵܐ ܕܡܕܡܝܢ ܒܕܘܼܒܪ̈ܲܝܗܘܿܢ
                 6 ܘܡܬܝܝ ܡܠܹ̈ܐ ܕܟܸܢܵܪܵ ܦܘܼܡܵܐ ܠܡܚܢܵܐ ܠܩܘܼܫܬܼܵܐ.
                 7 :ܒܸܐܘܪܚܵܐ ܕܩܘܼܫܬܵܐ ܚܙܲܩܘ ܬܓܪܹ̈ܐ ܕܡܠܲܬܼ ܩܘܼܫܬܵܐ
                 8 ܘܒܢܣܝܢܵܐ ܟܢܸܫܘ ܥ[ܘܼ]ܬܪܵܐ ܪܘܚܢܝܵܐ. ܡܲܬܼ
                 9 :ܒܪܸܝܝ ܥܘܼܬܪܵܐ ܕܕܘܒܪ̈ܝܗܘܿܢ ܚܙܲܩܘ ܚܘܫܒܲܝ̈
                 10 ܕܢܸܚܙܘܿܢ ܫܘܼܦܪܵܐ ܕܢܨܚܢܲܝ̈ܗܘܿܢ ܕܠܡ̇ܢ ܕܡ̇ܝܢ.
                 11 :ܩܵܠ ܚܘܼܡܣܢܗܘܿܢ ܐܥܝܼܪ ܪܸܥܝܵܢܝ ܐܝܟ ܡ̣ܢ ܫܢܬܼܵܐ
                 12 ܡܦܩܸܬ ܕܐܸܚܙܹܐ ܕܐܲܝܟܵܢ ܙܟܝܢ ܐ̄ܢܫ̈ܐ ܠܚܲܫܹ̈ܐ.
                 13 :ܚܘܒܗܘܿܢ ܓܪܓܢܝ ܐܲܝܟ ܕܠܫܒܪܵܐ ܠܘܵܬܼ ܥܡܠܲܝ̈ܗܘܿܢ
                 14 ܘܲܒܼܥ̇ܝܬ ܕܐܹܨܘܿܪ ܨܠܸܡ ܫܘܼܦܪ̈ܲܝܗܘܿܢ ܒܣܡܵܐ ܕܡܠܬܝ.
                 15 :ܒܟܬܝܒ̈ܬܐ ܕܣܦܪ̈ܝ ܡܲܠܟܵܐ ܒܥ̇ܝܬ ܕܐܬܗܓܹܐ
                 16 ܘܚ̇ܙܝܬ ܚܘܩܵܐ ܕܪܫܝܼܡܵܐ ܒܹܗ ܬܫܥܝܼܬ ܡܲܠܟܹ̈ܐ.
                 17 ܡܲܠܟܵܐ ܘܡܲܠܟܵܐ ܚܙܝܹ̇ܬ ܕܪܫܝܼܡܝܼܢ ܒܹܝܬ ܣܘܪ̈ܓܵܕܹܐ.
                 18 ܘܡܫܓܢܲܝ ܗ̄ܘ̣ܵܬ ܛܒܼܥܵܐ ܕܫܡܵܐ ܚܲܕ ܡ̣ܢ ܚܲܒܼܪܹܗ.
                 19 :ܠܐܕܡ̇ܐ ܗ̄ܘ̣ܵܐ ܬܓܼܵܐ ܠܬܓܼܵܐ ܕܒܪ̈ܫܲܝܗܘܿܢ
                 20 ܘܠܵܐ ܫ̇ܠܸܡ ܗ̄ܘ̣ܵܐ ܫܒܼܛܵܐ ܠܫܒܼܵܛܐ ܕܠܒܼܝܼܟܼܝܼܢ ܗ̄ܘ̣ܵܘ.
                 21 :ܚܲܕ ܪܗ̇ܛ ܗ̄ܘ̣ܵܐ ܚܘܩܵܐ ܕܫܪܒܹܗ ܒܕܼܵܡ ܒܒ̈ܬܐ
                 22 ܘܚܲܕ ܡܟܼܪܸܙ ܗ̄ܘ̣ܵܐ ܫܸܡ ܫܘܼܠܛܢܹܗ ܐܝܟ ܛܥܘܢܵܐ.
                 23 :ܒܣܦܪܐ ܕܪܘܼܚܵܐ ܪܫܝܼܡ ܗ̄ܘ̣ܵܐ ܫܐܘܿܠ ܐܝܟ ܝܲܬܝܼܪܵܐ
                 24 ܘܗܦܟ ܪܡܙܵܐ ܩ̣ܪܝܗܝ ܬܲܩܢܵܐܝܼܬ ܘܲܠܚܵܝܗܝ ܠܲܫܡܹܗ.
                 25 :ܠܐ ܗ̄ܘ̣ܵܐ ܡܛܥܐ ܛܥܐ ܟܵܬܼܘܒܵܐ ܘܟܬܒܗ ܠܫܡܗ
                 26 :ܗܘ̣ܝܘ̣ ܕܪܫܡܹܗ ܕܢܲܠܸܦ ܒܫܡܹܗ ܕܠܵܐ ܐ̄ܢܵܫ ܢܛܥܹܐ
                 27 ܐܬ̤ܐ ܣܡܹܗ ܒܹܝܬܼ ܐܘܪ̈ܚܸܬܼܵܐ ܕܚܘ̈ܩܹܐ ܕܪܘܼܚܵܐ.
                 28 ܕܢܚܙܘܿܢ ܐ̄ܢܫ̈ܐ ܘܠܐ ܢܬܕܘܕܘܢ ܒܬܘܫܵܐ ܕܐܘܼܪܚܹܗ.
                 29 :ܒܕܦܵܐ ܕܣܦܪܐ ܨܪܗ ܠܨܠܡܹܗ ܕܡܲܠܟܵܐ ܪܲܦܝܵܐ
                 30 ܕܢܚܘܹܐ ܒܹܗ ܣܢܝܘܼܬ ܥܘ̣ܠܐ ܕܟܼܡܵܐ ܣܢܝܵܐ.
                 31 :ܒܪܸܫ ܣܘܪܓܕܵܐ ܕܓܒܼܝܘܬ ܡܲܠܪܹ̈ܐ ܪܫܡܹܗ ܠܫܐܘܿܠ
                 32 ܕܐܝܢܵܐ ܕܩ̇ܪܸܐ ܢܚܘܿܪ ܬܩܢܐܝܼܬ ܘܐܟܢ ܢܩܪܐ.
                 33 :ܒܚܘܩܐ ܕܬܪܝܢ ܟܬܒܼ ܓܒܼܝܘܬܗ ܕܕܘܝܼܕ ܢܟܼܦܵܐ
                 34 ܘܨܵܪ ܢܨܚ̈ܢܹܐ ܕܕܟܝܘܼܬ ܢܲܦܫܹܗ ܩܕܼܵܡ ܚܲܙܵܝܹ̈ܐ.
                 35 :ܪܡܙܵܐ ܟܣܝܵܐ ܡܫܲܚ ܠܬܪܝܗܘܿܢ ܟܲܕ ܠܵܐ ܛܲܥܐ
                 36 ܘܓܼܒܼܐ ܘܐܣܠܝܼ ܐܲܝܟ ܒܘܼܚܵܪܢܵܐ ܕܣܥܘ ܪܘܼܬܹܗ.
                 37 :ܓܒܼܵܐ ܟܲܕ ܝ̇ܕܥ ܣܘܼܥܪ̈ܢܲܝܗܘܿܢ ܥܕܠܵ ܢܸܗܘܘܿܢ
                 38 ܘܚܘܝܼ ܚܘܼܒܹܗ ܕܐܦ ܥܲܠ ܒܝܼܫܹ̈ܐ ܫܦܝܼܥ ܐܢ ܨ̇ܒܝܢ.
                 39 :ܒܫܐܘܿܠ ܚܘܝܼ ܕܟܼܡܵܐ ܣܢ̇ܐ ܠܒܝܼܫܘܼܬ ܝܲܨܪ݁ܐ
                 40 ܘܲܒܼܒܲܪ ܐܝܼܫܝ ܓܠ̣ܐ ܨܒܝܢܹܗ ܕܡܚܸܒܼ ܟܐܢܹ̈ܐ ܗ̄ܘ̣.
                 41 :ܠܫܐܘܿܠ ܥܘ̣ܠܗ ܐܣܠܝܼ ܘܲܫܕܵܝܗܝ ܡ̣ܢ ܡܲܠܟܘܼܬܼܵܐ
                 42 ܘܚܘܒܹܗ ܕܕܵܘܝܼܕ ܣܡ ܠܹܗ ܬܵܓܼܵܐ ܕܪܹܫܢܘܼܬܼܵܐ. 

                 f.270v 
                 43 :ܐܚܸܵܝܘܗܝ ܦܘܼܩܕܢܵܐ ܠܫܡܹܗ ܕܫܵܐܘܿܠ ܡ̣ܢ ܒܹܝܬܼ ܐܪ̈ܟܹܐ
                 44 ܘܟܬܲܒܼ ܕܘܵܝܼܕ ܥܒܸ̇ܕ ܕܝܼܢܵܐ ܥܘܠܐ ܚܠܦ.
                 45 :ܪܸܡܙܵܐ ܟܣܝܵܐ ܐܪܡܝܼ ܐܝܕܵܐ ܫܘܼܠܛܢܹܗ
                 46 ܘܒܡܘܡܬܐ ܚܲܬܸܡ ܕܪܓܼܐ ܕܪܫܢܘܼܬܹܗ.
                 47 :ܝܼܡܵܐ ܘܐܫܪ ܐܠܗ ܟܠܐ ܕܠܐ ܡܬܕܓܲܠ
                 48 ܕܟܘܪܣܝ ܕܘܝܼܕ ܠܥܲܠܡ ܢܬܩܢ ܕܠܐ ܫܘܼܠܡܵܐ.
                 49 :ܥܲܡ ܢܗܝܪܐ ܫܡܫܵܐ ܘܣܗܪܵܐ ܢܪܗܲܛ ܕܪܥܗ
                 50 ܘܠܵܐ ܢܬܥܘܟ ܡ̣ܢ ܝܘܼܒܠܵܐ ܕܫܸܡ ܡܠܡܘܼܬܼܵܐ.
                 51 :ܚܕܵܐ ܠܲܡ ܝܼܡܝܬ ܒܫܸܡ ܩܕܝܼܫܵܐ ܘܠܵܐ ܡܕܓܸܠ ܐ̄ܢܵܐ
                 52 ܕܥܲܡ ܐܡܒܢܘܼܬܼܝ ܢܡܠܟ ܕܘܝܼܕ ܘܙܪܥܵܐ ܕܡܸܢܹܗ.
                 53 :ܡܠܟܘܼܬ ܙܒܼܢܵܐ ܝܗܒ̣ ܐ̄̈ܢܵܐ ܠܹܗ ܐܲܝܟ ܪܗܒܼܘܢܵܐ
                 54 ܘܒܣܘܥܪ̈ܢܹܐ ܡܚܬܸܡ ܐ̄ܢܐ ܠܗ̇ ܒܫܘܼܠܡ ܙܒ̈ܢܐ.
                 55 :ܐܓܼܪܐ ܛܒܼܵܐ ܦܪܥ ܐ̄ܢ̇ܐ ܠܹܗ ܚܠܦ ܚܘܼܡܣܵܢܵܘ̈ܗܝ
                 56 ܡܠܟܘܼܬ ܙܒܼܢܵܐ ܘܡܲܠܡܘܼܬ ܪܘܡܵܐ ܕܠܐ ܡܸܫܬܪܝܵܐ.
                 57 :ܕܠܵܐ ܐܫܬܒܗܲܪ ܘܫܛ ܦܘܼܩܕܢܝ̈ ܒܲܕܡܘܼܬ ܫܐܘܿܠ
                 58 ܡܪܡܪܡ ܐ̄ܢܵܐ ܠܹܗ ܠܥܹܝܢ ܚܙܝ̈ܐ ܒܝܲܠܕܵܐ ܕܡܸܢܹܗ.
                 59 :ܠܵܐ ܝܵܗ̣ܒܢܐ ܫܡܲܝܵܐ ܘܐܲܪܥܵܐ ܠܲܡܕܒܼܵܪܘܼ
                 60 ܘܫܒܛܗ ܢܡܠܟ ܥܲܠ ܥܠܝ̈ܐ ܘܥܲܠ ܬܚܬܝܹ̈ܐ.
                 61 :ܒܫܡܵܐ ܕܐܝܼܬܘܼܬܝ ܡ̣ܢ ܫܘܼܪܝܵܐ ܡܫܘܬܸܦ ܐ̄ܢܵܐ ܠܹܗ
                 62 ܘܝܪܬܵܐ ܘܡܪܐ ܣܐܡ ܐ̄ܢܵܐ ܠܹܗ ܕܟܼܠ ܡܐ ܕܒܪܝ̇ܬܼ.
                 63 :ܡܘܠܟܵܢ ܚ̈ܝܐ ܩܒܸܠ ܕܘܝܼܕ ܒܪܸܫ ܡܲܠܟܿܘܼܬܹܗ
                 64 ܘܗܝܡܢ ܘܐܫܪ ܠܕܪ̈ܚܝܼܩܵܢ ܒܲܕ ܒܲܪ̈ܝܼܒܢ.
                 65 :ܒܝܲܕ ܓܠܝ̈ܬܐ ܚ̣ܙܵܐ ܟܣܝ̈ܬܐ ܕܠܵܐ ܡܬܚ̈ܙܝܵܢ
                 66 ܘܒܐܪ̈ܥܢܬ ܪܫܲܡ ܦܠܐܬܼ̈ܐ ܕܲܥܬܼܝܼܪ̈ܬܵܐ.
                 67 :ܒܬܢܘܵܝ ܕܐܓܼܪܐ ܕܲܬܝܼܪ̈ܬܵܐ ܣܲܝܒܲܪ ܥܡ̈ܠܹܐ
                 68 ܘܡܛܠ ܚܘܼܒܵܐ ܕܫܸܡ ܒܵܪܘܿܝܵܐ ܢܛܲܪ ܦܘܼܩܕܵܢܹ̈ܐ.
                 69 :ܫܡ̣ܥ ܕܐܠܵܗܵܐ ܐܠܗ ܟܠܐ ܗ̄ܘ̣ ܘܗܘ̤ ܢܲܩܸܢ ܟܠ
                 70 ܘܠܵܐ ܣܡ ܡܕܡ ܥܲܡ ܡ̇ܪܘܼܬܹܗ ܕܠܵܘ ܠܹܗ ܡܵܘܕܹܐ.
                 71 :ܡ̣ܢ ܦܘܼܩܕܢܵܐ ܐܠܗܝܵܐ ܝܠܦ ܐܝܼܬܘܼܬܹܗ
                 72 ܘܫܪܲܪ ܒܙܘܵܥܘ̈ܗܝ ܕܠܲܝܬ ܫܘܼܪܵܝܵܐ ܠܐܡܝܼܢܘܼܬܹܗ.
                 73 :ܒܢܵܡܘܲܣ ܪܘܼܚܵܐ ܡܸܬܗܓܹܗ ܗ̄ܘ̣ܵܐ ܠܠܲܝ ܐܝܼܡܵܡ
                 74 ܘܒܣܬܝܼܪ̈ܬܵܐ ܕܒܹܗ ܗ̇ܪܸܓ ܗ̄ܘ̣ܵܐ ܪܵܡܫܵܐ ܘܨܲܦܪܵܐ.
                 75 :ܒܚܠܒܼܵܐܐ ܕܡܸܠܵܘ̈ܗܝ ܡܬܬܪܣܹܐ ܗ̄ܘ̣ܵܐ ܐܲܝܟ ܝܲܠܘܼܕܵܐ
                 76 ܘܒܼܣܘ ܟܠܵܘ̈ܗܝ ܡܬܕܪܓ ܗ̄ܘ̣ܵܐ ܠܓܼܡܝܼܪܘܼܬܼܵܐ.
                 77 :ܐܝܟ ܡܚܙܝܼܬܼܵܐ ܩܒܝܼܥ ܗ̄ܘ̣ܵܐ ܟܠܫܵܥ ܩܕܼܵܡ ܪܸܥܝܵܢܹܗ
                 78 ܘܚ̇ܙܐ ܗ̄ܘ̣ܵܐ ܒܹܗ ܝܘܩܢܵܐ ܦܲܐܝܵܐ ܕܫܦܝܪ̈ܬ̇ܐ.
                 79 :ܒܪ̈ܓܼܫܹܐ ܕܠܒܲܪ ܚ̇ܙܐ ܗ̄ܘ̣ܵܐ ܒܹܗ ܐܪ̈ܥܢܝܵܬܼܵܐ
                 80 ܘܒܪܥܝܢܹܗ ܡܬܒܩܹܐ ܗ̄ܘ̣ܐ ܒܕܠܵܐ ܫܘܼܠܵܡ.
                 81 :ܒܚܘܼܒܹܗ ܨܝܼܕ ܗ̄ܘ̣ܵܐ ܨܠܸܡ ܐܬܘܼܬܐ ܕܠܵܐ ܪܘܼܟܒܵܐ
                 82 ܘܟܲܕ ܗ̤ܝ ܟܣܝܵܐ ܠܹܗ ܓܲܠܝܵܐ ܗ̣̄ܘܵܬܼ ܒܗܝܡܢܘܼܬܼܵܐ.
                 83 :ܒܗܝܡܢܘܼܬܼܵܐ ܡܬܒܩܹܐ ܗ̄ܘ̣ܵܐ ܒܕܠܵܐ ܓܲܠ̈ܠܝܵܢ
                 84 ܘܣܝ̈ܡܵܢ ܗܘ̣̈ܝ ܠܹܗ ܐܝܟ ܗܘ̇ ܕܗܘ̣̈ܝ ܒܝܲܕܼ ܣܘܥܪ̈ܢܹܐ.
                 85 :ܐܝܟ ܕܒܨܒܥܵܐ ܡܚܵܘܹܐ ܗܘ̣ܐ ܠܹܗ ܠܚܝܹܠ ܒܵܪܘܿܝܵܐ
                 86 ܕܚ̣ܙܵܘ ܐ̄ܢܫܐ ܠܐܠܗ ܟܠܐ ܒܝܲܕ ܬܘܼܩܢܵܘ̈ܗܝ.
                 87 :ܡ̣ܢ ܫܬܝܼܩܹ̈ܐ ܡܲܠܸܦ ܗ̄ܘ̣ܵܐ ܠܵܗ̇ ܠܲܡܠܝܼܠܘܼܬܼܵܐ
                 88 ܕܚܘܪܘ ܦܪ̈ܘܿܫܹܐ ܒܪܗܛܵܐ ܚܲܪ ܫܵܐ ܘܗܒܼܘ ܬܸܫܒܘܿܚܬܵܐ.
                 89 :ܒܫܦܝܘܼܬ ܩܠܹܗ ܡܙܝܼܥ ܗ̄ܘ̣ܵܐ ܟܢܫܹ̈ܐ ܕܫܡܝ̈ܢܹܐ
                 90 ܠܡܦܪܲܥ ܫܘܒܼܚܵܐ ܠܚܲܝܠܵܐ ܕܚܲܝܸܠ ܠܲܩܢܘܿܡܲܝ̈ܗܘܿܢ.
                 91 ܡܠܝܼ̈ܠܹܐ ܘܚܪ̈ܫܹܐ ܙܡܸܢ ܘܩܪܵܐ ܠܬܘܕܝܼܬ ܟܲܣܝܐ. 
                 92 ܐܲܝܟ ܚܝܒܹܵܐ ܕܲܢܣܲܒܼܘ ܚܝܹܐ ܘܚܵܒܼܘ ܬܘܕܝܼܬܼܵܐ. 

                 f.271r 
                 93 :ܒܩܵܠ ܬܘܼܕܝܼܵܬܐ ܡܥܝܼܕ ܗ̄ܘ̣ܵܐ ܠܵܗ̇ ܠܫܒܪܘܼܬܼ ܐ̄ܢܫܵܐ
                 94 ܘܡ̣ܢ ܡܵܪ̈ܬܐ ܡܕܪܓܼ ܗ̄ܘ̣ܵܐ ܠܵܗ̇ ܠܘܬ ܪ̈ܡܬܼܵܐ.
                 95 :ܒܟܼܢܵܪ ܡ̈ܠܐ ܪܟܸܒܼ ܩ̈ܠܐ ܠܡܦܪܲܥ ܫܘܼܒܼܚ̈ܐ
                 96 ܕܢܨܘܼܬ ܟܠܢܵܫ ܒܝܲܕܼ ܩܪ̈ܢܬܵܐ ܒܘܼܕܵܩ ܐܪ̈ܙܹܐ.
                 97 :ܒܘܡܝܼܪ̈ܬܵܐ ܡܚܬܚܸܬ ܗ̄ܘ̣ܵܐ ܠܗܘܿܢ ܐܝܟ ܕܒܠܩܛܐ
                 98 ܘܟܸܢ ܡܪܡܸܐ ܗ̄ܘ̣ܵܐ ܡܨܝܼܕܬܵܐ ܕܚ̈ܝܹܐ ܥܲܠ ܫܡܘܿܥܵܘ̈ܗܝ.
                 99 :ܒܢܫܒܹ̈ܐ ܕܪܘܼܚܵܐ ܨܐܕ ܗ̄ܘ̣ܵܐ ܠܹܗ ܠܥܲܡܵܐ ܥܲܛܠܵܐ
                 100 ܘܚ̇ܒܫ ܗ̄ܘ̣ܵܐ ܠܹܗ ܠܓܼܵܘ ܡ̣ܢ ܚܸܣ̈ܢܹܐ ܕܡܠܲܬܼ ܚ̈ܝܹܐ.
                 101 :ܦܓܘܼܕ̈ܐ ܕܚܘܼܒܵܐ ܡܪܡܹܐ ܗ̄ܘ̣ܵܐ ܠܹܗ ܠܒܲܥܪܝܼܪܵܝܵܐ
                 102 ܘܡܛܟܸܣ ܗ̄ܘ̣ܵܐ ܪܗܛܵܐ ܕܙܘܥܵܘ̈ܗܝ ܡ̣ܢ ܣܢܝ̈ܬܐ.
                 103 :ܐܝܟ ܗܢܝܘܟܐ ܪܟܝܼܒ ܗ̄ܘ̣ܵܐ ܩܠܹܗ ܥܲܠ ܟܠ ܦܘܼܡܝܼ̈ܢ
                 104 ܘܡܪܗܸܛ ܗ̄ܘ̣ܵܐ ܠܗܘܿܢ ܒܐܘܼܪܚܵܐ ܫܦܝܼܬܵܐ ܕܫܸܡ ܒܵܪܣܘܿܝܵܐ.
                 105 :ܦܐܹܐ ܗ̄ܘ̣ܵܐ ܩܵܠܹܗ ܟܲܕ ܡܲܟܼܪܸܙ ܗ̄ܘ̣ܵܐ ܒܐܕܢܲܝ̈ ܟܠܢܵܫ
                 106 ܘܫܡܥܘ ܗܕܐ ܟܠܟܼܘܿܢ ܥܡܡܹ̈ܐ ܘܨܘܼܬܘ ܦܬܓܡܲܝ̈.
                 107 :ܒܢܝܪܐ ܕܚܘܼܒܵܐ ܪܓܼܝܼܓ ܗ̄ܘ̣ܵܐ ܕܢܹܐܣܘܿܪ ܠܟܼܠܗܘܿܢ ܥܲܡܡܹ̈ܐ
                 108 ܕܢܗܘܘܿܢ ܦܠܚܝܼܢ ܬܚܹܝܬ ܡܪܘܬܼܵܐ ܕܚܝܼܕ ܒܵܪܘܿܝܵܐ.
                 109 :ܒܙܝܢܵܐ ܕܪܘܚܵܐ ܡܬܬܲܫ ܗ̄ܘ̣ܵܐ ܠܘܼܩܒܼܵܠ ܛܘܥܝܝ
                 110 ܟܲܕ ܣܬܪ ܗ̄ܘ̣ܵܐ ܫܸܡ ܚܢܦܘܼܬܵܐ ܘܒܼܢܐ ܫܪܵܪܵܐ.
                 111 :ܛܢܢܵܐ ܠܒܝܼܫ ܗ̄ܘ̣ܵܐ ܐܲܝܟ ܫܪܝܢܵܐ ܕܚܲܕ ܒܵܪܘܿܝܵܐ
                 112 ܘܡܬܟܬܲܫ ܗ̄ܘ̣ܵܐ ܥܲܡ ܐܠܗܹ̈ܐ ܕܬܩܢܘ ܐ̄ܢܫ̈ܐ.
                 113 :ܒܩܵܠ ܦܬܓܡܵܘ̈ܗܝ ܡܦܪܣܹܐ ܗ̄ܘ̣ܵܐ ܠܗܘܿܢ ܠܕܠܵܐ ܐܲܠܵܗ
                 114 ܟܕ ܐܡ̇ܪ ܗ̄ܘ̣ܵܐ ܕܩܢܹܝܢ ܘܠܲܝܬ ܐܲܠܵܗܵܐ ܒܘܝܢܵܐ.
                 115 :ܒܟܼܠ ܬܟܬܘܫܲܝܼ̈ܢ ܗܘ̤ ܙ̇ܟܐ ܗ̄ܘ̣ܵܐ ܒܟܸܣܝܵܐ ܘܓܸܠܝܵܐ
                 116 ܘܥܲܠ ܟܠ ܐܠܗ ܡܫܬܥܠܹܐ ܗ̄ܘ̣ܵܐ ܒܫܸܡ ܒܵܪܘܿܝܵܐ.
                 117 :ܒܟܼܠ ܐܬܪ̈ܘܵܢ ܡ̣ܬܡܥܲܠ ܗ̄ܘ̣ܵܐ ܚܹܝܠ ܙܟܘܬܹܗ
                 118 ܘܒܟܼܠ ܥܡܡܝܼ̈ܢ ܡܬܬܢܹܐ ܗ̄ܘ̣ܵܐ ܢܸܨܚܵܢ ܥܲܡܠܵܘ̈ܗܝ.
                 119 :ܚܲܕ ܗ̄ܘ̣ ܒܠܚܘܿܕ ܗ̄ܘ̣ܵܐ ܘܐܒܸܝܠ ܥܲܠ ܢܸܨܚܵܢ̣ܵܘ̈ܗܝ
                 120 ܘܣܐܵܐ ܕܐ̄ܢܫܵܐ ܕܠܵܐ ܗܲܢܝܼܝܼ ܠܹܗ ܢܨܚܵܢ ܐ̄ܢܫܵܐ.
                 121 :ܚܲܫܵܐ ܠܒܝܼܫ ܗ̄ܘ̣ܵܐ ܠܘܼܩܵܒܼܵܠ ܫܘܼܦܪ̈ܵܘܗܝ ܕܡܲܠܟܵܐ ܓܲܒܼܝܵܐ
                 122 ܟܲܕ ܚ̇ܙܐ ܗ̄ܘ̣ܵܐ ܕܢ̇ܨܚ ܚܘܼܒܹܗ ܘܙ̇ܟܐ ܠܟܼܠܢܵܫ.
                 123 :ܛܢܵܢܵܐ ܕܪܘܓܼܙܵܐ ܠܒܝܼܫ ܡܪܘܕܵܐ ܠܘܼܩܒܼܵܠ ܕܵܘܝܼܕ
                 124 ܘܦܪ̈ܣܹܐ ܨܢܝܼ̈ܥܹܐ ܨܒܼܵܐ ܕܢܪܒܸܒܼ ܐܲܝܟ ܕܥܲܠ ܐܝܼܘܿܒܼ.
                 125 :ܠܗܵܠ ܐܣܪܝܼܦ ܗ̄ܘ̣ܵܐ ܢܘܼܪܵܐ ܕܪܘܓܼܙܵܐ ܒܩܸܢܝܵܢ ܟܹܐܢܵܐ
                 126 ܕܕܼܵܡ ܢܫܡܲܥ ܗ̄ܘ̣ܵܐ ܩܵܠ ܨܘܚ̈ܝܬܐ ܡ̣ܢ ܙܕܝܼܩܵܐ.
                 127 :ܗܪܟܵܐ ܦܚܵܐ ܨܠ̣ܐ ܠܹܗ ܠܐܪܵܐ ܡܪܸܗܒ ܥܡܡܹ̈ܐ
                 128 ܕܐܢܗ̤ܘ ܕܢܸܦܠ ܡܪܝܼܡ ܗ̄ܘ̣ܵܐ ܩܠܹܗ ܥܲܠ ܙܕܝܼ̈ܩܹܐ.
                 129 :ܩܪܵܒܼܵܐ ܟܲܣܝܵܐ ܐܝܬ ܗ̄ܘ̣ܵܐ ܟܠܢܵܫ ܠܘܼܩܒܼܵܠ ܟܹܐܢܵܐ
                 130 ܘܪܒܘܼ ܦܚ̈ܝܢ ܡܥܡܩ ܛ̇ܡܪ ܕܐܝܟܵܢ ܢܙܟܹܐ.
                 131 :ܢܟܼܠܐ ܒܝܼܫܵܐ ܪܟܸܒܼ ܒܝܼܫܵܐ ܥܲܠ ܒܲܪ ܐܝܼܫܲܝ
                 132 ܘܨܕܗ ܠܢܫܒܼܵܐ ܦܐܐ ܒܚܙܬܵܐ ܒܕܡܘܼܬ ܐܵܕܼܵܡ.
                 133 :ܠܩܛܐ ܪܓܼܝܼܓܐ ܚܘܝܹܗ ܠܢܸܫܪܵܐ ܩܲܠܝܼܠ ܓܸܦܹ̈ܐ
                 134 ܘܫܒܲܩ ܪܘܡܗ ܘܲܢܚܸܬ ܠܐܲܪܥܵܐ ܕܢܣܲܒܼ ܐܘܟܼܠܵܐ.
                 135 :ܪܓܲܪܐ ܫܒܬܹܗ ܠܡܠܟܵܐ ܫ̇ܒܐ ܠܥܡܡܹ̈ܐ
                 136 ܘܐܝܟ ܓܲܠܘܝܵܐ ܢܦܲܩ ܘܐܫܬܥܒܲܕ ܠܙܠܝܼܠܘܼܬܵܐ.
                 137 :ܒܓܘ ܥܡܪܬܐ ܕܙܠܝܼܠܘܼܬܐ ܚܒܼܫܹܗ ܛܪܘܢܵܐ
                 138 ܕܠܐ ܬܘܼܒ [ܢܫܲܘ̣ܠ] ܚܝܠܘ̈ܬܹܗ ܒܩܵܠ ܙܟܘܬܹܗ.
                 139 :ܒܐܠܥܵܐ ܪܦܝܼܬܵܐ ܦܪܪܹܗ ܘܫܕܵܝܗܝ ܐܝܟ ܕܒܙܝܢܵܐ
                 140 ܘܐܚܲܕ ܒܐܦܵܘ̈ܗܝ ܬܪܲܥ ܟܘܼܚܕܵܐ ܕܠܵܐ ܢܬܦܠܲܛ.
                 141 ܒܗ̇ܝ ܫܫܠܬܵܐ ܕܐܪܡܝܼ ܒܐܕܵܡ ܦܟܪܹܗ ܠܟܹܐܢܵܐ: 

                 f.271v 
                 142 ܘܐܲܝܟ ܕܒܼܦܐܪܵܐ ܚܲܬܚܸܬ ܚܨܪܹܗ ܒܫܘܦܪܵܐ ܕܐܲܦܹ̈ܐ.
                 143 :ܒܦܹܐܪܵܐ ܩܲܛܠܹܗ ܠܡܲܠܟܵܐ ܕܐܡܸܠܟ ܒܪܫܝܼܬ ܒܐܪܥܵܐ
                 144 ܘܒܚܘܬܚܬܹ̈ܐ ܣܲܚܦܹܗ ܠܕܵܝܼܕ ܒܗܘܬܵܐ ܕܥܘ̣ܠܵܐ.
                 145 :ܪܓܼܝܼܓ ܗ̄ܘ̣ܵܐ ܐܕܵܡ ܘܦܐܹܐ ܕܘܝܼܕ ܥܲܠܠܐ ܢܚܛܘܢ
                 146 ܘܐܲܣܠܝܼ ܐܢܘܿܢ ܒܝܼܫܵܐ ܒܫܟܼܠܹܗ ܠܦܐܚ̈ ܡ̣ܢ ܟܠ.
                 147 :ܢܚ̈ܬܐ ܕܥܘ̣ܠܵܐ ܠܐܒܸܫ ܐܢܘܿܢ ܠܡܠܟܹ̈ܐ ܪ̈ܓܼܝܓܹܐ
                 148 ܘܟܬܡ ܐܸܢܘܿܢ ܒܪܓܲܬܼ ܐܘܼܟܼܠܵܐ ܘܪܓܬ ܦܓܼܪܐ.
                 149 :ܣܡܵܐ ܕܡܘܬܼܵܐ ܡܕܟ ܒܐܘܼܟܼܠܵܐ ܘܪܓܲܬܼ ܦܓܼܪܵܐ
                 150 ܘܐܫܩܝܼ ܐܢܘܿܢ ܬܛܪܐ ܕܠܚܝܼܵܐ ܕܡܲܪܝܼܪܘܼܬܹܗ.
                 151 :ܟܣܐ ܨܚܢܵܐ ܡܙܓ ܒܚܛܝܼܬܼܵܐ ܘܝܗ̣ܒ ܠܹܗ ܠܕܵܘܝܼܕ
                 152 ܘܐܫܬܼܝܼ ܡܢܗ ܘܛܥ̣ܐ ܗܵܘܢܹܗ ܚܲܟܝܼܡ ܡ̣ܢ ܟܠ.
                 153 :ܐܲܝܟ ܕܠܫܒܼܪܵܐ ܚܲܬܚ̣ܬ ܢܓܼܕܹܗ ܠܘܵܬܼ ܦܘܪܓܝܵܐ
                 154 ܘܨܠܵܐ ܦܚܵܐ ܩܕܵܡ ܒܒ̈ܬܹܗ ܘܨܕܹܗ ܒܥܲܝܢܵܘ̈ܗܝ.
                 155 :ܥܲܝܢܵܐ ܪܦܐܝܼܬܼܵܐ ܚܙܬ̤ ܦܲܐܝܘܼܬܼܵܐ ܕܪ̈ܓܫܲܝ ܦܓܼܪܐ
                 156 ܘܐܨܕܬ̤ ܥܝܬܼܵܐ ܒܸܣܪܢܝܬܼܵܐ ܒܒܸܣܪܵܐ ܟܢܵܬܹ̇ܗ.
                 157 :ܒܣܪܵܐ ܠܒܸܣܪܵܐ ܡܬܪܲܓܼܪܲܓܼ ܗ̄ܘ̣ܵܐ ܒܪܓܲܬܼ ܒܸܣܪܵܐ
                 158 ܘܒܼܕܡܘܼܬ ܟܦܢܵܐ ܡܬܝܐܲܒ ܗ̄ܘ̣ܵܐ ܕܢܹܐܟܼܘܿܠ ܦܐܪܐ.
                 159 :ܟ̇ܦܢܐ ܕܥܝܢܹ̈ܐ ܫܚ̇ܩ ܗ̄ܘ̣ܵܐ ܠܹܗ ܠܕܘܝܼܕ ܢܲܟܦܵܐ
                 160 ܘܡܬܦܪܲܣ ܗ̄ܘ̣ܵܐ ܕܐܲܝܟܵܢ ܡܢܲܠܹܐ ܪܓܲܬܼ ܚܨܪܹܗ.
                 161 :ܝܲܨܪܵܐ ܕܠܓܼܵܘ ܪܡ̇ܙ ܗ̄ܘ̣ܵܐ ܠܵܗ̇ ܠܥܲܝܢܵܐ ܕܲܠܒܲܪ
                 162 ܕܚܘܪܝ ܘܐܬܒܩܝ ܕܟܼܡܐܗܲܢܝܼ ܐܘܼܟܼܠܐ ܕܒܸܣܪܵܐ.
                 163 :ܥܝܢܵܐ ܒܥܲܝܢܐ ܨܕܝܼܕܵܐ ܗ̄ܘ̣ܵܬ ܕܠܵܐ ܣܲܒܼܥܘܼܬܼܵܐ
                 164 ܘܗܲܢܝܼܝܼ ܗ̄ܘ̣ܵܐ ܠܵܗ̇ ܕܬܘܼܒܼ ܬܸܬܒܲܩܹܐ ܠܡܓܼܡܪ ܚܘܪܗ̇.
                 165 :ܪܓܲܬ ܦܓܼܪܐ ܫܒܬܗ̇ ܠܥܲܝܢܵܐ ܐܲܝܟ ܕܚܵܘܵܐ
                 166 ܘܠܵܐ ܣܒܼܥܐ ܗ̄ܘ̣ܵܬ ܠܡܚܪ ܒܐܦܹ̈ܐ ܐܲܝܟ ܕܒܸܦܐܪܵܐ.
                 167 :ܚܵܘܵܐ ܒܦܐܪܐ ܬܲܡܝܼܗܵܐ ܗ̄ܘ̣ܵܬ ܕܟܼܡܵܐ ܗܲܢܝܼܝܼ
                 168 ܘܥܝܢܹܗ ܕܕܘܝܼܕ ܒܪܓܼܫܲܝ ܦܓܹܪܐ ܕܟܼܡ̇ܐ ܪܓܼܝܼܓܝܼܢ.
                 169 :ܦܐܪܵܐ ܒܐܘܟܼܠܹܗ ܠܚܵܝܗܝ ܡ̣ܢ ܚܵܘܵܐ ܠܦܘܼܩܕܵܢ ܟܲܣܝܵܐ
                 170 ܘܫܘܼܦܪܵܐ ܕܐܦ̈ܐ ܣܡܹܝܗ ܠܕܵܘܝܼܕ ܡ̣ܢ ܒܘܼܝܵܢܵܐ.
                 171 :ܠܲܝܬ ܗ̄ܘ̣ܵܐ ܡܕܼܡ ܕܲܦܐܐ ܠܚܵܘܵܐ ܡ̣ܢ ܗ̇ܘ ܦܲܐܪܵܐ
                 172 ܘܠܵܐ ܠܒܸܿܪ ܐܝܼܫܲܝ ܣܝܼܡ ܗ̄ܘ̣ܵܐ ܫܘܼܦܪܵܐ ܕܦܚ̇ܡ ܠܕܗ̇ܝ.
                 173 :ܚܲܕ ܗ̄ܘ̣ ܦܲܚܵܐ ܕܨܕ ܠܬܿܪܝܗܘܿܢ ܠܪܲܘܝܼܕ ܘܲܠܗ̇ܝ
                 174 ܠܕܘܝܕ ܒܐܦܵܐ ܘܠܗ̇ܝ ܠܐܦܹ̈ܐ ܕܦܓܪܵܐ ܘܦܓܼܪܵܐ.
                 175 :ܢܨܵܐ ܨܢܝܥ̇ܐ ܚܙܵܐ ܦܵܪܚܬܐ ܕܪܓܲܬܼ ܐܘܟܼܠܵܐ
                 176 ܘܟܼܡܸܢ ܒܐܪܥܵܐ ܘܨܕܗ̇ ܡ̣ܢܫܠܝ ܒܚܵܘܪܵܐ ܣܢܝܵܐ.
                 177 :ܝܵܘܢܵܐ ܫܒܪܬܵܐ ܫܘܢܲܬ̤ ܕܬܣܒܼ ܐܘܟܼܠܵܐ ܠܟܲܪܣܗ̇
                 178 ܘܣܢܵܐܐ ܐܘܫܛ ܕܒܼܩܵܐ ܕܥܵܘܼܠܵܐ ܘܲܡܪܲܛ ܓܸܦܝܹ̈ܗ̇.
                 179 :ܣܠܸܩ ܒܲܪ ܐܝܫܲܝ ܠܡܬܒܩܝܘܼ ܒܦܐܝܘܼܬܼ ܐܲܪܥܵܐ
                 180 ܘܣܡ ܡܪܘܕܵܐ ܩܕܵܡ ܒܵܒܵܬܹ̈ܗ ܚܙ̣ܬܵܐ ܪܦܝܼܬܵܐ.
                 181 :ܪܦܝܹܗ ܠܝܨܪܹܗ ܡ̣ܢ ܚܝܼܨܘܼܬܼܵܐ ܕܪܚܡܲܬܼ ܩܘܼܫܬܼܵܐ
                 182 ܘܐܣܪܹܗ ܠܗܘܢܹܗ ܒܐܦ̈ܐ ܕܐܸܠܥܵܐ ܪܦܝܬ ܦܓܼܪܵܐ.
                 183 :ܠܵܐ ܐܬܒܩܝܼ ܟܕ ܚ̇ܐܪ ܗ̄ܘ̣ܵܐ ܕܒܡܢ ܚ̇ܐܪ
                 184 ܘܠܵܐ ܐܬܥܗܲܕ ܠܗ̇ܝ ܒܲܪܬ ܩܥܵܐ ܕܠܐ ܬܸܬܼܪܓܼܪܓܼ.
                 185 :ܛܥ̣ܐ ܚܟܡ̈ܬܗ ܗ̇ܘ ܟܼܢܪܐ ܙܡ̇ܪ ܩܘܼܫܬܼܵܐ
                 186 ܘܫܲܪܝܼ ܢܩ̇ܫ ܒܡܸܢܝ̈ ܦܓܼܪܐ ܝܩܝܼܪ ܪ̈ܓܼܫܹܐ.
                 187 :ܫܲܚܠܸܦ ܩܵܠܹܗ ܐܒܘܿܒ ܪܘܼܚܵܐ ܚܠܹܐ ܢܥܡ̈ܬܐ
                 188 ܘܪܟܸܒܘ ܩ̈ܠܹܐ ܒܸܣܪ̈ܢܵܝܹܐ ܡܠܹܝܢ ܟܲܪ ܝܘܼܬܼܵܐ.
                 189 :ܪܵܓܼ ܘܐܬܝܥܢ ܠܕܠܵܐ ܕܝܼܠܹܗ ܣ̇ܢܐ ܠܥܘ̣ܠܵܐ
                 190 ܘܫܪ̣ܐ ܣܝܓܼܵܐ ܕܣܡ ܢܵܡܘܿܣܵܐ ܒܐܲܦܲܝ̈ ܝܲܥܢܹ̈ܐ.
                 191 :ܐܪܚܐ ܕܘܝܼܕ ܫܪܐ ܨܝܼܕ ܕܵܘܝܼܕ ܕܠܵܐ ܒܲܟܝܵܕܵܐ
                 192 ܘܚܣ ܥܲܠ ܕܝܼܠܹܗ ܘܥܠܒܼ ܠܕܐ̄ܚܪܝܢ ܘܩܲܪܒܼ ܠܐ̄ܚܪܹܝܢ. 

                 f.272r 
                 193 :ܫܕܲܪ ܐܝܬܝܼ ܢܩܝܵܐ ܕܥܠܕܹܗ ܡܲܠܟܵܐ ܟܹܐܢܵܐ
                 194 ܘܥܒܼܕܗ̇ ܕܒܼܚܵܐ ܠܥܘ̣ܠܵܐ ܢܟܝܼܠܵܐ ܕܫ̣ܪܐ ܨܐܕܵܘܗܝ.
                 195 :ܐܟܠ ܕܘܝܼܕ ܥܡ ܢܟܘܠܐ ܐܘܟܼܠܵܐ ܕܥܘ̣ܠܵܐ
                 196 ܘܐܥܢܝܼ ܢܦܫܹܗ ܥܲܡ ܣܵܩܘܿܪܵܐ ܒܫܩܝܵܐ ܨܚܵܢܵܐ.
                 197 :ܨܐܕ ܥܲܡܡܹ̈ܐ ܒܢܫܒܼܵܐ ܕܪܘܼܚܵܐ ܕܠܵܐ ܡܸܬܦܣܲܡ
                 198 ܨܕܝ̈ܗܝ ܥܝܢܵܘ̈ܗܝ ܒܢܫܒܹ̈ܐ ܪ̈ܦܝܵܐ ܕܒܢܲܝ̈ ܒܲܝܬܹܗ.
                 199 :ܡܪܡܐ ܦܓܘܕܹ̈ܐ ܕܲܟܼܢܝܼܟܼܘܼܬܼܵܐ ܒܦܘܡ ܙܲܠܝܼ̈ܠܹܐ
                 200 ܐܲܙܸܠ ܢܲܦܫܹܗ ܒܚܘܪܵܐ ܣܢܝܵܐ ܕܪܓܲܬܼ ܒܸܣܪܵܐ.
                 201 :ܡܚܬܸܡ ܛܘܼܣܵܐ ܕܫܵܘܬܦܘܼܬܼܵܐ ܒܛܒܼ̈ܥܹܐ ܕܡܸܠܵܘ̈ܗܝ
                 202 ܠܚܵܝܗܝ ܒܲܚܵܝܪܹܗ ܠܐܪܡܝܼ ܐܝܼܕܵܐ ܕܨܒܼܥܵܐ ܕܪܘܼܚܵܐ.
                 203 :ܡܚܬܡ ܐ̄ܢܫܐ ܕܠܵܐ ܐ̄ܢܵܫ ܢܥܠܘܿܒܼ ܠܟܢܘ̈ܬܹܗ
                 204 ܫܢܝܼ ܬܚܘܡܵܐ ܕܣܵܡ ܒܪܘܿܝܵܐ ܒܟܼܝܵܢ ܐ̄ܢܫܵܐ.
                 205 :ܟ̇ܐܹܐ ܒܝܲܥ̈ܢܹܐ ܕܠܵܐ ܢܬܬܢܚܘܢ ܥܲܠ ܕܐ̄ܚܪ̈ܢܐ
                 206 :ܫܡܲܪ ܝܨܪܹܗ ܠܥܠܘܿܒܘܼܬܵܐ ܕܢܫܒܲܝ̈ ܚܲܒܼܪ̈ܘܗܝ
                 207 :ܥܲܝܢܵܐ ܫܦܝܼܬܼܵܐ ܕܒܵܗ̇ ܚ̇ܙܝܢ ܗ̄ܘ̣ܵܘ ܐ̄ܢܫ̈ܐ ܠܟܲܣܝܵܐ
                 208 ܚܫܟܲܬ̤ ܡ̣ܢܫܠܝ ܘܐܸܡ[...]ܟ ܚܸܫܟܵܐ ܥܲܠ ܚܙ̈ܝܹܐ.
                 209 :ܩܵܠ ܫܝܦܘܵܪܐ ܕܡܡܠܠ ܗ̄ܘ̣ܵܐ ܫܸܡ ܐܝܼܬܘܼܬܼܵܐ
                 210 ܒܛܸܠ ܢܗܡ̈ܬܹܗ ܘܠܵܐ ܨܵܬܼܘ ܐ̄ܢܫܐ ܡܥܬܼ ܚܲܝܹ̈ܐ.
                 211 :ܡܦܫܸܩ ܩ̈ܐܐ ܕܣܬܝܼܪ̈ܬܵܐ ܠܠ̇ܐ ܝܼܕܥܬܼܵܐ
                 212 ܚܪܸܫ ܒܘܝܢܹܗ ܘܠܵܐ ܐܸܣܟܲܬ ܣܘܥܪܵܢ ܢܦܫܹܗ.
                 213 :ܨܡܚܵܐ ܦܐܝܵܐ ܕܡܚܘܹܐ ܗ̄ܘ̣ܵܐ ܫܒܝܼܠ ܟܐܢܘܼܬܼܵܐ
                 214 ܛܦܛܸܦ ܘܕܥܟ ܘܲܒܛܸܠ ܪܗܛܹܗ ܕܨܝܕ ܟܹܐܢܘܼܬܼܵܐ.
                 215 :ܡܠܚܵܐ ܕܝܗܒܬ̤ ܛܥܡܵܐ ܚܠܝܵܐ ܠܕܦܟܝܼܗܝܼܢ
                 216 ܦܟܗܬ̤ ܘܗܘܬ̤ ܐܝܟ ܦܪ̈ܝܗܹܐ ܕܠܵܐ ܐܬܡܕܲܟܘ.
                 217 :ܩܢܝܵܐ ܕܪܘܚܵܐ ܕܪܬܒ ܗ̄ܘ̣ܵܐ ܒܹܗ ܣܦܪܵܐ ܡܗܝܼܪܵܐ
                 218 ܐܘܚܕ ܢܦܫܹܗ ܒܐܝܕܵܐ ܕܝܲܨܪܗ ܠܡܟܬܲܒܼ ܒܕܝܵܐ.
                 219 :ܡܥܝܼܪ ܪ̈ܘܚܢܹܐ ܒܩܵܠ ܢܥܡ̈ܬܹܗ ܠܡܸܙܡܲܪ ܫܘܼܒܼܚܵܐ
                 220 ܕܡܟ ܒܚܛܝܼܬܼܵܐ ܘܛܒܥܘ ܪ̈ܓܫܵܘܗܝ ܒܫܢܬܼܵܐ ܕܥܘ̣ܠܵܐ.
                 221 :ܡܙܡܢ ܚܪ̈ܫܹܐ ܠܵܘܵܬܼ ܬܵܘܕܝܼܬܼܵܐ ܕܐܠܗ ܟܠܐ
                 222 ܒܛܸܠ ܟܢܪܹܗ ܘܦܣܩ ܥܘ̣ܠܵܐ ܠܡܢܲܝ̈ ܙܵܘܥܵܘ̈ܗܝ.
                 223 :ܚܠܚܨ ܒܩܪ̈ܒܐ ܘܙ̇ܟܐ ܠܡܲܠܟܹ̈ܐ ܘܒ̇ܐܙ ܥܡܡܹ̈ܐ
                 224 ܚܒܼ ܡ̣ܢ ܐܸܠܥܵܐ ܪܦܝܬ̤ ܚܲܝܠܵܐ ܘܫܝܛܲܬ̤ ܓܘܼܫܡܵܐ.
                 225 :ܐܓܘܢܣܛܵܐ ܕܡܬܢܨܲܚ ܗ̄ܘ̣ܵܐ ܒܟܼܠܝܼܠ ܥܲܡܠܵܘ̈ܗܝ
                 226 ܚܣܢܹܗ ܠܚܨܪܹܗ ܢܕܫܗ̇ ܒܐܪܥܵܐ ܠܓܢ̄ܒܪܘܼܬܹܗ.
                 227 :ܐܚܲܕܼ ܕܲܪܐ ܥܲܡ ܪ̈ܘܚܢܹܐ ܘܥܲܡ ܦܓܼܪ̈ܢܹܐ
                 228 ܐܚܕܗ ܥܘ̣ܠܐ ܘܦܟܼܪ ܘܫܕܝܗܝ ܐܝܟ ܕܠܫܝܼܛܵܐ.
                 229 :ܢܘܣܵܐ ܕܟܝܵܐ ܕܪܘܼܚ ܓܠܝܢܹ̈ܐ ܠܐܗ̈ܝܹܐ
                 230 ܛܡܵܐ ܢܦܫܹܗ ܒܩܩܝܵܐ ܨܲܚܢܵܐ ܕܡܥܝܼܢ ܚܒܼܪܹܗ.
                 231 :ܓܘܼܪܝܵܐ ܕܐܪܝܵܐ ܕܩܛܠ ܐܪܝܵܐ ܘܦܫܚ ܕܐܹܒܵܐ
                 232 ܙܵܥ ܡ̣ܢ ܐܦ̈ܐ ܕܚܝܘܼܬ ܫܸܢܵܐ ܕܡܟܝܟ ܢܝܼܒ̣ܗ̇.
                 233 :ܐܪܝܵܐ ܘܕܐܒܼܐ ܠܵܐ ܐܙܝܼܥܘܼܗܝ ܡ̣ܢ ܬܘܼܟܼܠܢܹܗ
                 234 ܘܕܒ̇ܐ ܕܫܝܢܵܐ ܢܗܡܬ̤ ܡ̣ܢܫܸܠܝ ܘܲܪܥܸܠ ܡܸܢܵܗ̇.
                 235 :ܪܓ ܒܲܪ ܐܝܫܲܝ ܘܡܲܠܝܼ ܝܲܨܪܹܗ ܪܓܲܬ ܦܓܼܪܹܗ
                 236 ܘܫܪܝܼ ܗ̇ܪܓ ܒܲܫܟܝܼܪ̈ܵܬܵܐ ܕܠܵܐ ܦܐܝ̈ܢ ܠܹܗ.
                 237 :ܚܙܵܐ ܕܐܬܦܣܝܼ ܚܨܪܹܗ ܟܲܣܝܵܐ ܒܒܛܢܹܗ ܓܲܠܝܵܐ
                 238 :ܘܫܪܝܼ ܡܪܟܸܒ ܦܘܼܪ̈ܣܹܐ ܨܢܝܼ̈ܥܹܐ ܕܡܘܥܝܼܢ ܩܸܛܥܵܐ
                 239 :ܫܒܲܩ ܥܢܝܢܐ ܕܪ̈ܘܚܢܝܵܬܼܵܐ ܕܥ̇ܢܐ ܗ̄ܘ̣ܵܐ ܒܹܗ
                 240 ܘܲܐܥܢܝܼ ܢܲܦܫܹܗ ܠܡܸܩܪܵܐ ܒܣܸܦܪܹܗ ܕܩ̇ܛܠ ܐ̄ܢܫܵܐ.
                 241 :ܣܦܪܵܐ ܢܟܼܝܐܐ ܟܬܲܒܼ ܠܹܗ ܒܝܼܫܵܐ ܥܲܠ ܚܘܫܒܵܘ̈ܗܝ
                 242 ܘܫܪܝܼ ܗ̇ܓܐ ܐܝܟ ܗܸܕܝܘܛܵܐ ܒܕܠܵܐ ܦ̈ܐܝܵܢ.
                 243 :ܒܚܘܩܐ ܦܬܝܠܐ ܕܪܒܐ ܢܟܝܼܠ̇ܐ ܢܟܝܼܠܵܐ ܡܬܗܓܹܐ ܗ̄ܘ̣ܵܐ
                 244 ܟܕ ܒ̇ܥܐ ܠܡܨ ܛܲܢܵܥܘܼ ܠܡܐ ܫܲܕ ܠܲܕܡܵܐ. 

                 f.272v 
                 245 :ܩܕ̣ܵܐ ܘܐܫܬܪܲܪ ܒܟܬܝܼܒ̈ܬܹܗ ܕܡܨܚ ܙܹܐܦܵܐ
                 246 ܘܝܼܠܦ ܐܵܦ ܗܘ̤ ܠܡܠܒܟ ܩܢܝܵܐ ܟܕ ܒܐܝܼܬ.
                 247 :ܒܢܟܼܠܵܐ ܫܲܕܲܪ ܐܲܝܟ ܓܼܵܫܘܿܫܵܐ ܠܘܵܬܼ ܒܲܪ ܒܲܝܬܹܗ
                 248 ܘܩ̣ܪܵܝܗܝ ܨܐܕܵܘܗܝ ܒܐܣܟܹܝܡ ܚܘܼܒܵܐ ܟܕ ܡܲܛܥܹܐ ܠܹܗ.
                 249 :ܚܙ̣ܵܐ ܐܘ ܪܝܼܵܐ ܢܟܼܠܐ ܕܛܫܐ ܠܓܼܘ ܡ̣ܢ ܡܸ̈ܠܹܐ
                 250 ܘܛܲܫܝܼ ܐܵܦ ܗܘ̤ ܚܨܪܐ ܕܠܸܒܹܗ ܒܐܸܣܟܹܝܡ ܡܸ̈ܠܹܐ.
                 251 :ܫܡ̣ܥ ܕܦܩ̣ܕ ܠܹܗ ܡܲܠܟܵܐ ܕܢܹܐܙܲܠ ܢܚܕܐ ܒܒܲܝܬܹܗ
                 252 ܘܫܵܛ ܠܢܚ̈ܝܹܐ ܒܐܸܣܟܹܝܡ ܚܘܼܒܵܐ ܕܠܘܵܬܼ ܡܵܪܹܗ.
                 253 :ܠܵܐ ܠܲܡ ܚܲܝܲܝ̈ܟ ܡܲܠܟܵܐ ܛܵܒܲܐ ܘܡܠܟܵܐ ܒܐܢܵܐ
                 254 ܕܠܵܐ ܡܚܠܦ ܐ̄ܢܵܐ ܚܘܒܵܟ ܪܒܵܐ ܙܒܼܢܵܐ.
                 255 :ܚܙ̣ܵܐ ܒܲܪ ܐܝܫܲܝ ܕܙܟܼܐ ܒܥܕܗ ܠܗ ܦܟ̈ܬܹܗ
                 256 ܘܩܛܲܪ ܐ̄ܪܙܵܐ ܥܲܡ ܚܘܫܒܵܘ̈ܗܝ ܠܡܟܬܒܼ ܥܘ̣ܠܵܐ.
                 257 :ܠܒܟܼܘ ܗܕܡܵܘ̈ܗܝ ܩܒܝܵܐ ܕܓܪܕܗ ܚܨܪܐ ܒܝܼܫܵܐ
                 258 ܘܫܪܝܼ ܪܫ̇ܡ ܥܲܠ ܩܪܛܲܝܣܵܐ ܕܡܵܐ ܙܟܝܵܐ.
                 259 :ܩܢܝܐ ܕܡܘܬܵܐ ܠܒܟ ܗ̄ܘ̣ܵܐ ܒܐܝܕܗ ܩܢܝܐ ܕܪܘܼܚܵܐ
                 260 ܘܗܦܟܗ ܛܟܼܣܵܐ ܫܪܝܼ ܟ̇ܬܸܒܼ ܡ̣ܢ ܬܵܙ ܠܐܠܦ.
                 261 :ܟܲܕ ܪܘܼܚ ܩܘܼܕܫܵܐ ܟ̇ܬܸܒܼ ܗ̄ܘ̣ܵܐ ܒܗ ܬܪܝܼܨ ܗ̄ܘ̣ܵܐ ܚܘܼܩܹܗ
                 262 ܘܡ̣ܢ ܕܐܚܕܬܹܗ ܨܒܼܥܗ ܕܒܝܼܫܵܐ ܕܘܕܗ ܠܛܟܼܣܹܗ.
                 263 :ܣܡܵܐ ܕܡܘܬܐ ܛܒ̣ܥ ܒܐܓܲܪܬܐ ܘܝܗ̣ܒ ܠܐܘܿܪܝܵܐ
                 264 ܕܢܐܙܲܠ ܢܫܬܐ ܠܗܠ ܡ̣ܢ ܡܲܠܟܵܐ ܕܠܵܐ ܢܬܦܪܣܹܐ.
                 265 :ܫܩ̣ܠ ܬܡܝܼܡܵܐ ܣܲܝܦܵܐ ܕܚܫܠܹܗ ܚܨܪܐ ܢܟܝܼܠܵܐ
                 266 ܘܐܙܠ ܐܘܒܠ ܠܩܣܛܘܢܪܐ ܕܢܸܦܣܘܿܩ ܪܫܹܗ.
                 267 :ܐܘ ܐܝܙܓܕܵܐ ܕܛܥܝܼܢ ܡܘܬܵܐ ܥܲܠ ܟܬܦܬܹ̈ܗ
                 268 ܘܡܙܲܝܝ ܠܹܗ ܐܲܝܟ ܡܘܗܗܒܬܵܐ ܠܫܪܚ ܚܲܝܵܘ̈ܗܝ.
                 269 :ܚܬܝܼܪ ܗ̄ܘ̣ܵܐ ܘܐܙ̇ܠ ܒܛܒܼܵܥܐ ܕܡܲܠܟܵܐ ܕܣܝܼܡ ܗ̄ܘ̣ܵܐ ܒܐܝܼܕܘ̈ܗܝ
                 270 ܘܠܵܐ ܝ̇ܕܥ ܗ̄ܘ̣ܵܐ ܡܵܘܬܵܐ ܛܒܹܐ ܗ̄ܘ̣ܵܐ ܠܓܵܘ ܡ̣ܢ ܛܒܼܥܵܐ.
                 271 :ܚܙܲܩ ܐܘܼܪܝܼܵܐ ܡ̣ܢ ܨܝܕ ܡܲܠܟܵܐ ܘܡܘܬܹܗ ܥܲܡܹܗ
                 272 ܘܡܗ ܠܟ ܗ̄ܘ̣ܵܐ ܥܲܡ ܩܵܛܘܿܠܹܗ ܘܚܕܐ ܘܲܦܨܝܼܚ.
                 273 :ܡܢܲܥ ܘܡܛܵܐ ܠܘܵܬܼ ܡܫܪܝܼܬܼܵܐ ܕܥܒܼܕ̈ܝ ܡܵܪܹܗ
                 274 ܥܲܠ ܘܐܸܬܚܘܝܼ ܩܕܵܡ ܪܲܒܚܵܐܐ ܡܕܒܲܪ ܥܲܡܹܗ.
                 275 :ܝܗ̣ܒ ܠܹܗ ܫܠܡܵܐ ܘܛܒܼܥܹܗ ܕܡܲܠܟܵܐ ܕܨܝܼܪ ܒܹܗ ܡܵܘܬܵܐ
                 276 ܘܚܕܝ ܕܫܘܐ ܕܢܸܗܘܹܐ ܡܝܒܠ ܡܸܠܲܬ ܡܲܠܟܵܐ.
                 277 :ܣܒܪ ܚܠܫܵܐ ܕܕܫ̈ܢܐ ܫ̇ܩܠ ܠܐܝܼܙܓܲܕܘܼܬܹܗ
                 278 ܘܠܐ ܝ̇ܕܥ ܗ̄ܘ̣ܵܐ ܕܚܝܵܘ̈ܗܝ ܝ̇ܗܒ ܐܝܟ ܚܲܝܵܒ̣ܵܐ.
                 279 ܫܪܵܝܗܝ ܪܒܚܝܵܐܐ ܠܛܒܼܥܹܗ ܕܡܲܠܟܵܐ ܕܣܝܼܡ ܗ̄ܘ̣ܵܐ ܒܐܝܼܵܕ̈ܘܗܝ.
                 280 ܘܬܡܗ ܣܲܓܝܼ ܕܐܝܟܵܢ ܟܐܢܵܐ ܣܛܵܐ ܡ̣ܢ ܐܘܼܪܚܵܐ.
                 281 :ܩܪ̣ܐ ܠܐܓܪܬܵܐ ܘܚ̣ܙܵܐ ܢܸܟܼܠܵܐ ܕܟܸܣܐ ܒܓܵܘܵܗ̇
                 282 ܘܗ̣ܦܟ ܛܒܥܗ̇ ܘܣܬܪܹܗ ܠܢܟܼܠܵܐ ܒܓܼܵܘ ܚܘܼܫܵܒܵܘ̈ܗܝ.
                 283 :ܚܙ̣ܵܐ ܟܲܕ ܢܗ̇ܒ ܡܵܘܬܼܵܐ ܒܚܘ̈ܩܐ ܕܟܬܝ̈ܒܬܼܵܐ
                 284 ܘܝܼܕܲܥ ܠܸܒܹܗ ܕܓܸܙܪܐ ܩܨ ܠܹܗ ܡܲܠܟܵܐ ܘܲܫܪܵܝܗܝ.
                 285 :ܒܓܵܘ ܢ̇ܡܪܬܐ ܕܟܬܝܼܒ̈ܬܐ ܚܒܼܫܹܗ ܕܵܘܝܼܕ
                 286 ܘܫܕܪܹܗ ܠܝܘܐܒܼ ܕܲܚܙܝܼ ܘܲܫܪܝܼܘܗܝ ܚܲܟܝܼܡܐܝܼܬ.
                 287 :ܣܸܥܘܿܪ ܠܲܡ ܥܲܡܵܐ ܘܛܟܸܣ ܣܸܕܪܹ̈ܐ ܕܚܝܠܘ̈ܬܐ
                 288 ܘܒܐܣܟܹܝܡ ܩܹܐܪܣܵܐ ܟܡܵܐ ܢܟܼܠܐ ܕܠܵܐ ܢܸܬܼܒܕܲܩ.
                 289 :ܥܒܸܕ ܠܐܘܪܝܼܵܐ ܒܪܸܫ ܡܲܫܪܝܼܬܵܐ ܐܝܟ ܙܟܝܵܐ
                 290 ܘܐܲܗܦܸܟ ܐܦܝ̈ܟ ܡ̣ܢ ܥܘܼܕܪܢܹܵܗ ܕܢܒܼܠܠ ܘܲܢܡܘܼܬ.
                 291 ܫܲܡܠܝܼ ܝܘܐܒܼ ܨܒܼܝܵܢ ܡܲܠܟܵܐ ܐܝܟ ܕܐܸܬܼܦܩܲܕ
                 292 ܘܡܝܼܬ ܐܘܼܪܝܼܵܐ ܘܚܒܼ ܙܲܟܵܝܐ ܡܨܚ ܥܘ̣ܠܵܐ. 

                 f.273r 
                 293 :ܟܬܲܒܼ ܪܒܚܝܐܵܐܬ ܘܐܘܕܲܥ ܠܕܵܘܝܼܕ ܟܠܡܵܐ ܕܗܵܘ̤ܵܐ
                 294 ܕܗܵܐ ܡܝܼܬ ܜܒܼܕܵܟ ܫܲܡܠܵܐ ܡܸܟܹܝܠ ܪܓܲܬܼ ܢܲܦܫܵܟ.
                 295 :ܫܡܲܥ ܒܲܪ ܐܝܼܫܝ ܕܡܝܼܬ ܐܘܼܪܝܼܵܐ ܘܢܚ ܡ̣ܢ ܩܸܢܛܵܐ
                 296 ܘܠܵܐ ܝ̇ܕܥ ܗ̄ܘ̣̇ܐ ܕܡܘܬܹܗ ܡܣܓܹܐ ܩܸܢܛܵܐ ܠܚܲܝܵܘ̈ܗܝ.
                 297 :ܓܡ̣ܪ ܨܒܝܼܢܹܗ ܡܠܟܵܐ ܟܐܢܵܐ ܒܓܼܘܪܐ ܘܩܛܠܵܐ
                 298 ܘܫܕܲܪ ܕܒܼܪܗ̇ ܠܐ̄ܢܬܬ ܚܲܒܼܪܹܗ ܐܲܝܟ ܕܒܟܹܐܢܘܼ.
                 299 :ܣܒܼܪ ܚܟܼܝܡܵܐ ܕܚܲܟܝܼܡܵܐܝܼܬ ܣܥ̣ܪ ܗ̇ܝ ܕܣܥܪ
                 300 ܘܠܵܐ ܝ̇ܕܥ ܗ̄ܘ̣ܵܐ ܕܗܕܝܘܛܐ ܗ̄ܘ̣ܵܬ ܩܕܵܡ ܝ̇ܕܥ ܟܠ.
                 301 :ܪܢܐ ܠܹܗ ܡܠܟܐ ܕܡܢܘ ܒܕܩ ܐܪ̈ܙܝ ܡܲܠܟܵܐ
                 302 ܘܡܢܘ ܕܸ[...]ܫܹܐ ܠܪܫܐ ܕܩܒܼܝܼܥ ܠܥܸܠ ܡ̣ܢ ܓܘܼܫܡܵܐ.
                 303 :ܦܘܪܿܣܹܐ ܨܢܝ̈ܥܐ ܙܩ̣ܪܘ ܚܘܼܫܵܒܵܘ̈ܗܝ ܒܕܡܘܼܬ ܢܚܬܐ
                 304 ܘܟܣܝܗ ܠܥܘ̣ܠܹܗ ܡ̣ܢ ܚܲܙ̈ܝܹܐ ܘܡ̣ܢ ܚ̇ܙܐ ܟܠ.
                 305 :ܘܡܢܘܼ ܟܣܝܹܗ ܠܨܠܸܡ ܟܲܣܝܵܐ ܡ̣ܢ ܪܸܥܝܵܢܹܗ
                 306 ܕܗ̇ܘ ܚܙܝܵܐ ܕܨܝܼܪ ܗ̄ܘ̣ܵܐ ܟܣܝܵܐ ܩܕܼܵܡ ܥܘܗܕܢܹܗ.
                 307 :ܡܢܘܼ ܫܬܩ ܩܵ[ܠ] ܫܝܦܘܪܵܐ ܕܢܒܼܝܼܘܼܬܹܗ
                 308 ܕܗ̇ܘ ܕܐܡ̇ܪ ܕܐܝܼܬܵܘܗܝ ܟܣܝܵܐ ܒܪܘܡܵܐ ܘܥܘܼܡܩܵܐ.
                 309 :ܡܢܘܼ ܦܣܩ ܟܢܵܪ ܡܸܢܵܘܗܝ ܕܟܸܢܵܪ ܪܘܚܵܐ
                 310 ܘܫܲܠܝܼ ܙܡܪܵܐ ܕܩܵܠ ܢܥܡ̈ܬܹܗ ܒܲܣܝܼܡ̈ܬܐ.
                 311 :ܡܢܘܼ ܥܘܼܟܹܗ ܠܪܗܛܵܐ ܕܐܘܼܪܚܹܗ ܕܪܗ̇ܛ ܫܲܦܝܼܪ
                 312 ܘܒܲܛܠ ܘܝܼܬܸܒ ܡ̣ܢ ܦܘܼܠܚܵܢܵܐ ܕܪ̈ܘܚܢܝܬܵܐ.
                 313 :ܡܢܘܼ ܨܕܗ ܠܛܒܼܝܵܐ ܙܪܝܼܢܵܐ ܒܢܫܒܹ̈ܐ ܕܥܵܘ̣ܠܵܐ
                 314 ܘܝܗܒܹܗ ܐܘܟܼܠܵܐ ܠܪܓܲܬܼ ܦܲܓܼܪܵܐ ܕܠܵܐ ܡܣܬܒܼܥܵܐ.
                 315 :ܡܢܘܼ ܚܲܒܼܫܹܗ ܠܐܪܝܵܐ ܕܚܝܼܠܵܐ ܒܓܼܵܘ ܢ̇ܡܪܬܐ
                 316 ܘܐܲܗܸܠܘ ܘܓܚܸܟܘ ܬܥ̈ܠܐ ܫܝܼܛܹ̈ܐ ܥܲܠ ܡܘܼܟܵܟܹܗ.
                 317 :ܡ̇ܢ ܐܪܡܝܼ ܒܹܗ ܦܓܼܘܕܵܐ ܕܫܸܬܩܵܐ ܒܪܥܡܵܐ ܕܩ̈ܠܹܐ
                 318 ܕܡܝܸܒܕ [ܕ...] ܗ̄ܘ̣ܵܐ ܥܲܡ ܪ̈ܘܼܚܢܹܐ ܫܘܼܒܼܚܵܐ ܠܟܼܣܝܵܐ.
                 319 :ܡܢܘܼ ܫܓܫܹܗ ܠܨܢܝܼܥ ܡ̣ܢ ܟܠ ܒܝܲܕ ܚܘܬܚ̈ܬܹܐ
                 320 ܘܗܘ̤ܵܐ ܫܒܼܪܐ ܡܩܢܐ ܛܲܥܡܵܐ ܠܕܦܟܝܼܗܝܼܢ.
                 321 :ܡ̇ܢ ܟܲܝ ܬܒܲܪ ܕܪ̈ܥܹܐ ܕܐܝܕܵܘ̈ܗܝ ܕܓܢܒܵܪ ܚܲܝܠܵܐ
                 322 ܘܦܵܫ ܡ̣ܢ ܢܝܼܫܵܐ ܕܚ̇ܢܐ ܗ̄ܘ̣ܵܐ ܠܹܗ ܒܙܘܥܲܝ̈ ܢܲܦܫܹܗ.
                 323 :ܡ̣̇ܢ ܟܲܝ ܥܘܼܪܗ̇ ܠܥܝܢܵܐ ܫܦܝܼܬܵܐ ܕܗܲܝܡܵܢܘܼܬܹܗ
                 324 ܘܚܫܟ ܗܘܢܹܗ ܡ̣ܢ ܕܠܡܸܚܙܐ ܠܟܣܝܵܐ ܒܵܙܘܥܵܘ̈ܗܝ.
                 325 :ܡ̇ܢ ܟܝ ܐܡܝܼܬ ܦܓܼܪܐ ܘܢܲܦܫܹܗ ܕܫܪܝܼܪ ܟܠܹܗ
                 326 ܘܗܘ̤ܐ ܢܣܝܣܵܐ ܒܝܲܕ ܡܚܘ̈ܬܐ ܕܣܡ ܒܗ ܝܲܨܪܹܗ.
                 327 :ܒܥܘܠ̣ܵܐ ܣܢܝܵܐ ܢܦ̣ܠ ܗ̄ܘ̣ܵܐ ܕܘܝܼܕ ܐܝܟ ܕܒܟܐܒܼܵܐ
                 328 ܘܒܗܸܬ̣ ܡܠܟܼܵܐ ܕܢܓܼܠܐ ܟܠܒܹܐ ܠܥܝܼܢ ܚܙ̈ܝܹܐ.
                 329 :ܐܣܝܵܐ ܕܪܘܡܵܐ ܚܙ̣ܵܐ ܒܲܪ ܒܲܝܬܹܗ ܕܪܡܐ ܒܥ̣ܘܠܵܐ
                 330 ܘܫܕܲܪ ܨܐܕܘܗܝ ܢܒܝܼܵܐ ܚܲܒܼܪܹܗ ܕܢܲܐܣܹܐ ܟܹܐܒܹܗ.
                 331 :ܐܣܝܵܐ ܕܪܘܼܚܵܐ ܫܕܲܪ ܨܐܕܵܘܗܝ ܕܢܘܣܵܐ ܕܪܘܼܚܵܐ
                 332 ܕܢܪܕܘܿܦ ܥܘ̣ܠܵܬ ܘܢܗܦܸܟ ܪܘܼܚܵܐ ܠܗܝܟܠ ܢܲܦܫܹܗ.
                 333 :ܒܩܵܠ ܟܢܪܵܐ ܕܢܒܝܼܘܬܵܐ ܨܒܼܐ ܕܲܢܥܝܼܪܝܼܘܗܝ
                 334 ܠܕܡܟܐ ܕܛܒܥ ܒܝܘܩܪܵܐ ܕܥܘ̣ܠܵܐ ܐܝܟ ܕܒܫܢܬܼܵܐ.
                 335 :ܣܡܵܐ ܕܪܘܼܚܵܐ ܝܗ̣ܒ ܠܹܗ ܪܸܡ[...]ܐ ܠܐܣܝܵܐ ܕܪܘܼܚܵܐ
                 336 [...]ܐܙܠ ܢܐܣܹܐ ܦܓܼܪܵܐ ܕܒܲܣܒܸܣ ܥܘ̣ܠܵܐ ܢܣܝܵܐ.
                 337 :ܐܬܼܵܐ ܢܬܢ ܨܝܕ ܒܲܪ ܐܝܼܫܲܝ ܐܝܟ ܕܐܬܦܩܲܕ
                 338 ܘܐܪܡܝܼ ܐܝܕܵܐ ܘܓܵܫܹܗ ܠܟܹܐܒܵܐ ܘܲܚ̣ܙܵܐ ܕܲܥܣܸܩ.
                 339 :ܚܙ̣ܵܐ ܕܠܐ ܦܐܝܵܐ ܕܢܩܪܸܒܼ ܠܹܗ ܓܙܪܵܐ ܩܫܝܵܐ
                 340 ܕܠܡܵܐ ܢܡܛܹܐ ܚܫܵܐ ܠܢܦܫܵܐ ܘܬܼܫܲܢܹܐ ܠܵܗ̇.
                 341 :ܣܡܵܐ ܢܝܼܚܵܐ ܨܒܼܵܐ ܕܢܡܕܟ ܒܝܲܕ ܦܠܐܬܵܐ
                 342 ܕܕܡ ܢܬܪܟܟ ܥܒܼܝܐ ܕܥܘ̣ܠܵܐ ܒܣܲܡܵܐ ܕܪܘܼܚܵܐ. 

                 f.273v 
                 343 :ܫܪܝܼ ܢܬܢ ܡܪܟܸܒܼ ܡ̈ܠܐ ܐܲܝܟ ܣܡܡܢܹ̈ܐ
                 344 ܘܕܘܝܼܕ ܛܒܼܝܥ ܐܝܟ ܕܒܫܢܬܼܵܐ ܘܠܵܐ ܡܐܒܿܝܼܢ.
                 345 :ܬܪܹܝܢ ܠܲܡ ܓܲܒܼܪ̈ܝܢ ܗܘ̤ܘ ܒܩܪܝܼܬܼܵܐ ܚܲܕ ܥܲܡ ܚܒܼܪܹܗ
                 346 ܚܲܕ ܥܬܝܼܪܐ ܘܚܲܕ ܡܣܟܢܵܐ ܡܠܟܵܐ ܘܥܲܒܼܕܹܗ.
                 347 :ܗ̇ܘ ܥܬܝܪܵܐ ܩܢܐ ܗ̄ܘ̣ܵܐ ܣܘ̣ܓܼܐܐ ܕܥ̈ܢܐ ܘܬܵܘܪܹ̈ܐ
                 348 ܘܗ̇ܘ ܡܸܣܟܢܵܐ ܩܢܹܐ ܗ̄ܘ̣ܵܐ ܢܩܝܵܐ ܚܕܵܐ ܒܲܠܚܘܿܕܹܝܗ̇.
                 349 :ܐܬ̣ܐ ܐܲܪܚܵܐ ܠܗ̇ܘ ܥܬܝܼܪܵܐ ܕܩܢܹܐ ܣܲܓܝܼ
                 350 ܢܩܝܗ ܕܗ̇ܘ ܡܸܣܟܢܵܐ ܘܩܛܠ ܩܘܼܕܡܵܘܗܝ.
                 351 :ܕܘܢ ܟܐܢܐܝܼܬ ܐܲܝܟ ܒܘܼܚܪܵܢܵܐ ܕܦܪܘܿܫܘܼܬܵܟ
                 352 ܘܚܝܒ ܥܘ̣ܠܐ ܙܘ̇ܟܐ ܩܘܼܫܬܵܐ ܐܝܟ ܕܡܥܕ ܐܲܢ̄ܬ.
                 353 :ܚܙܝܼ ܠܵܐ ܬܣܒܼ ܒܐܦܹ̈ܐ ܒܕܝܼܢܵܐ ܕܐܬܪܲܒܼ ܠܵܟ
                 354 ܕܥܲܠ ܫܘܘܕܝܵܐ ܕܕܝܼܢܵܟ ܟܹܐܢܵܐ ܩܪܒܬܹܗ ܠܵܟ.
                 355 :ܪܡܙܵܐ ܟܣܝܵܐ ܫܠܚܢܝ ܨܐܕܝܟ ܪܡܙܢܐܝܼܬ
                 356 ܕܐܹܠܦ ܡܢܟ ܫܪܝܐ ܕܥܘ̣ܠܐ ܘܙܟܼܘܬ ܩܘܼܫܬܼܵܐ.
                 357 :ܫܡܲܥ ܒܼܲ ܐܝܫܲܝ ܛܠܘܡܝܵܐ ܕܛܠ̣ܡܘ ܐ̄ܢܫ̈ܐ ܒܐܪܥܵܐ
                 358 ܘܛܢ ܘܐܥܙܲܙ ܥܲܠ ܥܠܘܒܼܵܐ ܕܥܲܠܒܼ ܚܒܼܪܹܗ.
                 359 :ܕܝܼܢܵܐ ܟܹܐܢܵܐ ܥܒܲܕ ܥܲܠ ܢܦܫܹܗ ܟܕ ܠܵܐ ܝ̇ܕܥ
                 360 ܕܝܝ ܗ̄ܘ̣ ܡܪܝܐ ܕܚܝܒܼ ܡܘܬܵܐ ܗ̄ܘ̣ ܕܥܒܼܕ ܗܵܕܹܐ.
                 361 :ܦܣܩܵܐ ܟܐܢܵܐ ܦܣܩ ܥܲܠ ܢܫܦܹܗ ܢܵܡܘܿܣܝܼܬ
                 362 ܘܚܬܩ ܛܲܒܼܠܹܗ ܒܫܡܵܐ ܚܲܝܵܐ ܕܫܸܡ ܒܵܪܘܿܝܵܐ.
                 363 :ܓܙܪ ܠܘܼܚܡܵܐ ܕܡܘܬܼܵܐ ܩܫܝܵܐ ܥܲܠ ܥܠܘܿܒ̣ܵܐ
                 364 ܘܐܪܡܝܼ ܐܲܝܕܵܐ ܒܐ ܦܦܣܝܼܣ ܕܫܘܼܠܵܡ ܚܲܝܵܘ̈ܗܝ.
                 365 :ܘܡܵܢܵܐ ܬܥܒܸܕ ܐܘ ܒܲܪ ܐܝܼܫܲܝ ܒܬܲܪ ܡܸܠܲܝ̈ܟ
                 366 ܕܗܵܐ ܐܬܚܝܲܒܼܬ ܒܓܼܙܪ ܕܝܼܢܵܐ ܕܦܣܩ ܦܘܼܡܵܟ.
                 367 :ܗܵܐ ܓܙܪܬ ܡܵܘܬܼܵܐ ܒܟܬܝܼܒ̈ܬܟ ܘܣܡܬ ܒܹܝܬܼ ܐܪ̈ܟܹܐ
                 368 ܘܐܪܡܝܼܬ ܐܝܼܕܵܐ ܒܩܘܼܛܪܵܓ ܜܘܼܠܵܡ ܕܫܘ̇ܐ ܠܡܵܘܬܵܐ ܐ̄ܢܬ.
                 369 :ܢܒܝܼܵܐ ܕܪܘܚܐ ܚ̣ܙܵܐ ܕܐܬܚܝܲܒܼ ܡܠܟܵܐ ܒܡܸܠܵܘ̈ܗܝ
                 370 ܘܛܒܼܝܥ ܠܸܒܹܗ ܘܠܵܐ ܡܬܒܝܢ ܕܗܘ̤ ܠܹܗ ܕܐܸ̇ܢ.
                 371 :ܐܪܝܡ ܢܵܬܢ ܩܠܹܗ ܘܐܡ̣ܪ ܡ̣ܢ ܦܘܼܩ ܟܲܣܝܵܐ
                 372 ܕܐܢ̄ܬ ܗ̄ܘ̣ ܓܲܒܼܪܐ ܕܣܥ̣ܪ ܗܕܹܐ ܡܲܠܟܵܐ ܢܒܼܝܵܐ.
                 373 :ܐܲܢ̄ܬ ܗ̄ܘ̣ ܕܥܠܒܼܬ ܠܕܠܵܐ ܕܝܼܠܵܟ ܟܕ ܣܓܼܝ ܠܵܟ
                 374 ܘܐܢ̄ܬ ܗ̄ܘ̣ ܕܐܫܲܕܬ ܕܡܵܐ ܙܟܝܵܐ ܒܝܲܕ ܨܢ̈ܥܬܿܟ.
                 375 :ܠܟ ܐܝܼܬ ܢܫܹ̈ܐ ܕܩܢ̈ܝܵܢ ܫܘܦܪܐ ܘܣܝܼ̈ܡܵܢ ܬܵܓܼܵܢ
                 376 ܘܠܵܐ ܣܒܼܥ ܚܨܪܵܐ ܥܕܡܵܐ ܕܚܲܛܲܦܬ ܐܢܬܬ ܚܲܒܪܵܟ.
                 377 :ܪܓܲܬ ܒܸܣܪܵܐ ܫܒܼܵܬܵܟ ܕܵܘܥܕ ܠܒܲܪ ܡ̣ܢ ܛܲܟܼܣܵܐ
                 378 ܘܪܓܬ ܥܝܢܵܟ ܘܪܓܼ ܨܒܼܝܢܵܟ ܘܩܛܠ ܝܲܨܪܵܟ.
                 379 :ܠܡܢܵܐ ܛܥܝܬܗ̇ ܠܗ̇ܝ ܒܪܬ ܩܠܵܐ ܕܒܓܼܘ ܣܦܪܹ̈ܐ
                 380 ܕܠܵܐ ܠܲܡ ܬܪܓܼ ܐܢ̄ܬܬ ܚܒܼܪܟ ܕܠܵܐ ܬܸܬܦܪܣܐ.
                 381 :ܠܡܢܵܐ ܠܚܝܬܝܗܝ ܠܗ̇ܘ ܦܬܓܼܡܵܐ ܡ̣ܢ ܪܥܝܢܵܟ
                 382 ܕܐܫܲܕ ܠܕܡܐ ܕܡܹܗ ܢܬܐܫܕ ܚܠܦ ܗ̇ܘ ܕܐܫ̇ܕ.
                 383 :ܠܡܵܢܵܐ ܛܫܝܼܬ ܣܘܼܪܚܵܢ ܢܦܫܵܟ ܡ̣ܢ ܝ̇ܕܥ ܟܠ
                 384 ܘܠܵܐ ܐܬܥܗܲܕܬ ܗ̇ܝ ܕܐܢ̄ܬ ܐܢܸܒܼܬ ܕܒܚ̇ܪ ܠܒܵܐ ܗ̄ܘ̣.
                 385 :ܠܵܘ ܐܲܢ̄ܬ ܐܡܪܬ ܕܒܼܟܼܠ ܐܝܼܬܵܘܗܝ ܒܪܘܡܵܐ ܘܥܘܼܡܩܵܐ
                 386 ܘܠܵܐ ܡܨܐ ܛ̇ܫܐ ܡ̣ܢ ܥܒܘܿܕܵܐ ܥܒܕܐ ܕܐܝܼܕܵܘ̈ܗܝ.
                 387 :ܐܝܟܵܘ ܩܠܵܟ ܕܡܬܪܓܸܡ ܗ̄ܘ̣ܐ ܒܐܕܢܲܝ̈ ܐ̄ܢܫܵܐ
                 388 ܛܘܼܒܼܘܗܝ ܠܐܝܢ̇ܐ ܕܠܐ ܐܫܬܘܬܲܦ ܥܲܡ ܥܘ̈̇ܠܐ.
                 389 :ܠܵܘ ܐܢܐ ܓܒܝܬܟ ܐܝܟ ܕܠܹܐܢܵܐ ܘܐܣܠܝܼܬ ܥܘ̣ܠܐ
                 390 ܠܡ̇ܢ ܠܐ ܩܘܝܬ ܠܘܵܬ ܓܲܒܼܝܘܬܵܐ ܕܡܫܝܼܚܘܼܬܵܟ.
                 391 :ܚܛ̣ܝܬ ܘܐܬܛܫܝܼܬ ܡ̣ܢ ܟܐܢܘܼܬܼܵܐ ܐܲܝܟ ܥܵܪܘܿܩܵܐ
                 392 ܘܠܵܐ ܝ̇ܕܥ ܗ̄ܘ̣ܝܬ ܕܢܩܝܼܦܵܐ ܗ̣̄ܘܵܬ ܒܬܲܪ ܥܘ̣ܠܟ.
                 393 ܒܗܸܬܼܬܿ ܡ̣ܢ ܐ̄ܢܫܵܐ ܘܠܵܐ ܒܗܸܬܬ ܡ̣ܢ ܫܸܡܝ ܕܩܝܼܫ ܡ̣ܢܟܠ: 

                 f.274r 
                 394 ܘܟܣܝܼܬ ܥܘ̣ܠܵܟ ܒܢܚܬܵܐ ܥܦܝܼܦܵܐ ܕܕܡܵܐ ܛܠܝܼܡܵܐ.
                 395 :ܥܲܠ ܕܐܸܣܬܲܬܲܪܬ ܐܲܝܟ ܥܪܘܿܩܵܐ ܡ̣ܢ ܟܘܼܘܢܵܐ
                 396 ܗܵܐ ܓܠܐ ܐ̄ܢܵܐ ܠܥܹܝܢ ܚܙ̈ܝܹܐ ܦܘܼܪܣܵܝ ܥܘ̣ܠܵܐ.
                 397 :ܥܲܠ ܕܐܫܬܛܝܼܬ ܒܐܢ̄ܬܬ ܚܲܒܼܪܵܟ ܙܲܠܝܼܠܐܝܼܬ
                 398 ܗܵܐ ܝܗ̇ܒܢܐ ܢܫܝ̈ ܥܲܪܣܵܟ ܠܙܠܝܼܠܘܼܬܵܐ.
                 399 :ܕܩܛܠܬܿ ܘܐܫܕܬ ܕܡܵܐ ܙܲܟܵܝܵܐ ܕܠܵܐ ܐܣܟܸܠ ܒܵܟ
                 400 ܠܵܐ ܬܘܼܒ ܬܥܢܕ ܚܪܒܵܐ ܕܡܵܘܬܼܵܐ ܡ̣ܢ ܝ̈ܠܕܬܵܟ.
                 401 :ܕܡܲܟܸܕܬ ܩܘܼܫܬܼܵܐ ܘܐܪܝܼܡܬ ܩܲܪܢܵܐ ܕܙܲܠܝܼܠܘܼܬܼܵܐ
                 402 ܠܵܐ ܢܪܝܼܡ ܙܪܥܵܟ [ܡܸܟܹܝܠ] ܪܸܫܹܗ ܩܕܼܵܡ ܪ̈ܕܘܦܵܘܗܝ.
                 403 :ܚܙ̣ܵܐ ܒܲܪ ܐܝܫܲܝ ܕܨܕܗ ܪܡܙܵܐ ܕܓܠܐ ܠܹܗ ܟܠ
                 404 ܘܐܟܸܣ ܥܘ̣ܠܗ ܘܦܪܣܝܼ ܚܛܝܼܬܹܗ ܟܲܕ ܠܵܐ ܨ̇ܒܐ.
                 405 :ܚܙ̣ܵܐ ܟܐܢܘܼܬܵܐ ܕܐܚܝܼܡܵܐ ܠܗ ܥܲܙܝܼܙܵܐܝܼܬ
                 406 ܘܐܡܸܟ ܩܵܠܹܗ ܐܝܟ ܚܲܝܵܒܼܵܐ ܕܚܵܒܼ ܘܐܬܡܫܟܢ.
                 407 :ܚܙ̣ܵܐ ܘܐܬܦܪܣܝܼ ܢܟܼܠܐ ܕܪܟܸܒܼ ܒܓܼܵܘ ܚܘܼܫܵܒܵܗ̈ܝ
                 408 [...]ܚܝܒܼ ܗܘ̤ ܠܹܗ ܕܠܵܘ ܟܐܢܐܝܼܬ ܚܵܒܼ ܘܐܬܛܫܝܼ.
                 409 :ܒܩܵܠܵܐ ܪܵܡܵܐ ܩܛܪܓܼ ܥܘ̣ܠܹܗ ܩܕܵܡ ܝܵܕܲܥ ܟܠ
                 410 ܕܐܢܐ ܐ̄ܢܵܐ ܕܪܓ̇ܬ ܘܓܕܬܼ ܩܛܠܸܬ ܘܟܫܝܼܬ ܣܘܼܪܚܵܢܝ.
                 411 :ܐ̄ܢܐ ܐ̄ܢܐ ܕܐܬܵܐ ܐܪܚܵܐ ܕܥܘ̣ܠܵܐ ܥܪܨ ܥܠ ܪܸܥܝܵܢܝ
                 412 ܘܚܬܚܸܬ ܢܓܕܢܝ ܠܘܵܬܼ ܦܘܼܪܓܵܝܵܐ ܕܙܠܝܼܠܘܼܬܼܵܐ.
                 413 :ܐܢ̄ܐ ܐܢ̄ܐ ܕܚ̇ܣܬ ܕܐܚܕܐ ܒܢܩܦܐ ܢܡܘܣܝܵܐ
                 414 ܘܛܘܿܫܬ ܬܫܘܼܝܬܝ ܒܝܲܕ ܫܘܼܚܛܵܐ ܕܕܠܵܐ ܢܡܘܿܣ.
                 415 :ܐ̄ܢܐ ܐܢ̄ܐ ܕܛܡ̇ܪܬ ܦܚܹ̈ܐ ܕܢܕܠܵܐ ܠܬܡܝܼܡ ܠܸܒܵܐ
                 416 ܘܐ̄ܢܐ ܐܢ̄ܐ ܕܐܫܕܸܬ ܕܡܵܐ ܙܲܟܝܵܐ ܕܠܵܐ ܐܣܟܸܠ ܒܝܼ.
                 417 :ܚܨܪܵܐ ܒܝܵܫܐ ܛܡ̣ܪ ܠܝܼ ܦܚܵܐ ܒܪ̈ܓܼܫܹܐ ܕܠܒܲܪ
                 418 ܘܨܕܢܝ ܥܘ̣ܠܵܐ ܒܢܫܒܵܐ ܕܐܦܹ̈ܐ ܕܐܠܥܐ ܕܦܝܼܬܵܐ.
                 419 :ܥܘ̣ܠܵܐ ܥܘܪܵܢܝ ܡ̣ܢ ܒܘܼܝܵܢܵܐ ܕܦܪܘܿܫܘܼܬܵܐ
                 420 ܘܠܵܐ ܐܬܒܩܝܼܬ ܟܕ ܪܕܐ ܐ̄ܢܵܐ ܒܲܫܒܝܼܠ ܙܹܐܦܵܐ.
                 421 :ܚ̇ܒܸܬ ܡܸܟܹܝܠ ܘܠܵܐ ܣ̇ܦܩ ܐ̄ܢܵܐ ܠܘܵܐ ܦܘܪܥܢܵܐ
                 422 ܘܪܒܘ ܥܡܠܝ̈ܢ ܠܵܐ ܡܬܦܚܡܝܼܢ ܠܘܼܩܒܼܵܠ ܣܲܟܼܠܘܼܬܝ.
                 423 :ܙܥܘܪ̈ܝܢ ܡܝ̈ܐ ܕܝܲܡܵܐ ܪܲܒܵܐ ܕܢܫܝܓܘܢܵܢܝ
                 424 ܘܠܵܐ ܡܬܚܣܹܐ ܥܘ̣ܠܵܐ ܕܩܢܘܿܡܝ ܒܐܪ̈ܥܢܝܵܬܐ.
                 425 :ܪܲܒܐ ܗ̄ܝ̣ ܣܲܟܼܠܘܼܬܝ ܘܠܵܐ ܡܬ ܡܫܚܵܐ ܚܛܝܼܬܼܵܐ ܕܚ̇ܛܹܝܬ
                 426 ܘܙܥܘܿܪ ܝܲܡܵܐ ܕܢܫܝܼܓ ܨܐܬܼܐ ܕܥܘ̣ܠܵܐ ܕܩܢܘܿܡܝ.
                 427 :ܚܙܵܝܗܝ ܨܒܼܝܢܵܐ ܗ̇ܘ ܕܚܙܐ ܠܹܗ ܥܕܠܐ ܢܚܛܐ
                 428 ܕܢܲܓܸܕ ܗܘ̤ ܠܹܗ ܐܝܟ ܕܝ̇ܢܐ ܠܚܲܝܵܒܼ ܢܦܫܵܐ.
                 429 :ܚܙ̣ܝܗܝ ܕܐܬܡܟܲܟ ܘܢܦ̣ܠ ܠܸܒܹܗ ܡ̣ܢ ܬܘܼܟܼܠܹܗ
                 430 ܘܝܗܒ̣ ܠܹܗ ܐܝܕܵܐ ܕܕܠܡܵܐ ܢܸܦܣܘܿܩ ܣܒ̣ܪܐ ܕܚܲܝܵܘ̈ܗܝ.
                 431 :ܪܡ̣ܙ ܠܹܗ ܪܡܙܵܐ ܠܐܣܝܵܐ ܕܐܬ̣ܐ ܕܢܚܠܸܡ ܟܸܐܒܹܗ
                 432 ܕܣܝܼܡ ܠܹܗ ܣܲܡܵܐ ܡܠܹ̈ܐ ܕܢܝܼ̇ܝܢ ܥܲܠ ܟܘܼܬܡ̈ܬܹܗ.
                 433 :ܡܲܠܠ ܥܲܡܹܗ ܒܣܝܡܐܠܝܼܬ ܒܩܵܠ ܦܬܼܓܡܲܝ̈ܟ
                 434 ܘܐܦܠ ܒܐܸܕܢܵܘ̈ܗܝ ܣܒܪܬܵܐ ܕܚܲܝܹ̈ܐ ܕܚ̇ܢܝܢ ܡܓ̇ܢ.
                 435 :ܓܠܝܼ ܘܐܡ̣ܪ ܠܹܗ ܐܝܬ ܗܘ̣ ܣܲܡܵܐ ܕܡܐܣܹܐ ܥܘ̣ܠܵܐ
                 436 ܐܸܢ ܝܗܒ ܐܲܢ̄ܬ ܛܝܼܡ̈ܐ ܬܘܵܬܼܵܐ ܘܚܫ̈ܐ ܕܢܦܫܵܐ.
                 437 :ܡܠܸܠ ܪܘܼܚܵܐ ܒܟܸܢܵܪ ܢܵܬܢ ܥܲܡ ܒܲܪ ܐܝܫܲܝ
                 438 ܕܗܵܐ ܐܦܝܼܣܘܼܗܝ ܪ̈ܚܡܐ ܠܟܣܝ̇ܐ ܕܢܬܪܥܹܐ ܠܵܟ.
                 439 :ܗܵܐ ܕܒܸܩ ܠܝܼ ܐ̄ܪܙܢܐܝܼܬ ܕܫܒܝܼܩ ܥܘ̣ܠܵܟ
                 440 ܘܠܵܐ ܡ̇ܐܬ ܐܢܬ ܚܠܵܦ ܣܡܠܘܼܬܵܟ ܐܲܝܟ ܡܵܠ ܕܣܒܼܪܬ.
                 441 :ܗܵܐ ܟܠܝܗܝ ܪܸܡܙܵܐ ܠܩܣܟܘܢܵܪܐ ܢܡܣܝܵܐ
                 442 ܕܢܚܡܘܿܠ ܣܝܦܹܗ ܠܓܼܵܘ ܡ̣ܢ ܪ̈ܚܡܹܐ ܐܠܗ̈ܝܹܐܢ
                 443 :ܡܵܘܬܼܵܐ ܕܚܝܼܠܵܐ ܡܛܝܲܒܼ ܗܘ̣ܵܐ ܠܵܟ ܡ̣ܢ ܢܵܡܘܿܣܵܐ
                 444 ܘܢܲܣܲܒܼ ܒܐܦܲܝ̈ܟ ܕܠܵܐ ܢܸܫܬܲܒܼܗܲܪ ܣܵܢܵܐܐ ܒܡܵܘܬܵܟ. 
                 445 ܗܝܘ̤ܘ ܨܵܕܵܟ ܒܝܲܕ ܫܘܼܓܫ̈ܘܗܝ ܕܢܚܕܐ ܒܫܸܦܒܵܟ: 

                 f.274v 
                 446 ܘܐܸܢ ܡܐ̇ܬ ܐܢܬ ܣܓ̇ܐ ܓܘܼܡܕܵܐ ܠܘܼܩܒܵܠ ܟ̣ܐܢܹ̈ܐ.
                 447 :ܠܸܐ ܝܗ̇ܒܢܵܐ ܐܲܬܼܪܵܐ ܠܓܼܘܼܡܕܹܗ ܠܡܬܪܘܪܒܘܼ
                 448 ܕܠܵܐ ܢܬܥܝܲܕ ܠܡܐܫܲܕ ܠܲܕܡܵܐ ܒܥܠܲܬܼ ܥܘ̣ܠܵܐ.
                 449 :ܒܵܟ ܕܵܪܸܫܢܵܐ ܐܘܼܪܚܵܐ ܚܲܕܬܵܐ ܠܬܝܒܘܼܬܵܐ
                 450 ܕܢܒܗܲܬܼ ܒܝܼܫܵܐ ܟܕ ܡܬܚܢܢܝܢ ܒܪ̈ܚܣ ܒܛܲܝܒܘ.
                 451 :ܒܵܟ ܨܐܪ ܐ̄ܢܐ ܨܠܡܵܐ ܦܲܐܝܵܐ ܕܫܸܡ ܛܲܝܒܘܼܬܼܵܐ
                 452 ܕܗܘܝܵܐ ܣܢܐܓܼܪܐ ܚܠܦ ܚܛܝܹ̈ܐ ܒܫܘܼܠܵܡ ܙܒܢ̈ܐ.
                 453 :ܒܵܟ ܡܩܥܹܐ ܐ̄ܢܵܐ ܣܒܼܪܐ ܛܒܼܵܐ ܠܲܕܠܵܐ ܣܲܒܪܵܐ
                 454 ܕܣ̇ܓܹܝܢ ܪ̈ܚܡܹܐ ܠܥܘ̣ܠܵܐ ܕܐ̄ܢܫܐ ܘܚܝܐܝܢ ܡܓܼܢ.
                 455 :ܝ̇ܕܥ̇ ܐ̄ܢܵܐ ܠܹܗ ܠܝܲܨܪܵܐ ܒܝܼܫܵܐ ܕܟܝ̣ܵܢ ܐ̄ܢܵܫܵܐ
                 456 ܕܡܚ̣ܝܠ ܣܓܝܼ ܠܡܥܙܝܘܼ ܩܕܼܵܡ ܚܘܬܚ̈ܬܹܐ.
                 457 :ܒܵܟ ܣܐܡ ܐ̄ܢܐ ܚܡܝܼܪ ܚܲܝܘܼܬܵܐ ܕܡܲܚܐ ܠܐ̄ܢܫܵܐ
                 458 ܘܡ̣ܢ ܝܘܒܠܵܟ ܡܩܝܼܡ ܐ̄ܢܵܐ ܦܐܪܐ ܕܥ̇ܛܐ ܥܘ̣ܠܵܐ.
                 459 :ܒܗܵܕܹܐ ܬܢܘܝܼ ܥܛܝܹܬ ܣܟܼܠܘܼܬܵܟ ܒܣܲܡܵܐ ܕܪ̈ܚܡܹܐ
                 460 ܕܐܕܪܘܿܫ ܐܘܼܪܚܵܐ ܩܕܵܡ ܗ̇ܘ ܕܐܬ̇ܐ ܠܡܫܒܲܩ ܥܘ̣ܠܵܐ.
                 461 :ܡܢ̇ܟ ܕܢ̇ܚ ܗ̇ܘ ܕܡܬܠܚ ܫܛܪ ܚܝܒܹ̈ܐ
                 462 ܘܗܵܐ ܚܘܝܼܬܹܗ ܠܐ̄ܪܵܙ ܡܹܐܬܝܼܬܹܗ ܒܥ̣ܘܠܵܐ ܕܐܒܘܼܗܝ.
                 463 :ܒܢܡܘܿܣ ܡܠܵܘ̈ܗܝ ܡܒܛܸܠ ܩ̈ܠܹܐ ܕܢܛܘܼܪܵܬܵܐ
                 464 ܘܡܨܲܚ ܟ̇ܬܒ ܚܢܵܢܵܐ ܘܪ̈ܚܡܹܐ ܠܓܼܵܘ ܡ̣ܢ ܣܸܦܪ̈ܵܘܗܝ.
                 465 :ܒܕܡܗ ܟ̇ܬܒ ܫܛܵܪ ܚܐܪܘܼܬܼܵܐ ܠܒܢܲܝ̈ ܓܸܢܣܹ݂ܗ
                 466 ܘܡܬܠܚ ܠܗ̇ ܠܕܝܬܩܹܐ ܕܥܒܕܘܼܬ ܐ̄ܢܵܫܵܐ.
                 467 :ܘܡܛܠܗܕܹܐ ܠܐ ܝܗ̇ܒܬܼ ܠܹܗ ܐܬܕܹܐ ܠܡܵܘܬܵܐ
                 468 ܕܢܸܩܛܘܿܠ ܚܝ̈ܟ ܒܥܠܲܬܼ ܥܵܘ̣ܠܵܐ ܕܥܒܼܘܼܬ ܥܒܼܕܹ̈ܐ.
                 469 :ܒܥܠܲܬ ܥܘ̣ܠܵܐ ܗܘ̤ܘ ܡܝܘܬܐ ܥܒܼܕ̈ܐ ܠܡܘܬܐ
                 470 ܗܵܐ ܨ̇ܐܪ ܐ̄ܢܐ ܫܛܵܪ ܚܝܒܹ̈ܐ ܒܦܘܼܨܵܝ ܚܲܝܲܝ̈ܟ.
                 471 :ܚܙܝܼ ܒܲܪ ܐܝܫܲܝ ܛܡܵܐ ܐܚܒܼܬܵܟ ܡܣܒ̇ܬ ܒܐܦܲܝ̈ܟ
                 472 ܘܫܪܹܝܬ ܢܡܘܿܣܝ ܕܐܲܢ̄ܬ ܠܐ ܬܗܘܹܐ ܥܒܼܕܵܐ ܠܡܵܘܬܐ.
                 473 :ܐܦܠܐ ܢܵܡܘܿܣܝ ܠܵܐ ܒܲܛܠܬܹܗ ܡ̣ܢ ܬܒܥܬܹܗ
                 474 ܪ̈ܚܡܹܐ ܝܗܒ̇ܬ ܫܘܚܕܵܐ ܚܠܵܦܝܟ ܘܕܲܥܝܼܬܹܗ ܠܵܟ.
                 475 :ܐܦ ܟܐܢܘܼܬܼܵܐ ܠܵܐ ܗ̄ܘ̣ܵܐ ܡܸܛܥܵܐ ܛܥܬ̤ ܥܘܼܗܕܢܵܗ̇
                 476 ܪܫܝܼܡ ܗ̄ܘ̣ ܒܣܸܦܪܵܗ̇ ܚܘܩܵܐ ܕܥܘ̣ ܠܵܟ ܥܲܡ ܟܠ ܕܚ̣ܛܘ.
                 477 :ܗܪܟܵܐ ܠܚܬܗ ܠܫܸܡ ܣܟܼܠܘܼܬܵܟ ܡ̣ܢ ܢܡܘܿܣܵܐ
                 478 :ܠܵܐ ܗ̄ܘ̣ܵܐ ܡ̣ܢ ܗ̇ܘ ܟܬܒܼܵܐ ܟܣܝܵܐ ܕܪ ܫܝܼܡ ܒܝܕܲܥܬܝ
                 479 :ܗܵܐ ܫܒܼܝܼܩ ܥܘ̣ܠܵܟ ܒܡܠܹܐ ܙܒܼܢܵܐ ܠܦܘܼܬ ܢܡܘܿܣܵܐ
                 480 ܙܸܠ ܛܝܒܼ ܠܵܟ ܕܒܼܚܹ̈ܐ ܕܚܘܼܒܵܐ ܠܚ̈ܝܹܐ ܕܠܗܠ.
                 481 :ܗܵܐ ܚܘܼܝܼܢܵܟ ܫܒܼܝܼܠ ܚܵܘܣܵܢܐ ܕܕܪܫܘܼܗܝ ܪ̈ܚܡܹܐ
                 482 ܚܙܘܩ ܒܹܗ ܒܥܡܠܵܐ ܘܐܠܸܦ ܐ̄ܢܫܵܐ ܠܡܪܕܵܐ ܥܡܵܟ.
                 483 :ܗܵܐ ܝܗܒ̣ܬ ܠܵܟ ܐܝܼܕܼܵܐ ܕܣܒܼܪܐ ܕܬܦܢܐ ܠܚܲܝܹ̈ܐ
                 484 ܣܡܘܟ ܠܐܒܝܕ̈ܐ ܘܠܒܸܒ ܐܢܘܿܢ ܒܩܵܠ ܫܘܼܒܼܩܵܢܵܐ.
                 485 :ܗܵܐ ܦܨܝܼܬܵܟ ܡ̣ܢ ܢܡܘܿܣܵܐ ܕܠܚܝܼܡ ܗ̄ܘ̣ܵܐ ܠܵܟ
                 486 ܦܨܵܐ ܛܠܝܼܡ̇ܐ ܡ̣ܢ ܛܵܠܘܿܡܵܐ ܘܚܘܢ ܘܐܬܪܚܲܡ܀
                 487 :ܫܡܲܥ ܚܛܝܵܐ ܕܡܝܼܬ ܒܲܚܛܝܼܬܼܵܐܗ ܩܵܠ ܫܘܒܼܩܢܵܐ
                 488 ܘܢܵܕ ܡ̣ܢ ܡܵܘܬܼܵܐ ܐܝܟ ܕܡ̣ܢ ܫܸܢܬܐ ܘܦܢܵܐ ܠܚܲܝܹ̈ܐ.
                 489 :ܚܙܵܐ ܕܗܘ̤ܵܘ ܠܹܗ ܣܢܐ ܓܼܪܹ̈ܐ ܒܕܝܼܢܵܐ ܚܠܵܦ ܣܲܟܼܠܘܼܬܹܗ
                 490 ܘܫܪܝܼ ܕܢܦܝܣ ܕܢܦܢܐ ܠܕܲܪܓܼܐ ܕܪܫܢܘܼܬܹܗ.
                 491 :ܡܐܩܢܲܛ ܗ̄ܘ̣ܵܐ ܕܕܵܡ ܠܐ ܡܚܬܡ ܫܛܵܪ ܫܘܒܼܩܢܹܗ
                 492 ܘܡܬܟܫܲܦ ܗ̄ܘ̣ܵܐ ܕܢܪܡܹܐ ܐܝܕܵܐ ܪܡܵܙܐ ܚܠܵܦܵܘܗܝ.
                 493 ܦܢ̣ܐ ܕܢܪܟܸܒ ܩ̈ܠܐ ܚܢܝܼܓ̈ܐ ܒܟܸܢܵܪ ܡܸܢܵܘ̈ܗܝ: 

                 f.275r 
                 494 ܕܟܒܪ ܢܦܢܐ ܠܦܪ ܗܣܝܵܐ ܕܠܘܵܬ ܡܵܪܹܗ.
                 495 :ܒܩܸܢܛܵܐ ܫܪܹܐ ܗ̄ܘ̣ܵܐ ܟܲܕ ܛܵܒܼ ܩܲܒܸܿܠ ܫܘܼܒܼܩܵܢ ܥܵܘ̣ܠܵܗ
                 496 :ܘܠܵܐ ܫ̇ܠܐ ܗ̄ܘ̣ܵܐ ܡ̣ܢ ܕܢܲܟܢܸܫ ܣܢܸܐܓܪܹ̈ܐ ܚܠܵܦܵܘܞܝ
                 497 :ܓܠܝܵܐ ܗ̄ܘ̣ܵܬ ܠܹܗ ܟܲܕܼ ܛܵܒܼ ܩܲܒܸܠ ܫܪܝ ܣܟܼܠܘܼܬܹܗ
                 498 ܕܕܵܡ ܠܐ ܫܘܐ ܢܦܥܐ ܢܗܲܠܸܠ ܪܘܼܚܢܵܐܝܼܬ.
                 499 :ܐܵܦ ܗܵܕܹܐ ܡܬܟܫܲܦ ܗ̄ܘ̣ܵܐ ܒܩܵܠ ܚܢ̈ܓܼܬܐ
                 500 ܕܢܩܘܵܫ ܕܪܚܵܐ ܒܟܸܢܵܪ ܢܦܫܹܗ ܐܝܟ ܕܒܩܕܡܵܐ
                 501 :ܚܙ̣ܵܝܗܝ ܒܵܪܘܿܝܵܐ ܕܲܪܓܝܼܓ ܚܨܪܹܗ ܕܢܬܪܓܸܡ ܒܹܗ
                 502 :ܘܦܢܐ ܝܗ̤ܝ ܠܹܗ ܚܝܹܠ ܒܘܕܩܵܐ ܕܥܬܼܝܼܕ̈ܬܵܐ
                 503 :ܢܣܲܒܼ ܡܘܗܒܼܬܵܐ ܕܫܪܝܵܐ ܗ̄ܘ̣ܵܬ ܒܹܗ ܩܕܵܡ ܣܲܟܼܠܘܼܬܹܗ
                 504 ܘܫܪܝ ܙܡ̇ܪ ܪܘܚܢܐܝܼܬ ܩ̈ܠܐ ܚܢܝܼ̈ܓܹܐ.
                 505 :ܥܕܡܵܐ ܠܐܡܬܝ ܬܸܛܥܝܼܢܝ ܡܪܝܵܐ ܐܲܝܟ ܕܠܲܒܝܼܫܵܐ
                 506 ܥܕܡܵܐ ܠܐܡܲܬܝ ܬܗܩܟ ܐܦܝ̈ܟ ܡ̣ܢ ܒܲܪ ܒܲܝܬܵܟ.
                 507 :ܥܕܡܵܐ ܠܐܡܬܝ ܬܣܝܼܡ ܬܟܼܪܝܼܬܐ ܒܓܼܵܘ ܚܘܫܒܲܝ̈
                 508 :ܡܕ ܚ̇ܙܐ ܐ̄ܢܵܐ ܚܣܕܵܐ ܕܣܟܼ̈ܠܹܐ ܕܡܡܲܩܝܼܢ ܒܝܼ
                 509 :ܐܠܵ[ܗ]ܝ ܐܲܠܵܗܝ ܠܡܵܢܵܐ ܫܒܩܬܢܝ ܡ̣ܢ ܪ̈ܕܘܿܦܲܝ
                 510 ܘܐܪܚܸܩ ܥܘܼܕܪܵܢܝ ܒܡܲܡܠܠܐ ܣܲܝܢܵܐ ܕܡܠܠ ܣܦܘ̈ܬܝ.
                 511 :ܝ̇ܕܥ ܐܢ̄ܐ ܓܹܝܪ ܕܥܘ̣ ܠܗ̇ ܫܩܠܗ̇ ܠܙܟܘܼܬܝ ܡ̣ܢ ܪܸܫܝ
                 512 ܘܥܲܠ ܗ̇ܝ ܪܕܦ ܣܢܵܐܐ ܠܚܲܝ̈ ܕܠܵܐ ܚܵܘܿܣܵܢܵܐ.
                 513 ܠܵܐ ܛܠܝܵܐ ܠܝܼ ܕܡܛܠ ܣܲܟܼܠܘܼܬܝ ܐܘܼܠܨܢܲܝ̈.
                 514 :ܘܫܪܝܼܪܵܐ ܠܝܼ ܕܚܵܘ ܒܲܝ̈ ܐܥܝܼܪܘ ܩܐܪܣܵܐ ܠܘܼܩܒܵܠܝ
                 515 ܠܵܘ ܥܘܕܪܢ̇ܐ ܕܲܠܘܹܐ ܗ̄ܘ̣ܵܐ ܠܝܼ ܙܥܲܪ ܘܐܸܬܒܲܨܲܪ.
                 516 :ܐܢܐ ܗ̄ܘ̣ ܕܙܥܪܬ ܡ̣ܢ ܛܘܝܒܼܵܐ ܕܪܸܚܡܵܬ ܕܩܘܼܫܬܼܵܐ
                 517 ܡܦܣ ܐ̄ܢܵܐ ܕܚܛܝܬ ܘܡܸܛܠ ܣܲܟܼܠܘܼܬܝ ܡܸܬܢܓܕ ܐ̄ܢܵܐ.
                 518 ܘܠܵܘ ܥܲܠ ܢܕܕ̈ܝ ܡܬܟܫܲܦ ܐ̄ܢܵܐ ܐܸܠܵܐ ܥܲܠ ܥܵܘ̣ܠܵܝ.
                 519 :ܗܵܕܹܐ ܒܠܚܘܿܕ ܡܦܝܼܣ ܐ̄̈ܢܵܐ ܠܪܸܡܙܵܐ ܕܡܢܓܕ ܠܝܼ
                 520 ܕܠܵܐ ܩܲܫܝܵܐܝܼܬ ܢܗܘܹܐ ܡܲܪܕܘܬܝ ܐܸܠܵܐ ܒܚܵܣܵܢ.
                 521 :ܠܵܐ ܠܲܡ ܬܟܣܢܝ ܡܵܪܝܵܐ ܒܪܘܓܼܙܵܐ ܥܲܙܝܼܙܵܐܝܼܬ
                 522 ܘܠܵܐ ܬܚܘܹܐ ܠܝܼ ܐܦܹ̈ܐ ܕܚܸܡܬܵܐ ܕܠܵܐ ܬܲܪܥܘܼܬܼܵܐ.
                 523 :ܒܢܓܕܵܐ ܢܚܲܝ̈ܐ ܪܕܝܼܢܝ ܐܲܝܟ ܕܦܐܐ ܠܒܣܝܼܡܘܼܬܵܟ
                 524 ܕܕܠܡܵܐ ܢܘܠܸܕ ܚܲܫܵܐ ܕܡܲܪܕܘܼܢܝ ܪܛܢܵܐ ܣܢܝܵܐ.
                 525 :ܚܫܵܐ ܪܒܵܐ ܛܥܝܼܢ ܗ̄ܘ̣ܵܐ ܟܹܐܢܵܐ ܒܓܼܵܘ ܪܥܝܢܹܗ
                 526 ܟܕ ܛܵܒܼ ܫܡܥܗ̇ ܠܗ̇ܝ ܒܪܬ ܩܵܠܵܐ ܕܫܒܝܼܩ ܥܵܘ̣ܠܵܟ.
                 527 :ܐܘ ܙܕܝܼܩܵܐ ܕܝܗ̣ܒ ܠܹܗ ܪܸܡܙܵܐ ܫܛܪ ܚܘܒ̈ܬܹܗ
                 528 ܘܗ̣ܦܟ ܣܡܹܗ ܬܚܬ ܟܐܢܘܼܬܼܵܐ ܐܝܟ ܚܝܼܒܵܐ.܆
                 529 :ܐܘ ܐܲܬܠܝܟܵܐ ܕܚܒܼ ܒܐܓܼܘܢܵܐ ܘ̣ܣܡܟܗ ܪܸܡܙܵܐ
                 530 ܘܠܵܐ ܨܒܼܐ ܕܢܣܝܼܡ ܟܠܝܼܠ ܫܘܼܒܩܢܵܐ ܕܠܐ ܙܟܼܘܬܵܐ.
                 531 :ܐܘ ܥܝܼܪ ܟܠܫܵܥ ܕܛܒܼܥ ܩܲܠܝܼܠ ܒܫܢܵܬܐ ܕܥܵܘ̣ܠܵܐ
                 532 ܘܠܵܐ ܣܟܡ ܥܡܠܹ̈ܐ ܕܫܒܚ̈ܬܹܗ ܠܘܼܩܒܼܵܠ ܥܘ̣ܠܵܐ.
                 533 :ܬܵܘ ܚܛܝ̈ܐ ܚܙ̣ܵܘ ܚܛܝܵܐ ܕܚܛܐ ܘܲܦ̣ܫܵܐ
                 534 ܘܩܘܫ ܒܕܡܘܼܬܹܗ ܒܬܪܲܥ ܪ̈ܚܡܹܐ ܕܪܸܡܙܵܐ ܟܹܐܢܵܐ.
                 535 :ܬܵܘ ܙܕܝܼܩ̈ܐ ܚܙ̣̱ܵܘ ܙܕܝܼܩܵܐ ܕܚܵܒܼ ܒܚܛܝܬܵܐ
                 536 ܘܛܪܘ ܣܝܡ̈ܬܐ ܕܪ̈ܥܝܢܲܝܟܿܘ ܡ̣ܢ ܓܲܢܵܒܼܵܐ.
                 537 :ܬܵܘ ܦܪ̈ܘܿܫܹܐ ܚܙ̣ܵܘ ܚܲܙܝܵܐ ܕܚܵܪ ܘܐܣܬܡܝ
                 538 ܘܲܥܡܲܨܘ ܥܝܢܹ̈ܐ ܕܚܘܫܒܲܝ̈ܟܘܿܢ ܡ̣ܢ ܣܢܝ̈ܬܐ.
                 539 :ܐܸܢ ܚܲܙܝܵܐ ܕܣܬܝܪ̈ܬܵܐ ܦܗ̣ܵܐ ܒܲܚܝܵܪܹܗ
                 540 ܡ̇ܢ ܠܵܐ ܢܪܡܹܐ ܢܚܬܼܵܐ ܢܟܼܦܵܐ ܥܲܠ ܒܒ̈ܬܹܗ.
                 541 :ܐܢ ܩܕܝܼܫܵܐ ܛܡܐ ܢܦܫܹܗ ܒܚܸܙܘܵܐ ܕܐܦܹ̈ܐ
                 542 ܡ̇ܢ ܠܐ ܢܛܲܟܸܣ ܪܲܗܛܵܐ ܕܥܲܝܢܵܘ̈ܗܝ ܡ̣ܢ ܬܘܼܩ̈ܠܬܐ.
                 543 ܐܸܢ ܓܢ̄ܒܪܵܐ ܣܚܦܬܹܗ ܐܸܠܥܵܐ ܪܦܝܬ̣ ܓܘܼܫܡܵܐ: 

                 f.275v 
                 544 ܡ̇ܢ ܠܵܐ ܢܙܝܼܢ ܙܘܥܝ̈ ܢܲܦܫܹܗ ܠܘܼܩܒܼܵܠ ܚܵܘܝܵܐ.
                 545 :ܕܘܝܼܕ ܢܗܘܹܐ ܐܲܝܟ ܡܲܚܙܝܼܬܼܵܐ ܩܕܼܵܡ ܚܙ̈ܝܹܐ
                 546 ܘܒܹܗ ܢܗܒܩܘܿܢ ܬܓܼܘܡ̈ܐ ܕܟܹܐܢܹ̈ܐ ܘܕܚܛܝܹ̈ܐ.
                 547 :ܠܐ ܢܸܫܬܒܗܲܕ ܐܝܢܵܐ ܕܙܲܕܝܼܩ ܐܝܟ ܗ̇ܘ ܕܐܲܡܠܸܟ
                 548 ܘܠܵܐ ܢܬܪܦܐ ܐܝܢܵܐ ܕܚܛܝ ܐܲܝܟ ܗ̇ܘ ܕܐܒܕ.
                 549 :ܟܐܢܵܐ ܢܛܪ ܓܙ̈ܝ ܢܦܫܹܗ ܡ̣ܢ ܫܘܒܼܗܪܵܐ
                 550 ܐܵܦ ܚܛܝܵܐ ܢܥܨܘܿܒܼ ܟܸܐܒܹܗ ܒܬܝܒܘܼܬܼܵܐ.
                 551 :ܠܢܝܼܫܵܐ ܕܩܘܼܫܬܵܐ ܢܚܢܐ ܟܠܢܵܫ ܒܙܘܥܹ̈ܐ ܘܪܸ̈ܓܼܫܹܐ
                 552 ܕܢܬܘܹܐ ܠܡܣܲܒܼ ܟܠܝܼܠ ܙܟܘܬܵܐ ܕܠܵܐ ܡܬܚܒܲܠ܀