Alphonse Mingana ed., Narsai doctoris Syri homiliæ et carmina (Mausilii: Typis Fratrum Prædicatorum, 1905) ܥܲܠ ܡܲܟܿܣܵܢܘܼܬܼܵܐ ܕܟܼܵܗܢܹ̈ܐ 328 ܡܐܡܪܐ ܕܐܪܒܥܝܢ ܘܚܡܫܐ ܥܲܠ ܡܲܟܿܣܵܢܘܼܬܼܵܐ ܕܟܼܵܗܢܹ̈ܐ ܘܠܵܚܹ̇ܡ ܠܙܲܒܼܢܵܐ ܥܲܣܩܵܐ 1 :ܙܲܒܼܢܵܐ ܒܝܼܫܵܐ ܥܨ̣ܵܢܝ ܕܐܹܡܲܠܸܠ ܥܲܠ ܒܝܼܫܘܼܬܹܗ 2 ܘܠܵܐ ܫܲܘܝܘܼܬܹܗ ܥܒ݂ܲܕܼܬܲܢܝ ܕܐܹܡ݂ܲܪ ܥܲܠ ܒܘܼܠܒܵܠܹܗ ܀ 3 :ܠܒܲܪ ܡ̣ܢ ܛܲܟܼܣܵܐ ܚܙܹ̇ܝܬܼ ܕܲܡܕܼܵܘܲܕܼ ܛܲܟܼܣܵܐ ܕܐܘܼܪܚܹܗ 4 ܘܲܪܗܸܛ ܪܸܥܝܵܢܝ ܠܡܸܬܼܒܲܩܵܝܘܼ ܒܲܒܼܠܝܼܠܘܼܬܹܗ ܀ 5 :ܒܲܥܪܝܼܪܵܐܝܼܬܼ ܚܙܹ̇ܝܬܹܗ ܕܐܵܙܹ̇ܠ ܒܲܫܒܼܝܼܠ ܬܵܘܫܵܐ 6 ܘܬܸܘܪܹܬܼ ܣܲܓܿܝܼ ܒܡܲܪܵܚܘܼܬܹܗ ܕܲܕܠܵܐ ܢܵܡܘܿܣ ܀ 7 :ܐܲܝܟ ܚܲܝ̈ܘܵܬܼܵܐ ܣܵܪ̈ܘܿܚܵܬܼܵܐ ܡܸܬܼܒܲܥܪܲܪ ܗ̄ܘ̣ܵܐ 8 ܘܠܵܐ ܝܵܗܹ̇ܒܼ ܗ̄ܘ̣ܵܐ ܐܝܼܕܼܵܐ ܠܐ̄ܢܵܫܵܐ ܠܡܸܩܪܲܒܼ ܨܹܐܕܼܵܘܗܝ ܀ 9 :ܒܲܟܼܬܼܝܼܫܘܼܬܹܗ ܦܗ̣ܵܘ ܚܘܼܫܵܒܲܝ̈ ܐܲܝܟ ܕܲܒܼܚܸܠܡܵܐ 10 ܘܲܪܢܹ̇ܝܬܼ ܕܲܟܼܒܲܪ ܚܸܠܡܵܐ ܗ̄ܘ̣ ܪܲܗܛܹܗ ܘܠܵܘ ܣܘܼܥܪܵܢܵܐ ܗ̄ܘ̣ ܀ 11 :ܚܸܠܡܵܐ ܚܫ݂ܲܒܼܬܹܿܗ ܠܫܘܼܚܠܵܦ ܙܲܒܼܢܹ̈ܐ ܕܲܗܘ̤ܵܐ ܒܝܵܘ̈ܡܲܝ 12 ܠܵܐ ܗ̄ܘ̣ܵܐ ܕܚܸܠܡܵܐ ܗ̄ܘ̣ ܐܸܠܵܐ ܕܕܲܓܵܠ ܛܵܒܼ ܡ̣ܢ ܚܸܠܡܵܐ ܀ 13 :ܠܵܐ ܫܲܘܝܘܼܬܹܗ ܥܨ̣ܵܬܲܢܝ ܕܐܸܩܪܹܝܘܗܝ ܦܸܗܝܵܐ ܕܚܸܠܡܵܐ 14 ܘܐܲܝܟ ܕܲܒܼܚܸܠܡܵܐ ܡܲܦܗܸܐ ܠܐ̄ܢܵܫܵܐ ܡ̣ܢ ܘܵܠܝܼܬܼܵܐ ܀ 15 :ܐܲܝܟ ܕܲܒܼܫܸܢܬܼܵܐ ܛܲܒܿܥܹܗ ܠܥܵܠܡܵܐ ܒܝܲܩܝܼܪܘܼܬܹܗ 16 ܘܠܵܐ ܐ̄ܢܵܫ ܨܵܒܹ̇ܐ ܠܡܸܦܲܨ ܡܸܢܹܗ ܝܘܼܩܪܵܐ ܕܥܵܘ̣ܠܵܐ ܀ 17 :ܠܚܸܫܟܵܐ ܕܠܸܠܝܵܐ ܕܵܡܹ̇ܐ ܚܸܫܟܵܐ ܕܠܵܐ ܝܼܕܲܥܬܹܗ 18 ܘܲܥܣܸܩ ܣܲܓܿܝܼ ܠܡܸܪܕܼܵܐ ܫܲܦܝܼܪ ܒܥܲܡܘܼܛܘܼܬܹܗ ܀ 19 ܚܸܫܘ̇ܟ ܙܲܒܼܢܹܗ ܕܙܲܒܼܢܵܐ ܗܵܢܵܐ ܡ̣ܢ ܟܠ ܙܲܒܼܢܝܼ̈ܢ: 329 20 ܘܸܟܼܒܲܪ ܠܵܐ ܗܘ̤ܵܐ ܙܲܒܼܢܵܐ ܐ̄ܚܪܹܢܵܐ ܕܚܸܫܘܿܟ ܡܸܢܹܗ ܀ 21 :ܥܲܠ ܟܠ ܘܲܒܼܟܼܠ ܡ̣ܬܲܚ ܫܘܼܠܛܵܢܹܗ ܒܚܸܫܘܿܟܼܘܼܬܼܵܐ 22 ܘܚܲܣܢܹܗ ܠܢܘܼܗܪܵܐ ܕܦܵܪܘܿܫܘܼܬܼܵܐ ܒܡܲܪܝܼܪܘܼܬܹܗ ܀ 23 :ܦܵܫ̣ܘ ܗܲܠܵܟܹ̈ܐ ܡ̣ܢ ܕܲܠܡܸܪܕܵܐ ܠܘܲܥܕܵܐ ܕܫܲܝܢܵܐ 24 ܕܩܵܡ̣ ܠܹܗ ܙܲܒܼܢܵܐ ܒܲܕܼܡܘܼܬܼ ܚܸܫܟܵܐ ܩܕܼܵܡ ܥܲܝܢܲܝ̈ܗܘܿܢ ܀ 25 :ܒܛܸܠܘ ܟܠ ܡܘܼܫ̈ܚܵܢ ܡ̣ܢ ܥܸܢܝܵܢܵܐ ܕܫܲܦܝܼܪ̈ܵܬܼܵܐ 26 ܘܲܚܒ݂ܲܫ ܟܠܢܵܫ ܝܲܨܪܹܗ ܒܓܼܵܘܹܗ ܐܲܝܟ ܕܲܒܼܣܲܬܼܘܵܐ ܀ 27 :ܟܪܲܟܼܘ ܦܵܪ̈ܘܿܫܹܐ ܪܸ̈ܥܝܵܢܲܝܗܘܿܢ ܐܲܝܟ ܕܲܒܼܢܲܚܬܵܐ 28 ܘܥܲܠ̣ܘ ܘܐܸܣܬܲܬܲܪܘ ܕܠܵܐ ܢܸܫܬܲܚܩܘܼܢ ܒܥܲܪܝܹܗ ܕܙܲܒܼܢܵܐ ܀ 29 :ܡܲܐܝܼܢܘܼܬܼܵܐ ܐܸܚܕܲܬ̤ ܐܸܢܘܿܢ ܐܲܝܟ ܐܸܫܵܬܼܵܐ 30 ܘܠܑܵ ܨܒܼܵܘ ܬܲܪܓܸܿܡܘ ܩܵܠܹ̈ܐ ܟܣܲܝܵܐ ܒܐܸܕܢܲܝ̈ ܐ̄ܢܵܫܵܐ ܀ 31 :ܒܚܲܕܼ ܟܘܼܪܗܵܢܵܐ ܕܠܵܐ ܝܼܕܲܥܬܼܵܐ ܢܦܲܠ̣ܘ ܟܠ ܬܸܓܼܡܝܼ̈ܢ 32 ܘܠܲܝܬܼ ܕܲܡܛܲܦܸܐ ܡܸܠܲܬܼ ܩܘܼܫܬܵܐ ܠܟܹܐܒܼܵܐ ܕܚܲܒܼܪܹܗ ܀ 33 :ܠܫܘܼܚܢܵܐ ܕܢܘܼܦܚܹ̈ܐ ܕܵܡܹ̇ܐ ܟܹܐܒܼܵܐ ܕܣܘܼܗܪ̈ܵܢܲܝܗܘܿܢ 34 ܘܠܵܐ ܐ̄ܢܵܫ ܝܵܕܲ݁ܥ ܠܡܸܥܨܲܒܼ ܫܲܦܝܼܪ ܒܗܲܝܡܵܢܘܼܬܼܵܐ ܀ 35 :ܥܣܸܩ ܟܘܼܪܗܵܢܵܐ ܕܢܲܦܝܼܠܝܼܢ ܒܹܗ ܡ̣ܢ ܟܠ ܟܹܐܒܼܝܼ̈ܢ 36 ܘܠܲܝܬܿ ܣܲܡܡܵܢܹ̈ܐ ܕܲܡܨܹܝܢ ܡܲܐܣܹܝܢ ܠܲܚܒܼܵܪ̈ܵܬܹܗ ܀ 37 :ܒܢܲܦܫܵܐ ܟܣܝܼܬܼܵܐ ܚܠ݂ܲܕܼ ܟܘܼܪܗܵܢܹܗ ܕܗܵܢܵܐ ܙܲܒܼܢܵܐ 38 ܘܗܵܐ ܡܚܲܠܚܸܠ ܠܹܗ ܠܲܟܼܝܵܢ ܐ̄ܢܵܫܵܐ ܒܲܕܼܡܘܼܬܼ ܣܵܣܵܐ ܀ 39 :ܒܲܢܣܝܼܡܘܼܬܹܗ ܪܡܹܝܢ ܟܠ ܬܸܓܼܡܝܼ̈ܢ ܥܲܡ ܟܠ ܡܘܼܫ̈ܚܵܢ 40 ܘܗܵܢܵܘ̇ ܬܸܡܗܵܐ ܕܲܟܼܪܝܼܗ ܟܠܢܵܫ ܘܠܵܐ ܐ̄ܢܵܫ ܡܲܪܓܸܿܫ ܀ 41 :ܟܪܝܼܗܝܼܢ ܡܲܠ̈ܟܹܿܐ ܘܲܢܣܝܼܣ ܬܵܓܼܵܐ ܕܲܒܼܪܹ̈ܫܲܝܗܘܿܢ 42 ܘܠܲܝܬܿ ܫܘܼܠܛܵܢܵܐ ܕܲܚܠܝܼܡ ܕܲܪܓܹܗ ܘܪܵܕܹܐ ܒܛܲܟܼܣܵܐ ܀ 43 :ܟܪܝܼܗܝܼܢ ܟܵܗܢܹ̈ܐ ܘܲܡܚܝܼܠ ܫܲܒܼܛܵܐ ܕܦܘܼܩܕܵܢܲܝ̈ܗܘܿܢ 44 ܘܠܲܝܬܿ ܩܵܢܘܿܢܵܐ ܕܩܲܝܵܡ ܨܹܐܕܼܵܘܗܝ ܚܘܼܠܡܵܢ ܪܘܼܚܵܐ ܀ 45 :ܪܘܼܚܵܢܵܐܝܼܬܼ ܟܪܝܼܗܝܼܢ ܟܵܗܢܹ̈ܐ ܡܲܐܣܲܝ̈ ܢܲܦܫܵܐ 46 ܘܲܒܼܢܲܦܫܵܬܼ̈ܗܘܿܢ ܪܡܹܝܢ ܒܐܸܫܵܬܼܵܐ ܕܚܲܫܲܝ̈ ܦܲܓܼܪܵܐ ܀ 47 :ܚܲܫܹ̈ܐ ܣܢܲܝܵ̈ܐ ܕܟܼܠ ܐܸܣܟܹܿܡܝܼ̈ܢ ܡܕܼܝܼܩܝܼܢ ܡܸܢܗܘܿܢ 48 ܘܚܲܕܼ ܡ̣ܢ ܚܲܒܼܪܹܗ ܢܣܝܼܣ ܘܲܡܚܲܒܲܠ ܒܲܫܟܼܝܼܪ̈ܵܬܼܵܐ ܀ 49 :ܚܣܵܡܵܐ ܢܵܚ̇ܟܹܬܼ ܚܘܼܬܼܪܵܐ ܒܵܥܹ̇ܛ ܟܪܘܿܡ̇ܐ ܡܲܩܠܸܐ 50 ܘܟܲܕܼ ܠܲܝܬܿ ܥܸܠܠܹ̈ܐ ܩܛܝܼܪ̈ܵܢ ܥܸܠܠܹ̈ܐ ܘܠܵܐ ܡܸܫܬܿܪ̈ܝܵܢ ܀ 51 :ܚܸܡܬܼܵܐ ܫܓܼܝܼܫܵܐ ܗܸܪܬܼܵܐ ܝܵܩ̇ܕܵܐ ܣܸܢܐܬܼܵܐ ܠܚܝܼܡܵܐ 52 ܘܛܵܐܹ̇ܢ ܟܠܢܵܫ ܕܢܵܘܒܸܿܕܼ ܚܲܒܼܪܹܗ ܐܲܝܟ ܕܲܒܼܢܘܼܪܵܐ ܀ 53 :ܦܲܚܹ̈ܐ ܒܢܸܟܼܠܵܐ ܢܸܫ̈ܒܹܿܐ ܒܙܹܐܦܵܐ ܟܡܹܢܹ̈ܐ ܒܛܘܼܫܝܵܐ 54 ܘܡܲܢ̣ܘܼ ܕܲܡܨܸܐ ܠܡܸܬܼܦܲܠܵܛܘܼ ܡ̣ܢ ܥܵܩ̈ܬܼܵܐ ܀ 330 55 :ܣܲܝܦܹ̈ܐ ܠܛܝܼܫܝܼܢ ܓܹܐܪܹ̈ܐ ܫܢܝܼܢܝܼܢ ܢܲܝܙܟܹ̈ܐ ܬܪܝܼܨܝܼܢ 56 ܘܛܵܟ ܠܵܐ ܦܵܐܹ̇ܫ ܣܪܝܼܕܼܵܐ ܠܐ̄ܢܵܫܵܐ ܕܠܵܐ ܡܸܬܼܚܲܒܲܠ ܀ 57 :ܩܪܵܒܼܵܐ ܡܥܲܬܲܕܼ ܩܹܐܪܣܵܐ ܡܛܲܝܲܒܼ ܣܸܕܼܪܹ̈ܐ ܠܚܝܼܡܝܼܢ 58 ܘܗܵܢܵܘ̇ ܓܘܼܢܚܵܐ ܕܲܠܡܲܢ ܘܥܲܡ ܡܲܢ ܐܝܼܬܼ ܬܲܟܼܬܿܘܼܫܵܐ ܀ 59 :ܬܵܘ ܐܸܬܿܕܲܡܲܪܘ ܟܝܵܢܹ̈ܐ ܡܠܝܼ̈ܠܹܐ ܐܵܦ ܫܲܬܿܝܼܩܹ̈ܐ 60 ܒܩܹܐܪ̈ܣܹ ܩ̈ܫܲܝܵܐ ܕܣܵܕܼܪܝܼܢ ܟܵܗܢܹ̈ܐ ܚܲܕܼ ܠܘܼܩܒܲܠ ܚܲܕܼ ܀ 61 :ܬܵܘ ܪ̈ܘܼܚܵܢܹܐ ܚܘܼܪܘ ܘܐܸܬܼܒܲܩܵܘ ܦܵܪܘܿܫ̇ܐܝܼܬܼ 62 ܕܲܟܼܡܵܐ ܥܸܫܢܲܬ̤ ܡܲܪܵܚܘܼܬܿܢ ܒܗܵܢܵܐ ܙܲܒܼܢܵܐ ܀ 63 :ܬܵܐ ܐܸܬܿܬܲܢܲܚ ܟܝܵܢ ܒ̇ܝܘܿܬܹ̈ܐ ܐܲܢ̄ܬܿ ܥܲܠ ܢܲܦܫܵܟ 64 ܘܐܲܝܠܸܠ ܘܲܒܼܟܼܝܼ ܥܲܠ ܒܝܼ̈ܫܵܬܼܵܟ ܕܲܕܼܠܵܐ ܢܵܡܘܿܣ ܀ 65 :ܕܠܵܐ ܢܵܡܘܿܣܵܐ ܥܫܸ݂ܢ ܒܝܼ̈ܫܵܢܼܵܟ ܟܝܵܢܵܐ ܫܝܼܛܵܐ 66 ܘܲܕܼܠܵܐ ܛܲܟܼܣܵܐ ܪܕܲܝܬܿ ܒܲܫܒܼܝܼ̈ܠܹܐ ܕܩ̇ܪܘܿܕܼܘܼܬܼܵܐ ܀ 67 :ܡܲܪܵܚܵܐܝܼܬܼ ܣܥ̣ܵܐ ܨܸܒܼܝܵܢܵܟ ܠܘܼܩܒܲܠ ܩܘܼܫܬܵܐ 68 ܘܗܵܐ ܬܲܚܘܝܼܬܼܵ ܕܡܲܪܵܚܘܼܬܼܵܟ ܒܪܹ̈ܫܲܝ ܥܲܡܵܟ ܀ 69 :ܪܹ݁ܫܲܝ ܥܲܡܵܟ ܣܕܲܩܘ ܐܵܘܝܘܼܬܼܵܐ ܕܣܝܼܡܵܐ ܗ̄ܘ̣ܵܬܼ ܒܵܟ 70 ܘܗܸܢܘ̣ܿܢ ܦܲܠܓܼܘܼܟ ܠܲܡ̈ܢܘܿܬܼܵܐ ܕܟܼܠ ܐܸܣܟܹܿܡܝܼ̈ܢ ܀ 71 :ܙܵܪ̈ܥܲܝ ܫܲܝܢܵܐ ܕܲܠܚܘܼܗܝ ܠܫܲܝܢܵܐ ܒܚܸܪ݁ܝܵܢܲܝܗܘܿܢ 72 ܘܐܲܪܡܝܼܘ ܗܸܪܬܼܵܐ ܒܹܝܬܼ ܐܲܪ̈ܥܵܢܹܐ ܠܲܫܡܲܝܵܢܹ̈ܐ ܀ 73 :ܗܸܪܬܼܵܐ ܒܝܼܫܬܵܐ ܐܲܪܡܝܼܘ ܡܵܗܢܹ̈ ܒܹܝܬܼ ܟܠ ܘܲܠܟܼܠ 74 ܘܗܵܐ ܡܸܬܼܟܲܬܲܫ ܥܵܠܡܑܵܐ ܫܓܼܝܼܫܵܐ ܗܘ̤ ܥܲܡ ܢܲܦܫܹܗ ܀ 75 :ܛܢܵܢܵܐ ܒܝܼܫܵܐ ܠܒܸ݂ܫܘ ܐܲܝܟ ܙܲܝܢܵܐ ܚܲܕܼ ܠܘܼܩܒܲܠ ܚܲܕܸ 76 ܘܲܕܠܵܐ ܚܵܘܣܵܢ ܫܲܕܿܝܼܘ ܡܸܠܹ̈ܐ ܒܲܕܼܡܘܼܬܼ ܓܹܐܪܹ̈ܐ ܀ 77 :ܓܹܐܪܹ̈ܐ ܕܨܲܥܪܵܐ ܫܕܼܵܘ ܝܵܕܼܘܿܥܹ̈ܐ ܒܗܲܕܵܡܲܝ̈ܗܘܿܢ 78 ܘܠܵܐ ܐܸܣܬܲܟܲܠܘ ܕܲܠܡܲܢ ܡ̇ܚܹ̇ܝܢ ܒܦܸܬܼ ܓܼܵܡܲܝܗ̈ܘܿܢ ܀ 79 :ܚܣܵܡܵܐ ܣܲܡܝܵܐ ܣܲܡܝܼ ܐܸܢܘܿܢ ܡ̣ܢ ܒܘܼܝܵܢܵܐ 80 ܘܠܵܐ ܐܸܬܼܒܲܝܲܢܘ ܕܲܠܡܲܢ ܐܲܟܿܝܼܘ ܒܢܸܟܼܝܵܢܲܝ̈ܗܘܿܢ ܀ 81 :ܚܘܼܬܼܪܵܐ ܣܲܟܼܠܵܐ ܐܲܛܥܝܼ ܐܸܢܘܿܢ ܡ̣ܢ ܒܘܼܝܵܢܵܐ 82 ܘܠܵܐ ܦܪܲܫ̣ܘ ܘܝܼܕܲܥܘ ܕܐܲܝܕܵܐ ܦܲܐܝܵܬ ܠܫܸܡܗܘܿܢ ܪܲܒܵܐ ܀ 83 :ܪܸܚܡܲܬܼ ܟܸܣܦܵܐ ܐܸܣܪܲܬ̤ ܐܸܢܘܿܢ ܒܐܲܪ̈ܥܵܢܝܵܬܼܵܐ 84 ܘܠܵܐ ܐܸܬܼܝܲܐܲܒܼܘ ܠܡܘܼܠܟܵܢ ܚܲܝܹ̈ܐ ܕܲܥܬܼܝܼ̈ܕܵܬܼܵܐ ܀ 85 :ܥܵܠܘܿܒܼܘܼܬܼܵܐ ܫܸܓܼܪܲܬ̤ ܐܸܢܘܿܢ ܒܢܘܼܪ ܚܘܼܬܼܚܵܬܹ̈ܐ 86 ܘܲܙܥ݂ܲܪ ܥܵܠܡܵܐ ܡ̣ܢ ܛܵܒܼܵܬܼ̈ܐ ܠܣܘܼܢܩܵܢܲܝ̈ܗܘܿܢ ܀ 87 :ܪܸܚܡܲܬܼ ܫܘܼܒܼܚܵܐ ܨܵܕܲܬ̤ ܐܸܢܘܿܢ ܒܦܲܚܵܐ ܕܫܘܼܒܼܚܵܐ 88 ܘܐܲܝܟ ܦܵܪܲܚܬܼܵܐ ܢܦ݂ܲܠܘ ܡ̣ܢ ܪܵܘܡ̇ܐ ܕܕܼܒܵܪ݁ܲܝܗܘܿܢ ܀ 89 :ܪܲܒܿܘܼܬܼ ܟܲܪܣܵܐ ܥ̣ܠܲܬ̤ ܚܸܠܕܲܬ̤ ܒܚܘܼܫ̇ܒܲܝ̈ܗܘܿܢ 90 ܘܟܲܢܸܫܘ ܡ̣ܢ ܟܠ ܘܠܵܐ ܐܸܬܼܡܲܠܝܲܬ̤ ܪܸܓܿܬܼܵܐ ܕܲܒܼܗܘܿܢ ܀ 91 :ܠܵܐ ܚܲܣܝܼܪܹ̈ܐ ܗܘ̤ܵܘ ܚܲܣܝܼܪܹ݁ܐ ܡ̣ܢ ܟܠ ܡ̣ܕܹܿܡ 92 ܘܟܲܕܼ ܟܠ ܕܝܼܠܗܘܿܢ ܦܲܕܼ ܐܝܼܕܲܝ̈ܗܘܿܢ ܡ̣ܢ ܟܠ ܡܸܕܸܿܡ ܀ 93 ܨܪܲܟܼܘ ܡ̣ܢ ܕܝܼܠܗܘܿܢ ܩܲܢܝܲܝ̈ ܥܘܼܬܼܪܵܐ ܕܡܲܪ̈ܗܵܛܲܝܗܘܿܢ: 331 94 ܘܗܵܐ ܡܸܬܼܟܲܫܦܝܼܢ ܠܡܸܫܐܲܠ ܙܸܕܩܵܐ ܐܲܝܟ ܚܵܕܼܘܿܪܹ̈ܐ ܀ 95 :ܚܵܣܘܿܡܘܼܬܼܗܘܿܢ ܥ̣ܒܼܕܲܬ̤ ܐܸܢܘܿܢ ܨܪ̈ܝܼܟܲܝ ܡ̣ܢ ܟܠ 96 ܘܚܪܚ̇ܘܼܬܼܗܘܿܢ ܟܠܵܬ̤ ܛܵܒܼܵܬܼܵܐ ܡ̣ܢ ܦܵܘܼܡܲܝ̈ܗܘܿܢ ܀ 97 :ܗܸܢܘ̣ܿܢ ܐܲܫܝܼܛܘ ܠܲܩܢܘܿܡܲܝ̈ܗܘܿܢ ܒܲܕܼܠܵܐ ܦܲܐ̈ܝܵܢ 98 ܘܗܸܢܘ̣ܿܢ ܐܲܙܥܲܪܘ ܠܕܲܪܓܼܵܐ ܪܵܡ̇ܐ ܕܩܵܝ̇ܡܝܼܢ ܗ̄ܘ̣ܵܘ ܒܹܗ ܀ 99 :ܪ̈ܵܥܘܵܬܼܵܐ ܕܲܡܠܝܼܠܘܼܬܼܵܐ ܡܸܬܼܟܲܢܹܝܢ ܗ̄ܘ̣ܵܘ 100 ܘܲܫܒܲܩ̣ܘ ܐ̄ܢܵܫܵܐ ܘܲܢܦܲܩ̣ܘ ܛܵܥܹ̇ܝܢ ܒܵܬܲܪ ܚܲܪ̈ܫܹܐ ܀ 101 :ܠܠܵܐ ܦܵܪ݁ܘܿܫܹܐ ܪܚܸܡ̣ܘ ܦܵܪ݁ܘܿܫܹܐ ܡ̣ܢ ܦܵܪ̈ܘܿܫܹܐ 102 ܘܲܠܫܲܬܿܝܼܩܹ̈ܐ ܩ̣ܢܵܘ ܩܸܢܝܵܢܵܐ ܕܝܘܼܬܼܪ̈ܵܢܲܝܗܘܿܢ ܀ 103 :ܒܪܸܚܡܲܬܸ ܐܲܪܥܵܐ ܛܥ̣̇ܘ ܥܸܢܝܵܢܵܐ ܕܪ̈ܘܼܚܵܢܝܵܬܼܵܐ 104 ܘܲܒܼܫܝܼܛ̈ܬܼܵܐ ܚܲܠܸܦܘ ܥܘܼܬܼܪܵܐ ܕܝܲܩܝܼܪ݁ܵܬܼܵܐ ܀ 105 :ܠܡܲܡܟܿܘܼܬܼ ܪܵܘܡ̇ܐ ܙܲܡܸܢ ܐܸܢܘܿܢ ܚܲܬܼܢܵܐ ܕܪܵܘܡ̇ܐ 106 ܘܕܲܓܸܿܠܘ ܐܸܢܹܝܢ ܠܲܒܼ̈ܢܵܬܼ ܩܵܠܵܘ̈ܗܝ ܫܲܪܝܼܪ݁ܵܬܼܵܐ ܀ 107 :ܫܪܵܪܵܐ ܢܸܗܘܸܐ ܣܵܗܕ̇ܐ ܒܕܼܝܼܢܵܐ ܒܹܝܬܼ ܠܹܗ ܘܲܠܗܘܿܢ 108 ܘܢܸܬܼܒܲܥ ܡܸܢܗܘܿܢ ܥܝܵܪܬܵܐ ܕܨܲܥܪܵܐ ܕܫܲܪܝܼܪܘܼܬܹܗ ܀ 109 :ܒܕܼܝܼܢܵܐ ܟܹܐܢܵܐ ܢܲܟܸܿܣ ܐܸܢܘܿܢ ܠܟܼܵܗܢܹ̈ܐ ܢܟܼܝܼܠܹ̈ܐ 110 ܕܫܵܛ̣ܘ ܡ̇ܘܗܲܒܼܬܹܗ ܘܨܲܥܲܪܘ ܐ̄ܪ̈ܵܙܹܐ ܕܝܲܩܝܼܪ݁ܵܬܹܗ ܀ 111 :ܕܝܼܢܵܐ ܢܹܐܡܲܪ ܥܲܡ ܢܸܟܼܠܲܝ̈ܗܘܿܢ ܕܢܲܟܿܘܼܠܬܼܵܢܹ̈ܐ 112 ܕܟܼܵܡ̣ܘ ܥܲܠ ܥܘܼܬܼܪܹܗ ܘܠܵܐ ܦܲܪܢܸܣܘ ܒܹܗ ܣܘܼܢܩܵܢ ܐ̄ܢܵܫܵܐ ܀ 113 :ܠܗܘܿܢ ܝܲܗ̣̄ܒܼ ܡܸܠܬܹܗ ܕܲܢܦܲܠܓܼܘܼܢ ܒܵܗ̇ ܚܲܝܹ̈ܐ ܠܐ̄ܢܵܫܵܐ 114 ܘܗܸܢܘ̣ܿܢ ܛܲܫܝܘܼܗ̇ ܠܓܼܵܘ ܡ̣ܢ ܢܲܚܬܵܐ ܕܣܘܼܥܪ̈ܵܢܲܝܗܘܿܢ ܀ 115 :ܠܘܵܬܼܗܘܿܢ ܐܸܡ݂ܲܪ ܗܵܝ̇ ܒܲܪ̄ܬܼ ܩܵܠܵܐ ܕܲܠܘܵܬܼ ܫܸܡܥܘܿܢ 116 ܘܫܲܡ̣ܥܘܼܗ̇ ܘܲܫܬܸܩܘ ܡ̣ܢ ܣܘܼܟܵܠܵܐ ܕܲܟܼܣܸܐ ܒܓܼܵܘܵܗ̇ ܀ 117 :ܠܗܘܿܢ ܗ̄ܘ̣ ܐܲܓܼܥܸܠ ܩܲܝܵܡܘܼܬܼܵܐ ܕܥܵܢ̈ܐ ܕܐ̄ܢܵܫܑܵ 118 ܘܐܸܟܲܠ̣ܘ ܒܸܣܪܵܐ ܕܫܲܡܝܼ̈ܢܵܢܼܵܐ ܘܫܵܛ̣ܘ ܕܲܡܚ̈ܝܼܠܵܢ ܀ 119 :ܥܠܲܝܗܘܿܢ ܦܲܐܝܵܐ ܠܡܸܬܼܢܵܐ ܡܸܠܬܼܵܐ ܕܲܢܒܼܝܼܘܼܬܼܵܐ 120 ܕܐܘܿܢ ܟܵܗܢܹ̈ܐ ܪ̈ܵܥܵܘܵܬܼܵܐ ܒܘܿܪܹ̈ܐ ܘܣܲܟܼܠܹ̈ܐ ܀ 121 :ܕܠܵܐ ܒܲܟܼܝܵܢܵܐ ܪܥܵܘ̣ ܠܲܟܼܝܵܢܲܢ ܪ̈ܵܥܵܘܵܬܼܵܐ 122 ܘܲܕܼܠܵܐ ܚܵܘܣܵܢ ܒܲܕܿܪܘ ܚܲܝܲܝ̈ܢ ܒܛܘܼܪܹ̈ܐ ܕܛܘܥܝܲܝ ܀ 123 :ܐܲܝܟ ܡܲܪܥܝܼܬܼܵܐ ܕܠܲܝܬܿ ܠܵܗ̇ ܪܵܥܝܵܐ ܗܘ̤ܵܬܼ ܐ̄ܢܵܫܘܼܬܲܢ 124 ܘܥܲܠ̣ ܚܲܝ̈ܘܵܬܼܵܐ ܥܝܵܪܹ݁ܐ ܒܝܼܫܹ̈ܐ ܘܚܲܒܸܿܠܘ ܓܸܢܣܲܢ ܀ 125 :ܒܒܹܝܬܼ ܐܘܼܪ̈ܚܵܬܼܵܐ ܕܠܑܵ ܝܼܕܲܥܬܼܵܐ ܛܥ̣ܵܘ ܡܲܠܵܠܹ̈ܐ 126 ܘܠܵܐ ܐ̄ܢܵܫ ܐܲܦܢܝܼ ܠܪܸ̈ܥܝܵܢܵܝܗܘܿܢ ܨܹܝܕܼ ܕܲܟܼܬܼܝܼ̈ܒܼܵܢ ܀ 127 :ܪ̈ܵܥܵܘܵܬܼܵܐ ܦܵܫ̣ܘ ܡ̣ܢ ܢܝܼܫܵܐ ܕܕܼܚܠܲܬܼ ܩܘܼܫܬܵܐ 128 ܘܲܛܥܵܬ̤ ܥܵܢ̈ܐ ܒܲܫܒܼܝܼܠ ܙܹܐܦܵܐ ܕܣܘܼܥܪ݁ܵܢܲܝܗܘܿܢ ܀ 129 ܒܣܘܼܥܪ݁ܵܢܲܝܗܘܿܢ ܕܵܘܕܼܘܼܗ̇ ܠܐܘܼܪܚܵܐ ܕܗܲܝܡܵܢܘܼܬܼܵܐ: 332 130 ܘܲܒܼܢܼܟܼܠܲܝ̈ܗܘܿܢ ܡ̣ܠܵܐܘܼܗ̇ ܩܸܢܛܵܐ ܕܠܵܐ ܫܲܘܝܘܼܬܼܵܐ ܀ 131 :ܠܵܐ ܫܲܘܝܘܼܬܼܵܐ ܫܕܼܵܘ ܐܲܝܟ ܟܹܐܦܵܐ ܩܕܼܵܡ ܗܲܠܵܟܹ̈ܐ 132 ܘܲܣܓܼܝܼ ܩܸܢܛܵܐ ܘܠܵܐ ܐ̄ܢܵܫ ܪܵܕܹܐ ܫܲܪܝܼܪܵܐܝܼܬܼ ܀ 133 :ܡܝܼܠܹ̈ܐ ܕܫܲܝܢܵܐ ܫܲܢܝܼܘ ܘܐܲܪܚܸܩܘ ܡ̣ܢ ܕܘܼܟܲܬܼܗܘܿܢ 134 ܘܐܸܬܿܕܵܘܲܕܼ ܠܹܗ ܒܹܝܬܼ ܐܵܘܢܵܐ ܕܣܲܒܼܪܵܐ ܘܚܘܼܒܑܵܐ ܀ 135 :ܐܲܝܟ ܓܲܝܵܣܹ̈ܐ ܟܡܸܢ̣ܘ ܪܸ̈ܥܝܵܢܹܐ ܥܲܠ ܪܸ̈ܥܝܵܢܹܐ 136 ܘܫܲܠܲܚܘ ܐ̄ܢܵܫܵܐ ܠܲܒܼܢܲܝ̈ܢܵܫܵܐ ܡ̣ܢ ܛܵܒܼܵܬܼ̈ܐ ܀ 137 :ܥܘܼܬܼܪܵܐ ܪܲܒܵܐ ܡܠܸܐ ܗ̄ܘ̣ܵܐ ܓܼܙܵܐ ܕܗܲܝܡܵܢܘܼܬܼܵܐ 138 ܘܒܲܙ̣ܘܼܗܝ ܐ̄ܢܵܫܵܐ ܠܵܐ ܗ̄ܘ̣ܵܐ ܒܚܘܼܒܵܐ ܐܸܠܵܐ ܒܢܸܟܼܠܵܐ ܀ 139 :ܢܸܟܼܠܵܐ ܪܲܟܸܿܒܼܘ ܢܲܟܿܘܼܠܬܼܵܢܹ̈ܐ ܥܲܡ ܢܵܟܼܵܘܿܠܵܐ 140 ܘܒܲܙܘ ܬܵܘܕܿܝܼܬܼܵܐ ܕܠܵܐ ܦܘܼܠܵܓܼܵܐ ܒܦܸܬܼܓܼܵܡܲܝ̈ܗܘܿܢ ܀ 141 :ܐ̄ܪ̈ܵܙܹܐ ܕܥܵܘ̣ܠܵܐ ܩ̣ܛܲܪܘ ܡܲܪ̈ܵܚܹܐ ܥܲܠ ܡ̇ܪܘܿܕܼܵܐ 142 ܘܕܲܠܚܘܼܗܝ ܠܫܲܝܢܵܐ ܕܫܸܡ ܒܵܪܘܿܝܵܐ ܕܒܹܝܬܼ ܠܲܢ ܘܲܠܗܘܿܢ ܀ 143 :ܟܵܗܢܹ̈ܐ ܒܝܼܫܹ̈ܐ ܗܘ̤ܵܘ ܫܵܘܬܵܦܹ̈ܐ ܒܠܵܐ ܫܲܘܝܘܼܬܼܵܐ 144 ܘܐܲܩܝܼܡܘ ܡܸܪܕܵܐ ܕܠܵܐ ܢܸܬܼܛܦܝܼܣܘܼܢ ܠܡܸܠܲܬܼ ܫܲܝܢܵܐ ܀ 145 :ܠܡܹܐܢܵܐ ܕܫܲܝܢܵܐ ܣܵܡܲܬ̤ ܐܸܢܘܿܢ ܡܸܠܲܬܼ ܫܲܝܢܵܐ 146 ܘܪܲܕܼܦܘܼܗܝ ܠܫܲܝܢܵܐ ܡ̣ܢ ܓܵܘ ܫܲܝܢܵܐ ܠܚܘܼܪܒܵܐ ܕܲܠܒܲܪ ܀ 147 :ܒܚܘܼܪܒܵܐ ܕܲܠܒܲܪ ܦܵܗܹ̇ܐ ܫܲܝܢܵܐ ܕܫܸܡ ܒܵܪܘܿܝܵܐ 148 ܘܠܲܝܬܿ ܠܹܗ ܐܲܬܼܪܵܐ ܕܢܸܥܘܿܠ ܢܸܫܪܸܐ ܨܹܝܕܼ ܝܵܕܲܘܿܥܵܘ̈ܗܝ ܀ 149 :ܐܲܝܟ ܡܸܣܟܹܿܢܵܐ ܛܪܝܼܕܼ ܡ̣ܢ ܥܵܘܼܡܪܵܐ ܕܫܲܪܝܼܪܘܼܬܹܗ 150 ܘܥܲܠܝܼܠ ܙܹܐܦܵܐ ܠܒܹܝܬܼ ܝܵܪܬܿܘܼܬܹܗ ܘܒܼܵܐܹ̇ܙ ܢܼܟܼܣܵܘ̈ܗܝ ܀ 151 :ܢܘܼܡܹܐ ܕܫܲܝܢܵܐ ܠܒܼܝܼܟ ܚܸܪܝܵܢܵܐ ܘܲܡܕܲܝܲܪ ܒܹܗ 152 ܘܲܡܪܝܼܡ ܩܵܠܹܗ ܘܡܲܩܠܸܐ ܒܚܘܼܬܼܪܵܐ ܥܲܠ ܟܹܐܢܘܼܬܼܵܐ ܀ 153 :ܠܵܐ ܕܚܝܼܠ ܚܘܼܪܒܵܐ ܥܲܠ ܓܲܝܵܣܹ̈ܐ ܕܲܡܕܲܝܪܝܼܢ ܒܹܗ 154 ܐܲܟܼܡܵܐ ܕܩܢܹ̇ܛ ܓܼܒܵܐ ܕܫܲܝܢܵܐ ܡ̣ܢ ܚܸܪ̈ܝܵܢܹܐ ܀ 155 :ܠܵܐ ܡܸܣܬܲܪܕܼܝܼܢ ܥܵܡ̇ܪ̈ܲܝ ܚܘܼܪܒܵܐ ܡ̣ܢ ܚܲܝ̈ܘܼܬܼܵܐ 156 ܐܲܟܼܡܵܐ ܕܙܵܝ̇ܥܝܼܢ ܪ̈ܵܚܡܲܝ ܚܘܼܒܵܐ ܡ̣ܢ ܡܸܗܢܘܼܬܼܵܐ ܀ 157 :ܓܘܼܢܚܵܐ ܪܲܒܵܐ ܗܘ̤ܵܐ ܒܹܗ ܒܕܼܵܪܲܢ ܡܲܪܝܼܪ ܝܲܨܪܵܐ 158 ܕܥܸܠܲܬܼ ܫܲܝܢܵܐ ܗܘ̤ܵܬܼ ܠܵܗ̇ ܥܸܠܬܼܵܐ ܕܟܼܠ ܒܝܼܫ̈ܬܼܵܐ ܀ 159 :ܠܥܸܠܲܬܼ ܫܲܝܢܵܐ ܗܘ̤ܵܬܼ ܟܵܗܢܘܼܬܼܵܐ ܒܹܝܬܼ ܐܲܪ̈ܥܵܢܹܐ 160 ܘܟܼܵܗܢܹ̈ܐ ܗܲܦ̣ܟܿܘܼܗܝ ܠܛܲܟܼܣܵܐ ܕܫܲܝܢܵܐ ܠܘܵܬܼ ܚܸܪܝܵܢܵܐ ܀ 161 :ܒܕܼܘܼܟܲܬܼ ܢܘܼܗܪܵܐ ܘܲܚܠܵܦ ܡܸܠܚܵܐ ܐܸܬܼܝܲܗ̄ܒܲܬ̤ ܠܲܢ 162 ܘܲܚܫܸܟ ܢܘܼܗܪܵܗ̇ ܘܲܦܟ݂ܲܗ ܛܲܥܡܵܗ̇ ܘܗܲܦܟܲܬ̤ ܠܐܲܪܥܵܐ ܀ 163 :ܡܚܲܣܝܲܬܼ ܥܵܘ̣ܠܵܐ ܘܝܵܗ̇ܒܲܬܼ ܚܲܝܹ̈ܐ ܩ̣ܪܵܗ̇ ܝܵܗܘܿܒܼܵܗ̇ 164 ܘܲܣܓܼܝܼ ܥܵܘ̣ܠܵܗ̇ ܘܲܦܟ݂ܲܗ ܡܸܢܵܗ̇ ܪܹܚܝ ܚܲܝܘܼܬܼܵܐ ܀ 165 :ܩܠܝܼܕܲܝ̈ ܪܵܘܡ̇ܐ ܝܲܗ̣̄ܒܼ ܠܵܗ̇ ܪܸܡܙܵܐ ܐܲܠܵܗܵܝܵܐ 166 ܘܠܑܵ ܗ̤ܝ ܥܸܠܲܬ̤ ܘܠܵܐ ܠܬܲܝܵܒܹ̈ܐ ܦܬܼܚܲܬ̤ ܬܲܪܥܵܐ ܀ 333 167 :ܟܵܗܢܹ̈ܐ ܐܲܚܕܿܘܼܗܝ ܠܲܬܼܪܲܥ ܪ̈ܲܚܡܹܐ ܒܐܲܦܲܝ̈ ܐ̄ܢܵܫܵܐ 168 ܘܠܵܐ ܩܲܒܸܿܠܘ ܬܵܘܬܼܵܐ ܘܕܸܡܥܹ̈ܐ ܕܲܡܦܝܼܣܵܢܹ̈ܐ ܀ 169 :ܟܵܗܢܹ̈ܐ ܛܲܫܝܘܼܗ̇ ܠܡܸܠܲܬܼ ܚܲܝܹ̈ܐ ܡ̣ܢ ܡܵܝܘܿܬܹ̈ܐ 170 ܘܠܵܐ ܝܲܗ̣̄ܒܼܘ ܐܝܼܕܼܵܐ ܠܡܝܼܬܹ̈ܐ ܕܥܵܘ̣ܠܵܐ ܕܢܸܚܘܿܢ ܡܲܓܵܢ ܀ 171 :ܕܠܵܐ ܚܵܘܣܵܢܵܐ ܓܼܙܲܪܘ ܠܘܼܚܵܡܵܐ ܥܲܠ ܚܲܛܵܝܹ̈ܐ 172 ܘܠܵܐ ܣܵܡ̣ܘ ܣܲܡܵܐ ܕܲܬܼܝܵܒܼܘܼܬܼܵܐ ܥܲܠ ܫܘܼܚܢܲܝ̈ܗܘܿܢ ܀ 173 :ܒܡܲܐܝܼܢܘܼܬܼܵܐ ܩܪܸܒܼܘ ܠܲܥܒܼܵܕܵܐ ܕܣܝܼܡܝܼܢ ܗ̄ܘ̣ܵܘ ܠܹܗ 174 ܘܲܒܼܩܘܼܛܵܢܵܐ ܦܪ݂ܲܥܘ ܬܵܘ ܕܲܝܼܬܼܵܐ ܕܚܲܝܵܒܼܝܼܢ ܗ̄ܘ̣ܵܘ ܀ 175 :ܥܒܼܵܕܹ݁ܵܐ ܟܲܢܝܹܗ ܟܵܪܘܿܙ ܪܘܼܚܵܐ ܠܕܲܪܓܼܵܐ ܕܟܼܵܗܢܹ̈ܐ 176 ܘܗܸܢܘ̣ܿܢ ܗܲܦ̣ܟܿܘܼܗܝ ܠܫܸܡ ܫܘܼܠܛܵܢܵܐ ܐܲܪܥܵܢܵܝܵܐ ܀ 177 :ܐܲܪܥܵܢܵܐܝܼܬܼ ܣܒܲܪ̣ܘ ܕܐܝܼܬܿܝܗܘܿ ܛܲܟܼܣܹ̈ܐ ܕܥܹܕܿܬܵܐ 178 ܘܐܲܝܟ ܒܲܪ݁ܲܝܹܐ ܬܒܲܥ̣ܘ ܛܲܟܼܣܲܝ̈ܗܘܿܢ ܡ̣ܢ ܐ̄ܢܵܫܘܼܬܼܵܐ ܀ 179 :ܐܲܝܟ ܕܲܝܵܢܵܐ ܝܵ̇ܬܹܒܼ ܟܵܗܢܵܐ ܒܲܬܼܪܲܥ ܒܲܝܬܹܿܗ 180 ܘܐܲܝܟ ܫܲܠܝܼܛܵܐ ܡܪܝܼܡ ܒܲܪ̄ܬܼ ܩܵܠܹܗ ܘܬܵܒܲܥ ܫܸܩܠܹ̈ܐ ܀ 181 :ܫܸܡ ܫܘܼܠܛܵܢܵܐ ܡܪܝܼܡ ܗܸܕܼܝܘܼܛܵܐ ܥܲܠ ܫܵܡ̇ܘܿܥܵܘ̈ܗܝ 182 ܘܠܵܐ ܡܸܬܼܒܲܝܲܢ ܕܕܲܪܓܹܗ ܪܲܚܝܼܩ ܡ̣ܢ ܫܘܼܠܛܵܢܵܐ ܀ 183 :ܠܵܘ ܫܘܼܠܛܵܢܵܐ ܗ̄ܘ̣ ܕܲܪܓܼܵܟ ܣܲܟܼܠܵܐ ܡ̇ܢ ܛܵܥܹ̇ܐ ܐܲܢ̄ܬܿ 184 ܥܲܒܼܕܵܐ ܐܝܼܬܲܝܟ ܘܲܡܫܡܫܵܢܵܐ ܕܲܟܼܢܵܘ̈ܬܼܵܟ ܀ 185 :ܠܵܘ ܠܲܬܼܒܲܥܬܼܵܐ ܣܝܼܡ ܐܲܢ̄ܬܿ ܓܲܒܼܪܵܐ ܡ̇ܢ ܒܵܥܹ̇ܐ ܐܲܢ̄ܬܿ 186 ܠܲܡܚܵܢ ܡܲܓܵܢ ܩܪ̣ܵܐܘܼܟ ܪ̈ܲܚܡܹܐ ܠܲܬܼܪܲܥ ܡܲܠܟܵܐ ܀ 187 :ܠܵܘ ܕܝܼܠܵܟ ܗ̄ܘ̣ ܓܲܙܵܐ ܪܲܒܵܐ ܕܡܲܓܼܥܲܐ ܒܐܝܼܕܲܝ̈ܟ 188 ܡܵܢܵܐ ܚܬܝܼܪ ܐܲܢ̄ܬܿ ܒܲܕܼܠܵܐ ܕܝܼܠܵܟ ܐܲܝܟ ܕܲܒܼܕܼܝܼܠܵܟ ܀ 189 :ܓܹܐܙܲܒܼܪܵܐ ܐܲܢ̄ܬܿ ܒܲܪ ܡ̇ܝܘܿܬܹ̈ܐ ܕܡܲܠܟܵܐ ܕܥܲܠ ܟܠ 190 ܠܵܐ ܬܸܫܬܲܒܼܗܲܪ ܡ̇ܐ ܕܝܵܗܹ̇ܒܼ ܐܲܢ̄ܬܿ ܡ̣ܢ ܒܹܝܬܼ ܡ̇ܪܵܟ ܀ 191 :ܡ̇ܪܵܟ ܝܲܗ̣̄ܒܼ ܠܵܟ ܡ̣ܢ ܒܹܝܬܼ ܓܲܙܹܗ ܠܲܡܦܲܪܢܵܣܘܼ 192 ܚܙܝܼ ܠܵܐ ܬܸܛܠܘܿܡ ܠܲܟܼ̈ܢܵܘܵܬܼܵܟ ܒܡܲܣܲܒܼ ܒܐܲܦܹ̈ܐ ܀ 193 :ܫܡܲܥ ܩܵܠ ܡ̇ܪܵܟ ܕܲܡܩܲܛܪܸܓܼ ܠܹܗ ܠܥܲܒܼܕܵܐ ܒܝܼܫܵܐ 194 ܦܲܪܢܸܣ ܫܲܦܝܼܪ ܕܠܵܐ ܬܸܗܘܸܐ ܠܹܗ ܚܲܒܼܪܵܐ ܒܕܼܝܼܢܵܐ ܀ 195 :ܒܕܼܝܼܢܵܐ ܟܹܐܢܵܐ ܥܬܼܝܼܕܼ ܒܵܪܘܿܝܵܐ ܕܢܸܒܼܚܘܿܪ ܥܲܒܼܕܵܘ̈ܗܝ 196 ܘܵܝ ܠܲܕܿܛܲܫܝܼ ܟܸܣܦܵܐ ܕܡ̇ܪܹܗ ܡ̣ܢ ܢܵܣܘܼܒܹ̈ܐ ܀ 197 :ܒܪܸ̈ܓܼܫܹܐ ܘܙܵܘܥܹ̈ܐ ܥܵܐ̇ܠܵܐ ܒܨܵܬܼܵܐ ܕܕܲܝܵܢܘܼܬܹܗ 198 ܘܵܝ ܠܲܕܼܠܵܐ ܚܲܢ ܠܲܟܼ̈ܢܵܘܵܬܹܗ ܚܘܼܒܵܢܵܐܝܼܬܼ ܀ 199 :ܒܢܘܼܪܵܐ ܒܵܚܲ̇ܪ ܥܒܼܵܕܹ̈ܐ ܘܡܸܠܹ̈ܐ ܕܦܲܓܼܪܵܐ ܘܢܲܦܫܵܐ 200 ܘܵܝ ܠܲܕܼܠܵܐ ܒܢ̣ܵܐ ܥܲܡܠܹ̈ܐ ܕܟܲܝܵ̈ܐ ܒܒܸܢܝܵܢ ܩܘܼܫܬܵܐ ܀ 201 :ܕܠܵܐ ܒܘܼܣܪܵܢܵܐ ܡܲܦܸܩ ܕܝܼܢܵܐ ܥܲܠ ܟܠ ܬܸܓܼܡܝܼ̈ܢ 202 ܘܠܵܐ ܡܸܬܼܟܲܚܲܕܼ ܡ̣ܢ ܫܘܼܠܛܵܢܵܐ ܕܟܼܵܗܢܹ̈ܐ ܘܡܲܠ̈ܟܹܿܐ ܀ 203 ܠܟܼܵܗܢܹ̈ܐ ܝܲܬܿܝܼܪ ܡܲܨܪܸܦ ܢܸܓܼܕܹܿܗ ܥܲܙܝܼܙܵܐܝܼܬܼ: 334 204 ܠܦܘܼܬܼ ܡ̇ܘܗܲܒܼܬܼܵܐ ܘܪܲܒܿܘܼܬܼ ܚܲܝܠܵܐ ܕܩܲܒܸܿܠܘ ܡܸܢܹܗ ܀ 205 :ܥܠܲܝܗܘܿܢ ܡܩܲܫܸܐ ܢܸܓܼܕܵܐ ܥܦܝܼܦܵܐ ܕܠܵܐ ܚܵܘܣܵܢܵܐ 206 ܠܦܘܼܬܼ ܕܐܸܫܬܲܠܲܛܘ ܠܲܡܚܲܣܵܝܘܼ ܘܠܵܐ ܚܲܢ̣ܘܼ ܘܫܲܒܲܩ̣ܘ ܀ 207 :ܩܕܼܵܡ ܡܲܠܲܐܟܹ̈ܐ ܘܲܒܼܢܲܝ̈ܢܵܫܵܐ ܕܵܐܹ̇ܢ ܥܲܡܗܘܿܢ 208 ܠܦܘܼܬܼ ܕܐܸܬܼܝܲܩܲܪܘ ܠܥܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܀ 209 :ܠܥܹܝܢ ܐܲܪ̈ܥܵܢܹܐ ܘܲܫܡܲܝܵܢܹ̈ܐ ܝܲܩܲܪ ܐܸܢܘܿܢ 210 ܘܗܸܢܘ̣ܿܢ ܫܵܛ̇ܘܼܗ̇ ܒܲܕܼܠܵܐ ܦܲܐ̈ܝܵܢ ܠܝܲܩܝܼܪܘܼܬܹܗ ܀ 211 :ܠܥܸܠ ܡ̣ܢ ܟܸܢܫܹ̈ܐ ܕܲܫܡܲܝܵܢܹ̈ܐ ܝܲܩܲܪ ܐܸܢܘܿܢ 212 ܘܠܵܐ ܦܪܲܫܘ ܘܝܼܕܲܥܘ ܕܠܲܐܝܢܵܐ ܕܲܪܓܼܵܐ ܣܠܸ̣ܩܘ ܬܵܚܘܿܒܹ̈ܐ ܀ 213 :ܠܕܲܪܓܼܵܐ ܪܵܡ̇ܐ ܕܪܵܡ ܡ̣ܢ ܥܝܼܪܹ̈ܐ ܐܵܣܸܩ ܐܸܢܘܿܢ 214 ܘܠܵܐ ܐܸܬܼܒܲܝܲܢܘ ܕܲܟܼܡܵܐ ܝܸܪܒܲܬ̤ ܫܝܼܛܘܼܬܼ ܐ̄ܢܵܫܵܐ ܀ 215 :ܕܲܪܓܼܵܐ ܕܩܲܒܸܿܠܘ ܣܵܗܹ̇ܕܼ ܕܲܟܼܡܵܐ ܝ̄ܪܸܒܼܘ ܡ̣ܢ ܟܠܵܐ 216 ܕܐܵܦ ܪ̈ܘܼܚܵܢܹܐ ܕܪܵܡܝܼܢ ܡܸܢܹܗܘܿܢ ܡ̇ܟܿܝܼܢ ܡܸܢܗܘܿܢ ܀ 217 :ܠܵܐ ܫܲܠܝܼܛܝܼܢ ܥܝܼܪܹ̈ܐ ܠܡܸܣܲܩ ܠܕܲܪܓܼܵܐ ܕܲܢܣ݂ܲܒܼܘ 218 ܘܠܵܐ ܡܨܹܝܢ ܣܵܦ̇ܩܝܼܢ ܠܲܡܫܲܡܵܫܘܼ ܒܲܩܢܘܿܡܲܝ̈ܗܘܿܢ ܀ 219 :ܕܚܝܼܠܝܼܢ ܟܸܢܫܹ̈ܐ ܕܲܫܡܲܝܵܢܹ̈ܐ ܘܫܘܼܠܛܵܢܲܝ̈ܗܘܿܢ 220 ܘܡ̇ܐ ܕܡܸܬܼܦܲܚܡܝܼܢ ܒܨܝܼܪܝܼܢ ܣܲܓܿܝܼ ܡ̣ܢ ܟܵܗܢܘܼܬܼܵܐ ܀ 221 :ܫܒܼܝܼܚ ܓܲܒܼܪܝܹܠ ܘܪܲܒܿ ܡܝܼܟܼܵܐܹܝܠ ܘܫܸܡܗܘܿܢ ܣܵܗܹ̇ܕܼ 222 ܘܟܲܕܼ ܛܵܒܼ ܗܵܟܲܢ ܒܨܝܼܪ ܟܘܼܢܵܝܗܘܿܢ ܡ̣ܢ ܟܵܗܢܘܼܬܼܵܐ ܀ 223 :ܫܸܡ ܟܵܗܢܘܼܬܼܵܐ ܪܲܒܿ ܟܘܼܢܵܝܹܗ ܡ̣ܢ ܟܠ ܡܸܕܹܿܡ 224 ܘܐܸܢ ܐܝܼܬܼ ܡܸܕܹܿܡ ܕܪܲܒܿ ܡ̣ܢ ܡܸܕܹܿܡ ܬܚܹܝܬܼ ܡܵܗܢܘܼܬܼܵܐ ܗ̄ܘ̣ ܀ 225 :ܟܵܗܢܹ̈ܐ ܫܵܛ̣ܘܼܗܝ ܠܕܲܪܓܼܵܐ ܪܵܡ̇ܐ ܕܝܲܩܲܪ ܐܸܢܘܿܢ 226 ܘܐܲܣܢܝܼܘ ܫܘܼܦܪܹܗ ܒܲܫܟܼܝܼܪ̈ܵܬܼܵܐ ܕܣܘܼܥܪ݁ܵܢܲܝܗܘܿܢ ܀ 227 :ܒܟܼܠ ܐܸܣܟܿܡܝܼ̈ܢ ܫܵܛ̣ܘܼܗܝ ܠܲܫܡܵܐ ܕܝܲܩܝܼܪܘܼܬܹܗ 228 ܥܕܲܡ̇ܐ ܕܐܲܗܸܠܘ ܘܲܓܼܚܸܟܼܘ ܫܝܼܛܹ̈ܐ ܥܲܠ ܫܝܼܛܘܼܬܹܗ ܀ 229 :ܒܛܝܼܡܹ̈ܐ ܙܲܒܿܢܘܼܗ̇ ܠܗܵܝ̇ ܡ̇ܘܗܵܒܼܬܼܵܐ ܕܠܵܐ ܡܸܙܕܲܒܿܢܵܐ 230 ܘܟܲܕ ܠܵܐ ܣܵܦ݂̇ܩ ܥܵܠܡܵܐ ܠܛܝܼܡܹ̈ܝܗ̇ ܩܲܨ̣ܘ ܠܵܗ̇ ܛܝܼܡܹ̈ܐ ܀ 231 :ܒܥܵܒܼܘܿܪ̈ܝܵܬܼܵܐ ܚܲܠܦܘܼܗܝ ܠܕܲܪܓܼܵܐ ܕܠܵܐ ܡܸܬܼܚܲܠܲܦ 232 ܘܟܲܕܼ ܠܲܝܬܿ ܡܸܕܸܿܡ ܕܕܼܵܡܹ̇ܐ ܠܲܫܡܹܗ ܣܵܡ̣ܘ ܠܹܗ ܦܸܚܡܵܐ ܀ 233 :ܐܘܿ ܝܼܥܢܘܼܬܼܵܐ ܟܪܘܿܡܬܼܵܢܝܼܬܼܵܐ ܕܠܵܐ ܡܸܬܼܟܲܚܕܼܵܐ 234 ܕܣܵܡܲܬ̤ ܛܝܼܡܹ̈ܐ ܠܡܸܕܹܿܡ ܕܲܥܣܸܩ ܠܡܸܙܕܲܒܵܢܘܼ ܀ 235 :ܐܘܿ ܟܵܗܢܘܼܬܼܵܐ ܕܚܲܠܦܲܬ̤ ܠܲܫܡܵܗ̇ ܒܲܨܥܝܼܪ̈ܵܬܼܵܐ 236 ܘܟܲܕܼ ܟܠ ܕܝܼܠܵܗ̇ ܝܸܗܒܲܬ̤ ܕܝܼܠܵܗ̇ ܒܲܕܼܠܵܐ ܝܘܼܬܼܪܵܢ ܀ 237 :ܒܲܕܼܠܵܐ ܕܝܼܠܵܗ̇ ܙܸܒܼܢܲܬ̤ ܕܝܼܠܵܗ̇ ܗܸܕܼܝܘܿܛܵܐܝܼܬܼ 238 ܘܗܵܐ ܡܸܬܼܓܲܚܟܼܵܐ ܒܹܝܬܼ ܙܵܒܼܘܿܢܵܐ ܠܲܡܙܲܒܿܢܵܢܵܐ ܀ 239 :ܚܲܕܼ ܡܲܥܘܸܠ ܒܵܗ̇ ܟܲܕܼ ܝܵܗܹ̇ܒܼ ܠܵܗ̇ ܒܛܝܼܡܹ̈ܐ ܫܝܼܛܹ̈ܐ 240 ܘܚܲܕܼ ܫܵܐܲܛ ܒܲܕܼ ܢܲܣܹ̇ܒܼ ܠܵܗ̇ ܒܦܲܟܿܝܼ̈ܗܵܬܼܵܐ ܀ 335 241 :ܒܹܝܬܼ ܙܵܒܼܘܿܢܵܐ ܠܲܡܙܲܒܿܢܵܢܵܐ ܨܲܥܪܵܗ̇ ܣܵܓܹ̇ܐ 242 ܒܲܕܼܠܵܐ ܪܓܼܝܼܫܝܼܢ ܕܡܵܢ̇ܵܘ ܚܲܝܠܵܐ ܕܲܟܼܣܸܐ ܒܓܼܵܘܼܵܗ̇ ܀ 243 :ܐܵܪܵܐ ܒܘܿܪܹ̈ܐ ܕܠܵܐ ܡܸܣܬܲܟܿܠܝܼܢ ܒܹܝܬܼ ܛܵܒܼ ܘܲܠܒܼܝܼܫ 244 ܠܡܵܢ ܙܲܒܸܿܢܬܿܘܿܢ ܪܵܘܡ̇ܐ ܘܥܘܼܡܩܵܐ ܒܠܵܐ ܝܼܕܲܥܬܼܵܐ ܀ 245 :ܐܵܪܵܐ ܚܬܼܝܼܪܹ̈ܐ ܕܐܲܛܥܝܼ ܐܸܢܘܿܢ ܚܘܼܬܼܪܵܐ ܣܲܟܼܠܵܐ 246 ܠܡܵܢ ܚܲܠܸܦܬܿܘܿܢ ܫܲܡܝܵܢ̈ܝܵܬܼܵܐ ܒܡܸܕܼܪܵܐ ܫܝܼܛܵܐ ܀ 247 :ܡܲܪܓܵܢܝܼܬܼܵܐ ܠܵܐ ܡܸܙܕܲܒܿܢܵܐ ܕܠܵܐ ܝܵܕܼܘܿܥܹ̈ܐ 248 ܘܗܵܢܵܘ̇ ܓܘܼܚܟܵܐ ܕܲܠܟܼܵܗܢܘܼܬܼܲܐ ܙܲܒܿܢܘܼܗ̇ ܣܲܟܼܠܹ̈ܐ ܀ 249 :ܛܲܒܼܥܹ̈ܐ ܕܟܹܐܦܹ̈ܐ ܒܓܲܙܵܐ ܕܡܲܠ̈ܟܹܿܐ ܫܟܼܝܼܚܝܼܢ ܒܲܠܚܘܿܕܼ 250 ܘܗܵܢܵܘ̇ ܬܸܡܗܵܐ ܕܩܘܼܕܼܫܵܐ ܕܩܘܼܕܼܫܹ̈ܐ ܒܟܼܝܼܪ ܒܹܝܬܼ ܫܘܼܩܹ̈ܐ ܀ 251 :ܕܲܪ̈ܓܹܐ ܕܥܵܠܡܵܐ ܠܵܐ ܡܸܬܼܝܼܗ̄ܒܿܝܼܢ ܕܠܵܐ ܒܘܼܝܵܢܵܐ 252 ܘܚܸܟܼܡܲܬܼ ܩܘܼܫܬܵܐ ܠܲܝܬܿ ܫܘܼܐܵܠܵܐ ܥܲܠ ܦܘܼܪܢܵܣܵܗ̇ ܀ 253 :ܗܵܕܹܐ ܒܲܠܚܘܿܕܼ ܡܫܲܐܸܠ ܟܵܗܢܵܐ ܡ̇ܐ ܕܝܵܗܹ̇ܒܼ ܠܵܗ̇ 254 ܕܐܸܢ ܐܝܼܬܼ ܕܲܗܒܼܵܐ ܘܐܸܢ ܠܵܐ ܠܵܐ ܦܠܸܐ ܠܲܡܙܲܒܵܢܘܼ ܀ 255 :ܠܦܘܼܬܼ ܡ̇ܘܗܲܒܼܬܼܵܐ ܚܵܐܲ݁ܪ ܟܵܗܢܵܐ ܘܟܸܢ ܝܵܗܹ̇ܒܼ ܠܵܗ̇ 256 ܕܐܸܢ ܣܲܓܿܝܼܠܵܐ ܐܵܦ ܗܘ̤ ܡܲܣܓܸܿܐ ܘܲܡܫܲܦܲܥ ܠܵܗ̇ ܀ 257 :ܠܦܘܼܬܼ ܚܘܼܣܪܵܢܵܐ ܡܸܬܿܬܲܓܼܪ ܒܵܗ̇ ܐܵܦ ܙܵܒܼܘܿܢܵܐ 258 ܟܲܕܼ ܡܸܬܼܦܲܪܲܣ ܕܢܸܥܩܘܿܒܼ ܕܐܵܘܒܸܿܕܼ ܒܐܘܼܡ̇ܢܘܼܬܹܗ ܀ 259 :ܐܘܼܡ̇ܢܘܼܬܼܵܐ ܚܫܝܼܒܼ ܦܘܼܠܚܵܢܵܗ̇ ܠܲܡܙܲܒܿܢܵܢܵܗ̇ 260 ܘܐܲܝܟ ܬܹܐܓܼܘܼܪܬܵܐ ܡܸܬܼܗܲܦܟܼܝܼܢ ܒܵܗ̇ ܐܵܦ ܙܵܒܼܘܿܢܹ̈ܝܗ̇ ܀ 261 :ܠܲܝܬܿ ܣܘܼܦܣܵܪܵܐ ܥܲܠ ܬܹܐܓܼܘܼܪܬܵܐ ܕܐܲܪ݁ܥܵܢܝܵܬܼܵܐ 262 ܐܲܝܟ ܣܘܼܦܣܵܪܵܐ ܕܡܲܣܒܼܵܐ ܘܡܲܬܿܠܵܐ ܕܪ̈ܘܼܚܵܢܝܵܬܼܵܐ ܀ 263 :ܠܲܝܬܿ ܡܲܨܘܼܬܼܵܐ ܥܲܠ ܩܸܢܝܵܢܹ̈ܐ ܡܸܬܼܚܲܒܿܠܵܢܹ̈ܐ 264 ܐܲܝܟ ܬܲܟܼܬܿܘܼܫܵܐ ܕܲܪܡܸܐ ܠܐ̄ܢܵܫܵܐ ܥܲܠ ܕܲܥܢܼܝܼ̈ܕܼܵܢ ܀ 265 :ܠܵܐ ܥܒ݂ܲܕܼܘ ܩܹܐܪ̈ܣܹܐ ܡܲܠ̈ܟܹܿܐ ܛܪ̈ܘܼܢܹܐ ܚܲܕܼ ܠܘܼܩܒܲܠ ܚܲܕܼ 266 ܐܲܟܼܡܵܐ ܕܟܼܵܗܢܹ̈ܐ ܣܥ̣ܵܘ ܥܲܠ ܟܵܗܢܹ̈ܐ ܚܲܪܡ̇ܢܵܐܝܼܬܼ ܀ 267 :ܚܲܪܡ̇ܢܵܐܝܼܬܼ ܐܲܩܠܝܼܘ ܟܵܗܢܹ̈ܐ ܥܲܠ ܟܵܗܢܘܼܬܼܵܐ 268 ܘܲܕܼܠܵܐ ܚܵܘܣܵܢ ܕܵܫܘ̣ ܠܲܚܕܼܵܕܹ̈ܐ ܒܚܸܪܝܵܝܘܼܬܼܗܘܿܢ ܀ 269 :ܒܚܸܪܝܵܝܘܼܬܼܗܘܿܢ ܕܲܠܚܘܼܗܝ ܠܥܵܠܡܵܐ ܕܲܡܫܲܝܲܢ ܗ̄ܘ̣ܵܐ 270 ܘܗܵܐ ܡܸܬܼܟܲܬܲܫ ܠܹܠܲܝ ܐܝܼܡܵܡ ܕܠܵܐ ܫܘܼܠܵܡܵܐ ܀ 271 :ܒܦܘܼܠܵܓܲܝ̈ܗܘܿܢ ܣܲܕܿܩܘܼܗܝ ܠܢܲܚܬܵܐ ܕܗܲܝܡܵܢܘܼܬܼܵܐ 272 ܘܲܣܓܼܝܼ ܒܐܲܪܥܵܐ ܗܲܝܡܵܢ̈ܘܵܬܼܵܐ ܕܠܵܐ ܡܸܢܝܵܢܵܐ ܀ 273 :ܒܚܵܣܘܿܡܘܼܬܼܗܘܿܢ ܐܲܪܡܝܼܘ ܐܲܪܡܝܼܘ ܣܸܕܼܩܹ̈ܐ ܒܹܝܬܼ ܥܹ̈ܕܼܵܬܼܵܐ 274 ܘܗܵܐ ܦܠܝܼܓܼ ܟܠܢܵܫ ܘܠܵܐ ܐ̇̄ܢܵܫ ܫܵܠܹ̇ܡ ܠܡܸܠܲܬܼ ܚܲܒܼܪܹܗ ܀ 275 :ܚܲܕܼ ܗ̄ܘ̣ ܓܘܼܫܡܵܐ ܟܢܘܼܫܝܵܐ ܕܟܲܢܸܫ ܡܫܝܼܚܵܐ ܒܚܲܫܹܗ 276 ܘܟܼܵܗܢܹ̈ܐ ܦܲܠܓܼܘܼܗܝ ܠܲܡ̈ܢܵܘܵܬܼܵܐ ܕܠܵܐ ܡܸܬܼܡܲܢ̈ܝܵܢ ܀ 336 277 :ܚܲܕܼ ܗ̄ܘ̣ ܦܲܓܼܪܵܐ ܕܲܗܘ̤ܵܐ ܕܸܒܼܚܵܐ ܚܠܵܦ ܬܲܪܥܘܼܬܲܢ 278 ܘܛܲܠܩܘܼܗܝ ܣܲܟܼܠܹ̈ܐ ܒܝܲܕܼ ܡܘܼܙܵܓܼܵܐ ܕܚܲܕܼ ܒܲܐ̄ܚܪܹܢܵܐ ܀ 279 :ܚܲܕܼ ܗ̄ܘ̣ ܟܝܵܢܵܐ ܕܐܝܼܬܼܵܘܗܝ ܘܐܝܼܬܼܵܘܗܝ ܐܲܟܼܡܵܐ ܕܐܝܼܬܼܵܘܗܝ 280 ܘܡܲܙܓܼܘܼܗܝ ܥܲܛܠܹ̈ܐ ܥܲܡ ܬܘܼܩܵܢܵܐ ܕܲܥܒܼܵܕܼ ܐܝܼܕܼܵܘ̈ܗܝ ܀ 281 :ܒܦܲܓܼܪܵܐ ܘܢܲܦܫܵܐ ܓܡܝܼܪ ܗ̄ܘ̣ܵܐ ܕܸܒܼܚܵܐ ܕܦܘܼܪܩܵܢ ܚܲܝܲܝ̈ܢ 282 ܘܥܲܒܼ݂ܕܿܘܼܗܝ ܚܲܪ̈ܡܹܐ ܚܲܣܝܼܪ ܢܲܦܫܵܐ ܘܲܕܼܠܵܐ ܗܵܘܢܵܐ ܀ 283 :ܚܲܕܼ ܗ̄ܘ̣ ܡܸܠܬܼܵܐ ܒܪܵܐ ܕܐܲܠܵܗܵܐ ܥܲܡ ܝܵܠܘܿܕܹܗ 284 ܘܣܲܕܩܵܗ̇ ܚܘܼܬܼܪܵܐ ܠܗܵܝ̇ ܫܲܘܝܘܼܬܼܵܐ ܟܲܕܼ ܠܵܐ ܣܲܕܼܩܵܗ̇ ܀ 285 :ܕܠܵܐ ܣܘܼܝܵܟܼܵܐ ܗ̄ܘ̣ ܘܲܕܼܠܵܐ ܚܙܵܬܼܵܐ ܗ̄ܘ̣ ܟܝܵܢ ܐܝܼܬܼܘܼܬܼܵܐ 286 ܘܚܲܒܼܫܘܼܗܝ ܦܲܩܪܹ̈ܐ ܒܓܼܵܘ ܗܲܕܵܡܹ̈ܐ ܟܲܕܼ ܠܵܐ ܚܲܒܼ݂ܫܘܼܗܝ ܀ 287 :ܟܝܵܢܹ̈ܐ ܦܪ̈ܝܼܫܹܐ ܗܘ̤ܵܘ ܒܐܝܼܬܼܘܼܬܼܵܐ ܚܲܕܼ ܦܲܪܨܘܿܦܵܐ 288 ܘܠܵܐ ܡܸܣܬܲܟܿܠܝܼܢ ܥܲܛ̈ܠܲܝ ܠܸܒܵܐ ܙܢܵܐ ܕܲܗܘ̤ܵܘ ܒܹܗ ܀ 289 :ܗܘ̤ܵܘ ܒܹܗ ܐܸܡ̇ܪܹܬܼ ܠܵܘ ܒܲܟܼܝܵܢܵܐ ܐܸܠܵܐ ܒܚܘܼܒܵܐ 290 ܘܟܲܕܼ ܛܵܒܼ ܗܵܟܲܢ ܦܪܝܼܫ ܚܲܕܼ ܡ̣ܢ ܐܲܝܟ ܡ̇ܐ ܕܲܦܪܝܼܫ ܀ 291 :ܦܪܝܼܫ ܒܵܪܘܿܝܵܐ ܘܠܵܐ ܡܸܬܼܚܲܠܲܛ ܒܲܥܵܒܼ̇ܕܼ ܐܝܼܕܼܵܘ̈ܗܝ 292 ܘܡ̇ܟܵܐ ܒܪܝܼܬܼܵܐ ܡ̣ܢ ܪܲܒܿܘܼܬܼܵܐ ܕܚܲܝܠܵܐ ܕܲܒܼܪ̣ܵܗ̇ ܀ 293 :ܒܪܝܼܬܼܵܐ ܒܪܝܼܬܼܵܐ ܗ̄ܝܼ ܟܡܵܐ ܐܸܢ ܬܹܐܪܲܒܼ ܒܝܲܕܼ ܥܸܠ̈ܠܵܬܼܵܗ̇ 294 ܘܐܝܼܬܼܝܵܐ ܐܝܼܬܼܝܵܐ ܗ̄ܘ̣ ܟܡܵܐ ܐܸܢ ܢܸܙܥܲܪ ܒܲܫܡܵܐ ܫܐܝܼܠܵܐ ܀ 295 :ܒܲܫܡܵܐ ܫܐܝܼܠܵܐ ܙܥܲܪ̣ ܥܵܒܼܘܿܕܼܵܐ ܟܲܕܼܚܵܣ ܕܲܙܥܲܪ̣ 296 ܕܐܵܦ ܗ̤ܝ ܗܵܕܹܐ ܕܲܫܡܵܐ ܫܐܝܼܠܵܐ ܕܡܲܪܵܚܘܼܬܼܵܐ ܗ̄ܝܼ ܀ 297 :ܕܡܲܪܵܚܘܼܬܼܵܐ ܗ̄ܝܼ ܕܐ̄ܢܵܫ ܥܲܠ ܐܝܼܬܼܝܵܐ ܢܣܝܼܡ ܫܘܼܠܵܦܵܐ 298 ܘܲܕܼܫܘܼܥܠܵܝܵܐ ܗ̄ܝܼ ܕܢܹܐܡܲܪ ܕܲܡܥ݂ܲܪ ܐܵܦܸܢ ܒܲܫܡܵܐ ܀ 299 :ܠܲܝܬܿ ܠܐܝܼܬܼܘܼܬܼܵܐ ܠܡܸܙܥܲܪ ܡܸܡܬܼܘܿܡ ܡ̣ܢ ܡܵܐ ܕܐܝܼܬܹܝܗ̇ 300 ܠܵܐ ܫܐܝܼܠܵܐܝܼܬܼ ܘܠܵܐ ܒܣܘܼܥܪ̈ܵܢܹܐ ܘܠܵܐ ܟܠ ܟܠܹܗ ܀ 301 :ܝܲܨܪܵܐ ܕܒܼܝܼܫܹ̈ܐ ܣܥ̣ܵܐ ܠܡܲܙܥܵܪܘܼ ܠܲܟܼܝܵܢ ܟܲܣܝܵܐ 302 ܘܗܵܕܹܐ ܥܝܵܪܬܵܐ ܐ̄ܢܵܫ ܠܵܐ ܚܲܝܵܒܼ ܐܸܠܵܐ ܟܵܗܢܹ̈ܐ ܀ 303 :ܟܵܡܢܹ̈ܐ ܐܸܠܘܼ ܒܢܵܘ̣ ܬܲܩܢܵܐܝܼܬܼ ܚܕܼܵܐ ܬܵܘܕܿܝܼܬܼܵܐ 304 ܠܵܐ ܒܵܢܹ̇ܝܢ ܗ̄ܘ̣ܵܘ ܣܲܟܼܠܹ̈ܐ ܥܡܝܼܪܵܐ ܒܒܸܢܝܵܢ ܩܘܼܫܬܵܐ ܀ 305 :ܟܵܗܢܹ̈ܐ ܐܸܠܘ ܚܢ̣ܵܘ ܙܵܘܥܲܝ̈ܗܘܿܢ ܠܢܝܼܫܵܐ ܬܪܝܼܨܵܐ 306 ܠܵܐ ܫܵܟܹ̇ܝܢ ܗ̄ܘ̣ܵܘ ܥܲܛܠܲܝ̈ ܠܸܒܵܐ ܡܸܠܹ̈ܐ ܕܨܲܥܪܵܐ ܀ 307 :ܟܵܗܢܹ̈ܐ ܐܸܠܘܼ ܪܚܸܡ̣ܘ ܫܲܘܝܘܼܬܼܵܐ ܕܓܼܘܼܫܡܵܐ ܡܫܝܼܚܵܐ 308 ܠܵܐ ܢܵܒܼܥ̇ܝܢ ܗ̄ܘ̣ܵܘ ܣܸܕܼܩܹ̈ܐ ܦܠܝܼܓܹ̈ܐ ܒܓܼܵܘ ܥܹ̈ܕܵܬܼܵܐ ܀ 309 ܟܵܗܢܹ̈ܐ ܐܸܠܘܼ ܗܪܲܓܼ ܪܸܥܝܵܢܗܘܿܢ ܒܪ̈ܘܼܚܵܢܝܵܬܼܵܐ: 337 310 ܠܵܐ ܦܵܟܲ̇ܗ ܗ̄ܘ̣ܵܐ ܚܘܼܒܵܐ ܕܐ̄ܢܵܫܵܐ ܡ̣ܢ ܕܲܥܬܼܝܼ̈ܕܼܵܢ ܀ 311 :ܟܵܗܢܹ̈ܐ ܗܘ̤ܵܘ ܠܲܢ ܥܸܠܲܬܼ ܚܲܝܹ̈ܐ ܘܥܸܠܲܬܼ ܡ̇ܘܬܵܐ 312 ܘܐܸܠܘܼ ܩܵܘܝܘܼ ܒܛܲܟܼܣܵܐ ܕܚܲܝܹ̈ܐ ܛܘܼܒܼ ܗܘ̤ܵܐ ܠܓܸܢܣܲܢ ܀ 313 :ܥܸܠܲܬܼ ܡ̇ܘܬܵܐ ܥܸܠܒܲܬ̤ ܗܵܫ̇ܐ ܒܣܘܼܥܪ̈ܵܢܲܝܥܗܘܿܢ 314 ܘܗܵܐ ܚܦܝܼܛ ܟܠܢܵܫ ܠܡܸܩܛܲܠ ܚܲܒܼܪܹܗ ܕܠܵܐ ܚܵܘܣܵܢܵܐ ܀ 315 :ܡܸܢܗܘܿܢ ܝܼܠܸܦܘ ܐ̄̈ܢܵܫܵܐ ܠܡܸܚܣܲܡ ܒܲܒܼܢܲܝ̈ܢܵܫܵܐ 316 ܘܗܵܐ ܠܒܼܝܼܫ ܟܠܢܵܫ ܛܢܵܢܵܐ ܕܪܘܼܓܼܙܵܐ ܥܲܠ ܩܲܪܝܼܒܹܗ ܀ 317 :ܗܸܢܘ̣ܿܢ ܫܲܪܝܼܘ ܒܝܲܕܼ ܬܲܒܼܥ̈ܬܼܵܐ ܕܲܥܝܵܪ݁ܵܬܼܵܐ 318 ܘܗܵܐ ܠܚܝܼܡ ܟܠܢܵܫ ܠܡܸܬܼܒܲܥ ܥܝܵܪܬܼܵܐ ܡ̣ܢ ܒܲܪ ܙܵܘܓܹܿܗ ܀ 319 :ܗܸܢܘ̣ܿܢ ܕܵܘܸܕܼܘ ܛܲܟܼܣܹ̈ܐ ܬܲܩܢܹ̈ܐ ܕܪܵܕܹܝܢ ܗ̄ܘ̣ܵܘ ܒܲܢ 320 ܘܗܵܐ ܒܠܝܼܠ ܥܘܼܡܪܲܢ ܘܠܲܝܬܿ ܒܲܢ ܛܲܟܼܣܵܐ ܕܕܼܵܡܹ̇ܐ ܠܐ̄ܢܵܫܵܐ ܀ 321 :ܠܗܘܿܢ ܙܵܕܹܩ ܗ̄ܘ̣ܵܐ ܕܲܢܚܲܟܿܡܘܼܢܵܗ̇ ܠܫܲܒܼܪܘܼܬܼ ܐ̄ܢܵܫܵܐ 322 ܘܢܲܩܢܘܿܢ ܛܲܥܡܵܐ ܠܲܕܼܠܵܐ ܛܲܥܡܵܐ ܒܝܲܕܼ ܡܸܠܲܝ̈ܗܘܿܢ ܀ 323 :ܠܗܘܿܢ ܘܵܠܹ̇ܐ ܗ̄ܘ̣ܵܐ ܠܡܸܪܕܵܐ ܫܲܦܝܼܪ ܠܘܲܥܕܵܐ ܕܲܠܗܲܠ 324 ܘܲܒܼܥܲܡܠܲܝ̈ܗܘܿܢ ܠܲܡܚܵܘܵܝܹܘ ܫܒܼܝܼܠ ܡܲܠܟܿܘܼܬܼܵܐ ܀ 325 :ܡܲܠܟܿܘܼܬܼ ܪܵܘܡ̇ܐ ܡ̣ܠܲܟ ܒܵܪܘܿܝܵܐ ܠܲܟܼܝܵܢ ܐ̄ܢܵܫܵܐ 326 ܘܣܵܓܼܘܼܗ̇ ܟܵܗܢܹ̈ܐ ܠܐܘܼܪܚܵܐ ܕܪܵܡ̇ܐ ܘܠܵܐ ܐ̄ܢܵܫ ܪܵܕܹܐ ܀ 327 :ܒܛ̣ܠܘ ܚܵܙܘܿܩܹ̈ܐ ܡ̣ܢ ܡܲܪܕܲܝܼܬܼܵܐ ܕܫܲܦܝܼܪ݁ܵܬܼܵܐ 328 ܘܠܵܐ ܐ̄ܢܵܫ ܚܵܙܹ̇ܩ ܒܲܫܒܼܝܼܠ ܣܲܒܼܪܵܐ ܕܗܲܝܡܵܢܘܼܬܼܵܐ ܀ 329 :ܘܐܸܢ ܐܝܼܬܼ ܕܚܵܙܹ̇ܩ ܐܵܘ ܡ̣ܢ ܚܘܼܒܵܐ ܐܵܘ ܒܲܟܼܝܵܢܵܐ 330 ܠܵܐ ܡܲܪܦܸܐ ܠܹܗ ܩܹܐܪܣܵܐ ܕܟܼܵܗܢܹ̈ܐ ܠܡܸܪܕܼܵܐ ܫܲܦܝܼܪ ܀ 331 :ܩܸܢܛܵܐ ܪܲܒܵܐ ܕܬܲܟܼܬܿܘܼܫܲܝ̈ܗܘܿܢ ܪܡܸܐ ܥܲܠ ܟܠܢܵܫ 332 ܘܠܲܝܬܿ ܕܲܡܗܲܝܡܸܢ ܘܐܵܦܠܵܐ ܠܐܲܝܢܵܐ ܕܫܲܪܝܼܪ ܚܘܼܒܹܿܗ ܀ 333 :ܒܹܝܬܼ ܦܘܼܠܵܓܼܵܐ ܕܠܵܐ ܫܲܘܝܘܼܬܼܵܐ ܪܡܸܐ ܗ̄ܘ̣ܵܐ ܟܠܢܵܫ 334 ܘܠܲܝܬܿ ܬܘܼܟܼܠܵܢܵܐ ܐ̄ܢܵܫ ܥܲܠ ܚܲܒܼܪܹܗ ܐܵܦܠܵܐ ܒܡܸܠܬܼܵܐ ܀ 335 :ܐܸܢ ܐܝܼܬܼ ܕܲܬܼܟܼܝܼܠ ܗܘ̤ ܬܘܼܟܼܠܵܢܹܗ ܠܵܘ ܬܘܼܟܼܠܵܢܵܐ ܗ̄ܘ̣ 336 ܕܲܨܠܹܝܢ ܦܲܚܹ̈ܐ ܡ̣ܢ ܟܠ ܓܼܒܿܝܼ̈ܢ ܩܕܼܵܡ ܬܘܼܟܼܠܵܢܹܗ ܀ 337 :ܒܡܸܠܬܼܵܐ ܨܵܝ̇ܕܲܝܢ ܐ̄ܢܵܫܵܐ ܠܐ̄ܢܵܫܵܐ ܐܲܝܟ ܕܲܒܼܦܲܚܹ̈ܐ 338 ܘܛܵܟ ܥܵܗܹ̇ܢ ܗ̄ܘ̣ܵܐ ܫܸܬܼܩܵܐ ܘܫܸܠܝܵܐ ܘܠܵܐ ܥܸܢܝܵܢܐ ܀ 339 :ܡܸܠܬܼܵܐ ܗ̄ܝܼ ܐܵܬܼܵܐ ܕܲܡܠܝܼܠܘܼܬܼܵܐ ܕܐܝܼܬܼ ܒܲܟܼܝܵܢܲܢ 340 ܘܡ̇ܢܵܐ ܢܸܥܒܸܿܕܼ ܕܲܟܼܠܵܗ̇ ܚܣܵܡܵܐ ܠܣܵܥܘܿܪܘܼܬܼܵܗ̇ ܀ 341 :ܚܣܵܡܵܐ ܕܟܼܵܗܢܹ̈ܐ ܙܩܝܼܦ ܐܲܝܟ ܐܲܪܝܵܐ ܒܲܥܪܝܼܪܵܝܵܐ 342 ܘܗܵܐ ܡܢܲܟܸܿܬܼ ܠܵܗ̇ ܠܲܡܠܝܼܠܘܼܬܼܵܐ ܒܢܝܼܒܼܵܐ ܕܪܘܼܓܼܙܵܐ ܀ 343 :ܢܝܼܒܹ̈ܐ ܕܚܲܝܘܬܼܵܐ ܩܢܵܬ̤ ܟܵܗܢܘܼܬܼܵܐ ܡ̇ܫܚܲܬܼ ܐ̄ܢܵܫܵܐ 344 ܘܫܲܪܝܲܬ̤ ܢܵܟܼܬܵܐ ܘܒܼܵܥ̇ܛܵܐ ܠܐ̄ܢܵܫܵܐ ܕܠܵܐ ܒܘܼܝܵܢܵܐ ܀ 345 ܒܵܗ̇ ܐܲܣܝܼܪ ܗ̄ܘ̣ܵܐ ܫܲܝܢܵܐ ܕܐ̄̈ܢܵܫܵܐ ܘܲܕܼܪ̈ܘܼܚܵܢܹܐ: 338 346 ܘܗܵܐ ܕܲܚܝܼܠܝܼܢ ܥܝܼܪܹ̈ܐ ܘܐ̄ܢܵܫܵܐ ܠܡܸܩܪܲܒܼ ܨܹܐܕܹܝܗ̇ ܀ 347 :ܓܘܼܢܚܵܐ ܪܲܒܵܐ ܗܘ̤ܵܐ ܒܹܗ ܒܕܼܵܪܲܢ ܡܠܸܐ ܚܵܘ̈ܒܵܬܼܵܐ 348 ܕܡ̣ܢ ܬܘܼܟܼܠܵܢܵܗ̇ ܢܒ݂ܲܥ ܠܲܢ ܩܸܢܛܵܐ ܘܲܦܣܵܩ ܣܲܒܼܪܵܐ ܀ 349 :ܥܲܠ ܟܵܗܢܘܼܬܼܵܐ ܣܝܼܡ ܗ̄ܘ̣ܵܐ ܣܲܒܼܪܵܢ ܘܗܲܝܡܵܢܘܼܬܲܢ 350 ܘܗܵܐ ܢܸܦܠܲܬ̤ ܠܵܗ̇ ܘܲܢܦ݂ܲܠ ܥܲܡܵܗ̇ ܬܘܼܟܼܠܵܢ ܢܲܦܫܵܢ ܀ 351 :ܐܲܝܟ ܫܲܬܸܐܣܬܼܵܐ ܛܥܝܼܢܵܐ ܗ̄ܘ̣ܵܐ ܠܹܗ ܠܒܸܢܝܵܢ ܚܲܝܲܝ̈ܢ 352 ܘܲܢܫ݂ܲܒܼ ܪ̈ܘܼܚܹܐ ܕܲܪ̈ܓܼܝܼܓܼܵܬܼܵܐ ܘܙܵܥܲܬ̤ ܢܵܕܲܬ̤ ܀ 353 :ܠܵܘ ܟܵܗܢܘܼܬܼܵܐ ܙܵܥܲܬ̤ ܘܢܵܕܲܬ̤ ܐܲܟܼܡܵܐ ܕܐܸܡܪܹܬܼ 354 ܟܵܗܢܹ̈ܐ ܪ̈ܦܲܝܵܐ ܙܵܥܘ̣ ܡ̣ܢ ܩܵܠܵܐ ܕܪܘܼܚ ܚܘܼܬܼܚܵܬܹ̈ܐ ܀ 355 :ܠܵܘ ܗܝ̤ ܙܵܥܲܬ̤ ܒܐܲܝܠܹܝܢ ܕܲܬܼܢܹܝܬܼ ܥܲܠ ܫܲܡܵܫܹ̈ܝܗ̇ 356 ܪܸ̈ܥܝܵܢܲܝܗܘܿܢ ܙܥܲܪܘ ܘܐܸܬܼܒܲܨܲܪܘ ܡ̣ܢ ܘܵܠܝܼܬܼܵܐ ܀ 357 :ܠܵܘ ܗܝ̤ ܕܠܲܚܬܼܵܗ̇ ܠܡܸܠܲܬܼ ܫܲܝܢܵܐ ܕܫܲܪܝܵܐ ܗ̄ܘ̣ܵܐ ܒܵܗ̇ 358 ܒܢܲܝ̈ ܝܲܡܝܼܢܵܗ̇ ܠܵܐ ܨܒܼܵܘ ܩܵܘܝܘܼ ܒܒܸܢܝܵܢ ܚܘܼܒܵܗ̇ ܀ 359 :ܠܵܘ ܗܝ̤ ܫܵܛܲܬ̤ ܠܝܲܩܝܼܪܘܼܬܼܵܗ̇ ܩܕܼܵܡ ܒܲܪ̈ܲܝܹܐ 360 ܢܵܛܪܲܝ ܓܼܙܵܗ̇ ܦܲܣܝܼܘ ܐ̄ܪܵܘܵܗ̇ ܒܣܘܼܥܪ̈ܵܢܲܝܗܘܿܢ ܀ 361 :ܫܝܼܛܘܼܬܼ ܐ̄ܪ̈ܵܙܹܝܗ̇ ܚܙܹ̇ܝܬܼ ܟܲܕܼ ܬܵܢܹ̇ܐ ܦܘܼܡ̇ܐ ܕܣܲܟܼܠܹ̈ܐ 362 ܘܐܲܚܢܝ ܬܲܗܪܵܐ ܕܡܲܢܘܼ ܠܡܲܢ̣ܘܼ ܡܨܲܚܸܐ ܒܓܼܘܼܡܕܸܵܐ ܀ 363 :ܥܝܵܪܬܵܐ ܕܨܲܥܪܵܗ̇ ܒܥܹ̇̄ܝܬܼ ܕܐܸܬܼܢܲܩܲܡ ܒܝܲܕܼ ܦܸܬܼܓܼܵܡܲܝ̈ 364 ܡ̣ܢ ܡܲܪ̈ܵܚܹܐ ܕܫܵܛܘ̣ ܚܹܐܪܘܼܬܼܵܗ̇ ܘܨܲܥܲܪܘ ܕܲܪ̈ܓܹܝܗ̇ ܀ 365 :ܒܪܲܒܿܘܼܬܼ ܕܲܪ̈ܚܹܝܗ̇ ܚܙܹ̇ܝܬܼ ܟܲܕܼ ܡܲܗܠܝܼܢ ܥܲܛܠܲܝ̈ ܠܸܒܵܐ 366 ܘܛܸܢܹ̇ܬܼ ܣܲܓܿܝܼ ܕܐܵܘܠܸܕܼ ܡܸܠܹ݁̈ܐ ܕܡܲܪܵܚܘܼܬܼܵܐ ܀ 367 :ܡܲܪܵܚܘܼܬܼܵܐ ܗ̄ܝܼ ܕܐ̄̈ܢܵܫ ܢܸܬܼܥܲܕܲܠ ܒܪܲܒܵܢܘܼܬܼܵܐ 368 ܘܐܸܢܵܐ ܕܥܸܕܼܠܹ̇ܬܼ ܠܵܐ ܛܲܥܝܵܐ ܠܝܼ ܕܐܲܝܟܲܢ ܥܸܕܼܠܹ̇ܬܼ ܀ 369 :ܛܢܵܢܵܐ ܕܟܼܵܗܢܹ̈ܐ ܥܨ̣ܵܢܝ ܕܐܸܬܼܥܲܕܲܠ ܒܣܘܼܥܪ̈ܵܢܲܝܗܘܿܢ 370 ܕܲܫܒܲܩ̣ܘ ܐܘܼܪܚܵܐ ܕܗܲܝܡܵܢܘܼܬܼܵܐ ܘܲܕܼܪܲܫܘ̣ ܙܹܐܦܵܐ ܀ 371 :ܠܣܘܼܥܪ̈ܵܢܲܝܗܘܿܢ ܕܲܕܠܵܐ ܢܵܡܘܿܣ ܥܸܕܼܠܲܬ̤ ܡܸܠܲܬܼܝ 372 ܘܟܲܕܼ ܛܵܒܼ ܥܸܕܼܠܹ̇ܬܼ ܠܵܐ ܫܵܐܹ̇ܛ ܐ̄ܢܵܐ ܠܛܲܟܼܣܵܐ ܕܲܒܼܗܘܿܢ ܀ 373 :ܠܵܘ ܒܲܚܣܵܡܵܐ ܥܸܕܼܠܹ̇ܬܼ ܐܸܢܘܿܢ ܐܲܟܼܡܵܐ ܕܥܸܕܼܠܹ̇ܬܼ 374 ܘܠܵܘ ܡ̣ܢ ܒܝܼܫܘܼ ܐܸܟܼܠܹ̇̄ܬܼ ܩܲܪܨܵܐ ܕܣܘܼܥܪ̈ܵܢܲܝܗܘܿܢ ܀ 375 :ܩܘܼܫܬܵܐ ܣܵܗܹ̇ܕܼ ܕܠܵܐ ܣܢܹ̇ܝܬܼ ܐܸܢܘܿܢ ܘܠܵܐ ܣܵܢܹ̇ܐ ܐ̄ܢܵܐ 376 ܠܥܵܘ̣ܠܵܐ ܕܲܒܼܗܘܿܢ ܣܢܹ̇ܝܬܼ ܕܐܲܪܡܝܼ ܠܲܢ ܗܸܪܬܼܵܐ ܒܝܼܫܬܵܐ ܀ 377 :ܪܚܝܼܡܝܼܢ ܠܝܼ ܛܵܒܼ ܡܸܛܠ ܕܲܪܓܼܵܐ ܕܣܝܼܡ ܒܐܝܼܕܲܝ̈ܗܘܿܢ 378 ܘܲܣܢܹܝܢ ܠܝܼ ܛܵܒܼ ܡܸܛܠ ܥܵܘ̣ܠܵܐ ܕܐܲܪܡܝܼܘ ܒܐܲܪܥܵܐ ܀ 379 :ܪܵܚܹ̇ܡ ܐ̄ܢܵܐ ܠܗܘܿܢ ܡܸܛܠ ܚܘܼܒܵܐ ܚܘܼܒܵܐ ܘܡܸܛܠ ܛܲܟܼܣܵܐ 380 ܘܣܵܢܹ̇ܐ ܐ̄ܢܵܐ ܠܗܘܿܢ ܡܸܛܠ ܥܵܘ̣ܠܵܐ ܘܡܲܣܲܒܼ ܒܐܲܦܹ̈ܿܐ ܀ 381 ܠܵܐ ܡ̇ܠܹܝܢ ܐ̄ܢܵܐ ܕܐ̄ܢܵܫ ܢܸܫܬܲܥܠܸܐ ܥܲܠ ܕܲܪ̈ܓܲܝܗܘܿܢ: 339 382 ܕܠܵܐ ܢܸܬܿܬܿܫܝܼܛܘܼܢ ܟܡܵܐ ܐܸܢ ܒܝܼܫܝܼܢ ܕܘܼܒܵܪ̈ܲܝܗܘܿܢ ܀ 383 :ܒܚܘܼܒܵܐ ܕܲܦܠܸܐ ܢܸܦܪܘܿܥ ܐܸܢܘܿܢ ܚܸܘܒܲܬܼ ܚܘܼܒܵܐ 384 ܘܐܸܢ ܠܵܐ ܫܵܘܹ̇ܝܢ ܚܢܲܢ ܠܵܐ ܢܸܛܠܘܿܡ ܐܲܝܕܵܐ ܕܦܲܐܝܵܐ ܀ 385 :ܪܲܒܵܐ ܕܪ̈ܲܒܹܿܐ ܣܵܡ̣ ܩܵܢܘܿܢܵܐ ܥܲܠ ܕܲܪ̈ܓܼܝܗܘܿܢ 386 ܘܠܵܐ ܡܲܦܲܣ ܠܲܢ ܠܲܡܫܵܛ ܛܲܟܼܣܵܐ ܕܩܵܢܘܿܢܲܝ̈ܗܘܿܢ ܀ 387 :ܠܕܼܘܼܒܵܪ̈ܲܝܗܘܿܢ ܕܲܕܼܠܵܐ ܢܵܡܘܼܣ ܢܫܘܼܛ ܫܵܝܘܿܛܵܐ 388 ܟܲܕܼ ܠܵܐ ܡܲܗܡܸܐ ܡ̣ܢ ܘܵܠܝܼܬܼܵܐ ܕܦܲܐܝܵܐ ܠܫܸܡܗܘܿܢ ܀ 389 :ܫܡܵܐ ܝܲܩܝܼܪܵܐ ܕܥܸܠܵܝ ܡ̣ܢ ܟܠ ܣܝܼܡ ܥܲܠ ܪܹܫܗܘܿܢ 390 ܘܠܵܐ ܙܵܕܹܩ ܠܲܢ ܕܲܢܫܘܼܛ ܐܸܢܘܿܢ ܐܲܝܟ ܕܲܠܒܼܝܼܫܹ̈ܐ ܀ 391 :ܩܠܝܼܕܹ̈ܐ ܕܪܵܘܡ̇ܐ ܠܒܼܝܼܟܼܝܼܢ ܒܐܝܼܕܼܵܐ ܕܪܸ̈ܥܝܵܢܲܝܗܘܿܢ 392 ܘܠܵܐ ܐ̄ܢܵܫ ܥܵܐܹ̇ܠ ܠܗܵܘ̇ ܬܘܼܩܵܢܵܐ ܒܸܠܥܵܕܲܝܗܘܿܢ ܀ 393 :ܒܗܵܕܹܐ ܬܸܢܘܲܝ ܢܝܲܩܲܪ ܐܸܢܘܿܢ ܚܘܼܒܵܢܵܐܝܼܬܼ 394 ܐܲܝܟ ܓܹܐܙܲܒܼܪܹ̈ܐ ܘܢܵܛܪ̈ܲܝ ܚܘܼܒܵܐ ܕܪ̈ܘܼܚܵܢܝܵܬܼܵܐ ܀ 395 :ܒܗܵܢܵܐ ܢܝܼܫܵܐ ܫܸܬܼܩܹ̇ܬܼ ܐܵܦ ܐ̄ܢܵܐ ܡ̣ܢ ܩܘܼܛܪܵܓܼܗܘܿܢ 396 ܕܠܵܐ ܐ̄ܢܵܫ ܢܸܣܥܸܐ ܠܲܡܒܲܙܵܚܘܼ ܒܫܸܢܗܘܿܢ ܪܲܒܵܐ ܀ 397 :ܐܵܦܠܵܐ ܩܘܼܛܪܵܓܼܝ ܗܘ̤ ܩܘܼܛܪܵܓܼܵܐ ܗ̄ܘ̣ ܕܡܟܹܠܩܲܨܵܐ 398 ܐܸܠܵܐ ܢܝܼܫܵܐ ܗ̄ܘ̣ ܕܲܡܠܸܐ ܚܘܼܒܵܐ ܘܣܵܗܹ̇ܕܼ ܚܘܼܒܠܵܐ ܀ 399 :ܚܘܼܒܵܬ ܣܵܗܹ̇ܕܼ ܕܚܘܼܒܵܢܵܐܝܼܬܼ ܥܸܕܼܠܹ̇ܬܼ ܐܸܢܘܿܢ 400 ܘܗܘ̤ ܐܲܦܸܣ ܠܝܼ ܕܐܹܕܿܘܼܢ ܥܲܡܗܘܿܢ ܡ̣ܢ ܢܵܡܘܿܣܵܘ̈ܗܝ ܀ 401 :ܢܵܡܘܿܣܵܐܝܼܬܼ ܕܵܢܹ̇ܬܼ ܥܲܡܗܘܿܢ ܕܟܼܵܗܢܹ̈ܐ ܕܥܹܕܿܬܵܐ 402 ܕܲܚܙܹ̇ܝܬܼ ܕܲܣܛ̣ܵܘ ܡ̣ܢ ܩܵܢܘܿܢܵܐ ܢܵܡܘܿܣܵܝܵܐ ܀ 403 :ܒܲܫܒܼܝܼܠ ܡܸܠܵܘ̈ܗܝ ܚܸܙܩܲܬ̤ ܡܸܠܲܬܼܝ ܡ̣ܢ ܫܘܼܪܵܝܵܐ 404 ܘܠܵܐ ܦܵܐܹ̇ܫ ܐ̄ܢܵܐ ܡ̣ܢ ܕܐܹܬܿܢܹܝܘܗܝ ܥܕܲܡ̇ܐ ܠܚܲܪܬܼܵܐ ܀ 405 :ܠܘܝܼܬܼܵܐ ܕܚܘܼܒܹܿܗ ܗܢܵܬ̤ ܠܝܼ ܣܲܓܿܝܼ ܡ̣ܢ ܟܠ ܡܸܕܹܿܡ 406 ܘܚܵܣ ܠܝܼ ܕܐܸܛܥܹܝܘܗܝ ܘܐܲܗܡܸܐ ܘܐܸܫܬܿܘܿܩ ܡ̣ܢ ܥܸܢܝܵܢܹܗ ܀