John the Evangelist. “Gospel of John - ܐܘܢܓܠܝܘܢ ܩܕܝܫܐ ܟܪܘܙܘܬܐ ܕܝܘܚܢܢ.” Based upon G. H. Gwilliam, J. Pinkerton and John Gwynn eds., The New Testament in Syriac [ܕܝܬܝܩܐ ܚܕܬܐ ܕܡܪܢ ܝܫܘܥ ܡܫܝܚܐ] (London: British and Foreign Bible Society, 1905). Digital Syriac Corpus. Last modified May 1, 2018. https://syriaccorpus.org/121. ܐܘܢܓܠܝܘܢ ܩܕܝܫܐ ܟܪܘܙܘܬܐ ܕܝܘܚܢܢ Chapter 1 ܒ݁ܪܺܫܺܝܬ݂ ܐܺܝܬ݂ܰܘܗ̱ܝ ܗ̱ܘܳܐ ܡܶܠܬ݂ܳܐ . ܘܗܽܘ ܡܶܠܬ݂ܳܐ ܂ ܐܺܝܬ݂ܰܘܗ̱ܝ ܗ̱ܘܳܐ ܠܘܳܬ݂ ܐܰܠܳܗܳܐ . ܘܰܐܠܳܗܳܐ ܐܺܝܬ݂ܰܘܗ̱ܝ ܗ̱ܘܳܐ ܗܽܘ ܡܶܠܬ݂ܳܐ . ܗܳܢܳܐ ܂ ܐܺܝܬ݂ܰܘܗ̱ܝ ܗ̱ܘܳܐ ܒ݁ܪܺܫܺܝܬ݂ ܠܘܳܬ݂ ܐܰܠܳܗܳܐ . ܟ݁ܽܠ ܒ݁ܺܐܝܕ݂ܶܗ ܗܘܳܐ . ܘܒ݂ܶܠܥܳܕ݂ܰܘܗ̱ܝ̈ ܐܳܦ݂ܠܳܐ ܚܕ݂ܳܐ ܗܘܳܬ݂ ܡܶܕ݁ܶܡ ܕ݁ܰܗܘܳܐ . ܒ݁ܶܗ ܚܰܝܶܐ̈ ܗܘܳܐ . ܘܚܰܝܶܐ̈ ܐܺܝܬ݂ܰܝܗܽܘܢ ܂ ܢܽܘܗܪܳܐ ܕ݁ܰܒ݂ܢܰܝܢܳܫܳܐ̈ . ܘܗܽܘ ܢܽܘܗܪܳܐ ܒ݁ܚܶܫܽܘܟ݂ܳܐ ܡܰܢܗܰܪ . ܘܚܶܫܽܘܟ݂ܳܐ ܠܳܐ ܐܰܕ݂ܪܟ݂ܶܗ ܀ ܗܘܳܐ ܒ݁ܰܪܢܳܫܳܐ ܕ݁ܶܐܫܬ݁ܰܕ݁ܰܪ ܡܶܢ ܐܰܠܳܗܳܐ . ܫܡܶܗ ܝܽܘܚܰܢܳܢ . ܗܳܢܳܐ ܐܶܬ݂ܳܐ ܠܣܳܗܕ݁ܽܘܬ݂ܳܐ ܂ ܕ݁ܢܶܣܗܰܕ݂ ܥܰܠ ܢܽܘܗܪܳܐ . ܕ݁ܟ݂ܽܠܢܳܫ ܢܗܰܝܡܶܢ ܒ݁ܺܐܝܕ݂ܶܗ . ܠܳܐ ܗܽܘ ܗܘܳܐ ܢܽܘܗܪܳܐ . ܐܶܠܳܐ ܕ݁ܢܶܣܗܰܕ݂ ܥܰܠ ܢܽܘܗܪܳܐ . ܐܺܝܬ݂ܰܘܗ̱ܝ ܗ̱ܘܳܐ ܓ݁ܶܝܪ ܢܽܘܗܪܳܐ ܕ݁ܰܫܪܳܪܳܐ ܇ ܕ݁ܡܰܢܗܰܪ ܠܟ݂ܽܠܢܳܫ ܕ݁ܳܐܬ݂ܶܐ ܠܥܳܠܡܳܐ . ܒ݁ܥܳܠܡܳܐ ܗ̱ܘܳܐ . ܘܥܳܠܡܳܐ ܒ݁ܺܐܝܕ݂ܶܗ ܗܘܳܐ . ܘܥܳܠܡܳܐ ܠܳܐ ܝܰܕ݂ܥܶܗ . ܠܕ݂ܺܝܠܶܗ ܐܶܬ݂ܳܐ ܁ ܘܕ݂ܺܝܠܶܗ ܠܳܐ ܩܰܒ݁ܠܽܘܗ̱ܝ . ܐܰܝܠܶܝܢ ܕ݁ܶܝܢ ܕ݁ܩܰܒ݁ܠܽܘܗ̱ܝ . ܝܰܗ̱ܒ݂ ܠܗܽܘܢ ܫܽܘܠܛܳܢܳܐ ܂ ܕ݁ܰܒ݂ܢܰܝܳܐ̈ ܕ݁ܰܐܠܳܗܳܐ ܢܶܗܘܽܘܢ . ܠܰܐܝܠܶܝܢ ܕ݁ܰܡܗܰܝܡܢܺܝܢ ܒ݁ܰܫܡܶܗ . ܐܰܝܠܶܝܢ ܕ݁ܠܰܘ ܡܶܢ ܕ݁ܡܳܐ . ܘܠܳܐ ܡܶܢ ܨܶܒ݂ܝܳܢܳܐ ܕ݁ܒ݂ܶܣܪܳܐ . ܘܠܳܐ ܡܶܢ ܨܶܒ݂ܝܳܢܳܐ ܕ݁ܓ݂ܰܒ݂ܪܳܐ . ܐܶܠܳܐ ܂ ܡܶܢ ܐܰܠܳܗܳܐ ܐܶܬ݂ܺܝܠܶܕ݂ܘ ܀ ܘܡܶܠܬ݂ܳܐ ܒ݁ܶܣܪܳܐ ܗܘܳܐ ܂ ܘܰܐܓ݁ܶܢ ܒ݁ܰܢ . ܘܰܚܙܰܝܢ ܫܽܘܒ݂ܚܶܗ . ܫܽܘܒ݂ܚܳܐ ܐܰܝܟ݂ ܕ݁ܺܝܚܺܝܕ݂ܳܝܳܐ ܕ݁ܡܶܢ ܐܰܒ݂ܳܐ ܇ ܕ݁ܰܡܠܶܐ ܛܰܝܒ݁ܽܘܬ݂ܳܐ ܘܩܽܘܫܬ݁ܳܐ ܀ ܝܽܘܚܰܢܳܢ ܣܗܶܕ݂ ܥܠܰܘܗ̱ܝ ܁ ܘܰܩܥܳܐ ܘܶܐܡܰܪ . ܗܳܢܰܘ ܗܰܘ ܕ݁ܶܐܡܪܶܬ݂ ܕ݁ܒ݂ܳܬ݂ܰܪܝ ܐܳܬ݂ܶܐ ܂ ܘܰܗܘܳܐ ܠܶܗ ܩܕ݂ܳܡܰܝ . ܡܶܛܽܠ ܕ݁ܩܰܕ݂ܡܳܝ ܗ̱ܽܘ ܡܶܢܝ ܀ ܘܡܶܢ ܡܰܠܝܽܘܬ݂ܶܗ ܚܢܰܢ ܟ݁ܽܠܰܢ ܢܣܰܒ݂ܢ . ܘܛܰܝܒ݁ܽܘܬ݂ܳܐ ܂ ܚܠܳܦ݂ ܛܰܝܒ݁ܽܘܬ݂ܳܐ . ܡܶܛܽܠ ܕ݁ܢܳܡܽܘܣܳܐ ܒ݁ܝܰܕ݂ ܡܽܘܫܶܐ ܐܶܬ݂ܺܝܗܶܒ݂ . ܫܪܳܪܳܐ ܕ݁ܶܝܢ ܘܛܰܝܒ݁ܽܘܬ݂ܳܐ ܂ ܒ݁ܝܰܕ݂ ܝܶܫܽܘܥ ܡܫܺܝܚܳܐ ܗܘܳܐ ܀ ܐܰܠܳܗܳܐ ܠܳܐ ܚܙܳܐ ܐ̱ܢܳܫ ܡܶܡܬ݂ܽܘܡ . ܝܺܚܺܝܕ݂ܳܝܳܐ ܐܰܠܳܗܳܐ ܁ ܗܰܘ ܕ݁ܺܐܝܬ݂ܰܘܗ̱ܝ ܒ݁ܥܽܘܒ݁ܳܐ ܕ݁ܰܐܒ݂ܽܘܗ̱ܝ ܂ ܗܽܘ ܐܶܫܬ݁ܰܥܺܝ ܀ ܘܗܳܕ݂ܶܐ ܗܺܝ ܣܳܗܕ݁ܽܘܬ݂ܶܗ ܕ݁ܝܽܘܚܰܢܳܢ ܇ ܟ݁ܰܕ݂ ܫܰܕ݁ܰܪܘ ܠܘܳܬ݂ܶܗ ܝܺܗܽܘܕ݂ܳܝܶܐ̈ ܡܶܢ ܐܽܘܪܺܫܠܶܡ ܂ ܟ݁ܳܗܢܶܐ̈ ܘܠܶܘܳܝܶܐ̈ ܕ݁ܰܢܫܰܐܠܽܘܢܳܝܗ̱ܝ . ܐܰܢ̱ܬ݁ ܡܰܢ ܐܰܢ̱ܬ݁ . ܘܰܐܘܕ݁ܺܝ ܂ ܘܠܳܐ ܟ݁ܦ݂ܰܪ . ܘܰܐܘܕ݁ܺܝ ܂ ܕ݁ܠܰܘ ܐܶܢܳܐ ܐ̱ܢܳܐ ܡܫܺܝܚܳܐ . ܘܫܰܐܠܽܘܗ̱ܝ ܬ݁ܽܘܒ݂ . ܡܳܢܳܐ ܗܳܟ݂ܺܝܠ . ܐܺܠܺܝܳܐ ܐܰܢ̱ܬ݁ ܆ ܘܶܐܡܰܪ ܠܳܐ ܐܺܝܬ݂ܰܝ . ܢܒ݂ܺܝܳܐ ܐܰܢ̱ܬ݁ ܆ ܘܶܐܡܰܪ ܠܳܐ . ܘܶܐܡܰܪܘ ܠܶܗ . ܘܡܰܢܽܘ ܐܰܢ̱ܬ݁ ܕ݁ܢܶܬ݁ܶܠ ܦ݁ܶܬ݂ܓ݂ܳܡܳܐ ܠܰܐܝܠܶܝܢ ܕ݁ܫܰܕ݁ܪܽܘܢ . ܡܳܢܳܐ ܐܳܡܰܪ ܐܰܢ̱ܬ݁ ܥܰܠ ܢܰܦ݂ܫܳܟ݂ ܀ ܐܶܡܰܪ ܆ ܐܶܢܳܐ ܩܳܠܳܐ ܕ݁ܩܳܪܶܐ ܒ݁ܡܰܕ݂ܒ݁ܪܳܐ ܆ ܕ݁ܰܐܫܘܰܘ ܐܽܘܪܚܶܗ ܕ݁ܡܳܪܝܳܐ ܆ ܐܰܝܟ݁ܰܢܳܐ ܕ݁ܶܐܡܰܪ ܐܶܫܰܥܝܳܐ ܢܒ݂ܺܝܳܐ ܀ ܗܳܢܽܘܢ ܕ݁ܶܝܢ ܕ݁ܶܐܫܬ݁ܰܕ݁ܰܪܘ ܂ ܡܶܢ ܦ݁ܪܺܝܫܶܐ̈ ܗ̱ܘܰܘ . ܘܫܰܐܠܽܘܗ̱ܝ ܂ ܘܶܐܡܰܪܘ ܠܶܗ . ܡܳܢܳܐ ܗܳܟ݂ܺܝܠ ܡܰܥܡܶܕ݂ ܐܰܢ̱ܬ݁ ܇ ܐܶܢ ܐܰܢ̱ܬ݁ ܠܳܐ ܐܺܝܬ݂ܰܝܟ݁ ܡܫܺܝܚܳܐ ܁ ܘܠܳܐ ܐܺܠܺܝܳܐ ܁ ܘܠܳܐ ܢܒ݂ܺܝܳܐ ܀ ܥܢܳܐ ܝܽܘܚܰܢܳܢ ܂ ܘܶܐܡܰܪ ܠܗܽܘܢ . ܐܶܢܳܐ ܡܰܥܡܶܕ݂ ܐ̱ܢܳܐ ܒ݁ܡܰܝܳܐ̈ . ܒ݁ܰܝܢܳܬ݂ܟ݂ܽܘܢ ܕ݁ܶܝܢ ܩܳܐܶܡ ܆ ܗܰܘ ܕ݁ܰܐܢ̱ܬ݁ܽܘܢ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ . ܗܳܢܰܘ ܗܰܘ ܕ݁ܒ݂ܳܬ݂ܰܪܝ ܐܳܬ݂ܶܐ ܆ ܘܰܗܘܳܐ ܠܶܗ ܩܕ݂ܳܡܰܝ ܆ ܗܰܘ ܕ݁ܶܐܢܳܐ ܂ ܠܳܐ ܫܳܘܶܐ ܐ̱ܢܳܐ ܕ݁ܶܐܫܪܶܐ ܥܰܪܩܶܐ̈ ܕ݁ܰܡܣܳܢܰܘܗ̱ܝ̈ ܀ ܗܳܠܶܝܢ ܒ݁ܒ݂ܶܝܬ݂ ܥܰܢܝܳܐ ܗܘܰܝ̈ ܂ ܒ݁ܥܶܒ݂ܪܳܐ ܕ݁ܝܽܘܪܕ݁ܢܳܢ ܂ ܐܰܝܟ݁ܳܐ ܕ݁ܡܰܥܡܶܕ݂ ܗ̱ܘܳܐ ܝܽܘܚܰܢܳܢ ܀ ܘܰܠܝܰܘܡܳܐ ܕ݁ܒ݂ܳܬ݂ܪܶܗ ܂ ܚܙܳܐ ܝܽܘܚܰܢܳܢ ܠܝܶܫܽܘܥ ܕ݁ܳܐܬ݂ܶܐ ܠܘܳܬ݂ܶܗ ܂ ܘܶܐܡܰܪ . ܗܳܐ ܐܶܡܪܶܗ ܕ݁ܰܐܠܳܗܳܐ ܆ ܗܰܘ ܕ݁ܫܳܩܶܠ ܚܛܺܝܬ݂ܶܗ ܕ݁ܥܳܠܡܳܐ ܀ ܗܳܢܰܘ ܕ݁ܶܐܢܳܐ ܐܶܡܪܶܬ݂ ܥܠܰܘܗ̱ܝ ܇ ܕ݁ܒ݂ܳܬ݂ܰܪܝ ܐܳܬ݂ܶܐ ܓ݁ܰܒ݂ܪܳܐ ܁ ܘܰܗܘܳܐ ܠܶܗ ܩܕ݂ܳܡܰܝ . ܡܶܛܽܠ ܕ݁ܩܰܕ݂ܡܳܝ ܗ̱ܽܘ ܡܶܢܝ . ܘܶܐܢܳܐ ܠܳܐ ܝܳܕ݂ܰܥ ܗ̱ܘܺܝܬ݂ ܠܶܗ . ܐܶܠܳܐ ܕ݁ܢܶܬ݂ܺܝܕ݂ܰܥ ܠܺܐܝܣܪܳܝܶܠ . ܡܶܛܽܠ ܗܳܢܳܐ ܐܶܬ݂ܺܝܬ݂ ܐܶܢܳܐ ܂ ܕ݁ܰܒ݂ܡܰܝܳܐ̈ ܐܰܥܡܶܕ݂ ܀ ܘܰܐܣܗܶܕ݂ ܝܽܘܚܰܢܳܢ ܂ ܘܶܐܡܰܪ . ܕ݁ܰܚܙܺܝܬ݂ ܠܪܽܘܚܳܐ ܕ݁ܢܳܚܬ݁ܳܐ ܡܶܢ ܫܡܰܝܳܐ ܁ ܐܰܝܟ݂ ܝܰܘܢܳܐ ܂ ܘܩܰܘܝܰܬ݂ ܥܠܰܘܗ̱ܝ . ܘܶܐܢܳܐ ܠܳܐ ܝܳܕ݂ܰܥ ܗ̱ܘܺܝܬ݂ ܠܶܗ . ܐܶܠܳܐ ܡܰܢ ܕ݁ܫܰܕ݁ܪܰܢܝ ܕ݁ܰܐܥܡܶܕ݂ ܒ݁ܡܰܝܳܐ̈ ܂ ܗܽܘ ܐܶܡܰܪ ܠܺܝ . ܕ݁ܰܐܝܢܳܐ ܕ݁ܚܳܙܶܐ ܐܰܢ̱ܬ݁ ܕ݁ܢܳܚܬ݁ܳܐ ܪܽܘܚܳܐ ܁ ܘܰܡܩܰܘܝܳܐ ܥܠܰܘܗ̱ܝ ܆ ܗܳܢܰܘ ܡܰܥܡܶܕ݂ ܒ݁ܪܽܘܚܳܐ ܕ݁ܩܽܘܕ݂ܫܳܐ ܀ ܘܶܐܢܳܐ ܚܙܺܝܬ݂ ܘܰܐܣܗܕ݂ܶܬ݂ ܂ ܕ݁ܗܳܢܰܘ ܒ݁ܪܶܗ ܕ݁ܰܐܠܳܗܳܐ ܀ ܘܰܠܝܰܘܡܳܐ ܐ̱ܚܪܺܢܳܐ ܆ ܩܳܐܶܡ ܗ̱ܘܳܐ ܝܽܘܚܰܢܳܢ ܘܰܬ݂ܪܶܝܢ̈ ܡܶܢ ܬ݁ܰܠܡܺܝܕ݂ܰܘܗ̱ܝ̈ . ܘܚܳܪ ܒ݁ܝܶܫܽܘܥ ܁ ܟ݁ܰܕ݂ ܡܗܰܠܶܟ݂ ܂ ܘܶܐܡܰܪ . ܗܳܐ ܐܶܡܪܶܗ ܕ݁ܰܐܠܳܗܳܐ . ܘܰܫܡܰܥܘ ܬ݁ܪܰܝܗܽܘܢ̈ ܬ݁ܰܠܡܺܝܕ݂ܰܘܗ̱ܝ̈ ܟ݁ܰܕ݂ ܐܶܡܰܪ ܆ ܘܶܐܙܰܠܘ ܠܗܽܘܢ ܒ݁ܳܬ݂ܪܶܗ ܕ݁ܝܶܫܽܘܥ . ܘܶܐܬ݂ܦ݁ܢܺܝ ܝܶܫܽܘܥ ܁ ܘܰܚܙܳܐ ܐܶܢܽܘܢ ܕ݁ܳܐܬ݂ܶܝܢ ܒ݁ܳܬ݂ܪܶܗ ܆ ܘܶܐܡܰܪ ܠܗܽܘܢ . ܡܳܢܳܐ ܒ݁ܳܥܶܝܢ ܐܢ̱ܬ݁ܽܘܢ . ܐܳܡܪܺܝܢ ܠܶܗ . ܪܰܒ݁ܰܢ ܂ ܐܰܝܟ݁ܳܐ ܗܳܘܶܐ ܐܰܢ̱ܬ݁ . ܐܳܡܰܪ ܠܗܽܘܢ ܬ݁ܰܘ ܂ ܘܬ݂ܶܚܙܽܘܢ . ܗܶܢܽܘܢ ܕ݁ܶܝܢ ܐܶܬ݂ܰܘ ܂ ܘܰܚܙܰܘ ܐܰܝܟ݁ܳܐ ܕ݁ܗܳܘܶܐ . ܘܰܠܘܳܬ݂ܶܗ ܗܘܰܘ ܝܰܘܡܳܐ ܗܰܘ . ܘܺܐܝܬ݂ ܗ̱ܘܰܝ̈ ܐܰܝܟ݂ ܫܳܥܶܐ̈ ܥܣܰܪ ܀ ܚܰܕ݂ ܕ݁ܶܝܢ ܡܶܢ ܗܳܢܽܘܢ ܕ݁ܰܫܡܰܥܘ ܡܶܢ ܝܽܘܚܰܢܳܢ ܁ ܘܶܐܙܰܠܘ ܒ݁ܳܬ݂ܪܶܗ ܕ݁ܝܶܫܽܘܥ ܂ ܐܺܝܬ݂ܰܘܗ̱ܝ ܗ̱ܘܳܐ ܐܰܢܕ݁ܪܶܐܘܳܣ ܐܰܚܽܘܗ̱ܝ ܕ݁ܫܶܡܥܽܘܢ . ܗܳܢܳܐ ܚܙܳܐ ܠܽܘܩܕ݂ܰܡ ܠܫܶܡܥܽܘܢ ܐܰܚܽܘܗ̱ܝ ܂ ܘܶܐܡܰܪ ܠܶܗ . ܐܶܫܟ݁ܰܚܢܳܝܗ̱ܝ ܠܰܡܫܺܝܚܳܐ . ܘܰܐܝܬ݁ܝܶܗ ܠܘܳܬ݂ ܝܶܫܽܘܥ ܀ ܘܚܳܪ ܒ݁ܶܗ ܝܶܫܽܘܥ ܂ ܘܶܐܡܰܪ . ܐܰܢ̱ܬ݁ ܗ̱ܽܘ ܫܶܡܥܽܘܢ ܒ݁ܪܶܗ ܕ݁ܝܰܘܢܳܐ ܆ ܐܰܢ̱ܬ݁ ܬ݁ܶܬ݂ܩܪܶܐ ܟ݁ܺܐܦ݂ܳܐ ܀ ܘܰܠܝܰܘܡܳܐ ܐ̱ܚܪܺܢܳܐ ܆ ܨܒ݂ܳܐ ܝܶܫܽܘܥ ܠܡܶܦ݁ܰܩ ܠܰܓ݂ܠܺܝܠܳܐ . ܘܶܐܫܟ݁ܰܚ ܠܦ݂ܺܝܠܺܝܦ݁ܳܘܣ ܂ ܘܶܐܡܰܪ ܠܶܗ . ܬ݁ܳܐ ܒ݁ܳܬ݂ܰܪܝ . ܗܽܘ ܕ݁ܶܝܢ ܦ݂ܺܝܠܺܝܦ݁ܳܘܣ ܐܺܝܬ݂ܰܘܗ̱ܝ ܗ̱ܘܳܐ ܡܶܢ ܒ݁ܶܝܬ݂ ܨܰܝܳܕ݂ܳܐ . ܡܶܢ ܡܕ݂ܺܝܢ̱ܬ݁ܶܗ ܕ݁ܰܐܢܕ݁ܪܶܐܘܳܣ ܘܰܕ݂ܫܶܡܥܽܘܢ . ܘܦ݂ܺܝܠܺܝܦ݁ܳܘܣ ܐܶܫܟ݁ܰܚ ܠܢܰܬ݂ܰܢܰܝܺܐܝܠ ܂ ܘܶܐܡܰܪ ܠܶܗ . ܗܰܘ ܕ݁ܰܟ݂ܬ݂ܰܒ݂ ܥܠܰܘܗ̱ܝ ܡܽܘܫܶܐ ܒ݁ܢܳܡܽܘܣܳܐ ܘܒ݂ܰܢܒ݂ܺܝܶܐ̈ ܆ ܐܶܫܟ݁ܰܚܢܳܝܗ̱ܝ ܂ ܕ݁ܝܶܫܽܘܥ ܗ̱ܽܘ ܒ݁ܰܪ ܝܰܘܣܶܦ݂ ܡܶܢ ܢܳܨܪܰܬ݂ . ܐܳܡܰܪ ܠܶܗ ܢܰܬ݂ܰܢܰܝܺܐܝܠ . ܡܶܢ ܢܳܨܪܰܬ݂ ܆ ܡܶܫܟ݁ܰܚ ܡܶܕ݁ܶܡ ܕ݁ܛܳܒ݂ ܢܶܗܘܶܐ ܆ ܐܳܡܰܪ ܠܶܗ ܦ݂ܺܝܠܺܝܦ݁ܳܘܣ . ܬ݁ܳܐ ܂ ܘܬ݂ܶܚܙܶܐ . ܘܰܚܙܳܝܗ̱ܝ ܝܶܫܽܘܥ ܠܢܰܬ݂ܰܢܰܝܺܐܝܠ ܟ݁ܰܕ݂ ܐܳܬ݂ܶܐ ܠܘܳܬ݂ܶܗ ܂ ܘܶܐܡܰܪ ܥܠܰܘܗ̱ܝ . ܗܳܐ ܫܰܪܺܝܪܳܐܝܺܬ݂ ܒ݁ܰܪ ܐܺܝܣܪܳܝܶܠ ܂ ܕ݁ܢܶܟ݂ܠܳܐ ܠܰܝܬ݁ ܒ݁ܶܗ . ܐܳܡܰܪ ܠܶܗ ܢܰܬ݂ܰܢܰܝܺܐܝܠ . ܡܶܢ ܐܰܝܡܶܟ݁ܳܐ ܝܳܕ݂ܰܥ ܐܰܢ̱ܬ݁ ܠܺܝ . ܐܳܡܰܪ ܠܶܗ ܝܶܫܽܘܥ . ܥܰܕ݂ܠܳܐ ܢܶܩܪܶܝܟ݂ ܦ݂ܺܝܠܺܝܦ݁ܳܘܣ ܟ݁ܰܕ݂ ܬ݁ܚܶܝܬ݂ ܬ݁ܺܬ݁ܳܐ ܐܰܢ̱ܬ݁ ܚܙܺܝܬ݂ܳܟ݂ ܀ ܥܢܳܐ ܢܰܬ݂ܰܢܰܝܺܐܝܠ ܂ ܘܶܐܡܰܪ ܠܶܗ . ܪܰܒ݁ܺܝ ܆ ܐܰܢ̱ܬ݁ ܗ̱ܽܘ ܒ݁ܪܶܗ ܕ݁ܰܐܠܳܗܳܐ . ܐܰܢ̱ܬ݁ ܗ̱ܽܘ ܡܰܠܟ݁ܶܗ ܕ݁ܺܐܝܣܪܳܝܶܠ . ܐܳܡܰܪ ܠܶܗ ܝܶܫܽܘܥ . ܥܰܠ ܕ݁ܶܐܡܪܶܬ݂ ܠܳܟ݂ ܕ݁ܰܚܙܺܝܬ݂ܳܟ݂ ܬ݁ܚܶܝܬ݂ ܬ݁ܺܬ݁ܳܐ ܡܗܰܝܡܶܢ ܐܰܢ̱ܬ݁ . ܕ݁ܪܰܘܪܒ݂ܳܢ̈ ܡܶܢ ܗܳܠܶܝܢ ܬ݁ܶܚܙܶܐ . ܐܳܡܰܪ ܠܶܗ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܶܢ ܗܳܫܳܐ ܬ݁ܶܚܙܽܘܢ ܫܡܰܝܳܐ ܕ݁ܰܦ݂ܬ݂ܺܝܚܺܝܢ ܆ ܘܡܰܠܰܐܟ݂ܰܘܗ̱ܝ̈ ܕ݁ܰܐܠܳܗܳܐ ܟ݁ܰܕ݂ ܣܳܠܩܺܝܢ ܘܢܳܚܬ݁ܺܝܢ ܠܘܳܬ݂ ܒ݁ܪܶܗ ܕ݁ܐ̱ܢܳܫܳܐ ܀.܀.܀܀ Chapter 2 ܘܰܠܝܰܘܡܳܐ ܕ݁ܰܬ݂ܠܳܬ݂ܳܐ ܆ ܗܘܳܬ݂ ܡܶܫܬ݁ܽܘܬ݂ܳܐ ܒ݁ܩܳܛܢܶܐ ܡܕ݂ܺܝܢ̱ܬ݁ܳܐ ܕ݁ܰܓ݂ܠܺܝܠܳܐ . ܘܶܐܡܶܗ ܕ݁ܝܶܫܽܘܥ ܬ݁ܰܡܳܢ ܗ̱ܘܳܬ݂ . ܘܳܐܦ݂ ܗܽܘ ܝܶܫܽܘܥ ܘܬ݂ܰܠܡܺܝܕ݂ܰܘܗ̱ܝ̈ ܂ ܐܶܬ݂ܩܪܺܝܘ ܠܳܗ ܠܡܶܫܬ݁ܽܘܬ݂ܳܐ . ܘܰܚܣܰܪ ܗ̱ܘܳܐ ܚܰܡܪܳܐ . ܘܳܐܡܪܳܐ ܠܶܗ ܐܶܡܶܗ ܠܝܶܫܽܘܥ . ܚܰܡܪܳܐ ܠܰܝܬ݁ ܠܗܽܘܢ . ܐܳܡܰܪ ܠܳܗ ܝܶܫܽܘܥ . ܡܳܐ ܠܺܝ ܘܠܶܟ݂ܝ ܁ ܐܰܢ̱ܬ݁ܬ݂ܳܐ ܅ ܠܳܐ ܥܕ݂ܰܟ݁ܺܝܠ ܐܶܬ݂ܳܬ݂ ܫܳܥܰܬ݂ܝ . ܐܳܡܪܳܐ ܐܶܡܶܗ ܠܰܡܫܰܡܫܳܢܶܐ̈ . ܡܶܕ݁ܶܡ ܕ݁ܳܐܡܰܪ ܠܟ݂ܽܘܢ ܂ ܥܒ݂ܶܕ݂ܘ . ܐܺܝܬ݂ ܗ̱ܘܰܝ̈ ܕ݁ܶܝܢ ܬ݁ܰܡܳܢ ܁ ܐܰܓ݂ܳܢܶܐ̈ ܕ݁ܟ݂ܺܐܦ݂ܳܐ ܫܶܬ݂ . ܕ݁ܣܺܝܡܳܢ̈ ܠܬ݂ܰܕ݂ܟ݁ܺܝܬ݂ܳܐ ܕ݁ܺܝܗܽܘܕ݂ܳܝܶܐ̈ . ܕ݁ܳܐܚܕ݁ܳܢ̈ ܬ݁ܪܶܝܢ̈ ܬ݁ܪܶܝܢ̈ ܪܶܒ݂ܥܺܝܢ̈ ܂ ܐܰܘ ܬ݁ܠܳܬ݂ܳܐ . ܐܳܡܰܪ ܠܗܽܘܢ ܝܶܫܽܘܥ . ܡܠܰܘ ܐܶܢܶܝܢ̈ ܡܰܝܳܐ̈ ܠܰܐܓ݂ܳܢܶܐ̈ . ܘܰܡܠܰܘ ܐܶܢܶܝܢ̈ ܥܕ݂ܰܡܳܐ ܠܥܶܠ . ܐܳܡܰܪ ܠܗܽܘܢ . ܙܠܽܘܥܘ ܡܶܟ݁ܺܝܠ ܂ ܘܰܐܝܬ݁ܰܘ ܠܪܺܝܫ ܣܡܳܟ݂ܳܐ . ܘܰܐܝܬ݁ܺܝܘ . ܘܟ݂ܰܕ݂ ܛܥܶܡ ܗܰܘ ܪܺܝܫ ܣܡܳܟ݂ܳܐ ܡܰܝܳܐ̈ ܗܳܢܽܘܢ ܕ݁ܰܗܘܰܘ ܚܰܡܪܳܐ : ܘܠܳܐ ܝܳܕ݂ܰܥ ܗ̱ܘܳܐ ܡܶܢ ܐܰܝܡܶܟ݁ܳܐ ܗ̱ܘܳܐ : ܡܫܰܡܫܳܢܶܐ̈ ܕ݁ܶܝܢ ܝܳܕ݂ܥܺܝܢ ܗ̱ܘܰܘ . ܕ݁ܗܶܢܽܘܢ ܡܠܰܘ ܐܶܢܽܘܢ ܠܡܰܝܳܐ̈ . ܩܪܳܐ ܪܺܝܫ ܣܡܳܟ݂ܳܐ ܠܚܰܬ݂ܢܳܐ ܂ ܘܶܐܡܰܪ ܠܶܗ . ܟ݁ܽܠ ܐ̱ܢܳܫ ܠܽܘܩܕ݂ܰܡ ܚܰܡܪܳܐ ܛܳܒ݂ܳܐ ܡܰܝܬ݁ܶܐ . ܘܡܳܐ ܕ݁ܰܪܘܺܝܘ ܗܳܝܕ݁ܶܝܢ ܐܰܝܢܳܐ ܕ݁ܰܒ݂ܨܺܝܪ . ܐܰܢ̱ܬ݁ ܕ݁ܶܝܢ ܢܛܰܪܬ݁ܳܝܗ̱ܝ ܠܚܰܡܪܳܐ ܛܳܒ݂ܳܐ ܥܕ݂ܰܡܳܐ ܠܗܳܫܳܐ . ܗܳܕ݂ܶܐ ܗ̱ܝ ܐܳܬ݂ܳܐ ܩܰܕ݂ܡܳܝܬ݁ܳܐ ܕ݁ܰܥܒ݂ܰܕ݂ ܝܶܫܽܘܥ ܒ݁ܩܳܛܢܶܐ ܕ݁ܰܓ݂ܠܺܝܠܳܐ ܇ ܘܰܐܘܕ݁ܰܥ ܫܽܘܒ݂ܚܶܗ ܂ ܘܗܰܝܡܶܢܘ ܒ݁ܶܗ ܬ݁ܰܠܡܺܝܕ݂ܰܘܗ̱ܝ̈ ܀ ܒ݁ܳܬ݂ܰܪ ܗܳܕ݂ܶܐ ܢܚܶܬ݂ ܠܰܟ݂ܦ݂ܰܪܢܰܚܽܘܡ ܇ ܗܽܘ ܘܶܐܡܶܗ ܘܰܐܚܰܘܗ̱ܝ̈ ܘܬ݂ܰܠܡܺܝܕ݂ܰܘܗ̱ܝ̈ . ܘܬ݂ܰܡܳܢ ܗ̱ܘܰܘ ܩܰܠܺܝܠ ܝܰܘܡܳܬ݂ܳܐ̈ ܀ ܘܩܰܪܺܝܒ݂ ܗ̱ܘܳܐ ܦ݁ܶܨܚܳܐ ܕ݁ܺܝܗܽܘܕ݂ܳܝܶܐ̈ . ܘܰܣܠܶܩ ܠܽܐܘܪܺܫܠܶܡ ܝܶܫܽܘܥ ܆ ܘܶܐܫܟ݁ܰܚ ܒ݁ܗܰܝܟ݁ܠܳܐ ܠܗܳܠܶܝܢ ܕ݁ܰܡܙܰܒ݁ܢܺܝܢ ܬ݁ܰܘܪܶܐ̈ ܘܥܶܪܒ݁ܶܐ̈ ܘܝܰܘܢܶܐ̈ ܁ ܘܠܰܡܥܰܪܦ݂ܳܢܶܐ̈ ܕ݁ܝܳܬ݂ܒ݁ܺܝܢ . ܘܰܥܒ݂ܰܕ݂ ܠܶܗ ܦ݁ܪܳܓ݂ܶܠܳܐ ܡܶܢ ܚܰܒ݂ܠܳܐ ܆ ܘܰܠܟ݂ܽܠܗܽܘܢ ܐܰܦ݁ܶܩ ܡܶܢ ܗܰܝܟ݁ܠܳܐ ܂ ܘܰܠܥܶܪܒ݁ܶܐ̈ ܘܰܠܬ݂ܰܘܪܶܐ̈ ܘܠܰܡܥܰܪܦ݂ܳܢܶܐ̈ . ܘܶܐܫܰܕ݂ ܥܽܘܪܦ݂ܳܢܗܽܘܢ ܁ ܘܦ݂ܳܬ݂ܽܘܪܰܝܗܽܘܢ̈ ܗܦ݂ܰܟ݂ . ܘܰܠܗܳܢܽܘܢ ܕ݁ܰܡܙܰܒ݁ܢܺܝܢ ܝܰܘܢܶܐ̈ ܂ ܐܶܡܰܪ . ܫܩܽܘܠܘ ܗܳܠܶܝܢ ܡܶܟ݁ܳܐ . ܘܠܳܐ ܬ݁ܶܥܒ݁ܕ݂ܽܘܢܶܗ ܠܒ݂ܰܝܬ݁ܶܗ ܕ݁ܳܐܒ݂ܝ ܒ݁ܶܝܬ݂ ܬ݁ܶܐܓ݂ܽܘܪܬ݁ܳܐ ܀ ܘܶܐܬ݁ܕ݁ܟ݂ܰܪܘ ܬ݁ܰܠܡܺܝܕ݂ܰܘܗ̱ܝ̈ ܕ݁ܰܟ݂ܬ݂ܺܝܒ݂ ܇ ܕ݁ܰܛܢܳܢܶܗ ܕ݁ܒ݂ܰܝܬ݁ܳܟ݂ ܐܰܟ݂ܠܰܢܝ ܀ ܥܢܰܘ ܕ݁ܶܝܢ ܝܺܗܽܘܕ݂ܳܝܶܐ̈ ܂ ܘܶܐܡܰܪܘ ܠܶܗ . ܡܳܢܳܐ ܐܳܬ݂ܳܐ ܡܚܰܘܶܐ ܐܰܢ̱ܬ݁ ܠܰܢ . ܕ݁ܗܳܠܶܝܢ ܥܳܒ݂ܶܕ݂ ܐܰܢ̱ܬ݁ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܣܬ݂ܽܘܪܘ ܗܰܝܟ݁ܠܳܐ ܗܳܢܳܐ ܆ ܘܠܰܬ݂ܠܳܬ݂ܳܐ ܝܰܘܡܺܝܢ̈ ܂ ܐܶܢܳܐ ܡܩܺܝܡ ܐ̱ܢܳܐ ܠܶܗ . ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܠܰܐܪܒ݁ܥܺܝܢ ܘܫܶܬ݂ ܫܢܺܝܢ̈ ܐܶܬ݂ܒ݁ܢܺܝ ܗܰܝܟ݁ܠܳܐ ܗܳܢܳܐ : ܘܰܐܢ̱ܬ݁ ܆ ܠܰܬ݂ܠܳܬ݂ܳܐ ܝܰܘܡܺܝܢ̈ ܡܩܺܝܡ ܐܰܢ̱ܬ݁ ܠܶܗ ܆ ܗܽܘ ܕ݁ܶܝܢ ܐܶܡܰܪ ܗ̱ܘܳܐ ܥܰܠ ܗܰܝܟ݁ܠܳܐ ܕ݁ܦ݂ܰܓ݂ܪܶܗ . ܟ݁ܰܕ݂ ܩܳܡ ܕ݁ܶܝܢ ܡܶܢ ܒ݁ܶܝܬ݂ ܡܺܝܬ݂ܶܐ̈ ܆ ܐܶܬ݁ܕ݁ܟ݂ܰܪܘ ܬ݁ܰܠܡܺܝܕ݂ܰܘܗ̱ܝ̈ ܕ݁ܗܳܕ݂ܶܐ ܐܶܡܰܪ ܗ̱ܘܳܐ . ܘܗܰܝܡܶܢܘ ܠܰܟ݂ܬ݂ܳܒ݂ܶܐ̈ ܂ ܘܰܠܡܶܠܬ݂ܳܐ ܕ݁ܶܐܡܰܪ ܝܶܫܽܘܥ ܀܀ ܟ݁ܰܕ݂ ܐܺܝܬ݂ܰܘܗ̱ܝ ܗ̱ܘܳܐ ܕ݁ܶܝܢ ܝܶܫܽܘܥ ܒ݁ܽܐܘܪܺܫܠܶܡ ܂ ܒ݁ܦ݂ܶܨܚܳܐ ܒ݁ܥܰܕ݂ܥܺܕ݂ܳܐ ܆ ܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ ܂ ܕ݁ܰܚܙܰܘ ܐܳܬ݂ܘܳܬ݂ܳܐ̈ ܕ݁ܥܳܒ݂ܶܕ݂ . ܗܽܘ ܕ݁ܶܝܢ ܝܶܫܽܘܥ ܂ ܠܳܐ ܡܗܰܝܡܶܢ ܗ̱ܘܳܐ ܠܗܽܘܢ ܢܰܦ݂ܫܶܗ . ܡܶܛܽܠ ܕ݁ܗܽܘ ܝܳܕ݂ܰܥ ܗ̱ܘܳܐ ܠܟ݂ܽܠܢܳܫ . ܘܠܳܐ ܣܢܺܝܩ ܗ̱ܘܳܐ ܕ݁ܐ̱ܢܳܫ ܢܶܣܗܰܕ݂ ܠܶܗ ܥܰܠ ܟ݁ܽܠ ܒ݁ܰܪܢܳܫ . ܗܽܘ ܓ݁ܶܝܪ ܝܳܕ݂ܰܥ ܗ̱ܘܳܐ ܡܳܢܳܐ ܐܺܝܬ݂ ܒ݁ܒ݂ܰܪܢܳܫܳܐ ܀܀ Chapter 3 ܐܺܝܬ݂ ܗ̱ܘܳܐ ܕ݁ܶܝܢ ܬ݁ܰܡܳܢ ܚܰܕ݂ ܓ݁ܰܒ݂ܪܳܐ ܡܶܢ ܦ݁ܪܺܝܫܶܐ̈ ܆ ܢܺܝܩܳܕ݂ܺܡܳܘܣ ܫܡܶܗ ܗ̱ܘܳܐ . ܐܰܪܟ݂ܽܘܢܳܐ ܕ݁ܺܝܗܽܘܕ݂ܳܝܶܐ̈ . ܗܳܢܳܐ ܐܶܬ݂ܳܐ ܠܘܳܬ݂ ܝܶܫܽܘܥ ܒ݁ܠܺܠܝܳܐ ܂ ܘܶܐܡܰܪ ܠܶܗ . ܪܰܒ݁ܺܝ ܆ ܝܳܕ݂ܥܺܝܢܰܢ ܕ݁ܡܶܢ ܐܰܠܳܗܳܐ ܐܶܫܬ݁ܰܕ݁ܰܪܬ݁ ܡܰܠܦ݂ܳܢܳܐ . ܠܳܐ ܓ݁ܶܝܪ ܐ̱ܢܳܫ ܡܶܫܟ݁ܰܚ ܗܳܠܶܝܢ ܐܳܬ݂ܘܳܬ݂ܳܐ̈ ܠܡܶܥܒ݁ܰܕ݂ ܕ݁ܰܐܢ̱ܬ݁ ܥܳܒ݂ܶܕ݂ ܐܰܢ̱ܬ݁ ܇ ܐܶܠܳܐ ܡܰܢ ܕ݁ܰܐܠܳܗܳܐ ܥܰܡܶܗ . ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ݂ ܆ ܕ݁ܶܐܢ ܐ̱ܢܳܫ ܠܳܐ ܡܶܬ݂ܺܝܠܶܕ݂ ܡܶܢ ܕ݁ܪܺܝܫ ܆ ܠܳܐ ܡܶܫܟ݁ܰܚ ܕ݁ܢܶܚܙܶܐ ܡܰܠܟ݁ܽܘܬ݂ܶܗ ܕ݁ܰܐܠܳܗܳܐ . ܐܳܡܰܪ ܠܶܗ ܢܺܝܩܳܕ݂ܺܡܳܘܣ . ܐܰܝܟ݁ܰܢܳܐ ܡܶܫܟ݁ܰܚ ܕ݁ܢܶܬ݂ܺܝܠܶܕ݂ ܓ݁ܰܒ݂ܪܳܐ ܣܳܒ݂ܳܐ . ܕ݁ܰܠܡܳܐ ܁ ܡܶܫܟ݁ܰܚ ܬ݁ܽܘܒ݂ ܠܟ݂ܰܪܣܳܐ ܕ݁ܶܐܡܶܗ ܕ݁ܬ݂ܰܪܬ݁ܶܝܢ̈ ܙܰܒ݂ܢܺܝܢ̈ ܆ ܠܡܶܥܰܠ ܂ ܘܢܶܬ݂ܺܝܠܶܕ݂ ܆ ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ݂ ܆ ܕ݁ܶܐܢ ܐ̱ܢܳܫ ܠܳܐ ܡܶܬ݂ܺܝܠܶܕ݂ ܡܶܢ ܡܰܝܳܐ̈ ܘܪܽܘܚܳܐ ܂ ܠܳܐ ܡܶܫܟ݁ܰܚ ܕ݁ܢܶܥܽܘܠ ܠܡܰܠܟ݁ܽܘܬ݂ܳܐ ܕ݁ܰܐܠܳܗܳܐ . ܡܶܕ݁ܶܡ ܕ݁ܺܝܠܺܝܕ݂ ܡܶܢ ܒ݁ܶܣܪܳܐ ܂ ܒ݁ܶܣܪܳܐ ܗܽܘ . ܘܡܶܕ݁ܶܡ ܕ݁ܺܝܠܺܝܕ݂ ܡܶܢ ܪܽܘܚܳܐ ܂ ܪܽܘܚܳܐ ܗܽܘ . ܠܳܐ ܬ݁ܶܬ݁ܕ݁ܰܡܰܪ ܕ݁ܶܐܡܪܶܬ݂ ܠܳܟ݂ . ܕ݁ܘܳܠܶܐ ܠܟ݂ܽܘܢ ܠܡܶܬ݂ܺܝܠܳܕ݂ܽܘ ܡܶܢ ܕ݁ܪܺܝܫ . ܪܽܘܚܳܐ ܐܰܬ݂ܰܪ ܕ݁ܨܳܒ݂ܝܳܐ ܢܳܫܒ݁ܳܐ . ܘܩܳܠܳܗ ܫܳܡܰܥ ܐܰܢ̱ܬ݁ . ܐܶܠܳܐ ܠܳܐ ܝܳܕ݂ܰܥ ܐܰܢ̱ܬ݁ ܐܰܝܡܶܟ݁ܳܐ ܐܳܬ݂ܝܳܐ ܁ ܘܠܰܐܝܟ݁ܳܐ ܐܳܙܳܠ̱ܐ . ܗܳܟ݂ܰܢܳܐ ܐܺܝܬ݂ܰܘܗ̱ܝ ܟ݁ܽܠܢܳܫ ܕ݁ܺܝܠܺܝܕ݂ ܡܶܢ ܪܽܘܚܳܐ . ܥܢܳܐ ܢܺܝܩܳܕ݂ܺܡܳܘܣ ܂ ܘܶܐܡܰܪ ܠܶܗ . ܐܰܝܟ݁ܰܢܳܐ ܡܶܫܟ݁ܚܳܢ ܗܳܠܶܝܢ ܠܡܶܗܘܳܐ . ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܐܰܢ̱ܬ݁ ܗ̱ܽܘ ܡܰܠܦ݂ܳܢܶܗ ܕ݁ܺܐܝܣܪܳܝܶܠ ܆ ܘܗܳܠܶܝܢ ܠܳܐ ܝܳܕ݂ܰܥ ܐܰܢ̱ܬ݁ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ݂ ܆ ܕ݁ܡܶܕ݁ܶܡ ܕ݁ܝܳܕ݂ܥܺܝܢ ܚ̱ܢܰܢ ܡܡܰܠܠܺܝܢ ܚ̱ܢܰܢ . ܘܡܶܕ݁ܶܡ ܕ݁ܰܚܙܰܝܢ ܡܰܣܗܕ݂ܺܝܢ ܐܶܢܰܚܢܰܢ . ܘܣܳܗܕ݁ܽܘܬ݂ܰܢ ܠܳܐ ܡܩܰܒ݁ܠܺܝܢ ܐܢ̱ܬ݁ܽܘܢ . ܐܶܢ ܕ݁ܒ݂ܰܐܪܥܳܐ ܐܶܡܪܶܬ݂ ܠܟ݂ܽܘܢ ܂ ܘܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܆ ܐܰܝܟ݁ܰܢܳܐ ܐܶܢ ܐܺܡܰܪ ܠܟ݂ܽܘܢ ܕ݁ܒ݂ܰܫܡܰܝܳܐ ܁ ܬ݁ܗܰܝܡܢܽܘܢܳܢܝ . ܘܠܳܐ ܐ̱ܢܳܫ ܣܠܶܩ ܠܰܫܡܰܝܳܐ ܆ ܐܶܠܳܐ ܗܰܘ ܕ݁ܰܢܚܶܬ݂ ܡܶܢ ܫܡܰܝܳܐ . ܒ݁ܪܶܗ ܕ݁ܐ̱ܢܳܫܳܐ ܗܰܘ ܕ݁ܺܐܝܬ݂ܰܘܗ̱ܝ ܒ݁ܰܫܡܰܝܳܐ . ܘܰܐܝܟ݁ܰܢܳܐ ܕ݁ܰܐܪܺܝܡ ܡܽܘܫܶܐ ܚܶܘܝܳܐ ܒ݁ܡܰܕ݂ܒ݁ܪܳܐ ܆ ܗܳܟ݂ܰܢܳܐ ܥܬ݂ܺܝܕ݂ ܠܡܶܬ݁ܬ݁ܪܳܡܽܘ ܒ݁ܪܶܗ ܕ݁ܐ̱ܢܳܫܳܐ . ܕ݁ܟ݂ܽܠ ܐ̱ܢܳܫ ܕ݁ܰܡܗܰܝܡܶܢ ܒ݁ܶܗ ܂ ܠܳܐ ܢܺܐܒ݂ܰܕ݂ . ܐܶܠܳܐ ܢܶܗܘܽܘܢ ܠܶܗ ܚܰܝܶܐ̈ ܕ݁ܰܠܥܳܠܰܡ . ܗܳܟ݂ܰܢܳܐ ܓ݁ܶܝܪ ܐܰܚܶܒ݂ ܐܰܠܳܗܳܐ ܠܥܳܠܡܳܐ ܆ ܐܰܝܟ݁ܰܢܳܐ ܕ݁ܠܰܒ݂ܪܶܗ ܝܺܚܺܝܕ݂ܳܝܳܐ ܢܶܬ݁ܶܠ . ܕ݁ܟ݂ܽܠ ܡܰܢ ܕ݁ܰܡܗܰܝܡܶܢ ܒ݁ܶܗ ܂ ܠܳܐ ܢܺܐܒ݂ܰܕ݂ . ܐܶܠܳܐ ܢܶܗܘܽܘܢ ܠܶܗ ܚܰܝܶܐ̈ ܕ݁ܰܠܥܳܠܰܡ . ܠܳܐ ܓ݁ܶܝܪ ܫܰܕ݁ܰܪ ܐܰܠܳܗܳܐ ܠܰܒ݂ܪܶܗ ܠܥܳܠܡܳܐ ܕ݁ܰܢܕ݂ܽܘܢܺܝܘܗ̱ܝ ܠܥܳܠܡܳܐ . ܐܶܠܳܐ ܕ݁ܢܺܚܶܐ ܠܥܳܠܡܳܐ ܒ݁ܺܐܝܕ݂ܶܗ . ܡܰܢ ܕ݁ܰܡܗܰܝܡܶܢ ܒ݁ܶܗ ܂ ܠܳܐ ܡܶܬ݁ܬ݁ܕ݂ܺܝܢ . ܘܡܰܢ ܕ݁ܠܳܐ ܡܗܰܝܡܶܢ ܁ ܡܶܢ ܟ݁ܰܕ݁ܽܘ ܕ݁ܺܝܢ ܗ̱ܽܘ . ܕ݁ܠܳܐ ܗܰܝܡܶܢ ܒ݁ܰܫܡܶܗ ܕ݁ܺܝܚܺܝܕ݂ܳܝܳܐ ܒ݁ܪܶܗ ܕ݁ܰܐܠܳܗܳܐ . ܗܳܢܰܘ ܕ݁ܶܝܢ ܕ݁ܺܝܢܳܐ . ܕ݁ܢܽܘܗܪܳܐ ܐܶܬ݂ܳܐ ܠܥܳܠܡܳܐ ܆ ܘܰܐܚܶܒ݂ܘ ܒ݁ܢܰܝܢܳܫܳܐ̈ ܠܚܶܫܽܘܟ݂ܳܐ ܂ ܝܰܬ݁ܺܝܪ ܡܶܢ ܕ݁ܰܠܢܽܘܗܪܳܐ . ܐܺܝܬ݂ܰܝܗܽܘܢ ܗ̱ܘܰܘ ܓ݁ܶܝܪ ܥܒ݂ܳܕ݂ܰܝܗܽܘܢ̈ ܒ݁ܺܝܫܶܐ̈ . ܟ݁ܽܠ ܓ݁ܶܝܪ ܕ݁ܣܰܢܝܳܬ݂ܳܐ̈ ܥܳܒ݂ܶܕ݂ ܂ ܣܳܢܶܐ ܠܢܽܘܗܪܳܐ . ܘܠܳܐ ܐܳܬ݂ܶܐ ܠܢܽܘܗܪܳܐ ܂ ܕ݁ܠܳܐ ܢܶܬ݂ܟ݁ܰܣܣܽܘܢ ܥܒ݂ܳܕ݂ܰܘܗ̱ܝ̈ . ܗܰܘ ܕ݁ܶܝܢ ܕ݁ܥܳܒ݂ܶܕ݂ ܫܪܳܪܳܐ ܂ ܐܳܬ݂ܶܐ ܠܘܳܬ݂ ܢܽܘܗܪܳܐ . ܕ݁ܢܶܬ݂ܺܝܕ݂ܥܽܘܢ ܥܒ݂ܳܕ݂ܰܘܗ̱ܝ̈ ܕ݁ܒ݂ܰܐܠܳܗܳܐ ܥܒ݂ܺܝܕ݂ܺܝܢ ܀.܀.܀܀ ܒ݁ܳܬ݂ܰܪ ܗܳܠܶܝܢ ܂ ܐܶܬ݂ܳܐ ܝܶܫܽܘܥ ܘܬ݂ܰܠܡܺܝܕ݂ܰܘܗ̱ܝ̈ ܠܰܐܪܥܳܐ ܕ݁ܺܝܗܽܘܕ݂ . ܘܬ݂ܰܡܳܢ ܡܶܬ݂ܗܰܦ݁ܰܟ݂ ܗ̱ܘܳܐ ܥܰܡܗܽܘܢ ܂ ܘܡܰܥܡܶܕ݂ ܀ ܐܳܦ݂ ܝܽܘܚܰܢܳܢ ܕ݁ܶܝܢ ܡܰܥܡܶܕ݂ ܗ̱ܘܳܐ ܒ݁ܥܺܝܢ ܝܳܘܢ ܂ ܕ݁ܥܰܠ ܓ݁ܶܢ̱ܒ݂ ܫܳܠܺܝܡ . ܡܶܛܽܠ ܕ݁ܡܰܝܳܐ̈ ܐܺܝܬ݂ ܗ̱ܘܰܘ ܬ݁ܰܡܳܢ ܣܰܓ݁ܺܝܶܐܐ̈ . ܘܳܐܬ݂ܶܝܢ ܗ̱ܘܰܘ ܘܥܳܡܕ݁ܺܝܢ . ܠܳܐ ܓ݁ܶܝܪ ܥܕ݂ܰܟ݁ܺܝܠ ܢܦ݂ܰܠ ܗ̱ܘܳܐ ܝܽܘܚܰܢܳܢ ܒ݁ܶܝܬ݂ ܐܰܣܺܝܪܶܐ̈ ܀ ܗܘܳܬ݂ ܗ̱ܘܳܬ݂ ܕ݁ܶܝܢ ܒ݁ܥܳܬ݂ܳܐ ܠܚܰܕ݂ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܕ݁ܝܽܘܚܰܢܳܢ ܥܰܡ ܝܺܗܽܘܕ݂ܳܝܳܐ ܚܰܕ݂ ܥܰܠ ܬ݁ܰܕ݂ܟ݁ܺܝܬ݂ܳܐ . ܘܶܐܬ݂ܰܘ ܠܘܳܬ݂ ܝܽܘܚܰܢܳܢ ܘܶܐܡܰܪܘ ܠܶܗ . ܪܰܒ݁ܰܢ ܆ ܗܰܘ ܕ݁ܥܰܡܳܟ݂ ܗ̱ܘܳܐ ܒ݁ܥܶܒ݂ܪܳܐ ܕ݁ܝܽܘܪܕ݁ܢܳܢ : ܕ݁ܰܐܢ̱ܬ݁ ܣܗܶܕ݂ܬ݁ ܥܠܰܘܗ̱ܝ ܆ ܗܳܐ ܐܳܦ݂ ܗܽܘ ܡܰܥܡܶܕ݂ ܂ ܘܣܰܓ݁ܺܝܶܐܐ̈ ܐܳܬ݂ܶܝܢ ܠܘܳܬ݂ܶܗ ܀ ܥܢܳܐ ܝܽܘܚܰܢܳܢ ܘܶܐܡܰܪ ܠܗܽܘܢ . ܠܳܐ ܡܶܫܟ݁ܰܚ ܒ݁ܰܪܢܳܫܳܐ ܠܡܶܣܰܒ݂ ܡܶܢ ܨܒ݂ܽܘܬ݂ ܢܰܦ݂ܫܶܗ ܡܶܕ݁ܶܡ ܇ ܐܶܠܳܐ ܐܶܢ ܐܶܬ݂ܺܝܗܶܒ݂ ܠܶܗ ܡܶܢ ܫܡܰܝܳܐ . ܐܰܢ̱ܬ݁ܽܘܢ ܣܳܗܕ݁ܺܝܢ ܐܢ̱ܬ݁ܽܘܢ ܠܺܝ ܁ ܕ݁ܶܐܡܪܶܬ݂ ܆ ܕ݁ܶܐܢܳܐ ܠܳܐ ܗܘܺܝܬ݂ ܡܫܺܝܚܳܐ . ܐܶܠܳܐ ܫܠܺܝܚܳܐ ܐ̱ܢܳܐ ܕ݁ܰܩܕ݂ܳܡܰܘܗ̱ܝ . ܡܰܢ ܕ݁ܺܐܝܬ݂ ܠܶܗ ܟ݁ܰܠܬ݂ܳܐ ܂ ܚܰܬ݂ܢܳܐ ܗܽܘ . ܪܳܚܡܶܗ ܕ݁ܶܝܢ ܕ݁ܚܰܬ݂ܢܳܐ ܂ ܗܰܘ ܕ݁ܩܳܐܶܡ ܘܨܳܐܶܬ݂ ܠܶܗ . ܚܰܕ݂ܽܘܬ݂ܳܐ ܪܰܒ݁ܬ݂ܳܐ ܚܳܕ݂ܶܐ ܡܶܛܽܠ ܩܳܠܶܗ ܕ݁ܚܰܬ݂ܢܳܐ . ܗܳܕ݂ܶܐ ܗܳܟ݂ܺܝܠ ܚܰܕ݂ܽܘܬ݂ܳܐ ܕ݁ܺܝܠܝ ܗܳܐ ܡܡܰܠܝܳܐ . ܠܗܰܘ ܗ̱ܽܘ ܘܳܠܶܐ ܠܡܶܪܒ݁ܳܐ ܂ ܘܠܺܝ ܠܡܶܒ݂ܨܰܪ . ܗܰܘ ܓ݁ܶܝܪ ܕ݁ܡܶܢ ܠܥܶܠ ܐܶܬ݂ܳܐ ܂ ܠܥܶܠ ܡܶܢ ܟ݁ܽܠ ܗ̱ܽܘ . ܘܗܰܘ ܕ݁ܡܶܢ ܐܰܪܥܳܐ ܂ ܡܶܢ ܐܰܪܥܳܐ ܗܽܘ . ܘܡܶܢ ܐܰܪܥܳܐ ܡܡܰܠܶܠ . ܗܰܘ ܕ݁ܡܶܢ ܫܡܰܝܳܐ ܐܶܬ݂ܳܐ ܂ ܠܥܶܠ ܡܶܢ ܟ݁ܽܠ ܗ̱ܽܘ . ܘܡܶܕ݁ܶܡ ܕ݁ܰܚܙܳܐ ܘܰܫܡܰܥ ܡܰܣܗܶܕ݂ . ܘܣܳܗܕ݁ܽܘܬ݂ܶܗ ܠܳܐ ܐ̱ܢܳܫ ܡܩܰܒ݁ܶܠ . ܗܰܘ ܕ݁ܶܝܢ ܕ݁ܩܰܒ݁ܶܠ ܣܳܗܕ݁ܽܘܬ݂ܶܗ ܆ ܚܬ݂ܰܡ ܕ݁ܰܐܠܳܗܳܐ ܫܰܪܺܝܪܳܐ ܗܽܘ . ܐܰܝܢܳܐ ܓ݁ܶܝܪ ܕ݁ܰܐܠܳܗܳܐ ܫܰܕ݁ܪܶܗ ܆ ܡܶܠܶܐ̈ ܗ̱ܘ ܕ݁ܰܐܠܳܗܳܐ ܡܡܰܠܶܠ . ܠܳܐ ܗ̱ܘܳܐ ܓ݁ܶܝܪ ܒ݁ܟ݂ܰܝܠܳܐ ܝܰܗ̱ܒ݂ ܐܰܠܳܗܳܐ ܪܽܘܚܳܐ . ܐܰܒ݂ܳܐ ܡܰܚܶܒ݂ ܠܰܒ݂ܪܳܐ . ܘܟ݂ܽܠ ܡܶܕ݁ܶܡ ܝܰܗ̱ܒ݂ ܒ݁ܺܐܝܕ݂ܰܘܗ̱ܝ̈ . ܡܰܢ ܕ݁ܰܡܗܰܝܡܶܢ ܒ݁ܰܒ݂ܪܳܐ ܂ ܐܺܝܬ݂ ܠܶܗ ܚܰܝܶܐ̈ ܕ݁ܰܠܥܳܠܰܡ . ܘܡܰܢ ܕ݁ܠܳܐ ܡܶܬ݁ܛܦ݁ܺܝܣ ܠܰܒ݂ܪܳܐ ܂ ܠܳܐ ܢܶܚܙܶܐ ܚܰܝܶܐ̈ . ܐܶܠܳܐ ܪܽܘܓ݂ܙܶܗ ܕ݁ܰܐܠܳܗܳܐ ܢܩܰܘܶܐ ܥܠܰܘܗ̱ܝ ܀܀ Chapter 4 ܝܺܕ݂ܰܥ ܕ݁ܶܝܢ ܝܶܫܽܘܥ ܕ݁ܰܫܡܰܥܘ ܦ݁ܪܺܝܫܶܐ̈ ܕ݁ܬ݂ܰܠܡܺܝܕ݂ܶܐ̈ ܣܰܓ݁ܺܝܶܐܐ̈ ܥܒ݂ܰܕ݂ . ܘܡܰܥܡܶܕ݂ ܝܰܬ݁ܺܝܪ ܡܶܢ ܝܽܘܚܰܢܳܢ . ܟ݁ܰܕ݂ ܠܳܐ ܗ̱ܘܳܐ ܗܽܘ ܝܶܫܽܘܥ ܡܰܥܡܶܕ݂ ܗ̱ܘܳܐ . ܐܶܠܳܐ ܬ݁ܰܠܡܺܝܕ݂ܰܘܗ̱ܝ̈ . ܘܫܰܒ݂ܩܳܗ ܠܺܝܗܽܘܕ݂ ܆ ܘܶܐܙܰܠ ܠܶܗ ܬ݁ܽܘܒ݂ ܠܰܓ݂ܠܺܝܠܳܐ ܀܀ ܡܰܥܒ݁ܕ݂ܳܐ ܗ̱ܘܳܬ݂ ܠܶܗ ܕ݁ܶܝܢ ܕ݁ܢܺܐܬ݂ܶܐ ܢܶܥܒ݁ܰܪ ܥܰܠ ܒ݁ܶܝܬ݂ ܫܳܡܪܳܝܶܐ̈ . ܘܶܐܬ݂ܳܐ ܠܰܡܕ݂ܺܝܢ̱ܬ݁ܳܐ ܕ݁ܫܳܡܪܳܝܶܐ̈ ܁ ܕ݁ܡܶܬ݂ܩܰܪܝܳܐ ܫܳܟ݂ܰܪ . ܥܰܠ ܓ݁ܶܢ̱ܒ݂ ܩܪܺܝܬ݂ܳܐ ܂ ܕ݁ܝܰܗ̱ܒ݂ ܗ̱ܘܳܐ ܝܰܥܩܽܘܒ݂ ܠܝܰܘܣܶܦ݂ ܒ݁ܪܶܗ . ܘܺܐܝܬ݂ ܗ̱ܘܳܐ ܬ݁ܰܡܳܢ ܡܥܺܝܢܳܐ ܕ݁ܡܰܝܳܐ̈ ܕ݁ܝܰܥܩܽܘܒ݂ . ܗܽܘ ܕ݁ܶܝܢ ܝܶܫܽܘܥ ܠܐܶܐ ܗ̱ܘܳܐ ܡܶܢ ܥܰܡܠܳܐ ܕ݁ܽܐܘܪܚܳܐ . ܘܺܝܬ݂ܶܒ݂ ܗ̱ܘܳܐ ܠܶܗ ܥܰܠ ܡܥܺܝܢܳܐ . ܘܺܐܝܬ݂ ܗ̱ܘܰܝ̈ ܫܶܬ݂ ܫܳܥܺܝܢ̈ . ܘܶܐܬ݂ܳܬ݂ ܐܰܢ̱ܬ݁ܬ݂ܳܐ ܡܶܢ ܫܳܡܪܺܝܢ ܕ݁ܬ݂ܶܡܠܶܐ ܡܰܝܳܐ̈ . ܘܶܐܡܰܪ ܠܳܗ ܝܶܫܽܘܥ . ܗܰܒ݂ ܠܺܝ ܡܰܝܳܐ̈ ܐܶܫܬ݁ܶܐ . ܬ݁ܰܠܡܺܝܕ݂ܰܘܗ̱ܝ̈ ܓ݁ܶܝܪ ܥܰܠܘ ܗ̱ܘܰܘ ܠܰܡܕ݂ܺܝܢ̱ܬ݁ܳܐ ܂ ܕ݁ܢܶܙܒ݁ܢܽܘܢ ܠܗܽܘܢ ܣܰܝܒ݁ܳܪܬ݁ܳܐ . ܐܳܡܪܳܐ ܠܶܗ ܗܳܝ ܐܰܢ̱ܬ݁ܬ݂ܳܐ ܫܳܡܪܳܝܬ݁ܳܐ . ܐܰܝܟ݁ܰܢܳܐ ܐܰܢ̱ܬ݁ ܝܺܗܽܘܕ݂ܳܝܳܐ ܐܰܢ̱ܬ݁ ܇ ܘܡܶܢܝ ܫܳܐܶܠ ܐܰܢ̱ܬ݁ ܠܡܶܫܬ݁ܳܐ . ܕ݁ܺܐܝܬ݂ܰܝ ܐܰܢ̱ܬ݁ܬ݂ܳܐ ܫܳܡܪܳܝܬ݁ܳܐ . ܠܳܐ ܓ݁ܶܝܪ ܡܶܬ݂ܚܰܫܚܺܝܢ ܝܺܗܽܘܕ݂ܳܝܶܐ̈ ܥܰܡ ܫܳܡܪܳܝܶܐ̈ . ܥܢܳܐ ܝܶܫܽܘܥ ܂ ܘܶܐܡܰܪ ܠܳܗ . ܐܶܠܽܘ ܝܳܕ݂ܥܳܐ ܗ̱ܘܰܝܬ݁ܝ ܡܰܘܗܰܒ݂ܬ݁ܳܐ ܕ݁ܰܐܠܳܗܳܐ : ܘܡܰܢܽܘ ܗܳܢܳܐ ܕ݁ܶܐܡܰܪ ܠܶܟ݂ܝ ܂ ܗܰܒ݂ ܠܺܝ ܐܶܫܬ݁ܶܐ ܆ ܐܰܢ̱ܬ݁ܝ ܫܳܐܠܳܐ ܗ̱ܘܰܝܬ݁ܝ ܠܶܗ ܂ ܘܝܳܗܶܒ݂ ܗ̱ܘܳܐ ܠܶܟ݂ܝ ܡܰܝܳܐ̈ ܚܰܝܶܐ̈ . ܐܳܡܪܳܐ ܠܶܗ ܐܰܢ̱ܬ݁ܬ݂ܳܐ ܗܳܝ . ܡܳܪܝ ܆ ܠܳܐ ܕ݁ܰܘܠܳܐ ܐܺܝܬ݂ ܠܳܟ݂ ܁ ܘܒ݂ܺܪܳܐ ܥܰܡܺܝܩܳܐ . ܐܰܝܡܶܟ݁ܳܐ ܠܳܟ݂ ܡܰܝܳܐ̈ ܚܰܝܶܐ̈ . ܠܡܳܐ ܐܰܢ̱ܬ݁ ܪܰܒ݂ ܐܰܢ̱ܬ݁ ܡܶܢ ܐܰܒ݂ܽܘܢ ܝܰܥܩܽܘܒ݂ : ܗܰܘ ܕ݁ܗܽܘ ܝܰܗ̱ܒ݂ ܠܰܢ ܒ݁ܺܪܳܐ ܗܳܕ݂ܶܐ : ܘܗܽܘ ܡܶܢܳܗ ܐܶܫܬ݁ܺܝ ܘܰܒ݂ܢܰܘܗ̱ܝ̈ ܘܥܳܢܶܗ̈ . ܥܢܳܐ ܝܶܫܽܘܥ ܘܶܐܡܰܪ ܠܳܗ . ܟ݁ܽܠ ܕ݁ܢܶܫܬ݁ܶܐ ܡܶܢ ܗܳܠܶܝܢ ܡܰܝܳܐ̈ ܂ ܬ݁ܽܘܒ݂ ܢܶܨܗܶܐ . ܟ݁ܽܠ ܕ݁ܶܝܢ ܕ݁ܢܶܫܬ݁ܶܐ ܡܶܢ ܡܰܝܳܐ̈ ܕ݁ܶܐܢܳܐ ܐܶܬ݁ܶܠ ܠܶܗ ܂ ܠܳܐ ܢܶܨܗܶܐ ܠܥܳܠܰܡ . ܐܶܠܳܐ ܡܰܝܳܐ̈ ܗܳܢܽܘܢ ܕ݁ܝܳܗܶܒ݂ ܐ̱ܢܳܐ ܠܶܗ ܆ ܢܶܗܘܽܘܢ ܒ݁ܶܗ ܡܥܺܝܢܳܐ ܕ݁ܡܰܝܳܐ̈ ܁ ܕ݁ܢܳܒ݂ܥܺܝܢ ܠܚܰܝܶܐ̈ ܕ݁ܰܠܥܳܠܰܡ . ܐܳܡܪܳܐ ܠܶܗ ܐܰܢ̱ܬ݁ܬ݂ܳܐ ܗܳܝ . ܡܳܪܝ ܆ ܗܰܒ݂ ܠܺܝ ܡܶܢ ܗܳܠܶܝܢ ܡܰܝܳܐ̈ ܂ ܕ݁ܠܳܐ ܬ݁ܽܘܒ݂ ܐܶܨܗܶܐ . ܘܠܳܐ ܗܘܺܝܬ݂ ܐܳܬ݂ܝܳܐ ܕ݁ܳܠܝܳܐ ܡܶܢ ܗܳܪܟ݁ܳܐ . ܐܳܡܰܪ ܠܳܗ ܝܶܫܽܘܥ . ܙܶܠܝ ܩܪܳܝ ܠܒ݂ܰܥܠܶܟ݂ܝ ܂ ܘܬ݂ܳܝ ܠܗܳܪܟ݁ܳܐ . ܐܳܡܪܳܐ ܠܶܗ ܂ ܠܰܝܬ݁ ܠܺܝ ܒ݁ܰܥܠܳܐ . ܐܳܡܰܪ ܠܳܗ ܝܶܫܽܘܥ . ܫܰܦ݁ܺܝܪ ܐܶܡܰܪܬ݁ܝ ܂ ܕ݁ܠܰܝܬ݁ ܠܺܝ ܒ݁ܰܥܠܳܐ . ܚܰܡܫܳܐ ܓ݁ܶܝܪ ܒ݁ܰܥܠܺܝܢ̈ ܗܘܰܘ ܠܶܟ݂ܝ . ܘܗܳܢܳܐ ܕ݁ܺܐܝܬ݂ ܠܶܟ݂ܝ ܗܳܫܳܐ ܂ ܠܳܐ ܗܘܳܐ ܒ݁ܰܥܠܶܟ݂ܝ . ܗܳܕ݂ܶܐ ܂ ܫܰܪܺܝܪܬ݁ܳܐ ܐܶܡܰܪܬ݁ܝ . ܐܳܡܪܳܐ ܠܶܗ ܗܳܝ ܐܰܢ̱ܬ݁ܬ݂ܳܐ . ܡܳܪܝ ܆ ܚܳܙܝܳܐ ܐ̱ܢܳܐ ܕ݁ܰܢܒ݂ܺܝܳܐ ܐܰܢ̱ܬ݁ . ܐܰܒ݂ܳܗܰܝܢ̈ ܒ݁ܗܳܢܳܐ ܛܽܘܪܳܐ ܣܓ݂ܶܕ݂ܘ . ܘܰܐܢ̱ܬ݁ܽܘܢ ܐܳܡܪܺܝܢ ܐܢ̱ܬ݁ܽܘܢ ܂ ܕ݁ܒ݂ܽܐܘܪܺܫܠܶܡ ܗ̱ܽܘ ܐܰܬ݂ܰܪ ܕ݁ܘܳܠܶܐ ܠܡܶܣܓ݁ܰܕ݂ . ܐܳܡܰܪ ܠܳܗ ܝܶܫܽܘܥ . ܐܰܢ̱ܬ݁ܬ݂ܳܐ ܂ ܗܰܝܡܶܢܺܝܢܝ ܕ݁ܳܐܬ݂ܝܳܐ ܫܳܥܬ݂ܳܐ ܆ ܕ݁ܠܳܐ ܒ݁ܗܳܢܳܐ ܛܽܘܪܳܐ ܂ ܘܳܐܦ݂ ܠܳܐ ܒ݁ܽܐܘܪܺܫܠܶܡ ܬ݁ܶܣܓ݁ܕ݂ܽܘܢ ܠܰܐܒ݂ܳܐ . ܐܰܢ̱ܬ݁ܽܘܢ ܣܳܓ݂ܕ݁ܺܝܢ ܐܢ̱ܬ݁ܽܘܢ ܂ ܠܡܶܕ݁ܶܡ ܕ݁ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ . ܚܢܰܢ ܕ݁ܶܝܢ ܣܳܓ݂ܕ݁ܺܝܢ ܚ̱ܢܰܢ ܂ ܠܡܳܐ ܕ݁ܝܳܕ݂ܥܺܝܢ ܚ̱ܢܰܢ . ܕ݁ܚܰܝܶܐ̈ ܡܶܢ ܝܺܗܽܘܕ݂ܳܝܶܐ̈ ܐܶܢܽܘܢ . ܐܶܠܳܐ ܐܳܬ݂ܝܳܐ ܫܳܥܬ݂ܳܐ ܁ ܘܗܳܫܳܐ ܐܺܝܬ݂ܶܝܗ ܆ ܐܶܡܰܬ݂ܝ ܕ݁ܣܳܓ݂ܽܘܕ݂ܶܐ̈ ܫܰܪܺܝܪܶܐ̈ ܢܶܣܓ݁ܕ݂ܽܘܢ ܠܰܐܒ݂ܳܐ ܒ݁ܪܽܘܚܳܐ ܂ ܘܒ݂ܰܫܪܳܪܳܐ . ܐܳܦ݂ ܐܰܒ݂ܳܐ ܓ݁ܶܝܪ ܕ݁ܰܐܝܟ݂ ܗܳܠܶܝܢ ܗ̱ܽܘ ܣܳܓ݂ܽܘܕ݂ܶܐ̈ ܒ݁ܳܥܶܐ . ܪܽܘܚܳܐ ܗܽܘ ܓ݁ܶܝܪ ܐܰܠܳܗܳܐ . ܘܰܐܝܠܶܝܢ ܕ݁ܣܳܓ݂ܕ݁ܺܝܢ ܠܶܗ ܆ ܒ݁ܪܽܘܚܳܐ ܘܒ݂ܰܫܪܳܪܳܐ ܘܳܠܶܐ ܕ݁ܢܶܣܓ݁ܕ݂ܽܘܢ . ܐܳܡܪܳܐ ܠܶܗ ܐܰܢ̱ܬ݁ܬ݂ܳܐ ܗܳܝ . ܝܳܕ݂ܥܳܐ ܐ̱ܢܳܐ ܕ݁ܰܡܫܺܝܚܳܐ ܐܳܬ݂ܶܐ . ܘܡܳܐ ܕ݁ܶܐܬ݂ܳܐ ܂ ܗܽܘ ܡܰܠܶܦ݂ ܠܰܢ ܟ݁ܽܠܡܶܕ݁ܶܡ . ܐܳܡܰܪ ܠܳܗ ܝܶܫܽܘܥ . ܐܶܢܳܐ ܐ̱ܢܳܐ ܂ ܕ݁ܰܡܡܰܠܶܠ ܐ̱ܢܳܐ ܥܰܡܶܟ݂ܝ . ܘܟ݂ܰܕ݂ ܡܡܰܠܶܠ ܆ ܐܶܬ݂ܰܘ ܬ݁ܰܠܡܺܝܕ݂ܰܘܗ̱ܝ̈ ܂ ܘܡܶܬ݁ܕ݁ܰܡܪܺܝܢ ܗ̱ܘܰܘ ܕ݁ܥܰܡ ܐܰܢ̱ܬ݁ܬ݂ܳܐ ܡܡܰܠܶܠ . ܠܳܐ ܕ݁ܶܝܢ ܐ̱ܢܳܫ ܐܶܡܰܪ ܂ ܡܳܢܳܐ ܒ݁ܳܥܶܐ ܐܰܢ̱ܬ݁ ܇ ܐܰܘ ܡܳܢܳܐ ܡܡܰܠܶܠ ܐܰܢ̱ܬ݁ ܥܰܡܳܗ . ܘܫܶܒ݂ܩܰܬ݂ ܩܽܘܠܬ݂ܳܗ ܐܰܢ̱ܬ݁ܬ݂ܳܐ ܂ ܘܶܐܙܰܠ̱ܬ݂ ܠܰܡܕ݂ܺܝܢ̱ܬ݁ܳܐ ܂ ܘܳܐܡܪܳܐ ܠܐ̱ܢܳܫܳܐ . ܬ݁ܰܘ ܚܙܰܘ ܓ݁ܰܒ݂ܪܳܐ ܂ ܕ݁ܶܐܡܰܪ ܠܺܝ ܟ݁ܽܠ ܡܶܕ݁ܶܡ ܕ݁ܥܶܒ݂ܕ݁ܶܬ݂ . ܠܡܳܐ ܗܽܘܝܽܘ ܡܫܺܝܚܳܐ . ܘܰܢܦ݂ܰܩܘ ܐ̱ܢܳܫܳܐ ܡܶܢ ܡܕ݂ܺܝܢ̱ܬ݁ܳܐ ܆ ܘܳܐܬ݂ܶܝܢ ܗ̱ܘܰܘ ܠܘܳܬ݂ܶܗ ܀.܀.܀܀ ܘܒ݂ܰܝܢܳܬ݂ ܗܳܠܶܝܢ ܒ݁ܳܥܶܝܢ ܗ̱ܘܰܘ ܡܶܢܶܗ ܬ݁ܰܠܡܺܝܕ݂ܰܘܗ̱ܝ̈ ܂ ܘܳܐܡܪܺܝܢ ܠܶܗ . ܪܰܒ݁ܰܢ ܠܥܰܣ . ܗܽܘ ܕ݁ܶܝܢ ܐܶܡܰܪ ܠܗܽܘܢ . ܐܺܝܬ݂ ܠܺܝ ܡܶܐܟ݂ܽܘܠܬ݁ܳܐ ܕ݁ܶܐܟ݂ܽܘܠ ܆ ܐܰܝܕ݂ܳܐ ܕ݁ܰܐܢ̱ܬ݁ܽܘܢ ܂ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ . ܐܳܡܪܺܝܢ ܬ݁ܰܠܡܺܝܕ݂ܶܐ̈ ܒ݁ܰܝܢܰܝܗܽܘܢ̈ . ܠܡܳܐ ܆ ܐ̱ܢܳܫ ܐܰܝܬ݁ܺܝ ܠܶܗ ܡܶܕ݁ܶܡ ܠܡܶܐܟ݂ܰܠ ܆ ܐܳܡܰܪ ܠܗܽܘܢ ܝܶܫܽܘܥ . ܡܶܐܟ݂ܽܘܠܬ݁ܝ ܁ ܕ݁ܺܝܠܝ ܐܺܝܬ݂ܶܝܗ ܆ ܕ݁ܶܐܥܒ݁ܶܕ݂ ܨܶܒ݂ܝܳܢܶܗ ܕ݁ܡܰܢ ܕ݁ܫܰܕ݁ܪܰܢܝ ܂ ܘܶܐܫܰܠܡܺܝܘܗ̱ܝ ܠܰܥܒ݂ܳܕ݂ܶܗ . ܠܳܐ ܐܰܢ̱ܬ݁ܽܘܢ ܐܳܡܪܺܝܢ ܕ݁ܒ݂ܳܬ݂ܰܪ ܐܰܪܒ݁ܥܳܐ ܝܰܪܚܺܝܢ̈ ܁ ܐܳܬ݂ܶܐ ܚܨܳܕ݂ܳܐ . ܗܳܐ ܐܳܡܰܪ ܐ̱ܢܳܐ ܠܟ݂ܽܘܢ . ܕ݁ܰܐܪܺܝܡܘ ܥܰܝܢܰܝܟ݁ܽܘܢ̈ ܁ ܘܰܚܙܰܘ ܐܰܪܥܳܬ݂ܳܐ̈ ܕ݁ܰܚܘܰܪ ܘܡܰܛܺܝ ܠܰܚܨܳܕ݂ܳܐ ܂ ܡܶܢ ܟ݁ܰܕ݁ܽܘ . ܘܰܐܝܢܳܐ ܕ݁ܚܳܨܶܕ݂ ܁ ܐܰܓ݂ܪܳܐ ܢܳܣܶܒ݂ . ܘܟ݂ܳܢܶܫ ܦ݁ܺܐܪܶܐ̈ ܂ ܠܚܰܝܶܐ̈ ܕ݁ܰܠܥܳܠܰܡ . ܘܙܳܪܽܘܥܳܐ ܘܚܳܨܽܘܕ݂ܳܐ . ܐܰܟ݂ܚܕ݂ܳܐ ܢܶܚܕ݁ܽܘܢ . ܒ݁ܗܳܕ݂ܶܐ ܓ݁ܶܝܪ ܐܺܝܬ݂ܶܝܗ ܡܶܠܬ݂ܳܐ ܕ݁ܰܫܪܳܪܳܐ . ܕ݁ܰܐ̱ܚܪܺܝܢ ܗ̱ܽܘ ܙܳܪܰܥ ܆ ܘܰܐ̱ܚܪܺܝܢ ܚܳܨܶܕ݂ . ܐܶܢܳܐ ܫܰܕ݁ܰܪܬ݁ܟ݂ܽܘܢ ܠܡܶܚܨܰܕ݂ ܆ ܡܶܕ݁ܶܡ ܕ݁ܠܳܐ ܗ̱ܘܳܐ ܐܰܢ̱ܬ݁ܽܘܢ ܠܐܝܺܬ݁ܽܘܢ ܒ݁ܶܗ . ܐ̱ܚܪܳܢܶܐ̈ ܓ݁ܶܝܪ ܠܐܝܺܘ ܆ ܘܰܐܢ̱ܬ݁ܽܘܢ ܥܰܠܬ݁ܽܘܢ ܥܰܠ ܥܰܡܠܗܽܘܢ ܕ݁ܗܳܢܽܘܢ ܀ ܡܶܢ ܗܳܝ ܡܕ݂ܺܝܢ̱ܬ݁ܳܐ ܕ݁ܶܝܢ ܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ ܫܳܡܪܳܝܶܐ̈ . ܡܶܛܽܠ ܡܶܠܬ݂ܳܗ ܕ݁ܰܐܢ̱ܬ݁ܬ݂ܳܐ ܗܳܝ . ܕ݁ܡܰܣܗܕ݂ܳܐ ܗ̱ܘܳܬ݂ ܕ݁ܶܐܡܰܪ ܠܺܝ ܟ݁ܽܠܡܶܕ݁ܶܡ ܕ݁ܥܶܒ݂ܕ݁ܶܬ݂ . ܘܟ݂ܰܕ݂ ܐܶܬ݂ܰܘ ܠܘܳܬ݂ܶܗ ܗܳܢܽܘܢ ܫܳܡܪܳܝܶܐ̈ ܆ ܒ݁ܥܰܘ ܡܶܢܶܗ ܕ݁ܢܶܗܘܶܐ ܠܘܳܬ݂ܗܽܘܢ . ܘܰܗܘܳܐ ܠܘܳܬ݂ܗܽܘܢ ܬ݁ܪܶܝܢ̈ ܝܰܘܡܺܝܢ̈ . ܘܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ ܡܶܛܽܠ ܡܶܠܬ݂ܶܗ ܇ ܘܳܐܡܪܺܝܢ ܗ̱ܘܰܘ ܠܰܐܢ̱ܬ݁ܬ݂ܳܐ ܗܳܝ . ܕ݁ܡܶܟ݁ܺܝܠ ܠܳܐ ܗ̱ܘܳܐ ܡܶܛܽܠ ܡܶܠܬ݂ܶܟ݂ܝ ܡܗܰܝܡܢܺܝܢ ܚ̱ܢܰܢ ܒ݁ܶܗ . ܚܢܰܢ ܓ݁ܶܝܪ ܫܡܰܥܢ ܘܺܝܕ݂ܰܥܢ ܆ ܕ݁ܗܳܢܰܘ ܫܰܪܺܝܪܳܐܝܺܬ݂ ܡܫܺܝܚܳܐ ܂ ܡܰܚܝܳܢܶܗ ܕ݁ܥܳܠܡܳܐ ܀ ܘܒ݂ܳܬ݂ܰܪ ܬ݁ܪܶܝܢ̈ ܝܰܘܡܺܝܢ̈ ܆ ܢܦ݂ܰܩ ܝܶܫܽܘܥ ܡܶܢ ܬ݁ܰܡܳܢ ܂ ܘܶܐܙܰܠ ܠܰܓ݂ܠܺܝܠܳܐ . ܗܽܘ ܓ݁ܶܝܪ ܝܶܫܽܘܥ ܣܗܶܕ݂ ܆ ܕ݁ܰܢܒ݂ܺܝܳܐ ܒ݁ܰܡܕ݂ܺܝܢ̱ܬ݁ܶܗ ܠܳܐ ܡܶܬ݂ܝܰܩܰܪ ܀ ܟ݁ܰܕ݂ ܕ݁ܶܝܢ ܐܶܬ݂ܳܐ ܠܰܓ݂ܠܺܝܠܳܐ ܂ ܩܰܒ݁ܠܽܘܗ̱ܝ ܓ݁ܠܺܝܠܳܝܶܐ̈ . ܕ݁ܰܚܙܰܘ ܐܳܬ݂ܘܳܬ݂ܳܐ̈ ܟ݁ܽܠ ܕ݁ܰܥܒ݂ܰܕ݂ ܒ݁ܽܐܘܪܺܫܠܶܡ ܒ݁ܥܰܕ݂ܥܺܕ݂ܳܐ . ܐܶܬ݂ܰܘ ܗ̱ܘܰܘ ܓ݁ܶܝܪ ܘܳܐܦ݂ ܗܶܢܽܘܢ ܠܥܰܕ݂ܥܺܕ݂ܳܐ . ܐܶܬ݂ܳܐ ܕ݁ܶܝܢ ܬ݁ܽܘܒ݂ ܝܶܫܽܘܥ ܠܩܳܛܢܶܐ ܕ݁ܰܓ݂ܠܺܝܠܳܐ ܇ ܐܰܝܟ݁ܳܐ ܕ݁ܰܥܒ݂ܰܕ݂ ܡܰܝܳܐ̈ ܚܰܡܪܳܐ ܀ ܘܺܐܝܬ݂ ܗ̱ܘܳܐ ܒ݁ܰܟ݂ܦ݂ܰܪܢܰܚܽܘܡ ܥܒ݂ܶܕ݂ ܡܰܠܟ݁ܳܐ ܚܰܕ݂ ܂ ܕ݁ܰܒ݂ܪܶܗ ܟ݁ܪܺܝܗ ܗ̱ܘܳܐ . ܗܳܢܳܐ ܫܡܰܥ ܕ݁ܶܐܬ݂ܳܐ ܝܶܫܽܘܥ ܡܶܢ ܝܺܗܽܘܕ݂ ܠܰܓ݂ܠܺܝܠܳܐ ܆ ܘܶܐܙܰܠ ܠܘܳܬ݂ܶܗ ܂ ܘܒ݂ܳܥܶܐ ܗ̱ܘܳܐ ܡܶܢܶܗ ܆ ܕ݁ܢܶܚܽܘܬ݂ ܘܢܰܐܣܶܐ ܠܰܒ݂ܪܶܗ . ܩܰܪܺܝܒ݂ ܗ̱ܘܳܐ ܓ݁ܶܝܪ ܠܰܡܡܳܬ݂ . ܐܳܡܰܪ ܠܶܗ ܝܶܫܽܘܥ . ܐܶܢ ܐܳܬ݂ܘܳܬ݂ܳܐ̈ ܘܬ݂ܶܕ݂ܡܪܳܬ݂ܳܐ̈ ܠܳܐ ܬ݁ܶܚܙܽܘܢ ܂ ܠܳܐ ܬ݁ܗܰܝܡܢܽܘܢ . ܐܳܡܰܪ ܠܶܗ ܗܰܘ ܥܒ݂ܶܕ݂ ܡܰܠܟ݁ܳܐ . ܡܳܪܝ ܆ ܚܽܘܬ݂ ܂ ܥܰܕ݂ܠܳܐ ܡܳܐܶܬ݂ ܠܶܗ ܛܰܠܝܳܐ . ܐܳܡܰܪ ܠܶܗ ܝܶܫܽܘܥ ܁ ܙܶܠ ܆ ܒ݁ܪܳܟ݂ ܚܰܝ ܗ̱ܽܘ . ܘܗܰܝܡܶܢ ܗܰܘ ܓ݁ܰܒ݂ܪܳܐ ܒ݁ܡܶܠܬ݂ܳܐ ܕ݁ܶܐܡܰܪ ܠܶܗ ܝܶܫܽܘܥ ܂ ܘܶܐܙܰܠ . ܟ݁ܰܕ݂ ܕ݁ܶܝܢ ܢܚܶܬ݂ ܗ̱ܘܳܐ ܆ ܐܰܪܥܽܘܗ̱ܝ ܥܰܒ݂ܕ݁ܰܘܗ̱ܝ̈ ܂ ܘܣܰܒ݁ܪܽܘܗ̱ܝ ܘܳܐܡܪܺܝܢ ܠܶܗ . ܒ݁ܪܳܟ݂ ܚܝܳܐ . ܘܫܰܐܶܠ ܐܶܢܽܘܢ ܂ ܒ݁ܰܐܝܢܳܐ ܥܶܕ݁ܳܢܳܐ ܐܶܬ݂ܚܠܶܡ . ܐܳܡܪܺܝܢ ܠܶܗ . ܐܶܬ݂ܡܳܠܝ ܂ ܒ݁ܰܫܒ݂ܰܥ ܫܳܥܺܝܢ̈ ܫܒ݂ܰܩܬ݂ܶܗ ܐܶܫܳܬ݂ܳܐ . ܘܺܝܕ݂ܰܥ ܐܰܒ݂ܽܘܗ̱ܝ ܂ ܕ݁ܰܒ݂ܗܳܝ ܫܳܥܬ݂ܳܐ ܕ݁ܒ݂ܳܗ ܐܶܡܰܪ ܠܶܗ ܝܶܫܽܘܥ ܕ݁ܰܒ݂ܪܳܟ݂ ܚܝܳܐ . ܘܗܰܝܡܶܢ ܗܽܘ ܘܒ݂ܰܝܬ݁ܶܗ ܟ݁ܽܠܶܗ . ܗܳܕ݂ܶܐ ܬ݁ܽܘܒ݂ ܐܳܬ݂ܳܐ ܕ݁ܬ݂ܰܪܬ݁ܶܝܢ̈ ܥܒ݂ܰܕ݂ ܝܶܫܽܘܥ : ܟ݁ܰܕ݂ ܐܶܬ݂ܳܐ ܡܶܢ ܝܺܗܽܘܕ݂ ܠܰܓ݂ܠܺܝܠܳܐ ܀ Chapter 5 ܒ݁ܳܬ݂ܰܪ ܗܳܠܶܝܢ ܆ ܗܘܳܐ ܥܰܕ݂ܥܺܕ݂ܳܐ ܕ݁ܺܝܗܽܘܕ݂ܳܝܶܐ̈ . ܘܰܣܠܶܩ ܝܶܫܽܘܥ ܠܽܐܘܪܺܫܠܶܡ . ܐܺܝܬ݂ ܗ̱ܘܳܐ ܕ݁ܶܝܢ ܬ݁ܰܡܳܢ ܒ݁ܽܐܘܪܺܫܠܶܡ ܕ݁ܽܘܟ݁ܬ݂ܳܐ ܚܕ݂ܳܐ ܕ݁ܡܰܥܡܽܘܕ݂ܺܝܬ݂ܳܐ ܆ ܕ݁ܡܶܬ݂ܩܰܪܝܳܐ ܥܶܒ݂ܪܳܐܝܺܬ݂ ܂ ܒ݁ܶܝܬ݂ ܚܶܣܕ݁ܳܐ . ܘܺܐܝܬ݂ ܗ̱ܘܳܐ ܒ݁ܳܗ ܚܰܡܫܳܐ ܐܶܣܛܘܺܝܢ̈ . ܘܰܒ݂ܗܳܠܶܝܢ ܪܡܶܝܢ ܗ̱ܘܰܘ ܥܰܡܳܐ ܣܰܓ݁ܺܝܳܐܐ ܕ݁ܰܟ݂ܪܺܝܗܶܐ̈ ܇ ܘܰܣܡܰܝܳܐ̈ ܘܰܚܓ݂ܺܝܣܶܐ̈ ܘܝܰܒ݁ܺܝܫܶܐ̈ . ܘܰܡܣܰܟ݁ܶܝܢ ܗ̱ܘܰܘ ܠܙܽܘܥܳܐ ܕ݁ܡܰܝܳܐ̈ . ܡܰܠܰܐܟ݂ܳܐ ܓ݁ܶܝܪ ܒ݁ܰܙܒ݂ܰܢ ܙܒ݂ܰܢ ܢܳܚܶܬ݂ ܗ̱ܘܳܐ ܠܳܗ ܠܡܰܥܡܽܘܕ݂ܺܝܬ݂ܳܐ ܆ ܘܰܡܙܺܝܥ ܗ̱ܘܳܐ ܠܗܽܘܢ ܠܡܰܝܳܐ̈ . ܘܰܐܝܢܳܐ ܕ݁ܩܰܕ݂ܡܳܝܳܐ ܢܳܚܶܬ݂ ܗ̱ܘܳܐ ܡܶܢ ܒ݁ܳܬ݂ܰܪ ܙܰܘܥܳܐ ܕ݁ܡܰܝܳܐ̈ ܆ ܡܶܬ݂ܚܠܶܡ ܗ̱ܘܳܐ ܟ݁ܽܠ ܟ݁ܺܐܒ݂ܳܐ ܐܰܝܢܳܐ ܕ݁ܺܐܝܬ݂ ܗ̱ܘܳܐ ܠܶܗ ܀ ܐܺܝܬ݂ ܗ̱ܘܳܐ ܕ݁ܶܝܢ ܬ݁ܰܡܳܢ ܓ݁ܰܒ݂ܪܳܐ ܚܰܕ݂ ܆ ܕ݁ܰܬ݂ܠܳܬ݂ܺܝܢ ܘܰܬ݂ܡܳܢܶܐ ܫܢܺܝܢ̈ ܐܺܝܬ݂ܰܘܗ̱ܝ ܗ̱ܘܳܐ ܒ݁ܟ݂ܽܘܪܗܳܢܳܐ . ܠܗܳܢܳܐ ܚܙܳܐ ܝܶܫܽܘܥ ܕ݁ܰܪܡܶܐ ܆ ܘܺܝܕ݂ܰܥ ܕ݁ܙܰܒ݂ܢܳܐ ܣܰܓ݁ܺܝܳܐܐ ܐܺܝܬ݂ ܠܶܗ . ܘܶܐܡܰܪ ܠܶܗ . ܨܳܒ݂ܶܐ ܐܰܢ̱ܬ݁ ܕ݁ܬ݂ܶܬ݂ܚܠܶܡ ܆ ܥܢܳܐ ܗܰܘ ܟ݁ܪܺܝܗܳܐ ܂ ܘܶܐܡܰܪ . ܐܺܝܢ ܡܳܪܝ . ܠܰܝܬ݁ ܠܺܝ ܕ݁ܶܝܢ ܐ̱ܢܳܫ ܂ ܕ݁ܡܳܐ ܕ݁ܶܐܬ݁ܬ݁ܙܺܝܥܘ ܡܰܝܳܐ̈ ܢܰܪܡܶܝܢܝ ܒ݁ܡܰܥܡܽܘܕ݂ܺܝܬ݂ܳܐ . ܐܶܠܳܐ ܥܰܕ݂ ܐܶܢܳܐ ܐܳܬ݂ܶܐ ܐ̱ܢܳܐ ܆ ܐ̱ܚܪܺܝܢ ܡܶܢ ܩܕ݂ܳܡܰܝ ܢܳܚܶܬ݂ . ܐܳܡܰܪ ܠܶܗ ܝܶܫܽܘܥ . ܩܽܘܡ ܫܩܽܘܠ ܥܰܪܣܳܟ݂ ܂ ܘܗܰܠܶܟ݂ . ܘܒ݂ܰܪ ܫܳܥܬ݂ܶܗ ܐܶܬ݂ܚܠܶܡ ܓ݁ܰܒ݂ܪܳܐ ܗܰܘ . ܘܩܳܡ ܫܩܰܠ ܥܰܪܣܶܗ ܂ ܘܗܰܠܶܟ݂ ܀ ܘܗܽܘ ܗܰܘ ܝܰܘܡܳܐ ܫܰܒ݁ܬ݂ܳܐ ܗ̱ܘܳܬ݂ . ܘܳܐܡܪܺܝܢ ܠܶܗ ܝܺܗܽܘܕ݂ܳܝܶܐ̈ ܠܗܰܘ ܕ݁ܶܐܬ݂ܰܐܣܺܝ . ܫܰܒ݁ܬ݂ܳܐ ܗ̱ܝ . ܠܳܐ ܫܰܠܺܝܛ ܠܳܟ݂ ܕ݁ܬ݂ܶܫܩܽܘܠ ܥܰܪܣܳܟ݂ . ܗܽܘ ܕ݁ܶܝܢ ܥܢܳܐ ܘܶܐܡܰܪ ܠܗܽܘܢ . ܗܰܘ ܕ݁ܥܰܒ݂ܕ݁ܰܢܝ ܚܠܺܝܡܳܐ ܆ ܗܽܘ ܐܶܡܰܪ ܠܺܝ ܕ݁ܰܫܩܽܘܠ ܥܰܪܣܳܟ݂ ܂ ܘܗܰܠܶܟ݂ . ܘܫܰܐܠܽܘܗ̱ܝ ܡܰܢܽܘ ܗܳܢܳܐ ܓ݁ܰܒ݂ܪܳܐ ܕ݁ܶܐܡܰܪ ܠܳܟ݂ ܂ ܕ݁ܰܫܩܽܘܠ ܥܰܪܣܳܟ݂ ܘܗܰܠܶܟ݂ . ܗܰܘ ܕ݁ܶܝܢ ܕ݁ܶܐܬ݂ܰܐܣܺܝ ܂ ܠܳܐ ܝܳܕ݂ܰܥ ܗ̱ܘܳܐ ܡܰܢܽܘ . ܝܶܫܽܘܥ ܓ݁ܶܝܪ ܐܶܬ݂ܓ݁ܢܺܝ ܗ̱ܘܳܐ ܠܶܗ ܒ݁ܟ݂ܶܢܫܳܐ ܣܰܓ݁ܺܝܳܐܐ ܕ݁ܺܐܝܬ݂ ܗ̱ܘܳܐ ܒ݁ܕ݂ܽܘܟ݁ܬ݂ܳܐ ܗܳܝ . ܒ݁ܳܬ݂ܰܪ ܙܒ݂ܰܢ ܆ ܐܶܫܟ݁ܚܶܗ ܝܶܫܽܘܥ ܒ݁ܗܰܝܟ݁ܠܳܐ ܂ ܘܶܐܡܰܪ ܠܶܗ . ܗܳܐ ܚܠܺܝܡ ܐܰܢ̱ܬ݁ . ܬ݁ܽܘܒ݂ ܠܳܐ ܬ݁ܶܚܛܶܐ . ܕ݁ܰܠܡܳܐ ܢܶܗܘܶܐ ܠܳܟ݂ ܡܶܕ݁ܶܡ ܕ݁ܒ݂ܺܝܫ ܡܶܢ ܩܰܕ݂ܡܳܝܳܐ . ܘܶܐܙܰܠ ܗܰܘ ܓ݁ܰܒ݂ܪܳܐ ܁ ܘܶܐܡܰܪ ܠܺܝܗܽܘܕ݂ܳܝܶܐ̈ ܂ ܕ݁ܝܶܫܽܘܥ ܗ̱ܽܘ ܗܰܘ ܕ݁ܰܐܚܠܡܶܗ . ܘܡܶܛܽܠ ܗܳܕ݂ܶܐ ܪܳܕ݂ܦ݁ܺܝܢ ܗ̱ܘܰܘ ܝܺܗܽܘܕ݂ܳܝܶܐ̈ ܠܝܶܫܽܘܥ ܂ ܘܒ݂ܳܥܶܝܢ ܗ̱ܘܰܘ ܠܡܶܩܛܠܶܗ ܆ ܕ݁ܗܳܠܶܝܢ ܥܳܒ݂ܶܕ݂ ܗ̱ܘܳܐ ܒ݁ܫܰܒ݁ܬ݂ܳܐ . ܗܽܘ ܕ݁ܶܝܢ ܝܶܫܽܘܥ ܐܶܡܰܪ ܠܗܽܘܢ . ܐܳܒ݂ܝ ܥܕ݂ܰܡܳܐ ܠܗܳܫܳܐ ܥܳܒ݂ܶܕ݂ ܆ ܐܳܦ݂ ܐܶܢܳܐ ܥܳܒ݂ܶܕ݂ ܐ̱ܢܳܐ . ܘܡܶܛܽܠ ܗܳܕ݂ܶܐ ܝܰܬ݁ܺܝܪܳܐܝܺܬ݂ ܒ݁ܳܥܶܝܢ ܗ̱ܘܰܘ ܝܺܗܽܘܕ݂ܳܝܶܐ̈ ܠܡܶܩܛܠܶܗ . ܠܳܐ ܒ݁ܰܠܚܽܘܕ݂ ܕ݁ܫܳܪܶܐ ܗ̱ܘܳܐ ܫܰܒ݁ܬ݂ܳܐ ܆ ܐܶܠܳܐ ܐܳܦ݂ ܕ݁ܥܰܠ ܐܰܠܳܗܳܐ ܕ݁ܰܐܒ݂ܽܘܗ̱ܝ ܐܺܝܬ݂ܰܘܗ̱ܝ ܂ ܐܳܡܰܪ ܗ̱ܘܳܐ . ܘܡܰܫܘܶܐ ܗ̱ܘܳܐ ܢܰܦ݂ܫܶܗ ܥܰܡ ܐܰܠܳܗܳܐ ܀.܀.܀܀ ܥܢܳܐ ܕ݁ܶܝܢ ܝܶܫܽܘܥ ܂ ܘܶܐܡܰܪ ܠܗܽܘܢ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܠܳܐ ܡܶܫܟ݁ܰܚ ܒ݁ܪܳܐ ܥܳܒ݂ܶܕ݂ ܡܶܕ݁ܶܡ ܡܶܢ ܨܒ݂ܽܘܬ݂ ܢܰܦ݂ܫܶܗ . ܐܶܠܳܐ ܡܶܕ݁ܶܡ ܕ݁ܚܳܙܶܐ ܠܰܐܒ݂ܳܐ ܕ݁ܥܳܒ݂ܶܕ݂ . ܐܰܝܠܶܝܢ ܓ݁ܶܝܪ ܕ݁ܰܐܒ݂ܳܐ ܥܳܒ݂ܶܕ݂ ܆ ܗܳܠܶܝܢ ܐܳܦ݂ ܒ݁ܪܳܐ ܐܰܟ݂ܘܳܬ݂ܶܗ ܥܳܒ݂ܶܕ݂ . ܐܰܒ݂ܳܐ ܓ݁ܶܝܪ ܪܳܚܶܡ ܠܰܒ݂ܪܶܗ . ܘܟ݂ܽܠܡܶܕ݁ܶܡ ܕ݁ܥܳܒ݂ܶܕ݂ ܡܚܰܘܶܐ ܠܶܗ . ܘܰܕ݂ܝܰܬ݁ܺܝܪܺܝܢ ܡܶܢ ܗܳܠܶܝܢ ܥܒ݂ܳܕ݂ܶܐ̈ ܡܚܰܘܶܐ ܠܶܗ ܂ ܕ݁ܰܐܢ̱ܬ݁ܽܘܢ ܬ݁ܶܬ݁ܕ݁ܰܡܪܽܘܢ . ܐܰܝܟ݁ܰܢܳܐ ܓ݁ܶܝܪ ܕ݁ܰܐܒ݂ܳܐ ܡܩܺܝܡ ܡܺܝܬ݂ܶܐ̈ ܘܡܰܚܶܐ ܠܗܽܘܢ ܆ ܗܳܟ݂ܰܢܳܐ ܐܳܦ݂ ܒ݁ܪܳܐ ܠܰܐܝܠܶܝܢ ܕ݁ܨܳܒ݂ܶܐ ܡܰܚܶܐ . ܠܳܐ ܗ̱ܘܳܐ ܓ݁ܶܝܪ ܐܰܒ݂ܳܐ ܕ݁ܳܐܶܢ ܠܐ̱ܢܳܫ . ܐܶܠܳܐ ܟ݁ܽܠܶܗ ܕ݁ܺܝܢܳܐ ܝܰܗܒ݁ܶܗ ܠܰܒ݂ܪܳܐ . ܕ݁ܟ݂ܽܠܢܳܫ ܢܝܰܩܰܪ ܠܰܒ݂ܪܳܐ ܆ ܐܰܝܟ݂ ܕ݁ܰܡܝܰܩܰܪ ܠܰܐܒ݂ܳܐ . ܗܰܘ ܕ݁ܠܳܐ ܡܝܰܩܰܪ ܠܰܒ݂ܪܳܐ ܆ ܠܳܐ ܡܝܰܩܰܪ ܠܰܐܒ݂ܳܐ ܕ݁ܫܰܕ݁ܪܶܗ ܀ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܫܳܡܰܥ ܡܶܠܰܬ݂ܝ ܁ ܘܰܡܗܰܝܡܶܢ ܠܡܰܢ ܕ݁ܫܰܕ݁ܪܰܢܝ ܂ ܐܺܝܬ݂ ܠܶܗ ܚܰܝܶܐ̈ ܕ݁ܰܠܥܳܠܰܡ . ܘܰܠܕ݂ܺܝܢܳܐ ܠܳܐ ܐܳܬ݂ܶܐ . ܐܶܠܳܐ ܫܰܢܺܝ ܠܶܗ ܡܶܢ ܡܰܘܬ݁ܳܐ ܠܚܰܝܶܐ̈ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܳܐܬ݂ܝܳܐ ܫܳܥܬ݂ܳܐ . ܐܳܦ݂ ܗܳܫܳܐ ܐܺܝܬ݂ܶܝܗ . ܐܶܡܰܬ݂ܝ ܕ݁ܡܺܝܬ݂ܶܐ̈ ܢܶܫܡܥܽܘܢ ܩܳܠܶܗ ܕ݁ܰܒ݂ܪܶܗ ܕ݁ܰܐܠܳܗܳܐ . ܘܗܳܢܽܘܢ ܕ݁ܫܳܡܥܺܝܢ ܢܺܚܽܘܢ . ܐܰܝܟ݁ܰܢܳܐ ܓ݁ܶܝܪ ܕ݁ܠܰܐܒ݂ܳܐ ܐܺܝܬ݂ ܚܰܝܶܐ̈ ܒ݁ܰܩܢܽܘܡܶܗ ܆ ܗܳܟ݂ܰܢܳܐ ܝܰܗ̱ܒ݂ ܐܳܦ݂ ܠܰܒ݂ܪܳܐ ܂ ܕ݁ܢܶܗܘܽܘܢ ܚܰܝܶܐ̈ ܒ݁ܰܩܢܽܘܡܶܗ . ܘܰܐܫܠܛܶܗ ܕ݁ܢܶܗܘܶܐ ܥܳܒ݂ܶܕ݂ ܐܳܦ݂ ܕ݁ܺܝܢܳܐ . ܕ݁ܰܒ݂ܪܶܗ ܗܽܘ ܕ݁ܶܝܢ ܕ݁ܐ̱ܢܳܫܳܐ ܆ ܠܳܐ ܬ݁ܶܬ݁ܕ݁ܰܡܪܽܘܢ ܒ݁ܗܳܕ݂ܶܐ ܕ݁ܳܐܬ݂ܝܳܐ ܫܳܥܬ݂ܳܐ ܇ ܐܶܡܰܬ݂ܝ ܕ݁ܟ݂ܽܠܗܽܘܢ ܐܰܝܠܶܝܢ ܕ݁ܰܒ݂ܩܰܒ݂ܪܶܐ̈ ܐܶܢܽܘܢ ܢܶܫܡܥܽܘܢ ܩܳܠܶܗ ܂ ܘܢܶܦ݁ܩܽܘܢ ܆ ܐܰܝܠܶܝܢ ܕ݁ܰܥܒ݂ܰܕ݂ܘ ܛܳܒ݂ܳܬ݂ܳܐ̈ ܠܰܩܝܳܡܬ݁ܳܐ ܕ݁ܚܰܝܶܐ̈ ܇ ܘܰܐܝܠܶܝܢ ܕ݁ܰܥܒ݂ܰܕ݂ܘ ܒ݁ܺܝܫܳܬ݂ܳܐ̈ ܠܰܩܝܳܡܬ݁ܳܐ ܕ݁ܕ݂ܺܝܢܳܐ . ܠܳܐ ܡܶܫܟ݁ܰܚ ܐ̱ܢܳܐ ܡܶܕ݁ܶܡ ܡܶܢ ܨܒ݂ܽܘܬ݂ ܢܰܦ݂ܫܝ ܠܡܶܥܒ݁ܰܕ݂ . ܐܶܠܳܐ ܐܰܝܟ݁ܰܢܳܐ ܕ݁ܫܳܡܰܥ ܐ̱ܢܳܐ ܕ݁ܳܐܶܢ ܐ̱ܢܳܐ . ܘܕ݂ܺܝܢܝ ܟ݁ܺܐܝܢ ܗ̱ܽܘ . ܠܳܐ ܓ݁ܶܝܪ ܒ݁ܳܥܶܐ ܐ̱ܢܳܐ ܨܶܒ݂ܝܳܢܝ . ܐܶܠܳܐ ܨܶܒ݂ܝܳܢܶܗ ܕ݁ܡܰܢ ܕ݁ܫܰܕ݁ܪܰܢܝ ܀ ܐܶܢ ܐܶܢܳܐ ܡܰܣܗܶܕ݂ ܐ̱ܢܳܐ ܥܰܠ ܢܰܦ݂ܫܝ ܆ ܣܳܗܕ݁ܽܘܬ݂ܝ ܠܳܐ ܗܘܳܬ݂ ܫܰܪܺܝܪܳܐ . ܐ̱ܚܪܺܝܢ ܗ̱ܽܘ ܗܰܘ ܕ݁ܡܰܣܗܶܕ݂ ܥܠܰܝ . ܘܝܳܕ݂ܰܥ ܐ̱ܢܳܐ ܂ ܕ݁ܫܰܪܺܝܪܳܐ ܗ̱ܝ ܣܳܗܕ݁ܽܘܬ݂ܶܗ ܕ݁ܡܰܣܗܶܕ݂ ܥܠܰܝ . ܐܰܢ̱ܬ݁ܽܘܢ ܫܰܕ݁ܰܪܬ݁ܽܘܢ ܠܘܳܬ݂ ܝܽܘܚܰܢܳܢ ܂ ܘܰܐܣܗܶܕ݂ ܥܰܠ ܫܪܳܪܳܐ . ܐܶܢܳܐ ܕ݁ܶܝܢ ܠܳܐ ܗ̱ܘܳܐ ܡܶܢ ܒ݁ܰܪܢܳܫܳܐ ܢܳܣܶܒ݂ ܐ̱ܢܳܐ ܣܳܗܕ݁ܽܘܬ݂ܳܐ . ܐܶܠܳܐ ܗܳܠܶܝܢ ܐܳܡܰܪ ܐ̱ܢܳܐ ܂ ܕ݁ܰܐܢ̱ܬ݁ܽܘܢ ܬ݁ܺܚܽܘܢ . ܗܰܘ ܫܪܳܓ݂ܳܐ ܗ̱ܘܳܐ ܕ݁ܕ݂ܳܠܶܩ ܂ ܘܡܰܢܗܰܪ . ܘܰܐܢ̱ܬ݁ܽܘܢ ܨܒ݂ܰܝܬ݁ܽܘܢ ܁ ܕ݁ܬ݂ܶܫܬ݁ܰܒ݂ܗܪܽܘܢ ܕ݁ܫܳܥܬ݂ܳܐ ܒ݁ܢܽܘܗܪܶܗ . ܠܺܝ ܕ݁ܶܝܢ ܐܺܝܬ݂ ܠܺܝ ܁ ܣܳܗܕ݁ܽܘܬ݂ܳܐ ܕ݁ܪܰܒ݁ܳܐ ܡܶܢ ܕ݁ܝܽܘܚܰܢܳܢ . ܥܒ݂ܳܕ݂ܶܐ̈ ܓ݁ܶܝܪ ܕ݁ܝܰܗ̱ܒ݂ ܠܺܝ ܐܳܒ݂ܝ ܁ ܕ݁ܶܐܫܰܠܶܡ ܐܶܢܽܘܢ ܇ ܗܶܢܽܘܢ ܥܒ݂ܳܕ݂ܶܐ̈ ܕ݁ܥܳܒ݂ܶܕ݂ ܐ̱ܢܳܐ ܣܳܗܕ݁ܺܝܢ ܥܠܰܝ ܂ ܕ݁ܰܐܒ݂ܳܐ ܫܰܠܚܰܢܝ . ܘܰܐܒ݂ܳܐ ܕ݁ܫܰܠܚܰܢܝ ܂ ܗܽܘ ܣܳܗܶܕ݂ ܥܠܰܝ . ܠܳܐ ܩܳܠܶܗ ܡܶܡܬ݂ܽܘܡ ܫܡܰܥܬ݁ܽܘܢ ܆ ܘܠܳܐ ܚܶܙܘܶܗ ܚܙܰܝܬ݁ܽܘܢ . ܘܡܶܠܬ݂ܶܗ ܠܳܐ ܡܩܰܘܝܳܐ ܒ݁ܟ݂ܽܘܢ . ܡܶܛܽܠ ܕ݁ܰܒ݂ܗܰܘ ܕ݁ܗܽܘ ܫܰܕ݁ܰܪ ܂ ܐܰܢ̱ܬ݁ܽܘܢ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ . ܒ݁ܨܰܘ ܟ݁ܬ݂ܳܒ݂ܶܐ̈ ܕ݁ܰܒ݂ܗܽܘܢ ܡܰܣܒ݁ܪܺܝܢ ܐܢ̱ܬ݁ܽܘܢ ܂ ܕ݁ܚܰܝܶܐ̈ ܕ݁ܰܠܥܳܠܰܡ ܐܺܝܬ݂ ܠܟ݂ܽܘܢ . ܘܗܶܢܽܘܢ ܣܳܗܕ݁ܺܝܢ ܥܠܰܝ . ܘܠܳܐ ܨܳܒ݂ܶܝܢ ܐܢ̱ܬ݁ܽܘܢ ܕ݁ܬ݂ܺܐܬ݂ܽܘܢ ܠܘܳܬ݂ܝ ܇ ܕ݁ܚܰܝܶܐ̈ ܕ݁ܰܠܥܳܠܰܡ ܢܶܗܘܽܘܢ ܠܟ݂ܽܘܢ . ܫܽܘܒ݂ܚܳܐ ܡܶܢ ܒ݁ܢܰܝ̈ ܐ̱ܢܳܫܳܐ ܠܳܐ ܢܳܣܶܒ݂ ܐ̱ܢܳܐ . ܐܶܠܳܐ ܝܺܕ݂ܰܥܬ݁ܟ݂ܽܘܢ ܂ ܕ݁ܚܽܘܒ݁ܶܗ ܕ݁ܰܐܠܳܗܳܐ ܠܰܝܬ݁ ܒ݁ܟ݂ܽܘܢ . ܐܶܢܳܐ ܐܶܬ݂ܺܝܬ݂ ܒ݁ܰܫܡܶܗ ܕ݁ܳܐܒ݂ܝ ܂ ܘܠܳܐ ܡܩܰܒ݁ܠܺܝܢ ܐܢ̱ܬ݁ܽܘܢ ܠܺܝ . ܘܶܐܢ ܐ̱ܚܪܺܝܢ ܢܺܐܬ݂ܶܐ ܒ݁ܫܶܡ ܢܰܦ݂ܫܶܗ ܂ ܠܗܰܘ ܬ݁ܩܰܒ݁ܠܽܘܢ . ܐܰܝܟ݁ܰܢܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܰܡܗܰܝܡܳܢܽܘ ܆ ܕ݁ܫܽܘܒ݂ܚܳܐ ܚܰܕ݂ ܡܶܢ ܚܰܕ݂ ܡܩܰܒ݁ܠܺܝܢ ܐܢ̱ܬ݁ܽܘܢ ܇ ܘܫܽܘܒ݂ܚܳܐ ܕ݁ܡܶܢ ܚܰܕ݂ ܐܰܠܳܗܳܐ ܂ ܠܳܐ ܒ݁ܳܥܶܝܢ ܐܢ̱ܬ݁ܽܘܢ . ܠܡܳܐ ܣܳܒ݂ܪܺܝܢ ܐܢ̱ܬ݁ܽܘܢ ܆ ܕ݁ܶܐܢܳܐ ܐܳܟ݂ܶܠ ܐ̱ܢܳܐ ܩܰܪܨܝܰܟ݁ܽܘܢ̈ ܩܕ݂ܳܡ ܐܰܒ݂ܳܐ ܆ ܐܺܝܬ݂ܰܘܗ̱ܝ ܡܰܢ ܕ݁ܳܐܟ݂ܶܠ ܩܰܪܨܝܰܟ݁ܽܘܢ̈ : ܡܽܘܫܶܐ ܗܰܘ ܕ݁ܒ݂ܶܗ ܣܰܒ݁ܰܪܬ݁ܽܘܢ . ܐܶܠܽܘ ܓ݁ܶܝܪ ܒ݁ܡܽܘܫܶܐ ܗܰܝܡܶܢܬ݁ܽܘܢ ܆ ܐܳܦ݂ ܒ݁ܺܝ ܡܗܰܝܡܢܺܝܢ ܗ̱ܘܰܝܬ݁ܽܘܢ . ܡܽܘܫܶܐ ܓ݁ܶܝܪ ܥܠܰܝ ܟ݁ܬ݂ܰܒ݂ . ܘܶܐܢ ܠܰܟ݂ܬ݂ܳܒ݂ܰܘܗ̱ܝ̈ ܕ݁ܗܰܘ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܆ ܐܰܝܟ݁ܰܢܳܐ ܠܡܶܠܰܝ̈ ܕ݁ܺܝܠܝ ܬ݁ܗܰܝܡܢܽܘܢ ܀܀ Chapter 6 ܒ݁ܳܬ݂ܰܪ ܗܳܠܶܝܢ ܆ ܐܶܙܰܠ ܝܶܫܽܘܥ ܠܥܶܒ݂ܪܳܐ ܕ݁ܝܰܡܳܐ ܕ݁ܰܓ݂ܠܺܝܠܳܐ ܂ ܕ݁ܛܺܒ݂ܶܪܺܝܳܘܣ . ܘܶܐܙܰܠܘ ܒ݁ܳܬ݂ܪܶܗ ܟ݁ܶܢܫܶܐ̈ ܣܰܓ݁ܺܝܶܐܐ̈ . ܡܶܛܽܠ ܕ݁ܚܳܙܶܝܢ ܗ̱ܘܰܘ ܐܳܬ݂ܘܳܬ݂ܳܐ̈ ܕ݁ܥܳܒ݂ܶܕ݂ ܒ݁ܰܟ݂ܪܺܝܗܶܐ̈ . ܘܰܣܠܶܩ ܝܶܫܽܘܥ ܠܛܽܘܪܳܐ ܆ ܘܬ݂ܰܡܳܢ ܝܳܬ݂ܶܒ݂ ܗ̱ܘܳܐ ܂ ܥܰܡ ܬ݁ܰܠܡܺܝܕ݂ܰܘܗ̱ܝ̈ ܀ ܩܰܪܺܝܒ݂ ܗ̱ܘܳܐ ܕ݁ܶܝܢ ܥܰܕ݂ܥܺܕ݂ܳܐ ܕ݁ܦ݂ܶܨܚܳܐ ܕ݁ܺܝܗܽܘܕ݂ܳܝܶܐ̈ ܀ ܘܰܐܪܺܝܡ ܥܰܝܢܰܘܗ̱ܝ̈ ܝܶܫܽܘܥ ܆ ܘܰܚܙܳܐ ܟ݁ܶܢܫܳܐ ܣܰܓ݁ܺܝܳܐܐ ܕ݁ܳܐܬ݂ܶܐ ܠܘܳܬ݂ܶܗ . ܘܶܐܡܰܪ ܠܦ݂ܺܝܠܺܝܦ݁ܳܘܣ . ܐܰܝܡܶܟ݁ܳܐ ܢܶܙܒ݁ܶܢ ܠܰܚܡܳܐ ܕ݁ܢܶܐܟ݂ܠܽܘܢ ܗܳܠܶܝܢ . ܗܳܕ݂ܶܐ ܕ݁ܶܝܢ ܁ ܐܶܡܰܪ ܟ݁ܰܕ݂ ܡܢܰܣܶܐ ܠܶܗ . ܗܽܘ ܓ݁ܶܝܪ ܝܳܕ݂ܰܥ ܗ̱ܘܳܐ ܡܳܢܳܐ ܥܬ݂ܺܝܕ݂ ܠܡܶܥܒ݁ܰܕ݂ . ܐܳܡܰܪ ܠܶܗ ܦ݂ܺܝܠܺܝܦ݁ܳܘܣ . ܕ݁ܡܰܐܬ݂ܶܝܢ ܕ݁ܺܝܢܳܪܺܝܢ̈ ܠܰܚܡܳܐ ܁ ܠܳܐ ܣܳܦ݂ܶܩ ܠܗܽܘܢ ܇ ܟ݁ܰܕ݂ ܩܰܠܺܝܠ ܩܰܠܺܝܠ ܚܰܕ݂ ܚܰܕ݂ ܡܶܢܗܽܘܢ ܢܶܣܰܒ݂ . ܐܳܡܰܪ ܠܶܗ ܚܰܕ݂ ܡܶܢ ܬ݁ܰܠܡܺܝܕ݂ܰܘܗ̱ܝ̈ . ܐܰܢܕ݁ܪܶܐܘܳܣ ܐܰܚܽܘܗ̱ܝ ܕ݁ܫܶܡܥܽܘܢ ܟ݁ܺܐܦ݂ܳܐ . ܐܺܝܬ݂ ܬ݁ܢܳܢ ܛܰܠܝܳܐ ܚܰܕ݂ ܆ ܕ݁ܺܐܝܬ݂ ܥܠܰܘܗ̱ܝ ܚܰܡܶܫ ܓ݁ܪܺܝܨܳܢ̈ ܕ݁ܰܣܥܳܪܶܐ̈ ܂ ܘܰܬ݂ܪܶܝܢ̈ ܢܽܘܢܺܝܢ̈ . ܐܶܠܳܐ ܗܳܠܶܝܢ ܡܳܢܳܐ ܐܶܢܽܘܢ ܠܗܳܠܶܝܢ ܟ݁ܽܠܗܽܘܢ . ܐܳܡܰܪ ܠܗܽܘܢ ܝܶܫܽܘܥ . ܥܒ݂ܶܕ݂ܘ ܐ̱ܢܳܫܳܐ ܟ݁ܽܠܗܽܘܢ ܕ݁ܢܶܣܬ݁ܰܡܟ݁ܽܘܢ . ܥܶܣܒ݁ܳܐ ܕ݁ܶܝܢ ܣܰܓ݁ܺܝ ܗ̱ܘܳܐ ܒ݁ܳܗ ܒ݁ܕ݂ܽܘܟ݁ܬ݂ܳܐ ܗܳܝ . ܘܶܐܣܬ݁ܡܶܟ݂ܘ ܓ݁ܰܒ݂ܪܶܐ̈ ܒ݁ܡܶܢܝܳܢܳܐ ܂ ܚܰܡܫܳܐ ܐܰܠܦ݂ܺܝܢ̈ . ܘܰܫܩܰܠ ܝܶܫܽܘܥ ܠܰܚܡܳܐ ܆ ܘܒ݂ܰܪܶܟ݂ ܂ ܘܦ݂ܰܠܶܓ݂ ܠܗܳܢܽܘܢ ܕ݁ܰܣܡܺܝܟ݂ܺܝܢ . ܘܗܳܟ݂ܰܢܳܐ ܐܳܦ݂ ܡܶܢ ܢܽܘܢܶܐ̈ . ܟ݁ܡܳܐ ܕ݁ܰܨܒ݂ܰܘ . ܘܟ݂ܰܕ݂ ܣܒ݂ܰܥܘ ܂ ܐܶܡܰܪ ܠܬ݂ܰܠܡܺܝܕ݂ܰܘܗ̱ܝ̈ . ܟ݁ܰܢܶܫܘ ܩܨܳܝܶܐ̈ ܕ݁ܺܝܬ݂ܰܪܘ ܂ ܕ݁ܠܳܐ ܢܺܐܒ݂ܰܕ݂ ܡܶܕ݁ܶܡ . ܘܟ݂ܰܢܶܫܘ ܘܰܡܠܰܘ ܬ݁ܪܶܥܣܰܪ̈ ܩܽܘܦ݂ܺܝܢܺܝܢ̈ ܩܨܳܝܶܐ̈ ܇ ܐܰܝܠܶܝܢ ܕ݁ܺܝܬ݂ܰܪܘ ܠܗܳܢܽܘܢ ܕ݁ܶܐܟ݂ܰܠܘ ܡܶܢ ܚܰܡܫܳܐ ܠܰܚܡܺܝܢ̈ ܕ݁ܰܣܥܳܪܶܐ̈ ܀ ܗܳܢܽܘܢ ܕ݁ܶܝܢ ܐ̱ܢܳܫܳܐ ܁ ܕ݁ܰܚܙܰܘ ܐܳܬ݂ܳܐ ܕ݁ܰܥܒ݂ܰܕ݂ ܝܶܫܽܘܥ ܆ ܐܳܡܪܺܝܢ ܗ̱ܘܰܘ . ܫܰܪܺܝܪܳܐܝܺܬ݂ ܂ ܗܳܢܰܘ ܢܒ݂ܺܝܳܐ ܕ݁ܳܐܬ݂ܶܐ ܠܥܳܠܡܳܐ . ܝܶܫܽܘܥ ܕ݁ܶܝܢ ܝܺܕ݂ܰܥ ܂ ܕ݁ܰܥܬ݂ܺܝܕ݂ܺܝܢ ܕ݁ܢܺܐܬ݂ܽܘܢ ܢܶܚܛܦ݂ܽܘܢܳܝܗ̱ܝ ܂ ܘܢܶܥܒ݁ܕ݂ܽܘܢܳܝܗ̱ܝ ܡܰܠܟ݁ܳܐ . ܘܫܰܢܺܝ ܠܶܗ ܠܛܽܘܪܳܐ ܂ ܗܽܘ ܒ݁ܰܠܚܽܘܕ݂ܰܘܗ̱ܝ ܀.܀.܀܀ ܘܟ݂ܰܕ݂ ܗܘܳܐ ܪܰܡܫܳܐ ܆ ܢܚܶܬ݂ܘ ܬ݁ܰܠܡܺܝܕ݂ܰܘܗ̱ܝ̈ ܠܝܰܡܳܐ ܂ ܘܺܝܬ݂ܶܒ݂ܘ ܒ݁ܰܣܦ݂ܺܝܢ̱ܬ݁ܳܐ . ܘܳܐܬ݂ܶܝܢ ܗ̱ܘܰܘ ܠܥܶܒ݂ܪܳܐ ܠܰܟ݂ܦ݂ܰܪܢܰܚܽܘܡ . ܘܚܶܫܟ݁ܰܬ݂ ܗ̱ܘܳܬ݂ ܠܳܗ . ܘܠܳܐ ܐܰܬ݁ܺܝ ܗ̱ܘܳܐ ܠܘܳܬ݂ܗܽܘܢ ܝܶܫܽܘܥ . ܝܰܡܳܐ ܕ݁ܶܝܢ ܐܶܙܕ݁ܩܶܦ݂ ܗ̱ܘܳܐ ܥܠܰܝܗܽܘܢ . ܡܶܛܽܠ ܕ݁ܪܽܘܚܳܐ ܪܰܒ݁ܬ݂ܳܐ ܢܶܫܒ݁ܰܬ݂ ܗ̱ܘܳܬ݂ . ܘܰܕ݂ܒ݂ܰܪܘ ܐܰܝܟ݂ ܐܶܣܛܕ݂ܰܘܳܬ݂ܳܐ̈ ܥܶܣܪܺܝܢ ܘܚܰܡܫܳܐ ܂ ܐܰܘ ܬ݁ܠܳܬ݂ܺܝܢ . ܘܰܚܙܰܘ ܠܝܶܫܽܘܥ ܟ݁ܰܕ݂ ܡܗܰܠܶܟ݂ ܥܰܠ ܝܰܡܬ݂ܳܐ . ܘܟ݂ܰܕ݂ ܩܪܶܒ݂ ܠܘܳܬ݂ ܣܦ݂ܺܝܢ̱ܬ݁ܗܽܘܢ ܂ ܕ݁ܚܶܠܘ . ܗܽܘ ܕ݁ܶܝܢ ܝܶܫܽܘܥ ܐܶܡܰܪ ܠܗܽܘܢ . ܐܶܢܳܐ ܐ̱ܢܳܐ ܠܳܐ ܬ݁ܶܕ݂ܚܠܽܘܢ . ܘܰܨܒ݂ܰܘ ܗ̱ܘܰܘ ܕ݁ܰܢܩܰܒ݁ܠܽܘܢܳܝܗ̱ܝ ܒ݁ܰܣܦ݂ܺܝܢ̱ܬ݁ܳܐ . ܘܒ݂ܳܗ ܒ݁ܫܳܥܬ݂ܳܐ ܣܦ݂ܺܝܢ̱ܬ݁ܳܐ ܗܳܝ ܗܘܳܬ݂ ܠܘܳܬ݂ ܐܰܪܥܳܐ ܂ ܗܳܝ ܕ݁ܳܐܙܺܠ̱ܝܢ ܗ̱ܘܰܘ ܠܳܗ ܀ ܘܰܠܝܰܘܡܳܐ ܕ݁ܒ݂ܳܬ݂ܪܶܗ ܆ ܗܰܘ ܟ݁ܶܢܫܳܐ ܕ݁ܩܳܐܶܡ ܗ̱ܘܳܐ ܒ݁ܥܶܒ݂ܪܳܐ ܕ݁ܝܰܡܳܐ ܆ ܚܙܰܘ ܕ݁ܰܣܦ݂ܺܝܢ̱ܬ݁ܳܐ ܐ̱ܚܪܺܬ݂ܳܐ ܠܰܝܬ݁ ܗ̱ܘܳܐ ܬ݁ܰܡܳܢ ܂ ܐܶܠܳܐ ܐܶܢ ܗܳܝ ܕ݁ܰܣܠܶܩܘ ܠܳܗ ܬ݁ܰܠܡܺܝܕ݂ܶܐ̈ . ܘܰܕ݂ܠܳܐ ܥܰܠ ܗ̱ܘܳܐ ܥܰܡܗܽܘܢ ܝܶܫܽܘܥ ܥܰܡ ܬ݁ܰܠܡܺܝܕ݂ܰܘܗ̱ܝ̈ ܠܰܣܦ݂ܺܝܢ̱ܬ݁ܳܐ . ܐܶܬ݂ܰܝ̈ ܗ̱ܘܰܝ̈ ܕ݁ܶܝܢ ܐܶܠܦ݂ܶܐ̈ ܐ̱ܚܪܳܢܝܳܬ݂ܳܐ̈ ܡܶܢ ܛܒ݂ܶܪܺܝܳܘܣ ܇ ܥܰܠ ܓ݁ܶܢ̱ܒ݂ ܕ݁ܽܘܟ݁ܬ݂ܳܐ ܗܳܝ ܕ݁ܶܐܟ݂ܰܠܘ ܒ݁ܳܗ ܠܰܚܡܳܐ ܂ ܟ݁ܰܕ݂ ܒ݁ܰܪܶܟ݂ ܝܶܫܽܘܥ . ܘܟ݂ܰܕ݂ ܚܙܳܐ ܗܰܘ ܟ݁ܶܢܫܳܐ ܕ݁ܠܳܐ ܗܘܳܐ ܬ݁ܰܡܳܢ ܝܶܫܽܘܥ ܁ ܐܳܦ݂ܠܳܐ ܬ݁ܰܠܡܺܝܕ݂ܰܘܗ̱ܝ̈ ܆ ܣܠܶܩܘ ܠܗܳܠܶܝܢ ܐܶܠܦ݂ܶܐ̈ ܂ ܘܶܐܬ݂ܰܘ ܠܰܟ݂ܦ݂ܰܪܢܰܚܽܘܡ . ܘܒ݂ܳܥܶܝܢ ܗ̱ܘܰܘ ܠܶܗ ܠܝܶܫܽܘܥ . ܘܟ݂ܰܕ݂ ܐܶܫܟ݁ܚܽܘܗ̱ܝ ܒ݁ܥܶܒ݂ܪܳܐ ܕ݁ܝܰܡܳܐ ܂ ܐܳܡܪܺܝܢ ܠܶܗ . ܪܰܒ݁ܰܢ ܆ ܐܶܡܰܬ݂ܝ ܐܶܬ݂ܰܝܬ݁ ܠܗܳܪܟ݁ܳܐ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܒ݂ܳܥܶܝܢ ܐܢ̱ܬ݁ܽܘܢ ܠܺܝ ܆ ܠܳܐ ܗ̱ܘܳܐ ܡܶܛܽܠ ܕ݁ܰܚܙܰܝܬ݁ܽܘܢ ܐܳܬ݂ܘܳܬ݂ܳܐ̈ . ܐܶܠܳܐ ܕ݁ܶܐܟ݂ܰܠܬ݁ܽܘܢ ܠܰܚܡܳܐ ܘܰܣܒ݂ܰܥܬ݁ܽܘܢ . ܠܳܐ ܬ݁ܶܦ݂ܠܚܽܘܢ ܡܶܐܟ݂ܽܘܠܬ݁ܳܐ ܕ݁ܳܐܒ݂ܕ݁ܳܐ . ܐܶܠܳܐ ܡܶܐܟ݂ܽܘܠܬ݁ܳܐ ܕ݁ܰܡܩܰܘܝܳܐ ܠܚܰܝܶܐ̈ ܕ݁ܰܠܥܳܠܰܡ . ܐܰܝܕ݂ܳܐ ܕ݁ܰܒ݂ܪܶܗ ܕ݁ܐ̱ܢܳܫܳܐ ܢܶܬ݁ܶܠ ܠܟ݂ܽܘܢ . ܠܗܳܢܳܐ ܓ݁ܶܝܪ ܐܰܒ݂ܳܐ ܚܬ݂ܰܡ ܐܰܠܳܗܳܐ . ܐܳܡܪܺܝܢ ܠܶܗ . ܡܳܢܳܐ ܢܶܥܒ݁ܶܕ݂ ܕ݁ܢܶܦ݂ܠܽܘܚ ܥܒ݂ܳܕ݂ܶܐ̈ ܕ݁ܰܐܠܳܗܳܐ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܗܳܢܰܘ ܥܒ݂ܳܕ݂ܳܐ ܕ݁ܰܐܠܳܗܳܐ ܂ ܕ݁ܰܬ݂ܗܰܝܡܢܽܘܢ ܒ݁ܡܰܢ ܕ݁ܗܽܘ ܫܰܕ݁ܰܪ ܀ ܐܳܡܪܺܝܢ ܠܶܗ . ܡܳܢܳܐ ܐܳܬ݂ܳܐ ܥܳܒ݂ܶܕ݂ ܐܰܢ̱ܬ݁ ܇ ܕ݁ܢܶܚܙܶܐ ܘܰܢܗܰܝܡܶܢ ܒ݁ܳܟ݂ . ܡܳܢܳܐ ܣܳܥܰܪ ܐܰܢ̱ܬ݁ . ܐܰܒ݂ܳܗܰܝܢ̈ ܡܰܢ̱ܢܳܐ ܐܶܟ݂ܰܠܘ ܒ݁ܡܰܕ݂ܒ݁ܪܳܐ . ܐܰܝܟ݁ܰܢܳܐ ܕ݁ܰܟ݂ܬ݂ܺܝܒ݂ . ܕ݁ܠܰܚܡܳܐ ܡܶܢ ܫܡܰܝܳܐ ܂ ܝܰܗ̱ܒ݂ ܠܗܽܘܢ ܠܡܶܐܟ݂ܰܠ . ܐܳܡܰܪ ܠܗܽܘܢ ܝܶܫܽܘܥ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܠܳܐ ܗ̱ܘܳܐ ܡܽܘܫܶܐ ܝܰܗ̱ܒ݂ ܠܟ݂ܽܘܢ ܠܰܚܡܳܐ ܡܶܢ ܫܡܰܝܳܐ . ܐܶܠܳܐ ܐܳܒ݂ܝ ܝܳܗܶܒ݂ ܠܟ݂ܽܘܢ ܠܰܚܡܳܐ ܕ݁ܩܽܘܫܬ݁ܳܐ ܡܶܢ ܫܡܰܝܳܐ . ܠܰܚܡܶܗ ܓ݁ܶܝܪ ܕ݁ܰܐܠܳܗܳܐ ܐܺܝܬ݂ܰܘܗ̱ܝ ܆ ܗܰܘ ܕ݁ܰܢܚܶܬ݂ ܡܶܢ ܫܡܰܝܳܐ ܂ ܘܝܳܗܶܒ݂ ܚܰܝܶܐ̈ ܠܥܳܠܡܳܐ . ܐܳܡܪܺܝܢ ܠܶܗ . ܡܳܪܰܢ ܆ ܒ݁ܟ݂ܽܠܙܒ݂ܰܢ ܗܰܒ݂ ܠܰܢ ܠܰܚܡܳܐ ܗܳܢܳܐ ܀ ܐܳܡܰܪ ܠܗܽܘܢ ܝܶܫܽܘܥ . ܐܶܢܳܐ ܐ̱ܢܳܐ ܠܰܚܡܳܐ ܕ݁ܚܰܝܶܐ̈ ܀ ܡܰܢ ܕ݁ܳܐܬ݂ܶܐ ܠܘܳܬ݂ܝ ܠܳܐ ܢܶܟ݂ܦ݁ܰܢ . ܘܡܰܢ ܕ݁ܰܡܗܰܝܡܶܢ ܒ݁ܺܝ ܂ ܠܳܐ ܢܶܨܗܶܐ ܠܥܳܠܰܡ . ܐܶܠܳܐ ܐܶܡܪܶܬ݂ ܠܟ݂ܽܘܢ ܆ ܕ݁ܰܚܙܰܝܬ݁ܽܘܢܳܢܝ ܘܠܳܐ ܡܗܰܝܡܢܺܝܢ ܐܢ̱ܬ݁ܽܘܢ . ܟ݁ܽܠ ܕ݁ܝܰܗ̱ܒ݂ ܠܺܝ ܐܳܒ݂ܝ ܂ ܠܘܳܬ݂ܝ ܢܺܐܬ݂ܶܐ . ܘܡܰܢ ܕ݁ܰܠܘܳܬ݂ܝ ܢܺܐܬ݂ܶܐ ܂ ܠܳܐ ܐܰܦ݁ܩܶܗ ܠܒ݂ܰܪ . ܕ݁ܢܶܚܬ݁ܶܬ݂ ܡܶܢ ܫܡܰܝܳܐ ܂ ܠܳܐ ܗ̱ܘܳܐ ܕ݁ܶܐܥܒ݁ܶܕ݂ ܨܶܒ݂ܝܳܢܝ . ܐܶܠܳܐ ܕ݁ܶܐܥܒ݁ܶܕ݂ ܨܶܒ݂ܝܳܢܶܗ ܕ݁ܡܰܢ ܕ݁ܫܰܕ݁ܪܰܢܝ ܀ ܗܳܢܰܘ ܕ݁ܶܝܢ ܨܶܒ݂ܝܳܢܶܗ ܕ݁ܡܰܢ ܕ݁ܫܰܕ݁ܪܰܢܝ ܆ ܕ݁ܟ݂ܽܠ ܕ݁ܝܰܗ̱ܒ݂ ܠܺܝ ܂ ܠܳܐ ܐܰܘܒ݁ܶܕ݂ ܡܶܢܶܗ . ܐܶܠܳܐ ܐܰܩܺܝܡܺܝܘܗ̱ܝ ܒ݁ܝܰܘܡܳܐ ܐ̱ܚܪܳܝܳܐ . ܗܳܢܰܘ ܓ݁ܶܝܪ ܨܶܒ݂ܝܳܢܶܗ ܕ݁ܳܐܒ݂ܝ . ܕ݁ܟ݂ܽܠ ܕ݁ܚܳܙܶܐ ܠܰܒ݂ܪܳܐ ܘܰܡܗܰܝܡܶܢ ܒ݁ܶܗ ܆ ܢܶܗܘܽܘܢ ܠܶܗ ܚܰܝܶܐ̈ ܕ݁ܰܠܥܳܠܰܡ . ܘܶܐܢܳܐ ܐܰܩܺܝܡܺܝܘܗ̱ܝ ܒ݁ܝܰܘܡܳܐ ܐ̱ܚܪܳܝܳܐ ܀ ܝܺܗܽܘܕ݂ܳܝܶܐ̈ ܕ݁ܶܝܢ ܪܳܛܢܺܝܢ ܗ̱ܘܰܘ ܥܠܰܘܗ̱ܝ ܇ ܕ݁ܶܐܡܰܪ ܕ݁ܶܐܢܳܐ ܐ̱ܢܳܐ ܠܰܚܡܳܐ ܕ݁ܢܶܚܬ݁ܶܬ݂ ܡܶܢ ܫܡܰܝܳܐ . ܘܳܐܡܪܺܝܢ ܗ̱ܘܰܘ . ܠܳܐ ܗ̱ܘܳܐ ܗܳܢܳܐ ܝܶܫܽܘܥ ܁ ܒ݁ܪܶܗ ܕ݁ܝܰܘܣܶܦ݂ . ܗܰܘ ܕ݁ܰܚܢܰܢ ܝܳܕ݂ܥܺܝܢ ܠܰܐܒ݂ܽܘܗ̱ܝ ܘܠܶܐܡܶܗ . ܘܰܐܝܟ݁ܰܢܳܐ ܐܳܡܰܪ ܗܳܢܳܐ ܕ݁ܡܶܢ ܫܡܰܝܳܐ ܢܶܚܬ݁ܶܬ݂ ܀ ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܠܳܐ ܬ݁ܶܪܛܢܽܘܢ ܚܰܕ݂ ܥܰܡ ܚܰܕ݂ . ܠܳܐ ܐ̱ܢܳܫ ܡܶܫܟ݁ܰܚ ܕ݁ܢܺܐܬ݂ܶܐ ܠܘܳܬ݂ܝ ܇ ܐܶܠܳܐ ܐܶܢ ܢܰܓ݂ܕ݁ܶܗ ܐܰܒ݂ܳܐ ܕ݁ܫܰܕ݁ܪܰܢܝ . ܘܶܐܢܳܐ ܐܰܩܺܝܡܺܝܘܗ̱ܝ ܂ ܒ݁ܝܰܘܡܳܐ ܐ̱ܚܪܳܝܳܐ . ܟ݁ܬ݂ܺܝܒ݂ ܓ݁ܶܝܪ ܒ݁ܰܢܒ݂ܺܝܳܐ ܆ ܕ݁ܢܶܗܘܽܘܢ ܟ݁ܽܠܗܽܘܢ ܡܰܠܦ݂ܶܐ̈ ܕ݁ܰܐܠܳܗܳܐ . ܟ݁ܽܠ ܡܰܢ ܕ݁ܫܳܡܰܥ ܗܳܟ݂ܺܝܠ ܡܶܢ ܐܰܒ݂ܳܐ ܘܝܳܠܶܦ݂ ܡܶܢܶܗ ܂ ܐܳܬ݂ܶܐ ܠܘܳܬ݂ܝ . ܠܳܐ ܗ̱ܘܳܐ ܕ݁ܚܳܙܶܐ ܐ̱ܢܳܫ ܠܰܐܒ݂ܳܐ . ܐܶܠܳܐ ܡܰܢ ܕ݁ܡܶܢ ܐܰܠܳܗܳܐ ܐܺܝܬ݂ܰܘܗ̱ܝ ܂ ܗܰܘ ܗ̱ܽܘ ܚܳܙܶܐ ܠܰܐܒ݂ܳܐ ܀ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܰܡܗܰܝܡܶܢ ܒ݁ܺܝ ܁ ܐܺܝܬ݂ ܠܶܗ ܚܰܝܶܐ̈ ܕ݁ܰܠܥܳܠܰܡ ܀ ܐܶܢܳܐ ܐ̱ܢܳܐ ܠܰܚܡܳܐ ܕ݁ܚܰܝܶܐ̈ . ܐܰܒ݂ܳܗܰܝܟ݁ܽܘܢ̈ ܐܶܟ݂ܰܠܘ ܡܰܢ̱ܢܳܐ ܒ݁ܡܰܕ݂ܒ݁ܪܳܐ ܂ ܘܡܺܝܬ݂ܘ . ܗܳܢܰܘ ܕ݁ܶܝܢ ܠܰܚܡܳܐ ܕ݁ܰܢܚܶܬ݂ ܡܶܢ ܫܡܰܝܳܐ ܆ ܕ݁ܢܶܐܟ݂ܽܘܠ ܐ̱ܢܳܫ ܡܶܢܶܗ ܂ ܘܠܳܐ ܢܡܽܘܬ݂ . ܐܶܢܳܐ ܐ̱ܢܳܐ ܠܰܚܡܳܐ ܚܰܝܳܐ ܂ ܕ݁ܡܶܢ ܫܡܰܝܳܐ ܢܶܚܬ݁ܶܬ݂ . ܘܶܐܢ ܐ̱ܢܳܫ ܢܶܐܟ݂ܽܘܠ ܡܶܢ ܗܳܢܳܐ ܠܰܚܡܳܐ ܢܺܚܶܐ ܠܥܳܠܰܡ . ܘܠܰܚܡܳܐ ܐܰܝܢܳܐ ܕ݁ܶܐܢܳܐ ܐܶܬ݁ܶܠ ܆ ܦ݁ܰܓ݂ܪܝ ܗ̱ܽܘ ܂ ܕ݁ܥܰܠ ܐܰܦ݁ܰܝ̈ ܚܰܝܰܘܗ̱ܝ̈ ܕ݁ܥܳܠܡܳܐ ܝܳܗܶܒ݂ ܐ̱ܢܳܐ ܀ ܢܳܨܶܝܢ ܗ̱ܘܰܘ ܕ݁ܶܝܢ ܝܺܗܽܘܕ݂ܳܝܶܐ̈ ܚܰܕ݂ ܥܰܡ ܚܰܕ݂ ܂ ܘܳܐܡܪܺܝܢ . ܐܰܝܟ݁ܰܢܳܐ ܡܶܫܟ݁ܰܚ ܗܳܢܳܐ ܦ݁ܰܓ݂ܪܶܗ ܕ݁ܢܶܬ݁ܶܠ ܠܰܢ ܠܡܶܐܟ݂ܰܠ . ܘܶܐܡܰܪ ܠܗܽܘܢ ܝܶܫܽܘܥ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܶܐܠܳܐ ܬ݁ܶܐܟ݂ܠܽܘܢ ܦ݁ܰܓ݂ܪܶܗ ܕ݁ܰܒ݂ܪܶܗ ܕ݁ܐ̱ܢܳܫܳܐ ܁ ܘܬ݂ܶܫܬ݁ܽܘܢ ܕ݁ܡܶܗ ܆ ܠܰܝܬ݁ ܠܟ݂ܽܘܢ ܚܰܝܶܐ̈ ܒ݁ܰܩܢܽܘܡܟ݂ܽܘܢ . ܡܰܢ ܕ݁ܳܐܟ݂ܶܠ ܕ݁ܶܝܢ ܡܶܢ ܦ݁ܰܓ݂ܪܝ ܁ ܘܫܳܬ݂ܶܐ ܡܶܢ ܕ݁ܶܡܝ ܆ ܐܺܝܬ݂ ܠܶܗ ܚܰܝܶܐ̈ ܕ݁ܰܠܥܳܠܰܡ . ܘܶܐܢܳܐ ܐܰܩܺܝܡܺܝܘܗ̱ܝ ܒ݁ܝܰܘܡܳܐ ܐ̱ܚܪܳܝܳܐ ܀ ܦ݁ܰܓ݂ܪܝ ܓ݁ܶܝܪ ܂ ܫܰܪܺܝܪܳܐܝܺܬ݂ ܐܺܝܬ݂ܰܘܗ̱ܝ ܡܶܐܟ݂ܽܘܠܬ݁ܳܐ . ܘܕ݂ܶܡܝ ܂ ܫܰܪܺܝܪܳܐܝܺܬ݂ ܐܺܝܬ݂ܰܘܗ̱ܝ ܡܰܫܬ݁ܝܳܐ . ܡܰܢ ܕ݁ܳܐܟ݂ܶܠ ܦ݁ܰܓ݂ܪܝ ܁ ܘܫܳܬ݂ܶܐ ܕ݁ܶܡܝ ܆ ܒ݁ܺܝ ܡܩܰܘܶܐ ܂ ܘܶܐܢܳܐ ܒ݁ܶܗ . ܐܰܝܟ݁ܰܢܳܐ ܕ݁ܫܰܕ݁ܪܰܢܝ ܐܰܒ݂ܳܐ ܚܰܝܳܐ . ܘܶܐܢܳܐ ܚܰܝ ܐ̱ܢܳܐ ܡܶܛܽܠ ܐܰܒ݂ܳܐ . ܘܡܰܢ ܕ݁ܢܶܐܟ݂ܠܰܢܝ ܁ ܐܳܦ݂ ܗܽܘ ܢܺܚܶܐ ܡܶܛܽܠܳܬ݂ܝ . ܗܳܢܰܘ ܠܰܚܡܳܐ ܕ݁ܰܢܚܶܬ݂ ܡܶܢ ܫܡܰܝܳܐ . ܠܳܐ ܗ̱ܘܳܐ ܐܰܝܟ݂ ܕ݁ܶܐܟ݂ܰܠܘ ܐܰܒ݂ܳܗܰܝܟ݁ܽܘܢ̈ ܡܰܢ̱ܢܳܐ ܂ ܘܡܺܝܬ݂ܘ . ܡܰܢ ܕ݁ܳܐܟ݂ܶܠ ܗܳܢܳܐ ܠܰܚܡܳܐ ܁ ܢܺܚܶܐ ܠܥܳܠܰܡ ܀܀ ܗܳܠܶܝܢ ܐܶܡܰܪ ܒ݁ܰܟ݂ܢܽܘܫܬ݁ܳܐ ܂ ܟ݁ܰܕ݂ ܡܰܠܶܦ݂ ܒ݁ܰܟ݂ܦ݂ܰܪܢܰܚܽܘܡ . ܘܣܰܓ݁ܺܝܶܐܐ̈ ܕ݁ܰܫܡܰܥܘ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܂ ܐܳܡܪܺܝܢ . ܩܰܫܝܳܐ ܗ̱ܝ ܡܶܠܬ݂ܳܐ ܗܳܕ݂ܶܐ . ܡܰܢܽܘ ܡܶܫܟ݁ܰܚ ܠܡܶܫܡܥܳܗ ܀.܀.܀܀ ܝܶܫܽܘܥ ܕ݁ܶܝܢ ܁ ܝܺܕ݂ܰܥ ܒ݁ܢܰܦ݂ܫܶܗ ܕ݁ܪܳܛܢܺܝܢ ܥܰܠ ܗܳܕ݂ܶܐ ܬ݁ܰܠܡܺܝܕ݂ܰܘܗ̱ܝ̈ ܂ ܘܶܐܡܰܪ ܠܗܽܘܢ . ܗܳܕ݂ܶܐ ܡܰܟ݂ܫܠܳܐ ܠܟ݂ܽܘܢ . ܐܶܢ ܬ݁ܶܚܙܽܘܢ ܗܳܟ݂ܺܝܠ ܠܰܒ݂ܪܶܗ ܕ݁ܐ̱ܢܳܫܳܐ ܕ݁ܣܳܠܶܩ ܠܰܐܬ݂ܰܪ ܕ݁ܺܐܝܬ݂ܰܘܗ̱ܝ ܗ̱ܘܳܐ ܡܶܢ ܩܕ݂ܺܝܡ ܀ ܪܽܘܚܳܐ ܗ̱ܝ ܕ݁ܡܰܚܝܳܐ . ܦ݁ܰܓ݂ܪܳܐ ܂ ܠܳܐ ܡܰܗܢܶܐ ܡܶܕ݁ܶܡ . ܡܶܠܶܐ̈ ܕ݁ܶܐܢܳܐ ܡܰܠܠܶܬ݂ ܥܰܡܟ݂ܽܘܢ ܆ ܪܽܘܚܳܐ ܐܶܢܶܝܢ̈ ܂ ܘܚܰܝܶܐ̈ ܐܶܢܶܝܢ̈ ܀ ܐܶܠܳܐ ܐܺܝܬ݂ ܐ̱ܢܳܫܳܐ ܡܶܢܟ݂ܽܘܢ ܂ ܕ݁ܠܳܐ ܡܗܰܝܡܢܺܝܢ . ܝܳܕ݂ܰܥ ܗ̱ܘܳܐ ܓ݁ܶܝܪ ܝܶܫܽܘܥ ܡܶܢ ܩܕ݂ܺܝܡ ܂ ܡܰܢ ܐܶܢܽܘܢ ܐܰܝܠܶܝܢ ܕ݁ܠܳܐ ܡܗܰܝܡܢܺܝܢ ܇ ܘܡܰܢܽܘ ܗܰܘ ܕ݁ܡܰܫܠܶܡ ܠܶܗ . ܘܶܐܡܰܪ ܗ̱ܘܳܐ ܠܗܽܘܢ . ܡܶܛܽܠ ܗܳܢܳܐ ܐܶܡܪܶܬ݂ ܠܟ݂ܽܘܢ : ܕ݁ܠܳܐ ܐ̱ܢܳܫ ܡܶܫܟ݁ܰܚ ܕ݁ܢܺܐܬ݂ܶܐ ܠܘܳܬ݂ܝ ܇ ܐܶܠܳܐ ܝܺܗܺܝܒ݂ ܠܶܗ ܡܶܢ ܐܳܒ݂ܝ . ܡܶܛܽܠ ܗܳܕ݂ܶܐ ܡܶܠܬ݂ܳܐ ܆ ܣܰܓ݁ܺܝܶܐܐ̈ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܐܶܙܰܠܘ ܠܒ݂ܶܣܬ݁ܰܪܗܽܘܢ ܂ ܘܠܳܐ ܡܗܰܠܟ݂ܺܝܢ ܗ̱ܘܰܘ ܥܰܡܶܗ . ܘܶܐܡܰܪ ܝܶܫܽܘܥ ܠܰܬ݂ܪܶܥܣܰܪܬ݁ܶܗ . ܠܡܳܐ ܇ ܐܳܦ݂ ܐܰܢ̱ܬ݁ܽܘܢ ܨܳܒ݂ܶܝܢ ܐܢ̱ܬ݁ܽܘܢ ܠܡܺܐܙܰܠ ܀ ܥܢܳܐ ܫܶܡܥܽܘܢ ܟ݁ܺܐܦ݂ܳܐ ܂ ܘܶܐܡܰܪ . ܡܳܪܝ ܂ ܠܘܳܬ݂ ܡܰܢ ܢܺܐܙܰܠ . ܡܶܠܶܐ̈ ܕ݁ܚܰܝܶܐ̈ ܕ݁ܰܠܥܳܠܰܡ ܐܺܝܬ݂ ܠܳܟ݂ . ܘܰܚܢܰܢ ܗܰܝܡܶܢܢ ܘܺܝܕ݂ܰܥܢ ܆ ܕ݁ܰܐܢ̱ܬ݁ ܗ̱ܽܘ ܡܫܺܝܚܳܐ ܂ ܒ݁ܪܶܗ ܕ݁ܰܐܠܳܗܳܐ ܚܰܝܳܐ ܀ ܐܳܡܰܪ ܠܗܽܘܢ ܝܶܫܽܘܥ . ܠܳܐ ܗ̱ܘܳܐ ܐܶܢܳܐ ܓ݁ܒ݂ܺܝܬ݂ܟ݂ܽܘܢ ܠܰܬ݂ܪܶܥܣܰܪ ܆ ܘܡܶܢܟ݂ܽܘܢ ܚܰܕ݂ ܣܳܛܳܢܳܐ ܗܽܘ . ܐܶܡܰܪ ܗ̱ܘܳܐ ܕ݁ܶܝܢ ܂ ܥܰܠ ܝܺܗܽܘܕ݂ܳܐ ܒ݁ܰܪ ܫܶܡܥܽܘܢ ܣܟ݂ܰܪܝܽܘܛܳܐ . ܗܽܘ ܓ݁ܶܝܪ ܥܬ݂ܺܝܕ݂ ܗ̱ܘܳܐ ܕ݁ܢܰܫܠܡܺܝܘܗ̱ܝ ܂ ܚܰܕ݂ ܡܶܢ ܬ݁ܪܶܥܣܰܪ ܀ Chapter 7 ܒ݁ܳܬ݂ܰܪ ܗܳܠܶܝܢ ܂ ܡܗܰܠܶܟ݂ ܗ̱ܘܳܐ ܝܶܫܽܘܥ ܒ݁ܰܓ݂ܠܺܝܠܳܐ . ܠܳܐ ܓ݁ܶܝܪ ܨܳܒ݂ܶܐ ܗ̱ܘܳܐ ܠܰܡܗܰܠܳܟ݂ܽܘ ܒ݁ܺܝܗܽܘܕ݂ ܆ ܡܶܛܽܠ ܕ݁ܺܝܗܽܘܕ݂ܳܝܶܐ̈ ܒ݁ܳܥܶܝܢ ܗ̱ܘܰܘ ܠܡܶܩܛܠܶܗ ܀ ܘܩܰܪܺܝܒ݂ ܗ̱ܘܳܐ ܥܰܕ݂ܥܺܕ݂ܳܐ ܕ݁ܰܡܛܰܠܶܐ̈ ܕ݁ܺܝܗܽܘܕ݂ܳܝܶܐ̈ . ܘܶܐܡܰܪܘ ܠܶܗ ܐܰܚܰܘܗ̱ܝ̈ ܠܝܶܫܽܘܥ . ܫܰܢܳܐ ܠܳܟ݂ ܡܶܟ݁ܳܐ ܂ ܘܙܶܠ ܠܺܝܗܽܘܕ݂ . ܕ݁ܢܶܚܙܽܘܢ ܬ݁ܰܠܡܺܝܕ݂ܰܝܟ݁̈ ܥܒ݂ܳܕ݂ܶܐ̈ ܕ݁ܥܳܒ݂ܶܕ݂ ܐܰܢ̱ܬ݁ . ܠܰܝܬ݁ ܓ݁ܶܝܪ ܐ̱ܢܳܫ ܕ݁ܥܳܒ݂ܶܕ݂ ܡܶܕ݁ܶܡ ܒ݁ܛܽܘܫܝܳܐ ܇ ܘܨܳܒ݂ܶܐ ܗܽܘ ܕ݁ܰܒ݂ܓ݂ܶܠܝܳܐ ܢܶܗܘܶܐ . ܐܶܢ ܗܳܠܶܝܢ ܥܳܒ݂ܶܕ݂ ܐܰܢ̱ܬ݁ ܂ ܚܰܘܳܐ ܢܰܦ݂ܫܳܟ݂ ܠܥܳܠܡܳܐ . ܐܳܦ݂ ܠܳܐ ܓ݁ܶܝܪ ܐܰܚܰܘܗ̱ܝ̈ ܗܰܝܡܶܢܘ ܗ̱ܘܰܘ ܒ݁ܶܗ ܒ݁ܝܶܫܽܘܥ . ܐܳܡܰܪ ܠܗܽܘܢ ܝܶܫܽܘܥ . ܙܰܒ݂ܢܝ ܕ݁ܺܝܠܝ ܇ ܥܕ݂ܰܡܳܐ ܠܗܳܫܳܐ ܠܳܐ ܡܛܳܐ . ܙܰܒ݂ܢܟ݂ܽܘܢ ܕ݁ܶܝܢ ܕ݁ܺܝܠܟ݂ܽܘܢ ܂ ܒ݁ܟ݂ܽܠ ܥܶܕ݁ܳܢ ܡܛܰܝܰܒ݂ . ܠܳܐ ܡܶܫܟ݁ܰܚ ܥܳܠܡܳܐ ܠܡܶܣܢܳܟ݂ܽܘܢ . ܠܺܝ ܕ݁ܶܝܢ ܂ ܣܳܢܶܐ . ܡܶܛܽܠ ܕ݁ܶܐܢܳܐ ܡܰܣܗܶܕ݂ ܐ̱ܢܳܐ ܥܠܰܘܗ̱ܝ ܆ ܕ݁ܰܥܒ݂ܳܕ݂ܰܘܗ̱ܝ̈ ܒ݁ܺܝܫܺܝܢ̈ ܐܶܢܽܘܢ . ܐܰܢ̱ܬ݁ܽܘܢ ܣܰܩܘ ܠܥܰܕ݂ܥܺܕ݂ܳܐ ܗܳܢܳܐ . ܐܶܢܳܐ ܠܳܐ ܣܳܠܶܩ ܐ̱ܢܳܐ ܗܳܫܳܐ ܠܥܰܕ݂ܥܺܕ݂ܳܐ ܗܳܢܳܐ . ܡܶܛܽܠ ܕ݁ܙܰܒ݂ܢܳܐ ܕ݁ܺܝܠܝ ܠܳܐ ܥܕ݂ܰܟ݁ܺܝܠ ܫܠܶܡ . ܗܳܠܶܝܢ ܐܶܡܰܪ ܂ ܘܦ݂ܳܫ ܠܶܗ ܒ݁ܰܓ݂ܠܺܝܠܳܐ . ܟ݁ܰܕ݂ ܕ݁ܶܝܢ ܣܠܶܩܘ ܐܰܚܰܘܗ̱ܝ̈ ܠܥܰܕ݂ܥܺܕ݂ܳܐ ܆ ܗܳܝܕ݁ܶܝܢ ܐܳܦ݂ ܗܽܘ ܣܠܶܩ . ܠܳܐ ܒ݁ܓ݂ܶܠܝܳܐ ܁ ܐܶܠܳܐ ܐܰܝܟ݂ ܕ݁ܰܒ݂ܛܽܘܫܝܳܐ . ܝܺܗܽܘܕ݂ܳܝܶܐ̈ ܕ݁ܶܝܢ ܒ݁ܳܥܶܝܢ ܗ̱ܘܰܘ ܠܶܗ ܒ݁ܥܰܕ݂ܥܺܕ݂ܳܐ . ܘܳܐܡܪܺܝܢ ܗ̱ܘܰܘ ܂ ܐܰܝܟ݁ܰܘ ܗܰܘ . ܘܪܶܛܢܳܐ ܣܰܓ݁ܺܝܳܐܐ ܡܶܛܽܠܳܬ݂ܶܗ ܐܺܝܬ݂ ܗ̱ܘܳܐ ܒ݁ܟ݂ܶܢܫܳܐ . ܐܺܝܬ݂ ܗ̱ܘܰܘ ܓ݁ܶܝܪ ܕ݁ܳܐܡܪܺܝܢ ܂ ܕ݁ܛܳܒ݂ ܗ̱ܽܘ . ܘܰܐ̱ܚܪܳܢܶܐ̈ ܐܳܡܪܺܝܢ ܗ̱ܘܰܘ ܂ ܠܳܐ . ܐܶܠܳܐ ܡܰܛܥܶܐ ܠܥܰܡܳܐ . ܠܳܐ ܕ݁ܶܝܢ ܐ̱ܢܳܫ ܓ݁ܰܠܝܳܐܝܺܬ݂ ܡܡܰܠܶܠ ܗ̱ܘܳܐ ܥܠܰܘܗ̱ܝ ܇ ܡܶܛܽܠ ܕ݁ܶܚܠܬ݂ܳܐ ܕ݁ܺܝܗܽܘܕ݂ܳܝܶܐ̈ . ܟ݁ܰܕ݂ ܕ݁ܶܝܢ ܦ݁ܠܰܓ݂ܘ ܝܰܘܡܳܬ݂ܳܐ̈ ܕ݁ܥܰܕ݂ܥܺܕ݂ܳܐ ܆ ܣܠܶܩ ܝܶܫܽܘܥ ܠܗܰܝܟ݁ܠܳܐ ܂ ܘܡܰܠܶܦ݂ ܗ̱ܘܳܐ . ܘܡܶܬ݁ܕ݁ܰܡܪܺܝܢ ܗ̱ܘܰܘ ܝܺܗܽܘܕ݂ܳܝܶܐ̈ ܂ ܘܳܐܡܪܺܝܢ . ܐܰܝܟ݁ܰܢܳܐ ܝܳܕ݂ܰܥ ܗܳܢܳܐ ܣܶܦ݂ܪܳܐ ܂ ܟ݁ܰܕ݂ ܠܳܐ ܝܺܠܶܦ݂ . ܥܢܳܐ ܝܶܫܽܘܥ ܂ ܘܶܐܡܰܪ . ܝܽܘܠܦ݁ܳܢܝ ܠܳܐ ܗܘܳܐ ܕ݁ܺܝܠܝ . ܐܶܠܳܐ ܕ݁ܗܰܘ ܕ݁ܫܰܕ݁ܪܰܢܝ . ܡܰܢ ܕ݁ܨܳܒ݂ܶܐ ܕ݁ܢܶܥܒ݁ܶܕ݂ ܨܶܒ݂ܝܳܢܶܗ ܆ ܡܶܣܬ݁ܰܟ݁ܰܠ ܝܽܘܠܦ݁ܳܢܝ ܐܶܢ ܡܶܢ ܐܰܠܳܗܳܐ ܗܽܘ ܇ ܐܰܘ ܐܶܢܳܐ ܡܶܢ ܨܒ݂ܽܘܬ݂ ܢܰܦ݂ܫܝ ܡܡܰܠܶܠ ܐ̱ܢܳܐ . ܡܰܢ ܕ݁ܡܶܢ ܨܒ݂ܽܘܬ݂ ܪܶܥܝܳܢܶܗ ܡܡܰܠܶܠ ܆ ܫܽܘܒ݂ܚܳܐ ܠܢܰܦ݂ܫܶܗ ܒ݁ܳܥܶܐ . ܗܰܘ ܕ݁ܶܝܢ ܕ݁ܫܽܘܒ݂ܚܳܐ ܕ݁ܡܰܢ ܕ݁ܫܰܕ݁ܪܶܗ ܒ݁ܳܥܶܐ ܂ ܫܰܪܺܝܪ ܗ̱ܽܘ . ܘܥܰܘܠܳܐ ܒ݁ܠܶܒ݁ܶܗ ܠܳܐ ܐܺܝܬ݂ . ܠܳܐ ܗ̱ܘܳܐ ܡܽܘܫܶܐ ܝܰܗ̱ܒ݂ ܠܟ݂ܽܘܢ ܢܳܡܽܘܣܳܐ ܆ ܘܠܳܐ ܐ̱ܢܳܫ ܡܶܢܟ݂ܽܘܢ ܢܳܛܰܪ ܢܳܡܽܘܣܳܐ . ܡܳܢܳܐ ܒ݁ܳܥܶܝܢ ܐܢ̱ܬ݁ܽܘܢ ܠܡܶܩܛܠܰܢܝ . ܥܢܳܐ ܟ݁ܶܢܫܳܐ ܂ ܘܳܐܡܪܺܝܢ . ܕ݁ܰܝܘܳܐ ܐܺܝܬ݂ ܠܳܟ݂ . ܡܰܢܽܘ ܒ݁ܳܥܶܐ ܠܡܶܩܛܠܳܟ݂ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܚܰܕ݂ ܥܒ݂ܳܕ݂ܳܐ ܥܶܒ݂ܕ݁ܶܬ݂ ܂ ܘܟ݂ܽܠܟ݂ܽܘܢ ܡܶܬ݁ܕ݁ܰܡܪܺܝܢ ܐܢ̱ܬ݁ܽܘܢ . ܡܶܛܽܠ ܗܳܢܳܐ ܡܽܘܫܶܐ ܝܰܗ̱ܒ݂ ܠܟ݂ܽܘܢ ܓ݁ܙܽܘܪܬ݁ܳܐ . ܠܳܐ ܗ̱ܘܳܐ ܡܶܛܽܠ ܕ݁ܡܶܢܶܗ ܗ̱ܝ ܡܶܢ ܡܽܘܫܶܐ . ܐܶܠܳܐ ܕ݁ܡܶܢ ܐܰܒ݂ܳܗܳܬ݂ܳܐ̈ ܗ̱ܝ ܇ ܘܰܒ݂ܫܰܒ݁ܬ݂ܳܐ ܓ݁ܳܙܪܺܝܢ ܐܢ̱ܬ݁ܽܘܢ ܒ݁ܰܪܢܳܫܳܐ . ܐܶܢ ܒ݁ܰܪܢܳܫܳܐ ܡܶܬ݂ܓ݁ܙܰܪ ܒ݁ܝܰܘܡܳܐ ܕ݁ܫܰܒ݁ܬ݂ܳܐ . ܡܶܛܽܠ ܕ݁ܠܳܐ ܢܶܫܬ݁ܪܶܐ ܢܳܡܽܘܣܳܐ ܕ݁ܡܽܘܫܶܐ : ܥܠܰܝ ܪܳܛܢܺܝܢ ܐܢ̱ܬ݁ܽܘܢ ܆ ܕ݁ܟ݂ܽܠܶܗ ܒ݁ܰܪܢܳܫܳܐ ܐܰܚܠܡܶܬ݂ ܒ݁ܝܰܘܡܳܐ ܕ݁ܫܰܒ݁ܬ݂ܳܐ ܆ ܠܳܐ ܬ݁ܶܗܘܽܘܢ ܕ݁ܳܝܢܺܝܢ ܒ݁ܡܰܣܰܒ݂ ܒ݁ܰܐܦ݁ܶܐ̈ . ܐܶܠܳܐ ܕ݁ܺܝܢܳܐ ܟ݁ܺܐܢܳܐ ܕ݁ܽܘܢܘ ܀ ܘܳܐܡܪܺܝܢ ܗ̱ܘܰܘ ܐ̱ܢܳܫܳܐ ܡܶܢ ܐܽܘܪܺܫܠܶܡ . ܠܰܘ ܗܳܢܰܘ ܗܰܘ ܕ݁ܒ݂ܳܥܶܝܢ ܠܡܶܩܛܰܠ ܆ ܘܗܳܐ ܓ݁ܰܠܝܳܐܝܺܬ݂ ܡܡܰܠܶܠ ܇ ܘܡܶܕ݁ܶܡ ܠܳܐ ܐܳܡܪܺܝܢ ܠܶܗ . ܕ݁ܰܠܡܳܐ ܝܺܕ݂ܰܥܘ ܩܰܫܺܝܫܰܝܢ̈ ܕ݁ܗܳܢܰܘ ܫܰܪܺܝܪܳܐܝܺܬ݂ ܡܫܺܝܚܳܐ ܆ ܐܶܠܳܐ ܠܗܳܢܳܐ ܝܳܕ݂ܥܺܝܢ ܚ̱ܢܰܢ ܂ ܡܶܢ ܐܰܝܡܶܟ݁ܳܐ ܗܽܘ . ܡܫܺܝܚܳܐ ܕ݁ܶܝܢ ܐܶܡܰܬ݂ܝ ܕ݁ܳܐܬ݂ܶܐ ܇ ܠܳܐ ܐ̱ܢܳܫ ܝܳܕ݂ܰܥ ܡܶܢ ܐܰܝܡܶܟ݁ܳܐ ܗܽܘ ܀ ܘܰܐܪܺܝܡ ܝܶܫܽܘܥ ܩܳܠܶܗ ܟ݁ܰܕ݂ ܡܰܠܶܦ݂ ܒ݁ܗܰܝܟ݁ܠܳܐ ܂ ܘܶܐܡܰܪ . ܘܠܺܝ ܝܳܕ݂ܥܺܝܢ ܐܢ̱ܬ݁ܽܘܢ . ܘܡܶܢ ܐܰܝܡܶܟ݁ܳܐ ܐ̱ܢܳܐ ܂ ܝܳܕ݂ܥܺܝܢ ܐܢ̱ܬ݁ܽܘܢ . ܘܡܶܢ ܨܒ݂ܽܘܬ݂ ܢܰܦ݂ܫܝ ܠܳܐ ܐܶܬ݂ܺܝܬ݂ . ܐܶܠܳܐ ܫܰܪܺܝܪ ܗ̱ܽܘ ܡܰܢ ܕ݁ܫܰܕ݁ܪܰܢܝ . ܗܰܘ ܕ݁ܰܐܢ̱ܬ݁ܽܘܢ ܂ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ . ܐܶܢܳܐ ܕ݁ܶܝܢ ܝܳܕ݂ܰܥ ܐ̱ܢܳܐ ܠܶܗ . ܕ݁ܡܶܢ ܠܘܳܬ݂ܶܗ ܐܶܢܳܐ ܂ ܘܗܽܘ ܫܰܕ݁ܪܰܢܝ ܀ ܘܰܒ݂ܥܰܘ ܠܡܶܐܚܕ݁ܶܗ . ܘܠܳܐ ܐ̱ܢܳܫ ܐܰܪܡܺܝ ܥܠܰܘܗ̱ܝ ܐܺܝܕ݂ܰܝܳܐ̈ ܆ ܡܶܛܽܠ ܕ݁ܠܳܐ ܥܕ݂ܰܟ݁ܺܝܠ ܐܶܬ݂ܳܬ݂ ܗ̱ܘܳܬ݂ ܫܳܥܬ݂ܶܗ ܀ ܣܰܓ݁ܺܝܶܐܐ̈ ܕ݁ܶܝܢ ܡܶܢ ܟ݁ܶܢܫܳܐ ܗܰܝܡܶܢܘ ܒ݁ܶܗ ܂ ܘܳܐܡܪܺܝܢ . ܡܫܺܝܚܳܐ ܡܳܐ ܕ݁ܳܐܬ݂ܶܐ : ܠܡܳܐ ܆ ܕ݁ܝܰܬ݁ܺܝܪܳܢ̈ ܡܶܢ ܗܳܠܶܝܢ ܐܳܬ݂ܘܳܬ݂ܳܐ̈ ܕ݁ܥܳܒ݂ܶܕ݂ ܗܳܢܳܐ ܥܳܒ݂ܶܕ݂ ܆ ܘܰܫܡܰܥܘ ܦ݁ܪܺܝܫܶܐ̈ ܠܟ݂ܶܢܫܶܐ̈ ܕ݁ܰܡܡܰܠܠܺܝܢ ܥܠܰܘܗ̱ܝ ܗܳܠܶܝܢ . ܘܫܰܕ݁ܰܪܘ ܗܶܢܽܘܢ ܘܪܰܒ݁ܰܝ̈ ܟ݁ܳܗܢܶܐ̈ ܕ݁ܰܚܫܶܐ̈ ܕ݁ܢܶܐܚܕ݁ܽܘܢܳܝܗ̱ܝ ܀ ܘܶܐܡܰܪ ܝܶܫܽܘܥ . ܩܰܠܺܝܠ ܬ݁ܽܘܒ݂ ܙܰܒ݂ܢܳܐ ܥܰܡܟ݂ܽܘܢ ܐܶܢܳܐ . ܘܳܐܙܶܠ ܐ̱ܢܳܐ ܠܘܳܬ݂ ܡܰܢ ܕ݁ܫܰܕ݁ܪܰܢܝ . ܘܬ݂ܶܒ݂ܥܽܘܢܳܢܝ ܂ ܘܠܳܐ ܬ݁ܶܫܟ݁ܚܽܘܢܳܢܝ . ܘܰܐܝܟ݁ܳܐ ܕ݁ܶܐܢܳܐ ܐܺܝܬ݂ܰܝ ܂ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܬ݂ܳܐ . ܐܳܡܪܺܝܢ ܝܺܗܽܘܕ݂ܳܝܶܐ̈ ܒ݁ܢܰܦ݂ܫܗܽܘܢ . ܠܰܐܝܟ݁ܳܐ ܥܬ݂ܺܝܕ݂ ܗܳܢܳܐ ܠܡܺܐܙܰܠ ܇ ܕ݁ܰܚܢܰܢ ܠܳܐ ܡܶܫܟ݁ܚܺܝܢ ܚ̱ܢܰܢ ܠܶܗ . ܠܡܳܐ ܟ݁ܰܝ ܠܰܐܬ݂ܪܰܘܳܬ݂ܳܐ̈ ܕ݁ܥܰܡ̱ܡܶܐ̈ ܆ ܥܬ݂ܺܝܕ݂ ܕ݁ܢܺܐܙܰܠ ܂ ܘܢܰܠܶܦ݂ ܠܚܰܢܦ݂ܶܐ̈ . ܡܳܢܳܐ ܗܺܝ ܗܳܕ݂ܶܐ ܡܶܠܬ݂ܳܐ ܕ݁ܶܐܡܰܪ . ܕ݁ܬ݂ܶܒ݂ܥܽܘܢܳܢܝ ܘܠܳܐ ܬ݁ܶܫܟ݁ܚܽܘܢܳܢܝ ܇ ܘܰܐܝܟ݁ܳܐ ܕ݁ܶܐܢܳܐ ܐܺܝܬ݂ܰܝ ܂ ܐܰܢ̱ܬ݁ܽܘܢ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܬ݂ܳܐ ܀.܀.܀܀ ܒ݁ܝܰܘܡܳܐ ܕ݁ܶܝܢ ܪܰܒ݁ܳܐ ܁ ܕ݁ܺܐܝܬ݂ܰܘܗ̱ܝ ܐ̱ܚܪܳܝܳܐ ܕ݁ܥܰܕ݂ܥܺܕ݂ܳܐ ܆ ܩܳܐܶܡ ܗ̱ܘܳܐ ܝܶܫܽܘܥ ܘܩܳܥܶܐ ܂ ܘܳܐܡܰܪ . ܐܶܢ ܐ̱ܢܳܫ ܨܗܶܐ ܁ ܢܺܐܬ݂ܶܐ ܠܘܳܬ݂ܝ ܂ ܘܢܶܫܬ݁ܶܐ . ܟ݁ܽܠ ܡܰܢ ܕ݁ܰܡܗܰܝܡܶܢ ܒ݁ܺܝ ܁ ܐܰܝܟ݁ܰܢܳܐ ܕ݁ܶܐܡܰܪܘ ܟ݁ܬ݂ܳܒ݂ܶܐ̈ ܆ ܢܰܗܪܰܘܳܬ݂ܳܐ̈ ܕ݁ܡܰܝܳܐ̈ ܚܰܝܶܐ̈ ܢܶܪܕ݁ܽܘܢ ܡܶܢ ܟ݁ܰܪܣܶܗ . ܗܳܕ݂ܶܐ ܕ݁ܶܝܢ ܐܶܡܰܪ ܥܰܠ ܪܽܘܚܳܐ ܕ݁ܰܥܬ݂ܺܝܕ݂ܺܝܢ ܗ̱ܘܰܘ ܠܰܡܩܰܒ݁ܳܠܽܘ : ܐܰܝܠܶܝܢ ܕ݁ܰܡܗܰܝܡܢܺܝܢ ܒ݁ܶܗ . ܠܳܐ ܓ݁ܶܝܪ ܥܕ݂ܰܟ݁ܺܝܠ ܐܶܬ݂ܝܰܗܒ݁ܰܬ݂ ܗ̱ܘܳܬ݂ ܪܽܘܚܳܐ ܆ ܡܶܛܽܠ ܕ݁ܠܳܐ ܥܕ݂ܰܟ݁ܺܝܠ ܐܶܫܬ݁ܰܒ݁ܰܚ ܗ̱ܘܳܐ ܝܶܫܽܘܥ ܀ ܣܰܓ݁ܺܝܶܐܐ̈ ܕ݁ܶܝܢ ܡܶܢ ܟ݁ܶܢܫܶܐ̈ ܕ݁ܰܫܡܰܥܘ ܡܶܠܰܘܗ̱ܝ̈ ܂ ܐܳܡܪܺܝܢ ܗ̱ܘܰܘ . ܗܳܢܰܘ ܫܰܪܺܝܪܳܐܝܺܬ݂ ܢܒ݂ܺܝܳܐ . ܐ̱ܚܪܳܢܶܐ̈ ܐܳܡܪܺܝܢ ܗ̱ܘܰܘ . ܗܳܢܰܘ ܡܫܺܝܚܳܐ . ܐ̱ܚܪܳܢܶܐ̈ ܐܳܡܪܺܝܢ . ܕ݁ܰܠܡܳܐ ܆ ܡܶܢ ܓ݁ܠܺܝܠܳܐ ܐܳܬ݂ܶܐ ܡܫܺܝܚܳܐ . ܠܳܐ ܗ̱ܘܳܐ ܟ݁ܬ݂ܳܒ݂ܳܐ ܐܶܡܰܪ . ܕ݁ܡܶܢ ܙܰܪܥܶܗ ܕ݁ܕ݂ܰܘܺܝܕ݂ : ܘܡܶܢ ܒ݁ܶܝܬ݂ ܠܚܶܡ ܩܪܺܝܬ݂ܳܐ ܕ݁ܺܝܠܶܗ ܕ݁ܕ݂ܰܘܺܝܕ݂ ܐܳܬ݂ܶܐ ܡܫܺܝܚܳܐ ܆ ܘܰܗܘܳܬ݂ ܗ̱ܘܳܬ݂ ܦ݁ܳܠܓ݁ܽܘܬ݂ܳܐ ܒ݁ܟ݂ܶܢܫܶܐ̈ ܡܶܛܽܠܳܬ݂ܶܗ . ܘܺܐܝܬ݂ ܗ̱ܘܰܘ ܐ̱ܢܳܫܺܝܢ̈ ܡܶܢܗܽܘܢ ܂ ܕ݁ܨܳܒ݂ܶܝܢ ܗ̱ܘܰܘ ܕ݁ܢܶܐܚܕ݁ܽܘܢܳܝܗ̱ܝ . ܐܶܠܳܐ ܠܳܐ ܐ̱ܢܳܫ ܐܰܪܡܺܝ ܥܠܰܘܗ̱ܝ ܐܺܝܕ݂ܰܝܳܐ̈ ܀ ܘܶܐܬ݂ܰܘ ܕ݁ܰܚܫܶܐ̈ ܗܳܢܽܘܢ ܠܘܳܬ݂ ܪܰܒ݁ܰܝ̈ ܟ݁ܳܗܢܶܐ̈ ܘܰܦ݂ܪܺܝܫܶܐ̈ . ܘܶܐܡܰܪܘ ܠܗܽܘܢ ܟ݁ܳܗܢܶܐ̈ . ܠܡܳܢܳܐ ܠܳܐ ܐܰܝܬ݁ܺܝܬ݁ܽܘܢܳܝܗ̱ܝ . ܐܳܡܪܺܝܢ ܠܗܽܘܢ ܕ݁ܰܚܫܶܐ̈ . ܠܳܐ ܡܶܡܬ݂ܽܘܡ ܗܳܟ݂ܰܢܳܐ ܡܰܠܶܠ ܒ݁ܰܪܢܳܫܳܐ ܇ ܐܰܝܟ݂ ܕ݁ܰܡܡܰܠܶܠ ܓ݁ܰܒ݂ܪܳܐ ܗܳܢܳܐ . ܐܳܡܪܺܝܢ ܠܗܽܘܢ ܦ݁ܪܺܝܫܶܐ̈ . ܠܡܳܐ ܆ ܐܳܦ݂ ܐܰܢ̱ܬ݁ܽܘܢ ܛܥܰܝܬ݁ܽܘܢ . ܠܡܳܐ ܆ ܐ̱ܢܳܫ ܡܶܢ ܪܺܫܶܐ̈ ܐܰܘ ܡܶܢ ܦ݁ܪܺܝܫܶܐ̈ ܗܰܝܡܶܢܘ ܒ݁ܶܗ . ܐܶܠܳܐ ܐܶܢ ܥܰܡܳܐ ܗܳܢܳܐ ܆ ܕ݁ܠܳܐ ܝܳܕ݂ܰܥ ܢܳܡܽܘܣܳܐ ܆ ܠܺܝܛܺܝܢ ܐܶܢܽܘܢ . ܐܳܡܰܪ ܠܗܽܘܢ ܢܺܝܩܳܕ݂ܺܡܳܘܣ ܚܰܕ݂ ܡܶܢܗܽܘܢ . ܗܰܘ ܕ݁ܶܐܬ݂ܳܐ ܗ̱ܘܳܐ ܠܘܳܬ݂ ܝܶܫܽܘܥ ܒ݁ܠܺܠܝܳܐ . ܕ݁ܰܠܡܳܐ ܢܳܡܽܘܣܳܐ ܕ݁ܺܝܠܰܢ ܡܚܰܝܶܒ݂ ܠܒ݂ܰܪܢܳܫܳܐ ܆ ܐܶܠܳܐ ܐܶܢ ܢܶܫܡܰܥ ܡܶܢܶܗ ܠܽܘܩܕ݂ܰܡ ܇ ܘܢܶܕ݁ܰܥ ܡܳܢܳܐ ܥܒ݂ܰܕ݂ . ܥܢܰܘ ܘܳܐܡܪܺܝܢ ܠܶܗ . ܠܡܳܐ ܆ ܐܳܦ݂ ܐܰܢ̱ܬ݁ ܡܶܢ ܓ݁ܠܺܝܠܳܐ ܐܰܢ̱ܬ݁ ܆ ܒ݁ܨܺܝ ܘܰܚܙܺܝ . ܕ݁ܰܢܒ݂ܺܝܳܐ ܡܶܢ ܓ݁ܠܺܝܠܳܐ ܂ ܠܳܐ ܩܳܐܶܡ ܀܀ ܐܶܙܰܠ ܗܳܟ݂ܺܝܠ ܟ݁ܽܠܚܰܕ݂ ܠܒ݂ܰܝܬ݁ܶܗ ܀ Chapter 8 ܝܶܫܽܘܥ ܕ݁ܶܝܢ ܐܶܙܰܠ ܠܛܽܘܪܳܐ ܕ݁ܙܰܝܬ݁ܶܐ̈ . ܒ݁ܨܰܦ݂ܪܳܐ ܕ݁ܶܝܢ ܬ݁ܽܘܒ݂ ܐܶܬ݂ܳܐ ܠܗܰܝܟ݁ܠܳܐ ܘܟ݂ܽܠܶܗ ܥܰܡܳܐ ܐܳܬ݂ܶܐ ܗ̱ܘܳܐ ܠܘܳܬ݂ܶܗ . ܘܟ݂ܰܕ݂ ܝܳܬ݂ܶܒ݂ ܡܰܠܶܦ݂ ܗ̱ܘܳܐ ܠܗܽܘܢ . ܐܰܝܬ݁ܺܝܘ ܕ݁ܶܝܢ ܣܳܦ݂ܪܶܐ̈ ܘܰܦ݂ܪܺܝܫܶܐ̈ ܠܰܐܢ̱ܬ݁ܬ݂ܳܐ ܕ݁ܶܐܬ݁ܬ݁ܰܚܕ݁ܰܬ݂ ܒ݁ܓ݂ܰܘܪܳܐ . ܘܟ݂ܰܕ݂ ܐܰܩܺܝܡܽܘܗ ܒ݁ܰܡܨܰܥܬ݂ܳܐ ܆ ܐܳܡܪܺܝܢ ܠܶܗ . ܡܰܠܦ݂ܳܢܳܐ . ܗܳܕ݂ܶܐ ܐܰܢ̱ܬ݁ܬ݂ܳܐ ܐܶܬ݁ܬ݁ܰܚܕ݁ܰܬ݂ ܓ݁ܰܠܝܳܐܝܺܬ݂ ܒ݁ܶܗ ܒ݁ܣܽܘܥܪܳܢܳܐ ܕ݁ܓ݂ܰܘܪܳܐ . ܘܰܒ݂ܢܳܡܽܘܣܳܐ ܕ݁ܶܝܢ ܕ݁ܡܽܘܫܶܐ ܦ݁ܰܩܶܕ݂ ܕ݁ܰܠܕ݂ܰܐܝܟ݂ ܗܳܠܶܝܢ ܢܶܪܓ݁ܽܘܡ . ܐܰܢ̱ܬ݁ ܗܳܟ݂ܺܝܠ ܡܳܢܳܐ ܐܳܡܰܪ ܐܰܢ̱ܬ݁ . ܗܳܕ݂ܶܐ ܐܶܡܰܪܘ ܟ݁ܰܕ݂ ܡܢܰܣܶܝܢ ܠܶܗ . ܐܰܝܟ݁ܰܢܳܐ ܕ݁ܬ݂ܶܗܘܶܐ ܠܗܽܘܢ ܕ݁ܰܢܩܰܛܪܓ݂ܽܘܢܳܝܗ̱ܝ . ܝܶܫܽܘܥ ܕ݁ܶܝܢ ܟ݁ܰܕ݂ ܠܬ݂ܰܚܬ݁ ܐܶܬ݂ܓ݁ܗܶܢ ܡܰܟ݂ܬ݁ܶܒ݂ ܗ̱ܘܳܐ ܥܰܠ ܐܰܪܥܳܐ . ܟ݁ܰܕ݂ ܕ݁ܶܝܢ ܟ݁ܰܬ݁ܰܪܘ ܟ݁ܰܕ݂ ܡܫܰܐܠܺܝܢ ܠܶܗ ܆ ܐܶܬ݂ܦ݁ܫܶܛ ܘܶܐܡܰܪ ܠܗܽܘܢ . ܐܰܝܢܳܐ ܡܶܢܟ݂ܽܘܢ ܕ݁ܺܐܝܬ݂ܰܘܗ̱ܝ ܕ݁ܠܳܐ ܚܛܳܗ . ܩܰܕ݂ܡܳܝܳܐ ܢܶܫܕ݁ܶܐ ܥܠܶܝܗ ܟ݁ܺܐܦ݂ܳܐ . ܘܬ݂ܽܘܒ݂ ܟ݁ܰܕ݂ ܐܶܬ݂ܓ݁ܗܶܢ ܟ݁ܳܬ݂ܶܒ݂ ܗ̱ܘܳܐ ܥܰܠ ܐܰܪܥܳܐ . ܗܶܢܽܘܢ ܕ݁ܶܝܢ ܟ݁ܰܕ݂ ܫܡܰܥܘ ܢܳܦ݂ܩܺܝܢ ܗ̱ܘܰܘ ܚܰܕ݂ ܚܰܕ݂ ܟ݁ܰܕ݂ ܫܰܪܺܝܘ ܡܶܢ ܩܰܫܺܝܫܶܐ̈ ܘܶܐܫܬ݁ܰܒ݂ܩܰܬ݂ ܐܰܢ̱ܬ݁ܬ݂ܳܐ ܠܚܽܘܕ݂ܶܝܗ ܆ ܟ݁ܰܕ݂ ܐܺܝܬ݂ܶܝܗ ܒ݁ܰܡܨܰܥܬ݂ܳܐ . ܟ݁ܰܕ݂ ܕ݁ܶܝܢ ܐܶܬ݂ܦ݁ܫܶܛ ܝܶܫܽܘܥ ܐܶܡܰܪ ܠܳܗ ܠܰܐܢ̱ܬ݁ܬ݂ܳܐ . ܐܰܝܟ݁ܳܐ ܐܺܝܬ݂ܰܝܗܽܘܢ . ܠܳܐ ܐ̱ܢܳܫ ܚܰܝܒ݂ܶܟ݂ܝ . ܗܳܝ ܕ݁ܶܝܢ ܐܶܡܪܰܬ݂ . ܘܠܳܐ ܐ̱ܢܳܫ ܡܳܪܝܳܐ . ܐܶܡܰܪ ܕ݁ܶܝܢ ܝܶܫܽܘܥ . ܐܳܦ݂ܠܳܐ ܐܶܢܳܐ ܡܚܰܝܶܒ݂ ܐ̱ܢܳܐ ܠܶܟ݂ܝ . ܙܶܠܝ ܘܡܶܢ ܗܳܫܳܐ ܬ݁ܽܘܒ݂ ܠܳܐ ܬ݁ܶܚܛܶܝܢ ܀ ܬ݁ܽܘܒ݂ ܕ݁ܶܝܢ ܡܰܠܶܠ ܥܰܡܗܽܘܢ ܝܶܫܽܘܥ ܂ ܘܶܐܡܰܪ . ܐܶܢܳܐ ܐ̱ܢܳܐ ܢܽܘܗܪܶܗ ܕ݁ܥܳܠܡܳܐ . ܡܰܢ ܕ݁ܒ݂ܳܬ݂ܰܪܝ ܐܳܬ݂ܶܐ ܂ ܠܳܐ ܢܗܰܠܶܟ݂ ܒ݁ܚܶܫܽܘܟ݂ܳܐ . ܐܶܠܳܐ ܢܶܫܟ݁ܰܚ ܠܶܗ ܢܽܘܗܪܳܐ ܕ݁ܚܰܝܶܐ̈ . ܐܳܡܪܺܝܢ ܠܶܗ ܦ݁ܪܺܝܫܶܐ̈ . ܐܰܢ̱ܬ݁ ܥܰܠ ܢܰܦ݂ܫܳܟ݂ ܡܰܣܗܶܕ݂ ܐܰܢ̱ܬ݁ . ܣܳܗܕ݁ܽܘܬ݂ܳܟ݂ ܂ ܠܳܐ ܗܘܳܬ݂ ܫܰܪܺܝܪܳܐ ܀ ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܐܳܦ݂ܶܢ ܐܶܢܳܐ ܡܰܣܗܶܕ݂ ܐ̱ܢܳܐ ܥܰܠ ܢܰܦ݂ܫܝ ܆ ܫܰܪܺܝܪܳܐ ܗ̱ܝ ܣܳܗܕ݁ܽܘܬ݂ܝ . ܡܶܛܽܠ ܕ݁ܝܳܕ݂ܰܥ ܐ̱ܢܳܐ ܡܶܢ ܐܰܝܡܶܟ݁ܳܐ ܐܶܬ݂ܺܝܬ݂ ܂ ܘܠܰܐܝܟ݁ܳܐ ܐܳܙܶܠ ܐ̱ܢܳܐ . ܐܰܢ̱ܬ݁ܽܘܢ ܕ݁ܶܝܢ ܂ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܡܶܢ ܐܰܝܡܶܟ݁ܳܐ ܐܶܬ݂ܺܝܬ݂ ܂ ܘܠܳܐ ܠܰܐܝܟ݁ܳܐ ܐܳܙܶܠ ܐ̱ܢܳܐ . ܐܰܢ̱ܬ݁ܽܘܢ ܂ ܦ݁ܰܓ݂ܪܳܢܳܐܝܺܬ݂ ܕ݁ܳܝܢܺܝܢ ܐܢ̱ܬ݁ܽܘܢ . ܐܶܢܳܐ ܂ ܠܐ̱ܢܳܫ ܠܳܐ ܕ݁ܳܐܶܢ ܐ̱ܢܳܐ . ܘܶܐܢ ܕ݁ܳܐܶܢ ܐ̱ܢܳܐ ܕ݁ܶܝܢ ܁ ܕ݁ܺܝܢܝ ܂ ܫܰܪܺܝܪ ܗ̱ܽܘ . ܡܶܛܽܠ ܕ݁ܠܳܐ ܗ̱ܘܺܝܬ݂ ܒ݁ܰܠܚܽܘܕ݂ܰܝ . ܐܶܠܳܐ ܐܶܢܳܐ ܘܳܐܒ݂ܝ ܕ݁ܫܰܕ݁ܪܰܢܝ . ܘܰܒ݂ܢܳܡܽܘܣܟ݂ܽܘܢ ܕ݁ܶܝܢ ܟ݁ܬ݂ܺܝܒ݂ ܆ ܕ݁ܣܳܗܕ݁ܽܘܬ݂ܳܐ ܕ݁ܰܬ݂ܪܶܝܢ̈ ܓ݁ܰܒ݂ܪܺܝܢ̈ ܫܰܪܺܝܪܳܐ ܗ̱ܝ . ܐܶܢܳܐ ܐ̱ܢܳܐ ܕ݁ܣܳܗܶܕ݂ ܐ̱ܢܳܐ ܥܰܠ ܢܰܦ݂ܫܝ . ܘܳܐܒ݂ܝ ܕ݁ܫܰܕ݁ܪܰܢܝ ܂ ܣܳܗܶܕ݂ ܥܠܰܝ . ܐܳܡܪܺܝܢ ܠܶܗ . ܐܰܝܟ݁ܰܘ ܐܰܒ݂ܽܘܟ݂ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܘܠܳܐ ܠܺܝ ܝܳܕ݂ܥܺܝܢ ܐܢ̱ܬ݁ܽܘܢ ܂ ܘܠܳܐ ܠܳܐܒ݂ܝ . ܐܶܠܽܘ ܠܺܝ ܝܳܕ݂ܥܺܝܢ ܗ̱ܘܰܝܬ݁ܽܘܢ ܆ ܐܳܦ݂ ܠܳܐܒ݂ܝ ܝܳܕ݂ܥܺܝܢ ܗ̱ܘܰܝܬ݁ܽܘܢ ܀ ܗܳܠܶܝܢ ܡܶܠܶܐ̈ ܡܰܠܶܠ ܒ݁ܶܝܬ݂ ܓ݁ܰܙܳܐ ܁ ܟ݁ܰܕ݂ ܡܰܠܶܦ݂ ܒ݁ܗܰܝܟ݁ܠܳܐ ܂ ܘܠܳܐ ܐ̱ܢܳܫ ܐܰܚܕ݁ܶܗ . ܠܳܐ ܓ݁ܶܝܪ ܥܕ݂ܰܟ݁ܺܝܠ ܐܶܬ݂ܳܬ݂ ܗ̱ܘܳܬ݂ ܫܳܥܬ݂ܶܗ ܀ ܐܳܡܰܪ ܠܗܽܘܢ ܬ݁ܽܘܒ݂ ܝܶܫܽܘܥ . ܐܶܢܳܐ ܐܳܙܶܠ ܐ̱ܢܳܐ . ܘܬ݂ܶܒ݂ܥܽܘܢܳܢܝ ܂ ܘܰܬ݂ܡܽܘܬ݂ܽܘܢ ܒ݁ܰܚܛܳܗܰܝܟ݁ܽܘܢ̈ . ܘܰܐܝܟ݁ܳܐ ܕ݁ܶܐܢܳܐ ܐܳܙܶܠ ܐ̱ܢܳܐ ܆ ܐܰܢ̱ܬ݁ܽܘܢ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܬ݂ܳܐ . ܐܳܡܪܺܝܢ ܝܺܗܽܘܕ݂ܳܝܶܐ̈ . ܠܡܳܐ ܟ݁ܰܝ ܢܰܦ݂ܫܶܗ ܩܳܛܶܠ : ܕ݁ܳܐܡܰܪ ܕ݁ܰܐܝܟ݁ܳܐ ܕ݁ܶܐܢܳܐ ܐܳܙܶܠ ܐ̱ܢܳܐ ܆ ܐܰܢ̱ܬ݁ܽܘܢ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܬ݂ܳܐ ܆ ܘܶܐܡܰܪ ܠܗܽܘܢ . ܐܰܢ̱ܬ݁ܽܘܢ ܂ ܡܶܢ ܕ݁ܰܠܬ݂ܰܚܬ݁ ܐܰܢ̱ܬ݁ܽܘܢ . ܘܶܐܢܳܐ ܂ ܡܶܢ ܕ݁ܰܠܥܶܠ ܐ̱ܢܳܐ . ܐܰܢ̱ܬ݁ܽܘܢ ܡܶܢ ܗܳܢܳܐ ܐܰܢ̱ܬ݁ܽܘܢ ܥܳܠܡܳܐ . ܐܶܢܳܐ ܠܳܐ ܗ̱ܘܺܝܬ݂ ܡܶܢ ܗܳܢܳܐ ܥܳܠܡܳܐ . ܐܶܡܪܶܬ݂ ܠܟ݂ܽܘܢ ܂ ܕ݁ܰܬ݂ܡܽܘܬ݂ܽܘܢ ܒ݁ܰܚܛܳܗܰܝܟ݁ܽܘܢ̈ . ܐܶܠܳܐ ܓ݁ܶܝܪ ܬ݁ܗܰܝܡܢܽܘܢ ܕ݁ܶܐܢܳܐ ܐ̱ܢܳܐ ܂ ܬ݁ܡܽܘܬ݂ܽܘܢ ܒ݁ܰܚܛܳܗܰܝܟ݁ܽܘܢ̈ . ܐܳܡܪܺܝܢ ܝܺܗܽܘܕ݂ܳܝܶܐ̈ . ܐܰܢ̱ܬ݁ ܡܰܢ ܐܰܢ̱ܬ݁ . ܐܳܡܰܪ ܠܗܽܘܢ ܝܶܫܽܘܥ . ܐܳܦ݂ܶܢ ܕ݁ܫܰܪܺܝܬ݂ ܕ݁ܶܐܡܰܠܶܠ ܥܰܡܟ݂ܽܘܢ ܆ ܣܰܓ݁ܺܝ ܐܺܝܬ݂ ܠܺܝ ܥܠܰܝܟ݁ܽܘܢ ܠܡܺܐܡܰܪ ܘܠܰܡܕ݂ܳܢ . ܐܶܠܳܐ ܡܰܢ ܕ݁ܫܰܕ݁ܪܰܢܝ ܂ ܫܰܪܺܝܪ ܗ̱ܽܘ . ܘܶܐܢܳܐ ܐܰܝܠܶܝܢ ܕ݁ܫܶܡܥܶܬ݂ ܡܶܢܶܗ ܆ ܗܳܠܶܝܢ ܗ̱ܽܘ ܡܡܰܠܶܠ ܐ̱ܢܳܐ ܒ݁ܥܳܠܡܳܐ . ܘܠܳܐ ܝܺܕ݂ܰܥܘ ܕ݁ܥܰܠ ܐܰܒ݂ܳܐ ܐܶܡܰܪ ܠܗܽܘܢ ܀܀ ܐܳܡܰܪ ܠܗܽܘܢ ܬ݁ܽܘܒ݂ ܝܶܫܽܘܥ . ܐܶܡܰܬ݂ܝ ܕ݁ܰܬ݂ܪܺܝܡܽܘܢܶܗ ܠܰܒ݂ܪܶܗ ܕ݁ܐ̱ܢܳܫܳܐ ܆ ܗܳܝܕ݁ܶܝܢ ܬ݁ܶܕ݁ܥܽܘܢ ܕ݁ܶܐܢܳܐ ܐ̱ܢܳܐ . ܘܡܶܕ݁ܶܡ ܡܶܢ ܨܒ݂ܽܘܬ݂ ܢܰܦ݂ܫܝ ܂ ܠܳܐ ܥܳܒ݂ܶܕ݂ ܐ̱ܢܳܐ . ܐܶܠܳܐ ܐܰܝܟ݁ܰܢܳܐ ܕ݁ܰܐܠܦ݂ܰܢܝ ܐܳܒ݂ܝ ܂ ܗܳܟ݂ܘܳܬ݂ ܗ̱ܽܘ ܡܡܰܠܶܠ ܐ̱ܢܳܐ . ܘܡܰܢ ܕ݁ܫܰܕ݁ܪܰܢܝ ܥܰܡܝ ܐܺܝܬ݂ܰܘܗ̱ܝ . ܘܠܳܐ ܫܰܒ݂ܩܰܢܝ ܒ݁ܰܠܚܽܘܕ݂ܰܝ ܐܳܒ݂ܝ . ܡܶܛܽܠ ܕ݁ܶܐܢܳܐ ܡܶܕ݁ܶܡ ܕ݁ܫܳܦ݂ܰܪ ܠܶܗ ܥܳܒ݂ܶܕ݂ ܐ̱ܢܳܐ ܒ݁ܟ݂ܽܠܙܒ݂ܰܢ ܀ ܟ݁ܰܕ݂ ܗܳܠܶܝܢ ܡܡܰܠܶܠ ܗ̱ܘܳܐ ܆ ܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ . ܘܶܐܡܰܪ ܝܶܫܽܘܥ ܠܗܳܢܽܘܢ ܝܺܗܽܘܕ݂ܳܝܶܐ̈ ܕ݁ܗܰܝܡܶܢܘ ܒ݁ܶܗ : ܐܶܢ ܐܰܢ̱ܬ݁ܽܘܢ ܬ݁ܟ݂ܰܬ݁ܪܽܘܢ ܒ݁ܡܶܠܰܬ݂ܝ ܆ ܫܰܪܺܝܪܳܐܝܺܬ݂ ܬ݁ܰܠܡܺܝܕ݂ܰܝ̈ ܐܰܢ̱ܬ݁ܽܘܢ . ܘܬ݂ܶܕ݁ܥܽܘܢ ܫܪܳܪܳܐ . ܘܗܽܘ ܫܪܳܪܳܐ ܢܚܰܪܰܪܟ݂ܽܘܢ . ܐܳܡܪܺܝܢ ܠܶܗ . ܙܰܪܥܶܗ ܚܢܰܢ ܕ݁ܰܐܒ݂ܪܳܗܳܡ . ܘܡܶܢ ܡܬ݂ܽܘܡ ܥܰܒ݂ܕ݁ܽܘܬ݂ܳܐ ܠܐ̱ܢܳܫ ܂ ܠܳܐ ܦ݁ܠܺܝܚܳܐ ܠܰܢ . ܐܰܝܟ݁ܰܢܳܐ ܐܳܡܰܪ ܐܰܢ̱ܬ݁ ܕ݁ܬ݂ܶܗܘܽܘܢ ܒ݁ܢܰܝ̈ ܚܺܐܪܶܐ̈ . ܐܳܡܰܪ ܠܗܽܘܢ ܝܶܫܽܘܥ . ܐܰܡܺܝܢ ܐܰܡܺܝܢ ܐܳܡܰܪܢܳܐ ܠܟ݂ܽܘܢ ܆ ܕ݁ܟ݂ܽܠܡܰܢ ܕ݁ܥܳܒ݂ܶܕ݂ ܚܛܺܝܬ݂ܳܐ ܂ ܥܰܒ݂ܕ݁ܳܗ ܗ̱ܽܘ ܕ݁ܰܚܛܺܝܬ݂ܳܐ . ܘܥܰܒ݂ܕ݁ܳܐ ܠܳܐ ܡܩܰܘܶܐ ܠܥܳܠܰܡ ܒ݁ܒ݂ܰܝܬ݁ܳܐ . ܒ݁ܪܳܐ ܕ݁ܶܝܢ ܠܥܳܠܰܡ ܡܩܰܘܶܐ . ܐܶܢ ܗܽܘ ܗܳܟ݂ܺܝܠ ܕ݁ܰܒ݂ܪܳܐ ܢܚܰܪܰܪܟ݂ܽܘܢ ܆ ܫܰܪܺܝܪܳܐܝܺܬ݂ ܬ݁ܶܗܘܽܘܢ ܒ݁ܢܰܝ̈ ܚܺܐܪܶܐ̈ . ܝܳܕ݂ܰܥ ܐ̱ܢܳܐ ܕ݁ܙܰܪܥܶܗ ܐܰܢ̱ܬ݁ܽܘܢ ܕ݁ܰܐܒ݂ܪܳܗܳܡ . ܐܶܠܳܐ ܒ݁ܳܥܶܝܢ ܐܢ̱ܬ݁ܽܘܢ ܠܡܶܩܛܠܰܢܝ ܆ ܡܶܛܽܠ ܕ݁ܰܠܡܶܠܰܬ݂ܝ ܠܳܐ ܣܳܦ݂ܩܺܝܢ ܐܢ̱ܬ݁ܽܘܢ . ܐܶܢܳܐ ܡܶܕ݁ܶܡ ܕ݁ܰܚܙܺܝܬ݂ ܠܘܳܬ݂ ܐܳܒ݂ܝ ܡܡܰܠܶܠ ܐ̱ܢܳܐ . ܘܰܐܢ̱ܬ݁ܽܘܢ ܡܶܕ݁ܶܡ ܕ݁ܰܚܙܰܝܬ݁ܽܘܢ ܠܘܳܬ݂ ܐܰܒ݂ܽܘܟ݂ܽܘܢ ܥܳܒ݂ܕ݁ܺܝܢ ܐܢ̱ܬ݁ܽܘܢ . ܥܢܰܘ ܂ ܘܳܐܡܪܺܝܢ ܠܶܗ . ܐܰܒ݂ܽܘܢ ܕ݁ܺܝܠܰܢ ܐܰܒ݂ܪܳܗܳܡ ܗ̱ܽܘ ܀.܀.܀܀ ܐܳܡܰܪ ܠܗܽܘܢ ܝܶܫܽܘܥ . ܐܶܠܽܘ ܒ݁ܢܰܘܗ̱ܝ̈ ܗ̱ܘܰܝܬ݁ܽܘܢ ܕ݁ܰܐܒ݂ܪܳܗܳܡ ܆ ܥܒ݂ܳܕ݂ܰܘܗ̱ܝ̈ ܕ݁ܰܐܒ݂ܪܳܗܳܡ ܥܳܒ݂ܕ݁ܺܝܢ ܗ̱ܘܰܝܬ݁ܽܘܢ . ܗܳܫܳܐ ܕ݁ܶܝܢ ܗܳܐ ܒ݁ܳܥܶܝܢ ܐܢ̱ܬ݁ܽܘܢ ܠܡܶܩܛܠܰܢܝ ܆ ܠܓ݂ܰܒ݂ܪܳܐ ܕ݁ܫܰܪܺܝܪܬ݁ܳܐ ܡܰܠܠܶܬ݂ ܥܰܡܟ݂ܽܘܢ ܇ ܐܰܝܕ݂ܳܐ ܕ݁ܫܶܡܥܶܬ݂ ܡܶܢ ܐܰܠܳܗܳܐ ܆ ܗܳܕ݂ܶܐ ܐܰܒ݂ܪܳܗܳܡ ܠܳܐ ܥܒ݂ܰܕ݂ . ܐܰܢ̱ܬ݁ܽܘܢ ܕ݁ܶܝܢ ܥܳܒ݂ܕ݁ܺܝܢ ܐܢ̱ܬ݁ܽܘܢ ܥܒ݂ܳܕ݂ܶܐ̈ ܕ݁ܰܐܒ݂ܽܘܟ݂ܽܘܢ . ܐܳܡܪܺܝܢ ܠܶܗ . ܚܢܰܢ ܡܶܢ ܙܳܢܝܽܘܬ݂ܳܐ ܠܳܐ ܗܘܰܝܢ . ܚܰܕ݂ ܐܰܒ݂ܳܐ ܐܺܝܬ݂ ܠܰܢ ܂ ܐܰܠܳܗܳܐ . ܐܳܡܰܪ ܠܗܽܘܢ ܝܶܫܽܘܥ . ܐܶܠܽܘ ܐܰܠܳܗܳܐ ܗ̱ܘܳܐ ܐܰܒ݂ܽܘܟ݂ܽܘܢ ܂ ܡܰܚܒ݂ܺܝܢ ܗ̱ܘܰܝܬ݁ܽܘܢ ܠܺܝ . ܐܶܢܳܐ ܓ݁ܶܝܪ ܡܶܢ ܐܰܠܳܗܳܐ ܢܶܦ݂ܩܶܬ݂ ܘܶܐܬ݂ܺܝܬ݂ . ܘܠܳܐ ܗ̱ܘܳܐ ܡܶܢ ܨܒ݂ܽܘܬ݂ ܢܰܦ݂ܫܝ ܐܶܬ݂ܺܝܬ݂ . ܐܶܠܳܐ ܗܽܘ ܫܰܕ݁ܪܰܢܝ . ܡܶܛܽܠ ܡܳܢܳܐ ܡܶܠܰܬ݂ܝ ܠܳܐ ܡܶܫܬ݁ܰܘܕ݁ܥܺܝܢ ܐܢ̱ܬ݁ܽܘܢ . ܥܰܠ ܕ݁ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܫܳܡܥܺܝܢ ܡܶܠܰܬ݂ܝ . ܐܰܢ̱ܬ݁ܽܘܢ ܡܶܢ ܐܰܒ݂ܳܐ ܐܳܟ݂ܶܠܩܰܪܨܳܐ ܐܺܝܬ݂ܰܝܟ݁ܽܘܢ . ܘܪܶܓ݁ܬ݂ܶܗ ܕ݁ܰܐܒ݂ܽܘܟ݂ܽܘܢ ܨܳܒ݂ܶܝܢ ܐܢ̱ܬ݁ܽܘܢ ܠܡܶܥܒ݁ܰܕ݂ . ܗܰܘ ܕ݁ܡܶܢ ܒ݁ܪܺܫܺܝܬ݂ ܩܳܛܶܠ ܐ̱ܢܳܫܳܐ̈ ܗܽܘ ܂ ܘܒ݂ܰܫܪܳܪܳܐ ܠܳܐ ܩܳܐܶܡ . ܡܶܛܽܠ ܕ݁ܰܫܪܳܪܳܐ ܠܰܝܬ݁ ܒ݁ܶܗ . ܐܶܡܰܬ݂ܝ ܕ݁ܰܡܡܰܠܶܠ ܟ݁ܰܕ݁ܳܒ݂ܽܘܬ݂ܳܐ ܂ ܡܶܢ ܕ݁ܺܝܠܶܗ ܗܽܘ ܡܡܰܠܶܠ . ܡܶܛܽܠ ܕ݁ܕ݂ܰܓ݁ܳܠܳܐ ܗܽܘ ܂ ܐܳܦ݂ ܐܰܒ݂ܽܘܗ . ܐܶܢܳܐ ܕ݁ܶܝܢ ܕ݁ܰܫܪܳܪܳܐ ܡܡܰܠܶܠ ܐ̱ܢܳܐ ܆ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܠܺܝ . ܡܰܢܽܘ ܡܶܢܟ݂ܽܘܢ ܡܰܟ݁ܶܣ ܠܺܝ ܥܰܠ ܚܛܺܝܬ݂ܳܐ . ܘܶܐܢ ܫܪܳܪܳܐ ܡܡܰܠܶܠ ܐ̱ܢܳܐ ܆ ܐܰܢ̱ܬ݁ܽܘܢ ܠܡܳܢܳܐ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܠܺܝ . ܡܰܢ ܕ݁ܡܶܢ ܐܰܠܳܗܳܐ ܐܺܝܬ݂ܰܘܗ̱ܝ ܂ ܡܶܠܶܐ̈ ܕ݁ܰܐܠܳܗܳܐ ܫܳܡܰܥ . ܡܶܛܽܠ ܗܳܢܳܐ ܐܰܢ̱ܬ݁ܽܘܢ ܠܳܐ ܫܳܡܥܺܝܢ ܐܢ̱ܬ݁ܽܘܢ ܂ ܡܶܛܽܠ ܕ݁ܠܳܐ ܗܘܰܝܬ݁ܽܘܢ ܡܶܢ ܐܰܠܳܗܳܐ . ܥܢܰܘ ܝܺܗܽܘܕ݂ܳܝܶܐ̈ ܘܳܐܡܪܺܝܢ ܠܶܗ . ܠܳܐ ܫܰܦ݁ܺܝܪ ܐܳܡܪܺܝܢ ܐܶܢܰܚܢܰܢ ܂ ܕ݁ܫܳܡܪܳܝܳܐ ܐܰܢ̱ܬ݁ ܆ ܘܕ݂ܰܝܘܳܐ ܐܺܝܬ݂ ܠܳܟ݂ ܆ ܐܳܡܰܪ ܠܗܽܘܢ ܝܶܫܽܘܥ . ܠܺܝ ܕ݁ܰܝܘܳܐ ܠܳܐ ܐܺܝܬ݂ . ܐܶܠܳܐ ܠܳܐܒ݂ܝ ܡܝܰܩܰܪ ܐ̱ܢܳܐ . ܘܰܐܢ̱ܬ݁ܽܘܢ ܡܨܰܥܪܺܝܢ ܠܺܝ . ܐܶܢܳܐ ܕ݁ܶܝܢ ܠܳܐ ܒ݁ܳܥܶܐ ܐ̱ܢܳܐ ܫܽܘܒ݂ܚܝ . ܐܺܝܬ݂ ܗ̱ܽܘ ܕ݁ܒ݂ܳܥܶܐ ܘܕ݂ܳܐܶܢ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܡܶܠܰܬ݂ܝ ܢܳܛܰܪ ܂ ܡܰܘܬ݁ܳܐ ܠܳܐ ܢܶܚܙܶܐ ܠܥܳܠܰܡ . ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܗܳܫܳܐ ܝܺܕ݂ܰܥܢ ܕ݁ܕ݂ܰܝܘܳܐ ܐܺܝܬ݂ ܠܳܟ݂ . ܐܰܒ݂ܪܳܗܳܡ ܡܺܝܬ݂ ܘܰܢܒ݂ܺܝܶܐ̈ : ܘܰܐܢ̱ܬ݁ ܐܳܡܰܪ ܐܰܢ̱ܬ݁ ܕ݁ܡܰܢ ܕ݁ܡܶܠܰܬ݂ܝ ܢܳܛܰܪ ܡܰܘܬ݁ܳܐ ܠܳܐ ܢܶܛܥܰܡ ܠܥܳܠܰܡ ܆ ܠܡܳܐ ܐܰܢ̱ܬ݁ ܪܰܒ݂ ܐܰܢ̱ܬ݁ ܡܶܢ ܐܰܒ݂ܽܘܢ ܐܰܒ݂ܪܳܗܳܡ ܕ݁ܡܺܝܬ݂ . ܘܡܶܢ ܢܒ݂ܺܝܶܐ̈ ܕ݁ܡܺܝܬ݂ܘ . ܡܰܢܽܘ ܥܳܒ݂ܶܕ݂ ܐܰܢ̱ܬ݁ ܢܰܦ݂ܫܳܟ݂ . ܐܳܡܰܪ ܠܗܽܘܢ ܝܶܫܽܘܥ . ܐܶܢ ܐܶܢܳܐ ܡܫܰܒ݁ܰܚ ܐ̱ܢܳܐ ܢܰܦ݂ܫܝ ܆ ܫܽܘܒ݂ܚܝ ܠܳܐ ܗ̱ܘܳܐ ܡܶܕ݁ܶܡ . ܐܺܝܬ݂ܰܘܗ̱ܝ ܐܳܒ݂ܝ ܕ݁ܰܡܫܰܒ݁ܰܚ ܠܺܝ ܆ ܗܰܘ ܕ݁ܳܐܡܪܺܝܢ ܐܢ̱ܬ݁ܽܘܢ ܕ݁ܰܐܠܳܗܰܢ ܗ̱ܽܘ ܂ ܘܠܳܐ ܝܺܕ݂ܰܥܬ݁ܽܘܢܳܝܗ̱ܝ . ܐܶܢܳܐ ܕ݁ܶܝܢ ܝܳܕ݂ܰܥ ܐ̱ܢܳܐ ܠܶܗ . ܘܶܐܢ ܐܳܡܰܪ ܐ̱ܢܳܐ ܕ݁ܠܳܐ ܝܳܕ݂ܰܥ ܐ̱ܢܳܐ ܠܶܗ ܆ ܗܳܘܶܐ ܐ̱ܢܳܐ ܠܺܝ ܟ݁ܰܕ݁ܳܒ݂ܳܐ ܂ ܐܰܟ݂ܘܳܬ݂ܟ݂ܽܘܢ . ܐܶܠܳܐ ܝܳܕ݂ܰܥ ܐ̱ܢܳܐ ܠܶܗ ܂ ܘܡܶܠܬ݂ܶܗ ܢܳܛܰܪ ܐ̱ܢܳܐ . ܐܰܒ݂ܪܳܗܳܡ ܐܰܒ݂ܽܘܟ݂ܽܘܢ ܡܣܰܘܰܚ ܗ̱ܘܳܐ ܕ݁ܢܶܚܙܶܐ ܝܰܘܡܝ ܁ ܘܰܚܙܳܐ ܂ ܘܰܚܕ݂ܺܝ . ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܥܕ݂ܰܟ݁ܺܝܠ ܒ݁ܰܪ ܚܰܡܫܺܝܢ ܫܢܺܝܢ̈ ܠܳܐ ܗ̱ܘܰܝܬ݁ ܆ ܘܠܰܐܒ݂ܪܳܗܳܡ ܚܙܰܝܬ݁ ܆ ܐܳܡܰܪ ܠܗܽܘܢ ܝܶܫܽܘܥ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܥܰܕ݂ܠܳܐ ܢܶܗܘܶܐ ܐܰܒ݂ܪܳܗܳܡ ܐܶܢܳܐ ܐܺܝܬ݂ܰܝ . ܘܰܫܩܰܠܘ ܟ݁ܺܐܦ݂ܶܐ̈ ܕ݁ܢܶܪܓ݁ܡܽܘܢܳܝܗ̱ܝ . ܘܝܶܫܽܘܥ ܐܶܬ݁ܛܰܫܺܝ ܂ ܘܰܢܦ݂ܰܩ ܡܶܢ ܗܰܝܟ݁ܠܳܐ . ܘܰܥܒ݂ܰܪ ܒ݁ܰܝܢܳܬ݂ܗܽܘܢ ܂ ܘܶܐܙܰܠ ܀܀ Chapter 9 ܘܟ݂ܰܕ݂ ܥܳܒ݂ܰܪ ܆ ܚܙܳܐ ܓ݁ܰܒ݂ܪܳܐ ܣܰܡܝܳܐ ܕ݁ܡܶܢ ܟ݁ܪܶܣ ܐܶܡܶܗ . ܘܫܰܐܠܽܘܗ̱ܝ ܬ݁ܰܠܡܺܝܕ݂ܰܘܗ̱ܝ̈ ܂ ܘܳܐܡܪܺܝܢ . ܪܰܒ݁ܰܢ ܂ ܡܰܢܽܘ ܚܛܳܐ . ܗܳܢܳܐ ܂ ܐܰܘ ܐܰܒ݂ܳܗܰܘܗ̱ܝ̈ . ܕ݁ܟ݂ܰܕ݂ ܣܡܶܐ ܢܶܬ݂ܺܝܠܶܕ݂ . ܐܳܡܰܪ ܠܗܽܘܢ ܝܶܫܽܘܥ . ܠܳܐ ܗܽܘ ܚܛܳܐ ܂ ܘܠܳܐ ܐܰܒ݂ܳܗܰܘܗ̱ܝ̈ . ܐܶܠܳܐ ܕ݁ܢܶܬ݂ܚܙܽܘܢ ܒ݁ܶܗ ܥܒ݂ܳܕ݂ܰܘܗ̱ܝ̈ ܕ݁ܰܐܠܳܗܳܐ . ܠܺܝ ܘܳܠܶܐ ܠܡܶܥܒ݁ܰܕ݂ ܥܒ݂ܳܕ݂ܶܐ̈ ܕ݁ܡܰܢ ܕ݁ܫܰܕ݁ܪܰܢܝ ܂ ܥܰܕ݂ ܐܺܝܡܳܡܳܐ ܗܽܘ . ܐܳܬ݂ܶܐ ܠܺܠܝܳܐ ܁ ܕ݁ܐ̱ܢܳܫ ܠܳܐ ܡܶܫܟ݁ܰܚ ܠܡܶܦ݂ܠܰܚ . ܟ݁ܡܳܐ ܕ݁ܰܒ݂ܥܳܠܡܳܐ ܐ̱ܢܳܐ ܂ ܢܽܘܗܪܶܗ ܐ̱ܢܳܐ ܕ݁ܥܳܠܡܳܐ . ܘܟ݂ܰܕ݂ ܐܶܡܰܪ ܗܳܠܶܝܢ ܂ ܪܰܩ ܥܰܠ ܐܰܪܥܳܐ . ܘܰܓ݂ܒ݂ܰܠ ܛܺܝܢܳܐ ܡܶܢ ܪܽܘܩܶܗ ܆ ܘܛܳܫ ܥܰܠ ܥܰܝܢܰܘܗ̱ܝ̈ ܕ݁ܗܰܘ ܣܰܡܝܳܐ . ܘܶܐܡܰܪ ܠܶܗ . ܙܶܠ ܐܰܫܺܝܓ݂ ܒ݁ܡܰܥܡܽܘܕ݂ܺܝܬ݂ܳܐ ܕ݁ܫܺܝܠܽܘܚܳܐ . ܘܶܐܙܰܠ ܐܰܫܺܝܓ݂ ܘܶܐܬ݂ܳܐ ܟ݁ܰܕ݂ ܚܳܙܶܐ . ܫܒ݂ܳܒ݂ܰܘܗ̱ܝ̈ ܕ݁ܶܝܢ ܁ ܘܰܐܝܠܶܝܢ ܕ݁ܰܚܙܶܐ ܗ̱ܘܳܐ ܠܗܽܘܢ ܡܶܢ ܩܕ݂ܺܝܡ ܕ݁ܚܳܕ݂ܰܪ ܗ̱ܘܳܐ ܆ ܐܳܡܪܺܝܢ ܗ̱ܘܰܘ . ܠܳܐ ܗ̱ܘܳܐ ܗܳܢܰܘ ܗܰܘ ܕ݁ܝܳܬ݂ܶܒ݂ ܗ̱ܘܳܐ ܂ ܘܚܳܕ݂ܰܪ ܆ ܐܺܝܬ݂ ܕ݁ܳܐܡܪܺܝܢ ܗ̱ܘܰܘ ܕ݁ܗܽܘܝܽܘ . ܘܺܐܝܬ݂ ܕ݁ܳܐܡܪܺܝܢ ܗ̱ܘܰܘ ܂ ܠܳܐ . ܐܶܠܳܐ ܡܶܕ݂ܡܳܐ ܕ݁ܳܡܶܐ ܠܶܗ . ܗܽܘ ܕ݁ܶܝܢ ܐܳܡܰܪ ܗ̱ܘܳܐ ܂ ܕ݁ܶܐܢܳܐ ܐ̱ܢܳܐ . ܐܳܡܪܺܝܢ ܠܶܗ . ܐܰܝܟ݁ܰܢܳܐ ܐܶܬ݂ܦ݁ܰܬ݁ܰܚ ܥܰܝܢܰܝܟ݁̈ . ܥܢܳܐ ܂ ܘܶܐܡܰܪ ܠܗܽܘܢ . ܓ݁ܰܒ݂ܪܳܐ ܕ݁ܰܫܡܶܗ ܝܶܫܽܘܥ ܆ ܥܒ݂ܰܕ݂ ܛܺܝܢܳܐ ܘܛܳܫ ܠܺܝ ܥܰܠ ܥܰܝܢܰܝ̈ ܂ ܘܶܐܡܰܪ ܠܺܝ . ܙܶܠ ܐܰܫܺܝܓ݂ ܒ݁ܡܰܝܳܐ̈ ܕ݁ܫܺܝܠܽܘܚܳܐ . ܘܶܐܙܶܠ̱ܬ݂ ܐܰܫܺܝܓ݂ܶܬ݂ ܂ ܘܶܐܬ݂ܚܙܺܝ ܠܺܝ . ܐܳܡܪܺܝܢ ܠܶܗ ܐܰܝܟ݁ܰܘ . ܐܳܡܰܪ ܠܗܽܘܢ ܠܳܐ ܝܳܕ݂ܰܥ ܐ̱ܢܳܐ . ܘܰܐܝܬ݁ܝܽܘܗ̱ܝ ܠܗܰܘ ܕ݁ܡܶܢ ܩܕ݂ܺܝܡ ܣܰܡܝܳܐ ܗ̱ܘܳܐ ܂ ܠܘܳܬ݂ ܦ݁ܪܺܝܫܶܐ̈ . ܐܺܝܬ݂ܶܝܗ ܗ̱ܘܳܬ݂ ܕ݁ܶܝܢ ܫܰܒ݁ܬ݂ܳܐ ܆ ܟ݁ܰܕ݂ ܥܒ݂ܰܕ݂ ܛܺܝܢܳܐ ܝܶܫܽܘܥ ܂ ܘܦ݂ܰܬ݁ܰܚ ܠܶܗ ܥܰܝܢܰܘܗ̱ܝ̈ . ܘܬ݂ܽܘܒ݂ ܫܰܐܠܽܘܗ̱ܝ ܦ݁ܪܺܝܫܶܐ̈ ܆ ܐܰܝܟ݁ܰܢܳܐ ܐܶܬ݂ܚܙܺܝ ܠܳܟ݂ . ܗܽܘ ܕ݁ܶܝܢ ܐܶܡܰܪ ܠܗܽܘܢ . ܛܺܝܢܳܐ ܣܳܡ ܥܰܠ ܥܰܝܢܰܝ̈ ܆ ܘܰܐܫܺܝܓ݂ܶܬ݂ ܂ ܘܶܐܬ݂ܚܙܺܝ ܠܺܝ . ܘܳܐܡܪܺܝܢ ܗ̱ܘܰܘ ܐ̱ܢܳܫܳܐ̈ ܡܶܢ ܦ݁ܪܺܝܫܶܐ̈ . ܗܳܢܳܐ ܓ݁ܰܒ݂ܪܳܐ ܠܳܐ ܗ̱ܘܳܐ ܡܶܢ ܐܰܠܳܗܳܐ ܗܽܘ ܂ ܕ݁ܫܰܒ݁ܬ݂ܳܐ ܠܳܐ ܢܳܛܰܪ . ܐ̱ܚܪܳܢܶܐ̈ ܕ݁ܶܝܢ ܐܳܡܪܺܝܢ ܗ̱ܘܰܘ . ܐܰܝܟ݁ܰܢܳܐ ܡܶܫܟ݁ܰܚ ܓ݁ܰܒ݂ܪܳܐ ܚܰܛܳܝܳܐ ܂ ܗܳܠܶܝܢ ܐܳܬ݂ܘܳܬ݂ܳܐ̈ ܠܡܶܥܒ݁ܰܕ݂ . ܘܦ݂ܳܠܓ݁ܽܘܬ݂ܳܐ ܐܺܝܬ݂ ܗ̱ܘܳܬ݂ ܒ݁ܰܝܢܳܬ݂ܗܽܘܢ . ܐܳܡܪܺܝܢ ܬ݁ܽܘܒ݂ ܠܗܰܘ ܣܰܡܝܳܐ ܆ ܐܰܢ̱ܬ݁ ܡܳܢܳܐ ܐܳܡܰܪ ܐܰܢ̱ܬ݁ ܥܠܰܘܗ̱ܝ ܕ݁ܦ݂ܰܬ݁ܰܚ ܠܳܟ݂ ܥܰܝܢܰܝܟ݁̈ . ܐܳܡܰܪ ܠܗܽܘܢ . ܐܶܢܳܐ ܐܳܡܰܪ ܐ̱ܢܳܐ ܂ ܕ݁ܰܢܒ݂ܺܝܳܐ ܗܽܘ . ܠܳܐ ܕ݁ܶܝܢ ܗܰܝܡܶܢܘ ܗ̱ܘܰܘ ܥܠܰܘܗ̱ܝ ܝܺܗܽܘܕ݂ܳܝܶܐ̈ ܕ݁ܣܰܡܝܳܐ ܗ̱ܘܳܐ ܘܰܚܙܳܐ ܇ ܥܕ݂ܰܡܳܐ ܕ݁ܰܩܪܰܘ ܠܰܐܒ݂ܳܗܰܘܗ̱ܝ̈ ܕ݁ܗܰܘ ܕ݁ܰܚܙܳܐ ܇ ܘܫܰܐܶܠܘ ܐܶܢܽܘܢ . ܐܶܢ ܆ ܗܳܢܰܘ ܒ݁ܶܪܟ݂ܽܘܢ . ܗܰܘ ܕ݁ܰܐܢ̱ܬ݁ܽܘܢ ܐܳܡܪܺܝܢ ܐܢ̱ܬ݁ܽܘܢ ܁ ܕ݁ܟ݂ܰܕ݂ ܣܡܶܐ ܐܶܬ݂ܺܝܠܶܕ݂ . ܐܰܝܟ݁ܰܢܳܐ ܗܳܫܳܐ ܚܳܙܶܐ . ܥܢܰܘ ܕ݁ܶܝܢ ܐܰܒ݂ܳܗܰܘܗ̱ܝ̈ ܂ ܘܶܐܡܰܪܘ . ܝܳܕ݂ܥܺܝܢܰܢ ܕ݁ܗܳܢܰܘ ܒ݁ܪܰܢ . ܘܰܕ݂ܟ݂ܰܕ݂ ܣܡܶܐ ܐܶܬ݂ܺܝܠܶܕ݂ . ܐܰܝܟ݁ܰܢܳܐ ܕ݁ܶܝܢ ܗܳܫܳܐ ܚܳܙܶܐ : ܐܰܘ ܡܰܢܽܘ ܦ݁ܰܬ݁ܰܚ ܠܶܗ ܥܰܝܢܰܘܗ̱ܝ̈ : ܠܳܐ ܝܳܕ݂ܥܺܝܢܰܢ . ܐܳܦ݂ ܗܽܘ ܥܰܠ ܠܶܗ ܠܰܫܢܰܘܗ̱ܝ̈ . ܠܶܗ ܫܰܐܶܠܘ . ܗܽܘ ܚܠܳܦ݂ ܢܰܦ݂ܫܶܗ ܢܡܰܠܶܠ . ܗܳܠܶܝܢ ܐܶܡܰܪܘ ܐܰܒ݂ܳܗܰܘܗ̱ܝ̈ ܆ ܡܶܛܽܠ ܕ݁ܕ݂ܳܚܠܺܝܢ ܗ̱ܘܰܘ ܡܶܢ ܝܺܗܽܘܕ݂ܳܝܶܐ̈ . ܦ݁ܣܰܩܘ ܗ̱ܘܰܘ ܓ݁ܶܝܪ ܝܺܗܽܘܕ݂ܳܝܶܐ̈ ܆ ܕ݁ܶܐܢ ܐ̱ܢܳܫ ܢܰܘܕ݁ܶܐ ܒ݁ܶܗ ܕ݁ܰܡܫܺܝܚܳܐ ܗܽܘ ܆ ܢܰܦ݁ܩܽܘܢܳܝܗ̱ܝ ܡܶܢ ܟ݁ܢܽܘܫܬ݁ܳܐ . ܡܶܛܽܠ ܗܳܢܳܐ ܐܶܡܰܪܘ ܐܰܒ݂ܳܗܰܘܗ̱ܝ̈ ܂ ܕ݁ܥܰܠ ܠܶܗ ܠܰܫܢܰܘܗ̱ܝ̈ . ܠܶܗ ܫܰܐܶܠܘ ܀܀ ܘܰܩܪܰܐܘܽܗ̱ܝ ܠܓ݂ܰܒ݂ܪܳܐ ܕ݁ܬ݂ܰܪܬ݁ܶܝܢ̈ ܙܰܒ݂ܢܺܝܢ̈ ܂ ܠܗܰܘ ܕ݁ܺܐܝܬ݂ܰܘܗ̱ܝ ܗ̱ܘܳܐ ܣܰܡܝܳܐ ܆ ܘܳܐܡܪܺܝܢ ܠܶܗ . ܫܰܒ݁ܰܚ ܠܰܐܠܳܗܳܐ . ܚܢܰܢ ܓ݁ܶܝܪ ܝܳܕ݂ܥܺܝܢܰܢ ܁ ܕ݁ܗܳܢܳܐ ܓ݁ܰܒ݂ܪܳܐ ܚܰܛܳܝܳܐ ܗܽܘ . ܥܢܳܐ ܗܽܘ ܘܶܐܡܰܪ ܠܗܽܘܢ ܁ ܐܶܢ ܚܰܛܳܝܳܐ ܗܽܘ ܠܳܐ ܝܳܕ݂ܰܥ ܐ̱ܢܳܐ . ܚܕ݂ܳܐ ܕ݁ܶܝܢ ܝܳܕ݂ܰܥ ܐ̱ܢܳܐ ܆ ܕ݁ܣܰܡܝܳܐ ܗ̱ܘܺܝܬ݂ ܘܗܳܫܳܐ ܂ ܗܳܐ ܚܳܙܶܐ ܐ̱ܢܳܐ . ܐܳܡܪܺܝܢ ܠܶܗ ܬ݁ܽܘܒ݂ . ܡܳܢܳܐ ܥܒ݂ܰܕ݂ ܠܳܟ݂ . ܐܰܝܟ݁ܰܢܳܐ ܦ݁ܰܬ݁ܰܚ ܠܳܟ݂ ܥܰܝܢܰܝܟ݁̈ . ܐܳܡܰܪ ܠܗܽܘܢ . ܐܶܡܪܶܬ݂ ܠܟ݂ܽܘܢ ܂ ܘܠܳܐ ܫܡܰܥܬ݁ܽܘܢ . ܡܳܢܳܐ ܬ݁ܽܘܒ݂ ܨܳܒ݂ܶܝܢ ܐܢ̱ܬ݁ܽܘܢ ܠܡܶܫܡܰܥ . ܠܡܳܐ ܆ ܐܳܦ݂ ܐܰܢ̱ܬ݁ܽܘܢ ܬ݁ܰܠܡܺܝܕ݂ܶܐ̈ ܨܳܒ݂ܶܝܢ ܐܢ̱ܬ݁ܽܘܢ ܠܡܶܗܘܳܐ ܠܶܗ ܆ ܗܶܢܽܘܢ ܕ݁ܶܝܢ ܨܰܚܝܽܘܗ̱ܝ ܂ ܘܳܐܡܪܺܝܢ ܠܶܗ . ܐܰܢ̱ܬ݁ ܗ̱ܽܘ ܬ݁ܰܠܡܺܝܕ݂ܶܗ ܕ݁ܗܰܘ . ܚܢܰܢ ܓ݁ܶܝܪ ܬ݁ܰܠܡܺܝܕ݂ܶܐ̈ ܚܢܰܢ ܕ݁ܡܽܘܫܶܐ . ܘܝܳܕ݂ܥܺܝܢܰܢ ܕ݁ܥܰܡ ܡܽܘܫܶܐ ܂ ܐܰܠܳܗܳܐ ܡܰܠܶܠ . ܠܗܳܢܳܐ ܕ݁ܶܝܢ ܂ ܠܳܐ ܝܳܕ݂ܥܺܝܢܰܢ ܡܶܢ ܐܰܝܡܶܟ݁ܳܐ ܗܽܘ . ܥܢܳܐ ܗܰܘ ܓ݁ܰܒ݂ܪܳܐ ܂ ܘܶܐܡܰܪ ܠܗܽܘܢ . ܒ݁ܗܳܕ݂ܶܐ ܗ̱ܘ ܗܳܟ݂ܺܝܠ ܠܡܶܬ݁ܕ݁ܰܡܳܪܽܘ . ܕ݁ܰܐܢ̱ܬ݁ܽܘܢ ܁ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܡܶܢ ܐܰܝܡܶܟ݁ܳܐ ܗܽܘ ܇ ܘܥܰܝܢܰܝ̈ ܕ݁ܺܝܠܝ ܦ݁ܰܬ݁ܰܚ . ܝܳܕ݂ܥܺܝܢ ܚ̱ܢܰܢ ܕ݁ܶܝܢ ܕ݁ܰܐܠܳܗܳܐ ܒ݁ܩܳܠܳܐ ܕ݁ܚܰܛܳܝܶܐ̈ ܠܳܐ ܫܳܡܰܥ . ܐܶܠܳܐ ܠܡܰܢ ܕ݁ܕ݂ܳܚܶܠ ܡܶܢܶܗ ܁ ܘܥܳܒ݂ܶܕ݂ ܨܶܒ݂ܝܳܢܶܗ ܂ ܠܗܰܘ ܗ̱ܽܘ ܫܳܡܰܥ . ܡܶܢ ܥܳܠܰܡ ܠܳܐ ܐܶܫܬ݁ܰܡܥܰܬ݂ ܕ݁ܦ݂ܰܬ݁ܰܚ ܐ̱ܢܳܫ ܥܰܝܢܶܐ̈ ܕ݁ܣܰܡܝܳܐ ܕ݁ܶܐܬ݂ܺܝܠܶܕ݂ . ܐܶܠܽܘ ܠܳܐ ܡܶܢ ܐܰܠܳܗܳܐ ܗ̱ܘܳܐ ܗܳܢܳܐ ܆ ܠܳܐ ܡܶܫܟ݁ܰܚ ܗ̱ܘܳܐ ܗܳܕ݂ܶܐ ܠܡܶܥܒ݁ܰܕ݂ . ܥܢܰܘ ܂ ܘܳܐܡܪܺܝܢ ܠܶܗ . ܐܰܢ̱ܬ݁ ܟ݁ܽܠܳܟ݂ ܒ݁ܰܚܛܳܗܶܐ̈ ܐܶܬ݂ܺܝܠܶܕ݁ܬ݁ : ܘܰܐܢ̱ܬ݁ ܆ ܡܰܠܶܦ݂ ܐܰܢ̱ܬ݁ ܠܰܢ ܆ ܘܰܐܦ݁ܩܽܘܗ̱ܝ ܠܒ݂ܰܪ . ܘܰܫܡܰܥ ܝܶܫܽܘܥ ܕ݁ܰܐܦ݁ܩܽܘܗ̱ܝ ܠܒ݂ܰܪ ܆ ܘܶܐܫܟ݁ܚܶܗ ܂ ܘܶܐܡܰܪ ܠܶܗ . ܐܰܢ̱ܬ݁ ܡܗܰܝܡܶܢ ܐܰܢ̱ܬ݁ ܒ݁ܰܒ݂ܪܶܗ ܕ݁ܰܐܠܳܗܳܐ ܆ ܥܢܳܐ ܗܰܘ ܕ݁ܶܐܬ݂ܰܐܣܺܝ ܂ ܘܶܐܡܰܪ . ܡܰܢܽܘ ܡܳܪܝ ܅ ܕ݁ܶܐܗܰܝܡܶܢ ܒ݁ܶܗ . ܐܳܡܰܪ ܠܶܗ ܝܶܫܽܘܥ . ܚܙܰܝܬ݁ܳܝܗ̱ܝ . ܘܗܰܘ ܕ݁ܰܡܡܰܠܶܠ ܥܰܡܳܟ݂ ܂ ܗܽܘܝܽܘ . ܗܽܘ ܕ݁ܶܝܢ ܐܶܡܰܪ . ܡܗܰܝܡܶܢ ܐ̱ܢܳܐ ܡܳܪܝ ܅ ܘܰܢܦ݂ܰܠ ܣܓ݂ܶܕ݂ ܠܶܗ ܀ ܘܶܐܡܰܪ ܝܶܫܽܘܥ . ܠܕ݂ܺܝܢܶܗ ܕ݁ܥܳܠܡܳܐ ܗܳܢܳܐ ܐܶܬ݂ܺܝܬ݂ . ܕ݁ܰܐܝܠܶܝܢ ܕ݁ܠܳܐ ܚܳܙܶܝܢ ܂ ܢܶܚܙܽܘܢ . ܘܰܐܝܠܶܝܢ ܕ݁ܚܳܙܶܝܢ ܂ ܢܶܣܡܽܘܢ . ܘܰܫܡܰܥܘ ܡܶܢ ܦ݁ܪܺܝܫܶܐ̈ ܁ ܐܰܝܠܶܝܢ ܕ݁ܥܰܡܶܗ ܗ̱ܘܰܘ ܗܳܠܶܝܢ ܆ ܘܶܐܡܰܪܘ ܠܶܗ . ܠܡܳܐ ܆ ܐܳܦ݂ ܚܢܰܢ ܣܡܰܝܳܐ̈ ܚܢܰܢ ܆ ܐܳܡܰܪ ܠܗܽܘܢ ܝܶܫܽܘܥ . ܐܶܠܽܘ ܣܡܰܝܳܐ̈ ܗ̱ܘܰܝܬ݁ܽܘܢ ܆ ܠܰܝܬ݁ ܗ̱ܘܳܬ݂ ܠܟ݂ܽܘܢ ܚܛܺܝܬ݂ܳܐ . ܗܳܫܳܐ ܕ݁ܶܝܢ ܁ ܐܳܡܪܺܝܢ ܐܢ̱ܬ݁ܽܘܢ ܂ ܕ݁ܚܳܙܶܝܢܰܢ . ܡܶܛܽܠ ܗܳܢܳܐ ܚܛܺܝܬ݂ܟ݂ܽܘܢ ܩܰܝܳܡܳܐ ܗ̱ܝ ܀܀ Chapter 10 ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܠܳܐ ܥܳܐܶܠ ܡܶܢ ܬ݁ܰܪܥܳܐ ܠܰܛܝܳܪܳܐ ܕ݁ܥܳܢܳܐ : ܐܶܠܳܐ ܣܳܠܶܩ ܡܶܢ ܕ݁ܽܘܟ݁ܳܐ ܐ̱ܚܪܳܢܝܳܐ ܆ ܗܰܘ ܓ݁ܰܢܳܒ݂ܳܐ ܗܽܘ ܘܓ݂ܰܝܳܣܳܐ . ܗܰܘ ܕ݁ܶܝܢ ܕ݁ܥܳܐܶܠ ܡܶܢ ܬ݁ܰܪܥܳܐ ܂ ܪܳܥܝܳܐ ܗܽܘ ܕ݁ܥܳܢܳܐ . ܘܰܠܗܳܢܳܐ ܢܳܛܰܪ ܬ݁ܰܪܥܳܐ ܦ݁ܳܬ݂ܰܚ ܠܶܗ ܬ݁ܰܪܥܳܐ . ܘܥܳܢܳܐ ܫܳܡܥܳܐ ܩܳܠܶܗ . ܘܥܶܪܒ݁ܰܘܗ̱ܝ̈ ܩܳܪܶܐ ܒ݁ܰܫܡܳܗܰܝܗܽܘܢ̈ ܂ ܘܡܰܦ݁ܶܩ ܠܗܽܘܢ . ܘܡܳܐ ܕ݁ܰܐܦ݁ܶܩ ܥܳܢܶܗ ܂ ܩܕ݂ܳܡܶܝܗ ܐܳܙܶܠ . ܘܥܶܪܒ݁ܰܘܗ̱ܝ̈ ܕ݁ܺܝܠܶܗ ܂ ܐܳܙܺܠ̱ܝܢ ܒ݁ܳܬ݂ܪܶܗ . ܡܶܛܽܠ ܕ݁ܝܳܕ݂ܥܺܝܢ ܩܳܠܶܗ . ܒ݁ܳܬ݂ܰܪ ܢܽܘܟ݂ܪܳܝܳܐ ܕ݁ܶܝܢ ܂ ܠܳܐ ܐܳܙܳܠ̱ܐ ܥܳܢܳܐ . ܐܶܠܳܐ ܥܳܪܩܳܐ ܡܶܢܶܗ ܂ ܕ݁ܠܳܐ ܝܳܕ݂ܥܳܐ ܩܳܠܶܗ ܕ݁ܢܽܘܟ݂ܪܳܝܳܐ . ܗܳܕ݂ܶܐ ܦ݁ܶܠܶܐܬ݂ܳܐ ܐܶܡܰܪ ܠܗܽܘܢ ܝܶܫܽܘܥ . ܗܶܢܽܘܢ ܕ݁ܶܝܢ ܂ ܠܳܐ ܝܺܕ݂ܰܥܘ ܡܳܢܳܐ ܡܰܠܶܠ ܥܰܡܗܽܘܢ . ܐܳܡܰܪ ܠܗܽܘܢ ܕ݁ܶܝܢ ܬ݁ܽܘܒ݂ ܝܶܫܽܘܥ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܶܐܢܳܐ ܐ̱ܢܳܐ ܬ݁ܰܪܥܶܗ ܕ݁ܥܳܢܳܐ . ܘܟ݂ܽܠܗܽܘܢ ܐܰܝܠܶܝܢ ܕ݁ܶܐܬ݂ܰܘ ܂ ܓ݁ܰܢܳܒ݂ܶܐ̈ ܐܶܢܽܘܢ ܘܓ݂ܰܝܳܣܶܐ̈ . ܐܶܠܳܐ ܠܳܐ ܫܶܡܥܰܬ݂ ܐܶܢܽܘܢ ܥܳܢܳܐ . ܐܶܢܳܐ ܐ̱ܢܳܐ ܬ݁ܰܪܥܳܐ . ܘܒ݂ܺܝ ܐܶܢ ܐ̱ܢܳܫ ܢܶܥܽܘܠ ܂ ܢܺܚܶܐ . ܘܢܶܥܽܘܠ ܘܢܶܦ݁ܽܘܩ ܂ ܘܪܶܥܝܳܐ ܢܶܫܟ݁ܰܚ . ܓ݁ܰܢܳܒ݂ܳܐ ܠܳܐ ܐܳܬ݂ܶܐ ܆ ܐܶܠܳܐ ܕ݁ܢܶܓ݂ܢܽܘܒ݂ ܁ ܘܰܕ݂ܢܶܩܛܽܘܠ ܂ ܘܰܕ݂ܢܰܘܒ݁ܶܕ݂ . ܐܶܢܳܐ ܐܶܬ݂ܺܝܬ݂ ܂ ܕ݁ܚܰܝܶܐ̈ ܢܶܗܘܽܘܢ ܠܗܽܘܢ . ܘܡܶܕ݁ܶܡ ܕ݁ܝܰܬ݁ܺܝܪ ܢܶܗܘܶܐ ܠܗܽܘܢ . ܐܶܢܳܐ ܐ̱ܢܳܐ ܪܳܥܝܳܐ ܛܳܒ݂ܳܐ . ܪܳܥܝܳܐ ܛܳܒ݂ܳܐ ܢܰܦ݂ܫܶܗ ܣܳܐܶܡ ܚܠܳܦ݂ ܥܳܢܶܗ . ܐܰܓ݂ܺܝܪܳܐ ܕ݁ܶܝܢ ܕ݁ܠܳܐ ܗܘܳܐ ܪܳܥܝܳܐ : ܘܠܰܘ ܕ݁ܺܝܠܶܗ ܐܶܢܽܘܢ ܥܶܪܒ݁ܶܐ̈ : ܡܳܐ ܕ݁ܰܚܙܳܐ ܕ݁ܺܐܒ݂ܳܐ ܕ݁ܳܐܬ݂ܶܐ ܆ ܫܳܒ݂ܶܩ ܥܳܢܳܐ ܂ ܘܥܳܪܶܩ . ܘܳܐܬ݂ܶܐ ܕ݁ܺܐܒ݂ܳܐ ܚܳܛܶܦ݂ ܂ ܘܰܡܒ݂ܰܕ݁ܰܪ ܠܳܗ ܠܥܳܢܳܐ . ܐܰܓ݂ܺܝܪܳܐ ܕ݁ܶܝܢ ܥܳܪܶܩ ܂ ܡܶܛܽܠ ܕ݁ܰܐܓ݂ܺܝܪܳܐ ܗܽܘ . ܘܠܳܐ ܒ݁ܛܺܝܠ ܠܶܗ ܥܰܠ ܥܳܢܳܐ . ܐܶܢܳܐ ܐ̱ܢܳܐ ܪܳܥܝܳܐ ܛܳܒ݂ܳܐ . ܘܝܳܕ݂ܰܥ ܐ̱ܢܳܐ ܠܕ݂ܺܝܠܝ ܂ ܘܡܶܬ݂ܺܝܕ݂ܰܥ ܐ̱ܢܳܐ ܡܶܢ ܕ݁ܺܝܠܝ . ܐܰܝܟ݁ܰܢܳܐ ܕ݁ܝܳܕ݂ܰܥ ܠܺܝ ܐܳܒ݂ܝ ܂ ܘܶܐܢܳܐ ܝܳܕ݂ܰܥ ܐ̱ܢܳܐ ܠܳܐܒ݂ܝ . ܘܢܰܦ݂ܫܝ ܣܳܐܶܡ ܐ̱ܢܳܐ ܚܠܳܦ݂ ܥܳܢܳܐ . ܐܺܝܬ݂ ܠܺܝ ܕ݁ܶܝܢ ܐܳܦ݂ ܥܶܪܒ݁ܶܐ̈ ܐ̱ܚܪܳܢܶܐ̈ ܆ ܐܰܝܠܶܝܢ ܕ݁ܠܳܐ ܗܘܰܘ ܡܶܢ ܛܝܳܪܳܐ ܗܳܢܳܐ . ܘܳܐܦ݂ ܠܗܽܘܢ ܘܳܠܶܐ ܠܺܝ ܠܡܰܝܬ݁ܳܝܽܘ ܐܶܢܽܘܢ ܂ ܘܢܶܫܡܥܽܘܢ ܩܳܠܝ . ܘܬ݂ܶܗܘܶܐ ܥܳܢܳܐ ܟ݁ܽܠܳܗ ܚܕ݂ܳܐ ܂ ܘܚܰܕ݂ ܪܳܥܝܳܐ . ܡܶܛܽܠ ܗܳܢܳܐ ܐܳܒ݂ܝ ܪܳܚܶܡ ܠܺܝ ܆ ܕ݁ܶܐܢܳܐ ܣܳܐܶܡ ܐ̱ܢܳܐ ܢܰܦ݂ܫܝ ܂ ܕ݁ܬ݂ܽܘܒ݂ ܐܶܣܒ݂ܺܝܗ . ܠܳܐ ܗ̱ܘܳܐ ܐ̱ܢܳܫ ܫܳܩܶܠ ܠܳܗ ܡܶܢܝ . ܐܶܠܳܐ ܐܶܢܳܐ ܣܳܐܶܡ ܐ̱ܢܳܐ ܠܳܗ ܡܶܢ ܨܶܒ݂ܝܳܢܝ . ܫܰܠܺܝܛ ܐ̱ܢܳܐ ܓ݁ܶܝܪ ܕ݁ܰܐܣܺܝܡܺܝܗ ܆ ܘܫܰܠܺܝܛ ܐ̱ܢܳܐ ܕ݁ܬ݂ܽܘܒ݂ ܐܶܣܒ݂ܺܝܗ . ܕ݁ܗܳܢܳܐ ܦ݁ܽܘܩܕ݁ܳܢܳܐ ܩܰܒ݁ܠܶܬ݂ ܡܶܢ ܐܳܒ݂ܝ ܀ ܘܰܗܘܳܬ݂ ܬ݁ܽܘܒ݂ ܦ݁ܳܠܓ݁ܽܘܬ݂ܳܐ ܒ݁ܰܝܢܰܝ̈ ܝܺܗܽܘܕ݂ܳܝܶܐ̈ ܡܶܛܽܠ ܡܶܠܶܐ̈ ܗܳܠܶܝܢ . ܘܳܐܡܪܺܝܢ ܗ̱ܘܰܘ ܣܰܓ݁ܺܝܶܐܐ̈ ܡܶܢܗܽܘܢ ܆ ܕ݁ܕ݂ܰܝܘܳܐ ܐܺܝܬ݂ ܠܶܗ ܘܡܶܫܢܳܐ ܫܢܳܐ . ܡܳܢܳܐ ܫܳܡܥܺܝܢ ܐܢ̱ܬ݁ܽܘܢ ܠܶܗ . ܐ̱ܚܪܳܢܶܐ̈ ܕ݁ܶܝܢ ܐܳܡܪܺܝܢ ܗ̱ܘܰܘ . ܗܳܠܶܝܢ ܡܶܠܶܐ̈ ܂ ܠܳܐ ܗ̱ܘܰܝ̈ ܕ݁ܕ݂ܰܝܘܳܢܳܐ . ܠܡܳܐ ܆ ܕ݁ܰܝܘܳܐ ܡܶܫܟ݁ܰܚ ܥܰܝܢܶܐ̈ ܕ݁ܣܰܡܝܳܐ ܠܰܡܦ݂ܰܬ݁ܳܚܽܘ ܀ ܗܘܳܐ ܕ݁ܶܝܢ ܥܺܐܕ݂ܳܐ ܕ݁ܚܽܘܕ݂ܳܬ݂ܳܐ ܒ݁ܽܐܘܪܺܫܠܶܡ ܆ ܘܣܰܬ݂ܘܳܐ ܗ̱ܘܳܐ . ܘܰܡܗܰܠܶܟ݂ ܗ̱ܘܳܐ ܝܶܫܽܘܥ ܒ݁ܗܰܝܟ݁ܠܳܐ ܒ݁ܶܐܣܛܘܳܐ ܕ݁ܰܫܠܶܝܡܽܘܢ . ܘܚܰܕ݂ܪܽܘܗ̱ܝ ܝܺܗܽܘܕ݂ܳܝܶܐ̈ ܂ ܘܳܐܡܪܺܝܢ ܠܶܗ . ܥܕ݂ܰܡܳܐ ܠܶܐܡܰܬ݂ܝ ܢܳܣܶܒ݂ ܐܰܢ̱ܬ݁ ܢܰܦ݂ܫܰܢ . ܐܶܢ ܐܰܢ̱ܬ݁ ܗ̱ܽܘ ܡܫܺܝܚܳܐ ܁ ܐܶܡܰܪ ܠܰܢ ܓ݁ܰܠܝܳܐܝܺܬ݂ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܐܶܡܪܶܬ݂ ܠܟ݂ܽܘܢ ܂ ܘܠܳܐ ܡܗܰܝܡܢܺܝܢ ܐܢ̱ܬ݁ܽܘܢ . ܘܰܥܒ݂ܳܕ݂ܶܐ̈ ܕ݁ܶܐܢܳܐ ܥܳܒ݂ܶܕ݂ ܐ̱ܢܳܐ ܒ݁ܰܫܡܶܗ ܕ݁ܳܐܒ݂ܝ ܆ ܗܶܢܽܘܢ ܣܳܗܕ݁ܺܝܢ ܥܠܰܝ . ܐܶܠܳܐ ܐܰܢ̱ܬ݁ܽܘܢ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܁ ܡܶܛܽܠ ܕ݁ܠܳܐ ܗܘܰܝܬ݁ܽܘܢ ܡܶܢ ܥܶܪܒ݁ܰܝ̈ . ܐܰܝܟ݁ܰܢܳܐ ܕ݁ܶܐܡܪܶܬ݂ ܠܟ݂ܽܘܢ . ܥܶܪܒ݁ܶܐ̈ ܕ݁ܺܝܠܝ ܩܳܠܝ ܫܳܡܥܺܝܢ . ܘܶܐܢܳܐ ܝܳܕ݂ܰܥ ܐ̱ܢܳܐ ܠܗܽܘܢ . ܘܗܶܢܽܘܢ ܐܳܬ݂ܶܝܢ ܒ݁ܳܬ݂ܰܪܝ . ܘܶܐܢܳܐ ܝܳܗܶܒ݂ ܐ̱ܢܳܐ ܠܗܽܘܢ ܂ ܚܰܝܶܐ̈ ܕ݁ܰܠܥܳܠܰܡ . ܘܠܳܐ ܢܺܐܒ݂ܕ݁ܽܘܢ ܠܥܳܠܰܡ . ܘܠܳܐ ܐ̱ܢܳܫ ܢܶܚܛܽܘܦ݂ ܐܶܢܽܘܢ ܡܶܢ ܐܺܝܕ݂ܰܝ̈ . ܐܳܒ݂ܝ ܓ݁ܶܝܪ ܕ݁ܝܰܗ̱ܒ݂ ܠܺܝ ܡܶܢ ܟ݁ܽܠ ܪܰܒ݂ ܗ̱ܽܘ . ܘܠܳܐ ܐ̱ܢܳܫ ܡܶܫܟ݁ܰܚ ܕ݁ܡܶܢ ܐܺܝܕ݂ܶܗ ܕ݁ܳܐܒ݂ܝ ܢܶܚܛܽܘܦ݂ . ܐܶܢܳܐ ܘܳܐܒ݂ܝ ܂ ܚܰܕ݂ ܚܢܰܢ . ܘܰܫܩܰܠܘ ܬ݁ܽܘܒ݂ ܝܺܗܽܘܕ݂ܳܝܶܐ̈ ܟ݁ܺܐܦ݂ܶܐ̈ ܠܡܶܪܓ݁ܡܶܗ ܀.܀.܀܀ ܐܳܡܰܪ ܠܗܽܘܢ ܝܶܫܽܘܥ . ܣܰܓ݁ܺܝܶܐܐ̈ ܥܒ݂ܳܕ݂ܶܐ̈ ܫܰܦ݁ܺܝܪܶܐ̈ ܡܶܢ ܠܘܳܬ݂ ܐܳܒ݂ܝ ܚܰܘܺܝܬ݂ܟ݂ܽܘܢ . ܡܶܛܽܠ ܐܰܝܢܳܐ ܥܒ݂ܳܕ݂ܳܐ ܡܶܢܗܽܘܢ ܪܳܓ݂ܡܺܝܢ ܐܢ̱ܬ݁ܽܘܢ ܠܺܝ . ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܠܳܐ ܗ̱ܘܳܐ ܡܶܛܽܠ ܥܒ݂ܳܕ݂ܶܐ̈ ܫܰܦ݁ܺܝܪܶܐ̈ ܪܳܓ݂ܡܺܝܢ ܚ̱ܢܰܢ ܠܳܟ݂ . ܐܶܠܳܐ ܡܶܛܽܠ ܕ݁ܰܡܓ݂ܰܕ݁ܶܦ݂ ܐܰܢ̱ܬ݁ . ܘܟ݂ܰܕ݂ ܐܺܝܬ݂ܰܝܟ݁ ܒ݁ܰܪ ܐ̱ܢܳܫܳܐ ܆ ܥܳܒ݂ܶܕ݂ ܐܰܢ̱ܬ݁ ܢܰܦ݂ܫܳܟ݂ ܐܰܠܳܗܳܐ . ܐܳܡܰܪ ܠܗܽܘܢ ܝܶܫܽܘܥ . ܠܳܐ ܗ̱ܘܳܐ ܗܳܟ݂ܰܢܳܐ ܟ݁ܬ݂ܺܝܒ݂ ܒ݁ܢܳܡܽܘܣܟ݂ܽܘܢ ܆ ܕ݁ܶܐܢܳܐ ܐܶܡܪܶܬ݂ ܕ݁ܰܐܠܳܗܶܐ̈ ܐܰܢ̱ܬ݁ܽܘܢ ܆ ܐܶܢ ܠܗܳܢܽܘܢ ܐܶܡܰܪ ܐܰܠܳܗܶܐ̈ : ܡܶܛܽܠ ܕ݁ܰܠܘܳܬ݂ܗܽܘܢ ܗܘܳܬ݂ ܡܶܠܬ݂ܳܐ ܕ݁ܰܐܠܳܗܳܐ : ܘܠܳܐ ܡܶܫܟ݁ܰܚ ܟ݁ܬ݂ܳܒ݂ܳܐ ܕ݁ܢܶܫܬ݁ܪܶܐ ܇ ܠܰܐܝܢܳܐ ܕ݁ܰܐܒ݂ܳܐ ܩܰܕ݁ܫܶܗ ܘܫܰܕ݁ܪܶܗ ܠܥܳܠܡܳܐ : ܐܰܢ̱ܬ݁ܽܘܢ ܐܳܡܪܺܝܢ ܐܢ̱ܬ݁ܽܘܢ ܁ ܕ݁ܰܡܓ݂ܰܕ݁ܶܦ݂ ܐܰܢ̱ܬ݁ : ܥܰܠ ܕ݁ܶܐܡܪܶܬ݂ ܠܟ݂ܽܘܢ ܁ ܕ݁ܰܒ݂ܪܶܗ ܐ̱ܢܳܐ ܕ݁ܰܐܠܳܗܳܐ ܆ ܐܶܠܳܐ ܥܳܒ݂ܶܕ݂ ܐ̱ܢܳܐ ܥܒ݂ܳܕ݂ܶܐ̈ ܕ݁ܳܐܒ݂ܝ ܂ ܠܳܐ ܬ݁ܗܰܝܡܢܽܘܢܳܢܝ . ܐܶܢ ܕ݁ܶܝܢ ܥܳܒ݂ܶܕ݂ ܐ̱ܢܳܐ ܆ ܐܳܦ݂ܶܢ ܠܺܝ ܠܳܐ ܡܗܰܝܡܢܺܝܢ ܐܢ̱ܬ݁ܽܘܢ ܆ ܠܗܽܘܢ ܠܰܥܒ݂ܳܕ݂ܶܐ̈ ܗܰܝܡܶܢܘ . ܕ݁ܬ݂ܶܕ݁ܥܽܘܢ ܘܰܬ݂ܗܰܝܡܢܽܘܢ ܆ ܕ݁ܳܐܒ݂ܝ ܒ݁ܺܝ ܂ ܘܶܐܢܳܐ ܒ݁ܳܐܒ݂ܝ ܀ ܘܰܒ݂ܥܰܘ ܗ̱ܘܰܘ ܬ݁ܽܘܒ݂ ܕ݁ܢܶܐܚܕ݁ܽܘܢܳܝܗ̱ܝ ܆ ܘܰܢܦ݂ܰܩ ܠܶܗ ܡܶܢ ܒ݁ܶܝܬ݂ ܐܺܝܕ݂ܰܝܗܽܘܢ̈ ܁ ܘܶܐܙܰܠ ܠܶܗ ܠܥܶܒ݂ܪܳܐ ܕ݁ܝܽܘܪܕ݁ܢܳܢ ܇ ܠܕ݂ܽܘܟ݁ܬ݂ܳܐ ܐܰܝܟ݁ܳܐ ܕ݁ܺܐܝܬ݂ܰܘܗ̱ܝ ܗ̱ܘܳܐ ܝܽܘܚܰܢܳܢ ܡܶܢ ܩܕ݂ܺܝܡ ܟ݁ܰܕ݂ ܡܰܥܡܶܕ݂ ܗ̱ܘܳܐ ܂ ܘܰܗܘܳܐ ܬ݁ܰܡܳܢ ܀ ܘܶܐܬ݂ܰܘ ܐ̱ܢܳܫܳܐ̈ ܣܰܓ݁ܺܝܶܐܐ̈ ܠܘܳܬ݂ܶܗ ܂ ܘܳܐܡܪܺܝܢ ܗ̱ܘܰܘ . ܕ݁ܝܽܘܚܰܢܳܢ ܂ ܐܳܦ݂ ܠܳܐ ܚܕ݂ܳܐ ܐܳܬ݂ܳܐ ܥܒ݂ܰܕ݂ . ܟ݁ܽܠܡܶܕ݁ܶܡ ܕ݁ܶܝܢ ܕ݁ܶܐܡܰܪ ܝܽܘܚܰܢܳܢ ܥܰܠ ܓ݁ܰܒ݂ܪܳܐ ܗܳܢܳܐ ܂ ܫܰܪܺܝܪ ܗ̱ܽܘ . ܘܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ ܀܀ Chapter 11 ܐܺܝܬ݂ ܗ̱ܘܳܐ ܕ݁ܶܝܢ ܚܰܕ݂ ܕ݁ܰܟ݂ܪܺܝܗ . ܠܳܥܳܙܰܪ ܡܶܢ ܒ݁ܶܝܬ݂ ܥܰܢܝܳܐ ܩܪܺܝܬ݂ܳܐ ܐܰܚܽܘܗ ܕ݁ܡܰܪܝܰܡ ܘܰܕ݂ܡܳܪܬ݁ܳܐ ܀ ܡܰܪܝܰܡ ܕ݁ܶܝܢ ܗܳܕ݂ܶܐ ܐܺܝܬ݂ܶܝܗ . ܗܳܝ ܕ݁ܡܶܫܚܰܬ݂ ܒ݁ܒ݂ܶܣܡܳܐ ܪܶܓ݂ܠܰܘܗ̱ܝ̈ ܕ݁ܝܶܫܽܘܥ ܁ ܘܫܰܘܝܰܬ݂ ܒ݁ܣܰܥܪܳܗ . ܐܰܚܽܘܗ ܗ̱ܘܳܐ ܕ݁ܗܳܕ݂ܶܐ ܠܳܥܳܙܰܪ ܕ݁ܰܟ݂ܪܺܝܗ ܗ̱ܘܳܐ ܀ ܘܫܰܕ݁ܰܪܶܝܢ̈ ܬ݁ܰܪܬ݁ܰܝܗܶܝܢ̈ ܐܰܚܘܳܬ݂ܶܗ̈ ܠܘܳܬ݂ ܝܶܫܽܘܥ ܂ ܘܳܐܡܪܳܢ̈ . ܡܳܪܰܢ ܁ ܗܳܐ ܗܰܘ ܕ݁ܪܳܚܶܡ ܐܰܢ̱ܬ݁ ܟ݁ܪܺܝܗ . ܝܶܫܽܘܥ ܕ݁ܶܝܢ ܐܶܡܰܪ . ܗܳܢܳܐ ܟ݁ܽܘܪܗܳܢܳܐ ܠܳܐ ܗܘܳܐ ܕ݁ܡܰܘܬ݁ܳܐ . ܐܶܠܳܐ ܚܠܳܦ݂ ܬ݁ܶܫܒ݁ܽܘܚܬ݁ܳܐ ܕ݁ܰܐܠܳܗܳܐ ܂ ܕ݁ܢܶܫܬ݁ܰܒ݁ܰܚ ܒ݁ܪܶܗ ܕ݁ܰܐܠܳܗܳܐ ܡܶܛܽܠܳܬ݂ܶܗ . ܡܰܚܶܒ݂ ܗ̱ܘܳܐ ܕ݁ܶܝܢ ܗܽܘ ܝܶܫܽܘܥ ܠܡܳܪܬ݁ܳܐ ܘܰܠܡܰܪܝܰܡ ܘܰܠܠܳܥܳܙܰܪ . ܘܟ݂ܰܕ݂ ܫܡܰܥ ܕ݁ܰܟ݂ܪܺܝܗ ܆ ܟ݁ܰܬ݁ܰܪ ܒ݁ܕ݂ܽܘܟ݁ܬ݂ܳܐ ܕ݁ܺܐܝܬ݂ܰܘܗ̱ܝ ܗ̱ܘܳܐ ܂ ܬ݁ܪܶܝܢ̈ ܝܰܘܡܺܝܢ̈ . ܘܒ݂ܳܬ݂ܰܪܟ݁ܶܢ ܐܶܡܰܪ ܠܬ݂ܰܠܡܺܝܕ݂ܰܘܗ̱ܝ̈ . ܬ݁ܰܘ ܢܺܐܙܰܠ ܬ݁ܽܘܒ݂ ܠܺܝܗܽܘܕ݂ . ܐܳܡܪܺܝܢ ܠܶܗ ܬ݁ܰܠܡܺܝܕ݂ܰܘܗ̱ܝ̈ . ܪܰܒ݁ܰܢ ܆ ܗܳܫܳܐ ܝܺܗܽܘܕ݂ܳܝܶܐ̈ ܒ݁ܳܥܶܝܢ ܗ̱ܘܰܘ ܠܡܶܪܓ݁ܡܳܟ݂ . ܘܬ݂ܽܘܒ݂ ܆ ܐܳܙܶܠ ܐܰܢ̱ܬ݁ ܠܬ݂ܰܡܳܢ ܆ ܐܳܡܰܪ ܠܗܽܘܢ ܝܶܫܽܘܥ . ܠܳܐ ܬ݁ܰܪܬ݁ܰܥܶܣܪܶܐ̈ ܫܳܥܺܝܢ̈ ܐܺܝܬ݂ ܒ݁ܝܰܘܡܳܐ ܆ ܘܶܐܢ ܐ̱ܢܳܫ ܡܗܰܠܶܟ݂ ܒ݁ܺܐܝܡܳܡܳܐ ܂ ܠܳܐ ܡܶܬ݁ܬ݁ܩܶܠ . ܡܶܛܽܠ ܕ݁ܚܳܙܶܐ ܢܽܘܗܪܶܗ ܕ݁ܥܳܠܡܳܐ ܗܳܢܳܐ . ܐܶܢ ܐ̱ܢܳܫ ܕ݁ܶܝܢ ܒ݁ܠܺܠܝܳܐ ܢܗܰܠܶܟ݂ ܂ ܡܶܬ݁ܬ݁ܩܶܠ . ܡܶܛܽܠ ܕ݁ܢܰܗܺܝܪܳܐ ܠܰܝܬ݁ ܒ݁ܶܗ . ܗܳܠܶܝܢ ܐܶܡܰܪ ܝܶܫܽܘܥ . ܘܒ݂ܳܬ݂ܰܪܟ݁ܶܢ ܐܶܡܰܪ ܠܗܽܘܢ . ܠܳܥܳܙܰܪ ܪܳܚܡܰܢ ܫܟ݂ܶܒ݂ . ܐܶܠܳܐ ܐܳܙܶܠ ܐ̱ܢܳܐ ܂ ܕ݁ܰܐܥܺܝܪܺܝܘܗ̱ܝ . ܐܳܡܪܺܝܢ ܠܶܗ ܬ݁ܰܠܡܺܝܕ݂ܰܘܗ̱ܝ̈ . ܡܳܪܰܢ ܆ ܐܶܢ ܕ݁ܡܶܟ݂ ܂ ܡܶܬ݂ܚܠܶܡ . ܗܽܘ ܕ݁ܶܝܢ ܝܶܫܽܘܥ ܐܶܡܰܪ ܥܰܠ ܡܰܘܬ݁ܶܗ ܆ ܘܗܶܢܽܘܢ ܣܒ݂ܰܪܘ ܂ ܕ݁ܥܰܠ ܡܰܕ݂ܡܟ݂ܳܐ ܗܽܘ ܕ݁ܫܶܢܬ݂ܳܐ ܐܶܡܰܪ . ܗܳܝܕ݁ܶܝܢ ܐܶܡܰܪ ܠܗܽܘܢ ܝܶܫܽܘܥ ܂ ܦ݁ܫܺܝܩܳܐܝܺܬ݂ . ܠܳܥܳܙܰܪ ܡܺܝܬ݂ ܠܶܗ . ܘܚܳܕ݂ܶܐ ܐ̱ܢܳܐ ܕ݁ܠܳܐ ܗܘܺܝܬ݂ ܬ݁ܰܡܳܢ ܇ ܡܶܛܽܠܳܬ݂ܟ݂ܽܘܢ ܂ ܕ݁ܰܬ݂ܗܰܝܡܢܽܘܢ . ܐܶܠܳܐ ܗܰܠܶܟ݂ܘ ܠܬ݂ܰܡܳܢ . ܐܳܡܰܪ ܬ݁ܳܐܘܡܰܐ ܂ ܕ݁ܡܶܬ݂ܶܐܡܰܪ ܬ݁ܳܐܡܳܐ ܂ ܠܬ݂ܰܠܡܺܝܕ݂ܶܐ̈ ܚܰܒ݂ܪܰܘܗ̱ܝ̈ . ܢܺܐܙܰܠ ܐܳܦ݂ ܚܢܰܢ ܢܡܽܘܬ݂ ܥܰܡܶܗ . ܘܶܐܬ݂ܳܐ ܝܶܫܽܘܥ ܠܒ݂ܶܝܬ݂ ܥܰܢܝܳܐ . ܘܶܐܫܟ݁ܰܚ ܕ݁ܰܐܪܒ݁ܥܳܐ̈ ܠܶܗ ܝܰܘܡܺܝܢ̈ ܕ݁ܺܐܝܬ݂ܰܘܗ̱ܝ ܒ݁ܒ݂ܶܝܬ݂ ܩܒ݂ܽܘܪܳܐ . ܐܺܝܬ݂ܶܝܗ ܗ̱ܘܳܬ݂ ܕ݁ܶܝܢ ܒ݁ܶܝܬ݂ ܥܰܢܝܳܐ ܂ ܥܰܠ ܓ݁ܶܢ̱ܒ݂ ܐܽܘܪܺܫܠܶܡ . ܟ݁ܰܕ݂ ܦ݁ܰܪܺܝܩܳܐ ܡܶܢܳܗ ܐܰܝܟ݂ ܐܶܣܛܕ݂ܰܘܳܬ݂ܳܐ̈ ܚܰܡܶܫܬ݁ܰܥܣܰܪ . ܘܣܰܓ݁ܺܝܶܐܐ̈ ܡܶܢ ܝܺܗܽܘܕ݂ܳܝܶܐ̈ ܐܰܬ݁ܺܝܐܝܺܢ ܗ̱ܘܰܘ ܠܘܳܬ݂ ܡܳܪܬ݁ܳܐ ܘܡܰܪܝܰܡ ܇ ܕ݁ܢܶܡܠܽܘܢ ܒ݁ܠܶܒ݁ܗܶܝܢ ܡܶܛܽܠ ܐܰܚܽܘܗܶܝܢ . ܡܳܪܬ݁ܳܐ ܕ݁ܶܝܢ ܟ݁ܰܕ݂ ܫܶܡܥܰܬ݂ ܕ݁ܝܶܫܽܘܥ ܐܶܬ݂ܳܐ ܂ ܢܶܦ݂ܩܰܬ݂ ܠܽܐܘܪܥܶܗ . ܡܰܪܝܰܡ ܕ݁ܶܝܢ ܒ݁ܒ݂ܰܝܬ݁ܳܐ ܝܳܬ݂ܒ݁ܳܐ ܗ̱ܘܳܬ݂ . ܘܶܐܡܪܰܬ݂ ܡܳܪܬ݁ܳܐ ܠܝܶܫܽܘܥ . ܡܳܪܝ ܆ ܐܶܠܽܘ ܬ݁ܢܳܢ ܗ̱ܘܰܝܬ݁ ܂ ܠܳܐ ܡܳܐܶܬ݂ ܗ̱ܘܳܐ ܐܳܚܝ . ܐܶܠܳܐ ܐܳܦ݂ ܗܳܫܳܐ ܝܳܕ݂ܥܳܐ ܐ̱ܢܳܐ ܂ ܕ݁ܰܟ݂ܡܳܐ ܕ݁ܬ݂ܶܫܰܐܠ ܠܰܐܠܳܗܳܐ ܂ ܝܳܗܶܒ݂ ܠܳܟ݂ . ܐܳܡܰܪ ܠܳܗ ܝܶܫܽܘܥ . ܩܳܐܶܡ ܐܰܚܽܘܟ݂ܝ . ܐܳܡܪܳܐ ܠܶܗ ܡܳܪܬ݁ܳܐ . ܝܳܕ݂ܥܳܐܢܳܐ ܕ݁ܩܳܐܶܡ ܒ݁ܢܽܘܚܳܡܳܐ ܒ݁ܝܰܘܡܳܐ ܐ̱ܚܪܳܝܳܐ . ܐܳܡܰܪ ܠܳܗ ܝܶܫܽܘܥ . ܐܶܢܳܐ ܐ̱ܢܳܐ ܢܽܘܚܳܡܳܐ ܂ ܘܚܰܝܶܐ̈ . ܡܰܢ ܕ݁ܰܡܗܰܝܡܶܢ ܒ݁ܺܝ ܁ ܐܳܦ݂ܶܢ ܢܡܽܘܬ݂ ܢܺܚܶܐ ܆ ܘܟ݂ܽܠ ܕ݁ܚܰܝ ܘܰܡܗܰܝܡܶܢ ܒ݁ܺܝ ܁ ܠܥܳܠܰܡ ܂ ܠܳܐ ܢܡܽܘܬ݂ . ܡܗܰܝܡܢܰܬ݁ܝ ܗܳܕ݂ܶܐ ܆ ܐܳܡܪܳܐ ܠܶܗ . ܐܺܝܢ ܡܳܪܝ ܅ ܐܶܢܳܐ ܡܗܰܝܡܢܳܐ ܐ̱ܢܳܐ ܆ ܕ݁ܰܐܢ̱ܬ݁ ܗ̱ܽܘ ܡܫܺܝܚܳܐ ܒ݁ܪܶܗ ܕ݁ܰܐܠܳܗܳܐ ܕ݁ܳܐܬ݂ܶܐ ܠܥܳܠܡܳܐ ܀ ܘܟ݂ܰܕ݂ ܐܶܡܪܰܬ݂ ܗܳܠܶܝܢ ܆ ܐܶܙܰܠ̱ܬ݂ ܩܪܳܬ݂ ܠܡܰܪܝܰܡ ܚܳܬ݂ܳܗ ܟ݁ܰܣܝܳܐܝܺܬ݂ ܂ ܘܳܐܡܪܳܐ ܠܳܗ . ܪܰܒ݁ܰܢ ܐܶܬ݂ܳܐ ܂ ܘܩܳܪܶܐ ܠܶܟ݂ܝ . ܘܡܰܪܝܰܡ ܟ݁ܰܕ݂ ܫܶܡܥܰܬ݂ ܆ ܩܳܡܰܬ݂ ܥܓ݂ܰܠ ܂ ܘܳܐܬ݂ܝܳܐ ܗ̱ܘܳܬ݂ ܠܘܳܬ݂ܶܗ . ܗܽܘ ܕ݁ܶܝܢ ܝܶܫܽܘܥ ܂ ܠܳܐ ܥܕ݂ܰܟ݁ܺܝܠ ܐܶܬ݂ܳܐ ܗ̱ܘܳܐ ܠܰܩܪܺܝܬ݂ܳܐ . ܐܶܠܳܐ ܒ݁ܳܗ ܗ̱ܘܳܐ ܒ݁ܗܳܝ ܕ݁ܽܘܟ݁ܬ݂ܳܐ ܕ݁ܶܐܪܰܥܬ݂ܶܗ ܡܳܪܬ݁ܳܐ . ܐܳܦ݂ ܗܳܢܽܘܢ ܕ݁ܶܝܢ ܝܺܗܽܘܕ݂ܳܝܶܐ̈ ܁ ܕ݁ܺܐܝܬ݂ ܗ̱ܘܰܘ ܥܰܡܳܗ ܒ݁ܒ݂ܰܝܬ݁ܳܐ ܕ݁ܰܡܒ݂ܰܝܐܝܺܢ ܗ̱ܘܰܘ ܠܳܗ ܆ ܕ݁ܰܚܙܰܘ ܠܡܰܪܝܰܡ ܕ݁ܰܥܓ݂ܰܠ ܩܳܡܰܬ݂ ܢܶܦ݂ܩܰܬ݂ : ܐܶܙܰܠܘ ܠܗܽܘܢ ܒ݁ܳܬ݂ܪܳܗ . ܣܒ݂ܰܪܘ ܓ݁ܶܝܪ ܕ݁ܰܠܩܰܒ݂ܪܳܐ ܐܳܙܳܠ̱ܐ ܠܡܶܒ݂ܟ݁ܳܐ . ܗܺܝ ܕ݁ܶܝܢ ܡܰܪܝܰܡ ܟ݁ܰܕ݂ ܐܶܬ݂ܳܬ݂ ܐܰܝܟ݁ܳܐ ܕ݁ܺܐܝܬ݂ܰܘܗ̱ܝ ܗ̱ܘܳܐ ܝܶܫܽܘܥ ܂ ܘܰܚܙܳܬ݂ܶܗ ܆ ܢܶܦ݂ܠܰܬ݂ ܥܰܠ ܪܶܓ݂ܠܰܘܗ̱ܝ̈ ܂ ܘܳܐܡܪܳܐ ܠܶܗ . ܐܶܠܽܘ ܬ݁ܢܳܢ ܗ̱ܘܰܝܬ݁ ܡܳܪܝ ܂ ܠܳܐ ܡܳܐܶܬ݂ ܗ̱ܘܳܐ ܐܳܚܝ . ܝܶܫܽܘܥ ܕ݁ܶܝܢ ܟ݁ܰܕ݂ ܚܙܳܗ ܕ݁ܒ݂ܳܟ݂ܝܳܐ : ܘܠܺܝܗܽܘܕ݂ܳܝܶܐ̈ ܗܳܢܽܘܢ ܕ݁ܶܐܬ݂ܰܘ ܥܰܡܳܗ ܕ݁ܒ݂ܳܟ݂ܶܝܢ ܆ ܐܶܬ݂ܥܰܙܰܙ ܒ݁ܪܽܘܚܶܗ ܁ ܘܰܐܙܺܝܥ ܢܰܦ݂ܫܶܗ ܂ ܘܶܐܡܰܪ . ܐܰܝܟ݁ܳܐ ܣܳܡܬ݁ܽܘܢܳܝܗ̱ܝ . ܘܳܐܡܪܺܝܢ ܠܶܗ . ܡܳܪܰܢ ܬ݁ܳܐ ܚܙܺܝ . ܘܳܐܬ݂ܝܳܢ̈ ܗ̱ܘܰܝ̈ ܕ݁ܶܡܥܰܘܗ̱ܝ̈ ܕ݁ܝܶܫܽܘܥ ܂ ܘܳܐܡܪܺܝܢ ܗ̱ܘܰܘ ܝܺܗܽܘܕ݂ܳܝܶܐ̈ . ܚܙܰܘ ܟ݁ܡܳܐ ܪܳܚܶܡ ܗ̱ܘܳܐ ܠܶܗ . ܐ̱ܢܳܫܺܝܢ̈ ܕ݁ܶܝܢ ܡܶܢܗܽܘܢ ܐܶܡܰܪܘ . ܠܳܐ ܡܶܫܟ݁ܰܚ ܗ̱ܘܳܐ ܗܳܢܳܐ ܕ݁ܦ݂ܰܬ݁ܰܚ ܥܰܝܢܰܘܗ̱ܝ̈ ܕ݁ܗܰܘ ܣܰܡܝܳܐ : ܢܶܥܒ݁ܶܕ݂ ܆ ܕ݁ܳܐܦ݂ ܗܳܢܳܐ ܠܳܐ ܢܡܽܘܬ݂ ܆ ܝܶܫܽܘܥ ܕ݁ܶܝܢ ܟ݁ܰܕ݂ ܡܶܬ݂ܥܰܙܰܙ ܒ݁ܰܝܢܰܘܗ̱ܝ̈ ܘܠܶܗ ܂ ܐܶܬ݂ܳܐ ܠܒ݂ܶܝܬ݂ ܩܒ݂ܽܘܪܳܐ . ܘܗܽܘ ܒ݁ܶܝܬ݂ ܩܒ݂ܽܘܪܳܐ ܐܺܝܬ݂ܰܘܗ̱ܝ ܗ̱ܘܳܐ ܡܥܰܪܬ݂ܳܐ . ܘܟ݂ܺܐܦ݂ܳܐ ܣܺܝܡܳܐ ܗ̱ܘܳܬ݂ ܥܰܠ ܬ݁ܰܪܥܶܗ ܀.܀.܀܀ ܘܶܐܡܰܪ ܝܶܫܽܘܥ . ܫܩܽܘܠܘ ܟ݁ܺܐܦ݂ܳܐ ܗܳܕ݂ܶܐ . ܐܳܡܪܳܐ ܠܶܗ ܡܳܪܬ݁ܳܐ ܚܳܬ݂ܶܗ ܕ݁ܗܰܘ ܡܺܝܬ݂ܳܐ . ܡܳܪܝ ܂ ܡܶܢ ܟ݁ܰܕ݁ܽܘ ܣܪܺܝ ܠܶܗ . ܐܰܪܒ݁ܥܳܐ ܠܶܗ ܓ݁ܶܝܪ ܝܰܘܡܺܝܢ̈ . ܐܳܡܰܪ ܠܳܗ ܝܶܫܽܘܥ . ܠܳܐ ܐܶܡܪܶܬ݂ ܠܶܟ݂ܝ ܆ ܕ݁ܶܐܢ ܬ݁ܗܰܝܡܢܺܝܢ ܬ݁ܶܚܙܶܝܢ ܫܽܘܒ݂ܚܶܗ ܕ݁ܰܐܠܳܗܳܐ ܆ ܘܰܫܩܰܠܘ ܟ݁ܺܐܦ݂ܳܐ ܗܳܝ . ܘܗܽܘ ܝܶܫܽܘܥ ܐܰܪܺܝܡ ܥܰܝܢܰܘܗ̱ܝ̈ ܠܥܶܠ ܂ ܘܶܐܡܰܪ . ܐܰܒ݂ܳܐ ܂ ܡܰܘܕ݁ܶܐ ܐ̱ܢܳܐ ܠܳܟ݂ ܕ݁ܰܫܡܰܥܬ݁ܳܢܝ . ܘܶܐܢܳܐ ܝܳܕ݂ܰܥ ܐ̱ܢܳܐ ܂ ܕ݁ܰܒ݂ܟ݂ܽܠܙܒ݂ܰܢ ܫܳܡܰܥ ܐܰܢ̱ܬ݁ ܠܺܝ . ܐܶܠܳܐ ܡܶܛܽܠ ܟ݁ܶܢܫܳܐ ܗܳܢܳܐ ܕ݁ܩܳܐܶܡ ܐܳܡܰܪ ܐ̱ܢܳܐ ܗܳܠܶܝܢ ܆ ܕ݁ܰܢܗܰܝܡܢܽܘܢ ܂ ܕ݁ܰܐܢ̱ܬ݁ ܫܰܕ݁ܰܪܬ݁ܳܢܝ . ܘܟ݂ܰܕ݂ ܐܶܡܰܪ ܗܳܠܶܝܢ ܆ ܩܥܳܐ ܒ݁ܩܳܠܳܐ ܪܳܡܳܐ . ܠܳܥܳܙܰܪ ܬ݁ܳܐ ܠܒ݂ܰܪ . ܘܰܢܦ݂ܰܩ ܗܰܘ ܡܺܝܬ݂ܳܐ ܆ ܟ݁ܰܕ݂ ܐܰܣܺܝܪܳܢ̈ ܐܺܝܕ݂ܰܘܗ̱ܝ̈ ܘܪܶܓ݂ܠܰܘܗ̱ܝ̈ ܒ݁ܦ݂ܶܣܩܝܳܬ݂ܳܐ̈ . ܘܰܐܦ݁ܰܘܗ̱ܝ̈ ܐܰܣܺܝܪܳܢ̈ ܒ݁ܣܽܘܕ݂ܳܪܳܐ . ܐܳܡܰܪ ܠܗܽܘܢ ܝܶܫܽܘܥ . ܫܪܰܐܘܽܗ̱ܝ ܘܰܫܒ݂ܽܘܩܘ ܐܳܙܶܠ . ܘܣܰܓ݁ܺܝܶܐܐ̈ ܡܶܢ ܝܺܗܽܘܕ݂ܳܝܶܐ̈ ܁ ܕ݁ܶܐܬ݂ܰܘ ܠܘܳܬ݂ ܡܰܪܝܰܡ ܆ ܟ݁ܰܕ݂ ܚܙܰܘ ܡܶܕ݁ܶܡ ܕ݁ܰܥܒ݂ܰܕ݂ ܝܶܫܽܘܥ ܂ ܗܰܝܡܶܢܘ ܒ݁ܶܗ . ܘܐ̱ܢܳܫܺܝܢ̈ ܡܶܢܗܽܘܢ ܐܶܙܰܠܘ ܠܘܳܬ݂ ܦ݁ܪܺܝܫܶܐ̈ ܆ ܘܶܐܡܰܪܘ ܠܗܽܘܢ ܡܶܕ݁ܶܡ ܕ݁ܰܥܒ݂ܰܕ݂ ܝܶܫܽܘܥ ܀܀ ܘܶܐܬ݂ܟ݁ܰܢܰܫܘ ܪܰܒ݁ܰܝ̈ ܟ݁ܳܗܢܶܐ̈ ܘܰܦ݂ܪܺܝܫܶܐ̈ ܘܳܐܡܪܺܝܢ ܗ̱ܘܰܘ ܆ ܡܳܢܳܐ ܢܶܥܒ݁ܶܕ݂ . ܕ݁ܗܳܢܳܐ ܓ݁ܰܒ݂ܪܳܐ ܐܳܬ݂ܘܳܬ݂ܳܐ̈ ܣܰܓ݁ܺܝܳܐܬ݂ܳܐ̈ ܥܳܒ݂ܶܕ݂ . ܘܶܐܢ ܫܳܒ݂ܩܺܝܢ ܚ̱ܢܰܢ ܠܶܗ ܗܳܟ݂ܰܢܳܐ ܆ ܟ݁ܽܠܗܽܘܢ ܐ̱ܢܳܫܳܐ̈ ܡܗܰܝܡܢܺܝܢ ܒ݁ܶܗ . ܘܳܐܬ݂ܶܝܢ ܪܽܗ̱ܘܡܳܝܶܐ̈ . ܫܳܩܠܺܝܢ ܐܰܬ݂ܪܰܢ ܘܥܰܡܰܢ . ܚܰܕ݂ ܕ݁ܶܝܢ ܡܶܢܗܽܘܢ ܕ݁ܰܫܡܶܗ ܩܰܝܳܦ݂ܳܐ ܆ ܪܰܒ݁ ܟ݁ܳܗܢܶܐ̈ ܗ̱ܘܳܐ ܕ݁ܗܳܝ ܫܰܢ̱ܬ݁ܳܐ . ܘܶܐܡܰܪ ܠܗܽܘܢ . ܐܰܢ̱ܬ݁ܽܘܢ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܡܶܕ݁ܶܡ . ܘܠܳܐ ܡܶܬ݂ܚܰܫܒ݂ܺܝܢ ܐܢ̱ܬ݁ܽܘܢ ܕ݁ܦ݂ܰܩܳܚ ܠܰܢ ܕ݁ܚܰܕ݂ ܓ݁ܰܒ݂ܪܳܐ ܢܡܽܘܬ݂ ܚܠܳܦ݂ ܥܰܡܳܐ ܇ ܘܠܳܐ ܟ݁ܽܠܶܗ ܥܰܡܳܐ ܢܺܐܒ݂ܰܕ݂ ܀ ܗܳܕ݂ܶܐ ܕ݁ܶܝܢ ܡܶܢ ܨܒ݂ܽܘܬ݂ ܢܰܦ݂ܫܶܗ ܠܳܐ ܐܶܡܰܪ . ܐܶܠܳܐ ܡܶܛܽܠ ܕ݁ܪܰܒ݁ ܟ݁ܳܗܢܶܐ̈ ܗ̱ܘܳܐ ܕ݁ܗܳܝ ܫܰܢ̱ܬ݁ܳܐ ܆ ܐܶܬ݂ܢܰܒ݁ܺܝ ܂ ܕ݁ܰܥܬ݂ܺܝܕ݂ ܗ̱ܘܳܐ ܝܶܫܽܘܥ ܕ݁ܰܢܡܽܘܬ݂ ܚܠܳܦ݂ ܥܰܡܳܐ . ܘܠܳܐ ܒ݁ܰܠܚܽܘܕ݂ ܚܠܳܦ݂ ܥܰܡܳܐ ܆ ܐܶܠܳܐ ܕ݁ܳܐܦ݂ ܒ݁ܢܰܝܳܐ̈ ܕ݁ܰܐܠܳܗܳܐ ܕ݁ܰܡܒ݂ܰܕ݁ܪܺܝܢ ܂ ܢܟ݂ܰܢܶܫ ܠܰܚܕ݂ܳܐ ܀ ܘܡܶܢ ܗܰܘ ܝܰܘܡܳܐ ܂ ܐܶܬ݂ܚܰܫܰܒ݂ܘ ܗ̱ܘܰܘ ܕ݁ܢܶܩܛܠܽܘܢܳܝܗ̱ܝ . ܗܽܘ ܕ݁ܶܝܢ ܝܶܫܽܘܥ ܠܳܐ ܡܗܰܠܶܟ݂ ܗ̱ܘܳܐ ܓ݁ܰܠܝܳܐܝܺܬ݂ ܒ݁ܶܝܬ݂ ܝܺܗܽܘܕ݂ܳܝܶܐ̈ . ܐܶܠܳܐ ܐܶܙܰܠ ܠܶܗ ܡܶܢ ܬ݁ܰܡܳܢ ܠܰܐܬ݂ܪܳܐ ܕ݁ܩܰܪܺܝܒ݂ ܠܚܽܘܪܒ݁ܳܐ . ܠܟ݂ܰܪܟ݂ܳܐ ܕ݁ܡܶܬ݂ܩܪܶܐ ܐܰܦ݂ܪܶܝܡ . ܘܬ݂ܰܡܳܢ ܡܶܬ݂ܗܰܦ݁ܰܟ݂ ܗ̱ܘܳܐ ܥܰܡ ܬ݁ܰܠܡܺܝܕ݂ܰܘܗ̱ܝ̈ ܀ ܩܰܪܺܝܒ݂ ܗ̱ܘܳܐ ܕ݁ܶܝܢ ܦ݁ܶܨܚܳܐ ܕ݁ܺܝܗܽܘܕ݂ܳܝܶܐ̈ . ܘܰܣܠܶܩܘ ܣܰܓ݁ܺܝܶܐܐ̈ ܡܶܢ ܩܽܘܪܝܳܐ̈ ܠܽܐܘܪܺܫܠܶܡ ܇ ܩܕ݂ܳܡ ܥܰܕ݂ܥܺܕ݂ܳܐ ܂ ܕ݁ܰܢܕ݂ܰܟ݁ܽܘܢ ܢܰܦ݂ܫܗܽܘܢ . ܘܒ݂ܳܥܶܝܢ ܗ̱ܘܰܘ ܠܶܗ ܠܝܶܫܽܘܥ . ܘܳܐܡܪܺܝܢ ܗ̱ܘܰܘ ܚܰܕ݂ ܠܚܰܕ݂ ܒ݁ܗܰܝܟ݁ܠܳܐ . ܡܳܢܳܐ ܣܳܒ݂ܪܺܝܢ ܐܢ̱ܬ݁ܽܘܢ . ܕ݁ܠܳܐ ܐܳܬ݂ܶܐ ܠܥܰܕ݂ܥܺܕ݂ܳܐ ܆ ܪܰܒ݁ܰܝ̈ ܟ݁ܳܗܢܶܐ̈ ܕ݁ܶܝܢ ܘܰܦ݂ܪܺܝܫܶܐ̈ ܦ݁ܩܰܕ݂ܘ ܗ̱ܘܰܘ ܆ ܕ݁ܶܐܢ ܐ̱ܢܳܫ ܢܶܕ݁ܰܥ ܐܰܝܟ݁ܰܘ ܂ ܢܒ݂ܰܕ݁ܶܩ ܠܗܽܘܢ ܂ ܐܰܝܟ݂ ܕ݁ܢܶܐܚܕ݁ܽܘܢܳܝܗ̱ܝ ܀܀ Chapter 12 ܝܶܫܽܘܥ ܕ݁ܶܝܢ ܩܕ݂ܳܡ ܫܬ݁ܳܐ ܝܰܘܡܺܝܢ̈ ܕ݁ܦ݂ܶܨܚܳܐ ܆ ܐܶܬ݂ܳܐ ܠܒ݂ܶܝܬ݂ ܥܰܢܝܳܐ . ܐܰܝܟ݁ܳܐ ܕ݁ܺܐܝܬ݂ܰܘܗ̱ܝ ܗ̱ܘܳܐ ܠܳܥܳܙܰܪ : ܗܰܘ ܕ݁ܰܐܩܺܝܡ ܡܶܢ ܒ݁ܶܝܬ݂ ܡܺܝܬ݂ܶܐ̈ ܗܽܘ ܝܶܫܽܘܥ ܀ ܘܰܥܒ݂ܰܕ݂ܘ ܠܶܗ ܬ݁ܰܡܳܢ ܚܫܳܡܺܝܬ݂ܳܐ . ܘܡܳܪܬ݁ܳܐ ܡܫܰܡܫܳܐ ܗ̱ܘܳܬ݂ . ܘܠܳܥܳܙܰܪ ܚܰܕ݂ ܡܶܢ ܣܡܺܝܟ݂ܶܐ̈ ܗ̱ܘܳܐ ܕ݁ܥܰܡܶܗ . ܡܰܪܝܰܡ ܕ݁ܶܝܢ ܁ ܫܶܩܠܰܬ݂ ܫܳܛܺܝܦ݂ܬ݁ܳܐ ܕ݁ܒ݂ܶܣܡܳܐ ܕ݁ܢܰܪܕ݁ܺܝܢ ܪܺܫܳܝܳܐ ܣܰܓ݁ܺܝ ܕ݁ܡܰܝܳܐ̈ ܆ ܘܡܶܫܚܰܬ݂ ܪܶܓ݂ܠܰܘܗ̱ܝ̈ ܕ݁ܝܶܫܽܘܥ ܂ ܘܫܰܘܝܰܬ݂ ܒ݁ܣܰܥܪܳܗ ܪܶܓ݂ܠܰܘܗ̱ܝ̈ . ܘܶܐܬ݂ܡܠܺܝ ܒ݁ܰܝܬ݁ܳܐ ܡܶܢ ܪܺܝܚܶܗ ܕ݁ܒ݂ܶܣܡܳܐ ܀ ܘܶܐܡܰܪ ܝܺܗܽܘܕ݂ܳܐ ܣܟ݂ܰܪܝܽܘܛܳܐ ܚܰܕ݂ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܇ ܗܰܘ ܕ݁ܰܥܬ݂ܺܝܕ݂ ܗ̱ܘܳܐ ܕ݁ܢܰܫܠܡܺܝܘܗ̱ܝ . ܠܡܳܢܳܐ ܠܳܐ ܐܶܙܕ݁ܰܒ݁ܰܢ ܡܶܫܚܳܐ ܗܳܢܳܐ ܒ݁ܰܬ݂ܠܳܬ݂ ܡܳܐܐ ܕ݁ܺܝܢܳܪܺܝܢ̈ ܂ ܘܶܐܬ݂ܺܝܗܶܒ݂ ܠܡܶܣܟ݁ܺܢܶܐ̈ . ܗܳܕ݂ܶܐ ܕ݁ܶܝܢ ܐܶܡܰܪ ܆ ܠܳܐ ܗ̱ܘܳܐ ܡܶܛܽܠ ܕ݁ܥܰܠ ܡܶܣܟ݁ܺܢܶܐ̈ ܒ݁ܛܺܝܠ ܗ̱ܘܳܐ ܠܶܗ . ܐܶܠܳܐ ܡܶܛܽܠ ܕ݁ܓ݂ܰܢܳܒ݂ܳܐ ܗ̱ܘܳܐ . ܘܰܓ݂ܠܽܘܣܩܡܳܐ ܂ ܠܘܳܬ݂ܶܗ ܗ̱ܘܳܐ . ܘܡܶܕ݁ܶܡ ܕ݁ܢܳܦ݂ܶܠ ܗ̱ܘܳܐ ܒ݁ܶܗ ܂ ܗܽܘ ܛܥܺܝܢ ܗ̱ܘܳܐ ܀ ܐܶܡܰܪ ܕ݁ܶܝܢ ܝܶܫܽܘܥ ܁ ܫܒ݂ܽܘܩܶܝܗ . ܠܝܰܘܡܳܐ ܕ݁ܰܩܒ݂ܽܘܪܝ ܢܛܰܪܬ݂ܶܗ . ܒ݁ܟ݂ܽܠܙܒ݂ܰܢ ܓ݁ܶܝܪ ܡܶܣܟ݁ܺܢܶܐ̈ ܐܺܝܬ݂ ܠܟ݂ܽܘܢ ܥܰܡܟ݂ܽܘܢ ܆ ܠܺܝ ܕ݁ܶܝܢ ܠܳܐ ܒ݁ܟ݂ܽܠܙܒ݂ܰܢ ܐܺܝܬ݂ ܠܟ݂ܽܘܢ ܀ ܘܰܫܡܰܥܘ ܟ݁ܶܢܫܶܐ̈ ܣܰܓ݁ܺܝܶܐܐ̈ ܡܶܢ ܝܺܗܽܘܕ݂ܳܝܶܐ̈ ܁ ܕ݁ܬ݂ܰܡܳܢ ܗ̱ܽܘ ܝܶܫܽܘܥ ܂ ܘܶܐܬ݂ܰܘ . ܠܳܐ ܡܶܛܽܠ ܝܶܫܽܘܥ ܒ݁ܰܠܚܽܘܕ݂ ܆ ܐܶܠܳܐ ܐܳܦ݂ ܕ݁ܢܶܚܙܽܘܢ ܠܠܳܥܳܙܰܪ ܇ ܗܰܘ ܕ݁ܰܐܩܺܝܡ ܡܶܢ ܒ݁ܶܝܬ݂ ܡܺܝܬ݂ܶܐ̈ . ܘܶܐܬ݂ܪܰܥܺܝܘ ܗ̱ܘܰܘ ܪܰܒ݁ܰܝ̈ ܟ݁ܳܗܢܶܐ̈ ܂ ܕ݁ܳܐܦ݂ ܠܠܳܥܳܙܰܪ ܢܶܩܛܠܽܘܢܳܝܗ̱ܝ . ܡܶܛܽܠ ܕ݁ܣܰܓ݁ܺܝܶܐܐ̈ ܡܶܢ ܝܺܗܽܘܕ݂ܳܝܶܐ̈ ܡܶܛܽܠܳܬ݂ܶܗ ܐܳܙܺܠ̱ܝܢ ܗ̱ܘܰܘ ܂ ܘܰܡܗܰܝܡܢܺܝܢ ܒ݁ܝܶܫܽܘܥ ܀܀ ܘܰܠܝܰܘܡܳܐ ܐ̱ܚܪܺܢܳܐ ܆ ܟ݁ܶܢܫܳܐ ܣܰܓ݁ܺܝܳܐܐ ܐܰܝܢܳܐ ܕ݁ܳܐܬ݂ܶܐ ܗ̱ܘܳܐ ܠܥܰܕ݂ܥܺܕ݂ܳܐ ܆ ܟ݁ܰܕ݂ ܫܡܰܥܘ ܕ݁ܝܶܫܽܘܥ ܐܳܬ݂ܶܐ ܠܽܐܘܪܺܫܠܶܡ ܆ ܫܩܰܠܘ ܣܰܘܟ݁ܶܐ̈ ܕ݁ܕ݂ܶܩܠܶܐ̈ ܂ ܘܰܢܦ݂ܰܩܘ ܠܽܐܘܪܥܶܗ . ܘܩܳܥܶܝܢ ܗ̱ܘܰܘ ܘܳܐܡܪܺܝܢ . ܐܽܘܫܰܥܢܳܐ . ܒ݁ܪܺܝܟ݂ ܗ̱ܽܘ ܕ݁ܳܐܬ݂ܶܐ ܒ݁ܰܫܡܶܗ ܕ݁ܡܳܪܝܳܐ ܂ ܡܰܠܟ݁ܳܐ ܕ݁ܺܐܝܣܪܳܝܶܠ ܀ ܐܶܫܟ݁ܰܚ ܕ݁ܶܝܢ ܝܶܫܽܘܥ ܚܡܳܪܳܐ ܂ ܘܺܝܬ݂ܶܒ݂ ܥܠܰܘܗ̱ܝ . ܐܰܝܟ݁ܰܢܳܐ ܕ݁ܰܟ݂ܬ݂ܺܝܒ݂ . ܠܳܐ ܬ݁ܶܕ݂ܚܠܺܝܢ ܒ݁ܰܪ̱ܬ݂ ܨܶܗܝܽܘܢ ܅ ܗܳܐ ܡܰܠܟ݁ܶܟ݂ܝ ܐܳܬ݂ܶܐ ܠܶܟ݂ܝ . ܘܰܪܟ݂ܺܝܒ݂ ܥܰܠ ܥܺܝܠܳܐ ܒ݁ܰܪ ܐܰܬ݂ܳܢܳܐ ܀ ܗܳܠܶܝܢ ܕ݁ܶܝܢ ܠܳܐ ܝܺܕ݂ܰܥܘ ܬ݁ܰܠܡܺܝܕ݂ܰܘܗ̱ܝ̈ ܒ݁ܗܰܘ ܙܰܒ݂ܢܳܐ . ܐܶܠܳܐ ܟ݁ܰܕ݂ ܐܶܫܬ݁ܰܒ݁ܰܚ ܝܶܫܽܘܥ ܆ ܐܶܬ݁ܕ݁ܟ݂ܰܪܘ ܬ݁ܰܠܡܺܝܕ݂ܰܘܗ̱ܝ̈ ܕ݁ܗܳܠܶܝܢ ܟ݁ܬ݂ܺܝܒ݂ܳܢ̈ ܗ̱ܘܰܝ̈ ܥܠܰܘܗ̱ܝ ܆ ܘܗܳܠܶܝܢ ܥܒ݂ܰܕ݂ܘ ܠܶܗ . ܘܣܳܗܶܕ݂ ܗ̱ܘܳܐ ܟ݁ܶܢܫܳܐ ܗܰܘ ܕ݁ܥܰܡܶܗ ܗ̱ܘܳܐ ܁ ܕ݁ܰܩܪܳܐ ܠܠܳܥܳܙܰܪ ܡܶܢ ܩܰܒ݂ܪܳܐ ܇ ܘܰܐܩܺܝܡܶܗ ܡܶܢ ܒ݁ܶܝܬ݂ ܡܺܝܬ݂ܶܐ̈ . ܘܡܶܛܽܠ ܗܳܕ݂ܶܐ ܢܦ݂ܰܩܘ ܠܩܽܘܒ݂ܠܶܗ ܟ݁ܶܢܫܶܐ̈ ܣܰܓ݁ܺܝܶܐܐ̈ ܆ ܕ݁ܰܫܡܰܥܘ ܕ݁ܳܐܬ݂ܳܐ ܗܳܕ݂ܶܐ ܥܒ݂ܰܕ݂ . ܦ݁ܪܺܝܫܶܐ̈ ܕ݁ܶܝܢ ܐܳܡܪܺܝܢ ܗ̱ܘܰܘ ܚܰܕ݂ ܠܚܰܕ݂ . ܚܳܙܶܝܢ ܐܢ̱ܬ݁ܽܘܢ ܕ݁ܠܳܐ ܡܰܘܬ݁ܪܺܝܢ ܐܢ̱ܬ݁ܽܘܢ ܡܶܕ݁ܶܡ : ܕ݁ܗܳܐ ܥܳܠܡܳܐ ܟ݁ܽܠܶܗ ܐܶܙܰܠ ܠܶܗ ܒ݁ܳܬ݂ܪܶܗ ܀܀ ܐܺܝܬ݂ ܗ̱ܘܰܘ ܕ݁ܶܝܢ ܐܳܦ݂ ܡܶܢ ܥܰܡ̱ܡܶܐ̈ ܐ̱ܢܳܫܳܐ̈ ܒ݁ܗܽܘܢ ܕ݁ܰܣܠܶܩܘ ܠܡܶܣܓ݁ܰܕ݂ ܒ݁ܥܰܕ݂ܥܺܕ݂ܳܐ . ܗܳܠܶܝܢ ܐܶܬ݂ܰܘ ܩܪܶܒ݂ܘ ܠܘܳܬ݂ ܦ݂ܺܝܠܺܝܦ݁ܳܘܣ : ܗܰܘ ܕ݁ܡܶܢ ܒ݁ܶܝܬ݂ ܨܰܝܳܕ݂ܳܐ ܕ݁ܰܓ݂ܠܺܝܠܳܐ ܆ ܘܫܰܐܠܽܘܗ̱ܝ ܂ ܘܳܐܡܪܺܝܢ ܠܶܗ . ܡܳܪܝ ܂ ܨܳܒ݂ܶܝܢ ܚ̱ܢܰܢ ܢܶܚܙܶܐ ܠܝܶܫܽܘܥ . ܘܶܐܬ݂ܳܐ ܗܽܘ ܦ݂ܺܝܠܺܝܦ݁ܳܘܣ ܂ ܘܶܐܡܰܪ ܠܰܐܢܕ݁ܪܶܐܘܳܣ . ܘܰܐܢܕ݁ܪܶܐܘܳܣ ܘܦ݂ܺܝܠܺܝܦ݁ܳܘܣ ܐܶܡܰܪܘ ܠܝܶܫܽܘܥ ܀.܀.܀܀ ܝܶܫܽܘܥ ܕ݁ܶܝܢ ܥܢܳܐ ܂ ܘܶܐܡܰܪ ܠܗܽܘܢ . ܐܶܬ݂ܳܬ݂ ܫܳܥܬ݂ܳܐ ܕ݁ܢܶܫܬ݁ܰܒ݁ܰܚ ܒ݁ܪܶܗ ܕ݁ܐ̱ܢܳܫܳܐ ܀ ܐܰܡܺܝܢ ܐܰܡܺܝܢ ܁ ܐܳܡܰܪ ܐ̱ܢܳܐ ܠܟ݂ܽܘܢ . ܕ݁ܰܦ݂ܪܶܕ݁ܬ݁ܳܐ ܕ݁ܚܶܛܬ݂ܳܐ ܆ ܐܶܠܳܐ ܢܳܦ݂ܠܳܐ ܘܡܳܝܬ݁ܳܐ ܒ݁ܰܐܪܥܳܐ ܆ ܒ݁ܰܠܚܽܘܕ݂ܶܝܗ ܦ݁ܳܝܫܳܐ . ܐܶܢ ܕ݁ܶܝܢ ܡܳܝܬ݁ܳܐ ܆ ܦ݁ܺܐܪܶܐ̈ ܣܰܓ݁ܺܝܶܐܐ̈ ܡܰܝܬ݁ܝܳܐ ܀ ܡܰܢ ܕ݁ܪܳܚܶܡ ܢܰܦ݂ܫܶܗ ܂ ܢܰܘܒ݁ܕ݂ܺܝܗ . ܘܡܰܢ ܕ݁ܣܳܢܶܐ ܢܰܦ݂ܫܶܗ ܒ݁ܥܳܠܡܳܐ ܗܳܢܳܐ ܆ ܢܶܛܪܺܝܗ ܠܚܰܝܶܐ̈ ܕ݁ܰܠܥܳܠܰܡ . ܐܶܢ ܠܺܝ ܐ̱ܢܳܫ ܡܫܰܡܶܫ ܂ ܢܺܐܬ݂ܶܐ ܒ݁ܳܬ݂ܰܪܝ . ܘܰܐܝܟ݁ܳܐ ܕ݁ܶܐܢܳܐ ܐܺܝܬ݂ܰܝ ܆ ܬ݁ܰܡܳܢ ܢܶܗܘܶܐ ܐܳܦ݂ ܡܫܰܡܫܳܢܝ . ܡܰܢ ܕ݁ܠܺܝ ܡܫܰܡܶܫ ܂ ܢܝܰܩܪܺܝܘܗ̱ܝ ܐܰܒ݂ܳܐ ܀ ܗܳܫܳܐ ܢܰܦ݂ܫܝ ܂ ܗܳܐ ܫܓ݂ܺܝܫܳܐ . ܘܡܳܢܳܐ ܐܺܡܰܪ . ܐܳܒ݂ܝ ܦ݁ܰܨܳܢܝ ܡܶܢ ܗܳܕ݂ܶܐ ܫܳܥܬ݂ܳܐ ܆ ܐܶܠܳܐ ܡܶܛܽܠ ܗܳܢܳܐ ܐܶܬ݂ܺܝܬ݂ ܠܗܳܕ݂ܶܐ ܫܳܥܬ݂ܳܐ . ܐܰܒ݂ܳܐ ܂ ܫܰܒ݁ܰܚ ܫܡܳܟ݂ ܀ ܘܩܳܠܳܐ ܐܶܫܬ݁ܡܰܥ ܡܶܢ ܫܡܰܝܳܐ . ܫܰܒ݁ܚܶܬ݂ ܂ ܘܬ݂ܽܘܒ݂ ܡܫܰܒ݁ܰܚ ܐ̱ܢܳܐ . ܘܟ݂ܶܢܫܳܐ ܕ݁ܩܳܐܶܡ ܗ̱ܘܳܐ ܫܡܰܥܘ ܆ ܘܳܐܡܪܺܝܢ ܂ ܪܰܥܡܳܐ ܗܘܳܐ . ܐ̱ܚܪܳܢܶܐ̈ ܕ݁ܶܝܢ ܐܳܡܪܺܝܢ ܂ ܡܰܠܰܐܟ݂ܳܐ ܡܰܠܶܠ ܥܰܡܶܗ . ܥܢܳܐ ܝܶܫܽܘܥ ܂ ܘܶܐܡܰܪ ܠܗܽܘܢ . ܠܳܐ ܗ̱ܘܳܐ ܡܶܛܽܠܳܬ݂ܝ ܗܘܳܐ ܩܳܠܳܐ ܗܳܢܳܐ . ܐܶܠܳܐ ܡܶܛܽܠܳܬ݂ܟ݂ܽܘܢ . ܗܳܫܳܐ ܕ݁ܺܝܢܶܗ ܗ̱ܽܘ ܕ݁ܥܳܠܡܳܐ ܗܳܢܳܐ . ܗܳܫܳܐ ܐܰܪܟ݂ܽܘܢܳܐ ܕ݁ܥܳܠܡܳܐ ܗܳܢܳܐ ܡܶܫܬ݁ܕ݂ܶܐ ܠܒ݂ܰܪ . ܘܶܐܢܳܐ ܡܳܐ ܕ݁ܶܐܬ݁ܬ݁ܪܺܝܡܶܬ݂ ܡܶܢ ܐܰܪܥܳܐ ܆ ܐܶܓ݁ܶܕ݂ ܟ݁ܽܠܢܳܫ ܠܘܳܬ݂ܝ ܂ ܗܳܕ݂ܶܐ ܕ݁ܶܝܢ ܐܶܡܰܪ ܂ ܕ݁ܰܢܚܰܘܶܐ ܒ݁ܰܐܝܢܳܐ ܡܰܘܬ݁ܳܐ ܡܳܐܶܬ݂ . ܐܳܡܪܺܝܢ ܠܶܗ ܟ݁ܶܢܫܶܐ̈ . ܚܢܰܢ ܫܡܰܥܢ ܡܶܢ ܢܳܡܽܘܣܳܐ ܆ ܕ݁ܰܡܫܺܝܚܳܐ ܠܥܳܠܰܡ ܡܩܰܘܶܐ . ܐܰܝܟ݁ܰܢܳܐ ܐܳܡܰܪ ܐܰܢ̱ܬ݁ ܕ݁ܰܥܬ݂ܺܝܕ݂ ܗ̱ܽܘ ܕ݁ܢܶܬ݁ܬ݁ܪܺܝܡ ܒ݁ܪܶܗ ܕ݁ܐ̱ܢܳܫܳܐ . ܡܰܢܽܘ ܗܳܢܳܐ ܒ݁ܪܶܗ ܕ݁ܐ̱ܢܳܫܳܐ . ܐܳܡܰܪ ܠܗܽܘܢ ܝܶܫܽܘܥ . ܩܰܠܺܝܠ ܐ̱ܚܪܺܝܢ ܙܰܒ݂ܢܳܐ ܢܽܘܗܪܳܐ ܥܰܡܟ݂ܽܘܢ ܗ̱ܽܘ . ܗܰܠܶܟ݂ܘ ܥܰܕ݂ ܐܺܝܬ݂ ܠܟ݂ܽܘܢ ܢܽܘܗܪܳܐ ܆ ܕ݁ܠܳܐ ܚܶܫܽܘܟ݂ܳܐ ܢܰܕ݂ܪܶܟ݂ܟ݂ܽܘܢ . ܘܡܰܢ ܕ݁ܰܡܗܰܠܶܟ݂ ܒ݁ܚܶܫܽܘܟ݂ܳܐ ܂ ܠܳܐ ܝܳܕ݂ܰܥ ܠܰܐܝܟ݁ܳܐ ܐܳܙܶܠ . ܥܰܕ݂ ܐܺܝܬ݂ ܠܟ݂ܽܘܢ ܢܽܘܗܪܳܐ ܆ ܗܰܝܡܶܢܘ ܒ݁ܢܽܘܗܪܳܐ ܂ ܕ݁ܰܒ݂ܢܰܘܗ̱ܝ̈ ܕ݁ܢܽܘܗܪܳܐ ܬ݁ܶܗܘܽܘܢ . ܗܳܠܶܝܢ ܡܰܠܶܠ ܝܶܫܽܘܥ ܆ ܘܶܐܙܰܠ ܂ ܐܶܬ݁ܛܰܫܺܝ ܡܶܢܗܽܘܢ ܀ ܘܟ݂ܰܕ݂ ܗܳܠܶܝܢ ܟ݁ܽܠܗܶܝܢ ܐܳܬ݂ܘܳܬ݂ܳܐ̈ ܥܒ݂ܰܕ݂ ܩܕ݂ܳܡܰܝܗܽܘܢ ܂ ܠܳܐ ܗܰܝܡܶܢܘ ܒ݁ܶܗ . ܕ݁ܬ݂ܶܬ݂ܡܰܠܶܐ ܡܶܠܬ݂ܳܐ ܕ݁ܶܐܫܰܥܝܳܐ ܢܒ݂ܺܝܳܐ ܕ݁ܶܐܡܰܪ . ܡܳܪܝ ܂ ܡܰܢܽܘ ܗܰܝܡܶܢ ܠܫܶܡܥܰܢ ܇ ܘܰܕ݂ܪܳܥܶܗ ܕ݁ܡܳܪܝܳܐ ܠܡܰܢ ܐܶܬ݂ܓ݁ܠܺܝ . ܡܶܛܽܠ ܗܳܢܳܐ ܠܳܐ ܡܶܫܟ݁ܚܺܝܢ ܗ̱ܘܰܘ ܕ݁ܰܢܗܰܝܡܢܽܘܢ . ܡܶܛܽܠ ܕ݁ܬ݂ܽܘܒ݂ ܐܶܡܰܪ ܐܶܫܰܥܝܳܐ . ܕ݁ܥܰܘܰܪܘ ܥܰܝܢܰܝܗܽܘܢ̈ ܘܰܐܚܫܶܟ݂ܘ ܠܶܒ݁ܗܽܘܢ . ܕ݁ܠܳܐ ܢܶܚܙܽܘܢ ܒ݁ܥܰܝܢܰܝܗܽܘܢ̈ ܘܢܶܣܬ݁ܰܟ݁ܠܽܘܢ ܒ݁ܠܶܒ݁ܗܽܘܢ : ܘܢܶܬ݂ܦ݁ܢܽܘܢ ܘܰܐܣܶܐ ܐܶܢܽܘܢ . ܗܳܠܶܝܢ ܐܶܡܰܪ ܐܶܫܰܥܝܳܐ ܆ ܟ݁ܰܕ݂ ܚܙܳܐ ܫܽܘܒ݂ܚܶܗ ܂ ܘܡܰܠܶܠ ܥܠܰܘܗ̱ܝ ܀ ܐܳܦ݂ ܡܶܢ ܪܺܫܶܐ̈ ܕ݁ܶܝܢ ܣܰܓ݁ܺܝܶܐܐ̈ ܗܰܝܡܶܢܘ ܒ݁ܶܗ . ܐܶܠܳܐ ܡܶܛܽܠ ܦ݁ܪܺܝܫܶܐ̈ ܂ ܠܳܐ ܡܰܘܕ݁ܶܝܢ ܗ̱ܘܰܘ . ܕ݁ܠܳܐ ܢܶܗܘܽܘܢ ܠܒ݂ܰܪ ܡܶܢ ܟ݁ܢܽܘܫܬ݁ܳܐ . ܪܚܶܡܘ ܓ݁ܶܝܪ ܫܽܘܒ݂ܚܳܐ ܕ݁ܰܒ݂ܢܰܝܢܳܫܳܐ̈ ܝܰܬ݁ܺܝܪ ܡܶܢ ܫܽܘܒ݂ܚܶܗ ܕ݁ܰܐܠܳܗܳܐ ܀ ܝܶܫܽܘܥ ܕ݁ܶܝܢ ܩܥܳܐ ܂ ܘܶܐܡܰܪ . ܡܰܢ ܕ݁ܰܡܗܰܝܡܶܢ ܒ݁ܺܝ ܂ ܠܳܐ ܗ̱ܘܳܐ ܒ݁ܺܝ ܡܗܰܝܡܶܢ ܁ ܐܶܠܳܐ ܒ݁ܡܰܢ ܕ݁ܫܰܕ݁ܪܰܢܝ . ܘܡܰܢ ܕ݁ܠܺܝ ܚܳܙܶܐ ܂ ܚܙܳܐ ܠܡܰܢ ܕ݁ܫܰܕ݁ܪܰܢܝ . ܐܶܢܳܐ ܢܽܘܗܪܳܐ ܐܶܬ݂ܺܝܬ݂ ܠܥܳܠܡܳܐ . ܕ݁ܟ݂ܽܠ ܡܰܢ ܕ݁ܰܡܗܰܝܡܶܢ ܒ݁ܺܝ ܂ ܠܳܐ ܢܩܰܘܶܐ ܒ݁ܚܶܫܽܘܟ݂ܳܐ . ܘܡܰܢ ܕ݁ܫܳܡܰܥ ܡܶܠܰܝ̈ ܁ ܘܠܳܐ ܢܳܛܰܪ ܠܗܶܝܢ ܆ ܐܶܢܳܐ ܠܳܐ ܕ݁ܳܐܶܢ ܐ̱ܢܳܐ ܠܶܗ . ܠܳܐ ܓ݁ܶܝܪ ܐܶܬ݂ܺܝܬ݂ ܕ݁ܶܐܕ݁ܽܘܢ ܠܥܳܠܡܳܐ . ܐܶܠܳܐ ܕ݁ܰܐܚܶܐ ܠܥܳܠܡܳܐ . ܡܰܢ ܕ݁ܛܳܠܶܡ ܠܺܝ ܁ ܘܠܳܐ ܡܩܰܒ݁ܶܠ ܡܶܠܰܝ̈ ܆ ܐܺܝܬ݂ ܡܰܢ ܕ݁ܕ݂ܳܐܶܢ ܠܶܗ . ܡܶܠܬ݂ܳܐ ܕ݁ܡܰܠܠܶܬ݂ ܂ ܗܺܝ ܕ݁ܳܝܢܳܐ ܠܶܗ ܒ݁ܝܰܘܡܳܐ ܐ̱ܚܪܳܝܳܐ . ܕ݁ܶܐܢܳܐ ܡܶܢ ܢܰܦ݂ܫܝ ܠܳܐ ܡܰܠܠܶܬ݂ . ܐܶܠܳܐ ܐܰܒ݂ܳܐ ܕ݁ܫܰܕ݁ܪܰܢܝ ܆ ܗܽܘ ܝܰܗ̱ܒ݂ ܠܺܝ ܦ݁ܽܘܩܕ݁ܳܢܳܐ ܁ ܡܳܢܳܐ ܐܺܡܰܪ ܂ ܘܡܳܢܳܐ ܐܶܡܰܠܶܠ . ܘܝܳܕ݂ܰܥ ܐ̱ܢܳܐ ܕ݁ܦ݂ܽܘܩܕ݁ܳܢܶܗ ܚܰܝܶܐ̈ ܐܶܢܽܘܢ ܕ݁ܰܠܥܳܠܰܡ . ܐܰܝܠܶܝܢ ܗܳܟ݂ܺܝܠ ܕ݁ܰܡܡܰܠܶܠ ܐ̱ܢܳܐ ܆ ܐܰܝܟ݁ܰܢܳܐ ܕ݁ܶܐܡܰܪ ܠܺܝ ܐܳܒ݂ܝ ܂ ܗܳܟ݂ܰܢܳܐ ܡܡܰܠܶܠ ܐ̱ܢܳܐ ܀ Chapter 13 ܩܕ݂ܳܡ ܕ݁ܶܝܢ ܥܺܐܕ݂ܳܐ ܕ݁ܦ݂ܶܨܚܳܐ ܆ ܝܳܕ݂ܰܥ ܗ̱ܘܳܐ ܝܶܫܽܘܥ ܕ݁ܰܡܛܳܬ݂ ܫܳܥܬ݂ܳܐ ܇ ܕ݁ܰܢܫܰܢܶܐ ܡܶܢ ܗܳܢܳܐ ܥܳܠܡܳܐ ܠܘܳܬ݂ ܐܰܒ݂ܽܘܗ̱ܝ . ܘܰܐܚܶܒ݂ ܠܕ݂ܺܝܠܶܗ ܕ݁ܰܒ݂ܗܳܢܳܐ ܥܳܠܡܳܐ . ܘܰܥܕ݂ܰܡܳܐ ܠܚܰܪܬ݂ܳܐ ܂ ܐܰܚܶܒ݂ ܐܶܢܽܘܢ ܀ ܘܟ݂ܰܕ݂ ܗܘܳܬ݂ ܚܫܳܡܺܝܬ݂ܳܐ ܆ ܪܡܶܐ ܗ̱ܘܳܐ ܠܶܗ ܠܣܳܛܳܢܳܐ ܒ݁ܠܶܒ݁ܶܗ ܕ݁ܺܝܗܽܘܕ݂ܳܐ ܂ ܒ݁ܰܪ ܫܶܡܥܽܘܢ ܣܟ݂ܰܪܝܽܘܛܳܐ ܂ ܕ݁ܢܰܫܠܡܺܝܘܗ̱ܝ ܀ ܗܽܘ ܕ݁ܶܝܢ ܝܶܫܽܘܥ ܆ ܡܶܛܽܠ ܕ݁ܝܳܕ݂ܰܥ ܗ̱ܘܳܐ ܕ݁ܟ݂ܽܠ ܡܶܕ݁ܶܡ ܝܰܗ̱ܒ݂ ܐܰܒ݂ܳܐ ܒ݁ܺܐܝܕ݂ܰܘܗ̱ܝ̈ : ܘܰܕ݂ܡܶܢ ܐܰܠܳܗܳܐ ܢܦ݂ܰܩ ܘܰܠܘܳܬ݂ ܐܰܠܳܗܳܐ ܐܳܙܶܠ : ܩܳܡ ܡܶܢ ܚܫܳܡܺܝܬ݂ܳܐ ܂ ܘܣܳܡ ܢܰܚܬ݁ܰܘܗ̱ܝ̈ ܂ ܘܰܫܩܰܠ ܣܶܕ݁ܽܘܢܳܐ ܂ ܡܚܳܐ ܒ݁ܚܰܨܰܘܗ̱ܝ̈ . ܘܰܐܪܡܺܝ ܡܰܝܳܐ̈ ܒ݁ܰܡܫܳܓ݂ܬ݁ܳܐ ܆ ܘܫܰܪܺܝ ܠܰܡܫܳܓ݂ܽܘ ܪܶܓ݂ܠܶܐ̈ ܕ݁ܬ݂ܰܠܡܺܝܕ݂ܰܘܗ̱ܝ̈ . ܘܰܡܫܰܘܶܐ ܗ̱ܘܳܐ ܒ݁ܣܶܕ݁ܽܘܢܳܐ ܕ݁ܰܡܚܶܐ ܒ݁ܚܰܨܰܘܗ̱ܝ̈ . ܟ݁ܰܕ݂ ܕ݁ܶܝܢ ܐܶܬ݂ܳܐ ܠܘܳܬ݂ ܫܶܡܥܽܘܢ ܟ݁ܺܐܦ݂ܳܐ ܆ ܐܳܡܰܪ ܠܶܗ ܫܶܡܥܽܘܢ . ܐܰܢ̱ܬ݁ ܡܳܪܝ ܆ ܪܶܓ݂ܠܰܝ̈ ܡܫܺܝܓ݂ ܐܰܢ̱ܬ݁ ܠܺܝ ܆ ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܡܶܕ݁ܶܡ ܕ݁ܥܳܒ݂ܶܕ݂ ܐ̱ܢܳܐ ܐܰܢ̱ܬ݁ ܠܳܐ ܝܳܕ݂ܰܥ ܐܰܢ̱ܬ݁ ܗܳܫܳܐ . ܒ݁ܳܬ݂ܰܪܟ݁ܶܢ ܕ݁ܶܝܢ ܬ݁ܶܕ݁ܰܥ . ܐܳܡܰܪ ܠܶܗ ܫܶܡܥܽܘܢ ܟ݁ܺܐܦ݂ܳܐ . ܠܥܳܠܰܡ ܠܳܐ ܡܫܺܝܓ݂ ܐܰܢ̱ܬ݁ ܠܺܝ ܪܶܓ݂ܠܰܝ̈ . ܐܳܡܰܪ ܠܶܗ ܝܶܫܽܘܥ . ܐܶܢ ܠܳܐ ܡܫܺܝܓ݂ ܐ̱ܢܳܐ ܠܳܟ݂ ܆ ܠܰܝܬ݁ ܠܳܟ݂ ܥܰܡܝ ܡܢܳܬ݂ܳܐ . ܐܳܡܰܪ ܠܶܗ ܫܶܡܥܽܘܢ ܟ݁ܺܐܦ݂ܳܐ . ܡܳܕ݂ܶܝܢ ܡܳܪܝ ܆ ܠܳܐ ܒ݁ܰܠܚܽܘܕ݂ ܪܶܓ݂ܠܰܝ̈ ܬ݁ܫܺܝܓ݂ ܠܺܝ ܆ ܐܶܠܳܐ ܐܳܦ݂ ܐܺܝܕ݂ܰܝ̈ ܐܳܦ݂ ܪܺܫܝ . ܐܳܡܰܪ ܠܶܗ ܝܶܫܽܘܥ . ܗܰܘ ܕ݁ܰܣܚܶܐ ܆ ܠܳܐ ܣܢܺܝܩ ܐܶܠܳܐ ܪܶܓ݂ܠܰܘܗ̱ܝ̈ ܒ݁ܰܠܚܽܘܕ݂ ܢܫܺܝܓ݂ . ܟ݁ܽܠܶܗ ܓ݁ܶܝܪ ܕ݁ܟ݂ܶܐ ܗ̱ܘ . ܐܳܦ݂ ܐܰܢ̱ܬ݁ܽܘܢ ܟ݁ܽܠܟ݂ܽܘܢ ܕ݁ܟ݂ܰܝܳܐ̈ ܐܰܢ̱ܬ݁ܽܘܢ . ܐܶܠܳܐ ܠܳܐ ܟ݁ܽܠܟ݂ܽܘܢ . ܝܳܕ݂ܰܥ ܗ̱ܘܳܐ ܓ݁ܶܝܪ ܝܶܫܽܘܥ ܠܗܰܘ ܕ݁ܡܰܫܠܶܡ ܠܶܗ . ܡܶܛܽܠ ܗܳܢܳܐ ܐܶܡܰܪ ܂ ܕ݁ܠܳܐ ܗ̱ܘܳܐ ܟ݁ܽܠܟ݂ܽܘܢ ܕ݁ܟ݂ܰܝܳܐ̈ ܐܰܢ̱ܬ݁ܽܘܢ . ܟ݁ܰܕ݂ ܕ݁ܶܝܢ ܐܰܫܺܝܓ݂ ܪܶܓ݂ܠܰܝܗܽܘܢ̈ ܆ ܫܩܰܠ ܢܰܚܬ݁ܰܘܗ̱ܝ̈ ܂ ܘܶܐܣܬ݁ܡܶܟ݂ . ܘܶܐܡܰܪ ܠܗܽܘܢ . ܝܳܕ݂ܥܺܝܢ ܐܢ̱ܬ݁ܽܘܢ ܆ ܡܳܢܳܐ ܥܶܒ݂ܕ݁ܶܬ݂ ܠܟ݂ܽܘܢ . ܐܰܢ̱ܬ݁ܽܘܢ ܩܳܪܶܝܢ ܐܢ̱ܬ݁ܽܘܢ ܠܺܝ ܁ ܪܰܒ݁ܰܢ ܂ ܘܡܳܪܰܢ . ܘܫܰܦ݁ܺܝܪ ܐܳܡܪܺܝܢ ܐܢ̱ܬ݁ܽܘܢ . ܐܺܝܬ݂ܰܝ ܓ݁ܶܝܪ . ܐܶܢ ܐܶܢܳܐ ܗܳܟ݂ܺܝܠ ܡܳܪܟ݂ܽܘܢ ܘܪܰܒ݁ܟ݂ܽܘܢ ܁ ܐܰܫܺܝܓ݂ܶܬ݂ ܠܟ݂ܽܘܢ ܪܶܓ݂ܠܰܝܟ݁ܽܘܢ̈ ܆ ܟ݁ܡܳܐ ܐܰܢ̱ܬ݁ܽܘܢ ܚܰܝܳܒ݂ܺܝܢ̈ ܐܢ̱ܬ݁ܽܘܢ ܕ݁ܰܬ݂ܫܺܝܓ݂ܽܘܢ ܪܶܓ݂ܠܶܐ̈ ܚܰܕ݂ ܕ݁ܚܰܕ݂ . ܗܳܢܳܐ ܓ݁ܶܝܪ ܛܽܘܦ݂ܣܳܐ ܝܶܗܒ݁ܶܬ݂ ܠܟ݂ܽܘܢ ܆ ܕ݁ܰܐܝܟ݁ܰܢܳܐ ܕ݁ܶܐܢܳܐ ܥܶܒ݂ܕ݁ܶܬ݂ ܠܟ݂ܽܘܢ ܂ ܐܳܦ݂ ܐܰܢ̱ܬ݁ܽܘܢ ܬ݁ܶܥܒ݁ܕ݂ܽܘܢ ܀.܀.܀܀ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܠܰܝܬ݁ ܥܰܒ݂ܕ݁ܳܐ ܕ݁ܪܰܒ݁ ܡܶܢ ܡܳܪܶܗ ܆ ܘܠܳܐ ܫܠܺܝܚܳܐ ܕ݁ܪܰܒ݁ ܡܶܢ ܡܰܢ ܕ݁ܫܰܕ݁ܪܶܗ . ܐܶܢ ܗܳܠܶܝܢ ܬ݁ܶܕ݁ܥܽܘܢ ܆ ܛܽܘܒ݂ܳܢܶܐ̈ ܐܰܢ̱ܬ݁ܽܘܢ ܐܶܢ ܬ݁ܶܥܒ݁ܕ݂ܽܘܢ ܐܶܢܶܝܢ . ܠܳܐ ܗ̱ܘܳܐ ܥܰܠ ܟ݁ܽܠܟ݂ܽܘܢ ܐܳܡܰܪ ܐ̱ܢܳܐ . ܝܳܕ݂ܰܥ ܐ̱ܢܳܐ ܓ݁ܶܝܪ ܠܰܐܝܠܶܝܢ ܕ݁ܰܓ݂ܒ݂ܺܝܬ݂ . ܐܶܠܳܐ ܕ݁ܰܟ݂ܬ݂ܳܒ݂ܳܐ ܢܶܫܠܰܡ ܆ ܕ݁ܗܰܘ ܕ݁ܳܐܟ݂ܶܠ ܥܰܡܝ ܠܰܚܡܳܐ ܂ ܐܰܪܺܝܡ ܥܠܰܝ ܥܶܩܒ݂ܶܗ . ܡܶܢ ܗܳܫܳܐ ܐܳܡܰܪ ܐ̱ܢܳܐ ܠܟ݂ܽܘܢ ܂ ܡܶܢ ܩܕ݂ܳܡ ܕ݁ܢܶܗܘܶܐ . ܕ݁ܡܳܐ ܕ݁ܰܗܘܳܐ ܂ ܬ݁ܗܰܝܡܢܽܘܢ ܕ݁ܶܐܢܳܐ ܐ̱ܢܳܐ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܰܡܩܰܒ݁ܶܠ ܠܡܰܢ ܕ݁ܰܡܫܰܕ݁ܰܪ ܐ̱ܢܳܐ ܂ ܠܺܝ ܡܩܰܒ݁ܶܠ . ܘܡܰܢ ܕ݁ܠܺܝ ܡܩܰܒ݁ܶܠ ܂ ܡܩܰܒ݁ܶܠ ܠܡܰܢ ܕ݁ܫܰܕ݁ܪܰܢܝ ܀ ܗܳܠܶܝܢ ܐܶܡܰܪ ܝܶܫܽܘܥ ܆ ܘܶܐܬ݂ܥܰܙܰܙ ܒ݁ܪܽܘܚܶܗ ܘܰܐܣܗܶܕ݂ ܂ ܘܶܐܡܰܪ . ܐܰܡܺܝܢ ܐܰܡܺܝܢ ܁ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܚܰܕ݂ ܡܶܢܟ݂ܽܘܢ ܢܰܫܠܡܰܢܝ ܀ ܚܳܪܘ ܕ݁ܶܝܢ ܬ݁ܰܠܡܺܝܕ݂ܶܐ̈ ܚܰܕ݂ ܒ݁ܚܰܕ݂ . ܡܶܛܽܠ ܕ݁ܠܳܐ ܝܳܕ݂ܥܺܝܢ ܗ̱ܘܰܘ ܕ݁ܥܰܠ ܡܰܢܽܘ ܐܶܡܰܪ ܀ ܐܺܝܬ݂ ܗ̱ܘܳܐ ܕ݁ܶܝܢ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܁ ܚܰܕ݂ ܕ݁ܰܣܡܺܝܟ݂ ܗ̱ܘܳܐ ܒ݁ܥܽܘܒ݁ܶܗ ܇ ܗܰܘ ܕ݁ܪܳܚܶܡ ܗ̱ܘܳܐ ܠܶܗ ܝܶܫܽܘܥ . ܠܗܳܢܳܐ ܪܡܰܙ ܫܶܡܥܽܘܢ ܟ݁ܺܐܦ݂ܳܐ ܆ ܕ݁ܰܢܫܰܐܠܺܝܘܗ̱ܝ ܂ ܕ݁ܡܰܢܽܘ ܗܰܘ ܕ݁ܶܐܡܰܪ ܥܠܰܘܗ̱ܝ . ܘܰܢܦ݂ܰܠ ܗܰܘ ܬ݁ܰܠܡܺܝܕ݂ܳܐ ܥܰܠ ܚܰܕ݂ܝܶܗ ܕ݁ܝܶܫܽܘܥ ܂ ܘܶܐܡܰܪ ܠܶܗ . ܡܳܪܝ ܂ ܡܰܢܽܘ ܗܳܢܳܐ ܀ ܥܢܳܐ ܝܶܫܽܘܥ ܂ ܘܶܐܡܰܪ . ܗܰܘ ܗ̱ܽܘ ܕ݁ܨܳܒ݂ܰܥ ܐ̱ܢܳܐ ܠܰܚܡܳܐ ܝܳܗܶܒ݂ ܐ̱ܢܳܐ ܠܶܗ . ܘܰܨܒ݂ܰܥ ܝܶܫܽܘܥ ܠܰܚܡܳܐ ܆ ܘܝܰܗ̱ܒ݂ ܠܺܝܗܽܘܕ݂ܳܐ ܒ݁ܰܪ ܫܶܡܥܽܘܢ ܣܟ݂ܰܪܝܽܘܛܳܐ . ܘܒ݂ܳܬ݂ܰܪ ܠܰܚܡܳܐ ܂ ܗܳܝܕ݁ܶܝܢ ܐܶܬ݂ܥܰܠܰܠ ܒ݁ܶܗ ܣܳܛܳܢܳܐ . ܘܶܐܡܰܪ ܠܶܗ ܝܶܫܽܘܥ . ܡܶܕ݁ܶܡ ܕ݁ܥܳܒ݂ܶܕ݂ ܐܰܢ̱ܬ݁ ܁ ܥܒ݂ܶܕ݂ ܒ݁ܰܥܓ݂ܰܠ . ܗܳܕ݂ܶܐ ܕ݁ܶܝܢ ܠܳܐ ܐ̱ܢܳܫ ܝܺܕ݂ܰܥ ܂ ܡܶܢ ܗܳܢܽܘܢ ܣܡܺܝܟ݂ܶܐ̈ ܂ ܕ݁ܥܰܠ ܡܳܢܳܐ ܐܶܡܰܪ ܠܶܗ . ܐ̱ܢܳܫܺܝܢ̈ ܓ݁ܶܝܪ ܣܒ݂ܰܪܘ ܆ ܡܶܛܽܠ ܕ݁ܰܓ݂ܠܽܘܣܩܡܳܐ ܨܶܐܕ݂ܰܘܗ̱ܝ ܗܘܳܐ ܕ݁ܺܝܗܽܘܕ݂ܳܐ ܆ ܕ݁ܡܶܦ݂ܩܰܕ݂ ܦ݁ܩܰܕ݂ ܠܶܗ ܕ݁ܢܶܙܒ݁ܶܢ ܡܶܕ݁ܶܡ ܕ݁ܡܶܬ݂ܒ݁ܥܶܐ ܠܥܰܕ݂ܥܺܕ݂ܳܐ ܇ ܐܰܘ ܕ݁ܢܶܬ݁ܶܠ ܡܶܕ݁ܶܡ ܠܡܶܣܟ݁ܺܢܶܐ̈ . ܗܽܘ ܕ݁ܶܝܢ ܝܺܗܽܘܕ݂ܳܐ ܢܣܰܒ݂ ܠܰܚܡܳܐ ܒ݁ܰܪ ܫܳܥܬ݂ܶܗ ܂ ܘܰܢܦ݂ܰܩ ܠܶܗ ܠܒ݂ܰܪ . ܠܺܠܝܳܐ ܗ̱ܘܳܐ ܕ݁ܶܝܢ ܟ݁ܰܕ݂ ܢܦ݂ܰܩ ܀܀ ܘܶܐܡܰܪ ܝܶܫܽܘܥ . ܗܳܫܳܐ ܐܶܫܬ݁ܰܒ݁ܰܚ ܒ݁ܪܶܗ ܕ݁ܐ̱ܢܳܫܳܐ . ܘܰܐܠܳܗܳܐ ܐܶܫܬ݁ܰܒ݁ܰܚ ܒ݁ܶܗ . ܘܶܐܢ ܐܰܠܳܗܳܐ ܐܶܫܬ݁ܰܒ݁ܰܚ ܒ݁ܶܗ ܆ ܘܳܐܦ݂ ܐܰܠܳܗܳܐ ܡܫܰܒ݁ܰܚ ܠܶܗ ܒ݁ܶܗ . ܘܡܶܚܕ݂ܳܐ ܡܫܰܒ݁ܰܚ ܠܶܗ . ܒ݁ܢܰܝ̈ ܆ ܩܰܠܺܝܠ ܐ̱ܚܪܺܝܢ ܥܰܡܟ݂ܽܘܢ ܐ̱ܢܳܐ . ܘܬ݂ܶܒ݂ܥܽܘܢܳܢܝ . ܘܰܐܝܟ݁ܰܢܳܐ ܕ݁ܶܐܡܪܶܬ݂ ܠܺܝܗܽܘܕ݂ܳܝܶܐ̈ ܇ ܕ݁ܠܰܐܝܟ݁ܳܐ ܕ݁ܶܐܢܳܐ ܐܳܙܶܠ ܐ̱ܢܳܐ ܆ ܐܰܢ̱ܬ݁ܽܘܢ ܂ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܬ݂ܳܐ ܆ ܘܳܐܦ݂ ܠܟ݂ܽܘܢ ܐܳܡܰܪ ܐ̱ܢܳܐ ܗܳܫܳܐ . ܦ݁ܽܘܩܕ݁ܳܢܳܐ ܚܰܕ݂̱ܬ݂ܳܐ ܝܳܗܶܒ݂ ܐ̱ܢܳܐ ܠܟ݂ܽܘܢ . ܕ݁ܰܗܘܰܝܬ݁ܽܘܢ ܡܰܚܒ݂ܺܝܢ ܚܰܕ݂ ܠܚܰܕ݂ . ܐܰܝܟ݁ܰܢܳܐ ܕ݁ܶܐܢܳܐ ܐܰܚܶܒ݂ܬ݁ܟ݂ܽܘܢ ܆ ܐܳܦ݂ ܐܰܢ̱ܬ݁ܽܘܢ ܬ݁ܰܚܒ݂ܽܘܢ ܚܰܕ݂ ܠܚܰܕ݂ . ܒ݁ܗܳܕ݂ܶܐ ܢܶܕ݁ܰܥ ܟ݁ܽܠ ܐ̱ܢܳܫ ܕ݁ܬ݂ܰܠܡܺܝܕ݂ܰܝ̈ ܐܰܢ̱ܬ݁ܽܘܢ ܆ ܐܶܢ ܚܽܘܒ݁ܳܐ ܢܶܗܘܶܐ ܒ݁ܟ݂ܽܘܢ ܚܰܕ݂ ܠܘܳܬ݂ ܚܰܕ݂ ܀ ܐܳܡܰܪ ܠܶܗ ܫܶܡܥܽܘܢ ܟ݁ܺܐܦ݂ܳܐ . ܡܳܪܰܢ ܂ ܠܰܐܝܟ݁ܳܐ ܐܳܙܶܠ ܐܰܢ̱ܬ݁ . ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܠܰܐܝܟ݁ܳܐ ܕ݁ܳܐܙܶܠ ܐ̱ܢܳܐ ܆ ܠܳܐ ܡܶܫܟ݁ܰܚ ܐܰܢ̱ܬ݁ ܗܳܫܳܐ ܕ݁ܬ݂ܺܐܬ݂ܶܐ ܒ݁ܳܬ݂ܰܪܝ . ܠܚܰܪܬ݂ܳܐ ܕ݁ܶܝܢ ܬ݁ܺܐܬ݂ܶܐ . ܐܳܡܰܪ ܠܶܗ ܫܶܡܥܽܘܢ ܟ݁ܺܐܦ݂ܳܐ . ܡܳܪܝ ܆ ܠܡܳܢܳܐ ܠܳܐ ܡܶܫܟ݁ܰܚ ܐ̱ܢܳܐ ܕ݁ܺܐܬ݂ܶܐ ܒ݁ܳܬ݂ܪܳܟ݂ ܗܳܫܳܐ . ܢܰܦ݂ܫܝ ܚܠܳܦ݂ܰܝܟ݁ ܣܳܐܶܡ ܐ̱ܢܳܐ . ܐܳܡܰܪ ܠܶܗ ܝܶܫܽܘܥ . ܢܰܦ݂ܫܳܟ݂ ܚܠܳܦ݂ܰܝ ܣܳܐܶܡ ܐܰܢ̱ܬ݁ ܆ ܐܰܡܺܝܢ ܐܰܡܺܝܢ ܁ ܐܳܡܰܪ ܐ̱ܢܳܐ ܠܳܟ݂ . ܕ݁ܠܳܐ ܢܶܩܪܶܐ ܬ݁ܰܪܢܳܓ݂ܠܳܐ ܥܕ݂ܰܡܳܐ ܕ݁ܬ݂ܶܟ݂ܦ݁ܽܘܪ ܒ݁ܺܝ ܬ݁ܠܳܬ݂ ܙܰܒ݂ܢܺܝܢ̈ ܀ Chapter 14 ܠܳܐ ܢܶܬ݁ܕ݁ܰܘܰܕ݂ ܠܶܒ݁ܟ݂ܽܘܢ . ܗܰܝܡܶܢܘ ܒ݁ܰܐܠܳܗܳܐ ܂ ܘܒ݂ܺܝ ܗܰܝܡܶܢܘ . ܣܰܓ݁ܺܝܐܝܺܢ̈ ܐܶܢܽܘܢ ܐܰܘܳܢܶܐ̈ ܒ݁ܶܝܬ݂ ܐܳܒ݂ܝ . ܘܶܐܠܳܐ ܐܳܡܰܪ ܗ̱ܘܺܝܬ݂ ܠܟ݂ܽܘܢ ܆ ܕ݁ܳܐܙܶܠ ܐ̱ܢܳܐ ܕ݁ܶܐܛܰܝܶܒ݂ ܠܟ݂ܽܘܢ ܐܰܬ݂ܪܳܐ . ܘܶܐܢ ܐܺܙܰܠ ܐܶܛܰܝܶܒ݂ ܠܟ݂ܽܘܢ ܐܰܬ݂ܪܳܐ ܆ ܬ݁ܽܘܒ݂ ܐܺܬ݂ܶܐ ܂ ܘܶܐܕ݂ܒ݁ܰܪܟ݂ܽܘܢ ܠܘܳܬ݂ܝ . ܕ݁ܰܐܝܟ݁ܳܐ ܕ݁ܶܐܢܳܐ ܐܺܝܬ݂ܰܝ ܆ ܐܳܦ݂ ܐܰܢ̱ܬ݁ܽܘܢ ܬ݁ܶܗܘܽܘܢ . ܘܠܰܐܝܟ݁ܳܐ ܕ݁ܳܐܙܶܠ ܐ̱ܢܳܐ ܝܳܕ݂ܥܺܝܢ ܐܢ̱ܬ݁ܽܘܢ . ܘܽܐܘܪܚܳܐ ܝܳܕ݂ܥܺܝܢ ܐܢ̱ܬ݁ܽܘܢ . ܐܳܡܰܪ ܠܶܗ ܬ݁ܳܐܘܡܰܐ . ܡܳܪܰܢ ܆ ܠܳܐ ܝܳܕ݂ܥܺܝܢܰܢ ܠܰܐܝܟ݁ܳܐ ܐܳܙܶܠ ܐܰܢ̱ܬ݁ . ܘܰܐܝܟ݁ܰܢܳܐ ܡܶܫܟ݁ܚܺܝܢ ܚ̱ܢܰܢ ܐܽܘܪܚܳܐ ܠܡܶܕ݁ܰܥ . ܐܳܡܰܪ ܠܶܗ ܝܶܫܽܘܥ . ܐܶܢܳܐ ܐ̱ܢܳܐ ܐܽܘܪܚܳܐ ܘܰܫܪܳܪܳܐ ܘܚܰܝܶܐ̈ . ܠܳܐ ܐ̱ܢܳܫ ܐܳܬ݂ܶܐ ܠܘܳܬ݂ ܐܳܒ݂ܝ ܂ ܐܶܠܳܐ ܐܶܢ ܒ݁ܺܝ . ܐܶܠܽܘ ܠܺܝ ܝܳܕ݂ܥܺܝܢ ܗ̱ܘܰܝܬ݁ܽܘܢ ܆ ܐܳܦ݂ ܠܳܐܒ݂ܝ ܝܳܕ݂ܥܺܝܢ ܗ̱ܘܰܝܬ݁ܽܘܢ . ܘܡܶܢ ܗܳܫܳܐ ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ ܂ ܘܰܚܙܰܝܬ݁ܽܘܢܳܝܗ̱ܝ . ܐܳܡܰܪ ܠܶܗ ܦ݂ܺܝܠܺܝܦ݁ܳܘܣ . ܡܳܪܰܢ ܆ ܚܰܘܳܢ ܐܰܒ݂ܳܐ ܂ ܘܟ݂ܰܕ݁ܽܘ ܠܰܢ . ܐܳܡܰܪ ܠܶܗ ܝܶܫܽܘܥ . ܗܳܢܳܐ ܟ݁ܽܠܶܗ ܙܰܒ݂ܢܳܐ ܥܰܡܟ݂ܽܘܢ ܐ̱ܢܳܐ : ܘܠܳܐ ܝܺܕ݂ܰܥܬ݁ܳܢܝ ܦ݁ܺܝܠܺܝܦ݁ܶܐ ܆ ܡܰܢ ܕ݁ܠܺܝ ܚܳܙܶܐ ܂ ܚܙܳܐ ܠܰܐܒ݂ܳܐ . ܘܰܐܝܟ݁ܰܢܳܐ ܐܰܢ̱ܬ݁ ܐܳܡܰܪ ܐܰܢ̱ܬ݁ ܚܰܘܳܢ ܐܰܒ݂ܳܐ . ܠܳܐ ܡܗܰܝܡܶܢ ܐܰܢ̱ܬ݁ ܕ݁ܶܐܢܳܐ ܒ݁ܳܐܒ݂ܝ ܆ ܘܳܐܒ݂ܝ ܒ݁ܺܝ ܆ ܡܶܠܶܐ̈ ܐܰܝܠܶܝܢ ܕ݁ܶܐܢܳܐ ܡܡܰܠܶܠ ܐ̱ܢܳܐ ܆ ܡܶܢ ܢܰܦ݂ܫܝ ܂ ܠܳܐ ܡܡܰܠܶܠ ܐ̱ܢܳܐ . ܐܳܒ݂ܝ ܕ݁ܶܝܢ ܕ݁ܒ݂ܺܝ ܥܳܡܰܪ ܆ ܗܽܘ ܥܳܒ݂ܶܕ݂ ܥܒ݂ܳܕ݂ܶܐ̈ ܗܳܠܶܝܢ . ܗܰܝܡܶܢܘ ܕ݁ܶܐܢܳܐ ܒ݁ܳܐܒ݂ܝ ܂ ܘܳܐܒ݂ܝ ܒ݁ܺܝ . ܘܶܐܠܳܐ ܂ ܐܳܦ݂ܶܢ ܡܶܛܽܠ ܥܒ݂ܳܕ݂ܶܐ̈ ܗܰܝܡܶܢܘ . ܐܰܡܺܝܢ ܐܰܡܺܝܢ ܁ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܡܰܢ ܕ݁ܰܡܗܰܝܡܶܢ ܒ݁ܺܝ ܆ ܥܒ݂ܳܕ݂ܶܐ̈ ܐܰܝܠܶܝܢ ܕ݁ܶܐܢܳܐ ܥܳܒ݂ܶܕ݂ ܐ̱ܢܳܐ ܐܳܦ݂ ܗܽܘ ܢܶܥܒ݁ܶܕ݂ . ܘܰܕ݂ܝܰܬ݁ܺܝܪܺܝܢ ܡܶܢ ܗܳܠܶܝܢ ܢܶܥܒ݁ܶܕ݂ . ܕ݁ܶܐܢܳܐ ܠܘܳܬ݂ ܐܰܒ݂ܳܐ ܐܳܙܶܠ ܐ̱ܢܳܐ . ܘܡܶܕ݁ܶܡ ܕ݁ܬ݂ܶܫܶܐܠܽܘܢ ܒ݁ܫܶܡܝ ܂ ܐܶܥܒ݁ܶܕ݂ ܠܟ݂ܽܘܢ . ܕ݁ܢܶܫܬ݁ܰܒ݁ܰܚ ܐܰܒ݂ܳܐ ܒ݁ܰܒ݂ܪܶܗ . ܘܶܐܢ ܬ݁ܶܫܶܐܠܽܘܢܳܢܝ ܒ݁ܫܶܡܝ ܐܶܢܳܐ ܥܳܒ݂ܶܕ݂ܢܳܐ ܀ ܐܶܢ ܪܳܚܡܺܝܢ ܐܢ̱ܬ݁ܽܘܢ ܠܺܝ ܂ ܦ݁ܽܘܩܕ݁ܳܢܰܝ̈ ܛܰܪܘ . ܘܶܐܢܳܐ ܐܶܒ݂ܥܶܐ ܡܶܢ ܐܳܒ݂ܝ ܆ ܘܰܐ̱ܚܪܺܢܳܐ ܦ݁ܰܪܰܩܠܺܛܳܐ ܢܶܬ݁ܶܠ ܠܟ݂ܽܘܢ ܇ ܕ݁ܢܶܗܘܶܐ ܥܰܡܟ݂ܽܘܢ ܠܥܳܠܰܡ . ܪܽܘܚܳܐ ܕ݁ܰܫܪܳܪܳܐ . ܗܰܘ ܕ݁ܥܳܠܡܳܐ ܠܳܐ ܡܶܫܟ݁ܰܚ ܠܰܡܩܰܒ݁ܳܠܽܘܬ݂ܶܗ . ܡܶܛܽܠ ܕ݁ܠܳܐ ܚܙܳܝܗ̱ܝ ܂ ܘܠܳܐ ܝܰܕ݂ܥܶܗ . ܐܰܢ̱ܬ݁ܽܘܢ ܕ݁ܶܝܢ ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ . ܕ݁ܰܠܘܳܬ݂ܟ݂ܽܘܢ ܥܳܡܰܪ ܂ ܘܰܒ݂ܟ݂ܽܘܢ ܗ̱ܽܘ . ܠܳܐ ܫܳܒ݂ܶܩ ܐ̱ܢܳܐ ܠܟ݂ܽܘܢ ܝܰܬ݂ܡܶܐ̈ . ܐܳܬ݂ܶܐ ܐ̱ܢܳܐ ܓ݁ܶܝܪ ܠܘܳܬ݂ܟ݂ܽܘܢ ܁ ܩܰܠܺܝܠ ܐ̱ܚܪܺܝܢ ܆ ܘܥܳܠܡܳܐ ܂ ܠܳܐ ܚܳܙܶܐ ܠܺܝ . ܐܰܢ̱ܬ݁ܽܘܢ ܕ݁ܶܝܢ ܂ ܬ݁ܶܚܙܽܘܢܳܢܝ . ܕ݁ܶܐܢܳܐ ܚܰܝ ܂ ܐܳܦ݂ ܐܰܢ̱ܬ݁ܽܘܢ ܬ݁ܺܚܽܘܢ . ܒ݁ܗܰܘ ܝܰܘܡܳܐ ܬ݁ܶܕ݁ܥܽܘܢ ܆ ܕ݁ܶܐܢܳܐ ܒ݁ܳܐܒ݂ܝ ܇ ܘܰܐܢ̱ܬ݁ܽܘܢ ܒ݁ܺܝ ܐܰܢ̱ܬ݁ܽܘܢ ܇ ܘܶܐܢܳܐ ܒ݁ܟ݂ܽܘܢ ܐ̱ܢܳܐ ܀.܀.܀܀ ܡܰܢ ܕ݁ܺܐܝܬ݂ ܠܘܳܬ݂ܶܗ ܦ݁ܽܘܩܕ݁ܳܢܰܝ̈ ܁ ܘܢܳܛܰܪ ܠܗܽܘܢ ܆ ܗܰܘ ܗ̱ܽܘ ܡܰܚܶܒ݂ ܠܺܝ . ܗܰܘ ܕ݁ܶܝܢ ܕ݁ܪܳܚܶܡ ܠܺܝ ܂ ܢܶܬ݂ܪܚܶܡ ܡܶܢ ܐܳܒ݂ܝ . ܘܶܐܢܳܐ ܐܶܪܚܡܺܝܘܗ̱ܝ ܂ ܘܶܐܚܰܘܶܝܘܗ̱ܝ ܢܰܦ݂ܫܝ ܀ ܐܳܡܰܪ ܠܶܗ ܝܺܗܽܘܕ݂ܳܐ . ܠܳܐ ܗ̱ܘܳܐ ܣܟ݂ܰܪܝܽܘܛܳܐ . ܡܳܪܝ ܆ ܡܳܢܰܘ ܠܰܢ ܥܬ݂ܺܝܕ݂ ܐܰܢ̱ܬ݁ ܠܰܡܚܰܘܳܝܽܘ ܢܰܦ݂ܫܳܟ݂ ܁ ܘܠܳܐ ܗ̱ܘܳܐ ܠܥܳܠܡܳܐ . ܥܢܳܐ ܝܶܫܽܘܥ ܘܶܐܡܰܪ ܠܶܗ . ܡܰܢ ܕ݁ܪܳܚܶܡ ܠܺܝ ܂ ܡܶܠܰܬ݂ܝ ܢܳܛܰܪ . ܘܳܐܒ݂ܝ ܢܶܪܚܡܺܝܘܗ̱ܝ . ܘܰܠܘܳܬ݂ܶܗ ܐܳܬ݂ܶܝܢ ܚ̱ܢܰܢ ܆ ܘܰܐܘܳܢܳܐ ܠܘܳܬ݂ܶܗ ܥܳܒ݂ܕ݁ܺܝܢ ܚ̱ܢܰܢ . ܗܰܘ ܕ݁ܶܝܢ ܕ݁ܠܳܐ ܪܳܚܶܡ ܠܺܝ ܁ ܡܶܠܰܬ݂ܝ ܠܳܐ ܢܳܛܰܪ . ܘܡܶܠܬ݂ܳܐ ܗܳܕ݂ܶܐ ܕ݁ܫܳܡܥܺܝܢ ܐܢ̱ܬ݁ܽܘܢ ܂ ܠܳܐ ܗܘܳܬ݂ ܕ݁ܺܝܠܝ . ܐܶܠܳܐ ܕ݁ܰܐܒ݂ܳܐ ܕ݁ܫܰܕ݁ܪܰܢܝ . ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܆ ܟ݁ܰܕ݂ ܠܘܳܬ݂ܟ݂ܽܘܢ ܐܺܝܬ݂ܰܝ . ܗܰܘ ܕ݁ܶܝܢ ܦ݁ܰܪܰܩܠܺܛܳܐ ܪܽܘܚܳܐ ܕ݁ܩܽܘܕ݂ܫܳܐ : ܗܰܘ ܕ݁ܰܡܫܰܕ݁ܰܪ ܐܳܒ݂ܝ ܒ݁ܫܶܡܝ ܆ ܗܽܘ ܢܰܠܶܦ݂ܟ݂ܽܘܢ ܟ݁ܽܠܡܶܕ݁ܶܡ . ܘܗܽܘ ܢܰܥ̱ܗܶܕ݂ܟ݂ܽܘܢ ܂ ܟ݁ܽܠ ܡܳܐ ܕ݁ܳܐܡܰܪ ܐ̱ܢܳܐ ܠܟ݂ܽܘܢ . ܫܠܳܡܳܐ ܫܳܒ݂ܶܩ ܐ̱ܢܳܐ ܠܟ݂ܽܘܢ . ܫܠܳܡܳܐ ܕ݁ܺܝܠܝ ܝܳܗܶܒ݂ ܐ̱ܢܳܐ ܠܟ݂ܽܘܢ . ܠܳܐ ܗ̱ܘܳܐ ܐܰܝܟ݁ܰܢܳܐ ܕ݁ܝܳܗܶܒ݂ ܥܳܠܡܳܐ ܂ ܐܶܢܳܐ ܝܳܗܶܒ݂ ܐ̱ܢܳܐ ܠܟ݂ܽܘܢ . ܠܳܐ ܢܶܬ݁ܕ݁ܰܘܰܕ݂ ܠܶܒ݁ܟ݂ܽܘܢ ܘܠܳܐ ܢܶܕ݂ܚܰܠ . ܫܡܰܥܬ݁ܽܘܢ ܕ݁ܶܐܢܳܐ ܐܶܡܪܶܬ݂ ܠܟ݂ܽܘܢ ܆ ܕ݁ܳܐܙܶܠ ܐ̱ܢܳܐ ܘܳܐܬ݂ܶܐ ܐ̱ܢܳܐ ܠܘܳܬ݂ܟ݂ܽܘܢ . ܐܶܠܽܘ ܪܳܚܡܺܝܢ ܗ̱ܘܰܝܬ݁ܽܘܢ ܠܺܝ ܆ ܚܳܕ݂ܶܝܢ ܗ̱ܘܰܝܬ݁ܽܘܢ ܕ݁ܳܐܙܶܠ ܐ̱ܢܳܐ ܠܘܳܬ݂ ܐܳܒ݂ܝ . ܕ݁ܳܐܒ݂ܝ ܂ ܪܰܒ݂ ܗ̱ܽܘ ܡܶܢܝ . ܘܗܳܫܳܐ ܗܳܐ ܐܶܡܪܶܬ݂ ܠܟ݂ܽܘܢ ܂ ܥܰܕ݂ܠܳܐ ܢܶܗܘܶܐ . ܕ݁ܡܳܐ ܕ݁ܰܗܘܳܐ ܬ݁ܗܰܝܡܢܽܘܢ . ܡܶܟ݁ܺܝܠ ܠܳܐ ܐܶܡܰܠܶܠ ܥܰܡܟ݂ܽܘܢ ܣܰܓ݁ܺܝܳܐܬ݂ܳܐ̈ . ܐܳܬ݂ܶܐ ܓ݁ܶܝܪ ܐܰܪܟ݂ܽܘܢܶܗ ܕ݁ܥܳܠܡܳܐ ܆ ܘܒ݂ܺܝ ܠܰܝܬ݁ ܠܶܗ ܡܶܕ݁ܶܡ . ܐܶܠܳܐ ܕ݁ܢܶܕ݁ܰܥ ܥܳܠܡܳܐ ܂ ܕ݁ܪܳܚܶܡ ܐ̱ܢܳܐ ܠܳܐܒ݂ܝ ܆ ܘܰܐܝܟ݁ܰܢܳܐ ܕ݁ܦ݂ܰܩܕ݁ܰܢܝ ܐܳܒ݂ܝ ܂ ܗܳܟ݂ܘܳܬ݂ ܥܳܒ݂ܶܕ݂ ܐ̱ܢܳܐ . ܩܽܘܡܘ ܢܺܐܙܰܠ ܡܶܟ݁ܳܐ ܀ Chapter 15 ܐܶܢܳܐ ܐ̱ܢܳܐ ܂ ܓ݁ܦ݂ܶܬ݁ܳܐ ܕ݁ܰܫܪܳܪܳܐ . ܘܳܐܒ݂ܝ ܗ̱ܽܘ ܦ݁ܰܠܳܚܳܐ . ܟ݁ܽܠ ܫܒ݂ܺܫܬ݁ܳܐ ܕ݁ܒ݂ܺܝ ܦ݁ܺܐܪܶܐ̈ ܠܳܐ ܝܳܗܒ݁ܳܐ ܆ ܫܳܩܶܠ ܠܳܗ . ܘܰܐܝܕ݂ܳܐ ܕ݁ܝܳܗܒ݁ܳܐ ܦ݁ܺܐܪܶܐ̈ ܆ ܡܕ݂ܰܟ݁ܶܐ ܠܳܗ : ܕ݁ܦ݂ܺܐܪܶܐ̈ ܣܰܓ݁ܺܝܶܐܐ̈ ܬ݁ܰܝܬ݁ܶܐ . ܐܰܢ̱ܬ݁ܽܘܢ ܡܶܢ ܟ݁ܰܕ݁ܽܘ ܕ݁ܟ݂ܶܝܢ ܐܢ̱ܬ݁ܽܘܢ . ܡܶܛܽܠ ܡܶܠܬ݂ܳܐ ܕ݁ܡܰܠܠܶܬ݂ ܥܰܡܟ݂ܽܘܢ . ܩܰܘܰܘ ܒ݁ܺܝ ܂ ܘܶܐܢܳܐ ܒ݁ܟ݂ܽܘܢ . ܐܰܝܟ݁ܰܢܳܐ ܕ݁ܰܫܒ݂ܺܫܬ݁ܳܐ ܠܳܐ ܡܶܫܟ݁ܚܳܐ ܕ݁ܬ݂ܶܬ݁ܶܠ ܦ݁ܺܐܪܶܐ̈ ܡܶܢ ܢܰܦ݂ܫܳܗ . ܐܶܠܳܐ ܡܩܰܘܝܳܐ ܒ݁ܰܓ݂ܦ݂ܶܬ݁ܳܐ ܆ ܗܳܟ݂ܰܢܳܐ ܐܳܦ݂ ܠܳܐ ܐܰܢ̱ܬ݁ܽܘܢ ܂ ܐܶܠܳܐ ܬ݁ܩܰܘܽܘܢ ܒ݁ܺܝ . ܐܶܢܳܐ ܐ̱ܢܳܐ ܓ݁ܦ݂ܶܬ݁ܳܐ ܂ ܘܰܐܢ̱ܬ݁ܽܘܢ ܫܒ݂ܺܫܬ݁ܶܐ̈ . ܡܰܢ ܕ݁ܰܡܩܰܘܶܐ ܒ݁ܺܝ ܘܶܐܢܳܐ ܒ݁ܶܗ ܆ ܗܳܢܳܐ ܡܰܝܬ݁ܶܐ ܦ݁ܺܐܪܶܐ̈ ܣܰܓ݁ܺܝܶܐܐ̈ . ܡܶܛܽܠ ܕ݁ܰܕ݂ܠܳܐ ܐܶܢܳܐ ܂ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܥܒ݁ܰܕ݂ ܡܶܕ݁ܶܡ . ܐܶܠܳܐ ܕ݁ܶܝܢ ܐ̱ܢܳܫ ܡܩܰܘܶܐ ܒ݁ܺܝ ܆ ܡܶܫܬ݁ܕ݂ܶܐ ܠܒ݂ܰܪ . ܐܰܝܟ݂ ܫܒ݂ܺܫܬ݁ܳܐ ܕ݁ܝܳܒ݂ܫܳܐ ܇ ܘܠܳܩܛܺܝܢ ܪܳܡܶܝܢ ܠܳܗ ܒ݁ܢܽܘܪܳܐ ܕ݁ܬ݂ܺܐܩܰܕ݂ ܀ ܐܶܢ ܕ݁ܶܝܢ ܬ݁ܩܰܘܽܘܢ ܒ݁ܺܝ ܁ ܘܡܶܠܰܝ̈ ܢܩܰܘܝܳܢ̈ ܒ݁ܟ݂ܽܘܢ ܆ ܟ݁ܽܠ ܡܳܐ ܕ݁ܬ݂ܶܨܒ݁ܽܘܢ ܠܡܶܫܰܐܠ ܂ ܢܶܗܘܶܐ ܠܟ݂ܽܘܢ . ܒ݁ܗܳܕ݂ܶܐ ܡܶܫܬ݁ܰܒ݁ܰܚ ܐܰܒ݂ܳܐ ܆ ܕ݁ܦ݂ܺܐܪܶܐ̈ ܣܰܓ݁ܺܝܶܐܐ̈ ܬ݁ܰܝܬ݁ܽܘܢ . ܘܬ݂ܶܗܘܽܘܢ ܬ݁ܰܠܡܺܝܕ݂ܰܝ̈ . ܐܰܝܟ݁ܰܢܳܐ ܕ݁ܰܐܚܒ݂ܰܢܝ ܐܳܒ݂ܝ ܁ ܐܳܦ݂ ܐܶܢܳܐ ܐܰܚܶܒ݂ܬ݁ܟ݂ܽܘܢ . ܩܰܘܰܘ ܒ݁ܪܶܚܡܰܬ݂ܝ ܕ݁ܺܝܠܝ . ܐܶܢ ܦ݁ܽܘܩܕ݁ܳܢܰܝ̈ ܬ݁ܶܛܪܽܘܢ ܂ ܬ݁ܩܰܘܽܘܢ ܒ݁ܚܽܘܒ݁ܳܐ ܕ݁ܺܝܠܝ . ܐܰܝܟ݁ܰܢܳܐ ܕ݁ܶܐܢܳܐ ܢܶܛܪܶܬ݂ ܦ݁ܽܘܩܕ݁ܳܢܰܘܗ̱ܝ̈ ܕ݁ܳܐܒ݂ܝ ܇ ܘܰܡܩܰܘܶܐ ܐ̱ܢܳܐ ܒ݁ܚܽܘܒ݁ܶܗ . ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܂ ܕ݁ܚܰܕ݂ܘܰܬ݂ܝ ܬ݁ܶܗܘܶܐ ܒ݁ܟ݂ܽܘܢ . ܘܬ݂ܶܫܬ݁ܰܡܠܶܐ ܚܰܕ݂ܘܰܬ݂ܟ݂ܽܘܢ . ܗܳܢܰܘ ܦ݁ܽܘܩܕ݁ܳܢܝ ܂ ܕ݁ܬ݂ܰܚܒ݂ܽܘܢ ܚܰܕ݂ ܠܚܰܕ݂ . ܐܰܝܟ݁ܰܢܳܐ ܕ݁ܶܐܢܳܐ ܐܰܚܶܒ݂ܬ݁ܟ݂ܽܘܢ . ܚܽܘܒ݁ܳܐ ܕ݁ܪܰܒ݁ ܡܶܢ ܗܳܢܳܐ ܠܰܝܬ݁ . ܕ݁ܐ̱ܢܳܫ ܢܰܦ݂ܫܶܗ ܢܣܺܝܡ ܚܠܳܦ݂ ܪܳܚܡܰܘܗ̱ܝ̈ . ܐܰܢ̱ܬ݁ܽܘܢ ܪܳܚܡܰܝ̈ ܐܰܢ̱ܬ݁ܽܘܢ . ܐܶܢ ܬ݁ܶܥܒ݁ܕ݂ܽܘܢ ܟ݁ܽܠ ܕ݁ܰܡܦ݂ܰܩܶܕ݂ ܐ̱ܢܳܐ ܠܟ݂ܽܘܢ . ܠܳܐ ܡܶܟ݁ܺܝܠ ܩܳܪܶܐ ܐ̱ܢܳܐ ܠܟ݂ܽܘܢ ܥܰܒ݂ܕ݁ܶܐ̈ . ܡܶܛܽܠ ܕ݁ܥܰܒ݂ܕ݁ܳܐ ܠܳܐ ܝܳܕ݂ܰܥ ܡܳܢܳܐ ܥܳܒ݂ܶܕ݂ ܡܳܪܶܗ . ܪܳܚܡܰܝ̈ ܕ݁ܶܝܢ ܩܪܺܝܬ݂ܟ݂ܽܘܢ ܆ ܡܶܛܽܠ ܕ݁ܟ݂ܽܠ ܕ݁ܫܶܡܥܶܬ݂ ܡܶܢ ܐܳܒ݂ܝ . ܐܰܘܕ݁ܰܥܬ݁ܟ݂ܽܘܢ . ܠܳܐ ܗ̱ܘܳܐ ܐܰܢ̱ܬ݁ܽܘܢ ܓ݁ܒ݂ܰܝܬ݁ܽܘܢܳܢܝ . ܐܶܠܳܐ ܐܶܢܳܐ ܗܽܘ ܓ݁ܒ݂ܺܝܬ݂ܟ݂ܽܘܢ . ܘܣܳܡܬ݁ܟ݂ܽܘܢ ܆ ܕ݁ܳܐܦ݂ ܐܰܢ̱ܬ݁ܽܘܢ ܬ݁ܺܐܙܽܠ̱ܘܢ ܬ݁ܰܝܬ݁ܽܘܢ ܦ݁ܺܐܪܶܐ̈ ܂ ܘܦ݂ܺܐܪܰܝܟ݁ܽܘܢ̈ ܢܩܰܘܽܘܢ . ܕ݁ܟ݂ܽܠ ܕ݁ܬ݂ܶܫܶܐܠܽܘܢ ܠܳܐܒ݂ܝ ܒ݁ܫܶܡܝ ܂ ܢܶܬ݁ܶܠ ܠܟ݂ܽܘܢ ܀ ܗܳܠܶܝܢ ܡܦ݂ܰܩܶܕ݂ ܐ̱ܢܳܐ ܠܟ݂ܽܘܢ ܂ ܕ݁ܬ݂ܰܚܒ݂ܽܘܢ ܚܰܕ݂ ܠܚܰܕ݂ . ܘܶܐܢ ܥܳܠܡܳܐ ܣܳܢܶܐ ܠܟ݂ܽܘܢ ܆ ܕ݁ܰܥܘ ܕ݁ܰܩܕ݂ܳܡܰܝܟ݁ܽܘܢ ܠܺܝ ܣܢܳܐ . ܘܶܐܠܽܘ ܡܶܢ ܥܳܠܡܳܐ ܗ̱ܘܰܝܬ݁ܽܘܢ ܆ ܥܳܠܡܳܐ ܠܕ݂ܺܝܠܶܗ ܪܳܚܶܡ ܗ̱ܘܳܐ . ܐܶܠܳܐ ܠܳܐ ܗܘܰܝܬ݁ܽܘܢ ܡܶܢ ܥܳܠܡܳܐ . ܐܶܢܳܐ ܓ݁ܶܝܪ ܓ݁ܒ݂ܺܝܬ݂ܟ݂ܽܘܢ ܡܶܢ ܥܳܠܡܳܐ . ܡܶܛܽܠ ܗܳܢܳܐ ܣܳܢܶܐ ܠܟ݂ܽܘܢ ܥܳܠܡܳܐ ܀ ܥ̱ܶܗܰܕ݂ܘ ܡܶܠܬ݂ܳܐ ܕ݁ܶܐܢܳܐ ܐܶܡܪܶܬ݂ ܠܟ݂ܽܘܢ . ܕ݁ܠܰܝܬ݁ ܥܰܒ݂ܕ݁ܳܐ ܕ݁ܪܰܒ݁ ܡܶܢ ܡܳܪܶܗ . ܐܶܢ ܠܺܝ ܪܕ݂ܰܦ݂ܘ ܂ ܐܳܦ݂ ܠܟ݂ܽܘܢ ܢܶܪܕ݁ܦ݂ܽܘܢ . ܘܶܐܢ ܡܶܠܰܬ݂ܝ ܢܛܰܪܘ ܂ ܐܳܦ݂ ܕ݁ܺܝܠܟ݂ܽܘܢ ܢܶܛܪܽܘܢ ܀ ܐܶܠܳܐ ܗܳܠܶܝܢ ܟ݁ܽܠܗܶܝܢ ܢܶܥܒ݁ܕ݂ܽܘܢ ܒ݁ܟ݂ܽܘܢ ܂ ܡܶܛܽܠ ܫܶܡܝ ܕ݁ܺܝܠܝ . ܕ݁ܠܳܐ ܝܳܕ݂ܥܺܝܢ ܠܡܰܢ ܕ݁ܫܰܕ݁ܪܰܢܝ ܀ ܐܶܠܽܘ ܐܶܢܳܐ ܠܳܐ ܐܶܬ݂ܺܝܬ݂ ܡܰܠܠܶܬ݂ ܥܰܡܗܽܘܢ ܆ ܠܰܝܬ݁ ܗ̱ܘܳܬ݂ ܠܗܽܘܢ ܚܛܺܝܬ݂ܳܐ . ܗܳܫܳܐ ܕ݁ܶܝܢ ܠܰܝܬ݁ ܠܗܽܘܢ ܥܶܠܬ݂ܳܐ ܥܰܠ ܐܰܦ݁ܰܝ̈ ܚܛܺܝܬ݂ܗܽܘܢ ܀ ܡܰܢ ܕ݁ܠܺܝ ܣܳܢܶܐ ܂ ܘܳܐܦ݂ ܠܳܐܒ݂ܝ ܣܳܢܶܐ ܀ ܘܶܐܠܽܘ ܥܒ݂ܳܕ݂ܶܐ̈ ܠܳܐ ܥܶܒ݂ܕ݁ܶܬ݂ ܠܥܺܢܰܝܗܽܘܢ̈ : ܐܰܝܠܶܝܢ ܕ݁ܐ̱ܢܳܫ ܐ̱ܚܪܺܝܢ ܠܳܐ ܥܒ݂ܰܕ݂ ܆ ܠܰܝܬ݁ ܗ̱ܘܳܐ ܠܗܽܘܢ ܚܛܺܝܬ݂ܳܐ . ܗܳܫܳܐ ܕ݁ܶܝܢ ܘܰܚܙܰܘ ܂ ܘܰܣܢܰܘ . ܐܳܦ݂ ܠܺܝ ܘܳܐܦ݂ ܠܳܐܒ݂ܝ . ܕ݁ܬ݂ܶܬ݂ܡܰܠܶܐ ܡܶܠܬ݂ܳܐ ܕ݁ܰܟ݂ܬ݂ܺܝܒ݂ܳܐ ܒ݁ܢܳܡܽܘܣܗܽܘܢ ܇ ܕ݁ܰܣܢܰܐܘܽܢܝ ܡܰܓ݁ܳܢ ܀ ܡܳܐ ܕ݁ܶܝܢ ܕ݁ܶܐܬ݂ܳܐ ܦ݁ܰܪܰܩܠܺܛܳܐ : ܗܰܘ ܕ݁ܶܐܢܳܐ ܡܫܰܕ݁ܰܪ ܐ̱ܢܳܐ ܠܟ݂ܽܘܢ ܡܶܢ ܠܘܳܬ݂ ܐܳܒ݂ܝ ܂ ܪܽܘܚܳܐ ܕ݁ܰܫܪܳܪܳܐ : ܗܰܘ ܕ݁ܡܶܢ ܠܘܳܬ݂ ܐܳܒ݂ܝ ܢܳܦ݂ܶܩ ܆ ܗܽܘ ܢܰܣܗܶܕ݂ ܥܠܰܝ . ܐܳܦ݂ ܐܰܢ̱ܬ݁ܽܘܢ ܣܳܗܕ݁ܺܝܢ ܐܢ̱ܬ݁ܽܘܢ ܆ ܕ݁ܡܶܢ ܫܽܘܪܳܝܳܐ ܂ ܥܰܡܝ ܐܰܢ̱ܬ݁ܽܘܢ . Chapter 16 ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ ܕ݁ܠܳܐ ܬ݁ܶܬ݂ܟ݁ܰܫܠܽܘܢ ܀ ܢܰܦ݁ܩܽܘܢܳܟ݂ܽܘܢ ܓ݁ܶܝܪ ܡܶܢ ܟ݁ܢܽܘܫܳܬ݂ܗܽܘܢ̈ . ܘܬ݂ܺܐܬ݂ܶܐ ܫܳܥܬ݂ܳܐ ܕ݁ܟ݂ܽܠ ܕ݁ܢܶܩܛܽܘܠܟ݂ܽܘܢ ܆ ܢܰܣܒ݁ܰܪ ܕ݁ܩܽܘܪܒ݁ܳܢܳܐ ܡܩܰܪܶܒ݂ ܠܰܐܠܳܗܳܐ . ܘܗܳܠܶܝܢ ܢܶܥܒ݁ܕ݂ܽܘܢ ܆ ܡܶܛܽܠ ܕ݁ܠܳܐ ܝܺܕ݂ܰܥܘ ܘܠܳܐ ܠܳܐܒ݂ܝ ܂ ܘܠܳܐ ܠܺܝ ܀.܀.܀܀ ܗܳܠܶܝܢ ܡܰܠܠܶܬ݂ ܥܰܡܟ݂ܽܘܢ : ܕ݁ܡܳܐ ܕ݁ܶܐܬ݂ܳܐ ܥܶܕ݁ܳܢܗܶܝܢ ܬ݁ܶܥ̱ܗܕ݁ܽܘܢ ܐܶܢܶܝܢ̈ ܆ ܕ݁ܶܐܢܳܐ ܐܶܡܪܶܬ݂ ܠܟ݂ܽܘܢ ܇ ܗܳܠܶܝܢ ܕ݁ܶܝܢ ܡܶܢ ܩܕ݂ܺܝܡ ܠܳܐ ܐܶܡܪܶܬ݂ ܠܟ݂ܽܘܢ ܕ݁ܥܰܡܟ݂ܽܘܢ ܗ̱ܘܺܝܬ݂ . ܗܳܫܳܐ ܕ݁ܶܝܢ ܐܳܙܶܠ ܐ̱ܢܳܐ ܠܘܳܬ݂ ܡܰܢ ܕ݁ܫܰܕ݁ܪܰܢܝ ܆ ܘܠܳܐ ܐ̱ܢܳܫ ܡܶܢܟ݂ܽܘܢ ܡܫܰܐܶܠ ܠܺܝ ܂ ܠܰܐܝܟ݁ܳܐ ܐܳܙܶܠ ܐܰܢ̱ܬ݁ . ܐܶܡܪܶܬ݂ ܠܟ݂ܽܘܢ ܓ݁ܶܝܪ ܗܳܠܶܝܢ ܆ ܘܶܐܬ݂ܳܬ݂ ܟ݁ܰܪܝܽܘܬ݂ܳܐ ܂ ܘܰܡܠܳܬ݂ ܠܶܒ݁ܰܘܳܬ݂ܟ݂ܽܘܢ̈ . ܐܶܠܳܐ ܐܶܢܳܐ ܫܪܳܪܳܐ ܐܳܡܰܪ ܐ̱ܢܳܐ ܠܟ݂ܽܘܢ . ܕ݁ܦ݂ܰܩܳܚ ܠܟ݂ܽܘܢ ܂ ܕ݁ܶܐܢܳܐ ܐܺܙܰܠ . ܐܶܢ ܓ݁ܶܝܪ ܐܶܢܳܐ ܠܳܐ ܐܳܙܶܠ ܐ̱ܢܳܐ ܆ ܦ݁ܰܪܰܩܠܺܛܳܐ ܠܳܐ ܐܳܬ݂ܶܐ ܠܘܳܬ݂ܟ݂ܽܘܢ . ܐܶܢ ܕ݁ܶܝܢ ܐܺܙܰܠ ܆ ܐܶܫܰܕ݁ܪܺܝܘܗ̱ܝ ܠܘܳܬ݂ܟ݂ܽܘܢ . ܘܡܳܐ ܕ݁ܶܐܬ݂ܳܐ ܗܽܘ ܢܰܟ݁ܣܺܝܘܗ̱ܝ ܠܥܳܠܡܳܐ . ܥܰܠ ܚܛܺܝܬ݂ܳܐ ܘܥܰܠ ܙܰܕ݁ܺܝܩܽܘܬ݂ܳܐ ܘܥܰܠ ܕ݁ܺܝܢܳܐ . ܥܰܠ ܚܛܺܝܬ݂ܳܐ ܂ ܕ݁ܠܳܐ ܡܗܰܝܡܢܺܝܢ ܒ݁ܺܝ . ܥܰܠ ܙܰܕ݁ܺܝܩܽܘܬ݂ܳܐ ܕ݁ܶܝܢ ܂ ܕ݁ܰܠܘܳܬ݂ ܐܳܒ݂ܝ ܐܳܙܶܠ ܐ̱ܢܳܐ ܆ ܘܠܳܐ ܬ݁ܽܘܒ݂ ܚܳܙܶܝܢ ܐܢ̱ܬ݁ܽܘܢ ܠܺܝ . ܥܰܠ ܕ݁ܺܝܢܳܐ ܕ݁ܶܝܢ ܂ ܕ݁ܰܐܪܟ݂ܽܘܢܳܐ ܕ݁ܥܳܠܡܳܐ ܗܳܢܳܐ ܕ݁ܺܝܢ ܗ̱ܽܘ . ܬ݁ܽܘܒ݂ ܣܰܓ݁ܺܝ ܐܺܝܬ݂ ܠܺܝ ܠܡܺܐܡܰܪ ܠܟ݂ܽܘܢ ܆ ܐܶܠܳܐ ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܠܡܶܐܚܰܕ݂ ܗܳܫܳܐ . ܡܳܐ ܕ݁ܶܐܬ݂ܳܐ ܕ݁ܶܝܢ ܪܽܘܚܳܐ ܕ݁ܰܫܪܳܪܳܐ ܆ ܗܽܘ ܢܕ݂ܰܒ݁ܰܪܟ݂ܽܘܢ ܒ݁ܟ݂ܽܠܶܗ ܫܪܳܪܳܐ . ܠܳܐ ܓ݁ܶܝܪ ܢܡܰܠܶܠ ܡܶܢ ܪܶܥܝܳܢ ܢܰܦ݂ܫܶܗ . ܐܶܠܳܐ ܟ݁ܽܠ ܕ݁ܢܶܫܡܰܥ ܗܰܘ ܢܡܰܠܶܠ . ܘܰܥܬ݂ܺܝܕ݂ܳܬ݂ܳܐ̈ ܢܰܘܕ݁ܰܥܟ݂ܽܘܢ . ܘܗܽܘ ܢܫܰܒ݁ܚܰܢܝ . ܡܶܛܽܠ ܕ݁ܡܶܢ ܕ݁ܺܝܠܝ ܢܶܣܰܒ݂ ܂ ܘܰܢܚܰܘܶܝܟ݂ܽܘܢ . ܟ݁ܽܠ ܡܶܕ݁ܶܡ ܕ݁ܺܐܝܬ݂ ܠܳܐܒ݂ܝ ܂ ܕ݁ܺܝܠܝ ܗ̱ܽܘ . ܡܶܛܽܠ ܗܳܢܳܐ ܐܶܡܪܶܬ݂ ܠܟ݂ܽܘܢ ܆ ܕ݁ܡܶܢ ܕ݁ܺܝܠܝ ܢܶܣܰܒ݂ ܂ ܘܰܢܚܰܘܶܝܟ݂ܽܘܢ ܀ ܩܰܠܺܝܠ ܂ ܘܠܳܐ ܬ݁ܶܚܙܽܘܢܳܢܝ . ܘܬ݂ܽܘܒ݂ ܩܰܠܺܝܠ ܂ ܘܬ݂ܶܚܙܽܘܢܳܢܝ . ܕ݁ܳܐܙܶܠ ܐ̱ܢܳܐ ܠܘܳܬ݂ ܐܰܒ݂ܳܐ . ܘܶܐܡܰܪܘ ܗ̱ܘܰܘ ܬ݁ܰܠܡܺܝܕ݂ܰܘܗ̱ܝ̈ ܚܰܕ݂ ܠܚܰܕ݂ . ܡܳܢܳܐ ܗ̱ܝ ܗܳܕ݂ܶܐ ܕ݁ܶܐܡܰܪ ܠܰܢ ܇ ܕ݁ܩܰܠܺܝܠ ܘܠܳܐ ܬ݁ܶܚܙܽܘܢܳܢܝ ܇ ܘܬ݂ܽܘܒ݂ ܩܰܠܺܝܠ ܘܬ݂ܶܚܙܽܘܢܳܢܝ . ܘܕ݂ܳܐܙܶܠ ܐ̱ܢܳܐ ܠܘܳܬ݂ ܐܳܒ݂ܝ . ܘܳܐܡܪܺܝܢ ܗ̱ܘܰܘ . ܡܳܢܳܐ ܗ̱ܝ ܗܳܕ݂ܶܐ ܩܰܠܺܝܠ ܕ݁ܶܐܡܰܪ . ܠܳܐ ܝܳܕ݂ܥܺܝܢܰܢ ܡܳܢܳܐ ܡܡܰܠܶܠ . ܝܶܫܽܘܥ ܕ݁ܶܝܢ ܝܺܕ݂ܰܥ ܕ݁ܒ݂ܳܥܶܝܢ ܗ̱ܘܰܘ ܠܰܡܫܰܐܳܠܽܘܬ݂ܶܗ ܂ ܘܶܐܡܰܪ ܠܗܽܘܢ . ܥܰܠ ܗܳܕ݂ܶܐ ܒ݁ܳܥܶܝܢ ܐܢ̱ܬ݁ܽܘܢ ܥܰܡ ܚܕ݂ܳܕ݂ܶܐ̈ ܇ ܕ݁ܶܐܡܪܶܬ݂ ܠܟ݂ܽܘܢ : ܕ݁ܩܰܠܺܝܠ ܘܠܳܐ ܬ݁ܶܚܙܽܘܢܳܢܝ : ܘܬ݂ܽܘܒ݂ ܩܰܠܺܝܠ ܘܬ݂ܶܚܙܽܘܢܳܢܝ . ܐܰܡܺܝܢ ܐܰܡܺܝܢ ܁ ܐܳܡܰܪ ܐ̱ܢܳܐ ܠܟ݂ܽܘܢ . ܕ݁ܬ݂ܶܒ݂ܟ݁ܽܘܢ ܐܰܢ̱ܬ݁ܽܘܢ ܘܬ݂ܶܐܠܽܘܢ . ܘܥܳܠܡܳܐ ܢܶܚܕ݁ܶܐ ܂ ܘܰܠܟ݂ܽܘܢ ܬ݁ܶܟ݂ܪܶܐ . ܐܶܠܳܐ ܟ݁ܰܪܝܽܘܬ݂ܟ݂ܽܘܢ ܠܚܰܕ݂ܽܘܬ݂ܳܐ ܬ݁ܶܗܘܶܐ . ܐܰܢ̱ܬ݁ܬ݂ܳܐ ܡܳܐ ܕ݁ܝܳܠܕ݁ܳܐ ܆ ܟ݁ܳܪܝܳܐ ܠܳܗ ܕ݁ܰܡܛܳܐ ܝܰܘܡܳܐ ܕ݁ܡܰܘܠܳܕ݂ܳܗ . ܡܳܐ ܕ݁ܝܶܠܕ݁ܰܬ݂ ܕ݁ܶܝܢ ܒ݁ܪܳܐ ܆ ܠܳܐ ܥ̱ܳܗܕ݁ܳܐ ܐܽܘܠܨܳܢܳܗ : ܡܶܛܽܠ ܚܰܕ݂ܽܘܬ݂ܳܐ ܕ݁ܶܐܬ݂ܺܝܠܶܕ݂ ܒ݁ܰܪܢܳܫܳܐ ܒ݁ܥܳܠܡܳܐ . ܐܳܦ݂ ܐܰܢ̱ܬ݁ܽܘܢ ܗܳܫܳܐ ܟ݁ܰܪܝܳܐ ܠܟ݂ܽܘܢ . ܬ݁ܽܘܒ݂ ܕ݁ܶܝܢ ܐܶܚܙܶܝܟ݂ܽܘܢ ܂ ܘܢܶܚܕ݁ܶܐ ܠܶܒ݁ܟ݂ܽܘܢ ܁ ܘܚܰܕ݂ܘܰܬ݂ܟ݂ܽܘܢ ܂ ܠܳܐ ܐ̱ܢܳܫ ܢܳܣܶܒ݂ ܡܶܢܟ݂ܽܘܢ . ܘܰܒ݂ܗܰܘ ܝܰܘܡܳܐ ܠܺܝ ܠܳܐ ܬ݁ܶܫܶܐܠܽܘܢ ܡܶܕ݁ܶܡ . ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ ܆ ܕ݁ܟ݂ܽܠ ܡܶܕ݁ܶܡ ܕ݁ܬ݂ܶܫܶܐܠܽܘܢ ܠܳܐܒ݂ܝ ܒ݁ܫܶܡܝ ܂ ܢܶܬ݁ܶܠ ܠܟ݂ܽܘܢ . ܥܕ݂ܰܡܳܐ ܠܗܳܫܳܐ ܠܳܐ ܫܶܐܠܬ݁ܽܘܢ ܡܶܕ݁ܶܡ ܒ݁ܫܶܡܝ . ܫܰܐܠܘ ܘܬ݂ܶܣܒ݂ܽܘܢ . ܕ݁ܬ݂ܶܗܘܶܐ ܚܰܕ݂ܘܰܬ݂ܟ݂ܽܘܢ ܡܫܰܡܠܝܳܐ ܀ ܗܳܠܶܝܢ ܒ݁ܦ݂ܶܠܳܐܬ݂ܳܐ̈ ܡܰܠܠܶܬ݂ ܥܰܡܟ݂ܽܘܢ . ܐܳܬ݂ܝܳܐ ܕ݁ܶܝܢ ܫܳܥܬ݂ܳܐ ܆ ܐܶܡܰܬ݂ܝ ܕ݁ܠܳܐ ܐܶܡܰܠܶܠ ܥܰܡܟ݂ܽܘܢ ܒ݁ܦ݂ܶܠܳܐܬ݂ܳܐ̈ . ܐܶܠܳܐ ܥܺܝܢ ܒ݁ܰܓ݂ܠܶܐ ܐܶܒ݂ܰܕ݁ܶܩ ܠܟ݂ܽܘܢ ܥܰܠ ܐܰܒ݂ܳܐ . ܒ݁ܗܰܘ ܝܰܘܡܳܐ ܕ݁ܬ݂ܶܫܶܐܠܽܘܢ ܒ݁ܫܶܡܝ . ܘܠܳܐ ܐܳܡܰܪ ܐ̱ܢܳܐ ܠܟ݂ܽܘܢ ܕ݁ܶܐܢܳܐ ܐܶܒ݂ܥܶܐ ܡܶܢ ܐܰܒ݂ܳܐ ܥܠܰܝܟ݁ܽܘܢ ܇ ܗܽܘ ܓ݁ܶܝܪ ܐܰܒ݂ܳܐ ܪܳܚܶܡ ܠܟ݂ܽܘܢ . ܕ݁ܰܐܢ̱ܬ݁ܽܘܢ ܪܚܶܡܬ݁ܽܘܢܳܢܝ . ܘܗܰܝܡܶܢܬ݁ܽܘܢ ܕ݁ܶܐܢܳܐ ܡܶܢ ܠܘܳܬ݂ ܐܰܠܳܗܳܐ ܢܶܦ݂ܩܶܬ݂ . ܢܶܦ݂ܩܶܬ݂ ܡܶܢ ܠܘܳܬ݂ ܐܰܒ݂ܳܐ ܂ ܘܶܐܬ݂ܺܝܬ݂ ܠܥܳܠܡܳܐ . ܘܬ݂ܽܘܒ݂ ܫܳܒ݂ܶܩ ܐ̱ܢܳܐ ܠܥܳܠܡܳܐ ܂ ܘܳܐܙܶܠ ܐ̱ܢܳܐ ܠܺܝ ܠܘܳܬ݂ ܐܰܒ݂ܳܐ . ܐܳܡܪܺܝܢ ܠܶܗ ܬ݁ܰܠܡܺܝܕ݂ܰܘܗ̱ܝ̈ . ܗܳܐ ܗܳܫܳܐ ܓ݁ܰܠܝܳܐܝܺܬ݂ ܡܡܰܠܶܠ ܐܰܢ̱ܬ݁ ܆ ܘܦ݂ܶܠܶܐܬ݂ܳܐ ܘܠܳܐ ܚܕ݂ܳܐ ܐܳܡܰܪ ܐܰܢ̱ܬ݁ . ܗܳܫܳܐ ܝܳܕ݂ܥܺܝܢ ܚ̱ܢܰܢ ܕ݁ܟ݂ܽܠ ܡܶܕ݁ܶܡ ܝܳܕ݂ܰܥ ܐܰܢ̱ܬ݁ . ܘܠܳܐ ܣܢܺܝܩ ܐܰܢ̱ܬ݁ ܕ݁ܐ̱ܢܳܫ ܢܫܰܐܠܳܟ݂ . ܒ݁ܗܳܕ݂ܶܐ ܡܗܰܝܡܢܺܝܢ ܚ̱ܢܰܢ ܕ݁ܡܶܢ ܐܰܠܳܗܳܐ ܢܦ݂ܰܩܬ݁ ܀ ܐܳܡܰܪ ܠܗܽܘܢ ܝܶܫܽܘܥ . ܗܰܝܡܶܢܘ . ܕ݁ܗܳܐ ܐܳܬ݂ܝܳܐ ܫܳܥܬ݂ܳܐ ܘܗܳܫܳܐ ܐܶܬ݂ܳܬ݂ ܆ ܕ݁ܬ݂ܶܬ݂ܒ݁ܰܕ݁ܪܽܘܢ ܐ̱ܢܳܫ ܠܰܐܬ݂ܪܶܗ ܂ ܘܬ݂ܶܫܒ݁ܩܽܘܢܳܢܝ ܒ݁ܰܠܚܽܘܕ݂ܰܝ . ܘܠܳܐ ܗܘܺܝܬ݂ ܒ݁ܰܠܚܽܘܕ݂ܰܝ ܂ ܕ݁ܰܐܒ݂ܳܐ ܥܰܡܝ ܗ̱ܽܘ . ܗܳܠܶܝܢ ܐܶܡܪܶܬ݂ ܠܟ݂ܽܘܢ ܂ ܕ݁ܒ݂ܺܝ ܢܶܗܘܶܐ ܠܟ݂ܽܘܢ ܫܠܳܡܳܐ . ܒ݁ܥܳܠܡܳܐ ܗܳܘܶܐ ܠܟ݂ܽܘܢ ܐܽܘܠܨܳܢܳܐ . ܐܶܠܳܐ ܐܶܬ݂ܠܰܒ̱݁ܒ݂ܘ ܂ ܐܶܢܳܐ ܙܟ݂ܺܝܬ݂ܶܗ ܠܥܳܠܡܳܐ ܀܀ Chapter 17 ܗܳܠܶܝܢ ܡܰܠܶܠ ܝܶܫܽܘܥ ܁ ܘܰܐܪܺܝܡ ܥܰܝܢܰܘܗ̱ܝ̈ ܠܰܫܡܰܝܳܐ ܂ ܘܶܐܡܰܪ . ܐܳܒ݂ܝ ܂ ܐܶܬ݂ܳܬ݂ ܫܳܥܬ݂ܳܐ . ܫܰܒ݁ܰܚ ܒ݁ܪܳܟ݂ ܂ ܕ݁ܰܒ݂ܪܳܟ݂ ܢܫܰܒ݁ܚܳܟ݂ . ܐܰܝܟ݁ܰܢܳܐ ܕ݁ܝܰܗ̱ܒ݂ܬ݁ ܠܶܗ ܫܽܘܠܛܳܢܳܐ ܥܰܠ ܟ݁ܽܠ ܒ݁ܣܰܪ . ܕ݁ܟ݂ܽܠ ܡܳܐ ܕ݁ܝܰܗ̱ܒ݂ܬ݁ ܠܶܗ ܂ ܢܶܬ݁ܶܠ ܠܶܗ ܚܰܝܶܐ̈ ܕ݁ܰܠܥܳܠܰܡ . ܗܳܠܶܝܢ ܐܶܢܽܘܢ ܕ݁ܶܝܢ ܚܰܝܶܐ̈ ܕ݁ܰܠܥܳܠܰܡ . ܕ݁ܢܶܕ݁ܥܽܘܢܳܟ݂ ܂ ܕ݁ܰܐܢ̱ܬ݁ ܐܰܢ̱ܬ݁ ܐܰܠܳܗܳܐ ܕ݁ܰܫܪܳܪܳܐ ܒ݁ܰܠܚܽܘܕ݂ܰܝܟ݁ ܇ ܘܡܰܢ ܕ݁ܫܰܕ݁ܰܪܬ݁ ܝܶܫܽܘܥ ܡܫܺܝܚܳܐ . ܐܶܢܳܐ ܫܰܒ݁ܰܚܬ݁ܳܟ݂ ܒ݁ܰܐܪܥܳܐ . ܥܒ݂ܳܕ݂ܳܐ ܗܰܘ ܕ݁ܝܰܗ̱ܒ݂ܬ݁ ܠܺܝ ܕ݁ܶܐܥܒ݁ܶܕ݂ ܁ ܫܰܠܶܡܬ݁ܶܗ . ܘܗܳܫܳܐ ܫܰܒ݁ܰܚܰܝܢܝ ܐܰܢ̱ܬ݁ ܐܳܒ݂ܝ ܠܘܳܬ݂ܳܟ݂ : ܒ݁ܗܰܘ ܫܽܘܒ݂ܚܳܐ ܕ݁ܺܐܝܬ݂ ܗ̱ܘܳܐ ܠܺܝ ܠܘܳܬ݂ܳܟ݂ ܡܶܢ ܩܕ݂ܳܡ ܕ݁ܢܶܗܘܶܐ ܥܳܠܡܳܐ . ܐܰܘܕ݁ܥܶܬ݂ ܫܡܳܟ݂ ܠܰܒ݂ܢܰܝ̈ ܐ̱ܢܳܫܳܐ : ܗܳܢܽܘܢ ܕ݁ܝܰܗ̱ܒ݂ܬ݁ ܠܺܝ ܡܶܢ ܥܳܠܡܳܐ ܆ ܕ݁ܺܝܠܳܟ݂ ܗ̱ܘܰܘ . ܘܠܺܝ ܝܰܗ̱ܒ݂ܬ݁ ܐܶܢܽܘܢ ܂ ܘܰܢܛܰܪܘ ܡܶܠܬ݂ܳܟ݂ . ܗܳܫܳܐ ܝܶܕ݂ܥܶܬ݂ ܕ݁ܟ݂ܽܠ ܡܳܐ ܕ݁ܝܰܗ̱ܒ݂ܬ݁ ܠܺܝ ܡܶܢ ܠܘܳܬ݂ܳܟ݂ ܗ̱ܽܘ . ܕ݁ܡܶܠܶܐ̈ ܕ݁ܝܰܗ̱ܒ݂ܬ݁ ܠܺܝ ܂ ܝܶܗܒ݁ܶܬ݂ ܠܗܽܘܢ . ܘܗܶܢܽܘܢ ܩܰܒ݁ܶܠܘ ܂ ܘܺܝܕ݂ܰܥܘ ܫܰܪܺܝܪܳܐܝܺܬ݂ ܕ݁ܡܶܢ ܠܘܳܬ݂ܳܟ݂ ܢܶܦ݂ܩܶܬ݂ . ܘܗܰܝܡܶܢܘ ܕ݁ܰܐܢ̱ܬ݁ ܫܰܕ݁ܰܪܬ݁ܳܢܝ . ܘܶܐܢܳܐ ܥܠܰܝܗܽܘܢ ܒ݁ܳܥܶܐ ܐ̱ܢܳܐ . ܠܳܐ ܗ̱ܘܳܐ ܥܰܠ ܥܳܠܡܳܐ ܒ݁ܳܥܶܐ ܐ̱ܢܳܐ . ܐܶܠܳܐ ܥܰܠ ܗܳܢܽܘܢ ܕ݁ܝܰܗ̱ܒ݂ܬ݁ ܠܺܝ ܆ ܕ݁ܕ݂ܺܝܠܳܟ݂ ܐܶܢܽܘܢ . ܘܟ݂ܽܠ ܡܶܕ݁ܶܡ ܕ݁ܕ݂ܺܝܠܝ ܗ̱ܽܘ ܂ ܕ݁ܺܝܠܳܟ݂ ܗ̱ܽܘ . ܘܕ݂ܺܝܠܳܟ݂ ܂ ܕ݁ܺܝܠܝ ܗ̱ܽܘ . ܘܰܡܫܰܒ݁ܰܚ ܐ̱ܢܳܐ ܒ݁ܗܽܘܢ . ܡܶܟ݁ܺܝܠ ܠܳܐ ܗܘܺܝܬ݂ ܒ݁ܥܳܠܡܳܐ . ܘܗܳܠܶܝܢ ܒ݁ܥܳܠܡܳܐ ܐܶܢܽܘܢ . ܘܶܐܢܳܐ ܠܘܳܬ݂ܳܟ݂ ܐܳܬ݂ܶܐ ܐ̱ܢܳܐ . ܐܰܒ݂ܳܐ ܩܰܕ݁ܺܝܫܳܐ ܂ ܛܰܪ ܐܶܢܽܘܢ ܒ݁ܰܫܡܳܟ݂ ܇ ܗܰܘ ܕ݁ܝܰܗ̱ܒ݂ܬ݁ ܠܺܝ . ܕ݁ܢܶܗܘܽܘܢ ܚܰܕ݂ ܐܰܝܟ݁ܰܢܳܐ ܕ݁ܰܚܢܰܢ ܀.܀.܀܀ ܟ݁ܰܕ݂ ܥܰܡܗܽܘܢ ܗܘܺܝܬ݂ ܒ݁ܥܳܠܡܳܐ ܂ ܐܶܢܳܐ ܢܳܛܰܪ ܗ̱ܘܺܝܬ݂ ܠܗܽܘܢ ܒ݁ܰܫܡܳܟ݂ . ܠܰܐܝܠܶܝܢ ܕ݁ܝܰܗ̱ܒ݂ܬ݁ ܠܺܝ ܢܶܛܪܶܬ݂ . ܘܐ̱ܢܳܫ ܡܶܢܗܽܘܢ ܠܳܐ ܐܶܒ݂ܰܕ݂ ܁ ܐܶܠܳܐ ܒ݁ܪܶܗ ܕ݁ܰܐܒ݂ܕ݁ܳܢܳܐ ܂ ܕ݁ܢܶܬ݂ܡܰܠܶܐ ܟ݁ܬ݂ܳܒ݂ܳܐ . ܗܳܫܳܐ ܕ݁ܶܝܢ ܠܘܳܬ݂ܳܟ݂ ܐܳܬ݂ܶܐ ܐ̱ܢܳܐ ܘܗܳܠܶܝܢ ܡܡܰܠܶܠ ܐ̱ܢܳܐ ܒ݁ܥܳܠܡܳܐ . ܕ݁ܬ݂ܶܗܘܶܐ ܚܰܕ݂ܘܰܬ݂ܝ ܡܫܰܡܠܝܳܐ ܒ݁ܗܽܘܢ . ܐܶܢܳܐ ܝܶܗܒ݁ܶܬ݂ ܠܗܽܘܢ ܡܶܠܬ݂ܳܟ݂ ܂ ܘܥܳܠܡܳܐ ܣܢܳܐ ܐܶܢܽܘܢ ܂ ܕ݁ܠܳܐ ܗ̱ܘܰܘ ܡܶܢ ܥܳܠܡܳܐ . ܐܰܝܟ݁ܰܢܳܐ ܕ݁ܶܐܢܳܐ ܠܳܐ ܗ̱ܘܺܝܬ݂ ܡܶܢ ܥܳܠܡܳܐ . ܠܳܐ ܗ̱ܘܳܐ ܕ݁ܬ݂ܶܫܩܽܘܠ ܐܶܢܽܘܢ ܡܶܢ ܥܳܠܡܳܐ ܒ݁ܳܥܶܐ ܐ̱ܢܳܐ ܆ ܐܶܠܳܐ ܕ݁ܬ݂ܶܛܰܪ ܐܶܢܽܘܢ ܡܶܢ ܒ݁ܺܝܫܳܐ . ܠܳܐ ܗ̱ܘܰܘ ܓ݁ܶܝܪ ܡܶܢ ܥܳܠܡܳܐ ܆ ܐܰܝܟ݁ܰܢܳܐ ܕ݁ܶܐܢܳܐ ܠܳܐ ܗ̱ܘܺܝܬ݂ ܡܶܢ ܥܳܠܡܳܐ . ܐܰܒ݂ܳܐ ܂ ܩܰܕ݁ܶܫ ܐܶܢܽܘܢ ܒ݁ܰܫܪܳܪܳܟ݂ . ܕ݁ܡܶܠܬ݂ܳܟ݂ ܕ݁ܺܝܠܳܟ݂ ܂ ܫܪܳܪܳܐ ܗ̱ܝ . ܐܰܝܟ݁ܰܢܳܐ ܕ݁ܠܺܝ ܫܰܕ݁ܰܪܬ݁ ܠܥܳܠܡܳܐ ܆ ܐܳܦ݂ ܐܶܢܳܐ ܫܰܕ݁ܪܶܬ݂ ܐܶܢܽܘܢ ܠܥܳܠܡܳܐ . ܘܥܰܠ ܐܰܦ݁ܰܝܗܽܘܢ̈ ܐܶܢܳܐ ܡܩܰܕ݁ܶܫ ܐ̱ܢܳܐ ܢܰܦ݂ܫܝ . ܕ݁ܢܶܗܘܽܘܢ ܐܳܦ݂ ܗܶܢܽܘܢ ܡܩܰܕ݁ܫܺܝܢ ܒ݁ܰܫܪܳܪܳܐ . ܘܠܳܐ ܗ̱ܘܳܐ ܥܰܠ ܐܰܦ݁ܰܝ̈ ܗܳܠܶܝܢ ܒ݁ܳܥܶܐ ܐ̱ܢܳܐ ܒ݁ܰܠܚܽܘܕ݂ ܆ ܐܶܠܳܐ ܐܳܦ݂ ܥܰܠ ܐܰܦ݁ܰܝ̈ ܐܰܝܠܶܝܢ ܕ݁ܰܡܗܰܝܡܢܺܝܢ ܒ݁ܺܝ ܒ݁ܡܶܠܰܬ݂ܗܽܘܢ . ܕ݁ܟ݂ܽܠܗܽܘܢ ܢܶܗܘܽܘܢ ܚܰܕ݂ . ܐܰܝܟ݁ܰܢܳܐ ܕ݁ܰܐܢ̱ܬ݁ ܐܳܒ݂ܝ ܒ݁ܺܝ ܁ ܘܶܐܢܳܐ ܒ݁ܳܟ݂ . ܕ݁ܳܐܦ݂ ܗܶܢܽܘܢ ܒ݁ܰܢ ܂ ܚܰܕ݂ ܢܶܗܘܽܘܢ . ܕ݁ܰܢܗܰܝܡܶܢ ܥܳܠܡܳܐ ܕ݁ܰܐܢ̱ܬ݁ ܫܰܕ݁ܰܪܬ݁ܳܢܝ . ܘܶܐܢܳܐ ܫܽܘܒ݂ܚܳܐ ܕ݁ܝܰܗ̱ܒ݂ܬ݁ ܠܺܝ ܂ ܝܶܗܒ݁ܶܬ݂ ܠܗܽܘܢ ܁ ܕ݁ܢܶܗܘܽܘܢ ܚܰܕ݂ . ܐܰܝܟ݁ܰܢܳܐ ܕ݁ܰܚܢܰܢ ܚܰܕ݂ ܚܢܰܢ . ܐܶܢܳܐ ܒ݁ܗܽܘܢ ܂ ܘܰܐܢ̱ܬ݁ ܒ݁ܺܝ . ܕ݁ܢܶܗܘܽܘܢ ܓ݁ܡܺܝܪܺܝܢ ܠܚܰܕ݂ . ܘܰܕ݂ܢܶܕ݁ܰܥ ܥܳܠܡܳܐ ܕ݁ܰܐܢ̱ܬ݁ ܫܰܕ݁ܰܪܬ݁ܳܢܝ . ܘܕ݂ܰܐܚܶܒ݂ܬ݂ ܐܶܢܽܘܢ ܂ ܐܰܝܟ݁ܰܢܳܐ ܕ݁ܳܐܦ݂ ܠܺܝ ܐܰܚܶܒ݂ܬ݁ . ܐܰܒ݂ܳܐ . ܗܳܢܽܘܢ ܕ݁ܝܰܗ̱ܒ݂ܬ݁ ܠܺܝ ܆ ܨܳܒ݂ܶܐ ܐ̱ܢܳܐ ܕ݁ܰܐܬ݂ܰܪ ܕ݁ܶܐܢܳܐ ܂ ܐܳܦ݂ ܗܶܢܽܘܢ ܢܶܗܘܽܘܢ ܥܰܡܝ . ܕ݁ܢܶܗܘܽܘܢ ܚܳܙܶܝܢ ܫܽܘܒ݂ܚܳܐ ܕ݁ܺܝܠܝ . ܗܰܘ ܕ݁ܝܰܗ̱ܒ݂ܬ݁ ܠܺܝ . ܕ݁ܰܐܚܶܒ݂ܬ݁ܳܢܝ ܡܶܢ ܩܕ݂ܳܡ ܬ݁ܰܪܡܝܳܬ݂ܶܗ̈ ܕ݁ܥܳܠܡܳܐ . ܐܳܒ݂ܝ ܟ݁ܺܐܢܳܐ ܁ ܘܥܳܠܡܳܐ ܠܳܐ ܝܰܕ݂ܥܳܟ݂ ܆ ܐܶܢܳܐ ܕ݁ܶܝܢ ܝܺܕ݂ܰܥܬ݁ܳܟ݂ . ܘܗܶܢܽܘܢ ܝܺܕ݂ܰܥܘ ܂ ܕ݁ܰܐܢ̱ܬ݁ ܫܰܕ݁ܰܪܬ݁ܳܢܝ . ܘܰܐܘܕ݁ܥܶܬ݂ ܐܶܢܽܘܢ ܫܡܳܟ݂ ܆ ܘܡܰܘܕ݁ܰܥ ܐ̱ܢܳܐ . ܕ݁ܚܽܘܒ݁ܳܐ ܗܰܘ ܕ݁ܰܐܚܶܒ݂ܬ݁ܳܢܝ ܂ ܢܶܗܘܶܐ ܒ݁ܗܽܘܢ . ܘܶܐܢܳܐ ܐܶܗܘܶܐ ܒ݁ܗܽܘܢ ܀ Chapter 18 ܗܳܠܶܝܢ ܐܶܡܰܪ ܝܶܫܽܘܥ ܆ ܘܰܢܦ݂ܰܩ ܥܰܡ ܬ݁ܰܠܡܺܝܕ݂ܰܘܗ̱ܝ̈ ܠܥܶܒ݂ܪܳܐ ܕ݁ܰܪܓ݂ܶܠܬ݁ܳܐ ܕ݁ܩܶܕ݂ܪܽܘܢ ܁ ܐܰܬ݂ܰܪ ܕ݁ܺܐܝܬ݂ ܗ̱ܘܳܬ݂ ܓ݁ܰܢܬ݂ܳܐ . ܐܰܝܟ݁ܳܐ ܕ݁ܥܰܠ ܗܽܘ ܘܬ݂ܰܠܡܺܝܕ݂ܰܘܗ̱ܝ̈ ܀ ܝܳܕ݂ܰܥ ܗ̱ܘܳܐ ܕ݁ܶܝܢ ܐܳܦ݂ ܝܺܗܽܘܕ݂ܳܐ ܡܰܫܠܡܳܢܳܐ ܠܕ݂ܽܘܟ݁ܬ݂ܳܐ ܗܳܝ . ܡܶܛܽܠ ܕ݁ܣܰܓ݁ܺܝ ܙܰܒ݂ܢܳܐ ܟ݁ܳܢܶܫ ܗ̱ܘܳܐ ܬ݁ܰܡܳܢ ܝܶܫܽܘܥ ܥܰܡ ܬ݁ܰܠܡܺܝܕ݂ܰܘܗ̱ܝ̈ . ܗܽܘ ܗܳܟ݂ܺܝܠ ܝܺܗܽܘܕ݂ܳܐ ܕ݁ܒ݂ܰܪ ܐܶܣܦ݁ܺܝܪ . ܘܡܶܢ ܠܘܳܬ݂ ܪܰܒ݁ܰܝ̈ ܟ݁ܳܗܢܶܐ̈ ܘܰܦ݂ܪܺܝܫܶܐ̈ ܁ ܕ݁ܒ݂ܰܪ ܕ݁ܰܚܫܶܐ̈ ܆ ܘܶܐܬ݂ܳܐ ܠܬ݂ܰܡܳܢ ܁ ܥܰܡ ܢܰܦ݂ܛܺܪܶܐ̈ ܘܠܰܡܦ݁ܺܝܕ݂ܶܐ̈ ܘܙܰܝܢܳܐ ܀ ܝܶܫܽܘܥ ܕ݁ܶܝܢ ܕ݁ܝܳܕ݂ܰܥ ܗ̱ܘܳܐ ܟ݁ܽܠ ܡܶܕ݁ܶܡ ܕ݁ܳܐܬ݂ܶܐ ܥܠܰܘܗ̱ܝ ܆ ܢܦ݂ܰܩ ܘܶܐܡܰܪ ܠܗܽܘܢ . ܠܡܰܢ ܒ݁ܳܥܶܝܢ ܐܢ̱ܬ݁ܽܘܢ . ܐܳܡܪܺܝܢ ܠܶܗ . ܠܝܶܫܽܘܥ ܢܳܨܪܳܝܳܐ . ܐܳܡܰܪ ܠܗܽܘܢ ܝܶܫܽܘܥ . ܐܶܢܳܐ ܐ̱ܢܳܐ . ܩܳܐܶܡ ܗ̱ܘܳܐ ܕ݁ܶܝܢ ܐܳܦ݂ ܝܺܗܽܘܕ݂ܳܐ ܡܰܫܠܡܳܢܳܐ ܥܰܡܗܽܘܢ . ܘܟ݂ܰܕ݂ ܐܶܡܰܪ ܠܗܽܘܢ ܝܶܫܽܘܥ ܁ ܕ݁ܶܐܢܳܐ ܐ̱ܢܳܐ ܂ ܐܶܙܰܠܘ ܠܒ݂ܶܣܬ݁ܰܪܗܽܘܢ ܂ ܘܰܢܦ݂ܰܠܘ ܥܰܠ ܐܰܪܥܳܐ . ܬ݁ܽܘܒ݂ ܫܰܐܶܠ ܐܶܢܽܘܢ ܝܶܫܽܘܥ ܂ ܠܡܰܢ ܒ݁ܳܥܶܝܢ ܐܢ̱ܬ݁ܽܘܢ . ܗܶܢܽܘܢ ܕ݁ܶܝܢ ܐܶܡܰܪܘ ܂ ܠܝܶܫܽܘܥ ܢܳܨܪܳܝܳܐ . ܐܳܡܰܪ ܠܗܽܘܢ ܝܶܫܽܘܥ . ܐܶܡܪܶܬ݂ ܠܟ݂ܽܘܢ ܕ݁ܶܐܢܳܐ ܐ̱ܢܳܐ . ܘܶܐܢ ܠܺܝ ܒ݁ܳܥܶܝܢ ܐܢ̱ܬ݁ܽܘܢ ܆ ܫܒ݂ܽܘܩܘ ܠܗܳܠܶܝܢ ܐܳܙܺܠ̱ܝܢ . ܕ݁ܬ݂ܶܫܠܰܡ ܡܶܠܬ݂ܳܐ ܕ݁ܶܐܡܰܪ . ܕ݁ܰܐܝܠܶܝܢ ܕ݁ܝܰܗ̱ܒ݂ܬ݁ ܠܺܝ ܆ ܠܳܐ ܐܰܘܒ݁ܕ݂ܶܬ݂ ܡܶܢܗܽܘܢ ܐܳܦ݂ܠܳܐ ܚܰܕ݂ ܀ ܫܶܡܥܽܘܢ ܕ݁ܶܝܢ ܟ݁ܺܐܦ݂ܳܐ ܆ ܐܺܝܬ݂ ܗ̱ܘܳܐ ܥܠܰܘܗ̱ܝ ܣܰܦ݂ܣܺܪܳܐ ܂ ܘܫܰܡܛܳܗ . ܘܰܡܚܳܝܗ̱ܝ ܠܥܰܒ݂ܕ݁ܶܗ ܕ݁ܪܰܒ݁ ܟ݁ܳܗܢܶܐ̈ ܂ ܘܫܰܩܠܳܗ ܐܶܕ݂ܢܶܗ ܕ݁ܝܰܡܺܝܢܳܐ . ܫܡܶܗ ܕ݁ܶܝܢ ܕ݁ܥܰܒ݂ܕ݁ܳܐ ܂ ܡܳܠܶܟ݂ ܀ ܘܶܐܡܰܪ ܝܶܫܽܘܥ ܠܟ݂ܺܐܦ݂ܳܐ . ܣܺܝܡ ܣܰܦ݂ܣܺܪܳܐ ܒ݁ܚܶܠܬ݂ܳܗ . ܟ݁ܳܣܳܐ ܕ݁ܝܰܗ̱ܒ݂ ܠܺܝ ܐܳܒ݂ܝ ܆ ܠܳܐ ܐܶܫܬ݁ܶܝܘܗ̱ܝ ܀ ܗܳܝܕ݁ܶܝܢ ܐܶܣܦ݁ܺܝܪ ܘܟ݁ܺܠܺܝܰܪܟ݂ܶܐ̈ ܁ ܘܕ݂ܰܚܫܶܐ̈ ܕ݁ܺܝܗܽܘܕ݂ܳܝܶܐ̈ ܆ ܐܰܚܕ݁ܽܘܗ̱ܝ ܠܝܶܫܽܘܥ ܂ ܘܰܐܣܪܽܘܗ̱ܝ . ܘܰܐܝܬ݁ܝܽܘܗ̱ܝ ܠܘܳܬ݂ ܚܰܢܳܢ ܠܽܘܩܕ݂ܰܡ . ܡܶܛܽܠ ܕ݁ܰܚܡܽܘܗ̱ܝ ܗ̱ܘܳܐ ܕ݁ܩܰܝܳܦ݂ܳܐ ܇ ܗܰܘ ܕ݁ܺܐܝܬ݂ܰܘܗ̱ܝ ܗ̱ܘܳܐ ܪܰܒ݁ ܟ݁ܳܗܢܶܐ̈ ܕ݁ܫܰܢ̱ܬ݁ܳܐ ܗܳܝ . ܐܺܝܬ݂ܰܘܗ̱ܝ ܗ̱ܘܳܐ ܕ݁ܶܝܢ ܩܰܝܳܦ݂ܳܐ ܆ ܗܰܘ ܕ݁ܰܡܠܰܟ݂ ܠܺܝܗܽܘܕ݂ܳܝܶܐ̈ ܇ ܕ݁ܦ݂ܰܩܳܚ ܕ݁ܚܰܕ݂ ܓ݁ܰܒ݂ܪܳܐ ܢܡܽܘܬ݂ ܚܠܳܦ݂ ܥܰܡܳܐ ܀ ܫܶܡܥܽܘܢ ܕ݁ܶܝܢ ܟ݁ܺܐܦ݂ܳܐ ܁ ܘܚܰܕ݂ ܡܶܢ ܬ݁ܰܠܡܺܝܕ݂ܶܐ̈ ܐ̱ܚܪܳܢܶܐ̈ ܂ ܐܳܬ݂ܶܝܢ ܗ̱ܘܰܘ ܒ݁ܳܬ݂ܪܶܗ ܕ݁ܝܶܫܽܘܥ . ܠܗܰܘ ܕ݁ܶܝܢ ܬ݁ܰܠܡܺܝܕ݂ܳܐ ܂ ܝܳܕ݂ܰܥ ܗ̱ܘܳܐ ܠܶܗ ܪܰܒ݁ ܟ݁ܳܗܢܶܐ̈ . ܘܥܰܠ ܥܰܡ ܝܶܫܽܘܥ ܠܕ݂ܳܪܬ݁ܳܐ . ܫܶܡܥܽܘܢ ܕ݁ܶܝܢ ܩܳܐܶܡ ܗ̱ܘܳܐ ܠܒ݂ܰܪ ܠܘܳܬ݂ ܬ݁ܰܪܥܳܐ . ܘܰܢܦ݂ܰܩ ܗܰܘ ܬ݁ܰܠܡܺܝܕ݂ܳܐ ܐ̱ܚܪܺܢܳܐ ܁ ܕ݁ܝܳܕ݂ܰܥ ܗ̱ܘܳܐ ܠܶܗ ܪܰܒ݁ ܟ݁ܳܗܢܶܐ̈ ܆ ܘܶܐܡܰܪ ܠܢܳܛܪܰܬ݂ ܬ݁ܰܪܥܳܐ ܂ ܘܰܐܥܠܶܗ ܠܫܶܡܥܽܘܢ ܀ ܐܶܡܪܰܬ݂ ܕ݁ܶܝܢ ܥܠܰܝܡܬ݂ܳܐ ܢܳܛܪܰܬ݂ ܬ݁ܰܪܥܳܐ ܠܫܶܡܥܽܘܢ . ܠܡܳܐ ܆ ܐܳܦ݂ ܐܰܢ̱ܬ݁ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܐܰܢ̱ܬ݁ ܕ݁ܗܳܢܳܐ ܓ݁ܰܒ݂ܪܳܐ ܆ ܐܳܡܰܪ ܠܳܗ ܠܳܐ ܀ ܘܩܳܝܡܺܝܢ ܗ̱ܘܰܘ ܥܰܒ݂ܕ݁ܶܐ̈ ܘܕ݂ܰܚܫܶܐ̈ ܆ ܘܣܳܝܡܺܝܢ ܗ̱ܘܰܘ ܢܽܘܪܳܐ ܕ݁ܢܶܫܚܢܽܘܢ ܁ ܡܶܛܽܠ ܕ݁ܩܰܪܺܝܫ ܗ̱ܘܳܐ . ܩܳܐܶܡ ܗ̱ܘܳܐ ܕ݁ܶܝܢ ܐܳܦ݂ ܫܶܡܥܽܘܢ ܥܰܡܗܽܘܢ ܂ ܘܫܳܚܶܢ . ܪܰܒ݁ ܟ݁ܳܗܢܶܐ̈ ܕ݁ܶܝܢ ܫܰܐܠܶܗ ܠܝܶܫܽܘܥ ܁ ܥܰܠ ܬ݁ܰܠܡܺܝܕ݂ܰܘܗ̱ܝ̈ ܘܥܰܠ ܝܽܘܠܦ݁ܳܢܶܗ . ܘܶܐܡܰܪ ܠܶܗ ܝܶܫܽܘܥ . ܐܶܢܳܐ ܥܺܝܢ ܒ݁ܰܓ݂ܠܶܐ ܡܰܠܠܶܬ݂ ܥܰܡ ܥܰܡܳܐ . ܘܰܒ݂ܟ݂ܽܠܙܒ݂ܰܢ ܐܰܠܦ݂ܶܬ݂ ܒ݁ܰܟ݂ܢܽܘܫܬ݁ܳܐ ܂ ܘܰܒ݂ܗܰܝܟ݁ܠܳܐ . ܐܰܝܟ݁ܳܐ ܕ݁ܟ݂ܽܠܗܽܘܢ ܝܺܗܽܘܕ݂ܳܝܶܐ̈ ܡܶܬ݂ܟ݁ܰܢܫܺܝܢ . ܘܡܶܕ݁ܶܡ ܒ݁ܛܽܘܫܝܳܐ ܠܳܐ ܡܰܠܠܶܬ݂ . ܡܳܢܳܐ ܡܫܰܐܶܠ ܐܰܢ̱ܬ݁ ܠܺܝ . ܫܰܐܶܠ ܠܗܳܢܽܘܢ ܕ݁ܰܫܡܰܥܘ ܂ ܡܳܢܳܐ ܡܰܠܠܶܬ݂ ܥܰܡܗܽܘܢ . ܗܳܐ ܗܶܢܽܘܢ ܝܳܕ݂ܥܺܝܢ ܂ ܟ݁ܽܠ ܡܶܕ݁ܶܡ ܕ݁ܶܐܡܪܶܬ݂ ܀ ܘܟ݂ܰܕ݂ ܗܳܠܶܝܢ ܐܶܡܰܪ ܆ ܚܰܕ݂ ܡܶܢ ܕ݁ܰܚܫܶܐ̈ ܕ݁ܩܳܐܶܡ ܗ̱ܘܳܐ ܂ ܡܚܳܝܗ̱ܝ ܥܰܠ ܦ݁ܰܟ݁ܶܗ ܠܝܶܫܽܘܥ ܂ ܘܶܐܡܰܪ ܠܶܗ . ܗܳܟ݂ܰܢܳܐ ܝܳܗܶܒ݂ ܐܰܢ̱ܬ݁ ܦ݁ܶܬ݂ܓ݂ܳܡܳܐ ܠܪܰܒ݁ ܟ݁ܳܗܢܶܐ̈ . ܥܢܳܐ ܝܶܫܽܘܥ ܂ ܘܶܐܡܰܪ ܠܶܗ . ܐܶܢ ܒ݁ܺܝܫܳܐܝܺܬ݂ ܡܰܠܠܶܬ݂ ܂ ܐܰܣܗܶܕ݂ ܥܰܠ ܒ݁ܺܝܫܬ݁ܳܐ . ܘܶܐܢ ܕ݁ܶܝܢ ܫܰܦ݁ܺܝܪ ܂ ܠܡܳܢܳܐ ܡܚܰܝܬ݁ܳܢܝ ܀.܀.܀܀ ܚܰܢܳܢ ܕ݁ܶܝܢ ܫܰܕ݁ܰܪ ܠܝܶܫܽܘܥ ܂ ܟ݁ܰܕ݂ ܐܰܣܺܝܪ ܠܘܳܬ݂ ܩܰܝܳܦ݂ܳܐ ܪܰܒ݁ ܟ݁ܳܗܢܶܐ̈ ܀ ܘܫܶܡܥܽܘܢ ܟ݁ܺܐܦ݂ܳܐ ܩܳܐܶܡ ܗ̱ܘܳܐ ܘܫܳܚܶܢ . ܘܳܐܡܪܺܝܢ ܠܶܗ . ܠܡܳܐ ܆ ܐܳܦ݂ ܐܰܢ̱ܬ݁ ܚܰܕ݂ ܡܶܢ ܬ݁ܰܠܡܺܝܕ݂ܰܘܗ̱ܝ̈ ܐܰܢ̱ܬ݁ ܆ ܘܗܽܘ ܟ݁ܦ݂ܰܪ ܂ ܘܶܐܡܰܪ ܠܳܐ ܗ̱ܘܺܝܬ݂ . ܐܳܡܰܪ ܠܶܗ ܚܰܕ݂ ܡܶܢ ܥܰܒ݂ܕ݁ܶܐ̈ ܕ݁ܪܰܒ݁ ܟ݁ܳܗܢܶܐ̈ . ܐ̱ܚܝܳܢܶܗ ܕ݁ܗܰܘ ܕ݁ܰܦ݂ܣܰܩ ܗ̱ܘܳܐ ܫܶܡܥܽܘܢ ܐܶܕ݂ܢܶܗ . ܠܳܐ ܐܶܢܳܐ ܚܙܺܝܬ݂ܳܟ݂ ܥܰܡܶܗ ܒ݁ܓ݂ܰܢܬ݂ܳܐ . ܘܬ݂ܽܘܒ݂ ܟ݁ܦ݂ܰܪ ܫܶܡܥܽܘܢ . ܘܒ݂ܳܗ ܒ݁ܫܳܥܬ݂ܳܐ ܩܪܳܐ ܬ݁ܰܪܢܳܓ݂ܠܳܐ ܀܀ ܐܰܝܬ݁ܝܽܘܗ̱ܝ ܕ݁ܶܝܢ ܠܝܶܫܽܘܥ ܡܶܢ ܠܘܳܬ݂ ܩܰܝܳܦ݂ܳܐ ܠܰܦ݁ܪܶܛܳܘܪܺܝܢ . ܘܺܐܝܬ݂ܰܘܗ̱ܝ ܗ̱ܘܳܐ ܨܰܦ݂ܪܳܐ . ܘܗܶܢܽܘܢ ܠܳܐ ܥܰܠܘ ܠܰܦ݁ܪܶܛܳܘܪܺܝܢ ܆ ܕ݁ܠܳܐ ܢܶܬ݂ܛܰܘܫܽܘܢ ܁ ܥܰܕ݂ ܐܳܟ݂ܠܺܝܢ ܦ݁ܶܨܚܳܐ . ܢܦ݂ܰܩ ܕ݁ܶܝܢ ܦ݁ܺܝܠܰܛܳܘܣ ܠܒ݂ܰܪ ܠܘܳܬ݂ܗܽܘܢ ܂ ܘܶܐܡܰܪ ܠܗܽܘܢ . ܡܳܢܳܐ ܡܶܐܟ݂ܰܠ ܩܰܪܨܳܐ ܐܺܝܬ݂ ܠܟ݂ܽܘܢ ܥܰܠ ܓ݁ܰܒ݂ܪܳܐ ܗܳܢܳܐ . ܥܢܰܘ ܂ ܘܳܐܡܪܺܝܢ ܠܶܗ . ܐܶܠܽܘ ܠܳܐ ܥܳܒ݂ܶܕ݂ ܒ݁ܺܝܫܳܬ݂ܳܐ̈ ܗ̱ܘܳܐ ܆ ܐܳܦ݂ܠܳܐ ܠܳܟ݂ ܡܰܫܠܡܺܝܢ ܗ̱ܘܰܝܢ ܠܶܗ . ܐܳܡܰܪ ܠܗܽܘܢ ܦ݁ܺܝܠܰܛܳܘܣ . ܕ݁ܽܘܒ݂ܪܽܘܗ̱ܝ ܐܰܢ̱ܬ݁ܽܘܢ ܁ ܘܕ݂ܽܘܢܽܘܗ̱ܝ ܐܰܝܟ݂ ܢܳܡܽܘܣܟ݂ܽܘܢ . ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܠܳܐ ܫܰܠܺܝܛ ܠܰܢ ܠܡܶܩܛܰܠ ܠܐ̱ܢܳܫ . ܕ݁ܬ݂ܶܫܠܰܡ ܡܶܠܬ݂ܳܐ ܕ݁ܶܐܡܰܪ ܝܶܫܽܘܥ ܇ ܟ݁ܰܕ݂ ܡܰܘܕ݁ܰܥ ܒ݁ܰܐܝܢܳܐ ܡܰܘܬ݁ܳܐ ܥܬ݂ܺܝܕ݂ ܕ݁ܰܢܡܽܘܬ݂ ܀ ܥܰܠ ܕ݁ܶܝܢ ܦ݁ܺܝܠܰܛܳܘܣ ܠܰܦ݁ܪܶܛܳܘܪܺܝܢ ܆ ܘܰܩܪܳܐ ܠܝܶܫܽܘܥ ܂ ܘܶܐܡܰܪ ܠܶܗ . ܐܰܢ̱ܬ݁ ܗ̱ܽܘ ܡܰܠܟ݁ܗܽܘܢ ܕ݁ܺܝܗܽܘܕ݂ܳܝܶܐ̈ . ܐܳܡܰܪ ܠܶܗ ܝܶܫܽܘܥ . ܡܶܢ ܢܰܦ݂ܫܳܟ݂ ܐܶܡܰܪܬ݁ ܗܳܕ݂ܶܐ ܆ ܐܰܘ ܐ̱ܚܪܳܢܶܐ̈ ܐܶܡܰܪܘ ܠܳܟ݂ ܥܠܰܝ . ܐܳܡܰܪ ܠܶܗ ܦ݁ܺܝܠܰܛܳܘܣ . ܠܡܳܐ ܐܶܢܳܐ ܝܺܗܽܘܕ݂ܳܝܳܐ ܐ̱ܢܳܐ ܆ ܒ݁ܢܰܝ̈ ܥܰܡܳܟ݂ ܗ̱ܽܘ ܁ ܘܪܰܒ݁ܰܝ̈ ܟ݁ܳܗܢܶܐ̈ ܐܰܫܠܡܽܘܟ݂ ܠܺܝ . ܡܳܢܳܐ ܥܒ݂ܰܕ݁ܬ݁ . ܐܳܡܰܪ ܠܶܗ ܝܶܫܽܘܥ . ܡܰܠܟ݁ܽܘܬ݂ܝ ܕ݁ܺܝܠܝ ܂ ܠܳܐ ܗܘܳܬ݂ ܡܶܢ ܗܳܢܳܐ ܥܳܠܡܳܐ . ܐܶܠܽܘ ܡܶܢ ܥܳܠܡܳܐ ܗ̱ܘܳܬ݂ ܗܳܢܳܐ ܡܰܠܟ݁ܽܘܬ݂ܝ ܆ ܡܶܬ݂ܟ݁ܰܬ݁ܫܺܝܢ ܗ̱ܘܰܘ ܡܫܰܡܫܳܢܰܝ̈ ܂ ܕ݁ܠܳܐ ܐܶܫܬ݁ܠܶܡ ܠܺܝܗܽܘܕ݂ܳܝܶܐ̈ . ܗܳܫܳܐ ܕ݁ܶܝܢ ܡܰܠܟ݁ܽܘܬ݂ܝ ܕ݁ܺܝܠܝ ܂ ܠܳܐ ܗ̱ܘܳܬ݂ ܡܶܟ݁ܳܐ ܀ ܐܳܡܰܪ ܠܶܗ ܦ݁ܺܝܠܰܛܳܘܣ . ܡܳܕ݂ܶܝܢ ܡܰܠܟ݁ܳܐ ܐܰܢ̱ܬ݁ . ܐܳܡܰܪ ܠܶܗ ܝܶܫܽܘܥ . ܐܰܢ̱ܬ݁ ܐܶܡܰܪܬ݁ ܕ݁ܡܰܠܟ݁ܳܐ ܐ̱ܢܳܐ . ܐܶܢܳܐ ܠܗܳܕ݂ܶܐ ܝܺܠܺܝܕ݂ ܐ̱ܢܳܐ . ܘܰܠܗܳܕ݂ܶܐ ܐܶܬ݂ܺܝܬ݂ ܠܥܳܠܡܳܐ ܂ ܕ݁ܰܐܣܗܶܕ݂ ܥܰܠ ܫܪܳܪܳܐ . ܟ݁ܽܠ ܡܰܢ ܕ݁ܺܐܝܬ݂ܰܘܗ̱ܝ ܡܶܢ ܫܪܳܪܳܐ ܂ ܫܳܡܰܥ ܩܳܠܝ . ܐܳܡܰܪ ܠܶܗ ܦ݁ܺܝܠܰܛܳܘܣ . ܡܳܢܰܘ ܫܪܳܪܳܐ . ܘܟ݂ܰܕ݂ ܐܶܡܰܪ ܗܳܕ݂ܶܐ ܆ ܢܦ݂ܰܩ ܠܶܗ ܬ݁ܽܘܒ݂ ܠܘܳܬ݂ ܝܺܗܽܘܕ݂ܳܝܶܐ̈ . ܘܶܐܡܰܪ ܠܗܽܘܢ . ܐܶܢܳܐ ܐܳܦ݂ܠܳܐ ܚܕ݂ܳܐ ܥܶܠܬ݂ܳܐ ܡܶܫܟ݁ܰܚ ܐ̱ܢܳܐ ܒ݁ܶܗ . ܥܝܳܕ݂ܳܐ ܕ݁ܶܝܢ ܐܺܝܬ݂ ܠܟ݂ܽܘܢ ܂ ܕ݁ܚܰܕ݂ ܐܶܫܪܶܐ ܠܟ݂ܽܘܢ ܒ݁ܦ݂ܶܨܚܳܐ . ܨܳܒ݂ܶܝܢ ܐܢ̱ܬ݁ܽܘܢ ܗܳܟ݂ܺܝܠ ܆ ܐܶܫܪܶܐ ܠܟ݂ܽܘܢ ܠܗܳܢܳܐ ܡܰܠܟ݁ܳܐ ܕ݁ܺܝܗܽܘܕ݂ܳܝܶܐ̈ ܆ ܘܰܩܥܰܘ ܟ݁ܽܠܗܽܘܢ ܂ ܘܳܐܡܪܺܝܢ . ܠܳܐ ܠܗܳܢܳܐ ܁ ܐܶܠܳܐ ܠܒ݂ܰܪ ܐܰܒ݁ܰܐ . ܐܺܝܬ݂ܰܘܗ̱ܝ ܗ̱ܘܳܐ ܕ݁ܶܝܢ ܗܳܢܳܐ ܁ ܒ݁ܰܪ ܐܰܒ݁ܰܐ ܂ ܓ݁ܰܝܳܣܳܐ ܀܀ Chapter 19 ܗܳܝܕ݁ܶܝܢ ܦ݁ܺܝܠܰܛܳܘܣ ܢܰܓ݁ܕ݂ܶܗ ܠܝܶܫܽܘܥ . ܘܶܐܣܛܪܰܛܺܝܽܘܛܶܐ̈ ܓ݁ܕ݂ܰܠܘ ܟ݁ܠܺܝܠܳܐ ܡܶܢ ܟ݁ܽܘܒ݁ܶܐ̈ ܂ ܘܣܳܡܘ ܠܶܗ ܒ݁ܪܺܫܶܗ . ܘܟ݂ܰܣܝܽܘܗ̱ܝ ܢܰܚܬ݁ܶܐ̈ ܕ݁ܰܐܪܓ݁ܘܳܢܳܐ . ܘܳܐܡܪܺܝܢ ܗ̱ܘܰܘ ܆ ܫܠܳܡ ܠܳܟ݂ ܁ ܡܰܠܟ݁ܳܐ ܅ ܕ݁ܺܝܗܽܘܕ݂ܳܝܶܐ̈ . ܘܡܳܚܶܝܢ ܗ̱ܘܰܘ ܠܶܗ ܥܰܠ ܦ݁ܰܟ݁ܰܘܗ̱ܝ̈ ܀ ܘܰܢܦ݂ܰܩ ܦ݁ܺܝܠܰܛܳܘܣ ܬ݁ܽܘܒ݂ ܠܒ݂ܰܪ ܂ ܘܶܐܡܰܪ ܠܗܽܘܢ . ܗܳܐ ܡܰܦ݁ܶܩ ܐ̱ܢܳܐ ܠܶܗ ܠܟ݂ܽܘܢ ܂ ܠܒ݂ܰܪ . ܕ݁ܬ݂ܶܕ݁ܥܽܘܢ ܆ ܕ݁ܠܳܐ ܡܶܫܟ݁ܰܚ ܐ̱ܢܳܐ ܒ݁ܳܬ݂ܪܶܗ ܂ ܐܳܦ݂ܠܳܐ ܚܕ݂ܳܐ ܥܶܠܬ݂ܳܐ . ܘܰܢܦ݂ܰܩ ܝܶܫܽܘܥ ܠܒ݂ܰܪ ܆ ܟ݁ܰܕ݂ ܐܺܝܬ݂ ܥܠܰܘܗ̱ܝ ܟ݁ܠܺܝܠܳܐ ܕ݁ܟ݂ܽܘܒ݁ܶܐ̈ ܂ ܘܢܰܚܬ݁ܶܐ̈ ܕ݁ܰܐܪܓ݁ܘܳܢܳܐ . ܘܶܐܡܰܪ ܠܗܽܘܢ ܦ݁ܺܝܠܰܛܳܘܣ . ܗܳܐ ܓ݁ܰܒ݂ܪܳܐ ܀ ܟ݁ܰܕ݂ ܕ݁ܶܝܢ ܚܙܰܐܘܽܗ̱ܝ ܪܰܒ݁ܰܝ̈ ܟ݁ܳܗܢܶܐ̈ ܘܕ݂ܰܚܫܶܐ̈ ܆ ܩܥܰܘ ܘܳܐܡܪܺܝܢ . ܨܠܽܘܒ݂ܳܝܗ̱ܝ ܁ ܨܠܽܘܒ݂ܳܝܗ̱ܝ ܀ ܐܳܡܰܪ ܠܗܽܘܢ ܦ݁ܺܝܠܰܛܳܘܣ . ܕ݁ܒ݂ܰܪܘ ܐܰܢ̱ܬ݁ܽܘܢ ܘܙܽܘܩܦ݂ܽܘܗ̱ܝ . ܐܶܢܳܐ ܓ݁ܶܝܪ ܠܳܐ ܡܶܫܟ݁ܰܚ ܐ̱ܢܳܐ ܒ݁ܶܗ ܥܶܠܬ݂ܳܐ ܀ ܐܳܡܪܺܝܢ ܠܶܗ ܝܺܗܽܘܕ݂ܳܝܶܐ̈ . ܠܰܢ ܢܳܡܽܘܣܳܐ ܐܺܝܬ݂ ܠܰܢ . ܘܰܐܝܟ݂ ܕ݁ܰܒ݂ܢܳܡܽܘܣܰܢ ܂ ܚܰܝܳܒ݂ ܗ̱ܽܘ ܡܰܘܬ݁ܳܐ ܆ ܕ݁ܰܥܒ݂ܰܕ݂ ܢܰܦ݂ܫܶܗ ܒ݁ܪܶܗ ܕ݁ܰܐܠܳܗܳܐ . ܟ݁ܰܕ݂ ܫܡܰܥ ܕ݁ܶܝܢ ܦ݁ܺܝܠܰܛܳܘܣ ܗܳܕ݂ܶܐ ܡܶܠܬ݂ܳܐ ܆ ܝܰܬ݁ܺܝܪܳܐܝܺܬ݂ ܕ݁ܚܶܠ . ܘܥܰܠ ܬ݁ܽܘܒ݂ ܠܰܦ݁ܪܶܛܳܘܪܺܝܢ ܂ ܘܶܐܡܰܪ ܠܝܶܫܽܘܥ . ܐܰܝܡܶܟ݁ܳܐ ܐܰܢ̱ܬ݁ . ܝܶܫܽܘܥ ܕ݁ܶܝܢ ܦ݁ܶܬ݂ܓ݂ܳܡܳܐ ܠܳܐ ܝܰܗ̱ܒ݂ ܠܶܗ ܀ ܐܳܡܰܪ ܠܶܗ ܦ݁ܺܝܠܰܛܳܘܣ . ܥܰܡܝ ܆ ܠܳܐ ܡܡܰܠܶܠ ܐܰܢ̱ܬ݁ ܆ ܠܳܐ ܝܳܕ݂ܰܥ ܐܰܢ̱ܬ݁ ܕ݁ܫܰܠܺܝܛ ܐ̱ܢܳܐ ܕ݁ܶܐܫܪܶܝܟ݂ ܘܫܰܠܺܝܛ ܐ̱ܢܳܐ ܕ݁ܶܐܙܩܦ݂ܳܟ݂ ܆ ܐܳܡܰܪ ܠܶܗ ܝܶܫܽܘܥ . ܠܰܝܬ݁ ܗ̱ܘܳܐ ܠܳܟ݂ ܥܠܰܝ ܫܽܘܠܛܳܢܳܐ ܐܳܦ݂ ܠܳܐ ܚܰܕ݂ ܇ ܐܶܠܽܘ ܠܳܐ ܝܺܗܺܝܒ݂ ܗ̱ܘܳܐ ܠܳܟ݂ ܡܶܢ ܠܥܶܠ . ܡܶܛܽܠ ܗܳܢܳܐ ܗܰܘ ܡܰܢ ܕ݁ܰܐܫܠܡܰܢܝ ܠܳܟ݂ ܆ ܪܰܒ݁ܳܐ ܗ̱ܝ ܚܛܺܝܬ݂ܶܗ ܡܶܢ ܕ݁ܺܝܠܳܟ݂ ܀ ܘܡܶܛܽܠ ܗܳܕ݂ܶܐ ܂ ܨܳܒ݂ܶܐ ܗ̱ܘܳܐ ܦ݁ܺܝܠܰܛܳܘܣ ܕ݁ܢܶܫܪܶܝܘܗ̱ܝ . ܝܺܗܽܘܕ݂ܳܝܶܐ̈ ܕ݁ܶܝܢ ܩܳܥܶܝܢ ܗ̱ܘܰܘ ܆ ܕ݁ܶܐܢ ܠܗܳܢܳܐ ܫܳܪܶܐ ܐܰܢ̱ܬ݁ ܂ ܠܳܐ ܗܘܰܝܬ݁ ܪܳܚܡܶܗ ܕ݁ܩܶܣܰܪ . ܟ݁ܽܠ ܡܰܢ ܓ݁ܶܝܪ ܕ݁ܢܰܦ݂ܫܶܗ ܡܰܠܟ݁ܳܐ ܥܳܒ݂ܶܕ݂ ܆ ܣܰܩܽܘܒ݂ܠܳܐ ܗܽܘ ܕ݁ܩܶܣܰܪ . ܟ݁ܰܕ݂ ܫܡܰܥ ܕ݁ܶܝܢ ܦ݁ܺܝܠܰܛܳܘܣ ܗܳܕ݂ܶܐ ܡܶܠܬ݂ܳܐ ܆ ܐܰܦ݁ܩܶܗ ܠܝܶܫܽܘܥ ܠܒ݂ܰܪ . ܘܺܝܬ݂ܶܒ݂ ܥܰܠ ܒ݁ܺܝܡ . ܒ݁ܕ݂ܽܘܟ݁ܬ݂ܳܐ ܕ݁ܡܶܬ݂ܩܰܪܝܳܐ ܂ ܪܨܺܝܦ݂ܬ݁ܳܐ ܕ݁ܟ݂ܺܐܦ݂ܶܐ̈ . ܥܶܒ݂ܪܳܐܝܺܬ݂ ܕ݁ܶܝܢ ܡܶܬ݂ܰܐܡܪܳܐ ܂ ܓ݁ܦ݂ܺܝܦ݂ܬ݁ܳܐ . ܘܰܥܪܽܘܒ݂ܬ݁ܳܐ ܗ̱ܘܳܬ݂ ܕ݁ܦ݂ܶܨܚܳܐ . ܘܺܐܝܬ݂ ܗ̱ܘܰܝ̈ ܐܰܝܟ݂ ܫܳܥܶܐ̈ ܫܶܬ݂ ܀ ܘܶܐܡܰܪ ܠܺܝܗܽܘܕ݂ܳܝܶܐ̈ . ܗܳܐ ܡܰܠܟ݁ܟ݂ܽܘܢ . ܗܶܢܽܘܢ ܕ݁ܶܝܢ ܩܳܥܶܝܢ ܗ̱ܘܰܘ ܆ ܫܩܽܘܠܳܝܗ̱ܝ ܁ ܫܩܽܘܠܳܝܗ̱ܝ . ܨܠܽܘܒ݂ܳܝܗ̱ܝ ܁ ܨܠܽܘܒ݂ܳܝܗ̱ܝ . ܐܳܡܰܪ ܠܗܽܘܢ ܦ݁ܺܝܠܰܛܳܘܣ . ܠܡܰܠܟ݁ܟ݂ܽܘܢ ܐܶܙܩܽܘܦ݂ ܆ ܐܳܡܪܺܝܢ ܪܰܒ݁ܰܝ̈ ܟ݁ܳܗܢܶܐ̈ . ܠܰܝܬ݁ ܠܰܢ ܡܰܠܟ݁ܳܐ ܂ ܐܶܠܳܐ ܐܶܢ ܩܶܣܰܪ ܀ ܗܳܝܕ݁ܶܝܢ ܐܰܫܠܡܶܗ ܠܗܽܘܢ ܕ݁ܢܶܙܩܦ݂ܽܘܢܳܝܗ̱ܝ . ܘܕ݂ܰܒ݂ܪܽܘܗ̱ܝ ܠܝܶܫܽܘܥ ܘܰܐܦ݁ܩܽܘܗ̱ܝ ܂ ܟ݁ܰܕ݂ ܫܩܺܝܠ ܙܩܺܝܦ݂ܶܗ ܇ ܠܕ݂ܽܘܟ݁ܬ݂ܳܐ ܕ݁ܡܶܬ݂ܩܰܪܝܳܐ ܂ ܩܰܪܩܰܦ݂ܬ݂ܳܐ . ܥܶܒ݂ܪܳܐܝܺܬ݂ ܕ݁ܶܝܢ ܡܶܬ݂ܰܐܡܪܳܐ ܂ ܓ݁ܳܓ݂ܽܘܠܬ݁ܳܐ . ܐܰܬ݂ܰܪ ܕ݁ܙܰܩܦ݁ܽܘܗ̱ܝ . ܘܥܰܡܶܗ ܬ݁ܪܶܝܢ̈ ܐ̱ܚܪܳܢܺܝܢ̈ ܁ ܚܰܕ݂ ܡܶܟ݁ܳܐ ܘܚܰܕ݂ ܡܶܟ݁ܳܐ ܂ ܘܰܠܝܶܫܽܘܥ ܒ݁ܰܡܨܰܥܬ݂ܳܐ ܀ ܘܰܟ݂ܬ݂ܰܒ݂ ܐܳܦ݂ ܠܽܘܚܳܐ ܦ݁ܺܝܠܰܛܳܘܣ ܆ ܘܣܳܡ ܥܰܠ ܙܩܺܝܦ݂ܶܗ . ܟ݁ܬ݂ܺܝܒ݂ ܗ̱ܘܳܐ ܕ݁ܶܝܢ ܗܳܟ݂ܰܢܳܐ . ܗܳܢܳܐ ܝܶܫܽܘܥ ܢܳܨܪܳܝܳܐ ܡܰܠܟ݁ܳܐ ܕ݁ܺܝܗܽܘܕ݂ܳܝܶܐ̈ . ܘܰܠܗܳܢܳܐ ܕ݁ܰܦ݁ܳܐ ܂ ܣܰܓ݁ܺܝܶܐܐ̈ ܡܶܢ ܝܺܗܽܘܕ݂ܳܝܶܐ̈ ܩܪܰܐܘܽܗ̱ܝ . ܡܶܛܽܠ ܕ݁ܩܰܪܺܝܒ݂ܳܐ ܗ̱ܘܳܬ݂ ܠܰܡܕ݂ܺܝܢ̱ܬ݁ܳܐ ܕ݁ܽܘܟ݁ܬ݂ܳܐ ܕ݁ܶܐܙܕ݁ܩܶܦ݂ ܒ݁ܳܗ ܝܶܫܽܘܥ . ܘܰܟ݂ܬ݂ܺܝܒ݂ܳܐ ܗ̱ܘܳܐ ܥܶܒ݂ܪܳܐܝܺܬ݂ ܁ ܘܝܰܘܢܳܐܝܺܬ݂ ܂ ܘܰܪܽܗ̱ܘܡܳܐܝܺܬ݂ . ܘܶܐܡܰܪܘ ܪܰܒ݁ܰܝ̈ ܟ݁ܳܗܢܶܐ̈ ܠܦ݁ܺܝܠܰܛܳܘܣ . ܠܳܐ ܬ݁ܶܟ݂ܬ݁ܽܘܒ݂ ܕ݁ܡܰܠܟ݁ܳܐ ܗܽܘ ܕ݁ܺܝܗܽܘܕ݂ܳܝܶܐ̈ . ܐܶܠܳܐ ܕ݁ܗܽܘ ܐܶܡܰܪ ܂ ܕ݁ܡܰܠܟ݁ܳܐ ܐܶܢܳܐ ܕ݁ܺܝܗܽܘܕ݂ܳܝܶܐ̈ . ܐܳܡܰܪ ܦ݁ܺܝܠܰܛܳܘܣ . ܡܶܕ݁ܶܡ ܕ݁ܟ݂ܶܬ݂ܒ݁ܶܬ݂ ܂ ܟ݁ܶܬ݂ܒ݁ܶܬ݂ ܀.܀.܀܀ ܐܶܣܛܪܰܛܺܝܽܘܛܶܐ̈ ܕ݁ܶܝܢ ܁ ܟ݁ܰܕ݂ ܙܰܩܦ݁ܽܘܗ̱ܝ ܠܝܶܫܽܘܥ ܆ ܫܩܰܠܘ ܢܰܚܬ݁ܰܘܗ̱ܝ̈ ܁ ܘܰܥܒ݂ܰܕ݂ܘ ܠܰܐܪܒ݁ܰܥ ܡܢܰܘܳܢ̈ . ܡܢܳܬ݂ܳܐ ܠܚܰܕ݂ ܡܶܢ ܐܶܣܛܪܰܛܺܝܽܘܛܶܐ̈ . ܟ݁ܽܘܬ݁ܺܝܢܶܗ ܕ݁ܶܝܢ ܐܺܝܬ݂ܶܝܗ ܗ̱ܘܳܬ݂ ܕ݁ܠܳܐ ܚܺܝܛܳܐ ܡܶܢ ܠܥܶܠ . ܙܩܺܝܪܬ݁ܳܐ ܟ݁ܽܠܳܗ . ܘܶܐܡܰܪܘ ܚܰܕ݂ ܠܚܰܕ݂ ܂ ܠܳܐ ܢܶܣܕ݁ܩܺܝܗ . ܐܶܠܳܐ ܢܶܦ݁ܶܣ ܥܠܶܝܗ ܡܶܦ݁ܰܣ ܂ ܕ݁ܡܰܢܽܘ ܬ݁ܶܗܘܶܐ ܀ ܘܰܫܠܶܡ ܟ݁ܬ݂ܳܒ݂ܳܐ ܕ݁ܶܐܡܰܪ ܇ ܕ݁ܦ݂ܰܠܶܓ݂ܘ ܢܰܚܬ݁ܰܝ̈ ܒ݁ܰܝܢܳܬ݂ܗܽܘܢ ܇ ܘܥܰܠ ܠܒ݂ܽܘܫܝ ܐܰܪܡܺܝܘ ܦ݁ܶܣܳܐ . ܗܳܠܶܝܢ ܥܒ݂ܰܕ݂ܘ ܐܶܣܛܪܰܛܺܝܽܘܛܶܐ̈ ܀ ܩܳܝܡܳܢ̈ ܗ̱ܘܰܝ̈ ܕ݁ܶܝܢ ܠܘܳܬ݂ ܙܩܺܝܦ݂ܶܗ ܕ݁ܝܶܫܽܘܥ ܆ ܐܶܡܶܗ ܂ ܘܚܳܬ݂ܳܗ ܕ݁ܶܐܡܶܗ . ܘܡܰܪܝܰܡ ܗܳܝ ܕ݁ܰܩܠܶܝܳܘܦ݁ܳܐ . ܘܡܰܪܝܰܡ ܡܰܓ݂ܕ݁ܠܳܝܬ݁ܳܐ . ܝܶܫܽܘܥ ܕ݁ܶܝܢ ܚܙܳܐ ܠܶܐܡܶܗ ܂ ܘܰܠܬ݂ܰܠܡܺܝܕ݂ܳܐ ܗܰܘ ܕ݁ܪܳܚܶܡ ܗ̱ܘܳܐ ܕ݁ܩܳܐܶܡ ܆ ܘܶܐܡܰܪ ܠܶܐܡܶܗ . ܐܰܢ̱ܬ݁ܬ݂ܳܐ ܗܳܐ ܒ݁ܪܶܟ݂ܝ . ܘܶܐܡܰܪ ܠܬ݂ܰܠܡܺܝܕ݂ܳܐ ܗܰܘ ܂ ܗܳܐ ܐܶܡܳܟ݂ . ܘܡܶܢ ܗܳܝ ܫܳܥܬ݂ܳܐ ܂ ܕ݁ܰܒ݂ܪܳܗ ܬ݁ܰܠܡܺܝܕ݂ܳܐ ܗܰܘ ܠܘܳܬ݂ܶܗ ܀܀ ܒ݁ܳܬ݂ܰܪ ܗܳܠܶܝܢ ܂ ܝܺܕ݂ܰܥ ܝܶܫܽܘܥ ܕ݁ܟ݂ܽܠܡܶܕ݁ܶܡ ܐܶܫܬ݁ܰܠܰܡ ܆ ܘܰܕ݂ܢܶܬ݂ܡܰܠܶܐ ܟ݁ܬ݂ܳܒ݂ܳܐ ܐܶܡܰܪ ܂ ܨܗܶܐ ܐ̱ܢܳܐ ܀ ܘܡܳܐܢܳܐ ܣܺܝܡ ܗ̱ܘܳܐ ܕ݁ܰܡܠܶܐ ܚܰܠܳܐ . ܗܶܢܽܘܢ ܕ݁ܶܝܢ ܡܠܰܘ ܐܶܣܦ݂ܽܘܓ݁ܳܐ ܡܶܢ ܚܰܠܳܐ ܆ ܘܣܳܡܘ ܥܰܠ ܙܽܘܦ݁ܳܐ ܂ ܘܩܰܪܶܒ݂ܘ ܠܘܳܬ݂ ܦ݁ܽܘܡܶܗ . ܟ݁ܰܕ݂ ܕ݁ܶܝܢ ܫܩܰܠ ܗܰܘ ܚܰܠܳܐ ܝܶܫܽܘܥ ܆ ܐܶܡܰܪ ܂ ܗܳܐ ܡܫܰܠܰܡ . ܘܰܐܪܟ݁ܶܢ ܪܺܫܶܗ ܂ ܘܰܐܫܠܶܡ ܪܽܘܚܶܗ ܀ ܝܺܗܽܘܕ݂ܳܝܶܐ̈ ܕ݁ܶܝܢ ܡܶܛܽܠ ܕ݁ܰܥܪܽܘܒ݂ܬ݁ܳܐ ܗ̱ܘܳܬ݂ ܂ ܐܳܡܪܺܝܢ . ܠܳܐ ܢܒ݂ܽܘܬ݂ܽܘܢ ܦ݁ܰܓ݂ܪܶܐ̈ ܗܳܠܶܝܢ ܥܰܠ ܙܩܺܝܦ݂ܝܰܗܽܘܢ . ܡܶܛܽܠ ܕ݁ܫܰܒ݁ܬ݂ܳܐ ܢܳܓ݂ܗܳܐ . ܝܰܘܡܳܐ ܗ̱ܘܳܐ ܓ݁ܶܝܪ ܪܰܒ݁ܳܐ ܁ ܝܰܘܡܳܐ ܕ݁ܫܰܒ݁ܬ݂ܳܐ ܗܳܝ . ܘܰܒ݂ܥܰܘ ܡܶܢ ܦ݁ܺܝܠܰܛܳܘܣ ܆ ܕ݁ܰܢܬ݂ܰܒ݁ܪܽܘܢ ܫܳܩܰܝܗܽܘܢ̈ ܁ ܕ݁ܗܳܢܽܘܢ ܙܩܺܝܦ݂ܶܐ̈ ܂ ܘܢܰܚܬ݂ܽܘܢ ܐܶܢܽܘܢ . ܘܶܐܬ݂ܰܘ ܐܶܣܛܪܰܛܺܝܽܘܛܶܐ̈ ܆ ܘܬ݂ܰܒ݁ܰܪܘ ܫܳܩܰܘܗ̱ܝ̈ ܕ݁ܩܰܕ݂ܡܳܝܳܐ ܆ ܘܰܕ݂ܗܰܘ ܐ̱ܚܪܺܢܳܐ ܕ݁ܶܐܙܕ݁ܩܶܦ݂ ܥܰܡܶܗ . ܘܟ݂ܰܕ݂ ܐܶܬ݂ܰܘ ܠܘܳܬ݂ ܝܶܫܽܘܥ ܆ ܚܙܰܘ ܕ݁ܡܺܝܬ݂ ܠܶܗ ܡܶܢ ܟ݁ܰܕ݁ܽܘ ܂ ܘܠܳܐ ܬ݁ܰܒ݁ܰܪܘ ܫܳܩܰܘܗ̱ܝ̈ . ܐܶܠܳܐ ܚܰܕ݂ ܡܶܢ ܐܶܣܛܪܰܛܺܝܽܘܛܶܐ̈ ܁ ܡܚܳܝܗ̱ܝ ܒ݁ܕ݂ܰܦ݂ܢܶܗ ܒ݁ܠܽܘܟ݁ܳܝܬ݁ܳܐ ܆ ܘܡܶܚܕ݂ܳܐ ܢܦ݂ܰܩ ܕ݁ܡܳܐ ܘܡܰܝܳܐ̈ . ܘܡܰܢ ܕ݁ܰܚܙܳܐ ܐܰܣܗܶܕ݂ . ܘܫܰܪܺܝܪܳܐ ܗ̱ܝ ܣܳܗܕ݁ܽܘܬ݂ܶܗ . ܘܗܽܘ ܝܳܕ݂ܰܥ ܂ ܕ݁ܰܫܪܳܪܳܐ ܐܶܡܰܪ . ܕ݁ܳܐܦ݂ ܐܰܢ̱ܬ݁ܽܘܢ ܬ݁ܗܰܝܡܢܽܘܢ . ܗܳܠܶܝܢ ܓ݁ܶܝܪ ܗܘܰܝ̈ ܆ ܕ݁ܢܶܬ݂ܡܰܠܶܐ ܟ݁ܬ݂ܳܒ݂ܳܐ ܕ݁ܶܐܡܰܪ ܇ ܕ݁ܓ݂ܰܪܡܳܐ ܠܳܐ ܢܶܬ݁ܬ݁ܒ݂ܰܪ ܒ݁ܶܗ . ܘܬ݂ܽܘܒ݂ ܟ݁ܬ݂ܳܒ݂ܳܐ ܐ̱ܚܪܺܢܳܐ ܁ ܕ݁ܶܐܡܰܪ ܇ ܕ݁ܰܢܚܽܘܪܽܘܢ ܒ݁ܡܰܢ ܕ݁ܰܕ݂ܩܰܪܘ ܀ ܒ݁ܳܬ݂ܰܪ ܗܳܠܶܝܢ ܆ ܝܰܘܣܶܦ݂ ܗܰܘ ܕ݁ܡܶܢ ܪܳܡܬ݂ܳܐ ܁ ܒ݁ܥܳܐ ܡܶܢ ܦ݁ܺܝܠܰܛܳܘܣ ܆ ܡܶܛܽܠ ܕ݁ܬ݂ܰܠܡܺܝܕ݂ܳܐ ܗ̱ܘܳܐ ܕ݁ܝܶܫܽܘܥ : ܘܰܡܛܰܫܶܐ ܗ̱ܘܳܐ ܁ ܡܶܢ ܕ݁ܶܚܠܬ݂ܳܐ ܕ݁ܺܝܗܽܘܕ݂ܳܝܶܐ̈ . ܕ݁ܢܶܫܩܽܘܠ ܦ݁ܰܓ݂ܪܶܗ ܕ݁ܝܶܫܽܘܥ . ܘܰܐܦ݁ܶܣ ܦ݁ܺܝܠܰܛܳܘܣ . ܘܶܐܬ݂ܳܐ ܘܰܫܩܰܠ ܦ݁ܰܓ݂ܪܶܗ ܕ݁ܝܶܫܽܘܥ ܀ ܘܶܐܬ݂ܳܐ ܐܳܦ݂ ܢܺܝܩܳܕ݂ܺܡܳܘܣ ܆ ܗܰܘ ܕ݁ܶܐܬ݂ܳܐ ܗ̱ܘܳܐ ܡܶܢ ܩܕ݂ܺܝܡ ܠܘܳܬ݂ ܝܶܫܽܘܥ ܒ݁ܠܺܠܝܳܐ ܇ ܘܰܐܝܬ݁ܺܝ ܥܰܡܶܗ ܚܽܘܢܛܬ݂ܳܐ ܕ݁ܡܽܘܪܳܐ ܘܰܕ݂ܥܰܠܘܰܝ ܂ ܐܰܝܟ݂ ܡܳܐܐ ܠܺܝܛܪܺܝܢ̈ ܀ ܘܫܰܩܠܽܘܗ̱ܝ ܠܦ݂ܰܓ݂ܪܶܗ ܕ݁ܝܶܫܽܘܥ ܆ ܘܟ݂ܰܪܟ݂ܽܘܗ̱ܝ ܒ݁ܟ݂ܶܬ݁ܳܢܶܐ̈ ܘܰܒ݂ܒ݂ܶܣܡܶܐ̈ . ܐܰܝܟ݁ܰܢܳܐ ܕ݁ܺܐܝܬ݂ ܥܝܳܕ݂ܳܐ ܠܺܝܗܽܘܕ݂ܳܝܶܐ̈ ܕ݁ܢܶܩܒ݁ܪܽܘܢ . ܐܺܝܬ݂ ܗ̱ܘܳܬ݂ ܕ݁ܶܝܢ ܁ ܒ݁ܗܳܝ ܕ݁ܽܘܟ݁ܬ݂ܳܐ ܕ݁ܶܐܙܕ݁ܩܶܦ݂ ܒ݁ܳܗ ܝܶܫܽܘܥ ܂ ܓ݁ܰܢܬ݂ܳܐ . ܘܒ݂ܳܗ ܒ݁ܓ݂ܰܢܬ݂ܳܐ ܂ ܒ݁ܶܝܬ݂ ܩܒ݂ܽܘܪܳܐ ܚܰܕ݂̱ܬ݂ܳܐ . ܕ݁ܐ̱ܢܳܫ ܥܕ݂ܰܟ݁ܺܝܠ ܠܳܐ ܐܶܬ݁ܬ݁ܣܺܝܡ ܗ̱ܘܳܐ ܒ݁ܶܗ . ܘܣܳܡܽܘܗ̱ܝ ܬ݁ܰܡܳܢ ܠܝܶܫܽܘܥ . ܡܶܛܽܠ ܕ݁ܫܰܒ݁ܬ݂ܳܐ ܥܳܐܠܳܐ ܗ̱ܘܳܬ݂ ܆ ܘܡܶܛܽܠ ܕ݁ܩܰܪܺܝܒ݂ ܗ̱ܘܳܐ ܩܰܒ݂ܪܳܐ ܀ Chapter 20 ܒ݁ܚܰܕ݂ ܒ݁ܫܰܒ݁ܳܐ ܕ݁ܶܝܢ ܐܶܬ݂ܳܬ݂ ܡܰܪܝܰܡ ܡܰܓ݂ܕ݁ܠܳܝܬ݁ܳܐ ܒ݁ܨܰܦ݂ܪܳܐ ܥܰܕ݂ ܚܶܫܽܘܟ݂ ܂ ܠܒ݂ܶܝܬ݂ ܩܒ݂ܽܘܪܳܐ . ܘܰܚܙܳܬ݂ ܠܟ݂ܺܐܦ݂ܳܐ ܂ ܕ݁ܰܫܩܺܝܠܳܐ ܡܶܢ ܩܰܒ݂ܪܳܐ . ܘܪܶܗܛܰܬ݂ ܐܶܬ݂ܳܬ݂ ܠܘܳܬ݂ ܫܶܡܥܽܘܢ ܟ݁ܺܐܦ݂ܳܐ ܂ ܘܰܠܘܳܬ݂ ܗܰܘ ܬ݁ܰܠܡܺܝܕ݂ܳܐ ܐ̱ܚܪܺܢܳܐ ܕ݁ܪܳܚܶܡ ܗ̱ܘܳܐ ܝܶܫܽܘܥ ܂ ܘܳܐܡܪܳܐ ܠܗܽܘܢ . ܕ݁ܫܰܩܠܽܘܗ̱ܝ ܠܡܳܪܰܢ ܡܶܢ ܗܰܘ ܒ݁ܶܝܬ݂ ܩܒ݂ܽܘܪܳܐ ܆ ܘܠܳܐ ܝܳܕ݂ܥܳܐ ܐ̱ܢܳܐ ܐܰܝܟ݁ܳܐ ܣܳܡܽܘܗ̱ܝ . ܘܰܢܦ݂ܰܩ ܫܶܡܥܽܘܢ ܘܗܰܘ ܬ݁ܰܠܡܺܝܕ݂ܳܐ ܐ̱ܚܪܺܢܳܐ ܆ ܘܳܐܬ݂ܶܝܢ ܗ̱ܘܰܘ ܠܒ݂ܶܝܬ݂ ܩܒ݂ܽܘܪܳܐ . ܘܪܳܗܛܺܝܢ ܗ̱ܘܰܘ ܬ݁ܪܰܝܗܽܘܢ̈ ܐܰܟ݂ܚܕ݂ܳܐ . ܗܰܘ ܕ݁ܶܝܢ ܬ݁ܰܠܡܺܝܕ݂ܳܐ ܪܗܶܛ ܩܰܕ݁ܡܶܗ ܠܫܶܡܥܽܘܢ ܆ ܘܶܐܬ݂ܳܐ ܩܰܕ݂ܡܳܝܳܐ ܠܒ݂ܶܝܬ݂ ܩܒ݂ܽܘܪܳܐ . ܘܰܐܕ݂ܺܝܩ ܚܙܳܐ ܟ݁ܶܬ݁ܳܢܶܐ̈ ܟ݁ܰܕ݂ ܣܺܝܡܺܝܢ . ܡܶܥܰܠ ܕ݁ܶܝܢ ܠܳܐ ܥܰܠ ܀ ܐܶܬ݂ܳܐ ܕ݁ܶܝܢ ܫܶܡܥܽܘܢ ܒ݁ܳܬ݂ܪܶܗ ܆ ܘܥܰܠ ܠܒ݂ܶܝܬ݂ ܩܒ݂ܽܘܪܳܐ ܂ ܘܰܚܙܳܐ ܟ݁ܶܬ݁ܳܢܶܐ̈ ܟ݁ܰܕ݂ ܣܺܝܡܺܝܢ . ܘܣܽܘܕ݂ܳܪܳܐ ܗܰܘ ܕ݁ܰܚܙܺܝܩ ܗ̱ܘܳܐ ܒ݁ܪܺܫܶܗ ܆ ܠܳܐ ܥܰܡ ܟ݁ܶܬ݁ܳܢܶܐ̈ . ܐܶܠܳܐ ܟ݁ܰܕ݂ ܟ݁ܪܺܝܟ݂ ܘܣܺܝܡ ܠܰܣܛܰܪ ܒ݁ܰܚܕ݂ܳܐ ܕ݁ܽܘܟ݁ܳܐ . ܗܳܝܕ݁ܶܝܢ ܥܰܠ ܐܳܦ݂ ܗܰܘ ܬ݁ܰܠܡܺܝܕ݂ܳܐ ܕ݁ܶܐܬ݂ܳܐ ܩܰܕ݂ܡܳܝܳܐ ܠܒ݂ܶܝܬ݂ ܩܒ݂ܽܘܪܳܐ ܆ ܘܰܚܙܳܐ ܂ ܘܗܰܝܡܶܢ . ܠܳܐ ܓ݁ܶܝܪ ܥܕ݂ܰܟ݁ܺܝܠ ܝܳܕ݂ܥܺܝܢ ܗ̱ܘܰܘ ܡܶܢ ܟ݁ܬ݂ܳܒ݂ܶܐ̈ ܇ ܕ݁ܰܥܬ݂ܺܝܕ݂ ܗ̱ܘܳܐ ܠܰܡܩܳܡ ܡܶܢ ܡܺܝܬ݂ܶܐ̈ . ܘܶܐܙܰܠܘ ܗܶܢܽܘܢ ܬ݁ܰܠܡܺܝܕ݂ܶܐ̈ ܬ݁ܽܘܒ݂ ܠܕ݂ܽܘܟ݁ܰܬ݂ܗܽܘܢ ܀ ܡܰܪܝܰܡ ܕ݁ܶܝܢ ܩܳܝܡܳܐ ܗ̱ܘܳܬ݂ ܠܘܳܬ݂ ܩܰܒ݂ܪܳܐ ܂ ܘܒ݂ܳܟ݂ܝܳܐ . ܘܟ݂ܰܕ݂ ܒ݁ܳܟ݂ܝܳܐ ܂ ܐܰܕ݂ܺܝܩܰܬ݂ ܒ݁ܩܰܒ݂ܪܳܐ ܆ ܘܰܚܙܳܬ݂ ܬ݁ܪܶܝܢ̈ ܡܰܠܰܐܟ݂ܶܐ̈ ܒ݁ܚܶܘܳܪܶܐ̈ ܕ݁ܝܳܬ݂ܒ݁ܺܝܢ . ܚܰܕ݂ ܡܶܢ ܐܶܣܳܕ݂ܰܘܗ̱ܝ̈ ܂ ܘܚܰܕ݂ ܡܶܢ ܪܶܓ݂ܠܰܘܗ̱ܝ̈ . ܐܰܝܟ݁ܳܐ ܕ݁ܣܺܝܡ ܗ̱ܘܳܐ ܦ݁ܰܓ݂ܪܶܗ ܕ݁ܝܶܫܽܘܥ . ܘܳܐܡܪܺܝܢ ܠܳܗ . ܐܰܢ̱ܬ݁ܬ݂ܳܐ ܂ ܡܳܢܳܐ ܒ݁ܳܟ݂ܝܳܐ ܐܰܢ̱ܬ݁ܝ . ܐܳܡܪܳܐ ܠܗܽܘܢ . ܕ݁ܫܰܩܠܽܘܗ̱ܝ ܠܡܳܪܝ ܂ ܘܠܳܐ ܝܳܕ݂ܥܳܐ ܐ̱ܢܳܐ ܐܰܝܟ݁ܳܐ ܣܳܡܽܘܗ̱ܝ . ܗܳܕ݂ܶܐ ܐܶܡܪܰܬ݂ ܘܶܐܬ݂ܦ݁ܰܢܝܰܬ݂ ܠܒ݂ܶܣܬ݁ܪܳܗ ܇ ܘܰܚܙܳܬ݂ ܠܝܶܫܽܘܥ ܕ݁ܩܳܐܶܡ ܆ ܘܠܳܐ ܝܳܕ݂ܥܳܐ ܗ̱ܘܳܬ݂ ܕ݁ܝܶܫܽܘܥ ܗ̱ܽܘ . ܐܳܡܰܪ ܠܳܗ ܝܶܫܽܘܥ . ܐܰܢ̱ܬ݁ܬ݂ܳܐ ܂ ܡܳܢܳܐ ܒ݁ܳܟ݂ܝܳܐ ܐܰܢ̱ܬ݁ܝ . ܘܰܠܡܰܢ ܒ݁ܳܥܝܳܐ ܐܰܢ̱ܬ݁ܝ . ܗܺܝ ܕ݁ܶܝܢ ܣܶܒ݂ܪܰܬ݂ ܂ ܕ݁ܓ݂ܰܢܳܢܳܐ ܗܽܘ . ܘܳܐܡܪܳܐ ܠܶܗ . ܡܳܪܝ ܆ ܐܶܢ ܐܰܢ̱ܬ݁ ܫܩܰܠܬ݁ܳܝܗ̱ܝ ܂ ܐܶܡܰܪ ܠܺܝ ܐܰܝܟ݁ܳܐ ܣܳܡܬ݁ܳܝܗ̱ܝ . ܐܺܙܰܠ ܐܶܫܩܠܺܝܘܗ̱ܝ . ܐܳܡܰܪ ܠܳܗ ܝܶܫܽܘܥ ܁ ܡܰܪܝܰܡ . ܘܶܐܬ݂ܦ݁ܰܢܝܰܬ݂ ܘܳܐܡܪܳܐ ܠܶܗ ܥܶܒ݂ܪܳܐܝܺܬ݂ . ܪܰܒ݁ܽܘܠܺܝ . ܕ݁ܡܶܬ݂ܶܐܡܰܪ ܡܰܠܦ݂ܳܢܳܐ . ܐܳܡܰܪ ܠܳܗ ܝܶܫܽܘܥ . ܠܳܐ ܬ݁ܶܬ݂ܩܰܪܒ݂ܺܝܢ ܠܺܝ . ܠܳܐ ܓ݁ܶܝܪ ܥܕ݂ܰܟ݁ܺܝܠ ܣܶܠܩܶܬ݂ ܠܘܳܬ݂ ܐܳܒ݂ܝ . ܙܶܠܝ ܕ݁ܶܝܢ ܠܘܳܬ݂ ܐܰܚܰܝ̈ ܂ ܘܶܐܡܰܪܝ ܠܗܽܘܢ . ܣܳܠܶܩ ܐ̱ܢܳܐ ܠܘܳܬ݂ ܐܳܒ݂ܝ ܂ ܘܰܐܒ݂ܽܘܟ݂ܽܘܢ . ܘܰܐܠܳܗܝ ܂ ܘܰܐܠܳܗܟ݂ܽܘܢ ܀ ܗܳܝܕ݁ܶܝܢ ܐܶܬ݂ܳܬ݂ ܡܰܪܝܰܡ ܡܰܓ݂ܕ݁ܠܳܝܬ݁ܳܐ ܆ ܘܣܰܒ݁ܪܰܬ݂ ܠܬ݂ܰܠܡܺܝܕ݂ܶܐ̈ ܁ ܕ݁ܰܚܙܳܬ݂ ܠܡܳܪܰܢ ܂ ܘܰܕ݂ܗܳܠܶܝܢ ܐܶܡܰܪ ܠܳܗ ܀.܀.܀܀ ܟ݁ܰܕ݂ ܗܘܳܐ ܕ݁ܶܝܢ ܪܰܡܫܳܐ ܕ݁ܝܰܘܡܳܐ ܗܰܘ ܕ݁ܚܰܕ݂ ܒ݁ܫܰܒ݁ܳܐ : ܘܬ݂ܰܪܥܶܐ̈ ܐܰܚܺܝܕ݂ܺܝܢ ܗ̱ܘܰܘ ܕ݁ܰܐܝܟ݁ܳܐ ܕ݁ܺܐܝܬ݂ܰܝܗܽܘܢ ܗ̱ܘܰܘ ܬ݁ܰܠܡܺܝܕ݂ܶܐ̈ : ܡܶܛܽܠ ܕ݁ܶܚܠܬ݂ܳܐ ܕ݁ܺܝܗܽܘܕ݂ܳܝܶܐ̈ ܆ ܐܶܬ݂ܳܐ ܝܶܫܽܘܥ ܩܳܡ ܒ݁ܰܝܢܳܬ݂ܗܽܘܢ ܂ ܘܶܐܡܰܪ ܠܗܽܘܢ . ܫܠܳܡܳܐ ܥܰܡܟ݂ܽܘܢ . ܗܳܕ݂ܶܐ ܐܶܡܰܪ ܆ ܘܚܰܘܺܝ ܐܶܢܽܘܢ ܐܺܝܕ݂ܰܘܗ̱ܝ̈ ܂ ܘܣܶܛܪܶܗ . ܘܰܚܕ݂ܺܝܘ ܬ݁ܰܠܡܺܝܕ݂ܶܐ̈ ܕ݁ܰܚܙܰܘ ܠܡܳܪܰܢ . ܐܶܡܰܪ ܠܗܽܘܢ ܕ݁ܶܝܢ ܬ݁ܽܘܒ݂ ܝܶܫܽܘܥ . ܫܠܳܡܳܐ ܥܰܡܟ݂ܽܘܢ . ܐܰܝܟ݁ܰܢܳܐ ܕ݁ܫܰܕ݁ܪܰܢܝ ܐܳܒ݂ܝ ܁ ܐܳܦ݂ ܐܶܢܳܐ ܡܫܰܕ݁ܰܪ ܐ̱ܢܳܐ ܠܟ݂ܽܘܢ ܀ ܘܟ݂ܰܕ݂ ܐܶܡܰܪ ܗܳܠܶܝܢ ܆ ܢܦ݂ܰܚ ܒ݁ܗܽܘܢ ܂ ܘܶܐܡܰܪ ܠܗܽܘܢ . ܩܰܒ݁ܶܠܘ ܪܽܘܚܳܐ ܕ݁ܩܽܘܕ݂ܫܳܐ . ܐܶܢ ܬ݁ܶܫܒ݁ܩܽܘܢ ܚܛܳܗܶܐ̈ ܠܐ̱ܢܳܫ ܂ ܢܶܫܬ݁ܰܒ݂ܩܽܘܢ ܠܶܗ . ܘܶܐܢ ܬ݁ܶܐܚܕ݁ܽܘܢ ܕ݁ܐ̱ܢܳܫ ܂ ܐܰܚܺܝܕ݂ܺܝܢ ܀ ܬ݁ܳܐܘܡܰܐ ܕ݁ܶܝܢ ܚܰܕ݂ ܡܶܢ ܬ݁ܪܶܥܣܰܪܬ݁ܳܐ̈ : ܗܰܘ ܕ݁ܡܶܬ݂ܶܐܡܰܪ ܬ݁ܳܐܡܳܐ ܂ ܠܳܐ ܗ̱ܘܳܐ ܬ݁ܰܡܳܢ ܗ̱ܘܳܐ ܥܰܡܗܽܘܢ ܟ݁ܰܕ݂ ܐܶܬ݂ܳܐ ܝܶܫܽܘܥ . ܘܳܐܡܪܺܝܢ ܠܶܗ ܬ݁ܰܠܡܺܝܕ݂ܶܐ̈ . ܚܙܰܝܢ ܠܡܳܪܰܢ . ܗܽܘ ܕ݁ܶܝܢ ܐܶܡܰܪ ܠܗܽܘܢ . ܐܶܠܳܐ ܚܳܙܶܐ ܐ̱ܢܳܐ ܒ݁ܺܐܝܕ݂ܰܘܗ̱ܝ̈ ܕ݁ܽܘܟ݁ܝܳܬ݂ܳܐ̈ ܕ݁ܨܶܨܶܐ̈ : ܘܪܳܡܶܐ ܐ̱ܢܳܐ ܒ݁ܗܶܝܢ ܨܶܒ݂ܥܳܬ݂ܝ̈ : ܘܡܰܘܫܶܛ ܐ̱ܢܳܐ ܐܺܝܕ݂ܝ ܒ݁ܕ݂ܰܦ݂ܢܶܗ ܆ ܠܳܐ ܡܗܰܝܡܶܢ ܐ̱ܢܳܐ ܀ ܘܒ݂ܳܬ݂ܰܪ ܬ݁ܡܳܢܝܳܐ ܝܰܘܡܺܝܢ̈ ܆ ܬ݁ܽܘܒ݂ ܠܓ݂ܰܘ ܗ̱ܘܰܘ ܬ݁ܰܠܡܺܝܕ݂ܶܐ̈ ܂ ܘܬ݂ܳܐܘܡܰܐ ܥܰܡܗܽܘܢ . ܘܶܐܬ݂ܳܐ ܝܶܫܽܘܥ ܁ ܟ݁ܰܕ݂ ܐܰܚܺܝܕ݂ܺܝܢ ܬ݁ܰܪܥܶܐ̈ ܆ ܩܳܡ ܒ݁ܰܡܨܰܥܬ݂ܳܐ ܂ ܘܶܐܡܰܪ ܠܗܽܘܢ . ܫܠܳܡܳܐ ܥܰܡܟ݂ܽܘܢ . ܘܶܐܡܰܪ ܠܬ݂ܳܐܘܡܰܐ . ܐܰܝܬ݁ܳܐ ܨܶܒ݂ܥܳܟ݂ ܠܗܳܪܟ݁ܳܐ ܂ ܘܰܚܙܺܝ ܐܺܝܕ݂ܰܝ̈ . ܘܰܐܝܬ݁ܳܐ ܐܺܝܕ݂ܳܟ݂ ܂ ܘܰܐܘܫܶܛ ܒ݁ܓ݂ܰܒ݁ܝ . ܘܠܳܐ ܬ݁ܶܗܘܶܐ ܠܳܐ ܡܗܰܝܡܢܳܐ ܁ ܐܶܠܳܐ ܡܗܰܝܡܢܳܐ ܀ ܘܰܥܢܳܐ ܬ݁ܳܐܘܡܰܐ ܂ ܘܶܐܡܰܪ ܠܶܗ . ܡܳܪܝ ܂ ܘܰܐܠܳܗܝ . ܐܳܡܰܪ ܠܶܗ ܝܶܫܽܘܥ . ܗܳܫܳܐ ܕ݁ܰܚܙܰܝܬ݁ܳܢܝ ܂ ܗܰܝܡܶܢܬ݁ . ܛܽܘܒ݂ܰܝܗܽܘܢ̈ ܠܰܐܝܠܶܝܢ ܕ݁ܠܳܐ ܚܙܰܐܘܽܢܝ ܘܗܰܝܡܶܢܘ ܀܀ ܣܰܓ݁ܺܝܳܐܬ݂ܳܐ̈ ܕ݁ܶܝܢ ܐܳܬ݂ܘܳܬ݂ܳܐ̈ ܐ̱ܚܪܳܢܝܳܬ݂ܳܐ̈ ܥܒ݂ܰܕ݂ ܝܶܫܽܘܥ ܩܕ݂ܳܡ ܬ݁ܰܠܡܺܝܕ݂ܰܘܗ̱ܝ̈ ܇ ܐܰܝܠܶܝܢ ܕ݁ܠܳܐ ܟ݁ܬ݂ܺܝܒ݂ܳܢ̈ ܒ݁ܰܟ݂ܬ݂ܳܒ݂ܳܐ ܗܳܢܳܐ . ܐܳܦ݂ ܗܳܠܶܝܢ ܕ݁ܶܝܢ ܕ݁ܰܟ݂ܬ݂ܺܝܒ݂ܳܢ̈ ܆ ܕ݁ܰܬ݂ܗܰܝܡܢܽܘܢ ܂ ܕ݁ܝܶܫܽܘܥ ܗܽܘ ܡܫܺܝܚܳܐ ܒ݁ܪܶܗ ܕ݁ܰܐܠܳܗܳܐ . ܘܡܳܐ ܕ݁ܗܰܝܡܶܢܬ݁ܽܘܢ ܆ ܢܶܗܘܽܘܢ ܠܟ݂ܽܘܢ ܒ݁ܰܫܡܶܗ ܚܰܝܶܐ̈ ܕ݁ܰܠܥܳܠܰܡ ܀ Chapter 21 ܒ݁ܳܬ݂ܰܪ ܗܳܠܶܝܢ ܆ ܚܰܘܺܝ ܬ݁ܽܘܒ݂ ܢܰܦ݂ܫܶܗ ܝܶܫܽܘܥ ܠܬ݂ܰܠܡܺܝܕ݂ܰܘܗ̱ܝ̈ ܇ ܥܰܠ ܝܰܡܳܐ ܕ݁ܛܺܝܒ݂ܶܪܺܝܳܘܣ . ܚܰܘܺܝ ܕ݁ܶܝܢ ܗܳܟ݂ܰܢܳܐ . ܐܺܝܬ݂ܰܝܗܽܘܢ ܗ̱ܘܰܘ ܐܰܟ݂ܚܕ݂ܳܐ ܆ ܫܶܡܥܽܘܢ ܟ݁ܺܐܦ݂ܳܐ . ܘܬ݂ܳܐܘܡܰܐ ܕ݁ܡܶܬ݂ܶܐܡܰܪ ܬ݁ܳܐܡܳܐ . ܘܢܰܬ݂ܰܢܰܝܐܝܺܠ ܗܰܘ ܕ݁ܡܶܢ ܩܳܛܢܶܐ ܕ݁ܰܓ݂ܠܺܝܠܳܐ . ܘܰܒ݂ܢܰܝ̈ ܙܰܒ݂ܕ݂ܰܝ ܆ ܘܰܬ݂ܪܶܝܢ̈ ܐ̱ܚܪܳܢܺܝܢ̈ ܡܶܢ ܬ݁ܰܠܡܺܝܕ݂ܶܐ̈ . ܐܳܡܰܪ ܠܗܽܘܢ ܫܶܡܥܽܘܢ ܟ݁ܺܐܦ݂ܳܐ . ܐܳܙܶܠ ܐ̱ܢܳܐ ܐܶܨܽܘܕ݂ ܢܽܘܢܶܐ̈ . ܐܳܡܪܺܝܢ ܠܶܗ ܐܳܦ݂ ܚܢܰܢ ܐܳܬ݂ܶܝܢܰܢ ܥܰܡܳܟ݂ . ܘܰܢܦ݂ܰܩܘ ܘܰܣܠܶܩܘ ܠܰܣܦ݂ܺܝܢ̱ܬ݁ܳܐ . ܘܰܒ݂ܗܰܘ ܠܺܠܝܳܐ ܡܶܕ݁ܶܡ ܠܳܐ ܨܳܕ݂ܘ . ܟ݁ܰܕ݂ ܕ݁ܶܝܢ ܗܘܳܐ ܨܰܦ݂ܪܳܐ ܆ ܩܳܡ ܝܶܫܽܘܥ ܥܰܠ ܝܰܕ݂ ܝܰܡܳܐ ܆ ܘܠܳܐ ܝܕ݂ܰܥܘ ܬ݁ܰܠܡܺܝܕ݂ܶܐ̈ ܕ݁ܝܶܫܽܘܥ ܗ̱ܽܘ ܀ ܘܶܐܡܰܪ ܠܗܽܘܢ ܝܶܫܽܘܥ . ܛܠܳܝܶܐ̈ ܆ ܠܡܳܐ ܆ ܐܺܝܬ݂ ܠܟ݂ܽܘܢ ܡܶܕ݁ܶܡ ܠܡܶܠܥܰܣ ܆ ܐܳܡܪܺܝܢ ܠܶܗ ܠܳܐ . ܐܳܡܰܪ ܠܗܽܘܢ . ܐܰܪܡܰܘ ܡܨܺܝܕ݂ܬ݁ܟ݂ܽܘܢ ܡܶܢ ܓ݁ܰܒ݁ܳܐ ܕ݁ܝܰܡܺܝܢܳܐ ܕ݁ܰܣܦ݂ܺܝܢ̱ܬ݁ܳܐ ܂ ܘܡܶܫܟ݁ܚܺܝܢ ܐܢ̱ܬ݁ܽܘܢ . ܘܰܐܪܡܺܝܘ ܂ ܘܠܳܐ ܐܶܫܟ݁ܰܚܘ ܠܡܶܓ݁ܕ݂ܳܗ ܠܰܡܨܺܝܕ݂ܬ݁ܳܐ ܇ ܡܶܢ ܣܽܘܓ݂ܳܐܐ ܕ݁ܢܽܘܢܶܐ̈ ܕ݁ܶܐܚܕ݁ܰܬ݂ ܀ ܘܶܐܡܰܪ ܬ݁ܰܠܡܺܝܕ݂ܳܐ ܗܰܘ ܕ݁ܪܳܚܶܡ ܗ̱ܘܳܐ ܠܶܗ ܝܶܫܽܘܥ ܠܟ݂ܺܐܦ݂ܳܐ . ܗܳܢܳܐ ܂ ܡܳܪܰܢ ܗ̱ܽܘ . ܫܶܡܥܽܘܢ ܕ݁ܶܝܢ ܟ݁ܰܕ݂ ܫܡܰܥ ܕ݁ܡܳܪܰܢ ܗ̱ܽܘ ܆ ܢܣܰܒ݂ ܟ݁ܽܘܬ݁ܺܝܢܶܗ ܂ ܡܚܳܐ ܒ݁ܚܰܨܰܘܗ̱ܝ̈ . ܡܶܛܽܠ ܕ݁ܥܰܪܛܶܠܳܝܳܐ ܗ̱ܘܳܐ . ܘܰܫܕ݂ܳܐ ܢܰܦ݂ܫܶܗ ܒ݁ܝܰܡܳܐ ܂ ܕ݁ܢܺܐܬ݂ܶܐ ܠܘܳܬ݂ ܝܶܫܽܘܥ . ܐ̱ܚܪܳܢܶܐ̈ ܕ݁ܶܝܢ ܬ݁ܰܠܡܺܝܕ݂ܶܐ̈ ܂ ܒ݁ܰܣܦ݂ܺܝܢ̱ܬ݁ܳܐ ܐܶܬ݂ܰܘ . ܠܳܐ ܓ݁ܶܝܪ ܪܰܚܺܝܩܺܝܢ ܗ̱ܘܰܘ ܣܰܓ݁ܺܝ ܡܶܢ ܐܰܪܥܳܐ ܇ ܐܶܠܳܐ ܐܰܝܟ݂ ܡܰܐܬ݂ܶܝܢ ܐܰܡܺܝܢ̈ . ܘܢܳܓ݂ܕ݁ܺܝܢ ܗ̱ܘܰܘ ܠܳܗ ܠܰܡܨܺܝܕ݂ܬ݁ܳܐ ܗܳܝ ܕ݁ܢܽܘܢܶܐ̈ ܀ ܟ݁ܰܕ݂ ܕ݁ܶܝܢ ܣܠܶܩܘ ܠܰܐܪܥܳܐ ܆ ܚܙܰܘ ܓ݁ܽܘܡܪܶܐ̈ ܟ݁ܰܕ݂ ܣܺܝܡܳܢ̈ . ܘܢܽܘܢܳܐ ܟ݁ܰܕ݂ ܣܺܝܡ ܥܠܰܝܗܶܝܢ ܘܠܰܚܡܳܐ . ܘܶܐܡܰܪ ܠܗܽܘܢ ܝܶܫܽܘܥ . ܐܰܝܬ݁ܰܘ ܡܶܢ ܗܳܢܽܘܢ ܢܽܘܢܶܐ̈ ܕ݁ܨܳܕ݂ܬ݁ܽܘܢ ܗܳܫܳܐ . ܘܰܣܠܶܩ ܫܶܡܥܽܘܢ ܟ݁ܺܐܦ݂ܳܐ . ܘܢܰܓ݂ܕ݁ܳܗ ܠܰܡܨܺܝܕ݂ܬ݁ܳܐ ܠܰܐܪܥܳܐ ܆ ܟ݁ܰܕ݂ ܡܰܠܝܳܐ ܢܽܘܢܶܐ̈ ܪܰܘܪܒ݂ܶܐ̈ . ܡܳܐܐ ܘܚܰܡܫܺܝܢ ܘܰܬ݂ܠܳܬ݂ܳܐ . ܘܰܒ݂ܗܳܢܳܐ ܟ݁ܽܠܶܗ ܝܽܘܩܪܳܐ ܠܳܐ ܐܶܨܛܰܪܝܰܬ݂ ܡܨܺܝܕ݂ܬ݁ܳܐ ܗܳܝ ܀ ܘܶܐܡܰܪ ܠܗܽܘܢ ܝܶܫܽܘܥ ܁ ܬ݁ܰܘ ܐܶܫܬ݁ܰܪܰܘ . ܐ̱ܢܳܫ ܕ݁ܶܝܢ ܡܶܢ ܬ݁ܰܠܡܺܝܕ݂ܶܐ̈ ܆ ܠܳܐ ܡܰܡܪܰܚ ܗ̱ܘܳܐ ܕ݁ܰܢܫܰܐܠܺܝܘܗ̱ܝ ܕ݁ܡܰܢܽܘ . ܕ݁ܝܳܕ݂ܥܺܝܢ ܗ̱ܘܰܘ ܕ݁ܡܳܪܰܢ ܗ̱ܽܘ . ܩܪܶܒ݂ ܕ݁ܶܝܢ ܝܶܫܽܘܥ ܁ ܘܰܫܩܰܠ ܠܰܚܡܳܐ ܘܢܽܘܢܶܐ̈ ܂ ܘܝܰܗ̱ܒ݂ ܠܗܽܘܢ ܀ ܗܳܕ݂ܶܐ ܕ݁ܰܬ݂ܠܳܬ݂ ܙܰܒ݂ܢܺܝܢ̈ ܐܶܬ݂ܚܙܺܝ ܝܶܫܽܘܥ ܠܬ݂ܰܠܡܺܝܕ݂ܰܘܗ̱ܝ̈ . ܟ݁ܰܕ݂ ܩܳܡ ܡܶܢ ܒ݁ܶܝܬ݂ ܡܺܝܬ݂ܶܐ̈ ܀܀ ܟ݁ܰܕ݂ ܕ݁ܶܝܢ ܐܶܫܬ݁ܰܪܺܝܘ ܆ ܐܶܡܰܪ ܝܶܫܽܘܥ ܠܫܶܡܥܽܘܢ ܟ݁ܺܐܦ݂ܳܐ . ܫܶܡܥܽܘܢ ܒ݁ܰܪ ܝܳܘܢܰܐ ܆ ܪܳܚܶܡ ܐܰܢ̱ܬ݁ ܠܺܝ ܝܰܬ݁ܺܝܪ ܡܶܢ ܗܳܠܶܝܢ ܆ ܐܳܡܰܪ ܠܶܗ ܂ ܐܺܝܢ ܡܳܪܝ . ܐܰܢ̱ܬ݁ ܝܳܕ݂ܰܥ ܐܰܢ̱ܬ݁ ܂ ܕ݁ܪܳܚܶܡ ܐ̱ܢܳܐ ܠܳܟ݂ . ܐܳܡܰܪ ܠܶܗ . ܪܥܺܝ ܠܺܝ ܐܶܡܪܰܝ̈ ܀ ܐܳܡܰܪ ܠܶܗ ܬ݁ܽܘܒ݂ ܕ݁ܬ݂ܰܪܬ݁ܶܝܢ̈ ܙܰܒ݂ܢܺܝܢ̈ . ܫܶܡܥܽܘܢ ܒ݁ܰܪ ܝܳܘܢܰܐ ܆ ܪܳܚܶܡ ܐܰܢ̱ܬ݁ ܠܺܝ ܆ ܐܳܡܰܪ ܠܶܗ ܐܺܝܢ ܡܳܪܝ . ܐܰܢ̱ܬ݁ ܝܳܕ݂ܰܥ ܐܰܢ̱ܬ݁ ܕ݁ܪܳܚܶܡ ܐ̱ܢܳܐ ܠܳܟ݂ . ܐܳܡܰܪ ܠܶܗ ܝܶܫܽܘܥ . ܪܥܺܝ ܠܺܝ ܥܶܪܒ݁ܰܝ̈ ܀ ܐܳܡܰܪ ܠܶܗ ܕ݁ܰܬ݂ܠܳܬ݂ ܙܰܒ݂ܢܺܝܢ̈ . ܫܶܡܥܽܘܢ ܒ݁ܰܪ ܝܳܘܢܰܐ ܆ ܪܳܚܶܡ ܐܰܢ̱ܬ݁ ܠܺܝ ܆ ܘܟ݂ܶܪܝܰܬ݂ ܠܶܗ ܠܟ݂ܺܐܦ݂ܳܐ ܕ݁ܶܐܡܰܪ ܠܶܗ ܕ݁ܰܬ݂ܠܳܬ݂ ܙܰܒ݂ܢܺܝܢ̈ ܕ݁ܪܳܚܶܡ ܐܰܢ̱ܬ݁ ܠܺܝ . ܘܶܐܡܰܪ ܠܶܗ . ܡܳܪܝ ܆ ܟ݁ܽܠ ܡܶܕ݁ܶܡ ܐܰܢ̱ܬ݁ ܚܳܟ݂ܶܡ ܐܰܢ̱ܬ݁ . ܐܰܢ̱ܬ݁ ܝܳܕ݂ܰܥ ܐܰܢ̱ܬ݁ ܂ ܕ݁ܪܳܚܶܡ ܐ̱ܢܳܐ ܠܳܟ݂ . ܐܳܡܰܪ ܠܶܗ ܝܶܫܽܘܥ . ܪܥܺܝ ܠܺܝ ܢܩܰܘܳܬ݂ܝ̈ ܀ ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܳܟ݂ ܆ ܕ݁ܟ݂ܰܕ݂ ܛܠܶܐ ܗ̱ܘܰܝܬ݁ ܆ ܐܰܢ̱ܬ݁ ܠܢܰܦ݂ܫܳܟ݂ ܐܳܣܰܪ ܗ̱ܘܰܝܬ݁ ܚܰܨܰܝܟ݁̈ ܆ ܘܰܡܗܰܠܶܟ݂ ܗ̱ܘܰܝܬ݁ ܠܰܐܝܟ݁ܳܐ ܕ݁ܨܳܒ݂ܶܐ ܐܰܢ̱ܬ݁ . ܡܳܐ ܕ݁ܶܝܢ ܕ݁ܰܣܶܐܒ݂ܬ݁ ܆ ܬ݁ܶܦ݂ܫܽܘܛ ܐܺܝܕ݂ܰܝܟ݁̈ ܂ ܘܰܐ̱ܚܪܺܝܢ ܢܶܐܣܽܘܪ ܠܳܟ݂ ܚܰܨܰܝܟ݁̈ . ܘܢܰܘܒ݁ܠܳܟ݂ ܂ ܠܰܐܝܟ݁ܳܐ ܕ݁ܠܳܐ ܨܳܒ݂ܶܐ ܐܰܢ̱ܬ݁ . ܗܳܕ݂ܶܐ ܕ݁ܶܝܢ ܐܶܡܰܪ ܂ ܕ݁ܰܢܚܰܘܶܐ ܒ݁ܰܐܝܢܳܐ ܡܰܘܬ݁ܳܐ ܥܬ݂ܺܝܕ݂ ܕ݁ܰܢܫܰܒ݁ܰܚ ܠܰܐܠܳܗܳܐ . ܘܟ݂ܰܕ݂ ܐܶܡܰܪ ܗܳܠܶܝܢ ܂ ܐܶܡܰܪ ܠܶܗ . ܬ݁ܳܐ ܒ݁ܳܬ݂ܰܪܝ ܀ ܘܶܐܬ݂ܦ݁ܢܺܝ ܫܶܡܥܽܘܢ ܟ݁ܺܐܦ݂ܳܐ ܂ ܘܰܚܙܳܐ ܠܬ݂ܰܠܡܺܝܕ݂ܳܐ ܗܰܘ ܕ݁ܪܳܚܶܡ ܗ̱ܘܳܐ ܝܶܫܽܘܥ ܕ݁ܳܐܬ݂ܶܐ ܒ݁ܳܬ݂ܪܶܗ . ܗܰܘ ܕ݁ܰܢܦ݂ܰܠ ܗ̱ܘܳܐ ܒ݁ܰܚܫܳܡܺܝܬ݂ܳܐ ܥܰܠ ܚܰܕ݂ܝܶܗ ܕ݁ܝܶܫܽܘܥ ܂ ܘܶܐܡܰܪ . ܡܳܪܝ ܂ ܡܰܢܽܘ ܡܰܫܠܶܡ ܠܳܟ݂ . ܠܗܳܢܳܐ ܟ݁ܰܕ݂ ܚܙܳܐ ܟ݁ܺܐܦ݂ܳܐ ܂ ܐܶܡܰܪ ܠܝܶܫܽܘܥ . ܡܳܪܝ ܁ ܘܗܳܢܳܐ ܂ ܡܳܢܳܐ . ܐܳܡܰܪ ܠܶܗ ܝܶܫܽܘܥ . ܐܶܢ ܨܳܒ݂ܶܐ ܐ̱ܢܳܐ ܕ݁ܰܢܩܰܘܶܐ ܗܳܢܳܐ ܥܕ݂ܰܡܳܐ ܕ݁ܳܐܬ݂ܶܐ ܐ̱ܢܳܐ ܁ ܠܳܟ݂ ܡܳܐ ܠܳܟ݂ . ܐܰܢ̱ܬ݁ ܬ݁ܳܐ ܒ݁ܳܬ݂ܰܪܝ . ܘܢܶܦ݂ܩܰܬ݂ ܗܳܕ݂ܶܐ ܡܶܠܬ݂ܳܐ ܒ݁ܶܝܬ݂ ܐܰܚܶܐ̈ ܆ ܕ݁ܗܰܘ ܬ݁ܰܠܡܺܝܕ݂ܳܐ ܠܳܐ ܡܳܐܶܬ݂ . ܝܶܫܽܘܥ ܕ݁ܶܝܢ ܂ ܠܳܐ ܗ̱ܘܳܐ ܕ݁ܠܳܐ ܡܳܐܶܬ݂ ܐܶܡܰܪ . ܐܶܠܳܐ ܕ݁ܶܐܢ ܨܳܒ݂ܶܐ ܐ̱ܢܳܐ ܕ݁ܰܢܩܰܘܶܐ ܗܳܢܳܐ ܥܕ݂ܰܡܳܐ ܕ݁ܳܐܬ݂ܶܐ ܐ̱ܢܳܐ ܁ ܠܳܟ݂ ܡܳܐ ܠܳܟ݂ . ܗܳܢܰܘ ܬ݁ܰܠܡܺܝܕ݂ܳܐ ܕ݁ܰܐܣܗܶܕ݂ ܥܰܠ ܗܳܠܶܝܢ ܟ݁ܽܠܗܶܝܢ ܆ ܘܳܐܦ݂ ܟ݁ܬ݂ܰܒ݂ ܐܶܢܶܝܢ̈ . ܘܝܳܕ݂ܥܺܝܢ ܚ̱ܢܰܢ ܕ݁ܫܰܪܺܝܪܳܐ ܗ̱ܝ ܣܳܗܕ݁ܽܘܬ݂ܶܗ ܀ ܐܺܝܬ݂ ܕ݁ܶܝܢ ܐܳܦ݂ ܐ̱ܚܪܳܢܝܳܬ݂ܳܐ̈ ܣܰܓ݁ܺܝܳܐܬ݂ܳܐ̈ ܕ݁ܰܥܒ݂ܰܕ݂ ܝܶܫܽܘܥ . ܐܰܝܠܶܝܢ ܕ݁ܶܐܠܽܘ ܚܕ݂ܳܐ ܚܕ݂ܳܐ ܡܶܬ݂ܟ݁ܰܬ݂ܒ݁ܳܢ̈ ܗ̱ܘܰܝ̈ : ܐܳܦ݂ ܠܳܐ ܗܽܘ ܥܳܠܡܳܐ ܐܰܝܟ݂ ܕ݁ܣܳܒ݂ܰܪ ܐ̱ܢܳܐ ܇ ܣܳܦ݂ܶܩ ܗ̱ܘܳܐ ܠܰܟ݂ܬ݂ܳܒ݂ܶܐ̈ ܕ݁ܡܶܬ݂ܟ݁ܰܬ݂ܒ݁ܺܝܢ ܗ̱ܘܰܘ ܀