Paul the Apostle. “1 Corinthians (Peshitta Version) - ܐܓܪܬܐ ܕܦܘܠܘܣ ܕܠܘܬ ܩܘܪ̈ܝܢܬܝܐ ܩܕܡܝܬܐ.” Based upon G. H. Gwilliam, J. Pinkerton and John Gwynn eds., The New Testament in Syriac [ܕܝܬܝܩܐ ܚܕܬܐ ܕܡܪܢ ܝܫܘܥ ܡܫܝܚܐ] (London: British and Foreign Bible Society, 1905). Digital Syriac Corpus. Last modified May 1, 2018. https://syriaccorpus.org/124.
    
        

            
                ܐܓܪܬܐ ܕܦܘܠܘܣ ܕܠܘܬ ܩܘܪ̈ܝܢܬܝܐ ܩܕܡܝܬܐ
            
            
                Chapter 1
                
                ܦ݁ܰܘܠܳܘܣ ܩܰܪܝܳܐ ܘܰܫܠܺܝܚܳܐ ܕ݁ܝܶܫܽܘܥ ܡܫܺܝܚܳܐ ܁ ܒ݁ܨܶܒ݂ܝܳܢܶܗ
                    ܕ݁ܰܐܠܳܗܳܐ ܂ ܘܣܳܘܣܬ݂ܶܢܺܣ ܐܰܚܳܐ ܆
                ܠܥܺܕ̱݁ܬ݁ܳܐ ܕ݁ܰܐܠܳܗܳܐ ܕ݁ܰܒ݂ܩܳܘܪܺܢܬ݂ܳܘܣ ܇ ܩܪܰܝܳܐ̈ ܘܩܰܕ݁ܺܝܫܶܐ̈
                    ܕ݁ܰܒ݂ܝܶܫܽܘܥ ܡܫܺܝܚܳܐ ܡܩܰܕ݁ܫܺܝܢ . ܘܰܠܟ݂ܽܠܗܽܘܢ ܐܰܝܠܶܝܢ ܕ݁ܩܳܪܶܝܢ ܫܡܶܗ ܕ݁ܡܳܪܰܢ ܝܶܫܽܘܥ
                    ܡܫܺܝܚܳܐ ܒ݁ܟ݂ܽܠ ܐܰܬ݂ܰܪ ܇ ܕ݁ܺܝܠܗܽܘܢ ܘܕ݂ܺܝܠܰܢ .
                ܛܰܝܒ݁ܽܘܬ݂ܳܐ ܥܰܡܟ݂ܽܘܢ ܘܰܫܠܳܡܳܐ ܂ ܡܶܢ ܐܰܠܳܗܳܐ ܐܰܒ݂ܽܘܢ ܆ ܘܡܶܢ
                    ܡܳܪܰܢ ܝܶܫܽܘܥ ܡܫܺܝܚܳܐ ܀
                ܡܰܘܕ݁ܶܐ ܐ̱ܢܳܐ ܠܰܐܠܳܗܝ ܒ݁ܟ݂ܽܠܙܒ݂ܰܢ ܚܠܳܦ݂ܰܝܟ݁ܽܘܢ ܇ ܥܰܠ
                    ܛܰܝܒ݁ܽܘܬ݂ܳܐ ܕ݁ܰܐܠܳܗܳܐ ܕ݁ܶܐܬ݂ܝܰܗܒ݁ܰܬ݂ ܠܟ݂ܽܘܢ ܂ ܒ݁ܝܶܫܽܘܥ ܡܫܺܝܚܳܐ .
                ܕ݁ܰܒ݂ܟ݂ܽܠ ܡܶܕ݁ܶܡ ܥܬ݂ܰܪܬ݁ܽܘܢ ܒ݁ܶܗ ܇ ܒ݁ܟ݂ܽܠ ܡܶܠܳܐ ܂ ܘܰܒ݂ܟ݂ܽܠ
                    ܝܺܕ݂ܰܥܬ݂ܳܐ .
                ܐܰܝܟ݂ ܕ݁ܣܳܗܕ݁ܽܘܬ݂ܶܗ ܕ݁ܰܡܫܺܝܚܳܐ ܐܶܫܬ݁ܰܪܪܰܬ݂ ܒ݁ܟ݂ܽܘܢ .
                ܕ݁ܠܳܐ ܐܶܬ݂ܒ݁ܰܨܰܪܬ݁ܽܘܢ ܒ݁ܰܚܕ݂ܳܐ ܡܶܢ ܡܰܘܗܒ݂ܳܬ݂ܶܗ̈ ܇ ܐܶܠܳܐ
                    ܡܣܰܟ݁ܶܝܢ ܐܢ̱ܬ݁ܽܘܢ ܠܓ݂ܶܠܝܳܢܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ .
                ܕ݁ܗܽܘ ܢܫܰܪܰܪܟ݂ܽܘܢ ܥܕ݂ܰܡܳܐ ܠܰܐ̱ܚܪܳܝܬ݁ܳܐ ܂ ܕ݁ܰܕ݂ܠܳܐ ܪܶܫܝܳܢ
                    ܬ݁ܶܗܘܽܘܢ ܒ݁ܝܰܘܡܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ .
                ܡܗܰܝܡܰܢ ܗ̱ܘ ܐܰܠܳܗܳܐ ܕ݁ܒ݂ܺܐܝܕ݂ܶܗ ܐܶܬ݂ܩܪܺܝܬ݁ܽܘܢ ܠܫܰܘܬ݁ܳܦ݂ܽܘܬ݂ܳܐ
                    ܕ݁ܰܒ݂ܪܶܗ ܝܶܫܽܘܥ ܡܫܺܝܚܳܐ ܡܳܪܰܢ ܀
                ܒ݁ܳܥܶܐ ܐ̱ܢܳܐ ܕ݁ܶܝܢ ܡܶܢܟ݂ܽܘܢ ܐܰܚܰܝ̈ ܇ ܒ݁ܰܫܡܶܗ ܕ݁ܡܳܪܰܢ ܝܶܫܽܘܥ
                    ܡܫܺܝܚܳܐ ܆ ܕ݁ܬ݂ܶܗܘܶܐ ܚܕ݂ܳܐ ܡܶܠܬ݂ܳܐ ܠܟ݂ܽܠܟ݂ܽܘܢ . ܘܠܳܐ ܢܶܗܘܝܳܢ̈ ܒ݁ܟ݂ܽܘܢ
                    ܦ݁ܳܠܰܓ݂ܘܳܬ݂ܳܐ̈ . ܐܶܠܳܐ ܬ݁ܶܗܘܽܘܢ ܓ݁ܡܺܝܪܺܝܢ ܒ݁ܰܚܕ݂ܳܐ ܬ݁ܰܪܥܺܝܬ݂ܳܐ ܘܰܒ݂ܚܰܕ݂ ܪܶܥܝܳܢܳܐ
                    .
                ܫܠܰܚܘ ܠܺܝ ܓ݁ܶܝܪ ܥܠܰܝܟ݁ܽܘܢ ܐܰܚܰܝ̈ ܁ ܡܶܢ ܒ݁ܶܝܬ݂ ܟ݁ܠܳܐܶܐ̈ ܆
                    ܕ݁ܚܶܪܝܳܢܶܐ̈ ܐܺܝܬ݂ ܒ݁ܰܝܢܳܬ݂ܟ݂ܽܘܢ .
                ܗܳܕ݂ܶܐ ܕ݁ܶܝܢ ܐܳܡܰܪ ܐ̱ܢܳܐ ܆ ܕ݁ܺܐܝܬ݂ ܡܶܢܟ݂ܽܘܢ ܕ݁ܳܐܡܰܪ ܂ ܐܶܢܳܐ
                    ܕ݁ܦ݁ܰܘܠܳܘܣ ܐ̱ܢܳܐ ܆ ܘܺܐܝܬ݂ ܕ݁ܳܐܡܰܪ ܂ ܐܶܢܳܐ ܕ݁ܰܐܦ݁ܳܠܳܘ ܐ̱ܢܳܐ ܆ ܘܺܐܝܬ݂ ܕ݁ܳܐܡܰܪ ܂
                    ܐܶܢܳܐ ܕ݁ܟ݂ܺܐܦ݂ܳܐ ܐ̱ܢܳܐ ܆ ܘܺܐܝܬ݂ ܕ݁ܳܐܡܰܪ ܂ ܐܶܢܳܐ ܕ݁ܰܡܫܺܝܚܳܐ ܐ̱ܢܳܐ .
                ܕ݁ܰܠܡܳܐ ܐܶܬ݂ܦ݁ܰܠܰܓ݂ ܠܶܗ ܡܫܺܝܚܳܐ . ܐܰܘ ܠܡܳܐ ܦ݁ܰܘܠܳܘܣ
                    ܐܶܙܕ݁ܩܶܦ݂ ܥܰܠ ܐܰܦ݁ܰܝܟ݁ܽܘܢ̈ . ܐܰܘ ܒ݁ܰܫܡܶܗ ܕ݁ܦ݁ܰܘܠܳܘܣ ܥܡܰܕ݁ܬ݁ܽܘܢ .
                ܡܰܘܕ݁ܶܐ ܐ̱ܢܳܐ ܠܰܐܠܳܗܝ ܂ ܕ݁ܰܠܐ̱ܢܳܫ ܡܶܢܟ݂ܽܘܢ ܠܳܐ ܐܰܥܡܕ݂ܶܬ݂ ܆
                    ܐܶܠܳܐ ܠܰܟ݁ܪܺܝܣܦ݁ܳܘܣ ܘܰܠܓ݂ܰܐܺܝܳܘܣ .
                ܕ݁ܠܳܐ ܐ̱ܢܳܫ ܢܺܐܡܰܪ ܕ݁ܰܒ݂ܫܶܡܝ ܐܰܥܡܕ݂ܶܬ݂ .
                ܐܰܥܡܕ݂ܶܬ݂ ܕ݁ܶܝܢ ܐܳܦ݂ ܠܒ݂ܰܝܬ݁ܶܗ ܕ݁ܶܐܣܛܶܦ݂ܰܢܰܐ . ܬ݁ܽܘܒ݂ ܕ݁ܶܝܢ
                    ܠܳܐ ܝܳܕ݂ܰܥ ܐ̱ܢܳܐ ܂ ܐܶܢ ܠܐ̱ܢܳܫ ܐ̱ܚܪܺܝܢ ܐܰܥܡܕ݂ܶܬ݂ .
                ܠܳܐ ܓ݁ܶܝܪ ܫܰܕ݁ܪܰܢܝ ܡܫܺܝܚܳܐ ܂ ܠܡܰܥܡܳܕ݂ܽܘ ܂ ܐܶܠܳܐ ܠܰܡܣܰܒ݁ܳܪܽܘ
                    ܂ ܠܳܐ ܒ݁ܚܶܟ݂ܡܰܬ݂ ܡܶܠܶܐ̈ ܇ ܕ݁ܠܳܐ ܢܶܣܬ݁ܰܪܰܩ ܙܩܺܝܦ݂ܶܗ ܕ݁ܰܡܫܺܝܚܳܐ ܀
                ܡܶܠܬ݂ܳܐ ܓ݁ܶܝܪ ܕ݁ܰܙܩܺܝܦ݂ܳܐ ܂ ܠܰܐܒ݂ܺܝܕ݂ܶܐ̈ ܫܳܛܝܽܘܬ݂ܳܐ ܗ̱ܝ .
                    ܠܰܢ ܕ݁ܶܝܢ ܁ ܠܰܐܝܠܶܝܢ ܕ݁ܚܰܝܺܝܢܰܢ ܂ ܚܰܝܠܳܐ ܗ̱ܝ ܕ݁ܰܐܠܳܗܳܐ .
                ܟ݁ܬ݂ܺܝܒ݂ ܓ݁ܶܝܪ ܂ ܕ݁ܰܐܘܒ݁ܶܕ݂ ܚܶܟ݂ܡܬ݂ܳܐ ܕ݁ܚܰܟ݁ܺܝܡܶܐ̈ ܆
                    ܘܶܐܓ݂ܠܽܘܙ ܬ݁ܰܪܥܺܝܬ݂ܳܐ ܕ݁ܣܰܟ݁ܽܘܠܬ݂ܳܢܶܐ̈ .
                ܐܰܝܟ݁ܳܐ ܗܽܘ ܚܰܟ݁ܺܝܡܳܐ . ܐܰܘ ܐܰܝܟ݁ܳܐ ܗܽܘ ܣܳܦ݂ܪܳܐ . ܐܰܘ
                    ܐܰܝܟ݁ܳܐ ܗܽܘ ܕ݁ܳܪܽܘܫܳܐ ܕ݁ܥܳܠܡܳܐ ܗܳܢܳܐ . ܠܳܐ ܗܳܐ ܐܰܫܛܝܳܗ ܐܰܠܳܗܳܐ ܚܶܟ݂ܡܬ݂ܶܗ
                    ܕ݁ܥܳܠܡܳܐ ܗܳܢܳܐ .
                ܡܶܛܽܠ ܓ݁ܶܝܪ ܕ݁ܰܒ݂ܚܶܟ݂ܡܬ݂ܶܗ ܕ݁ܰܐܠܳܗܳܐ ܂ ܠܳܐ ܝܺܕ݂ܰܥ ܥܳܠܡܳܐ
                    ܒ݁ܚܶܟ݂ܡܬ݂ܳܐ ܠܰܐܠܳܗܳܐ ܆ ܨܒ݂ܳܐ ܐܰܠܳܗܳܐ ܕ݁ܰܒ݂ܫܳܛܝܽܘܬ݂ܳܐ ܕ݁ܟ݂ܳܪܽܘܙܽܘܬ݂ܳܐ ܢܰܚܶܐ
                    ܠܰܐܝܠܶܝܢ ܕ݁ܰܡܗܰܝܡܢܺܝܢ .
                ܡܶܛܽܠ ܕ݁ܺܝܗܽܘܕ݂ܳܝܶܐ̈ ܐܳܬ݂ܘܳܬ݂ܳܐ̈ ܫܳܐܠܺܝܢ . ܘܰܐܪܡܳܝܶܐ̈
                    ܚܶܟ݂ܡܬ݂ܳܐ ܒ݁ܳܥܶܝܢ .
                ܚܢܰܢ ܕ݁ܶܝܢ ܡܰܟ݂ܪܙܺܝܢܰܢ ܡܫܺܝܚܳܐ ܁ ܟ݁ܰܕ݂ ܙܩܺܝܦ݂ ܆ ܬ݁ܽܘܩܰܠܬ݁ܳܐ
                    ܠܺܝܗܽܘܕ݂ܳܝܶܐ̈ ܁ ܘܠܰܐܪܡܳܝܶܐ̈ ܫܳܛܝܽܘܬ݂ܳܐ ܆
                ܠܗܳܢܽܘܢ ܕ݁ܶܝܢ ܕ݁ܰܩܪܶܝܢ ܂ ܝܺܗܽܘܕ݂ܳܝܶܐ̈ ܘܰܐܪܡܳܝܶܐ̈ ܆ ܡܫܺܝܚܳܐ
                    ܚܰܝܠܳܐ ܕ݁ܰܐܠܳܗܳܐ ܂ ܘܚܶܟ݂ܡܬ݂ܳܐ ܕ݁ܰܐܠܳܗܳܐ .
                ܡܶܛܽܠ ܕ݁ܫܳܛܝܽܘܬ݂ܶܗ ܕ݁ܰܐܠܳܗܳܐ ܚܰܟ݁ܺܝܡܳܐ ܗ̱ܝ ܡܶܢ ܒ݁ܢܰܝܢܳܫܳܐ̈ ܆
                    ܘܰܟ݂ܪܺܝܗܽܘܬ݂ܶܗ ܕ݁ܰܐܠܳܗܳܐ ܚܰܝܠܬ݂ܳܢܝܳܐ ܗ̱ܝ ܡܶܢ ܒ݁ܢܰܝ̈ ܐ̱ܢܳܫܳܐ ܀
                ܚܙܰܘ ܓ݁ܶܝܪ ܐܳܦ݂ ܩܪܳܝܬ݁ܟ݂ܽܘܢ ܐܰܚܰܝ̈ ܇ ܕ݁ܠܳܐ ܣܰܓ݁ܺܝܐܝܺܢ̈
                    ܒ݁ܟ݂ܽܘܢ ܚܰܟ݁ܺܝܡܶܐ̈ ܒ݁ܰܒ݂ܣܰܪ . ܘܠܳܐ ܣܰܓ݁ܺܝܐܝܺܢ̈ ܒ݁ܟ݂ܽܘܢ ܚܰܝܠܬ݂ܳܢܶܐ̈ . ܘܠܳܐ
                    ܣܰܓ݁ܺܝܐܝܺܢ̈ ܒ݁ܟ݂ܽܘܢ ܒ݁ܢܰܝ̈ ܛܽܘܗܡܳܐ ܪܰܒ݁ܳܐ .
                ܐܶܠܳܐ ܓ݁ܒ݂ܳܐ ܐܰܠܳܗܳܐ ܠܣܰܟ݂ܠܰܘܗ̱ܝ̈ ܕ݁ܥܳܠܡܳܐ ܕ݁ܢܰܒ݂ܗܶܬ݂
                    ܠܚܰܟ݁ܺܝܡܶܐ̈ . ܘܰܓ݂ܒ݂ܳܐ ܟ݁ܪܺܝܗܰܘܗ̱ܝ̈ ܕ݁ܥܳܠܡܳܐ ܕ݁ܢܰܒ݂ܗܶܬ݂ ܠܚܰܝܠܬ݂ܳܢܶܐ̈ .
                ܘܰܓ݂ܒ݂ܳܐ ܠܰܐܝܠܶܝܢ ܕ݁ܰܒ݂ܨܺܝܪ ܛܽܘܗܡܗܽܘܢ ܒ݁ܥܳܠܡܳܐ ܇
                    ܘܰܠܡܰܣܠܰܝܳܐ̈ ܂ ܘܠܰܐܝܠܶܝܢ ܕ݁ܠܰܝܬ݁ ܐܶܢܽܘܢ ܇ ܕ݁ܰܢܒ݂ܰܛܶܠ ܠܰܐܝܠܶܝܢ ܕ݁ܺܐܝܬ݂ܰܝܗܽܘܢ
                    .
                ܕ݁ܠܳܐ ܢܶܫܬ݁ܰܒ݂ܗܰܪ ܟ݁ܽܠ ܒ݁ܣܰܪ ܩܕ݂ܳܡܰܘܗ̱ܝ .
                ܐܳܦ݂ ܐܰܢ̱ܬ݁ܽܘܢ ܕ݁ܶܝܢ ܡܶܢܶܗ ܐܰܢ̱ܬ݁ܽܘܢ ܒ݁ܝܶܫܽܘܥ ܡܫܺܝܚܳܐ ܆ ܗܰܘ
                    ܕ݁ܰܗܘܳܐ ܠܰܢ ܚܶܟ݂ܡܬ݂ܳܐ ܡܶܢ ܐܰܠܳܗܳܐ ܇ ܘܙܰܕ݁ܺܝܩܽܘܬ݂ܳܐ ܘܩܰܕ݁ܺܝܫܽܘܬ݂ܳܐ ܘܦ݂ܽܘܪܩܳܢܳܐ
                    .
                ܐܰܝܟ݂ ܕ݁ܰܟ݂ܬ݂ܺܝܒ݂ . ܕ݁ܡܰܢ ܕ݁ܡܶܫܬ݁ܰܒ݂ܗܰܪ ܁ ܒ݁ܡܳܪܝܳܐ
                    ܢܶܫܬ݁ܰܒ݂ܗܰܪ ܀
            
            
                Chapter 2
                ܘܶܐܢܳܐ ܐܰܚܰܝ̈ ܁ ܟ݁ܰܕ݂ ܐܶܬ݂ܺܝܬ݂ ܠܘܳܬ݂ܟ݂ܽܘܢ ܆ ܠܳܐ ܒ݁ܡܰܡܠ̱ܠܳܐ
                    ܪܰܘܪܒ݂ܳܐ ܁ ܐܳܦ݂ܠܳܐ ܒ݁ܚܶܟ݂ܡܬ݂ܳܐ ܂ ܣܰܒ݁ܰܪܬ݁ܟ݂ܽܘܢ ܐ̱ܪܳܙܶܗ ܕ݁ܰܐܠܳܗܳܐ ܀
                ܘܠܳܐ ܕ݁ܳܢܶܬ݂ ܢܰܦ݂ܫܝ ܒ݁ܰܝܢܳܬ݂ܟ݂ܽܘܢ ܂ ܐܰܝܟ݂ ܕ݁ܡܶܕ݁ܶܡ ܝܳܕ݂ܰܥ
                    ܐ̱ܢܳܐ ܆ ܐܶܠܳܐ ܐܶܢ ܠܝܶܫܽܘܥ ܡܫܺܝܚܳܐ . ܐܳܦ݂ ܠܶܗ ܟ݁ܰܕ݂ ܙܩܺܝܦ݂ .
                ܘܶܐܢܳܐ ܒ݁ܕ݂ܶܚܠܬ݂ܳܐ ܣܰܓ݁ܺܝܐܬ݂ܳܐ ܂ ܘܒ݂ܰܪܬ݂ܺܝܬ݂ܳܐ ܗܘܺܝܬ݂
                    ܠܘܳܬ݂ܟ݂ܽܘܢ .
                ܘܡܶܠܰܬ݂ܝ ܘܟ݂ܳܪܽܘܙܽܘܬ݂ܝ ܇ ܠܳܐ ܗܘܳܬ݂ ܒ݁ܰܡܦ݁ܺܝܣܳܢܽܘܬ݂ܳܐ ܕ݁ܡܶܠܶܐ̈
                    ܕ݁ܚܶܟ݂ܡܬ݂ܳܐ ܆ ܐܶܠܳܐ ܒ݁ܬ݂ܰܚܘܺܝܬ݂ܳܐ ܕ݁ܪܽܘܚܳܐ ܂ ܘܰܕ݂ܚܰܝܠܳܐ ܆
                ܕ݁ܠܳܐ ܬ݁ܶܗܘܶܐ ܗܰܝܡܳܢܽܘܬ݂ܟ݂ܽܘܢ ܒ݁ܚܶܟ݂ܡܬ݂ܳܐ ܕ݁ܰܒ݂ܢܰܝܢܳܫܳܐ̈ ܇
                    ܐܶܠܳܐ ܒ݁ܚܰܝܠܳܐ ܕ݁ܰܐܠܳܗܳܐ ܀
                ܚܶܟ݂ܡܬ݂ܳܐ ܕ݁ܶܝܢ ܡܡܰܠܠܺܝܢܰܢ ܒ݁ܰܓ݂ܡܺܝܪܶܐ̈ . ܚܶܟ݂ܡܬ݂ܳܐ ܠܳܐ
                    ܕ݁ܗܳܢܳܐ ܥܳܠܡܳܐ . ܐܳܦ݂ܠܳܐ ܕ݁ܫܰܠܺܝܛܳܢܰܘܗ̱ܝ̈ ܕ݁ܥܳܠܡܳܐ ܗܳܢܳܐ ܕ݁ܡܶܬ݂ܒ݁ܰܛܠܺܝܢ .
                ܐܶܠܳܐ ܡܡܰܠܠܺܝܢܰܢ ܚܶܟ݂ܡܬ݂ܳܐ ܕ݁ܰܐܠܳܗܳܐ ܒ݁ܐ̱ܪܳܙ . ܗܳܝ
                    ܕ݁ܰܡܟ݂ܰܣܝܳܐ ܗ̱ܘܳܬ݂ ܆ ܘܩܰܕ݁ܶܡ ܗ̱ܘܳܐ ܦ݁ܰܪܫܳܗ ܐܰܠܳܗܳܐ ܡܶܢ ܩܕ݂ܳܡ ܥܳܠܡܶܐ̈ ܂ ܠܫܽܘܒ݂ܚܳܐ
                    ܕ݁ܺܝܠܰܢ .
                ܗܳܝ ܕ݁ܚܰܕ݂ ܡܶܢ ܫܰܠܺܝܛܳܢܶܐ̈ ܕ݁ܥܳܠܡܳܐ ܗܳܢܳܐ ܠܳܐ ܝܰܕ݂ܥܳܗ . ܐܶܠܽܘ
                    ܓ݁ܶܝܪ ܝܰܕ݂ܥܽܘܗ ܆ ܠܰܘ ܠܡܳܪܳܗ ܕ݁ܬ݂ܶܫܒ݁ܽܘܚܬ݁ܳܐ ܙܳܩܦ݁ܺܝܢ ܗ̱ܘܰܘ .
                ܐܶܠܳܐ ܐܰܝܟ݂ ܕ݁ܰܟ݂ܬ݂ܺܝܒ݂ . ܕ݁ܥܰܝܢܳܐ ܠܳܐ ܚܙܳܬ݂ : ܘܶܐܕ݂ܢܳܐ ܠܳܐ
                    ܫܶܡܥܰܬ݂ : ܘܥܰܠ ܠܶܒ݁ܳܐ ܕ݁ܒ݂ܰܪܢܳܫܳܐ ܠܳܐ ܣܠܶܩ ܆ ܡܶܕ݁ܶܡ ܕ݁ܛܰܝܶܒ݂ ܐܰܠܳܗܳܐ ܠܰܐܝܠܶܝܢ
                    ܕ݁ܪܳܚܡܺܝܢ ܠܶܗ ܀
                ܠܰܢ ܕ݁ܶܝܢ ܓ݁ܰܠܳܐ ܐܰܠܳܗܳܐ ܒ݁ܪܽܘܚܶܗ . ܪܽܘܚܳܐ ܓ݁ܶܝܪ ܟ݁ܽܠܡܶܕ݁ܶܡ
                    ܒ݁ܳܨܝܳܐ ܆ ܐܳܦ݂ ܥܽܘܡܩܰܘܗ̱ܝ̈ ܕ݁ܰܐܠܳܗܳܐ .
                ܐܰܝܢܳܐ ܗܽܘ ܓ݁ܶܝܪ ܒ݁ܰܪܢܳܫܳܐ ܕ݁ܝܳܕ݂ܰܥ ܕ݁ܰܒ݂ܒ݂ܰܪܢܳܫܳܐ ܇ ܐܶܠܳܐ
                    ܐܶܢ ܪܽܘܚܳܐ ܕ݁ܒ݂ܰܪ ܐ̱ܢܳܫܳܐ ܕ݁ܒ݂ܶܗ . ܗܳܟ݂ܰܢܳܐ ܐܳܦ݂ ܕ݁ܒ݂ܰܐܠܳܗܳܐ ܐ̱ܢܳܫ ܠܳܐ ܝܳܕ݂ܰܥ ܇
                    ܐܶܠܳܐ ܐܶܢ ܪܽܘܚܶܗ ܕ݁ܰܐܠܳܗܳܐ .
                ܚܢܰܢ ܕ݁ܶܝܢ ܠܳܐ ܗ̱ܘܳܐ ܪܽܘܚܳܐ ܕ݁ܥܳܠܡܳܐ ܢܣܰܒ݂ܢ ܆ ܐܶܠܳܐ ܪܽܘܚܳܐ
                    ܕ݁ܡܶܢ ܐܰܠܳܗܳܐ ܇ ܕ݁ܢܶܕ݁ܰܥ ܡܰܘܗܒ݂ܳܬ݂ܳܐ̈ ܕ݁ܡܶܢ ܐܰܠܳܗܳܐ ܐܶܬ݂ܺܝܗܶܒ݂ ܠܰܢ ܀.܀.܀܀
                
                ܐܰܝܠܶܝܢ ܕ݁ܳܐܦ݂ ܡܡܰܠܠܺܝܢܰܢ ܆ ܠܳܐ ܗ̱ܘܳܐ ܒ݁ܝܽܘܠܦ݁ܳܢܳܐ ܕ݁ܡܶܠܶܐ̈
                    ܕ݁ܚܶܟ݂ܡܬ݂ܳܐ ܕ݁ܰܒ݂ܢܰܝܢܳܫܳܐ̈ ܇ ܐܶܠܳܐ ܒ݁ܝܽܘܠܦ݁ܳܢܳܐ ܕ݁ܪܽܘܚܳܐ . ܘܰܠܪܽܘܚܳܢܶܐ̈
                    ܪܽܘܚܳܢܝܳܬ݂ܳܐ̈ ܡܦ݂ܰܚܡܺܝܢܰܢ .
                ܒ݁ܰܪܢܳܫܳܐ ܓ݁ܶܝܪ ܕ݁ܒ݂ܰܢܦ݂ܶܫ ܗ̱ܽܘ ܆ ܠܳܐ ܡܩܰܒ݁ܶܠ ܪܽܘܚܳܢܝܳܬ݂ܳܐ̈
                    . ܫܳܛܝܽܘܬ݂ܳܐ ܐܶܢܶܝܢ̈ ܓ݁ܶܝܪ ܠܶܗ . ܘܠܳܐ ܡܶܫܟ݁ܰܚ ܕ݁ܢܶܕ݁ܰܥ ܕ݁ܰܒ݂ܪܽܘܚ ܡܶܬ݁ܕ݂ܺܝܢ
                    .
                ܪܽܘܚܳܢܳܐ ܕ݁ܶܝܢ ܟ݁ܽܠ ܡܶܕ݁ܶܡ ܕ݁ܳܐܶܢ ܆ ܘܗܽܘ ܡܶܢ ܐ̱ܢܳܫ ܠܳܐ
                    ܡܶܬ݁ܕ݂ܺܝܢ .
                ܡܰܢܽܘ ܓ݁ܶܝܪ ܝܺܕ݂ܰܥ ܪܶܥܝܳܢܶܗ ܕ݁ܡܳܪܝܳܐ ܕ݁ܢܰܠܦ݂ܺܝܘܗ̱ܝ . ܠܰܢ
                    ܕ݁ܶܝܢ ܪܶܥܝܳܢܳܐ ܕ݁ܰܡܫܺܝܚܳܐ ܐܺܝܬ݂ ܠܰܢ ܀
            
            
                Chapter 3
                ܘܶܐܢܳܐ ܐܰܚܰܝ̈ ܁ ܠܳܐ ܐܶܫܟ݁ܚܶܬ݂ ܕ݁ܶܐܡܰܠܶܠ ܥܰܡܟ݂ܽܘܢ ܐܰܝܟ݂ ܕ݁ܥܰܡ
                    ܪܽܘܚܳܢܶܐ̈ ܆ ܐܶܠܳܐ ܐܰܝܟ݂ ܕ݁ܥܰܡ ܦ݁ܰܓ݂ܪܳܢܶܐ̈ ܇ ܘܰܐܝܟ݂ ܕ݁ܰܠܝܰܠܽܘܕ݂ܶܐ̈ ܒ݁ܰܡܫܺܝܚܳܐ
                    .
                ܚܰܠܒ݂ܳܐ ܐܰܫܩܺܝܬ݂ܟ݂ܽܘܢ ܆ ܘܠܳܐ ܝܶܗܒ݁ܶܬ݂ ܠܟ݂ܽܘܢ ܡܶܐܟ݂ܽܘܠܬ݁ܳܐ .
                    ܠܳܐ ܓ݁ܶܝܪ ܥܕ݂ܰܟ݁ܺܝܠ ܡܶܫܟ݁ܚܺܝܢ ܗ̱ܘܰܝܬ݁ܽܘܢ ܆ ܐܶܠܳܐ ܐܳܦ݂ܠܳܐ ܗܳܫܳܐ ܡܶܫܟ݁ܚܺܝܢ
                    ܐܢ̱ܬ݁ܽܘܢ .
                ܥܕ݂ܰܟ݁ܺܝܠ ܓ݁ܶܝܪ ܒ݁ܰܒ݂ܣܰܪ ܐܰܢ̱ܬ݁ܽܘܢ . ܐܰܝܟ݁ܳܐ ܓ݁ܶܝܪ ܕ݁ܺܐܝܬ݂
                    ܒ݁ܟ݂ܽܘܢ ܚܣܳܡܳܐ ܘܚܶܪܝܳܢܳܐ ܘܦ݂ܳܠܰܓ݂ܘܳܬ݂ܳܐ̈ ܇ ܠܳܐ ܗܳܐ ܦ݁ܰܓ݂ܪܳܢܶܐ̈ ܐܢ̱ܬ݁ܽܘܢ ܂
                    ܘܒ݂ܰܒ݂ܣܰܪ ܡܗܰܠܟ݂ܺܝܢ ܐܢ̱ܬ݁ܽܘܢ ܆
                ܡܳܐ ܕ݁ܳܐܡܰܪ ܓ݁ܶܝܪ ܐ̱ܢܳܫ ܐ̱ܢܳܫ ܡܶܢܟ݂ܽܘܢ ܇ ܐܶܢܳܐ ܕ݁ܦ݁ܰܘܠܳܘܣ
                    ܐ̱ܢܳܐ ܇ ܘܰܐ̱ܚܪܺܢܳܐ ܐܳܡܰܪ ܐ̱ܢܳܐ ܕ݁ܰܐܦ݁ܳܠܳܘ ܐ̱ܢܳܐ ܇ ܠܳܐ ܗܳܐ ܦ݁ܰܓ݂ܪܳܢܶܐ̈ ܐܢ̱ܬ݁ܽܘܢ
                    ܆
                ܡܰܢܽܘ ܓ݁ܶܝܪ ܦ݁ܰܘܠܳܘܣ ܂ ܐܰܘ ܡܰܢܽܘ ܐܰܦ݁ܳܠܳܘ ܆ ܐܶܠܳܐ ܡܫܰܡܫܳܢܶܐ̈
                    ܕ݁ܒ݂ܺܐܝܕ݂ܰܝܗܽܘܢ̈ ܗܰܝܡܶܢܬ݁ܽܘܢ . ܘܐ̱ܢܳܫ ܐ̱ܢܳܫ ܐܰܝܟ݂ ܕ݁ܝܰܗ̱ܒ݂ ܠܶܗ ܡܳܪܝܳܐ .
                ܐܶܢܳܐ ܢܶܨܒ݁ܶܬ݂ ܂ ܘܰܐܦ݁ܳܠܳܘ ܐܰܫܩܺܝ ܆ ܐܶܠܳܐ ܐܰܠܳܗܳܐ ܪܰܒ݁ܺܝ
                    .
                ܠܳܐ ܗܳܟ݂ܺܝܠ ܗܰܘ ܕ݁ܢܳܨܶܒ݂ ܐܺܝܬ݂ܰܘܗ̱ܝ ܡܶܕ݁ܶܡ ܂ ܘܠܳܐ ܗܰܘ
                    ܕ݁ܡܰܫܩܶܐ ܆ ܐܶܠܳܐ ܐܰܠܳܗܳܐ ܕ݁ܰܡܪܰܒ݁ܶܐ .
                ܡܰܢ ܕ݁ܢܳܨܶܒ݂ ܕ݁ܶܝܢ ܂ ܘܡܰܢ ܕ݁ܡܰܫܩܶܐ ܂ ܚܰܕ݂ ܐܶܢܽܘܢ . ܘܐ̱ܢܳܫ
                    ܐܰܝܟ݂ ܥܰܡܠܶܗ ܐܰܓ݂ܪܶܗ ܡܩܰܒ݁ܶܠ .
                ܥܰܡ ܐܰܠܳܗܳܐ ܓ݁ܶܝܪ ܦ݁ܳܠܚܺܝܢܰܢ . ܘܦ݂ܽܘܠܚܳܢܳܐ ܕ݁ܰܐܠܳܗܳܐ ܂
                    ܘܒ݂ܶܢܝܳܢܳܐ ܕ݁ܰܐܠܳܗܳܐ ܂ ܐܰܢ̱ܬ݁ܽܘܢ ܐܶܢܽܘܢ .
                ܘܰܐܝܟ݂ ܛܰܝܒ݁ܽܘܬ݂ܳܐ ܕ݁ܰܐܠܳܗܳܐ ܕ݁ܶܐܬ݂ܝܰܗܒ݁ܰܬ݂ ܠܺܝ ܆ ܣܳܡܶܬ݂
                    ܫܶܬ݂ܶܐܣܬ݁ܳܐ ܐܰܝܟ݂ ܐܰܪܕ݁ܺܟ݂ܠܳܐ ܚܰܟ݁ܺܝܡܳܐ . ܐ̱ܚܪܺܢܳܐ ܕ݁ܶܝܢ ܥܠܶܝܗ ܒ݁ܳܢܶܐ . ܟ݁ܽܠܢܳܫ
                    ܕ݁ܶܝܢ ܢܶܚܙܶܐ ܐܰܝܟ݁ܰܢ ܒ݁ܳܢܶܐ ܥܠܶܝܗ .
                ܫܶܬ݂ܶܐܣܬ݁ܳܐ ܓ݁ܶܝܪ ܐ̱ܚܪܺܬ݂ܳܐ ܂ ܣܛܰܪ ܡܶܢ ܗܳܕ݂ܶܐ ܕ݁ܣܺܝܡܳܐ ܆
                    ܐ̱ܢܳܫ ܠܳܐ ܡܶܫܟ݁ܰܚ ܠܰܡܣܳܡ . ܕ݁ܺܐܝܬ݂ܶܝܗ ܝܶܫܽܘܥ ܡܫܺܝܚܳܐ .
                ܘܶܐܢ ܐ̱ܢܳܫ ܕ݁ܶܝܢ ܒ݁ܳܢܶܐ ܥܰܠ ܗܳܕ݂ܶܐ ܫܶܬ݂ܶܐܣܬ݁ܳܐ ܇ ܕ݁ܰܗܒ݂ܳܐ
                    ܐܰܘ ܣܺܐܡܳܐ ܁ ܐܰܘ ܟ݁ܺܐܦ݂ܶܐ̈ ܝܰܩܺܝܪܳܬ݂ܳܐ̈ ܇ ܐܰܘ ܩܰܝܣܶܐ̈ ܐܰܘ ܥܡܺܝܪܳܐ ܁ ܐܰܘ ܚܰܒ݁ܬ݂ܳܐ
                    ܆
                ܥܒ݂ܳܕ݂ܳܐ ܕ݁ܟ݂ܽܠܢܳܫ ܡܶܬ݂ܓ݁ܠܶܐ . ܝܰܘܡܳܐ ܓ݁ܶܝܪ ܗܰܘ ܓ݁ܳܠܶܐ ܠܶܗ .
                    ܡܶܛܽܠ ܕ݁ܰܒ݂ܢܽܘܪܳܐ ܡܶܬ݂ܓ݁ܠܶܐ . ܘܰܥܒ݂ܳܕ݂ܶܗ ܕ݁ܟ݂ܽܠܢܳܫ ܐܰܝܟ݁ܰܢܳܐ ܐܺܝܬ݂ܰܘܗ̱ܝ ܆ ܢܽܘܪܳܐ
                    ܬ݁ܶܦ݂ܪܫܺܝܘܗ̱ܝ .
                ܘܰܐܝܢܳܐ ܕ݁ܰܢܩܰܘܶܐ ܥܒ݂ܳܕ݂ܶܗ ܆ ܗܰܘ ܕ݁ܒ݂ܳܢܶܐ ܐܰܓ݂ܪܶܗ ܢܩܰܒ݁ܶܠ
                    .
                ܘܰܐܝܢܳܐ ܕ݁ܰܥܒ݂ܳܕ݂ܶܗ ܢܺܐܩܰܕ݂ ܂ ܢܶܚܣܰܪ . ܗܽܘ ܕ݁ܶܝܢ ܢܶܫܬ݁ܰܘܙܰܒ݂
                    ܆ ܗܳܟ݂ܰܢܳܐ ܕ݁ܶܝܢ ܐܰܝܟ݂ ܕ݁ܡܶܢ ܢܽܘܪܳܐ ܀
                ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܗܰܝܟ݁ܠܶܗ ܐܰܢ̱ܬ݁ܽܘܢ ܕ݁ܰܐܠܳܗܳܐ ܇
                    ܘܪܽܘܚܶܗ ܕ݁ܰܐܠܳܗܳܐ ܥܳܡܪܳܐ ܒ݁ܟ݂ܽܘܢ .
                ܘܡܰܢ ܕ݁ܰܡܚܰܒ݁ܶܠ ܗܰܝܟ݁ܠܶܗ ܕ݁ܰܐܠܳܗܳܐ ܆ ܡܚܰܒ݁ܶܠ ܠܶܗ ܐܰܠܳܗܳܐ .
                    ܗܰܝܟ݁ܠܶܗ ܓ݁ܶܝܪ ܕ݁ܰܐܠܳܗܳܐ ܩܰܕ݁ܺܝܫ ܗ̱ܽܘ ܕ݁ܰܐܢ̱ܬ݁ܽܘܢ ܐܶܢܽܘܢ .
                ܐ̱ܢܳܫ ܠܳܐ ܢܰܛܥܶܐ ܢܰܦ݂ܫܶܗ . ܡܰܢ ܕ݁ܣܳܒ݂ܰܪ ܒ݁ܟ݂ܽܘܢ ܕ݁ܚܰܟ݁ܺܝܡ
                    ܗ̱ܽܘ ܒ݁ܥܳܠܡܳܐ ܗܳܢܳܐ ܆ ܢܶܗܘܶܐ ܠܶܗ ܣܰܟ݂ܠܳܐ ܂ ܕ݁ܢܶܗܘܶܐ ܚܰܟ݁ܺܝܡܳܐ .
                ܚܶܟ݂ܡܬ݂ܶܗ ܓ݁ܶܝܪ ܕ݁ܥܳܠܡܳܐ ܗܳܢܳܐ ܠܶܠܽܘܬ݂ܳܐ ܗ̱ܝ ܠܘܳܬ݂ ܐܰܠܳܗܳܐ .
                    ܟ݁ܬ݂ܺܝܒ݂ ܗ̱ܽܘ ܓ݁ܶܝܪ ܆ ܕ݁ܳܐܚܶܕ݂ ܚܰܟ݁ܺܝܡܶܐ̈ ܒ݁ܚܳܪܥܽܘܬ݂ܗܽܘܢ .
                ܘܬ݂ܽܘܒ݂ ܆ ܡܳܪܝܳܐ ܝܳܕ݂ܰܥ ܡܰܚܫܒ݂ܳܬ݂ܗܽܘܢ̈ ܕ݁ܚܰܟ݁ܺܝܡܶܐ̈ ܂
                    ܕ݁ܰܣܪܺܝܩܳܢ̈ ܐܶܢܶܝܢ̈ .
                ܡܶܛܽܠ ܗܳܢܳܐ ܠܳܐ ܐ̱ܢܳܫ ܢܶܫܬ݁ܰܒ݂ܗܰܪ ܒ݁ܰܒ݂ܢܰܝܢܳܫܳܐ̈ .
                    ܟ݁ܽܠܡܶܕ݁ܶܡ ܓ݁ܶܝܪ ܕ݁ܺܝܠܟ݂ܽܘܢ ܗ̱ܽܘ .
                ܐܶܢ ܦ݁ܰܘܠܳܘܣ ܂ ܘܶܐܢ ܐܰܦ݁ܳܠܳܘ ܇ ܘܶܐܢ ܟ݁ܺܐܦ݂ܳܐ ܇ ܘܶܐܢ ܥܳܠܡܳܐ ܇
                    ܘܶܐܢ ܚܰܝܶܐ̈ ܂ ܘܶܐܢ ܡܰܘܬ݁ܳܐ ܇ ܘܶܐܢ ܕ݁ܩܳܝܡܳܢ̈ ܂ ܘܶܐܢ ܕ݁ܰܥܬ݂ܺܝܕ݂ܳܢ̈ ܆ ܟ݁ܽܠ ܡܶܕ݁ܶܡ
                    ܕ݁ܺܝܠܟ݂ܽܘܢ ܗ̱ܽܘ .
                ܘܰܐܢ̱ܬ݁ܽܘܢ ܕ݁ܰܡܫܺܝܚܳܐ . ܘܰܡܫܺܝܚܳܐ ܕ݁ܰܐܠܳܗܳܐ ܀
            
            
                Chapter 4
                ܗܳܟ݂ܰܢܳܐ ܗܘܰܝܢ ܚܫܺܝܒ݂ܺܝܢ ܠܟ݂ܽܘܢ ܆ ܐܰܝܟ݂ ܡܫܰܡܫܳܢܶܐ̈ ܕ݁ܰܡܫܺܝܚܳܐ
                    ܇ ܘܪܰܒ݁ܰܝ̈ ܒ݁ܳܬ݁ܶܐ̈ ܕ݁ܐ̱ܪܳܙܰܘܗ̱ܝ̈ ܕ݁ܰܐܠܳܗܳܐ .
                ܗܳܪܟ݁ܳܐ ܡܶܟ݁ܺܝܠ ܡܶܬ݂ܒ݁ܥܶܐ ܒ݁ܪܰܒ݁ܰܝ̈ ܒ݁ܳܬ݁ܶܐ̈ ܆ ܕ݁ܐ̱ܢܳܫ ܟ݁ܰܕ݂
                    ܡܗܰܝܡܰܢ ܢܶܫܬ݁ܟ݂ܰܚ .
                ܠܺܝ ܕ݁ܶܝܢ ܗܳܕ݂ܶܐ ܒ݁ܨܺܝܪܽܘܬ݂ܳܐ ܗ̱ܝ ܠܺܝ ܕ݁ܡܶܢܟ݂ܽܘܢ ܐܶܬ݁ܕ݂ܺܝܢ ܆
                    ܐܰܘ ܡܶܢ ܟ݁ܽܠ ܒ݁ܰܪ ܐ̱ܢܳܫ . ܐܶܠܳܐ ܐܳܦ݂ܠܳܐ ܐܶܢܳܐ ܢܰܦ݂ܫܝ ܕ݁ܳܐܶܢ ܐ̱ܢܳܐ .
                ܠܳܐ ܓ݁ܶܝܪ ܡܶܕ݁ܶܡ ܒ݁ܢܰܦ݂ܫܝ ܚܫܺܝܫ ܐ̱ܢܳܐ . ܐܶܠܳܐ ܠܰܘ ܒ݁ܗܳܕ݂ܶܐ
                    ܐܶܙܕ݁ܰܕ݁ܩܶܬ݂ . ܕ݁ܰܝܳܢܝ ܓ݁ܶܝܪ ܡܳܪܝܳܐ ܗܽܘ .
                ܡܶܛܽܠ ܗܳܢܳܐ ܠܳܐ ܡܶܢ ܩܕ݂ܳܡ ܙܰܒ݂ܢܳܐ ܬ݁ܶܗܘܽܘܢ ܕ݁ܳܝܢܺܝܢ ܇ ܥܕ݂ܰܡܳܐ
                    ܕ݁ܢܺܐܬ݂ܶܐ ܡܳܪܝܳܐ ܆ ܗܰܘ ܕ݁ܡܰܢܗܰܪ ܟ݁ܰܣܝܳܬ݂ܶܗ̈ ܕ݁ܚܶܫܽܘܟ݂ܳܐ ܇ ܘܓ݂ܳܠܶܐ ܡܰܚܫܒ݂ܳܬ݂ܗܽܘܢ̈
                    ܕ݁ܠܶܒ݁ܰܘܳܬ݂ܳܐ̈ . ܘܗܳܝܕ݁ܶܝܢ ܢܶܗܘܶܐ ܫܽܘܒ݂ܚܳܐ ܠܐ̱ܢܳܫ ܐ̱ܢܳܫ ܂ ܡܶܢ ܐܰܠܳܗܳܐ ܀
                ܗܳܠܶܝܢ ܕ݁ܶܝܢ ܐܰܚܰܝ̈ ܆ ܡܶܛܽܠܳܬ݂ܟ݂ܽܘܢ ܗ̱ܽܘ ܣܳܡܶܬ݂ ܥܰܠ
                    ܦ݁ܰܪܨܽܘܦ݁ܳܐ ܕ݁ܺܝܠܝ ܂ ܘܕ݂ܰܐܦ݁ܳܠܳܘ ܂ ܕ݁ܒ݂ܰܢ ܬ݁ܺܐܠܦ݁ܽܘܢ ܆ ܕ݁ܠܳܐ ܬ݁ܶܬ݂ܪܰܥܽܘܢ ܝܰܬ݁ܺܝܪ
                    ܡܶܢ ܡܳܐ ܕ݁ܰܟ݂ܬ݂ܺܝܒ݂ ܇ ܘܐ̱ܢܳܫ ܥܰܠ ܚܰܒ݂ܪܶܗ ܠܳܐ ܢܶܬ݁ܪܺܝܡ ܡܶܛܽܠ ܐ̱ܢܳܫ .
                ܡܰܢܽܘ ܓ݁ܶܝܪ ܒ݁ܨܳܟ݂ . ܐܰܘ ܡܳܢܳܐ ܐܺܝܬ݂ ܠܳܟ݂ ܕ݁ܠܳܐ ܢܣܰܒ݂ܬ݁ .
                    ܘܶܐܢ ܢܣܰܒ݂ܬ݁ ܆ ܠܡܳܢܳܐ ܡܶܫܬ݁ܰܒ݂ܗܰܪ ܐܰܢ̱ܬ݁ ܐܰܝܟ݂ ܗܰܘ ܕ݁ܠܳܐ ܢܣܰܒ݂ܬ݁ .
                ܡܶܢ ܟ݁ܰܕ݁ܽܘ ܣܒ݂ܰܥܬ݁ܽܘܢ ܠܟ݂ܽܘܢ ܘܰܥܬ݂ܰܪܬ݁ܽܘܢ ܆ ܘܒ݂ܶܠܥܳܕ݂ܰܝܢ
                    ܐܰܡܠܶܟ݂ܬ݁ܽܘܢ ܆ ܐܶܫܬ݁ܽܘܦ݂ ܕ݁ܶܝܢ ܐܰܡܠܶܟ݂ܬ݁ܽܘܢ ܆ ܕ݁ܳܐܦ݂ ܚܢܰܢ ܢܰܡܠܶܟ݂ ܥܰܡܟ݂ܽܘܢ
                    .
                ܣܳܒ݂ܰܪ ܐ̱ܢܳܐ ܓ݁ܶܝܪ ܕ݁ܠܰܢ ܠܰܫܠܺܝܚܶܐ̈ ܆ ܐ̱ܚܪܳܝܶܐ̈ ܗ̱ܘ ܣܳܡܰܢ
                    ܐܰܠܳܗܳܐ ܐܰܝܟ݂ ܕ݁ܰܠܡܰܘܬ݁ܳܐ . ܕ݁ܰܗܘܰܝܢ ܬ݁ܶܐܰܛܪܳܘܢ ܠܥܳܠܡܳܐ ܇ ܘܰܠܡܰܠܰܐܟ݂ܶܐ̈ ܂
                    ܘܠܰܒ݂ܢܰܝܢܳܫܳܐ̈ .
                ܚܢܰܢ ܫܳܛܰܝܳܐ̈ ܡܶܛܽܠ ܡܫܺܝܚܳܐ . ܐܰܢ̱ܬ݁ܽܘܢ ܕ݁ܶܝܢ ܚܰܟ݁ܺܝܡܶܐ̈
                    ܒ݁ܰܡܫܺܝܚܳܐ . ܚܢܰܢ ܟ݁ܪܺܝܗܶܐ̈ . ܘܰܐܢ̱ܬ݁ܽܘܢ ܚܰܝܠܬ݂ܳܢܶܐ̈ . ܐܰܢ̱ܬ݁ܽܘܢ ܡܶܫܬ݁ܰܒ݁ܚܺܝܢ .
                    ܘܰܚܢܰܢ ܡܶܨܛܰܥܪܺܝܢ .
                ܥܕ݂ܰܡܳܐ ܠܗܳܕ݂ܶܐ ܫܳܥܬ݂ܳܐ ܆ ܟ݁ܰܦ݂ܢܺܝܢܰܢ . ܘܰܨܗܶܝܢܰܢ .
                    ܘܥܰܪܛܶܠܳܝܺܝܢܰܢ . ܘܡܶܬ݂ܩܰܦ݁ܚܺܝܢܰܢ . ܘܒ݂ܶܝܬ݂ ܩܝܳܡܳܐ ܠܰܝܬ݁ ܠܰܢ .
                ܘܠܳܐܶܝܢܰܢ ܂ ܟ݁ܰܕ݂ ܦ݁ܳܠܚܺܝܢܰܢ ܒ݁ܺܐܝܕ݂ܰܝܢ̈ . ܡܨܰܥܪܺܝܢ ܠܰܢ ܂
                    ܘܰܡܒ݂ܰܪܟ݂ܺܝܢܰܢ . ܪܳܕ݂ܦ݁ܺܝܢ ܠܰܢ ܂ ܘܰܡܣܰܝܒ݁ܪܺܝܢܰܢ .
                ܡܨܰܚܶܝܢ ܠܰܢ ܂ ܘܒ݂ܳܥܶܝܢܰܢ ܡܶܢܗܽܘܢ . ܐܰܝܟ݂ ܢܦ݂ܳܬ݂ܳܐ ܕ݁ܥܳܠܡܳܐ
                    ܗܘܰܝܢ ܂ ܘܟ݂ܽܘܦ݁ܳܪܳܐ ܕ݁ܟ݂ܽܠܢܳܫ ܥܕ݂ܰܡܳܐ ܠܗܳܫܳܐ .
                ܠܳܐ ܗ̱ܘܳܐ ܐܰܝܟ݂ ܕ݁ܰܐܒ݂ܗܶܬ݂ܟ݂ܽܘܢ ܟ݁ܳܬ݂ܶܒ݂ ܐ̱ܢܳܐ ܗܳܠܶܝܢ ܆
                    ܐܶܠܳܐ ܐܰܝܟ݂ ܕ݁ܠܰܒ݂ܢܰܝܳܐ̈ ܚܰܒ݁ܺܝܒ݂ܶܐ̈ ܡܰܪܬ݁ܶܐ ܐ̱ܢܳܐ .
                ܐܶܢ ܓ݁ܶܝܪ ܪܶܒ݁ܽܘ ܬ݁ܳܪܐܶܐ̈ ܢܶܗܘܽܘܢ ܠܟ݂ܽܘܢ ܒ݁ܰܡܫܺܝܚܳܐ ܆ ܐܶܠܳܐ
                    ܠܳܐ ܣܰܓ݁ܺܝܶܐܐ̈ ܐܰܒ݂ܳܗܶܐ̈ . ܒ݁ܝܶܫܽܘܥ ܓ݁ܶܝܪ ܡܫܺܝܚܳܐ ܆ ܐܶܢܳܐ ܗܽܘ ܐܰܘܠܶܕ݁ܬ݁ܟ݂ܽܘܢ
                    ܒ݁ܰܣܒ݂ܰܪܬ݂ܳܐ .
                ܒ݁ܳܥܶܐ ܐ̱ܢܳܐ ܗܳܟ݂ܺܝܠ ܡܶܢܟ݂ܽܘܢ ܕ݁ܒ݂ܺܝ ܬ݁ܶܬ݁ܕ݁ܰܡܽܘܢ
                    ܀.܀.܀܀
                
                ܡܶܛܽܠ ܗܳܢܳܐ ܫܰܕ݁ܪܶܬ݂ ܠܘܳܬ݂ܟ݂ܽܘܢ ܠܛܺܝܡܳܬ݂ܶܐܳܘܣ ܆ ܕ݁ܺܐܝܬ݂ܰܘܗ̱ܝ
                    ܒ݁ܶܪܝ ܚܰܒ݁ܺܝܒ݂ܳܐ ܂ ܘܰܡܗܰܝܡܢܳܐ ܒ݁ܡܳܪܝܳܐ ܆ ܕ݁ܗܽܘ ܢܰܥ̱ܗܶܕ݂ܟ݂ܽܘܢ ܐܽܘܪܚܳܬ݂ܝ̈
                    ܕ݁ܒ݂ܰܡܫܺܝܚܳܐ . ܐܰܝܟ݂ ܡܶܕ݁ܶܡ ܕ݁ܡܰܠܶܦ݂ ܐ̱ܢܳܐ ܒ݁ܟ݂ܽܠܗܶܝܢ ܥܺܕ݂ܳܬ݂ܳܐ̈ ܀
                ܐܰܝܟ݂ ܗܰܘ ܕ݁ܶܝܢ ܕ݁ܠܳܐ ܐܳܬ݂ܶܐ ܐ̱ܢܳܐ ܠܘܳܬ݂ܟ݂ܽܘܢ ܆ ܐܶܬ݂ܚܬ݂ܰܪܘ
                    ܐ̱ܢܳܫܳܐ ܡܶܢܟ݂ܽܘܢ .
                ܐܶܠܳܐ ܐܶܢ ܡܳܪܝܳܐ ܨܳܒ݂ܶܐ ܆ ܒ݁ܰܥܓ݂ܰܠ ܐܳܬ݂ܶܐ ܐ̱ܢܳܐ ܠܘܳܬ݂ܟ݂ܽܘܢ .
                    ܘܶܐܕ݁ܰܥ ܠܳܐ ܡܶܠܰܬ݂ܗܽܘܢ ܕ݁ܗܳܠܶܝܢ ܕ݁ܰܡܪܺܝܡܺܝܢ ܢܰܦ݂ܫܗܽܘܢ ܂ ܐܶܠܳܐ ܚܰܝܠܗܽܘܢ .
                ܡܰܠܟ݁ܽܘܬ݂ܶܗ ܓ݁ܶܝܪ ܕ݁ܰܐܠܳܗܳܐ ܠܳܐ ܗ̱ܘܳܬ݂ ܒ݁ܡܶܠܬ݂ܳܐ ܂ ܐܶܠܳܐ
                    ܒ݁ܚܰܝܠܳܐ .
                ܐܰܝܟ݁ܰܢܳܐ ܨܳܒ݂ܶܝܢ ܐܢ̱ܬ݁ܽܘܢ ܆ ܒ݁ܚܽܘܛܪܳܐ ܐܺܬ݂ܶܐ ܠܘܳܬ݂ܟ݂ܽܘܢ ܇
                    ܐܰܘ ܒ݁ܚܽܘܒ݁ܳܐ ܂ ܘܰܒ݂ܪܽܘܚܳܐ ܡܰܟ݁ܺܝܟ݂ܬ݁ܳܐ ܆
            
            
                Chapter 5
                ܣܳܟ݂ܳܐ ܡܶܫܬ݁ܰܡܥܳܐ ܒ݁ܰܝܢܳܬ݂ܟ݂ܽܘܢ ܙܳܢܝܽܘܬ݂ܳܐ . ܘܕ݂ܰܐܝܟ݂ ܗܳܕ݂ܶܐ
                    ܙܳܢܝܽܘܬ݂ܳܐ ܁ ܐܰܝܕ݂ܳܐ ܕ݁ܳܐܦ݂ܠܳܐ ܒ݁ܶܝܬ݂ ܚܰܢܦ݂ܶܐ̈ ܡܶܫܬ݁ܰܡܗܳܐ . ܥܕ݂ܰܡܳܐ ܕ݁ܢܶܣܰܒ݂
                    ܒ݁ܪܳܐ ܐܰܢ̱ܬ݁ܰܬ݂ ܐܰܒ݂ܽܘܗ̱ܝ .
                ܘܰܐܢ̱ܬ݁ܽܘܢ ܚܬ݂ܺܝܪܺܝܢ ܐܢ̱ܬ݁ܽܘܢ ܆ ܘܠܳܐ ܕ݁ܶܝܢ ܝܰܬ݁ܺܝܪܳܐܝܺܬ݂
                    ܝܺܬ݂ܶܒ݂ܬ݁ܽܘܢ ܒ݁ܶܐܒ݂ܠܳܐ ܆ ܕ݁ܢܶܫܬ݁ܩܶܠ ܡܶܢ ܒ݁ܰܝܢܳܬ݂ܟ݂ܽܘܢ ܗܰܘ ܡܰܢ ܕ݁ܗܳܢܳܐ ܣܽܘܥܪܳܢܳܐ
                    ܣܥܰܪ .
                ܐܶܢܳܐ ܓ݁ܶܝܪ ܟ݁ܰܕ݂ ܪܰܚܺܝܩ ܐ̱ܢܳܐ ܡܶܢܟ݂ܽܘܢ ܒ݁ܰܦ݂ܓ݂ܰܪ ܂ ܘܩܰܪܺܝܒ݂
                    ܐ̱ܢܳܐ ܠܟ݂ܽܘܢ ܒ݁ܪܽܘܚ ܆ ܡܶܢ ܟ݁ܰܕ݁ܽܘ ܕ݁ܳܢܶܬ݂ ܐܰܝܟ݂ ܩܰܪܺܝܒ݂ܳܐ ܠܗܰܘ ܡܰܢ ܕ݁ܗܳܕ݂ܶܐ
                    ܣܳܥܰܪ ܆
                ܕ݁ܒ݂ܰܫܡܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܬ݁ܶܬ݂ܟ݁ܰܢܫܽܘܢ ܟ݁ܽܠܟ݂ܽܘܢ ܇
                    ܘܶܐܢܳܐ ܥܰܡܟ݂ܽܘܢ ܒ݁ܪܽܘܚ ܇ ܥܰܡ ܚܰܝܠܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܇
                ܘܬ݂ܰܫܠܡܽܘܢܶܗ ܠܗܳܢܳܐ ܠܣܳܛܳܢܳܐ ܠܰܐܒ݂ܕ݂ܳܢܳܐ ܕ݁ܦ݂ܰܓ݂ܪܶܗ ܆
                    ܕ݁ܰܒ݂ܪܽܘܚ ܢܺܚܶܐ ܒ݁ܝܰܘܡܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܀
                ܠܳܐ ܫܰܦ݁ܺܝܪ ܫܽܘܒ݂ܗܳܪܟ݂ܽܘܢ . ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܰܚܡܺܝܪܳܐ
                    ܩܰܠܺܝܠ ܟ݁ܽܠܳܗ ܓ݁ܒ݂ܺܝܠܬ݁ܳܐ ܡܰܚܡܰܥ ܆
                ܕ݁ܰܟ݁ܰܘ ܡܶܢܟ݂ܽܘܢ ܚܡܺܝܪܳܐ ܥܰܬ݁ܺܝܩܳܐ ܆ ܕ݁ܬ݂ܶܗܘܽܘܢ ܓ݁ܒ݂ܺܝܠܬ݁ܳܐ
                    ܚܰܕ݂̱ܬ݂ܳܐ ܇ ܐܰܝܟ݁ܰܢܳܐ ܕ݁ܺܐܝܬ݂ܰܝܟ݁ܽܘܢ ܦ݁ܰܛܺܝܪܳܐ . ܦ݁ܶܨܚܳܐ ܓ݁ܶܝܪ ܕ݁ܺܝܠܰܢ ܆ ܡܫܺܝܚܳܐ
                    ܗܽܘ ܂ ܕ݁ܶܐܬ݂ܢܟ݂ܶܣ ܚܠܳܦ݂ܰܝܢ .
                ܡܶܛܽܠ ܗܳܢܳܐ ܢܶܥܒ݁ܶܕ݂ ܥܰܕ݂ܥܺܕ݂ܳܐ ܆ ܠܳܐ ܒ݁ܰܚܡܺܝܪܳܐ ܥܰܬ݁ܺܝܩܳܐ ܁
                    ܘܠܳܐ ܒ݁ܰܚܡܺܝܪܳܐ ܕ݁ܒ݂ܺܝܫܽܘܬ݂ܳܐ ܘܰܕ݂ܡܰܪܺܝܪܽܘܬ݂ܳܐ ܇ ܐܶܠܳܐ ܒ݁ܰܚܡܺܝܪܳܐ ܕ݁ܕ݂ܰܟ݂ܝܽܘܬ݂ܳܐ
                    ܘܰܕ݂ܩܰܕ݁ܺܝܫܽܘܬ݂ܳܐ ܀
                ܟ݁ܶܬ݂ܒ݁ܶܬ݂ ܠܟ݂ܽܘܢ ܒ݁ܶܐܓ݁ܰܪܬ݁ܳܐ ܆ ܕ݁ܠܳܐ ܬ݁ܶܬ݂ܚܰܠܛܽܘܢ ܥܰܡ
                    ܙܰܢܳܝܶܐ̈ .
                ܠܳܐ ܕ݁ܶܝܢ ܐܳܡܰܪ ܐ̱ܢܳܐ ܥܰܠ ܙܰܢܳܝܶܐ̈ ܕ݁ܰܒ݂ܥܳܠܡܳܐ ܗܳܢܳܐ . ܐܰܘ
                    ܥܰܠ ܥܳܠܽܘܒ݂ܶܐ̈ . ܐܰܘ ܥܰܠ ܚܳܛܽܘܦ݂ܶܐ̈ . ܐܰܘ ܥܰܠ ܦ݁ܳܠܚܰܝ̈ ܦ݁ܬ݂ܰܟ݂ܪܶܐ̈ . ܘܶܐܢ ܠܳܐ ܆
                    ܚܰܝܳܒ݂ܺܝܢ ܗ̱ܘܰܝܬ݁ܽܘܢ ܐܳܦ݂ ܡܶܢ ܥܳܠܡܳܐ ܠܡܶܦ݁ܰܩ .
                ܗܳܕ݂ܶܐ ܕ݁ܶܝܢ ܕ݁ܟ݂ܶܬ݂ܒ݁ܶܬ݂ ܠܟ݂ܽܘܢ ܕ݁ܠܳܐ ܬ݁ܶܬ݂ܚܰܠܛܽܘܢ ܆ ܐܶܢ
                    ܐܺܝܬ݂ ܕ݁ܡܶܬ݂ܩܪܶܐ ܐܰܚܳܐ . ܘܺܐܝܬ݂ܰܘܗ̱ܝ ܙܰܢܳܝܳܐ . ܐܰܘ ܥܳܠܽܘܒ݂ܳܐ . ܐܰܘ ܦ݁ܳܠܰܚ
                    ܦ݁ܬ݂ܰܟ݂ܪܶܐ̈ . ܐܰܘ ܡܨܰܥܪܳܢ . ܐܰܘ ܪܰܘܳܝ . ܐܰܘ ܚܳܛܽܘܦ݂ . ܥܰܡ ܐܰܝܢܳܐ ܕ݁ܗܳܟ݂ܰܢܳܐ ܗܽܘ
                    ܇ ܐܳܦ݂ܠܳܐ ܠܰܚܡܳܐ ܠܡܶܐܟ݂ܰܠ .
                ܡܳܐ ܠܺܝ ܓ݁ܶܝܪ ܠܰܡܕ݂ܳܢ ܠܒ݂ܰܪܳܝܶܐ̈ . ܐܰܢ̱ܬ݁ܽܘܢ ܠܕ݂ܰܠܓ݂ܰܘ
                    ܕ݁ܽܘܢܘ ܆
                ܠܒ݂ܰܪܳܝܶܐ̈ ܕ݁ܶܝܢ ܐܰܠܳܗܳܐ ܕ݁ܳܐܶܢ . ܘܫܽܘܩܠܽܘܗ̱ܝ ܠܒ݂ܺܝܫܳܐ ܡܶܢ
                    ܒ݁ܰܝܢܳܬ݂ܟ݂ܽܘܢ ܀
            
            
                Chapter 6
                ܡܰܡܪܰܚ ܐ̱ܢܳܫ ܡܶܢܟ݂ܽܘܢ ܟ݁ܰܕ݂ ܐܺܝܬ݂ ܠܶܗ ܕ݁ܺܝܢܳܐ ܥܰܡ ܐܰܚܽܘܗ̱ܝ ܆
                    ܕ݁ܰܢܕ݂ܽܘܢ ܩܕ݂ܳܡ ܥܰܘܳܠܶܐ̈ ܂ ܘܠܳܐ ܩܕ݂ܳܡ ܩܰܕ݁ܺܝܫܶܐ̈ ܆
                ܐܰܘ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܩܰܕ݁ܺܝܫܶܐ̈ ܠܥܳܠܡܳܐ ܢܕ݂ܽܘܢܽܘܢ .
                    ܘܶܐܢ ܥܳܠܡܳܐ ܒ݁ܟ݂ܽܘܢ ܡܶܬ݁ܕ݂ܺܝܢ ܆ ܠܳܐ ܫܳܘܶܝܢ ܐܢ̱ܬ݁ܽܘܢ ܠܰܡܕ݂ܳܢ ܕ݁ܺܝܢܶܐ̈ ܕ݁ܰܩܕ݁ܩܶܐ̈
                    ܆
                ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܰܠܡܰܠܰܐܟ݂ܶܐ̈ ܕ݁ܳܝܢܺܝܢܰܢ . ܚܰܕ݂ ܟ݁ܡܳܐ
                    ܐܰܝܠܶܝܢ ܕ݁ܰܕ݂ܥܳܠܡܳܐ ܐܶܢܶܝܢ̈ ܗܳܢܳܐ ܆
                ܐܶܠܳܐ ܐܶܢ ܐܺܝܬ݂ ܠܟ݂ܽܘܢ ܕ݁ܺܝܢܳܐ ܥܰܠ ܕ݁ܥܳܠܡܳܐ ܆ ܠܰܐܝܠܶܝܢ
                    ܕ݁ܰܒ݂ܣܶܝܢ ܒ݁ܥܺܕ̱݁ܬ݁ܳܐ ܂ ܐܰܘܬ݁ܶܒ݂ܘ ܠܟ݂ܽܘܢ ܒ݁ܕ݂ܺܝܢܳܐ .
                ܠܟ݂ܽܘܳܐܪܳܐ ܗܽܘ ܕ݁ܶܝܢ ܐܳܡܰܪ ܐ̱ܢܳܐ ܠܟ݂ܽܘܢ . ܗܳܟ݂ܰܢܳܐ ܠܰܝܬ݁
                    ܒ݁ܟ݂ܽܘܢ ܐܳܦ݂ܠܳܐ ܚܰܕ݂ ܚܰܟ݁ܺܝܡܳܐ ܇ ܕ݁ܢܶܫܟ݁ܰܚ ܢܰܫܘܶܐ ܒ݁ܶܝܬ݂ ܐܰܚܳܐ ܠܰܐܚܽܘܗ̱ܝ .
                ܐܶܠܳܐ ܐܰܚܳܐ ܥܰܡ ܐܰܚܽܘܗ̱ܝ ܡܶܬ݁ܕ݂ܺܝܢ . ܘܬ݂ܽܘܒ݂ ܩܕ݂ܳܡ ܐܰܝܠܶܝܢ
                    ܕ݁ܠܳܐ ܡܗܰܝܡܢܺܝܢ .
                ܡܶܢ ܟ݁ܰܕ݁ܽܘ ܗܳܟ݂ܺܝܠ ܩܢܽܘܡܟ݂ܽܘܢ ܚܳܒ݂ܬ݁ܽܘܢ ܠܟ݂ܽܘܢ ܆ ܕ݁ܕ݂ܺܝܢܳܐ
                    ܚܰܕ݂ ܥܰܡ ܚܰܕ݂ ܐܺܝܬ݂ ܠܟ݂ܽܘܢ . ܡܶܛܽܠ ܡܳܢܳܐ ܓ݁ܶܝܪ ܠܳܐ ܡܶܬ݂ܥܰܠܒ݂ܺܝܢ ܐܢ̱ܬ݁ܽܘܢ .
                    ܘܡܶܛܽܠ ܡܳܢܳܐ ܠܳܐ ܡܶܬ݂ܓ݁ܰܠܙܺܝܢ ܐܢ̱ܬ݁ܽܘܢ .
                ܐܶܠܳܐ ܐܰܢ̱ܬ݁ܽܘܢ ܥܳܠܒ݁ܺܝܢ ܐܢ̱ܬ݁ܽܘܢ ܁ ܘܓ݂ܳܠܙܺܝܢ ܐܢ̱ܬ݁ܽܘܢ ܂ ܐܳܦ݂
                    ܠܰܐܚܰܝܟ݁ܽܘܢ̈ .
                ܐܰܘ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܂ ܕ݁ܥܰܘܳܠܶܐ̈ ܡܰܠܟ݁ܽܘܬ݂ܶܗ ܕ݁ܰܐܠܳܗܳܐ
                    ܠܳܐ ܝܳܪܬ݁ܺܝܢ ܆ ܠܳܐ ܬ݁ܶܛܥܽܘܢ . ܠܳܐ ܙܰܢܳܝܶܐ̈ . ܘܠܳܐ ܦ݁ܳܠܚܰܝ̈ ܦ݁ܬ݂ܰܟ݂ܪܶܐ̈ . ܘܠܳܐ
                    ܓ݁ܰܝܳܪܶܐ̈ . ܘܠܳܐ ܡܚܰܒ݁ܠܶܐ̈ . ܘܠܳܐ ܫܳܟ݂ܒ݁ܰܝ̈ ܥܰܡ ܕ݁ܶܟ݂ܪܶܐ̈ .
                ܘܠܳܐ ܥܳܠܽܘܒ݂ܶܐ̈ . ܘܠܳܐ ܓ݁ܰܢܳܒ݂ܶܐ̈ . ܘܠܳܐ ܪܰܘܳܝܶܐ̈ . ܘܠܳܐ
                    ܡܨܰܥܪܳܢܶܐ̈ . ܘܠܳܐ ܚܳܛܽܘܦ݂ܶܐ̈ ܇ ܗܳܠܶܝܢ ܡܰܠܟ݁ܽܘܬ݂ܶܗ ܕ݁ܰܐܠܳܗܳܐ ܠܳܐ ܝܳܪܬ݁ܺܝܢ .
                ܘܗܳܠܶܝܢ ܐܺܝܬ݂ ܗ̱ܘܰܝ̈ ܒ݁ܐ̱ܢܳܫ ܐ̱ܢܳܫ ܡܶܢܟ݂ܽܘܢ . ܐܶܠܳܐ
                    ܣܚܰܝܬ݁ܽܘܢ ܁ ܘܶܐܬ݂ܩܰܕ݁ܰܫܬ݁ܽܘܢ ܂ ܘܶܐܙܕ݁ܰܕ݁ܰܩܬ݁ܽܘܢ ܆ ܒ݁ܰܫܡܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ
                    ܇ ܘܰܒ݂ܪܽܘܚܶܗ ܕ݁ܰܐܠܳܗܰܢ ܀
                ܟ݁ܽܠ ܫܰܠܺܝܛ ܠܺܝ . ܐܶܠܳܐ ܠܳܐ ܟ݁ܽܠ ܦ݁ܰܩܳܚ ܠܺܝ . ܟ݁ܽܠ ܫܰܠܺܝܛ
                    ܠܺܝ . ܐܶܠܳܐ ܥܠܰܝ ܐ̱ܢܳܫ ܠܳܐ ܢܶܫܬ݁ܰܠܰܛ .
                ܡܶܐܟ݂ܽܘܠܬ݁ܳܐ ܕ݁ܟ݂ܰܪܣܳܐ ܆ ܘܟ݂ܰܪܣܳܐ ܕ݁ܡܶܐܟ݂ܽܘܠܬ݁ܳܐ . ܐܰܠܳܗܳܐ
                    ܕ݁ܶܝܢ ܠܬ݂ܰܪܬ݁ܰܝܗܶܝܢ̈ ܡܒ݂ܰܛܶܠ . ܦ݁ܰܓ݂ܪܳܐ ܕ݁ܶܝܢ ܠܳܐ ܠܙܳܢܝܽܘܬ݂ܳܐ ܂ ܐܶܠܳܐ ܠܡܳܪܰܢ ܆
                    ܘܡܳܪܰܢ ܠܦ݂ܰܓ݂ܪܳܐ .
                ܐܰܠܳܗܳܐ ܕ݁ܶܝܢ ܘܰܠܡܳܪܰܢ ܐܰܩܺܝܡ ܆ ܘܠܰܢ ܡܩܺܝܡ ܒ݁ܚܰܝܠܶܗ .
                ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܦ݂ܰܓ݂ܪܰܝܟ݁ܽܘܢ̈ ܗܰܕ݁ܳܡܶܐ̈ ܐܶܢܽܘܢ
                    ܕ݁ܰܡܫܺܝܚܳܐ ܆ ܢܶܣܰܒ݂ ܗܰܕ݁ܳܡܳܐ ܕ݁ܰܡܫܺܝܚܳܐ ܢܶܥܒ݁ܕ݂ܺܝܘܗ̱ܝ ܗܰܕ݁ܳܡܳܐ ܕ݁ܙܳܢܺܝܬ݂ܳܐ ܆ ܚܳܣ
                    .
                ܐܰܘ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܂ ܕ݁ܡܰܢ ܕ݁ܢܳܩܶܦ݂ ܠܙܳܢܺܝܬ݂ܳܐ ܂ ܚܰܕ݂
                    ܗ̱ܽܘ ܦ݁ܓ݂ܰܪ . ܐܰܡܺܝܪ ܓ݁ܶܝܪ ܂ ܕ݁ܢܶܗܘܽܘܢ ܬ݁ܪܰܝܗܽܘܢ̈ ܚܰܕ݂ ܦ݁ܓ݂ܰܪ .
                ܡܰܢ ܕ݁ܢܳܩܶܦ݂ ܕ݁ܶܝܢ ܠܡܳܪܰܢ ܆ ܗܳܘܶܐ ܥܰܡܶܗ ܚܕ݂ܳܐ ܪܽܘܚ .
                ܥܪܽܘܩܘ ܡܶܢ ܙܳܢܝܽܘܬ݂ܳܐ . ܟ݁ܽܠ ܚܛܺܝܬ݂ܳܐ ܕ݁ܢܶܥܒ݁ܶܕ݂ ܒ݁ܰܪܢܳܫܳܐ ܆
                    ܠܒ݂ܰܪ ܡܶܢ ܦ݁ܰܓ݂ܪܶܗ ܗ̱ܺܝ . ܡܰܢ ܕ݁ܰܡܙܰܢܶܐ ܕ݁ܶܝܢ ܆ ܒ݁ܦ݂ܰܓ݂ܪܶܗ ܗ̱ܽܘ ܚܳܛܶܐ .
                ܐܰܘ ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܂ ܕ݁ܦ݂ܰܓ݂ܪܟ݂ܽܘܢ ܗܰܝܟ݁ܠܳܐ ܗܽܘ
                    ܕ݁ܪܽܘܚܳܐ ܕ݁ܩܽܘܕ݂ܫܳܐ ܂ ܕ݁ܥܳܡܪܳܐ ܒ݁ܟ݂ܽܘܢ ܇ ܗܳܝ ܕ݁ܩܰܒ݁ܶܠܬ݁ܽܘܢ ܡܶܢ ܐܰܠܳܗܳܐ ܆ ܘܠܳܐ
                    ܗܘܰܝܬ݁ܽܘܢ ܕ݁ܢܰܦ݂ܫܟ݂ܽܘܢ ܆
                ܐܶܙܕ݁ܒ݂ܶܢܬ݁ܽܘܢ ܓ݁ܶܝܪ ܒ݁ܰܕ݂ܡܰܝܳܐ̈ . ܗܘܰܝܬ݁ܽܘܢ ܗܳܟ݂ܺܝܠ
                    ܡܫܰܒ݁ܚܺܝܢ ܠܰܐܠܳܗܳܐ ܒ݁ܦ݂ܰܓ݂ܪܟ݂ܽܘܢ ܘܰܒ݂ܪܽܘܚܟ݂ܽܘܢ ܇ ܗܳܢܽܘܢ ܕ݁ܺܐܝܬ݂ܰܝܗܽܘܢ ܕ݁ܰܐܠܳܗܳܐ
                    ܀.܀.܀܀
            
            
                Chapter 7
                
                ܥܰܠ ܐܰܝܠܶܝܢ ܕ݁ܰܟ݂ܬ݂ܰܒ݂ܬ݁ܽܘܢ ܠܺܝ ܕ݁ܶܝܢ ܆ ܫܰܦ݁ܺܝܪ ܗ̱ܽܘ
                    ܠܓ݂ܰܒ݂ܪܳܐ ܕ݁ܠܰܐܢ̱ܬ݁ܬ݂ܳܐ ܠܳܐ ܢܶܬ݂ܩܰܪܰܒ݂ .
                ܐܶܠܳܐ ܡܶܛܽܠ ܙܳܢܝܽܘܬ݂ܳܐ ܆ ܐ̱ܢܳܫ ܐܰܢ̱ܬ݁ܬ݂ܶܗ ܢܶܐܚܽܘܕ݂ ܇
                    ܘܰܐܢ̱ܬ݁ܬ݂ܳܐ ܠܒ݂ܰܥܠܳܗ ܬ݁ܶܐܚܽܘܕ݂ .
                ܓ݁ܰܒ݂ܪܳܐ ܠܰܐܢ̱ܬ݁ܬ݂ܶܗ ܚܽܘܒ݁ܳܐ ܕ݁ܡܶܬ݁ܬ݁ܚܺܝܒ݂ ܢܶܦ݂ܪܽܘܥ .
                    ܗܳܟ݂ܰܢܳܐ ܐܳܦ݂ ܗܺܝ ܐܰܢ̱ܬ݁ܬ݂ܳܐ ܠܒ݂ܰܥܠܳܗ .
                ܐܰܢ̱ܬ݁ܬ݂ܳܐ ܠܳܐ ܫܰܠܺܝܛܳܐ ܥܰܠ ܦ݁ܰܓ݂ܪܳܗ ܆ ܐܶܠܳܐ ܒ݁ܰܥܠܳܗ .
                    ܗܳܟ݂ܰܢܳܐ ܐܳܦ݂ ܓ݁ܰܒ݂ܪܳܐ ܠܳܐ ܫܰܠܺܝܛ ܥܰܠ ܦ݁ܰܓ݂ܪܶܗ ܆ ܐܶܠܳܐ ܐܰܢ̱ܬ݁ܬ݂ܶܗ .
                ܠܳܐ ܗܳܟ݂ܺܝܠ ܬ݁ܶܓ݂ܠܙܽܘܢ ܚܰܕ݂ ܠܚܰܕ݂ ܆ ܐܶܠܳܐ ܐܶܡܰܬ݂ܝ
                    ܕ݁ܰܬ݂ܪܰܝܟ݁ܽܘܢ̈ ܬ݁ܶܫܬ݁ܘܽܘܢ ܒ݁ܰܙܒ݂ܰܢ ܇ ܕ݁ܬ݂ܶܬ݂ܥܢܽܘܢ ܠܨܰܘܡܳܐ ܘܠܰܨܠܽܘܬ݂ܳܐ ܆ ܘܬ݂ܽܘܒ݂
                    ܠܳܗ ܠܰܨܒ݂ܽܘܬ݂ܳܐ ܬ݁ܶܬ݂ܦ݁ܢܽܘܢ . ܕ݁ܠܳܐ ܢܢܰܣܶܝܟ݂ܽܘܢ ܣܳܛܳܢܳܐ ܡܶܛܽܠ ܪܶܓ݁ܬ݂ܳܐ
                    ܕ݁ܦ݂ܰܓ݂ܪܟ݂ܽܘܢ .
                ܗܳܕ݂ܶܐ ܕ݁ܶܝܢ ܐܳܡܰܪ ܐ̱ܢܳܐ ܐܰܝܟ݂ ܕ݁ܠܰܡܚܺܝܠܶܐ̈ ܆ ܠܰܘ ܡܶܢ
                    ܦ݁ܽܘܩܕ݁ܳܢܳܐ .
                ܐܶܢܳܐ ܓ݁ܶܝܪ ܨܳܒ݂ܶܐ ܐ̱ܢܳܐ ܂ ܕ݁ܟ݂ܽܠܗܽܘܢ ܒ݁ܢܰܝܢܳܫܳܐ̈ ܐܰܟ݂ܘܳܬ݂ܝ
                    ܢܶܗܘܽܘܢ ܒ݁ܕ݂ܰܟ݂ܝܽܘܬ݂ܳܐ . ܐܶܠܳܐ ܟ݁ܽܠܢܳܫ ܡܰܘܗܰܒ݂ܬ݁ܳܐ ܝܺܗܺܝܒ݂ܳܐ ܠܶܗ ܡܶܢ ܐܰܠܳܗܳܐ ܇
                    ܐܺܝܬ݂ ܕ݁ܗܳܟ݂ܰܢܳܐ ܂ ܘܺܐܝܬ݂ ܕ݁ܗܳܟ݂ܰܢܳܐ .
                ܐܳܡܰܪ ܐ̱ܢܳܐ ܕ݁ܶܝܢ ܠܰܐܝܠܶܝܢ ܕ݁ܠܰܝܬ݁ ܠܗܽܘܢ ܢܶܫܶܐ̈ ܂
                    ܘܠܰܐܪܡܠܳܬ݂ܳܐ̈ ܆ ܕ݁ܦ݂ܰܩܳܚ ܠܗܽܘܢ ܐܶܢ ܢܩܰܘܽܘܢ ܐܰܟ݂ܘܳܬ݂ܝ .
                ܐܶܢ ܠܳܐ ܕ݁ܶܝܢ ܡܣܰܝܒ݁ܪܺܝܢ ܂ ܢܶܙܕ݁ܰܘܓ݂ܽܘܢ . ܦ݁ܰܩܳܚ ܓ݁ܶܝܪ
                    ܠܡܶܣܰܒ݂ ܐܰܢ̱ܬ݁ܬ݂ܳܐ ܛܳܒ݂ ܡܶܢ ܕ݁ܰܠܡܺܐܩܰܕ݂ ܒ݁ܪܶܓ݁ܬ݂ܳܐ .
                ܠܰܐܝܠܶܝܢ ܕ݁ܶܝܢ ܕ݁ܺܐܝܬ݂ ܠܗܽܘܢ ܢܶܫܶܐ̈ ܂ ܡܦ݂ܰܩܶܕ݂ ܐ̱ܢܳܐ ܇ ܠܳܐ
                    ܐܶܢܳܐ ܐܶܠܳܐ ܡܳܪܝ ܆ ܕ݁ܰܐܢ̱ܬ݁ܬ݂ܳܐ ܡܶܢ ܒ݁ܰܥܠܳܗ ܠܳܐ ܬ݁ܶܦ݂ܪܽܘܫ .
                ܘܶܐܢ ܬ݁ܶܦ݂ܪܽܘܫ ܆ ܬ݁ܩܰܘܶܐ ܕ݁ܠܳܐ ܓ݁ܰܒ݂ܪܳܐ . ܐܰܘ ܠܒ݂ܰܥܠܳܗ
                    ܬ݁ܶܬ݂ܪܰܥܶܐ . ܘܓ݂ܰܒ݂ܪܳܐ ܠܰܐܢ̱ܬ݁ܬ݂ܶܗ ܠܳܐ ܢܶܫܒ݁ܽܘܩ .
                ܠܫܰܪܟ݁ܳܐ ܕ݁ܶܝܢ ܐܳܡܰܪ ܐ̱ܢܳܐ . ܐܶܢܳܐ ܁ ܠܳܐ ܡܳܪܝ . ܐܶܢ ܐܺܝܬ݂
                    ܐܰܚܳܐ ܕ݁ܺܐܝܬ݂ ܠܶܗ ܐܰܢ̱ܬ݁ܬ݂ܳܐ ܕ݁ܠܳܐ ܡܗܰܝܡܢܳܐ ܇ ܘܗܺܝ ܨܳܒ݂ܝܳܐ ܕ݁ܬ݂ܶܥܡܰܪ ܥܰܡܶܗ ܆ ܠܳܐ
                    ܢܶܫܒ݁ܩܺܝܗ .
                ܘܰܐܢ̱ܬ݁ܬ݂ܳܐ ܂ ܐܰܝܕ݂ܳܐ ܕ݁ܺܐܝܬ݂ ܠܳܗ ܒ݁ܰܥܠܳܐ ܕ݁ܠܳܐ ܡܗܰܝܡܶܢ ܇
                    ܘܗܽܘ ܨܳܒ݂ܶܐ ܕ݁ܢܶܥܡܰܪ ܥܰܡܳܗ ܆ ܠܳܐ ܬ݁ܶܫܒ݁ܽܘܩ ܒ݁ܰܥܠܳܗ .
                ܡܩܰܕ݁ܰܫ ܗ̱ܽܘ ܓ݁ܶܝܪ ܓ݁ܰܒ݂ܪܳܐ ܁ ܐܰܝܢܳܐ ܕ݁ܠܳܐ ܡܗܰܝܡܶܢ ܂
                    ܒ݁ܰܐܢ̱ܬ݁ܬ݂ܳܐ ܕ݁ܰܡܗܰܝܡܢܳܐ . ܘܰܡܩܰܕ݁ܫܳܐ ܗ̱ܝ ܐܰܢ̱ܬ݁ܬ݂ܳܐ ܁ ܐܰܝܕ݂ܳܐ ܕ݁ܠܳܐ ܡܗܰܝܡܢܳܐ ܂
                    ܒ݁ܓ݂ܰܒ݂ܪܳܐ ܕ݁ܰܡܗܰܝܡܶܢ . ܘܶܐܢ ܠܳܐ ܇ ܒ݁ܢܰܝܗܽܘܢ̈ ܛܰܡܺܐܝܢ ܐܶܢܽܘܢ . ܗܳܫܳܐ ܕ݁ܶܝܢ
                    ܕ݁ܟ݂ܶܝܢ ܐܶܢܽܘܢ .
                ܐܶܢ ܕ݁ܶܝܢ ܗܰܘ ܕ݁ܠܳܐ ܡܗܰܝܡܶܢ ܦ݁ܳܪܶܫ ܂ ܢܶܦ݂ܪܽܘܫ . ܠܳܐ
                    ܡܫܰܥܒ݁ܰܕ݂ ܐܰܚܳܐ ܐܰܘ ܚܳܬ݂ܳܐ ܒ݁ܗܳܠܶܝܢ . ܠܰܫܠܳܡܳܐ ܗܽܘ ܩܪܳܢ ܐܰܠܳܗܳܐ .
                ܡܳܢܳܐ ܓ݁ܶܝܪ ܝܳܕ݂ܥܳܐ ܐܰܢ̱ܬ݁ܝ ܐܰܢ̱ܬ݁ܬ݂ܳܐ ܆ ܐܶܢ ܠܒ݂ܰܥܠܶܟ݂ܝ
                    ܬ݁ܰܚܶܝܢ . ܐܰܘ ܐܰܢ̱ܬ݁ ܓ݁ܰܒ݂ܪܳܐ ܝܳܕ݂ܰܥ ܐܰܢ̱ܬ݁ ܆ ܐܶܢ ܠܰܐܢ̱ܬ݁ܬ݂ܳܟ݂ ܬ݁ܰܚܶܐ ܆
                ܐܶܠܳܐ ܐ̱ܢܳܫ ܐ̱ܢܳܫ ܐܰܝܟ݂ ܕ݁ܰܦ݂ܠܰܓ݂ ܠܶܗ ܡܳܪܝܳܐ ܆ ܘܐ̱ܢܳܫ ܐܰܝܟ݂
                    ܕ݁ܰܩܪܳܝܗ̱ܝ ܐܰܠܳܗܳܐ ܆ ܗܳܟ݂ܰܢܳܐ ܢܗܰܠܶܟ݂ . ܘܳܐܦ݂ ܠܟ݂ܽܠܗܶܝܢ ܥܺܕ݂ܳܬ݂ܳܐ̈ ܗܳܟ݂ܰܢܳܐ
                    ܡܦ݂ܰܩܶܕ݂ ܐ̱ܢܳܐ ܀
                ܐܶܢ ܟ݁ܰܕ݂ ܓ݁ܙܺܝܪ ܐ̱ܢܳܫ ܐܶܬ݂ܩܪܺܝ ܆ ܠܳܐ ܢܶܗܦ݁ܽܘܟ݂ ܠܶܗ
                    ܠܥܽܘܪܠܽܘܬ݂ܳܐ . ܘܶܐܢ ܒ݁ܥܽܘܪܠܽܘܬ݂ܳܐ ܐܶܬ݂ܩܪܺܝ ܆ ܠܳܐ ܢܶܓ݂ܙܽܘܪ .
                ܓ݁ܙܽܘܪܬ݁ܳܐ ܓ݁ܶܝܪ ܠܳܐ ܗ̱ܘܳܬ݂ ܡܶܕ݁ܶܡ ܆ ܐܳܦ݂ ܠܳܐ ܥܽܘܪܠܽܘܬ݂ܳܐ .
                    ܐܶܠܳܐ ܢܛܽܘܪܳܬ݂ܳܐ̈ ܕ݁ܦ݂ܽܘܩܕ݁ܳܢܰܘܗ̱ܝ̈ ܕ݁ܰܐܠܳܗܳܐ .
                ܟ݁ܽܠܢܳܫ ܒ݁ܩܶܪܝܳܢܳܐ ܕ݁ܶܐܬ݂ܩܪܺܝ ܂ ܒ݁ܶܗ ܢܩܰܘܶܐ .
                ܐܶܢ ܥܰܒ݂ܕ݁ܳܐ ܐܶܬ݂ܩܪܺܝܬ݁ ܆ ܠܳܐ ܢܶܬ݂ܒ݁ܛܶܠ ܠܳܟ݂ . ܐܶܠܳܐ ܐܳܦ݂ܶܢ
                    ܡܶܫܟ݁ܰܚ ܐܰܢ̱ܬ݁ ܠܡܶܬ݂ܚܰܪܳܪܽܘ ܆ ܓ݁ܒ݂ܺܝ ܠܳܟ݂ ܕ݁ܬ݂ܶܦ݂ܠܽܘܚ .
                ܐܰܝܢܳܐ ܓ݁ܶܝܪ ܕ݁ܥܰܒ݂ܕ݁ܳܐ ܐܶܬ݂ܩܪܺܝ ܒ݁ܡܳܪܰܢ ܆ ܡܚܰܪܪܳܐ ܗܽܘ
                    ܕ݁ܰܐܠܳܗܳܐ . ܗܳܟ݂ܰܢܳܐ ܐܳܦ݂ ܐܰܝܢܳܐ ܕ݁ܒ݂ܰܪ ܚܺܐܪܶܐ̈ ܐܶܬ݂ܩܪܺܝ ܆ ܥܰܒ݂ܕ݁ܳܐ ܗܽܘ
                    ܕ݁ܰܡܫܺܝܚܳܐ .
                ܒ݁ܰܕ݂ܡܰܝܳܐ̈ ܐܶܙܕ݁ܒ݂ܶܢܬ݁ܽܘܢ . ܠܳܐ ܬ݁ܶܗܘܽܘܢ ܥܰܒ݂ܕ݁ܶܐ̈
                    ܕ݁ܰܒ݂ܢܰܝܢܳܫܳܐ̈ .
                ܟ݁ܽܠܢܳܫ ܒ݁ܡܶܕ݁ܶܡ ܕ݁ܶܐܬ݂ܩܪܺܝ ܐܰܚܰܝ̈ ܆ ܒ݁ܶܗ ܢܩܰܘܶܐ ܠܘܳܬ݂
                    ܐܰܠܳܗܳܐ ܀
                ܥܰܠ ܒ݁ܬ݂ܽܘܠܽܘܬ݂ܳܐ ܕ݁ܶܝܢ ܆ ܦ݁ܽܘܩܕ݁ܳܢܳܐ ܡܶܢ ܐܰܠܳܗܳܐ ܠܳܐ
                    ܐܰܚܺܝܕ݂ ܐ̱ܢܳܐ . ܡܶܠܟ݁ܳܐ ܕ݁ܶܝܢ ܝܳܗܶܒ݂ ܐ̱ܢܳܐ ܆ ܐܰܝܟ݂ ܓ݁ܰܒ݂ܪܳܐ ܕ݁ܶܐܬ݂ܚܰܢܢܶܬ݂ ܡܶܢ
                    ܐܰܠܳܗܳܐ ܕ݁ܶܐܗܘܶܐ ܡܗܰܝܡܰܢ .
                ܘܣܳܒ݂ܰܪ ܐ̱ܢܳܐ ܕ݁ܗܳܕ݂ܶܐ ܫܰܦ݁ܺܝܪܳܐ ܇ ܡܶܛܽܠ ܐܰܢܰܢܩܺܐ ܕ݁ܙܰܒ݂ܢܳܐ
                    ܆ ܕ݁ܦ݂ܰܩܳܚ ܠܶܗ ܠܒ݂ܰܪܢܳܫܳܐ ܂ ܕ݁ܗܳܟ݂ܰܢܳܐ ܢܶܗܘܶܐ .
                ܐܰܣܺܝܪ ܐܰܢ̱ܬ݁ ܒ݁ܰܐܢ̱ܬ݁ܬ݂ܳܐ ܆ ܠܳܐ ܬ݁ܶܒ݂ܥܶܐ ܫܪܳܝܳܐ . ܫܪܶܐ
                    ܐܰܢ̱ܬ݁ ܡܶܢ ܐܰܢ̱ܬ݁ܬ݂ܳܐ ܆ ܠܳܐ ܬ݁ܶܒ݂ܥܶܐ ܐܰܢ̱ܬ݁ܬ݂ܳܐ .
                ܘܶܐܢ ܬ݁ܶܣܰܒ݂ ܐܰܢ̱ܬ݁ܬ݂ܳܐ ܠܳܐ ܚܳܛܶܐ ܐܰܢ̱ܬ݁ ܇ ܘܶܐܢ ܒ݁ܬ݂ܽܘܠܬ݁ܳܐ
                    ܬ݁ܶܗܘܶܐ ܠܓ݂ܰܒ݂ܪܳܐ ܠܳܐ ܚܳܛܝܳܐ ܆ ܐܽܘܠܨܳܢܳܐ ܕ݁ܶܝܢ ܒ݁ܰܦ݂ܓ݂ܰܪ ܗܳܘܶܐ ܠܰܐܝܠܶܝܢ
                    ܕ݁ܗܳܟ݂ܰܢܳܐ ܐܶܢܽܘܢ . ܐܶܢܳܐ ܕ݁ܶܝܢ ܥܠܰܝܟ݁ܽܘܢ ܚܳܐܶܣ ܐ̱ܢܳܐ .
                ܘܗܳܕ݂ܶܐ ܐܳܡܰܪ ܐ̱ܢܳܐ ܐܰܚܰܝ̈ . ܕ݁ܙܰܒ݂ܢܳܐ ܡܶܟ݁ܺܝܠ ܐܶܙܕ݁ܰܠܗܰܙ
                    ܠܶܗ . ܕ݁ܰܐܝܠܶܝܢ ܕ݁ܺܐܝܬ݂ ܠܗܽܘܢ ܢܶܫܶܐ̈ ܆ ܢܶܗܘܽܘܢ ܐܰܝܟ݂ ܕ݁ܠܰܝܬ݁ ܠܗܽܘܢ .
                ܘܰܐܝܠܶܝܢ ܕ݁ܒ݂ܳܟ݂ܶܝܢ ܆ ܐܰܝܟ݂ ܠܳܐ ܒ݁ܳܟ݂ܶܝܢ . ܘܰܐܝܠܶܝܢ
                    ܕ݁ܚܳܕ݂ܶܝܢ ܆ ܐܰܝܟ݂ ܠܳܐ ܚܳܕ݂ܶܝܢ . ܘܰܐܝܠܶܝܢ ܕ݁ܙܳܒ݂ܢܺܝܢ ܆ ܐܰܝܟ݂ ܠܳܐ ܡܩܰܕ݁ܶܝܢ .
                ܘܰܐܝܠܶܝܢ ܕ݁ܡܶܬ݂ܚܰܫܚܺܝܢ ܒ݁ܥܳܠܡܳܐ ܗܳܢܳܐ ܆ ܠܳܐ ܠܒ݂ܰܪ ܡܶܢ
                    ܙܶܕ݂ܩܳܐ ܕ݁ܰܚܫܰܚܬ݂ܳܐ . ܥܳܒ݂ܰܪ ܠܶܗ ܓ݁ܶܝܪ ܐܶܣܟ݁ܺܡܶܗ ܕ݁ܥܳܠܡܳܐ ܗܳܢܳܐ .
                ܡܶܛܽܠ ܗܳܢܳܐ ܨܳܒ݂ܶܐ ܐ̱ܢܳܐ ܕ݁ܰܕ݂ܠܳܐ ܨܶܦ݂ܬ݂ܳܐ ܬ݁ܶܗܘܽܘܢ . ܐܰܝܢܳܐ
                    ܓ݁ܶܝܪ ܕ݁ܠܰܝܬ݁ ܠܶܗ ܐܰܢ̱ܬ݁ܬ݂ܳܐ ܆ ܪܳܢܶܐ ܒ݁ܰܕ݂ܡܳܪܶܗ ܂ ܕ݁ܰܐܝܟ݁ܰܢܳܐ ܢܶܫܦ݁ܰܪ ܠܡܳܪܶܗ
                    .
                ܘܰܐܝܢܳܐ ܕ݁ܺܐܝܬ݂ ܠܶܗ ܐܰܢ̱ܬ݁ܬ݂ܳܐ ܆ ܝܳܨܶܦ݂ ܕ݁ܥܳܠܡܳܐ ܂
                    ܕ݁ܰܐܝܟ݁ܰܢܳܐ ܢܶܫܦ݁ܰܪ ܠܰܐܢ̱ܬ݁ܬ݂ܶܗ .
                ܦ݁ܽܘܪܫܳܢܳܐ ܕ݁ܶܝܢ ܐܺܝܬ݂ ܐܳܦ݂ ܒ݁ܰܝܢܳܬ݂ ܐܰܢ̱ܬ݁ܬ݂ܳܐ
                    ܠܰܒ݂ܬ݂ܽܘܠܬ݁ܳܐ . ܐܰܝܕ݂ܳܐ ܕ݁ܰܠܓ݂ܰܒ݂ܪܳܐ ܠܳܐ ܗܘܳܬ݂ ܆ ܪܳܢܝܳܐ ܒ݁ܡܳܪܳܗ ܇ ܕ݁ܬ݂ܶܗܘܶܐ
                    ܩܰܕ݁ܺܝܫܳܐ ܒ݁ܦ݂ܰܓ݂ܪܳܗ ܘܰܒ݂ܪܽܘܚܳܗ . ܘܰܐܝܕ݂ܳܐ ܕ݁ܺܐܝܬ݂ ܠܳܗ ܒ݁ܰܥܠܳܐ ܆ ܪܳܢܝܳܐ ܕ݁ܥܳܠܡܳܐ
                    ܇ ܕ݁ܰܐܝܟ݁ܰܢܳܐ ܬ݁ܶܫܦ݁ܰܪ ܠܒ݂ܰܥܠܳܗ .
                ܗܳܕ݂ܶܐ ܕ݁ܶܝܢ ܠܥܽܘܕ݂ܪܳܢܟ݂ܽܘܢ ܗ̱ܽܘ ܕ݁ܺܝܠܟ݂ܽܘܢ ܐܳܡܰܪ ܐ̱ܢܳܐ .
                    ܠܳܐ ܗ̱ܘܳܐ ܡܰܚܢܽܘܩܺܝܬ݂ܳܐ ܪܳܡܶܐ ܐ̱ܢܳܐ ܠܟ݂ܽܘܢ ܆ ܐܶܠܳܐ ܕ݁ܬ݂ܶܗܘܽܘܢ ܐܰܡܺܝܢܺܝܢ ܠܘܳܬ݂
                    ܡܳܪܟ݂ܽܘܢ ܒ݁ܶܐܣܟ݁ܺܡܳܐ ܫܰܦ݁ܺܝܪܳܐ ܇ ܟ݁ܰܕ݂ ܠܳܐ ܪܳܢܶܝܢ ܐܢ̱ܬ݁ܽܘܢ ܒ݁ܥܳܠܡܳܐ .
                ܐܶܢ ܐ̱ܢܳܫ ܕ݁ܶܝܢ ܣܳܒ݂ܰܪ ܕ݁ܡܶܬ݂ܒ݁ܰܙܰܚ ܒ݁ܰܒ݂ܬ݂ܽܘܠܬ݁ܶܗ ܇
                    ܕ݁ܰܥܒ݂ܰܪ ܙܰܒ݂ܢܳܗ ܂ ܘܠܳܐ ܝܰܗܒ݁ܳܗ ܠܓ݂ܰܒ݂ܪܳܐ ܆ ܘܘܳܠܝܳܐ ܕ݁ܢܶܬ݁ܠܺܝܗ ܆ ܐܰܝܟ݂ ܕ݁ܨܳܒ݂ܶܐ
                    ܢܶܥܒ݁ܶܕ݂ . ܠܳܐ ܚܳܛܶܐ . ܬ݁ܶܙܕ݁ܰܘܰܓ݂ .
                ܐܰܝܢܳܐ ܕ݁ܶܝܢ ܕ݁ܫܰܪܺܝܪܳܐܝܺܬ݂ ܦ݁ܣܰܩ ܒ݁ܪܶܥܝܳܢܶܗ ܇ ܘܠܳܐ ܐܳܠܨܳܐ
                    ܠܶܗ ܨܒ݂ܽܘܬ݂ܳܐ ܇ ܘܫܰܠܺܝܛ ܥܰܠ ܨܶܒ݂ܝܳܢܶܗ ܇ ܘܗܳܟ݂ܰܢܳܐ ܕ݁ܳܢ ܒ݁ܠܶܒ݁ܶܗ ܂ ܕ݁ܢܶܛܰܪ
                    ܒ݁ܬ݂ܽܘܠܬ݁ܶܗ ܆ ܫܰܦ݁ܺܝܪ ܥܳܒ݂ܶܕ݂ .
                ܘܰܐܝܢܳܐ ܗܳܟ݂ܺܝܠ ܕ݁ܝܳܗܶܒ݂ ܒ݁ܬ݂ܽܘܠܬ݁ܶܗ ܆ ܫܰܦ݁ܺܝܪ ܥܳܒ݂ܶܕ݂ .
                    ܘܰܐܝܢܳܐ ܕ݁ܠܳܐ ܝܳܗܶܒ݂ ܒ݁ܬ݂ܽܘܠܬ݁ܶܗ ܆ ܝܰܬ݁ܺܝܪܳܐܝܺܬ݂ ܫܰܦ݁ܺܝܪ ܥܳܒ݂ܶܕ݂ ܀
                ܐܰܢ̱ܬ݁ܬ݂ܳܐ ܟ݁ܡܳܐ ܕ݁ܚܰܝ ܒ݁ܰܥܠܳܗ ܆ ܐܰܣܺܝܪܳܐ ܗ̱ܝ ܒ݁ܢܳܡܽܘܣܳܐ .
                    ܐܶܢ ܕ݁ܶܝܢ ܢܶܕ݂ܡܰܟ݂ ܒ݁ܰܥܠܳܗ ܆ ܡܚܰܪܪܳܐ ܗ̱ܝ ܕ݁ܬ݂ܶܗܘܶܐ ܠܡܰܢ ܕ݁ܨܳܒ݂ܝܳܐ . ܒ݁ܰܠܚܽܘܕ݂
                    ܒ݁ܡܳܪܰܢ .
                ܛܽܘܒ݂ܶܝܗ ܕ݁ܶܝܢ ܁ ܐܶܢ ܗܳܟ݂ܰܢܳܐ ܬ݁ܩܰܘܶܐ ܐܰܝܟ݂ ܪܶܥܝܳܢܝ ܕ݁ܺܝܠܝ .
                    ܣܳܒ݂ܰܪ ܐ̱ܢܳܐ ܕ݁ܶܝܢ ܐܳܦ݂ ܐܶܢܳܐ ܆ ܕ݁ܪܽܘܚܳܐ ܕ݁ܰܐܠܳܗܳܐ ܐܺܝܬ݂ ܒ݁ܺܝ ܀.܀.܀܀
            
            
                Chapter 8
                
                ܥܰܠ ܕ݁ܶܒ݂ܚܶܐ̈ ܕ݁ܶܝܢ ܕ݁ܰܦ݂ܬ݂ܰܟ݂ܪܶܐ̈ ܆ ܝܳܕ݂ܥܺܝܢܰܢ ܕ݁ܰܒ݂ܟ݂ܽܠܰܢ
                    ܐܺܝܬ݂ ܝܺܕ݂ܰܥܬ݂ܳܐ . ܘܺܝܕ݂ܰܥܬ݂ܳܐ ܡܰܚܬ݁ܪܳܐ ܆ ܚܽܘܒ݁ܳܐ ܕ݁ܶܝܢ ܒ݁ܳܢܶܐ .
                ܐܶܢ ܐ̱ܢܳܫ ܕ݁ܶܝܢ ܣܳܒ݂ܰܪ ܕ݁ܝܳܕ݂ܰܥ ܡܶܕ݁ܶܡ ܆ ܠܳܐ ܥܕ݂ܰܟ݁ܺܝܠ ܡܶܕ݁ܶܡ
                    ܝܺܕ݂ܰܥ ܂ ܐܰܝܟ݂ ܡܳܐ ܕ݁ܘܳܠܶܐ ܠܶܗ ܠܡܶܕ݁ܰܥ .
                ܐܶܢ ܐ̱ܢܳܫ ܕ݁ܶܝܢ ܡܰܚܶܒ݂ ܠܰܐܠܳܗܳܐ ܆ ܗܳܢܳܐ ܐܶܬ݂ܺܝܕ݂ܰܥ ܡܶܢܶܗ
                    ܀
                ܥܰܠ ܡܶܐܟ݂ܽܘܠܬ݁ܳܐ ܗܳܟ݂ܺܝܠ ܕ݁ܕ݂ܶܒ݂ܚܶܐ̈ ܕ݁ܰܦ݂ܬ݂ܰܟ݂ܪܶܐ̈ ܆
                    ܝܳܕ݂ܥܺܝܢܰܢ ܕ݁ܠܳܐ ܗ̱ܘܳܐ ܡܶܕ݁ܶܡ ܗ̱ܽܘ ܦ݁ܬ݂ܰܟ݂ܪܳܐ ܒ݁ܥܳܠܡܳܐ . ܘܰܕ݂ܠܰܝܬ݁ ܐܰܠܳܗ ܐ̱ܚܪܺܝܢ
                    ܐܶܠܳܐ ܐܶܢ ܚܰܕ݂ .
                ܐܳܦ݂ܶܢ ܓ݁ܶܝܪ ܐܺܝܬ݂ ܕ݁ܡܶܬ݂ܩܪܶܝܢ ܐܰܠܳܗܶܐ̈ ܂ ܐܰܘ ܒ݁ܰܫܡܰܝܳܐ ܁ ܐܰܘ
                    ܒ݁ܰܐܪܥܳܐ ܇ ܐܰܝܟ݁ܰܢܳܐ ܕ݁ܺܐܝܬ݂ ܐܰܠܳܗܶܐ̈ ܣܰܓ݁ܺܝܶܐܐ̈ ܂ ܘܡܳܪܰܘܳܬ݂ܳܐ̈ ܣܰܓ݁ܺܝܶܐܐ̈
                    ܆
                ܐܶܠܳܐ ܠܰܢ ܕ݁ܺܝܠܰܢ ܚܰܕ݂ ܗ̱ܽܘ ܐܰܠܳܗܳܐ ܂ ܐܰܒ݂ܳܐ . ܕ݁ܟ݂ܽܠ ܡܶܢܶܗ
                    ܘܰܚܢܰܢ ܒ݁ܶܗ . ܘܚܰܕ݂ ܡܳܪܝܳܐ ܝܶܫܽܘܥ ܡܫܺܝܚܳܐ . ܕ݁ܟ݂ܽܠ ܒ݁ܺܐܝܕ݂ܶܗ ܘܳܐܦ݂ ܚܢܰܢ
                    ܒ݁ܺܐܝܕ݂ܶܗ .
                ܐܶܠܳܐ ܠܳܐ ܗ̱ܘܳܐ ܒ݁ܟ݂ܽܠܢܳܫ ܝܺܕ݂ܰܥܬ݂ܳܐ . ܐܺܝܬ݂ ܓ݁ܶܝܪ ܐ̱ܢܳܫܳܐ
                    ܕ݁ܰܒ݂ܬ݂ܺܐܪܬ݁ܗܽܘܢ ܥܕ݂ܰܡܳܐ ܠܗܳܫܳܐ ܆ ܕ݁ܥܰܠ ܦ݁ܬ݂ܰܟ݂ܪܶܐ̈ ܐܰܝܟ݂ ܕ݁ܰܕ݂ܒ݂ܺܝܚܳܐ ܐܳܟ݂ܠܺܝܢ
                    . ܘܡܶܛܽܠ ܕ݁ܰܟ݂ܪܺܝܗܳܐ ܬ݁ܺܐܪܬ݁ܗܽܘܢ ܡܶܬ݁ܛܰܘܫܳܐ .
                ܡܶܐܟ݂ܽܘܠܬ݁ܳܐ ܕ݁ܶܝܢ ܠܳܐ ܡܩܰܪܒ݂ܳܐ ܠܰܢ ܠܰܐܠܳܗܳܐ . ܠܳܐ ܓ݁ܶܝܪ ܐܶܢ
                    ܐܳܟ݂ܠܺܝܢܰܢ ܡܶܬ݂ܝܰܬ݁ܪܺܝܢܰܢ ܆ ܘܠܳܐ ܐܶܢ ܠܳܐ ܢܶܐܟ݂ܽܘܠ ܡܶܬ݂ܒ݁ܰܨܪܺܝܢܰܢ .
                ܚܙܰܘ ܕ݁ܶܝܢ ܂ ܕ݁ܰܠܡܳܐ ܫܽܘܠܛܳܢܟ݂ܽܘܢ ܗܳܢܳܐ ܢܶܗܘܶܐ ܬ݁ܽܘܩܰܠܬ݁ܳܐ
                    ܠܰܟ݂ܪܺܝܗܶܐ̈ .
                ܐܶܢ ܐ̱ܢܳܫ ܓ݁ܶܝܪ ܢܶܚܙܶܝܟ݂ ܠܳܟ݂ ܂ ܕ݁ܺܐܝܬ݂ ܒ݁ܳܟ݂ ܝܺܕ݂ܰܥܬ݂ܳܐ ܂
                    ܕ݁ܰܣܡܺܝܟ݂ ܐܰܢ̱ܬ݁ ܒ݁ܶܝܬ݂ ܦ݁ܬ݂ܰܟ݂ܪܶܐ̈ ܆ ܠܳܐ ܗܳܐ ܬ݁ܺܐܪܬ݁ܶܗ ܡܶܛܽܠ ܕ݁ܰܟ݂ܪܺܝܗ ܗ̱ܽܘ ܇
                    ܡܶܫܬ݁ܰܪܪܳܐ ܠܡܶܐܟ݂ܰܠ ܕ݁ܰܕ݂ܒ݂ܺܝܚܳܐ ܆
                ܘܳܐܒ݂ܶܕ݂ ܠܶܗ ܒ݁ܺܝܕ݂ܰܥܬ݂ܳܟ݂ ܕ݁ܺܝܠܳܟ݂ ܗܰܘ ܐܰܝܢܳܐ ܕ݁ܰܡܪܰܥ ܇
                    ܕ݁ܡܶܛܽܠܳܬ݂ܶܗ ܡܺܝܬ݂ ܡܫܺܝܚܳܐ .
                ܘܶܐܢ ܗܳܟ݂ܰܢܳܐ ܡܰܣܟ݁ܠܺܝܢ ܐܢ̱ܬ݁ܽܘܢ ܒ݁ܰܐܚܰܝܟ݁ܽܘܢ̈ ܆ ܘܰܡܩܰܦ݁ܚܺܝܢ
                    ܐܢ̱ܬ݁ܽܘܢ ܬ݁ܺܐܪܳܬ݂ܗܽܘܢ̈ ܡܰܪܥܳܬ݂ܳܐ̈ ܆ ܒ݁ܰܡܫܺܝܚܳܐ ܗܽܘ ܡܰܣܟ݁ܠܺܝܢ ܐܢ̱ܬ݁ܽܘܢ .
                ܡܶܛܽܠ ܗܳܢܳܐ ܐܶܢ ܡܶܐܟ݂ܽܘܠܬ݁ܳܐ ܡܰܟ݂ܫܠܳܐ ܠܳܐܚܝ ܆ ܠܥܳܠܰܡ ܒ݁ܶܣܪܳܐ
                    ܠܳܐ ܐܶܟ݂ܽܘܠ ܂ ܕ݁ܠܳܐ ܐܰܟ݂ܫܶܠ ܠܳܐܚܝ ܀
            
            
                Chapter 9
                ܠܡܳܐ ܠܳܐ ܗ̱ܘܺܝܬ݂ ܒ݁ܰܪ ܚܺܐܪܶܐ̈ . ܐܰܘ ܠܳܐ ܗ̱ܘܺܝܬ݂ ܫܠܺܝܚܳܐ . ܐܰܘ
                    ܠܝܶܫܽܘܥ ܡܫܺܝܚܳܐ ܡܳܪܰܢ ܠܳܐ ܚܙܺܝܬ݂ . ܐܰܘ ܠܳܐ ܗ̱ܘܰܝܬ݁ܽܘܢ ܥܒ݂ܳܕ݂ܝ ܒ݁ܡܳܪܝ ܆
                ܘܶܐܢ ܠܰܐ̱ܚܪܳܢܶܐ̈ ܠܳܐ ܗ̱ܘܺܝܬ݂ ܫܠܺܝܚܳܐ ܆ ܐܶܠܳܐ ܠܟ݂ܽܘܢ ܐܺܝܬ݂ܰܝ .
                    ܘܚܳܬ݂ܡܳܐ ܕ݁ܰܫܠܺܝܚܽܘܬ݂ܝ ܐܰܢ̱ܬ݁ܽܘܢ ܐܶܢܽܘܢ .
                ܘܡܰܦ݁ܰܩ ܒ݁ܪܽܘܚܝ ܠܰܐܝܠܶܝܢ ܕ݁ܕ݂ܳܝܢܺܝܢ ܠܺܝ ܂ ܗܳܢܰܘ .
                ܠܡܳܐ ܠܳܐ ܫܰܠܺܝܛ ܠܰܢ ܠܡܶܐܟ݂ܰܠ ܘܰܠܡܶܫܬ݁ܳܐ .
                ܘܰܠܡܳܐ ܠܳܐ ܫܰܠܺܝܛ ܠܰܢ ܚܳܬ݂ܳܐ ܐܰܢ̱ܬ݁ܬ݂ܳܐ ܠܡܰܟ݂ܪܳܟ݂ܽܘ ܥܰܡܰܢ ܆
                    ܐܰܝܟ݂ ܫܰܪܟ݁ܳܐ ܕ݁ܰܫܠܺܝܚܶܐ̈ ܇ ܘܰܐܝܟ݂ ܐܰܚܰܘܗ̱ܝ̈ ܕ݁ܡܳܪܰܢ ܂ ܘܰܐܝܟ݂ ܟ݁ܺܐܦ݂ܳܐ .
                ܐܰܘ ܐܶܢܳܐ ܒ݁ܰܠܚܽܘܕ݂ ܘܒ݂ܰܪܢܰܒ݂ܰܐ ܂ ܠܰܝܬ݁ ܠܰܢ ܫܽܘܠܛܳܢܳܐ ܕ݁ܠܳܐ
                    ܢܶܦ݂ܠܽܘܚ ܆
                ܡܰܢܽܘ ܕ݁ܡܰܦ݂ܠܰܚ ܒ݁ܦ݂ܳܠܚܽܘܬ݂ܳܐ ܒ݁ܢܰܦ݂ܩܳܬ݂ܳܐ̈ ܕ݁ܢܰܦ݂ܫܶܗ . ܐܰܘ
                    ܡܰܢܽܘ ܕ݁ܢܳܨܶܒ݂ ܟ݁ܰܪܡܳܐ ܆ ܘܡܶܢ ܦ݁ܺܐܪܰܘܗ̱ܝ̈ ܠܳܐ ܐܳܟ݂ܶܠ . ܐܰܘ ܡܰܢܽܘ ܕ݁ܪܳܥܶܐ ܥܢܳܐ ܆
                    ܘܡܶܢ ܚܰܠܒ݂ܳܐ ܕ݁ܡܰܪܥܺܝܬ݂ܶܗ ܠܳܐ ܐܳܟ݂ܶܠ .
                ܕ݁ܰܠܡܳܐ ܐܰܝܟ݂ ܒ݁ܰܪܢܳܫܳܐ ܗܳܠܶܝܢ ܐܳܡܰܪ ܐ̱ܢܳܐ . ܗܳܐ ܐܳܦ݂
                    ܢܳܡܽܘܣܳܐ ܗܳܠܶܝܢ ܐܶܡܰܪ .
                ܟ݁ܬ݂ܺܝܒ݂ ܓ݁ܶܝܪ ܒ݁ܶܗ ܒ݁ܢܳܡܽܘܣܳܐ ܕ݁ܡܽܘܫܶܐ ܆ ܕ݁ܠܳܐ ܬ݁ܶܒ݂ܠܽܘܡ
                    ܬ݁ܰܘܪܳܐ ܕ݁ܡܰܕ݂ܪܶܟ݂ . ܠܡܳܐ ܥܰܠ ܬ݁ܰܘܪܶܐ̈ ܒ݁ܛܺܝܠ ܠܶܗ ܠܰܐܠܳܗܳܐ .
                ܐܶܠܳܐ ܝܺܕ݂ܺܝܥܳܐ ܕ݁ܡܶܛܽܠܳܬ݂ܰܢ ܗ̱ܽܘ ܐܶܡܰܪ ܇ ܘܡܶܛܽܠܳܬ݂ܰܢ ܓ݁ܶܝܪ
                    ܐܶܬ݂ܟ݁ܰܬ݂ܒ݁ܰܬ݂ ܆ ܡܶܛܽܠ ܕ݁ܥܰܠ ܣܰܒ݂ܪܳܐ ܗܽܘ ܘܳܠܶܐ ܠܶܗ ܠܟ݂ܳܪܽܘܒ݂ܳܐ ܕ݁ܢܶܟ݂ܪܽܘܒ݂ ܇
                    ܘܰܐܝܢܳܐ ܕ݁ܡܰܕ݂ܪܶܟ݂ ܥܰܠ ܣܰܒ݂ܪܳܐ ܕ݁ܰܥܠܰܠܬ݂ܳܐ .
                ܐܶܢ ܚܢܰܢ ܕ݁ܪܽܘܚܳܐ ܙܪܰܥܢ ܒ݁ܟ݂ܽܘܢ ܆ ܪܰܒ݁ܳܐ ܗ̱ܝ ܐܶܢ ܚܢܰܢ
                    ܡܶܢܟ݂ܽܘܢ ܕ݁ܦ݂ܰܓ݂ܪܳܐ ܢܶܚܨܽܘܕ݂ ܆
                ܘܶܐܢ ܠܰܐ̱ܚܪܳܢܶܐ̈ ܐܺܝܬ݂ ܠܗܽܘܢ ܫܽܘܠܛܳܢܳܐ ܥܠܰܝܟ݁ܽܘܢ ܆ ܠܳܐ ܠܰܢ
                    ܘܳܠܶܐ ܝܰܬ݁ܺܝܪܳܐܝܺܬ݂ ܆ ܐܶܠܳܐ ܠܳܐ ܐܶܬ݂ܚܰܫܰܚܢ ܒ݁ܫܽܘܠܛܳܢܳܐ ܗܳܢܳܐ . ܐܶܠܳܐ ܟ݁ܽܠܡܶܕ݁ܶܡ
                    ܡܣܰܝܒ݁ܪܺܝܢܰܢ ܆ ܕ݁ܰܒ݂ܡܶܕ݁ܶܡ ܠܳܐ ܢܬ݂ܰܟ݁ܶܣ ܣܒ݂ܰܪܬ݂ܶܗ ܕ݁ܰܡܫܺܝܚܳܐ ܀
                ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܆ ܕ݁ܰܐܝܠܶܝܢ ܕ݁ܒ݂ܶܝܬ݂ ܩܽܘܕ݂ܫܳܐ ܦ݁ܳܠܚܺܝܢ
                    ܆ ܡܶܢ ܒ݁ܶܝܬ݂ ܩܽܘܕ݂ܫܳܐ ܡܶܣܬ݁ܰܝܒ݁ܪܺܝܢ . ܘܰܐܝܠܶܝܢ ܕ݁ܰܠܡܰܕ݂ܒ݁ܚܳܐ ܦ݁ܳܠܚܺܝܢ ܆ ܥܰܡ
                    ܡܰܕ݂ܒ݁ܚܳܐ ܦ݁ܳܠܓ݁ܺܝܢ .
                ܗܳܟ݂ܰܢܳܐ ܐܳܦ݂ ܡܳܪܰܢ ܦ݁ܰܩܶܕ݂ ܆ ܕ݁ܰܐܝܠܶܝܢ ܕ݁ܰܣܒ݂ܰܪܬ݂ܶܗ
                    ܡܰܟ݂ܪܙܺܝܢ ܆ ܡܶܢ ܣܒ݂ܰܪܬ݂ܶܗ ܢܺܚܽܘܢ .
                ܐܶܢܳܐ ܕ݁ܶܝܢ ܠܳܐ ܐܶܬ݂ܚܰܫܚܶܬ݂ ܒ݁ܰܚܕ݂ܳܐ ܡܶܢ ܗܳܠܶܝܢ . ܘܠܰܘ ܡܶܛܽܠ
                    ܗܳܕ݂ܶܐ ܟ݁ܶܬ݂ܒ݁ܶܬ݂ ܆ ܕ݁ܗܳܟ݂ܰܢܳܐ ܢܶܗܘܶܐ ܠܺܝ . ܦ݁ܰܩܳܚ ܠܺܝ ܓ݁ܶܝܪ ܕ݁ܰܡܡܳܬ݂ ܐܶܡܽܘܬ݂ ܆
                    ܘܠܳܐ ܕ݁ܐ̱ܢܳܫ ܫܽܘܒ݂ܗܳܪܝ ܢܣܰܪܶܩ .
                ܐܳܦ݂ ܕ݁ܰܡܣܰܒ݁ܰܪ ܐ̱ܢܳܐ ܓ݁ܶܝܪ ܆ ܠܰܝܬ݁ ܠܺܝ ܫܽܘܒ݂ܗܳܪܳܐ . ܩܛܺܝܪܳܐ
                    ܓ݁ܶܝܪ ܣܺܝܡ ܥܠܰܝ . ܘܳܝ ܠܺܝ ܕ݁ܶܝܢ ܆ ܐܶܠܳܐ ܐܶܣܰܒ݁ܰܪ .
                ܐܶܢ ܓ݁ܶܝܪ ܒ݁ܨܶܒ݂ܝܳܢܝ ܗܳܕ݂ܶܐ ܣܳܥܰܪ ܐ̱ܢܳܐ ܆ ܐܰܓ݂ܪܳܐ ܐܺܝܬ݂ ܠܺܝ
                    . ܐܶܢ ܕ݁ܶܝܢ ܕ݁ܠܳܐ ܒ݁ܨܶܒ݂ܝܳܢܝ ܆ ܪܰܒ݁ܰܬ݂ ܒ݁ܰܝܬ݁ܽܘܬ݂ܳܐ ܗܽܘ ܡܗܰܝܡܰܢ ܐ̱ܢܳܐ .
                ܐܰܝܢܳܐ ܗܽܘ ܗܳܟ݂ܺܝܠ ܐܰܓ݂ܪܝ ܆ ܕ݁ܟ݂ܰܕ݂ ܡܣܰܒ݁ܰܪ ܐ̱ܢܳܐ ܆ ܕ݁ܠܳܐ
                    ܢܦ݂ܰܩܬ݂ܳܐ ܐܶܥܒ݁ܕ݂ܺܝܗ ܠܰܣܒ݂ܰܪܬ݂ܶܗ ܕ݁ܰܡܫܺܝܚܳܐ . ܘܠܳܐ ܐܶܬ݂ܚܰܫܰܚ ܒ݁ܫܽܘܠܛܳܢܳܐ ܂
                    ܕ݁ܝܰܗ̱ܒ݂ ܠܺܝ ܒ݁ܶܐܘܰܢܓ݁ܶܠܺܝܳܘܢ .
                ܟ݁ܰܕ݂ ܡܚܰܪܰܪ ܐ̱ܢܳܐ ܓ݁ܶܝܪ ܡܶܢ ܟ݁ܽܠܗܶܝܢ ܁ ܠܟ݂ܽܠܢܳܫ ܫܰܥܒ݁ܕ݂ܶܬ݂
                    ܢܰܦ݂ܫܝ ܆ ܕ݁ܰܠܣܰܓ݁ܺܝܶܐܐ̈ ܐܺܬ݂ܰܪ .
                ܘܰܗܘܺܝܬ݂ ܥܰܡ ܝܺܗܽܘܕ݂ܳܝܶܐ̈ ܐܰܝܟ݂ ܝܺܗܽܘܕ݂ܳܝܳܐ ܆
                    ܕ݁ܠܺܝܗܽܘܕ݂ܳܝܶܐ̈ ܐܺܬ݂ܰܪ . ܘܥܰܡ ܕ݁ܰܬ݂ܚܶܝܬ݂ ܢܳܡܽܘܣܳܐ ܐܶܢܽܘܢ ܆ ܗܘܺܝܬ݂ ܐܰܝܟ݂
                    ܕ݁ܰܬ݂ܚܶܝܬ݂ ܢܳܡܽܘܣܳܐ ܇ ܕ݁ܠܰܐܝܠܶܝܢ ܕ݁ܰܬ݂ܚܶܝܬ݂ ܢܳܡܽܘܣܳܐ ܐܶܢܽܘܢ ܐܺܬ݂ܰܪ .
                ܘܠܰܐܝܠܶܝܢ ܕ݁ܢܳܡܽܘܣܳܐ ܠܰܝܬ݁ ܠܗܽܘܢ ܆ ܗܘܺܝܬ݂ ܐܰܝܟ݂ ܕ݁ܠܳܐ ܢܳܡܽܘܣ
                    ܇ ܟ݁ܰܕ݂ ܠܳܐ ܐܺܝܬ݂ܰܝ ܠܰܐܠܳܗܳܐ ܕ݁ܠܳܐ ܢܳܡܽܘܣ ܇ ܐܶܠܳܐ ܒ݁ܢܳܡܽܘܣܶܗ ܕ݁ܰܡܫܺܝܚܳܐ ܇ ܕ݁ܳܐܦ݂
                    ܠܗܳܢܽܘܢ ܕ݁ܰܕ݂ܠܳܐ ܢܳܡܽܘܣ ܂ ܐܶܢܽܘܢ ܐܺܬ݂ܰܪ .
                ܗܘܺܝܬ݂ ܥܰܡ ܟ݁ܪܺܝܗܶܐ̈ ܐܰܝܟ݂ ܟ݁ܪܺܝܗܳܐ ܆ ܕ݁ܠܰܟ݂ܪܺܝܗܶܐ̈ ܐܺܬ݂ܰܪ .
                    ܠܟ݂ܽܠܢܳܫ ܟ݁ܽܠ ܗܘܺܝܬ݂ ܆ ܕ݁ܰܠܟ݂ܽܠܢܳܫ ܐܰܚܶܐ .
                ܗܳܕ݂ܶܐ ܕ݁ܶܝܢ ܥܳܒ݂ܶܕ݂ ܐ̱ܢܳܐ ܆ ܡܶܛܽܠ ܕ݁ܶܐܗܘܶܐ ܫܰܘܬ݁ܳܦ݂ܳܐ
                    ܠܰܣܒ݂ܰܪܬ݂ܳܐ ܀
                ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܰܐܝܠܶܝܢ ܕ݁ܒ݂ܶܐܣܛܰܕ݂ܺܝܳܘܢ ܪܳܗܛܺܝܢ ܆
                    ܟ݁ܽܠܗܽܘܢ ܗ̱ܽܘ ܪܳܗܛܺܝܢ ܇ ܐܶܠܳܐ ܚܰܕ݂ ܗ̱ܽܘ ܢܳܣܶܒ݂ ܠܳܗ ܙܳܟ݂ܽܘܬ݂ܳܐ . ܗܳܟ݂ܰܢܳܐ ܗܰܪ̱ܛܘ
                    ܂ ܐܰܝܟ݂ ܕ݁ܬ݂ܰܕ݂ܪܟ݂ܽܘܢ .
                ܟ݁ܽܠ ܐ̱ܢܳܫ ܕ݁ܶܝܢ ܕ݁ܰܐܓ݂ܽܘܢܳܐ ܥܳܒ݂ܶܕ݂ ܆ ܡܶܢ ܟ݁ܽܠ ܡܶܕ݁ܶܡ
                    ܐܳܚܶܕ݂ ܪܶܥܝܳܢܶܗ . ܘܗܳܠܶܝܢ ܪܳܗܛܺܝܢ ܕ݁ܢܶܣܒ݂ܽܘܢ ܟ݁ܠܺܝܠܳܐ ܕ݁ܡܶܬ݂ܚܰܒ݁ܰܠ ܆ ܚܢܰܢ ܕ݁ܶܝܢ
                    ܕ݁ܠܳܐ ܡܶܬ݂ܚܰܒ݁ܰܠ .
                ܐܶܢܳܐ ܗܳܟ݂ܺܝܠ ܗܳܟ݂ܰܢܳܐ ܪܳܗܶܛ ܐ̱ܢܳܐ . ܠܳܐ ܗ̱ܘܳܐ ܐܰܝܟ݂ ܕ݁ܥܰܠ
                    ܡܶܕ݁ܶܡ ܕ݁ܠܳܐ ܝܺܕ݂ܺܝܥ . ܘܗܳܟ݂ܰܢܳܐ ܡܶܬ݂ܟ݁ܰܬ݁ܰܫ ܐ̱ܢܳܐ . ܠܳܐ ܐܰܝܟ݂ ܗܰܘ ܕ݁ܠܳܐܐܰܪ
                    ܟ݁ܳܬ݂ܶܫ .
                ܐܶܠܳܐ ܦ݁ܰܓ݂ܪܝ ܗ̱ܽܘ ܟ݁ܳܒ݂ܶܫ ܐ̱ܢܳܐ ܘܰܡܫܰܥܒ݁ܶܕ݂ ܐ̱ܢܳܐ ܆
                    ܕ݁ܕ݂ܰܠܡܳܐ ܐ̱ܢܳܐ ܕ݁ܠܰܐ̱ܚܪܳܢܶܐ̈ ܐܰܟ݂ܪܙܶܬ݂ ܇ ܐܶܢܳܐ ܩܢܽܘܡܝ ܐܶܣܬ݁ܠܶܐ ܠܺܝ ܀.܀.܀܀
            
            
                Chapter 10
                
                ܨܳܒ݂ܶܐ ܐ̱ܢܳܐ ܕ݁ܶܝܢ ܕ݁ܬ݂ܶܕ݁ܥܽܘܢ ܐܰܚܰܝ̈ ܆ ܕ݁ܰܐܒ݂ܳܗܰܝܢ̈ ܟ݁ܽܠܗܽܘܢ
                    ܬ݁ܚܶܝܬ݂ ܥܢܳܢܳܐ ܗܘܰܘ . ܘܟ݂ܽܠܗܽܘܢ ܒ݁ܝܰܡܳܐ ܥܒ݂ܰܪܘ .
                ܘܟ݂ܽܠܗܽܘܢ ܒ݁ܝܰܕ݂ ܡܽܘܫܶܐ ܥܡܰܕ݂ܘ ܒ݁ܰܥܢܳܢܳܐ ܘܰܒ݂ܝܰܡܳܐ .
                ܘܟ݂ܽܠܗܽܘܢ ܚܕ݂ܳܐ ܡܶܐܟ݂ܽܘܠܬ݁ܳܐ ܕ݁ܪܽܘܚܳܐ ܐܶܟ݂ܰܠܘ .
                ܘܟ݂ܽܠܗܽܘܢ ܚܰܕ݂ ܡܰܫܬ݁ܝܳܐ ܕ݁ܪܽܘܚܳܐ ܐܶܫܬ݁ܺܝܘ . ܫܳܬ݂ܶܝܢ ܗ̱ܘܰܘ
                    ܓ݁ܶܝܪ ܡܶܢ ܟ݁ܺܐܦ݂ܳܐ ܕ݁ܪܽܘܚܳܐ ܕ݁ܳܐܬ݂ܝܳܐ ܗ̱ܘܳܬ݂ ܥܰܡܗܽܘܢ ܆ ܟ݁ܺܐܦ݂ܳܐ ܕ݁ܶܝܢ ܗܳܝ ܂ ܗܽܘ
                    ܗܘܳܐ ܡܫܺܝܚܳܐ .
                ܐܶܠܳܐ ܠܳܐ ܗ̱ܘܳܐ ܒ݁ܣܽܘܓ݂ܐܗܽܘܢ ܐܶܨܛܒ݂ܺܝ ܐܰܠܳܗܳܐ ܆ ܢܦ݂ܰܠܘ ܓ݁ܶܝܪ
                    ܒ݁ܡܰܕ݂ܒ݁ܪܳܐ .
                ܗܳܠܶܝܢ ܕ݁ܶܝܢ ܛܽܘܦ݂ܣܳܐ ܠܰܢ ܗ̱ܽܘ ܗܘܰܘ ܆ ܕ݁ܠܳܐ ܗܘܰܝܢ ܪܳܓ݁ܺܝܢ
                    ܒ݁ܺܝܫܳܬ݂ܳܐ̈ ܂ ܐܰܝܟ݁ܰܢܳܐ ܕ݁ܗܶܢܽܘܢ ܪܰܓ݂ܘ .
                ܘܳܐܦ݂ܠܳܐ ܢܶܗܘܶܐ ܦ݁ܳܠܚܰܝ̈ ܦ݁ܬ݂ܰܟ݂ܪܶܐ̈ ܇ ܐܰܝܟ݁ܰܢܳܐ ܕ݁ܳܐܦ݂
                    ܡܶܢܗܽܘܢ ܦ݁ܠܰܚܘ . ܐܰܝܟ݂ ܕ݁ܰܟ݂ܬ݂ܺܝܒ݂ ܆ ܕ݁ܺܝܬ݂ܶܒ݂ ܥܰܡܳܐ ܠܡܶܐܟ݂ܰܠ ܘܰܠܡܶܫܬ݁ܳܐ ܆ ܘܩܳܡܘ
                    ܠܡܶܫܬ݁ܥܳܝܽܘ .
                ܘܳܐܦ݂ܠܳܐ ܢܙܰܢܶܐ ܂ ܐܰܝܟ݁ܰܢܳܐ ܕ݁ܡܶܢܗܽܘܢ ܙܰܢܺܝܘ ܇ ܘܰܢܦ݂ܰܠܘ
                    ܒ݁ܚܰܕ݂ ܝܰܘܡܳܐ ܥܶܣܪܺܝܢ ܘܰܬ݂ܠܳܬ݂ܳܐ ܐܰܠܦ݂ܺܝܢ̈ .
                ܘܠܳܐ ܢܢܰܣܶܐ ܠܰܡܫܺܝܚܳܐ ܂ ܐܰܝܟ݁ܰܢܳܐ ܕ݁ܡܶܢܗܽܘܢ ܢܰܣܺܝܘ ܇
                    ܘܰܐܘܒ݁ܶܕ݂ܘ ܐܶܢܽܘܢ ܚܘܰܘܳܬ݂ܳܐ̈ .
                ܘܳܐܦ݂ܠܳܐ ܬ݁ܶܪܛܢܽܘܢ ܂ ܐܰܝܟ݁ܰܢܳܐ ܕ݁ܡܶܢܗܽܘܢ ܪܛܶܢܘ ܇ ܘܶܐܒ݂ܰܕ݂ܘ
                    ܒ݁ܺܐܝܕ݂ܰܝ̈ ܡܚܰܒ݁ܠܳܢܳܐ .
                ܗܳܠܶܝܢ ܕ݁ܶܝܢ ܟ݁ܽܠܗܶܝܢ ܕ݁ܰܓ݂ܕ݂ܰܫ ܠܗܽܘܢ ܂ ܠܛܽܘܦ݂ܣܰܢ ܗܘܰܝ̈ .
                    ܘܶܐܬ݂ܟ݁ܬ݂ܶܒ݂ ܡܶܛܽܠ ܡܰܪܕ݁ܽܘܬ݂ܳܐ ܕ݁ܺܝܠܰܢ ܇ ܕ݁ܚܰܪܬ݂ܗܽܘܢ ܕ݁ܥܳܠܡܶܐ̈ ܥܠܰܝܢ ܡܰܛܝܰܬ݂
                    ܀
                ܡܶܟ݁ܺܝܠ ܡܰܢ ܕ݁ܣܳܒ݂ܰܪ ܕ݁ܩܳܡ ܆ ܢܶܙܕ݁ܗܰܪ ܕ݁ܠܳܐ ܢܶܦ݁ܶܠ .
                ܢܶܣܝܽܘܢܳܐ ܠܳܐ ܡܰܛܺܝܟ݂ܽܘܢ ܂ ܐܶܠܳܐ ܕ݁ܰܒ݂ܢܰܝܢܳܫܳܐ̈ . ܡܗܰܝܡܰܢ
                    ܗ̱ܽܘ ܕ݁ܶܝܢ ܐܰܠܳܗܳܐ ܆ ܕ݁ܠܳܐ ܢܰܪܦ݁ܶܝܟ݂ܽܘܢ ܕ݁ܬ݂ܶܬ݂ܢܰܣܽܘܢ ܝܰܬ݁ܺܝܪ ܡܰܢ ܡܶܕ݁ܶܡ
                    ܕ݁ܰܡܨܶܝܢ ܐܢ̱ܬ݁ܽܘܢ . ܐܶܠܳܐ ܢܶܥܒ݁ܶܕ݂ ܠܢܶܣܝܽܘܢܟ݂ܽܘܢ ܡܰܦ݁ܩܳܢܳܐ ܆ ܐܰܝܟ݁ܰܢܳܐ
                    ܕ݁ܬ݂ܶܫܟ݁ܚܽܘܢ ܠܰܡܣܰܝܒ݁ܳܪܽܘ ܀
                ܡܶܛܽܠ ܗܳܢܳܐ ܚܰܒ݁ܺܝܒ݂ܰܝ̈ ܆ ܥܪܽܘܩܘ ܡܶܢ ܦ݁ܽܘܠܚܳܢܳܐ
                    ܕ݁ܰܦ݂ܬ݂ܰܟ݂ܪܶܐ̈ .
                ܐܰܝܟ݂ ܕ݁ܰܠܚܰܟ݁ܺܝܡܶܐ̈ ܐܳܡܰܪ ܐ̱ܢܳܐ . ܕ݁ܽܘܢܘ ܐܰܢ̱ܬ݁ܽܘܢ ܡܶܕ݁ܶܡ
                    ܕ݁ܳܐܡܰܪ ܐ̱ܢܳܐ .
                ܟ݁ܳܣܳܐ ܗܰܘ ܕ݁ܬ݂ܰܘܕ݁ܺܝܬ݂ܳܐ ܕ݁ܰܡܒ݂ܰܪܟ݂ܺܝܢܰܢ ܆ ܠܳܐ ܗ̱ܘܳܐ
                    ܫܰܘܬ݁ܳܦ݂ܽܘܬ݂ܳܐ ܐܺܝܬ݂ܰܘܗ̱ܝ ܕ݁ܰܕ݂ܡܶܗ ܕ݁ܰܡܫܺܝܚܳܐ ܆ ܘܠܰܚܡܳܐ ܗܰܘ ܕ݁ܩܳܨܶܝܢܰܢ ܆ ܠܳܐ
                    ܗ̱ܘܳܐ ܫܰܘܬ݁ܳܦ݂ܽܘܬ݂ܳܐ ܐܺܝܬ݂ܰܘܗ̱ܝ ܕ݁ܦ݂ܰܓ݂ܪܶܗ ܕ݁ܰܡܫܺܝܚܳܐ ܆
                ܐܰܝܟ݁ܰܢܳܐ ܕ݁ܚܰܕ݂ ܗ̱ܽܘ ܠܰܚܡܳܐ ܗܰܘ ܆ ܗܳܟ݂ܰܢܳܐ ܟ݁ܽܠܰܢ ܚܰܕ݂ ܚܢܰܢ
                    ܦ݁ܓ݂ܰܪ . ܟ݁ܽܠܰܢ ܓ݁ܶܝܪ ܡܶܢ ܗܰܘ ܗ̱ܽܘ ܚܰܕ݂ ܠܰܚܡܳܐ ܢܳܣܒ݁ܺܝܢܰܢ .
                ܚܙܰܘ ܠܺܐܝܣܪܳܝܶܠ ܕ݁ܒ݂ܰܒ݂ܣܰܪ . ܠܳܐ ܗ̱ܘܳܐ ܐܰܝܠܶܝܢ ܕ݁ܳܐܟ݂ܠܺܝܢ
                    ܕ݁ܶܒ݂ܚܶܐ̈ ܆ ܗܳܘܶܝܢ ܫܰܘܬ݁ܳܦ݂ܶܐ̈ ܠܡܰܕ݂ܒ݁ܚܳܐ ܆
                ܡܳܢܳܐ ܗܳܟ݂ܺܝܠ ܐܳܡܰܪ ܐ̱ܢܳܐ . ܕ݁ܰܦ݂ܬ݂ܰܟ݂ܪܳܐ ܡܶܕ݁ܶܡ ܐܺܝܬ݂ܰܘܗ̱ܝ
                    ܆ ܐܰܘ ܕ݁ܶܒ݂ܚܳܐ ܕ݁ܰܦ݂ܬ݂ܰܟ݂ܪܳܐ ܡܶܕ݁ܶܡ ܗ̱ܽܘ ܆ ܠܳܐ .
                ܐܶܠܳܐ ܗܰܘ ܡܶܕ݁ܶܡ ܕ݁ܕ݂ܳܒ݂ܚܺܝܢ ܚܰܢܦ݂ܶܐ̈ ܆ ܠܫܺܐܕ݂ܶܐ̈ ܗ̱ܘ
                    ܕ݁ܳܒ݂ܚܺܝܢ ܂ ܘܠܳܐ ܠܰܐܠܳܗܳܐ . ܠܳܐ ܕ݁ܶܝܢ ܨܳܒ݂ܶܐ ܐ̱ܢܳܐ ܕ݁ܬ݂ܶܗܘܽܘܢ ܫܰܘܬ݁ܳܦ݂ܶܐ̈
                    ܠܫܺܐܕ݂ܶܐ̈ .
                ܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܕ݁ܬ݂ܶܫܬ݁ܽܘܢ ܟ݁ܳܣܳܐ ܕ݁ܡܳܪܰܢ ܂ ܘܟ݂ܳܣܳܐ
                    ܕ݁ܫܺܐܕ݂ܶܐ̈ . ܘܠܳܐ ܡܶܫܟ݁ܚܺܝܢ ܐܢ̱ܬ݁ܽܘܢ ܕ݁ܬ݂ܶܫܬ݁ܰܘܬ݁ܦ݂ܽܘܢ ܒ݁ܦ݂ܳܬ݂ܽܘܪܳܐ ܕ݁ܡܳܪܰܢ ܂
                    ܘܰܒ݂ܦ݂ܳܬ݂ܽܘܪܳܐ ܕ݁ܫܺܐܕ݂ܶܐ̈ .
                ܐܰܘ ܕ݁ܰܠܡܳܐ ܡܰܛܳܢܽܘ ܡܰܛܢܺܝܢܰܢ ܠܡܳܪܰܢ ܆ ܕ݁ܰܠܡܳܐ ܚܰܣܺܝܢܺܝܢܰܢ
                    ܡܶܢܶܗ ܀
                ܟ݁ܽܠ ܡܶܕ݁ܶܡ ܫܰܠܺܝܛ ܠܺܝ ܆ ܐܶܠܳܐ ܠܳܐ ܟ݁ܽܠ ܡܶܕ݁ܶܡ ܦ݁ܰܩܳܚ . ܟ݁ܽܠ
                    ܡܶܕ݁ܶܡ ܫܰܠܺܝܛ ܠܺܝ ܆ ܐܶܠܳܐ ܠܳܐ ܟ݁ܽܠ ܡܶܕ݁ܶܡ ܡܒ݂ܰܢܶܐ .
                ܠܳܐ ܐ̱ܢܳܫ ܕ݁ܢܰܦ݂ܫܶܗ ܢܶܗܘܶܐ ܒ݁ܳܥܶܐ ܆ ܐܶܠܳܐ ܟ݁ܽܠܢܳܫ ܐܳܦ݂
                    ܕ݁ܚܰܒ݂ܪܶܗ .
                ܟ݁ܽܠܡܶܕ݁ܶܡ ܕ݁ܡܶܙܕ݁ܰܒ݁ܰܢ ܒ݁ܡܰܩܶܠܳܘܢ ܗܘܰܝܬ݁ܽܘܢ ܐܳܟ݂ܠܺܝܢ ܇
                    ܕ݁ܠܳܐ ܥܽܘܩܳܒ݂ܳܐ ܡܶܛܽܠ ܬ݁ܺܐܪܬ݁ܳܐ .
                ܕ݁ܡܳܪܝܳܐ ܗ̱ܝ ܓ݁ܶܝܪ ܐܰܪܥܳܐ ܒ݁ܰܡܠܳܐܳܗ .
                ܐܶܢ ܐ̱ܢܳܫ ܕ݁ܶܝܢ ܡܶܢ ܚܰܢܦ݂ܶܐ̈ ܁ ܩܳܪܶܐ ܠܟ݂ܽܘܢ ܆ ܘܨܳܒ݂ܶܝܢ
                    ܐܢ̱ܬ݁ܽܘܢ ܠܡܺܐܙܰܠ ܆ ܟ݁ܽܠܡܶܕ݁ܶܡ ܕ݁ܡܶܬ݁ܣܺܝܡ ܩܕ݂ܳܡܰܝܟ݁ܽܘܢ ܐܰܟ݂ܽܘܠܘ ܇ ܕ݁ܠܳܐ ܥܽܘܩܳܒ݂ܳܐ
                    ܡܶܛܽܠ ܬ݁ܺܐܪܬ݁ܳܐ .
                ܐܶܢ ܐ̱ܢܳܫ ܕ݁ܶܝܢ ܢܺܐܡܰܪ ܠܟ݂ܽܘܢ ܂ ܕ݁ܗܳܢܳܐ ܕ݁ܰܕ݂ܒ݂ܺܝܚܳܐ ܗܽܘ ܆
                    ܠܳܐ ܬ݁ܶܐܟ݂ܠܽܘܢ . ܡܶܛܽܠ ܗܰܘ ܕ݁ܳܐܡܰܪ ܠܟ݂ܽܘܢ ܂ ܘܡܶܛܽܠ ܬ݁ܺܐܪܬ݁ܳܐ .
                ܬ݁ܺܐܪܬ݁ܳܐ ܕ݁ܶܝܢ ܐܳܡܰܪ ܐ̱ܢܳܐ ܂ ܠܳܐ ܗ̱ܘܳܐ ܕ݁ܺܝܠܟ݂ܽܘܢ ܆ ܐܶܠܳܐ
                    ܕ݁ܗܰܘ ܕ݁ܳܐܡܰܪ . ܠܡܳܢܳܐ ܓ݁ܶܝܪ ܚܺܐܪܽܘܬ݂ܝ ܡܶܬ݁ܕ݂ܺܝܢܳܐ ܡܶܢ ܬ݁ܺܐܪܬ݁ܳܐ ܕ݁ܰܐ̱ܚܪܳܢܶܐ̈
                    .
                ܐܶܢ ܐܶܢܳܐ ܒ݁ܛܰܝܒ݁ܽܘܬ݂ܳܐ ܡܶܬ݂ܚܰܫܰܚ ܐ̱ܢܳܐ ܆ ܡܳܢܳܐ ܡܶܬ݂ܓ݁ܰܕ݁ܰܦ݂
                    ܐ̱ܢܳܐ ܥܰܠ ܡܶܕ݁ܶܡ ܕ݁ܶܐܢܳܐ ܡܰܘܕ݁ܶܐܢܳܐ .
                ܐܶܢ ܐܳܟ݂ܠܺܝܢ ܐܢ̱ܬ݁ܽܘܢ ܗܳܟ݂ܺܝܠ ܂ ܘܶܐܢ ܫܳܬ݂ܶܝܢ ܐܢ̱ܬ݁ܽܘܢ ܇ ܘܶܐܢ
                    ܡܶܕ݁ܶܡ ܥܳܒ݂ܕ݁ܺܝܢ ܐܢ̱ܬ݁ܽܘܢ ܆ ܟ݁ܽܠܡܶܕ݁ܶܡ ܠܬ݂ܶܫܒ݁ܽܘܚܬ݁ܳܐ ܕ݁ܰܐܠܳܗܳܐ ܗܘܰܝܬ݁ܽܘܢ
                    ܥܳܒ݂ܕ݁ܺܝܢ .
                ܕ݁ܠܳܐ ܬ݁ܽܘܩܠܳܐ ܗܘܰܘ ܠܺܝܗܽܘܕ݂ܳܝܶܐ̈ ܘܠܰܐܪܡܳܝܶܐ̈ ܘܰܠܥܺܕ̱݁ܬ݁ܶܗ
                    ܕ݁ܰܐܠܳܗܳܐ .
                ܐܰܝܟ݂ ܕ݁ܳܐܦ݂ ܐܶܢܳܐ ܒ݁ܟ݂ܽܠ ܡܶܕ݁ܶܡ ܠܟ݂ܽܠܢܳܫ ܫܳܦ݂ܰܪ ܐ̱ܢܳܐ ܆
                    ܘܠܳܐ ܒ݁ܳܥܶܐ ܐ̱ܢܳܐ ܡܶܕ݁ܶܡ ܕ݁ܠܺܝ ܦ݁ܰܩܳܚ ܆ ܐܶܠܳܐ ܡܶܕ݁ܶܡ ܕ݁ܰܠܣܰܓ݁ܺܝܶܐܐ̈ ܦ݁ܰܩܳܚ ܂
                    ܕ݁ܢܺܚܽܘܢ .
            
            
                Chapter 11
                ܐܶܬ݁ܕ݁ܰܡܰܘ ܒ݁ܺܝ ܆ ܐܰܝܟ݁ܰܢܳܐ ܕ݁ܳܐܦ݂ ܐܶܢܳܐ ܒ݁ܰܡܫܺܝܚܳܐ .
                ܡܫܰܒ݁ܰܚ ܐ̱ܢܳܐ ܠܟ݂ܽܘܢ ܕ݁ܶܝܢ ܐܰܚܰܝ̈ ܆ ܕ݁ܰܒ݂ܟ݂ܽܠ ܡܶܕ݁ܶܡ ܡܰܥ̱ܗܶܕ݂
                    ܐܢ̱ܬ݁ܽܘܢ ܠܺܝ ܇ ܘܰܐܝܟ݁ܰܢܳܐ ܕ݁ܰܐܫܠܡܶܬ݂ ܠܟ݂ܽܘܢ ܦ݁ܽܘܩܕ݁ܳܢܶܐ̈ ܂ ܐܰܚܺܝܕ݂ܺܝܢ ܐܢ̱ܬ݁ܽܘܢ
                    ܀
                ܨܳܒ݂ܶܐ ܐ̱ܢܳܐ ܕ݁ܶܝܢ ܕ݁ܬ݂ܶܕ݁ܥܽܘܢ ܆ ܕ݁ܟ݂ܽܠ ܓ݁ܒ݂ܰܪ ܪܺܫܶܗ ܡܫܺܝܚܳܐ
                    ܗܽܘ . ܘܪܺܫܳܗ ܕ݁ܰܐܢ̱ܬ݁ܬ݂ܳܐ ܓ݁ܰܒ݂ܪܳܐ ܗܽܘ . ܘܪܺܫܶܗ ܕ݁ܰܡܫܺܝܚܳܐ ܐܰܠܳܗܳܐ ܗܽܘ .
                ܟ݁ܽܠ ܓ݁ܰܒ݂ܪܳܐ ܕ݁ܰܡܨܰܠܶܐ ܐܰܘ ܡܶܬ݂ܢܰܒ݁ܶܐ ܂ ܟ݁ܰܕ݂ ܡܟ݂ܰܣܰܝ ܪܺܫܶܗ
                    ܆ ܡܰܒ݂ܗܶܬ݂ ܪܺܫܶܗ .
                ܘܟ݂ܽܠ ܐܰܢ̱ܬ݁ܬ݂ܳܐ ܕ݁ܰܡܨܰܠܝܳܐ ܐܰܘ ܡܶܬ݂ܢܰܒ݁ܝܳܐ ܂ ܟ݁ܰܕ݂ ܓ݁ܠܶܐ
                    ܪܺܫܳܗ ܆ ܡܰܒ݂ܗܬ݂ܳܐ ܪܺܫܳܗ . ܫܰܘܝܳܐ ܗ̱ܝ ܓ݁ܶܝܪ ܥܰܡ ܗܳܝ ܕ݁ܰܓ݂ܪܺܝܥ ܪܺܫܳܗ .
                ܐܶܢ ܓ݁ܶܝܪ ܠܳܐ ܡܶܬ݂ܟ݁ܰܣܝܳܐ ܐܰܢ̱ܬ݁ܬ݂ܳܐ ܂ ܐܳܦ݂ ܬ݁ܶܣܬ݁ܰܦ݁ܰܪ . ܐܶܢ
                    ܕ݁ܶܝܢ ܡܫܰܟ݁ܰܪ ܗ̱ܽܘ ܠܰܐܢ̱ܬ݁ܬ݂ܳܐ ܠܡܶܣܬ݁ܰܦ݁ܳܪܽܘ ܐܰܘ ܠܡܶܓ݂ܪܰܥ ܂ ܬ݁ܶܬ݂ܟ݁ܰܣܶܐ .
                ܓ݁ܰܒ݂ܪܳܐ ܓ݁ܶܝܪ ܠܳܐ ܚܰܝܳܒ݂ ܕ݁ܰܢܟ݂ܰܣܶܐ ܪܺܫܶܗ ܆ ܡܶܛܽܠ
                    ܕ݁ܰܕ݂ܡܽܘܬ݂ܳܐ ܗܽܘ ܘܬ݂ܶܫܒ݁ܽܘܚܬ݁ܳܐ ܕ݁ܰܐܠܳܗܳܐ . ܐܰܢ̱ܬ݁ܬ݂ܳܐ ܕ݁ܶܝܢ ܬ݁ܶܫܒ݁ܽܘܚܬ݁ܳܐ ܗ̱ܝ
                    ܕ݁ܓ݂ܰܒ݂ܪܳܐ .
                ܠܳܐ ܓ݁ܶܝܪ ܐܺܝܬ݂ܰܘܗ̱ܝ ܓ݁ܰܒ݂ܪܳܐ ܡܶܢ ܐܰܢ̱ܬ݁ܬ݂ܳܐ ܆ ܐܶܠܳܐ
                    ܐܰܢ̱ܬ݁ܬ݂ܳܐ ܡܶܢ ܓ݁ܰܒ݂ܪܳܐ .
                ܘܳܐܦ݂ܠܳܐ ܓ݁ܶܝܪ ܓ݁ܰܒ݂ܪܳܐ ܐܶܬ݂ܒ݁ܪܺܝ ܡܶܛܽܠ ܐܰܢ̱ܬ݁ܬ݂ܳܐ ܆ ܐܶܠܳܐ
                    ܐܰܢ̱ܬ݁ܬ݂ܳܐ ܡܶܛܽܠ ܓ݁ܰܒ݂ܪܳܐ .
                ܡܶܛܽܠ ܗܳܢܳܐ ܚܰܝܳܒ݂ܳܐ ܐܰܢ̱ܬ݁ܬ݂ܳܐ ܆ ܕ݁ܫܽܘܠܛܳܢܳܐ ܢܶܗܘܶܐ ܥܰܠ
                    ܪܺܫܳܗ ܇ ܡܶܛܽܠ ܡܰܠܰܐܟ݂ܶܐ̈ .
                ܒ݁ܪܰܡ ܕ݁ܶܝܢ ܠܳܐ ܓ݁ܰܒ݂ܪܳܐ ܠܒ݂ܰܪ ܡܶܢ ܐܰܢ̱ܬ݁ܬ݂ܳܐ ܆ ܐܳܦ݂ܠܳܐ
                    ܐܰܢ̱ܬ݁ܬ݂ܳܐ ܠܒ݂ܰܪ ܡܶܢ ܓ݁ܰܒ݂ܪܳܐ ܂ ܒ݁ܡܳܪܰܢ .
                ܐܰܝܟ݁ܰܢܳܐ ܓ݁ܶܝܪ ܕ݁ܰܐܢ̱ܬ݁ܬ݂ܳܐ ܡܶܢ ܓ݁ܰܒ݂ܪܳܐ ܆ ܗܳܟ݂ܰܢܳܐ ܐܳܦ݂
                    ܓ݁ܰܒ݂ܪܳܐ ܒ݁ܝܰܕ݂ ܐܰܢ̱ܬ݁ܬ݂ܳܐ . ܟ݁ܽܠܡܶܕ݁ܶܡ ܕ݁ܶܝܢ ܡܶܢ ܐܰܠܳܗܳܐ ܗܽܘ .
                ܕ݁ܽܘܢܘ ܒ݁ܰܝܢܰܝܟ݁ܽܘܢ ܠܢܰܦ݂ܫܟ݂ܽܘܢ . ܝܳܐܶܐ ܠܰܐܢ̱ܬ݁ܬ݂ܳܐ ܕ݁ܟ݂ܰܕ݂
                    ܓ݁ܠܶܐ ܪܺܫܳܗ ܬ݁ܨܰܠܶܐ ܠܰܐܠܳܗܳܐ ܆
                ܐܳܦ݂ܠܳܐ ܗܽܘ ܟ݁ܝܳܢܳܐ ܡܰܠܶܦ݂ ܠܟ݂ܽܘܢ ܆ ܕ݁ܓ݂ܰܒ݂ܪܳܐ ܡܳܐ ܕ݁ܩܳܐܶܡ
                    ܣܰܥܪܶܗ ܇ ܨܰܥܪܳܐ ܗܽܘ ܠܶܗ .
                ܘܰܐܢ̱ܬ݁ܬ݂ܳܐ ܡܳܐ ܕ݁ܰܡܪܰܒ݁ܰܝ ܣܰܥܪܳܗ ܆ ܬ݁ܶܫܒ݁ܽܘܚܬ݁ܳܐ ܗ̱ܝ ܠܳܗ ܇
                    ܡܶܛܽܠ ܕ݁ܣܰܥܪܳܗ ܚܠܳܦ݂ ܬ݁ܰܟ݂ܣܺܝܬ݂ܳܐ ܗܽܘ ܐܶܬ݂ܺܝܗܶܒ݂ ܠܳܗ .
                ܐܶܢ ܐ̱ܢܳܫ ܕ݁ܶܝܢ ܡܶܬ݂ܚܪܶܐ ܥܰܠ ܗܳܠܶܝܢ ܆ ܠܰܢ ܠܰܝܬ݁ ܥܝܳܕ݂ܳܐ
                    ܐܰܝܟ݂ ܗܳܢܳܐ ܇ ܘܠܳܐ ܠܥܺܕ̱݁ܬ݁ܶܗ ܕ݁ܰܐܠܳܗܳܐ ܀.܀.܀܀
                
                ܗܳܕ݂ܶܐ ܕ݁ܶܝܢ ܕ݁ܰܡܦ݂ܰܩܶܕ݂ ܐ̱ܢܳܐ ܆ ܠܳܐ ܐܰܝܟ݂ ܡܫܰܒ݁ܰܚ ܐ̱ܢܳܐ
                    ܠܟ݂ܽܘܢ . ܡܶܛܽܠ ܕ݁ܠܳܐ ܗ̱ܘܳܐ ܠܰܩܕ݂ܳܡܰܝܟ݁ܽܘܢ ܐܶܬ݂ܰܝܬ݁ܽܘܢ ܆ ܐܶܠܳܐ ܠܰܒ݂ܨܺܝܪܽܘܬ݂ܳܐ ܗܽܘ
                    ܢܚܶܬ݁ܬ݁ܽܘܢ .
                ܠܽܘܩܕ݂ܰܡ ܓ݁ܶܝܪ ܡܳܐ ܕ݁ܡܶܬ݂ܟ݁ܰܢܫܺܝܢ ܐܢ̱ܬ݁ܽܘܢ ܒ݁ܥܺܕ̱݁ܬ݁ܳܐ ܆
                    ܦ݁ܳܠܰܓ݂ܘܳܬ݂ܳܐ̈ ܫܳܡܰܥ ܐ̱ܢܳܐ ܕ݁ܺܐܝܬ݂ ܒ݁ܰܝܢܳܬ݂ܟ݂ܽܘܢ . ܘܡܶܕ݁ܶܡ ܡܶܕ݁ܶܡ ܡܗܰܝܡܶܢ ܐ̱ܢܳܐ
                    .
                ܥܬ݂ܺܝܕ݂ܺܝܢ ܐܶܢܽܘܢ ܓ݁ܶܝܪ ܐܳܦ݂ ܚܶܪܝܳܢܶܐ̈ ܕ݁ܢܶܗܘܽܘܢ
                    ܒ݁ܰܝܢܳܬ݂ܟ݂ܽܘܢ ܆ ܕ݁ܰܐܝܠܶܝܢ ܕ݁ܰܒ݂ܩܶܝܢ ܒ݁ܟ݂ܽܘܢ ܢܶܬ݂ܝܰܕ݂ܥܽܘܢ .
                ܡܳܐ ܗܳܟ݂ܺܝܠ ܕ݁ܡܶܬ݂ܟ݁ܰܢܫܺܝܢ ܐܢ̱ܬ݁ܽܘܢ ܆ ܠܰܘ ܐܰܝܟ݂ ܕ݁ܙܳܕ݂ܶܩ
                    ܠܝܰܘܡܶܗ ܕ݁ܡܳܪܰܢ ܂ ܐܳܟ݂ܠܺܝܢ ܐܢ̱ܬ݁ܽܘܢ ܘܫܳܬ݂ܶܝܢ .
                ܐܶܠܳܐ ܐ̱ܢܳܫ ܐ̱ܢܳܫ ܚܫܳܡܺܝܬ݂ܶܗ ܩܳܕ݂ܶܡ ܐܳܟ݂ܶܠ ܠܳܗ . ܘܗܳܘܶܐ ܚܰܕ݂
                    ܟ݁ܦ݂ܶܢ ܂ ܘܚܰܕ݂ ܪܘܶܐ .
                ܕ݁ܰܠܡܳܐ ܒ݁ܳܬ݁ܶܐ̈ ܠܰܝܬ݁ ܠܟ݂ܽܘܢ ܕ݁ܬ݂ܶܐܟ݂ܠܽܘܢ ܘܬ݂ܶܫܬ݁ܽܘܢ ܆ ܐܰܘ
                    ܒ݁ܥܺܕ̱݁ܬ݁ܶܗ ܕ݁ܰܐܠܳܗܳܐ ܒ݁ܳܣܶܝܢ ܐܢ̱ܬ݁ܽܘܢ ܇ ܘܡܰܒ݂ܗܬ݂ܺܝܢ ܐܢ̱ܬ݁ܽܘܢ ܠܰܐܝܠܶܝܢ ܕ݁ܠܰܝܬ݁
                    ܠܗܽܘܢ . ܡܳܢܳܐ ܐܺܡܰܪ ܠܟ݂ܽܘܢ ܆ ܐܶܫܰܒ݁ܰܚܟ݂ܽܘܢ ܒ݁ܗܳܕ݂ܶܐ ܆ ܠܳܐ ܡܫܰܒ݁ܰܚ ܐ̱ܢܳܐ .
                ܐܶܢܳܐ ܓ݁ܶܝܪ ܩܰܒ݁ܠܶܬ݂ ܡܶܢ ܡܳܪܰܢ ܆ ܗܰܘ ܡܶܕ݁ܶܡ ܕ݁ܰܐܫܠܡܶܬ݂
                    ܠܟ݂ܽܘܢ . ܕ݁ܡܳܪܰܢ ܝܶܫܽܘܥ ܂ ܒ݁ܗܰܘ ܠܺܠܝܳܐ ܕ݁ܡܶܫܬ݁ܠܶܡ ܗ̱ܘܳܐ ܆ ܢܣܰܒ݂ ܗ̱ܘܳܐ ܠܰܚܡܳܐ
                    ܁
                ܘܒ݂ܰܪܶܟ݂ ܘܰܩܨܳܐ ܂ ܘܶܐܡܰܪ . ܣܰܒ݂ܘ ܂ ܐܰܟ݂ܽܘܠܘ . ܗܳܢܰܘ ܦ݁ܰܓ݂ܪܝ
                    ܁ ܕ݁ܥܰܠ ܐܰܦ݁ܰܝܟ݁ܽܘܢ̈ ܡܶܬ݂ܩܨܶܐ . ܗܳܟ݂ܰܢܳܐ ܗܘܰܝܬ݁ܽܘܢ ܥܳܒ݂ܕ݁ܺܝܢ ܠܕ݂ܽܘܟ݂ܪܳܢܝ .
                ܗܳܟ݂ܰܢܳܐ ܡܶܢ ܒ݁ܳܬ݂ܰܪ ܕ݁ܰܐܚܫܶܡܘ ܆ ܐܳܦ݂ ܟ݁ܳܣܳܐ ܝܰܗ̱ܒ݂ ܂ ܘܶܐܡܰܪ
                    . ܗܳܢܳܐ ܟ݁ܳܣܳܐ ܐܺܝܬ݂ܰܘܗ̱ܝ ܕ݁ܺܝܰܬ݂ܺܩܺܐ ܚܕ݂ܰܬ݂ܳܐ ܒ݁ܕ݂ܶܡܝ . ܗܳܟ݂ܰܢܳܐ ܗܘܰܝܬ݁ܽܘܢ
                    ܥܳܒ݂ܕ݁ܺܝܢ ܇ ܟ݁ܽܠ ܐܶܡܰܬ݂ܝ ܕ݁ܫܳܬ݂ܶܝܢ ܐܢ̱ܬ݁ܽܘܢ ܂ ܠܕ݂ܽܘܟ݂ܪܳܢܝ .
                ܟ݁ܽܠ ܐܶܡܰܬ݂ܝ ܓ݁ܶܝܪ ܕ݁ܳܐܟ݂ܠܺܝܢ ܐܢ̱ܬ݁ܽܘܢ ܠܰܚܡܳܐ ܗܳܢܳܐ ܁
                    ܘܫܳܬ݂ܶܝܢ ܐܢ̱ܬ݁ܽܘܢ ܟ݁ܳܣܳܐ ܗܳܢܳܐ ܆ ܡܰܘܬ݁ܶܗ ܗ̱ܽܘ ܕ݁ܡܳܪܰܢ ܡܰܥ̱ܗܕ݁ܺܝܢ ܐܢ̱ܬ݁ܽܘܢ ܂
                    ܥܕ݂ܰܡܳܐ ܠܡܶܐܬ݂ܺܝܬ݂ܶܗ .
                ܐܰܝܢܳܐ ܗܳܟ݂ܺܝܠ ܕ݁ܳܐܟ݂ܶܠ ܡܶܢ ܠܰܚܡܶܗ ܕ݁ܡܳܪܝܳܐ ܁ ܘܫܳܬ݂ܶܐ ܡܶܢ
                    ܟ݁ܳܣܶܗ ܂ ܘܠܳܐ ܫܳܘܶܐ ܠܶܗ ܆ ܡܚܰܝܰܒ݂ ܗ̱ܽܘ ܠܰܕ݂ܡܶܗ ܕ݁ܡܳܪܝܳܐ ܘܰܠܦ݂ܰܓ݂ܪܶܗ .
                ܡܶܛܽܠ ܗܳܢܳܐ ܢܶܗܘܶܐ ܐ̱ܢܳܫ ܒ݁ܳܩܶܐ ܢܰܦ݂ܫܶܗ ܆ ܘܗܳܝܕ݁ܶܝܢ ܐܳܟ݂ܶܠ
                    ܡܶܢ ܠܰܚܡܳܐ ܗܳܢܳܐ ܂ ܘܫܳܬ݂ܶܐ ܡܶܢ ܟ݁ܳܣܳܐ ܗܳܢܳܐ .
                ܡܰܢ ܕ݁ܳܐܟ݂ܶܠ ܓ݁ܶܝܪ ܘܫܳܬ݂ܶܐ ܡܶܢܶܗ ܟ݁ܰܕ݂ ܠܳܐ ܫܳܘܶܐ ܆ ܚܽܘܝܳܒ݂ܳܐ
                    ܗ̱ܘ ܠܢܰܦ݂ܫܶܗ ܐܳܟ݂ܶܠ ܘܫܳܬ݂ܶܐ ܇ ܕ݁ܠܳܐ ܦ݁ܪܰܫ ܦ݁ܰܓ݂ܪܶܗ ܕ݁ܡܳܪܝܳܐ .
                ܡܶܛܽܠ ܗܳܢܳܐ ܣܰܓ݁ܺܝܐܝܺܢ̈ ܒ݁ܟ݂ܽܘܢ ܡܰܪܥܶܐ̈ ܘܰܟ݂ܪܺܝܗܶܐ̈ ܆
                    ܘܣܰܓ݁ܺܝܶܐܐ̈ ܕ݁ܕ݂ܳܡܟ݁ܺܝ
                ܐܶܠܽܘ ܓ݁ܶܝܪ ܢܰܦ݂ܫܰܢ ܕ݁ܳܝܢܺܝܢ ܗ̱ܘܰܝܢ ܆ ܠܳܐ ܡܶܬ݁ܕ݂ܺܝܢܺܝܢ
                    ܗ̱ܘܰܝܢ .
                ܟ݁ܰܕ݂ ܡܶܬ݁ܕ݂ܺܝܢܺܝܢܰܢ ܕ݁ܶܝܢ ܡܶܢ ܡܳܪܰܢ ܆ ܡܶܬ݂ܪܕ݂ܳܝܽܘ
                    ܡܶܬ݂ܪܕ݂ܶܝܢܰܢ ܇ ܕ݁ܠܳܐ ܥܰܡ ܥܳܠܡܳܐ ܢܶܬ݂ܚܰܝܰܒ݂ ܀
                ܡܶܟ݁ܺܝܠ ܐܰܚܰܝ̈ ܆ ܐܶܡܰܬ݂ܝ ܕ݁ܡܶܬ݂ܟ݁ܰܢܫܺܝܢ ܐܢ̱ܬ݁ܽܘܢ ܠܡܶܐܟ݂ܰܠ ܆
                    ܗܘܰܝܬ݁ܽܘܢ ܡܩܰܘܶܝܢ ܚܰܕ݂ ܠܚܰܕ݂ .
                ܡܰܢ ܕ݁ܶܝܢ ܕ݁ܰܟ݂ܦ݂ܶܢ ܁ ܒ݁ܒ݂ܰܝܬ݁ܶܗ ܢܶܠܥܰܣ ܆ ܕ݁ܠܳܐ
                    ܠܚܰܝܳܒ݂ܽܘܬ݂ܳܐ ܬ݁ܶܗܘܽܘܢ ܡܶܬ݂ܟ݁ܰܢܫܺܝܢ . ܥܰܠ ܫܰܪܟ݁ܳܐ ܕ݁ܶܝܢ ܂ ܡܳܐ ܕ݁ܶܐܬ݂ܺܝܬ݂
                    ܐܶܦ݁ܰܩܶܕ݂ܟ݂ܽܘܢ ܀
            
            
                Chapter 12
                ܥܰܠ ܪܽܘܚܳܢܝܳܬ݂ܳܐ̈ ܕ݁ܶܝܢ ܐܰܚܰܝ̈ ܆ ܨܳܒ݂ܶܐ ܐ̱ܢܳܐ ܕ݁ܬ݂ܶܕ݁ܥܽܘܢ
                    ܁
                ܕ݁ܚܰܢܦ݂ܶܐ̈ ܗ̱ܘܰܝܬ݁ܽܘܢ ܇ ܘܠܰܦ݂ܬ݂ܰܟ݂ܪܶܐ̈ ܐܰܝܠܶܝܢ ܕ݁ܠܰܝܬ݁ ܠܗܽܘܢ
                    ܩܳܠܳܐ ܁ ܕ݁ܠܳܐ ܦ݁ܽܘܪܫܳܢ ܡܶܬ݁ܕ݁ܰܒ݂ܪܺܝܢ ܗ̱ܘܰܝܬ݁ܽܘܢ .
                ܡܶܛܽܠ ܗܳܢܳܐ ܡܰܘܕ݁ܰܥ ܐ̱ܢܳܐ ܠܟ݂ܽܘܢ ܆ ܕ݁ܠܰܝܬ݁ ܐ̱ܢܳܫ ܕ݁ܰܒ݂ܪܽܘܚܳܐ
                    ܕ݁ܰܐܠܳܗܳܐ ܡܡܰܠܶܠ ܇ ܘܳܐܡܰܪ ܕ݁ܰܚܪܶܡ ܗ̱ܽܘ ܝܶܫܽܘܥ . ܘܳܐܦ݂ܠܳܐ ܐ̱ܢܳܫ ܡܶܫܟ݁ܰܚ ܠܡܺܐܡܰܪ
                    ܕ݁ܡܳܪܝܳܐ ܗܽܘ ܝܶܫܽܘܥ ܇ ܐܶܠܳܐ ܐܶܢ ܒ݁ܪܽܘܚܳܐ ܕ݁ܩܽܘܕ݂ܫܳܐ .
                ܦ݁ܽܘܠܳܓ݂ܶܐ̈ ܕ݁ܶܝܢ ܕ݁ܡܰܘܗܒ݂ܳܬ݂ܳܐ̈ ܐܺܝܬ݂ܰܝܗܽܘܢ . ܐܶܠܳܐ ܚܕ݂ܳܐ
                    ܗ̱ܝ ܪܽܘܚܳܐ .
                ܘܦ݂ܽܘܠܳܓ݂ܶܐ̈ ܕ݁ܬ݂ܶܫܡܫܳܬ݂ܳܐ̈ ܐܺܝܬ݂ܰܝܗܽܘܢ . ܐܶܠܳܐ ܚܰܕ݂ ܗ̱ܽܘ
                    ܡܳܪܝܳܐ .
                ܘܦ݂ܽܘܠܳܓ݂ܶܐ̈ ܕ݁ܚܰܝܠܰܘܳܬ݂ܳܐ̈ ܐܺܝܬ݂ . ܐܶܠܳܐ ܚܰܕ݂ ܗ̱ܽܘ ܐܰܠܳܗܳܐ ܂
                    ܕ݁ܡܰܥܒ݁ܶܕ݂ ܟ݁ܽܠ ܒ݁ܟ݂ܽܠܢܳܫ .
                ܠܐ̱ܢܳܫ ܐ̱ܢܳܫ ܕ݁ܶܝܢ ܆ ܡܶܬ݂ܺܝܗܶܒ݂ ܠܶܗ ܓ݁ܶܠܝܳܢܳܐ ܕ݁ܪܽܘܚܳܐ ܂
                    ܐܰܝܟ݂ ܕ݁ܥܳܕ݂ܪܳܐ ܠܶܗ .
                ܐܺܝܬ݂ ܕ݁ܺܝܗܺܝܒ݂ܳܐ ܠܶܗ ܒ݁ܪܽܘܚܳܐ ܡܶܠܬ݂ܳܐ ܕ݁ܚܶܟ݂ܡܬ݂ܳܐ .
                    ܠܰܐ̱ܚܪܺܢܳܐ ܕ݁ܶܝܢ ܡܶܠܬ݂ܳܐ ܕ݁ܺܝܕ݂ܰܥܬ݂ܳܐ ܂ ܒ݁ܳܗ ܒ݁ܪܽܘܚܳܐ .
                ܠܰܐ̱ܚܪܺܢܳܐ ܗܰܝܡܳܢܽܘܬ݂ܳܐ ܂ ܒ݁ܳܗ ܒ݁ܪܽܘܚܳܐ . ܠܰܐ̱ܚܪܺܢܳܐ
                    ܡܰܘܗܒ݂ܳܬ݂ܳܐ̈ ܕ݁ܳܐܣܝܽܘܬ݂ܳܐ ܂ ܒ݁ܳܗ ܒ݁ܪܽܘܚܳܐ .
                ܠܰܐ̱ܚܪܺܢܳܐ ܕ݁ܶܝܢ ܚܰܝܠܶܐ̈ . ܠܰܐ̱ܚܪܺܢܳܐ ܕ݁ܶܝܢ ܢܒ݂ܺܝܽܘܬ݂ܳܐ .
                    ܠܰܐ̱ܚܪܺܢܳܐ ܕ݁ܶܝܢ ܦ݁ܳܪܽܘܫܽܘܬ݂ܳܐ ܕ݁ܪܽܘܚܶܐ̈ . ܠܰܐ̱ܚܪܺܢܳܐ ܕ݁ܶܝܢ ܙܢܰܝܳܐ̈ ܕ݁ܠܶܫܳܢܶܐ̈ .
                    ܠܰܐ̱ܚܪܺܢܳܐ ܕ݁ܶܝܢ ܦ݁ܽܘܫܳܩܳܐ ܕ݁ܠܶܫܳܢܶܐ̈ .
                ܟ݁ܽܠܗܶܝܢ ܕ݁ܶܝܢ ܗܳܠܶܝܢ ܚܕ݂ܳܐ ܗ̱ܝ ܪܽܘܚܳܐ ܣܳܥܪܳܐ . ܘܰܡܦ݂ܰܠܓ݂ܳܐ
                    ܠܟ݂ܽܠܢܳܫ ܐܰܝܟ݂ ܕ݁ܗܺܝ ܨܳܒ݂ܝܳܐ .
                ܐܰܟ݂ܙܢܳܐ ܓ݁ܶܝܪ ܕ݁ܦ݂ܰܓ݂ܪܳܐ ܚܰܕ݂ ܗ̱ܽܘ ܇ ܘܺܐܝܬ݂ ܒ݁ܶܗ ܗܰܕ݁ܳܡܶܐ̈
                    ܣܰܓ݁ܺܝܶܐܐ̈ . ܟ݁ܽܠܗܽܘܢ ܕ݁ܶܝܢ ܗܰܕ݁ܳܡܶܐ̈ ܕ݁ܦ݂ܰܓ݂ܪܳܐ ܂ ܟ݁ܰܕ݂ ܣܰܓ݁ܺܝܶܐܐ̈ ܂
                    ܐܺܝܬ݂ܰܝܗܽܘܢ ܚܰܕ݂ ܐܶܢܽܘܢ ܦ݁ܓ݂ܰܪ ܆ ܗܳܟ݂ܰܢܳܐ ܐܳܦ݂ ܡܫܺܝܚܳܐ .
                ܐܳܦ݂ ܚܢܰܢ ܓ݁ܶܝܪ ܟ݁ܽܠܰܢ ܆ ܒ݁ܰܚܕ݂ܳܐ ܪܽܘܚ ܠܚܰܕ݂ ܦ݁ܓ݂ܰܪ ܥܡܰܕ݂ܢ ܇
                    ܐܶܢ ܝܺܗܽܘܕ݂ܳܝܶܐ̈ ܂ ܘܶܐܢ ܐܰܪܡܳܝܶܐ̈ ܇ ܘܶܐܢ ܥܰܒ݂ܕ݁ܶܐ̈ ܂ ܘܶܐܢ ܒ݁ܢܰܝ̈ ܚܺܐܪܶܐ̈ .
                    ܘܟ݂ܽܠܰܢ ܚܕ݂ܳܐ ܪܽܘܚܳܐ ܐܶܫܬ݁ܺܝܢ .
                ܐܳܦ݂ ܦ݁ܰܓ݂ܪܳܐ ܓ݁ܶܝܪ ܠܳܐ ܗ̱ܘܳܐ ܚܰܕ݂ ܗܰܕ݁ܳܡ ܂ ܐܶܠܳܐ ܣܰܓ݁ܺܝܶܐܐ̈
                    .
                ܐܶܢ ܬ݁ܺܐܡܰܪ ܓ݁ܶܝܪ ܪܶܓ݂ܠܳܐ ܇ ܕ݁ܡܶܛܽܠ ܕ݁ܠܳܐ ܗܘܺܝܬ݂ ܐܺܝܕ݂ܳܐ ܂
                    ܠܳܐ ܗܘܺܝܬ݂ ܡܶܢܶܗ ܡܶܢ ܦ݁ܰܓ݂ܪܳܐ ܆ ܠܰܘ ܡܶܛܽܠ ܗܳܕ݂ܶܐ ܠܰܝܬ݁ܶܝܗ ܡܶܢܶܗ ܡܶܢ ܦ݁ܰܓ݂ܪܳܐ
                    ܆
                ܘܶܐܢ ܬ݁ܺܐܡܰܪ ܐܶܕ݂ܢܳܐ ܇ ܥܰܠ ܕ݁ܠܳܐ ܗܘܺܝܬ݂ ܥܰܝܢܳܐ ܂ ܠܳܐ ܗܘܺܝܬ݂
                    ܡܶܢܶܗ ܡܶܢ ܦ݁ܰܓ݂ܪܳܐ ܆ ܠܰܘ ܡܶܛܽܠ ܗܳܕ݂ܶܐ ܠܰܝܬ݁ܶܝܗ ܡܶܢܶܗ ܡܶܢ ܦ݁ܰܓ݂ܪܳܐ ܆
                ܐܶܠܽܘ ܓ݁ܶܝܪ ܟ݁ܽܠܶܗ ܦ݁ܰܓ݂ܪܳܐ ܥܰܝܢܶܐ̈ ܗ̱ܘܳܐ ܆ ܐܰܝܟ݁ܳܐ ܗ̱ܘܳܬ݂
                    ܡܰܫܡܰܥܬ݂ܳܐ . ܘܶܐܠܽܘ ܟ݁ܽܠܶܗ ܡܰܫܡܰܥܬ݂ܳܐ ܗ̱ܘܳܐ ܆ ܐܰܝܟ݁ܰܢܳܐ ܡܪܺܝܚ ܗ̱ܘܳܐ .
                ܗܳܫܳܐ ܕ݁ܶܝܢ ܐܰܠܳܗܳܐ ܣܳܡ ܟ݁ܽܠ ܚܰܕ݂ ܚܰܕ݂ ܡܶܢ ܗܰܕ݁ܳܡܶܐ̈
                    ܒ݁ܦ݂ܰܓ݂ܪܳܐ ܆ ܐܰܝܟ݁ܰܢܳܐ ܕ݁ܗܽܘ ܨܒ݂ܳܐ .
                ܐܶܠܽܘ ܕ݁ܶܝܢ ܟ݁ܽܠܗܽܘܢ ܚܰܕ݂ ܗ̱ܘܰܘ ܗܰܕ݁ܳܡܳܐ ܆ ܐܰܝܟ݁ܳܐ ܗ̱ܘܳܐ
                    ܦ݁ܰܓ݂ܪܳܐ .
                ܗܳܫܳܐ ܕ݁ܶܝܢ ܗܰܕ݁ܳܡܶܐ̈ ܐܺܝܬ݂ܰܝܗܽܘܢ ܣܰܓ݁ܺܝܶܐܐ̈ ܆ ܚܰܕ݂ ܗ̱ܽܘ
                    ܕ݁ܶܝܢ ܦ݁ܰܓ݂ܪܳܐ .
                ܠܳܐ ܡܶܫܟ݁ܚܳܐ ܥܰܝܢܳܐ ܕ݁ܬ݂ܺܐܡܰܪ ܠܺܐܝܕ݂ܳܐ ܂ ܕ݁ܠܳܐ ܡܶܬ݂ܒ݁ܰܥܝܳܐ
                    ܐܰܢ̱ܬ݁ܝ ܠܺܝ . ܐܳܦ݂ܠܳܐ ܪܺܫܳܐ ܡܶܫܟ݁ܰܚ ܕ݁ܢܺܐܡܰܪ ܠܪܶܓ݂ܠܶܐ̈ ܂ ܕ݁ܠܳܐ ܡܶܬ݂ܒ݁ܰܥܝܳܢ̈
                    ܐܢ̱ܬ݁ܶܝܢ ܠܺܝ .
                ܐܶܠܳܐ ܝܰܬ݁ܺܝܪܳܐܝܺܬ݂ ܐܰܝܠܶܝܢ ܗܰܕ݁ܳܡܶܐ̈ ܕ݁ܡܶܣܬ݁ܰܒ݂ܪܺܝܢ
                    ܕ݁ܰܡܚܺܝܠܺܝܢ ܆ ܥܠܰܝܗܽܘܢ ܗ̱ܽܘ ܣܽܘܢܩܳܢܳܐ .
                ܘܰܐܝܠܶܝܢ ܕ݁ܣܳܒ݂ܪܺܝܢܰܢ ܕ݁ܰܡܨܰܥܪܺܝܢ ܐܶܢܽܘܢ ܒ݁ܦ݂ܰܓ݂ܪܳܐ ܆
                    ܠܗܳܠܶܝܢ ܐܺܝܩܳܪܳܐ ܝܰܬ݁ܺܝܪܳܐ ܡܰܣܓ݁ܶܝܢܰܢ . ܘܰܐܝܠܶܝܢ ܕ݁ܰܕ݂ܢܽܘܟ݁ܳܦ݂ܳܐ ܐܶܢܽܘܢ ܆
                    ܐܶܣܟ݁ܺܡܳܐ ܝܰܬ݁ܺܝܪܳܐ ܥܳܒ݂ܕ݁ܺܝܢܰܢ ܠܗܽܘܢ .
                ܐܰܝܠܶܝܢ ܕ݁ܶܝܢ ܗܰܕ݁ܳܡܶܐ̈ ܕ݁ܺܐܝܬ݂ ܒ݁ܰܢ ܕ݁ܰܡܝܰܩܪܺܝܢ ܆ ܠܳܐ
                    ܡܶܬ݂ܒ݁ܥܶܐ ܠܗܽܘܢ ܐܺܝܩܳܪܳܐ . ܐܰܠܳܗܳܐ ܓ݁ܶܝܪ ܡܰܙܓ݂ܶܗ ܠܦ݂ܰܓ݂ܪܳܐ . ܘܝܰܗ̱ܒ݂ ܐܺܝܩܳܪܳܐ
                    ܝܰܬ݁ܺܝܪܳܐ ܠܗܰܕ݁ܳܡܳܐ ܐܰܝܢܳܐ ܕ݁ܰܙܥܽܘܪ ܆
                ܕ݁ܠܳܐ ܬ݁ܶܗܘܶܐ ܦ݁ܳܠܓ݁ܽܘܬ݂ܳܐ ܒ݁ܦ݂ܰܓ݂ܪܳܐ ܇ ܐܶܠܳܐ ܟ݁ܽܠܗܽܘܢ
                    ܗܰܕ݁ܳܡܶܐ̈ ܫܰܘܝܳܐܝܺܬ݂ ܁ ܚܰܕ݂ ܥܰܠ ܚܰܕ݂ ܢܶܗܘܽܘܢ ܝܳܨܦ݁ܺܝܢ .
                ܕ݁ܶܐܡܰܬ݂ܝ ܕ݁ܚܰܕ݂ ܗܰܕ݁ܳܡ ܢܶܗܘܶܐ ܟ݁ܳܐܶܒ݂ ܆ ܟ݁ܽܠܗܽܘܢ ܢܶܗܘܽܘܢ
                    ܚܳܫܺܝܢ . ܘܶܐܢ ܡܶܫܬ݁ܰܒ݁ܰܚ ܚܰܕ݂ ܗܰܕ݁ܳܡ ܆ ܟ݁ܽܠܗܽܘܢ ܗܰܕ݁ܳܡܶܐ̈ ܢܶܗܘܽܘܢ ܡܶܫܬ݁ܰܒ݁ܚܺܝܢ
                    .
                ܐܰܢ̱ܬ݁ܽܘܢ ܕ݁ܶܝܢ ܦ݁ܰܓ݂ܪܶܗ ܐܰܢ̱ܬ݁ܽܘܢ ܕ݁ܰܡܫܺܝܚܳܐ ܂ ܘܗܰܕ݁ܳܡܶܐ̈
                    ܒ݁ܕ݂ܽܘܟ݁ܰܬ݂ܟ݂ܽܘܢ ܀.܀.܀܀
                
                ܣܳܡ ܓ݁ܶܝܪ ܐܰܠܳܗܳܐ ܒ݁ܥܺܕ̱݁ܬ݁ܶܗ ܆ ܠܽܘܩܕ݂ܰܡ ܫܠܺܝܚܶܐ̈ .
                    ܒ݁ܳܬ݂ܰܪܗܽܘܢ ܢܒ݂ܺܝܶܐ̈ . ܒ݁ܳܬ݂ܰܪܗܽܘܢ ܡܰܠܦ݂ܳܢܶܐ̈ . ܒ݁ܳܬ݂ܰܪܗܽܘܢ ܥܳܒ݂ܕ݁ܰܝ̈ ܚܰܝܠܶܐ̈ .
                    ܒ݁ܳܬ݂ܰܪܗܽܘܢ ܡܰܘܗܒ݂ܳܬ݂ܳܐ̈ ܕ݁ܳܐܣܝܽܘܬ݂ܳܐ . ܘܰܡܥܰܕ݁ܪܳܢܶܐ̈ ܘܰܡܕ݂ܰܒ݁ܪܳܢܶܐ̈ ܂ ܘܰܙܢܰܝܳܐ̈
                    ܕ݁ܠܶܫܳܢܶܐ̈ .
                ܕ݁ܰܠܡܳܐ ܟ݁ܽܠܗܽܘܢ ܫܠܺܝܚܶܐ̈ ܆ ܕ݁ܰܠܡܳܐ ܟ݁ܽܠܗܽܘܢ ܢܒ݂ܺܝܶܐ̈ ܆ ܠܡܳܐ
                    ܟ݁ܽܠܗܽܘܢ ܡܰܠܦ݂ܳܢܶܐ̈ ܆ ܠܡܳܐ ܟ݁ܽܠܗܽܘܢ ܣܳܥܪܰܝ̈ ܚܰܝܠܶܐ̈ ܆
                ܠܡܳܐ ܠܟ݂ܽܠܗܽܘܢ ܐܺܝܬ݂ ܠܗܽܘܢ ܡܰܘܗܒ݂ܳܬ݂ܳܐ̈ ܕ݁ܳܐܣܝܽܘܬ݂ܳܐ ܆ ܠܡܳܐ
                    ܟ݁ܽܠܗܽܘܢ ܒ݁ܠܶܫܳܢܶܐ̈ ܡܡܰܠܠܺܝܢ ܆ ܐܰܘ ܕ݁ܰܠܡܳܐ ܟ݁ܽܠܗܽܘܢ ܡܦ݂ܰܫܩܺܝܢ ܆
                ܐܶܢ ܕ݁ܶܝܢ ܛܳܢܺܝܢ ܐܢ̱ܬ݁ܽܘܢ ܒ݁ܡܰܘܗܒ݂ܳܬ݂ܳܐ̈ ܪܰܘܪܒ݂ܳܬ݂ܳܐ̈ ܆
                    ܐܶܢܳܐ ܬ݁ܽܘܒ݂ ܐܶܚܰܘܶܝܟ݂ܽܘܢ ܐܽܘܪܚܳܐ ܕ݁ܰܡܝܰܬ݁ܪܳܐ .
            
            
                Chapter 13
                ܐܶܢ ܒ݁ܟ݂ܽܠ ܠܶܫܳܢ ܕ݁ܰܒ݂ܢܰܝܢܳܫܳܐ̈ ܐܶܡܰܠܶܠ ܘܒ݂ܰܕ݂ܡܰܠܰܐܟ݂ܶܐ̈ ܇
                    ܘܚܽܘܒ݁ܳܐ ܠܳܐ ܢܶܗܘܶܐ ܒ݁ܺܝ ܆ ܗܘܺܝܬ݂ ܠܺܝ ܢܚܳܫܳܐ ܕ݁ܙܳܐܶܡ ܆ ܐܰܘ ܨܺܨܠܳܐ ܕ݁ܝܳܗܶܒ݂ ܩܳܠܳܐ
                    .
                ܘܶܐܢ ܬ݁ܶܗܘܶܐ ܒ݁ܺܝ ܢܒ݂ܺܝܽܘܬ݂ܳܐ ܇ ܘܶܐܕ݁ܰܥ ܐ̱ܪܳܙܶܐ̈ ܟ݁ܽܠܗܽܘܢ
                    ܘܟ݂ܽܠܳܗ ܝܺܕ݂ܰܥܬ݂ܳܐ ܇ ܘܶܐܢ ܬ݁ܶܗܘܶܐ ܒ݁ܺܝ ܟ݁ܽܠܳܗ ܗܰܝܡܳܢܽܘܬ݂ܳܐ ܁ ܐܰܝܟ݁ܰܢܳܐ ܕ݁ܛܽܘܪܳܐ
                    ܐܶܫܰܢܶܐ ܇ ܘܚܽܘܒ݁ܳܐ ܠܰܝܬ݁ ܒ݁ܺܝ ܆ ܠܳܐ ܗ̱ܘܺܝܬ݂ ܡܶܕ݁ܶܡ .
                ܘܶܐܢ ܐܰܘܟ݁ܶܠ ܟ݁ܽܠ ܕ݁ܺܐܝܬ݂ ܠܺܝ ܠܡܶܣܟ݁ܺܢܶܐ̈ ܇ ܘܶܐܢ ܐܰܫܠܶܡ
                    ܦ݁ܰܓ݂ܪܝ ܕ݁ܢܺܐܩܰܕ݂ ܇ ܘܚܽܘܒ݁ܳܐ ܠܳܐ ܢܶܗܘܶܐ ܒ݁ܺܝ ܆ ܡܶܕ݁ܶܡ ܠܳܐ ܝܳܬ݂ܰܪ ܐ̱ܢܳܐ .
                ܚܽܘܒ݁ܳܐ ܢܰܓ݁ܺܝܪܳܐ ܗ̱ܝ ܪܽܘܚܶܗ ܂ ܘܒ݂ܰܣܺܝܡ . ܚܽܘܒ݁ܳܐ ܠܳܐ ܚܳܣܶܡ .
                    ܚܽܘܒ݁ܳܐ ܠܳܐ ܡܶܫܬ݁ܓ݂ܶܫ ܂ ܘܠܳܐ ܡܶܬ݂ܚܬ݂ܰܪ .
                ܘܠܳܐ ܣܳܥܰܪ ܕ݁ܒ݂ܶܗܬ݁ܬ݂ܳܐ ܂ ܘܠܳܐ ܒ݁ܳܥܶܐ ܕ݁ܺܝܠܶܗ . ܘܠܳܐ
                    ܡܶܬ݁ܬ݁ܦ݂ܺܝܪ . ܘܠܳܐ ܡܶܬ݂ܪܰܥܶܐ ܕ݁ܒ݂ܺܝܫ .
                ܠܳܐ ܚܳܕ݂ܶܐ ܒ݁ܥܰܘܠܳܐ ܆ ܐܶܠܳܐ ܚܳܕ݂ܶܐ ܒ݁ܩܽܘܫܬ݁ܳܐ .
                ܟ݁ܽܠ ܡܶܕ݁ܶܡ ܡܣܰܝܒ݁ܰܪ . ܟ݁ܽܠܡܶܕ݁ܶܡ ܡܗܰܝܡܶܢ . ܟ݁ܽܠ ܡܣܰܒ݁ܰܪ .
                    ܟ݁ܽܠ ܣܳܒ݂ܶܠ .
                ܚܽܘܒ݁ܳܐ ܡܶܡܬ݂ܽܘܡ ܠܳܐ ܢܳܦ݂ܶܠ . ܢܒ݂ܺܝܰܘܳܬ݂ܳܐ̈ ܓ݁ܶܝܪ
                    ܢܶܬ݂ܒ݁ܰܛܠܳܢ̈ . ܘܠܶܫܳܢܶܐ̈ ܢܶܫܬ݁ܰܬ݁ܩܽܘܢ . ܘܺܝܕ݂ܰܥܬ݂ܳܐ ܬ݁ܶܬ݂ܒ݁ܰܛܰܠ .
                ܩܰܠܺܝܠ ܗ̱ܽܘ ܓ݁ܶܝܪ ܡܶܢ ܣܰܓ݁ܺܝ ܝܳܕ݂ܥܺܝܢܰܢ ܂ ܘܩܰܠܺܝܠ ܡܶܢ ܣܰܓ݁ܺܝ
                    ܡܶܬ݂ܢܰܒ݁ܶܝܢܰܢ .
                ܐܶܡܰܬ݂ܝ ܕ݁ܶܝܢ ܕ݁ܬ݂ܺܐܬ݂ܶܐ ܓ݁ܡܺܝܪܽܘܬ݂ܳܐ ܆ ܗܳܝܕ݁ܶܝܢ ܢܶܬ݂ܒ݁ܰܛܰܠ
                    ܗܰܘ ܡܶܕ݁ܶܡ ܕ݁ܩܰܠܺܝܠ ܗ̱ܘܳܐ ܀
                ܟ݁ܰܕ݂ ܝܰܠܽܘܕ݂ܳܐ ܗ̱ܘܺܝܬ݂ ܆ ܐܰܝܟ݂ ܝܰܠܽܘܕ݂ܳܐ ܡܡܰܠܶܠ ܗ̱ܘܺܝܬ݂ .
                    ܘܰܐܝܟ݂ ܝܰܠܽܘܕ݂ܳܐ ܡܶܬ݂ܪܰܥܶܐ ܗ̱ܘܺܝܬ݂ . ܘܰܐܝܟ݂ ܝܰܠܽܘܕ݂ܳܐ ܡܶܬ݂ܚܰܫܰܒ݂ ܗ̱ܘܺܝܬ݂ . ܟ݁ܰܕ݂
                    ܗܘܺܝܬ݂ ܕ݁ܶܝܢ ܓ݁ܰܒ݂ܪܳܐ ܆ ܒ݁ܰܛܠܶܬ݂ ܗܳܠܶܝܢ ܕ݁ܛܰܠܝܽܘܬ݂ܳܐ .
                ܗܳܫܳܐ ܐܰܝܟ݂ ܕ݁ܰܒ݂ܡܰܚܙܺܝܬ݂ܳܐ ܚܳܙܶܝܢܰܢ ܂ ܒ݁ܦ݂ܶܠܶܐܬ݂ܳܐ ܆
                    ܗܳܝܕ݁ܶܝܢ ܕ݁ܶܝܢ ܐܰܦ݁ܺܝܢ̈ ܠܽܘܩܒ݂ܰܠ ܐܰܦ݁ܺܝܢ̈ . ܗܳܫܳܐ ܝܳܕ݂ܰܥ ܐ̱ܢܳܐ ܩܰܠܺܝܠ ܡܶܢ ܣܰܓ݁ܺܝ
                    ܆ ܗܳܝܕ݁ܶܝܢ ܕ݁ܶܝܢ ܐܶܕ݁ܰܥ ܐܰܝܟ݂ ܡܳܐ ܕ݁ܶܐܬ݂ܝܰܕ݂ܥܶܬ݂ .
                ܗܳܠܶܝܢ ܐܶܢܶܝܢ̈ ܓ݁ܶܝܪ ܬ݁ܠܳܬ݂ ܕ݁ܰܡܟ݂ܰܬ݁ܪܳܢ̈ ܇ ܗܰܝܡܳܢܽܘܬ݂ܳܐ ܁
                    ܘܣܰܒ݂ܪܳܐ ܂ ܘܚܽܘܒ݁ܳܐ . ܕ݁ܪܰܒ݁ ܕ݁ܶܝܢ ܡܶܢܗܶܝܢ ܚܽܘܒ݁ܳܐ .
            
            
                Chapter 14
                ܗܰܪ̱ܛܘ ܒ݁ܳܬ݂ܰܪ ܚܽܘܒ݁ܳܐ . ܘܛܰܢܘ ܒ݁ܡܰܘܗܒ݂ܳܬ݂ܳܐ̈ ܕ݁ܪܽܘܚܳܐ .
                    ܝܰܬ݁ܺܝܪܳܐܝܺܬ݂ ܕ݁ܶܝܢ ܕ݁ܬ݂ܶܬ݂ܢܰܒ݁ܽܘܢ .
                ܡܰܢ ܕ݁ܰܡܡܰܠܶܠ ܓ݁ܶܝܪ ܒ݁ܠܶܫܳܢܳܐ ܆ ܠܳܐ ܗ̱ܘܳܐ ܠܰܒ݂ܢܰܝܢܳܫܳܐ̈
                    ܡܡܰܠܶܠ ܂ ܐܶܠܳܐ ܠܰܐܠܳܗܳܐ . ܠܳܐ ܓ݁ܶܝܪ ܐ̱ܢܳܫ ܫܳܡܰܥ ܡܶܕ݁ܶܡ ܕ݁ܰܡܡܰܠܶܠ ܆ ܐܶܠܳܐ ܒ݁ܪܽܘܚ
                    ܐ̱ܪܳܙܳܐ ܡܡܰܠܶܠ .
                ܐܰܝܢܳܐ ܕ݁ܶܝܢ ܕ݁ܡܶܬ݂ܢܰܒ݁ܶܐ ܆ ܠܰܒ݂ܢܰܝܢܳܫܳܐ̈ ܡܡܰܠܶܠ ܒ݁ܶܢܝܳܢܳܐ ܁
                    ܘܠܽܘܒ݁ܳܒ݂ܳܐ ܂ ܘܒ݂ܽܘܝܳܐܳܐ .
                ܕ݁ܰܡܡܰܠܶܠ ܒ݁ܠܶܫܳܢܳܐ ܂ ܢܰܦ݂ܫܶܗ ܗܽܘ ܒ݁ܳܢܶܐ . ܘܰܕ݂ܡܶܬ݂ܢܰܒ݁ܶܐ ܂
                    ܥܺܕ̱݁ܬ݁ܳܐ ܒ݁ܳܢܶܐ .
                ܨܳܒ݂ܶܐ ܐ̱ܢܳܐ ܕ݁ܶܝܢ ܂ ܕ݁ܟ݂ܽܠܟ݂ܽܘܢ ܬ݁ܡܰܠܠܽܘܢ ܒ݁ܠܶܫܳܢܶܐ̈ ܆
                    ܝܰܬ݁ܺܝܪܳܐܝܺܬ݂ ܕ݁ܶܝܢ ܕ݁ܬ݂ܶܬ݂ܢܰܒ݁ܽܘܢ . ܪܰܒ݂ ܗ̱ܽܘ ܓ݁ܶܝܪ ܐܰܝܢܳܐ ܕ݁ܡܶܬ݂ܢܰܒ݁ܶܐ ܇ ܡܶܢ
                    ܗܰܘ ܕ݁ܰܡܡܰܠܶܠ ܒ݁ܠܶܫܳܢܳܐ ܆ ܐܶܢ ܠܳܐ ܡܦ݂ܰܫܶܩ . ܐܶܢ ܕ݁ܶܝܢ ܡܦ݂ܰܫܶܩ ܆ ܥܺܕ̱݁ܬ݁ܳܐ ܒ݁ܳܢܶܐ
                    ܀
                ܘܗܳܫܳܐ ܐܰܚܰܝ̈ ܆ ܐܶܢ ܐܺܬ݂ܶܐ ܠܘܳܬ݂ܟ݂ܽܘܢ ܂ ܘܶܐܡܰܠܶܠ ܥܰܡܟ݂ܽܘܢ
                    ܒ݁ܠܶܫܳܢܶܐ̈ ܇ ܡܳܢܳܐ ܡܰܘܬ݁ܰܪ ܐ̱ܢܳܐ ܠܟ݂ܽܘܢ ܆ ܐܶܠܳܐ ܐܶܢ ܐܶܡܰܠܶܠ ܥܰܡܟ݂ܽܘܢ ܂ ܐܰܘ
                    ܒ݁ܓ݂ܶܠܝܳܢܳܐ ܂ ܐܰܘ ܒ݁ܺܝܕ݂ܰܥܬ݂ܳܐ ܂ ܐܰܘ ܒ݁ܰܢܒ݂ܺܝܽܘܬ݂ܳܐ ܂ ܐܰܘ ܒ݁ܝܽܘܠܦ݁ܳܢܳܐ .
                ܐܳܦ݂ ܨܶܒ݂ܘܳܬ݂ܳܐ̈ ܓ݁ܶܝܪ ܐܰܝܠܶܝܢ ܕ݁ܠܰܝܬ݁ ܒ݁ܗܶܝܢ ܢܰܦ݂ܫܳܐ ܂
                    ܘܝܳܗܒ݁ܳܢ̈ ܩܳܠܳܐ ܇ ܐܶܢ ܐܰܒ݁ܽܘܒ݂ܳܐ ܂ ܘܶܐܢ ܩܺܝܬ݂ܳܪܳܐ ܇ ܐܶܢ ܦ݁ܽܘܪܫܳܢܳܐ ܠܳܐ ܥܳܒ݂ܕ݁ܳܢ̈
                    ܒ݁ܶܝܬ݂ ܩܺܝܢܬ݁ܳܐ ܠܰܚܒ݂ܰܪܬ݂ܳܗ ܆ ܐܰܝܟ݁ܰܢܳܐ ܡܶܬ݂ܺܝܕ݂ܰܥ ܁ ܡܶܕ݁ܶܡ ܕ݁ܡܶܙܕ݁ܡܰܪ ܂ ܐܰܘ
                    ܡܶܕ݁ܶܡ ܕ݁ܡܶܬ݂ܢܩܶܫ .
                ܘܶܐܢ ܩܰܪܢܳܐ ܬ݁ܶܩܪܶܐ ܩܳܠܳܐ ܕ݁ܠܳܐ ܦ݁ܪܺܝܫ ܆ ܡܰܢܽܘ ܢܶܬ݁ܛܰܝܰܒ݂
                    ܠܰܩܪܳܒ݂ܳܐ .
                ܗܳܟ݂ܰܢܳܐ ܐܳܦ݂ ܐܰܢ̱ܬ݁ܽܘܢ ܆ ܐܶܢ ܬ݁ܺܐܡܪܽܘܢ ܡܶܠܬ݂ܳܐ ܒ݁ܠܶܫܳܢܳܐ ܂
                    ܘܠܳܐ ܬ݁ܶܗܘܶܐ ܡܦ݂ܰܫܩܳܐ ܆ ܐܰܝܟ݁ܰܢܳܐ ܡܶܬ݂ܺܝܕ݂ܰܥ ܡܶܕ݁ܶܡ ܕ݁ܳܐܡܪܺܝܢ ܐܢ̱ܬ݁ܽܘܢ .
                    ܗܳܘܶܝܬ݁ܽܘܢ ܠܟ݂ܽܘܢ ܂ ܐܰܝܟ݂ ܗܰܘ ܕ݁ܥܰܡ ܐܳܐܰܪ ܡܡܰܠܠܺܝܢ ܐܢ̱ܬ݁ܽܘܢ .
                ܗܳܐ ܓ݁ܶܝܪ ܓ݁ܶܢܣܶܐ̈ ܕ݁ܠܶܫܳܢܶܐ̈ ܣܰܓ݁ܺܝܶܐܐ̈ ܐܺܝܬ݂ ܒ݁ܥܳܠܡܳܐ .
                    ܘܠܰܝܬ݁ ܚܰܕ݂ ܡܶܢܗܽܘܢ ܕ݁ܠܳܐ ܩܳܠܳܐ .
                ܘܶܐܢ ܠܳܐ ܝܳܕ݂ܰܥ ܐ̱ܢܳܐ ܚܰܝܠܶܗ ܕ݁ܩܳܠܳܐ ܆ ܗܳܘܶܐ ܐ̱ܢܳܐ ܠܺܝ
                    ܒ݁ܰܪܒ݁ܪܳܝܳܐ ܠܗܰܘ ܕ݁ܰܡܡܰܠܶܠ ܇ ܘܳܐܦ݂ ܗܰܘ ܕ݁ܰܡܡܰܠܶܠ ܗܳܘܶܐ ܠܶܗ ܠܺܝ ܒ݁ܰܪܒ݁ܪܳܝܳܐ
                    .
                ܗܳܟ݂ܰܢܳܐ ܐܳܦ݂ ܐܰܢ̱ܬ݁ܽܘܢ ܆ ܡܶܛܽܠ ܕ݁ܛܰܢܳܢܶܐ̈ ܐܰܢ̱ܬ݁ܽܘܢ
                    ܕ݁ܡܰܘܗܒ݂ܳܬ݂ܳܐ̈ ܕ݁ܪܽܘܚܳܐ ܂ ܠܒ݂ܶܢܝܳܢܳܐ ܕ݁ܥܺܕ̱݁ܬ݁ܳܐ ܆ ܒ݁ܥܰܘ ܕ݁ܬ݂ܶܬ݂ܝܰܬ݁ܪܽܘܢ .
                ܘܗܰܘ ܕ݁ܰܡܡܰܠܶܠ ܒ݁ܠܶܫܳܢܳܐ ܆ ܢܨܰܠܶܐ ܕ݁ܰܢܦ݂ܰܫܶܩ .
                ܐܶܢ ܗܽܘ ܓ݁ܶܝܪ ܕ݁ܰܗܘܺܝܬ݂ ܡܨܰܠܶܐ ܒ݁ܠܶܫܳܢܳܐ ܆ ܪܽܘܚܝ ܗ̱ܽܘ
                    ܡܨܰܠܝܳܐ ܇ ܡܰܕ݁ܰܥܝ ܕ݁ܶܝܢ ܕ݁ܠܳܐ ܦ݁ܺܐܪܺܝܢ̈ ܗ̱ܽܘ .
                ܡܳܢܳܐ ܗܳܟ݂ܺܝܠ ܐܶܥܒ݁ܶܕ݂ ܆ ܐܶܨܰܠܶܐ ܒ݁ܪܽܘܚܝ ܆ ܘܶܐܨܰܠܶܐ ܐܳܦ݂
                    ܒ݁ܡܰܕ݁ܰܥܝ . ܘܶܐܙܰܡܰܪ ܒ݁ܪܽܘܚܝ ܆ ܘܶܐܙܰܡܰܪ ܐܳܦ݂ ܒ݁ܡܰܕ݁ܰܥܝ .
                ܘܶܐܢ ܠܳܐ ܐܶܢ ܡܒ݂ܰܪܶܟ݂ ܐܰܢ̱ܬ݁ ܒ݁ܪܽܘܚ ܆ ܗܰܘ ܕ݁ܰܡܡܰܠܶܐ
                    ܕ݁ܽܘܟ݁ܬ݂ܶܗ ܕ݁ܗܶܕ݂ܝܽܘܛܳܐ ܇ ܐܰܝܟ݁ܰܢܳܐ ܢܺܐܡܰܪ ܐܰܡܺܝܢ ܁ ܥܰܠ ܬ݁ܰܘܕ݁ܺܝܬ݂ܳܟ݂ ܕ݁ܺܝܠܳܟ݂ .
                    ܡܶܛܽܠ ܕ݁ܡܳܢܳܐ ܐܳܡܰܪ ܐܰܢ̱ܬ݁ ܠܳܐ ܝܳܕ݂ܰܥ .
                ܐܰܢ̱ܬ݁ ܓ݁ܶܝܪ ܫܰܦ݁ܺܝܪ ܡܒ݂ܰܪܶܟ݂ ܐܰܢ̱ܬ݁ ܆ ܐܶܠܳܐ ܚܰܒ݂ܪܳܟ݂ ܠܳܐ
                    ܡܶܬ݂ܒ݁ܰܢܶܐ .
                ܡܰܘܕ݁ܶܐ ܐ̱ܢܳܐ ܠܰܐܠܳܗܳܐ ܂ ܕ݁ܝܰܬ݁ܺܝܪ ܡܶܢ ܟ݁ܽܠܟ݂ܽܘܢ ܡܡܰܠܶܠ
                    ܐ̱ܢܳܐ ܒ݁ܠܶܫܳܢܶܐ̈ .
                ܐܶܠܳܐ ܒ݁ܥܺܕ̱݁ܬ݁ܳܐ ܨܳܒ݂ܶܐ ܐ̱ܢܳܐ ܕ݁ܚܰܡܶܫ ܡܶܠܺܝܢ̈ ܒ݁ܡܰܕ݁ܰܥܝ
                    ܐܶܡܰܠܶܠ ܇ ܕ݁ܳܐܦ݂ ܐ̱ܚܪܳܢܶܐ̈ ܐܰܠܶܦ݂ ܆ ܝܰܬ݁ܺܝܪ ܡܶܢ ܪܶܒ݁ܽܘ ܡܶܠܺܝܢ̈ ܒ݁ܠܶܫܳܢܳܐ ܀
                ܐܰܚܰܝ̈ ܆ ܠܳܐ ܗܘܰܝܬ݁ܽܘܢ ܛܠܶܝܢ ܒ݁ܪܶܥܝܳܢܰܝܟ݁ܽܘܢ̈ . ܐܶܠܳܐ
                    ܠܒ݂ܺܝܫܳܬ݂ܳܐ̈ ܗܘܰܘ ܝܰܠܽܘܕ݂ܶܐ̈ ܆ ܘܰܒ݂ܪܶܥܝܳܢܰܝܟ݁ܽܘܢ̈ ܗܘܰܘ ܓ݁ܡܺܝܪܺܝܢ .
                ܒ݁ܢܳܡܽܘܣܳܐ ܟ݁ܬ݂ܺܝܒ݂ ܆ ܕ݁ܰܒ݂ܡܰܡܠ̱ܠܳܐ ܢܽܘܟ݂ܪܳܝܳܐ ܁ ܘܰܒ݂ܠܶܫܳܢܳܐ
                    ܐ̱ܚܪܺܢܳܐ ܂ ܐܶܡܰܠܶܠ ܥܰܡܶܗ ܥܰܡ ܥܰܡܳܐ ܗܳܢܳܐ . ܐܳܦ݂ܠܳܐ ܗܳܟ݂ܰܢܳܐ ܢܶܫܡܥܽܘܢܳܢܝ ܆ ܐܳܡܰܪ
                    ܡܳܪܝܳܐ .
                ܡܳܕ݂ܶܝܢ ܠܶܫܳܢܶܐ̈ ܠܳܐܬ݂ܳܐ ܗܽܘ ܣܺܝܡܺܝܢ ܇ ܠܳܐ ܠܰܡܗܰܝܡܢܶܐ̈ ܂
                    ܐܶܠܳܐ ܠܰܐܝܠܶܝܢ ܕ݁ܠܳܐ ܡܗܰܝܡܢܺܝܢ ܆ ܢܒ݂ܺܝܰܘܳܬ݂ܳܐ̈ ܕ݁ܶܝܢ ܂ ܠܳܐ ܗ̱ܘܳܐ ܠܰܐܝܠܶܝܢ ܕ݁ܠܳܐ
                    ܡܗܰܝܡܢܺܝܢ ܇ ܐܶܠܳܐ ܠܰܐܝܠܶܝܢ ܕ݁ܰܡܗܰܝܡܢܺܝܢ .
                ܐܶܢ ܗܽܘ ܗܳܟ݂ܺܝܠ ܕ݁ܬ݂ܶܬ݂ܟ݁ܰܢܰܫ ܟ݁ܽܠܳܗ ܥܺܕ̱݁ܬ݁ܳܐ ܇ ܘܟ݂ܽܠܗܽܘܢ
                    ܒ݁ܠܶܫܳܢܶܐ̈ ܢܡܰܠܠܽܘܢ ܇ ܘܢܶܥܠܽܘܢ ܗܶܕ݂ܝܽܘܛܶܐ̈ ܂ ܐܰܘ ܐܰܝܠܶܝܢ ܕ݁ܠܳܐ ܡܗܰܝܡܢܺܝܢ ܆ ܠܳܐ
                    ܐܳܡܪܺܝܢ ܂ ܕ݁ܗܳܠܶܝܢ ܫܢܰܘ ܠܗܽܘܢ .
                ܘܶܐܢ ܟ݁ܽܠܟ݂ܽܘܢ ܬ݁ܶܗܘܽܘܢ ܡܶܬ݂ܢܰܒ݁ܶܝܢ ܇ ܘܢܶܥܽܘܠ ܠܘܳܬ݂ܟ݂ܽܘܢ
                    ܗܶܕ݂ܝܽܘܛܳܐ ܂ ܐܰܘ ܡܰܢ ܕ݁ܠܳܐ ܡܗܰܝܡܶܢ ܆ ܡܶܬ݂ܒ݁ܨܶܐ ܡܶܢ ܟ݁ܽܠܟ݂ܽܘܢ ܇ ܘܡܶܬ݂ܟ݁ܰܘܰܢ ܡܶܢ
                    ܟ݁ܽܠܟ݂ܽܘܢ .
                ܘܟ݂ܰܣܝܳܬ݂ܳܐ̈ ܕ݁ܠܶܒ݁ܶܗ ܡܶܬ݂ܓ݁ܰܠܝܳܢ̈ . ܘܗܳܝܕ݁ܶܝܢ ܢܶܦ݁ܶܠ ܥܰܠ
                    ܐܰܦ݁ܰܘܗ̱ܝ̈ ܆ ܘܢܶܣܓ݁ܽܘܕ݂ ܠܰܐܠܳܗܳܐ ܂ ܘܢܺܐܡܰܪ ܆ ܫܰܪܺܝܪܳܐܝܺܬ݂ ܐܰܠܳܗܳܐ ܐܺܝܬ݂ ܒ݁ܟ݂ܽܘܢ
                    ܀.܀.܀܀
                
                ܐܳܡܰܪ ܐ̱ܢܳܐ ܗܳܟ݂ܺܝܠ ܐܰܚܰܝ̈ ܆ ܕ݁ܶܐܡܰܬ݂ܝ ܕ݁ܡܶܬ݂ܟ݁ܰܢܫܺܝܢ
                    ܐܢ̱ܬ݁ܽܘܢ ܇ ܠܰܐܝܢܳܐ ܡܶܢܟ݂ܽܘܢ ܕ݁ܺܐܝܬ݂ ܠܶܗ ܡܰܙܡܽܘܪܳܐ ܢܺܐܡܰܪ . ܘܰܐܝܢܳܐ ܕ݁ܺܐܝܬ݂ ܠܶܗ
                    ܝܽܘܠܦ݁ܳܢܳܐ . ܘܰܐܝܢܳܐ ܕ݁ܺܐܝܬ݂ ܠܶܗ ܓ݁ܶܠܝܳܢܳܐ . ܘܰܐܝܢܳܐ ܕ݁ܺܐܝܬ݂ ܠܶܗ ܠܶܫܳܢܳܐ .
                    ܘܰܐܝܢܳܐ ܕ݁ܺܐܝܬ݂ ܠܶܗ ܦ݁ܽܘܫܳܩܳܐ ܆ ܟ݁ܽܠܗܶܝܢ ܠܒ݂ܶܢܝܳܢܳܐ ܢܶܗܘܝܳܢ̈ .
                ܘܶܐܢ ܒ݁ܠܶܫܳܢܳܐ ܐ̱ܢܳܫ ܢܡܰܠܶܠ ܆ ܬ݁ܪܶܝܢ̈ ܢܡܰܠܠܽܘܢ . ܘܟ݂ܰܕ݂
                    ܣܰܓ݁ܺܝ ܬ݁ܠܳܬ݂ܳܐ . ܘܚܰܕ݂ ܚܰܕ݂ ܢܡܰܠܠܽܘܢ . ܘܚܰܕ݂ ܢܦ݂ܰܫܶܩ .
                ܘܶܐܢ ܠܰܝܬ݁ ܕ݁ܰܡܦ݂ܰܫܶܩ ܆ ܢܶܫܬ݁ܽܘܩ ܠܶܗ ܒ݁ܥܺܕ̱݁ܬ݁ܳܐ ܗܰܘ
                    ܕ݁ܰܡܡܰܠܶܠ ܒ݁ܠܶܫܳܢܳܐ . ܘܒ݂ܰܝܢܰܘܗ̱ܝ ܠܢܰܦ݂ܫܶܗ ܘܠܰܐܠܳܗܳܐ ܢܡܰܠܶܠ .
                ܢܒ݂ܺܝܶܐ̈ ܕ݁ܶܝܢ ܬ݁ܪܶܝܢ̈ ܐܰܘ ܬ݁ܠܳܬ݂ܳܐ ܢܡܰܠܠܽܘܢ ܆ ܘܫܰܪܟ݁ܳܐ
                    ܢܦ݂ܰܪܫܽܘܢ .
                ܘܶܐܢ ܠܰܐ̱ܚܪܺܢܳܐ ܢܶܬ݂ܓ݁ܠܶܐ ܟ݁ܰܕ݂ ܝܳܬ݂ܶܒ݂ ܆ ܩܰܕ݂ܡܳܝܳܐ ܢܶܫܬ݁ܽܘܩ
                    ܠܶܗ .
                ܡܶܫܟ݁ܚܺܝܢ ܐܢ̱ܬ݁ܽܘܢ ܓ݁ܶܝܪ ܟ݁ܽܠܟ݂ܽܘܢ ܕ݁ܚܰܕ݂ ܚܰܕ݂ ܬ݁ܶܬ݂ܢܰܒ݁ܽܘܢ
                    ܆ ܕ݁ܟ݂ܽܠܢܳܫ ܢܺܐܠܰܦ݂ ܂ ܘܟ݂ܽܠܢܳܫ ܢܶܬ݂ܒ݁ܰܝܰܐ .
                ܪܽܘܚܳܐ ܓ݁ܶܝܪ ܕ݁ܰܢܒ݂ܺܝܶܐ̈ ܠܰܢܒ݂ܺܝܶܐ̈ ܡܶܫܬ݁ܰܥܒ݁ܕ݂ܳܐ .
                ܡܶܛܽܠ ܕ݁ܰܐܠܳܗܳܐ ܠܳܐ ܗ̱ܘܳܐ ܕ݁ܰܫܓ݂ܽܘܫܝܳܐ ܆ ܐܶܠܳܐ ܕ݁ܰܫܠܳܡܳܐ .
                    ܐܰܝܟ݂ ܕ݁ܰܒ݂ܟ݂ܽܠܗܶܝܢ ܥܺܕ݂ܳܬ݂ܳܐ̈ ܕ݁ܩܰܕ݁ܺܝܫܶܐ̈ .
                ܢܶܫܰܝܟ݁ܽܘܢ̈ ܒ݁ܥܺܕ̱݁ܬ݁ܳܐ ܢܶܗܘܝܳܢ̈ ܫܰܬ݁ܺܝܩܳܢ̈ . ܠܳܐ ܓ݁ܶܝܪ
                    ܡܰܦ݁ܰܣ ܠܗܶܝܢ ܕ݁ܰܢܡܰܠܠܳܢ̈ ܆ ܐܶܠܳܐ ܕ݁ܢܶܫܬ݁ܰܥܒ݁ܕ݂ܳܢ̈ ܇ ܐܰܝܟ݁ܰܢܳܐ ܕ݁ܳܐܦ݂ ܢܳܡܽܘܣܳܐ
                    ܐܶܡܰܪ .
                ܘܶܐܢ ܡܶܕ݁ܶܡ ܨܳܒ݂ܝܳܢ̈ ܕ݁ܢܺܐܠܦ݁ܳܢ̈ ܇ ܒ݁ܒ݂ܳܬ݁ܰܝܗܶܝܢ̈ ܢܫܰܐܠܳܢ̈
                    ܠܒ݂ܰܥܠܰܝܗܶܝܢ̈ . ܒ݁ܶܗܬ݁ܬ݂ܳܐ ܗ̱ܝ ܓ݁ܶܝܪ ܕ݁ܢܶܫܶܐ̈ ܒ݁ܥܺܕ̱݁ܬ݁ܳܐ ܢܡܰܠܠܳܢ̈ .
                ܐܰܘ ܕ݁ܰܠܡܳܐ ܡܶܢܟ݂ܽܘܢ ܗ̱ܘ ܢܶܦ݂ܩܰܬ݂ ܡܶܠܬ݂ܶܗ ܕ݁ܰܐܠܳܗܳܐ . ܐܰܘ
                    ܠܘܳܬ݂ܟ݂ܽܘܢ ܗ̱ܘ ܒ݁ܰܠܚܽܘܕ݂ ܡܛܳܬ݂ ܆
                ܐܶܢ ܐ̱ܢܳܫ ܕ݁ܶܝܢ ܡܶܢܟ݂ܽܘܢ ܣܳܒ݂ܰܪ ܕ݁ܰܢܒ݂ܺܝܳܐ ܗܽܘ ܂ ܐܰܘ
                    ܕ݁ܪܽܘܚܳܐ ܗܽܘ ܆ ܢܶܕ݁ܰܥ ܗܳܠܶܝܢ ܕ݁ܟ݂ܳܬ݂ܶܒ݂ ܐ̱ܢܳܐ ܠܟ݂ܽܘܢ ܇ ܕ݁ܦ݂ܽܘܩܕ݁ܳܢܶܐ̈ ܐܶܢܽܘܢ
                    ܕ݁ܡܳܪܰܢ .
                ܐܶܢ ܐ̱ܢܳܫ ܕ݁ܶܝܢ ܠܳܐ ܝܳܕ݂ܰܥ ܆ ܠܳܐ ܢܶܕ݁ܰܥ .
                ܛܰܢܘ ܗܳܟ݂ܺܝܠ ܐܰܚܰܝ̈ ܠܡܶܬ݂ܢܰܒ݁ܳܝܽܘ ܆ ܘܠܰܡܡܰܠܳܠܽܘ ܒ݁ܠܶܫܳܢܶܐ̈
                    ܠܳܐ ܬ݁ܶܟ݂ܠܽܘܢ .
                ܟ݁ܽܠܡܶܕ݁ܶܡ ܕ݁ܶܝܢ ܒ݁ܶܐܣܟ݁ܺܡܳܐ ܘܰܒ݂ܛܶܟ݁ܣܳܐ ܢܶܗܘܶܐ ܀
            
            
                Chapter 15
                ܡܰܘܕ݁ܰܥ ܐ̱ܢܳܐ ܠܟ݂ܽܘܢ ܕ݁ܶܝܢ ܐܰܚܰܝ̈ ܆ ܐܶܘܰܢܓ݁ܶܠܺܝܳܘܢ
                    ܕ݁ܣܰܒ݁ܰܪܬ݁ܟ݂ܽܘܢ . ܘܩܰܒ݁ܶܠܬ݁ܽܘܢܳܝܗ̱ܝ . ܘܩܳܡܬ݁ܽܘܢ ܒ݁ܶܗ .
                ܘܒ݂ܶܗ ܚܳܐܶܝܢ ܐܢ̱ܬ݁ܽܘܢ . ܒ݁ܰܐܝܕ݂ܳܐ ܡܶܠܬ݂ܳܐ ܣܰܒ݁ܰܪܬ݁ܟ݂ܽܘܢ ܆ ܐܶܢ
                    ܥܳܗܕ݁ܺܝܢ ܐܢ̱ܬ݁ܽܘܢ ܇ ܐܶܢ ܠܳܐ ܗ̱ܘܳܐ ܣܪܺܝܩܳܐܝܺܬ݂ ܗܰܝܡܶܢܬ݁ܽܘܢ .
                ܐܰܫܠܡܶܬ݂ ܠܟ݂ܽܘܢ ܓ݁ܶܝܪ ܡܶܢ ܠܽܘܩܕ݂ܰܡ ܐܰܝܟ݂ ܡܶܕ݁ܶܡ ܕ݁ܩܰܒ݁ܠܶܬ݂ ܆
                    ܕ݁ܰܡܫܺܝܚܳܐ ܡܺܝܬ݂ ܥܰܠ ܐܰܦ݁ܰܝ̈ ܚܛܳܗܰܝܢ̈ ܇ ܐܰܝܟ݁ܰܢܳܐ ܕ݁ܰܟ݂ܬ݂ܺܝܒ݂ .
                ܘܕ݂ܶܐܬ݂ܩܒ݂ܰܪ . ܘܩܳܡ ܠܰܬ݂ܠܳܬ݂ܳܐ ܝܰܘܡܺܝܢ̈ ܇ ܐܰܝܟ݂ ܕ݁ܰܟ݂ܬ݂ܺܝܒ݂
                    .
                ܘܶܐܬ݂ܚܙܺܝ ܠܟ݂ܺܐܦ݂ܳܐ . ܘܒ݂ܳܬ݂ܪܶܗ ܠܰܬ݂ܪܶܥܣܰܪ .
                ܘܒ݂ܳܬ݂ܰܪܟ݁ܶܢ ܐܶܬ݂ܚܙܺܝ ܠܝܰܬ݁ܺܝܪ ܡܶܢ ܚܰܡܶܫܡܳܐܐ ܐܰܚܺܝܢ̈
                    ܐܰܟ݂ܚܕ݂ܳܐ ܆ ܕ݁ܣܰܓ݁ܺܝܶܐܐ̈ ܡܶܢܗܽܘܢ ܩܰܝܳܡܺܝܢ ܐܶܢܽܘܢ ܥܕ݂ܰܡܳܐ ܠܗܳܫܳܐ ܇ ܘܡܶܢܗܽܘܢ
                    ܕ݁ܡܶܟ݂ܘ .
                ܘܡܶܢ ܒ݁ܳܬ݂ܰܪ ܗܳܠܶܝܢ ܐܶܬ݂ܚܙܺܝ ܠܝܰܥܩܽܘܒ݂ . ܘܒ݂ܳܬ݂ܪܶܗ ܠܰܫܠܺܝܚܶܐ̈
                    ܟ݁ܽܠܗܽܘܢ .
                ܠܚܰܪܬ݂ܳܐ ܕ݁ܶܝܢ ܕ݁ܟ݂ܽܠܗܽܘܢ ܆ ܐܰܝܟ݂ ܕ݁ܰܠܝܰܚܛܳܐ ܂ ܐܶܬ݂ܚܙܺܝ ܐܳܦ݂
                    ܠܺܝ .
                ܐܶܢܳܐ ܐ̱ܢܳܐ ܓ݁ܶܝܪ ܙܥܽܘܪܗܽܘܢ ܕ݁ܰܫܠܺܝܚܶܐ̈ . ܘܠܳܐ ܫܳܘܶܐ ܐ̱ܢܳܐ
                    ܕ݁ܶܐܬ݂ܩܪܶܐ ܫܠܺܝܚܳܐ . ܡܶܛܽܠ ܕ݁ܪܶܕ݂ܦ݁ܶܬ݂ ܥܺܕ̱݁ܬ݁ܶܗ ܕ݁ܰܐܠܳܗܳܐ .
                ܒ݁ܛܰܝܒ݁ܽܘܬ݂ܶܗ ܕ݁ܶܝܢ ܕ݁ܰܐܠܳܗܳܐ ܐܺܝܬ݂ܰܝ ܡܶܕ݁ܶܡ ܕ݁ܺܐܝܬ݂ܰܝ .
                    ܘܛܰܝܒ݁ܽܘܬ݂ܶܗ ܕ݁ܒ݂ܺܝ ܂ ܠܳܐ ܗܘܳܬ݂ ܣܪܺܝܩܳܐ ܆ ܐܶܠܳܐ ܝܰܬ݁ܺܝܪ ܡܶܢ ܟ݁ܽܠܗܽܘܢ ܠܺܐܝܬ݂ .
                    ܠܳܐ ܐܶܢܳܐ ܂ ܐܶܠܳܐ ܛܰܝܒ݁ܽܘܬ݂ܶܗ ܕ݁ܥܰܡܝ .
                ܐܶܢ ܐܶܢܳܐ ܗܳܟ݂ܺܝܠ ܁ ܘܶܐܢ ܗܶܢܽܘܢ ܆ ܗܳܟ݂ܰܢܳܐ ܡܰܟ݂ܪܙܺܝܢܰܢ ܂
                    ܘܗܳܟ݂ܰܢܳܐ ܗܰܝܡܶܢܬ݁ܽܘܢ .
                ܐܶܢ ܕ݁ܶܝܢ ܡܫܺܝܚܳܐ ܡܶܬ݂ܟ݁ܪܶܙ ܕ݁ܩܳܡ ܡܶܢ ܒ݁ܶܝܬ݂ ܡܺܝܬ݂ܶܐ̈ ܆
                    ܐܰܝܟ݁ܰܢܳܐ ܐܺܝܬ݂ ܒ݁ܟ݂ܽܘܢ ܐ̱ܢܳܫܳܐ ܕ݁ܳܐܡܪܺܝܢ ܂ ܠܰܝܬ݁ ܚܰܝܰܬ݂ ܡܺܝܬ݂ܶܐ̈ .
                ܘܶܐܢ ܚܰܝܰܬ݂ ܡܺܝܬ݂ܶܐ̈ ܠܰܝܬ݁ ܆ ܐܳܦ݂ܠܳܐ ܡܫܺܝܚܳܐ ܩܳܡ .
                ܘܶܐܢ ܡܫܺܝܚܳܐ ܠܳܐ ܩܳܡ ܆ ܣܪܺܝܩܳܐ ܗ̱ܝ ܟ݁ܳܪܽܘܙܽܘܬ݂ܰܢ . ܣܪܺܝܩܳܐ
                    ܐܳܦ݂ ܗܰܝܡܳܢܽܘܬ݂ܟ݂ܽܘܢ .
                ܡܶܫܬ݁ܰܟ݂ܚܺܝܢ ܚ̱ܢܰܢ ܕ݁ܶܝܢ ܐܳܦ݂ ܣܳܗܕ݁ܶܐ̈ ܕ݁ܰܓ݁ܳܠܶܐ̈ ܕ݁ܰܐܠܳܗܳܐ
                    ܇ ܕ݁ܰܐܣܗܶܕ݂ܢ ܥܰܠ ܐܰܠܳܗܳܐ ܁ ܕ݁ܰܐܩܺܝܡ ܠܰܡܫܺܝܚܳܐ ܂ ܟ݁ܰܕ݂ ܠܳܐ ܐܰܩܺܝܡ .
                ܐܶܢ ܡܺܝܬ݂ܶܐ̈ ܓ݁ܶܝܪ ܠܳܐ ܩܳܝܡܺܝܢ ܆ ܐܳܦ݂ܠܳܐ ܡܫܺܝܚܳܐ ܩܳܡ .
                ܘܶܐܢ ܡܫܺܝܚܳܐ ܠܳܐ ܩܳܡ ܆ ܒ݁ܰܛܳܠܳܐ ܗ̱ܝ ܗܰܝܡܳܢܽܘܬ݂ܟ݂ܽܘܢ .
                    ܘܰܥܕ݂ܰܟ݁ܺܝܠ ܒ݁ܰܚܛܳܗܰܝܟ݁ܽܘܢ̈ ܐܰܢ̱ܬ݁ܽܘܢ .
                ܘܰܟ݂ܒ݂ܰܪ ܐܳܦ݂ ܐܰܝܠܶܝܢ ܕ݁ܰܕ݂ܡܶܟ݂ܘ ܒ݁ܰܡܫܺܝܚܳܐ ܂ ܐܶܒ݂ܰܕ݂ܘ ܠܗܽܘܢ
                    .
                ܘܶܐܢ ܒ݁ܗܳܠܶܝܢ ܗ̱ܽܘ ܚܰܝܶܐ̈ ܒ݁ܰܠܚܽܘܕ݂ ܡܣܰܒ݁ܪܺܝܢܰܢ ܒ݁ܰܡܫܺܝܚܳܐ ܆
                    ܕ݁ܳܘܶܝܢܰܢ ܗ̱ܽܘ ܡܶܢ ܟ݁ܽܠܗܽܘܢ ܒ݁ܢܰܝܢܳܫܳܐ̈ ܀
                ܗܳܫܳܐ ܕ݁ܶܝܢ ܡܫܺܝܚܳܐ ܩܳܡ ܡܶܢ ܒ݁ܶܝܬ݂ ܡܺܝܬ݂ܶܐ̈ . ܘܰܗܘܳܐ
                    ܪܺܫܺܝܬ݂ܳܐ ܕ݁ܕ݂ܰܡܟ݁ܶܐ̈ .
                ܘܰܐܝܟ݁ܰܢܳܐ ܕ݁ܰܒ݂ܝܰܕ݂ ܒ݁ܰܪܢܳܫܳܐ ܗܘܳܐ ܡܰܘܬ݁ܳܐ ܆ ܗܳܟ݂ܰܢܳܐ ܐܳܦ݂
                    ܒ݁ܝܰܕ݂ ܒ݁ܰܪܢܳܫܳܐ ܗܳܘܝܳܐ ܚܰܝܰܬ݂ ܡܺܝܬ݂ܶܐ̈ .
                ܐܰܝܟ݁ܰܢܳܐ ܓ݁ܶܝܪ ܕ݁ܒ݂ܳܐܕ݂ܳܡ ܟ݁ܽܠܗܽܘܢ ܒ݁ܢܰܝܢܳܫܳܐ̈ ܡܳܝܬ݁ܺܝܢ ܆
                    ܗܳܟ݂ܰܢܳܐ ܐܳܦ݂ ܒ݁ܰܡܫܺܝܚܳܐ ܟ݁ܽܠܗܽܘܢ ܚܳܐܶܝܢ .
                ܐ̱ܢܳܫ ܐ̱ܢܳܫ ܒ݁ܛܶܟ݁ܣܶܗ . ܪܺܫܺܝܬ݂ܳܐ ܗܘܳܐ ܡܫܺܝܚܳܐ . ܒ݁ܳܬ݂ܰܪܟ݁ܶܢ
                    ܐܰܝܠܶܝܢ ܕ݁ܕ݂ܰܡܫܺܝܚܳܐ ܐܶܢܽܘܢ ܒ݁ܡܶܐܬ݂ܺܝܬ݂ܶܗ .
                ܘܗܳܝܕ݁ܶܝܢ ܬ݁ܶܗܘܶܐ ܚܰܪܬ݂ܳܐ ܇ ܡܳܐ ܕ݁ܡܰܫܠܶܡ ܡܰܠܟ݁ܽܘܬ݂ܳܐ
                    ܠܰܐܠܳܗܳܐ ܐܰܒ݂ܳܐ . ܡܳܐ ܕ݁ܒ݂ܰܛܶܠ ܟ݁ܽܠ ܪܺܝܫ ܁ ܘܟ݂ܽܠ ܫܽܘܠܛܳܢ ܂ ܘܟ݂ܽܠ ܚܰܝܠܺܝܢ̈ .
                ܥܬ݂ܺܝܕ݂ ܗ̱ܽܘ ܓ݁ܶܝܪ ܕ݁ܢܰܡܠܶܟ݂ ܁ ܥܕ݂ܰܡܳܐ ܕ݁ܰܢܣܺܝܡ
                    ܒ݁ܥܶܠܕ݁ܒ݂ܳܒ݂ܰܘܗ̱ܝ̈ ܟ݁ܽܠܗܽܘܢ ܬ݁ܚܶܝܬ݂ ܪܶܓ݂ܠܰܘܗ̱ܝ̈ .
                ܘܰܐ̱ܚܪܳܝܳܐ ܒ݁ܥܶܠܕ݁ܒ݂ܳܒ݂ܳܐ ܡܶܬ݂ܒ݁ܰܛܰܠ ܂ ܡܰܘܬ݁ܳܐ .
                ܟ݁ܽܠ ܓ݁ܶܝܪ ܫܰܥܒ݁ܶܕ݂ ܬ݁ܚܶܝܬ݂ ܪܶܓ݂ܠܰܘܗ̱ܝ̈ . ܡܳܐ ܕ݁ܶܐܡܰܪ ܕ݁ܶܝܢ
                    ܂ ܕ݁ܟ݂ܽܠܡܶܕ݁ܶܡ ܡܶܫܬ݁ܰܥܒ݁ܰܕ݂ ܠܶܗ ܆ ܝܺܕ݂ܺܝܥܳܐ ܕ݁ܰܣܛܰܪ ܡܶܢ ܗܰܘ ܕ݁ܫܰܥܒ݁ܶܕ݂ ܠܶܗ ܟ݁ܽܠ
                    .
                ܘܡܳܐ ܕ݁ܶܐܫܬ݁ܰܥܒ݁ܰܕ݂ ܠܶܗ ܟ݁ܽܠ ܆ ܗܳܝܕ݁ܶܝܢ ܗܽܘ ܒ݁ܪܳܐ
                    ܢܶܫܬ݁ܰܥܒ݁ܰܕ݂ ܠܗܰܘ ܕ݁ܫܰܥܒ݁ܶܕ݂ ܠܶܗ ܟ݁ܽܠ ܇ ܕ݁ܢܶܗܘܶܐ ܐܰܠܳܗܳܐ ܟ݁ܽܠ ܒ݁ܟ݂ܽܠ .
                ܘܶܐܠܳܐ ܡܳܢܳܐ ܢܶܥܒ݁ܕ݂ܽܘܢ ܗܳܢܽܘܢ ܕ݁ܥܳܡܕ݁ܺܝܢ ܚܠܳܦ݂ ܡܺܝܬ݂ܶܐ̈ ܆
                    ܐܶܢ ܡܺܝܬ݂ܶܐ̈ ܠܳܐ ܩܳܝܡܺܝܢ ܆ ܡܳܢܳܐ ܥܳܡܕ݁ܺܝܢ ܚܠܳܦ݂ ܡܺܝܬ݂ܶܐ̈ .
                ܘܰܠܡܳܢܳܐ ܐܳܦ݂ ܚܢܰܢ ܒ݁ܟ݂ܽܠ ܫܳܥܳܐ ܒ݁ܩܽܢܕ݂ܺܝܢܳܘܣ ܩܳܝܡܺܝܢܰܢ
                    .
                ܝܳܡܶܐ ܐ̱ܢܳܐ ܒ݁ܫܽܘܒ݂ܗܳܪܟ݂ܽܘܢ ܐܰܚܰܝ̈ ܇ ܕ݁ܺܐܝܬ݂ ܠܺܝ ܒ݁ܡܳܪܰܢ
                    ܝܶܫܽܘܥ ܡܫܺܝܚܳܐ ܆ ܕ݁ܟ݂ܽܠܝܽܘܡ ܡܳܐܶܬ݂ ܐ̱ܢܳܐ .
                ܐܶܢ ܐܰܝܟ݂ ܕ݁ܒ݂ܶܝܬ݂ ܒ݁ܢܰܝܢܳܫܳܐ̈ ܇ ܐܶܫܬ݁ܕ݂ܺܝܬ݂ ܠܚܰܝܘܳܬ݂ܳܐ̈
                    ܒ݁ܶܐܦ݂ܶܣܳܘܣ ܆ ܡܳܢܳܐ ܐܶܬ݂ܗܢܺܝܬ݂ ܂ ܐܶܢ ܡܺܝܬ݂ܶܐ̈ ܠܳܐ ܩܳܝܡܺܝܢ . ܢܶܐܟ݂ܽܘܠ ܘܢܶܫܬ݁ܶܐ .
                    ܡܚܳܪ ܓ݁ܶܝܪ ܡܳܝܬ݁ܺܝܢܰܢ .
                ܠܳܐ ܬ݁ܶܛܥܽܘܢ . ܡܚܰܒ݁ܠܳܢ̈ ܪܶܥܝܳܢܶܐ̈ ܒ݁ܰܣܺܝܡܶܐ̈ ܫܽܘܥܝܳܬ݂ܳܐ̈
                    ܒ݁ܺܝܫܳܬ݂ܳܐ̈ ܀.܀.܀܀
                
                ܐܰܥܺܝܪܘ ܠܶܒ݁ܟ݂ܽܘܢ ܙܰܕ݁ܺܝܩܳܐܝܺܬ݂ ܂ ܘܠܳܐ ܬ݁ܶܚܛܽܘܢ . ܐܺܝܬ݂
                    ܓ݁ܶܝܪ ܐ̱ܢܳܫܳܐ ܕ݁ܺܝܕ݂ܰܥܬ݂ܳܐ ܕ݁ܰܐܠܳܗܳܐ ܠܰܝܬ݁ ܒ݁ܗܽܘܢ . ܠܒ݂ܶܗܬ݁ܰܬ݂ܟ݂ܽܘܢ ܗ̱ܽܘ ܐܳܡܰܪ
                    ܐ̱ܢܳܐ .
                ܢܺܐܡܰܪ ܐ̱ܢܳܫ ܡܶܢܟ݂ܽܘܢ ܆ ܕ݁ܰܐܝܟ݁ܰܢܳܐ ܩܳܝܡܺܝܢ ܡܺܝܬ݂ܶܐ̈ ܇
                    ܘܒ݂ܰܐܝܢܳܐ ܦ݁ܰܓ݂ܪܳܐ ܐܳܬ݂ܶܝܢ .
                ܣܰܟ݂ܠܳܐ ܆ ܙܰܪܥܳܐ ܕ݁ܙܳܪܰܥ ܐܰܢ̱ܬ݁ ܆ ܐܶܢ ܠܳܐ ܡܳܐܶܬ݂ ܂ ܠܳܐ ܚܳܝܶܐ
                    .
                ܘܗܰܘ ܡܶܕ݁ܶܡ ܕ݁ܙܳܪܰܥ ܐܰܢ̱ܬ݁ ܆ ܠܳܐ ܗ̱ܘܳܐ ܗܰܘ ܦ݁ܰܓ݂ܪܳܐ
                    ܕ݁ܰܥܬ݂ܺܝܕ݂ ܠܡܶܗܘܳܐ ܂ ܙܳܪܰܥ ܐܰܢ̱ܬ݁ ܇ ܐܶܠܳܐ ܦ݁ܪܶܕ݁ܬ݁ܳܐ ܥܰܪܛܶܠܳܝܬ݁ܳܐ ܕ݁ܚܶܛܶܐ̈ ܂ ܐܰܘ
                    ܕ݁ܰܣܥܳܪܶܐ̈ ܂ ܐܰܘ ܕ݁ܫܰܪܟ݁ܳܐ ܕ݁ܙܰܪܥܽܘܢܶܐ̈ .
                ܐܰܠܳܗܳܐ ܕ݁ܶܝܢ ܝܳܗܶܒ݂ ܠܶܗ ܦ݁ܰܓ݂ܪܳܐ ܂ ܐܰܝܟ݁ܰܢܳܐ ܕ݁ܨܳܒ݂ܶܐ .
                    ܘܰܠܚܰܕ݂ ܚܰܕ݂ ܡܶܢ ܙܰܪܥܽܘܢܶܐ̈ ܦ݁ܰܓ݂ܪܳܐ ܕ݁ܰܟ݂ܝܳܢܶܗ .
                ܠܳܐ ܗ̱ܘܳܐ ܕ݁ܶܝܢ ܟ݁ܽܠ ܦ݁ܓ݂ܰܪ ܫܘܶܐ . ܐ̱ܚܪܺܝܢ ܗ̱ܽܘ ܓ݁ܶܝܪ
                    ܦ݁ܰܓ݂ܪܳܐ ܕ݁ܒ݂ܰܪ ܐ̱ܢܳܫܳܐ . ܘܰܐ̱ܚܪܺܝܢ ܕ݁ܰܒ݂ܥܺܝܪܳܐ . ܘܰܐ̱ܚܪܺܝܢ ܕ݁ܦ݂ܳܪܰܚܬ݂ܳܐ .
                    ܘܰܐ̱ܚܪܺܝܢ ܕ݁ܢܽܘܢܶܐ̈ .
                ܘܺܐܝܬ݂ ܦ݁ܰܓ݂ܪܶܐ̈ ܫܡܰܝܳܢܶܐ̈ . ܘܺܐܝܬ݂ ܦ݁ܰܓ݂ܪܶܐ̈ ܐܰܪܥܳܢܳܝܶܐ̈ .
                    ܐܶܠܳܐ ܐ̱ܚܪܺܝܢ ܗ̱ܽܘ ܫܽܘܒ݂ܚܳܐ ܕ݁ܰܫܡܰܝܳܢܶܐ̈ ܆ ܘܰܐ̱ܚܪܺܝܢ ܕ݁ܰܐܪܥܳܢܳܝܶܐ̈ .
                ܘܰܐ̱ܚܪܺܝܢ ܗ̱ܽܘ ܫܽܘܒ݂ܚܳܐ ܕ݁ܫܶܡܫܳܐ . ܘܰܐ̱ܚܪܺܝܢ ܫܽܘܒ݂ܚܳܐ
                    ܕ݁ܣܰܗܪܳܐ . ܘܰܐ̱ܚܪܺܝܢ ܫܽܘܒ݂ܚܳܐ ܕ݁ܟ݂ܰܘܟ݁ܒ݂ܶܐ̈ . ܘܟ݂ܰܘܟ݁ܒ݂ܳܐ ܡܶܢ ܟ݁ܰܘܟ݁ܒ݂ܳܐ ܡܝܰܬ݁ܰܪ
                    ܗ̱ܽܘ ܒ݁ܫܽܘܒ݂ܚܳܐ .
                ܗܳܟ݂ܰܢܳܐ ܐܳܦ݂ ܚܰܝܰܬ݂ ܡܺܝܬ݂ܶܐ̈ . ܡܶܙܕ݁ܰܪܥܺܝܢ ܒ݁ܰܚܒ݂ܳܠܳܐ ܆
                    ܩܳܝܡܺܝܢ ܕ݁ܠܳܐ ܚܒ݂ܳܠܳܐ .
                ܡܶܙܕ݁ܰܪܥܺܝܢ ܒ݁ܨܰܥܪܳܐ ܆ ܩܳܝܡܺܝܢ ܒ݁ܫܽܘܒ݂ܚܳܐ . ܡܶܙܕ݁ܰܪܥܺܝܢ
                    ܒ݁ܰܟ݂ܪܺܝܗܽܘܬ݂ܳܐ ܆ ܩܳܝܡܺܝܢ ܒ݁ܚܰܝܠܳܐ .
                ܡܶܙܕ݁ܰܪܥܺܝܢ ܦ݁ܰܓ݂ܪܳܐ ܢܰܦ݂ܫܳܢܳܝܳܐ ܆ ܩܳܐܶܡ ܦ݁ܰܓ݂ܪܳܐ ܪܽܘܚܳܢܳܝܳܐ
                    . ܐܺܝܬ݂ ܓ݁ܶܝܪ ܦ݁ܰܓ݂ܪܳܐ ܕ݁ܰܢܦ݂ܶܫ ܆ ܘܺܐܝܬ݂ ܦ݁ܰܓ݂ܪܳܐ ܕ݁ܪܽܘܚ .
                ܗܳܟ݂ܰܢܳܐ ܐܳܦ݂ ܟ݁ܬ݂ܺܝܒ݂ . ܗܘܳܐ ܐܳܕ݂ܳܡ ܒ݁ܰܪܢܳܫܳܐ ܩܰܕ݂ܡܳܝܳܐ
                    ܠܰܢܦ݂ܶܫ ܚܰܝܳܐ ܆ ܘܳܐܕ݂ܳܡ ܐ̱ܚܪܳܝܳܐ ܠܪܽܘܚܳܐ ܡܰܚܝܳܢܺܝܬ݂ܳܐ .
                ܐܶܠܳܐ ܠܳܐ ܗ̱ܘܳܐ ܠܽܘܩܕ݂ܰܡ ܪܽܘܚܳܢܳܝܳܐ ܆ ܐܶܠܳܐ ܢܰܦ݂ܫܳܢܳܝܳܐ ܂
                    ܘܗܳܝܕ݁ܶܝܢ ܪܽܘܚܳܢܳܝܳܐ .
                ܒ݁ܰܪܢܳܫܳܐ ܩܰܕ݂ܡܳܝܳܐ ܥܰܦ݂ܪܳܢܳܐ ܕ݁ܡܶܢ ܐܰܪܥܳܐ ܆ ܒ݁ܰܪܢܳܫܳܐ
                    ܕ݁ܰܬ݂ܪܶܝܢ̈ ܡܳܪܝܳܐ ܡܶܢ ܫܡܰܝܳܐ .
                ܐܰܝܟ݁ܰܢܳܐ ܕ݁ܺܐܝܬ݂ܰܘܗ̱ܝ ܗܰܘ ܥܰܦ݂ܪܳܢܳܐ ܆ ܗܳܟ݂ܰܢܳܐ ܐܳܦ݂
                    ܥܰܦ݂ܪܳܢܶܐ̈ . ܘܰܐܝܟ݁ܰܢܳܐ ܕ݁ܺܐܝܬ݂ܰܘܗ̱ܝ ܗܰܘ ܕ݁ܡܶܢ ܫܡܰܝܳܐ ܆ ܗܳܟ݂ܰܢܳܐ ܐܳܦ݂ ܫܡܰܝܳܢܶܐ̈
                    .
                ܘܰܐܝܟ݂ ܕ݁ܰܠܒ݂ܶܫܢ ܕ݁ܡܽܘܬ݂ܳܐ ܕ݁ܗܰܘ ܕ݁ܡܶܢ ܥܰܦ݂ܪܳܐ ܆ ܗܳܟ݂ܰܢܳܐ
                    ܢܶܠܒ݁ܰܫ ܕ݁ܡܽܘܬ݂ܳܐ ܕ݁ܗܰܘ ܕ݁ܡܶܢ ܫܡܰܝܳܐ .
                ܗܳܕ݂ܶܐ ܕ݁ܶܝܢ ܐܳܡܰܪ ܐ̱ܢܳܐ ܐܰܚܰܝ̈ ܆ ܕ݁ܒ݂ܶܣܪܳܐ ܘܰܕ݂ܡܳܐ
                    ܡܰܠܟ݁ܽܘܬ݂ܳܐ ܕ݁ܰܫܡܰܝܳܐ ܠܡܺܐܪܰܬ݂ ܁ ܠܳܐ ܡܶܫܟ݁ܚܺܝܢ . ܘܠܳܐ ܚܒ݂ܳܠܳܐ ܝܳܪܶܬ݂ ܠܳܐ
                    ܡܶܬ݂ܚܰܒ݁ܠܳܢܽܘܬ݂ܳܐ .
                ܗܳܐ ܐܳܡܰܪ ܐ̱ܢܳܐ ܠܟ݂ܽܘܢ ܐ̱ܪܳܙܳܐ . ܠܰܘ ܟ݁ܽܠܰܢ ܢܶܕ݂ܡܰܟ݂ ܆
                    ܟ݁ܽܠܰܢ ܕ݁ܶܝܢ ܢܶܬ݂ܚܰܠܰܦ݂ ܇
                ܚܰܪܺܝܦ݂ܳܐܝܺܬ݂ ܂ ܐܰܝܟ݂ ܪܦ݂ܳܦ݂ ܥܰܝܢܳܐ ܂ ܒ݁ܩܰܪܢܳܐ ܐ̱ܚܪܳܝܬ݁ܳܐ
                    ܟ݁ܰܕ݂ ܬ݁ܶܩܪܶܐ ܆ ܘܰܢܩܽܘܡܽܘܢ ܡܺܝܬ݂ܶܐ̈ ܕ݁ܠܳܐ ܚܒ݂ܳܠܳܐ ܘܰܚܢܰܢ ܢܶܬ݂ܚܰܠܰܦ݂ .
                ܥܬ݂ܺܝܕ݂ ܗ̱ܽܘ ܓ݁ܶܝܪ ܗܳܢܳܐ ܕ݁ܡܶܬ݂ܚܰܒ݁ܰܠ ܁ ܕ݁ܢܶܠܒ݁ܰܫ ܠܳܐ
                    ܡܶܬ݂ܚܰܒ݁ܠܳܢܽܘܬ݂ܳܐ ܇ ܘܗܳܢܳܐ ܕ݁ܡܳܐܶܬ݂ ܁ ܕ݁ܢܶܠܒ݁ܰܫ ܠܳܐ ܡܳܝܽܘܬ݂ܽܘܬ݂ܳܐ .
                ܡܳܐ ܕ݁ܠܳܒ݂ܶܫ ܕ݁ܶܝܢ ܗܳܢܳܐ ܕ݁ܡܶܬ݂ܚܰܒ݁ܰܠ ܠܳܐ ܡܶܬ݂ܚܰܒ݁ܠܳܢܽܘܬ݂ܳܐ
                    ܇ ܘܗܳܢܳܐ ܕ݁ܡܳܐܶܬ݂ ܠܳܐ ܡܳܝܽܘܬ݂ܽܘܬ݂ܳܐ ܆ ܗܳܝܕ݁ܶܝܢ ܬ݁ܶܗܘܶܐ ܡܶܠܬ݂ܳܐ ܗ̱ܝ ܕ݁ܰܟ݂ܬ݂ܺܝܒ݂ܳܐ
                    ܇ ܕ݁ܶܐܬ݂ܒ݁ܠܰܥ ܡܰܘܬ݁ܳܐ ܒ݁ܙܳܟ݂ܽܘܬ݂ܳܐ .
                ܐܰܝܟ݁ܰܘ ܥܽܘܩܣܳܟ݂ ܁ ܡܰܘܬ݁ܳܐ ܆ ܐܳܘ ܐܰܝܟ݁ܳܐ ܗ̱ܝ ܙܳܟ݂ܽܘܬ݂ܶܟ݂ܝ ܁
                    ܫܝܽܘܠ .
                ܥܽܘܩܣܶܗ ܕ݁ܶܝܢ ܕ݁ܡܰܘܬ݁ܳܐ ܚܛܺܝܬ݂ܳܐ ܗ̱ܝ . ܘܚܰܝܠܳܐ ܕ݁ܰܚܛܺܝܬ݂ܳܐ
                    ܢܳܡܽܘܣܳܐ ܗܽܘ .
                ܛܰܝܒ݁ܽܘ ܕ݁ܶܝܢ ܠܰܐܠܳܗܳܐ ܆ ܕ݁ܝܰܗ̱ܒ݂ ܠܰܢ ܙܳܟ݂ܽܘܬ݂ܳܐ ܒ݁ܝܰܕ݂
                    ܡܳܪܰܢ ܝܶܫܽܘܥ ܡܫܺܝܚܳܐ ܀
                ܡܶܟ݁ܺܝܠ ܐܰܚܰܝ̈ ܘܚܰܒ݁ܺܝܒ݂ܰܝ̈ ܆ ܗܘܰܘ ܡܫܰܪܪܺܝܢ . ܘܠܳܐ ܬ݁ܶܗܘܽܘܢ
                    ܡܶܬ݁ܙܺܝܥܺܝܢ ܇ ܐܶܠܳܐ ܗܘܰܘ ܡܶܬ݂ܝܰܬ݁ܪܺܝܢ ܒ݁ܟ݂ܽܠܙܒ݂ܰܢ ܒ݁ܰܥܒ݂ܳܕ݂ܶܗ ܕ݁ܡܳܪܝܳܐ . ܟ݁ܰܕ݂
                    ܝܳܕ݂ܥܺܝܢ ܐܢ̱ܬ݁ܽܘܢ ܆ ܕ݁ܥܰܡܠܟ݂ܽܘܢ ܠܳܐ ܗ̱ܘܳܐ ܣܪܺܝܩ ܒ݁ܡܳܪܝܳܐ ܀
            
            
                Chapter 16
                ܥܰܠ ܡܶܕ݁ܶܡ ܕ݁ܶܝܢ ܕ݁ܡܶܬ݂ܟ݁ܰܢܰܫ ܠܩܰܕ݁ܺܝܫܶܐ̈ ܆ ܐܰܝܟ݁ܰܢܳܐ
                    ܕ݁ܦ݂ܶܩܕ݁ܶܬ݂ ܠܥܺܕ݂ܳܬ݂ܳܐ̈ ܕ݁ܓ݂ܰܠܰܛܳܝܶܐ̈ ܆ ܗܳܟ݂ܰܢܳܐ ܐܳܦ݂ ܐܰܢ̱ܬ݁ܽܘܢ ܥܒ݂ܶܕ݂ܘ .
                ܒ݁ܟ݂ܽܠ ܚܰܕ݂ ܒ݁ܫܰܒ݁ܳܐ ܂ ܐ̱ܢܳܫ ܐ̱ܢܳܫ ܡܶܢܟ݂ܽܘܢ ܒ݁ܒ݂ܰܝܬ݁ܶܗ ܢܶܗܘܶܐ
                    ܣܳܐܶܡ ܘܢܳܛܰܪ ܗܰܘ ܡܶܕ݁ܶܡ ܕ݁ܡܳܛܶܐ ܒ݁ܺܐܝܕ݂ܰܘܗ̱ܝ̈ ܆ ܕ݁ܠܳܐ ܡܳܐ ܕ݁ܶܐܬ݂ܺܝܬ݂ ܂ ܗܳܝܕ݁ܶܝܢ
                    ܢܶܗܘܝܳܢ̈ ܓ݁ܶܒ݂ܝܳܬ݂ܳܐ̈ .
                ܘܡܳܐ ܕ݁ܶܐܬ݂ܺܝܬ݂ ܂ ܠܰܐܝܠܶܝܢ ܕ݁ܓ݂ܳܒ݂ܶܝܢ ܐܢ̱ܬ݁ܽܘܢ ܆ ܠܗܽܘܢ
                    ܐܶܫܰܕ݁ܰܪ ܒ݁ܶܐܓ݁ܰܪܬ݁ܳܐ ܂ ܕ݁ܢܰܘܒ݁ܠܽܘܢ ܛܰܝܒ݁ܽܘܬ݂ܟ݂ܽܘܢ ܠܽܐܘܪܺܫܠܶܡ .
                ܐܶܢ ܕ݁ܶܝܢ ܫܳܘܶܐ ܗ̱ܘ ܣܽܘܥܪܳܢܳܐ ܂ ܕ݁ܳܐܦ݂ ܐܶܢܳܐ ܐܺܙܰܠ ܆ ܥܰܡܝ
                    ܢܺܐܙܽܠ̱ܘܢ .
                ܐܳܬ݂ܶܐ ܐ̱ܢܳܐ ܕ݁ܶܝܢ ܠܘܳܬ݂ܟ݂ܽܘܢ ܆ ܡܳܐ ܕ݁ܥܶܒ݂ܪܶܬ݂ ܡܶܢ
                    ܡܰܩܶܕ݂ܳܘܢܳܝܶܐ̈ . ܥܳܒ݂ܰܪ ܐ̱ܢܳܐ ܠܳܗ ܓ݁ܶܝܪ ܠܡܰܩܶܕ݂ܳܘܢܺܝܰܐ .
                ܘܰܟ݂ܒ݂ܰܪ ܐܳܦ݂ ܠܘܳܬ݂ܟ݂ܽܘܢ ܐܶܩܰܘܶܐ . ܐܰܘ ܐܰܣܬ݁ܶܐ ܠܘܳܬ݂ܟ݂ܽܘܢ ܆
                    ܕ݁ܰܐܢ̱ܬ݁ܽܘܢ ܬ݁ܠܰܘܽܘܢܳܢܝ ܠܰܐܬ݂ܰܪ ܕ݁ܳܐܙܶܠ ܐ̱ܢܳܐ .
                ܠܳܐ ܓ݁ܶܝܪ ܨܳܒ݂ܶܐ ܐ̱ܢܳܐ ܕ݁ܗܳܫܳܐ ܂ ܐܰܝܟ݂ ܥܳܒ݂ܰܪ ܐܽܘܪܚܳܐ
                    ܐܶܚܙܶܝܟ݂ܽܘܢ . ܡܣܰܒ݁ܰܪ ܐ̱ܢܳܐ ܓ݁ܶܝܪ ܕ݁ܰܐܘܚܰܪ ܙܰܒ݂ܢܳܐ ܠܘܳܬ݂ܟ݂ܽܘܢ ܆ ܐܶܢ ܡܳܪܝ ܡܰܦ݁ܶܣ
                    ܠܺܝ .
                ܡܩܰܘܶܐ ܐ̱ܢܳܐ ܕ݁ܶܝܢ ܒ݁ܶܐܦ݂ܶܣܳܘܣ ܥܕ݂ܰܡܳܐ ܠܦ݁ܶܢܛܺܩܳܘܣܛܺܐ .
                ܬ݁ܰܪܥܳܐ ܓ݁ܶܝܪ ܪܰܒ݁ܳܐ ܐܶܬ݂ܦ݁ܬ݂ܰܚ ܠܺܝ ܂ ܕ݁ܰܡܠܶܐ ܣܽܘܥܪܳܢܶܐ̈ ܆
                    ܘܣܰܩܽܘܒ݂ܠܶܐ̈ ܣܰܓ݁ܺܝܐܝܺܢ .
                ܐܶܢ ܕ݁ܶܝܢ ܢܺܐܬ݂ܶܐ ܨܶܐܕ݂ܰܝܟ݁ܽܘܢ ܛܺܝܡܳܬ݂ܶܐܳܘܣ ܆ ܚܙܰܘ ܕ݁ܰܕ݂ܠܳܐ
                    ܕ݁ܶܚܠܳܐ ܢܶܗܘܶܐ ܠܘܳܬ݂ܟ݂ܽܘܢ . ܥܒ݂ܳܕ݂ܳܐ ܓ݁ܶܝܪ ܕ݁ܡܳܪܝܳܐ ܦ݁ܳܠܰܚ ܐܰܟ݂ܘܳܬ݂ܝ .
                ܠܡܳܐ ܗܳܟ݂ܺܝܠ ܐ̱ܢܳܫ ܢܫܽܘܛܺܝܘܗ̱ܝ ܆ ܐܶܠܳܐ ܠܰܘܰܐܘܽܗ̱ܝ ܒ݁ܰܫܠܳܡܳܐ
                    ܕ݁ܢܺܐܬ݂ܶܐ ܠܘܳܬ݂ܝ . ܡܩܰܘܶܐ ܐ̱ܢܳܐ ܠܶܗ ܓ݁ܶܝܪ ܥܰܡ ܐܰܚܶܐ̈ .
                ܡܶܢ ܐܰܦ݁ܳܠܳܘ ܕ݁ܶܝܢ ܐܰܚܰܝ̈ ܆ ܣܰܓ݁ܺܝ ܒ݁ܥܺܝܬ݂ ܡܶܢܶܗ ܂ ܕ݁ܢܺܐܬ݂ܶܐ
                    ܠܘܳܬ݂ܟ݂ܽܘܢ ܥܰܡ ܐܰܚܶܐ̈ . ܘܰܟ݂ܒ݂ܰܪ ܠܳܐ ܗܘܳܐ ܨܶܒ݂ܝܳܢܳܐ ܕ݁ܢܺܐܬ݂ܶܐ ܠܘܳܬ݂ܟ݂ܽܘܢ .
                    ܐܶܡܰܬ݂ܝ ܕ݁ܶܝܢ ܕ݁ܢܶܗܘܶܐ ܠܶܗ ܐܰܬ݂ܪܳܐ ܆ ܐܳܬ݂ܶܐ ܠܘܳܬ݂ܟ݂ܽܘܢ ܀
                ܐܶܬ݁ܬ݁ܥܺܝܪܘ ܘܩܽܘܡܘ ܒ݁ܗܰܝܡܳܢܽܘܬ݂ܳܐ . ܐܶܬ݂ܓ݁ܰܒ݁ܰܪܘ ܐܶܬ݂ܚܰܣܰܢܘ
                    .
                ܘܟ݂ܽܠܗܶܝܢ ܨܶܒ݂ܘܳܬ݂ܟ݂ܽܘܢ̈ ܒ݁ܚܽܘܒ݁ܳܐ ܢܶܗܘܝܳܢ̈ ܀
                ܒ݁ܳܥܶܐ ܐ̱ܢܳܐ ܕ݁ܶܝܢ ܡܶܢܟ݂ܽܘܢ ܐܰܚܰܝ̈ ܆ ܥܰܠ ܒ݁ܰܝܬ݁ܳܐ
                    ܕ݁ܶܐܣܛܶܦ݂ܰܢܰܐ . ܡܶܛܽܠ ܕ݁ܝܳܕ݂ܥܺܝܢ ܐܢ̱ܬ݁ܽܘܢ ܕ݁ܗܶܢܽܘܢ ܐܶܢܽܘܢ ܪܺܫܺܝܬ݂ܳܐ ܕ݁ܰܐܟ݂ܰܐܺܝܰܐ
                    ܇ ܘܣܳܡܘ ܢܰܦ݂ܫܗܽܘܢ ܠܬ݂ܶܫܡܶܫܬ݁ܳܐ ܕ݁ܩܰܕ݁ܺܝܫܶܐ̈ .
                ܕ݁ܳܐܦ݂ ܐܰܢ̱ܬ݁ܽܘܢ ܬ݁ܶܗܘܽܘܢ ܡܶܫܬ݁ܰܡܥܺܝܢ ܠܰܐܝܠܶܝܢ ܕ݁ܗܳܟ݂ܰܢܳܐ
                    ܐܶܢܽܘܢ . ܘܰܠܟ݂ܽܠܢܳܫ ܕ݁ܠܳܐܶܐ ܥܰܡܰܢ ܘܰܡܥܰܕ݁ܰܪ .
                ܚܳܕ݂ܶܐ ܐ̱ܢܳܐ ܕ݁ܶܝܢ ܒ݁ܡܶܐܬ݂ܺܝܬ݂ܶܗ ܕ݁ܶܐܣܛܶܦ݂ܰܢܰܐ ܁
                    ܘܰܕ݂ܦ݂ܳܪܛܽܘܢܰܛܳܘܣ ܂ ܘܕ݂ܰܐܟ݂ܰܐܝܺܩܳܘܣ . ܕ݁ܡܶܕ݁ܶܡ ܕ݁ܒ݂ܰܨܰܪܬ݁ܽܘܢ ܠܘܳܬ݂ܝ ܂ ܗܶܢܽܘܢ
                    ܡܰܠܺܝܘ .
                ܐܰܢܺܝܚܘ ܓ݁ܶܝܪ ܪܽܘܚܝ ܕ݁ܺܝܠܝ ܘܕ݂ܺܝܠܟ݂ܽܘܢ . ܗܘܰܝܬ݁ܽܘܢ ܗܳܟ݂ܺܝܠ
                    ܡܶܫܬ݁ܰܘܕ݁ܥܺܝܢ ܠܰܐܝܠܶܝܢ ܕ݁ܗܳܟ݂ܰܢܳܐ ܐܶܢܽܘܢ ܀
                ܫܳܐܠܳܢ̈ ܒ݁ܰܫܠܳܡܟ݂ܽܘܢ ܥܺܕ݂ܳܬ݂ܳܐ̈ ܟ݁ܽܠܗܶܝܢ ܕ݁ܒ݂ܰܐܣܺܝܰܐ ܀
                    ܫܳܐܠܺܝܢ ܒ݁ܰܫܠܳܡܟ݂ܽܘܢ ܣܰܓ݁ܺܝ ܒ݁ܡܳܪܰܢ ܆ ܐܰܩܶܠܳܘܣ ܘܰܦ݁ܪܺܝܣܩܺܠܰܐ ܂ ܥܰܡ ܥܺܕ̱݁ܬ݁ܳܐ
                    ܕ݁ܰܒ݂ܒ݂ܰܝܬ݁ܗܽܘܢ ܀
                ܫܳܐܠܺܝܢ ܒ݁ܰܫܠܳܡܟ݂ܽܘܢ ܐܰܚܰܝܢ̈ ܟ݁ܽܠܗܽܘܢ ܀ ܫܰܐܠܘ ܒ݁ܰܫܠܳܡܳܐ ܚܰܕ݂
                    ܕ݁ܚܰܕ݂ ܒ݁ܢܽܘܫܰܩܬ݁ܳܐ ܩܰܕ݁ܺܝܫܬ݁ܳܐ ܀
                ܫܠܳܡܳܐ ܒ݁ܰܟ݂ܬ݂ܳܒ݂ܰܬ݂ ܐܺܝܕ݂ܳܐ ܕ݁ܺܝܠܝ ܕ݁ܦ݁ܰܘܠܳܘܣ .
                ܡܰܢ ܕ݁ܠܳܐ ܪܳܚܶܡ ܠܡܳܪܰܢ ܝܶܫܽܘܥ ܡܫܺܝܚܳܐ ܂ ܢܶܗܘܶܐ ܚܪܶܡ . ܡܳܪܰܢ
                    ܐܶܬ݂ܳܐ .
                ܛܰܝܒ݁ܽܘܬ݂ܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܥܰܡܟ݂ܽܘܢ ܆
                ܘܚܽܘܒ݁ܝ ܥܰܡ ܟ݁ܽܠܟ݂ܽܘܢ ܒ݁ܰܡܫܺܝܚܳܐ ܝܶܫܽܘܥ ܀.܀.܀܀