Paul the Apostle. “Titus (Peshitta Version) - ܐܓܪܬܐ ܕܦܘܠܘܣ ܕܠܘܬ ܛܝܛܘܣ.” Based upon G. H. Gwilliam, J. Pinkerton and John Gwynn eds., The New Testament in Syriac [ܕܝܬܝܩܐ ܚܕܬܐ ܕܡܪܢ ܝܫܘܥ ܡܫܝܚܐ] (London: British and Foreign Bible Society, 1905). Digital Syriac Corpus. Last modified May 1, 2018. https://syriaccorpus.org/135. ܐܓܪܬܐ ܕܦܘܠܘܣ ܕܠܘܬ ܛܝܛܘܣ Chapter 1 ܦ݁ܰܘܠܳܘܣ ܥܰܒ݂ܕ݁ܶܗ ܕ݁ܰܐܠܳܗܳܐ ܁ ܘܰܫܠܺܝܚܶܗ ܕ݁ܝܶܫܽܘܥ ܡܫܺܝܚܳܐ . ܒ݁ܗܰܝܡܳܢܽܘܬ݂ܳܐ ܕ݁ܰܓ݂ܒ݂ܰܝܳܐ̈ ܕ݁ܰܐܠܳܗܳܐ ܁ ܘܺܝܕ݂ܰܥܬ݂ܳܐ ܕ݁ܰܫܪܳܪܳܐ ܕ݁ܰܒ݂ܕ݂ܶܚܠܰܬ݂ ܐܰܠܳܗܳܐ . ܥܰܠ ܣܰܒ݂ܪܳܐ ܕ݁ܚܰܝܶܐ̈ ܕ݁ܰܠܥܳܠܰܡ ܇ ܕ݁ܰܡܠܰܟ݂ ܐܰܠܳܗܳܐ ܫܰܪܺܝܪܳܐ ܩܕ݂ܳܡ ܙܰܒ݂ܢܰܘܗ̱ܝ̈ ܕ݁ܥܳܠܡܳܐ ܇ ܘܰܓ݂ܠܳܐ ܡܶܠܬ݂ܶܗ ܒ݁ܙܰܒ݂ܢܳܗ ܒ݁ܝܰܕ݂ ܟ݁ܳܪܽܘܙܽܘܬ݂ܰܢ . ܗܳܝ ܕ݁ܶܐܬ݂ܗܰܝܡܢܶܬ݂ ܐܶܢܳܐ ܒ݁ܦ݂ܽܘܩܕ݁ܳܢܳܐ ܕ݁ܰܐܠܳܗܳܐ ܡܰܚܝܳܢܰܢ ܆ ܠܛܺܛܳܘܣ ܒ݁ܪܳܐ ܫܰܪܺܝܪܳܐ ܒ݁ܗܰܝܡܳܢܽܘܬ݂ܳܐ ܕ݁ܓ݂ܰܘܳܐ . ܛܰܝܒ݁ܽܘܬ݂ܳܐ ܘܰܫܠܳܡܳܐ ܁ ܡܶܢ ܐܰܠܳܗܳܐ ܐܰܒ݂ܳܐ ܆ ܘܡܶܢ ܡܳܪܰܢ ܝܶܫܽܘܥ ܡܫܺܝܚܳܐ ܡܰܚܝܳܢܰܢ ܀ ܡܶܛܽܠܗܳܢܳܐ ܗ̱ܘ ܫܒ݂ܰܩܬ݁ܳܟ݂ ܗ̱ܘܺܝܬ݂ ܒ݁ܰܩܪܺܛܺܐ ܆ ܕ݁ܰܐܝܠܶܝܢ ܕ݁ܚܰܣܺܝܪܳܢ̈ ܬ݁ܰܬ݂ܩܶܢ ܁ ܘܰܬ݂ܩܺܝܡ ܩܰܫܺܝܫܶܐ̈ ܒ݁ܰܡܕ݂ܺܝܢܳܐ ܡܕ݂ܺܝܢܳܐ ܐܰܝܟ݁ܰܢܳܐ ܕ݁ܦ݂ܰܩܶܕ݁ܬ݁ܳܟ݂ ܇ ܐܰܝܢܳܐ ܕ݁ܰܕ݂ܠܳܐ ܪܶܫܝܳܢ ܗ̱ܽܘ . ܘܰܗܘܳܐ ܒ݁ܰܥܠܳܐ ܕ݁ܰܚܕ݂ܳܐ ܐܰܢ̱ܬ݁ܬ݂ܳܐ . ܘܺܐܝܬ݂ ܠܶܗ ܒ݁ܢܰܝܳܐ̈ ܡܗܰܝܡܢܶܐ̈ ܕ݁ܠܳܐ ܡܨܰܚܶܝܢ . ܘܠܳܐ ܐܺܝܬ݂ܰܝܗܽܘܢ ܕ݁ܠܳܐ ܫܽܘܥܒ݁ܳܕ݂ ܒ݁ܳܐܣܽܘܛܽܘܬ݂ܳܐ . ܚܰܝܳܒ݂ ܗ̱ܽܘ ܓ݁ܶܝܪ ܩܰܫܺܝܫܳܐ ܆ ܕ݁ܢܶܗܘܶܐ ܕ݁ܠܳܐ ܪܶܫܝܳܢ . ܐܰܝܟ݂ ܪܰܒ݁ܰܝܬ݁ܳܐ ܕ݁ܰܐܠܳܗܳܐ . ܘܠܳܐ ܢܶܗܘܶܐ ܡܶܬ݁ܕ݁ܰܒ݁ܰܪ ܒ݁ܪܶܥܝܳܢ ܢܰܦ݂ܫܶܗ . ܘܠܳܐ ܢܶܗܘܶܐ ܚܶܡܬ݂ܳܢ . ܘܠܳܐ ܢܶܗܘܶܐ ܥܳܒ݂ܰܪ ܥܰܠ ܚܰܡܪܳܐ . ܘܠܳܐ ܬ݁ܶܗܘܶܐ ܪܳܗܛܳܐ ܐܺܝܕ݂ܶܗ ܠܡܶܡܚܳܐ . ܘܠܳܐ ܢܶܗܘܶܐ ܪܳܚܶܡ ܝܽܘܬ݂ܪܳܢܶܐ̈ ܛܰܢܦ݁ܶܐ̈ ܇ ܐܶܠܳܐ ܢܶܗܘܶܐ ܪܳܚܶܡ ܐܰܟ݂ܣܢܳܝܶܐ̈ . ܘܢܶܗܘܶܐ ܪܳܚܶܡ ܛܳܒ݂ܳܬ݂ܳܐ̈ . ܘܢܶܗܘܶܐ ܢܟ݂ܶܦ݂ . ܘܢܶܗܘܶܐ ܟ݁ܺܐܝܢ . ܘܢܶܗܘܶܐ ܚܰܣܝܳܐ . ܘܰܠܒ݂ܺܝܟ݂ ܢܰܦ݂ܫܶܗ ܡܶܢ ܪܓ݂ܺܝܓ݂ܳܬ݂ܳܐ̈ . ܘܰܒ݂ܛܺܝܠ ܠܶܗ ܥܰܠ ܝܽܘܠܦ݁ܳܢܳܐ ܕ݁ܡܶܠܬ݂ܳܐ ܕ݁ܗܰܝܡܳܢܽܘܬ݂ܳܐ ܇ ܕ݁ܢܶܫܟ݁ܰܚ ܐܳܦ݂ ܠܰܡܒ݂ܰܝܳܐܘܽ ܒ݁ܝܽܘܠܦ݁ܳܢܶܗ ܚܠܺܝܡܳܐ ܁ ܘܰܠܡܰܟ݁ܳܣܽܘ ܠܰܐܝܠܶܝܢ ܕ݁ܡܶܬ݂ܚܪܶܝܢ . ܐܺܝܬ݂ ܓ݁ܶܝܪ ܣܰܓ݁ܺܝܶܐܐ̈ ܁ ܕ݁ܠܳܐ ܡܶܫܬ݁ܰܥܒ݁ܕ݂ܺܝܢ . ܘܰܣܪܺܝܩܳܢ̈ ܡܶܠܰܝܗܽܘܢ̈ . ܘܡܰܛܥܶܝܢ ܪܶܥܝܳܢܶܐ̈ ܕ݁ܰܒ݂ܢܰܝܢܳܫܳܐ̈ . ܝܰܬ݁ܺܝܪܳܐܝܺܬ݂ ܁ ܐܰܝܠܶܝܢ ܕ݁ܡܶܢ ܓ݁ܙܽܘܪܬ݁ܳܐ ܐܶܢܽܘܢ ܇ ܗܳܢܽܘܢ ܕ݁ܘܳܠܶܐ ܠܰܡܣܰܟ݁ܳܪܽܘ ܦ݁ܽܘܡܗܽܘܢ . ܒ݁ܳܬ݁ܶܐ̈ ܓ݁ܶܝܪ ܣܰܓ݁ܺܝܶܐܐ̈ ܡܚܰܒ݁ܠܺܝܢ ܆ ܘܡܰܠܦ݂ܺܝܢ ܡܶܕ݁ܶܡ ܕ݁ܠܳܐ ܘܳܠܶܐ ܡܶܛܽܠ ܝܽܘܬ݂ܪܳܢܶܐ̈ ܛܰܢܦ݁ܶܐ̈ . ܐܶܡܰܪ ܐ̱ܢܳܫ ܡܶܢܗܽܘܢ ܢܒ݂ܺܝܳܐ ܕ݁ܺܝܠܗܽܘܢ ܆ ܕ݁ܰܒ݂ܢܰܝ̈ ܩܪܺܛܺܐ̈ ܒ݁ܟ݂ܽܠܙܒ݂ܰܢ ܕ݁ܰܓ݁ܳܠܺܝܢ ܐܶܢܽܘܢ ܇ ܚܰܝܘܳܬ݂ܳܐ̈ ܒ݁ܺܝܫܳܬ݂ܳܐ̈ ܁ ܘܟ݂ܰܪܣܳܬ݂ܳܐ̈ ܒ݁ܰܛܺܝܠܳܬ݂ܳܐ̈ . ܘܫܰܪܺܝܪܳܐܝܺܬ݂ ܐܺܝܬ݂ܶܝܗ ܣܳܗܕ݁ܽܘܬ݂ܳܐ ܗܳܕ݂ܶܐ . ܡܶܛܽܠ ܗܳܢܳܐ ܩܰܫܝܳܐܝܺܬ݂ ܗܘܰܝܬ݁ ܡܰܟ݁ܶܣ ܠܗܽܘܢ ܆ ܕ݁ܢܶܗܘܽܘܢ ܚܠܺܝܡܺܝܢ ܒ݁ܗܰܝܡܳܢܽܘܬ݂ܳܐ ܆ ܘܠܳܐ ܢܶܬ݂ܪܡܽܘܢ ܠܫܽܘܥܝܳܬ݂ܳܐ̈ ܕ݁ܺܝܗܽܘܕ݂ܳܝܶܐ̈ ܁ ܘܰܠܦ݂ܽܘܩܳܕ݂ܶܐ̈ ܕ݁ܰܒ݂ܢܰܝܢܳܫܳܐ̈ ܕ݁ܣܳܢܶܝܢ ܫܪܳܪܳܐ . ܟ݁ܽܠܡܶܕ݁ܶܡ ܓ݁ܶܝܪ ܕ݁ܟ݂ܶܐ ܗ̱ܘ ܠܰܕ݂ܟ݂ܰܝܳܐ̈ . ܠܰܐܝܠܶܝܢ ܕ݁ܶܝܢ ܕ݁ܰܡܣܰܝܒ݂ܺܝܢ ܘܠܳܐ ܡܗܰܝܡܢܺܝܢ ܆ ܡܶܕ݁ܶܡ ܕ݁ܰܕ݂ܟ݂ܶܐ ܠܰܝܬ݁ ܠܗܽܘܢ ܇ ܐܶܠܳܐ ܡܣܰܝܰܒ݂ ܗ̱ܽܘ ܪܶܥܝܳܢܗܽܘܢ ܘܬ݂ܺܐܪܬ݁ܗܽܘܢ . ܘܡܰܘܕ݁ܶܝܢ ܕ݁ܝܳܕ݂ܥܺܝܢ ܠܰܐܠܳܗܳܐ ܆ ܒ݁ܰܥܒ݂ܳܕ݂ܰܝܗܽܘܢ̈ ܕ݁ܶܝܢ ܟ݁ܳܦ݂ܪܺܝܢ ܒ݁ܶܗ ܇ ܘܺܐܝܬ݂ܰܝܗܽܘܢ ܣܢܺܝܶܐܐ̈ ܘܰܕ݂ܠܳܐ ܦ݁ܝܳܣ . ܘܡܰܣܠܰܝܳܐ̈ ܠܟ݂ܽܠ ܥܒ݂ܳܕ݂ ܛܳܒ݂ ܀ Chapter 2 ܐܰܢ̱ܬ݁ ܕ݁ܶܝܢ ܡܰܠܶܠ ܡܶܕ݁ܶܡ ܕ݁ܝܳܐܶܐ ܠܝܽܘܠܦ݁ܳܢܳܐ ܚܠܺܝܡܳܐ . ܘܰܐܠܶܦ݂ ܁ ܕ݁ܢܶܗܘܽܘܢ ܩܰܫܺܝܫܶܐ̈ ܥܺܝܪܺܝܢ ܒ݁ܪܶܥܝܳܢܰܝܗܽܘܢ̈ . ܘܢܶܗܘܽܘܢ ܢܰܟ݂ܦ݁ܺܝܢ . ܘܢܶܗܘܽܘܢ ܕ݁ܟ݂ܶܝܢ . ܘܢܶܗܘܽܘܢ ܚܠܺܝܡܺܝܢ ܒ݁ܗܰܝܡܳܢܽܘܬ݂ܳܐ ܘܰܒ݂ܚܽܘܒ݁ܳܐ ܘܒ݂ܰܡܣܰܝܒ݁ܪܳܢܽܘܬ݂ܳܐ . ܘܳܐܦ݂ ܩܰܫܺܝܫܳܬ݂ܳܐ̈ ܗܳܟ݂ܰܢܳܐ ܆ ܕ݁ܢܶܗܘܝܳܢ̈ ܒ݁ܶܐܣܟ݁ܺܡܳܐ ܕ݁ܝܳܐܶܐ ܠܕ݂ܶܚܠܰܬ݂ ܐܰܠܳܗܳܐ . ܘܠܳܐ ܢܶܗܘܝܳܢ̈ ܐܳܟ݂ܠܳܢ̈ ܩܰܪܨܶܐ̈ . ܘܠܳܐ ܢܶܗܘܝܳܢ̈ ܡܫܰܥܒ݁ܕ݂ܳܢ̈ ܠܚܰܡܪܳܐ ܣܰܓ݁ܺܝܳܐܐ . ܘܢܶܗܘܝܳܢ̈ ܡܰܠܦ݂ܳܢ̈ ܫܰܦ݁ܺܝܪܳܬ݂ܳܐ̈ . ܘܰܡܢܰܟ݁ܦ݂ܳܢ̈ ܠܰܐܝܠܶܝܢ ܕ݁ܛܰܠܝܳܢ̈ ܁ ܕ݁ܢܶܪܚܡܳܢ̈ ܒ݁ܰܥܠܰܝܗܶܝܢ̈ ܘܰܒ݂ܢܰܝܗܶܝܢ̈ . ܘܢܶܗܘܝܳܢ̈ ܢܰܟ݂ܦ݁ܳܢ̈ ܘܩܰܕ݁ܺܝܫܳܢ̈ . ܘܢܶܗܘܝܳܢ̈ ܝܳܨܦ݁ܳܢ̈ ܫܰܦ݁ܺܝܪ ܕ݁ܒ݂ܳܬ݁ܰܝܗܶܝܢ̈ ܘܡܶܫܬ݁ܰܥܒ݁ܕ݂ܳܢ̈ ܠܒ݂ܰܥܠܰܝܗܶܝܢ̈ ܇ ܕ݁ܠܳܐ ܐ̱ܢܳܫ ܢܓ݂ܰܕ݁ܶܦ݂ ܥܰܠ ܡܶܠܬ݂ܶܗ ܕ݁ܰܐܠܳܗܳܐ . ܘܡܶܢ ܐܰܝܠܶܝܢ ܕ݁ܰܛܠܶܝܢ ܁ ܗܳܟ݂ܰܢܳܐ ܒ݁ܥܺܝ ܆ ܕ݁ܢܶܗܘܽܘܢ ܢܰܟ݂ܦ݁ܺܝܢ . ܒ݁ܟ݂ܽܠܡܶܕ݁ܶܡ ܕ݁ܶܝܢ ܕ݁ܡܽܘܬ݂ܳܐ ܒ݁ܢܰܦ݂ܫܳܟ݂ ܚܰܘܳܐ ܒ݁ܟ݂ܽܠ ܥܒ݂ܳܕ݂ܶܐ̈ ܛܳܒ݂ܶܐ̈ ܆ ܘܰܒ݂ܡܰܠܦ݂ܳܢܽܘܬ݂ܳܟ݂ ܬ݁ܶܗܘܶܐ ܠܳܟ݂ ܡܶܠܬ݂ܳܐ ܚܠܺܝܡܬ݁ܳܐ ܁ ܕ݁ܢܰܟ݂ܦ݁ܳܐ ܘܠܳܐ ܡܚܰܒ݁ܠܳܐ . ܘܠܳܐ ܐ̱ܢܳܫ ܒ݁ܳܣܰܪ ܠܳܗ ܆ ܕ݁ܰܐܝܢܳܐ ܕ݁ܩܳܐܶܡ ܠܩܽܘܒ݂ܠܰܢ ܢܶܒ݂ܗܰܬ݂ ܇ ܟ݁ܰܕ݂ ܠܳܐ ܢܶܫܟ݁ܰܚ ܕ݁ܢܺܐܡܰܪ ܥܠܰܝܢ ܡܶܕ݁ܶܡ ܕ݁ܰܣܢܶܐ ܀.܀.܀܀ ܥܰܒ݂ܕ݁ܶܐ̈ ܠܡܳܪܰܝܗܽܘܢ̈ ܢܶܫܬ݁ܰܥܒ݁ܕ݂ܽܘܢ ܒ݁ܟ݂ܽܠܡܶܕ݁ܶܡ ܘܢܶܫܬ݁ܰܦ݂ܪܽܘܢ . ܘܠܳܐ ܗܘܰܘ ܡܥܰܨܶܝܢ . ܘܠܳܐ ܗܘܰܘ ܓ݁ܳܢܒ݁ܺܝܢ ܆ ܐܶܠܳܐ ܢܚܰܘܽܘܢ ܫܪܳܪܗܽܘܢ ܛܳܒ݂ܳܐ ܒ݁ܟ݂ܽܠܡܶܕ݁ܶܡ ܆ ܕ݁ܰܢܨܰܒ݁ܬ݂ܽܘܢ ܒ݁ܟ݂ܽܠܡܶܕ݁ܶܡ ܝܽܘܠܦ݁ܳܢܶܗ ܕ݁ܰܐܠܳܗܳܐ ܡܰܚܝܳܢܰܢ ܀ ܐܶܬ݂ܓ݁ܰܠܝܰܬ݂ ܓ݁ܶܝܪ ܛܰܝܒ݁ܽܘܬ݂ܶܗ ܕ݁ܰܐܠܳܗܳܐ ܁ ܡܰܚܝܰܬ݂ ܟ݁ܽܠ ܠܰܒ݂ܢܰܝܢܳܫܳܐ̈ ܟ݁ܽܠܗܽܘܢ ܁ ܘܪܳܕ݂ܝܳܐ ܠܰܢ ܆ ܕ݁ܢܶܟ݂ܦ݁ܽܘܪ ܒ݁ܪܽܘܫܥܳܐ ܘܒ݂ܰܪܓ݂ܺܝܓ݂ܳܬ݂ܳܐ̈ ܕ݁ܥܳܠܡܳܐ ܇ ܘܢܺܚܶܐ ܒ݁ܥܳܠܡܳܐ ܗܳܢܳܐ ܁ ܒ݁ܢܰܟ݂ܦ݁ܽܘܬ݂ܳܐ . ܘܰܒ݂ܟ݂ܺܐܢܽܘܬ݂ܳܐ . ܘܰܒ݂ܕ݂ܶܚܠܰܬ݂ ܐܰܠܳܗܳܐ ܇ ܟ݁ܰܕ݂ ܡܣܰܟ݁ܶܝܢܰܢ ܠܣܰܒ݂ܪܳܐ ܒ݁ܪܺܝܟ݂ܳܐ ܘܰܠܓ݂ܶܠܝܳܢܳܐ ܕ݁ܬ݂ܶܫܒ݁ܽܘܚܬ݁ܶܗ ܕ݁ܰܐܠܳܗܳܐ ܪܰܒ݁ܳܐ ܘܡܰܚܝܳܢܰܢ ܝܶܫܽܘܥ ܡܫܺܝܚܳܐ . ܕ݁ܗܽܘ ܝܰܗ̱ܒ݂ ܢܰܦ݂ܫܶܗ ܚܠܳܦ݂ܰܝܢ ܆ ܕ݁ܢܶܦ݂ܪܩܰܢ ܡܶܢ ܟ݁ܽܠ ܥܰܘܠܳܐ ܇ ܘܰܢܕ݂ܰܟ݁ܶܝܢ ܠܢܰܦ݂ܫܶܗ ܥܰܡܳܐ ܚܰܕ݂̱ܬ݂ܳܐ ܕ݁ܚܳܣܶܡ ܒ݁ܰܥܒ݂ܳܕ݂ܶܐ̈ ܛܳܒ݂ܶܐ̈ ܀ ܗܳܠܶܝܢ ܡܰܠܶܠ ܘܰܒ݂ܥܺܝ . ܘܟ݂ܰܘܶܢ ܒ݁ܟ݂ܽܠ ܦ݁ܽܘܩܕ݁ܳܢ . ܘܠܳܐ ܐ̱ܢܳܫ ܢܰܒ݂ܣܶܐ ܒ݁ܳܟ݂ . Chapter 3 ܘܰܗܘܰܝܬ݁ ܡܰܥ̱ܗܶܕ݂ ܠܗܽܘܢ ܆ ܕ݁ܰܠܪܺܫܶܐ̈ ܘܰܠܫܰܠܺܝܛܳܢܶܐ̈ ܢܶܫܬ݁ܰܡܥܽܘܢ ܘܢܶܫܬ݁ܰܥܒ݁ܕ݂ܽܘܢ . ܘܰܕ݂ܢܶܗܘܽܘܢ ܥܬ݂ܺܝܕ݂ܺܝܢ ܠܟ݂ܽܠ ܥܒ݂ܳܕ݂ ܛܳܒ݂ . ܘܥܰܠ ܐ̱ܢܳܫ ܠܳܐ ܢܓ݂ܰܕ݁ܦ݂ܽܘܢ . ܘܠܳܐ ܢܶܗܘܽܘܢ ܡܶܬ݂ܟ݁ܰܬ݁ܫܺܝܢ ܇ ܐܶܠܳܐ ܢܶܗܘܽܘܢ ܡܰܟ݁ܺܝܟ݂ܺܝܢ . ܘܰܒ݂ܟ݂ܽܠܡܶܕ݁ܶܡ ܢܚܰܘܽܘܢ ܒ݁ܰܣܺܝܡܽܘܬ݂ܗܽܘܢ ܠܘܳܬ݂ ܟ݁ܽܠܗܽܘܢ ܒ݁ܢܰܝܢܳܫܳܐ̈ . ܐܳܦ݂ ܚܢܰܢ ܓ݁ܶܝܪ ܡܶܢ ܩܕ݂ܺܝܡ ܕ݁ܠܳܐ ܪܶܥܝܳܢܳܐ ܗ̱ܘܰܝܢ ܁ ܘܰܕ݂ܠܳܐ ܦ݁ܝܳܣܳܐ . ܘܛܳܥܶܝܢ ܗ̱ܘܰܝܢ . ܘܰܡܫܰܥܒ݁ܕ݂ܺܝܢ ܗ̱ܘܰܝܢ ܠܰܐܪܓ݂ܺܝܓ݂ܳܬ݂ܳܐ̈ ܡܫܰܚܠܦ݂ܳܬ݂ܳܐ̈ . ܘܰܒ݂ܒ݂ܺܝܫܽܘܬ݂ܳܐ ܘܒ݂ܰܚܣܳܡܳܐ ܡܶܬ݂ܗܰܦ݁ܟ݂ܺܝܢ ܗ̱ܘܰܝܢ . ܘܰܣܢܺܝܐܝܺܢ ܗ̱ܘܰܝܢ . ܐܳܦ݂ ܚܰܕ݂ ܠܚܰܕ݂ ܣܳܢܶܝܢ ܗ̱ܘܰܝܢ . ܟ݁ܰܕ݂ ܕ݁ܶܝܢ ܐܶܬ݂ܓ݁ܰܠܝܰܬ݂ ܒ݁ܰܣܺܝܡܽܘܬ݂ܶܗ ܘܰܡܪܰܚܡܳܢܽܘܬ݂ܶܗ ܕ݁ܰܐܠܳܗܳܐ ܡܰܚܝܳܢܰܢ ܇ ܠܳܐ ܒ݁ܰܥܒ݂ܳܕ݂ܶܐ̈ ܕ݁ܙܰܕ݁ܺܝܩܽܘܬ݂ܳܐ ܕ݁ܰܥܒ݂ܰܕ݂ܢ ܇ ܐܶܠܳܐ ܒ݁ܪܰܚܡܰܘܗ̱ܝ̈ ܕ݁ܺܝܠܶܗ ܆ ܐܰܚܝܰܢ ܒ݁ܰܣܚܳܬ݂ܳܐ ܕ݁ܡܰܘܠܳܕ݂ܳܐ ܕ݁ܡܶܢ ܕ݁ܪܺܝܫ ܁ ܘܰܒ݂ܚܽܘܕ݁ܳܬ݂ܳܐ ܕ݁ܪܽܘܚܳܐ ܕ݁ܩܽܘܕ݂ܫܳܐ . ܗܳܝ ܕ݁ܶܐܫܰܕ݂ ܥܠܰܝܢ ܥܰܬ݁ܺܝܪܳܐܝܺܬ݂ ܒ݁ܝܰܕ݂ ܝܶܫܽܘܥ ܡܫܺܝܚܳܐ ܡܰܚܝܳܢܰܢ ܆ ܕ݁ܰܒ݂ܛܰܝܒ݁ܽܘܬ݂ܶܗ ܢܶܙܕ݁ܰܕ݁ܰܩ ܇ ܘܢܶܗܘܶܐ ܝܳܪܬ݁ܶܐ̈ ܒ݁ܣܰܒ݂ܪܳܐ ܒ݁ܚܰܝܶܐ̈ ܕ݁ܰܠܥܳܠܰܡ ܀ ܡܗܰܝܡܢܳܐ ܗ̱ܝ ܡܶܠܬ݂ܳܐ . ܘܰܒ݂ܗܳܠܶܝܢ ܨܳܒ݂ܶܐ ܐ̱ܢܳܐ ܆ ܕ݁ܳܐܦ݂ ܐܰܢ̱ܬ݁ ܗܘܰܝܬ݁ ܡܫܰܪܰܪ ܠܗܽܘܢ ܆ ܕ݁ܢܶܬ݂ܒ݁ܛܶܠ ܠܗܽܘܢ ܠܡܶܦ݂ܠܰܚ ܥܒ݂ܳܕ݂ܶܐ̈ ܛܳܒ݂ܶܐ̈ ܇ ܐܰܝܠܶܝܢ ܕ݁ܗܰܝܡܶܢܘ ܒ݁ܰܐܠܳܗܳܐ . ܗܳܠܶܝܢ ܐܶܢܶܝܢ̈ ܛܳܒ݂ܳܢ̈ ܘܡܰܘܬ݁ܪܳܢ̈ ܠܰܒ݂ܢܰܝܢܳܫܳܐ̈ . ܡܶܢ ܒ݁ܥܳܬ݂ܳܐ ܕ݁ܶܝܢ ܣܰܟ݂ܠܬ݂ܳܐ . ܘܡܶܢ ܬ݁ܰܫܥܝܳܬ݂ܳܐ̈ ܕ݁ܫܰܪܒ݂ܳܬ݂ܳܐ̈ . ܘܡܶܢ ܚܶܪܝܳܢܶܐ̈ . ܘܡܶܢ ܬ݁ܰܟ݂ܬ݁ܽܘܫܶܐ̈ ܕ݁ܣܳܦ݂ܪܶܐ̈ ܆ ܐܶܫܬ݁ܰܐ̱ܠ . ܝܽܘܬ݂ܪܳܢ ܓ݁ܶܝܪ ܠܰܝܬ݁ ܒ݁ܗܶܝܢ ܆ ܘܰܣܪܺܝܩܳܢ̈ ܐܶܢܶܝܢ̈ . ܡܶܢ ܓ݁ܰܒ݂ܪܳܐ ܗܶܪܶܣܺܝܰܘܛܳܐ ܇ ܡܶܢ ܒ݁ܳܬ݂ܰܪ ܚܕ݂ܳܐ ܙܒ݂ܰܢ ܘܬ݂ܰܪܬ݁ܶܝܢ ܕ݁ܡܰܪܬ݁ܶܐ ܐܰܢ̱ܬ݁ ܠܶܗ ܆ ܐܶܫܬ݁ܰܐ̱ܠ . ܘܰܗܘܰܝܬ݁ ܝܳܕ݂ܰܥ ܆ ܕ݁ܡܰܢ ܕ݁ܗܳܟ݂ܰܢܳܐ ܗ̱ܘ ܁ ܡܥܰܩܰܡ ܗ̱ܽܘ ܘܚܳܛܶܐ . ܘܗܽܘ ܚܰܝܶܒ݂ ܢܰܦ݂ܫܶܗ ܀ ܡܳܐ ܕ݁ܫܰܕ݁ܪܶܬ݂ ܠܘܳܬ݂ܳܟ݂ ܠܰܐܪܛܶܡܰܐ ܐܰܘ ܠܛܽܘܟ݂ܺܝܩܳܘܣ ܆ ܢܶܬ݂ܒ݁ܛܶܠ ܠܳܟ݂ ܆ ܕ݁ܬ݂ܺܐܬ݂ܶܐ ܠܘܳܬ݂ܝ ܠܢܺܝܩܳܦ݁ܳܘܠܺܝܣ . ܬ݁ܰܡܳܢ ܓ݁ܶܝܪ ܣܳܡܶܬ݂ ܒ݁ܪܶܥܝܳܢܝ ܕ݁ܰܐܣܬ݁ܶܐ . ܥܰܠ ܙܺܢܰܐ ܕ݁ܶܝܢ ܣܳܦ݂ܪܳܐ ܘܥܰܠ ܐܰܦ݁ܳܠܳܘ ܁ ܢܶܬ݂ܒ݁ܛܶܠ ܠܳܟ݂ ܆ ܕ݁ܰܬ݂ܠܰܘܶܐ ܐܶܢܽܘܢ ܫܰܦ݁ܺܝܪ ܇ ܕ݁ܡܶܕ݁ܶܡ ܠܳܐ ܢܶܚܣܰܪ ܠܗܽܘܢ . ܘܢܺܐܠܦ݁ܽܘܢ ܐܳܦ݂ ܐܰܝܠܶܝܢ ܕ݁ܕ݂ܺܝܠܰܢ ܐܶܢܽܘܢ ܆ ܕ݁ܢܶܗܘܽܘܢ ܦ݁ܳܠܚܺܝܢ ܥܒ݂ܳܕ݂ܶܐ̈ ܛܳܒ݂ܶܐ̈ ܒ݁ܨܶܒ݂ܘܳܬ݂ܳܐ̈ ܕ݁ܳܐܠܨܳܢ̈ ܇ ܕ݁ܠܳܐ ܢܶܗܘܽܘܢ ܕ݁ܠܳܐ ܦ݁ܺܐܪܶܐ̈ ܀ ܫܳܐܠܺܝܢ ܒ݁ܰܫܠܳܡܳܟ݂ ܟ݁ܽܠܗܽܘܢ ܐܰܝܠܶܝܢ ܕ݁ܥܰܡܝ ܐܶܢܽܘܢ ܀ ܫܰܐܠ ܒ݁ܰܫܠܳܡܳܐ ܕ݁ܟ݂ܽܠܗܽܘܢ ܐܰܝܠܶܝܢ ܕ݁ܪܳܚܡܺܝܢ ܠܰܢ ܒ݁ܗܰܝܡܳܢܽܘܬ݂ܳܐ . ܛܰܝܒ݁ܽܘܬ݂ܳܐ ܥܰܡ ܟ݁ܽܠܟ݂ܽܘܢ ܂ ܐܰܡܺܝܢ ܀