John the Apostle. “1 John (Peshitta Version) - ܐܓܪܬܐ ܕܝܘܚܢܢ ܫܠܝܚܐ.” Based upon G. H. Gwilliam, J. Pinkerton and John Gwynn eds., The New Testament in Syriac [ܕܝܬܝܩܐ ܚܕܬܐ ܕܡܪܢ ܝܫܘܥ ܡܫܝܚܐ] (London: British and Foreign Bible Society, 1905). Digital Syriac Corpus. Last modified May 1, 2018. https://syriaccorpus.org/141. ܐܓܪܬܐ ܕܝܘܚܢܢ ܫܠܝܚܐ Chapter 1 ܡܣܰܒ݁ܪܺܝܢܰܢ ܠܟ݂ܽܘܢ ܆ ܠܗܰܘ ܕ݁ܺܐܝܬ݂ܰܘܗ̱ܝ ܗ̱ܘܳܐ ܡܶܢ ܒ݁ܪܺܫܺܝܬ݂ ܇ ܗܰܘ ܕ݁ܰܫܡܰܥܢ ܘܰܚܙܰܝܢܳܝܗ̱ܝ ܒ݁ܥܰܝܢܰܝܢ̈ . ܚܙܰܝܢ ܘܓ݂ܰܫܢ ܒ݁ܺܐܝܕ݂ܰܝܢ̈ ܆ ܗܰܘ ܕ݁ܺܐܝܬ݂ܰܘܗ̱ܝ ܡܶܠܬ݂ܳܐ ܕ݁ܚܰܝܶܐ̈ . ܘܚܰܝܶܐ̈ ܐܶܬ݂ܓ݁ܠܺܝܘ . ܘܰܚܙܰܝܢ ܘܣܳܗܕ݁ܺܝܢܰܢ . ܘܡܰܟ݂ܪܙܺܝܢܰܢ ܠܟ݂ܽܘܢ ܚܰܝܶܐ̈ ܕ݁ܰܠܥܳܠܰܡ ܇ ܗܳܢܽܘܢ ܕ݁ܺܐܝܬ݂ܰܝܗܽܘܢ ܗ̱ܘܰܘ ܠܘܳܬ݂ ܐܰܒ݂ܳܐ ܂ ܘܶܐܬ݂ܓ݁ܠܺܝܘ ܠܰܢ . ܘܡܶܕ݁ܶܡ ܕ݁ܰܚܙܰܝܢ ܘܰܫܡܰܥܢ ܆ ܡܰܘܕ݁ܥܺܝܢܰܢ ܐܳܦ݂ ܠܟ݂ܽܘܢ ܇ ܕ݁ܬ݂ܶܗܘܶܐ ܠܟ݂ܽܘܢ ܫܰܘܬ݁ܳܦ݂ܽܘܬ݂ܳܐ ܥܰܡܰܢ . ܘܫܰܘܬ݁ܳܦ݂ܽܘܬ݂ܰܢ ܕ݁ܶܝܢ ܕ݁ܺܝܠܰܢ ܐܺܝܬ݂ܶܝܗ ܆ ܥܰܡ ܐܰܒ݂ܳܐ ܘܥܰܡ ܒ݁ܪܶܗ ܝܶܫܽܘܥ ܡܫܺܝܚܳܐ . ܘܗܳܠܶܝܢ ܟ݁ܳܬ݂ܒ݁ܺܝܢܰܢ ܠܟ݂ܽܘܢ ܆ ܕ݁ܚܰܕ݂ܽܘܬ݂ܰܢ ܕ݁ܰܒ݂ܟ݂ܽܘܢ ܬ݁ܶܗܘܶܐ ܡܫܰܡܠܝܳܐ . ܘܗܳܕ݂ܶܐ ܗ̱ܝ ܣܒ݂ܰܪܬ݂ܳܐ ܕ݁ܰܫܡܰܥܢ ܡܶܢܶܗ ܇ ܘܰܡܣܰܒ݁ܪܺܝܢܰܢ ܠܟ݂ܽܘܢ ܆ ܕ݁ܰܐܠܳܗܳܐ ܢܽܘܗܪܳܐ ܗ̱ܘ ܆ ܘܚܶܫܽܘܟ݂ܳܐ ܟ݁ܽܠ ܟ݁ܽܠܶܗ ܠܰܝܬ݁ ܒ݁ܶܗ . ܘܶܐܢ ܐܳܡܪܺܝܢܰܢ ܕ݁ܫܰܘܬ݁ܳܦ݂ܽܘܬ݂ܳܐ ܐܺܝܬ݂ ܠܰܢ ܥܰܡܶܗ ܘܰܡܗܰܠܟ݂ܺܝܢܰܢ ܒ݁ܚܶܫܽܘܟ݂ܳܐ ܆ ܕ݁ܰܓ݁ܳܠܶܐ̈ ܚ̱ܢܰܢ ܘܠܰܘ ܒ݁ܰܫܪܳܪܳܐ ܪܳܕ݂ܶܝܢܰܢ . ܐܶܢ ܕ݁ܶܝܢ ܒ݁ܢܽܘܗܪܳܐ ܡܗܰܠܟ݂ܺܝܢܰܢ ܐܰܝܟ݂ ܕ݁ܗܽܘ ܐܺܝܬ݂ܰܘܗ̱ܝ ܒ݁ܢܽܘܗܪܳܐ ܆ ܐܺܝܬ݂ ܠܰܢ ܫܰܘܬ݁ܳܦ݂ܽܘܬ݂ܳܐ ܥܰܡ ܚܕ݂ܳܕ݂ܶܐ̈ ܇ ܘܰܕ݂ܡܳܐ ܕ݁ܝܶܫܽܘܥ ܒ݁ܪܶܗ ܡܕ݂ܰܟ݁ܶܐ ܠܰܢ ܡܶܢ ܟ݁ܽܠܗܽܘܢ ܚܛܳܗܰܝܢ̈ . ܘܶܐܢ ܢܺܐܡܰܪ ܕ݁ܠܰܝܬ݁ ܠܰܢ ܚܛܺܝܬ݂ܳܐ ܆ ܢܰܦ݂ܫܰܢ ܡܰܛܥܶܝܢܰܢ . ܘܰܫܪܳܪܳܐ ܠܰܝܬ݁ ܒ݁ܰܢ . ܐܶܢ ܕ݁ܶܝܢ ܡܰܘܕ݁ܶܝܢܰܢ ܒ݁ܰܚܛܳܗܰܝܢ̈ ܆ ܡܗܰܝܡܰܢ ܗ̱ܽܘ ܘܙܰܕ݁ܺܝܩ ܁ ܕ݁ܢܶܫܒ݁ܽܘܩ ܠܰܢ ܚܛܳܗܰܝܢ̈ ܇ ܘܰܢܕ݂ܰܟ݁ܶܝܢ ܡܶܢ ܟ݁ܽܠܶܗ ܥܰܘܠܰܢ . ܘܶܐܢ ܐܳܡܪܺܝܢܰܢ ܕ݁ܠܳܐ ܚܛܰܝܢ ܆ ܥܳܒ݂ܕ݁ܺܝܢܰܢ ܠܶܗ ܕ݁ܰܓ݁ܳܠܳܐ . ܘܡܶܠܬ݂ܶܗ ܠܰܝܬ݁ ܠܘܳܬ݂ܰܢ ܀ Chapter 2 ܒ݁ܢܰܝ̈ ܆ ܗܳܠܶܝܢ ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܂ ܕ݁ܠܳܐ ܬ݁ܶܚܛܽܘܢ . ܘܶܐܢ ܐ̱ܢܳܫ ܢܶܚܛܶܐ ܆ ܐܺܝܬ݂ ܠܰܢ ܦ݁ܰܪܰܩܠܺܛܳܐ ܠܘܳܬ݂ ܐܰܒ݂ܳܐ ܇ ܝܶܫܽܘܥ ܡܫܺܝܚܳܐ ܙܰܕ݁ܺܝܩܳܐ . ܗܽܘܝܽܘ ܓ݁ܶܝܪ ܚܽܘܣܳܝܳܐ ܕ݁ܥܰܠ ܐܰܦ݁ܰܝ̈ ܚܛܳܗܰܝܢ̈ . ܘܠܰܘ ܚܠܳܦ݂ܰܝܢ ܕ݁ܺܝܠܰܢ ܒ݁ܰܠܚܽܘܕ݂ ܆ ܐܶܠܳܐ ܐܳܦ݂ ܚܠܳܦ݂ ܟ݁ܽܠܶܗ ܥܳܠܡܳܐ . ܘܰܒ݂ܗܳܕ݂ܶܐ ܡܰܪܓ݁ܫܺܝܢܰܢ ܕ݁ܺܝܕ݂ܰܥܢܳܝܗ̱ܝ ܆ ܐܶܢ ܢܳܛܪܺܝܢܰܢ ܦ݁ܽܘܩܕ݁ܳܢܰܘܗ̱ܝ̈ . ܗܰܘ ܓ݁ܶܝܪ ܕ݁ܳܐܡܰܪ ܕ݁ܺܝܕ݂ܰܥܬ݂ܶܗ ܇ ܘܦ݂ܽܘܩܕ݁ܳܢܰܘܗ̱ܝ̈ ܠܳܐ ܢܳܛܰܪ ܆ ܕ݁ܰܓ݁ܳܠܳܐ ܗܽܘ . ܘܰܫܪܳܪܳܐ ܠܰܝܬ݁ ܒ݁ܶܗ . ܗܰܘ ܕ݁ܶܝܢ ܕ݁ܢܳܛܰܪ ܡܶܠܬ݂ܶܗ ܆ ܒ݁ܗܳܢܳܐ ܡܫܰܠܰܡ ܫܰܪܺܝܪܳܐܝܺܬ݂ ܚܽܘܒ݁ܶܗ ܕ݁ܰܐܠܳܗܳܐ . ܒ݁ܗܳܕ݂ܶܐ ܓ݁ܶܝܪ ܝܳܕ݂ܥܺܝܢܰܢ ܁ ܕ݁ܒ݂ܶܗ ܚܢܰܢ . ܗܰܘ ܕ݁ܳܐܡܰܪ ܕ݁ܒ݂ܶܗ ܐܺܝܬ݂ܰܝ ܆ ܘܳܠܶܐ ܠܶܗ ܕ݁ܰܐܝܟ݂ ܗܰܠܟ݂ܳܬ݂ܶܗ̈ ܕ݁ܺܝܠܶܗ ܢܗܰܠܶܟ݂ ܀.܀.܀܀ ܚܰܒ݁ܺܝܒ݂ܰܝ̈ ܆ ܠܰܘ ܦ݁ܽܘܩܕ݁ܳܢܳܐ ܚܰܕ݂̱ܬ݂ܳܐ ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܆ ܐܶܠܳܐ ܦ݁ܽܘܩܕ݁ܳܢܳܐ ܥܰܬ݁ܺܝܩܳܐ ܇ ܗܰܘ ܕ݁ܺܐܝܬ݂ ܗ̱ܘܳܐ ܠܟ݂ܽܘܢ ܡܶܢ ܒ݁ܪܺܫܺܝܬ݂ . ܦ݁ܽܘܩܕ݁ܳܢܳܐ ܕ݁ܶܝܢ ܥܰܬ݁ܺܝܩܳܐ ܐܺܝܬ݂ܰܘܗ̱ܝ ܡܶܠܬ݂ܳܐ ܗܳܝ ܕ݁ܰܫܡܰܥܬ݁ܽܘܢ . ܬ݁ܽܘܒ݂ ܦ݁ܽܘܩܕ݁ܳܢܳܐ ܚܰܕ݂̱ܬ݂ܳܐ ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܇ ܗܰܘ ܕ݁ܺܐܝܬ݂ܰܘܗ̱ܝ ܫܰܪܺܝܪܳܐ ܁ ܒ݁ܶܗ ܘܰܒ݂ܟ݂ܽܘܢ ܆ ܕ݁ܚܶܫܽܘܟ݂ܳܐ ܥܒ݂ܰܪ ܠܶܗ ܇ ܘܢܽܘܗܪܳܐ ܫܰܪܺܝܪܳܐ ܫܰܪܺܝ ܡܶܬ݂ܚܙܶܐ . ܡܰܢ ܕ݁ܳܐܡܰܪ ܗܳܟ݂ܺܝܠ ܕ݁ܺܐܝܬ݂ܰܘܗ̱ܝ ܒ݁ܢܽܘܗܪܳܐ ܇ ܘܣܳܢܶܐ ܠܰܐܚܽܘܗ̱ܝ ܆ ܒ݁ܚܶܫܽܘܟ݂ܳܐ ܐܺܝܬ݂ܰܘܗ̱ܝ ܥܕ݂ܰܡܳܐ ܠܗܳܫܳܐ . ܗܰܘ ܕ݁ܶܝܢ ܕ݁ܡܰܚܶܒ݂ ܠܰܐܚܽܘܗ̱ܝ ܆ ܒ݁ܢܽܘܗܪܳܐ ܡܟ݂ܰܬ݁ܰܪ . ܘܟ݂ܶܫܠܳܐ ܠܰܝܬ݁ ܒ݁ܶܗ . ܗܰܘ ܕ݁ܶܝܢ ܕ݁ܣܳܢܶܐ ܠܰܐܚܽܘܗ̱ܝ ܆ ܒ݁ܚܶܫܽܘܟ݂ܳܐ ܐܺܝܬ݂ܰܘܗ̱ܝ . ܘܰܒ݂ܚܶܫܽܘܟ݂ܳܐ ܡܗܰܠܶܟ݂ . ܘܠܳܐ ܝܳܕ݂ܰܥ ܁ ܠܰܐܝܟ݁ܳܐ ܐܳܙܶܠ ܇ ܡܶܛܽܠ ܕ݁ܚܶܫܽܘܟ݂ܳܐ ܣܰܡܺܝ ܐܶܢܶܝܢ̈ ܥܰܝܢܰܘܗ̱ܝ̈ ܀ ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܒ݁ܢܰܝܳܐ̈ ܆ ܕ݁ܶܐܫܬ݁ܒ݂ܶܩܘ ܠܟ݂ܽܘܢ ܚܛܳܗܰܝܟ݁ܽܘܢ̈ ܂ ܡܶܛܽܠ ܫܡܶܗ . ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܐܰܒ݂ܳܗܶܐ̈ ܆ ܕ݁ܺܝܕ݂ܰܥܬ݁ܽܘܢܳܝܗ̱ܝ ܠܗܰܘ ܕ݁ܺܐܝܬ݂ܰܘܗ̱ܝ ܗ̱ܘܳܐ ܡܶܢ ܒ݁ܪܺܫܺܝܬ݂ . ܟ݁ܳܬ݂ܶܒ݂ ܐ̱ܢܳܐ ܠܟ݂ܽܘܢ ܥܠܰܝܡܶܐ̈ ܆ ܕ݁ܰܙܟ݂ܰܝܬ݁ܽܘܢܳܝܗ̱ܝ ܠܒ݂ܺܝܫܳܐ . ܟ݁ܶܬ݂ܒ݁ܶܬ݂ ܠܟ݂ܽܘܢ ܛܠܳܝܶܐ̈ ܆ ܕ݁ܺܝܕ݂ܰܥܬ݁ܽܘܢ ܠܰܐܒ݂ܳܐ . ܟ݁ܶܬ݂ܒ݁ܶܬ݂ ܠܟ݂ܽܘܢ ܐܰܒ݂ܳܗܶܐ̈ ܆ ܕ݁ܺܝܕ݂ܰܥܬ݁ܽܘܢ ܠܗܰܘ ܕ݁ܡܶܢ ܒ݁ܪܺܫܺܝܬ݂ . ܟ݁ܶܬ݂ܒ݁ܶܬ݂ ܠܟ݂ܽܘܢ ܥܠܰܝܡܶܐ̈ ܆ ܕ݁ܚܰܝܠܬ݂ܳܢܶܐ̈ ܐܢ̱ܬ݁ܽܘܢ . ܘܡܶܠܬ݂ܶܗ ܕ݁ܰܐܠܳܗܳܐ ܫܰܪܝܳܐ ܒ݁ܟ݂ܽܘܢ . ܘܰܙܟ݂ܰܝܬ݁ܽܘܢܳܝܗ̱ܝ ܠܒ݂ܺܝܫܳܐ . ܠܳܐ ܬ݁ܶܪܚܡܽܘܢ ܠܥܳܠܡܳܐ ܆ ܘܠܳܐ ܠܡܶܕ݁ܶܡ ܕ݁ܺܐܝܬ݂ ܒ݁ܶܗ . ܡܰܢ ܓ݁ܶܝܪ ܕ݁ܪܳܚܶܡ ܠܥܳܠܡܳܐ ܆ ܚܽܘܒ݁ܶܗ ܕ݁ܰܐܒ݂ܳܐ ܠܰܝܬ݁ ܒ݁ܶܗ . ܟ݁ܽܠ ܡܶܕ݁ܶܡ ܓ݁ܶܝܪ ܕ݁ܺܐܝܬ݂ ܒ݁ܶܗ ܒ݁ܥܳܠܡܳܐ ܆ ܪܶܓ݁ܬ݂ܳܐ ܗܽܘ ܕ݁ܦ݂ܰܓ݂ܪܳܐ . ܘܪܶܓ݁ܬ݂ܳܐ ܕ݁ܥܰܝܢܶܐ̈ ܆ ܘܫܽܘܒ݂ܗܳܪܳܐ ܕ݁ܥܳܠܡܳܐ . ܗܳܠܶܝܢ ܕ݁ܠܳܐ ܗ̱ܘܰܝ̈ ܡܶܢ ܐܰܒ݂ܳܐ ܆ ܐܶܠܳܐ ܡܶܢܶܗ ܐܶܢܶܝܢ̈ ܡܶܢ ܥܳܠܡܳܐ . ܘܥܳܒ݂ܰܪ ܥܳܠܡܳܐ ܁ ܗܽܘ ܘܪܶܓ݁ܬ݂ܶܗ . ܗܰܘ ܕ݁ܶܝܢ ܕ݁ܥܳܒ݂ܶܕ݂ ܨܶܒ݂ܝܳܢܶܗ ܕ݁ܰܐܠܳܗܳܐ ܆ ܡܩܰܘܶܐ ܠܥܳܠܰܡ ܀ ܒ݁ܢܰܝ̈ ܆ ܙܰܒ݂ܢܳܐ ܗܽܘ ܐ̱ܚܪܳܝܳܐ . ܘܰܐܝܟ݂ ܡܶܕ݁ܶܡ ܕ݁ܰܫܡܰܥܬ݁ܽܘܢ ܕ݁ܳܐܬ݂ܶܐ ܡܫܺܝܚܳܐ ܕ݁ܰܓ݁ܳܠܳܐ ܆ ܘܗܳܫܳܐ ܗܘܰܘ ܠܗܽܘܢ ܣܰܓ݁ܺܝܶܐܐ̈ ܡܫܺܝܚܶܐ̈ ܕ݁ܰܓ݁ܳܠܶܐ̈ . ܘܡܶܢ ܗܳܕ݂ܶܐ ܝܳܕ݂ܥܺܝܢܰܢ ܆ ܕ݁ܙܰܒ݂ܢܳܐ ܗܽܘ ܐ̱ܚܪܳܝܳܐ . ܡܶܢܰܢ ܢܦ݂ܰܩܘ ܆ ܐܶܠܳܐ ܠܰܘ ܡܶܢܰܢ ܗ̱ܘܰܘ . ܐܶܠܽܘ ܓ݁ܶܝܪ ܡܶܢܰܢ ܗ̱ܘܰܘ ܆ ܠܘܳܬ݂ܰܢ ܡܟ݂ܰܬ݁ܪܺܝܢ ܗ̱ܘܰܘ . ܐܶܠܳܐ ܢܦ݂ܰܩܘ ܡܶܢܰܢ ܆ ܕ݁ܬ݂ܶܬ݂ܺܝܕ݂ܰܥ ܕ݁ܠܰܘ ܡܶܢܰܢ ܗ̱ܘܰܘ . ܘܰܐܢ̱ܬ݁ܽܘܢ ܁ ܡܫܺܝܚܽܘܬ݂ܳܐ ܐܺܝܬ݂ ܠܟ݂ܽܘܢ ܡܶܢ ܩܰܕ݁ܺܝܫܳܐ ܆ ܘܦ݂ܳܪܫܺܝܢ ܐܢ̱ܬ݁ܽܘܢ ܗ̱ܽܘ ܠܟ݂ܽܠ ܐ̱ܢܳܫ . ܠܳܐ ܟ݁ܶܬ݂ܒ݁ܶܬ݂ ܠܟ݂ܽܘܢ ܆ ܕ݁ܠܳܐ ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ ܠܰܫܪܳܪܳܐ ܇ ܐܶܠܳܐ ܕ݁ܝܳܕ݂ܥܺܝܢ ܐܢ̱ܬ݁ܽܘܢ ܠܶܗ ܇ ܘܰܕ݂ܟ݂ܽܠܳܗ ܕ݁ܰܓ݁ܳܠܽܘܬ݂ܳܐ ܠܳܐ ܗ̱ܘܳܬ݂ ܡܶܢܶܗ ܡܶܢ ܫܪܳܪܳܐ . ܡܰܢܽܘ ܕ݁ܰܓ݁ܳܠܳܐ ܆ ܐܶܠܳܐ ܐܶܢ ܐܰܝܢܳܐ ܕ݁ܟ݂ܳܦ݂ܰܪ ܕ݁ܝܶܫܽܘܥ ܠܳܐ ܗ̱ܘܳܐ ܡܫܺܝܚܳܐ . ܗܳܢܳܐ ܗܽܘ ܡܫܺܝܚܳܐ ܕ݁ܰܓ݁ܳܠܳܐ . ܗܰܘ ܕ݁ܟ݂ܳܦ݂ܰܪ ܒ݁ܰܐܒ݂ܳܐ ܆ ܟ݁ܳܦ݂ܰܪ ܐܳܦ݂ ܒ݁ܰܒ݂ܪܳܐ . ܘܗܰܘ ܕ݁ܟ݂ܳܦ݂ܰܪ ܒ݁ܰܒ݂ܪܳܐ ܆ ܐܳܦ݂ܠܳܐ ܒ݁ܰܐܒ݂ܳܐ ܡܗܰܝܡܶܢ . ܡܰܢ ܕ݁ܡܰܘܕ݁ܶܐ ܒ݁ܰܒ݂ܪܳܐ ܆ ܐܳܦ݂ ܒ݁ܰܐܒ݂ܳܐ ܡܰܘܕ݁ܶܐ . ܘܰܐܢ̱ܬ݁ܽܘܢ ܁ ܡܶܕ݁ܶܡ ܕ݁ܰܫܡܰܥܬ݁ܽܘܢ ܡܶܢ ܩܕ݂ܺܝܡ ܆ ܢܩܰܘܶܐ ܠܘܳܬ݂ܟ݂ܽܘܢ . ܐܶܢ ܓ݁ܶܝܪ ܡܩܰܘܶܐ ܠܘܳܬ݂ܟ݂ܽܘܢ ܡܶܕ݁ܶܡ ܕ݁ܰܫܡܰܥܬ݁ܽܘܢ ܡܶܢ ܩܕ݂ܺܝܡ ܆ ܐܳܦ݂ ܐܰܢ̱ܬ݁ܽܘܢ ܡܩܰܘܶܝܢ ܐܢ̱ܬ݁ܽܘܢ ܒ݁ܰܐܒ݂ܳܐ ܘܒ݂ܰܒ݂ܪܳܐ . ܘܗܳܢܰܘ ܫܽܘܘ̱ܕ݁ܳܝܳܐ ܕ݁ܶܐܫܬ݁ܰܘܕ݁ܺܝ ܠܰܢ ܆ ܚܰܝܶܐ̈ ܕ݁ܰܠܥܳܠܰܡ . ܗܳܠܶܝܢ ܕ݁ܶܝܢ ܟ݁ܶܬ݂ܒ݁ܶܬ݂ ܠܟ݂ܽܘܢ ܆ ܡܶܛܽܠ ܐܰܝܠܶܝܢ ܕ݁ܡܰܛܥܶܝܢ ܠܟ݂ܽܘܢ . ܘܳܐܦ݂ ܐܰܢ̱ܬ݁ܽܘܢ ܁ ܐܶܢ ܬ݁ܩܰܘܶܐ ܠܘܳܬ݂ܟ݂ܽܘܢ ܡܫܺܝܚܽܘܬ݂ܳܐ ܕ݁ܩܰܒ݁ܶܠܬ݁ܽܘܢ ܡܶܢܶܗ ܆ ܠܳܐ ܣܢܺܝܩܺܝܢ ܐܢ̱ܬ݁ܽܘܢ ܕ݁ܐ̱ܢܳܫ ܢܰܠܶܦ݂ܟ݂ܽܘܢ . ܐܶܠܳܐ ܐܰܝܟ݂ ܡܫܺܝܚܽܘܬ݂ܳܐ ܕ݁ܺܐܝܬ݂ܶܝܗ ܡܶܢ ܐܰܠܳܗܳܐ ܆ ܗܺܝ ܡܰܠܦ݂ܳܐ ܠܟ݂ܽܘܢ ܥܰܠ ܟ݁ܽܠܡܶܕ݁ܶܡ . ܘܫܰܪܺܝܪܳܐ ܗ̱ܝ ܘܠܰܝܬ݁ ܒ݁ܳܗ ܕ݁ܰܓ݁ܳܠܽܘܬ݂ܳܐ . ܘܰܐܝܟ݂ ܕ݁ܰܐܠܶܦ݂ܟ݂ܽܘܢ ܆ ܩܰܘܰܘ ܒ݁ܶܗ . ܘܗܳܫܳܐ ܒ݁ܢܰܝ̈ ܆ ܩܰܘܰܘ ܒ݁ܶܗ ܆ ܕ݁ܡܳܐ ܕ݁ܡܶܬ݂ܓ݁ܠܶܐ ܁ ܠܳܐ ܢܶܒ݂ܗܰܬ݂ ܡܶܢܶܗ . ܐܶܠܳܐ ܬ݁ܶܗܘܶܐ ܠܰܢ ܓ݁ܰܠܝܽܘܬ݂ ܐܰܦ݁ܶܐ̈ ܒ݁ܡܶܐܬ݂ܺܝܬ݂ܶܗ . ܐܶܢ ܝܺܕ݂ܰܥܬ݁ܽܘܢ ܕ݁ܙܰܕ݁ܺܝܩ ܗ̱ܽܘ ܆ ܕ݁ܰܥܘ ܁ ܕ݁ܳܐܦ݂ ܟ݁ܽܠ ܕ݁ܥܳܒ݂ܶܕ݂ ܙܰܕ݁ܺܝܩܽܘܬ݂ܳܐ ܆ ܡܶܢܶܗ ܐܺܝܬ݂ܰܘܗ̱ܝ ܀ Chapter 3 ܘܰܚܙܰܘ ܁ ܕ݁ܰܟ݂ܡܳܐ ܣܰܓ݁ܺܝ ܚܽܘܒ݁ܶܗ ܕ݁ܰܐܒ݂ܳܐ ܠܘܳܬ݂ܰܢ ܆ ܕ݁ܰܒ݂ܢܰܝܳܐ̈ ܩܪܳܢ ܂ ܐܳܦ݂ ܥܰܒ݂ܕ݁ܰܢ . ܡܶܛܽܠ ܗܳܢܳܐ ܥܳܠܡܳܐ ܠܳܐ ܝܳܕ݂ܰܥ ܠܰܢ ܇ ܡܶܛܽܠ ܕ݁ܳܐܦ݂ܠܳܐ ܠܶܗ ܝܺܕ݂ܰܥ ܀ ܚܰܒ݁ܺܝܒ݂ܰܝ̈ ܆ ܗܳܫܳܐ ܒ݁ܢܰܘܗ̱ܝ̈ ܚܢܰܢ ܕ݁ܰܐܠܳܗܳܐ . ܘܠܳܐ ܐܶܬ݂ܓ݁ܠܺܝ ܥܕ݂ܰܡܳܐ ܠܗܳܫܳܐ ܆ ܡܳܢܳܐ ܥܬ݂ܺܝܕ݂ܺܝܢܰܢ ܕ݁ܢܶܗܘܶܐ . ܝܳܕ݂ܥܺܝܢܰܢ ܕ݁ܶܝܢ ܕ݁ܡܳܐ ܕ݁ܶܐܬ݂ܓ݁ܠܺܝ ܆ ܒ݁ܰܕ݂ܡܽܘܬ݂ܶܗ ܗܳܘܶܝܢܰܢ . ܘܚܳܙܶܝܢܰܢ ܠܶܗ ܐܰܝܟ݂ ܡܶܕ݁ܶܡ ܕ݁ܺܐܝܬ݂ܰܘܗ̱ܝ . ܘܟ݂ܽܠ ܐܰܝܢܳܐ ܕ݁ܺܐܝܬ݂ ܠܶܗ ܥܠܰܘܗ̱ܝ ܗܳܢܳܐ ܣܰܒ݂ܪܳܐ ܆ ܡܕ݂ܰܟ݁ܶܐ ܢܰܦ݂ܫܶܗ ܐܰܝܟ݂ ܕ݁ܗܽܘ ܕ݁ܟ݂ܶܐ ܗ̱ܽܘ . ܡܰܢ ܕ݁ܶܝܢ ܕ݁ܥܳܒ݂ܶܕ݂ ܚܛܺܝܬ݂ܳܐ ܆ ܥܰܘܠܳܐ ܣܳܥܰܪ . ܚܛܺܝܬ݂ܳܐ ܓ݁ܶܝܪ ܟ݁ܽܠܳܗ ܥܰܘܠܳܐ ܗ̱ܝ . ܘܝܳܕ݂ܥܺܝܢ ܐܢ̱ܬ݁ܽܘܢ ܆ ܕ݁ܗܰܘ ܕ݁ܶܐܬ݂ܓ݁ܠܺܝ ܕ݁ܢܶܣܰܒ݂ ܚܛܳܗܰܝܢ̈ . ܘܰܚܛܺܝܬ݂ܳܐ ܒ݁ܶܗ ܠܰܝܬ݁ . ܘܟ݂ܽܠ ܕ݁ܒ݂ܶܗ ܡܩܰܘܶܐ ܆ ܠܳܐ ܚܳܛܶܐ . ܘܟ݂ܽܠ ܕ݁ܚܳܛܶܐ ܆ ܠܳܐ ܚܙܳܝܗ̱ܝ ܁ ܘܠܳܐ ܝܰܕ݂ܥܶܗ ܀ ܒ݁ܢܰܝ̈ ܆ ܠܳܐ ܐ̱ܢܳܫ ܢܰܛܥܶܝܟ݂ܽܘܢ . ܗܰܘ ܕ݁ܥܳܒ݂ܶܕ݂ ܙܰܕ݁ܺܝܩܽܘܬ݂ܳܐ ܆ ܙܰܕ݁ܺܝܩܳܐ ܗܽܘ ܇ ܐܰܝܟ݂ ܕ݁ܳܐܦ݂ ܗܽܘ ܡܫܺܝܚܳܐ ܐܺܝܬ݂ܰܘܗ̱ܝ ܙܰܕ݁ܺܝܩܳܐ . ܗܰܘ ܕ݁ܣܳܥܰܪ ܚܛܺܝܬ݂ܳܐ ܆ ܡܶܢ ܣܳܛܳܢܳܐ ܗܽܘ ܇ ܡܶܛܽܠ ܕ݁ܡܶܢ ܪܺܫܺܝܬ݂ܳܐ ܗܽܘ ܣܳܛܳܢܳܐ ܚܰܛܳܝܳܐ ܗܽܘ . ܘܡܶܛܽܠ ܗܳܢܳܐ ܐܶܬ݂ܚܙܺܝ ܒ݁ܪܶܗ ܕ݁ܰܐܠܳܗܳܐ ܆ ܕ݁ܢܶܫܪܶܐ ܥܒ݂ܳܕ݂ܰܘܗ̱ܝ̈ ܕ݁ܣܳܛܳܢܳܐ . ܟ݁ܽܠ ܕ݁ܶܐܬ݂ܺܝܠܶܕ݂ ܡܶܢ ܐܰܠܳܗܳܐ ܆ ܚܛܺܝܬ݂ܳܐ ܠܳܐ ܥܳܒ݂ܶܕ݂ . ܡܶܛܽܠ ܕ݁ܙܰܪܥܶܗ ܒ݁ܶܗ ܐܺܝܬ݂ܰܘܗ̱ܝ . ܘܠܳܐ ܡܶܫܟ݁ܰܚ ܠܡܶܚܛܳܐ ܇ ܕ݁ܡܶܢ ܐܰܠܳܗܳܐ ܐܶܬ݂ܺܝܠܶܕ݂ . ܒ݁ܗܳܕ݂ܶܐ ܡܶܬ݂ܦ݁ܰܪܫܺܝܢ ܒ݁ܢܰܘܗ̱ܝ̈ ܕ݁ܰܐܠܳܗܳܐ ܆ ܡܶܢ ܒ݁ܢܰܘܗ̱ܝ̈ ܕ݁ܣܳܛܳܢܳܐ . ܟ݁ܽܠ ܕ݁ܠܳܐ ܥܳܒ݂ܶܕ݂ ܙܰܕ݁ܺܝܩܽܘܬ݂ܳܐ ܘܠܳܐ ܡܰܚܶܒ݂ ܠܰܐܚܽܘܗ̱ܝ ܆ ܠܰܝܬ݁ܰܘܗ̱ܝ ܡܶܢ ܐܰܠܳܗܳܐ . ܕ݁ܗܳܢܰܘ ܦ݁ܽܘܩܕ݁ܳܢܳܐ ܕ݁ܰܫܡܰܥܬ݁ܽܘܢ ܡܶܢ ܩܕ݂ܺܝܡ ܆ ܕ݁ܬ݂ܰܚܒ݂ܽܘܢ ܚܰܕ݂ ܠܚܰܕ݂ . ܠܰܘ ܐܰܝܟ݂ ܩܳܐܝܶܢ ܁ ܗܰܘ ܕ݁ܺܐܝܬ݂ܰܘܗ̱ܝ ܗ̱ܘܳܐ ܡܶܢ ܒ݁ܺܝܫܳܐ ܘܰܩܛܰܠ ܠܰܐܚܽܘܗ̱ܝ . ܘܡܶܛܽܠ ܡܳܢܳܐ ܩܰܛܠܶܗ ܆ ܐܶܠܳܐ ܡܶܛܽܠ ܕ݁ܒ݂ܺܝܫܺܝܢ ܗ̱ܘܰܘ ܥܒ݂ܳܕ݂ܰܘܗ̱ܝ̈ ܇ ܘܕ݂ܰܐܚܽܘܗ̱ܝ ܙܰܕ݁ܺܝܩܺܝܢ . ܘܠܳܐ ܬ݁ܶܬ݁ܕ݁ܰܡܪܽܘܢ ܐܰܚܰܝ̈ ܆ ܐܶܢ ܣܳܢܶܐ ܠܟ݂ܽܘܢ ܥܳܠܡܳܐ . ܚܢܰܢ ܝܳܕ݂ܥܺܝܢܰܢ ܕ݁ܫܰܢܺܝܢܰܢ ܡܶܢ ܡܰܘܬ݁ܳܐ ܠܚܰܝܶܐ̈ ܇ ܒ݁ܗܳܕ݂ܶܐ ܕ݁ܡܰܚܒ݂ܺܝܢܰܢ ܠܰܐܚܰܝܢ̈ . ܗܰܘ ܕ݁ܠܳܐ ܡܰܚܶܒ݂ ܠܰܐܚܽܘܗ̱ܝ ܆ ܡܩܰܘܶܐ ܒ݁ܡܰܘܬ݁ܳܐ . ܟ݁ܽܠ ܓ݁ܶܝܪ ܕ݁ܣܳܢܶܐ ܠܰܐܚܽܘܗ̱ܝ ܆ ܩܳܛܶܠ ܐ̱ܢܳܫܳܐ ܗܽܘ . ܘܝܳܕ݂ܥܺܝܢ ܐܢ̱ܬ݁ܽܘܢ ܕ݁ܟ݂ܽܠ ܕ݁ܩܳܛܶܠ ܐ̱ܢܳܫܳܐ ܆ ܠܳܐ ܡܶܫܟ݁ܚܺܝܢ ܡܩܰܘܶܝܢ ܒ݁ܶܗ ܚܰܝܶܐ̈ ܕ݁ܰܠܥܳܠܰܡ . ܒ݁ܗܳܕ݂ܶܐ ܝܳܕ݂ܥܺܝܢܰܢ ܚܽܘܒ݁ܶܗ ܕ݁ܰܠܘܳܬ݂ܰܢ ܆ ܕ݁ܗܽܘ ܝܰܗ̱ܒ݂ ܢܰܦ݂ܫܶܗ ܚܠܳܦ݂ܰܝܢ . ܘܳܐܦ݂ ܚܢܰܢ ܁ ܙܳܕ݂ܶܩ ܠܰܢ ܆ ܕ݁ܥܰܠ ܐܰܦ݁ܰܝ̈ ܐܰܚܰܝܢ̈ ܢܶܬ݁ܶܠ ܢܰܦ݂ܫܳܬ݂ܰܢ̈ . ܘܰܐܝܢܳܐ ܕ݁ܺܐܝܬ݂ ܠܶܗ ܩܶܢܝܳܢܳܐ ܕ݁ܥܳܠܡܳܐ ܇ ܘܢܶܚܙܶܐ ܠܰܐܚܽܘܗ̱ܝ ܕ݁ܰܣܢܺܝܩ ܇ ܘܢܶܐܚܽܘܕ݂ ܪܰܚܡܰܘܗ̱ܝ̈ ܡܶܢܶܗ ܆ ܐܰܝܟ݁ܰܢܳܐ ܐܺܝܬ݂ ܒ݁ܶܗ ܚܽܘܒ݁ܶܗ ܕ݁ܰܐܠܳܗܳܐ ܀ ܒ݁ܢܰܝ̈ ܆ ܠܳܐ ܢܰܚܶܒ݂ ܚܰܕ݂ ܠܚܰܕ݂ ܒ݁ܡܶܠܶܐ̈ ܘܰܒ݂ܠܶܫܳܢܳܐ ܇ ܐܶܠܳܐ ܒ݁ܰܥܒ݂ܳܕ݂ܶܐ̈ ܘܒ݂ܰܫܪܳܪܳܐ . ܘܰܒ݂ܗܳܕ݂ܶܐ ܡܶܫܬ݁ܰܘܕ݁ܥܺܝܢܰܢ ܆ ܕ݁ܡܶܢ ܫܪܳܪܳܐ ܐܺܝܬ݂ܰܝܢ . ܘܰܩܕ݂ܳܡ ܕ݁ܢܺܐܬ݂ܶܐ ܗܽܘ ܆ ܡܦ݁ܺܝܣܺܝܢܰܢ ܠܶܒ݁ܰܢ . ܕ݁ܶܐܢ ܗܽܘ ܠܶܒ݁ܰܢ ܒ݁ܳܣܰܪ ܠܰܢ ܆ ܟ݁ܡܳܐ ܐܰܠܳܗܳܐ ܕ݁ܪܰܒ݁ ܡܶܢ ܠܶܒ݁ܰܢ ܘܝܳܕ݂ܰܥ ܟ݁ܽܠܡܶܕ݁ܶܡ ܀.܀.܀܀ ܚܰܒ݁ܺܝܒ݂ܰܝ̈ ܆ ܐܶܢ ܠܶܒ݁ܰܢ ܠܳܐ ܒ݁ܳܣܰܪ ܠܰܢ ܆ ܓ݁ܳܠܝܳܢ̈ ܐܶܢܶܝܢ̈ ܐܰܦ݁ܰܝܢ̈ ܩܕ݂ܳܡ ܐܰܠܳܗܳܐ . ܘܟ݂ܽܠܡܶܕ݁ܶܡ ܕ݁ܫܳܐܠܺܝܢܰܢ ܆ ܢܳܣܒ݁ܺܝܢܰܢ ܡܶܢܶܗ ܆ ܡܶܛܽܠ ܕ݁ܢܳܛܪܺܝܢܰܢ ܦ݁ܽܘܩܕ݁ܳܢܰܘܗ̱ܝ̈ ܇ ܘܫܰܦ݁ܺܝܪܳܬ݂ܳܐ̈ ܣܳܥܪܺܝܢܰܢ ܩܕ݂ܳܡܰܘܗ̱ܝ . ܘܗܳܢܳܐ ܗ̱ܽܘ ܦ݁ܽܘܩܕ݁ܳܢܶܗ ܆ ܕ݁ܰܢܗܰܝܡܶܢ ܒ݁ܰܫܡܳܐ ܕ݁ܰܒ݂ܪܶܗ ܝܶܫܽܘܥ ܡܫܺܝܚܳܐ ܇ ܘܢܰܚܶܒ݂ ܚܰܕ݂ ܠܚܰܕ݂ ܂ ܐܰܝܟ݂ ܕ݁ܦ݂ܰܩܕ݁ܰܢ . ܘܰܐܝܢܳܐ ܕ݁ܢܳܛܰܪ ܦ݁ܽܘܩܕ݁ܳܢܰܘܗ̱ܝ̈ ܆ ܒ݁ܶܗ ܡܶܬ݂ܢܛܰܪ . ܘܗܽܘ ܫܳܪܶܐ ܒ݁ܶܗ . ܘܰܒ݂ܗܳܕ݂ܶܐ ܡܶܣܬ݁ܰܟ݁ܠܺܝܢܰܢ ܕ݁ܫܳܪܶܐ ܒ݁ܰܢ ܆ ܡܶܢ ܪܽܘܚܶܗ ܗܳܝ ܕ݁ܝܰܗ̱ܒ݂ ܠܰܢ ܀ Chapter 4 ܚܰܒ݁ܺܝܒ݂ܰܝ̈ ܆ ܠܳܐ ܠܟ݂ܽܠ ܪܽܘܚܺܝܢ̈ ܬ݁ܗܰܝܡܢܽܘܢ . ܐܶܠܳܐ ܗܘܰܝܬ݁ܽܘܢ ܦ݁ܳܪܫܺܝܢ ܪܽܘܚܶܐ̈ ܆ ܐܶܢ ܡܶܢ ܐܰܠܳܗܳܐ ܐܺܝܬ݂ܰܝܗܶܝܢ . ܡܶܛܽܠ ܕ݁ܣܰܓ݁ܺܝܶܐܐ̈ ܢܒ݂ܺܝܶܐ̈ ܕ݁ܰܓ݁ܳܠܶܐ̈ ܢܦ݂ܰܩܘ ܒ݁ܶܗ ܒ݁ܥܳܠܡܳܐ . ܒ݁ܗܳܕ݂ܶܐ ܡܶܬ݂ܝܰܕ݂ܥܳܐ ܪܽܘܚܶܗ ܕ݁ܰܐܠܳܗܳܐ . ܟ݁ܽܠ ܪܽܘܚܳܐ ܕ݁ܡܰܘܕ݁ܝܳܢ ܕ݁ܝܶܫܽܘܥ ܡܫܺܝܚܳܐ ܐܶܬ݂ܳܐ ܒ݁ܰܒ݂ܣܰܪ ܆ ܡܶܢ ܐܰܠܳܗܳܐ ܗ̱ܝ . ܘܟ݂ܽܠ ܪܽܘܚܳܐ ܕ݁ܠܳܐ ܡܰܘܕ݁ܝܳܐ ܕ݁ܝܶܫܽܘܥ ܐܶܬ݂ܳܐ ܒ݁ܰܒ݂ܣܰܪ ܆ ܠܰܝܬ݁ܶܝܗ ܡܶܢ ܐܰܠܳܗܳܐ . ܐܶܠܳܐ ܗܳܕ݂ܶܐ ܡܶܢ ܡܫܺܝܚܳܐ ܗ̱ܝ ܕ݁ܰܓ݁ܳܠܳܐ ܇ ܗܰܘ ܕ݁ܰܫܡܰܥܬ݁ܽܘܢ ܕ݁ܳܐܬ݂ܶܐ . ܘܗܳܫܳܐ ܒ݁ܥܳܠܡܳܐ ܐܺܝܬ݂ܰܘܗ̱ܝ ܡܶܢ ܟ݁ܰܕ݁ܽܘ . ܐܰܢ̱ܬ݁ܽܘܢ ܕ݁ܶܝܢ ܡܶܢ ܐܰܠܳܗܳܐ ܐܺܝܬ݂ܰܝܟ݁ܽܘܢ ܒ݁ܢܰܝܳܐ̈ ܆ ܘܰܙܟ݂ܰܝܬ݁ܽܘܢ ܐܶܢܽܘܢ . ܡܶܛܽܠ ܕ݁ܪܰܒ݁ ܗܰܘ ܕ݁ܰܒ݂ܟ݂ܽܘܢ ܆ ܡܶܢ ܗܰܘ ܕ݁ܰܒ݂ܥܳܠܡܳܐ . ܘܗܳܠܶܝܢ ܡܶܢ ܥܳܠܡܳܐ ܐܶܢܽܘܢ . ܡܶܛܽܠ ܗܳܢܳܐ ܡܶܢ ܥܳܠܡܳܐ ܡܡܰܠܠܺܝܢ ܆ ܘܥܳܠܡܳܐ ܠܗܽܘܢ ܫܳܡܰܥ . ܚܢܰܢ ܕ݁ܶܝܢ ܡܶܢ ܐܰܠܳܗܳܐ ܚܢܰܢ . ܘܗܰܘ ܕ݁ܝܳܕ݂ܰܥ ܠܰܐܠܳܗܳܐ ܆ ܫܳܡܰܥ ܠܰܢ . ܘܗܰܘ ܕ݁ܠܳܐ ܐܺܝܬ݂ܰܘܗ̱ܝ ܡܶܢ ܐܰܠܳܗܳܐ ܆ ܠܳܐ ܫܳܡܰܥ ܠܰܢ . ܒ݁ܳܗ ܒ݁ܗܳܕ݂ܶܐ ܁ ܡܶܣܬ݁ܰܟ݁ܠܺܝܢܰܢ ܠܪܽܘܚܳܐ ܕ݁ܰܫܪܳܪܳܐ ܆ ܘܰܠܪܽܘܚܳܐ ܕ݁ܡܰܛܥܝܳܢܽܘܬ݂ܳܐ ܀ ܚܰܒ݁ܺܝܒ݂ܰܝ̈ ܆ ܢܰܚܶܒ݂ ܚܰܕ݂ ܠܚܰܕ݂ ܇ ܡܶܛܽܠ ܕ݁ܚܽܘܒ݁ܳܐ ܡܶܢ ܐܰܠܳܗܳܐ ܗܽܘ . ܘܟ݂ܽܠ ܡܰܢ ܕ݁ܡܰܚܶܒ݂ ܆ ܡܶܢ ܐܰܠܳܗܳܐ ܝܺܠܺܝܕ݂ ܇ ܘܝܳܕ݂ܰܥ ܠܰܐܠܳܗܳܐ . ܡܶܛܽܠ ܕ݁ܰܐܠܳܗܳܐ ܚܽܘܒ݁ܳܐ ܗܽܘ . ܘܟ݂ܽܠ ܕ݁ܠܳܐ ܡܰܚܶܒ݂ ܆ ܠܳܐ ܝܳܕ݂ܰܥ ܠܰܐܠܳܗܳܐ . ܒ݁ܗܳܕ݂ܶܐ ܐܶܬ݂ܺܝܕ݂ܰܥ ܚܽܘܒ݁ܶܗ ܕ݁ܰܐܠܳܗܳܐ ܕ݁ܰܠܘܳܬ݂ܰܢ ܆ ܕ݁ܠܰܒ݂ܪܶܗ ܝܺܚܺܝܕ݂ܳܝܳܐ ܫܰܕ݁ܰܪ ܐܰܠܳܗܳܐ ܠܥܳܠܡܳܐ ܕ݁ܢܺܚܶܐ ܒ݁ܺܐܝܕ݂ܶܗ . ܒ݁ܗܳܢܳܐ ܐܺܝܬ݂ܰܘܗ̱ܝ ܚܽܘܒ݁ܳܐ ܇ ܠܳܐ ܗ̱ܘܳܐ ܕ݁ܰܚܢܰܢ ܐܰܚܶܒ݂ܢ ܠܰܐܠܳܗܳܐ ܆ ܐܶܠܳܐ ܗܽܘ ܐܰܚܒ݂ܰܢ ܇ ܘܫܰܕ݁ܰܪ ܠܰܒ݂ܪܶܗ ܚܽܘܣܳܝܳܐ ܥܰܠ ܐܰܦ݁ܰܝ̈ ܚܛܳܗܰܝܢ̈ ܀ ܚܰܒ݁ܺܝܒ݂ܰܝ̈ ܆ ܐܶܢ ܗܳܟ݂ܰܢܳܐ ܐܰܚܒ݂ܰܢ ܐܰܠܳܗܳܐ ܆ ܐܳܦ݂ ܚܢܰܢ ܚܰܝܳܒ݂ܺܝܢܰܢ ܚܰܕ݂ ܠܚܰܕ݂ ܠܡܰܚܳܒ݂ܽܘ . ܠܰܐܠܳܗܳܐ ܡܶܡܬ݂ܽܘܡ ܐ̱ܢܳܫ ܠܳܐ ܚܙܳܝܗ̱ܝ . ܐܶܢ ܕ݁ܶܝܢ ܢܰܚܶܒ݂ ܚܰܕ݂ ܠܚܰܕ݂ ܆ ܐܰܠܳܗܳܐ ܒ݁ܰܢ ܡܩܰܘܶܐ ܇ ܘܚܽܘܒ݁ܶܗ ܡܶܫܬ݁ܰܡܠܶܐ ܒ݁ܰܢ . ܘܰܒ݂ܗܳܕ݂ܶܐ ܝܳܕ݂ܥܺܝܢܰܢ ܁ ܕ݁ܒ݂ܶܗ ܡܩܰܘܶܝܢܰܢ ܇ ܘܗܽܘ ܡܩܰܘܶܐ ܒ݁ܰܢ ܆ ܕ݁ܡܶܢ ܪܽܘܚܶܗ ܝܰܗ̱ܒ݂ ܠܰܢ . ܘܰܚܢܰܢ ܚܙܰܝܢ ܘܡܰܣܗܕ݂ܺܝܢܰܢ ܆ ܕ݁ܰܐܒ݂ܳܐ ܫܰܕ݁ܰܪ ܠܰܒ݂ܪܶܗ ܦ݁ܳܪܽܘܩܳܐ ܠܥܳܠܡܳܐ . ܟ݁ܽܠ ܕ݁ܡܰܘܕ݁ܶܐ ܒ݁ܝܶܫܽܘܥ ܕ݁ܗܽܘܝܽܘ ܒ݁ܪܶܗ ܕ݁ܰܐܠܳܗܳܐ ܆ ܐܰܠܳܗܳܐ ܒ݁ܶܗ ܡܩܰܘܶܐ . ܘܗܽܘ ܡܩܰܘܶܐ ܒ݁ܰܐܠܳܗܳܐ . ܘܰܚܢܰܢ ܗܰܝܡܶܢܢ ܘܺܝܕ݂ܰܥܢ ܚܽܘܒ݁ܳܐ ܇ ܕ݁ܺܐܝܬ݂ ܠܶܗ ܠܰܐܠܳܗܳܐ ܨܶܐܕ݂ܰܝܢ . ܐܰܠܳܗܳܐ ܓ݁ܶܝܪ ܚܽܘܒ݁ܳܐ ܗܽܘ . ܘܟ݂ܽܠ ܕ݁ܰܡܩܰܘܶܐ ܒ݁ܚܽܘܒ݁ܳܐ ܆ ܒ݁ܰܐܠܳܗܳܐ ܡܩܰܘܶܐ . ܘܰܒ݂ܗܳܕ݂ܶܐ ܡܶܫܬ݁ܰܠܰܡ ܚܽܘܒ݁ܶܗ ܥܰܡܰܢ ܆ ܕ݁ܓ݂ܰܠܝܽܘܬ݂ ܐܰܦ݁ܶܐ̈ ܬ݁ܶܗܘܶܐ ܠܰܢ ܒ݁ܝܰܘܡܳܐ ܕ݁ܕ݂ܺܝܢܳܐ . ܡܶܛܽܠ ܕ݁ܰܐܝܟ݂ ܕ݁ܰܗܘܳܐ ܗܽܘ ܆ ܗܳܟ݂ܰܢܳܐ ܐܳܦ݂ ܚܢܰܢ ܐܺܝܬ݂ܰܝܢ ܒ݁ܗܳܢܳܐ ܥܳܠܡܳܐ . ܕ݁ܶܚܠܬ݂ܳܐ ܒ݁ܚܽܘܒ݁ܳܐ ܠܰܝܬ݁ . ܐܶܠܳܐ ܚܽܘܒ݁ܳܐ ܡܫܰܡܠܝܳܐ ܆ ܠܒ݂ܰܪ ܫܳܕ݂ܶܐ ܠܳܗ ܠܕ݂ܶܚܠܬ݂ܳܐ ܇ ܡܶܛܽܠ ܕ݁ܕ݂ܶܚܠܬ݂ܳܐ ܒ݁ܩܶܢܛܳܐ ܐܺܝܬ݂ܶܝܗ . ܗܰܘ ܕ݁ܶܝܢ ܕ݁ܕ݂ܳܚܶܠ ܆ ܠܳܐ ܡܫܰܡܠܰܝ ܒ݁ܚܽܘܒ݁ܳܐ . ܚܢܰܢ ܗܳܟ݂ܺܝܠ ܢܰܚܶܒ݂ ܠܰܐܠܳܗܳܐ ܆ ܡܶܛܽܠ ܕ݁ܗܽܘ ܩܰܕ݂ܡܳܝܰܬ݂ ܐܰܚܒ݂ܰܢ . ܐܶܢ ܕ݁ܶܝܢ ܐ̱ܢܳܫ ܢܺܐܡܰܪ ܕ݁ܡܰܚܶܒ݂ ܐ̱ܢܳܐ ܠܰܐܠܳܗܳܐ ܇ ܘܠܰܐܚܽܘܗ̱ܝ ܣܳܢܶܐ ܆ ܕ݁ܰܓ݁ܳܠܳܐ ܗܽܘ . ܗܰܘ ܓ݁ܶܝܪ ܕ݁ܠܰܐܚܽܘܗ̱ܝ ܕ݁ܡܶܬ݂ܚܙܶܐ ܠܳܐ ܡܰܚܶܒ݂ ܆ ܠܰܐܠܳܗܳܐ ܗܰܘ ܕ݁ܠܳܐ ܡܶܬ݂ܚܙܶܐ ܁ ܐܰܝܟ݁ܰܢܳܐ ܡܶܫܟ݁ܰܚ ܕ݁ܢܰܚܶܒ݂ . ܘܗܳܢܳܐ ܦ݁ܽܘܩܕ݁ܳܢܳܐ ܩܰܒ݁ܶܠܢ ܡܶܢܶܗ ܆ ܕ݁ܟ݂ܽܠ ܕ݁ܡܰܚܶܒ݂ ܠܰܐܠܳܗܳܐ ܆ ܢܰܚܶܒ݂ ܐܳܦ݂ ܠܰܐܚܽܘܗ̱ܝ . Chapter 5 ܟ݁ܽܠ ܕ݁ܰܡܗܰܝܡܶܢ ܕ݁ܝܶܫܽܘܥ ܐܺܝܬ݂ܰܘܗ̱ܝ ܡܫܺܝܚܳܐ ܆ ܡܶܢ ܐܰܠܳܗܳܐ ܝܺܠܺܝܕ݂ . ܘܟ݂ܽܠ ܕ݁ܡܰܚܶܒ݂ ܠܝܳܠܽܘܕ݂ܳܐ ܆ ܡܰܚܶܒ݂ ܐܳܦ݂ ܠܗܰܘ ܕ݁ܶܐܬ݂ܺܝܠܶܕ݂ ܡܶܢܶܗ . ܘܰܒ݂ܗܳܕ݂ܶܐ ܝܳܕ݂ܥܺܝܢܰܢ ܕ݁ܡܰܚܒ݂ܺܝܢܰܢ ܠܰܒ݂ܢܰܘܗ̱ܝ̈ ܕ݁ܰܐܠܳܗܳܐ ܆ ܡܳܐ ܕ݁ܠܰܐܠܳܗܳܐ ܡܰܚܒ݂ܺܝܢܰܢ ܘܥܳܒ݂ܕ݁ܺܝܢܰܢ ܦ݁ܽܘܩܕ݁ܳܢܰܘܗ̱ܝ̈ . ܗܳܢܳܐ ܗܽܘ ܓ݁ܶܝܪ ܚܽܘܒ݁ܶܗ ܕ݁ܰܐܠܳܗܳܐ ܆ ܕ݁ܢܶܛܰܪ ܦ݁ܽܘܩܕ݁ܳܢܰܘܗ̱ܝ̈ . ܘܦ݂ܽܘܩܕ݁ܳܢܰܘܗ̱ܝ̈ ܠܳܐ ܝܰܩܺܝܪܺܝܢ . ܡܶܛܽܠ ܕ݁ܟ݂ܽܠ ܕ݁ܺܝܠܺܝܕ݂ ܡܶܢ ܐܰܠܳܗܳܐ ܆ ܙܳܟ݂ܶܐ ܠܶܗ ܠܥܳܠܡܳܐ . ܘܗܳܕ݂ܶܐ ܗ̱ܝ ܙܳܟ݂ܽܘܬ݂ܳܐ ܕ݁ܰܙܟ݂ܳܬ݂ܶܗ ܠܥܳܠܡܳܐ ܂ ܗܰܝܡܳܢܽܘܬ݂ܰܢ . ܡܰܢܽܘ ܓ݁ܶܝܪ ܕ݁ܙܳܟ݂ܶܐ ܠܶܗ ܠܥܳܠܡܳܐ ܆ ܐܶܠܳܐ ܗܰܘ ܕ݁ܰܡܗܰܝܡܶܢ ܕ݁ܝܶܫܽܘܥ ܒ݁ܪܶܗ ܗ̱ܽܘ ܕ݁ܰܐܠܳܗܳܐ . ܗܳܢܰܘ ܕ݁ܶܐܬ݂ܳܐ ܒ݁ܝܰܕ݂ ܡܰܝܳܐ̈ ܘܰܕ݂ܡܳܐ ܁ ܝܶܫܽܘܥ ܡܫܺܝܚܳܐ . ܠܳܐ ܗ̱ܘܳܐ ܒ݁ܡܰܝܳܐ̈ ܒ݁ܰܠܚܽܘܕ݂ ܆ ܐܶܠܳܐ ܒ݁ܡܰܝܳܐ̈ ܘܰܕ݂ܡܳܐ . ܘܪܽܘܚܳܐ ܡܰܣܗܕ݂ܳܐ ܆ ܕ݁ܗܺܝ ܪܽܘܚܳܐ ܐܺܝܬ݂ܶܝܗ ܫܪܳܪܳܐ . ܘܺܐܝܬ݂ܰܝܗܽܘܢ ܬ݁ܠܳܬ݂ܳܐ ܣܳܗܕ݁ܺܝܢ ܆ ܪܽܘܚܳܐ ܘܡܰܝܳܐ̈ ܘܰܕ݂ܡܳܐ . ܘܰܬ݂ܠܳܬ݁ܰܝܗܽܘܢ̈ ܒ݁ܚܰܕ݂ ܐܶܢܽܘܢ . ܐܶܢ ܣܳܗܕ݁ܽܘܬ݂ܳܐ ܕ݁ܰܒ݂ܢܰܝܢܳܫܳܐ̈ ܡܩܰܒ݁ܠܺܝܢܰܢ ܆ ܚܰܕ݂ ܟ݁ܡܳܐ ܣܳܗܕ݁ܽܘܬ݂ܶܗ ܕ݁ܰܐܠܳܗܳܐ ܕ݁ܪܰܒ݁ܳܐ ܗ̱ܝ . ܘܗܳܕ݂ܶܐ ܗ̱ܺܝ ܣܳܗܕ݁ܽܘܬ݂ܶܗ ܕ݁ܰܐܠܳܗܳܐ ܁ ܕ݁ܰܐܣܗܶܕ݂ ܥܰܠ ܒ݁ܪܶܗ . ܟ݁ܽܠܡܰܢ ܕ݁ܰܡܗܰܝܡܶܢ ܒ݁ܰܒ݂ܪܶܗ ܕ݁ܰܐܠܳܗܳܐ ܆ ܐܺܝܬ݂ ܠܶܗ ܗܳܕ݂ܶܐ ܣܳܗܕ݁ܽܘܬ݂ܳܐ ܒ݁ܢܰܦ݂ܫܶܗ . ܟ݁ܽܠ ܕ݁ܠܳܐ ܡܗܰܝܡܶܢ ܆ ܠܰܐܠܳܗܳܐ ܕ݁ܰܓ݁ܳܠܳܐ ܥܰܒ݂ܕ݁ܶܗ ܇ ܒ݁ܰܕ݂ܠܳܐ ܗܰܝܡܶܢ ܠܣܳܗܕ݁ܽܘܬ݂ܳܐ ܁ ܕ݁ܰܐܣܗܶܕ݂ ܐܰܠܳܗܳܐ ܥܰܠ ܒ݁ܪܶܗ . ܘܗܳܕ݂ܶܐ ܗ̱ܝ ܣܳܗܕ݁ܽܘܬ݂ܳܐ ܆ ܕ݁ܚܰܝܶܐ̈ ܕ݁ܰܠܥܳܠܰܡ ܝܰܗ̱ܒ݂ ܠܰܢ ܐܰܠܳܗܳܐ . ܘܗܶܢܽܘܢ ܚܰܝܶܐ̈ ܒ݁ܰܒ݂ܪܶܗ ܐܺܝܬ݂ܰܝܗܽܘܢ . ܟ݁ܽܠ ܕ݁ܰܐܚܺܝܕ݂ ܠܰܒ݂ܪܳܐ ܆ ܐܰܚܺܝܕ݂ ܐܳܦ݂ ܠܚܰܝܶܐ̈ . ܘܟ݂ܽܠ ܕ݁ܠܳܐ ܐܰܚܺܝܕ݂ ܠܰܒ݂ܪܶܗ ܕ݁ܰܐܠܳܗܳܐ ܆ ܠܰܝܬ݁ ܠܶܗ ܚܰܝܶܐ̈ . ܗܳܠܶܝܢ ܟ݁ܶܬ݂ܒ݁ܶܬ݂ ܠܟ݂ܽܘܢ ܆ ܕ݁ܬ݂ܶܕ݁ܥܽܘܢ ܕ݁ܚܰܝܶܐ̈ ܕ݁ܰܠܥܳܠܰܡ ܐܺܝܬ݂ ܠܟ݂ܽܘܢ ܇ ܠܰܐܝܠܶܝܢ ܕ݁ܗܰܝܡܶܢܬ݁ܽܘܢ ܒ݁ܰܫܡܶܗ ܕ݁ܰܒ݂ܪܶܗ ܕ݁ܰܐܠܳܗܳܐ . ܘܗܳܕ݂ܶܐ ܦ݁ܰܪܶܗ̱ܣܺܝܰܐ ܐܺܝܬ݂ ܠܰܢ ܠܘܳܬ݂ܶܗ ܆ ܕ݁ܟ݂ܽܠ ܕ݁ܫܳܐܠܺܝܢܰܢ ܠܶܗ ܐܰܝܟ݂ ܨܶܒ݂ܝܳܢܶܗ ܆ ܫܳܡܰܥ ܠܰܢ . ܘܶܐܢ ܡܦ݁ܳܣܺܝܢܰܢ ܕ݁ܫܳܡܰܥ ܠܰܢ ܥܰܠ ܡܶܕ݁ܶܡ ܕ݁ܫܳܐܠܺܝܢܰܢ ܡܶܢܶܗ ܆ ܬ݁ܟ݂ܺܝܠܺܝܢܰܢ ܕ݁ܩܰܒ݁ܶܠܢ ܡܶܢ ܟ݁ܰܕ݁ܽܘ ܫܶܐܠܳܬ݂ܰܢ̈ ܕ݁ܫܶܐܠܢ ܡܶܢܶܗ . ܐܶܢ ܐ̱ܢܳܫ ܢܶܚܙܶܐ ܠܰܐܚܽܘܗ̱ܝ ܕ݁ܚܳܛܶܐ ܚܛܳܗܳܐ ܕ݁ܠܳܐ ܡܚܰܝܰܒ݂ ܠܡܰܘܬ݁ܳܐ ܆ ܢܶܫܰܐܠ ܘܡܶܬ݂ܝܰܗܒ݁ܺܝܢ ܠܶܗ ܚܰܝܶܐ̈ ܇ ܠܰܐܝܠܶܝܢ ܕ݁ܠܳܐ ܗ̱ܘܳܐ ܐܰܝܟ݂ ܕ݁ܰܠܡܰܘܬ݁ܳܐ ܚܳܛܶܝܢ . ܐܺܝܬ݂ ܓ݁ܶܝܪ ܚܛܳܗܳܐ ܕ݁ܡܰܘܬ݁ܳܐ . ܠܳܐ ܗ̱ܘܳܐ ܥܰܠ ܗܳܢܳܐ ܐܳܡܰܪ ܐ̱ܢܳܐ ܁ ܕ݁ܢܶܒ݂ܥܶܐ ܐ̱ܢܳܫ . ܟ݁ܽܠ ܥܰܘܠܳܐ ܓ݁ܶܝܪ ܚܛܺܝܬ݂ܳܐ ܗܽܘ . ܘܺܐܝܬ݂ ܚܛܳܗܳܐ ܕ݁ܠܳܐ ܗ̱ܘܳܐ ܕ݁ܡܰܘܬ݁ܳܐ ܗܽܘ . ܘܝܳܕ݂ܥܺܝܢܰܢ ܕ݁ܟ݂ܽܠ ܕ݁ܺܝܠܺܝܕ݂ ܡܶܢ ܐܰܠܳܗܳܐ ܆ ܠܳܐ ܚܳܛܶܐ . ܗܰܘ ܓ݁ܶܝܪ ܕ݁ܺܝܠܺܝܕ݂ ܡܶܢ ܐܰܠܳܗܳܐ ܆ ܢܳܛܰܪ ܢܰܦ݂ܫܶܗ . ܘܒ݂ܺܝܫܳܐ ܠܳܐ ܡܶܬ݂ܩܰܪܰܒ݂ ܠܶܗ . ܝܳܕ݂ܥܺܝܢܰܢ ܕ݁ܡܶܢ ܐܰܠܳܗܳܐ ܚܢܰܢ ܆ ܘܥܳܠܡܳܐ ܟ݁ܽܠܶܗ ܒ݁ܒ݂ܺܝܫܳܐ ܗܽܘ ܣܺܝܡ . ܘܝܳܕ݂ܥܺܝܢܰܢ ܕ݁ܰܒ݂ܪܶܗ ܕ݁ܰܐܠܳܗܳܐ ܐܶܬ݂ܳܐ ܆ ܘܝܰܗ̱ܒ݂ ܠܰܢ ܡܰܕ݁ܥܳܐ ܕ݁ܢܶܕ݁ܰܥ ܠܫܰܪܺܝܪܳܐ ܇ ܘܢܶܗܘܶܐ ܒ݁ܶܗ ܒ݁ܫܰܪܺܝܪܳܐ ܇ ܒ݁ܰܒ݂ܪܶܗ ܝܶܫܽܘܥ ܡܫܺܝܚܳܐ . ܗܳܢܳܐ ܗܽܘ ܐܰܠܳܗܳܐ ܫܰܪܺܝܪܳܐ ܘܚܰܝܶܐ̈ ܕ݁ܰܠܥܳܠܰܡ . ܒ݁ܢܰܝ̈ ܆ ܛܰܪܘ ܢܰܦ݂ܫܟ݂ܽܘܢ ܡܶܢ ܕ݁ܶܚܠܰܬ݂ ܦ݁ܬ݂ܰܟ݂ܪܶܐ̈ ܀.܀.܀܀