Jude the Apostle. “Jude (Peshitta Version) - ܐܓܪܬܐ ܕܝܗܘܕܐ ܫܠܝܚܐ.” Based upon G. H. Gwilliam, J. Pinkerton and John Gwynn eds., The New Testament in Syriac [ܕܝܬܝܩܐ ܚܕܬܐ ܕܡܪܢ ܝܫܘܥ ܡܫܝܚܐ] (London: British and Foreign Bible Society, 1905). Digital Syriac Corpus. Last modified May 1, 2018. https://syriaccorpus.org/144.
    
        

            
                ܐܓܪܬܐ ܕܝܗܘܕܐ ܫܠܝܚܐ
            
            
                Chapter 1
                ܝܺܗܽܘܕ݂ܳܐ ܥܰܒ݂ܕ݁ܳܐ ܕ݁ܝܶܫܽܘܥ ܡܫܺܝܚܳܐ ܇ ܐܰܚܳܐ ܕ݁ܶܝܢ ܕ݁ܝܰܥܩܽܘܒ݂
                    ܆ ܠܥܰܡ̱ܡܶܐ̈ ܩܪܰܝܳܐ̈ ܕ݁ܒ݂ܰܐܠܳܗܳܐ ܐܰܒ݂ܳܐ ܪܚܺܝܡܺܝܢ ܇ ܘܰܒ݂ܝܶܫܽܘܥ ܡܫܺܝܚܳܐ ܢܛܺܝܪܺܝܢ
                    .
                ܪܰܚܡܶܐ̈ ܘܰܫܠܳܡܳܐ ܘܚܽܘܒ݁ܳܐ ܂ ܢܶܣܓ݁ܶܐ ܠܟ݂ܽܘܢ ܀
                ܚܰܒ݁ܺܝܒ݂ܰܝ̈ ܆ ܟ݁ܰܕ݂ ܟ݁ܽܠܳܗ ܝܰܨܺܝܦ݂ܽܘܬ݂ܳܐ ܥܳܒ݂ܶܕ݂ ܐ̱ܢܳܐ
                    ܠܡܶܟ݂ܬ݁ܰܒ݂ ܠܟ݂ܽܘܢ ܁ ܥܰܠ ܚܰܝܶܐ̈ ܕ݁ܺܝܠܰܢ ܕ݁ܓ݂ܰܘܳܐ ܆ ܐܰܢܰܢܩܺܐ ܐܺܝܬ݂ ܠܺܝ ܠܡܶܟ݂ܬ݁ܰܒ݂
                    ܠܟ݂ܽܘܢ ܇ ܟ݁ܰܕ݂ ܡܦ݁ܺܝܣ ܐ̱ܢܳܐ ܆ ܕ݁ܰܐܓ݂ܽܘܢܳܐ ܬ݁ܶܥܒ݁ܕ݂ܽܘܢ ܚܠܳܦ݂ ܗܰܝܡܳܢܽܘܬ݂ܳܐ ܇
                    ܐܰܝܕ݂ܳܐ ܕ݁ܰܚܕ݂ܳܐ ܙܒ݂ܰܢ ܐܶܫܬ݁ܰܠܡܰܬ݂ ܠܩܰܕ݁ܺܝܫܶܐ̈ .
                ܩܢܰܘ ܓ݁ܶܝܪ ܐ̱ܢܳܫܺܝܢ̈ ܡܰܥܠܳܢܽܘܬ݂ܳܐ ܇ ܐܰܝܠܶܝܢ ܕ݁ܡܶܢ ܫܽܘܪܳܝܳܐ
                    ܩܰܕ݁ܶܡܘ ܐܶܬ݂ܟ݁ܬ݂ܶܒ݂ܘ ܒ݁ܚܽܘܝܳܒ݂ܳܐ ܗܳܢܳܐ . ܐ̱ܢܳܫܳܐ ܪܰܫܺܝܥܶܐ̈ . ܕ݁ܰܠܛܰܝܒ݁ܽܘܬ݂ܶܗ
                    ܕ݁ܰܐܠܳܗܰܢ ܡܰܗܦ݁ܟ݂ܺܝܢ ܠܛܰܢܦ݁ܽܘܬ݂ܳܐ . ܘܰܒ݂ܗܰܘ ܕ݁ܺܐܝܬ݂ܰܘܗ̱ܝ ܒ݁ܰܠܚܽܘܕ݂ܰܘܗ̱ܝ ܡܳܪܳܐ
                    ܐܰܠܳܗܳܐ ܘܡܳܪܰܢ ܝܶܫܽܘܥ ܡܫܺܝܚܳܐ ܂ ܟ݁ܳܦ݂ܪܺܝܢ .
                ܠܡܰܥ̱ܗܳܕ݂ܽܘܬ݂ܟ݂ܽܘܢ ܕ݁ܶܝܢ ܨܳܒ݂ܶܐ ܐ̱ܢܳܐ ܇ ܟ݁ܰܕ݂ ܝܳܕ݂ܥܺܝܢ
                    ܐܢ̱ܬ݁ܽܘܢ ܟ݁ܽܠܗܶܝܢ ܆ ܕ݁ܰܐܠܳܗܳܐ ܟ݁ܰܕ݂ ܚܕ݂ܳܐ ܙܒ݂ܰܢ ܠܥܰܡܳܐ ܡܶܢ ܡܶܨܪܶܝܢ ܦ݁ܪܰܩ ܆ ܗܳܝ
                    ܕ݁ܬ݂ܰܪܬ݁ܶܝܢ̈ ܠܰܐܝܠܶܝܢ ܕ݁ܠܳܐ ܗܰܝܡܶܢܘ ܐܰܘܒ݁ܶܕ݂ .
                ܘܰܠܡܰܠܰܐܟ݂ܶܐ̈ ܐܰܝܠܶܝܢ ܕ݁ܠܳܐ ܢܛܰܪܘ ܪܺܝܫܳܢܽܘܬ݂ܗܽܘܢ ܇ ܐܶܠܳܐ
                    ܫܒ݂ܰܩܘ ܥܽܘܡܪܳܐ ܕ݁ܺܝܠܗܽܘܢ ܆ ܠܕ݂ܺܝܢܳܐ ܕ݁ܝܰܘܡܳܐ ܪܰܒ݁ܳܐ ܁ ܒ݁ܰܐܣܽܘܪܶܐ̈ ܠܳܐ ܝܺܕ݂ܺܝܥܶܐ̈
                    ܁ ܬ݁ܚܶܝܬ݂ ܥܰܡܛܳܢܳܐ ܂ ܢܳܛܰܪ .
                ܐܰܝܟ݁ܰܢܳܐ ܕ݁ܰܣܕ݂ܽܘܡ ܘܥܳܡܽܘܪܳܐ ܘܰܡܕ݂ܺܝܢܳܬ݂ܳܐ̈ ܕ݁ܰܚܕ݂ܳܪܰܝܗܶܝܢ̈
                    ܇ ܕ݁ܒ݂ܳܗ ܒ݁ܰܕ݂ܡܽܘܬ݂ܳܐ ܕ݁ܗܳܠܶܝܢ ܙܰܢܺܝ̈ ܘܶܐܙܰܠ ܒ݁ܳܬ݂ܰܪ ܒ݁ܶܣܪܳܐ ܐ̱ܚܪܺܢܳܐ ܆ ܣܺܝܡܳܢ̈
                    ܬ݁ܚܶܝܬ݂ ܬ݁ܰܚܘܺܝܬ݂ܳܐ ܕ݁ܢܽܘܪܳܐ ܕ݁ܰܠܥܳܠܰܡ ܁ ܟ݁ܰܕ݂ ܡܚܰܝܒ݂ܳܢ̈ ܠܕ݂ܺܝܢܳܐ .
                ܒ݁ܳܗ ܒ݁ܰܕ݂ܡܽܘܬ݂ܳܐ ܐܳܦ݂ ܗܳܠܶܝܢ ܕ݁ܰܒ݂ܚܶܠܡܶܐ̈ ܡܶܫܬ݁ܪܰܓ݂ܪܓ݂ܺܝܢ ܆
                    ܠܒ݂ܶܣܪܳܐ ܡܰܢ ܡܛܰܢܦ݂ܺܝܢ . ܠܡܳܪܽܘܬ݂ܳܐ ܕ݁ܶܝܢ ܛܳܠܡܺܝܢ . ܘܰܠܬ݂ܶܫܒ݁ܽܘܚܬ݁ܳܐ ܡܓ݂ܰܕ݁ܦ݂ܺܝܢ
                    .
                ܡܺܝܟ݂ܳܐܝܶܠ ܕ݁ܶܝܢ ܪܺܝܫ ܡܰܠܰܐܟ݂ܶܐ̈ ܇ ܗܰܘ ܕ݁ܥܰܡ ܐܳܟ݂ܶܠܩܰܪܨܳܐ
                    ܟ݁ܰܕ݂ ܕ݁ܳܐܶܢ ܁ ܡܡܰܠܶܠ ܗ̱ܘܳܐ ܡܶܛܽܠ ܦ݁ܰܓ݂ܪܶܗ ܕ݁ܡܽܘܫܶܐ ܆ ܠܳܐ ܐܰܡܪܰܚ ܕ݁ܢܰܝܬ݁ܶܐ
                    ܥܠܰܘܗ̱ܝ ܕ݁ܺܝܢܳܐ ܕ݁ܓ݂ܽܘܕ݁ܳܦ݂ܳܐ . ܐܶܠܳܐ ܐܶܡܰܪ ܆ ܕ݁ܢܶܓ݂ܥܽܘܪ ܒ݁ܳܟ݂ ܡܳܪܝܳܐ .
                ܗܳܠܶܝܢ ܕ݁ܶܝܢ ܁ ܒ݁ܰܐܝܠܶܝܢ ܕ݁ܠܳܐ ܝܳܕ݂ܥܺܝܢ ܂ ܡܓ݂ܰܕ݁ܦ݂ܺܝܢ .
                    ܒ݁ܰܐܝܠܶܝܢ ܕ݁ܶܝܢ ܕ݁ܰܟ݂ܝܳܢܳܐܝܺܬ݂ ܐܰܝܟ݂ ܚܰܝܘܳܬ݂ܳܐ̈ ܚܰܪܫܳܬ݂ܳܐ̈ ܡܦ݁ܳܣܺܝܢ ܆ ܒ݁ܗܶܝܢ
                    ܡܶܬ݂ܚܰܒ݁ܠܺܝܢ .
                ܘܳܝ ܠܗܽܘܢ ܕ݁ܒ݂ܽܐܘܪܚܶܗ ܕ݁ܩܳܐܝܶܢ ܐܶܙܰܠܘ . ܘܒ݂ܳܬ݂ܰܪ ܛܳܥܝܽܘܬ݂ܶܗ
                    ܕ݁ܒ݂ܶܠܥܰܡ ܒ݁ܰܐܓ݂ܪܳܐ ܐܶܫܬ݁ܰܪܰܚܘ . ܘܰܒ݂ܥܶܨܝܳܝܽܘܬ݂ܶܗ ܕ݁ܩܽܘܪܳܚ ܐܶܒ݂ܰܕ݂ܘ .
                ܗܳܠܶܝܢ ܐܺܝܬ݂ܰܝܗܽܘܢ ܐܰܝܠܶܝܢ ܕ݁ܒ݂ܰܢܝܳܚܳܬ݂ܗܽܘܢ̈ ܟ݁ܰܕ݂
                    ܡܟ݂ܰܬ݁ܡܺܝܢ ܁ ܡܶܬ݂ܦ݁ܰܪܦ݁ܥܺܝܢ . ܟ݁ܰܕ݂ ܕ݁ܠܳܐ ܕ݁ܶܚܠܬ݂ܳܐ ܢܰܦ݂ܫܗܽܘܢ ܪܳܥܶܝܢ . ܥܢܳܢܶܐ̈
                    ܕ݁ܠܳܐ ܡܶܛܪܳܐ ܕ݁ܡܶܢ ܪܽܘܚܶܐ̈ ܦ݁ܳܗܝܳܢ̈ . ܐܺܝܠܳܢܶܐ̈ ܕ݁ܰܐܘܦ݁ܺܝ ܐܶܒ݁ܗܽܘܢ .
                    ܕ݁ܺܐܝܬ݂ܰܝܗܽܘܢ ܕ݁ܠܳܐ ܦ݁ܺܐܪܶܐ̈ . ܕ݁ܡܺܝܬ݂ܘ ܬ݁ܶܢܝܳܢܽܘܬ݂ . ܘܰܣܠܶܩܘ ܡܶܢ ܥܶܩܳܪܰܝܗܽܘܢ̈
                    .
                ܓ݁ܰܠ̱ܠܶܐ̈ ܥܰܙܺܝܙܶܐ̈ ܕ݁ܝܰܡܳܐ ܇ ܕ݁ܰܒ݂ܝܰܕ݂ ܪܽܘܥܬ݁ܗܽܘܢ ܡܚܰܘܶܝܢ
                    ܒ݁ܶܗܬ݁ܰܬ݂ܗܽܘܢ . ܟ݁ܰܘܟ݁ܒ݂ܶܐ̈ ܡܰܛܥܝܳܢܶܐ̈ . ܠܗܳܠܶܝܢ ܕ݁ܥܰܡܛܳܢܳܐ ܕ݁ܚܶܫܽܘܟ݂ܳܐ ܠܥܳܠܰܡ
                    ܠܗܽܘܢ ܢܛܺܝܪ .
                ܐܶܬ݂ܢܰܒ݁ܺܝ ܕ݁ܶܝܢ ܐܳܦ݂ ܠܗܳܠܶܝܢ ܆ ܗܰܘ ܕ݁ܺܐܝܬ݂ܰܘܗ̱ܝ ܕ݁ܫܰܒ݂ܥܳܐ
                    ܡܶܢ ܐܳܕ݂ܳܡ ܁ ܚܢܽܘܟ݂ ܟ݁ܰܕ݂ ܐܳܡܰܪ ܆ ܕ݁ܗܳܐ ܡܳܪܝܳܐ ܐܳܬ݂ܶܐ ܒ݁ܪܶܒ݁ܘܳܬ݂ܳܐ̈ ܕ݁ܩܰܕ݁ܺܝܫܶܐ̈
                    ܆
                ܕ݁ܢܶܥܒ݁ܶܕ݂ ܕ݁ܺܝܢܳܐ ܥܰܠ ܟ݁ܽܠ ܆ ܘܰܠܡܰܟ݁ܳܣܽܘ ܠܟ݂ܽܠ ܢܰܦ݂ܫܳܬ݂ܳܐ̈
                    ܇ ܡܶܛܽܠ ܟ݁ܽܠܗܽܘܢ ܥܒ݂ܳܕ݂ܶܐ̈ ܐܰܝܠܶܝܢ ܕ݁ܰܐܪܫܥܘ ܇ ܘܡܶܛܽܠ ܟ݁ܽܠܗܶܝܢ ܡܶܠܶܐ̈ ܩܰܫܝܳܬ݂ܳܐ̈
                    ܁ ܐܰܝܠܶܝܢ ܕ݁ܡܰܠܶܠܘ ܂ ܚܰܛܳܝܶܐ̈ ܪܰܫܺܝܥܶܐ̈ .
                ܗܳܠܶܝܢ ܐܶܢܽܘܢ ܕ݁ܡܰܪܛܢܺܝܢ ܘܥܳܕ݂ܠܺܝܢ ܒ݁ܟ݂ܽܠ ܨܶܒ݂ܘܳܢ̈ ܇ ܟ݁ܰܕ݂
                    ܐܰܝܟ݂ ܪܓ݂ܺܝܓ݂ܳܬ݂ܳܐ̈ ܕ݁ܺܝܠܗܽܘܢ ܡܗܰܠܟ݂ܺܝܢ . ܘܦ݂ܽܘܡܗܽܘܢ ܡܡܰܠܶܠ ܓ݁ܢܺܝܚܳܬ݂ܳܐ̈ ܆
                    ܘܰܡܫܰܒ݁ܚܺܝܢ ܠܦ݂ܰܪܨܽܘܦ݁ܶܐ̈ ܡܶܛܽܠ ܝܽܘܬ݂ܪܳܢܶܐ̈ ܀
                ܐܰܢ̱ܬ݁ܽܘܢ ܕ݁ܶܝܢ ܚܰܒ݁ܺܝܒ݂ܰܝ̈ ܆ ܐܶܬ݁ܕ݁ܰܟ݂̱ܪܘ ܠܡܶܠܶܐ̈ ܐܰܝܠܶܝܢ
                    ܕ݁ܩܰܕ݁ܶܡ ܐܶܬ݂ܶܐܡܰܪ ܡܶܢ ܫܠܺܝܚܰܘܗ̱ܝ̈ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܇
                ܕ݁ܳܐܡܪܺܝܢ ܗ̱ܘܰܘ ܠܟ݂ܽܘܢ ܆ ܕ݁ܰܒ݂ܚܰܪܬ݂ܳܐ ܕ݁ܙܰܒ݂ܢܶܐ̈ ܢܶܗܘܽܘܢ
                    ܐܰܝܠܶܝܢ ܕ݁ܰܡܒ݂ܰܙܚܺܝܢ ܇ ܕ݁ܰܐܝܟ݂ ܪܓ݂ܺܝܓ݂ܳܬ݂ܳܐ̈ ܕ݁ܺܝܠܗܽܘܢ ܐܳܙܺܠ̱ܝܢ ܒ݁ܳܬ݂ܰܪ ܪܽܘܫܥܳܐ
                    .
                ܗܳܠܶܝܢ ܐܺܝܬ݂ܰܝܗܽܘܢ ܐܰܝܠܶܝܢ ܕ݁ܰܡܦ݂ܰܪܫܺܝܢ . ܢܰܦ݂ܫܳܢܳܝܶܐ̈ .
                    ܕ݁ܪܽܘܚܳܐ ܠܰܝܬ݁ ܠܗܽܘܢ .
                ܐܰܢ̱ܬ݁ܽܘܢ ܕ݁ܶܝܢ ܚܰܒ݁ܺܝܒ݂ܰܝ̈ ܆ ܒ݁ܗܰܝܡܳܢܽܘܬ݂ܳܐ ܕ݁ܺܝܠܟ݂ܽܘܢ
                    ܩܰܕ݁ܺܝܫܬ݁ܳܐ ܁ ܐܶܬ݂ܒ݁ܰܢܰܘ ܡܶܢ ܕ݁ܪܺܝܫ ܒ݁ܪܽܘܚܳܐ ܩܰܕ݁ܺܝܫܳܐ ܂ ܟ݁ܰܕ݂ ܡܨܰܠܶܝܢ .
                ܢܰܦ݂ܫܰܢ ܕ݁ܶܝܢ ܒ݁ܚܽܘܒ݁ܳܐ ܕ݁ܰܐܠܳܗܳܐ ܢܶܛܰܪ ܁ ܟ݁ܰܕ݂ ܡܣܰܟ݁ܶܝܢܰܢ
                    ܠܰܚܢܳܢܶܗ ܕ݁ܡܳܪܰܢ ܝܶܫܽܘܥ ܡܫܺܝܚܳܐ ܇ ܠܚܰܝܶܐ̈ ܕ݁ܺܝܠܰܢ ܕ݁ܰܠܥܳܠܰܡ .
                ܘܰܠܡܶܢܗܽܘܢ ܡܰܢ ܡܶܢ ܢܽܘܪܳܐ ܚܛܽܘܦ݂ܘ .
                ܟ݁ܰܕ݂ ܕ݁ܶܝܢ ܡܶܬ݁ܬ݁ܘܶܝܢ ܁ ܐܶܬ݂ܪܰܚܰܡܘ ܥܠܰܝܗܽܘܢ ܒ݁ܕ݂ܶܚܠܬ݂ܳܐ ܇
                    ܟ݁ܰܕ݂ ܣܳܢܶܝܢ ܐܢ̱ܬ݁ܽܘܢ ܐܳܦ݂ ܠܟ݂ܽܘܬ݁ܺܝܢܳܐ ܕ݁ܡܶܢ ܒ݁ܶܣܪܳܐ ܕ݁ܰܡܟ݂ܰܬ݁ܡܳܐ .
                ܠܗܰܘ ܕ݁ܶܝܢ ܕ݁ܡܶܫܟ݁ܰܚ ܕ݁ܰܢܢܰܛܰܪ ܠܰܢ ܕ݁ܠܳܐ ܫܽܘܪܰܥܬ݂ܳܐ ܘܰܕ݂ܠܳܐ
                    ܟ݁ܽܘܬ݂ܡܳܐ ܇ ܘܰܢܩܺܝܡ ܕ݁ܠܳܐ ܡܽܘܡܳܐ :
                ܒ݁ܰܠܚܽܘܕ݂ܰܘܗ̱ܝ ܐܰܠܳܗܳܐ ܦ݁ܳܪܽܘܩܰܢ ܁ ܒ݁ܝܰܕ݂ ܝܶܫܽܘܥ ܡܫܺܝܚܳܐ
                    ܡܳܪܰܢ ܇ ܩܕ݂ܳܡ ܬ݁ܶܫܒ݁ܽܘܚܬ݁ܶܗ ܒ݁ܚܰܕ݂ܽܘܬ݂ܳܐ ܆ ܠܶܗ ܫܽܘܒ݂ܚܳܐ ܘܽܐܘܚܕ݁ܳܢܳܐ ܘܺܐܝܩܳܪܳܐ
                    ܘܪܰܒ݁ܽܘܬ݂ܳܐ ܁ ܐܳܦ݂ ܗܳܫܳܐ ܘܰܒ݂ܟ݂ܽܠܗܽܘܢ ܥܳܠܡܶܐ̈ ܂ ܐܰܡܺܝܢ ܀