James H. Charlesworth ed., The Odes of Solomon: The Syriac Texts (Oxford: Oxford University Press, 1973)
    
        


            
                
                    1

                    ܐܰܝܟ ܪܶܗܛܳܗܿ ܕܚܶܡܬܳܐ ܥܰܠ ܥܰܘܳܠܽܘܬܳܐ܆ ܗܳܟܰܢܳܐ ܪܶܗܛܰܗܿ ܕܚܰܕܽܘܬܳܐ ܥܰܠ
                        ܪܚܺܝܡܳܐ܆
                    ܘܡܼܶܢ ܦܺܐܪ̈ܶܝܗܿ ܡܰܥܶܠ ܕܠܴܐ ܟܶܠܝܳܢܳܐ. 
                
                
                    2

                    ܚܰܕܽܘܬܝ ܡܳܪܝܰܐ ܗ̱ܘܼ ܘܪܶܗܛܝ ܠܘܳܬܶܗ܆ 
                    ܗܳܕܶܐ ܐܽܘܪܚܝ ܫܰܦܺܝܪܳܐ. 
                
                
                    3

                    ܡܥܰܕܪܳܢܳܐ ܓܶܝܪ ܐܺܝܬ ܠܺܝ ܠܡܳܪܝܳܐ܆ ܐܰܘܕܥܰܢܝ ܢܰܦܫܶܗ ܕܠܴܐ ܚܣܳܡܳܐ
                        ܒܰܦܫܺܝܛܽܘܬܶܗ܆
                    ܪܰܒܽܘܬܶܗ ܓܶܝܪ ܒܰܣܺܝܡܽܘܬܶܗ ܐܰܙܥܪܰܬ. 
                
                
                    4

                    ܗܘܳܐ ܐܰܟܘܳܬܝ ܡܶܛܽܠ ܕܶܐܣܒܺܝܘܗ̱ܝ܆
                    ܒܰܕܡܽܘܬܳܐ ܐܶܣܬܒܰܪ ܐܰܟܘܳܬܝ ܡܶܛܽܠ ܕܶܐܠܒܫܺܝܘܗ̱ܝ. 
                
                
                    5

                    ܘܠܴܐ ܙܳܥܶܬ ܟܰܕ ܚܙܺܝܬܶܗ܆
                    ܡܶܛܽܠ ܕܗܽܘܝܽܘ ܚܼܰܢܰܢܝ. 
                
                
                    6

                    ܐܰܝܟ ܟܝܳܢܝ ܗܘܳܐ ܡܶܛܽܠ ܕܰܐܠܦܺܝܘܗ̱ܝ܆
                    ܐܰܝܟ ܨܽܘܪܬܝ ܡܶܛܽܠ ܕܠܴܐ ܐܶܗܦܽܘܟ ܡܶܢܶܗ. 
                
                
                    7

                    ܐܰܒܽܘܗܿ ܕܺܝܕܰܥܬܳܐ܆
                    ܦܶܬܓܳܡܰܐ ܗܼ̄ܘ ܕܺܝܕܰܥܬܳܐ. 
                
                
                    8

                    ܗ݀ܰܘ ܕܰܒܪܳܐ ܚܶܟܡܬܳܐ܆ 
                    ܚܰܟܺܝܡ ܗ̱ܽܘܼ ܡܼܶܢ ܥ̈ܒܳܕܰܘܗ̱ܝ. 
                
                
                    9

                    ܘܗܰܘܿ ܕܰܒܪܳܢܝ ܥܰܕ ܠܴܳܐ ܐܶܗܘܶܐ܆
                    ܝܿܳܕܰܥ ܡܶܕܶܡ ܕܥܿܳܒܶܕ ܗܘܺܝܬ ܟܰܕ ܐܶܗܘܶܐ. 
                
                
                    10

                    ܡܶܛܽܠ ܗܳܢܳܐ ܚܰܢܰܢܝ ܒܰܚܢܳܢܶܗ ܣܰܓܺܝܐܴܐ܆
                    ܘܝܰܗ̱ܒ ܠܺܝ ܕܶܐܒܥܶܐ ܡܶܢܶܗ ܘܶܐܩܰܒܶܠ ܡܶܢ ܕܶܒܚܬܶܗ. 
                
                
                    11

                    ܡܶܛܽܠ ܕܗܽܘܝܽܘ ܐܺܝܬܰܘܗ̱ܝ ܕܠܴܐ ܚܒܳܠܴܐ܆ 
                    ܫܽܘܡܠܳܝܳܐ ܕܥܳܠܡܷ̈ܐ ܘܰܐܒܽܘܗܽܘܢ. 
                
                
                    12

                    ܝܰܗܼܒ ܠܶܗ ܕܢܶܬܚܙܶܐ ܠܐܰܝܠܶܝܢ ܕܕܺܝܠܶܗ ܐܶܢܽܘܢܿ܆ ܡܶܛܽܠ ܕܢܶܫܬܰܘܕܥܽܘܢܿ ܠܗܰܘܿ
                        ܕܰܥܒܼܰܕ ܐܶܢܽܘܢܿ܆
                    ܘܰܕܠܴܐ ܢܶܣܒܪܽܘܢ ܕܡܶܢ ܢܰܦܫܗܽܘܢ ܗܘܰܘ. 
                
                
                    13

                    ܠܺܝܕܰܥܬܳܐ ܓܶܝܪ ܐܽܘܪܚܶܗ ܣܳܡܳܗܿ܆
                    ܐܰܦܬܝܳܗܿ ܘܐܱܘܪܟܳܗܿ ܘܐܱܝܬܝܳܗܿ ܥܰܠ ܟܽܠܶܗ ܫܽܘܡܠܳܝܳܐ. 
                
                
                    14

                    ܘܣܳܡ ܥܠܶܝܗܿ ܥܶܩ̈ܒܳܬܳܐ ܕܢܽܘܗܪܶܗ܆ 
                    ܘܗܶܠܟܰܬܼ ܡܶܢ ܒܪܺܝܫܺܝܬ ܥܕܰܡܳܐ ܠܚܰܪܬܳܐ. 
                
                
                    15

                    ܡܶܢܶܗ ܓܶܝܪ ܦܠܺܝܚ ܗ̱ܘܳܐ܆
                    ܘܰܡܢܳܚ ܗ̱ܘܳܐ ܒܰܒܪܳܐ. 
                
                
                    16

                    ܘܡܶܛܽܠ ܦܽܘܪܩܳܢܶܗ ܢܶܐܚܽܘܕ ܟܽܠ ܡܶܕܶܡ܆
                    ܘܢܶܬܺܝܕܰܥ ܡܪܰܝܡܳܐ ܒܩܰܕܺܝ̈ܫܰܘܗ̱ܝ. 
                
                
                    17

                    ܠܰܡܣܰܒܳܪܺܘ ܠܐܰܝܠܶܝܢ ܕܺܐܝܬ ܠܗܽܘܢܿ ܡܰܙܡܽܘܪ̈ܶܐ ܕܡܶܬܺܝܬܶܗ ܕܡܳܪܝܳܐ܆ ܕܢܶܦܩܽܘܢ
                        ܠܽܐܘܪܥܗ ܘܢܶܙܡܪܽܘܢ ܠܶܗ܆ 
                    ܒܚܰܕܽܘܬܳܐ ܘܰܒܩܺܝܬܳܪܳܐ ܕܣܰܓܺܝܐܺܝܢ ܩܳܠܰܘ̈ܗ̱ܝ. 
                
                
                    18

                    ܢܺܐܙܽܠ̄ܘܢ ܩܕܳܡܰܘܗ̱ܝ ܚܰܙܳܝܷ̈ܐ܆
                    ܘܢܶܬܚܙܽܘܢ ܩܕܳܡܰܘܗ̱ܝ. 
                
                
                    19

                    ܘܰܢܫܰܒܚܽܘܢ ܠܡܳܪܝܳܐ ܒܚܽܘܒܶܗ܆
                    ܡܶܛܽܠ ܕܩܰܪܺܝܒ ܗ̱ܽܘܼ ܘܚܿܳܙܶܐ. 
                
                
                    20

                    ܘܶܐܬܬܪܺܝܡܝ ܣܶܢܶܐܬܳܐ ܡܼܶܢ ܐܰܪܥܳܐ܆ 
                    ܘܥܰܡ ܛܢܳܢܳܐ ܬܶܬܛܒܰܥܝ. 
                
                
                    21

                    ܐܶܬܚܰܒܠܰܬ ܠܳܗܿ ܓܶܝܪ ܠܴܐ ܝܺܕܰܥܬܳܐ܆ 
                    ܡܶܛܽܠ ܕܶܐܬܳܬ ܠܳܗܿ ܝܺܕܰܥܬܶܗ ܕܡܳܪܝܳܐ. 
                
                
                    22

                    ܢܙܰܡܪܽܘܢ ܐܰܝܠܶܝܢ ܕܰܡܙܰܡܪܺܝܢ ܛܰܝܒܽܘܬܶܗ ܕܡܳܪܝܳܐ ܡܪܰܝܡܳܐ܆
                    ܘܰܢܩܰܪܒܽܘܢ ܡܰܙܡܽܘܪ̈ܰܝܗܽܘܢܿ. 
                
                
                    23

                    ܘܐܰܝܟ ܝܰܘܡܳܐ ܢܶܗܘܶܐ ܠܶܒܗܽܘܢܿ܆
                    ܘܐܰܝܟ ܪܰܒܽܘܬ ܝܳܐܝܽܘܬܶܗ ܕܡܳܪܝܳܐ ܢܶܥܡܴ̈ܬܗܽܘܢܿ. 
                
                
                    24

                    ܘܠܴܐ ܢܶܗܘܶܐ ܡܶܕܶܡ ܕܢܰܦܫܳܐ܆ 
                    ܘܠܴܐ ܕܠܴܐ ܝܺܕܰܥܬܳܐ ܘܠܴܐ ܕܰܚܪܶܫ. 
                
                
                    25
                    ܦܽܘܡܳܐ ܓܶܝܪ ܝܰܗܼܒ ܠܰܒܪܺܝܬܶܗ܆
                    ܠܡܶܦܬܰܚ ܩܳܠܴܐ ܕܦܽܘܡܳܐ ܠܘܳܬܶܗ܆ ܘܠܰܡܫܰܒܳܚܽܘܬܶܗ.
                
                
                    26
                    ܐܘܕܰܘ ܚܰܝܠܬܳܢܽܘܬܶܗ܆
                    ܘܚܰܘܰܘ ܛܰܝܒܽܘܬܶܗ. ܗܰܠܶܠܘܽܝܰܐ.