James H. Charlesworth ed., The Odes of Solomon: The Syriac Texts (Oxford: Oxford University Press, 1973)
    
        


            
                
                    1

                    ܐܶܬܓܙܰܪ ܠܶܒܝ ܘܶܐܬܚܙܺܝ ܥܽܘܦܳܝܶܗ܆ ܘܺܝܥܼܳܬ ܒܶܗ ܛܰܝܒܽܘܬܳܐ܆ 
                    ܘܰܥܒܰܕ ܦܺܐܪ̈ܶܐ ܠܡܳܪܝܳܐ. 
                
                
                    2

                    ܡܪܰܝܡܳܐ ܓܶܝܪ ܓܰܙܪܰܢܝ ܒܪܽܘܚܶܗ ܩܰܕܺܝܫܳܐ܆ ܘܰܓܠܼܳܐ ܠܘܳܬܶܗ ܟܽܘ̈ܠܝܳܬܝ܆
                    ܘܰܡܠܳܢܝ ܡܼܶܢ ܚܽܘܒܶܗ. 
                
                
                    3

                    ܘܰܗܘܳܬ ܠܺܝ ܓܙܽܘܪܬܶܗ ܠܦܽܘܪܩܳܢܳܐ܆ (ܘܪܶܗܿܛܶܬ ܒܽܐܘܪܚܳܐ ܒܰܫܠܳܡܶܗ܆ 
                    ܒܽܐܘܪܚܳܐ ܕܰܫܪܳܪܳܐ.) 
                
                
                    4

                    ܡܼܶܢ ܪܺܝܫܺܝܬܳܐ ܘܰܥܕܰܡܳܐ ܠܰܐܚܪܳܝܬܳܐ܆ 
                    ܢܶܣܒܶܬ ܝܺܕܰܥܬܶܗ. 
                
                
                    5

                    ܘܐܷܫܬܰܪܪܶܬ ܥܰܠ (ܫܽܘܥܳܐ ܕܰܫܪܳܪܳܐ)܆ 
                    ܐܰܝܟܳܐ ܕܗܽܘ ܐܰܬܩܢܰܢܝ. 
                
                
                    6

                    ܘܡܰܝ̈ܳܐ ܡܱ̈ܠܳܠܷܐ ܩܪܶܒܘ ܠܣܶܦ̈ܘܳܬܝ܆ 
                    (ܡܼܶܢ ܡܰܒܽܘܥܶܗ ܕܡܳܪܝܳܐ ܕܠܴܐ ܚܣܳܡ. 
                
                
                    7

                    ܘܶܐܫܿܬܺܝܬ ܘܰܪܘܺܝܬ܆ 
                    ܡܼܶܢ ܡܰܝ̈ܳܐ ܚܰܝܷ̈ܐ ܕܠܴܐ ܡܿܳܝܬܺܝܢ. 
                
                
                    8

                    ܘܪܳܘܝܽܘܬܝ ܠܴܐ ܗܘܳܬ ܕܠܴܐ ܝܺܕܰܥܬܳܐ܆
                    ܐܶܠܴܐ ܫܶܒܩܶܬ ܣܪ̈ܺܝܩܳܬܳܐ. 
                
                
                    9

                    ܘܶܐܬܦܢܺܝܬ ܠܘܳܬ ܡܪܰܝܡܳܐ ܐܰܠܳܗܝ܆
                    ܘܥܶܬܪܶܬ ܒܡܰܘܗܰܒܬܶܗ. 
                
                
                    10

                    ܘܫܶܒܩܶܬ ܠܫܳܛܝܽܘܬܳܐ ܫܰܕܝܳܐ ܥܰܠ ܐܰܪܥܳܐ܆
                    ܘܰܫܠܰܚܬܳܗܿ ܘܰܫܕܺܝܬܳܗܿ ܡܶܢܝ. 
                
                
                    11

                    ܘܡܳܪܝܳܐ ܚܰܕܬܰܢܝ ܒܰܠܒܽܘܫܶܗ܆ 
                    ܘܰܩܢܳܢܝ ܒܢܽܘܗܪܶܗ. 
                
                
                    12

                    (ܘܡܼܶܢ ܠܥܶܠ ܐܰܢܺܚܰܝܢܝ ܕܠܴܐ ܚܒܴܿܠ܆
                    ܘܰܗܘܺܝܬ ܐܰܝܟ ܐܰܪܥܳܐ ܕܫܳܘܚܳܐ ܘܪܳܘܙܳܐ ܒܦܺܐܪ̈ܶܝܗܿ. 
                
                
                    13

                    ܘܡܳܪܝܳܐ ܐܰܝܟ ܫܶܡܫܳܐ܆ 
                    ܥܰܠ ܐܰܦܶܝ̈ܗܿ ܕܰܐܪܥܳܐ. 
                
                
                    14

                    ܥܰܝ̈ܢܰܝ ܐܰܢܗܼܰܪ܆
                    ܘܦܰܪܨܽܘܦܝ ܩܼܰܒܶܠ ܛܰܐܠܴܐ. 
                
                
                    15

                    ܘܶܐܬܒܰܣܡܰܬ ܢܶܫܡܰܬܝ܆ 
                    (ܒܪܺܝܚܶܗ ܒܰܣܺܝܡܳܐ) ܕܡܳܪܝܳܐ. 
                
                
                    16

                    ܘܰܐܘܒܠܳܢܝ ܠܦܰܪܕܰܝܣܶܗ܆
                    ܐܰܝܟܳܐ ܕܥܽܘܬܪܳܐ ܕܒܽܘܣܳܡܶܗ ܕܡܳܪܝܳܐ. 
                
                
                    17

                    ܘܣܶܓܕܶܬ ܠܡܳܪܝܳܐ ܡܶܛܽܠ ܬܶܫܒܽܘܚܬܶܗ.
                

                
                    18

                    ܘܐܷܡܪܶܬ ܕܛܽܘܒܰܝܗܽܘܢܿ ܡܳܪܝܳܐ܆ ܠܐܰܝܠܶܝܢ ܕܳܢܨܺܝܒܺܝܢ ܒܰܐܪܥܳܟ܆
                    ܘܗܳܢܽܘܢܿ ܕܺܐܝܬ ܠܗܽܘܢܿ ܐܰܬܪܳܐ ܒܦܰܪܕܰܝܣܳܟ. 
                
                
                    19

                    ܘܝܴܿܥܶܝܢ ܒܡܰܘܥܺܝܬܳܐ ܕܺܐܝ̈ܠܳܢܰܝܟ܆ 
                    ܘܫܰܢܺܝܘ ܡܼܶܢ ܚܶܫܽܘܟܳܐ ܫܰܦܺܝܪܺܝܢ܆ 
                
                
                    20

                    ...
                     ܕܥܴܿܒܕܶܝܢ ܥܒܴ̈ܕܶܐ ܛܳܒܷ̈ܐ܆
                    (ܘܗܳܦܟܻܝܢ ܡܼܶܢ ܒܺܝܫܽܘܬܳܐ ܠܒܰܣܺܝܡܽܘܬܳܐ ܕܺܝܠܳܟ).
                
                
                    21

                    (ܘܐܱܗܶܦܟܘ ܡܪܳܪܳܐ ܕܐܻܝ̈ܠܳܢܶܐ ܡܶܢܗܽܘܢܿ܆ 
                    ܡܳܐ ܕܶܐܬܢܨܰܒܘ ܒܰܐܪܥܳܐ ܕܺܝܠܳܟ)܆ 
                
                
                    22

                    ...
                    ܘܕܽܘܟܪܳܢܳܐ ܕܰܠܥܳܠܰܡ ܕܥܰܒܼܕܰܝ̈ܟ ܡܗܰܝ̈ܡܢܶܐ. 
                
                
                    23

                    ܣܰܓܺܝ ܗ̱ܽܘܼ ܓܶܝܪ ܐܰܬܪܳܐ ܒܦܰܪܕܰܝܣܳܟ܆ ܘܠܰܝܬ ܒܶܗ ܡܶܕܶܡ ܕܰܒܛܺܝܠ܆
                    ܐܶܠܴܐ ܟܽܠܡܶܕܶܡ ܡܠܷܐ ܦܺܐܪ̈ܶܐ. 
                
                
                    24

                    (ܫܽܘܒܚܳܐ ܠܳܟ ܐܰܠܳܗܐ ܒܽܘܣܳܡܳܐ ܕܰܒܦܰܪܕܰܝܣܳܐ ܕܰܠܥܳܠܰܡ). ܗܰܠܶܠܘܽܝܰܐ.