“Odes of Solomon: Ode 12.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/155. 1 ܡܠܼܳܢܝ ܦܶܬܓܳܡ̈ܶܐ ܕܰܫܪܳܪܳܐ܆ ܡܶܛܽܠ ܕܐܷܡܰܠܶܠ ܠܶܗ. 2 ܘܐܰܝܟ ܪܳܕܝܳܐ ܕܡܰܝܴ̈ܐ ܪܳܕܶܐ ܫܪܳܪܳܐ ܡܶܢ ܦܽܘܡܝ܆ ܘܣܶܦܘܴ̈ܬܝ ܚܰܘܺܝ ܦܺܐܪ̈ܰܘܗ̱ܝ. 3 ܘܰܐܣܓܺܝ ܒܺܝ ܝܺܕܰܥܬܶܗ܆ ܡܶܛܽܠ ܕܦܽܘܡܶܗ ܕܡܳܪܝܳܐ ܦܶܬܓܳܡܳܐ ܗ̱ܽܘܼ ܫܰܪܺܝܪܳܐ܆ ܘܬܰܪܥܳܐ ܕܢܽܘܗܪܶܗ. 4 ܘܝܰܗܒܶܗ ܡܪܰܝܡܳܐ ܠܥܴ̈ܠܡܰܘܗ̱ܝ܆ ܡܬܰܪ̈ܓܡܳܢܶܐ ܕܝܳܐܝܽܘܬܼܳܐ ܕܺܝܠܶܗ܆ ܘܰܡܬܰܢ̈ܝܳܢܶܐ ܕܬܶܫܒܽܘܚܬܶܗ܆ ܘܡܰܘ̈ܕܝܳܢܶܐ ܕܡܰܚܫܰܒܬܶܗ܆ ܘܰܡܣܰܒܪ̈ܳܢܶܐ ܕܬܰܪܥܺܝܬܶܗ܆ ܘܰܡܢܰܟ̈ܦܳܢܶܐ ܕܰܥܒܴ̈ܕܰܘܗ̱ܝ. 5 ܩܰܠܻܝܠܺܘܬܶܗ ܓܶܝܪ ܕܦܶܬܓܳܡܳܐ ܕܠܴܳܐ ܬܽܘܢܳܝܳܐ ܐܺܝܬܶܝܗܿ܆ ܘܐܱܝܟ ܬܽܘܢܳܝܶܗ ܗܳܟܰܢܳܐ ܐܶܦ ܩܰܠܺܝܠܽܘܬܶܗ ܘܚܰܪܺܝܦܽܘܬܶܗ܆ ܘܰܕܠܴܐ ܣܽܘܝܳܟܳܐ ܐܺܝܬܶܝܗܿ ܗܶܠܰܟܬܶܗ. 6 ܘܠܴܐ ܡܬܽܘܡ ܢܿܳܦܶܠ ܐܶܠܴܐ ܡܩܳܡ ܗ̱ܽܘܼ ܩܴܿܐܷܡ܆ ܘܠܴܐ ܢܷܿܕܰܥ ܡܰܚܬܶܗ ܐܳܦܠܴܐ ܐܽܘܪܚܶܗ. 7 ܐܰܝܟ ܥܒܿܳܕܶܗ ܓܶܝܪ ܗܳܟܰܢܳܐ ܣܽܘܟܳܝܶܗ܆ ܢܽܘܗܪܳܐ ܓܶܝܪ ܘܕܶܢܚܳܗܿ ܕܰܡܚܫܰܒܬܳܐ ܐܺܝܬܘܗ̱ܝ. 8 ܘܥܳܠܡܷ̈ܐ ܒܶܗ ܡܰܠܶܠܘ ܚܰܕ ܠܚܰܕ܆ ܘܰܗܘܰܘ ܒܡܶܠܬܳܐ ܗܳܢܽܘܢܿ ܕܫܰܬܺܝܩܺܝܢ ܗ̱ܘܰܘ. 9 ܘܡܶܢܶܗ ܗܘܳܬ ܪܳܚܡܽܘܬܳܐ ܘܫܰܘܝܽܘܬܳܐ܆ ܘܡܰܠܶܠܘ ܚܰܕ ܠܘܳܬ ܚܰܕ ܡܶܕܶܡ ܕܺܐܝܬ ܗ̱ܘܳܐ ܠܗܽܘܢܿ. 10 ܘܶܐܙܕܩܶܬܘ ܡܼܶܢ ܦܶܬܓܳܡܳܐ܆ ܘܺܝܕܰܥܘ ܠܗܰܘܿ ܕܰܥܒܰܕ ܐܶܢܽܘܢܿ܆ ܒܰܕ ܗܘܰܘ ܒܫܰܘܝܽܘܬܳܐ. 11 ܡܶܛܽܠ ܕܡܰܠܶܠ ܠܗܽܘܢܿ ܦܽܘܡܶܗ ܕܰܡܪܰܝܡܳܐ܆ ܘܪܶܗܼܛܰܬ ܒܺܐܝܕܶܗ ܡܦܰܫܩܳܢܽܘܬܶܗ. 12 ܡܰܫܟܢܳܐ ܓܶܝܪ ܕܦܶܬܓܳܡܳܐ ܒܰܪ ܐ̱ܢܳܫܰܐ ܗ̱ܘܼ܆ ܘܰܫܪܳܪܶܗ ܚܽܘܒܰܐ ܗ̱ܘܼ. 13 ܛܽܘܒܰܝܗܽܘܢܿ ܠܐܰܝܠܶܝܢ ܕܰܒܝܰܕ ܗܳܢܳܐ ܐܶܫܬܰܘܕܰܥܘ ܟܽܠ ܡܶܕܶܡ܆ ܘܝܺܕܰܥܘ ܠܡܳܪܝܳܐ ܒܰܫܪܳܪܶܗ. ܗܰܠܶܠܘܽܝܰܐ.