“Odes of Solomon: Ode 15.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/158.
    
        


            
                
                    1

                    ܐܰܟܙܢܳܐ ܕܫܶܡܫܳܐ ܚܰܕܽܘܬܰܐ ܗ̱ܘܼ ܠܐܰܝܠܶܝܢ ܕܒܿܳܥܶܝܢ ܝܰܘܡܶܗ܆
                    ܗܳܟܰܢܳܐ ܚܰܕܽܘܬܝ ܡܳܪܝ ܗ̱ܽܘܼ. 
                
                
                    2

                    ܡܶܛܽܠ ܕܗܽܘܝܽܘ ܫܶܡܫܝ܆ ܘܙܱ̈ܠܺܝܩܰܘܗ̱ܝ ܐܰܩܺܝܡܽܘܢܝ܆
                    ܘܢܽܘܗܪܶܗ ܫܪܳܐ ܟܽܠ ܚܶܫܽܘܟܳܐ ܡܼܶܢ ܐܰܦܱ̈ܝ. 
                
                
                    3

                    ܩܢܺܝܬ ܒܶܗ ܥܰܝܢܷ̈ܐ܆
                    ܘܰܚܙܺܝܬ ܠܝܰܘܡܶܗ ܩܰܕܺܝܫܳܐ. 
                
                
                    4

                    ܗܘܱ̈ܝ ܠܺܝ ܐܶܕܢܷ̈ܐ܆ 
                    ܘܫܶܡܿܥܶܬ ܠܰܫܪܳܪܶܗ. 
                
                
                    5

                    ܗܘܳܬ ܠܺܝ ܡܰܚܫܰܒܬܳܐ ܕܺܝܕܰܥܬܳܐ܆ 
                    ܘܐܶܬܦܱܿܢܩܶܬ ܒܺܐܝܕܶܗ. 
                
                
                    6

                    ܐܽܘܪܚܳܐ ܕܛܳܥܝܽܘܬܳܐ ܫܶܒܿܩܶܬ܆ 
                    ܘܐܶܙܷܿܠ̱ܬ ܠܘܳܬܶܗ ܘܢܶܣܿܒܶܬ ܦܽܘܪܩܳܢܐ ܡܶܢܶܗ ܕܠܴܐ ܚܣܳܡܳܐ. 
                
                
                    7

                    ܘܐܰܝܟ ܡܰܘܗܰܒܬܶܗ ܝܰܗ̱ܒܼ ܠܺܝ܆
                    ܘܐܰܝܟ ܪܰܒܼܽܘܬ ܝܳܐܝܽܘܬܶܗ ܥܰܒܕܰܢܝ. 
                
                
                    8

                    ܠܶܒܿܫܶܬ ܠܠܴܐ ܚܒܳܠܴܐ ܒܝܰܕ ܫܡܶܗ܆ 
                    ܘܫܶܠܚܶܬ ܠܰܚܒܳܠܴܐ ܒܛܰܝܒܽܘܬܶܗ. 
                
                
                    9

                    ܡܰܘܬܳܐ ܐܶܬܚܰܒܰܠ ܡܼܶܢ ܩܕܳܡ ܦܰܪܨܽܘܦܝ܆
                    ܘܰܫܝܽܘܠ ܐܶܬܒܰܛܠܱܬ ܒܡܶܠܰܬܝ. 
                
                
                    10

                    ܘܰܣܠܼܶܩ ܒܰܐܪܥܶܗ ܕܡܳܪܝܳܐ ܚܰܝܷ̈ܐ ܕܠܴܐ ܡܰܘܬܳܐ܆ 
                    ܘܐܶܬܺܝܕܰܥܘ ܠܡܰܗܰܝܡ̈ܢܰܘܗ̱ܝ܆
                    ܘܐܶܬܺܝܗܶܒܘ ܕܠܴܐ ܚܽܘܣܪܳܢܳܐ ܠܟܽܠܗܽܘܢܿ ܐܰܝܠܶܝܢ ܕܰܬܟܺܝܠܺܝܢ ܥܠܰܘܗܝ.
                    ܗܰܠܶܠܘܽܝܰܐ.