James H. Charlesworth ed., The Odes of Solomon: The Syriac Texts (Oxford: Oxford University Press, 1973)
    
        


            
                
                    1

                    ܐܰܟܙܢܳܐ ܕܰܒܥܴܿܕܶܗ ܕܐܱܟܳܪܳܐ ܩܶܩܢܳܐ ܗ̱ܝܼ܆ ܘܰܥܒܴܿܕܶܗ ܕܩܽܘܒܰܪܢܺܝܛܰܐ ܓܪܳܪܳܗܿ
                        ܕܐܷܠܦܳܐ܆ 
                    ܗܳܟܰܢܳܐ ܐܳܦ ܥܒܿܳܕܝ ܡܰܙܡܽܘܪܰܐ ܗ̱ܘܼ ܕܡܳܪܝܳܐ ܒܬܶܫܒ̈ܚܳܬܶܗ. 
                
                
                    2

                    ܐܽܘܡܳܢܽܘܬܝ ܘܦܽܘܠܚܳܢܝ ܒܬܶܫܒ̈ܚܳܬܶܗ ܐܶܢܶܝܢ܆ ܡܶܛܽܠ ܕܚܽܘܒܶܗ ܬܰܪܣܺܝ ܠـܠܶܒܝ܆ 
                    ܘܰܥܕܰܡܳܐ ܠܣܶܦܘܴ̈ܬܝ ܓ݀ܳܣܶܐ ܗ̱ܘܳܐ ܦܺܐܪ̈ܰܘܗܝ. 
                
                
                    3

                    ܚܽܘܒܝ ܓܶܝܪ ܡܳܪܝܰܐ ܗ̱ܘܼ܆ 
                    ܡܶܛܽܠܗܳܢܳܐ ܐܶܙܡܰܪ ܠܶܗ. 
                
                
                    4

                    ܡܚܰܝܰܠ ܐ̱ܢܳܐ ܓܶܝܪ ܒܬܶܫܒ̈ܚܳܬܶܗ܆ 
                    ܘܗܰܝܡܳܢܽܘܬܳܐ ܐܺܝܬ ܠܺܝ ܒܶܗ. 
                
                
                    5

                    ܐܶܦܬܰܚ ܦܽܘܡܝ܆ ܘܰܬܡܰܠܶܠܝ ܒܺܝ ܪܽܘܚܶܗ܆
                    ܬܶܫܒܽܘܚܬܶܗ ܕܡܳܪܝܳܐ ܘܝܳܐܝܽܘܬܶܗ. 
                
                
                    6

                    ܥܒܴܿܕܳܐ ܕܺܐܝ̈ܕܰܘܗ̱ܝ܆
                    ܘܦܽܘܠܚܳܢܳܐ ܕܨܶܒ̈ܥܳܬܶܗ. 
                
                
                    7

                    ܠܣܽܘܓܳܐܐ ܕܪܱ̈ܚܡܰܘܗ̱ܝ܆ 
                    ܘܰܠܥܽܘܫܢܳܐ ܕܡܶܠܬܶܗ. 
                
                
                    8

                    ܡܶܠܬܶܗ ܓܶܝܪ ܕܡܳܪܝܳܐ ܒܳܨܿܝܳܐ ܡܶܕܶܡ ܕܠܴܐ ܡܶܬܚܙܶܐ܆
                    ܘܕܳܓܠܴܐ ܡܰܚܫܰܒܬܶܗ. 
                
                
                    9

                    ܚܿܳܙܝܳܐ ܓܶܝܪ ܥܰܝܢܳܐ ܥܒܴ̈ܕܰܘܗ̱ܝ܆
                    ܘܐܷܕܢܳܐ ܫܳܡܿܥܳܐ ܠܡܰܚܫܰܒܬܶܗ. 
                
                
                    10

                    ܗܽܘܼ ܐܰܦܬܺܝ ܠܰܐܪܥܳܐ܆
                    ܘܐܱܘܬܶܒ ܡܰܝܴ̈ܐ ܒܝܰܡܳܐ. 
                
                
                    11

                    ܡܬܰܚ ܫܡܰܝܳܐ܆ 
                    ܘܐܱܬܩܶܢ ܟܰܘ̈ܟܒܶܐ. 
                
                
                    12

                    ܘܐܱܬܩܶܢ ܠܰܒܪܺܝܬܳܐ ܘܰܐܩܺܝܡܳܗܿ܆ 
                    ܘܐܷܬܬܢܺܝܚ ܗ̱ܽܘܼ ܡܼܶܢ ܥܒܴ̈ܕܰܘܗ̱ܝ. 
                
                
                    13

                    ܘܒܶܪ̈ܝܳܬܳܐ ܒܪ̈ܰܗܛܰܝܗܶܝܢ ܪ̈ܳܗܛܳܢ܆ ܘܰܥܒܴ̈ܕܰܝܗܶܝܢ ܥܳܒ̈ܕܳܢ܆ 
                    ܘܠܴܐ ܝܳܕ̈ܥܳܢ ܠܰܡܩܳܡ ܘܰܠܡܶܒܛܰܠ. 
                
                
                    14

                    ܘܚܰܝ̈ܠܰܘܳܬܳܐ ܡܶܫܬܰܥܒܕܺܝܢ ܠܡܶܠܬܶܗ.
                

                
                    15

                    ܣܺܝܡܬܳܐ ܕܢܽܘܗܪܳܐ ܫܶܡܫܰܐ ܗ̱ܘܼ܆
                    ܘܣܺܝܡܬܳܐ ܕܚܶܫܽܘܟܳܐ ܠܶܠܝܰܐ ܗ̱ܘܼ. 
                
                
                    16

                    ܥܒܼܰܕ ܕܶܝܢ ܫܶܡܫܳܐ ܠܝܰܘܡܳܐ ܕܢܶܗܘܶܐ ܢܰܗܺܝܪ܆
                    ܡܰܝܬܶܐ ܕܶܝܢ ܠܚܶܫܽܘܟܳܐ ܠܶܠܝܳܐ ܥܰܠ ܐܰܦܶܝ̈ܗܿ ܕܰܐܪܥܳܐ. 
                
                
                    17

                    ܘܩܽܘܒܳܠܗܽܘܢ ܕܚܰܕ ܡܼܶܢ ܚܰܕ܆
                    ܝܳܐܝܽܘܬܶܗ ܕܰܐܠܳܗܳܐ ܡܡܰܠܶܝܢ. 
                
                
                    18

                    ܘܠܰܝܬ ܡܶܕܶܡ ܕܰܠܒܰܪ ܡܼܶܢ ܡܳܪܝܳܐ܆
                    ܡܶܛܽܠ ܕܗܽܘܼ ܐܺܝܬܰܘܗ̱ܝ ܗ̱ܘܳܐ ܡܼܶܢ ܩܕܳܡ ܟܽܠ ܢܶܗܘܶܐ. 
                
                
                    19

                    ܘܥܳܠ̈ܡܶܐ ܒܡܶܠܬܶܗ ܗܘܰܘ܆
                    ܘܰܒܡܰܚܫܰܒܬܳܐ ܕܠܶܒܶܗ. 
                
                
                    20

                    ܬܶܫܒܽܘܚܬܳܐ ܘܐܺܝܩܳܪܳܐ ܠܰܫܡܶܗ. ܗܰܠܶܠܘܽܝܰܐ.