“Odes of Solomon: Ode 23.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/166.
    
        


            
                
                    1

                    ܚܰܕܽܘܬܳܐ ܕܩܰܕܺܝ̈ܫܶܐ ܗ̱ܝܼ܆ 
                    ܘܡܰܢܽܘ ܢܶܠܒܫܺܝܗܿ ܐܶܠܴܐ ܐܶܢ ܗܼܶܢܽܘܢ ܒܰܠܚܽܘܕ. 
                
                
                    2

                    ܛܰܝܒܽܘܬܳܐ ܕܓܰܒܰܝܴ̈ܐ ܗ̱ܝܼ܆ 
                    ܘܡܰܢܽܘ ܢܶܣܒܺܝܗܿ ܐܠܴܐ ܐܶܢ ܗܿܳܢܽܘܢܿ ܕܰܬܟܺܝܠܺܝܢ ܥܠܶܝܗܿ ܡܼܶܢ ܒܪܺܝܫܺܝܬ. 
                
                
                    3

                    ܚܽܘܒܳܐ ܕܰܓܒܰܝܱ̈ܐ ܗ̱ܘ܆ 
                    ܘܡܰܢܽܘ ܢܶܠܒܫܺܝܘܗ̱ܝ ܐܶܠܴܐ ܐܶܢ ܗܿܳܢܽܘܢܿ ܕܰܩܢܰܐܘܽܗ̱ܝ ܡܼܶܢ ܒܪܺܝܫܺܝܬ. 
                
                
                    4

                    ܗܰܠܶܟܘ ܒܺܝܕܰܥܬܶܗ ܕܡܳܪܝܳܐ܆ ܘܬܶܕܥܽܘܢ ܛܰܝܒܽܘܬܶܗ ܕܡܳܪܝܳܐ ܕܠܴܐ ܚܣܳܡܳܐ܆ 
                    ܘܠܰܕܝܳܨܶܗ ܘܰܠܫܽܘܡܠܳܝܳܐ ܕܝܺܕܰܥܬܶܗ. 
                
                
                    5

                    ܘܡܰܚܫܰܒܬܶܗ ܗܘܼܳܬ ܐܰܝܟ ܐܶܓܰܪܬܳܐ܆ 
                    ܘܨܶܒܝܳܢܳܗܿ ܢܚܶܬ ܡܼܶܢ ܡܪܰܘܡܳܐ. 
                
                
                    6

                    ܘܐܶܫܬܰܕܰܪ ܐܰܝܟ ܓܶܐܪܳܐ ܡܼܶܢ ܩܶܫܬܳܐ܆
                    ܕܡܶܫܬܕܶܐ ܒܰܩܛܺܝܪܳܐ. 
                
                
                    7

                    ܘܰܪ̈ܗܶܛܝ ܥܰܠ ܐܶܓܰܪܬܳܐ ܐܺܝ̈ܕܰܝܳܐ ܣܰܓܺܝ̈ܳܐܬܳܐ܆ 
                    ܠܡܶܚܛܰܦ ܘܰܠܡܶܣܰܒ ܘܰܠܡܶܩܪܶܝܗܿ. 
                
                
                    8

                    ܘܥܶܪܩ݀ܰܬ ܡܼܶܢ ܨܶܒ̈ܥܳܬܗܘܽܢ܆ 
                    ܘܰܕܚܶܠܘ ܡܶܢܳܗܿ ܘܡܼܶܢ ܚܰܬܡܳܐ ܕܰܥܠܶܝܗܿ. 
                
                
                    9

                    ܡܶܛܽܠ ܕܠܴܐ ܫܰܠܺܝܛ ܗ̱ܘܳܐ ܠܗܽܘܢܿ ܠܡܶܫܪܳܐ ܚܰܬܡܳܗܿ܆ 
                    ܚܰܝܠܴܐ ܓܶܝܪ ܕܐܺܝܬ ܗ̱ܘܳܐ ܥܰܠ ܚܰܬܡܳܐ ܡܝܰܬܰܪ ܗ̱ܘܳܐ ܡܶܢܗܽܘܢܿ. 
                
                
                    10

                    ܐܶܙܰܠܘ ܕܶܝܢ ܒܳܬܪܳܗܿ ܕܶܐܓܰܪܬܳܐ ܗܿܳܢܽܘܢܿ ܕܰܚܙܰܐܘܽܗܿ܆ ܕܢܶܕܥܽܘܢ ܐܰܝܟܳܐ ܫܿܳܪܝܳܐ܆
                        ܘܰܕܡܰܢܽܘ ܩܿܳܪܶܐ ܠܳܗܿ܆ 
                    ܘܡܰܢܽܘ ܫܿܳܡܰܥ ܠܳܗܿ. 
                
                
                    11

                    ܓܺܝܓܠܴܐ ܕܶܝܢ ܩܰܒܶܠܬܳܗܿ܆ 
                    ܘܐܳܬܝܳܐ ܗ̱ܘܳܬ ܥܠܶܝܗܿ. 
                
                
                    12

                    ܘܐܳܬܿܳܐ ܐܺܝܬ ܗ̱ܘܳܐ ܥܰܡܳܗܿ܆
                    ܕܡܰܠܟܽܘܬܳܐ ܘܕܰܡܕܰܒܪܳܢܘܽܬܳܐ. 
                
                
                    13

                    ܘܟܽܠܡܶܕܶܡ ܕܰܡܙܺܝܥ ܗ̱ܘܳܐ ܠܓܺܝܓܠܴܐ܆
                    ܚܴܿܨܕܳܐ ܗ̱ܘܳܬܿ ܠܶܗ ܘܰܡܦܱܿܣܩܶܐ ܗ̱ܘܳܬ ܠܶܗ. 
                
                
                    14

                    ܘܣܽܘܓܳܐܐ ܚܶܡܼܠ݀ܰܬ ܕܣܰܩܽܘܒ̈ܠܶܐ ܗ̱ܘܰܘ܆ 
                    ܘܛܰܡܼܪܰܬܿ ܥܼܶܩܪܰܬܿ ܥܳܒܷ̈ܐ ܣܰܓܺܝܷ̈ܐܐ܆ 
                
                
                    15

                    ܘܥܶܒܼܕܰܬܿ ܐܽܘܪܚܳܐ ܦܬܺܝܬܳܐ. 
                    ... 
                
                
                    16

                    ܢܚܼܶܬ ܪܺܝܫܳܐ ܠܘܳܬ ܪ̈ܶܓܠܶܐ܆ ܡܶܛܽܠ ܕܰܥܕܰܡܳܐ ܠܪ̈ܶܓܠܶܐ ܪܶܗܼܛ݀ܰܬ ܓܺܝܓܠܴܐ܆ 
                    ܘܡܶܕܶܡ ܕܐܳܬܷܿܐ ܗ̱ܘܳܐ ܥܠܶܝܗܿ. 
                
                
                    17

                    ܐܶܓܰܪܬܳܐ ܗܘܳܬ ܕܦܽܘܩܕܳܢܳܐ܆ 
                    ܘܡܶܛܽܠ ܕܶܐܬܟܰܢܰܫܘ ܐܰܟܚܕܳܐ ܟܽܠܗܽܘܢܿ ܐܰܬܪ̈ܰܘܳܬܳܐ. 
                
                
                    18

                    ܘܐܶܬܚܙܺܝ ܒܪܺܝܫܳܗܿ ܪܺܝܫܳܐ ܕܶܐܬܓܠܺܝ܆
                    ܘܰܒܪܳܐ ܕܰܫܪܳܪܳܐ ܡܼܶܢ ܐܰܒܳܐ ܡܪܰܝܡܳܐ. 
                
                
                    19

                    ܘܝܺܪܶܬ ܟܽܠܡܶܕܶܡ ܘܰܢܣܰܒ܆ 
                    ܘܐܶܬܒܰܛܠܱܬ ܕܶܝܢ ܡܰܚܫܰܒܬܳܐ ܕܣܰܓܺܝ̈ܐܷܐ. 
                
                
                    20

                    ܐܰܡܪܰܚܘ ܕܶܝܢ ܟܽܠܗܘܽܢܿ ܡܰܣܛܝܴ̈ܢܶܐ ܘܰܥܪܰܩܘ܆ 
                    ܘܰܕܥܶܟܘ ܐܰܝܿܠܶܝܢ ܕܪܳܕܦܺܝܢ ܘܐܶܬܥܰܛܺܝܘ. 
                
                
                    21

                    ܘܰܗܘܳܬ ܕܶܝܢ ܐܶܓܰܪܬܳܐ ܦܶܢܩܺܝܬܳܐ ܪܰܒܬܳܐ܆ 
                    ܕܰܟܬܺܝܒܳܐ ܒܨܶܒܥܶܗ ܕܰܐܠܳܗܳܐ ܡܫܰܡܠܝܳܐܻܝܬ. 
                
                
                    22

                    ܘܰܫܡܳܐ ܕܰܐܒܳܐ ܥܠܶܝܗܿ܆ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ܆ 
                    ܠܰܡܡܰܠܳܟܽܘ ܠܥܳܠܰܡ ܥܳܠܡܺܝܢ. ܗܰܠܶܠܘܽܝܰܐ.