“Odes of Solomon: Ode 25.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/168.
    
        


            
                
                    1

                    ܐܶܬܦ݀ܰܠܛܶܬ ܡܼܶܢ ܐܰܣܽܘܪ̈ܰܝ܆ 
                    ܘܰܠܘܳܬܳܟ ܥܶܪܩܷܿܬ ܐܰܠܳܗܝ. 
                
                
                    2

                    (ܡܶܛܽܠ ܕܰܗܘܼܰܝܬ ܝܰܡܺܝܢܳܐ ܕܦܽܘܪܩܳܢܳܐ܆)
                    ܘܰܡܥܰܕܪܳܢܳܐ ܕܺܝܠܝ. 
                
                
                    3

                    ܟܠܼܰܝܬ ܠܐܰܝܠܶܝܢ ܕܩܳܝܡܺܝܢ ܠܘܽܩܒܰܠܝ܆ 
                    ܘܬܽܘܒ (ܠܴܐ ܐܶܬܚܙܺܝܘ). 
                
                
                    4

                    ܡܶܛܽܠ ܕܦܰܪܨܘܽܦܳܟ ܥܰܡܝ ܗ̱ܘܳܐ܆
                    ܗܰܘܿ ܕܰܦܼܪܰܩ ܗ̱ܘܳܐ ܠܻܝ ܒܛܰܝܒܘܽܬܳܟ. 
                
                
                    5

                    ܐܶܬܿܬܫܺܝܛܶܬ ܕܶܝܢ ܘܐܷܣܿܬܠܺܝܬ ܒܥܰܝ̈ܢܰܝ ܣܰܓܺܝ̈ܐܷܐ܆ 
                    ܘܰܗܘܺܝܿܬ ܒܥܰܝܢܰܝ̈ܗܘܽܢܿ ܐܰܝܟ ܐܰܒܳܪܳܐ. 
                
                
                    6

                    ܘܰܗܘܳܐ ܠܺܝ ܥܽܘܫܢܳܐ ܡܼܶܢ ܠܘܳܬܳܟ܆
                    ܘܥܽܘܕܪܳܢܳܐ. 
                
                
                    7

                    ܫܪܳܓܳܐ ܣܳܡܼܬ ܠܺܝ ܡܼܶܢ ܝܰܡܺܝܢܝ ܘܡܼܶܢ ܣܶܡܳܠܝ܆ 
                    ܕܠܴܐ ܢܶܗܘܶܐ ܒܺܝ ܡܶܕܶܡ ܕܠܴܐ ܢܽܘܗܪܳܐ. 
                
                
                    8

                    ܘܐܶܬܿܟܰܣܺܝܬ ܒܬܰܟܣܺܝܬܳܐ ܕܪܽܘܚܳܟ܆
                    ܘܰܐܪܺܝܡܶܬ ܡܢܝ ܠܒܽܘ̈ܫܰܝ ܕܡܶܫܟܳܐ. 
                
                
                    9

                    ܡܶܛܽܠ ܕܝܰܡܺܝܢܳܟ ܐܰܪܺܝܡܬܳܢܝ܆ 
                    ܘܰܐܥܒܰܪܬ ܟܽܘܪܗܳܢܳܐ ܡܶܢܝ. 
                
                
                    10

                    ܘܰܗܘܺܝܿܬ ܚܰܝܠܬܳܢܳܐ ܒܰܫܪܳܪܳܟ܆ 
                    ܘܚܰܣܝܳܐ ܒܙܰܕܺܝܩܽܘܬܳܟ. 
                
                
                    11

                    (ܘܰܕܚܶܠܼܘ ܡܶܢܝ ܟܽܠܗܽܘܢܿ ܕܠܽܘܩܒܰܠܝ)܆
                    ܘܰܗܘܺܝܿܬ ܕܡܳܪܝܳܐ ܒܰܫܡܶܗ ܕܡܳܪܝܳܐ. 
                
                
                    12

                    ܘܐܷܙܕܰܕܩܰܬ ܒܒܰܣܺܝܡܽܘܬܶܗ܆
                    ܘܰܢܝܳܚܶܗ ܠܥܳܠܰܡܥܳܠܡܺܝܢ ܗ̱ܽܘܼ.
                    ܗܰܠܶܠܘܽܝܰܐ.