“Odes of Solomon: Ode 31.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/174. 1 ܐܶܬܦܫܰܪܘ ܡܼܶܢ ܩܕܳܡ ܡܳܪܝܳܐ ܬܗܽܘ̈ܡܶܐ܆ ܘܶܐܬܩܰܒܰܠ ܚܶܫܽܘܟܳܐ ܡܼܶܢ ܚܶܙܘܶܗ. 2 ܛܥ݀ܳܬ ܛܳܥܝܽܘܬܳܐ ܘܐܷܒܼܕܰܬܿ ܡܶܢܶܗ܆ ܘܫܺܝܛܽܘܬܳܐ (ܢܣܰܒܬܳܗܿ ܠܴܐ ܗܶܠܰܟܬܳܐ܆ ܘܛܶܒܼܥܰܬ) ܡܼܶܢ ܫܪܳܪܶܗ ܕܡܳܪܝܳܐ. 3 ܦܽܘܡܶܗ ܦܬܰܚ ܘܡܰܠܶܠ ܛܰܝܒܽܘܬܳܐ ܘܚܰܕܽܘܬܳܐ܆ ܘܡܰܠܶܠ ܬܶܫܒܽܘܚܬܳܐ ܚܕܰܬܳܐ ܠܰܫܡܶܗ. 4 ܘܰܐܪܺܝܡ ܩܳܠܶܗ ܠܘܳܬ ܡܪܰܝܡܳܐ܆ ܘܩܰܪܶܒ ܠܶܗ ܒܢܰܝܴ̈ܐ ܗܳܢܽܘܢܿ ܕܒܺܐܝܕܶܗ ܗܘܰܘ. 5 ܘܐܶܙܕܰܕܰܩ ܦܰܪܨܽܘܦܶܗ܆ ܡܶܛܽܠ ܕܗܳܟܰܢܳܐ ܝܰܗ̱ܒ ܠܶܗ ܐܰܒܽܘܗ̱ܝ ܩܰܕܺܝܫܳܐ. 6 ܦܽܘܩܘ ܗܳܢܽܘܢܿ ܕܶܐܬܐܶܠܶܨܘ܆ ܘܩܰܒܶܠܘ ܚܰܕܽܘܬܳܐ. 7 ܘܺܝܪܰܬܘ ܢܰܦܫܟܽܘܢܿ ܒܝܰܕ ܛܰܝܒܽܘܬܳܐ܆ ܘܣܰܒܘ ܠܟܽܘܢܿ ܚܰܝܷ̈ܐ ܕܠܴܐ ܡܰܘܬܳܐ. 8 ܘܚܰܝܒܽܘܢܝ ܟܰܕ ܩܳܡܷܿܬ܆ ܠܗܱܿܘ ܕܠܴܐ ܐܻܝܬܰܝ ܗ̱ܿܘܺܝܬ ܡܚܰܝܒܳܐ. 9 ܘܦܰܠܶܓܘ ܒܶܙܰܬܝ܆ ܟܰܕ ܡܶܕܶܡ ܠܴܐ ܡܶܬܬܚܺܝܒ ܠܗܽܘܢܿ. 10 ܐܶܢܳܐ ܕܶܝܢ ܣܰܝܿܒܪܶܬ ܘܫܶܬܩܿܶܬ ܘܰܫܿܠܺܝܬ܆ ܐܰܝܟ ܕܠܴܐ ܐܶܬܬܙܺܝܥ ܡܶܢܗܽܘܢܿ. 11 ܐܶܠܴܐ ܩܳܡܷܿܬ ܕܠܴܐ ܙܰܘܥܬܳܐ ܐܰܝܟ ܟܺܐܦܳܐ ܫܰܪܺܝܪܬܳܐ܆ ܗ݀ܳܝ ܕܡܶܬܢܰܓܕܳܐ ܡܼܶܢ ܟܺܐܦܷ̈ܐ ܓ̈ܰܠܠܶܐ ܘܰܡܣܰܝܒܪܳܐ. 12 ܘܣܶܒܿܠܶܬ ܡܰܪܺܝܪܽܘܬܗܽܘܢܿ ܡܶܛܽܠ ܡܰܟܺܝܟܽܘܬܳܐ܆ ܡܶܛܽܠ ܕܶܐܦܪܽܘܩ ܠܥܰܡܝ ܘܰܐܪܬܺܝܘܗ̱ܝ. 13 ܘܰܕܠܴܐ ܐܷ݀ܣܰܪܶܩ ܠܫܽܘܘ̈ܕܳܝܶܐ ܕܰܠܘܳܬ ܪ̈ܺܝܫܰܝ ܐܰܒܴ̈ܗܳܬܳܐ܆ ܗܳܢܽܘܢܿ ܕܶܐܫܬܰܘܕܝܿܺܬ ܠܦܽܘܪܩܳܢܳܐ ܕܙܰܪܥܗܽܘܢܿ. ܗܰܠܶܠܘܽܝܰܐ.