“Odes of Solomon: Ode 33.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/176.
    
        


            
                
                    1

                    ܪܶܗܼܛܰܬ ܕܶܝܢ ܬܽܘܒ ܛܰܝܒܽܘܬܳܐ ܘܫܶܒܼܩ݀ܰܬ ܠܰܚܒܴܿܠܴܐ܆ 
                    ܘܢܶܚܼܬܰܬ ܒܶܗ ܐܰܝܟ ܕܰܬܣܰܪܩܺܝܘܗ̱ܝ. 
                
                
                    2

                    ܘܰܐܘܒܶܕ ܠܰܐܒܕܳܢܳܐ ܡܼܶܢ ܩܕܳܡܰܘܗ̱ܝ܆
                    ܘܚܰܒܶܠ ܟܽܠܶܗ ܬܽܘܩܢܶܗ. 
                
                
                    3

                    ܘܩܳܡ ܥܰܠ ܪܺܝܫܳܐ ܪܳܡܴܿܐ ܘܰܫܒܼܰܩ ܩܳܠܶܗ܆
                    ܡܼܶܢ ܣܰܘ̈ܦܶܝܗܿ ܕܰܐܪܥܳܐ ܘܰܥܕܰܡܳܐ ܠܣܰܘ̈ܦܶܝܗܿ. 
                
                
                    4

                    ܘܰܢܓܰܕ ܠܘܳܬܶܗ ܠܟܽܠ ܐܰܝܠܶܝܢ ܕܶܐܫܬܡܰܥܘ ܠܶܗ܆
                    ܘܠܴܐ ܐܶܬܚܙܺܝ ܐܰܝܟ ܒܺܝܫܳܐ. 
                
                
                    5

                    ܐܶܠܴܐ ܩܳܡܼ݀ܰܬ ܒܬܽܘܠܬܳܐ ܓܡܺܝܪܬܳܐ܆
                    ܕܡܰܟܪܙܳܐ ܘܩܿܳܪܝܳܐ ܘܳܐܡܿܪܳܐ. 
                
                
                    6

                    ܒܢܱ̈ܝ ܐ̱ܢܳܫܳܐ ܐܶܬܦܢܰܘ܆ 
                    ܘܰܒܢܴ̈ܬܗܽܘܢܿ ܬܳܝܶܝ̈ܢ. 
                
                
                    7

                    ܘܰܫܒܽܘܩܘ ܐܽܘܪ̈ܚܳܬܶܗ ܕܰܚܒܴܠܴܐ ܗܳܢܳܐ܆ 
                    ܘܶܐܬܩܰܪܰܒܘ ܠܺܝ. 
                
                
                    8

                    ܘܶܐ݀ܥܽܘܠ ܒܟܽܘܢܿ܆ ܘܰܐܦܿܶܩܩܟܽܘܢ ܡܼܶܢ ܐܰܒܕܳܢܳܐ܆
                    ܘܶܐܚܰܟܶܡܟܽܘܢ ܒܽܐܘܪ̈ܚܳܬܳܐ ܕܰܫܪܳܪܳܐ. 
                
                
                    9

                    ܠܴܐ ܬܶܬܚܰܒܠܽܘܢ܆ 
                    ܐܳܦ ܠܴܐ ܬܺܐܒܕܽܘܢ. 
                
                
                    10

                    ܫܽܘܡܥܽܘܢܝ ܘܶܐܬܦܰܪܩܘ܆
                    ܛܰܝܒܽܘܬܶܗ ܓܶܝܪ ܕܰܐܠܳܗܳܐ ܡܡܰܠܠܴܐ ܐ̱ܢܳܐ ܒܟܽܘܢ. 
                
                
                    11

                    ܘܒܺܐܝ̈ܕܰܝ ܬܶܬܦܰܪܩܽܘܢ ܘܬܶܗܘܽܘܢ ܛܽܘܒܳܢܷ̈ܐ܆ 
                    ܕܰܝܿܢܳܟܽܘܢ ܐܶܢܳܐ ܐܺܝܬܰܝ. 
                
                
                    12

                    ܘܗܳܢܽܘܢ ܕܠܰܒܫܽܘܢܳܢܝ ܠܴܐ ܢܶܬܛܰܠܡܽܘܢ܆ 
                    ܐܶܠܴܳܐ ܢܶܩܢܽܘܢ ܒܥܳܠܡܳܐ ܚܰܕ̱ܬܳܐ ܠܴܳܐ ܚܒܳܠܴܐ. 
                
                
                    13

                    ܓܒܰܝ̈ ܗܰܠܶܟܘ ܒܺܝ܆
                    ܘܐܽܘܪ̈ܚܳܬܝ ܐܰܘܼܕܰܥ ܠܗܳܢܽܘܢܿ ܕܒܳܥܶܝܢ ܠܺܝ܆
                    ܘܐܰܬܟܶܠ ܐܶܢܽܘܢܿ ܥܰܠ ܫܶܡܝ.
                    ܗܰܠܶܠܘܽܝܰܐ.