“Odes of Solomon: Ode 36.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/179.
    
        


            
                
                    1

                    ܐܶܬܬܢܺܝܚ݀ܰܬ ܥܰܠ ܪܽܘܚܶܗ ܕܡܳܪܝܳܐ܆ 
                    ܘܰܐܪܺܝܡܬܳܢܝ ܠܪܰܘܡܳܐ. 
                
                
                    2

                    ܘܰܐܩܺܝܡܬܳܢܝ ܥܰܠ ܪ̈ܶܓܠܰܝ ܒܪܰܘܡܶܗ ܕܡܳܪܝܳܐ܆ 
                    ܩܕܳܡ ܫܽܘܡܠܳܝܶܗ ܘܬܶܫܒܽܘܚܬܶܗ܆
                    ܟܰܕ ܡܫܰܒܰܚ ܐ̱ܢܳܐ ܒܬܽܘܩܳܢܳܐ ܕܰܙܡܺܝܪ̈ܳܬܶܗ. 
                

                
                    3
                    ܝܺܠܶܕܬܳܢܝ ܡܼܶܢ ܩܕܳܡ ܐܰܦܰܘܗ̱̈ܝ ܕܡܳܪܝܳܐ܆ 
                    ܘܟܰܕ ܒܰܪܢܳܫܳܐ ܐܺܝܬܰܝ܆
                    ܐܶܫܿܬܰܡܗܶܬ ܢܰܗܺܝܪܳܐ ܒܪܶܗ ܕܰܐܠܳܗܳܐ.
                

                
                    4

                    ܟܰܕ ܡܫܰܒܰܚ ܐ̱ܢܳܐ ܒܰܡܫܰܒ̈ܚܶܐ܆
                    ܘܪܰܒ ܐ̱ܢܳܐ ܒܪܰܘܪ̈ܒܳܢܶܐ. 
                
                
                    5

                    ܐܰܝܟ ܪܰܒܽܘܬܶܗ ܓܶܝܪ ܕܰܡܪܰܝܡܳܐ ܗܳܟܰܢܳܐ ܥܒܰܕܬܰܢܝ܆
                    ܘܐܰܝܟ ܚܽܘܕܳܬܶܗ ܚܰܕܬܰܢܝ. 
                
                
                    6

                    ܘܡܰܫܚܰܢܝ ܡܼܶܢ ܡܫܰܡܠܝܽܘܬܶܗ܆ 
                    ܘܰܗܿܘܺܝܬ ܚܰܕ ܡܼܶܢ ܩܰܪ̈ܺܝܒܰܘܗ̱ܝ. 
                
                
                    7

                    ܘܶܐܬܦܰܬܰܚ ܦܽܘܡܝ ܐܰܝܟ ܥܢܳܢܳܐ ܕܛܰܠܴܐ܆ 
                    ܘܰܓܣܳܐ ܠܶܒܝ ܓܣܺܝܬܳܐ ܕܙܰܕܺܝܩܽܘܬܳܐ. 
                
                
                    8

                    ܘܰܗܘܳܐ ܩܽܘܪܳܒܝ ܒܰܫܠܳܡܳܐ܆
                    ܘܶܐܫܬܰܪܪܰܬ ܒܪܽܘܚܳܐ ܕܰܡܕܰܒܪܳܢܽܘܬܳܐ.
                    ܗܰܠܶܠܘܽܝܰܐ.