“Odes of Solomon: Ode 38.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/181. 1 ܣܷܿܠܩܶܬ ܠܢܽܘܗܪܳܐ ܕܰܫܪܳܪܳܐ ܐܰܝܟ ܕܰܠܡܰܪܟܰܒܬܳܐ܆ ܘܕܰܒܼܪܰܢܝ ܫܪܳܪܳܐ ܘܰܐܝܬܝܰܢܝ. 2 ܘܰܐܥܒܼܪܰܢܝ ܦܰܚ̈ܬܶܐ ܘܣܶܕܩ̈ܶܐ܆ ܘܡܼܶܢ ܫܩܺܝ̈ܦܶܐ ܘܓܰܠ̈ܠܶܐ ܦܰܪܩܰܢܝ. 3 ܘܰܗܘܳܐ ܠܺܝ ܠܡܺܐܢܳܐ ܕܦܽܘܪܩܳܢܳܐ܆ ܘܣܳܡܰܢܝ ܥܰܠ ܕܰܪܓܳܐ ܕܚܰܝܷ̈ܐ ܕܠܴܐ ܡܰܘܬܳܐ. 4 ܘܐܷܙܰܠ ܥܰܡܝ ܘܰܐܢܺܝܚ ܠܺܝ ܘܠܴܐ ܫܰܒܩܰܢܝ ܕܶܐܛܥܶܐ܆ ܡܶܛܽܠ ܕܰܫܪܳܪܳܐ ܐܺܝܬܰܘܗ̱ܝ ܗ̱ܘܳܐ ܘܗܼܽܘܝܽܘ. 5 ܘܠܴܳܐ ܗܘܳܐ ܠܺܝ ܩܺܝܢܕܽܘܢܽܘܣ ܕܥܰܡܶܗ ܡܗܰܠܶܟ ܗ̱ܘܺܝܿܬ܆ ܘܠܴܐ ܛܥܺܝܬ ܒܡܶܕܶܡ ܡܶܛܽܠ ܕܶܐܫܿܬܰܡܥܶܬ ܠܶܗ. 6 ܥܳܪܩܳܐ ܗ̱ܘܳܬ ܓܶܝܪ ܡܶܢܶܗ ܛܳܥܝܽܘܬܳܐ܆ ܘܠܴܳܐ ܐܳܪܥܳܐ ܗ̱ܘܳܬܿ ܠܶܗ. 7 ܫܪܳܪܳܐ ܕܶܝܢ ܐܴ݀ܙܶܠ ܗ̱ܘܶܐ ܒܐܽܘܪܚܳܐ ܬܪܺܝܨܬܳܐ܆ ܘܟܽܠܡܶܕܶܡ ܕܠܴܐ ܝܿܳܕܰܥ ܗ̱ܘܺܝܿܬ ܠܶܗ ܡܚܰܘܶܐ ܗ̱ܘܳܐ ܠܺܝ. 8 ܠܟܽܠܗܽܘܢܿ ܣܰܡ̱̈ܡܳܢܶܐ ܕܛܳܥܝܘܽܬܳܐ܆ ܘܰܠܢܶܓ̈ܕܶܐ ܗܳܢܽܘܢܿ ܕܰܣܒܺܝܪܺܝܢ ܕܚܰܠܝܽܘܬܳܐ ܗ̱ܝܼ ܕܡܰܘܬܳܐ. 9 ܘܠܰܡܚܰܒܠܳܢܶܗ ܕܰܚܒܴܿܠܴܐ܆ ܚܿܳܙܶܐ ܗ̱ܘܺܝܿܬ ܟܰܕ ܡܶܨܛܰܒܬܳܐ ܗ̱ܘܳܬ ܟܰܠܬܳܐ ܕܰܡܚܰܒܠܴܐ܆ ܘܚܰܬܢܳܐ ܕܰܡܚܰܒܶܠ ܘܡܶܬܚܰܒܰܠ. 10 ܘܫܿܶܐܠܶܬ ܠܰܫܪܳܪܳܐ ܕܡܰܢ ܐܶܢܽܘܢܿ ܗܳܠܶܝܢ܆ ܘܐܷܡܰܪ ܠܺܝ ܗܴܿܢܰܘ ܡܰܛܥܝܳܢܳܐ ܘܛܳܥܝܽܘܬܳܐ. 11 ܘܡܶܬܕܰܡܶܝܢ ܒܚܰܒܺܝܒܳܐ ܘܰܒܟܰܠܬܶܗ܆ ܘܡܰܛܥܶܝܢ ܠܥܳܠܡܳܐ ܘܰܡܚܰܒܠܺܝܢ ܠܶܗ. 12 ܘܩܳܪܶܝܢ ܠܣܰܓܺܝ̈ܐܶܐ ܠܡܶܫܬܽܘܬܳܐ܆ ܘܝܳܗܒܺܝܢ ܠܗܽܘܢܿ ܕܢܶܫܬܽܘܢ ܚܰܡܪܳܐ ܕܪܰܘܳܝܽܘܬܗܽܘܢܿ. 13 ܘܰܡܬܺܝܒܺܝܢ ܚܶܟ̈ܡܳܬܗܽܘܢܿ ܘܡܰܕܥܰܝ̈ܗܽܘܢܿ܆ ܘܥܿܳܒܕܺܝܢ ܠܗܽܘܢܿ ܕܠܴܐ ܪܶܥܝܳܢܳܐ. 14 ܘܗܳܝܕܶܝܢ ܫܳܒܩܺܝܢ ܠܗܽܘܢܿ܆ ܘܗܳܢܽܘܢܿ ܕܳܝܢ ܗܳܘܶܝܢ ܡܶܬܟܰܪܟܺܝܢ ܟܰܕ ܦܳܩܪܺܝܢ ܘܰܡܚܰܒܠܺܝܢ. 15 ܟܰܕ ܠܰܝܬ ܒܗܽܘܢܿ ܠܶܒܳܐ܆ ܐܳܦ ܠܴܐ ܓܶܝܪ ܒܳܥܶܝܢ ܠܶܗ. 16 (15) ܘܶܐܬܚܰܟܿܡܶܬ ܐܶܢܳܐ ܕܠܴܐ ܢܶܦܿܠܶܬ ܒܺܐܝ̈ܕܰܝ ܡܰܛܥ̈ܝܳܢܶܐ܆ ܘܰܚܕܺܝܬ ܠܢܰܦܫܝ ܡܶܛܽܠ ܕܐܷܙܰܠ ܗ̱ܘܳܐ ܥܰܡܝ ܫܪܳܪܳܐ. 17 (16) ܘܶܐܫܬܰܪܪܶܬ ܕܶܝܢ ܘܰܚܝܝܼܺܬ ܘܶܐܬܦܰܪܩܶܬ܆ ܘܶܐܬܬܣܺܝ̈ܡܝ ܫܶܬܶܐܣ̈ܰܝ ܥܰܠ ܐܺܝܕܶܗ ܕܡܳܪܝܳܐ܆ 18 (17) ܡܶܛܽܠ ܕܗܺܘ ܢܰܨܒܰܢܝ. ܗܽܘܼ ܓܶܝܪ ܣܼܳܡ ܥܶܩܳܪܳܐ܆ ܘܰܐܫܩܝܶܗ ܘܰܐܬܩܢܶܗ ܘܒܰܪܟܶܗ܆ 19 (18) ܦܺܐܪ̈ܰܘܗ̱ܝ ܠܥܳܠܡܺܝܢ ܗܴܿܘܶܝܢ. (ܐܰܥܡܶܩ ܘܰܣܠܶܩ ܘܰܐܦܬܺܝ)܆ ܘܰܡܠܼܳܐ ܘܶܐܬܪܰܘܪܰܒ. 20 (19) ܘܶܐܫܬܰܒܰܚ ܡܳܪܝܳܐ ܒܰܠܚܽܘܕܰܘܗ̱ܝ܆ ܒܢܶܨܒܬܶܗ ܘܰܒܦܽܘܠܚܳܢܶܗ. 21 (20) ܒܝܰܨܺܝܦܽܘܬܶܗ ܘܰܒܒܽܘܪܟܬܳܐ ܕܣܶܦ̈ܘܳܬܶܗ܆ ܒܢܼܶܨܒܬܳܐ ܝܳܐܺܝܬܳܐ ܕܝܰܡܺܝܢܶܗ. 22 (21) ܘܒܰܫܟܺܝܚܽܘܬܳܐ ܕܢܶܨܒܬܶܗ܆ ܘܰܒܡܰܕܥܳܐ ܕܬܰܪܥܺܝܬܶܗ. ܗܰܠܶܠܘܽܝܰܐ.