James H. Charlesworth ed., The Odes of Solomon: The Syriac Texts (Oxford: Oxford University Press, 1973)
    
        


            
                
                    1

                    ܢܰܗܪ̈ܰܘܳܬܳܐ ܥܰܫܺܝ̈ܢܶܐ ܚܰܝܠܶܗ ܕܡܳܪܝܳܐ܆ 
                    ܕܠܰܐܝܠܶܢ ܕܰܡܒܰܣܪܺܝܢ ܥܠܰܘܗ̱ܝ ܡܰܝܬܶܝܢ ܒܳܬܰܪ ܪܺܝܫܗܽܘܢܿ. 
                
                
                    2

                    ܘܰܡܥܰܪܩܿܠܺܝܢ ܗܰܠܟܳܬܗ̈ܘܽܢܿ܆
                    ܘܡܰܣܪܚܺܝܢ ܡܰܥܒܪ̈ܳܬܗܽܘܢܿ. 
                
                
                    3

                    ܘܚܴܿܛܦܺܝܢ ܦܰܓܪ̈ܰܝܗܽܘܢܿ܆
                    ܘܰܡܚܰܒܠܺܝܢ ܢܰܦ̈ܫܳܬܗܽܘܢܿ. 
                
                
                    4

                    ܚܰܪܺܝܦܺܝܢ ܐܶܢܽܘܢܿ ܓܶܝܪ ܡܼܶܢ ܒܰܪ̈ܩܶܐ܆
                    ܘܩܰܠܺܝܠܺܝܢ. 
                
                
                    5

                    ܘܗܳܢܽܘܢܿ ܕܥܿܳܒܪܺܝܢ ܠܗܽܘܢܿ ܒܗܰܝܡܳܢܽܘܬܳܐ܆ 
                    ܠܴܐ ܢܶܬܬܙܺܝܥܽܘܢ. 
                
                
                    6

                    ܘܗܳܢܽܘܢ ܕܰܡܗܰܠܟܺܝܢ ܒܗܽܘܢܿ ܕܠܴܐ ܡܽܘܡܳܐ܆ 
                    ܠܴܐ ܢܶܬܕܰܠܚܽܘܢ. 
                
                
                    7

                    ܡܶܛܽܠ ܕܐܴܬܴܿܐ ܒܗܽܘܢܿ ܡܳܪܝܰܐ ܗ̱ܘ܆
                    ܘܐܴܬܴܿܐ ܗܳܘܝܳܐ ܐܽܘܪܚܳܐ ܕܗܳܢܽܘܢܿ ܕܥܿܳܒܪܺܝܢ ܒܰܫܡܶܗ ܕܡܳܪܝܳܐ. 
                
                
                    8

                    ܠܒܰܫܘ ܗܳܟܺܝܠ ܫܡܶܗ ܕܰܡܪܰܝܡܳܐ ܘܰܕܥܽܘܢܳܝܗ̱ܝ܆ ܘܬܶܥܒܪܽܘܢ ܕܠܴܐ ܩܺܝܢܕܽܘܢܽܘܣ܆
                    ܟܰܕ ܢܶܗܘܽܘܢ ܢܰܗܪ̈ܰܘܳܬܐ ܡܶܬܛܦܺܝܣܺܝܢ ܠܟܽܘܢ. 
                
                
                    9

                    ܓܫܼܰܪ ܐܶܢܽܘܢܿ ܡܳܪܝܳܐ ܒܡܶܠܬܶܗ܆ 
                    ܘܗܰܠܶܟ ܘܰܥܒܰܪ ܐܶܢܽܘܢܿ ܡܼܶܢ ܪܓܶܠ. 
                
                
                    10

                    ܘܥܶܩ̈ܒܳܬܶܗ ܩܳܝ̈ܡܳܢ ܥܰܠ ܡܰܝܴ̈ܐ ܘܠܴܐ ܐܶܬܚܱ̈ܒܰܠܝ܆
                    ܐܶܠܴܐ ܐܺܝܬܰܝܗܶܝܢ ܐܰܝܟ ܩܰܝܣܳܐ ܕܡܰܬܼܩܰܢ ܒܰܫܪܳܪܳܐ. 
                
                
                    11

                    ܘܡܶܟܳܐ ܘܡܶܟܳܐ ܡܶܬܬܪܺܝܡܺܝܢ ܗ̱ܘܰܘ ܓܰܠ̈ܠܶܐ܆ 
                    ܘܥܶܩ̈ܒܳܬܶܗ ܕܶܝܢ ܕܡܳܪܰܢ ܡܫܺܝܚܳܐ ܩܰܝܴ̈ܡܺܝܢ ܐܶܢܶܝܢ. 
                
                
                    12

                    ܘܠܴܐ ܡܶܬܥܱ̈ܛܝܳܢ܆
                    ܐܳܦܠܴܐ ܡܶܬܚܰܒ̈ܠܳܢ. 
                
                
                    13

                    ܘܐܶܬܬܣܺܝܡ݀ܰܬ ܐܽܘܪܚܶܐ ܠܐܰܝܠܶܝܢ ܕܥܳܒܪܺܝܢ ܒܳܬܪܶܗ܆
                    ܘܰܠܗܳܢܽܘܢܿ ܕܫܿܳܠܡܺܝܢ ܠܗܶܠܰܟܬܳܐ ܕܗܰܝܡܳܢܽܘܬܶܗ܆
                    ܘܣܳܓܕܺܝܢ ܠܰܫܡܶܗ.
                    ܗܰܠܶܠܘܽܝܰܐ.