“Odes of Solomon: Ode 42.” Based upon James H. Charlesworth ed., The Odes of Solomon: The Syriac Texts (Oxford: Oxford University Press, 1973). Digital Syriac Corpus. Last modified July 6, 2017. https://syriaccorpus.org/185.
    
        


            
                
                    1

                    ܦܶܫܿܛܶܬ ܐܺܝ̈ܕܰܝ ܘܐܶܬܿܩܰܪܒܶܬ ܠܘܳܬ ܡܳܪܝ܆ 
                    ܡܶܛܽܠ ܕܡܶܬܚܳܐ ܕܺܐܝ̈ܕܰܝ ܐܳܬܷܿܗ̄ ܗ̱ܝܼ. 
                
                
                    2

                    ܘܰܦܫܺܝܛܽܘܬܝ ܩܰܝܣܳܐ ܦܫܺܝܛܳܐ܆ 
                    ܐܶܬܬܠܺܝ ܥܰܠ ܐܽܘܪܚܶܗ ܕܰܬܪܺܝܨܶܐ. 
                
                
                    3

                    ܘܰܗܿܘܺܝܬ ܕܠܴܐ ܚܳܫܚܽܘ ܠܗܳܢܽܘܢܿ ܕܝܳܕܥܺܝܢ ܠܺܝ܆
                    ܡܶܛܽܠ ܕܶܐܬܛܫܶܐ ܠܗܳܢܽܘܢܿ ܕܠܴܐ ܐܰܚܺܝܕܺܝܢ ܗ̱ܘܰܘ ܠܺܝ. 
                
                
                    4

                    ܘܐܷܗܘܶܐ ܠܘܳܬ ܗܳܢܽܘܢܿ܆ 
                    ܡܰܚܒܺܝܢ ܠܺܝ. 
                
                
                    5

                    ܡܺܝܬܘ ܟܽܠܗܽܘܢܿ ܪ̈ܳܕܽܘܦܰܝ܆
                    ܘܰܒܥܰܐܘܽܢܝ ܗܳܢܽܘܢܿ ܕܰܣܒܰܪܘ ܥܠܰܝ ܡܶܛܽܠ ܕܚܰܝ ܐ̱ܢܳܐ. 
                
                
                    6

                    ܘܩܳܡܷܿܬ ܠܺܝ ܘܐܻܝܬܰܝ ܥܰܡܗܽܘܢܿ܆
                    ܘܐܶܡܰܠܶܠ ܒܦܽܘܡܰܝ̈ܗܽܘܢܿ. 
                
                
                    7

                    ܐܰܣܠܼܺܝܘ ܓܶܝܪ ܠܰܐܝܠܶܝܢ ܕܪܳܕܦܺܝܢ ܠܗܽܘܢܿ܆ 
                    ܘܰܐܪܡܿܺܝܬ ܥܠܰܝܗܽܘܢܿ ܢܺܝܪܶܗ ܕܚܽܘܒܝ. 
                
                
                    8

                    ܐܰܝܟ ܕܪܳܥܶܗ ܕܚܰܬܢܳܐ ܥܰܠ ܟܰܠܬܳܐ܆ 
                    ܗܳܟܰܢܳܐ ܢܺܝܪܝ ܥܰܠ ܐܰܝܠܶܝܢ ܕܝܳܕܥܺܝܢ ܠܺܝ. 
                
                
                    9

                    ܘܐܰܝܟ ܓܢܽܘܢܳܐ ܕܰܡܬܺܝܚ ܒܶܝܬ ܚܱ̈ܬܢܶܐ܆ 
                    ܗܳܟܰܢܳܐ ܚܽܘܒܝ ܥܰܠ ܐܰܝܠܶܝܢ ܕܰܡܗܰܝܡܢܺܝܢ ܒܺܝ. 
                
                
                    10

                    ܠܴܐ ܐܶܣܬܰܠܿܝܰܬ ܐܳܦܶܢ ܐܶܣܿܬܰܒܪܰܬ܆
                    ܘܠܴܐ ܐܶܒܿܕܶܬ ܐܳܦܶܢ ܪܢܰܘ ܥܠܰܝ. 
                
                
                    11

                    ܫܝܽܘܠ ܚܙܳܬܰܢܝ ܘܶܐܬܕܰܘܝܰܬ܆
                    ܘܡܰܘܬܳܐ ܐܰܬܻܝܒܰܢܝ ܘܰܠܣܰܓܺܝܷ̈ܐܐ ܥܰܡܝ. 
                
                
                    12

                    ܚܰܠܴܐ ܘܰܡܪܳܪ̈ܶܐ ܗܘܺܝܬ ܠܶܗ܆
                    ܘܢܶܚܿܬܶܬ ܥܰܡܶܗ ܟܡܳܐ ܕܺܐܝܬ ܗ̱ܘܳܐ ܒܶܗ ܥܽܘܡܩܳܐ. 
                
                
                    13

                    ܘܪ̈ܶܓܠܶܐ ܘܪܺܝܫܳܐ ܐܰܪܦܺܝ܆
                    ܡܶܛܽܠ ܕܠܴܐ ܐܶܫܟܰܚ ܠܰܡܣܰܝܒܳܪܽܘ ܦܰܪܨܽܘܦܝ. 
                
                
                    14

                    ܘܥܶܒܿܕܶܬ ܟܢܽܘܫܬܳܐ ܕܚܰܝܷ̈ܐ ܒܡܺܝ̈ܬܰܘܗ̱ܝ܆ ܘܡܰܠܿܠܶܬ ܠܘܳܬܗܽܘܢܿ ܒܣܶܦ̈ܘܳܬܳܐ
                        ܚܰܝܴ̈ܬܳܐ܆ 
                    ܡܶܛܽܠ ܕܠܴܐ ܢܶܗܘܶܐ ܒܳܛܶܠ ܦܶܬܓܳܡܝ. 
                
                
                    15

                    ܘܰܪܗܶܛܘ ܠܘܳܬܝ ܗܳܢܽܘܢܿ ܕܡܺܝܬܘ܆ 
                    ܘܰܩܥܰܘ ܘܶܐܡܼܰܪܘ ܚܽܘܢܰܝܢ ܒܪܶܗ ܕܰܐܠܳܗܳܐ. 
                
                
                    16

                    ܘܰܥܒܶܕ ܥܰܡܰܢ ܐܰܝܟ ܒܰܣܺܝܡܽܘܬܳܟ܆ 
                    ܘܰܐܦܶܩܰܝܢ ܡܼܶܢ ܐܰܣܽܘܪ̈ܶܐ ܕܚܶܫܽܘܟܳܐ. 
                
                
                    17

                    ܘܰܦܬܰܚ ܠܰܢ ܬܰܪܥܳܐ܆ ܕܒܶܗ ܢܷܿܦܽܘܩ ܠܘܳܬܳܟ܆
                    ܚܳܙܶܝܿܢܰܢ ܓܶܝܪ ܕܠܴܐ ܡܶܬܩܰܪܰܒ ܠܳܟ ܡܰܘܬܰܢ. 
                
                
                    18

                    ܢܶܬܦܪܶܩ ܐܳܦ ܚܢܰܢ ܥܰܡܳܟ܆
                    ܡܶܛܽܠ ܕܰܐܢ̱ܬ ܗ̱ܽܘܼ ܦܳܪܽܘܩܰܢ 
                
                
                    19

                    ܐܶܢܳܐ ܕܶܝܢ ܫܶܡܿܥܶܬ ܩܳܠܗܽܘܢܿ܆
                    ܘܣܴܿܡܶܬ ܒܠܶܒܝ ܗܰܝܡܳܢܽܘܬܗܽܘܢܿ. 
                
                
                    20

                    ܘܣܴܿܡܶܬ ܥܰܠ ܪܺܝܫܗܽܘܢܿ ܫܶܡܝ܆
                    ܡܶܛܽܠ ܕܰܒܢܱ̈ܝ ܚܺܐܪ̈ܶܐ ܐܶܢܽܘܢܿ ܘܕܺܝܠܝ ܐܺܝܬܰܝܗܽܘܢܿ.
                    ܗܰܠܶܠܘܽܝܰܐ.