“Memra 11 - ܡܺܐܡܪܳܐ ܕܰܚܕܰܥܣܰܪ ܕܥܰܠ ܡܰܫܡܰܥܬܳܐ ܕܰܟܬܳܒ̈ܶܐ ܘܶܐܡܰܬܝ ܕܡܶܬܩܪܶܐ ܢܳܡܽܘܣܳܐ ܩܕܳܡܰܝܢ..” Based upon Robert Kitchen and Martien Parmentier eds., The Syriac Book of Steps vol. 2 (Piscataway, NJ: Gorgias Press, 2011). Digital Syriac Corpus. Last modified May 31, 2017. https://syriaccorpus.org/198. ܡܺܐܡܪܳܐ ܕܰܚܕܰܥܣܰܪ ܕܥܰܠ ܡܰܫܡܰܥܬܳܐ ܕܰܟܬܳܒ̈ܶܐ ܘܶܐܡܰܬܝ ܕܡܶܬܩܪܶܐ ܢܳܡܽܘܣܳܐ ܩܕܳܡܰܝܢ. 1 ܐܰܝܟܰܢܳܐ ܕܡܶܐܟ̈ܠܳܬܳܐ ܕܦܰܓܪܳܐ ܦܳܪܫܺܝܢܰܢ ܘܝܳܕܥܺܝܢܰܢ ܐܰܝܕܳܐ ܛܳܒܳܐ ܘܰܐܝܕܳܐ ܒܺܝܫܳܐ: ܘܰܐܝܕܳܐ ܛܰܡܐܳܐ ܘܰܐܝܕܳܐ ܕܰܟܝܳܐ: ܘܝܳܕܥܺܝܢܰܢ ܕܺܐܝܬ ܡܶܐܟ̈ܠܳܬܳܐ ܕܣܰܡܳܐ ܕܡܰܘܬܳܐ ܐܺܝܬ ܒܗܶܝܢ: ܘܰܒܛܺܝܠ ܠܰܢ ܕܢܶܦܪܽܘܫ ܡܶܐܟܽܘܠܬܳܐ ܡܶܢ ܡܶܐܟ̈ܠܳܬܳܐ: ܗܳܟܰܢ ܐܳܦ ܟܬܳܒ̈ܶܐ ܐܶܡܰܬܝ ܕܩܳܪܶܐ ܣܳܦܪܳܐ: ܐܶܢ ܐܺܝܬ ܕܰܡܦܰܫܶܩ ܠܰܢ: ܘܶܐܠܳܐ ܚܢܰܢ ܠܳܐ ܢܶܣܬܢܶܩ: ܐܶܠܳܐ ܢܶܦܪܽܘܫ ܦܽܘܩ̈ܕܳܢܶܐ ܕܰܓܡܺܝܪܽܘܬܳܐ ܡܶܢ ܕܝܰܪܩܳܐ ܘܚܰܠܒܳܐ ܘܦܽܘܩ̈ܕܳܢܶܐ ܡܰܟܺܝ̈ܟܶܐ ܡܶܢ ܩܫܰܝ̈ܳܐ ܘܪܰܘܪ̈ܒܶܐ ܡܶܢ ܕܰܩܕ̈ܩܶܐ: ܘܗܳܠܶܝܢ ܕܠܳܐ ܚܳܝܶܐ ܒܗܽܘܢ ܐ̱ܢܳܫ ܡܳܐ ܕܰܢܛܰܪ ܐܶܢܽܘܢ ܡܶܢ ܗܳܠܶܝܢ ܕܚܳܐܶܝܢ ܡܳܐ ܕܢܳܛܪܺܝܢ ܠܗܽܘܢ. ܡܳܐ ܕܶܐܡܰܪ ܢܳܡܽܘܣܳܐ: ܕܰܪܚܶܡ ܠܡܳܪܝܳܐ ܐܰܠܳܗܳܟ ܛܳܒ ܡܶܢ ܢܰܦܫܳܟ: ܘܰܠܩܰܪܺܝܒܳܟ ܐܰܝܟ ܢܰܦܫܳܟ ܐܶܡܰܪ ܐܰܢ̱ܬ ܕܗܳܢܳܐ ܦܽܘܩܕܳܢܳܐ ܕܺܝܠܝ ܗ̱ܽܘ. ܘܡܳܐ ܕܥܰܝܢܳܐ ܚܠܳܦ ܥܰܝܢܳܐ ܘܰܣܢܺܝ ܠܰܒܥܶܠܕܒܳܒܳܟ ܘܰܕܕܳܡܝ̈ܳܢ ܠܗܳܠܶܝܢ: ܐܶܡܰܪ: ܕܗܳܠܶܝܢ ܠܳܐ ܗܘ̈ܰܝ ܕܺܝܠܝ: ܐܶܠܳܐ ܕܰܩܫ̈ܰܝܳܐ ܘܰܕܒܺܝܫ̈ܶܐ. p ܠܡܰܟܺܝ̈ܟܶܐ ܓܶܝܪ ܦܽܘܩܕ̈ܳܢܶܐ ܡܰܟܺܝ̈ܟܶܐ ܣܳܡ ܠܗܽܘܢ ܡܳܪܰܢ ܕܬܽܘܒ ܢܶܬܡܰܟܟܽܘܢ ܘܢܶܬܓܰܡܪܽܘܢ: ܐܰܝܟ ܕܟܶܬܒܶܬ ܡܶܢ ܠܥܶܠ. ܘܡܳܐ ܕܶܐܡܰܪ ܕܰܘܺܝܕ: ܠܣܳܢ̈ܰܐܝܟ ܡܳܪܝܳܐ ܣܢܺܝܬ: ܐܶܡܰܪ ܐܰܢ̱ܬ: ܗܳܕܶܐ ܠܳܐ ܗܘܳܬ ܕܺܝܠܝ: ܪܽܘܚܰܐ ܗ̱ܘ ܨܒܳܬ ܘܶܐܡܪܰܬ ܠܽܘܩܒܰܠ ܣܳܢܐܰܘ̈ܗ̱ܝ ܕܡܳܪܝܳܐ ܕܢܶܫܡܥܽܘܢ ܘܢܶܕܚܠܽܘܢ ܘܰܢܬܽܘܒܽܘܢ ܘܢܺܚܽܘܢ. ܘܡܳܐ ܕܶܐܡܰܪ: ܕܰܐܝܢܰܘ ܓܰܒܪܳܐ ܕܨܳܒܶܐ ܚܰܝ̈ܶܐ؟ ܘܬܰܘ ܒܢܰܝ̈ܳܐ ܫܽܘܡܥܽܘܢܝ: ܘܰܐܠܶܦܟܽܘܢ ܕܶܚܠܬܶܗ ܕܰܐܠܳܗܳܐ: ܛܰܪܘ ܠܶܫܳܢܟܽܘܢ ܡܶܢ ܒܺܝܫܬܳܐ: ܘܣܶܦ̈ܘܳܬܟܽܘܢ ܕܠܳܐ ܢܡ̈ܰܠ̱ܠܳܢ ܢܶܟܠܳܐ: ܥܒܰܪ ܡܶܢ ܒܺܝܫܬܳܐ ܘܰܥܒܶܕ ܛܳܒܬܳܐ: ܒܥܺܝ ܫܠܳܡܳܐ ܘܗܰܪܛ ܒܳܬܪܶܗ: ܐܶܬܬܢܺܝܚ ܡܶܢ ܚܶܡܬܳܐ ܘܶܐܬܬܢܺܝܚ ܡܶܢ ܪܽܘܓܙܳܐ: ܘܠܶܒܳܐ ܒܺܝܫܳܐ ܐܰܥܒܰܪ ܡܶܢܝ: ܘܒܺܝܫܬܳܐ ܠܳܐ ܝܶܕܥܶܬ: ܐܶܡܰܪ ܐܰܢ̤ܬ݊ ܗܳܠܶܝܢ ܐܶܢܽܘܢ ܦܽܘܩܕ̈ܳܢܶܐ ܕܺܝܠܝ: ܕܗܳܘܶܐ ܐ̱ܢܳܐ ܒܗܽܘܢ ܢܺܝܚܳܐ ܘܡܰܟܺܝܟ ܪܽܘܚܳܐ: ܘܰܐܝܠܶܝܢ ܕܕܳܡܶܝܢ ܠܗܽܘܢ: ܒܟܽܠܗܽܘܢ ܢܒܺܝ̈ܶܐ ܘܰܫ̈ܠܺܝܚܶܐ: ܐܰܝܟ ܕܶܐܡܰܪ ܫܠܺܝܚܳܐ: ܕܰܗܘܰܝܬܽܘܢ ܓܳܒܶܝܢ ܠܟܽܘܢ ܗܳܠܶܝܢ ܕܡܰܟ̈ܺܝܟܳܢ ܡܶܢ ܒܰܝܢܳܬ ܗܳܠܶܝܢ ܕܩܰܫ̈ܝܳܢ ܘܗܳܟܰܢ ܡܶܬܓܰܡܪܺܝܢ ܐܢ̱ܬܽܘܢ. ܘܡܳܐ ܕܡܶܬܩܪܶܐ ܫܠܺܝܚܳܐ ܘܶܐܘܰܢܓܶܠܺܝܽܘܢ: ܗܳܠܶܝܢ ܟܽܠܗܽܘܢ ܦܽܘܩܕ̈ܳܢܶܐ ܕܰܓܡܺܝܪ̈ܶܐ: ܕܰܓܒܺܝܬ ܠܳܟ ܡܶܢ ܠܥܶܠ: ܒܗܽܘܢ ܗܘܰܝܬ ܪܳܗܶܛ ܘܒܰܐܝܠܶܝܢ ܕܕܳܡܶܝܢ ܠܗܽܘܢ: ܘܶܐܬܥܰܠܳܐ ܠܳܟ ܡܶܢ ܗܳܠܶܝܢ ܕܺܐܝܬܰܝܗܽܘܢ ܝܰܪܩܳܐ ܘܚܰܠܒܳܐ ܘܠܰܘ ܠܚܰܕ ܐ̱ܢܳܫ ܐܰܡܺܝܪܺܝܢ܀ 2 ܨܳܒܶܐ ܐܰܢ̱ܬ ܕܬܶܬܓܡܰܪ: ܒܳܬܰܪ ܦܽܘܩܕ̈ܳܢܶܐ ܪܰܘܪ̈ܒܶܐ ܗܰܪܛ. ܘܶܐܠܳܐ ܣܺܝܡ ܠܒܳܠܳܟ ܕܶܐܢܗܽܘ ܕܣܳܐܶܡ ܐܰܢ̱ܬ ܠܗܽܘܢ ܠܚܰܕ ܐ̱ܢܳܫ: ܠܗܳܠܶܝܢ ܦܽܘܩܕ̈ܳܢܶܐ ܪܰܘܪ̈ܒܶܐ ܘܕܰܩܕ̈ܩܶܐ: ܐܰܝܟܰܢ ܠܳܐ ܡܶܫܟܰܚ ܢܶܛܰܪ ܠܗܽܘܢ ܐܰܟܚܕܳܐ: ܘܶܐܠܳܐ ܐܶܢ ܫܳܒܶܩ ܠܚܰܕ ܠܳܐ ܢܳܛܰܪ ܠܚܰܕ. ܘܰܚܙܺܝ ܐܰܝܟܰܢ ܗܳܘ̈ܝܳܢ ܡܶܠܰܘ̈ܗ̱ܝ ܕܝܶܫܽܘܥ ܣܰܩܽܘܒܠܳܐ ܚܕܳܐ ܠܰܚܕܳܐ. ܘܡܶܛܽܠ ܕܬܶܕܰܥ ܕܠܰܬܪ̈ܶܝܢ ܐ̱ܢܳܫ̈ܺܝܢ ܐܰܡܺܝܪ̈ܳܢ: ܐܶܡܰܪ ܡܳܪܰܢ: ܕܠܳܐ ܬܕܽܘܢܽܘܢ. ܘܶܐܡܰܪ: ܕܰܐܒܗܶܬܳܝܗ̱ܝ ܠܐ̱ܢܳܫ ܩܕܳܡ ܟܽܠܳܗ ܥܺܕ̱ܬܳܐ. ܐܶܢ ܕܺܝܠܳܟ ܐܶܢܽܘܢ ܬܪ̈ܰܝܗܽܘܢ: ܒܰܐܝܢܳܐ ܡܶܢܗܽܘܢ ܩܳܐܶܡ ܐܰܢ̱ܬ؟ ܐܶܢܕܶܝܢ ܕܳܐܶܢ ܐܰܢ̱ܬ: ܦܳܫܬ ܠܳܟ ܡܶܢ ܗܰܘ ܦܽܘܩܕܳܢܳܐ ܪܰܒܳܐ ܠܳܐ ܬܕܽܘܢܽܘܢ: ܘܶܐܢ ܠܳܐ ܕܳܐܶܢ ܐܰܢ̱ܬ: ܐܶܬܥܕܰܠܬ ܠܳܟ ܡܶܢ ܗܰܘ ܦܽܘܩܕܳܢܳܐ ܕܰܩܕܳܡ ܟܽܠܳܗ ܥܺܕ̱ܬܳܐ ܐܰܒܗܶܬܳܝܗ̱ܝ܀ 3 ܬܽܘܒ ܐܶܡܰܪ ܡܳܪܰܢ: ܫܒܽܘܩ ܠܶܗ ܠܰܐܚܽܘܟ ܫܰܒ̈ܥܺܝܢ ܥܰܠ ܫܒܰܥ: ܐܶܢ ܡܰܣܟܶܠ ܒܳܟ ܒܝܰܘܡܳܐ ܚܰܕ. ܘܬܽܘܒ ܐܶܡܰܪ: ܕܰܚܫܽܘܒܳܝܗ̱ܝ ܐܰܝܟ ܚܰܢܦܳܐ. ܐܶܢ ܠܚܰܕ ܐ̱ܢܳܫ ܐܰܡܺܝܪܺܝܢ: ܒܰܐܝܢܳܐ ܡܶܢܗܽܘܢ ܩܳܐܶܡ ܐܰܢ̱ܬ؟ ܒܗܰܘ ܕܰܫܒܽܘܩ ܠܶܗ ܫܰܒ̈ܥܺܝܢ ܥܰܠ ܫܒܰܥ: ܐܰܘ ܒܗܰܘ ܕܰܐܝܟ ܚܰܢܦܳܐ ܚܫܽܘܒܳܝܗ̱ܝ ܘܫܰܢܳܐ ܠܳܟ ܡܶܢ ܠܘܳܬܶܗ؟ ܒܗܰܘ ܓܶܝܪ ܕܰܫܒܽܘܩ ܠܶܗ: ܐܶܡܰܪ ܠܳܟ ܠܳܐ ܬܶܦܪܽܘܫ ܡܶܢ ܐܰܚܽܘܟ. ܘܗܳܟܰܢ ܩܳܬܺܝܢ ܦܽܘܩܕ̈ܳܢܶܐ ܪܰܘܪ̈ܒܶܐ ܘܕܰܩܕ̈ܩܶܐ: ܡܶܛܽܠ ܕܠܳܐ ܗܘܳܐ ܠܚܰܕ ܐ̱ܢܳܫ ܐܰܡܺܝܪܺܝܢ: ܐܶܠܳܐ ܠܟܽܠܢܳܫ ܐܰܝܟ ܕܺܐܝܬ ܒܶܗ ܚܰܝܠܳܐ. ܐܰܝܟ ܕܩܰܬ ܗܰܘ ܦܽܘܩܕܳܢܳܐ: ܕܠܳܐ ܬܶܬܚܰܠܰܛ ܥܰܡ ܓܰܝܳܪ̈ܶܐ ܒܗܰܘ: ܕܰܗܘܺܝ ܟܽܠ ܥܰܡ ܟܽܠܢܳܫ. ܗܳܠܶܝܢ ܗܳܟܺܝܠ ܦܽܘܩܕ̈ܳܢܶܐ ܕܠܳܐ ܕܳܝܢܺܝܢ ܠܐ̱ܢܳܫ: ܘܰܠܟܽܠܢܳܫ ܡܰܚܒܺܝܢ ܠܚܰܝ̈ܠܬܳܢܶܐ ܐܰܡܺܝܪܺܝܢ. ܠܗܳܠܶܝܢ ܕܶܐܡܰܪ ܕܚܰܝܳܒܺܝܢܰܢ ܚܢܰܢ ܚܰܝ̈ܠܬܳܢܶܐ ܕܟܽܘܪܗܳܢܳܐ ܕܰܡܚ̈ܺܝܠܶܐ ܢܶܫܩܽܘܠ: ܘܟܽܠܝܽܘܡ ܢܶܣܥܽܘܪ ܐܶܢܽܘܢ: ܘܢܰܪܬܶܐ ܐܶܢܽܘܢ ܡܰܟܺܝܟܳܐܺܝܬ. ܘܗܳܠܶܝܢ ܕܰܩܕ̈ܩܶܐ݀ ܐܰܡܺܝܪܺܝܢ ܠܰܛܠ̈ܳܝܶܐ ܘܠܰܒܨܺܝܪ̈ܶܐ ܕܡܶܬܛܪܶܝܢ ܒܬܶܐܪܬܗܽܘܢ: ܐܰܝܟ ܕܶܐܡܰܪ ܦܰܘܠܳܘܣ: ܕܰܐܝܢܳܐ ܕܡܰܪܥܳܐ ܬܶܐܪܬܶܗ ܣܰܓܺܝ ܡܶܬܛܪܶܐ: ܡܳܐ ܕܚܳܙܶܐ ܠܰܐܝܢܳܐ ܕܰܚܠܺܝܡܳܐ ܬܶܐܪܬܶܗ: ܡܳܐ ܕܳܐܟܶܠ ܥܰܡ ܚܰܢ̈ܦܶܐ ܘܡܰܪܬܶܐ ܠܗܽܘܢ: ܐܰܝܟ ܕܰܐܪܬܺܝ ܐܶܢܽܘܢ ܡܳܪܰܢ. ܐܰܝܟܰܢܳܐ ܕܡܶܬܛܪܶܝܢ ܗ̱ܘܰܘ ܝܺܗ̱ܽܘ̈ܕܳܝܶܐ ܒܝܶܫܽܘܥ: ܕܗܳܢܳܐ ܠܚܰܛܳܝ̈ܶܐ ܡܩܰܒܶܠ ܘܳܐܟܶܠ ܥܰܡܗܽܘܢ. ܠܰܕܟܰܝ̈ܳܐ ܠܰܡ ܟܽܠܡܶܕܶܡ ܕܟܶܐ ܗ̱ܘ ܠܗܽܘܢ: ܗܳܢܰܘ ܕܶܝܢ ܡܰܢ ܕܰܕܟܶܐ ܠܶܒܶܗ ܡܶܢ ܤܳܛܳܢܳܐ: ܠܳܐ ܪܳܢܶܐ ܒܺܝܫܬܳܐ ܥܰܠ ܐ̱ܢܳܫ: ܐܶܠܳܐ ܟܽܠ ܛܳܒ̈ܳܬܳܐ: ܡܰܢ ܠܰܡ ܕܰܡܙܺܝܓܳܐ ܬܶܐܪܬܶܗ ܒܣܳܛܳܢܳܐ: ܪܳܢܶܐ ܛܰܡܐܽܘܬܳܐ ܥܰܠ ܒܢܰܝ̈ܢܳܫܳܐ܀ 4 ܦܩܰܕ ܬܽܘܒ ܠܰܚܠ̈ܺܝܡܶܐ: ܕܠܳܐ ܬܶܗܘܽܘܢ ܬܽܘܩܠܬܳܐ ܠܰܟܪ̈ܺܝܗܶܐ ܥܰܕ ܡܶܬܚܰܠܡܺܝܢ: ܘܶܐܠܳܐ ܡܳܝܬܺܝܢ ܠܗܽܘܢ ܘܡܰܣܟܠܺܝܢ ܐܰܢ̱ܬܽܘܢ ܒܰܡܫܺܝܚܳܐ ܗܰܘ ܕܡܺܝܬ ܡܶܛܽܠܳܬܗܽܘܢ. ܘܬܽܘܒ ܐܶܡܰܪ ܫܠܺܝܚܳܐ ܠܰܚܠ̈ܺܝܡܶܐ: ܕܢܶܚܫܒܽܘܢ ܠܟܽܠܢܳܫ ܐܰܝܟ ܕܰܡܝܰܬܰܪ ܡܶܢܗܽܘܢ. ܘܰܠܝܰܠܽܘܕܳܐ ܐܶܡܰܪ ܠܶܗ: ܕܠܳܐ ܬܶܐܟܽܘܠ ܥܰܡ ܓܰܝܳܪ̈ܶܐ ܡܶܛܽܠ ܕܠܳܐ ܢܶܥܒܕܽܘܢܳܝܗ̱ܝ ܐܰܟܘܳܬܗܽܘܢ: ܒܙܰܒܢܳܐ ܕܰܛܠܶܐ ܡܶܢ ܫܪܳܪܳܐ. ܒܰܐܝܢܳܐ ܡܶܢ ܗܳܠܶܝܢ ܦܽܘܩܕ̈ܳܢܶܐ ܩܳܐܶܡ ܗܰܘ ܕܳܐܡܰܪ ܕܰܠܚܰܕ ܐ̱ܢܳܫ ܐܰܡܺܝܪܺܝܢ؟ ܒܪܰܒܳܐ ܐܰܘ ܒܰܙܥܽܘܪܳܐ؟ ܪܰܒܳܐ ܗܰܘ: ܕܰܐܡܶܟ ܢܰܦܫܳܟ؟ ܘܰܚܫܽܘܒܳܝܗ̱ܝ ܠܰܐܚܽܘܟ ܐܰܝܟ ܕܰܡܝܰܬܰܪ ܡܶܢܳܟ. ܘܰܙܥܽܘܪܳܐ ܗܰܘ: ܕܠܳܐ ܬܶܐܟܽܘܠ ܥܰܡ ܓܰܝܳܪ̈ܶܐ. ܐܶܢ ܢܳܛܪܰܬ ܗܰܘ ܪܰܒܳܐ: ܒܽܘܪܟܬܳܐ ܫܳܩܶܠ ܐܰܢ̱ܬ ܡܶܢ ܐܰܠܳܗܳܐ. ܘܶܐܢ ܒܗܰܘ ܙܥܽܘܪܳܐ ܩܳܐܶܡ ܐܰܢ̱ܬ: ܣܽܘܓܶܐܗ ܕܥܳܠܡܳܐ ܗܳܘܶܐ ܛܰܡܐܳܐ ܒܥܰܝ̈ܢܰܝܟ. ܐܳܦ ܠܰܕ̈ܟܰܝܳܐ ܥܳܒܶܕ ܤܳܛܳܢܳܐ ܛܰܡ̈ܐܶܐ ܒܥܰܝ̈ܢܰܝܟ: ܒܝܰܕ ܕܝܳܗܶܒ ܐܰܢ̱ܬ ܐܰܬܪܳܐ ܕܢܶܫܬܰܠܰܛ ܒܳܟ. ܐܶܢ ܗܳܟܺܝܠ ܢܳܛܰܪ ܐܰܢ̱ܬ ܗܰܘ ܦܽܘܩܕܳܢܳܐ ܪܰܒܳܐ: ܣܳܠܶܩ ܐܰܢ̱ܬ ܠܳܟ ܡܶܢ ܙܥܽܘܪܳܐ. ܘܶܐܢ ܩܳܐܶܡ ܐܰܢ̱ܬ ܒܗܰܘ ܙܥܽܘܪܳܐ: ܦܳܫܬ ܠܳܟ ܡܶܢ ܗܰܘ ܪܰܒܳܐ. ܬܽܘܒ ܐܶܡܰܪ: ܕܰܗܘܺܝ ܟܽܠ ܥܰܡ ܟܽܠ: ܘܰܕܠܳܐ ܬܶܬܚܰܠܰܛ ܥܰܡ ܓܰܝܳܪ̈ܶܐ: ܕܣܰܩܽܘܒܠܶܗ ܗ̱ܽܘ ܗܰܘ ܦܽܘܩܕܳܢܳܐ ܪܰܒܳܐ ܕܗܰܘ ܙܥܽܘܪܳܐ. ܪܰܒܳܐ ܐܳܡܰܪ: ܕܰܗܘܺܝ ܟܽܠ ܥܰܡ ܟܽܠ ܘܰܠܟܽܠܢܳܫ ܐܰܪܬܳܐ. ܘܰܙܥܽܘܪܳܐ ܐܳܡܰܪ: ܕܰܥܪܽܘܩ ܡܶܢ ܠܘܳܬ ܡܰܢ ܕܰܟܪܺܝܗ ܘܥܽܘܠ ܠܘܳܬ ܡܰܢ ܕܺܐܝܬ ܒܶܗ ܚܰܝܠܳܐ. ܐܶܡܰܪ ܓܶܝܪ ܕܰܚܓܺܝܪ ܠܳܐ ܢܶܣܬܚܶܦ. ܟܽܠ ܟܪ̈ܺܝܗܶܐ ܡܫܰܕܰܪ ܠܘܳܬ ܚܰܝ̈ܠܬܳܢܶܐ ܘܚܰܝ̈ܠܬܳܢܶܐ ܠܘܳܬ ܟܪ̈ܺܝܗܶܐ: ܐܰܝܟ ܕܝܳܐܶܐ ܠܚܰܝ̈ܠܬܳܢܶܐ ܕܟܽܘܪܗܳܢܳܐ ܕܰܟܪ̈ܺܝܗܶܐ ܢܶܫܩܠܽܘܢ. ܠܡܰܢ ܕܠܳܐ ܡܶܫܟܰܚ ܕܢܰܠܶܦ ܐܳܦ ܠܳܐ ܠܢܰܦܫܶܗ: ܐܳܡܰܪ ܠܶܗ: ܕܠܳܐ ܬܺܐܙܰܠ ܠܘܳܬ ܟܪ̈ܺܝܗܶܐ: ܐܶܠܳܐ ܠܘܳܬ ܚܠ̈ܺܝܡܶܐ: ܕܠܳܐ ܢܺܐܙܽܠ̱ܘܢ ܟܪ̈ܺܝܗܶܐ ܚܰܕ ܠܘܳܬ ܚܰܕ ܘܰܢܡܽܘܬܽܘܢ ܠܗܽܘܢ ܕܠܰܝܬ ܡܰܢ ܕܰܡܣܰܘܣܶܐ ܠܗܽܘܢ. ܐܶܢ ܗܳܟܺܝܠ ܠܳܐ ܦܳܪܶܫ ܐ̱ܢܳܫ ܡܶܛܽܠ ܡܳܢܳܐ ܐܰܡܺܝܪܺܝܢ: ܠܳܐ ܡܥܰܕܳܪܽܘ ܡܥܰܕܰܪ ܘܠܳܐ ܡܶܬܥܰܕܳܪܽܘ ܡܶܬܥܰܕܰܪ܀ 5 ܫܰܦܺܝܪ ܕܶܝܢ ܟܶܬܒܰܬ ܪܽܘܚܳܐ: ܟܰܕ ܠܳܐ ܪܓܺܝܫܺܝܢ ܢܶܬܥܰܕܪܽܘܢ ܟܪ̈ܺܝܗܶܐ: ܘܗܰܘ ܡܰܢ ܕܰܚܠܺܝܡ ܝܳܕܰܥ ܗ̱ܽܘ ܐܰܝܢܰܘ ܦܽܘܩܕܳܢܳܐ ܕܺܝܠܶܗ. ܘܡܶܛܽܠ ܕܶܐܡܰܪ ܡܳܪܰܢ: ܕܡܰܢ ܕܢܶܫܪܶܐ ܚܰܕ ܡܶܢ ܗܳܠܶܝܢ ܦܽܘܩܕ̈ܳܢܶܐ ܙܥܽܘܪ̈ܶܐ ܘܢܰܐܠܶܦ ܠܰܒܢܰܝ̈ܢܳܫܳܐ: ܒܨܺܝܪܳܐ ܢܶܬܩܪܶܐ. ܠܰܘ ܡܶܫܪܳܐ ܫܳܪܶܐ ܐܰܢ̱ܬ ܠܗܳܠܶܝܢ ܦܽܘܩܕ̈ܳܢܶܐ ܙܥܽܘܪ̈ܶܐ: ܘܩܳܐܶܡ ܐܰܢ̱ܬ ܒܪܰܘܪ̈ܒܶܐ: ܡܺܐܪܰܒ ܝܳܪܶܒ ܐܰܢ̱ܬ ܡܶܢ ܗܰܘ ܦܽܘܩܕܳܢܳܐ ܙܥܽܘܪܳܐ ܘܩܳܐܶܡ ܐܰܢ̱ܬ ܒܪܰܒܳܐ. ܡܳܕܶܝܢ ܡܳܐ ܕܰܗܘܳܐ ܐ̱ܢܳܫ ܓܰܒܪܳܐ: ܡܶܛܽܠ ܕܠܳܐ ܝܳܢܶܩ ܚܰܠܒܳܐ ܕܝܰܠ̈ܽܘܕܶܐ: ܡܒܰܛܳܠܽܘ ܡܒܰܛܶܠ ܠܶܗ ܠܚܰܠܒܳܐ؟ ܚܳܣ. ܝܳܢܩܺܝܢ ܐܶܢܽܘܢ ܝܰܠ̈ܽܘܕܶܐ: ܘܗܽܘ ܠܳܐ ܩܳܪܶܒ ܠܚܰܠܒܳܐ. ܐܳܦ ܝܰܠܽܘܕܳܐ ܕܪܽܘܚܳܐ: ܡܳܐ ܕܚܳܨ ܘܶܐܬܳܐ ܠܡܶܕܶܡ ܕܪܰܒ ܡܶܢ ܚܰܠܒܳܐ: ܗܳܟܰܢ ܡܶܛܽܠ ܠܡܶܐܟܽܘܠܬܳܐ ܫܰܪܺܝܪܬܳܐ ܕܗܳܠܶܝܢ ܕܰܒܚܰܝܠܳܐ ܡܕܰܪܫܺܝܢ ܠܡܶܣܬܰܟܳܠܽܘ ܘܰܠܡܶܦܪܰܫ ܬܶܫܡܶܫܬܳܐ ܕܰܠܥܶܠ ܡܶܢ ܕܰܠܬܰܚܬ. ܐܰܝܟ ܕܰܠܝܰܠ̈ܽܘܕܶܐ ܠܰܡ ܒܰܡܫܺܝܚܳܐ ܚܰܠܒܳܐ ܐܰܫܩܺܝܬܟܽܘܢ. ܬܰܘ ܠܟܽܘܢ ܗܳܫܳܐ ܠܡܶܐܟܽܘܠܬܳܐ ܫܰܪܺܝܪܬܳܐ: ܗܳܢܰܘ ܕܶܝܢ ܡܶܢ ܦܽܘܩܕ̈ܳܢܶܐ ܙܥܽܘܪ̈ܶܐ ܠܪܰܘܪ̈ܒܶܐ. ܘܰܐܝܟܰܢܳܐ ܕܚܰܠܒܳܐ ܠܓܰܒܪܳܐ ܫܽܘܢܳܩܰܐ ܗ̱ܘ ܠܶܗ ܕܢܺܐܢܰܩ: ܘܰܠܝܰܠܽܘܕܳܐ ܠܰܚܡܳܐ ܡܰܚܢܽܘܩܺܝܬܰܐ ܗ̱ܘ ܠܶܗ: ܗܳܟܰܢ ܦܽܘܩܕܳܢܳܐ ܙܥܽܘܪܳܐ ܣܰܩܽܘܒܠܳܗ ܗ̱ܽܘ ܕܰܓܡܺܝܪܽܘܬܳܐ. ܠܥܳܠܰܡ ܥܳܠܡܺܝܢ ܓܶܝܪ ܠܳܐ ܡܶܬܥܰܠܶܐ ܐ̱ܢܳܫ ܡܶܢ ܗܰܘ ܕܦܰܪܣܳܐ ܠܰܐܚܽܘܟ ܩܕܳܡ ܥܺܕ̱ܬܳܐ ܘܰܚܫܽܘܒܳܝܗ̱ܝ ܐܰܝܟ ܚܰܢܦܳܐ ܘܠܳܐ ܡܳܛܶܐ ܠܰܓܡܺܝܪܽܘܬܳܐ: ܐܶܠܳܐ ܩܳܪܶܒ ܠܗܰܘ ܕܫܰܒܽܘܩ ܠܶܗ ܫܰܒ̈ܥܺܝܢ ܥܰܠ ܫܒܰܥ: ܘܰܚܫܽܘܒܳܝܗ̱ܝ ܐܰܝܟ ܕܰܡܝܰܬܰܪ ܡܶܢܳܟ܀ ܫܠܶܡ ܡܺܐܡܪܳܐ ܕܰܚܕܰܥܣܰܪ ܕܥܰܠ ܡܰܫܡܰܥܬܳܐ ܕܰܟܬܳܒ̈ܶܐ ܩܰܕ̈ܺܝܫܶܐ܀