(eds.), "Literal Commentary on Ezekiel - ܦܘܼܫܩܐ ܣܘܼܥܪܢܝܐ ܕܚܙܩܝܐܝܠ ܢܒܝܐ" in last modified , https://syriaccorpus.org/244
    
        
            
                ܦܘܼܫܩܐ ܣܘܼܥܪܢܝܐ ܕܚܙܩܝܐܝܠ ܢܒܝܐ
            
            
                 ܬܘܼܒ ܦܘܼܫܩܐ ܣܘܼܥܪܢܝܐ ܕܚܙܩܝܐܝܠ ܢܒܝܐ ܒܡܢ̈ܘܬܐ ܕܝܼܠܗ ܕܡܪܝ ܕܝܘܿܢܢܣܝܘܿܣ
                    ܩܕ̄ܡ ܥܠܼܬܐ ܚܙܩܝܐܝܠ ܡܼܢ ܫܪܒܬܐ ܗܼܘܬ ܕܟܗ̈ܢܐ ܘܐܬܼܢܒܝܼ ܒܐܪܥܐ ܕܒܒܿܝܠ. ܚܕ ܡܿܢ ܐܝܿܟܢܐ
                    ܕܢܘܕܥ ܕܐܠܗܐ ܒܟܿܠܕܘܟ ܫܠܝܼܛ. ܐܝܟ ܕܐܪܒܥܐ ܕܡܘܼܠܟܢܐ ܘܐܚܪܬܐ ܐܝܿܟܢܐ ܕܢܫܼܕܪ ܠܢܒܝܘܼܬܐ
                    ܕܐܪܡܝܐ ܘܚܒܼܪ̈ܘܗܝ ܒܗ݀ܝ ܕܥܠ ܗ݀ܘ ܡܐ ܕܐܬܢܼܒܝܼܘ ܗܿܠܝܢ ܐܦ ܗܼܘ ܗܿܟܘܬ. ܬܘܼܒ ܐܬܼܢܒܝܼ ܡܛ݀ܠ
                    ܡܣܼܒܪܢܘܼܬܐ ܒܝܼܫܬܐ ܕܒܒܠ̈ܝܐ ܕܡܣܒܪܝܢ ܗܼܘܘ ܕܠܐ ܡܬܦܼܨܐ ܥܡܐ ܡܼܢ ܐܝܼܕ̈ܝܗܘܿܢ ܐܟܡܿܢ
                    ܕܒܙܒܼܢ ܡܼܢ ܡܨܪܝܢ ܘܝܼܕܝܼܥܐ ܡܼܢ ܗ݀ܝ ܕܐܡܼܪ 
            
            
                 ܡܠܟܐ ܕܡܿܢܘ ܐܠܗܟܘܿܢ ܕܢܦܼܨܝܟܘܿܢ ܡܼܢ ܐܝܼܕ̈ܝ. ܘܥܡܐ ܕܝܢ ܕܐܫܬܼܒܝܼܘ ܡܼܢ
                    ܐܬܘܿܪ̈ܝܐ ܘܡܼܢ ܒܒ̈ܠܝܐ ܦܣܩܼܘ ܗܼܘܘ ܣܒܼܪܐ ܠܐ ܡܬܼܦܪܩܝܼܢ ܘܫܪܟܐ ܕܐܫܼܬܚܪܘ ܒܐܘܿܪܫܠܝܡ
                    ܐܡܪܝܼܢ ܗܼܘܘ ܕܒܿܬܪ ܬܪܬܝܢ ܫܢ̈ܝܐ ܦܢܿܝܐ ܫܒܝܼܬܐ. ܘܠܘܼܩܒܠ ܗܿܠܝܢ ܫܪܝܼ ܢܒܝܐ ܕܡܬܼܢܒܐ
                    ܚܙܩܝܐܝܠ܆ ܘܗ݀ܘ ܒܫܢܬ݀ ܬܠܬܝܢ. ܫܢܿܬܐ ܗܿܕܐ ܕܬܠܬܝܢ ܠܘ ܕܫܒܘܿܥܐ ܕܫܒܘܥܐ ܕܫܘܼܒܩܢ ܚܩܠ̈ܬܐ
                    ܐܝܼܬܘܗܝ. ܩܕ̄ ܡܪܝ ܐܦܪܝܡ ܫܢܬ݀ ܬܠܬܝܢ ܕܚܝ̈ܘܗܝ ܕܢܒܝܐ ܚܙܩܝܐܝܠ ܐܡܿܪ. ܘܐܦܿܠܐ ܬܘܼܒ ܕܫܒܼܝܐ
                    ܕܒܒܠ̈ܝܐ ܠܐ ܡܬܚܼܫܟܐ ܡܼܢ ܫܢܬ ܝܚ̄ ܕܝܘܿܫܝܐ ܟܕ ܐܫܼܬܟܚ ܬܢܝܿܢ ܢܡܘܿܣܐ: ܒܗܝܠܟܐ. ܘܡܼܢ ܗ݀ܘ
                    ܙܒܢܼܐ ܐܬܓܼܙܪ ܥܠ ܥܡܐ ܕܢܫܼܬܒܐ. ܘܩܝܬܪܘܼܬܗ ܕܝܘܿܫܝܐ ܟܠܼܬ ܠܪܘܓܙܐ. ܘܐܝܼܬܘܗܝ ܡܢܝܿܢܐ ܡܼܢ
                    ܝܓ̄ ܕܝܘܿܫܝܐ. ܡܛ݀ܠ ܕܬܠܬܝܼܢ ܘܚܕܐ ܐܡܼܠܟ ܘܚܕܥܣܪܐ ܕܝܘܼܝܩܝܼܡ. ܘܫܢܿܬܐ ܕܒܝܬ ܝܗܘܼ ܐܚܙ
                    ܠܝܘܝܟܝܼܢ. ܘܚܡܫ ܕܫܒܝܼܬܐ ܕܟܢܫ̈ܢ ܫܢ̈ܝܐ ܬܠ̈ܬܝܼܢ. ܘܝܼܕܝܼܥ ܗܿܕܐ ܡܼܢ ܡܓܿܣܗ ܕܢܒܝܐ.
                    ܕܒܡܢܝܿܢܐ ܗܿܐ ܡܬܚܡ܆ ܚܙܩܝܐܝܠ ܥܡ ܝܘܟܢܝܐ ܐܫܼܬܒܝܼܘ. ܕܒܝܬ ܕܢܝܐܝܠ ܒܫܢܬ݀ ܬܠܬ ܕܝܘܼܝܿܩܝܡ
                    ܐܬܒܼܕܪܘ ܠܒܿܒܝܠ. ܘܐܝܟ ܗܡܝܪ̈ܐ ܢܣܼܒ ܐܢܘܿܢ ܢܒܘܿܟܕܢܨܪ ܘܩܕܝܼܡܝܼܢ ܓܝܪ ܡܼܢ ܗܿܠܝܢ ܕܫܪܟܐ܆
                    ܨ̄܆ ܩܕܡܝܐ ܒܚܡܫܬܐ ܗ̄ ܒܚܡܫܐ ܒܗ ܒܝܪܚܐ. ܒܢܗܪ ܟܒܪ ܗ̄ ܒܢܗܪܐ ܕܟܐܒܘܿܪ ܒܿܬܪ ܕܣܝܼܡ ܙܒܼܢܐܐܦ
                    ܕܘܼܟܬܐܘܐܬܪܐ ܕܒܗ ܚܙܼܐ ܠܓܠܝܢܐ. ܡܫܼܬܥܐ ܕܐܝܿܟܢ ܐܬܚܼܙܝܼ ܠܗ. ܐܬܦܬܼܚܘ ܫܡ̈ܝܐ ܗ̄ ܐܣܬܼܒܪ
                    ܠܗ ܕܡܼܢ ܫܡܿܝܐ ܢܚܿܬܐ ܠܗ ܕܡܘܼܬܐ ܘܚܙܼܬܐ. ܘܒܥܝܢܐ ܕܪܥܝܿܢܗ ܚܙܼܐ ܠܪܘܼܚܐ ܘܠܘ ܒܥ̈ܝܢܐ
                    ܕܦܓܪܐ. ܗܘܬ݀ ܥܠܝ ܐܝܼܕܗ ܕܡܪܝܐ ܗ̄ ܡܥܒܕܢܘܼܬܗ ܕܡܪܝܐ ܕܡܢܼܗܿ ܐܬܡܼܨܝܼ ܠܡܚܼܙܐ ܘܠܡܫܼܬܥܝܘܼ
                    ܗܿܠܝܢ. ܘܠܘ ܡܼܢ ܚܘܼܫ̈ܒܝ ܢܦܫܼܗ. ܘܗܿܐ ܪܘܼܚܐ ܕܥܠܥܠܐ ܗ̄ ܒܗܿܕܐ ܒܕܩܼ ܥܠ ܡܣܡܒܪܝܼܫܐ
                    ܕܥܬܝܼܕܝܢ ܗܼܘܘ ܠܡܩܼܒܠܘܼ ܗܿܠܝܢ ܕܦܫܼܘ ܒܐܘܿܪܫܠܝܡ ܒ݀ܬܪ ܫܒܼܝܗ ܕܝܘܿܟܢܝܐ ܒܝܕ ܥܠܥܠܐ
                    ܘܪܘܼܚܐ ܒܕܩܼ. ܥܠ ܩܠܝܼܠܘܼܬ ܡܼܐܬܝܼܬܐ ܕܒܒܠ̈ܝܐ ܘܒܝܼܫܬܐ ܕܣܿܒܠ ܡܢܼܗܘܿܢ ܥܡܐ. ܒܟܼܪ ܕܝܢ ܐܦ
                    ܠܐܒܕܢܗܿ ܕܒܿܒܝܠ ܥܡ ܐܘܿܪܫܠܡ ܡܒܿܕܩ. ܕܐܦ ܗܝܼ ܠܚܪܬܐ ܡܼܢ ܡ̈ܕܝܐ ܕܠܓܪܒܝܐ ܡܢܼܗܿ ܐܬܥܩܼܪܬ݀.
                    ܘܢܘܼܪܐ ܡܬܼܓܘܙܠܐ ܗ̄ ܚܕܪ̈ܝܗܿ ܕܪܘܼܚܐ ܕܥܠܥܠܐ ܗ̄ ܘܐܦ ܒܗܿܕܐ ܥܠ ܚܪܝܼܩܘܼܬܐ ܕܡܣܡ ܒܪܝܼܫܐ
                    ܕܐܬܿܐ ܥܠܝܗܘܿܢ ܡܒܿܕܩ. ܘܡܼܢ ܓܘܗܿ ܐܝܟ ܚܼܙܘܐ ܗ̄ ܕܡܼܢ ܓܘܗܿ ܕܗܿܝ ܢܘܼܪܐ ܕܡܬܓܘܙܠܐ ܗܘܬ
                    ܘܡܙܗܪܐ ܐܘܿ ܡܼܢ ܗ݀ܝ ܥܢܼܢܐ ܪܒܼܬܐ. ܬܘܼܒ ܚܙܼܬܐ ܐܚܪܬܐ ܐܝܼܬ ܗܘܼܐ ܕܐܝܼܬܝܗܿ ܕܡܘܼܬܐ ܕܐܪܒܥ
                    ܚܝ̈ܘܬܐ. ܗ݀ܝ ܓܝܪ ܕܚܝ̈ܘܢ ܠܗܿܝ ܕܚܼܙܐ ܙ݀ܕܩ ܕܢܩܼܦܗܿ ܚܕܐ ܓܝܪ ܐܝܼܬܝܗܿ ܐ݀ܦܢ ܡܦܿܠܓܼܐ
                    ܠܬܪܬܝܢ. ܕܡܘܼܬܐ ܐܡܼܪ ܡܛ݀ܠ ܕܠܘ ܕܡܘܼܬܐ ܚܬܝܼܬܐ ܕܚܝܘ̈ܬܐ ܩܢܝ̈ܢ ܗܼܘ̈ܝ ܒܝܕ ܚܝ̈ܘܬܐ ܨܿܐܪ
                    ܠܥܿܠܡܐ ܟܿܠܗ ܒܕܡܘܼܬ 
            
            
                 ܡܪܟܒܬܐ. ܬܚܝܬ ܐܠܗܐ ܣܝܼܡ. ܘܒܗ݀ܝ ܕܐܪܒܥ ܥܠ ܦܢܝ̈ܬܐ ܡܒܿܕܩ. ܬܘܼܒ ܒܝܕ
                    ܚܝܘ̈ܬܐ ܡܒܿܕܩ ܥܠ ܓܢ̈ܣܼܐ ܟܿܠܗܘܿܢ ܕܒܪܝܼܬܐ ܕܡܫܼܥܒܕܝܼܢ ܠܒܪܘܿܝܐ. ܘܗܿܢܘ ܚܙܼܘܗܝܢ ܐܝܟ ܗ̄
                    ܠܘ ܕܠܐ ܡܬܚܼܙܝܐ ܒܗܝܢ ܕܡܘܼܬܐ ܐܚܪܬܐ ܐܡܿܪ ܐܠܐ ܕܡܘܼܬܐ ܕܒܪܢܫܐ ܐܡܼܪ ܥܠܝܗܝܢ ܡܛ݀ܠ
                    ܦܫܝܼܛ̄ܘܼ ܘܬܪܝܼܨܘܼܬܐ ܕܩܘܡܬܼܗܝܢ. ܒܗ݀ܝ ܕܠܘ ܥܠ ܐܪܒܥ ܐܝܟ ܫܪܟܐ ܕܚܝ̈ܘܬܐ ܡܗܠ̈ܟܢ ܗܼܘ̈ܝ
                    ܐܠܐ ܥܠ ܬܪܬܝܢ ܐܝܟ ܕܒܪܢܫܐ. ܘܐܪܒܥ ܐܦܼܝ̈ܢ ܗ̄ ܡܿܘܕܥ ܒܗܿܕܐ ܕܐܠܐ ܐܢ ܒܬܪܝܼܨܘܼܬ ܩܘܼܡܬܐ
                    ܘܒܦܪܨܘܼܦܐ ܕܒܪܢܫܐ ܕܒܚܕ ܡܼܢ ܓܒܝ̈ܗܝܢ. ܚܝܘ̈ܬܐ ܘܦܪ̈ܚܬܐ ܡܚܿܘܐ ܠܗܝܢ ܕܐܝܼܬܝܗܝܢ ܗܼܘ̈ܝ
                    ܘܪ̈ܓܠܝܗܝܢ ܦܫܝܼܛ̈ܢ ܗ̄ ܦܫܝܼܛܘܼܬܐ ܕܪ̈ܓܠܐ ܐܡܿܪ ܠܗܝܢ ܒܗ݀ܝ ܕܠܥܓ̈ܠܐ ܐܘܟܝܼܬ ܐܪ̈ܘܢܐ ܕܡܝܼ
                    ܐܢܝܢ ܕܠܐ ܟܦܝܼ̈ܦܢ ܪ̈ܓܠܝܗܘܿܢ ܐܝܟ ܚܝܘ̈ܬܐ ܕܐܝܼܬ ܠܗܘܿܢ ܛܦܼܪ̈ܐ ܒܪ̈ܓܠܝܗܝܢ. ܘܠܘ ܐܝܟ
                    ܕܡܘܼܬ ܕܒܪܢܫܐ. ܐܝܼܬ ܗܼܘܐ ܠܗܝܢ ܒܦܫܝܼܛܘܼܬܐ. ܘܐܝܼܕܐ ܕܒܪܢܫܐܗ̄ ܐܝܼܬܝܗܿ ܕܝܢ ܨܒܘܼܬܐ ܗܿܕܐ
                    ܡܥ̄ܒܕܢܘܼ ܕܐܠܗܐ ܗܿܝ ܕܠܗܝܢ ܚ̈ܝܐ ܘܡܬܼܬܙܝܼܥܢܘܼܬܐ ܒܕܡܘܼܬ ܐܝܼܕܐ ܕܒܪܢܫܐ ܡܘܿܫܛܐ ܗܘܼܬ݀܆
                    ܘܐܦܝ̈ܝܗܝܢ ܘܓܦܼܝ̈ܗܝܢ ܗ̄ ܐܡܪ ܕܠܦܘܼܬ ܬܪܝܼܨܘܼܬܗܝܢ. ܘܒܗܿ ܒܦܫܝܼܛܘܼܬܗܝܢ ܐܝܼܬ ܗܼܘܐ ܠܗܝܢ
                    ܐܦ̈ܐ ܘܓܦܼ̈ܐ ܐܝܟ ܕܡܬܼ̈ܟܢ. ܘܓܦܼ̈ܝܗܝܢ ܢܩܝܼܦܝܼܢ ܗ̄ ܡܛ݀ܠ ܓܝܪ ܕܠܐܪܒܥ ܦܢ̈ܝܢ ܐܙܠ̈ܢ
                    ܗܼܘ̈ܝ. ܐܝܼܬ ܗܼܘܐ ܠܗܝܢ ܐܦ ܓܦܼ̈ܐ ܐܪܒܥܐ ܘܓܠܝܐ ܗܿܝ ܕܩܪܝܼܒܝܼܢ ܗܼܘܘ ܠܚܕ̈ܕܐ. ܐܟܡܿܢ ܕܠܐ
                    ܡܨܝܐ ܕܢܗܼܘܐ ܐܬܪܐ ܒܝܬ ܓܦܼ̈ܐ ܠܓ̈ܦܼܐ ܒܓܘܼܫ̈ܡܝܗܘܿܢ ܕܚܝܘ̈ܬܐ. ܘܡܐ ܕܐܙܠ̈ܢ ܗܼܘ̈ܝ ܗ̄
                    ܕܠܝܼܠܐܝܼܬ ܠܡ ܠܟܿܠ ܦܢܝ̈ܢ ܪ̈ܗܛܢ ܗܼܘ̈ܝ ܕܠܐ ܥܘܼܘܟܐ ܒܗ݀ܝ ܕܠܐ ܣܢܝܼ̈ܩܢ ܗܼܘ̈ܝ ܥܠ ܟܪܘܼܟܝܐ
                    ܘܗܦܘܼܟܝܐ. ܡܛ݀ܠ ܥܝ̈ܢܐ ܘܐܦ̈ܐ ܘܓܦܼ̈ܐ ܕܠܟܿܠܦܢܝ̈ܢ ܐܝܼܬ ܗܼܘ̈ܝ ܠܗܝܢ. ܘܕܡܘܼܬܐ ܕܐܦܝ̈ܗܝܢ.
                    ܕܣܡܼܠܐ ܗ̄ ܕܗܼܢܝܢ ܚܝܘ̈ܬܐ ܥܠ ܟܿܠܗ ܥ݀ܠܡܐ ܡܒܕ̈ܩܢ ܗܼܘ̈ܝ ܘܕܡܘܼܬܐ ܕܟܿܠܗ ܒܪܝܼܬܐ
                    ܒܟܕܝܥܘܼܬܗܝܢ ܡܚ̈ܘܝܢ ܗܼܘ̈ܝ ܙܕܩܐܝܼܬ ܐܦ̈ܐ ܘܥܝ̈ܢܐ ܕܒܪܢܫܐ ܘܕܫܪܟܐ ܕܚܝ̈ܘܬܐ ܣܼܡ ܠܗܝܢ ܐܝܟ
                    ܕܢܠܼܦ ܠܢ ܕܐܢ ܒܪܢܫܐ ܘܐܢ ܟ݀ܠܗܝܢ ܒܪ̈ܝܬܐ ܕܚܕ ܐܠܗܐ ܐܢܝܢ ܘܠܗ ܡܫܼܥ̈ܒܕܢ. ܒܝܕ ܐܪܝܐ ܡܒܿܕܩ
                    ܥܠ ܟܾܿܠ ܚܝ̈ܘܢ. ܘܒܝܕ ܬܘܪܐ ܥܠ ܟܿܠܗܿ ܒܥܝܿܕܐ ܢܫܼܪܐ ܠܦܚܪܬܐ. ܒܝܕ ܒܪܢܫܐ ܠܘ ܒܠܚܘܼܕ
                    ܠܟܿܠܗܘܿܢ ܡܠ̈ܝܼܠܐ ܐܠܐ ܠܟܿܠܗܝܢ ܒܪ̈ܝܬܐ. ܘܡܛ݀ܠ ܕܐܝܼܬܘܗܝ ܐܣܼܪܐ ܕܟܿܠܗܿ ܒܪܝܼܬܐ.
                    ܘܓܦ̈ܝܗܝܢ ܦܪܝܼܣܝܼܢ ܗܼܘܘ ܗ̄ ܠܥܼܠ ܡܢܼܗܘܿܢ ܕܦܪ̈ܨܘܼܦܐ. ܬܪܝܢ ܢܩܝܼܦܝܼܢ ܗ̄ ܬܪܝܢ ܠܥܼܠ ܡܼܢ
                    ܐܦܝ̈ܗܝܢ ܬܪܝܼܨܝܼܢ ܗܼܘܘ ܘܡܟܿܣܝܢ ܗܼܘܘ ܠܗܘܿܢ ܟܕ ܢܩܝܼܦܝܼܢ ܠܚܕ̈ܕܐ ܘܬܪܝܢ ܐܚܪ̈ܢܐ ܥܠ
                    ܓܘܼܫܡܗܘܿܢ ܦܪܝܼܣܝܼܢ ܗܼܘܘ ܘܡܟܿܣܝܢ ܠܗ. ܘܠܘܼܩܒܠܗܘܿܢ ܐܙܠ̈ܢ ܗܼܘ̈ܝ ܟܪ ܕܒܿܥܐ ܗܼܘܐ ܗ݀ܘ
                    ܕܡܿܕܒܪ ܗܼܘܐ ܠܗܝܢ. ܠܗܿܢܐ ܓܝܪ ܩܿܪܐ ܪܘܼܚܐ. ܠܐ ܕܝܢ ܡܬܗܼ̈ܦܟܢ ܗܼܘ̈ܝ ܡܛ݀ܠ ܕܟܠܿܠܦܢ̈ܝܢ
                    ܐܦ̈ܐ ܐܝܼܬ ܗܼܘܐ ܠܗܝܢ ܘܐܝܟ ܕܡܚܝܼܪ ܗܼܘܐ ܘܒܿܥܐ ܗܿܘ ܕܪܟܝܼܒ ܥܠ ܡܪܟܒܼܬܐ ܘܐܦ ܗܼܢܝܢ
                    ܚܝܘ̈ܬܐ ܐܙܠ̈ܢ ܗܼܘ̈ܝ. 
            
            
                 ܐܝܟ ܚܼܙܐ ܕܓܘܼܡܪ̈ܐ ܗ̄ ܒܝܕ ܚܙܼܬܐ ܗܿܕܐ ܡܒܿܕܩ ܥܠ ܫܒܝܼܚܘܼܬܐ ܕܓܠܝܢܐ.
                    ܕܡܙܗܪ ܥܡ ܢܘܼܪܐ ܗ̄ ܠܚܪܝܼܦܘܼܬܐ ܕܡܣܡ ܒܪܝܼܫܐ ܡܿܘܕܥ. ܘܐܝܟ ܚܼܙܘܐ ܕܙܝܼܩܬܐ ܕܒܙܒܼܢܐ
                    ܙܥܘܿܪܐ ܠܟܿܠܕܘܼܟ ܡܿܛܐ ܒܝܕ ܢܫܼܒܗ. ܙܝܼܩܐ ܓܝܪ ܐܝܼܬܘܗܝ ܐܐܪ ܩܛܝܼܢܐ ܐܡܼܬܝ ܕܠܝܬ ܥܢܼ̈ܢܐ
                    ܘܫܿܦܐܼ ܫܡܿܝܐ. ܘܐܝܼܬ ܒܗ ܩܪܝܼܪܘܼܬܐ. ܘܐܡܼܬܝ ܕܐܝܼܬ ܓܠܝܼܕܐ ܥܠ ܐܪܥܐ. ܢ݀ܣܒ ܐܢܫ ܪܓܫܬܗ ܡܐ
                    ܕܡܿܗܠܟ ܐܢܫ ܒܐܘܼܪܚܐ. ܬܘܼܒ ܙܝܼܩܐ ܐܝܼܬܘܗܝ ܟܘܟ̈ܒܐ ܕܟ݀ܫܛܝܼܢ. ܡܿܕܝܢ ܟܫ̈ܛܐ ܕܡܬܼܚܙܝܢ
                    ܒܐܐܪ ܐܝܼܬܝܗܘܿܢ ܙܝܼܩ̈ܐ. ܘܚܙܝܿܬ ܚܝܘ̈ܬܐ ܘܗܿܐ ܓܝܓ̈ܠܐ ܗ̄ ܕܘܼܡܪܐ ܠܡ ܗܿܢܐ ܗܼܘܐ. ܕܒܙܼܒܢ
                    ܚܿܙܐ ܗܼܘܐ ܠܓܝ̈ܓܠܐ ܥܠ ܐܪܥܐ ܘܒܙܼܒܢ ܐܝܟ ܗ݀ܘ ܕܒܿܐܐܪ ܦܿܪܚܝܼܢ ܟܕ ܒܗܿܕܐ ܥܠ ܩܠܝܼܠܘܼܬܐ
                    ܕܪܡܼܙܗ ܕܒܪܘܿܝܐ ܡܒܿܕܩ ܕܫܠܝܼܛ ܒܫܡܿܝܐ ܘܒܐܪܥܐ܆ ܐܝܟ ܚܼܙܘܐ ܕܬܪܫܝܼܫ ܗ̄ ܬܪܫܝܼܫ ܟܐܦܐ ܗ݀ܝ
                    ܘܕܡܿܐ ܓܘܢܗܿ ܠܢܘܼܪܐ ܐܘܿ ܠܢܚܿܫܐ ܣܩܝܼܠܐܼ. ܘܕܡܘܼܬܐ ܚܕܐ ܠܐܪܒܥܬܝܗܝܢ ܒܝܕ ܦܪ̈ܨܘܼܦܐ
                    ܘܓܦܼ̈ܐ ܘܐܝܼܕ̈ܝܐܐܡܿܪ ܕܫܿܘܝܢܼ ܗܼܘܘ ܘܠܘ ܒܟܿܠܗܝܢ. ܐܝܟ ܓܝܓܠܐ ܒܓܘ ܓܝܓܠܐ ܗ̄ ܕܗܿܟܢܐ ܗܼܘܐ
                    ܠܡ ܬܘܼܩܢܐ ܕܓܝ̈ܓܠܐ. ܠܘ ܚܕ ܝܼܚܝܼܕܝܐ ܘܦܫܝܼܛܐ ܐܝܼܬ̄ܘ ܗܼܘܐ ܐܠܐ ܒܓܘ ܚܕ̈ܕܐ ܩܒܝܼܥ̈ܢ
                    ܗܼ̈ܘܝ ܘܚܕܐ ܒܚܕܐ ܐܝܼܬܝܗܝܢ ܗܼܘ̈ܝ. ܕܦܢܿܝܐ ܗܼܘܬ݀ ܪ̈ܝܼܫܝܬܗܝܢ ܗ̄ ܪܝܼܫܝܬܐ ܕܚܝ̈ܘܬܐ ܐܡܿܪ
                    ܠܘ ܕܓܝ̈ܓܠܐ ܗ݀ܢܝܢ ܓܝܪ ܚܝܘ̈ܬܐ ܐܬܝ̈ܢ ܗܼܘ̈ܝ ܠܘܩܕܡ ܘܟܢ ܓܝ̈ܓܠܐ ܒ݀ܬܪܗܝܢ. ܟܕ ܩܿܪܐ
                    ܪܝܼܫܝܿܬܐ ܠܦܪܨܘܼܦܐ ܕܒܪܢܫܐ ܗܿܘ ܕܐܝܼܬ ܗܼܘܐ ܠܟܿܠ ܚܕܐ ܚܕܐ ܡܼܢ ܚܝܘ̈ܬܐ ܐܟܡܿܢ ܕܗܘܼ
                    ܠܘܼܩܕܡ ܡܫܿܪܐ ܗܼܘܐ ܠܡܐܼܙܠ ܠܐܝܿܟܐ ܕܨ݀ܒܐ ܗܼܘܐ ܡܕܒܪܢܐ ܕܡܪܟܼܒܬܐ ܕܢܐܼܙܠ ܘܗܼܢܘܢܿ
                    ܦܪ̈ܨܘܼܦܐ ܐܚܪ̈ܝܐ ܕܚܝܘ̈ܬܐ ܒܿܬܪܗ. ܘܪܘܡܐ ܐܝܼܬ ܠܚܨܗܝܢ ܗ̄ ܡܛ݀ܠ ܕܐܝܼܬ ܗܘܼܐ ܠܗܝܢ ܪܘܡܐ
                    ܕܚܨ̈ܐ ܐܦ ܡܬܼܚ̈ܙܝܢ ܗܼ̈ܘܝ ܕܐܝܼܬܝܗܝܢ ܪܘܪ̈ܒܬܐ ܘܫܒܝܼܚ̈ܬܐ ܡܿܠܐܼ ܗܼܘܐ܆ ܥܝ̈ܢܐ ܗ̄ ܡ̈ܠܝܢ
                    ܗܼ̈ܘܝ ܐܦ ܥܝ̈ܢܐ ܒܚܨ̈ܝܗܝܢ ܗܿܢܝܢ ܕܡܒܕ̈ܩܢ ܗܼܘ̈ܝ ܥܠ ܝܼܕܥܬܐ ܘܚܙܼܬܐ ܕܩܢ̈ܝܢ ܗܼ̈ܘܝ ܒܟܿܠܗ
                    ܓܘܼܫܡܗܝܢ ܗܿܝ ܕܦܐܝܐ ܗܼܘܬ݀. ܡܼܢ ܡܢܿܬܐ ܗ̄ ܕܡܠܝܼܠܘܼܬܐ ܕܒܪܢܫܐ ܠܡܣܼܟܠܘܼ ܐܦ ܥܠ ܗܿܠܝܢ
                    ܐܚܪ̈ܢܝܬܐ ܐܝܿܠܝܢ ܕܗܼܘ ܒܝܼܕܥܬܐ ܕܡܠܝܼܠܘܼܬܗ ܒܡܕ̄ܒܪܢܘܪܗ ܕܥܠܝܗܝܢ ܡܿܩܢܐ ܗܼܘܐ ܠܗܝܢ ܡܼܢ
                    ܝܼܕܥܬܗ. ܘܡܬܼܚ ܠܥܼܠ ܡܼܢ ܪܝܼܫܐ ܕܩܪܘܿܣܛܠܘܿܣ ܕܚܝܼܠܐ ܗ̄ ܡܒܿܕܩ ܗܼܘܐ ܒܝܕ ܗܿܕܐ ܕܟ݀ܠܗܝܢ
                    ܕܬܡܿܢ ܕܡ̈ܘܬܐ ܗܼܘ̈ܝ ܘܠܐ ܗܼܘܐ ܓܘܼܫܡܐ ܫܪܝܼܪܐ. ܐܟܚܕܐ ܕܝܢ ܘܡܚܘܐ ܕܠܥܼܠ ܡܢܼܗܝܢ ܕܚܝ̈ܘܬܐ
                    ܥܠ ܪ̈ܝܼܫܝܗܝܢ ܣܝܼܡܐ ܗܼܘܬ ܡܪܟܒܼܬܐ ܗܿܝ ܕܕܡܿܝܐ ܗܼܘܬ݀ ܠܩܪܘܣܛܠܘܣܿ. ܘܝܬܝܼܒ ܗܼܘܐ ܥܠܝܗܿ
                    ܡܕܒܪܢܐ ܘܠܘ ܥܠ ܐܪܥܐ ܒܿܬܪܗܝܢ ܕܚܝ̈ܘܬܐ. ܘܬܚܘܼ̈ܬܘܗܝ ܗ̄ ܬܚܘܼܬܘܗܝ ܠܡ ܕܩܪܘܿܣܼܛܠܘܿܣ ܗܿܘ
                    ܕܐܝܼܬܘ ܗܼܘܐ ܚܙܼܬܐ ܕܚܝܼܠܬܐ ܒܝܕ ܓܘܢܗ ܡܫܼܘܝ ܗܼܘܐ ܐܝܟ ܒܐܡܐ ܡܕܡ ܠܡܘܬܒܗ ܕܡܕܒܪܢܐ.
                    ܩܪܘܿܣܛܠܘܿܣ ܗ̄ ܟܐܦܐ ܗܿܝ ܚܘܪܬܐ ܘܡܼܢ 
            
            
                 ܓܠܝܼܕܐ ܕܡܬܼܩܫܐ ܗܿܘܝܐ ܘܓܘܢܗܿ ܨܠܝܼܠ ܘܐܝܟ ܡ̈ܝܐ ܨܠ̈ܝܼܠܐ ܘܓܠܝܼܕܐ
                    ܒܠܫܼܢܐ ܝܘܢܝܐ ܐܡܿܪܝܼܢ ܕܩܪܘܿܣܛܠܘܿܣ ܟܪ ܕܩܘܼܪܫܐ ܐܝܼܬ. ܓܦܝ̈ܗܝܢ ܗ̄ ܓܦܼ̈ܝܗܝܢ ܕܚܝܘ̈ܬܐ
                    ܬܪܝܼܨܝܼܢ ܗܼܘܘ ܘܚܕ ܠܘܼܩܒܠ. ܡܼܢ ܠܥܼܠ ܗ̄ ܗܿܕܐ ܡܠܦܐ ܕܒܗܘܿܢ ܒܓܦܼ̈ܝܗܝܢ ܠܥܼܠ ܡܼܢ
                    ܪ̈ܝܼܫܝܗܝܢ ܛܥ̈ܝܼܢܢ ܗܼܘ̈ܝ ܠܗ ܚܝܘ̈ܬܐ ܠܡܘܬܒܗ ܕܡܕܒܪܢܐ ܘܥܡ ܗ݀ܝ ܕܫܘܼܥܒܕܐ ܕܚܝܘ̈ܬܐ ܪ̈ܡܙܢ
                    ܬܬܝܼܕܥܝ ܬܘܼܒ ܐܦ ܪܒܘܼܬܐ ܕܐܝܼܩܪܗ ܕܡܕܒܪܢܐ ܬܪܝܢ ܡܟܣܿܝܢ ܗ̄ ܗ݀ܝ ܕܡܟܿܣܝܢ ܠܗܝܢ ܡܿܘܕܥ
                    ܕܟܐܡܬ݀ ܪ̈ܝܼܫܝܗܝܢ ܕܚܝܘ̈ܬܐ ܡܟܣܿܝܢ ܒܠܚܘܿܕ. ܘܗ݀ܝ ܕܡܟܿܣܝܢ ܠܗܝܢ ܡܿܘܕܥ ܕܟܐܼܡܬ݀
                    ܪ̈ܝܼܫܝܗܝܢ ܕܚܝ̈ܘܬܐ ܡܟܣܿܝܢ ܒܠܚܘܼܕ ܘܗ݀ܝ ܕܡܟܣܿܝܢ ܓܘܼܫܡ̈ܝܗܝܢ ܥܠ ܓܘܼܫܡܐ ܗ݀ܘ ܕܠܬܚܼܬ ܡܼܢ
                    ܦܪܨܘܪܦܐ ܘܪܝܼܫܐ ܣܝܼܡ ܗܘܐ. ܘܫܡܿܥܬ ܩܾܿܠܐ ܕܓܦ̈ܝܼܗܝܢ ܗ̄ ܕܚܝܘ̈ܬܐ܆ ܐܝܟ ܩܿܪܐ ܕܡ̈ܝܐ ܗ̄
                    ܬܚܘܝܼܬܐ ܗܿܝ ܡܼܢ ܐܝܿܠܝܢ ܕܡܥ̈ܠܝܢ. ܐܝܟ ܩܿܠܐ ܕܐܠܗܐ ܗ̄ ܐܝܟ ܕܦܿܐܐܼ ܘܠܿܚܡ ܠܐܠܗܐ ܡܐ
                    ܕܡܡܿܠܠ ܐܝܟ ܩ݀ܠܐ ܕܥܠ ܛܘܘܪ ܣܝܼܢܝ. ܘܐܝܟ ܩܿܠܐ ܕܡܡܠܠܐ ܗ̄ ܬܚܘܝܼܬܐ ܗܿܝ ܕܐܦ ܗܿܕܐ ܕܛܒܿ
                    ܪܒܐ ܕܡܣܗܕܐ ܥܠ ܕܚܝܼܠܘܼܬܗ ܕܩܿܠܐ ܘܗ݀ܘ ܕܡܼܢ ܙܘܥܼܬܐ ܘܗܠܼܟܬܐ ܕܝܼܠܗܝܢ ܡܫܼܬܡܥ ܗܼܘ ܘܡܐ
                    ܕܡܐܡ̈ܢ ܗܼܘ̈ܝ ܡܫܠ̈ܝܢ ܗܼܘ̈ܝ ܓܦܼ̈ܝܗܝܢ. ܘܗܼܘܐ ܩܿܠܐ ܡܼܢ܆ ܡܼܢ ܩܿܠ ܙܘܥܡܐ ܕܡܼܢ ܪܘܡܐ
                    ܘܢܩܼܕܘܼܬܐ ܕܝܼܠܗ ܕܬܛܠܝܼܠܐ ܡܬܝܼܠܕ ܗܼܘܐ ܢܩܫܐ ܕܓܦܼ̈ܐ ܕܚܝ̈ܘܬܐ. ܐܘܿ ܠܦܘܼܩܕܢܐ ܕܒܝܕ ܩܿܠܐ
                    ܡܼܢ ܗܿܝ ܕܠܥܼܠ ܝܬܝܼܒ ܗܿܘܐ ܗܼܘ ܠܘܿܬܗܝܢ ܐܘܿ ܕܢܫܠܼ̈ܝܢ ܐܘܿ ܕܢܗܠ̈ܟܢ ܘܠܥܼܠ ܡܼܢ ܡܐܛܠܐ.
                    ܐܝܼܬ ܗܼܘܐ ܗܿܟܝܼܠ ܠܥܼܠ ܡܼܢ ܪܝܼܫ ܓܦܼ̈ܐ ܕܚܝܘ̈ܬܐ ܐܝܟ ܬܛܠܝܼܠܐ ܡܕܡ ܘܒܐܡܐ ܕܡܫܘܝܐ. ܘܠܥܼܠ
                    ܡܢܼܗܿ ܒܡܼܨܥܬܐ ܐܝܟ ܕܠܒܼܬܐ ܕܣܦܝܼܠܐ ܘܠܥܼܠ ܡܼܢ ܟܐܼܦܐ ܗܿܕܐ ܕܡܘܼܬ ܟܘܼܪܣܝܐ ܕܥܠܘܗܝ ܝܬܝܼܒ
                    ܗܼܘܬ ܗܿܝ ܕܡܘܼܬ ܕܒܪܢܫܐ. ܣܦܝܼܠܐ. ܓܘܢܐ ܕܫܡܿܝܐ. ܘܐܝܟ ܕܡܘܼܬܐ ܕܟܘܼܪܣܝܐ ܗ̄ ܠܥܼܠ ܡܢܼܗ ܐܦ
                    ܗܿܕܐ ܡܒܕܩܢܝܼܬܐ ܗܿܝ ܕܗܘܼܝܘܼ ܗ݀ܘ ܕܐܬܼܚܙܝܼ ܒܛܘܼܪ ܣܝܼܢܝ ܠܫܒܥܝܼܢ ܣܒ̈ܐ ܟܕ ܬܚܝܬ ܪ̈ܓܠܘܗܝ
                    ܠܒܼܬܐ ܕܣܦܝܼܠܐ. ܘܚܙܝܿܬ ܐܝܟ ܚܼܙܘܐ ܕܐܠܗܐ ܗ̄ ܠܘ ܚܼܙܐ [] ܐܚܪܢܐ ܣܛܪ ܡܼܢ ܗ݀ܘ ܕܝܬܝܼܒ ܥܠ
                    ܟܘܼܪܣܝܐ ܐܡܿܪ ܐܠܐ ܠܗ ܡܦܫܿܩ ܡܚܿܘܐ ܕܚܙܼܘܐ ܠܡ ܐܝܼܬܘܗܝ ܗܼܘܐ ܘܓܠܝܢܐ ܕܐܠܗܐ ܘܠܘ ܒܪܢܫܐ
                    ܕܫܪܪܐ܆ ܘܐܝܟ ܚܼܙܐ ܕܢܘܼܪܐ ܗܿܝ ܠܗ݀ܝ ܕܡܘܼܬܐ ܕܒܪܢܫܐ ܢܘܼܪܐ ܡܬܼܚ̄ܙܝܐ ܗܼܘܬ ܕܟܪܝܼܟܐ ܠܗܿ
                    ܡܼܢܟ݀ܠ ܓܒ̈ܝܼܢ ܘܠܐ ܝ݀ܩܕܐ ܗܘܬ݀.. ܡܼܢ ܚܼܙܐ ܕܚܨ̈ܘܗܝ܀ ܕܟܿܪܟ ܠܗ ܗ̄ ܒܗ݀ܝ ܕܐܡܼܪܗ ܚܙܼܘܐ
                    ܕܐܠܗܐ. ܘܢܘܼܪܐ ܡܼܢ ܟܿܠܕܘܼܟ ܚܕܝܼܪܐ ܗܘܼܬ ܠܗ. ܐܘܕܥ ܥܠ ܕܚܝܼܠܘܼܬܗ ܕܓܠܝܢܐ ܘܥܠ ܪܒܘܼܬܗ
                    ܕܐܠܗܐ. ܗ݀ܘ ܕܒܓܠܝܢܐ. ܐܬܚܼܙܝܼ ܠܬܘܼܪܨܐ ܕܐܝܿܠܝܢ ܕܒܗ ܒܙܒܼܢܐ ܚܫ̈ܚܢ ܗܼܘ̈ܝ ܘܠܒܘܼܕܩܐ
                    ܕܗܿܠܝܢ ܕܒܿܬܪ ܙܒܢܼܐ ܥܬܝܼܕܗܢ ܗܼܘ̈ܝ ܠܡܬܓܼܠܝܘܼ. ܟܕ 
            
            
                 ܒܗܿܝ ܕܐܡܼܪ ܕܡܘܼܬܐ ܘܚܙܼܘܐ ܕܒܪܢܫܐ. ܘܬܘܼܒ ܚܙܼܘܐ ܕܐܠܗܐ ܘܕܢܘܼܪܐ ܐܪܙܐ
                    ܗܿܝ ܕܡܼܬܒܪܢܫܢܘܼܬܗ ܕܡܠܼܬܐ. ܟܕ ܒܗܿܝ ܕܡܼܢ ܚܨܘ̈ܗܝ ܘܠܥܼܠ ܘܡܼܢ ܚܨ̈ܘܗܝ ܘܠܬܚܼܬ ܪܫܡ. ܕܡܼܢ
                    ܐܠܗܘܼܬܐ ܘܐܢܫܘܼܬܐ ܚܕ ܒܪܐ ܘܚܕ ܟܝܿܢܐ ܡܒܼܪܣܐ ܐܬܚܼܙܝܼ ܒܚܪܬ ܙܒܢܼ̈ܐ. ܘܐܝܟ ܚܙܼܘܐ ܕܩܫܼܬܐ
                    ܕܗܿܘܝܐ ܒܥܢܼ̈ܢܐ ܗ̄ ܐܝܿܟܢܐ ܓܝܪ ܕܩܫܼܬܐ ܚܕܐ ܐܝܼܬܝܗܿ ܘܡܼܢ ܝܿܠܝܢ ܕܡܫܚܠ̈ܦܢ ܒܓܘܢܐ
                    ܐܝܼܬܘܗܝ ܪܘܼܟܒܗܿ ܘܩܘܼܝܡܗܿ ܗܿܟܢܐ ܐܦ ܗܼܘ ܓܠܝܢܐ ܡܦܬܼܟܐ ܗ݀ܘ ܘܥܠ ܚܕܝܘܼܬܐ ܕܡܠܼܬܐ ܕܥܡ
                    ܦܓܪܐ ܪܡܿܙ. ܟܘܼܢܝܐ ܕܕܡܘܼܬܐ ܕܐܠܝܩܛܪܘܿܢ ܐܡܿܪ ܕܐܝܼܬܘܗܝ ܗܼܘܐ ܡܼܢ ܚܨ̈ܘܗܝ ܘܠܥܼܠ.
                    ܐܠܝܼܩܛܪܘܿܢ ܗ̄ ܕܗܒ ܣܐܡܐ ܡܕܡ ܡܚܠܛܐ܆ ܨܚܚܐ ܕܬܪܝܢ ܒܪܢܫܐ ܩܘܼܡ ܗ̄ ܐܡܝܼܢܐܝܼܬ ܡܬܚܼܫܚ ܐܠܗܐ
                    ܒܗܿܕܐ ܒܪܬ݀ ܩܿܠܐ ܥܡ ܗܿܢܐ ܢܒܝܐ ܕܢܚܼܘܐ ܡܘܼܟܟܐ ܘܬܚܘܼܒܘܼܬܐ ܕܟܝܿܢܗ ܕܒܪܢܫܐ ܘܕܠܐ ܡܛ݀ܠ
                    ܝܬܝܼܪܘܼܬܐ ܕܓܠܝܢܐ ܢܬܼܬܪܝܼܡ ܘܪܥܝܿܢܐ ܘܢܘܒܼܕ ܠܢܒܝܘ̄ ܘܥܠܬ݀ ܒܝܼ ܪܘܼܚܐ ܗ̄ ܥܕܡܐ ܓܝܪ
                    ܕܐܬܼܚܝܠ ܡܼܢ ܪܘܼܚܐ ܐܘܟܝܼܬ ܡܼܢ ܡܥܒܼܕܢܘܼܬܗ ܠܐ ܐܫܟܼܚ ܕܢܠܒܼܒ ܢܦܫܼܗ ܘܢܩܘܼܡ ܘܢܫܡܼܥ
                    ܐܝܿܠܝܢ ܕܡܬܼܐܡܪ̈ܢ ܠܗ. ܘܒܿܬܪ ܕܓܠܼܐ ܠܗ ܥܠ ܣܘܼܥܪܢܐ ܕܠܗ ܡܬܼܦܪܫ ܘܐܦ ܥܠ ܗܿܢܘܿܢ
                    ܕܠܘܿܬܗܘܿܢ ܡܫܼܬܕܪ ܒܕܩܼ ܠܗ ܥܠ ܓܘܼܡܕܢܘܼܬܗܘܿܢ. ܘܟܕ ܚܙܼܐ ܠܢܒܝܐ ܕܡܫܼܬܐܠ ܐܡܼܪ ܠܗ. ܠܐ
                    ܬܗܼܘܐ ܡܡܪܡܪܢ ܗ̄ ܒ݀ܥܐ ܗܼܘܐ ܕܠܐ ܢܬܢܼܒܐ ܐܝܟ ܡܘܿܫܐ ܘܐܪܡܝܐ ܘܒܗܿܠܝܢ ܫܬܼܩܗ ܠܢܒܝܐ ܘܠܐ
                    ܫܒܼܩ ܕܢܡܠܼܠ ܡܕܡ ܕܡܬܼܚܫܒ ܗܼܘܐ. ܘܚܙܝܿܬ ܘܗܿܐ ܐܝܼܕܐ ܗ̄ ܒܝܕ ܐܝܼܕܐ ܪܡܿܙ ܥܠ ܡܥܼܒܕܢܘܼܬܐ
                    ܐܠܗܝܿܬܐ ܗܿܝ ܕܗܝܼ ܚܪܩܬ݀ ܐܘܟܝܼܬ ܦܣܼܩܬ݀ ܗܿܠܝܢ ܥܠ ܝܼܣܪ̈ܠܝܐ. ܟܬܝܼܒ ܗܼܘܐ ܡܼܢ ܩܕܡܘܗܝ ܗ̄
                    ܥܦܝܼܦܘܼܬܐ ܕܟܬܝܼܒܬܗ ܥܠ ܫܪܪܗ ܡܒܕܩܐ ܒܕܡܘܼܬ ܠܘܼܚ̈ܐ ܕܣܦܼܪܗ ܕܡܘܿܫܐ. ܩܝܼ̈ܢܬܐ ܘܫܒܝܼ̈ܚܬܐ
                    ܗ̄ ܚܫܼܒ̈ܬܐ ܡܚܘ̈ܝܢ ܗܼܘ̈ܝ ܕܟܠܗ ܡܣܡ ܒܪܝܼܫܐ ܕܥܬܝܼܕ ܗܼܘܐ ܠܡܐܬܼܐ ܥܠ ܝܘܼܕ̈ܝܐ ܡܼܢ ܟܕܘܼ
                    ܚܫܝܼܒ ܗܼܘܐ ܘܡܿܢܐܼ ܘܡܬܚܡ ܘܣܝܼܡ ܒܟܪܟܐ. ܒܩܝܼ̈ܢܬܐ ܗܿܝ ܕܗܼܢܝܢ ܐܘܼܠ̈ܝܬܐ ܕܡܛ݀ܠ
                    ܒܝܼܫ̈ܬܗܝܢ ܐܿܠܝܢ ܗܼܘܘ ܝܘܼܕ̈ܝܐ ܥܠ ܢܦܫܼܗܘܿܢ ܒܡܘܼܫ̈ܚܬܐ ܘܒܩ̈ܠܐ ܕܩܝܼ̈ܢܬܐ ܡܬܼܪ̈ܟܒܢ܆
                    ܗܼܘ̈ܝ܆ ܨܚܚܐ ܕܬܠܬܐ܆ ܘܐܟܠܬܼܗ ܗ̄ ܦ݀ܩܕ ܕܢܐܟܠܝܼܘܗܝ ܠܟܪܟܐ. ܐܝܿܟܢܐ ܕܒܡܐܟܘܼܠܬܐ ܓܫܝܼܡܬܐ
                    ܪܓܫܼܬܐ ܕܣܝܒܪܬܐ ܪܘܼܚܢܝܬܐ ܢܩܒܼܠ ܗܿܝ ܕܡܢܼܗܿ ܕܝܼܕܥܬܐ ܕܟܣܝ̈ܬܐ ܡܬܼܡܠܐ ܘܣܘܼܟܠܐ ܕܐܝܠܝܢ
                    ܕܒܗ ܒܟܪܟܐ ܡܿܩܒܠ ܗܼܘܐ. ܘܗܿܢܐ ܟܪܟܐ ܓܠܝܢܐ܆ ܠܐ ܗܼܘܐ ܥܠ ܥܡܐ. ܥܡܝܼܩ ܗ̄ ܡܠܒܒ ܠܗ ܕܠܐ
                    ܢܕܚܼܠ ܘܢܟܣܼ ܠܗܿܢܘܢܿ ܕܐܫܼܬܕܪܘ ܠܘܿܬܗܘܿܢ ܠܐ ܗܼܘܐ ܥܠ ܥܡܐ ܥܡܝܼܩ ܠܫܼܢܐ ܫܕܿܪܬܟ ܕܬܩܼܢܛ
                    ܡܢܼܗܘܿܢ ܐܠܐ ܠܘܿܬ ܥܡܟ ܘܒܢ̈ܝ ܠܫܼܢܟ. ܡܛ݀ܠ ܕܐܝܿܢܐ ܕܥܡܝܼܩ ܡܡܠܠܗ 
            
            
                 ܠܐ ܦܫܝܼܩ ܠܐܚܪ̈ܢܐ ܕܢܣܼܬܟܠܘܼܢܝܗܝ ܘܝܬܝܼܪܐܝܼܬ ܐܝܿܢܐ ܕܠܓܼ ܠܫܼܢܗ. ܕܠܐ
                    ܫܿܡܥ ܐܢܬ ܡܡܠܼܠܗܘܿܢ ܗ̄ ܠܐ ܗܼܘܐ ܥܠ ܫܡܥܼܐ ܐܡܝܼܪܐ ܐܠܐ ܥܠ ܣܘܼܟܠܐ ܕܗ݀ܘ ܡܐ ܕܡܬܼܡܠܠ.
                    ܘܐܠܘܼ ܥܠܝܗܘܿܢ ܗ̄ ܡܿܘܕܥ ܒܗܿܠܝܢ ܥܠ ܡܬܬܦܝܣܢ̄ܘܼܬ ܕܥܡ̈ܡܼܐ ܢܘܼܟܪ̈ܝܐ ܕܠ̈ܫܢܐ ܘܠܐ
                    ܡܫܼܬܡܥܢܘܼܬܐ ܕܝܘܼܕ̈ܝܐ.. ܕܟܿܠܗ ܓܝܪ ܒܝܬ܆ ܘܩܿܫܐܼ ܠܒܗܿܘܢ܆ ܡܪ̈ܚܐ ܘܓܘܼ̈ܡܕܢܐ ܐܝܼܬܝܗܘܿܢ.
                    ܥܫ̈ܝܼܢܐ ܓܝܪ ܕܒܝܬ ܥܝ̈ܢܐ ܠܠܐ ܡܬܼܟܚܕܢܘܼܬ ܩ݀ܪܐ. ܘܩܫ̄ܝܘܼ ܕܠܒܼܐ ܠܠܐ ܕܚܠܼܬܐ ܕܡܼܢ ܐܠܗܐ
                    ܘܓܙܡ̈ܘܗܝ ܗܿܐ ܐܥܫܿܢܬܟ ܘܚܝܿܠܬܟ ܕܠܐ ܬܩܼܘܼܡ ܠܘܼܩܒܠܗܘܿܢ ܟܕ ܠܐ ܕܚܿܠ ܐܢܬ ܡܢܼܗܘܿܢ. ܘܡܼܢ
                    ܕܐܫܼܬܥܝܼ ܗܿܠܝܢ ܕܐܬܦܼܩܕ ܠܡܥܼܒܕ ܬܘܼܒ ܡܿܝܬܐ. ܘܫܩܠܼܬܢܝ ܪܘܼܚܐ ܗ̄ ܒܡܥܒܕܢܘܼܬܐ ܕܪܘܼܚܐ
                    ܡܼܢ ܕܘܼܟܬܐ ܠܕܘܼܟܬܐ ܡܫܿܢܐ ܗܼܘܐ ܢܒܝܐ ܒܚܘܼܫ̈ܒ̄ܘ ܡܼܢ ܡܨܥܬ݀ ܫܒܝܼܬܐ ܕܥܡܐ ܠܦܩܼܥܬܐ ܐܝܿܟܐ
                    ܕܓܠܝܢܐ ܐܬܚܼܙܝܼ ܠܗ. ܘܒܿܬܪ ܫܘܼܠܡܐ ܕܚܙܼܘܐ ܠܕܘܼܟܬܗ ܦܢܼܐ ܒܝܕ ܢܦܫܼܗ. ܒܝܕ ܪܘܼܚܐ ܗ݀ܘܕ
                    ܐܦܩܼܗ. ܘܫܡܿܥܬ ܩܿܠܐ ܗ̄ ܫܿܥ ܗܼܘܐ ܕܝܢ ܐܦ ܩܿܠܐ ܬܩܝܼܦܐ ܡܢܼܗ ܕܓܠܝܢܐ ܡܐ ܕܡܫܿܢܐ ܗܼܘ. ܗ݀ܘ
                    ܕܒܝܕ ܙܘܥܗ ܡܒܿܕܩ ܗܼܘܐ ܕܐܠܗܐ ܕܟ݀ܠܡܕܡ ܕܦܫܝܼܩ ܠܗ. ܘܡܿܙܝܼܥ ܘܡܫܚܿܠܦ ܠܟܿܠܡܕܡ ܐܝܟ ܪܒܘܼܬ
                    ܚܝܠܗ ܘܡܫܼܬܡܥ ܗܼܘܐ ܒܗ. ܬܘܼܒ ܒܩܿܠܐ ܐܦ ܩܘܼܠܣܐ ܕܐܠܗܐ ܕܡܼܢ ܗܿܢܘܿܢ ܕܐܝܟ ܡܪܟܒܼܬܐ
                    ܛܥܝܼܢܝܼܢ ܗܼܘܘ ܠܗ ܗ݀ܘ ܕܡܬܼܡܠܠ ܗܼܘܐ ܒܙܘܥܐ ܪܒܐ. ܒܗܿܝ ܕܚ̈ܝܐ ܗܼܘܘ ܘܡܠ̈ܝܼܠܐ. ܘܒܿܬܪ ܟܢ
                    ܡܚܿܘܐ ܕܟܪ̈ܘܼܒܐ ܐܢܘܿܢ ܒܝܪܼܟ ܗܼܘܐ ܐܝܼܩܪܗ ܕܡܪܝܐ ܡܼܢ ܐܬܪܗ ܗ̄ ܡܼܢ ܟܿܠܗܿ ܠܡ ܒܪܝܼܬܗ.
                    ܬܘܼܒ ܡܢ ܫܡܗܘܗܝ ܪ̈ܡܐ ܘܼܡܢ ܕܘܼܟ̈ܝܬܐ ܩܕ̈̄ ܕܡܥܡܪܗ ܢܬܒܼܪܟ ܐܝܼܩܪܗ. ܐܬܪܗ ܕܐܠܗܐ ܠܦܘܼܬ
                    ܓܫܝܼܡܘܼܬܐ ܕܡ̈ܠܐ ܫܡܿܝܐ ܡܬܐܼܡܪܐ܀ ܬܘܼܒ ܐܬܪܗ ܕܐܠܗܐ ܐܝܼܬܘܗܝ ܟܝܿܢܗ ܘܓܢܝܼܙܘܼܬܗ ܐܝܟ ܗܿܝ
                    ܕܐܡܼܪ ܒܗܘܼܫܥ ܕܐܗܿܦܘܼܟ ܠܐܬܪܝ܆ ܐ݀ܩܘܐ ܡܢܼܝ ܘܠܝ܀ ܘܐܙܿܠܬ ܒܚܐܦܐ ܕܪܘܼܚܝ ܗ̄ ܪܘܼܚܐ ܕܝܼܠܝ
                    ܡܟܿܢܐ ܠܛܝܒܘܼܬܐ ܗܿܝ ܕܫܘܪܝܐ ܗܘܬ݀ ܒܗ. ܡܐܙܼܠܬܗ ܘܡܐܬܝܼܬܗ ܒܝܕ ܗܘܢܐ ܗܿܘܝܐ ܗܘܬ݀
                    ܒܡܥܕܒܢܘܼܬܐ ܕܪܘܼܚܐ. ܗܿܟܢܐ ܐܦ ܡܦܩܼܬܗ ܕܠܩܼܥܬ ܕܡܠܝܐ ܗܘܬ݀ ܓܪ̈ܡܐ܆ ܡܿܕܝܢ ܡܥܠܼܬܗ ܘܡܦܩܼܬܗ
                    ܒܝܕ ܓܠܝܢܐ ܗܿܘܝܐ ܗܘܬ݀ ܒܝܕ ܗܘܢܗ. ܐܦܿܢ ܡܿܢ ܠܥܠ ܡܝܛܿܒܝܼܢܢ ܕܪܘܼܚܢܐܝܼܬ ܢܿܦܫܩ ܠܟܬܒܐ ܐܠܐ
                    ܬܢܢ ܩܠܝܼܠ ܐܡܼܪܢܢ. ܐܪܒܥ ܚܝܘ̈ܬܐ ܐܪܒܥܐ ܐܘܢܓܠ̈ܝܼܣܛܐ ܘܗܢܝܘܿܟܐ ܡܫܝܼܚܐ. ܘܓܦܼ̈ܐ
                    ܩܠܝܼܠܘܼܬܐ ܕܣܒܼܪܬܐ. ܘܐܪܝܐ ܪܡܿܙ ܥܠ ܠܒܝܼܒܘܼܬܐ ܕܫܠ̈ܝܼܚܐ. ܘܢܫܼܪܐ ܥܠ ܨܝܼܕܬܐ ܕܥܡ̈ܡܼܐ
                    ܘܐܒܕܢܐ ܕܫܐ̈ܕܐ. ܬܘܪܐ ܥܠ ܟܕܝܼܢܘܼܬܐ ܘܫܘܼܥܒܕܐ ܕܥܿܠܡܐ ܬܚܝܬ ܢܝܼܪܐ ܕܝܘܼ̈ܠܦܢܐ ܐܠܗ̈ܝܐ
                    ܕܡܫܝܼܚܐ. ܓܝܓ̈ܠܐ ܕܚܕܐ ܒܚܕܐ ܕܝܬܩܐ ܚܿܕܬܐ ܒܕܝܬܩܐ ܥܬܝܼܩܬܐ. ܗܠܼܟܬܐ ܕܓܝ̈ܓܠܐ ܕܚܝܘ̈ܬܐ
                    ܐܟܡܿܢ ܕܥܡ ܫܠ̈ܝܼܚܐ ܢܦܩܼܬ ܟܪܘܿܙܘܼܬܐ ܕܚܿܕܬܐ ܘܥܬܝܼܩܬܐ ܠܒܝܬ ܥܡ̈ܡܼܐ. ܪܘܼܚܐ ܚܝܬܐ
                    ܕܒܓܝ̈ܓܠܐ ܬܚܘܝܼܬܐ ܕܒܘܼܛܠܐ ܕܗܿܠܝܢ 
            
            
                 ܕܢܡܘܿܣܐ. ܘܡܢܼܒܿܬܪ ܫܒܥܐ ܗ̄ ܢܒܝܐ ܒܿܬܪ ܕܚܼܙܐ ܘܫܘܼܢܿܝܗ ܕܚܙܼܘܐ ܕܡܢܼ̈
                    ܒܬܼܪ ܟܕ ܬܡܝܼܗ ܝܘܡ̈ܬܐ ܫܒܼܥܐ ܠܥܝܼܢ ܝܘܼܕ̈ܝܐ ܕܢܪܓܼܫܘܢܼ ܐܦ ܗܼܢܘܿܢ ܒܪܒܘܼܐ ܕܐܝܿܠܝܢ
                    ܕܐܬܼܚ̈ܙܼ ܠܗ. ܕܘܩܐ ܗ̄ ܐܟܙܼܢܐ ܕܕܘܩܐ ܡܼܢ ܪܘܡܐ ܕܕܘܼܟܬܐ ܕܩܿܐܡ ܒܗܿ ܕܐܩܿ ܘܚܿܙܐ ܠܪܘܼܚܩܐ
                    ܨܒܼ̈ܘܬ ܐܝܿܠܝܢ ܕܡܛ݀ܠ ܪܚܝܼܩܘܼܬܗܝܢ ܠܐ ܡܬܼܚܪ̈ܢ ܠܣܓ̈ܝܐܐ. ܗܿܟܢܐ ܐܦ ܠܟ ܡܼܢ ܟܿܠܗܘܿܢ
                    ܝܣܪ̈ܠܝܐ ܥܠܝܿܬܟ ܘܚܙܝܐ ܕܟܣܝ̈ܬܐ ܣܡܿܬܟ ܟܕ ܡܒܿܕܩ ܐܢܬ ܠܗܘܿܢ ܐܝܿܠܝܢ ܕܡܛܝ̈ܒܢ ܠܡܐܼܬܐ
                    ܥܠܝܗܘܿܢ ܡܙܿܗܪ ܐܢܬ ܠܗܘܿܢ ܕܢܬܦܪܣܘܿܢ ܐ݀ܣܝܘܼܬܐ ܠܒܝܼܫܬܐ ܕܬܐܼܬܐ ܥܠܝܗܘܿܢ. ܐܬܿܠ ܬܘܼܩܠܬܐ
                    ܗ̄ ܬܘܼܩܠܬܐ ܠܗ ܠܡܣܿܡ ܒܪܝܼܫܐ ܕܡܿܩܒܠ ܚܛܝܐ ܚܠܦ ܚܛ̈ܗ̄ܘ ܩܿܪܐ܆ ܦܘܿܩ ܠܦܩܥܼܬܐ ܗ̄ ܡܬܦܼܩܕ
                    ܢܒܝܐ ܒܓܠܝܢܐ ܕܢܼܦܘܿܩ ܠܕܘܼܟܬܐ ܕܫܠܼܝܐ ܡܼܢ ܡܼܨܥܬ݀ ܥܡܐ. ܐܦ ܗܿܕܐ ܡܦܩܼܬܐ ܫܘܼܢܝܐ ܕܢܦܼܫܐ
                    ܘܕܗܘܢܐ ܐܝܼܬܝܗܿ ܘܠܘ ܕܦܓܪܐ. ܘܡܼܢ ܕܐܫܼܬܥܝܼ ܫܘܼ̄ܗ ܘܗܕܪܗ ܕܓܠܝܢܐ ܐܡܼܪ܆ ܥܘܿܠ ܐܬܼܚܫܒ
                    ܒܒܝܬܟ ܗ̄ ܡܛ݀ ܠܕܒܝܼ̈ܫܐ ܗܼܘܘ ܝܘܼܕ̈ܝܐ ܘܠܐ ܡܫܪܝܢ ܗܼܘܘ ܠܡܼ̈ܠܐ ܕܢܒܝܐ. ܘܡܬܼܦܩܕ ܢܒܝܐ ܕܥܡ
                    ܡܠܼܬܐ ܐܦ ܒܥܒܿܕܐ ܢܪܫܘܼܡ ܠܥܩ̈ܬܐ ܕܬܝ̈ܢ ܥܠܝܗܘܿܢ. ܚܒܘܼܫܝܐ ܕܒܒܝܬܐ ܡܒܿܕܩ ܥܠ ܫܪܟܢܐ ܕܦܼܫ
                    ܒܐܘܿܪܫܠܡ ܡܛ݀ܠ ܕܪܢܝܢ ܗܼܘܘ ܘܠܐ ܡܬܼܚܒܫܝܼܢ ܘܡܫܼܬܒܝܢ ܡܼܢ ܒܒܠ̈ܝܐ ܐܘܿ ܡܫܼܬܒܝܢ
                    ܘܡܬܼܐܠܨܝܼܢ ܒܟܦܼܢܐ ܘܥܩܼ̈ܬܐ. ܘܬܬܼܚܪܫ ܘܠܐ ܬܗܼܘܐ ܒܟܿܠܗܘܿܢ ܙܒ̈ܢܼܐ ܦܩܿܕ ܠܗ ܕܠܐ ܢܡܼܠܠ
                    ܥܡܼܗܘܿܢ ܐܠܐ ܒܗܿܠܝܢ ܝܘܡ̈ܬܐ ܕܚܒܘܼܫܝܗ ܐܟܡܿܢ ܕܚܫ̈ܚܢ ܗܼܘ̈ܝ ܗܿܠܝܢ ܒܗ݀ܘܙܒܢܼܐ ܕܒܗܝܢ
                    ܐܬܘ̈ܬܐ ܕܒܝܼܫ̈ܬܐ ܕܐܬܝ̈ ܗܼܘ̈ܝ ܥܠ ܥܡܐ ܕܪ̈ܫܝܼܡܢ ܗܼܘ̈ܝ. ܘܡܐ ܕܡܿܡܠܠ ܐܢܼܐ ܗ̄ ܗܼܘܝܬ ܝܿܕܥ
                    ܕܟܿܠܐܼ ܡܼܢ ܡܡܠܠܐ ܕܥܡܼܗܘܿܢ ܘܡܐ ܕܡܬܼܦܬܚ ܦܘܼܡܟ ܗܿܕܐ ܬܐܡܼܪ ܠܗܘܿܢ ܗܿܟܢܐ ܐܡܿܪ ܕܫܿܡܥ
                    ܢܫܡܼܥ ܗ̄ ܗܿܕܐ ܬܐܡܼܪ ܠܗܘܿܢ ܕܗ݀ܘ ܕܝ݀ܨܦ ܕܢܫܡܼܥ ܗܿܠܝܢ ܕܥܘܼܕܪܢܗ ܫܿܡܥ ܘܟܕ ܙܐܥ ܥܠ
                    ܣܢܝܿܬܗ. ܥܕܠܐ ܢܫܼܩ̄ܠܝܼܘ ܪܘܓܙܐ ܕܡܛ݀ܠ ܚܛܗ̈ܘܗܝ. ܣܒ ܠܒܼܬܐ ܗ̄ ܣܝܼܡܝܗܿ ܒܒܝܬܟ ܐܝܿܟܐ
                    ܕܡܐܓܿܨ ܐܢܬ ܒܚܘܼܫܒܟ ܨ܆ ܕܐܪܒܥܐ ܘܪܫܘܿܡ ܗ̄ ܘܪܫܘܿܡ ܒܬܪܥܝܼܬܟ ܕܐܘܿܪܫܡ ܗܝܼ ܕܣܝܼܡܐ ܩܕܡܝܟ
                    ܕܬܬܢܼܒܐ ܥܠܝܗܿ. ܘܥܒܕ ܠܗܿ ܙܘܝܼܕ̈ܢܐ ܗ̄ ܙܘܝܼܕ̈ܢܐ ܠܡܓܕܠܐ ܕܫܘܼܪ̈ܐ ܩ݀ܪܐ ܐܘܿ ܠܦܘܼܪ̈ܩܣܐ
                    ܐܘܟܝܼܬ ܒܘܪ̈ܓܐ ܕܢܿܦܩܝܼܢ ܠܒܪ ܡܼܢ ܫܘܼܪܐ. ܐ݀ܫܪܐ ܥܠܝܗܿ ܡܫܪ̈ܝܬܐ ܕܢ݀ܦܩܝܼܢ ܠܒܪ ܡܼܢ
                    ܫܘܼܥܐ. ܐ݀ܫܪܐ ܥܠܝܗܿ ܡܫܪ̈ܝܬܐ ܗ̄ ܒܢܝܼ ܡܼܢ ܛܒܝܼܢܐ ܕܡܘܼܬ ܦܪ̈ܫܐ ܕܒܒܠ̈ܝܐ ܕܡܢܼܗܘܿܢ
                    ܡܩܿܪܒܝܼܢ ܒܩܘܼܪܒܐ ܘܡܢܼܗܘܿܢ ܟܡܝܼܢܝܼܢ. ܡܼܢ ܪܘܼܚܩܐ ܒܕܘܼܟ̈ܝܬܐ ܡܣܬܪ̈ܬܐ. ܕܠܐܝܿܠܝܢ
                    ܕܒ݀ܥܝܢ ܠܡܥܼܪܩ ܒܠܝ̈ܠܘܬܐ ܨܿܝܕܝܢ. ܣܒ ܠܟ ܛܝܓܢܐ ܕܦܪܙܠܐ ܗ̄ ܬܚܘܝܼܬܐ ܩܿܢܐܼ ܗܼܘܐ ܛܝܓܢܐ
                    ܕܩܫܼܝܘܼܬܗ ܘܠܐ ܡܫܬܼܚܠܦܢܘܼܬܗ ܕܓܙܪ ܕܝܼܢܐ ܘܕܠܐ ܚܿܐܪ ܒܗܘܿܢ ܐܠܗܐ ܐܘܿ ܫܿܡܥ ܟܕ ܩܿܪܝܢ ܠܗ
                    ܠܥܘܼܕܪܢܗܘܿܢ ܐܝܟ ܕܐ݀ܦܠܐ ܒܐܣܼܬܐ ܕܦܪܙܠܐ ܥ݀ܒܪܐ ܚܼܙܬܐ ܐܘ ܩ݀ܠܐ. ܘܛܝܒܼ ܐܦ̈ܝܟ ܗ̄ ܚܘܠܐ ܠܡ
                
            
            
                 ܒܝܕ ܦܪܨܘܼܦܟ ܐܝܟ ܗ݀ܘ ܕܠܚܝܼܡ ܐܢܬ ܥܠܝܗܿ. ܟܕ ܒܗ݀ܝ ܕܛܝܓܢܐ ܐܝܼܬܘܗܝ ܗܼܘܐ
                    ܕܦܪܙܠܐ ܗ݀ܘ ܕܐܬܩܼܪܝܼ ܐܣܼܬܐ. ܕܡܝܐ ܬܘܼܒ ܥܠ ܫܘܼܢܩܐ ܕܥܡܘܪ̈ܝܗܿ ܕܡܕܝܼܢܬܐ ܡܼܢ ܩܕܡ
                    ܕܬܬܟܼܒܫܝ ܪܡܿܙ ܗܼܘܐ ܠܗܘܿܢ. ܐܡܼܬܝ ܕܡܢܼܟ݀ܠ ܓܒܝܼ̈ܢ ܒܥܠܕܒ̈ܒܐ ܚܕܝܼܪܝܢ ܗܼܘܘ ܠܗܘܿܢ
                    ܘܠܡܦܼܩ ܠܒܪ ܘܠܡܒܼܥܐ ܠܗܘܿܢ ܣܝܒܪܬܐ ܠܐ ܡܫܼܟܚܝܼܢ ܗܼܘܘ܆ ܛܝܓܢܐ. ܛܒܩܐ ܐܝܼܬܘܗܝ܀ ܕܡܟ ܥܠ܀
                    ܥܘܠܐܕܒܝܬ ܝܼܣܪܐܝܠ ܗ̄ ܫܢ̈ܝܐ ܓܝܪ ܕܫܘܼܥܒܕܐ ܕܝܼܠܗܘܿܢ ܒܝܘܡ̈ܬܐ ܕܡܓܣܗ ܕܢܒܝܐ ܡܚܿܘܐ ܗܼܘܐ
                    ܠܗܘܿܢ ܘܡܼܢ ܚܫܝ̈ܗܘܿܢ ܐܝܟ ܕܠܕܘܩܐ ܘܡܣܒܪܐ ܡܛܿܠܡ ܠܗ ܘܫܘܼܥܒܕܐ ܘܡܘܼܟܟܐ ܕܝܼܣܪ̈ܠܝܐ
                    ܘܕܝܘܼ̈ܕܝܐ. ܒܝܕ ܐܘܼܠܨܢܗ ܡܿܘܕܥ ܗܿܝ ܕܝܢ ܕܥܠܘܗܝ. ܠܘ ܥܠ ܣܛܪܗ ܐܠܐ ܥܠ ܡܫܟܼܒܗ ܐܡܿܪ. ܟܕ
                    ܓܠܝܐ ܕܠܘ ܥܘܠܐ ܢܣܿܒ ܗܼܘܐ ܥܠܘܗܝ ܐܠܐ ܡܘܼܟܟܐ ܕܡܛ݀ܠ ܥܘܠܐ. ܡܿܢܝܢ ܝܘܡ̈ܬܐ ܕܕ݀ܡܟ. ܬܠܬ ܡܐܐ
                    ܘܬܫܝܥܝܼܢ ܗ̄ ܐܝܼܬܝܗܘܿܢ ܗܿܠܝܢ ܬܚܘ̈ܝܬܐ ܕܫܢ̈ܝܐ ܬܠܬ ܡܐܐ ܘܬܫܥ̈ܝܼܢ ܕܗܿܘܝܢ ܒܥܩ̈ܬܐ
                    ܘܒܫܒܼܝܐ. ܒܝܬ ܐܬܪ̈ܘܬܐ ܕܒܒܠ̈ܝܐ ܝܼܣܪ̈ܠܝܐ ܘܝܘܼܕ̈ܝܐ. ܗܿܢܐ ܕܝܢ ܡܢܝܿܢܐ ܐܢܗܼܘ ܕܡܼܢ ܙܒܢܼܐ
                    ܗ݀ܘ ܕܐܫܼܬܒܝܼܘ ܡܼܢ ܐܬܪ̈ܘܬܐ ܕܐܬܘܼܪ̈ܝܐ ܗܿܢܘܿܢ ܥܣܼܪܐ ܫܒܼ̈ܛܐ. ܘܩܕܝܼܡ ܠܗܿܢܘܿܢ ܕܒܝܬ
                    ܝܼܗܘܼܕܐ ܫܢ̈ܝܐ ܡܐܐ ܘܬܠܬܝܢ ܘܐܪܒܥ ܢܬܚܼܫܒ. ܘܬܘܼܒ ܫܢ̈ܝܐ ܫܒܥܝܼܢ ܕܒܒ̈ܠܝܐ ܘܒܿܬܪܗܝܢ
                    ܕܡܕ̈ܝܐ ܘܕܦܪ̈ܣܝܐ ܡܫܟܼܚܐ ܕܢܣܼܬܩܡ ܘܢܬܡܼܠܐ ܡܢܝܿܢܐ ܕܫܢ̈ܝܐ ܗܿܠܝܢ ܒܫܘܼܠܡܐ ܕܙܒܢ̈ܝܗܘܿܢ
                    ܕܡ̈ܠܟܐ ܦܪܣܝܐ. ܐܡܼܬܝ ܕܐܦ ܩܘܡܐ ܕܡܠܟܘܼܬܗ ܕܐܠܟܣܢܕܪܘܿܣ ܡܩܕܘܼܢܝܐ ܗܼܘܐ ܟܕ ܪܒ ܟܗ̈ܢܐ
                    ܝܘܿܚܢܢ ܒܪ ܝܘܼܝܕܥ ܕܐܝܼܬ̄ܘ ܗܼܘܐ ܚܡܝܼܫܝܐ ܠܝܫܘܿܥ ܒܪ ܝܘܿܙܕܩ. ܐܢܕܝܢ ܠܦܘܼܬ ܡܕܡ ܕܐܡܝܼܪ
                    ܠܢܒܝܐ ܥܠ ܥܬܝܼܕ̈ܬܐ ܢܣܼܒܝܼܘܗܝ ܐܢܫ ܠܡܢܝܿܢܐ ܥܕܡܐ ܠܫܘܼܪܝܐ ܕܙܒܼ̈ܢܐ ܕܡܩܕ̈ܘܼܢܝܐ ܡܬܡܼܬܚ
                    ܙܒܢܼ̈. ܟܕ ܓܝܪ ܢܐܼܚܘܿܕ ܐܢܫ ܫܘܼܪܝܐ ܕܡܠܟܘܼܬܗ ܕܐܢܛܝܟܘܿܣ ܐܦܝܼܦܐܢܝܼܣ ܕܐܝܼܬܘܗܝ ܫܘܼܪܝܐ
                    ܩܘܡܗܘܿܢ ܕܡܩܒ̈ܝܐ ܘܥܛ݀ܦ ܒܪ ܒܣܬܪܐܝܼܬ ܥܕܡܐ ܠܡܠܟܘܼܬܗ ܕܐܠܟܣܕܪܘܿܣ ܫܢܗܝܐ ܡܐܐ ܘܬܠܬܝܢ ܘܫܒܥ
                    ܡܫܬܼܟ̈ܚܢ ܐܝܟ ܣܗܕܘܼܬܐ ܕܟܬܒܐ ܕܡܩܒ̈ܝܐ. ܘܫܢܝ̈ܐ ܕܡܠ̈ܟܐ ܦܪ̈ܣܝܐ ܕܡܼܢ ܐܠܟܣܢܕܪܘܿܣ ܘܥܕܡܐ
                    ܠܟܘܼܪܫ ܗܘ̈ܝܢ ܡܐܬܝܢ ܘܬܠܬܝܢ ܘܝܬܝܼܪ ܩܠܝܼܠ܆ ܘܬܘܼܒ ܫܒܥܝܼܢ ܕܡܕ̈ܝܐ ܘܕܒܒܠ̈ܝܐ ܐܝܟ
                    ܣܿܗܕܘܼܬܗ ܕܐܪܡܝܐ ܢܒܝܐ ܕܡܫܼܬ̈ܟܚܢ ܕܝܢ ܕܫܦ̈ܥܢ ܡܼܢ ܡܢܝܿܢܐ ܗܿܢܐ ܕܣܝܼܡ ܠܢܒܝܐ ܫܢ̈ܝܐ
                    ܐܪܒܥܝܼܢ ܒܠܚܘܼܕ ܐܠܐ ܐܡܿܪܝܼܢܢ ܕܝܬܝܼܪ̄ܘܼ ܕܫܢ̈ܝܐ ܡܼܢ ܥܠܼܬܐ ܕܗ݀ܘ ܕܐܦܩܼ ܠܟܬܒܐ ܠܣܘ̄ܪ
                    ܐܝܼܬܝܗܿ ܐܘܿ ܡܼܢ ܟܬܘܿܒ̈ܐ ܒ݀ܬܪܟܢ ܗܘܬ݀. ܐܝܟ ܗ݀ܝ ܕܟܬܝܼܒܐ ܒܝܘܢܝܐ ܫܪܝܼܪܐ ܗ̄ ܫܢ̈ܝܐ ܡܐܐ
                    ܘܬܫܥܝܼܢ. ܘܬܕܡܼܟ ܥܠ ܣܼܛܪܟ ܕܝܡܝܼܢܐ ܗ̄ ܡܼܢ ܗܿܪܟܐ ܝܼܝܕܝܼܥܐ ܕܡܼܢ ܡܼ̈ܠܐ ܕܐܡܼܪ ܕܝܘܡܐ
                    ܠܫܢܿܬܐ ܘܦܘܼܫܩܐ ܕܥܠ ܬܪ̈ܝܗܘܿܢ ܒܗܿܠܝܢ ܕܗܿܫܐ ܚܘܝܼ ܐܝܟܟܢܐ ܕܐܦ ܗܪܟܐ ܢܬܼܪܥܐ ܕܟܕ ܡܼܢ
                    ܚܘܼܪܒܐ ܐܚܪܝܐ ܕܐܘܿܪܫܠܡ ܡܫܿܪܐ ܐܝܟ 
            
            
                 ܣܗܕܘܼܬܗ ܕܡܓܣܗ ܕܢܒܝܐ ܕܥܠ ܣܛܪܗ ܕܝܡܝܼܢܐ ܡܫܬܼܠܡ ܐܦ ܗܼܘ ܒܫܢܿܬܐ ܕܝܓ̄
                    ܕܡܿܘܬܗ ܕܒܘܿܟܕܢܨܪ. ܐܚܪ̈ܢܐ ܐܡܿܪܝܼܢ ܕܡܢܝܿܐ ܕܥܘܠܐ ܗ̄ ܡܼܢ ܡܿܘܬܗ ܕܫܠܝܡܘܿܢ ܥܕܡܐ
                    ܠܓܿܠܘܿܬܗ ܕܐܦܪܝܡ ܫܢ̈ܝܐ ܬܠܬܡܐܐ ܘܚܡܫܝܢ ܗܿܘܝܢ. ܫܿܘܝܢ ܗܼܘܘ ܓܝܪ ܕܡܼܢ ܝܘܪܒܥܡ ܒܪ ܢܒܿܛ
                    ܢܫܼܬܘܘܢܿ. ܘܣܝܒܼܪ ܐܢܘܿܢ ܐܠܗܐ. ܘܠܝܘܼܕ̈ܝܐ ܣܝܒܼܪ ܐܢܘܿܢ ܐܠܗܐ. ܘܓܘܼܠܝܗ ܕܐܦܪܝܡ
                    ܘܦܘܼܪܩܢܗܘܿܢ ܕܡܼܢ ܐܬܘܪ̈ܝܐ ܟܕ ܡܪܫܿܥܝܼܢ ܐܪܒܥܝܼܢ ܫܢ̈ܝܼܢ. ܟܕ ܫܿܘܝܢ ܗܼܘܘ ܕܥܡ ܐܚܝ̈ܗܘܿܢ
                    ܢܫܼܬܒܘܿܢ. ܬܠܬܡܐܐ ܓܝܪ ܘܬܫܥܝܼܢ ܕܓܘܐ ܗܼܘ̈ܝ ܕܬܪ̈ܬܝܗܝܢ ܡܠܗܟܘܬܐ. ܘܗܿܕܐ ܗܿܟܝܼܠ ܐܡܿܪ
                    ܢܒܝܐ. ܕܐܢ ܠܟ ܥܣܩܐ ܠܡܣܼܝܒܪܘܼ ܗܿܢܐ ܩܠܝܼܠ ܙܒܢܼܐ ܝܘܡܐ ܡܼܢ ܫܢܿܬܐ. ܟܡܼܐ ܝܬܝܼܪ ܠܝܪ ܕܡܼܢ
                    ܝܘܡ̈ܝ ܝܘܪܒܥܡ ܠܥܘܠܗܘܿܢ ܘܠܪܘܼܫܥܗܘܿܢ ܣܝܒܼܪܬ. ܐܪܡܝܿܬ ܥܠܟ ܫܝܼܫܠ̈ܬܐ ܗ̄ ܒܝܕ ܦܘܼܩܕܢܝ ܠܡ
                    ܐܝܟ ܕܒܫܝܼܫܠܬܐ ܐܣܝܼܪ ܐܢܬ ܒܗܿܝ ܕܠܐ ܫܠܝܼܛ ܐܢܬ ܕܬܬܗܼܦܟ ܡܼܢ ܣܼܛܪܟ ܠܣܼܛܪܟ ܥܕܡܐ
                    ܕܫܿܠܡܝܼܢ ܝܘܡܗܬܐ ܕܐܬܬܚܼܡܘ ܠܟܿܠ ܚܕ ܡܼܢ ܥܘܠ̈ܢ ܕܬܪ̈ܬܝܗܝܢ ܟܢܘܼܫ̈ܬܐ ܒܬܠܬ ܡܐܐ ܘܬܫܥܝܢ
                    ܝܘܡ̈ܝܼܢ ܚܕܐ ܙܒܢܿܬܐ ܐܬܗܼܦܟ ܣܒ ܠܟ ܚܛ̈ܐ ܘܣܥܪ̈ܐ ܗ̄ ܦܩܼܕ ܠܗ ܬܘܼܒ ܕܠܦܘܼܬ ܥܣܼܩܘܼܬܐ
                    ܕܡܓܣܗ ܬܗܼܘܐ ܐܦ ܣܝܒܼܪܬܗ ܟܕ ܣܼܡ ܐܦ ܐܕܫ̈ܐ ܕܡܢܼܗܘܿܢ ܡܬܟܼܢܫܐ. ܟܘܼܢ̈ܬܐ ܗ̄ ܟܘܼܢ̈ܬܐ
                    ܐܡܿܪܝܼܢ ܕܚܛ̈ܐ ܓܠܝܼ̈ܠܬܐ ܐܢܝܢ ܘܒܨܝܼܪ ܘܡܡܟܟ ܠܚܡܗܝܢ ܡܼܢ ܕܚ̈ܛܐ ܐܚܪ̈ܢܝܬܐ. ܕܘܼܚܢܐ ܕܡܿܐ
                    ܠܦܝܓܢܐ ܘܕܘܼܚܢܐ ܪܒ ܩܠܝܼܠ ܡܼܢ ܟܘܼ̈ܢܬܐ. ܡܼܢ ܥܕܢܐ ܗ̄ ܡܼܢ ܪܡܫܐ ܐܘܿ ܡܼܢ ܛܗܪܐ ܠܛܗܪܐ.
                    ܗܿܠܝܢ ܐܢܘܿܢ ܥܕ̈ܢܐ ܕܝܘܡ̈ܬܐ. ܘܪܥܦܐ ܕܣܥܪ̈ܐ ܗ̄ ܦܛܝܼܪ̈ܐ ܕܡܛܘܝ ܒܟܒ̈ܝܐ ܕܒܪܢܫܐ. ܕܠܐ
                    ܬܢܘܼܪܐ ܘܕܠܐ ܬܦ̈ܝܐ ܘܡܼܢ ܡܢܿܬܐ ܕܣܥܪ̈ܐ ܪܡܿܙ. ܥܠ ܐܚܪ̈ܢܝܬܐ ܕܡܼܢ ܠܥܼܠ ܕܚ̈ܠܝܼܛܢ ܗܼܘ̈ܝ
                    ܥܡ ܣܥܪ̈ܐ ܡܒܿܕܩ ܕܝܢ ܒܝܕ ܗܿܕܐ ܥܠ ܟܦܢܘܼܬܐ ܘܡܓܙܝܘܼܬܐ ܕܐܚܿܕܐ ܒܐܘܿܪܫܠܡ. ܗ݀ܝ
                    ܕܠܥܝܢ̈ܝܗܘܿܢ ܐܝܿܟܢܐ ܕܟܕ ܚܿܙܝܢ ܢܬܓܢܼܚܘܢܼ ܢܦܫܝ ܠܐ ܗܘܬ݀ ܡܛܢܦܐ ܗ̄ ܒ݀ܥܐ ܗܼܘܐ ܢܒܝܐ
                    ܕܬܬܚܼܠܦܝ ܠܗ ܗܿܝ ܕܟܒ̈ܝܐ ܕܒܪܢܫܐ ܡܬܼܦܪܣ ܗܼܘܐ ܢܒܝܐ ܕܢܥܼܪܘܿܩ ܡܼܢ ܡܣܝܒܼ̈ܬܐ ܘܠܘ ܡܼܢ
                    ܡܐܟܘܼܠܬܐ ܕܒܣܼܪܐ ܘܥܠܗ݀ܝ ܐܡܼܪ ܕܐܢ ܒܗܿܠܝܢ ܕܐܚܪ̈ܢܐ ܡܬܼܚܫܚܝܼܢ ܒܡܐܟܘܼܠܬܐ. ܗܘܼ ܠܐ ܐܟܼܠ
                    ܐܢܝܢ ܡܛ݀ܠ ܢܩܕܘܼܬܐ ܐܝܿܟܢܐ ܒܐܝܿܠܝܢ ܕܠܟܿܠܢܫ ܓܥܝܼܨ̈ܢ ܡܿܨܐܼ ܗܼܘܐ ܕܢܬܚܼܫܚ ܘܢܥܒܼܕ ܠܗ
                    ܒܗܝܢ ܠܚܡܐ ܠܡܐܟܘܼܠܬܐ ܡܿܢܐ ܗܿܟܝܼܠ ܐܠܗܐ ܟܒ̈ܝܐ ܕܬܘܪ̈ܐ ܗ̄ ܚܠܦ ܟܒܝ̈ܐ ܕܒܪܢܫܐ. ܗܿܐ ܬܒܿܪ
                    ܐܢܼܐ ܩܢܝܐ ܕܥܒܘܼܪܐ ܠܟܿܠܗܝܢ ܐܝܿܠܝܢ ܕܡܿܨܝܢܼ ܠܡܥܒܼܕ ܩܘܼܝܡܐ ܕܚ̈ܝܐ ܠܒܪܢܫܐ ܒܝܕ
                    ܡܐܟܘܼܠܬܗܝܢ ܚܿܒܫ ܘܠܘ ܩܢܼܝܐ ܕܥܒܘܼܪܐ ܡܬܬܼܒܪ ܗܼܘܐ ܡܼܢ ܪܘܓܙܐ ܐܠܗܿܝܐ ܐܠܐ ܐܦ ܥܩܪ̈ܐ
                    ܘܦܐܪ̈ܐ ܕܐܝܼܠ̈ܢܐ ܘܚܝܘܼܬܐ ܕܐܪܥܐ܆ ܨ܆ ܕܗ̄ ܣܼܒ ܠܟ ܣܝܦܐ ܗ̄ ܡܬܼܦܩܕ ܬܘܼܒ ܠܡܓܼܪܥ ܠܪܝܼܫܗ
                    ܘܕܩܢܗ 
            
            
                 ܬܚܘܝܼܬܐ ܕܡܫܼܬܩܠܐ ܟܗܢܘܼܬܐ ܘܡܠܟܘܼ̄ ܘܝܿܩܕܐ ܘܡܬܼܚܪܒܐ ܐܘܿܪܫܠܡ ܒܝܕ
                    ܫܒܼܝܐ. ܒܣܝܦܐ ܓܝܪ ܘܠܘ ܒܡܕܟܝܐ ܐܬܦܼܩܕ ܕܢܓܪܘܿܥ ܣܥܪܗ ܕܢܚܼܘܐ ܕܡܼܢ ܒ݀ܬܪ ܟܦܢܼܐ ܚܪܒܐ
                    ܫܿܠܛܐ ܒܗܘܿܢ. ܠܬܠܬ ܡܢܘ̈ܢ ܗ̄ ܦܩܿܕ ܠܗ ܬܘܼܒ ܕܒܡܣܐܬܐ ܢܬܼܩ̄ܠܝܼܘ ܠܣܥܪܗ ܘܠܬܠܬ ܡܢ̈ܘܢ
                    ܢܦܠܓܝܼܘܗܝ. ܚܕܐ ܠܡ ܡܼܢ ܬܠܬ ܡܢܘ̈ܢ ܐܘܩܼܕ ܗ̄ ܚܕܪ̈ܝܗܿ ܕܡܕܝܼܢܬܐ ܐܘܿܪܫܠܝܡ ܗܿܝ ܕܪܫܝܼܡܐ
                    ܗܘܬ݀ ܥܠܼ ܠܒܼܬܐ ܕܟܐܦܐ ܡܒܿܕܩ ܕܝܢ ܒܝܕ ܦܘܠܓܐ ܕܬܠܬ ܡܢ̈ܘܢ ܬܪܝܼܨܘܼܬܐ ܕܝܼܠܗ ܕܦܘܠܓܐ ܗܿܝ
                    ܕܗܘܬ݀ ܒܡܣܼܐܬܐ ܕܡܬܩ̈ܠܐ ܗܿܝ ܕܠܗܿܢܘܢܿ ܡܦܿܠܓܐ ܗܘܬ݀ ܘܣܿܝܡܐ ܥܠܝܗܘܿܢ ܝܘܼܩܪܐ ܕܥܘܠܗܘܿܢ
                    ܘܡܿܘܕܥܐ ܗܘܬ݀ ܐܦ ܟܐܢܘܼܬܗ ܕܕܝܿܢܐ. ܚܕܐ ܕܝܢ ܡܢܿܬܐܐܘܩܼܕ ܒܢܘܼܪܐ ܒܓܘ ܡܕܝܼܢܬܐ ܗ̄ ܦܠܐܼܬܐ
                    ܕܗܿܢܘܿܢ. ܕܣܦܼܘ ܒܟܦܼܢܐ ܒܓܘ ܐܘܿܪܫܠܡ ܘܐܚܪܬܐ ܬܦܣܼܘܿܩ ܒܣܦܐ ܚܕܪ̈ܝܗܿ ܗ̄ ܡܢܿܬܐ ܕܡܬܼܚܪܒܐ
                    ܡܼܢ ܒܒܠ̈ܝܐ ܒܓܘ ܐܪܥܗܘܿܢ. ܘܬܣܼܒ ܡܼܢ ܬܡܿܢ ܙܥܘܪ̈ܐ ܒܡܢܝܿܢܐ. ܠܥܼܠ ܟ݀ܠܗܘܿܢ ܕܒܝܬ ܝܼܣܪܐܝܠ
                    ܗ̄ ܦܘܼܫܩܐ ܕܗܿܠܝܢ ܣܝܼܡ ܒܣܦܪ ܡܠܟܘ̈ܬܐ ܐܦ ܒܐܪܡܝܐ ܟܕ ܡܫܼܬܥܼܐ ܥܠ ܐܝܼܫܡܥܝܼܠ ܒܪ ܢܬܢܝܐ
                    ܘܙܥܘܿܪ̈ܐ ܐܝܟ ܕܒܟܢܼܦܐ ܕܢܒܝܐ ܐܬܢܼܛܘ ܡܼܢ ܚܪܒܐ ܕܒܒ̈ܠܝܐ ܒܒܛܝܼ̈ܠܘܼ ܕܐܠܗܐ. ܥܡ ܓܕܠܝܐ ܗ݀ܘ
                    ܕܗܼܘܐ ܥܠܝܗܘܿܢ ܪܝܼܫܐ. ܗܘܼ ܗܿܢܐ ܐܝܼܫܡܥܝܼܠ ܒܚܒܪ̄ܘܼ ܕܥܡܘܼܗܢܝܐ ܚܪܒܼܘ ܘܐܘܒܼܕܘ ܠܓܕܠܝܐ
                    ܘܠܐܝܿܠܝܢ ܕܥܡܗ. ܘܐܝܿܠܝܢ ܕܐܬܦܼܠܛܘ ܡܼܢ ܚܪܒܗ ܥܪܼܩܘ ܠܡܨܪܝܢ ܘܒܟܿܠ ܕܘܿܟ ܐܬܒܼܕܪܘ܆ ܘܒܗܿܝ
                    ܕܬܨܘܪ ܐܢܘܿܢ ܒܟܢܼܦܟ ܐܘܕܥ ܥܠ ܡܪܚܡܢܘܼܬܗ ܕܐܠܗܐ ܐܝܿܕܐ ܕܡܼܢ ܒܒܠ̈ܝܐ ܡܢܛܿܪܐ ܗܘܬ݀ ܠܗܘܿܢ.
                    ܒܗܿܝ ܕܣܒ ܘܐܪܡܐ ܒܓܘ ܢܘܼܪܐ ܪܡܿܙ ܥܠ ܚܣܿܡܗܘܿܢ ܘܡܪܝܼܪܘܼܬܗܘܿܢ ܕܠܘܿܬ ܚܕ̈ܕܐ ܘܝܬܝܼܪܐܝܼܬ
                    ܕܐܝܼܫܡܥܝܼܠ ܗܿܘ ܕܥܠܼܬܐ ܕܚܪܒܐ ܕܐܝܟ ܿܗܢܐ ܗܼܘܐ ܠܗܘܿܢ. ܘܗ݀ܝ ܕܡܢܼܗܘܿܢ ܬܦܼܘܿܩܝ ܚܪܒܐ
                    ܐܡܿܪ ܥܠ ܚܒܿܠܐ ܕܗܘܼܐ ܒܟܿܠܗܘܿܢ ܕܗܿܢܘܿܢ ܕܐܬܩܼܛܠܘ ܒܐܪܥܗܘܿܢ ܡܼܢ ܚܕ̈ܕܐ ܘܐܝܿܠܝܢ
                    ܕܒܡܪܕܘܼܬܐ ܕܥܠ ܐܠܗܐ ܐܝܟ ܬܘܪܬܪ̈ܐܗ ܕܒܝܼܫ̈ܬܐ ܠܒܝܬ ܡܨܪ̈ܝܐ ܢ݀ܚܬܝܼܢ ܗܼܘܘ. ܐܢܿܐ ܐܢܼܐ
                    ܕܡܿܠܠܬ ܒܛܢܢܝ ܗ̄ ܐܠܘܼ ܓܝܪ ܝܿܕܥܝܼܢ ܗܼܘܘ ܠܗ ܡܼܢ ܩܕܝܼܡ ܕܢܛܢ ܒܗܘܿܢ ܗܿܕܐ ܕܡܚܘܝܐ ܗܘܬ݀
                    ܕܠܐ ܝܕܥܘܼܗܝ ܒܗ݀ܝ ܕܫܒܩܼܘ ܢܩܦܼܗ ܘܐܫܼܬܘܬܦܘ ܠܦܬܼܟܪ̈ܐ ܐܝܿܟܢܐ ܕܡܼܢ ܗܿܕܐ ܐܬܬܼܙܝܼܥ ܕܢܼܛܢ
                    ܒܗܘܿܢ ܠܐ ܡܬܼܒܥܝܐ ܗܘܬ݀ ܠܗܘܿܢ ܝܼܕܥܬܐ ܚܪܬܐ ܕܒܝܕ ܗܿܝܢ ܕܐܝܼܬܝܗܝܢ ܕܠܩܘܼܒܠܐ ܕܚܘܼܒܐ ܗ̄
                    ܪܘܓܙܐ ܕܡܣܡ ܒܪܝܼܫܐ ܢܐܼܠܦܘܢ ܕܗܘܼܝܬ ܐܠܗܐ ܝܿܨܘܿܦܗܘܿܢ. ܗ݀ܝ ܕܡܠܿܠܬ ܒܛܢܢܝ ܗ̄ ܢܕܥܘܢܿ
                    ܡܢܼܗܘܿܢ ܕܣܘܼܥܪ̈ܢܐ ܕܠܘ ܒܡܠܼܬܐ ܗ݀ܘ ܛܢܼܢܝ ܕܒܗܘܿܢ ܒܠܚܘܿܕ ܐܠܐ ܒܥܿܒܕ̈ܐ. ܐܡܼܪܗܿ ܕܝܢ
                    ܠܗܿܕܐ ܡܼܢ ܕܡܘܼܬܐ ܕܐܝܿܢܐ ܕܓܝܪܐ ܐܢܬܬܗ ܕܩܕܡܐܝܼܬ ܒܡܠܼܬܐ ܓܠܼܐ ܥܠ ܛܢܢܼܐ ܕܒܗܿ. ܘܒܿܬܪ
                    ܕܐܬܓܠܝܬ݀ ܙܢܝܘܼܬܗܿ ܛܪ ܕܠܗܿ ܡܼܢ ܒܝܬܗ ܘܒܿܬܪ ܕܐܡܼܪ ܥܠ ܚܪܒܗܿ ܕܡܕܝܼܢܬܐ ܨ܆ ܕܘ̄܆ ܣܝܼܡ
                    ܐܦܝ̈ܟ ܠܛܘܼܪܐ ܗ̄ ܡܬܢܼܒܐ ܥܠ ܛܘܼܪ̈ܐ ܕܒܗܘܿܢ ܡܕܒܚܝܼܢ ܗܼܘܘ ܠܦܬܼܟܪ̈ܐ 
            
            
                 ܫܢܝܗܝ ܡܟܝܼܠ ܠܚܝܿܪܟ ܡܼܢ ܨܝܕ ܠܒܼܬܐ. ܘܐܬܢܼܒܐ ܥܠ ܛܘܼܪ̈ܐ ܕܡܫܼܬܒܝܢ
                    ܥܡܘܪ̈ܝܗܘܿܢ ܘܦܝܿܫܝܼܢ ܡܕܒܚܐ ܕܒܿܢܝܢ ܒܗܘܿܢ ܟܕ ܫܿܗܝܢ ܘܒܛܝܼܠܝܼܢ ܡܼܢ ܕܒܚ̈ܐ. ܘܦܪ̈ܟܐ ܗ̄
                    ܦܪ̈ܟܐ ܩܪܐ ܠܒܢܝܬܐ ܡܕܡ ܕܐܝܼܬܝܗܿ ܐܝܟ ܐܣܛܘܼܢܐ ܕܒܫܡ ܐ̈ܠܗܐ ܙܥܘܪ̈ܐ ܒܢܝܐ. ܩܘܿܫ ܒܟܦܟ ܗ̄
                    ܐܦ ܗ݀ܕܐ ܒܥܒܿܕܐ ܣܥܼܪ ܠܗܿ ܢܒܝܐ ܠܥܝܼܢ ܟܿܠܢܫ. ܢܩܫ ܟܦܐ ܘܪܦܣܼܐ ܕܪ̈ܓܠܼܐ ܐܬܘ̈ܬܐ ܐܢܝܢ
                    ܕܚܕܘܼܬܐ ܕܒܝܬ ܒܢܝ̈ܢܫܐ ܒܙܼܒܢ ܕܝܢ ܗܘ̈ܝܢ ܫܿܢܝܐܝܼܬ ܒܥܿܩܬܐ ܕܡܝܼ̈ܬܐ. ܘܐܡܼܪ ܐܢܝܢ ܗ̄ ܥܠ
                    ܚܕܘܼܬܐ ܡܿܘܕܥܐ ܒܗܿܠܝܢ ܕܦ݀ܩܕ ܠܢܒܝܐ ܕܢܚܼܕܐ ܐܠܦܼܗ ܕܢܼܚܘܝ̄ܘ ܠܥܡܐ ܕܒܩܿܠܝܼܬܐ
                    ܘܒܬܪܝܼܨܘܼܬܐ ܐܬܝ̈ܢ ܥܠܘܗܝ ܥܩ̈ܬܐ ܐܝܼܬܝܗܝܢ ܦܘܼܪܥܢܐ ܕܥܒܿܕܘ̈ܗܝ ܛܢ̈ܦܼܐ ܘܐܝܟ ܗ݀ܘ ܕܗܿܕܐ
                    ܐܡܿܪ ܢܒܼܝܐ ܒܗܿܝ ܕܐܚܼܢ ܕܚ̈ܝܐ ܠܡ ܘܢܝܿܚܐ ܪܒܐ ܡܬܼܬܘܣܦ ܠܝܼ ܒܐܒܕܢܗܘܿܢ ܥܠ ܟܿܠܗܿ
                    ܒܝܼܫܘܼܬܐ ܕܒܝܬ ܝܼܣܪܐܝܠ ܕܒܚܪܒܐ ܗ̄ ܚܪܒܐ ܩܿܪܐ ܠܣܝܦܐ ܘܟܦܼܢܐ ܘܡܘܬܢܐ ܐܘܿ ܠܗ ܠܡܿܘܬܐ ܕܡܼܢ
                    ܥܠܠܬܐ ܐܝܿܠܝܢ ܕܗܼܢܝܢ ܗܼܘ̈ܝ ܠܗܘܿܢ܀ ܨܚܚܐ ܕܙܙ̄ ܕܡܛܝ ܣܘܦܐ ܗ̄ ܣܘܦܐ ܫܘܼܠܡܐ ܕܗܿܠܝܢ
                    ܕܦܩܝܼܕ̈ܢ ܩܨܐ ܦܣܿܩܐ ܘܬܚܘܼܡܐ ܐܝܼܬܘܗܝ ܕܨܒܼ̈ܘܬܐ ܐܝܿܠܝܢ ܕܦܩܝܼ̈ܕܢ ܐܘܿ ܡܛܝܒ̈ܢ ܠܡܗܼܘܐ
                    ܘܐܡܿܪ ܗܧܿܪܟܐ ܕܙܒܼܢܐ ܠܡ ܫܘܼܠܡܐ ܕܐܝܿܠܝܢ ܕܦܩܝܼ̈ܕܢ ܠܝܼ ܥܠܝܗܘܿܢ ܕܝܼܣܪܗܠܝܐ ܡܛܝܼ ܠܗ ܗ݀ܘ
                    ܕܠܟܿܠܗܿ ܐܪܥܗܘܿܢ ܠܐܪܒܥ ܦܢ̈ܝܬܗܿ ܡܚܒܠ ܘܡܿܘܩܕ ܩܨܼܐ ܐܬܿܐ ܗ̄ ܥܠܝܟܝ ܠܘ ܕܡܚܕܐ ܐܠܐ ܕܡܥܝܼܩ
                    ܘܐ݀ܬܐ ܨܝܼܦܪܐ ܗ̄ ܒܒܿܠܝܐ ܗ݀ܘ ܕܒܐܝܼܕ̈ܘܗܝ ܡܫܼܬܠܡ ܩܼܨܐ ܩ݀ܪܐ ܠܗ ܠܡܠܟܐ ܕܒ݀ܒܝܠ ܨܝܼܦܪܐ
                    ܡܛ݀ܠ ܕܬܙܝܼܪܙ ܗܼܘܐ ܘܩܫܐ ܘܡܪܚ ܗܿܟܢܐ ܓܝܪ ܐܝܼܬܝܗܘܿܢ ܨܝܼܦܪ̈ܝܐ ܒܥ̈ܢܐ. ܥܡܘܿܪܐ ܩܼܪܝܗܝ
                    ܡܛ݀ܠ ܙܥܘܿܪܘܼܬ ܙܒܢܼܗ ܬܘܼܒ ܡܛ݀ܠ ܕܠܗ ܒܠܚܘܼܕܘܗܝ ܐܬܝܗܼܒܬ݀ ܐܪܥܐ ܒܙܒܢܼܐ ܗ݀ܘ ܠܫܘܼܥܒܕܐ
                    ܘܗܘܼܝܘܼ ܫܠܝܼܛܠܡܥܼܡܪ ܒܗܿ. ܢܦܩܼ ܠܡ ܨܝܼܦܪܝܐ ܘܒܠܼܨ ܚܘܼܛܪܐ ܗ̄ ܐܬܓܠܝܼ ܘܐܬܚܼܙܝܼ
                    ܫܘܼܠܛܢܗ. ܒܕܡܘܼܬ ܡܘܥܝܼܬܐ ܕܐܪܥܐ ܘܦܪܥܼ ܨܥܪܐ ܗ̄ ܕܗܘܼ ܠܡ ܡܠܟܐ ܕܒܒܿܝܠ ܕܝܼܢܐ ܘܨܥܪܐ ܥܒܼܕ
                    ܡܢܼܗܘܿܢ ܡܛ݀ܠ ܗܿܝ ܕܡܼܪܕܘ ܥ̄ܠܘ ܘܥܘܠܐ ܩܼܡ ܗ̄ ܐܝܿܟܢܐ ܢܩܼܪܝܘܗܝ ܚܘܼܛܪܐ ܠܡܠܟܐ ܕܒܿܒܝܠ
                    ܗܿܟܢܐ ܐܦ ܠܡܠܟܐ ܕܝܘܼܕ̈ܝܐ ܘܐܡܿܪ ܕܡܣܡ ܒܪܝܼܫܐ ܕܥܘܠܗ ܕܨܕܩܝܐ. ܩܼܡ ܥܠ ܚܘܼܛܪܗ ܕܥܘܠܐ ܗ̄
                    ܥܠ ܫܘܼܠܛܢܗ ܕܨܕܩܝܐ ܥܘܼܠܐ. ܗ݀ܝ ܕܩܼܡ ܗ̄ ܩܼܡ ܕܢܬܒܼܥ ܡܢܼܗ ܥܘܠܐ ܕܦܠܼܚ ܒܗ ܘܒܐܠܗܐ. ܐܝܟ
                    ܗ݀ܝ ܕܗܒ ܥܘܠܐ ܥܠ ܥܘܠܗܘܿܢ ܗ̄ ܦܘܼܪܥܢܐ ܕܥܘܠܗܘܿܢ܆ ܠܐ ܡܢܼ̈ܘܿܢ.. ܘܠܐ ܐܬܬܼܢܝܼܚ ܒܗܘܿܢ ܗ̄
                    ܦܘܼܪܥܢܐ ܕܥܘܠܗܘܿܢ ܕܠܐ ܗܼܢܘܿܢ ܝܘܼ̈ܕܝܐ ܡܢܼܗܘܿܢ ܘܠܗܘܿܢ ܡܬܼܥܕܪܝܼܢ ܘܠܐ ܐܢ ܡܬܼܕܠܚܝܼܢ
                    ܘܡܫܼܬܓܫܝܼܢ ܒܢܦܼܫܗܘܿܢ ܡܫܬܼܘܙܒܝܼܢ ܘܠܐ ܐܢ ܡܬܼܟܫܦܝܼܢ ܠܬܟܪ̈ܐ ܘܠܫܐܕ̈ܐ ܝܿܬܪܝܼܢ ܘܠܐ ܐܢ
                    ܡܬܼܦܢܝܢ ܠܘܿܬܝ ܡܫܼܬܘܙܒܝܼܢ. ܘܐܢ ܠܐ ܡܬܼܟܫܦܝܼܢ ܠܦܼܬܢܐ ܘܠܐ ܐܢ ܡܬܼܦܢܝܢ ܠܘܿܬܝ ܡܼܢ
                    ܐܘܼܠܨܢܐ ܕܠܐ ܒܨܒܝܿܢܗܘܿܢ ܘܡܦܝܼܣܢܘܼܬܐ ܕܝܼܠܗܘܿܢ. ܠܝܼ 
            
            
                 ܡܬܼܗܢܝܢ ܘܐܦܿܠܐ ܐܢ ܢܬܼܦܪܣܘܢܿ ܕܢܩܼܪܘܢܿ ܠܗܘܿܢ ܡܥܕܪ̈ܢܐ ܡܨܪ̈ܝܐ
                    ܡܬܼܦܨܝܢ. ܘܠܐ ܬܘܼܒ ܡܬܼܬܢܝܼܚ ܨܒܝܿܢܝ ܥܕܡܐ ܕܥܿܩܪ ܐܢܼܐ ܠܗܘܿܢ. ܡܛܝܼ ܓܝܪ ܙܒܢܼܐ ܗ̄ ܩܪܒ
                    ܙܒܢܼܐ ܕܫܒܼܝܐ ܕܡܒܿܠܒܠ ܬܩܼܢ̈ܬܐ. ܕܩܢܼܐ ܠܐ ܢܚܼܕܐ ܗ̄ ܕܙܒܿܢ ܘܩܿܢܐ ܠܐ ܡܫܼܬܒܩ ܠܡܩܼܢܐ
                    ܘܠܡܚܼܕܐ. ܘܠܝܬ ܚܝ̈ܐ ܗ̄ ܚ̈ܝܐ ܐ̈ܠܝܼܨܐ ܘܥܩ̈ܬܐ ܚܿܐܝܢ ܡܟܝܼܠ ܗܿܢܘܢ ܟܕ ܡܬܼܦܢܝܢ ܥܡ ܕܡܼܢ
                    ܩܕܝܼܡ ܐܝܟ ܗ݀ܘ ܕܠܘ ܚ̈ܝܐ ܐܢܘܢܿ܀ ܡܛ݀ܠ ܕܚܼܙܘܐ ܠܐ ܗ̄ ܕܠܐ ܠܡ ܡܨܝܐ ܗܿܢܐ ܕܒܗ ܐܫܼܬܘܕܥ
                    ܒܝ̈ܫܬܐ ܕܐܬܝ̈ܢ ܥܠܘܗܝ ܕܥܡܐ ܕܢܫܼܬܪܐ ܘܢܫܼܬܚܠܦ ܡܼܢ ܫܪܪܗ ܘܢܒܼܛܠ. ܘܓܫܪܐ ܒܥܘܠܗ ܠܐ ܗ̄ ܡܼܢ
                    ܚܕ ܓܒܪܐ ܥܠ ܟ݀ܠܗ ܥܡܐܐܡܿܪ. ܘܡܚܿܘܐ ܕܗܿܟܢܐ ܬܩܝܼܦܐ ܒܝܼܫܬܐ ܕܐܬܿܝܐ ܥܠܝܗܘܿܢ. ܡܛ݀ܠ ܕܚܼܙܘܐ
                    ܠܐ ܗ̄ ܕܠܐ ܠܡ ܡܨܝܐ ܗܿܢܐ ܕܒܗ ܐܫܼܬܘܕܥ ܒܝܼ̈ܫܬܐ ܡܛ݀ܠ ܚܛܗܝ̈ܗܘܢܿ. ܐܝܟ ܕܠܐ ܐܢܫ ܡܫܼܟܚ
                    ܕܢܣܼܝܒܪܝܗܿ ܐܝܟ ܕܢܟܼܬܪܘܢܿ ܒܗ ܚ̈ܝܐ ܟܕ ܡܬܼܓܠܝܐ. ܩܪܼܘ ܒܩܪܢܐ ܐܘܿ ܝܘܼܕ̈ܝܐ ܗ̄ ܘܛܝܒܼܘ
                    ܒܟܿܠ ܡܐ ܕܡܬܼܒܥܐ ܠܩܪܒܐ ܕܥܡ ܒܒܠ̈ܝܐ. ܘܠܝܬ ܕܐܙܿܠ ܗ̄ ܘܠܝܬ ܡܼܢ ܝܘܼܕ̈ܝܐ ܕܐܙܿܠ ܠܩܪܒܐ
                    ܘܢܬܼܦܣܘܢ ܐܝܿܠܝܢ ܗ̄ ܐܡܿܪ ܕܐ݀ܦܢ ܥܠ ܟ݀ܠܗܘܢܿ ܦܣܝܼܩ ܗܼܘܐ ܡܿܘܬܐ ܐܠܐ ܡܪܚ̄ܡ ܗ݀ܝ ܕܠܟܿܠ
                    ܐܚܝܼܕܐ ܡܪܦܝܐ ܡܢܼܗܘܿܢ ܫܪܟܢܐ ܒܛܘܼܪ̈ܐ ܐܦ ܒܡܕܝܼ̈ܢܬܐ ܐܝܿܠܝܢ ܕܠܩܘܼܝܡܐ ܕܝܼܠܗ ܕܓܢܼܣܐ ܗܿܘ
                    ܕܡܢܼܗ ܨܿܒܐ ܕܢܼܕܢܚ ܡܫܝܼܚܐ ܒܒܣܼܪ. ܗܿܢܐ ܫܘܼܢܩܐ ܗ̄ ܒ݀ܥܐ ܕܢܘܕܥ ܥܠܼܬܐ ܕܒܝܼܫ̈ܬܐ. ܗܿܢܐ
                    ܠܡ ܫܘܼܢܩܐ ܕܟܦܼܢܐ ܘܕܨܗܝܐ ܦܘܼܪܥܢܐ ܗܿܘ ܟܐܢܐ ܕܚܠܦ ܥܘܠܗܘܿܢ ܗ݀ܘ ܕܟܕ ܡܨܼܛܒܬܝܼܢ ܒܢܚ̈ܬܐ
                    ܫܒܝܼ̈ܚܐ ܘܒܕܗܒܐ ܡܬܓܐܝܢ ܗܼܘܘ ܩܕܡ ܦܬܟܪ̈ܐ. ܡܛ݀ܠܗܿܢܐ ܗ̄ ܡܛ݀ܠܗܿܢܐ ܥܒܕܿܬܗ ܠܟܿܠܗ ܕܗܒܗܘܿܢ
                    ܡܣܠܝܐ. ܡܛ݀ܠ ܦܬܟܪ̈ܐ ܕܐܬܬܩܼܢܘ ܡܢܼܗ. ܘܐܬܿܠܝܼܘܗܝ ܗ̄ ܘܐܣܿܒܝܼܘܗܝ. ܡܢܼܗܘܿܢ ܘܐܬܼܠܝܼܘܗܝ
                    ܠܢܘܼܟܪ̈ܝܐ. ܘܠܚܛ̈ܝܗܿ ܕܐܪܥܐ ܗ̄ ܐܡܿܪ ܕܠܚܛ̈ܝܗܿ ܕܐܪܥܐ ܕܡܘܼܠܟܢܐ ܐ݀ܫܠܡ ܠܫܒܝܼܬܐ.
                    ܘܢܛܘܫܘܼܢܗ ܗ̄ ܥܠ ܕܗܒܐ ܐܡܿܪ ܕܣܒܝܼܪ ܗܼܘܐ ܥܠ ܝܘܼ̈ܕܝܐ ܕܩܕܝܼܫ ܡܛ݀ܠ ܦܬܟܪ̈ܐ ܕܗܘܼܘ ܡܢܼܗ
                    ܕܒܙܒܼܢܐ ܠܡ ܕܫܒܼܝܐ ܡܛܘܫܝܼܢ ܠܗ ܐܝܟ ܕܠܡܣܠܝܐ ܒܗ݀ܝ ܕܠܐ ܐܬܼܥܪܕܘ ܡܢܼ̈ ܡܕܡ. ܐܚܪ̈ܢܐ ܚܛ̈ܝܐ
                    ܕܐܪܥܐ ܩܿܪܝܢ ܠܒܒܠ̈ܝܐ ܡܛ݀ܠ ܕܝܬܝܼܪ ܡܼܢ ܟܿܠܗܘܿܢ ܒܢܝ̈ܢܫܐ ܕܥܠ ܐܪܥܐ. ܦܫܝܼܩ ܗܼܘܐ ܠܡܚܼܛܐ
                    ܘܡܬܼܟܣܣܝܼܢ ܒܗܿܠܝܢ ܝܘܼ̈ܕܝܐ ܕܒܐܝܼܕ̈ܝ ܒܝܼܫ̈ܐ ܐܬܪܕܝܼܘ ܘܠܘ ܒܐܝܼ̈ܕܝ ܡܝܬܪ̈ܐ ܘܗܼܢܘܢܿ
                    ܣܐܡܼܗܘܿܢ ܘܕܗܒܗܘܿܢ ܐܫܼܬܠܡܘ ܠܚܛ̈ܝܗܿ ܕܐܪܥܐ ܕܢܫܼܒܘܢܿ ܬܐܢܘܿܢ ܘܢܛܘܫܘܢܿ ܐܢܘܿܢ
                    ܒܛܡܼܐܘܼܬܗܝܢ. ܘܐܦܿܐ ܐܦ̈ܝ ܡܢܼܗܘܿܢ ܗ̄ ܡܼܢ ܝܘܼ̈ܕܝܐ ܐܬܿܦܢܐ ܘܠܐ ܐܚܿܘܪ ܒܗܘܿܢ ܬܘܼܒ
                    ܘܠܒܒܠ̈ܝܐ ܐܦܿܩܘܕ ܕܢܛܘܫܘܢܿ ܕܘ̈ܩܝ ܕܐܝܼܬܝܗܘܿܢ ܪܘܡܐ ܕܐܪܥܐ ܘܡܼܢ ܡܢܿܬܐ ܕܕܘ̈ܩܐ ܡܿܘܕܥ ܥܠ
                    ܟܿܠܗܿ ܐܪܥܐ.. ܐܚܪ̈ܢܐ ܩܿܪܝܢ ܕܘ̈ܩܐ ܠܗܝܟܠܐ ܘܠܕܪ̈ܬܗ. ܘܢܒܼܥܘܢ ܫܠܡܐ ܗ̄ ܡܼܢ 
            
            
                 ܒܒ̈ܠܝܐ ܘܠܐ ܢܫܼܬܟܚ. ܘܧܝܐ ܥܠ ܘܿܝܐ ܗ̄ ܘ݀ܝܐ ܟܪܘܿܙܐ ܗܿܘ ܕܥܩ̈ܬܐ
                    ܘܝܬܝܼܪܐܝܼܬ ܡܐ ܕܥܦܝܼܦ. ܘܫܡܘܿܥܬܐ ܗ̄ ܘܗܿܟܢܐ ܘܫܡܘܿܥܬܐ ܣܒܼܪܬܐܐܝܼܬܝܗܿ ܕܐܝܿܠܝܢ ܕܡܼܢ
                    ܪܘܼܚܐ ܡܬܓܠ̈ܝܢ. ܐܢ ܠܛܒܿ ܘܐܢ ܠܒܝܼܫ. ܗܿܪܟܐ ܕܝܢ ܫܿܡܘܿܥܬܐ ܥܠ ܒܝܼܫ̈ܬܐ. ܡܿܘܕܥ܆ ܨܚܚܐ ܕܚ̄
                    ܒܫܢܿܬܐ ܫܬܝܼܬܝܬܐ ܗ̄ ܐܝܟ ܕܡܼܢ ܫܒܝܼܬܗ ܗ̄ ܐܝܟ ܕܡܼܢ ܫܒܝܼܬܗܿ ܡܿܢܐ. ܡܛ݀ܠ ܕܒܫܼܢܬ݀ ܚܡܫ
                    ܐܡܿܪ ܕܫܪܝܼ ܒܢܒܝܘܼ̄ܗ ܐܝܟ ܕܢܼܗܘܐ ܢ݀ܣܒ ܙܒܢܼܐ ܕܚܒܘܼܫܝܗ ܘܕܡܓܿܣܗ ܫܢܿܬܐ ܚܕܐ ܘܝܬܝܼܪ
                    ܩܠܝܼܠ܆ ܫܢܿܬܐ܀ ܣ̈ܒܐ ܕܝܘ̈ܕܝܐ ܕܝܿܬܒܝܼܢ ܗܼܘܘ ܩܕܡ̄ܘ ܗܿܢܘܿܢ ܕܢܚܼܬܘ ܥܡܼܗ ܒܫܒܼܝܐ
                    ܕܡܢܼܗܘܿܢ ܒܫܪܪܐ. ܘܡܢܼܗܘܿܢ ܒܐܣܟܡܐ ܠܘܿܬܗ ܐܬܿܝܢ ܗܼܘܘ. ܒܚܡܼܫܐ ܠܡ ܒܝܼܪܚ ܐܝܼܠܘܿܠ ܕܫܢܬ݀
                    ܫܬ ܕܫܒܝܼܬܗ ܕܝܘܼܝܟܝܼܢ ܟܕ ܝܿܬܒ ܐܢܼܐ ܠܘܿܬܗܘܿܢ ܕܣܒ̈ܐ ܡܼܢܫܝܠܝ ܐܓܢܬ݀ ܥܠܝ ܐܝܼܕܗ ܕܡܪܝܐ
                    ܘܫܢܝܿܬ ܐܢܘܿܢ ܙܘ̈ܥܐ ܕܢܦܼܫܝ ܡܼܢ ܥܢܝܿܢܐ ܕܥܡ ܐܢܫ̈ܐ ܠܡܬܼܒܩܝܘܼ ܒܐܝܿܠܝܢ ܕܡܼܬܬܨܝܪ̈ܢ
                    ܩܕܡܝܟ ܘܚܙܝܿܬ ܗ̄ ܚܙܝܿܬ ܕܡܘܼܬ ܕܒܪܢܫܐ ܕܕܡܘܼܬܗ ܡܼܢ ܢܘܼܪܐ ܡܪܟܒܐ ܗܘܼܬ݀. ܡܼܢ ܚܨܘ̈ܗܝ
                    ܘܠܬܚܼܬ. ܚܼܙܐ ܕܐܠܗܐ ܗ̄ ܐܝܟ ܕܬܗܼܘܐ ܝܼܕܝܼܥܐ ܕܕܡܘܼܬܐ ܚܬܝܼܬܐ ܠܐ ܩܿܢܐܼ ܬܚܘܝܼܬܐ ܓܝܪ
                    ܓܠܝܼܬܐ ܕܟܝܿܢܗ ܕܐܠܗܐ ܕܕܠܐ ܕܡܘܼ ܐܝܼܬܘ̄. ܗܿܝ ܕܝܢ ܕܐܝܟ ܚܼܙܐ ܕܐܠܗܐ ܗ̄ ܕܡܿܝܐ ܠܡ ܕܡܘܼܬܐ
                    ܗܿܕܐ ܒܟܿܠ ܡܕܡ ܠܗܿܝ ܕܚܙܝܿܬ ܥܠ ܢܗܪ ܟܿܒܪ. ܘܐܝܬܝܼܬܢܝ ܗ̄ ܐܝܬܝܼܬܢܝ ܡܥܒܕܢܘܼܬܐ ܐܠܗܿܝܬܐ
                    ܒܚܙܼܘܐ ܠܐܘܿܪܫܠܡ. ܐܢܗܘܼ ܗܿܟܝܼܠ ܕܒܚܼܙܐ ܗܿܘ ܐܚܬܼܢܝ ܝܼܕܝܼܥܐ ܕܠܘ ܓܘܼܫܡܢܐܝܼܬ ܡܫܼܬܢܐ
                    ܗܼܘܐ ܐܠܐ ܟܕ ܦܓܪܗ ܩܕܘ ܣܒ̈ܐ ܝܬܝܼܒ ܗܼܘܐ ܒܙܘ̈ܥܝ ܢܦܫܼܗ ܒܐܘܿܪܫܠܡ ܫܪܐ ܘܡܬܼܒܩܐ. ܬܪܥܐ
                    ܕܙܘܝܼܬܐ ܗ̄ ܒܓܘܼܢܝܐ ܗܿܟܝܼܠ ܓܪܒܝܝܬܐ ܕܚܕܐ ܡܼܢ ܕܪ̈ܐ ܕܗܝܟܠܐ ܐܡܿܪ ܕܚܙܝܿܬ. ܘܬܡܿܢ ܩܿܝܡܐ
                    ܩܿܝܡܬܐ ܕܛܢܢܐ ܫܡܼܗܗ ܠܦܬܟܪ̈ܐ ܐܝܟ ܕܡܼܢ ܣܘܼܥܪܢܐ ܘܬܪܥܝܼܬܐ ܕܗܿܢܘܿܢ ܕܐܩܝܼܡܘܼܗܝ ܒܗܿܝ
                    ܕܐܝܟ ܕܠܨܥܪܐ ܘܒܙܼܚܐ ܕܐܠܗܐ ܐܬܬܼܣܝܼܡܘ ܡܢܼܗܘܿܢ ܘܐܦ ܕܢܛܥܼܘܿܢ ܒܗ ܠܐܠܗܐ ܕܐܝܟ ܗ݀ܘ ܕܡܝܼܬܪ
                    ܘܡܼܨܐ ܠܡܥܕܪܘܼ ܦܬܟܪ̈ܐ ܛ݀ܒ ܡܼܢ ܗ݀ܘ ܕܝܨܝܼܦ ܕܝܼܠܗܘܿܢ. ܚܦܘܼܪ ܒܐܣܼܬܐ ܗ̄ ܡܬܼܒܩܐ ܢܒܝܐ
                    ܒܣܘܼܥܪ̈ܢܝܗܘܿܢ ܓܢܝܼܚ̈ܐ ܦ݀ܩܕ ܠܗ ܕܢܚܼܦܘܪ ܒܐܣܼܬܐ ܕܐܝܼܬܝܗܿ ܗܼܘܬ݀ ܫܘܼܘܕܥܐ ܕܡܛܫܝܘܼܬܐ
                    ܬܪܥܝܼܬܗܘܿܢ ܕܒܗܿ ܪܢܝܢܼ ܗܘܘ ܟܐܼܡܬ݀ ܕܛܥ̈ܝܢ ܠܐܠܗܐ ܗܿܠܝܢ ܕܡܣܼܬܥܪ̈ܢ ܡܢܼܗܘܿܢ ܒܠܝ̈ܠܘܬܐ
                    ܒܬܘ̈ܘܢܐ. ܘܚܙܝܿܬ ܟܿܠ ܕܡܘ̈ܬܐ ܗ̄ ܕܨܝܼܪ̈ܢ ܥܠ ܐܣ̈ܐ. ܥ̄ ܓܒܪ̈ܐ ܕܩ݀ܝܡܝܼܢ ܩܕܡ ܕܡܘ̈ܬܐ
                    ܗܿܠܝܢ. ܘܥܙܢܝܐ ܗ̄ ܥܙܢܝܐ ܓܒܪܐ ܝܼܕܝܼܥܐ ܐܝܼܬܘܗܝ ܒܗܘܿܢ ܘܪܒ ܟܘܼܡܪ̈ܐ ܐܝܼܬܘܗܝ ܗܼܘ ܠܫܐܕܗܐ
                    ܗܿܠܝܢ ܕܡܼܘ̈ܬܐ ܕܚܙܼܐ ܘܐܝܿܠܝܢ ܕܩܕܡܝܗܘܿܢ ܦܿܠܚܝܼܢ ܗܼܘܘ ܘܣܿܝܡܝܼܢ ܒܣ̈ܡܼܐ ܓܠܝܐܝܼܬ
                    ܒܓܠܝܢܐ ܘܒܝܼܕܥܬܐ ܚܿܙܐ ܗܿܘܐ ܠܗܝܢ ܘܠܘ ܒܟܝܿܢ ܘܒܣܘܼܥܪܢܐ ܠܘ ܓܝܪ ܒܦܓܪ ܩܪܝܼܒ ܗܼܘܐ ܠܗܿܠܝܢ
                    ܕܣܿܥܪܝܢ ܒܐܘܿܪܫܠܝܡ ܡܛܫܝܐܝܼܬ 
            
            
                 ܐܠܐ ܒܓܠܝܢܐ ܘܐܝܟ ܕܒܚܼܙܬܐ ܕܦܓܪܐ ܒܝܕ ܢܦܫܼ̈ ܩܒܼܠ ܐܢܝܢ. ܘܐܝܬܼܝܢܝ ܠܬܪܥܐ
                    ܘܡܒ̈ܟܝܢ ܠܬܡܘܼܙܐ ܗ̄ ܠܡܬܼܕܡܪܘܼ ܙܕܩܿ ܒܫܪܝܼܚܘܼܬ ܙ݀ܢܝܘܼܬܗܘܿܢ ܕܝܘܼ̈ܕܝܐ ܕܒܦܚܼܡܐ
                    ܕܦܓܪܗܘܿܢ ܐܫܝܼܕܐ. ܐܦ ܙ݀ܢܝܘܼܬܐ ܕܢܦܼܫܗܘܿܢ ܘܢܼܨܚ̈ܢܐ ܥܡ̈ܡܼܐ ܘܚ̈ܢܼܦܐ ܪܚܝܼܡܝܼܢ ܗܼܘܘ
                    ܥܠܝܗܘܿܢ ܝܬܝܼܪ ܡܼܢ ܕܩܕ̈ܝܼܫܐ ܐܟܙܼܢܐ ܕܝܘܿܫܝܐ ܘܫܡܼܫܘܿܢ. ܘܥܠ ܗ݀ܝ ܕܗܼܘܘ ܠܬܡܘܼܙܐ ܘܠܘ
                    ܠܚܛܗ̈ܝܗܘܿܢ. ܬܡܘܼܙܐ ܓܝܪ ܪܝܥܐ ܘܨܝܕܐ ܚܝܠܬܢܐ ܗܼܘܐ ܘܟܕ ܪܚܡܼܬܗ ܐܦܪܘܕܝܛܝܼ ܘܚܛܦܼܗܿ ܡܼܢ
                    ܓܒܪܗܿ ܘܩܛܠܗ. ܘܐܦ ܗܼܘ ܬܡܘܼܙܐ ܐܬܩܼܛܠ ܡܼܢ ܚܙܝܼܪ ܒܪܐ ܒܡܕܒܪܐ ܘܥܒܼܕܘ ܥܠܘܗܝ ܐܒܗ̈ܘܗܝ
                    ܐ݀ܦܠܐ ܒܬܡܘܿܙ ܝܪܚܐ. ܘܐܦ ܒܠܬܝ ܐܢܬܬܗ ܗܿܟܘܬ ܘܦܩܕܬ݀ ܕܗܿܟܢܐ ܢܒܼܟܘܿܢ. ܝܘܼܕ̈ܝܐ ܕܝܢ
                    ܩܒ̄ܠܘܼ ܠܗܿܢܐ ܥܝܿܕܐ ܒܝܼܫܐ. ܘܚܙܝܿܬ ܒܝܢܬ݀ ܩܣܛܪܘܼܡܐ ܠܡܕܒܚܐ ܗ̄ ܗ݀ܘ ܕܥܠܘܗܝ. ܕܒܚ̈ܐ
                    ܠܐܠܗܐ ܡܩܿܪܒܝܼܢ ܗܼܘܘ ܥܣܪܝܼܢ ܘܚܫܐ ܓܒܪ̈ܝܼܢ ܕܦܘܼܠܚܢܐ ܕܦܬܟܪ̈ܐ ܡܩܝܼܡܝܼܢ ܗܼܘܘ ܘܠܣܓܕܬܐ
                    ܕܐܠܗܐ ܗܿܝ ܕܠܡܥܪܒܐ ܠܫܡܼܫܐܣܿܓܕܝܼܢ ܗܼܘ ܘܠܐܦ̈ܝ ܡܕܢܚܐ. ܠܘܼܩܒܠ ܗܝܠܟܠܗ ܗ̄ ܘܠܐܠܗܐ ܡܪܗ
                    ܕܗܝܟܠܐ ܚܨ̈ܝܗܘܿܢ ܒܨܥܪܐ ܡܿܦܢܝܢ ܗܼܘܘ [] ܗܼܢܘܢ ܡܦܩܥܝܼܢ ܗܼܘܘ ܗ̄ ܗܿܕܐ ܠܘ ܒܠܚܘܼܕ
                    ܠܪܘܼܫܥܗܘܿܢ ܡܿܘܕܥ ܗܘܼܬ݀ ܐܠܐ ܐܦ ܡܪܚܘܼܬܗܘܿܢ ܕܠܘܼܩܒܠ ܐܠܗܐ ܘܓܘܼܕܦܗܘܿܢ ܕܥܠܘܗܝ ܗܿܝ
                    ܕܡܦܩܥܝܼܢ ܒܢܚܝܼܪ̈ܝܗܘܿܢ ܗ̄ ܡܠܝܢ ܗܼܘܘ ܥܠܘܗܝ ܚܡܼܬܐ ܘܒܢܚܝܼܪ̈ܝܗܘܿܢ ܡܚܿܘܝܢ ܐܝܟ ܗܿܝ
                    ܕܢܿܕܐ ܠܗܘܿܢ ܡܢܼ̈. ܐܥܿܒܕ ܒܚܡܼܬܐ ܗ̄ ܦܘܼܪܥܢܐ ܕܗܿܠܝܢ܀ ܨ̄܆ ܛ̄ ܘܩܼܪܐ ܒܐܕ̈ܢܝ ܗ̄ ܟܕ ܢܒܝܐ
                    ܩܼܪܐ ܐܠܗܐ ܒܩܿܠܐ ܪܡܐ ܘܐܡܼܪ. ܩܪܘܿܒܘ ܦܪ̈ܘܥܝܗܿ ܗ̄ ܪܡܙ ܥܠ ܡܠܐ̈ܟܐ ܗܿܠܝܢ ܕܒܐܝܼܕ̈ܝܗܘܿܢ
                    ܚܣܝܼܡ ܫܘܼܡܠܝܐ ܕܣܘܼܥܪ̈ܢܐ ܕܡܕܒܪܢܘܼܬܐ ܐܠܗܿܝܬܐ. ܡܼܢ ܐܘܼܪܚܐ ܕܬܪܥܐ ܥܠܝܐ ܗ̄ ܐܡܿܪ ܕܝܢ
                    ܠܬܪܥܐ ܗ݀ܘ ܕܒܗ ܐܥܠܼܗ ܠܢܒܝܐ ܩܕܡܐܝܬ݀܆ ܐܝܿܟܢܐ ܕܩܿܝܡܐ ܗܼܘܬ݀ ܩܝܿܡܬܐ ܕܛܢܢܐ܆ ܘܐܢܫ ܡܐܢ̈ܝ
                    ܦܘܼܪܥܢܗ ܗ̄ ܡܚܿܕܐ ܕܦܩܼܕ ܗ̄ ܩܡܼܘ ܗܿܠܝܢ ܓܒܪ̈ܐ. ܘܓܒܪ̈ܐ ܚܕ ܒܢܝܬܗܘܿܢ ܕܗܿܠܝܢ ܫܬܐ ܗ̄
                    ܪܡܿܙ ܒܝܕ ܫܬܐ ܓܒܪ̈ܝܼܢ ܥܠ ܣܿܓܝܐܘܼܬ ܚܝܠܗ ܕܒܒܠܝܐ. ܘܐܢܕܝܢ. ܐܦ ܚܕ ܣܿܦܩ ܗܼܘܐ ܒܐܕܢܗܘܿܢ
                    ܕܝܼܣܪܐܝܠ. ܗ݀ܘ ܕܠܒܼܫ ܒܘܼܨܐ ܗ̄ ܡܕܒܪܢܐ ܗܿܘ ܕܥܡܐ. ܥܠ ܓܢܒ ܡܕܒܚܐ ܕܢܚܿܫܐ ܗ̄ ܕܢܚܼܘܐ
                    ܕܠܚܝܼܡ ܠܡܒܼܛܠܘܼ ܟܗܢܘܼ̄ ܥܡ ܕܒܚ̈ܐ.. ܘܫܘܼ̄ܒ ܕܐܠܗܐ ܠܗ ܠܐܠܗܐ ܩܿܪܐ ܟܬܒܐ. ܐܘ ܠܓܠܝܢܐ
                    ܐܝܿܢܐ ܕܗܘܼ ܡܬܼܚ̄ܙܐ ܒܗ ܠܒܢܝ̈ܢܫܐ. ܣܿܠܩ ܡܼܢ ܟܪ̈ܘܼܒܐ ܗ̄ ܐܝܟ ܕܢܘܕܥ ܕܡܟܝܼܠ ܡܫܿܢܐ ܠܗ
                    ܡܼܢ ܗܝܟܠܐ ܘܡܼܢ ܡܕܝܼܢܬܐ ܘܡܗܿܡܐ ܠܗ ܡܼܢ ܒܛܝܼܠܘܼܬܗ ܘܡܕܒܪܢܘܼܬܗ ܕܥܠܗܝܘܿܢ ܟܕ ܠܐ ܡܣܿܝܒܪ
                    ܕܠܥܒܿܕ̈ܝ ܒܝܼܫ̈ܬܐ ܢܚܒܼ ܘܢܗܼܘܐ ܠܘܿܬܗܘܿܢ ܘܢܣܼܥܘܿܪ ܐܢܘܿܢ. ܘܗܿܝ ܕܣܠܼܩ ܗ̄ ܕܐܬܬܼܝܼܡ
                    ܥܡܼܗܘܿܢ ܕܟܪ̈ܘܼܒܐ ܛܥܝܼ̈ܢܝ ܡܪܟܼܒܬܗ. ܘܡܼܢ ܚܕ ܟܪܘܼܒܐ ܪܡܿܙ ܥܠ ܣ̈ܓܝܐܐ.. ܘܐܣܼܪ ܚܨ̈ܐ ܗ̄
                    ܐܣ̄ܝܼܪܘܼ 
            
            
                 ܕܝܢ ܕܚܨ̈ܘܗܝ ܥܠ ܡܛܝܒܘܼܬܐ ܕܡܫܼܬܡܥܢܘܼܬܐ ܕܠܗ݀ܘ ܕܦ݀ܩܕ ܠܗ ܡܿܘܕܥܐ. ܥܒܼܪ
                    ܒܓܘ ܡܕܝܼܢܬܐ ܗ̄ ܒܝܼܫ̈ܬܐ ܕܡܬܼܥ̈ܒܕܢ ܒܓܘܗܿ ܗ̄ ܠܘ ܒܪܘܼܫܡܐ ܡܬܚܼܙܝܢܐ ܢ݀ܛܪ ܗܼܘܐ ܠܗܘܿܢ
                    ܐܟܝܟ ܗ݀ܘ ܕܒܡܨܪܝܢ ܒܕܒܡܐ ܕܥܠ ܦܪ̈ܘܼܣܬܕܐ ܐܠܐ ܠܒܛܝܼܠܘܼܬܗ ܕܐܠܗܐ ܫܡܼܗ ܪܘܼܫܐܡ.ܐܝܟ ܗܿܝ
                    ܕܝܗܒܼܬ ܐܬ݀ܐ ܠܕܚ̈ܠܝܟ. ܘܥܒܕ ܥܡܝ ܐܬ݀ܐ ܛ݀ܒܬܐ. ܡܬܼܕܢܩܝܼܢ ܗ̄ ܡܬܕܢܩܼܐ ܘܡܬܼܕܝܒܐ ܪܘܼܚܗܘܿܢ
                    ܒܥܩܿܬܐ ܡܛ݀ܠ ܒܝܼ̈ܫܬܐ ܐܝܿܠܝܢ ܕܡܣܼܬܥܪ̈ܢ. ܐ݀ܦܢ ܠܘ ܙܕܝܼ̈ܩܐ ܗܼܘܘ ܐܠܐ ܒܪܡ ܠܐ ܛܥܡܼ ܐܢܘܿܢ
                    ܐܠܗܐ ܥܠ ܛܒ̈ܬܐ ܕܒܢܦܼܫܗܘܿܢ ܐܝܼܬܝܗܘܿܢ ܐܝܿܠܝܢ ܕܐܬܢܼܛܪܘ ܡܼܢ ܚܪܒܐ ܕܒܿܒܠܝܐ. ܘܠܗܿܢܘܿܢ
                    ܕܥܡܼܗ ܐܢܘܿܢ. ܠܫܬܐ ܓܒܪ̈ܝܼܝܢ ܐܡܼܪ ܠܗܘܿܢ ܐܠܗܐ ܠܥܝܼܢ̈ܝ܀ ܥܒܼܪܘ ܒܓܘ ܡܕܝܼܢܬܐ ܗ̄ ܐܟܡܿܢ
                    ܕܫܢܝܼ ܠܗ ܡܼܢ ܗܝܟܠܐ ܘܢܦܼܩ ܠܗ ܕܢܣܝܼܡ ܒܪܝܼܫܐ ܕܚܛ̈ܝܐ. ܗܘܼ ܕܝܢ ܐܙܿܠ ܗܼܘܐ ܩܕܡ ܗܿܠܝܢ
                    ܕܢܘܕܥ ܕܠܘ ܠܒܪ ܡܼܢ ܨܒܝܿܢܗ ܗܼܢܘܿܢ ܣܘܼܥܪ̈ܢܐ ܡܫܼܬܡܠܝܢ. ܘܩܼܪܐ ܗ̄ ܕܝܿܬܒ ܥܠ ܡܪܟܼܒܬܐ.
                    ܥܘܿܠ ܠܒܝܢܬ ܓܝܓ̈ܠܐ ܗ̄ ܕܬܚܝܬ ܟܪ̈ܘܼܒܐ. ܡܛ݀ܠ ܕܥܠ ܓܢܒ ܟܿܠ ܟܪܘܼܒܐ ܓܝܓܠܐ ܐܝܼܬ ܗܼܘܬ݀ ܗ݀ܝ
                    ܕܝܢ ܕܬܚܝܬ ܟܪ̈ܘܿܒܐ ܓܝܓܠܐ ܐܝܼܬ ܗܼܘܬ݀. ܗ݀ܝ ܠܓܘ ܡܼܢ ܟܪ̈ܘܼܒܐ. ܬܚܝܬ ܬܛܠܝܼܠܐ ܕܠܥܼܠ ܡܼܢ
                    ܓܦ̈ܝܗܘܿܢ. ܘܡܠܝܼ ܚܘܼ̈ܦܢܝܟ ܡܼܢ ܓܘܼܡܪ̈ܐ ܗ̄ ܕܢܒܼܕܩ ܡܼܢ ܫܟܝܼܢܬܗ ܕܐܠܗܐ ܢܿܦܩ ܥܠܝܗܘܿܢ
                    ܪܘܓܙܐ. ܘܒܗ ܝܿܩܕܝܼܢ ܘܡܬܼܚܪܒܝܼܢ ܐܝܟ ܕܒܢܘܼܪܐ. ܘܥܼܠ ܠܥܝܢ̈ܝ ܗ̄ ܘܥܠܼ ܟܕ ܚܿܐܪ ܐܢܼܐ ܒܗ.
                    ܘܟܪ̈ܘܼܒܐ ܩܿܝܡܝܼܢ ܗܼܘܘ ܕܝܢ ܐܝܟ ܡܿܢ ܕܨܿܒܝܢ ܗܼܘܘ ܡܟܝܼܠ ܕܢܬܼܬܪܝܼܡܘܿܢ ܘܢܫܢܼܘܢܿ ܡܼܢ
                    ܒܝܬܐ. ܘܕܪܬܐ ܓܘܝܬܐ ܡܬܼܡܠܝܐ ܗܘܬ݀ ܥܢܢܐ ܚܫܘܿܟܬܐ ܗܿܝ ܕܥܠ ܡܣܿܡ ܒܪܝܼܫܐ ܕܝܼܠܗ ܕܥܡܐ
                    ܡܿܘܕܥܐ ܗܘܬ݀. ܘܫܘܼܒܚܗ ܗ̄ ܡܼܢ ܕܩܕܡ ܥܢܼܢܐ ܫܘܼܒ ܕܐܠܗܐ ܕܐܝܼܬܘܗܝ ܓܠܝܢܗ ܡܼܢ ܟܪ̈ܘܼܒܐ
                    ܕܠܥܼܠ ܡܼܢ ܙ݀ܘܝܼܬܐ ܕܒܝܬ ܩܝܿܡܝܼܢ ܗܼܘܘ ܡܬܼܬܪܝܼܡ ܗܼܘܐ ܘܡܬܼܥܠܐ ܘܠܒܝܬܐ ܥܢܼܢܐ ܚܫܘܼܟܬܐ
                    ܡܟܣܝܐ ܗܘܬ ܐܟܡܿܢ ܕܐܣܬܼܦܩ ܡܢܼܗ ܫܘܼܒܚܗ ܕܐܠܗܐ. ܘܩܼܛܪ ܒܗ ܚܫܼܟܐ ܕܬܢܼܢܐ. ܩܿܠܐ
                    ܕܓܦܼ̈ܝܗܘܿܢ ܗ̄ ܩܿܠܐ ܕܝܢ ܡܒܕܩܢܐ ܗܼܘܐ ܙܘܥ ܕܒܗ ܫܿܪܝܢܼ ܗܿܢܘܿܢ ܕܛܥܝܼܢܝܼܢ ܡܪܟܼܒܬܐ
                    ܕܡܛܝܒܝܼܢ ܟܐܡܬ݀ ܠܡܦܼܪܚ ܘܠܡܫܼܢܝܘܼ ܐܝܟ ܩܠܝܼܠܘܼܬܐ ܕܟܝܿܢܗܘܿܢ ܘܡܬܼܬܟܣܝܼܢ ܡܼܢ ܗܢܝܘܿܟܐ
                    ܐܘܟܝܼܬ ܡܕܒܪܢܐ ܘܐܩܟ ܩܿܠܐ ܕܐܠܗܐ ܗ̄ ܩܿܠܐ ܕܠܝܬ ܠܗ ܕܡܘܼܬܐ ܒܥܒܝܼܕ̈ܐ ܨ܆ ܕܝ̄ ܓܒܪܐ ܕܠܒܝܼܫ
                    ܒܘܼܨܐ ܗ̄ ܡܝܼܟܐܝܠ ܐܝܼܬܘܗܝ ܗܿܘ ܕܡܕܒܪܢܘܼܬܐ ܕܐܠܗܐ ܕܥܡܐ ܡܫܿܡܫ ܗܼܘܐ ܠܘܼܦ̈ܢܐ ܩܼܪܐ ܗ̄
                    ܡܢܼܩܕܝܼܡ ܓܝܓ̈ܐ ܒܠܫܼܢܐ ܥܒܪܝܐ ܠܘܼ̈ܦܢܐ ܡܬܼܩܪ̈ܝܢ. ܐܚܪ̈ܢܐ ܠܘܼܦ̈ܢܐ ܗ̄ ܚܪ̈ܝܼܦܐ ܘܩ̈ܠܝܼܠܐ
                    ܡܬܼܦܫܩܝܷܢ ܟܕ ܦ݀ܩܕ ܠܗܝܢ ܠܓܝ̈ܓܠܐ ܕܢܬܥܪ̈ܓܠܢ ܘܢܐܙ̈ܠܢ ܩܠܝܼܠܐܝܼܬ ܘܐܪܒܥ ܐܦܝܼ̈ܢ ܠܚܕ
                    ܡܢܼܗܘܿܢ ܗ̄ ܠܗܿܢܘܿܢ ܕܛܥܝܼܢܝܼܢ ܠܡܪܟܼܒܬܐ ܘܠܘ ܠܓܝ̈ܓܠܐ ܐܝܼܬ ܐܦ̈ܐ. ܚܕ ܠܐܦ̈ܝ ܟܪܘܼܒܐ. ܗ̄
                    ܟܕ ܫܼܘܐ ܚܼܙܘܐ ܗܿܢܐ ܠܗܿܘ ܕܚܙܼܐ ܥܠ ܢܗܪ ܟܒܪ. ܗܪܟܐ ܫܚܠܼܦܗ ܘܚܠܼܦ ܬܘܪܐ ܟܪܘܼܒܐ 
            
            
                 ܣܼܡ ܘܬܘܪܐ ܨܿܐܪ ܠܟܗܢܘܼܬܐ ܘܐܫܬܪܝܬ݀ ܡܟܝܼܠ ܡܼܢ ܥܡܐ ܕܬܣܼܒܝ ܚܘܼܣܝܐ ܡܼܢ
                    ܐܠܗܐ. ܐܚܪ̈ܢܐ ܕܚܠܼܦ ܕܡܘܼܬܐ ܬܢܢ ܗ݀ܝ ܕܐܦ̈ܐ ܐܝܟ ܗ݀ܝ ܕܬܦܼܠܝ ܗܿܝ ܕܟܪܘܼܒܐ ܠܐܪܒܥܬܝܗܝܢ
                    ܚܝܘ̈ܬܐ ܡܛ݀ܠ ܕܐܦܿܢ ܒܐܦ̈ܐ ܠܒܪܢܫܐ ܕܡ̈ܝܢ ܗܼܘ̈ܝ ܐܠܐ ܒܓ̈ܦܼܐ ܘܒܢܘܼܪܘܼܬܐ ܘܒܦܪܘܿܚܘܼܬܐ
                    ܚܝ̈ܠܐ ܠܐ ܡܬܼܚ̈ܙܝܢܐ ܐܝܼܬܝܗܘܿܢ. ܘܐܬܬܪܝܼܡܘ ܟܪ̈ܘܼܒܐ ܗ̄ ܫܪܝܼܘ ܠܡܦܼܪܚ ܗܼܢܘܢܿ ܥܡ
                    ܓܝܓ̈ܠܐ. ܘܫܩܼܠ ܫܘܼܒܚܗ. ܘܣܼܡ ܥܠ ܟܪ̈ܘܼܒܐ ܗ̄ ܕܡܿܝܐ ܓܝܪ ܕܡܼܢ ܩܕܝܼܡ ܠܡܪܟܒܼܬܐ ܠܚܘܼܕ
                    ܚܿܙܐ ܗܼܘܐ ܕܩܿܝܡܐ ܗܘܬ݀ ܥܠ ܬܪܥܐ ܕܗܝܟܠܐ ܟܕ ܢܿܛܪܐ ܠܡܕܒܪܢܐ ܕܢܼܦܘܿܩ ܢܙܕܝܚ ܥܠܝܗܿ. ܘܡܢ
                    ܕܢܦܼܩ ܡܼܢ ܬܡܿܢ ܩܼܡ ܒܡܥܠܢܐ ܕܬܪܥܐ ܡܕܢܝܚܐ ܕܒܝܬܗ ܕܡܪܝܐ ܗ̄ ܒܿܥܐ ܓܝܪ ܠܡܼܐܡܪ ܒܝܕ ܗܿܕܐ
                    ܕܫܢܝܼ ܠܗ ܠܓܡܿܪ ܡܼܢ ܡܕܝܼܢܬܐ ܘܫܒܼܩܗܿ ܒܐܝܼܕ̈ܝ ܒܥܠܕܒ̈ܒܐ. ܘܚܕ ܚܕ ܠܓܒܗ ܐܙܿܠܝܼܢ ܗܼܘܘ ܗ̄
                    ܠܟܿܠ ܓܒ̈ܝܼܢ ܕܡܬܼܒܥܐ ܗܼܘܐ. ܠܐ ܡܣܼܬ̈ܢܩܢ ܗܼ̈ܘܝ ܠܡܬܼܟܪܟܘܼ ܒܗܿܝ ܕܠܟܿܠ ܦܢܝ̈ܢ ܩܢ̈ܝܢ
                    ܗܼ̈ܘܝ ܦܪܨܘܼܦܐ ܕܡܫܒܠ ܠܗܝܢ ܠܘܿܬ ܡܪܕܝܼܬܐ܆ ܨ܆ ܕܝ̄ܐ ܘܫܩܼܠܬܢܝ ܪܘܼܚܐ ܘܐܝܬܝܬܼܢܝ ܠܘܿܬ
                    ܬܪܥܐ ܕܐܡܿܪ ܠܘ ܕܗܝܟܠܐ ܐܠܐ ܕܕܪܬܐ ܕܗܝܟܠܐ. ܒܡܥܼܒܕ̄ܢܘܼ ܕܝܢ ܕܪܘܼܚܐܐܡܿܪ ܕܐܫܼܬܢܝܼ ܡܛ݀
                    ܕܠܐ ܡܨܐ ܗܼܘ ܕܒܗܠ̈ܟܬܐ ܦܓܪ̈ܢܝܬܐ ܒܠܘܝܼܬܐ ܕܗܿܢܘܿܢ ܒܕܦܿܪܚܝܼܢ ܢܪܕܐ. ܘܚܙܝܿܬ ܒܡܥܠܢܐ ܗ̄
                    ܚܿܙܐ ܕܝܢ ܒܡܥܠܢܗ ܕܬܪܥܐ ܟܗ̄ ܓܒܪ̈ܝܼܢ ܕܒܝܢܬܗܘܿܢ ܩܝܿܡܝܼܢ ܗܼܘܘܬܪܝܢ ܡܼܢ ܝܼܕ̈ܝܼܥܐ ܕܥܡܐ
                    ܗܿܠܝܢ ܕܝܬܝܼܪ ܡܼܢ ܕܫܪܟܐ ܪ̈ܫܝܼܥܝܼܢ ܘܡܿܠܟܝܼܢ ܠܐܚܪ̈ܢܐ ܠܘܿܬ ܥܘܠܐ ܟܕ ܐܡܿܪܝܼܢ ܐܦ
                    ܡܬܪܥܝܢ. ܕܠܐܗܼܘܐ ܒܓܘܗܿ. ܘܚܢܢ ܒܣܼܪܐ ܗ̄ ܡܛ݀ܠ ܠܡ ܡܘܬܒܐ ܡܣܼܬܬܐ ܕܩܿܢܝܢܼ ܒܓܘ ܡܕܝܼܢܬܐ.
                    ܡܩܒܠ ܥܠܝܢ ܐܘܼܠܨܢܐ ܘܡܘܬܒܐ ܕܒܓܘ ܡܕܝܼܢܬܐ. ܡܩܒܠ ܥܠܝܢ ܐܘܼܠܨܢܐ ܘܡܘܬܒܐ ܕܒܓܘ ܒ̈ܬܝܼܢ
                    ܝܬܝܼܪ ܡܼܢ ܪܚܝܼܩܘܼܬܐ ܕܡܝܢ ܐܬܪܢ ܘܗܘܼܐ ܕܒܡܘܼܬ ܒܣܼܪܐ ܕܡܬܼܒܫܠ ܒܩܕܣܐ ܡܫܼܬܠܡܝܼܢܢ ܠܥܩ̈ܬܐ
                    ܘܣܿܝܦܝܼܢܢ ܒܓܘܗܿ ܕܡܕܝܼܢܬܐ ܘܡܢܗܿ ܠܐ ܡܬܼܪܚܩܝܼܢܢ ܐܝܟ ܕܐܬܢܒܝܼ ܐܪܡܝܐ ܘܚܙܩܐܝܠ. ܗܿܟܢܐ
                    ܪܚܼܡܬܘܢܿ ܒܢܼ̈ܝ. ܐܢܿܐ ܝܿܕܥ ܐܢܼܐ ܠܗܿܠܝܢ ܗ̄ ܐܢܿܐ ܝܿܕܥ ܐܢܼܐ ܘܡܦܿܣ ܐܢܼܐ ܕܗܿܠܝܢ ܪܚܡܝܼܢ
                    ܐܢܬܘܿܢ ܒܢܦܫܼܟܘܢܿ ܕܠܐ ܬܫܢܼܘܢܿ ܒܫܒܝܼܬܐ ܘܒܓܠܘܼܬܐ ܕܡܼܢ ܐܬܪܟܘܢܿ ܠܐܬܪܐ ܐܚܪܢܐ ܘܡܩܒܠ
                    ܥܠܝܟܘܿܢ ܡܘܬܒܐ ܕܒܒ̈ܬܝܟܘܿܢ ܝܬܝܼܪ ܡܼܢ ܡܦܼܩܬܐ ܕܡܼܢ ܓܘܗܘܿܢ ܐܝܟ ܐܢܫ̈ܐ ܕܫܒܝܼܬܟ ܗ̄ ܗܿܠܝܢ
                    ܕܐܫܼܬܒܝܼܘ ܥܡܟ ܠܐ ܡܬܼܢܣܝܢ ܥܡܟ ܒܡܪܕܘܼܬܐ ܕܗܿܠܝܢ ܕܐܝܼܬ ܒܐܘܿܪܫܠܝܡ ܗܿܝ ܕܐܚ̈ܝܟ ܐܚ̈ܝܟ
                    ܕܐܡܼܪ ܥܦܝܼܦܐܝܼܬ ܐܝܟ ܕܠܡܡܼܠܐ ܒܠܒܼܗ ܘܕܗܿܢܘܿܢ ܕܐܝܼܬܝܗܘܿܢ ܗܼܘܘ ܒܫܒܝܼܬܐ. ܘܬܘܼܒ ܐܝܟ
                    ܕܠܫܘܼܪܐ ܕܡܠܼܬܗ. ܘܟܿܠܗܘܿܢ ܕܒܝܬ ܝܼܣܪܐܝܠ ܢܣܘܼܦܘܢܼ ܗ̄ ܐܝܟ ܕܐܠܦܼܘ ܠܚܕ̈ܕܐ ܠܡܪܚܼܩܘܼ ܡܼܢ
                    ܡܪܝܐ. ܘܐܡܿܪܝܼܢ ܕܠܢ ܗܼܘ ܒܠܚܘܼܕ ܐܬܝܗܒܬ݀ ܐܪܥܐ ܕܡܘܼܠܟܢܐ ܕܢܐܪܬܝܗܿ ܡܛ݀ܠ ܕܝܢ ܗ݀ܟܢܐ
                    ܐܬܪܥܝܼܘ ܐܕܿܚܘܼܩ ܐܢܘܿܢ ܡܼܢ ܒܝܕ ܫܒܼܝܐ. ܘܐܗܿܘܐ ܠܗܘܿܢ ܠܡܩܕܫܐ ܗ̄ ܗܿܕܐ ܓܝܪ ܠܿܚܚܡܐ 
            
            
                 ܗܘܬ݀ ܠܐܝܿܠܝܢ ܕܐܫܼܬܒܝܪܘ ܡܼܢ ܟܕܘܼ ܐܝܼܬܝܗܘܿܢ ܒܒܿܒܝܠ ܘܠܐܝܿܠܝܢ ܕܠܐ
                    ܐܫܼܬܒܝܼܘ. ܥܬܝܼܕܝܢ ܗܼܘܘ ܓܝܪ ܕܢܫܼܬܒܘܢܿ ܒ݀ܬܪܟܢ. ܗܿܢܘܢܿ ܕܥܠ ܬܪ̈ܝܗܘܿܢ ܒܛܝܼܠܘܼܬܐܕܐܠܗܐ
                    ܗܿܘܝܐ ܒܐܪ̈ܥܬܐ ܢܘܼܟܪ̈ܝܬܐ ܘܡܿܢܛܪܐ ܗܘܼܬ ܠܗܘܿܢ. ܗܿܕܐ ܓܝܪ ܩ݀ܪܐ ܡܩܕܫܐ ܙܥܘܿܪܐ ܐܝܟ ܐܢܫ
                    ܕܡܬܓܘܣ ܒܗܝܟܠܐ ܟܕ ܐܡܿܪ ܕܡܬܼܒܛܠ ܠܝܼ ܘܢ݀ܛܪ ܐܢܼܐ ܠܗܘܿܢ ܒܝܢܬ݀ ܥܡ̈ܡܼܐ ܡܩܕܫܐ. ܠܥܘܼܕܪܢܐ
                    ܡܫܿܡܗ܆ ܘܬܿܠ ܠܗܘܿܢ ܠܒܼܐ ܚܼܕܬܐ ܗ̄ ܐܡܿܪ ܕܡܼܢ ܬܕܡܪ̈ܬܐ ܕܚܿܙܝܢ ܘܦܘܼܢܝܐ ܕܡܢܼܫܝܠܝ ܕܠܗܘܿܢ
                    ܝܿܗܒ ܐܢܼܐ ܡܬܼܪܟܟܐ ܬܪܥܝܼܬܗܘܿܢ ܘܡܫܼܬܚܠܦ ܨܒܝܿܢܗܘܿܢ. ܠܒܐ ܓܝܪ ܘܪܘܼܚܐ ܠܚܘܼܕܬܐ ܕܡܕܥܐ
                    ܘܕܬܪܥܝܼܬܐ ܛܒܿܬܐ ܕܿܡܝܢܼ ܗܼܘܘ ܠܚܪܬܐ ܐܡܿܪ ܒܪܥܝܿܢܐ ܓܝܪ ܕܦܬܟܪ̈ܝܗܘܿܢ ܗ̄ ܡܛ݀ܠ ܗܿܕܐ
                    ܐܫܒܝܿܬ ܐܢܘܿܢ ܡܼܢ ܩܕ̄ܡ ܕܥܠ ܕܟܿܠܗ ܪܥܝܢܗܘܿܢ ܘܕܿܢܝܐ ܕܬܪܥܝܼܬܗܘܿܢ ܒܿܬܪ ܢܝܿܚ ܕܫܐܕ̈ܐ
                    ܡܬܼܕܒܪ ܗܼܘܐ ܘܐܬܼܬܪܝܼܡ ܫܘܼܒܚܗ ܗ̄ ܫܢܝܼ ܠܗܿ ܠܓܡܪ ܠܫܘܼܘܕܥܐ. ܕܡܫܠܡܐ ܡܟܝܠ ܒܐܝܼ̈ܕܝ
                    ܒܥܠܕܒܒ̈ܐ ܕܢܥܼܩܪܘܼܢܗܿ. ܘܪܘܼܚܐ ܫܩܼܠܬܢܝ ܘܐܝܬܼܝܬܢܝ ܗ̄ ܗܿܢܐ ܓܝܪ ܟܿܠܗ ܡܡܠܠܐ ܒܐܘܿܪܫܠܡ
                    ܟܐܡܼܬ݀ ܫܿܡܥ ܗܼܘܐ ܕܡܬܼܡܠܠ. ܘܡܼܢ ܕܚܼܙܐ ܠܟܿܠܡܕܡ ܕܐܣܬܼܥܪ ܬܡܿܢ ܐܫܼܬܢܝܼ ܬܘܼܒ ܠܒܿܒܝܼܠ.
                    ܒܚܼܙܘܐ ܘܒܪܘܼܚܐ ܗ̄ ܒܓܠܝܢܐ ܘܒܡܥܒܕܢܘܼܬܐ ܐܠܗܝܿܬܐ ܕܒܟܿܠܗܝܢ ܢܠܼܦܢ ܕܠܘ ܒܦܓܪ ܫܡܼ̈ܝܐ ܕܐܝܟ
                    ܗܿܠܝܢ ܡܩܿܒܠ ܗܼܘܐ ܐܠܐ ܒܢܦܼܫܗ. ܘܦܪܩܼ ܠܗ ܡܢܼܝ ܚܼܙܘܐ ܗ̄ ܐܬܓܼܢܙ ܠܗ ܡܢܼܝ܀ ܨܚܚ̄ܐ ܕܝܒ̄܆
                    ܥܒܕ ܠܟ ܡ̈ܐܢܐ ܕܫܒܝܼܬܐ ܗ̄ ܦܿܩܕ ܠܗ ܕܒܣܘܼܥܪ̈ܢܐ ܢܪܫܘܿܡ ܫܒܼܝܗܘܿܢ ܕܝܘܼܕ̈ܝܐ ܘܐܡܿܪ ܕܡ̈ܐܢܐ
                    ܘܨܒܘ̈ܬܐ ܟܿܠܗܘܿܢ ܕܒܒܝܬܟ ܨܘܼܪ ܐܢܘܿܢ ܘܦܠܓ ܐܢܘܿܢ ܒܫܩܘܿܠܬܐ ܟܕ ܡܚܿܘܐ ܐܢܬ ܐܝܟ ܗ݀ܘ
                    ܕܡܛܝܒܼ ܐܢܬ ܠܡܥܼܪܩ ܡܼܢ ܩܕܡ ܫܒ̈ܝܐ. ܘܐܢܬ ܦܘܿܩ ܒܪܡܫܐ ܗ̄ ܩܕܡܝܗܘܿܢ. ܘܬܪܘܿܥ ܠܡ ܐܣܼܬܐ ܗ̄
                    ܦܠܐܼܬܐ ܕܐܘܿܪܫܠܡ ܕܡܬܼܬܪܥܐ ܡܼܢ ܒܒܠ̈ܝܐ ܒܪܡܫܐ ܡܛ݀ܠ ܕܒܒܠܝܐ ܐܬܟܼܒܫܬ݀. ܡ̈ܐܢܝ ܐܦܩܿܬ
                    ܒܐܝܼܡܡܐ ܗ̄ ܒܗܿܕܐ ܥܠ ܬܟܝܼܠܘܼܬܐ ܕܫܒ̈ܝܐ ܐܡܿܪ ܐܘܿ ܡܛ݀ܠ ܚܙܼܬܐ ܕܥܡܐ ܦܩܼܕܗ ܠܡܥܼܒܕ ܐܟܡܿܢ
                    ܕܥܣܼܩ ܗܼܘܐ ܠܗܘܿܢ ܒܙܒܼܢܗ ܕܠܠܼܝܐ ܠܡܬܒܼܩܝܘܼ ܒܗܿܠܝܢ ܕܥܒܼܕ ܢܒܝܐ. ܘܕܢܚܼܦܐ ܐܦܘ̈ܗܝ ܕܠܐ
                    ܢܬܼܝܕܥ ܗ̄ ܥܠ ܨܕܩܝܐ ܡܬܢܼܒܐ ܗ݀ܘ ܕܟܕ ܐܬܦܼܪܣ ܕܢܥܼܪܘܿܩ ܒܠܠܝܐ ܡܢܼܩܕܡ ܟ̈ܠܕܝܐ. ܢܦܩܼ
                    ܒܛܘܼܫܝܐ ܒܬܪܥܐ ܕܒܝܬ ܓܢ̈ܐ ܘܟܣܝܼ ܐܦܘ̈ܗܝ ܕܠܐ ܢܬܝܼܕܥ ܒܦܪܘܼܩܝܗ ܕܡܠܟܐ ܐܝܼܬܘܗܝ ܘܠܐ
                    ܐܫܼܘܙܒ ܒܗܿܟܢ܆ ܘܐ݀ܦܪܘܿܣ ܡܨܝܼܕܬܝ ܥܠܘܗܝ ܗ̄ ܡܐܪܙ ܥܠܗ݀ܝ ܕܠܐ ܢܫܼܬܘܙܒ ܘܠܐ ܐܕܪܟܘܼܗܝ
                    ܟ̈ܠܕܝܐ ܒܦܩܼܥܬܐ ܕܐܝܼܪܝܼܚܘܼ ܒܪܢܫܐ ܗ̄ ܡܿܢܘ ܡܬܠܐ ܗܿܢܐ ܗ̄ ܡܛ݀ܠ ܕܒܩܛܝܼܪܐ ܡܗܝܡܢܝܼܢ ܗܼܘܘ
                    ܠܡ̈ܠܼܐ ܕܢܒܝܐ ܕܡܛ݀ܠ ܫܒܼܝܗܘܿܢ ܐܡܼܪ ܕܐܡܿܪܝܼܢ. ܕܢܓܪܘܢܿ ܝܘܡ̈ܬܐ ܘܢܐܼܒܕ ܗ̄ ܢܬܕܓܿܠ
                    ܡܡܪܚܝܼܢ ܗܼܘܘ ܓܝܪ ܥܡܐ ܕܢܐܼܡܪܘܢܼ ܕܐܘܿ ܠܐ ܗܘ̈ܝܢ ܠܓܡܿܪ ܐܝܿܠܝܢ ܕܡܬܼܡ̈ܠܠܢ ܡܼܢ ܢܒܝܐ
                    ܕܐܝܼܬܝܗܝܢ ܫܒܼܝܐ 
            
            
                 ܘܚܪܒܐ ܕܥܡܐ. ܐܘܿ ܕܐܝܢ ܗܘ̈ܝܢ ܠܐ ܩܪܝܼܒ ܙܒܢܼܐ ܕܡܦܼܩܢܗܝܢ ܘܠܐ ܢܗܼܘܐ
                    ܬܘܼܒ ܩܼܨܡܐ ܗ̄ ܩܼܨܡܐ ܓܝܪ ܕܐܡܿܪ ܗܿܪܟܐ ܠܘ ܗ݀ܘ ܕܡܼܢ ܫܐܕ̈ܐ ܗܿܘܐ ܠܛܥܿܝܘܼܬܐ ܕܒܢܝ̈ܢܫܐ
                    ܐܠܐ ܥܠܘܗܝ ܕܓܠܝܢܐ ܕܒܝܕ ܢܒ̈ܝܐ ܫܪܝܼܪ̈ܐ ܗܿܘܐ ܗܼܘܐ ܠܬܘܼܪܨܐ ܕܒܢ̈ܝ ܐܢܫ̈ܐ. ܩ݀ܪܐ ܠܝܼܕܥܬܐ
                    ܕܟܣܝ̈ܬܐ ܗܿܟܢ ܟܕ ܕܡܿܝܐ ܕܗܿܢܐ ܫܡܐ ܚܛܦܘܼܗܝ ܫܐܕ̈ܐ ܘܣܡܘܼܗܝ ܥܠ ܡܢܝܼܚ̈ܢܿܝܗܘܿܢ ܐܦ
                    ܫܘܿܠܘܿܡܘܿܢ ܐܡܼܪ ܩܼܨܡܐ ܥܠ ܣܼܦܘ̈ܬܗ ܕܡܠܟܐ ܩܼܨܡܐ ܗ̄ ܝܼܕܥܬܐ. ܘܐܡܿܪ ܕܘܿܠܐ ܕܬܗܼܘܐ
                    ܝܼܕܥܬܐ ܠܟܿܠ. ܡܠܟܐ ܡܛ݀ܠܣܘܼܥܪ̈ܢ ܕܡܕܒܪܢܘܼܬܗ. ܘܗܿܪܟܐ ܐܡܿܪ ܕܠܐ ܢܗܼܘܐ ܩܼܨܡܐ ܗ̄ ܠܐ ܠܡ
                    ܡܟܝܼܠ ܢܬܼܬܗ̈ܝܢ ܡܠ̈ܝ ܐܝܟ ܕܢܬܕܓܠ̈ܢ ܡܼܢ ܥܡܐܐܠܐ ܩܠܝܼܠܐܝܼܬ ܡܫܿܡܠܐ ܐܢܼܐ ܠܗܝܢ ܒܝܕ
                    ܣܘܼܥܪ̈ܢܐ܆ ܨ܆ ܕܝܓ̄܆ ܘܿܝ ܠܢܒ̈ܝܐ ܫܛ̈ܝܐ ܗ̄ ܥܠܝܗܘܿܢ ܕܢܕܒ̈ܝܐ ܕܓ̈ܠܐ ܐܝܼܬܝܗܿ ܡܠܬܼܗ. ܒ݀ܬܪ
                    ܪܘܼܚܗܘܿܢ ܗ̄ ܒܿܬܪ ܨܒܝܿܢܗܘܿܢ. ܟܕ ܚܼܙܘܐ ܡܼܢ ܕܝܼܠܝ ܠܐ ܐܬܚܼܙܝܼ ܠܗܘܿܢ. ܐܝܟ ܬܥ̈ܠܐ
                    ܒܚܪ̈ܒܬܐ ܗ̄ ܐܝܿܟܢ ܠܡ ܕܬܥ̈ܠܐ ܒܟܝܿܢܗܘܿܢ ܐܝܼܬܝܗܘܿܢ ܚܪ̈ܥܐ ܘܢܟܝܼ̈ܠܐ ܕܡܕܡ ܠܚܪ̈ܒܬܐ
                    ܕܥ݀ܡܪܝܼܢ ܒܗܝܢ ܠܐ ܡܿܘܬܪܝܼܢ ܣܛܪ ܡܼܢ ܚ̈ܠܼܠܐ ܝܬܝܼܪ̈ܐ ܒܗ݀ܝ ܕܠܘ ܡܒܼܢܐ ܒܿܢܝܢ ܐܠܐ
                    ܡܚܼܪܒܘܼ ܡܚܪܒܝܼܢ ܘܡܚܠܚܠܘܼ ܡܚܿܠܠܼܚܠܝܼܢ ܘܥܠ ܡܦܘܼܠܬܗܿ ܕܕܘܼܟܬܐ ܕܥ݀ܡܪܝܼܢ ܒܗܿ ܡܿܘܣܦܝܼܢ
                    ܗܿܟܢܐܐܦܿܠܐ ܗܼܢܘܢܿ ܢܒ̈ܝܐ ܕܓ̈ܠܐ ܡܿܘܬܪܝܼܢ ܡܕܡ ܒܢܒܝܘܼܬܗܘܿܢ ܗܿܕܐ ܕܓܠܬܐ ܠܥܡܐ. ܗ݀ܘ ܕܡܼܢ
                    ܟܕܘܼ ܐܝܼܬܘܗܝ ܐܝܟ ܕܒܐܪܥܐ ܨܕܝܼܬܐ ܘܚܪܒܼܬܐ ܡܛ݀ܠ ܚܛܗ̈ܝܗܘܿܢ. ܠܐ ܣܠܼܩܬܘܿܢ ܒܬܘܼܪܥܬܝ
                    ܒܝܘܡܗ ܕܡܪܝܐ ܗ̄ ܐܡܿܪ ܕܠܐ ܣܿܦܩܝܼܢ ܒܢܒܝܘܼܬܗܘܿܢ ܗܕܿܐ ܕܓܠܬܐ ܕܢܥܕܪܘܼܢܝܗܝ ܠܥܡܐ ܒܡܕܡ
                    ܘܐܦܿܠܐ ܒܕܡܘܼܬܐ ܕܐܢܫ ܕܣܿܐܓ ܬܘܼܪܥܬܐ ܠܓܢܬܐ ܐܘܿ ܡܟܪܟ ܣܝܿܓܐ ܠܟܪ̈ܡܐ ܕܠܐ ܢܫܬܼܚܛܘܿܢ
                    ܘܢܬܚܼܒܠܘܢܿ ܡܼܢ ܒܢܝ̈ܢܫܐ ܘܚܝܘ̈ܬܐ ܕܗܿܟܢܐ ܐܦ ܗܢܼܘܿܢ ܢܬܟܼܣܘܢܿ ܡܢܼܗ ܕܥܡܐ ܩܪܒܐ ܐܝܿܢܐ
                    ܕܦܪܝܼܫ ܘܡܛܝܒܼ ܠܐܠܗܐ ܕܢܝܬܐ ܥܠ ܥܡܐ ܘܗܘܼ ܒܿܢܐ ܗܼܘܐ ܐܣܼܬܐ ܘܗܼܢܘܢܿ ܗ̄ ܐܣܼܬܐ ܠܥܡܐ ܩܿܪܐ
                    ܗ݀ܘ ܕܒܝܕ ܡ̈ܠܐ ܕܫܒܼܝܐ ܘܕܡܟܣܢܘܼܬܐ ܕܢܒ̈ܝܐ ܫܪܝܼܪ̈ܐ ܒܿܢܐ ܗܼܘܐ ܠܗ ܐܠܗܐ ܗ̄ ܡܥܿܬܕ ܗܼܘܐ
                    ܠܗ ܠܬܝܿܒܘܼܬܐ. ܕܒܥܠܼܬܗ ܡܬܼܒܢܐ ܗܼܘܐ ܘܠܐ ܡܬܼܥܩܪ ܡܼܢ ܫܒܼܝܐ. ܛܿܪܝܢ ܗܼܘܘ ܗ̄ ܛܿܪܝܢ ܗܼܘܘ
                    ܢܒ̈ܝܐ ܕܓ̈ܠܐ ܠܥܡܐ ܗ݀ܘ ܕܩܪܝܼܒ ܗܼܘܐ ܕܢܦܼܠ ܡܛ݀ܠ ܚܛܗ̈ܘܗܝ ܒܝܕ ܡ̈ܠܐ ܛܒ̈ܬܐ ܕܐܡܿܪܝܼܢ ܗܼܘܘ
                    ܠܗܘܿܢ ܕܠܐ ܫܒܼܝܐ ܐܬܿܐ ܥܠܝܗܘܿܢ ܘܠܐ ܚܪܒܐ ܟܕ ܡܬܼܕܡܝܢ ܗܼܘܘ ܠܐܢܫ ܐܝܿܢܐ ܕܠܐܣܼܬܐ ܐܝܿܢܐ
                    ܕܡܚܝܼܠܐ ܘܕܚ̈ܝܼܩܢ ܫܬܼܐܣ̈ܝܗܿ ܒܝܕ ܛܪܝܐ ܕܛܝܼܢܐ ܕܡܼܢ ܠܒܪ. ܨ݀ܒܐ ܕܢܼܚܘܝܗܿ ܚܠܝܼܡܬܐ
                    ܘܫܪܝܼܪܬܐ. ܐܫܼܒ ܪܘܼܚܐ ܕܥܠܥܠܐ ܒܚܡܼܬܝ ܗ̄ ܡܛܪܐ ܓܝܪ ܘܥܠܥܠܐ ܠܡܫܪܝܼܬܐ ܕܒܒܠ̈ܝܐ ܡܫܡܿܗ
                    ܟܐܦܐ ܕܕܚܪܐ ܗ̄ ܠܟܐܦ̈ܐ ܕܒܪܕܐ ܩܿܪܐ. ܘ݀ܝ ܕܠܚܿܝܛܘ ܒܣܕ̈ܘܬܐ ܗ̄ ܡܬܼܢܒܐ ܥܠ ܢܫ̈ܐ ܕܒܐܪܙܐ
                    ܕܫܐܕ̈ܐ ܩܼܨܡܐ ܘܢܒܝܘܼܬܐ ܡܫܼܬ̈ܘܕܝܢ ܗܼܘ̈ܝ ܐܘܿ ܓܝܪ ܠܢܝܿܚܐ ܕܡܣܼܬܒܪ ܗܼܘܐ ܡܼܢ ܡܠ̈ܝܗܘܿܢ
                    ܐܡܿܪ ܒܣܕܘ̈ܬܐ ܐܘܿ ܒܩܼܨ̈ܡܐ ܘܟܬܒ̈ܐ ܕܠܘܼܚܫ̈ܬܐ ܡܿܘܕܥ ܗܿܢܘܿܢ ܕܒܓܘ ܒܣܕܘ̈ܬܐ ܛܡܪ̈ܢ ܗܼܘ̈ܝ
                    ܠܢܝܼܫܐ ܘܠܥܘܼܕܪܢܐ 
            
            
                 ܕܗܿܢܘܿܢ ܕܡܬܼܪܡܝܢ ܗܼܘܘ ܠܛܿܥܝܘܼܬܗܝܢ. ܘܥܒ̈ܕܢ ܬܟܣܝܼܬܐ ܗ̄ ܗܿܟܢܐ ܐܦ
                    ܒܠܒܘ̈ܫܐ ܒܬܟܣ̈ܝܬܐ. ܕܡܼܘ̈ܬܐ ܡܕܡ ܘܫܡ̈ܗܝܐ ܕܕ̈ܝܘܐ ܙܦܪ̈ܢ ܗܼ̈ܘܝ ܘܝܗ̈ܒܢ ܠܪܘܪ̈ܒܢܐ
                    ܕܒܥܠܬܼܗܝܢ ܟܐܡܼܬ݀ ܡܬܼܢܛܪܝܼܢ ܘܙ݀ܟܝܢ ܒܩܪ̈ܒܐ. ܢܦܼܫ̈ܬܐ ܕܥܡܝ ܨܝ̈ܕܢ ܐܢܬܝܢ ܗ̄ ܨܝܕ̈ܢ
                    ܗܼܘ̈ܝ ܠܗܝܢ ܒܢܒܝܘܼܬܗܝܢ ܕܓܠܬܐ. ܡܚܝ̈ܢ ܐܢܬܝܢ ܗ̄ ܡܚܝ̈ܢ ܗܼܘ̈ܝ ܓܝܪ ܢܦܫܼ̈ܬܗܝܢ ܒܝܕ ܟܣܼܦܐ
                    ܘܩܘܼܪ̈ܒܢܐ ܕܫܩ̈ܠܢ ܗܼ̈ܘܝ ܒܚܘܼܦ̈ܢܐ ܕܣܥܪ̈ܐ ܗ̄ ܐܝܼܬ ܗܼܘܐ ܥܝܿܕܐ ܠܚܢ̈ܦܐ ܕܟܕ ܐܙܿܠܝܼܢ
                    ܠܘܿܬ ܩܨܘ̈ܡܐ ܘܢܒ̈ܝܐ ܕܫܘܼܩܪܐ ܕܢܘܒܼܠܘܢܿ ܠܗܘܿܢ ܣܥܪ̈ܐ ܘܩܨܝ̈ܐ ܕܠܚܡܐ. ܠܡܩܼܛܠ ܢܦܼܫ̈ܬܐ ܗ̄
                    ܓܝܪ ܗܼܢܝܢ ܩܛ̈ܠܢ ܗܼ̈ܘܝ ܐܠܐ ܡܠ̈ܟܢ ܗܼ̈ܘܝ ܠܪܘܪ̈ܒܢܐ ܕܠܢܒ̈ܝܐ ܫܪܝܼܪ̈ܐ ܢܘܒܕܘܢܿ ܘܠܕܓ̈ܠܐ
                    ܢܚܼܘܿܢ. ܐܚܪ̈ܢܐ ܐܡܿܪܝܼܢ ܕܢܦܼܫ̈ܬܐ ܕܠܡܚܼܐ ܠܐ ܫܘ̈ܝܢ ܗܼ̈ܘܝ. ܕܝܼܠܗܝܢ ܕܢܒܝ̈ܬܐ ܕܓܠ̈ܠܬܐ
                    ܐܢܝܢ ܘܕܠܡܡܼܬ ܠܐ ܚܝ̈ܒܢ ܗܼ̈ܘܝ. ܘܢܦܫܼ̈ܬܗ ܕܥܡܐ ܗܿܢܝܢ ܕܒܐܝܼܕ̈ܝܗܝܢ ܡܼܢ ܫܪܪܐ ܡܬܼܩܛܠܝܼܢ
                    ܗܼܘܘ. ܗܿܐ ܐܢܿܐ ܥܠ ܒܣܕ̈ܘܬܟܝܢ. ܘܐܨܿܪܐ ܡܐܢܝ̈ܟܝܢ ܗ̄ ܕܡܿܝܐ ܓܝܪ ܕܫܡ̈ܗܐ ܕܕܝܘ̈ܐ ܟܬܒ̈ܢ
                    ܗܼ̈ܘܝ ܐܘܿ ܩܡܝܼ̈ܥܐ ܡܕܡ ܣܝ̈ܡܢ ܗܼ̈ܘܝ ܒܣܕ̈ܘܬܐ ܐܘܿ ܒܡ̈ܐܢܐ ܕܬܚܘܼܬܝܗܝܢ ܠܫܘܼܘܕܥܐ ܟܐܡܼܬ݀
                    ܕܫܘܼܥܒܕܐ ܕܥܡܐ ܕܬܚܘܼܬܝܗܝܢ ܐܝܟ ܕܥܿܒܕܝܼܢ ܚܪ̈ܫܐ. ܐܦ ܡܼܢ ܗܿܠܝܢ ܠܡ ܡܦܿܨܐ ܐܢܼܐ ܠܗ ܠܥܡܝ
                    ܡܼܢ ܐܝܼܕ̈ܝܟܝܢ. ܥܠ ܕܡܚܝ̈ܬܝܢ ܠܒܼܗ ܕܙܕܝܼܩܐ ܗ̄ ܙܕܝܼܩܐ ܐܡܿܪ ܠܢܒ̈ܝܐ ܫܪܝܼܪ̈ܐ ܗܿܢܘܢܿ
                    ܕܒܝܕ ܩܘܛܪ̈ܓܝܗܝܢ ܡܙܝ̈ܥܢ ܗܼ̈ܘܝ ܥܠܝܗܝܢ ܠܥܡܐ ܕܢܩܼܛܠܘܢܼ ܐܢܘܿܢ. ܘܐܢܿܐ ܠܐ ܗܿ ܗܿܕܐ
                    ܡܿܘܕܥܐ ܕܒܛܝܼܠܘܼܬܗ ܕܥܠ ܢܒ̈ܝܐ ܕܝܼܠܗ ܕܟܕ ܛ݀ܒ ܗܿܟܢܐ ܙܩܝܼܦ ܗܼܘܐ ܥܠܝܗܘܿܢ ܢܒ̈ܝܐ ܕܓ̈ܠܐ
                    ܘܥܡܐ ܠܘ ܒܟܿܠܙܒܢ ܝܿܗܒ ܠܗܘܿܢ ܐܬܪܐ ܠܒܝܼ̈ܫܐ ܕܢܫܼܬܠܛܘܿܢ ܥܠܝܗܘܿܢ. ܟܕ ܩ݀ܪܐ ܠܒܼܗ ܕܙܕܝܼܩܐ
                    ܐܘܿ ܠܚܫ̈ܐ ܝܩܝܼܪ̈ܐ ܕܙܢܝܼ̈ܢ ܙܢ̈ܝܼܢ ܐܘܿ ܠܗ ܠܡܿܘܬܐ ܕܡܝܬܝܢ ܥܠܝܗܘܿܢ ܕܜܐܬܼܘ ܠܘܿܬ ܓܒܪ̈ܐ܀
                    ܨܚܚܐ ܝܕ̄ ܘܝܼܬܼܒܘ ܩܕܡܝ ܗ̄ ܒܐܣܟܡܐ ܕܙܐܦܐ ܕܐ݀ܬܝܢ ܗܼܘܘ ܗܿܠܝܢ ܠܘܿܬ ܢܒܝܐ ܘܠܘ ܐܝܟ
                    ܕܢܐܠܼܦܘܢ ܫܪܪܐ. ܘܡܛ݀ܠ ܕܟܣܝܐ ܗܘܬ݀ ܬܪܥܝܼܬܗܘܿܢ ܡܼܢ ܢܒܝܐ. ܓܠܼܐ ܠܗ ܐܠܗܐ ܥܠܝܗܘܿܢ ܘܐܡܼܪ.
                    ܓܒܪ ܓܒܪ ܗ̄ ܓܒܪ̈ܐ ܠܡ ܗܿܠܝܢ ܐܣܩܼܘ ܕܚܠܼܬܗܘܿܢ ܥܠ ܠܒܼܗܘܿܢ ܗ̄ ܒܠܼܒܗܘܿܢ ܣܝܼܡܐ ܛܘܼܥܝܝ
                    ܕܦܬܟܪ̈ܐ ܘܐܡܝܼܢܐܝܼܬ ܡܬܼܥܗܕܝܼܢ ܠܗܿ ܠܕܚܠܼܬܗܘܿܢ ܟܕ ܠܓܡܿܪ ܠܐ ܡܫܢܝܐ ܡܼܢ ܢܦܼܫܗܘܿܢ.
                    ܘܬܘܩܼܠܬܐ ܕܥܘܠܐ ܣܡܿܘ ܠܘܼܩܒܠ ܐܦܝ̈ܗܘܿܢ ܗ̄ ܥܘܠܐ ܕܣܿܥܪܝܼܢ ܗܼܘܘ ܕܡܛ݀ܠܬܗ ܡܬܼܬܩܠܝܼܢ ܗܼܘܘ
                    ܘܢܿܦܠܝܼܢ ܒܒܝܼܫ̈ܬܐ ܒܠܒܘ̈ܬܗܘܿܢ ܛܡܝܼܪ ܘܒܗ ܚܿܝܪܝܼܢ ܚܒܝܒܐܝܼܬ ܠܠܝܐ ܘܐܝܼܡܡܐ ܗ̄ ܠܐ ܣܿܥܝܢ
                    ܠܗ ܘܡܛ݀ܠܗܿܕܐ ܟܐܢܐܝܼܬ ܡܩܒܠܝܼܢ ܦܘܼܠܥܢܐ ܡܼܢ ܨܝܕܝ. ܘܐܢܿܐ ܡܪܝܐ ܒܣܘܓܐܐ ܕܕܚܠܼܬܗ ܗ̄ ܡܛ݀ܠ
                    ܓܝܪ ܕܐܝܼܬ ܗܼܘܐ ܐܢܫ ܒܗܘܿܢ ܕܝܬܝܼܪ ܡܪܚ ܗܼܘܐ ܒܐܣܟܡܐ ܢܟܝܼܠܐ. ܕܡܚܿܘܐ ܗܼܘܐ ܠܘ ܓܝܪ ܐܝܟ
                    ܕܢܫܡܼܥ ܡܠܼ̈ܘܗܝ ܕܢܒܝܐ 
            
            
                 ܘܢܬܼܬܘܐ ܥܠ ܒܝܼܫ̈ܬܗ ܠܘܿܬܗ ܐܬܿܐ. ܐܠܐ ܐܝܟ ܕܢܗܠ ܒܡܼ̈ܠܘܗܝ ܟܐܡܼܬܬ ܕܠܐ
                    ܫܪܝܼܪ̈ܢ. ܡܗܦܟ ܡܠܼܬܗ ܡܼܢ ܨܝܕ ܚܒܼܪ̈ܘܗܝ. ܘܠܘܿܬ ܗܿܢܐ ܡܚܝܼܪ ܠܡܠܼܬܗ. ܕܗܿܢܐ ܠܡ ܠܐ ܡܨܝܐ
                    ܕܢܬܼܦܨܐ ܡܼܢ ܪܘܓܙܐ ܕܐܠܗܐ. ܗ݀ܘ ܕܝܿܕܥ ܚܘܼܫ̈ܒܐ ܕܢܦܼܫܗ ܘܐܦ ܣܿܗܕܐ ܕܥܘܿܠܘܼܬܗܿ ܗܿܘ ܒܝܕ
                    ܓܙܪ ܕܝܼܢܐ ܕܡܦܩ ܥܠܘܗܝ ܟܐܢܐܝܼܬ. ܡܛ݀ܠ ܕܐܚܿܘܪ ܒܟܿܠܗܝܢ ܕܚܠ̈ܬܗܘܿܢ ܗ̄ ܐܚܿܕ ܗܼܘܐ ܠܗܘܿܢ
                    ܓܝܪ ܒܠܒܼܗܘܿܢ ܡܛ݀ܠ ܕܓܿܠܐ ܗܼܘܐ ܠܗܘܿܢ ܚܘܼܫ̈ܒܐ ܕܢܦܼܫܗܘܿܢ ܘܐܡܼܪ. ܕܡܐ ܕܐܚܿܕܬ
                    ܠܚܘܼܫ̈ܒܝܗܘܿܢ ܐܝܿܠܝܢ ܕܒܗܘܿܢ ܩܪܝܼܒܝܼܢ ܘܐܚܝܼܕܝܼܢ ܒܦܘܼܠܚܢܐ ܕܫ̈ܐܕܐ܆ ܘܩܕܡ ܟ݀ܠ ܐܢܫܐ
                    ܐܕܢܚܿܬ ܐܢܝܢ ܠܬܪ̈ܥܝܬܗܘܿܢ ܒܝܼܫ̈ܬܐ ܡܬܼܝܕܥܝܼܢ ܓܠܝܐܝܼܬ ܕܠܘ ܐܝܟ ܦܪܨܘܼܦܐ ܕܡܚܘܝܢ ܡܼܢ ܠܒܪ
                    ܗܿܟܢܐ ܐܝܼܬܝܗܘܿܢ ܐܦ ܡܼܢ ܠܓܘ. ܘܐܬܦܼܢܘ ܡܼܢ ܟ݀ܠܗܝܢ ܕܚܠܼ̈ܬܟܘܢܿ ܗ̄ ܩܕܡ̈ܝܬܐ. ܡܛ݀ܠ
                    ܕܓܒܪ̈ܐ ܗ̄ ܡܛ݀ܠ ܕܗ݀ܟܢܐ ܦܣܩܿܬ ܥܠܝܟܘܢܿ. ܕܡܼܬܦܢܝܢ ܠܘܿܬܝ ܗ̄ ܡܼܢ ܬܘ̈ܬܒܐ ܕܐܬܬܠܼܡܕܘ
                    ܠܝܼܣܪܐܝܠ. ܕܢܗܦܼܘܼܟ ܡܼܢܝ ܗ̄ ܒܢܦܼܫܗ ܟܕ ܒܐܣܼܟܡܐ ܡܚܿܘܐ ܕܕܝܼܠܝ ܗܼܘ. ܘܟܕ ܝܬܝܼܒ ܩܕܡ
                    ܢܒܝܐ ܠܡܫܡܼܥ ܡܢܼ̈ ܐܝܟ ܒܝܬܝܐ. ܕܚܼܠܬܗ ܩܕܡܝܬܐ. ܡܿܣܩܐ ܠܗ ܠܒܗ ܐܝܟ ܟܬܒܐ ܥܠ ܠܘܼܚܐ.
                    ܘܬܘܼܩܠܬܐ ܕܐܝܼܬ̄ܘ ܫܒܼܝܐ ܣܝܼܡ ܠܗ ܩܕܡ ܐܦܘ̈ܗܝ ܘܡܦܿܣ ܕܟܐܢܐܝܼܬ ܐܬܪܕܝܼ ܘܐܬܼܐ ܠܘܿܬ ܢܒܝܐ
                    ܫܪܝܼܪܐ ܠܡܼܫܐܠܘܼܬܗ ܒܢܣܼܝܿܢܐ ܕܐܢ ܒܬܪܥܝܼܬܗ ܐܘܿ ܠܐ. ܐܢܿܐ ܡܪܝܐ ܐܗܿܘܐ ܠܗ ܣܿܗܕܐ ܗ̄
                    ܬܒܘܿܥܐ ܗ̄ ܕܣܿܗܕ ܐܢܐ ܥܠ ܠܒܼ̈ ܕܒܿܬܪ ܛܘܼܥܝܝ ܕܒܝܼܪ. ܘܢܒܝܐ ܟܕ ܢܛܥܐ ܗ̄ ܐܢܿܐ ܫܒܩܿܬ
                    ܕܢܛܥܐ ܗ̄ ܐܝܿܟܢܐ ܕܗ݀ܘ ܥܡ ܗ݀ܘ ܕܛܥܿܐ ܒܿܬܪܗ. ܢܩܒܼܠܘܿܢ ܬܒܼܥܬܐ ܘܢܫܼܩܠܘܢ ܥܘܠܗܘܿܢ. ܕܢܒܝܐ
                    ܢܗܼܘܐ ܗ̄ ܡܣܡ ܒܪܝܼܫܐ ܕܚܠܼܦ ܥܘܠܗܘܿܢ ܗܼܢܘܿܢ ܣܿܒܠܝܼܢ ܠܗ ܐܟܚܕܐ. ܥܘܠܗ ܕܗ݀ܘ ܕܫܿܒܩ ܠܢܒܝܐ
                    ܘܐܙܿܠ ܡܫܿܐܠ ܠܢܒܝܐ ܕܓܿܠܐ ܐܝܟ ܥܘܠܗ ܕܓܠܐ ܢܼ̈ܘܐ. ܘܚܕܐ ܡܪܕܘܼܬܐ ܢܩܼܒܠܘܢܿ ܒܗ݀ܝ ܕܫܘܝܐ
                    ܗܿܝ ܒܝܼܫܬܐ ܕܬܪ̈ܝܗܘܿܢ ܓܒ̈ܐ ܕܐܝܿܢܐ ܕܡܛܥܐ ܒܢܒܝܘܼܬܗ ܕܗ݀ܘ. ܒܪ ܐܢܫܐ ܐܪܥܐ ܐܢ ܬܚܼܛܐ ܠܝܼ
                    ܗ̄ ܒܗܿܠܝܢ ܓܿܠܐ ܠܗ ܠܢܒܝܐ ܕܐܝܿܢܘ ܨܒܝܿܢܗ ܨܝܕ ܚܛ̈ܝܐ ܘܙܕܝܼ̈ܩܐ܆ ܒܪܢܫܐ ܐܪܥܐ ܗ̄ ܓܠܝܐ ܗܿܝ
                    ܓܝܪ ܕܒܝܕ ܐܪܥܐ ܥܠ ܥܡܘܿܪ̈ܝܗܿ ܐܘܕܥ. ܘܐܬܿܒܪ ܩܢܝܐ ܗ̄ ܡܿܝܬܐ ܐܢܼܐ ܥܠܝܗܘܿܢ ܟܦܢܼܐ. ܘܐܢ
                    ܢܗܼܘܘܢܿ ܒܗܿ ܗܿܠܝܢ ܬܠܬܐ ܗ̄ ܡܿܘܕܥ ܒܗܿܕܐ ܕܒܟܐܢܘܼܬܐ ܕܐ݀ܢ ܠܟܿܠܢܫ ܘܠܘ ܒܣܓܼܡܐ ܘܕܠܐ
                    ܥܘܼܩܒܐ. ܘܐܝܟ ܕܠܣܗ̈ܕܘܬܐ ܠܗܿܠܝܢ ܦܪ̈ܨܘܼܦܐ ܕܐܬܢܼܨܚܘ ܐܝܬܝܼ ܟܿܠ ܚܕ ܒܙܒܼܢܗ ܠܢܘܿܚ
                    ܩܕܡܐܝܼܬ ܗ݀ܘ ܕܠܥܿܠܡܐ ܙܟܼܐ ܕܗܘܼ ܒܠܚܘܕܘܗܝ ܥܡ ܒܢ̈ܝ ܒܝܬܗ ܐܬܼܦܨܝܼ ܡܼܢ ܛܘܦܢܐ ܡܛ݀ܠ
                    ܙܕܝܼܩܘܼܬܗ. ܘܐܝܘܿܒ ܕܡܛ݀ܠ ܕܟܐܢܘܼܬܗ ܘܫܪܪܗ ܙܟܼܐ ܠܫܐܕ̈ܐ ܟܕ ܐܫܬܼܠܚ ܡܼܢ ܟܿܠܡܕܡ ܕܩܿܢܐܼ
                    ܗܼܘܐ ܘܕܢܝܐܝܠ ܗܿܘ ܕܟܕ ܒܫܒܼܝܐ ܐܝܼܬ̄ܘ ܗܼܘܐ ܡܝܬܪܘܼ̄ܗ ܠܐ ܫܒܼܩ. ܘܠܘܿܬ ܣܕܘܼ̈ܡܝܐ ܥܣܪܐ
                    ܙܕܝܼ̈ܩܐ ܐܬܒܼܥܝܼܘ. ܡܛ݀ܠ ܕܠܝܬ ܗܼܘܐ ܢܡܘܿܣܐ. ܠܘܿܬ ܥܒܪ̈ܝܐ ܬܠܬܐ ܥܠ ܕܐܝܼܬ ܗܘܐ ܠܗܘܿܢ
                    ܗܝܟܠܐ. ܘܢܡܘܿܣܐ ܘܚܪܒܐ. ܐܢ ܗܼܘ 
            
            
                 ܠܐ ܡܬܼܪܨ ܚܘܼܫ̈ܒܘܗܝ ܘܕܘܼܒܪ̈ܘܗܝ. ܡܛ݀ܠ ܕܐܦܿܠܐ ܢܘܼܚ ܐܬܡܼܨܝܼ ܕܢܫܼܘܙܒ
                    ܠܒܢ̈ܝ ܕܪܗ ܡܼܢ ܛܘܦܢܐ ܘܕܢܝܐܝܠ ܠܩܢܘܿܡܗ ܠܚܘܼܕ ܢܼܛܪ ܡܼܢ ܢܟܝ̈ܢܐ ܕܒܒܠ̈ܝܐ. ܘܐܝܘܿܒ ܠܐ
                    ܐܫܼܟܚ ܠܡܼܫܘܙܒܘܼ ܒܢܘ̈ܗܝ ܡܼܢ ܡܿܘܬܐ ܐܠܐ ܩܠܢܘܿܡܗ ܠܚܘܿܕ܆ ܡܛ݀ܠ ܕܗܿܟܢܐ ܐܡܿܪ܆ ܒܢ̈ܝܐ
                    ܘܒܢ̈ܬܐ ܗ̄ ܪܡܿܙ ܕܐ݀ܦܢ܇ ܟܿܠܗܘܿܢ ܝܟ ܕܡܼܢ ܟܐܢܼܘܼܬܗ ܚܝܿܒܝܼܢ ܗܼܘܘ ܠܡܐܼܒܕ ܐܠܐ ܡܪܚܡܢܘܼܬܐ
                    ܢܛܪܬ݀ ܡܢܼܗܘܿܢ ܫܪܟܢܐ ܠܝܘܼܒܠܐ ܕܓܢܼܣܐ ܘܢܘܠܕ ܒܢ̈ܝܐ ܘܒܢ̈ܬܐ ܢܫܼܬܪܬܚܘܿܢ. ܘܗܼܢܘܿܢ
                    ܢܦܼܩܘܿܢ ܗ̄ ܢܫܼܬܢܘܿܢ ܒܫܒܼܝܐ ܘܢܐܼܬܘܢܼ ܠܒܿܒܝܠ ܨܝܕܝܟܘܿܢ. ܘܬܚܼܙܘܢ ܐܘܼܪ̈ܚܬܗܘܿܢ. ܥܠ
                    ܐܘܿܪܫܠܡ ܗ̄ ܡܦܼܩ ܒܪܘܼܚܐ ܕܡܝܬܐ ܥܿܒܪ ܠܘܿܬ ܗܿܢܘܿܢ ܕܒܫܒܝܼܬܐ ܕܒܿܒܝܠ܆ ܨܝܕ̄ܘ ܕܢܒܝܐ
                    ܐܝܼܬܝܗܘܿܢ ܗܼܘܘ ܐܝܿܟܢܐ ܕܢܕܥܘܿܢ ܕܐܝܿܠܝܢ ܕܐܬܦܼܩܕܘ ܡܢܼܗ ܡܛ݀ܠ ܥܿܡܘܿܪ̈ܝܗܿ ܕܐܘܿܪܫܠܡ
                    ܕܬܘܼܪܨܐ ܐܢܝܢ ܕܟܿܠܗܿ ܓܘܐ. ܘܙܿܕܩ ܐܦ ܠܗܘܿܢ ܕܢܓܪܘܢܿ ܪܘܼܚܐ. ܘܡܼܢ ܣܘܼܥܪ̈ܢܝܗܘܿܢ ܕܗܿܢܘܿܢ
                    ܕܡܬܼܪܕܝܢ ܕܢܠܦܘܼܢܗܿ ܠܡܪܕܘܼܬܐ ܕܟܡܼܐ ܡܫܼܚܐ ܘܒܨܝܼܪܐ ܡܼܢ ܪܒܘܼܬܐ ܕܚܛܗ̈ܝܗܘܿܢ. ܐܢܬܘܿܢ ܠܡ
                    ܕܩܕܡܼܬܘܿܢ ܐܫܬܼܒܝܼܬܘܢܿ. ܐܡܼܬܝ ܕܬܚܼܙܘܢܿ ܐܘܼܠ̈ܨܢܝܗܘܿܢ ܕܗܿܢܘܿܢ ܕܗܿܫܐ ܒܐܘܿܪܫܠܡ
                    ܐܝܼܬܝܗܘܿܢ. ܘܬܫܼܬܘܕܥܘܢܿ ܣܘܼܥܪ̈ܢܝܗܘܿܢ ܫܟܝܼܪ̈ܐ ܘܨܢܥ̈ܬܗܘܿܢ ܕܠܘܼܩܒܠ ܐܠܗܐ ܘܕܡܛ݀ܠܬܗܘܿܢ
                    ܣܿܒܠܝܼܢ ܗܿܠܝܢ ܟܿܠܗܝܢ ܒܝܼܫ̈ܬܐ ܡܬܼܒܝܐܝܼܢ ܐܢܬܘܿܢ ܕܠܐ ܣܒܼܠܬܘܿܢ ܐܟܘܿܬܗܘܿܢ ܐܘܼܠܨܢܐ
                    ܕܟܦܼܢܐ ܘܨܗܝܐ ܘܡܘܬܢܐ. ܗܿܢܘܿܢ ܓܝܪ ܕܐܫܼܬܒܝܼܘ ܥܡ ܝܘܿܟܢܝܐ ܕܥܡܼ̈ܘܿܢ ܢܒ̈ܝܐ ܠܐ ܣܒܼܠܘ
                    ܒܝܼܫ̈ܬܐ ܕܗ̈ܘܼܝ ܒܚܪܒܗܿ ܕܐܘܿܪܫܠܡ ܨ܆ ܕܝܗ̄ ܒܪܢܫܐ ܡܿܢܐ ܢܗܼܘܐ ܠܩܝܣܐ ܕܥܿܒܐ ܗ̄ ܐܬܪܥܐ ܠܡ
                    ܘܚܘܪ. ܕܠܐ ܚܿܫܚ ܩܝܣܐ ܕܓܦܼܬܐ ܠܡܕܡ ܐܡܚܪܝܼܢ. ܐܠܐ ܠܡܼܛܥܢ ܥܢ̈ܒܼܐ ܠܡܥܼܒܕ ܚܡܪܐ. ܐܡܼܬܝ
                    ܕܝܢ ܕܚܕܐ ܡܼܢ ܗܿܠܝܢ ܠܝܬ ܠܗܿ ܠܓܦܼܬܐ ܘܐܝܼܬܝܗܿ ܒܥܪܝܼܝܬܐ ܘܥܩܼܪܬܐ. ܟܕ ܠܐ ܛܥܿܢܐ ܦܐܪ̈ܐ
                    ܠܢܘܼܪܐ ܚܿܫܚܐ. ܗܿܟܢܐ ܐܦ ܗܿܢܐ ܥܡܐ ܘܟܢܘܼܫܬܐ ܕܠܗܿ ܡܫܿܡܗ ܓܦܼܬܐ ܡܬܼܥܒܝܢ ܠܝܼ܆ ܣܘ̈ܟܝܗܿ
                    ܐܡܿܪ ܗ̄ ܠܥܣܼܪܐ ܫܒ̈ܛܝܼܢ. ܡܢܿܬܐ ܚܕܐ ܗ݀ܝ ܕܥܒܼܒܪܐ ܕܝܘܿܪܕܢܢ ܘܐܚܪܬܐ ܗܿܝ ܕܒܫܡܪܝܼܢ
                    ܬܠܝܼܬܝܬܐ ܕܝܢ ܐܘܿܪܫܠܡ. ܗܿܠܝܢ ܕܝܢ ܡܼܢ ܩܕܡ ܐܘܿܪܫܠܡ ܐܫܬܼܒܝܼܘ ܡܼܢ ܐܬܘܼܪ̈ܝܐ. ܓܘܗܿ ܚܼܪܒ
                    ܗ̄ ܡܠܟܘܼܬܐ ܕܒܝܬ ܝܼܗܘܼܕܐ. ܐܝܿܕܐ ܕܡܼܢ ܟܕܘܼ ܠܫܒܼܝܐ ܕܒܒܠ̈ܝܐ ܡܚܪܒܐ ܗܘܬ݀. ܡܼܢ ܢܘܼܪܐ
                    ܐܝܿܟܢܐ ܕܗܼܢܘܿܢ ܒܥܒܼܪܐ ܕܝܘܪܕܢܢ ܘܒܫܿܡܪܝܼܢ ܘܡܢܿܬܐ ܕܝܼܗܘܼܕܐ ܐܫܬܒܝܼܘ. ܗܿܟܢܐ ܐܦ ܬܘܪ̈ܐ
                    ܕܢܘܼܪܒܗ ܕܩܪܒܐ ܕܦܫܼ ܡܢܼܗ. ܐܦ ܗܼܢܘܢܿ ܒܢܘܼܪܐ ܐܚܪܝܬܐ ܕܫܒܼܝܐ ܕܒܒܠ̈ܝܐ ܣܝܿܦܝܼܢ ܘܓܿܡܪܝܼܢ
                    ܪܡܿܙ ܬܘܼܒ ܒܗܿܕܐ ܗܿܟܢܐ. ܕܡܛ݀ܠ ܕܫܘܙܒܿܬ ܐܢܘܿܢ ܡܼܢ ܢܘܼܪܐ ܕܚܪܒܗܘܿܢ ܕܡܨܪ̈ܝܐ ܘܐܬܼܘ
                    ܠܐܪܥܐ ܕܡܘܼܠܟܢܐ ܘܫܼ̈ܛܝ ܢܡܘ̈ܣܝ ܡܫܿܠܡ ܐܢܼܐ ܠܗܘܿܢ ܠܢܘܼܪܐ ܕܣܝܦܐ ܕܒܒ̈ܠܝܐ܆ ܨ̄ ܕܝܘ܆
                    ܐܘܕܥܝܗܿ ܠܐܘܿܪܫܠܡ ܗ̄ ܦ݀ܩܕ ܠܢܒܝܐ ܕܠܦܘܼܬ ܕܡܘܬܐ ܕܣܘܼܥܪ̈ܢܝܗܘܿܢ ܢܚܘܝܘܗܝ. ܐܘܬܕܥܝܗܿ
                    ܠܐܘܿܪܫܠܡ ܗ̄ ܚܘܗܿ ܥܠ ܕܫܒܼܩܬܢܝ. ܘܐܬܛܢܼܦܬ݀ ܒܦܬܟܪ̈ܐ ܕܟܢܥ̈ܢܝܐ ܐܦ ܐܢܿܐ ܫܿܒܩ 
            
            
                 ܐܢܼܐ ܠܗܿ ܡܦܿܩ ܐܢܼܐ ܠܗܿ ܡܼܢ ܒܝܬܝ. ܥܩܼܪܟܝ ܕܟܢܥܝܢ ܗ̄ ܠܦܘܼܬ ܕܡܼܢ ܬܡܿܢ
                    ܫܪܝܼܪ ܓܢܣܼܗܘܿܢ ܠܡܬܼܩܝܡܘܼ. ܒܐܪܥܐ ܕܥܗܟܢܥܢ ܐܘܠܼܕܘ ܐܢܘܿܢ܇ ܐܒܗ̈ܝܗܘܿܢ ܩܕܡ̈ܝܐ. ܘܬܘܼܒ
                    ܡܛ݀ܠ ܕܡܝܘܼܬ ܣܘܼܥܪ̈ܢܝܗܘܿܢ ܡܟܣ ܠܗܘܿܢ ܕܐܢܬܘܢܿ ܝܘܼܕ̈ܝܐ ܒܢ̈ܝ ܐܒܪܗܡ ܒܢ̈ܝ ܟܢܥ̈ܢܝܐ ܙܕܿܩ
                    ܕܬܬܼܩܪܘܢ ܡܛ݀ܠ ܕܕܡܿܝܢ ܥܒܿܕܝ̈ܟܘܢܿ ܠܕܝܼܠܗܘܿܢ. ܐܒܘܼܟܝ ܐܡܘܼܪ̈ܝܐ ܗ̄ ܡܛ݀ܠ ܕܠܗܘܿܢ ܚܫܼܒܬ݀
                    ܐܒܗ̈ܝܗܿ ܒܥܒܕܿܝ̈ܗܘܿܢ ܐܬܕܡܝܬ݀ ܘܡܘܠܕܢܝܼܬܟܝ ܒܝܘܡܿܐ ܗ̄ ܐܝܿܟܢܐ ܕܫܡܼܗ ܐܡܘܼܪ̈ܝܐ ܘܚܝܼ̈ܬܝܐ
                    ܠܐܒܗ̈ܝܗܘܿܢ ܡܛ݀ܠ ܥܒܕܿܝ̈ܗܘܿܢ ܒܝܼ̈ܫܐ ܘܡܛܿܠܗ݀ܝ ܕܒܝܢܬܗܘܿܢ ܥܡܿܪܝܼܢ ܗܼܘܘ. ܗܿܟܢܐ
                    ܡܘܠܕܢܝܼܬܗܘܿܢ ܡܫܿܡܗ ܠܡܨܪܝܢ ܗ݀ܝ ܕܒܗܿ ܐܬܝܬܼܒܘ ܡܼܢ ܩܕܝܼܡ ܘܐܬܝܼܠܕܘ. ܠܐ ܦܣܼܩܬ݀ ܗ̄
                    ܒܗܿܕܐ ܡܚܘܿܐ ܕܠܐ ܚܘܝܼܘ ܠܘܿܬܗܘܿܢ ܡܨܪ̈ܝܐ ܒܛܝܼܠܘܼܬܐ ܒܬܘܬܒܘܼܬܗܘܿܢ ܕܠܘܿܬܗܘܿܢ. ܘܒܡܠܚܼܐ
                    ܠܐ ܡܠܚܼܬܟܝ ܗ̄ ܕܐܦܿܠܐ ܒܚܕܐ ܡܼܢ ܐܝܿܠܝܢ ܕܒܗܿ ܡܬܼܚܙܝܐ ܐܬ݀ܐ ܕܡܪܚ̄ܡ܆ ܐܬܚܫܼܚܘ ܠܘܿܬܗܘܿܢ
                    ܡܨܪ̈ܝܐ ܐܝܟ ܢܡܘܿܣܐ ܕܢܫ̈ܐ ܐܝܿܠܝܢ ܕܡܥ̈ܕܢ ܒܙܒܢܼܐ ܕܡܘܠܕܐ ܢܩܼܒܠ̈ܢ ܥܘܼ̈ܠܐ ܐܝܿܠܝܢ ܕܝܠ̈ܕܢ
                    ܕܢܐܨ̈ܦܢ ܕܝܼܠܗܘܿܢ ܒܫܝܿܓܬܐ ܕܡ̈ܝܐ ܘܕܡܠܼܚܐ ܘܒܟܪܟܐ ܕܥܙܪܘܼܪ̈ܐ ܐܘܟܝܼܬ ܦܪ̈ܩܐ ܘܪ̈ܘܼܩܥܐ
                    ܒܠ̈ܝܐ ܕܒܗܘܿܢ ܟܪܟܝܼܢ ܠܥܘܼ̈ܠܐ ܟܕ ܡܬܼܝܠܕܝܢ. ܠܐ ܐܫܼܬܕܝܼܬܝ ܒܕܒܪܐ ܗ̄ ܕܝܠܕܬܢܝ ܗ̄ ܠܘ
                    ܐܟܡܿܢ ܕܗܝܼ ܡܘܠܕܐ ܗܘܬ݀ ܠܗܘܿܢ. ܐܠܐ ܗܼܢܘܢܿ ܐܝܟ ܢܡܘܿܣܐ ܕܟܝܿܢܗܘܿܢ ܒܗܿ ܡܬܼܝܠܕܝܢ ܗܼܘܘ
                    ܘܡܬܼܝܒܠܝܼܢ. ܒܕܒܪܐ ܕܝܢ ܐܡܿܪ ܕܐܫܼܬܕܝܼܬܝ ܒܗܿܝ ܕܟܕ ܒܐܪܥܐ ܗܿܝ ܕܥܡܿܪܝܼܢ ܗܼܘܘ ܒܗܿ ܫܪܝܢ
                    ܗܼܘܘ ܪܚܝܼܩܝܼܢ ܡܼܢ ܡܕܝܼܢܬܐܐܝܟ ܕܒܪܘܓܙܐ ܟܿܠܝܘܿܡ ܡܢܗܘܿܢ ܡܬܥܼܫܩܼܝܢ ܗܘܘ ܘܡܬܼܛܠܡܝܼ
                    ܒܦܘܼܠܚܢܐ ܩܫܝܐ ܘܝܠ̈ܘܼܕܝܗܘܿܢ ܡܫܼܬܕܝܢ ܗܼܘܘ ܒܢܗܪܐ. ܕܡܦܼܠܦܠܬܝ ܒܕܡܐ ܗ̄ ܟܬܒܐ ܠܘ ܒܠܚܘܼܕ
                    ܠܩܼܛܠܐ ܩ݀ܪܐ ܕܡܐ ܐܠܐ ܐܦ ܠܥܿܠܘܒܘܼܬܐ ܘܫܘܼܥܒܕܐ ܘܢܣܝܘ̈ܢܐ ܗܪܟܐ ܕܝܢ ܩܛܝܼܠܝܼܢ ܗܼܘܘ
                    ܘܡܦܠܦܠܝܼܢ ܒܕܡܐ. ܕܥܡܐ ܩܫܼܝܐ ܕܡܬܼܦܪܣܝܼܢ ܗܼܘܘ ܡܨܪ̈ܝܐ ܕܒܗܿ ܢܪܓܼܡܘܿܢ ܐܢܘܿܢ. ܗ݀ܝ
                    ܕܥܒܿܪܬ ܥܠܝܟܝ ܗ̄ ܐܟܙܼܢܐ ܕܟܕ ܥܿܒܪ ܐܢܫ ܒܐܘܼܪܚܐ ܘܚܿܙܐ ܠܐܢܫ ܕܒܠܝܼܥ ܡܼܢ ܠܣܛ̈ܝܐ ܘܝܿܬܒ
                    ܥܿܨܐ ܠܡܚܘܼܬܗ. ܘܐܡܿܪܬ ܠܟܝ ܒܕܡܟܝ ܚܝܝ ܗ̄ ܒܗܝܢ ܠܡ ܒܥܩ̈ܬܐ ܫܪܬܚܬܟܝ. ܘܣܓܝܬܝ ܘܪܒܝܼܬܝ
                    ܡܨܥܬ݀ ܥܩ̈ܬܐ ܕܡܨܪ̈ܝܐ. ܘܥܠܼܬܝ ܠܡܕܝܼܢܬܐ ܗ̄ ܕܟܢܥ̈ܢܝܐ. ܬܕ̈ܝܟܝ ܩܡܼܘ ܗ̄ ܐܬܡܼܛܝܼܬܝ
                    ܠܓܡܝܼܪܘܼܬܐ ܕܟ݀ܠ ܡܕܡ ܒܕܡܘܼܬܐ ܕܢܫ̈ܐ ܐܝܿܠܝܢ ܕܒܝܕ ܩܘܡܐ ܕܬܕܝܗܝܢ ܒܣܿܓܝܐܘܼܬܐ ܘܐܪܝܼܟܘܼܬܐ
                    ܕܣܥܪ̈ܝܗܝܢ ܡܘ̈ܕܥܢ ܥܠ ܙܒܢܼܐ ܕܢܩܝܼܦܘܼܬܗܝܢ ܕܠܘܿܬ ܓܒܪܐ. ܥܪܛܠ ܘܥܪܝܬ݀ ܗ̄ ܡܿܥܗܕ ܠܗܠܝܢ
                    ܕܒܫܘܼܪ̈ܝܐ ܐܡܼܬܝ ܕܡܼܢ ܥܘܼܕܪ̈ܢܐ ܕܒܢܝܢ̈ܫܐ ܡܫܠܚܝܼܢ ܗܼܘܘ ܘܒܥܪܝܐ ܕܒܝܼܫܘܼܬܟܘܢܿ ܕܡܨܪ̈ܝܐ
                    ܐܝܟ ܕܒܓܠܝܼܕܐ ܩܝܿܡܝܼܢ ܗܼܘܘ ܥܪܝܐ ܩܘܼܪܫܐ ܗܿܘ ܘܐܡܿܪ ܕܠܐ ܒܥܪܝܐ ܐܦܿܠܐ ܒܚܘܼܡܐ. ܝܿܗܒܝܼܢ
                    ܗܼܘܘ ܠܗܘܿܢ ܢܦܐܫܐ ܡܼܢ ܦܘܼܠܚܢܐ. ܘܚܙܝܿܬ ܙܒܼܢܟܝ. ܙܒܢܐ ܕܥܙܪܪ̈ܬܐ ܗ̄ ܟܕ ܐܬܓܠܝܿܬ ܥܠܝܟܘܢܿ
                    ܐܫܟܚܿܬܟܘܿܢ 
            
            
                 ܡܼܢ ܟܿܠܗܝܢ ܛܒ̈ܬܐ ܡܬܼܪܚܩܝܼܢ ܐܢܬܘܢܿ. ܘܐܝܬܝܼܬܟܘܢܿ ܒܣܬܘܐ ܕܒܝܼ̈ܫܬܐ
                    ܒܕܡܘܼܬ ܥܙܪܪܬܐ ܕܡܫܼܬܠܚܐ ܒܙܒܼܢܐ ܕܩܘܼܪܫܐ ܡܼܢ ܛܪ̈ܦܐ ܘܦܐܪ̈ܐ. ܥܙܪܪܬܐ ܩܢ̈ܝܐ ܐܢܘܢܿ ܕܠܐ
                    ܒܙܒܢܼܐ ܕܩܝܛܐ ܐܝܼܬ ܠܗܘܿܢ ܛܪ̈ܦܐ ܕܥ݀ܒܕܝܼܢ ܛܠܼܠܐ ܐܦܿܠܐ ܦܐܪ̈ܐ ܕܡܗܢܝܢ ܒܝܕ ܡܐܟܘܼܠܬܗܘܿܢ
                    ܗܿܟܢܐ ܠܡ ܐܝܼܬܝܗܘܿܢ ܗܼܘܘ ܒܢ̈ܝ ܝܼܣܪܐܝܠ ܒܙܒܼܢܐ ܗ݀ܘ ܕܠܐ ܚܿܫܚܝܼܢ ܗܼܘܘ ܠܡܕܡ. ܐܣܚܝܿܬܟܝ
                    ܒܡ̈ܝܐ ܕܪܣܣܐ ܘܕܘܼ̈ܟܝܐ ܕܒܗܘܿܢ ܡܼܬܕܟܝܢ ܗܼܘܘ. ܘܐܫܝܿܓܬ ܕܡܢܼܟܝ ܗ̄ ܛܘܼܥܝܝ ܗܿܝ ܕܩܢܼܝܬܝ
                    ܡܼܢ ܡܨܪ̈ܝܐ ܐܘܿ ܫܘܥܒܕܟܝ ܕܒܛܠܬ݀ ܡܢܼܟܝ. ܘܡܫܚܿܬܟܝ ܡܫܼܚܐ ܗ̄ ܟܗܝܼ̄ܢܘܼ ܕܐܪܥܐ ܕܡܘܼܠܟܢܐ.
                    ܘܠܐܒܫܿܬܟܝ ܦܬܟܐ ܗ̄ ܠܒܘܼܫܐ ܡܦܼܬܟܐ ܘܫܦܝܼܪܐ ܕܟܗܢܘܼܬܐ ܦܬܼܟܐ ܓܝܪ ܡܼܢ ܥܡܪܐ ܘܟܬܢܐ ܘܕܘܼܠܐ
                    ܙܩܖܝܼܪ ܗܼܘ ܒܨܘܼܪ̈ܬܐ ܘܟܗ̈ܢܐ ܠܿܒܫܝܼܢ ܗܼܘܘ ܠܗ. ܘܟܣܝܿܬܟܝ ܚܼܠܐ ܗ̄ ܩ݀ܪܐ ܠܡܐ̈ܢܐ ܢܩ̈ܕܐ
                    ܘܪ̈ܝܼܫܝܐ ܕܚܿܫܚܝܼܢ ܠܩܝܛܐ. ܗܿܠܢ ܕܡܼܢ ܪܩܝܼܩܐ ܐܘܿ ܡܼܢ ܕܘܼܠܐ ܙܩܝܼܪܐ ܙܩܝܼܪܝܼܢ ܕܡܐ
                    ܕܡܬܼܬܣܝܼܡ ܥܠ ܦܪܨܘܼܦܐ ܕܐܢܬܬܐ ܚܿܙܝܐ ܠܟܿܠ ܡܕܡ ܘܐܡܿܪܝܼܢ ܕܗܘܼܝܘܼ ܐܪܕܝܼܕܐ. ܨܒܬܿܬܟܝ
                    ܨܒܬܼܐ ܗ̄ ܪܡܿܙ ܥܠ ܫܘܼܡܠܝܐ ܕܒܟܿܠܗܝܢ ܐܝܿܠܝܢ ܕܚܫ̈ܚܢ ܠܨܒܼܬܐ ܘܠܩܘܼܝܡܐ ܕܒܪܢܫܐ. ܘܐܨܼܛܒܬܝ
                    ܒܕܗܒܐ ܗ̄ ܐܡܿܪ ܥܠ ܥܘܼܬܪܐ ܕܡܼܢ ܥܡ̈ܡܼܐ ܢܣܼܒ ܘܝܗܼܒ ܠܗܘܿܢ. ܒܘܼܨܐ ܘܬܟܠܼܬܐ ܘܦܬܼܟܐ ܗ̄
                    ܡ̈ܐܢܐ ܕܡܚܠܛܝܢ ܒܓܘ̈ܢܐ ܡܫܼܚܠ̈ܦܐ ܕܗܿܠܝܢ ܕܠܟܗܢܘܼܬܐ ܘܠܡܼܫܟܢܐ ܒܠܚܘܼܕ ܦܩܝܼܕܝܼܢ ܗܼܘܘ
                    ܕܢܨܛܒܼܬܘܢܿ ܒܗܘܿܢ. ܐܡܼܬܝ ܕܝܢ ܕܗܼܢܝܢ ܨܒܼܘ̈ܬܐ ܝܼܚܝܼܕ̈ܝܬܐ ܢܼܗܘ̈ܝܢ ܠܘ ܠܟܿܠܗܘܿܢ ܡܦܼܣ
                    ܠܡܠܒܼܫ ܒܘܼܨܐ ܗ̄ ܚܘܪܐ ܗܿܘ ܘܡܼܢ ܟܬܢܐ ܪܝܼܫܝܐ ܡܙܕܩܼܪ ܬܟܠܼܬܐ ܐܘܼܟܡܬܐ ܗܿܝ ܐܠܐ ܠܘܿ
                    ܣܿܓܝܼ. ܐܬܐܟܠܼܬܝ ܥܠ ܫܘܼܦܪܟܝ ܗ̄ ܕܢܐܼܡܪ ܥܠ ܫܡܐ ܕܝܼܠܝ ܕܣܝܼܡ ܥܠܝܟܝ ܟܕ ܗܿܠܝܢ ܠܡ ܟܿܠܗܝܢ
                    ܕܝܼܠܝ ܐܝܼܬܝܗܝܢ. ܗܝܼ ܕܝܢ ܠܘ ܒܠܚܘܼܕ ܐܓܪܐ ܕܚܠܦܝܗܝܢ ܕܗܿܠܝܢ ܛܠܡܼܬܢܝ ܐܠܐ ܐܦ ܝܬܝܼܪ
                    ܐܪܫܼܥܬ݀ ܟܕ ܠܐ ܡܬܼܟܚܕܐ ܐ݀ܦܠܐ ܡܼܢ ܩܪܝܬܐ ܕܫܡܝ ܕܥܠܝܗܿ ܟܕ ܡܢܝܐ ܘܣܒܝܼܪܐ ܒܝܬܝܬܐ ܕܝܼܠܝ
                    ܡܙܢܝܐ ܒܦܬܟܪ̈ܐ. ܗܿܝ ܕܐܬܬܟܼܠܬܝ ܐܡܿܪ ܕܝܢ ܥܠ ܗܿܝ ܕܪܢܝܢ ܗܼܘܘ ܕܡܥܬܪܝܼܢ ܗܿܟܢܐ
                    ܒܟܗܝܼܢܘܼܬܗܘܿܢ ܟܕ ܐ ܡܫܼܬܢܝܢ ܡܢܼܗܿ. ܘܐܫܼܕܬܝ ܙܢܝܘܼܬܟܝ ܗ̄ ܒܗ݀ܝ ܕܟܕ ܡܢܼܩܕܝܼܡ ܟܣܝܐܝܼܬ
                    ܡܙܢܝܢ ܗܼܘܘ ܠܚܪܬܐ ܓܠܝܐܝܼܬ ܢܦܩܼܘ ܒ݀ܬܪ ܦܬܟܪ̈ܐ. ܘܥܒܼܕܬܝ ܠܟܝ ܩܢܝ̈ܬܐ ܗ̄ ܕܡܼ̈ܘܬܐ
                    ܕܐ̈ܠܗܬܐ ܢܩܒܼ̈ܬܐ. ܟܕ ܕܡܿܝܐ ܕܐܦ ܗܼܘ ܫܡܐ ܕܩܢ̈ܝܬܐ ܥܠ ܐܝܿܠܝܢ ܕܚܬܝܼܬܐܝܼܬ ܐܬܪܥܝܼܘ
                    ܥܠܝܗܝܢ ܘܒܕܘ ܐܢܝܢ ܡܼܢ ܠܒܼܗܘܿܢ. ܪܡܿܙ ܬܘܼܒ ܥܠ ܐܝܿܠܝܢ ܕܒܕܘܼܟ ܓܢܝ̈ܬܐ ܡܫܡܿܗ ܠܗܝܢ ܟܬܒܐ.
                    ܘܒܕܘܼܟ ܚܘܓ̈ܒܐ ܐܟܡܿܢ ܒܕܗܘܿܢ ܚܒܝܼܫ̈ܢ ܘܐܣܝܼܪ̈ܢ ܢܦܫܼ̈ܬܐ ܕܦܠ̈ܚܝܗܘܿܢ ܟܕ ܠܐ ܡܬܼܪܚܩܝܼܢ
                    ܡܢܼܗܘܿܢ. ܠܐ ܬܥܠܝܼܢ ܗ̄ ܠܐ ܬܪܫܥܝܼܢ ܝܬܝܼܪ ܘܠܐ ܬܥܠܝܼܢ ܒܝܼ ܘܕܚܠܼܬܐ ܗܿܠܝܢ ܠܐ ܢܗܼ̈ܘܝܢ
                    ܠܟܝ ܒܗ݀ܝ ܕܐܢܿܐ ܗܿܘ ܐܠܗܟܘܿܢ ܘܠܘ ܦܬܟܪ̈ܐ. ܒܬ̈ܐ ܕܓܢ̈ܒܐ ܐܡܿܪ ܠܗܝ̈ܟܠܐ ܪ̈ܡܐ ܘܪ̈ܘܝܼܚܐ
                    ܕܒܝܢܬ݀ ܛܘܼܪ̈ܐ ܘܪ̈ܡܬܐ ܐܩܝܼܡܘ 
            
            
                 ܠܦܬܟܪ̈ܝܗܘܿܢ ܕܒܗܘܿܢ ܡܬܼܟܣܝܼܢ ܗܼܘܘ ܒܥܐܕ̈ܐ ܘܕܒܼܚ̈ܐ ܕܫܐܕ̈ܐ ܡܿܕܒܚܝܼܢ
                    ܗܼܘܘ. ܓܝܒ̈ܐ ܗ̄ ܒܝܬ ܟܢܘܼܫ̈ܝܐ ܕܦܬܟܪ̈ܐ. ܘܒܟܿܠ ܪܝܼܫ ܐܘܼܪ̈ܚܬܐ ܒܢܼܝܬܝ ܦܪ̈ܟܝܟܝ ܗ̄ ܒܝܬ
                    ܣܓܕ̈ܬܐ ܕܦܬܟܪ̈ܐ ܐܝܟ ܗܿܠܝܢ ܒ̈ܬܐ ܙܥܘܪ̈ܐ ܕܒܝܬ ܨܠ̈ܘܬܐ ܕܒܿܢܝܢܼ ܠܡܗܝܡܼ̈ܢܐ ܥܠ ܪܝܼܫ
                    ܐܘܼܪ̈ܚܬܐ ܒܫܡܐ ܕܐܠܗܐ ܐܝܟ ܕܠܢܝܿܚܐ ܕܪ̈ܕܝܝ ܒܐܘܼܪ̈ܚܬܐ. ܘܦܫܼܛܬܝ ܪ̈ܓܠܝܟܝ ܗ̄ ܐܡܼܪܗܿ
                    ܠܗܿܕܐ ܡܼܢ ܕܡܘܼܬܐ ܕܢܫ̈ܐ ܢܬܝܼܦ̈ܬ݀ ܠܙܢܿܝܘܼܬܐ ܕܐܦܿܠܐ ܡܼܢ ܗܿܕܐ ܡܬܼܟܚ̈ܕܢ ܕܦܼܫ̈ܛܢ
                    ܫܩ̈ܝܗܝܢ ܘܢܓܼܠ̈ܝܢ ܪ̈ܓܠܝܗܝܢ ܘܢܬܼ̈ܒܢ ܩܕܡ ܐܝܿܠܝܢ ܕܥܿܒܪܝܼܢ ܒܫܘܼܩܐ. ܪܘܪ̈ܒܝ ܒܣܼܪܐ ܗ̄
                    ܪܒܘܼܬܐ ܗܿܟܝܼܠ ܕܒܣܼܪܐ ܕܗܕ̈ܡܝܗܘܿܢ ܕܡܨܪ̈ܝܐ ܕܐܡܼܪ ܬܢܢ ܠܐ ܕ݀ܡܝܐ ܕܥܠ ܒܣܼܪܐ ܕܟܝܿܢܐ
                    ܡܫܿܘܕܥ ܡܛ݀ܠ ܕܐ݀ܦܠܐ ܥܠ ܙ݀ܢܝܘܼܬܐ ܕܦܓܪܐ ܐܝܼܬ̄ܘ ܫܪܒܗ. ܐܠܐ ܒ݀ܥܐ ܕܡܼܢ ܫܡܐ ܕܗܕ̈ܡܐ ܗܿܠܝܢ
                    ܕܒܣܼܪܐ ܢܘܕܥ ܥܠ ܥܒܝܘܼܬܗܘܿܢ ܕܡܨܪ̈ܝܐ ܕܒܕܚܠܬ݀ ܦܬܟܪ̈ܐ. ܘܐܘܒܿܕܬ ܦܘܼܩ̈ܕܢܝܟܝ ܗ̄ ܠܘ ܥܠ
                    ܦܘܼܩ̈ܕܢܘܗܝ ܕܢܡܘܿܣܐ ܕܐܬܝܼܗܒ ܒܝܕ ܡܘܿܫܐ. ܐܡܿܪ. ܐܠܐ ܥܠ ܡܫܠܡܢܘܼܬܐ ܘܢܡܘܿܣܐ ܕܦܬܟܪ̈ܐ ܟܕ
                    ܒܝܕ ܡܗܡܝܢܘܼܬܐ ܕܗܿܘܝܐ ܗܘܼܬ ܡܼܢ ܐܠܗܐ ܠܘܿܬܗܘܿܢ ܕܢܫܼܬܥܒܕܘܢ ܠܥܡ̈ܡܼܐ. ܐܦ ܢܡܘ̈ܣܐ
                    ܕܦܬܟܪ̈ܐ ܒܿܛܠܝܼܢ ܼ̈ܘܘ ܟܡܼܐ ܙܒܢ̈ܝܼܢ. ܘܐܦ ܗܼܢܘܢܿ ܦܬܟܪ̈ܐ ܡܢܼ̈ܘܿܢ ܕܒܥܠܕܒ̈ܒܝܗܘܿܢ
                    ܡܬܼܚܒܠܝܼܢ ܗܼܘܘ. ܗܿܕܐ ܗܿܝ ܓܝܪ ܗܿܝ ܕܬܟ݀ܣܢ ܗܼ̈ܘܝ ܠܟܝ ܡܼܢ ܐܘܼܪ̈ܚܬܟܝ ܕܙܢܿܝܘܼܬܐ. ܡܿܢܐ
                    ܐܕܿܘܢ ܠܒܪܬܟܝ ܗ̄ ܒܪܬܐ ܠܥܼܣܪܐ ܫܒܼ̈ܛܐ ܩܿܪܐ ܐܝܟ ܕܒܚܼܡܐ ܕܠܘܿܬ ܐܘܿܪܫܠܡ ܘܥܡܐ ܕܝܼܗܘܼܕܐ
                    ܕܐܝܼܬ ܠܘܿܬܗܘܿܢ ܗܝܟܠܐ ܘܟܗܢܘܼܬܐ ܘܡܠܟܘܼܬܐ ܒܗܿܝ ܕܐܦ ܥܣܼܪܐ ܫܒܼ̈ܛܝܼܢ ܒܿܬܪ ܙܒ̈ܢܼܐ
                    ܕܐܣܼܬܕܩܘ ܘܢܦܩܼܘ ܡܼܢ ܫܘܼܥܒܕܐ ܕܒܝܬ ܝܼܗܘܼܕܐ ܡܢܼܗܘܿܢ ܘܠܗܘܿܢ ܡܠܟܘܼܬܐ ܐܩܝܼܡܘ ܒܫܡܪܝܼܢ.
                    ܐܡܿܪ ܓܝܪ ܕܐܢ ܒܥܒܿܕ̈ܐ ܕܝܼܠܟܝ ܐܘܿܪܫܠܡ ܚܿܐܪ ܐܢܼܐ ܘܒܛܢ̈ܦܘܼܬܟܝ ܣܓܝ̈ܐܬܐ. ܐܢܬܝ ܕܐܝܟܐܡܐ
                    ܘܡܠܦܢܝܼܬܐ ܕܟܿܠܗ ܥܡܐ ܣܝܼܡܐ ܗܼܘܝܬܝ ܡܢܼܝ. ܐܝܟ ܕܡܼܢ ܦܚܼܡܟܝ ܐܦܿܠܐ ܙ݀ܕܩ ܕܐܕܿܘܢ ܘܐܚܿܝܒ
                    ܠܗܿܢܘܿܢ ܕܓܡܝܼܪܐܝܼܬ ܫܒܼܩܘܼܝ ܘܐܬܪܚܼܩܘ ܡܼܢ ܨܝܕܝ ܡܼܬܚܙܝܐ ܠܝܼ ܒܗܿܝ ܕܚܛܗ̈ܝܟܝ ܕܝܼܠܟܝ
                    ܥܫܝܼܢܝܼܢ ܡܼܢ ܕܝܼܠܗܘܿܢ ܘܐܬܿܠܟܝ ܠܕܡܐ .ܗ̄ ܚܠܼܦ ܕܡܐ ܕܐܬܼܐܫܕ ܒܓܘܟܝ ܗܿܟܢܐ ܐܦ ܗ݀ܝ
                    ܕܚܡܼܬܐ ܘܛܢܼܢܐ ܐܝܼܬܝܗܿ. ܕܡܐ ܐܡܿܪ ܠܩܼܛܠܐ ܕܒܢ̈ܝܗܘܿܢ. ܛܢܢܐ ܕܝܢ ܠܗܿ ܝܕܗܘܼ ܡܛ݀ܠ ܗܿܠܝܢ
                    ܬܪ̈ܬܝܗܝܢ ܩܼܛܠܐ ܕܒܢܝ̈ܝܗܘܿܢ ܘܙ݀ܢܝܘܬܗ ܒܝܕ ܐܝܿܠܝܢ ܕܣܿܐܡ ܗܼܘܐ ܒܪܝܼܫܗܘܿܢ ܡܿܘܕܥ ܠܗܿ
                    ܨܝܕܝܗܘܿܢ. ܐܡܿܪ ܕܝܢ ܥܠ ܒܥ̈ܠܕܒܒܐ ܕܠܒܝܼܫܝܼܢ ܟܐܡܬ݀ ܛܢܼܢܐ ܕܚܠܦ ܐܠܗܐ. ܘܒܚܡܼܬܐ
                    ܡܬܼܢܩܡܝܼܢ ܡܢܼܗܘܿܢ ܟܢܼ̈ܫܐ ܗ̄ ܕܥܡ ܒܒܠ̈ܝܐ ܘܢܪܓܡܘܼܢܟܝ ܐܝܟ ܕܠܓܝܪܬܐ ܕܓܪܬ݀ ܒܩܝ̈ܣܐ
                    ܘܒܟ̈ܐܦܐ. ܢܫ̈ܐ ܗ̄ ܢܫ̈ܐ ܣܓܝ̈ܐܬܐ ܩܿܪܐ ܬܢܢ ܠܟܢܘܼܫ̈ܬܐ ܕܥܡ̈ܡܐ ܘܟܿܠܡܿܢ ܕܡܡܬܼܠ ܗ̄ ܕܗܿܟܢܐ
                    ܠܡ ܥܿܒܕ ܐܢܼܐ ܠܗ ܠܦܘܼܪܥܢܟܝ ܐܝܟ ܡܬܠܐ ܘܬܫܥܝܼܬܐ ܠܟܿܠܗܘܿܢ ܥܡ̈ܡܼܐ. ܗ݀ܘ ܕܟܕ ܡܢܼܗ
                    ܢܿܣܒܝܼܢ ܣܗܕܘܼܬܐ ܕܥܒܕܿܝ̈ܟܝ ܛܢ̈ܦܐ ܐܡܿܪܝܼܢ. ܒܪܬܐ ܗ̄ ܡܛ݀ܠ ܕܒܪܬܐ ܗܿܝ ܗܿܕܐ ܕܟܘܼܫܬܐ
                
            
            
                 ܕܢܦܩܼܬ݀ ܡܼܢ ܡܨܪܝܢ ܡܛ݀ܠ ܗܿܕܐ ܕܡܿܝܢ ܣܘܼܥܪ̈ܢܝܗܿ ܠܕܗ݀ܝ. ܒܪܬ݀ ܐܡܟܝ
                    ܐܢܬܝ ܗ̄ ܐܟܙܼܢܐ ܠܡ ܕܗܿܝ ܕܒܫܘܼܪܝܐ ܕܡܟܘܼܪܝܗܿ ܫܒܼܩܬܢܝ ܘܙܢܝܬ݀ ܒܥܓܼܠܐ ܗܿܟܢܐ ܐܦ ܐܢܬܝ
                    ܠܝܼ ܫܒܼܩܬܝ ܘܠܒܢ̈ܝܟܝ ܛܥܝܼܬܝ ܒܗܿܝ ܕܕܒܚܼܬܝ ܐܢܘܿܢ ܠܒܢܝ̈ܫܐ ܪ̈ܚܝܼܩܡܐ ܠܦܬܟܪ̈ܐ. ܐܚܪ̈ܢܐ
                    ܐܡܿܪܝܼܢ ܕܒܢ̈ܝܗܿ ܩܿܪܐ ܠܡܘܿܫܐ ܘܠܐܗܪܘܢܿ ܘܠܡܝܬܪ̈ܐ ܕܒܗܘܿܢ. ܘܚܿܬܐ ܐܢܬܝ ܕܐܚ̈ܘܬܐ ܗ̄
                    ܣܘܼܥܪ̈ܢܝܟܘܢ ܠܡ ܒܝܼ̈ܫܐ ܕ݀ܡܝܢ ܠܕܚ̈ܕܕܐ ܡܛ݀ܠ ܕܡܪܝܼܬܘܢܿ ܒܥܒܿܕ̈ܐ ܕܗܿܢܘܢܿ ܕܒܓܘ ܡܕܒܪܐ:
                    ܬܘܼܒ ܘܐܦ ܐܢܬܘܿܢ ܡܪܝܼܬܘܢܿ ܚܕ ܒܚܕ ܘܕܡܘܼܬܐ ܫܪܝܼܪܬܐ ܐܝܼܬ ܠܟܘܿܢ ܨܝܕ ܐܚܝ̈ܟܘܢܿ ܐܝܿܠܝܢ
                    ܕܒܫܿܡܪܝܼܢ ܘܒܥܒܼܪܐ ܕܝܘܪܕܢܢ ܥ݀ܡܪܝܼܢ ܗܼܘܘ ܐܟܘܬܟܘܢܿ ܓܝܪ ܫܒܼܩܘ ܠܐܠܗܐ ܐܦ ܠܢܒ̈ܝܐ ܘܓܼܪܘ
                    ܒܩܝܣ̈ܐ܀ ܘܗ݀ܝ ܕܓܒܪ̈ܝܗܝܢ ܣܓܝܢܐܝܼܬ ܪܡܙܐ ܥܠ ܚܕ ܐܠܗܐ ܬܠܬܐ ܩܢܘ̈ܡܐ ܐܝܟ ܗܿܝ ܕܢ݀ܥܒܕ ܒܪܢܫܐ
                    ܒܨܠܡܢ ܘܒܕܡܘܼܬܢ. ܐܚܪܢܝܐܝܼܬ ܥܠܝܗܘܿܢ ܕܓܒܪ̈ܐ ܘܒܢ̈ܝܐ ܫܪܝܼܪܐܝܼܬ ܐܡܝܼܪܐ. ܒܗ݀ܝ ܕܐܦ ܗܼܢܝܢ
                    ܟܢܘܼܫ̈ܬܐ ܫܒܼ̈ܩܝ ܐܢܝܢ ܠܡܕܝܼ̈ܢܬܐ ܒܝܕ ܫܒܼܝܐ ܕܐܕܪܟ ܐܢܝܢ ܘܡܥܕ ܟܬܒܐ ܕܢܟܢܐ ܕܡܕܝܼܢܬܐ
                    ܐܝܿܕܐ ܕܗܝܼ ܓܒܪ̈ܝܗܿ ܘܒܢ̈ܝܗ ܐܝܟ ܗ݀ܝ ܕܐܝܟ ܕܒܥܿܠ ܓܕܘܕܐ ܠܒܬܘܼܠܬܐ ܢܒܼܠܥܘܼܢܟܝ ܒܢܝ̈ܟܝ܀
                    ܘܐܝܿܠܝܢ ܐܢܝܢ ܐܚܘ̈ܬܗܿ ܐܡܿܪ܆ ܚܿܬܟܝ ܩܫܝܼܫܬܐ ܗ̄ ܫܡܪܝܼܢ ܐܝܼܬܝܗܿ ܘܡܕ̈ܝܼܢܬܐ ܕܬܚܝܬ
                    ܫܘܼܛܠܢܗܿ ܕܠܗܝܢ ܩܿܪܐ ܒܢ̈ܬܗܿ ܕܝ̈ܬܒܢ ܡܼܢ ܣܡܠܗܿ܆ ܘܚܿܬܟܝ ܙܥܘܼܪܬܐ ܕܝܿܬܒܐ ܡܼܢ ܝܡܝܼܢܟܝ
                    ܣܕܘܿܡ ܘܒܢ̈ܬܗܿ ܗ̄ ܠܗܿܢܘܢܿ ܬܪܝܢ ܫܒ̈ܛܐ ܘܦܠܓܗ ܩܿܪܐ ܬܢܢ ܣܕܘܿܡ ܡܛ݀ܠ ܕܡܝܘܼܬ
                    ܣܘܼܥܪ̈ܢܝܗܘܿܢ ܘܐ݀ܡܪ ܕܚܿܬܟܝ ܙܥܘܪ̈ܬܐ ܕܠܘܼܩܒܠ ܐܦܝ̈ܟܝ ܡܼܢ ܡܕܢܚܐ ܡܼܢ ܝܡܝܼܢܟܝ ܝܿܬܒܐ.
                    ܚܫܼܒܘܢ ܘܡܕܝܼ̈ܢܬܐ ܕܡܫܼܥ̈ܒܕ ܗܼ̈ܘܝ ܠܗܿ ܘܗ݀ܝ ܕܐܝܼܬܝܗܿ ܗܘܬ݀ ܒܪܬ ݀ܬܚܘܼܡܐ ܘܒܪܬ݀ ܪܥܝܢܐ
                    ܕܣܕ̈ܘܼܡܝܐ ܘܠܘ ܥܠ ܣܕܘܿܡ ܪܡܿܙ ܡܛ݀ܠ ܕܣܕܘܿܡ ܠܐ ܬܘܼܒ ܥܡܼܪܬ݀. ܐܠܐ ܟܿܠܗܿ ܝܩܝܼܪܕܬܐ ܗܿܝ
                    ܥܠܗܿܕܐ ܐܡܼܪ ܕܐܗܦܼܟ ܫܒܝܼܬܗܝܢ ܫܒܝܼܬܐ ܕܣܕܘܼܡ ܘܕܒ̈ܢܬܗܿ ܠܐ ܥܒܪܬ݀ ܣܕܘܿܡ ܗ̄ ܡܼܢ ܗܿܕܐ
                    ܝܼܕܝܼ݁ܐ ܕܥܠ ܬܪܝܢ ܫܒ̈ܛܐ ܘܦܠܓܗ ܐܝܼܬܝܗܿ ܡܠܼܬܐ ܘܠܘ ܥܠ ܣܕܘܼ̈ܡܝܐ. ܬܘܼܒ ܡܼܢ ܗܿܝ ܕܐܚ̈ܐ
                    ܘܒܢ̈ܝ ܐܒܗ̈ܐ ܕܝܘܼܕ̈ܝܐ ܫܡܼܗ ܐܢܘܿܢ ܠܐ ܥܒܼܕܘ ܗܼܢܘܿܢ ܬܪܝܢ ܫܒ̈ܛܐ ܘܦܠܓܗ ܕܠܗܘܿܢ ܩܿܪܐ
                    ܣܕܘܼ̈ܡܝܐ ܡܕܡ ܕܕܡܿܐ ܠܣܕܘܼ̈ܡܝܐ. ܗܿܢܘ ܥܘܠܐ ܕܣܕܘܿܡ ܚܿܬܟܝ ܗ̄ ܐܡܿܪ ܕܡܠܝܐ ܗܘܼܬ ܚܿܟܝ
                    ܚܪܡܘܼ̄ ܘܓܐܝܘܼܬܐ ܕܠܐ ܚܿܫܒܝܼ ܗܼܘܘ ܠܐܢܫ ܡܢܼܗܘܿܢ ܟܗܝܼܢܘܼܬܗܘܿܢ ܕܠܗܿ ܩܿܪܐ ܣܒܥܐ ܘܠܐܠܗܐ
                    ܕܡܐܛܒ ܠܗܘܿܢ ܘܠܐ ܚܫܼܒܘ ܡܕܡ ܘܛ݀ܒܬܐ ܒܐܢܫ ܠܐ ܣܿܥܪܝܼܢ ܗܼܘܘ ܡܼܢ ܥܠܬ݀ ܪܡܘܼܬܗܘܿܢ ܒܐܝܼܕܐ
                    ܕܡܣܼ̈ܟܢܐ ܗ̄ ܒܗܿܕܐ ܡܩܿܛܪܓ ܠܗܘܿܢ ܥܠ ܕܩܡܼܘ ܠܘܼܩܒܠ ܦܘܼܩܕܢܐ ܕܐܠܗܐ ܗ݀ܘ ܕܡܿܦܩܕ ܗܼܘܐ
                    ܒܢܡܘܿܣܐ ܥܠ ܡܣ̈ܟܼܢܐ ܘܣܢܼܝ̈ܩܐ. ܐܚܪ̈ܢܐ܆ ܥܠ ܣܕܘܿܡ ܕܫܪܪܐ ܡܦܫܿܩܝܼܢ ܠܦܬܓ̈ܡܼܐ ܗܿܠܝܢ
                    ܘܒܢ̈ܬܗܿ ܩܿܪܐ 
            
            
                 ܠܡܕܝܼ̈ܢܬܐ ܕܡܫܼܥ̈ܒܕ ܠܗܿ. ܕܗܒܦܟܿܬ ܐܢܝܢ ܗ̄ ܠܣܕܘܼܡ ܘܚܒܪ̈ܬܗܿ. ܐܚܪ̈ܢܐ܆
                    ܐܝܿܠܝܢ ܕܥܠ ܬܪܝܢ ܫܒ̈ܛܐ ܘܦܠܓܗ ܢ݀ܣܒܝܼܢ ܠܡܠܼܬܐ ܐ݀ܡܪܝܼܢ ܕܗܦܘܼܟܝܐ ܬܢܢ ܠܘ ܥܠ ܐܪܥܐ ܐܡܼܪ.
                    ܐܠܐ ܥܠ ܫܒܼܝܐ ܕܓܠܘܼܬܐ ܕܡܕܝܼܢܬܐܐܝܿܕܐ ܕܗܿܘܝܐ ܡܼܢ ܒܥ̈ܠܕܒܒܐ. ܘܙܟܼܝܬܝ ܠܐܚ̈ܘܬܟܝ ܗ̄
                    ܥܒܼܪܘ ܦܘܼܪ̈ܣܐ ܘܨܢܥ̈ܬܐ ܕܛܘܼܥܝܝ ܕܝܼܠܟܝ ܠܕܗܿܠܝܢ. ܘܙܟܼܝܬܝ ܠܚܘ̈ܬܟܝ. ܩܒܠܝ ܒܗܬܼܬܟܝ ܗ̄
                    ܡܣܡ ܒܪܝܼܫܐ ܕܒܗ ܡܬܼܬܚܕܐ ܐܢܬܝ ܒܒܗܼܬܬܐ. ܘܡܼܢ ܕܐܘܕܥ ܥܠ ܦܘܼܢܝܐ ܕܫܿܡܪܝܼܢ ܘܕܡܕ̈ܝܼܢܬܐ
                    ܐܚܪ̈ܢܝܬܐ ܥܡ ܕܐܘܿܪܫܠܡ ܡܿܘܕܥ ܥܠܼܬܐ ܕܡܛ݀ܠ ܡܿܢܐ ܩܕܡ ܩܘܼܢܝܐ ܡܫܼܬܒܝܐܐܘܿܪܫܠܡ ܘܒܝܢܬ݀
                    ܗܿܠܝܢ ܐܡܿܪ. ܠܐ ܗܘܬܼ݀ ܣܕܘܼܡ ܚܿܬܟܝ. ܕܬܬܓܼܠܐ ܒܝܼܫܬܟܝ ܗ̄ ܠܐ ܠܡ ܡܨܝܐ ܗܼܘܝܬܝ ܠܡܐܼܡܪ
                    ܕܠܐ ܡܦܿܣܐ ܗܼܘܝܬܝ ܒܐܒܕܢܐ ܕܣܕܘܼܡ ܩܕܡ ܕܬܬܓܼܠܐܒܝܼܫܬܟܝ ܒܝܕ ܫܒܼܝܐ. ܕܗܿܐ ܒܦܘܼܡܟܝ ܡܬܢܝܐ
                    ܗܼܘܝܬܝ ܛܒܼܐ ܕܡܦܘܼܠܬܗܿ. ܒܝܘܡܐ ܕܓܐܝܘܼܬܟܝ ܗ̄ ܕܟܕ ܡܬܓܝܐܐ ܗܼܘܝܬܝ ܒܥܘܼܬܪܐ ܘܡܠܟܘܼܬܐ ܐܦ
                    ܗܿܝ ܕܝܢ ܓܝܪ ܢܛܝܼܪ ܗܼܘܐ ܒܢܦܼܫܟܝ ܥܘܼܗܕܢܐ ܕܟܿܠܗܝܢ ܐܢ ܗܦܘܼܟܝܐ ܕܣܕܘܿܡ ܗ݀ܘ ܕܒܥ̈ܝܢܐ
                    ܡܬܼܚܙܐ ܘܐܢ ܫܒܼܝܐ ܕܐܚ̈ܘܬܟܝ ܫܿܡܪܝܼܢ ܘܐܪܥܐ ܕܬܪܝܢ ܫܒܼܛ̈ܐ ܘܦܠܓܗ܆ ܐܝܟ ܚܣܼܕܐ ܗ̄ ܐܝܿܟܢ
                    ܠܡ ܠܐ ܡܦܿܣܐ ܐܢܬܝ ܒܒܝܼܫܬܟܝ ܘܒܡܪܕܘܼܬܐ ܕܗܿܠܝܢ ܟܕ ܗܿܐ ܡܼܢ ܐܕܘܼ̈ܡܝܐ ܘܡܼܢ ܦܠܫܬ̈ܝܐ
                    ܡܬܼܚܣܕܝܼܢ ܗܼܘܝܬܘܿܢ ܕܡܛ݀ܠ ܥܘܠܟܘܢܿ ܘܪܘܼܫܥܟܘܢܿ ܢܦܠܼܬܘܢܿ ܒܒܝܼܫ̈ܬܐ ܕܐܝܟ ܗܿܠܝܢ.
                    ܚܛܗ̈ܝܟܝ ܘܛܢܦܘܼܬܟܝ ܗ̄ ܠܘ ܕܗܝܼ ܚܛܗ̈ܝܗܿ ܫܿܩܠܐ ܗܘܬ݀ ܐܠܐ ܦܘܼܪܥܢܐ ܕܚܛܗ̈ܝܗܿ ܘܕܛܢ̈ܦܘ̄ܗ
                    ܟܐܢܐܝܼܬ ܡܩܒܠܐ ܗܘܬܼ݀ ܐܘܿ ܡ݀ܠ ܗܿܝ ܕܒܗܘܿܢ ܒܚܛ̈ܗܐ ܡܬܼܗܦܟܝܼܢ ܗܼܘܘ ܐܡܿܪ ܕܐܦ ܒܗܘܿܢ
                    ܐܝܼܬܝܗܘܿܢ ܗܼܘܘ ܘܗܼܢܘܿܢ ܫܩܝܼܠܝܼܢ ܗܼܘܘ ܠܗܘܿܢ ܥܠܝܗܘܿܢ ܘܡܛ݀ܠ ܕܠܐ ܕܪܚܝܼܩܝܼܢ ܗܼܘܘ
                    ܡܢܼܗܘܿܢ ܡܿܩܒܠܝܼܢ ܗܼܘܘ ܐܦ ܠܦܘܼܪܥܢܗܘܿܢ ܙܕܩܐܝܼܬ. ܐܢܿܐ ܕܝܢ ܐܬܿܕܟܪ ܗ̄ ܚܿܠܛ ܩܠܝܼܠ ܡܼܢ
                    ܗܿܠܝܢ ܕܦܘܼܢܝܐ ܩܿܝܡܐ ܕܥܡܟܝ ܕܒܛܘܿܪ ܣܝܼܢܝ. ܛܠܝܘܼܬܐ ܓܝܪ ܠܙܒܼܢܐ ܗ݀ܘ ܩܿܪܐ. ܘܬܥܼܗܕܝܼܢ
                    ܐܘܼܪ̈ܚܬܟܝ ܗ̄ ܐܘܼܪ̈ܚܬܐ ܗܿܪܟܐ ܠܣܘܼܥܪ̈ܢܐ ܡܫܿܡܗ. ܕܢܣܒܿܬ ܠܐܚܘ̈ܬܟܝ ܗ̄ ܠܗܿܠܝܢ ܐܡܿܪ
                    ܕܬܬܥܼܗܕܝ ܒܗܿܠܝܢ ܪܡܿܙ ܥܠ ܐܘܝܘܼܬܗܘܿܢ ܕܒܿܬܪ ܦܘܼܢܝܐ ܕܠܐ ܡܣܼܬܕܩܝܼܢ ܡܟܝܼܠ ܠܬܪ̈ܬܝܢ
                    ܡ̈ܠܟܘܢ. ܐܠܐ ܡܬܼܟܢܫܝܼܢ ܒܚܘܼܒܐ ܠܚܕܐ ܡܠܟܘܼܬܐ. ܗܿܕܐ ܐܦ ܒܿܬܟܪܢ ܡܒܿܕܩ ܥܠܝܗܿ ܟܕ ܦ݀ܩܕ
                    ܠܢܒܝܐ ܕܢܫܼܩܘܿܠ ܬܪܝܢ ܩܝܣ̈ܐ ܘܢܟܼܬܘܿܒ ܥܠܝܗܘܿܢ ܫܡܗܝ̈ܗܘܢܿ ܘܢܩܦܼ ܐܢܘܿܢ ܠܚܕ̈ܕܐ ܒܐܝܼܕܗ.
                    ܠܐ ܡܼܢ ܩܝܿܡܟܝ ܗ̄ ܠܘ ܡܼܢ ܚܘܼܒܟܝ ܫܪܝܼܪܐ ܕܠܘܿܬܝ ܥܿܒܕ ܐܢܼܐ ܠܗܿܠܝܢ ܐܠܐ ܡܛܾ݀ ܛܝܒܘܼܬܝ
                    ܡܩܝܼܡ ܐܢܼܐ ܥܡܟܝ ܩܝܿܡܝ ܕܡܬܼܟܗܢܬܝ ܘܡܡܠܟܬܝ ܐܝܟ ܕܡܼܢ ܩܕܝܼܡ ܨܚܚܐ ܕܝܙܙ̄ ܐܚܘܼܕ ܐܘܼܚܕܬܐ
                    ܥܠ ܕܒܝܬ ܝܼܣܪܐܝܠ ܗ̄ ܩܿܪܐ ܬܢܢ ܠܡܢܿܬܐܐܘܟܝܼܬ ܠܕܒܝܬ ܝܼܗܘܼܕܐ ܡܛ݀ܠ ܕܐܦ ܗܼܢܘܿܢ ܡܼܢ
                    ܝܼܣܪܐܝܠ ܐܝܼܬܝܗܘܿܢ ܗܼܘܘ. ܐܘܼܚܕܬܐ ܘܡܬܠܐ 
            
            
                 ܡܬܼܐܡܪ ܗ݀ܘ ܡܕܡ ܕܠܘ ܗܘܼܝܘܼ ܩܢܘܿܡܗܿ ܘܦܪܨܘܼܦܗܿ ܕܨܒܘܼܬܐ ܕܡܬܐܼܡܪܐ ܐܠܐ
                    ܒܕܘܼܡܝܐ ܕܝܼܠܗܿ. ܡܕܡ ܕܢܘܼܟܪܝ ܡܬܼܡܠܠ ܘܡܼܬܪܟܒ ܐܝܟ ܕܕܡܝܼ ܠܣܒܼܪܬܐ ܠܡܨܝܼܕܬܐ ܘܚܡܝܼܪܐ.
                    ܐܘܼܚܕܬܐ ܡܬܼܐܡܪܐ ܡܛ݀ܠ ܕܐܚܿܕܐ ܠܗ ܠܚܘܼܫܒܐ ܕܠܐ ܝܿܕܥ ܗ݀ܘ ܡܐ ܕܡܬܼܐܡܪ ܡܬܠܐ. ܐܕܫܐ ܕܗ݀ܘ
                    ܡܐ ܕܡܬܼܢܣܒ ܕܢܬܐܼܡܪ ܚܠܦ ܡܕܡ ܕܪܚܝܼܩ ܦܠܐܼܬܐ ܗܼܢܘܿܢ ܙܢ̈ܝܐ ܕܣܥܘܪ̈ܘܼܬܐ ܕܗ݀ܘ ܡܕܡ
                    ܕܡܬܼܡܠܠ ܕܡܼܬܪܫܡܝܼܢ ܐܝܟ ܕܒܦܼܠܐܬܐ ܘܡܿܚܘܝܢ ܠܗ݀ܘ ܕܪܚܝܼܩ ܘܟܕ ܡܿܘܕܥ ܥܠ ܡܬܠܐ ܐܡܿܪ.
                    ܢܫܼܪܐ ܪܒܐ ܗ̄ ܢܫܼܪܐ ܩ݀ܪܐ ܠܢܒܘܼܟܢܕܢܨܪ ܡܛ݀ܠ ܩܠܝܼܠܘܼܬܐ ܕܐܘܼܚܕܢܗ ܕܡܼܢ ܫܝܠܝ ܐܬܦܼܪܣ
                    ܒܐܬܪ̈ܘܬܐ ܟܿܠܗܘܿܢ. ܓܦܼ̈ܐ ܐܘܟܝܼܬ ܐܒܼܪ̈ܐ ܩܿܪܐ ܠܚܝܠܬܢܘܼܬܐ ܕܡܠܟܘܼܬܗ ܘܥܫܝܼܢܼܘܬ
                    ܫܘܼܠܛܢܗ. ܓܠ̈ܦܢܐ ܗܿܢܘܿܢ ܕܒܐܒܪ̈ܐ ܕܒܗܘܿܢ ܦܼܚ ܐܝܼܬܝܗܘܿܢ ܪܘܪ̈ܒܢܘܗܝ. ܛܦܪ̈̄ܘ ܚܝܠ̈ܘܬܗ
                    ܒܗܿܝ ܕܦܪܚܬܐ ܒܛܦܪ̈ܝܗܿ ܢ݀ܒܪܐ ܘܚܿܦܪܐ ܐܪܥܐ. ܡܠܓܗ ܓܝܪ ܠܟܿܠܗ ܓܘܫܼܡܐ ܕܦܪܚܬܐ ܩܪܝܼܡ
                    ܘܡܟܿܣܐ. ܐܦ ܗܿܢܐ ܬܚܘܝܼܬܐ ܕܣܿܓܝܐܘܼܬ ܥܡܗ ܘܦܪ̈ܫܘܗܝ ܐܝܿܠܝܢ ܕܡܼܢ ܟ݀ܠ ܓܒ̈ܝܼܢ ܠܘܿܬܗ
                    ܟܢܝܼܫܝܼܢ ܗܼܘܘ. ܘܐܬܼܐ ܠܠܒܼܢܢ ܗ̄ ܠܡܠܟܘܼܬܐ ܕܝܘ̈ܕܝܐ ܩܿܪܐ ܠܒܢܢ ܕܟܗܝܼܢܐ ܗܘܼܬ ܒܗ݀ܘ
                    ܙܒܢܼܐ ܒܚܝܠ̈ܘܬܐ ܐܝܟ ܛܘܪ ܠܒܼܢܢ. ܥܪ̈ܩܐ ܗ̄ ܠܡܠ̈ܟܐ ܡܿܟܢܐ ܐܝܿܠܝܢ ܕܩܝܿܡܝܼܢ ܗܼܘܘ
                    ܒܡܠܟܘܼܬܐ ܕܠܗ ܫܡܼܗ ܠܒܼܢܢ. ܥܪܩܐ ܗ̄ ܫܓܼܐ ܗܿܘ ܘܫܪܝܼܪ ܒܥܩܪܗ ܘܐܚܝܿܢܐ ܗܿܘ ܕܐܪܙܐ
                    ܘܕܫܪܘܝܢܐ. ܘܩܛܡܼ ܩܛܦܼ ܘܦܣܼܩ ܐܝܟ ܗܿܝ ܕܩܛܡܼܬܗ ܠܫܪܘܪܐ. ܪܝܼܫ ܡܪܒܝܬܗ ܗ̄ ܝܘܟܢܝܐ ܒܗ݀ܝ
                    ܕܒܕܡܘܼܬ ܢܘܼܪܒܐ ܕܥܕܟܝܠ ܠܐ ܐܫܼܬܪܪ ܘܗܼܘܐ ܚܘܼܛܪܐ ܘܐܝܼܠܢܐ ܚܝܪܬܢܐ ܕܦܐܪ̈ܐ ܦܫܝܼܩܐܝܼܬ
                    ܦܣܼܩ ܘܐܪܡܼܝܘܗ ܒܫܘܼܪܝܐ ܕܡܠܟܘܼܬܐ ܡܼܢ ܒܿܬܪ ܬܠܬܐ ܝܪ̈ܚܐ ܕܐܡܼܠܟ. ܡܪܒܝܼܬܐ ܗ̄ ܬܪܒܝܼܬܐ
                    ܐܝܟ ܗܿܝ ܕܟܿܠܗܿ ܡܪܒܝܼܬܐ ܕܒܝܬܟ ܢܡܘܼܬܘܢܼ. ܠܐܪܥ ܕܟܢܥܢ ܗ̄ ܟܢܥܢ ܠܐܪܥܐ ܕܒܿܒܝܠ ܩܿܪܐ.
                    ܘܩܪܗܿ ܡܕܝܼܢܬܐ ܕܬܐܓܪ̈ܐ ܡܛ݀ܠ ܕܩܢܝܿܢܐ ܕܟܿܠܗܘܿܢ ܥܡ̈ܡܼܐ ܒܒܼܙܬܐ ܥܡ ܡ̈ܠܟܝܗܘܿܢ
                    ܘܪ̈ܝܼܫܢܝܗܘܿܢ ܠܓܙܗܿ ܡܟܢܫܐ ܗܘܬ݀ ܒܟܢܥܢ ܡܕܿܡܐ ܠܗܿ ܡܛ݀ܠ ܕܡܝܘܼܬܗܿ ܕܠܟܢܥ̈ܢܝܐ ܘܡܛ݀ܠ ܫܡܐ
                    ܕܬܓܪ̈ܐ ܕܣܼܡ ܥܠܝܗܿ ܗ݀ܘ ܕܐܦ ܠܟܢܥ̈ܢܝܐ ܐܝܼܬܘܗܝ ܗܼܘܐ ܐܝܟ ܕܐܡܼܪ ܐܫܝܥܐ ܥܠ ܨܘܼܪ ܕܟܢܥ̈ܢܝܐ
                    ܝܩܝܼܪ̈ܝܗܿ ܕܐܪܥܐ. ܘܢܣܼܒ ܡܼܢ ܙܪܥܐ ܕܐܪܥܐ ܗ̄ ܙܪܥܐ ܩܿܪܐ ܠܨܕܩܝܐ ܡܛ݀ܠ ܡܘܼܟܟܗ ܘܫܝܼܛܘܼܬܗ
                    ܩܕܿܝܬܐ܆ ܡܕܒܪܐ ܚܪܒܐ ܡܬܪܥܐ ܗܘܬ݀ ܡܼܢ ܟܕܘܼ ܘܡܚܪܒܐ ܗܘܬ݀ ܠܒܒ̈ܠܝܐ ܕܣܠܼܩܘ ܥܠܝܗܿ ܬܪܬܝܢ
                    ܙܒܢ̈ܝܼܢ ܒܗ݀ܝ ܕܒܫܘܼܪܝܐ ܟܕ ܐܡܠܟܼܗ ܒܒܿܠܝܐ ܠܨܕܩܝܐ ܒܿܬܪ ܝܘܼܟܢܝܐ. ܡܓܙܝ ܗܼܘܐ ܡܼܢ ܦܠܚ̈ܐ
                    ܘܡܼܢ ܥܘܼܬܪܐ ܘܠܐ ܩܿܢܐܪ ܗܼܘܐ ܚܝܠܐ ܐܝܟ ܡܠ̈ܟܐ ܕܡܼܢ ܩܕܡܘܗܝ ܢܨܒܼܬܐ ܥܠ ܡ̈ܝܐ ܗ̄ ܢܨܒܼܬܐ
                    ܬܢܢ ܠܗ ܠܨܕܩܝܐ ܡܟܿܢܐ ܡܛ݀ܠ ܫܝܼܛܘܼܬܗ ܡܼܢ ܩܕܡ ܕܢܡܼܠܟ. ܐܬܢܼܨܒ ܥܠ ܡ̈ܝܐ ܣܓ̈ܝܐܐ ܗ̄
                    ܐܫܬܪܼܬܚܬ݀ ܒܬܪ 
            
            
                 ܟܢ ܡܠܟܘܼܬܗ ܒܝܕ ܚܝܠ̈ܘܬܗ ܕܒܒܿܠܝܐ ܗܿܢܘܢܿ ܕܕܡܿܝܢ ܗܼܘܘ ܠܡ̈ܝܐ ܣܓ̈ܝܐܐ
                    ܘܐܟܡܼܐ ܡܿܪܒܝܢ ܠܢܨܼܒ̈ܬܐ ܘܡܿܦܪܥܝܼܢ ܠܗܝܢ ܗܿܟܢܐ ܐܦ ܒܡܟܘܼ̄ܗ ܕܨܕܩܝܐ ܢܣܼܒܬ݀ ܚܝܠܐ
                    ܘܬܥܕܝܼܪܐ ܡܼܢ ܡܠܟܘܼ̄ܗ ܕܨܕܩܝܐ ܢܣܼܒܬ݀ ܚܝܠܐ ܘܬܥܕܝܼܪܐ ܡܼܢ ܡܠܟܘܼ̄ܗ ܘܚܝܠ̈ܘܬܗ
                    ܕܢܒܘܼܟܕܢܨܪ. ܘܣܡܼܗ ܠܕܘܩܐ ܗ̄ ܗܘܼ ܒܒܿܠܝܐ ܗ̄ ܐܟܡܿܢ ܕܠܗܿܕܐ ܐܩܝܼܡܗ ܕܢܗܼܘܐ ܠܗ ܢ݀ܛܪ
                    ܕܘܼܟܬܐ ܘܡܫܼܥܒܕܐ ܘܡܚܘܝܢܐ ܕܣܘܼܥܪ̈ܢܐ ܕܝܼܠܗܿ ܕܡܠܟܘܼܬܐ. ܘܝܼܥܬ݀ ܘܗܘܬ݀ ܓܦܼܬܐ ܡܪܥܬܐ ܗ̄
                    ܕܗܝܼ ܠܡ ܗܿܕܐ ܓܦܼܬܐ ܕܡܼܢܩܕܝܼܡ ܓܦܼܬܐ ܡܪܥܬܐ ܗ̄ ܟܪܝܼܗܬܐ ܘܡܚܝܼܠܬܐ ܒܐܝܼܕܐ ܒܐܝܼܕܐ ܒܝܕ
                    ܚܝܠܐ ܕܫܘܼܠܛܢܗ ܕܒܒܿܠܝܐ ܝܼܥܬ݀ ܘܬܪܒܝܬ݀. ܐܡܿܪ ܕܝܢ ܥܠ ܡܠܟܘܼܬܗ ܕܨܕܩܝܐ ܗܿܝ ܕܩܢܬ݀ ܚܝܠܐ
                    ܒܿܬܪܟܢ ܡܼܢ ܒܒܠ̈ܝܐ. ܕܢܬܚܼܙܘܢܿ ܫܒܘܼ̈ܩܝܗܿ ܗ̄ ܘܗܕܐ ܠܡ ܥܒܼܕ ܠܗܿ ܒܒܿܠܝܐ ܐܝܟ ܕܢܗܼܘܘܿܢ
                    ܠܗܿ ܠܡܠܟܘܼܬܗ ܫܒܘܼ̈ܩܐ ܕܐܝܼܬܝܗܘܿܢ ܪܘܪ̈ܒܢܐ ܘܚܝܠ̈ܬܢܐ ܕܒܗܘܿܢ ܥܿܫܢܐ ܗܘܬ݀ ܡܠܟܘܼܬܗ.
                    ܘܥܩܪ̈ܝܗܿ ܗ̄ ܗܝܼ ܡܠܟܘܼܬܐ ܬܗܼܘܐ ܡܬܼ݁ܕܪܐ ܘܡܬܼܢܛܪܐ ܒܝܕ ܒܛܝܼܠܘܼܬܗ ܕܡܠܟܐ ܕܒܿܒܝܠ.
                    ܘܦܫܛܬ݀ ܥܢܩ̈ܝܗܿ ܗ̄ ܥܢ̈ܩܐ ܠܪܘܪ̈ܒܢܐ ܘܠܚ̈ܠܬܢܐ ܕܡܠܟܘܼܬܐ ܡܟܿܢܐ. ܘܗܿܢܐ ܢܫܼܪܐ ܪܒܐ ܗ̄
                    ܢܫܼܪܐ ܩܿܪܐ ܠܡܠܟܐ ܕܡܨܪܝܢ ܐܝܿܟܢܐ ܕܒܙܒܼܢܐ ܗ݀ܘ ܠܐ ܡܫܥܼܒܕ ܗܼܘܐ ܠܒܿܒܠܝܐ ܘܐܬܼܩܪܝܼ ܢܫܼܪܐ
                    ܡܛ݀ܠ ܥܫܝܼܢܘܼܬܐ ܕܡܠܟܘܼܬܗ ܘܒܚܪܝܼܦܘܼܬܐ ܕܚܝܠ̈ܘܬܗ ܐܟܡܿܢ ܕܐܝܼܬ ܗܼܘܐ ܠܗ ܐܦ ܓ̈ܦܼܐ
                    ܪܘܪ̈ܒܢܐ ܗܿܢܘܿܢ ܕܒܗܘܿܢ ܥܠܼ ܠܡܨܪܝܢ ܘܐܦ ܥܠ ܫܪܟܢܐ ܕܥܡ̈ܡܼܐ ܦܿܪܚ ܗܼܘܐ ܘܡܫܼܬܠܛ ܛܦܪ̈ܐ
                    ܕܝܢ ܕܐܝܼܬܝܗܘܿܢ ܠܗܿ ܐܡܿܪ ܕܣܓ̈ܝܐܢ ܐܠܐ ܠܐ ܡܠ̈ܝܢ ܐܝܟ ܕܢܫܼܪܐ ܗ݀ܘ ܩܕܡܿܝܐ ܕܢܚܼܘܐ ܕܠܐ
                    ܚܝܠ̈ܬܢܝܼܢ ܗܼܘܘ ܦܪ̈ܫܘܗܝ ܒܕܡܘܼܬ ܒܒܠ̈ܝܐ. ܘܓܦܼܬܐ ܗܿܕܐ ܗ̄ ܐܡܿܪ ܥܠ ܬܘܼܟܠܢܗ ܘܓܘܣܗ
                    ܕܨܕܩܝܐ ܕܒܡܨܪܝܐ ܡܛ݀ܠ ܕܫܼܕܐ ܥ̄ܠܘ ܬܘܼܟܠܢܗ ܕܡܢܼܗ ܢܬܼܥܕܪ ܘܗܼܘ ܚܠܦܘܗܝ ܢܩܼܪܒ ܠܘܼܩܒܠ
                    ܒܒܠ̈ܝܐ. ܥܩܪ̈ܝܗܿ ܠܪܘܪ̈ܒܢܐ ܡܫܿܡܗ ܘܕܠ̈ܠܝܬܐ ܠܥܡ̈ܡܐ ܕܬܚܘܼܬܘܗܝ. ܡܕܪܐ ܕܝܢ ܘܫܩܼܝܐ
                    ܠܥܘܼܕܪܢܐ ܕܡܣܒܪ ܗܼܘܐ ܥܡܐ ܕܩܿܢܐܼ ܗܼܘܐ ܡܼܢ ܡܨܪ̈ܝܐ ܒܕܡܘܼܬ ܓܦܼܬܐ ܐܝܿܕܐ ܕܫ݀ܩܠܐ ܚܝܠܐ
                    ܠܩܘܼܝܡܗܿ ܡܼܢ ܡܕܪܐ ܕܐܪܥ ܘܡܼܢ ܡ̈ܝܐ ܗܿܢܘܿܢ ܕܥܠܝܗܘܿܢ ܢܨܝܼܒܐ.. ܒܚܩܠܐ ܗ̄ ܕܗܿܟܢܐ ܡܣܒܪ
                    ܗܼܘܐ ܨܕܩܝܐ ܕܝܬܝܼܪ ܡܼܢ ܒܒܠ̈ܝܐ ܡܥܕܪܝܼܢ ܠܗ ܡܨܪ̈ܝܐ. ܠܐ ܬܟܼܫܪܝ ܗ̄ ܠܐ ܬܥܒܼܕܝ ܛܪ̈ܦܐ
                    ܘܛܿܥܢܐ ܦܐܪ̈ܐ ܐܝܟ ܕܡܣܒܪܐ ܥܩܪ̈ܝܗܿ ܢܬܦܼܣܩܘܿܢ ܗ̄ ܡܼܢ ܒܒܠ̈ܝܐ. ܥܩܪ̈ܝܗܿ ܠܐܒ̈ܗܐ ܡܟܿܢܐ
                    ܘܦܐܪ̈ܝܗܿ ܠܒܢ̈ܝܐ ܩܿܪܐ܆ ܛܪ̈ܦܐ ܥܡ̈ܡܼܐ ܕܢܩܝܼܦܝܼܢ ܗܼܘܘ ܠܥܡܐ. ܘܐܝܼܩܪܐ ܘܨܒܼܬܐ ܠܡܠܟܘܼܬܐ
                    ܥܿܒܕܝܼܢ ܗܼܘܘ. ܬܘܼܒ ܥܩܼܪܐ ܥܡܐ ܦܐܪ̈ܐ ܕܥܡܐ ܡܠ̈ܟܐ ܕܡܢܼܗ ܛܪ̈ܦܐ ܚܟܝܼܡ̈ܐ ܕܒܗܘܿܢ ܐܝܿܠܝܢ
                    ܕܒܡܠ̈ܟܝܗܘܿܢ ܡܣܼܬܒܪܝܼܢ ܗܼܘܘ . . . . ܕܢܟܦܘܼܬܐ ܘܡܛܟܣܘܼܐ ܢܬܼܠܘܢ ܠܥܡܐ ܠܐ ܕܝܢ ܡܟܫܪܝܼܢ
                    ܗܼܘܘ ܡܛ݀ܠ ܕܐܠܗܐ ܡܥܕܪܢܗܘܿܢ ܠܘܼܩܒܠܗܘܿܢ ܐܝܼܬ̄ܘ܀ ܘܠܐ ܒܕܪܥܐ ܗ̄ ܠܐ ܡܣܼܬܢܩ ܒܒܿܠܝܐ ܥܠ
                    ܥܡܼ̈ܡܐ 
            
            
                 ܣܓܝ̈ܐܐ ܕܢܥܼܩܪܝܗܿ ܠܡܠܟܘܼܬܐ ܕܨܕܩܝܐ. ܗܿܐ ܢܨܝܼܒܐ ܗ̄ ܐܝܟ ܡܣܼܒܪܢܘܼܬܗ
                    ܕܨܕܩܝܐ ܠܐ ܬܟܼܫܪܝ. ܘܡܐ ܕܢܫܼܒܬ݀ ܒܗܿ ܡܫܪܝܼܬܐ ܕܒܒ̈ܠܝܐ ܝܿܒܫܐ ܥܡ ܡܕܪܐ ܕܡܘܼܥܝܼܬܗܿ
                    ܕܐܝܼܬܝܗܿ ܡܠܟܘܼܬܐ ܕܡܨܪ̈ܝܐ ܕܐܦ ܗܝܼ ܠܡ ܥܡܐ ܐܫܼܬܒܝܬ݀ ܡܼܢ ܒܿܒܠܝܐ. ܢܒܝܐ ܡܐ ܕܐܡܼܬܠ
                    ܗܿܠܝܢ ܦܫܼܩ ܐܢܝܢ ܠܥܡܐ ܘܚܘܝܼ ܕܟܐܢܐܝܼܬ ܡܬܼܪܕܐ ܨܕܩܝܐ ܥܠ ܕܕܓܠ ܒܩܝܣܐ ܘܒܕܓܘܢ ܐܡܿܪ.
                    ܕܒܐܬܪܐ ܗܿܘ ܕܐܩܝܼ̄ܡܘܼ ܘܫܪܟܐ ܗ̄ ܐܠܘܼ ܢܼܛܪ ܡܘܡ̈ܬܐ ܘܐܫܼܬܥܒܕ ܠܡܠܟܐ ܕܒܿܒܝܠ ܒܐܬܪܐ
                    ܕܐܬܬܩܝܼܡ ܒܗ ܡܠܟܐ ܒܗ ܡܿܐܬ ܗܼܘܐ. ܡܛ݀ܠ ܕܫܼܛ ܡܘܡ̈ܬܝ ܗ̄ ܘܩܝܿܡܗ ܕܥܡ ܒܒܿܠܝܐ ܒܿܛܠ ܗܼܘܐ
                    ܗ݀ܘ ܕܒܫܡܐ ܕܝܼܠܝ ܫܪܪܗ ܘܡܛ݀ܠܗܿܕܐ ܐܦ ܗܼܢܘܢܿ ܒܒܠ̈ܝܐ ܗܝܡ̄ܢܘܼ. ܠܐ ܝܿܗܒ ܐܢܼܐ ܠܗ ܕܢܬܼܦܨܐ
                    ܡܼܢ ܐܝܼܕܐ ܕܒܒ̈ܠܝܐ ܐܠܐ ܡܼܬܒܐ ܠܒܿܒܝܠ ܟܕ ܡܥܘܪ̈ܢ ܥܝܢ̈ܘܗܝ.. ܗܿܟܢܐ ܐܡܿܪ ܗ̄ ܚܿܠܛ ܬܢܢ
                    ܗܿܠܝܢ ܕܦܘܼܢܝܐ. ܐ݀ܣܒ ܡܼܢܓܒ̈ܝܐ ܕܥܪ̈ܩܐ ܗ̄ ܪܡܿܙ ܥܠ ܙܘܼܪܒܒܝܠ ܘܐܡܿܪ ܕܡܩܝܼܡ ܐܢܼܐ
                    ܡܠܟܘܼܬܐ ܐܝܿܕܐ ܕܝܬܝܼܪ ܡܬܚܼܙܝܐ ܕܐܝܼܬܝܗܿ ܪܡܬܐ ܘܚܠܬܢܝܼܬܐ ܡܢܼܗܘܿܢ ܕܣܘܼܥܪ̈ܢܐ ܟܕ ܡܼܢ
                    ܙܪܥܐ ܕܡܠܟܘܼܬܐ ܢ݀ܣܒ ܐܢܼܐ ܠܗܿܢܐ ܡܠܟܐ ܚܝܠܬܢܐ. ܘܪܡܐ ܕܐܝܼܬܘܗܝ ܡܼܢ ܪܝܼܫܗܿ ܕܡܠܟܘܼܬܐ ܗ̄
                    ܡܼܢ ܝܘܼܒܠܐ ܪܝܼܫܝܐ ܕܒܝܬ ܕܘܝܼܕ. ܪܝܼܫܐ ܕܝܢ ܘܠܒܼܐ ܐܡܝܼܪ. ܡܼܢ ܗܿܝ ܕܐܝܿܠܝܢ ܕܒܛܝܼܠ
                    ܠܗܘܿܢ ܥܠ ܢܨ̈ܒܼܬܐ ܡܼܢ ܡܨܥܬܗ ܕܐܝܼܠܢܐ ܦ݀ܣܩܝܼܢ ܘܢ݀ܨܒܝܼܢ ܘܐܨܿܘܿܒ ܥܠ ܛܘܼܪ̈ܐ ܗ̄
                    ܕܝܼܣܪܐܝܠ. ܘܢܼܛܥܢ ܦܐܪ̈ܐ ܘܢܥܼܒܕ ܛܪ̈ܦܐ ܗ̄ ܕܣܿܓܐ ܘܡܫܼܬܪܬܚ ܥܡܐ ܒܡܠܟܘܼܬܗ. ܘܢܕܥܩ
                    ܟܿܠܗܘܿܢ ܗ̄ ܡܠ̈ܟܐ ܕܥܡ̈ܡܼܐ. ܐܡܿܟܬ ܩܝܣܐ ܕܪܡܐ ܗ̄ ܠܨܕܩܝܐ ܩܿܪܐ ܪܡܐ ܐܘܿ ܠܗܿܢܘܿܢ ܐܚܪ̈ܢܐ
                    ܕܐܝܼܬܝܗܘܿܢ ܗܼܘܘ ܒܡܥܠܝܘܼܬܐ ܕܡܠܟܘܼܬܐ ܕܡܛ݀ܠ ܫܘܼܒܗܪܗܘܿܢ ܡܟܟܿܬ ܐܢܘܿܢ ܒܫܒܼܝܐ. ܩܝܣܐ
                    ܡܟܝܼܟܐ ܗ̄ ܙܘܼܪܒܒܝܠ ܕܐܝܼܬܘܗܝ ܗܼܘܐ ܡܟܝܼܟܐ ܒܫܒܼܝܐ ܘܒܥܩ̈ܬܐ. ܘܐܪܝܿܡܬ ܕܒܝܬ ܓܘܿܓܝ܀ ܨܚܚܐ
                    ܕܝܚ̄ ܕܐܒܗ̈ܐ ܐܟܠܼܘ ܒܣܼܪܐ ܘܫܢܼ̈ܐ ܕܒܢ̈ܝܐ ܩܗܝ̈ܢ ܗ̄ ܒܗܿܠܝܢ ܡܟܿܣ ܠܗܘܿܢ ܕܟܕ ܒܗܛ̈ܗܐ
                    ܡܦܿܠܦܠܝܼܢ ܗܼܘ ܡܓܿܕܦܝܼܢ ܗܼܘܘ ܬܘܼܒ ܕܠܘ ܠܡ ܚܛܗ̈ܝܢ ܡܬܼܬܒܥܝܼܢܢ ܡܼܢ ܐܠܗܐ ܐܠܐ ܚܛܗ̈ܐ
                    ܕܐܒܗ̈ܝܢ ܒܣܼܪ̈ܐ ܐܝܼܬܝܗܘܿܢ ܡܫܼܟ̈ܐ ܕܥܢܼ̈ܒܐ ܒܣܝܼܪ̈ܬܐ ܡܐܟܘܼܠܬܐ ܓܝܪ ܕܒܣܼܪ̈ܐ ܠܦܘܼܠܚܢܐ
                    ܕܥܘܠܐ ܡܫܡܿܗ ܘܩܗܝܘܼܬܐ ܐܘܟܝܼܬ ܒܪܘܿܩܘܼܬܐ ܕܫܼ̈ܢܐ ܠܡܣܼܡ ܒܪܝܼܫܐ ܕܚܠܼܦ ܚܛܝܼܬܐ܆ ܘܒܨܨܐ ܗ̄
                    ܩܨܨܐ ܩܿܫܐܼ ܡܼܢ ܪܒܝܼܬܐ ܘܐܝܼܬ ܬܢܘܝ ܘܦܘܼܪܩܢܐ ܕܟܡܐ ܝܘܼܬܪܢܐ ܬܘܼܒ ܠܟܣܼܦܐ ܘܐܢ ܥܿܒܪ ܕܩܨܨ
                    ܝܿܗܒ ܠܚܕ ܬܪܝܢ ܐܘܿ ܕܢܿܦܩ ܡܼܢ ܡܕܡ ܕܣܝܼܡ ܡܫܟܢܐ. ܬܘܼܟܐ ܗ̄ ܚܘܼܣܪܢܐ. ܐܢܬ ܕܝܢ ܒܪܢܫܐ ܗ̄
                    ܦ݀ܩܕ ܠܗ ܕܢܪܟܒ ܐܘܼܠ̈ܝܬܐ ܚܢܝܓܐܝܼܬ. ܐܠܐ ܠܫܘܼܚܠܦܗܝܢ ܕܡܼܢ ܐܝ̈ܕܐ ܟܗܝܼܢܘܼܬܐ ܠܐܝܿܢܐ
                    ܡܘܼܟܟܐ ܐܬܬ݀ ܟܢܘܼܫܬܐ ܒܙܒܼܢܗ ܕܫܒܼܝܐ ܒܝܕ ܡ̈ܠܟܐ ܒܝܼ̈ܫܐ. ܫܩܘܿܠ ܐܘܼܠܝܬܐ ܗ̄ ܪܟܒܼ ܐܢܝܢ
                
            
            
                 ܠܗܿܠܝܢ ܕܬܫܥܝܼܬܐ ܕܡ̈ܠܟܐ ܕܝܼܣܪܐܝܠ ܘܐܡܪ ܐܢܝܢ ܒܩ̈ܠܐ ܕܐܘܼܠ̈ܝܬܐ. ܡܿܢܐ
                    ܗܿܝ ܐܡܟ܆ ܓܪ̈ܝܗܿ ܗ̄ ܐܡܿܪ ܕܐܝܿܟܐܢ ܗܿܝ ܘܡܿܢܐ ܗܼܘܐ ܡܢܼܗܿ ܕܐܡܟ. ܟܢܘܼܫܬܐ ܗܿܝ ܕܡܿܘܠܕܐ
                    ܗܼܘܬ݀ ܡ̈ܠܟܐ ܚܝ̈ܠܬܢܐ ܕܕܡܿܝܢ ܗܼܘܘ ܠܐܪ̈ܝܘܬܐ ܥܠ̈ܝܡܐ ܗܿܢܘܿܢ ܕܡܼܢ ܩܕܝܼܡ ܒܝܢܬ݀ ܐܪ̈ܝܘܬܐ
                    ܕܐܝܬܝܗܘܿܢ ܡܠ̈ܟܐ ܒܫܠܼܝܐ ܘܒܟܗܝܼܢܘܼܬܐ ܝܿܬܒܐ ܗܘܬ݀. ܘܪܒܐ ܚܕ ܡܼܢ ܓܪ̈ܝܗܿ ܫܠܘܿܡ ܐܘܟܝܼܬ
                    ܝܿܗܘ ܐܚܙ ܒܪ ܝܘܫܿܝܐ ܕܩܼܡ ܒܡܠܟܘܼܬܐ ܝܪ̈ܚܐ ܬܠܬܐ ܘܐܣܼܪܗ ܦܪܥܘܿܢ ܘܐܚܼܬܘ ܠܡܨܪܝܢ ܘܠܐ ܣܠܼܩ
                    ܬܘܼܒ ܠܡܠܟܘܼܬܗ. ܘܝܼܠܦ ܠܡܬܼܬܒܪ ܗ̄ ܠܗܿ ܠܕܡܘܼܬܐ ܗܿܝ ܕܐܪܝܘܼܬܐ ܣܼܡ ܒܟܿܠܗܝܢ ܡ̈ܠܘܗܝ
                    ܘܐܡܿܪ ܕܕܡܐ ܣܿܓܝܐܐ ܐܫܼܕ ܒܗ݀ܘ ܙܒܢܼܐ ܕܐܡܠܼܟ ܐܝܟ ܕܡܼܢ ܛܘܼܝܒܐ ܕܨܒܝܿܢܗ ܐܡܿܪ ܠܗܿ
                    ܠܡܠܼܬܗ.. ܘܫܡܼܥܘ ܛܒܼܗ ܗ̄ ܡܨܪ̈ܝܐ ܘܐܕܘܼ̈ܡܝܐ ̈ܐܢܐ ܕܥܡܐ ܘܒܡܨܝܼܕܬܗܘܿܢ ܐܬܬܼܚܕ
                    ܘܐܝܬܼܝܘܼܘܗܝ ܒܒܠܡܐ ܠܐܪܥܐ ܕܡܨܪܝܢ. ܘܟܕ ܚܼܙܐ ܡܘܼܫܬܐ ܕܠܗܿ ܩܿܪܐ ܐܡܐ ܕܐܬܟܼܪܗܬ݀ ܘܐܬܦܣܼܩ
                    ܠܗܿ ܣܒܼܪܗܿ ܒܗܿܝ ܕܝܗܘ ܐܚܙ ܐܬܕܒܪ ܘܝܘܼܝܩܝܼܡ ܐܬܩܼܛܠ. ܢܣܼܒܬ݀ ܚܕ ܡܼܢ ܒܢ̈ܝܗܿ ܘܥܒܕܬܗ ܗ̄
                    ܐܡܿܪ ܥܠ ܝܘܼܟܢܝܐ ܗ݀ܘ ܕܐܦ ܚܕ ܡܼܢ ܒܢ̈ܝܐ ܕܡ̄ܠܟܘܼ ܐܝܼܬܘܗܝ. ܐܚܝ̈ܢܐ ܗܿܝ ܕܝܼܠܦ ܠܡܬܼܒܪ ܥܠ
                    ܨܕܩܝܐ ܫܿܩܠܝܼܢ ܠܗܿ ܕܬܒܿܪ ܗܼܘܐ ܘܩ݀ܛܠ ܠܡܣܼ̈ܟܢܐ. ܘܗܠܼܟ ܒܥܘܼܫܢܗ ܗ̄ ܒܬܘܼܟܠܢܐ ܠܡ ܕܥܠ
                    ܒܒ̈ܠܝܐ ܫܥܼܒܕ ܠܣܓ̈ܝܐܐ ܘܚܒܼܠ ܒܟܫܝܼܪܘܼܬܗ ܠܐܪܥܐ ܕܡܘܼܠܟܢܐ. ܐܚܪ̈ܢܐ ܥܠ ܝܘܼܟܢܝܐ ܫ݀ܩܠܝܼܢ
                    ܠܗܿܠܝܢ.. ܘܐܬܟܒܼܫܼܘ ܥܠܘܗܝ ܗ̄ ܦܠ̈ܫܬܝܐ ܘܐܕܘܼ̈ܡܝܐ ܘܦܪܣܼܘ ܥܠܘ̄ ܡܨܝܼܕܬܗܘܿܢ ܘܒܗܿ
                    ܐܬܬܚܼܕܘ ܘܠܦܘܼܬ ܕܗܼܢܘܿܢ ܡܚܦܛܝܼܢ ܗܼܘܘ ܠܒܒܠ̈ܝܐ ܕܢܥܼܒܕܘܢ ܩܪܒܐ ܥܡ ܝܘܼܕ̈ܝܐ. ܘܚܒܼܫܗ
                    ܒܥܡܿܪܬܐ ܗ̄ ܥܿܡܪܬ ܩܿܪܐ ܠܚܒܘܼܫܝܗ ܕܡܼܢ ܚܝܠ̈ܘܬܐ ܕܟܪܝܼܟܝܼܢ ܗܼܘܘ ܠܗ ܕܠܐ ܢܥܼܪܘܿܩ. ܡܼܢ
                    ܕܡܘܼܬܐ ܕܗ݀ܘ ܡܐ ܕܡܥܕܝܼܢ ܒܢܝ̈ܢܫܐ ܠܡܥܼܒܕ ܠܐܪ̈ܝܘܬܐ ܘܠܢܡܼܪ̈ܐ ܕܚܿܒܫܝܼܢ ܠܗܘܿܢ ܒܩܒ̈ܘܬܐ
                    ܡܒܙ̈ܥܬܐ ܐܟܡܿܢ ܕܠܐ ܢܬܼܢܟܘܢܿ ܡܢܼܗܘܿܢ. ܐܡܟ ܐܝܟ ܓܦܼܬܐ ܗ̄ ܕܐܝܿܟܐ ܗܿܝ ܟܢܘܼܫܬܐ ܗܿܝ ܕܒܝܕ
                    ܙܟܘܿܬܐ ܕܡ̈ܠܟܐ ܕܩܝܿܡܝܼܢ ܗܼܘܘ ܒܗܿ ܐܝܼܬܝܗܿ ܗܘܬ݀ ܟܗܝܼܢܢܬܐ ܒܕܡܘܼܬ ܓܦܼܬܐ ܕܢܨܝܼܒܐ ܥܠ
                    ܡ̈ܝܐ ܘܫܿܩܠܐ ܚܝܠܐ ܡܼܢ ܐܪܥܐ ܘܛܝܼܒ̄ܘܼ ܠܡܥܼܒܕ ܦܐܪ̈ܐ. ܒܕܡܟ ܗ̄ ܓܠܝܐ ܗܿܝ ܓܝܪ ܕܕܡܐ
                    ܕܡܠ̈ܟܐ ܥܠ ܚܪܒܐ ܕܥܿܒܕܝܼܢ ܗܼܘܘ ܒܥܡ̈ܡܼܐ ܐܚܪ̈ܢܐ ܐܡܿܪ ܘܠܘ ܥܠ ܩܛܼܠܐ ܕܝܼܠܗܘܿܢ ܕܡ̈ܠܟܐ.
                    ܐܚܪܢܝܐܝܼܬ. ܗܿܕܐ ܠܡ ܟܢܘܼܫܬܐ ܕܗܝܼ ܗܝܼ ܐܡܟ ܕܝܼܠܟ ܨܕܩܝܐ ܒܝܕ ܕܡܐ ܙܟܝܐ ܕܐܫܼܕܬ݀ ܡܣܒܪܐ
                    ܕܡܬܼܟܗܢܐ ܐܝܟ ܓܦܼܬܐ ܕܢܨܝܼܒܐ ܥܠ ܡ̈ܝܐ ܣܓܝ̈ܐܐ. ܒܙܢܐ ܐܚܪܢܐ. ܕܡܐ ܩܿܪܐ ܠܝܘܼܒܐ ܕܟܠܗ
                    ܓܢܣܼܐ ܕܡ̈ܠܟܐ ܐܝܟ ܗܿܝ ܕܡܼܢ ܚܕ ܕܡ ܥܒܼܕ ܐܠܗܐ ܠܥܿܠܡܐ ܗ̄ ܝܘܼܒܠܐ ܠܡ ܕܟܿܠܗܿ ܡܠܟܘܼܬܐ ܐܝܟ
                    ܓܦܼܬܐ ܕܢܨܝܼܒܐ ܥܠ ܡܝ̈ܐ 
            
            
                 ܡܫܼܬܪܪ ܥܕܡܐ ܕܢܐܼܬܐ ܡܿܢ ܕܕܝܠܗ ܗܝܼ ܡܠܟܘܼܬܐ. ܦܐܪ̈ܝܗܿ ܘܥܘܦ̈ܝܗܿ ܗ̄
                    ܐܡܿܪ ܕܡܬܼܝܠܕܝܼܢ ܡܢܼܗܿ ܣܓ̈ܝܐܐ ܘܫܪ̈ܒܬܐ ܡܬܼܝܒܠ̈ܢ ܒܓܘܗܿ ܐܝܟܥܘ̈ܦܐ ܕܐܝܼܠ̈ܢܐ.
                    ܘܐܚܪܢܝܐܝܼܬ. ܗܿܕܐ ܠܡ ܓܦܼܬܐ ܕܐܝܼܬܝܗܿ ܟܢܘܼܫܬܐ ܕܡܢܼܩܕܝܼܡ ܥܬܝܼܪܐ ܗܘܬ݀ ܒܛܪ̈ܦܐ ܘܒܥܘܦܐ
                    ܢܨܒܬ݀ ܢܦܫܼܗܿ ܒܡ̈ܝܐ ܣܓ̈ܝܐܐ ܕܐܝܼܬܝܗܘܿܢ ܚܝܠ̈ܝ ܒܿܒܝܠ ܕܐܬܓܘܣܬ݀ ܒܗܘܿܢ ܘܟܡܐ ܕܢܛܪܬ݀ ܬܢܘܝ
                    ܥܡ ܒܒܠ̈ܝܐ ܐܨܠܚܬ݀ ܣܿܓܝܼ ܘܐܬܬܪܝܡܬ݀ ܗ̄ ܘܐܬܝܼܕܥܘ ܘܫܼܬܡܗܘ ܡܼܢ ܟܿܠܗܘܿܢ ܥܡ̈ܡܼܐ ܥܠ
                    ܟܗܝܼܢܘܼܬܐ ܕܐܪܥܗܘܿܢ ܘܗܝܟܠܐ ܘܟܗܝܼܢܘܼܬܐ ܕܒܝܢܬܗܘܿܢ. ܘܐܬܼܚܙܝܼܘ ܗ̄ ܘܡܛ݀ܠ ܕܥܠ ܟܿܠ
                    ܝܩܝܼܪܝܼܢ ܗܼܘܘ ܐܬܚܼܙܝܼܘ ܒܪܘܡܐ ܕܫܘܼܠܛܢܗܘܿܢ. ܐܡܿܪ ܕܝܢ ܥܠ ܟܿܠܗ ܓܢܣܼܐ ܕܡ̈ܠܟܐ ܕܐܬܗܼܕܪܘ
                    ܒܡܠܟܘܼܬܗܘܿܢ ܥܠ ܣܘܓܐܐ ܕܚܝܠ̈ܘܬܐ ܕܠܗܘܿܢ ܩܿܪܐ ܕܠ̈ܝܬܐ. ܐܬܥܩܼܪܘ ܗ̄ ܥܠ ܕܠܐ ܐܟܫܼܪܘ
                    ܒܕܚܠܬ݀ ܐܠܗܐ ܒܚܡܼܬܐ ܐܬܥܩܼܪܘ. ܘܒܐܪܥܐ ܗ̄ ܗܿܢܘܢܿ ܕܗܿܢܐ ܟܿܠܗ ܡܨܠܚܝܼܢ ܗܼܘܘ ܒܫܘܼܛܢܗܘܿܢ
                    ܐܝܟ ܕܡܼܢ ܚܡܼܬܐ ܕܐܠܗܐ ܐܬܥܩܼܪܘ ܡܼܢ ܐܬܪܗܘܿܢ ܘܒܐܪܥ ܕܒܒ̈ܠܝܐ ܐܫܼܬܕܝܼܘ ܒܨܥܪܐ. ܘܐܬܢܼܨܒܬ݀
                    ܗ̄ ܐܡܿܪ ܥܠ ܗܿܢܘܢܿ ܕܡܼܢ ܒ݀ܬܪ ܚܘܼܪܒܗܿ ܕܡܕܝܼܢܬܐ ܐܫܬܼܒܩܘ ܒܐܪܥܐ ܕܝܼܗܘܼܕ ܕܢܗܼܘܘܢܿ
                    ܦ݀ܠܚܝܼܢ ܐܪܥܐ ܘܝܿܗܒܝܼܢ ܡܐܕܬܐ ܠܒܒܠ̈ܝܐ. ܗܿܢܘܿܢ ܕܪܝܼܫܐ ܩܼܡ ܠܗܘܿܢ ܓܕܠܝܐ ܒܪ ܐܚܝܼܩܡ.
                    ܐܚܪ̈ܢܐ. ܠܒܿܒܝܠ ܩܿܪܝܢ ܡܕܒܪܐ ܘܐܪܥܐ ܨܗܝܼܬܐ. ܘܢܦܩܼܬ݀ ܢܘܼܪܐ ܗ̄ ܐܡܿܪ ܥܠ ܚܪܒܐ ܗܿܝ ܕܗܘܬ݀
                    ܡܼܢ ܐܝܼܫܡܥܝܼܠ ܒܪ ܢܬܢܝܐ ܗ݀ܘ ܕܩܛܼܠ ܠܓܕܠܝܐ ܘܠܐܝܿܠܝܢ ܕܐܝܼܬ ܗܼܘܘ ܥܡܗ ܘܠܫܪܟܐ ܕܥܡܐ ܫܒܼܐ
                    ܘܐܘܒܼܠ ܥܡܗ. ܐܝܼܬ̄ܘ ܗܼܘܐ ܓܝܪ ܐܦ ܗܿܢܐ ܡܼܢ ܓܢܣܼܐ ܕܡܠܟܘܼܬܐ ܨ܆ ܕܝܛ̄ ܐܘܼܠܝܼܬܐ ܗܿܝ ܗ̄
                    ܕܒܙܼܢܐ ܠܡ ܕܐܘܼܠܝܼܬܐ ܪܟܒܿܬ ܐܢܿܐ ܗܿܠܢ ܟܕ ܠܘܼܩܕܡ ܬܢܝܿܬ ܪܡܘܼܬܗܘܿܢ ܕܝܘܼܕ̈ܝܐ ܘܗܿܝܕܝܢ
                    ܡܘܼܟܟܗܘܿܢ ܐܝܟ ܥܝܿܕܐ ܕܐܝܿܠܝܢ ܕܡܪܟܒܝܼܢ ܐܘܼܠ̈ܝܬܐ ܘܗܿܟܢܐ ܐܦ ܒܥܒܿܕܐ ܥܬܝܼܕ̈ܢ ܕܢܗܼ̈ܘܝܢ.
                    ܐܘܼܠܝܬܢܐܝܼܬ ܪܟܒܼܿܬܗܿ ܠܬܫܥܝܼܬܗܘܿܢ ܘܗܿܟܢܐ ܥܬܝܼܕܐ ܕܡܬܐܠܝܐ ܡܼܢ ܟܿܠܗܘܿܢ ܥܡ̈ܡܼܐ. ܘܗܘܼܐ
                    ܒܫܢܿܬܐ ܗ̄ ܒܿܬܪ ܕܐܬܼܢܒܝܼ ܥܠ ܗܿܢܘܢܿ ܕܒܐܘܿܪܫܠܡ ܡܟܣ ܠܗܿܢܘܿܢ ܕܒܫܒܝܼܬܐ ܕܐ݀ܦܠܐ ܒܿܬܪ
                    ܡܪܕܘܼܬܐ ܘܫܒܼܝܐ ܦܫܼܘ ܡܼܢ ܢܟܼܠܐ ܘܙܐܦܠܐ ܕܬܪܥܝܼܬܗܘܿܢ ܪܫܡܼ ܬܘܼܒ ܐܦ ܠܙܒܼ̈ܢܐ ܕܓܠܝܢܐ܆ ܨ܆
                    ܕܟܟ ܒܫܢܿܬܐ ܠܡ ܫܒܝܼܥܝܬܐ ܗ̄ ܒܫܢܿܬܐ ܕܬܠܬ ܕܢܒܝܘܼܬܗ ܕܐܝܼܬܝܗܿ ܫܢܬܜ ܫܒܥ ܕܫܒܝܼܬܐ. ܐܬܼܘ
                    ܓܒܪ̈ܐ ܗ̄ ܥܿܒܕ ܫܘܼܪܝܐ ܠܡ̈ܠܘܗܝ ܡܼܢ ܡܟܣܢܘܼܬܐ ܕܐܝܿܠܝܢ ܕܐܬܿܝܢ ܗܼܘܘ ܠܘܿܬܗ ܠܡܫܼܡܥ
                    ܕܐܝܿܠܝܢ ܐܢܝܢ ܕܩܒܼܠ ܡܼܢ ܐܠܗܐ. ܠܡܐܼܡܪ ܠܥܡܐ. ܠܡܼܫܐܠܘܼܬܝ ܐܬܿܝܢ ܐܢܬܘܿܢ ܗ̄ ܡܣܒܪܝܼܬܘܿܢ
                    ܠܡ. ܕܟܿܣܐܼ ܡܢܼܝ ܙܐܦܼܐ ܕܪܥܝܿܢܟܘܢܿ ܘܡܢܿܣܝܢ ܗܼܘܘ ܗܿܠܝܢ ܕܐܢ ܡܦܿܣ ܢܒܝܐ ܒܢܟܼܠܐ
                    ܕܪ̈ܥܝܢܝܗܘܿܢ ܐܘܿ ܠܐ. 
            
            
                 ܕܢܚܼܙܘܿܢ ܕܐܢ ܕܡ̈ܝܢ ܡܠ̈ܘܗܝ ܠܕܢܒ̈ܝܐ ܕܓ̈ܠܐ.ܠܐ ܐܬܿܠ ܠܟܘܿܢ ܦܬܓܡܐ ܗ̄
                    ܒܣܝܼܡܐ ܐܠܐ ܕܡܥܝܼܩ ܘܕܠܩܘܼܒܠܐ ܕܨܒܝܿܢܟܘܿܢ ܘܘܡܟܝܼܠ ܡܡܿܠܠ ܥܡܼܗܘܢܿ ܟܕ ܡܫܿܪܐ ܡܼܢ
                    ܓܒܝܼܠܬܗܘܿܢ ܩܕ̄ܡ ܘܬܿܢܐ ܒܐܝܼܕܐ ܒܐܝܼܕܐ ܛܒ̈ܬܐ ܕܣܥܼܪܘ ܗܼܢܘܢܿ. ܒܝܘܡܐ ܕܓܒܝܿܬ ܗ̄ ܠܘ
                    ܫܚܝܼܡܐܝܼܬ ܥܒܕܿܬܗ ܠܓܒܝܿܬܗ ܐܠܐܐܪܝܿܡܬ ܐܝܼܕܝ ܘܒܬܕܡܪ̈ܬܐ ܪܘܪ̈ܒܬܐ ܪܕܝܿܬ ܠܡܨܪ̈ܝܐ. ܘܠܗܘܿܢ
                    ܦܪܩܿܬ ܡܼܢ ܫܘܼܥܒܕܐ ܕܐܝܿܬܐ ܐܢܘܿܢ ܠܐܪܥܐ ܕܝܗܒܿܬ ܠܗܘܿܢ ܕܡܪܕܝܐ ܚܠܒܐ ܘܕܒܼܫܐ. ܫܘܼ̄ܒ ܗܿܝ
                    ܕܟܿܠܗܝܢ ܗ̄ ܡܫܒܼܚܬܐ ܗܿܝ ܛ݀ܒ ܡܼܢ ܟ݀ܠܗܝܢ ܡܕܝܼ̈ܢܬܐ ܕܚܕܪ̈ܝܗܿ. ܝܗܒܿܬ ܠܗܘܿܢ ܦܘܼܩ̈ܕܢܐ
                    ܕܠܐ ܫܦܝܼܪܝܼܢ ܗ̄ ܐܡܿܪ ܥܠ ܦܘܼ̈ܩܕܢܐ ܓܙܪ̈ܝ ܕܝܼܢܐ ܗܿܢܘܿܢ ܕܡܝܬܝܢ ܗܼܘܘ ܥܠܝܗܘܿܢ ܡܣܡ
                    ܒܪܝܼܫܐ ܒܡܕܒܪܐ. ܒܙܒܢ ܙܒܢ ܟܕ ܡܪܝܼܡܝܼܢ ܗܼܘܘ. ܐܚܪ̈ܢܐ ܐܟܙܼܢܐ ܕܦܘܼܩ̈ܕܢܐ ܫܦܝܼܪ̈ܐ
                    ܘܕܫܼ̈ܢܐ ܕܡܿܢ ܕܥܒܼܕ ܚ̈ܝܐ ܡܬܼܩܪܝܢ ܥܣܼܪܐ ܦܬܓܡ̈ܐ ܕܐܚܼܬ ܡܘܿܫܐ. ܗܿܟܢܐ ܦܘܼܩ̈ܕܢܐ ܣܢ̈ܝܐ
                    ܘܡܘ̈ܒܕܢܐ ܩܿܪܐ ܠܛܡܐܘܼܬܐ ܘܣܘܼܝܒܐ. ܒܗܿܝ ܕܟ݀ܠ ܝܘܿܡ ܣܿܚܝܢ ܗܼܘܘ ܘܥܿܩܪܝܼܢ ܒܬ̈ܐ ܕܟܿܠ
                    ܘܡܼܢܕܪܝܼܫ ܡܚܿܕܬܝܼܢ ܠܗܘܿܢ. ܐܚܪ̈ܢܐ ܐܡܿܪܝܼܢ ܕܕ̈ܝܼܢܐ ܕܠܐ ܫܦܝܼܪܝܼܢ ܩܿܪܐ ܠܡܣܡ ܒܪܝܼܫ
                    ܕܫܒܼܝܐ ܘܛܢܦܿܘ ܐܢܘܿܢ ܒܡܘܗ̈ܒܬܗܘܿܢ ܗ̄ ܐܡܿܪ ܕܗܼܢܘܢܿ ܒܥܒܿܕ̈ܝܗܘܿܢ ܛܢ̈ܦܐ ܐܣܼܬܝܒܘ. ܘܠܝܼ
                    ܐܙܝܼܥܘ ܠܪܘܓܙܐ ܕܥܠܝܗܘܿܢ ܐܦ ܠܡܼܘܗܒܬܐ ܗܿܝ ܕܒܘܼܟܪ̈ܐ ܕܡܿܩܪܒܝܼܢ ܗܼܘܘ ܠܝܼ ܐܝܟ ܕܦܩܿܕܬ
                    ܒܢܡܘܿܣܐ. ܐܣܠܝܼܬܗܿ ܘܠܐ ܐܬܬܦܝܼܣܿܬ ܠܡܩܒܠܘܼܬܗܿ ܡܢܼܗܘܿܢ. ܘܡܿܢܐ ܗܿܝ ܦܪܟܐ ܕܐܬܿܝܢ ܐܢܬܘܿܢ
                    ܗ̄ ܡܿܢܐ ܝܘܼܬܪܢܐ ܐܝܼܬ ܡܼܢ ܕܘܼܟ̈ܝܬܐ ܗܿܠܝܢ ܕܒܝܬ ܣܓܕ̈ܬܐ ܕܒܿܢܝܬܘܿܢ ܦܬܟܪ̈ܐ ܐܝܿܠܝܢ
                    ܕܡܫܼܬܡܗܝܼܢ ܡܢܼܟܘܿܢ ܦܪ̈ܟܐ ܕܗܿܐ ܠܐ ܢܬܼܠܘܿܢ ܠܟܘܿܢ ܛܒ̈ܬܐ ܡܫܟܚܝܼܢ ܐ݀ܦܠܐ ܕܢܟܼܠܘܢ
                    ܡܢܼܟܘܢܿ ܡܣܿܡ ܒܪܝܫܐ ܡܿܨܝܢܼ ܡܼܢ ܚܕ ܦܪܟܐ ܪܡܿܙ ܥܠ ܣܓ̈ܝܐܬܐ. ܘܐܬܩܼܪܝܼ ܫܡܗ ܦܪܟܐ ܗ̄
                    ܩܿܝܡܬܐܐܘܿ ܐܣܛܘܼܢܐ ܕܥܒܝܼܕܝܼܢ ܒܐܣܟܡܐ ܙܥܘܿܪܐ ܐܝܟ ܗܿܠܝܢ ܕܥܿܒܕܝܼܢ ܥܠ ܩܒܪ̈ܐ ܕܐܢܫ ܐܝܟ
                    ܩܝܡ̄ ܟܒܼܪ. ܐܦ̈ܝܼܢ ܠܘܩܒܠ ܗ̄ ܓܠܝܐܝܼܬ ܐܘܿܕܐܦ̈ܐ ܕܒܒ̈ܠܝܐ ܚܠܦ ܐܦܘ̈ܗܝ ܕܐܠܗܐ ܗܘ̈ܝܢ
                    ܠܘܼܩܒܠ ܝܘܼܕ̈ܝܐ ܒܗܿܝ ܕܚܡܼܬܗ ܕܐܠܗܐ ܕܥܠܝܗܘܿܢ ܕܐܒܝܼܕ̈ܝܗܘܿܢ ܡܬܓܼܡܪܐ. ܐܝܟ ܕܕܢܿܬ
                    ܕܠܡܨܪܝܢ ܗ̄ ܕܐܣܿܦܬ ܠܟܿܠܗܘܿܢ ܒܡܣܡܒܪ̈ܝܼܫܐ ܡܫܚܼܠ̈ܦܐ܀ ܬܚܝܬ ܫܒܛܐ ܗ̄ ܕܡܪܕܘܬܗ ܕܒܒܠܝ. ܐܝܟ
                    ܕܐܥܿܒܪܟܘܢ ܬܚܝܬ ܫܒܛܐ ܕܡܨܪ̈ܝܐ ܗ̄ ܬܫܼܬܥܒܕܘܿܢ ܠܒܒܠ̈ܝܐ ܐܝܟ ܕܐܫܬܼܥܒܕܬܘܢܿ ܠܡܨܪ̈ܝܐ.
                    ܘܐܥܿܠܟܘܿܢ ܒܡܪܕܘܼ̄ ܗ̄ ܡܛ݀ܠ ܕܐܥܿܒܼܪܬܘܿܢ ܕܝܬܩܐ ܕܝܼܠܝ. ܥܠ ܩܝ̈ܡܐ ܘܦܘܼܩ̈ܕܢܐ ܘܢܡ̈ܘܣܐ
                    ܕܝܗܿܒܬ ܠܟ. ܡܿܝܬܐ ܐܢܿܐ ܥܠܝܟܘܿܢ ܫܒܼܝܐ ܘܥܩ̈ܬܐ. ܘܡܛ݀ܠ ܕܒܛܘܼܪܐ ܕܩܘܕܫܝ ܗ̄ ܚܠܼܛ ܗܿܠܝܢ
                    ܕܦܘܼܢܝܐ. ܛܘܼܪܐ ܕܩ̄ܘܼܕ ܩܿܪܐ ܠܛܘܼܪܐ ܕܨܗܝܘܿܢ. ܛܘܼܪ̈ܐ ܕܝܢ ܪ̈ܡܐ ܕܝܼܣܪ̈ܠܝܐ ܐܡܿܪ.
                    ܠܐܝܿܠܝܢ ܕܝܢ ܕܒܝܕ ܦܘܼܪܩܢܐ ܥܿܒܕ ܗܼܘܐ ܠܥܡܘܪ̈ܝܗܘܿܢ. ܐܦ ܗܼܢܘܢܿ ܛܘܼܪ̈ܐ ܪ̈ܡܐ ܘܡܦܪ̈ܓܐ
                
            
            
                 ܝܬܝܼܪ ܡܼܢ ܕܒܩܕܡܝܬܐ ܡܬܪܚܙܝܢ ܒܦܘܼܢܝܐ܇ ܘܬܬܼܕܟܪܘܿܢ ܬܡܿܢ ܗ̄. ܘܢܬܼܩܛ̈ܡܢ
                    ܐܦܝ̈ܟܘܿܢ ܒܟܿܠܗܝܢ ܗ̄ ܬܬܬܚܼܕܘܢ ܒܒܗܼܬܬܐ ܐܟܡܿܢ ܕܬ݀ܡܗܝܼܢ ܐܢܬܘܿܢ ܒܡܪܚܡܢܘܼܬܝ ܕܐܝܿܟܢ ܠܐ
                    ܐܩܨܿܬ ܠܟܘܢܿ ܩܕܡ̈ܝܬܐ ܐܠܐ ܚܘܿܩܬ ܥܠܝܟܘܢܿ ܘܕܠܐ ܣܒܪܐ ܐܦܢܝܿܬܟܘܿܢ ܠܐܪܥܟܘܢܿ. ܣܝܼܡ ܐܦܝ̈ܟ
                    ܠܐܘܼܪܚܐ ܕܬܝܡܢܐ ܗ̄ ܐܦܢܐ ܙܘܥ̈ܝܟ ܐܢܬ ܢܒܝܐ ܘܚܘܼܪ ܠܐܦ̈ܝ ܐܘܿܪܫܠܡ ܡܕܝܼܢܬܐ ܗܿܝ ܕܐܝܼܬܝܗܿ
                    ܠܬܝܡܢܐ ܗܿܝ ܡܼܢ ܒܒܿܝܠ. ܘܐܬܢܒܐ ܥܠ ܥܒܐ ܗ̄ ܥܠ ܐܘܿܪܫܠܡ ܕܣܒܝܼܣܐ ܒܒܢܝ̈ܢܫܐ ܐܝܟ ܥܿܒܐ
                    ܒܩܝ̈ܣܐ ܘܓܠ̈ܝܼܙܐ ܡܼܢ ܦܐܪ̈ܐ ܕܕܚܠܬ݀ ܐܠܗܐ ܐܝܟ ܥܿܒܐ ܚܪܒܐ. ܗܿܐ ܫܿܒܩ ܐܢܼܐ ܒܟ ܢܘܼܪܐ ܗ̄
                    ܐܡܿܪ ܕܐܟܚܕܐ ܠܡ ܣܿܝܦܝܼܢ ܟܿܠܗܘܿܢ ܡܼܢ ܒܒܠ̈ܝܐ ܥܬܝܼܪ̈ܐ ܘܡܣܼ̈ܟܢܐ ܘܥܠ ܕܫܡܼܗ ܥܿܒܐ
                    ܠܟܢܘܼܫܬܐ ܙ݀ܕܩܐܝܼܬ ܐܦ ܪ̈ܓܝܐ ܘܝܒܝܼܫ̈ܐ ܕܥܒܒܐ ܫܡܼܗ ܠܥܬܝܼܪ̈ܐ ܘܡܣ̈ܟܼܢܐ ܕܥܡܐ܀ ܨ܆ ܕܟܐ
                    ܗܿܐ ܐܢܿܐ ܠܡ ܥܠܝܟ ܗ̄ ܡܛ݀ܠ ܕܐܬܦܼܩܕ ܢܒܝܐ ܠܡܪܟܼܒܘܼ ܬܫܥܝܼܬܐ ܕܕܘܼܟܪܢܗܘܿܢ ܩܕܡܝܐ ܘܐܦ
                    ܕܡܪܕܘܼ̄ ܕܿܐܬܝܐ ܥܠܝܗܘܿܢ ܘܗܼܢܘܢܿ ܡܡܿܝܩܝܼܢ ܗܼܘܘ ܒܗ ܕܠܐ ܩܝ̈ܡܢ ܡ̈ܠܘܗܝ ܐܝܟ ܕܢܒ̈ܝܐ
                    ܕܓ̈ܠܐ. ܥܠ ܗܿܝ ܡܬܼܦܩܕ ܕܢܬܼܢܒܐ ܓܠܝܐܝܼܬ ܥܠ ܚܘܼܪܒܗܿ ܕܐܘܿܪܫܠܡ. ܘܐܦܿܩ ܣܦܣܝܼܪܝ ܗ̄ ܐ݀ܦܩܝ
                    ܥܠܝܟܝ ܡܣܡ ܒܪܝܼܫܐ ܗܿܘܐ ܕܥܕܡܐ ܠܗܿܫܐ ܐܝܟ ܕܒܚܠܼܬܐ ܚܡܝܼܠ ܗܼܘܐ ܒܝܕ ܡܓܪܬ݀ ܪܘܼܚܝ. ܘܐܘܿܒܕ
                    ܡܢܼܟܝ ܗ̄ ܙܕܝܼ̈ܩܐ ܣܒܝܼܪ̈ܐ ܥܡ ܚܛ̈ܝܐ ܓܠ̈ܝܐ. ܙܕܝܼ̈ܩܐ ܩܿܪܐ ܬܢܢ ܠܚܛ̈ܝܐ ܐܝܿܠܝܢ
                    ܕܒܙܕܝܼܩܘܼܬܐ ܘܒܟܐܢܘܼܬܐ ܢ݀ܦܩ ܗܼܘܐ ܥܠܝܗܘܿܢ ܡܣܿܡ ܒܪܝܫܐ ܒܝܕ ܣܝܦܐ ܕܡܠܟܐ ܕܒܿܒܝܠ. ܘܥܠ
                    ܕܐܘܒܿܕܬ ܡܢܼܟܝ ܙܕ̈ܝܼܩܐ ܣܒܝܼܪ̈ܐ ܘܚܛ̈ܝܐ ܓܠ̈ܝܐ ܗܿܝܕܝܢ ܐܦܿܩ ܣܦܣܝܼܪܝ ܗ̄ ܘܥܠ ܟ݀ܠ ܕܠܒܪ
                    ܡܼܢ ܐܘܿܪܫܠܡ ܘܡܼܢ ܬܝܡܢܐ ܗ̄ ܡܼܢ ܐܪܥܐ ܕܡܘܼܠܟܢܐ ܘܥܕܡܐ ܠܓܪܒܝܐ ܘܐܚܿܪܘܿܒ ܐܢܘܿܢ ܒܝܕ
                    ܒܒܠ̈ܝܐ. ܐܬܬܢܝܼܚܐ ܒܛܒܪܐ ܕܚܨܐ ܗ̄ ܡܛ݀ܠ ܓܝܪ ܕܡܡܝܩܝܼܢ ܗܼܘܘ ܒܡ̈ܠܘܗܝ ܡܬܼܦܩܕ ܗܿܫܐ ܕܐܦ
                    ܒܣܘܼܥܪ̈ܢܐ ܢܚܼܘܐ ܠܓܢܚ ܠܒܼܗܘܿܢ ܘܩܕܡܝܐ ܐܬܢܓܼܕ ܒܚܫܐ ܘܐܝܼܠܠ ܘܟ݀ܠ ܐܢܫ ܐܐܪܓܫܼ ܒܟܐܒ ܚܨܐ
                    ܕܢܒܝܐ. ܣܝܦܐ ܐܬܠܼܛܫ ܗ̄ ܠܣܝܦܐ ܦ݀ܩܕ ܕܢܬܼܛܝܒ ܠܩܼܛܠܐ ܐܝܟ ܕܒܝܕ ܣܝܦܐ ܢܚܠܼܛ ܠܗ݀ܘ ܡܿܢ
                    ܕܐܚܝܼܕ ܗܼܘܐ ܠܗ ܠܣܝܦܐ ܕܐܝܼܬܘܗܝ ܡܠܟܐ ܕܒܿܒܝܠ܀ ܘܐܬܛܝܒܼ ܠܡܪܬܥܼܘ ܗ̄ ܠܡܥܼܪܩܘܼ
                    ܘܠܡܪܡܝܘܼ̄ܗܿ ܡܼܢ ܕܘܼܟܬܐ ܠܫܪܒܬܐ ܕܝܘܼ̈ܕܝܐ ܐܝܾܿܠܝܢ ܕܩܪܝܿܬ ܐܢܘܢܿ ܒܢ̈ܝܐ ܘܠܐ ܐܟܫܼܪܘ.
                    ܘܐܣܿܠܐ ܟܿܠ ܗ̄ ܥܠܝܗܘܿܢ ܕܝܘܼ̈ܕܝܐ ܐܡܿܪ. ܘܚܠܦ ܒܪܢܫܐ ܩܝܣܐ ܣܼܡ ܒܗ݀ܝ ܕܟܿܠܗܘܿܢ ܡܣܠ̈ܝܐ
                    ܐܢܘܢܿ ܡܼܢ ܐܠܗܐ ܐܝܟ ܩܝܣܐ ܕܠܐ ܦܐܪ̈ܐ. ܘܝܗܒܼܗ ܠܛܘܼܝܒܐ. ܕܣܝܦܐ ܕܠܛܝܼܫܐ ܗ̄ ܐܡܿܪ ܕܗܿܢܐ
                    ܣܝܦܐ ܕܡܛܝܒܼ ܘܠܛܝܼܫ ܠܩܼܛܠܐ ܝܗܼܒܗ ܐܠܗܐ ܠܐܝܼܕܐ ܚܝܠܬܢܝܼܬܐ ܐܝܿܕܐ ܕܟܕ ܐܦ ܗܼܝ ܡܛܝܒܼܐ
                    ܠܩܼܛܠܐ ܣܿܦܩܐ ܡܛ݀ܠ ܥܫܝܼܢܘܼܬܗ ܠܡܓܼܡܪ ܣܘܼܥܪ̈ܢܝܗܿ ܡܫܠܛܐܝܼܬ. ܓܥܝܼ ܘܐܝܠܠܼ ܡܛ݀ܠ ܕܗܘܼ ܗ̄
                    ܗܿܢܐ ܕܪܫܡ ܐܢܬ ܗܼܘܐ ܥܠ ܥܡܝ ܘܥܠ ܟܿܠܗܘܿܢ 
            
            
                 ܪܘܪ̈ܒܢܐ. ܩܘܿܫܝ ܟܦܐ ܗ̄ ܚܘܐ ܕܚܿܕܐ ܐܢܬ ܒܬܒܼܥܬܐ ܕܿܐܬܝܐ ܥܠܝܗܘܿܢ. ܡܛ݀ܠ
                    ܕܐܙܕܕܩܬ݀ ܗܿܕܐ ܗ̄ ܐܬܚܼܪܩܬ݀ ܥܠܝܗܘܿܢ ܬܒܥܼܬܐ ܕܡܼܢ ܐܠܗܐ ܘܠܐ ܡܨܝܐ ܕܬܫܼܬܚܠܦ܆ ܒܡܥܣܬ݀
                    ܥܩ̈ܬܐ ܚܿܠܛ ܒܘܼܝܐܐ܆ ܘܐܢ ܫܪܒܬܐ ܐܣܬܼܠܝܬ݀ ܡܛ݀ܠ ܥܘܠܗܿ ܣܿܒܪܝܬܘܿܢ ܕܠܐ ܬܗܼܘܐ ܡܟܝܼܠ
                    ܘܬܬܩܼܝܡܝ. ܡܬܼܟܢܫܐ ܬܘܼܒ ܘܡܬܼܩܝܡܐ ܒܫܘܼܠܡ ܫܒܥܝܼܢ ܫܢ̈ܝܼܢ. ܒܙܢܼܐ ܐܚܪܢܐ. ܕܟܕ ܠܡ ܗܿܕܐ
                    ܫܪܒܬܐ ܕܕܝܼܠܝ ܡܬܼܐܡܪܐ ܐܣܬܠܝܬ݀ ܕܝܢ ܡܼܢܫܪܪܐ ܒܗܿܝ ܕܗܝܼ ܠܩܢܘܿܡܗܿ ܐܪܚܩܬ݀ ܡܼܢ ܨܝܕܝ. ܠܐ
                    ܬܬܼܕܡܪ ܕܐܝܿܟܢܐ ܐܬܿܐ ܥܠܝܗܘܿܢ ܚܪܒܐ ܕܣܝܦܐ ܚܠܬܢܐ ܗܿܘ ܕܠܛܝܼܫ ܘܡܛܝܒܼ ܠܘܿܬ ܩܼܛܠܐ.
                    ܘܢܬܐܼܥܦ ܗ̄ ܡܟܝܼܠ ܕܢܬܐܼܥܦ ܣܝܦܐ ܡܼܢ ܣܘܿܓܐܐ ܕܕܡܐ ܕܐܫܿܕ. ܘܚܿܡܐ ܦܘܼܡܗ ܘܡܬܥܼܒܐ
                    ܘܡܬܼܦܠܬܠ. ܘܣܝܦܐ ܕܬܠܬܐ ܗ̄ ܣܦܐ ܠܡ ܕܬܠܬܐ ܡܩܼܛܠ ܗܼܘ ܩ݀ܛܠ ܘܠܘ ܡܫܼܒܐ ܗܿܘ ܫܿܒܐ ܐܝܟ
                    ܕܒܙܒܼ̈ܢܬܐ ܩܕܡ̈ܝܬܐ ܬܪ̈ܬܝܢ ܓܝܪ ܙܒܢܼ̈ܬܐ ܣܠܼܩܘ ܥܠܝܗܘܿܢ ܒܒܠ̈ܝܐ ܟܕ ܚܪܒܐ ܠܐ ܥܒܼܕܘ ܒܗܿܘ.
                    ܒܙܒܼܢܬܐ ܕܝܢ ܕܬܠܬ ܚܪܒܬ݀ ܡܕܝܼܢܬܐ ܘܐܫܼܬܒܝܼ ܥܡܐ ܘܗܘܼ ܗܿܢܐ ܣܝܦܐ ܕܡܪܡܐ ܩܛܝܼ̈ܠܐ.
                    ܕܢܒܘܼܟܕܢܨܪ ܪܒܐ ܐܝܼܬܘܗܝ ܕܗܼܘ ܡܙܝܼܥ ܠܗܘܿܢ ܠܝܘܼܕ̈ܝܐ܀ ܚܡܼܣܢܝ ܝܡܝܼܢܝ ܕܡܛܝ̈ܒܢ ܐܦܝ̈ ܗ̄
                    ܕܗܿܕܐ ܐܡܿܪ ܕܡܼܢ ܕܡܘܼܬܐ ܕܩܪ̈ܒܬܢܐ ܙܪ̈ܝܼܙܐ ܕܒܬܪ̈ܬܝܗܝܢ ܐܝܼܕ̈ܘ̄ ܚܿܪܒ ܠܟܿܠ ܓܒ̈ܝܼܢ
                    ܘܡܿܠܒܒ ܗܼܘܐ ܠܗ ܕܢܥܼܙܐ ܥܕܡܐ ܕܠܟܿܠܗܘܿܢ ܒܥܠܕܒ̈ܒܘܗܝ ܢܘܒܕ. ܐܬܪܐ ܕܡܛܝ̈ܒܢ ܠܗ ܐܦܘ̈ܗܝ
                    ܐܡܿܪ. ܐܪܥܐ ܗܿܝ ܕܡܘܼܠܟܢܐ ܕܡܛܝܒܼ ܗܼܘܐ ܕܢܥܼܩܪܝܗܿ ܒܝܕ ܒܒܠ̈ܝܐ. ܐܦ ܐܢܿܐ ܐܩܿܘܿܫ ܟܦܐ ܗ̄
                    ܗܿܟܢܐ ܠܡ ܐܦ ܐܢܿܐ ܢܒܝܐ ܠܘ ܒܠܚܘܼܕ ܡܥܕܪܢܐ ܐܗܿܘܐ ܠܐܝܿܠܝܢ ܕܚܿܪܒܝܼܢ ܐܠܐ ܐܚܿܕܐ ܠܗܘܿܢ ܡܐ
                    ܕܡܬܼܩܛܠܝܼܢ ܟܐܢܐܼܝܼܬ. ܘܥܠ ܐܒܕܢܗܘܿܢ ܟܦܐ ܐܩܿܘܿܫ. ܬܘܼܒ ܦܿܩܕ ܠܗ ܕܢܪܫܘܼܡ ܕܡܘܼ̄
                    ܕܣܘܼܥܪ̈ܢܐ ܐܝܿܠܝܢ ܕܩܪܝܼܒܝܼܢ ܠܡܗܼܘܐ. ܥܒܕ ܠܟ ܬܪ̈ܬܝܢ ܐܘܼܪ̈ܚܢ. ܢܦܼܩܘܢܿ ܬܪ̈ܝܗܘܿܢ ܗ̄
                    ܡܠܦ ܬܢܢ ܠܢܒܝܐ ܕܒܐܬܘ̈ܬܐ ܕܡܬܼܚ̈ܙܝܢ ܢܚܼܘܝܗܿ ܠܗܘܿܢ ܠܡܐܬܝܼܬܐ ܕܒܒܠ̈ܝܐ ܕܠܐܪܥܗܘܿܢ. ܟܕ
                    ܪܫܿܡ ܬܪ̈ܬܝܢ ܐܘܼܪ̈ܚܬܐ ܕܒܗܝܢ ܡܠܟܐ ܕܒܿܒܝܠ ܪܕܐ ܗܼܘܐ ܡܐ ܕܐܙܿܠ ܥܠ ܝܘܼܕ̈ܝܐ ܘܥܠ ܒܢ̈ܝ
                    ܥܡܘܢܿ. ܘܟܕ ܡܪܡܝܢ ܦܼܨܐ ܕܠܐܝܿܟܐ ܙܕܿܩ ܠܗܘܿܢ ܠܡܐܼܙܠ ܩܕܡܝܬ݀. ܘܐܝܿܕܐ ܓܒܝܼܬܐ ܗ̄ ܢܦܼܩ
                    ܗܼܘܐ ܕܝܢ ܠܗܘܿܢ ܩܼܨܡܐ ܠܦܘܼܬ ܥܝܕܿܗܘܢܿ ܒܕܨܘܿܡܘܿܬܗܘܿܢ ܕܠܐܘܿܪܫܠܡ ܢܐܙܠܘܢܿ ܩܕܡܝܬ݀
                    ܘܗܿܝܕܝܢ ܥܠ ܒܢ̈ܝ ܥܡܘܢ܀ ܘܐܝܿܕܐ ܓܒܝܼܬܐ ܗ̄ ܐܡܿܪ ܕܡܥܒܕܢܘܼ̄ ܚܝܠܬܢܝܼܬܐ ܕܝܼܠܝ ܒܝܕ ܒܒܠ̈ܝܐ
                    ܠܘܩܕܡ ܥܠ ܐܘܿܪܫܠܡ ܡܕܝܼܢܬܐ ܓܒܝܼܬܐ ܗܿܘܝܐ ܗܼܘܬ ܘܒܿܬܪܟܢ ܡܿܫܢܝܐ ܡܼܢ ܬܡܿܢ ܥܠ ܒܢ̈ܝ
                    ܥܡܘܢܿ܇ ܘܐܚܪ̈ܢܐ. ܫܼܕܐ ܓܐܪܐ ܗ̄ ܦܬܓܼܡܐ ܗ݀ܘ ܗܦܝܼܟܐ. ܠܘ ܓܝܪ ܡܼܢ ܩܕܡ ܕܢܫܐܼܠ ܒܐܠܗܗ ܩܿܨܡ
                    ܗܼܘܐ. ܐܠܐ ܫܐܼܠ ܘܕܒܼܚ ܘܟܼܢ ܩܨܡ ܒܓܐܪܐ ܐܝܟ ܥܝܿܕܐ ܕܦܠ̈ܚܝ ܦܬܟܪ̈ܐ܆ ܚܙܼܐ ܒܫܘܼܒܚܗ ܗ̄
                    ܐܬܓܼܠܝܼ ܠܗ ܩܨܼܡܐ ܕܙ݀ܟܘܼܬܐ ܢ݀ܣܒ ܘܡܫܼܬܒܚ ܒܩܪܒܐ ܕܥܡ ܝܘܼܕ̈ܝܐ. ܘܣܠܼܩ ܠܗ ܩܨܼܡܐ
                    ܕܠܝܡܝܼܢܗ 
            
            
                 ܢܦܼܪܘܿܫ ܘܠܐܘܿܪܫܠܡ ܢܚܿܙܘܿܩ ܩܕܡܝܬ݀ ܐܟܡܿܢ ܕܗܘܼ ܩܼܨܡܐ ܕܒܐܝܼܕܐ ܕܝܡܝܼܢܐ
                    ܥܠ ܐܘܼܪܚܐ ܕܡܿܘܒܐ ܗܘܬ݀ ܠܐܘܿܪܫܠܡ ܢܦܼܩ ܗܼܘܐ. ܘܢܒܘܟܕܢܨܪ ܗܿܠܝܢ ܟܿܠܗܝܢ ܐܝܟ ܥܝܿܕܗ ܡܼܢ
                    ܦܬܟܪ̈ܐ ܫܿܐܠ ܗܼܘܐ. ܐܠܗܐ ܕܝܢ ܗܿܝ ܕܣܝܼܡܐ ܗܘܼܬ ܠܗ ܡܼܢ ܪܝܼܫܝܼܬܐ ܡܫܿܡܠܐ ܗܼܘܐ ܐܝܟ ܕܥܒܼܕ
                    ܠܘܿܬ ܒܠܥܡ ܘܠܘܿܬ ܐܢܬܬܐ ܡܣܩܬ݀ ܒܙܟܘܪ̈ܐ. ܘܢܗܼܘܐ ܠܗܘܿܢ ܐܝܟ ܩܼܨܡܐ ܗ̄ ܠܘ ܠܒܒ̈ܠܝܐ ܐܠܐ
                    ܠܝܘܼܕ̈ܝܐ ܐܡܿܪ ܐܡܿܪ ܐܟܿܡܢ ܕܐܦ ܗܼܢܘܿܢ ܒܢܒ̈ܝܐ ܕܓ̈ܠܐ ܩܨ̈ܡܐ ܕܐܝܟ ܗܿܠܝܢ ܚܿܠܡܝܼܢ ܗܼܘܘ
                    ܠܢܦܼܫܗܘܿܢ ܕܟܐܡܼܬ݀ ܠܐ ܡܫܼܬܠܛܐ ܥܠܝܗܘܿܢ ܐܝܼܕܗ ܕܡܠܟܐ ܕܒܿܒܝܠ. ܘܗܘܼ ܢܬܕܒܪ ܗ̄ ܐܡܿܪ ܥܠ
                    ܐܠܗܐ ܕܟܕ ܡܼܬܕܟܪ ܥܘܠܗ ܕܥܡܐ. ܗܘܼ ܥܡܐ ܕܡܬܼܬܚܕ ܒܐܝܼܕܐ ܕܫܦ̈ܝܐ ܡܛ݀ܠܬܗܘܿܢ ܕܚܛܗ̈ܘܗܝ.
                    ܡܬܼܐܡܪܐ ܬܘܼܒ ܐܦ ܥܠܘܗܝ ܕܥܡܐ ܕܥܠ ܠܡ ܕܐܚܝܼܕ ܗܼܘܐ ܒܥܘܠܗ ܐܬܬܚܼܕܘ ܡܼܢ ܪܘܓܙܐ ܐܠܗܿܝܐ܆
                    ܗܿܟܢܐ ܐܡܿܪ܀ ܒܐܝܼܕܐ ܬܬܬܚܼܕܘܢܿ ܗ̄ ܐܡܿܪ ܕܡܛ݀ܠ ܕܟܕ ܐܬܕܟܪܬܘܿܢ. ܥܘܠܟܘܢܿ ܗ݀ܘ ܕܡܣܼܬܬ
                    ܒܚܘܼܫ̈ܒܝܟܘܢܿ ܘܡܢܼܗ ܠܓܡܿܪ ܠܐ ܡܬܼܕܚܩܝܼܢ ܐܢܬܘܿܢ ܐܠܐ ܐܝܟ ܕܒܫܼܒܝܐ ܡܕܡ ܕܒܝܼܪܝܼܬܘܿܢ
                    ܠܡܦܼܠܚ ܣܢܝ̈ܬܐ. ܘܗܿܢܝܐܝܼܢ ܠܟܘܢܿ ܚܛܗ̈ܝܟܘܢܿ ܘܨܢܥ̈ܬܐ ܒܝܼܫ̈ܬܐ ܡܩܒ̈ܠܢ ܥܠܟܘܢܿ. ܥܠ ܐܦ̈ܝ
                    ܗܿܠܝܢ ܒܐܝܼܕܐ ܕܒܥ̈ܠܕܒܒܐ ܬܦܠܘܿܢ܀ ܐܢܬ ܕܝܢ ܛܢܦܐ܆ ܘܚܪܬܟ ܗ̄ ܐܡܼܪܗܿ ܕܝܢ ܠܡܟܼܣܢܘܼܬܐ ܗܿܕܐ
                    ܐܘܿ ܠܘܿܬ ܡܠ̈ܟܐ ܐܘܿ ܠܘܿܬ ܟܗ̈ܢܐ. ܡܛܝܼ ܠܗ ܕܝܢ ܝܘܡܐ ܕܒܗ ܡܬܬܼܒܥ ܥܘܠܟ ܘܛܢܦܘܼܬܟ܆ ܣܒ
                    ܡܢܼܟ ܡܨܢܦܬܐ ܗ̄ ܐܟܡܿܢ ܕܠܐ ܡܫܼܬܒܩ ܐܢܬ ܠܡܟܼܗܢܘܼ ܠܟܗ̈ܢܐ ܐܘܿ ܟܠܝܼܠܐ ܕܫܘܼܠܛܢܐ ܠܡܠܟܐ.
                    ܘܐܡܝܼܢ ܚܕ ܡܢܼܗܘܿܢ ܒܣܓܕܬ݀ ܦܬܟܪ̈ܐ ܡܬܼܬܪܝܼܡ ܡܢܼܗ ܐܝܼܩܪܗ. ܘܐܢܝܼܚ ܡܢܼܟ ܗ̄ ܐܟܡܿܢ ܕܠܘ
                    ܡܠܟܐܐܢܬ ܐܠܐ ܥܒܕܐ ܕܒܿܒܠܝܐ. ܡܟܝܼܟܐ ܐܪܝܼܡ ܗ̄ ܝܘܼܟܢܝܐ ܕܐܬܬܪܝܼܡ ܒܡܠܟܘܼ̄ܗ ܕܐܘܠܡܪܘܕܟ.
                    ܘܪܡܐ ܐܡܟ ܗ̄ ܨܕܩܝܐ. ܐܦ ܗܿܕܐ ܠܥܘܠܐ ܗ̄ ܡܛ݀ܠ ܥܘܠܐ ܘܥܬܐ ܕܦܠܼܚܘ ܟܗ̈ܢܐ ܘܡܠ̈ܟܐ ܕܥܡܐ
                    ܙܟܝܼܘ ܠܚܝܒ̈ܐ ܘܚܝܒܘ ܠܙܟ̈ܝܐ ܒܝܕ ܫܘܼܚܕܐ܆ ܐܥܿܒܕܝܼܗܿ ܠܡܪܕܘܼܬܐ ܒܥܓܠ ܥܕܡܐ ܕܢܐܼܬܐ ܡܿܢ
                    ܕܕܝܼܠܗ ܗܼܘ ܕܝܼܢܐ. ܘܐܫܿܠܡܝܼܘ̄ ܠܗ ܗ̄ ܠܫܘܼܠܛܢܐ ܘܕܝܼܢܐ ܕܥܡܐ ܕܥܠ ܝܫܘܿܥ ܒܪ ܝܘܼܙܕܩ ܪܡܿܙ
                    ܐܘܿ ܥܠ ܙܘܿܪܒܒܝܠ. ܫܪܪܐ ܕܡܠܼܬܐ ܒܡܫܝܼܚܐ ܐܫܬܼܡܠܝܼ. ܡܬܼܢܒܐ ܥܠ ܒܢ̈ܝ ܥܡܘܢܿ ܗ̄ ܥܠ ܒܢ̈ܝ
                    ܥܡܘܿܢ ܗܿܠܝܢ ܕܐܡܝܼܢܐܝܼܬ ܡܚܿܣܕܝܼܢ ܗܼܘܘ ܠܥܡܐ ܗܿܟܢܐ ܦܣܼܩ ܡܪܝܐ. ܣܝܦܐ ܗ̄ ܕܗܼܘ ܠܡ ܟܕ
                    ܗܘܼ ܣܝܦܐ ܕܒܒܠ̈ܝܐ ܗܿܘ ܕܠܛܝܼܫ ܘܡܛܝܒܼ ܡܼܢ ܐܠܗܐ ܠܬܒܼܥܬܐ. ܢܐܼܬܐ ܥܠ ܒܢ̈ܝ ܥܡܘܢܿ ܘܢܘܼܒܕ
                    ܐܢܘܿܢ ܘܒܐܒܕܢܐ ܕܝܼܠܗܘܿܢ ܢܬܕܓܠ ܚܼܙܘܐ ܣܪܝܼܩܐ ܘܩܼܨܡܐ ܕܒܩܼܨܡܘ ܕܠܐ ܡܼܬܒܝܢ ܘܠܐ ܡܬܬܒܥܝܼܢ
                    ܥܘܠܗܘܿܢ ܕܒܥܡܐ. ܘܡܼܢ ܕܐܡܼܪ ܥܠ ܐܝܿܠܝܢ ܕܒܐܝܼܕ̈ܝ ܒܒܠ̈ܝܐ ܡܬܼܚܪܒܝܼܢ ܐܡܿܪ ܡܝܼܠ ܥܠܝܗܘܿܢ
                    ܕܒܒ̈ܠܝܐ ܕܒܐܝܼܕ̈ܝ ܒܒܠ̈ܝܐ ܡܬܼܚܪܒܝܼܢ. ܐܬܚܡܠ ܒܚܠܼܬܟ ܗ̄ ܒܒܿܝܠ ܟܕ ܠܐ ܡܟܝܼܠ ܚܿܪܒ ܐܢܬ
                    ܠܟܿܠ ܐܝܟ ܥܝܕ̈ܝܟ. ܐܠܐ 
            
            
                 ܐܦ ܐܢܬ ܬܩܼܒܠ ܡܣܡ ܒܪܝܼܫܐ ܐܝܟ ܕܫܪܟܐ. ܘܬܡܿܢ ܐܕܿܘܼܢܟ ܗ̄ ܥܠ ܐܦ̈ܝ
                    ܚܪܡܘܼܬܐ ܕܚܘܝܼܬ ܒܥܡܐ ܘܥܡ̈ܡܼܐ. ܘܒܢܘܼܪܐ ܕܚܡܼܬܝ ܗ̄ ܕܐܝܟ ܕܡܿܘܩܕܐ ܢܘܼܪܐ ܠܥܡܝܼܪܐ ܗܿܟܢܐ
                    ܐܦ ܠܟܘܿܢ ܐܘܿܩܕ ܘܐ݀ܓܡܪ ܒܚܪܒܐ ܕܡܕ̈ܝܐ ܕܡܿܝܬܐ ܢܼܐ ܥܠܝܟܘܢܿ. ܕܣܿܥܪܝܼܢ ܚܒܿܠܐ ܗ̄ ܕܨܿܗܝܢܼ
                    ܠܚܒܿܠܐ ܘܝܐܝܼܒܝܼܢ ܠܩܼܛܠܐ ܨ܆ ܕܟܒ̄ ܕܘܿܢ ܠܡܕܝܼܢܬܐ ܗ̄ ܡܬܼܦܢܐ ܥܠ ܐܘܿܪܫܠܡ ܕܢܡܼܠܠ. ܕܕܡܐ
                    ܗ̄ ܕܕܡܐ ܩܿܪܐ ܠܗܿ ܡܛ݀ܠ ܩܼܛܠܐ ܕܥܿܕܒܝܼܢ ܗܼܘܘ ܥܡܘܿܪ̈ܝܗܿ ܘܕܡܐ ܕܚܕ̈ܕܐ ܕܐ݀ܫܕܝܼܢ ܗܼܘܘ
                    ܒܓܘܗܿ. ܕܘܢܿ ܗ̄ ܚܝܒܝܗܿ ܒܝܕ ܡܠܼܬܟ ܕܠܡܣܿܡ ܒܪܝܼܫܐ ܫܿܘܝܐ. ܘܡܘܼܝܿܩܐ ܠܟܿܠܗܝܢ ܗ̄ ܟܿܠܗܝܢ
                    ܓܝܪ ܡܕܝܼ̈ܢܬܐ ܕܩܪ̈ܝܼܒܢ ܘܪ̈ܚܝܼܩܢ ܕܠܗܝܢ ܥܿܪܩܝܼܢ ܥܡܘܿܪ̈ܝܟܝ ܠܡܣܼܬܬܪܘܼ. ܢܼܡܝܩ̈ܢ ܒܟܝ
                    ܘܢܐܡܼܪܗܢ ܢܛܢܦܼܬܐ ܗ̄ ܛܢܦܬܐ ܠܡ ܕܣܿܓܝܐܝܼܢ ܫܡ̈ܗܐ ܕܛܢܦܘܼܬܟܝ. ܘܒܒܝܼܫܬܐ ܛ݀ܒ ܡܫܡܿܗܐ
                    ܐܢܬܝ. ܐܝܿܟܢ ܓܝܪ ܡܨܝܐ ܕܬܬܼܥܕܪܝܼܢ ܡܢܼܝ. ܟܕ ܗܿܐ ܪܘܪ̈ܒܢܐ ܕܝܼܣܪܐܝܠ ܕܣܝܼܡܝܼܢ ܗܼܘܘ ܠܡܕܢ
                    ܘܠܡܬܼܒܥ ܠܩܛܘܿܠ̈ܐ ܐܢܫ ܠܫܪܒܬܗ ܘܠܘ ܠܢܘܼܟܪ̈ܝܐ. ܗܘܼܘ ܒܟܝ ܕܐܫܿܕܝܼܢ ܕܡܐ. ܨܚܝܼܘ ܒܟܝܼ ܗ̄
                    ܫܢܼܘ ܘܨܚܝܼܘ ܒܢܝ̈ܐ ܠܐܒܗ̈ܝܗܘܿܢ. ܐܘܿ ܨܘܼܚܝܼܬܐ ܕܐܒܐ ܫܘܬܦܘܼܬܐ ܕܒܪܐ ܕܥܡ ܐܢܬܬ݀ ܐܒܘܼܗܝ.
                    ܘܩܘܼܕܫܝ ܐܣܼܠܝܼܬܝ ܗ̄ ܟܿܠܡܕܡ ܕܐܡܿܪܬ ܠܟܘܿܢ. ܗ̄ ܢܬܚܼܫܒ ܠܟܘܿܢ ܐܢܬܘܿܢ ܡܣܠܝܐ ܘܡܛܘܫܐ
                    ܚܫܼܒܬܘܿܢ. ܘܬܢܿܐ ܙܢ̈ܝܐ ܕܡܥܼܘ ܠܘܿܬܗܘܿܢ. ܘܝܬܝܼܪܐ ܫܩܠܼܘ ܗ̄ ܐܦܿܠܐ ܒܬܢܘܝ ܘܩܨ̈ܨܐ
                    ܕܣܝܼܡܝܼܢ ܗܼܘܘ ܡܟܬܪܝܼܢ. ܐܠܐ ܢ݀ܣܒܝܼܢ ܗܼܘܘ ܝܬܝܼܪܐ ܡܼܢ ܩܨܨ̈ܐ ܘܪ̈ܒܝܬܐ. ܕܐܦ ܐܢܼܐ ܗ̄
                    ܢܒܝܐ. ܐ݀ܛܪܦ ܗ̄ ܟܐܢܐܝܼܬ ܚܿܕܐ ܐܢܼܐ ܒܐܒܕܢܟܘܢ. ܛܪܦܐ ܓܝܪ ܕܐܝܼܕ̈ܝܐ ܠܗܿܕܐ ܩ݀ܪܐ. ܘܐܪܿܬܟܝ
                    ܠܥܝܼܢ ܗ̄ ܡܐ ܠܡ ܕܒܕܿܪܬܟܘܿܢ ܒܥܡ̈ܡܼܐ ܐܩܿܝܼܡܟܘܿܢ ܒܪܥܼܠܐ ܘܒܪܬܝܼܬܐ ܩܕܡܝܗܘܿܢ. ܐܝܟ
                    ܐܝܿܠܝܢ ܕܒܥܪܝܐ ܪܥܠܝܼܢ ܘܢܩ̈ܫܢ ܫܢ̈ܝܗܘܿܢ. ܐܚܪ̈ܢܐ ܐܪ̈ܬܟܝ ܗ̄ ܡܼܢ ܝܪܬܘܼܬܐ ܫܿܩܠܝܼܢ ܠܗܿ.
                    ܒܿܬܪ ܫܒܼܝܐ ܠܡ ܐܪ̈ܬܟܝ ܘܐܩܿܢܟܝ ܘܬܗܼܘܝܢ ܠܝܼ ܡܢܿܬܐ ܘܝܪܬܘܼܬܐ. ܗܼܘܘ ܠܝܼ ܕܒܝܬ ܝܼܣܪܐܝܠ
                    ܕܚܠܝܼܛܝܼܢ ܒܣܐܡܐ ܗ̄ ܐܟܙܼܢܐ ܠܡ ܕܣܐܡܐ ܐܡܼܬܝ ܕܡܚܠܛ ܒܗܿܠܝܢ ܐܕܫ̈ܐ ܡܣܠܝܐ ܐܝܼܬ̄ܘ ܘܠܐ
                    ܡܼܬܕܟܐ ܐܠܐ ܒܢܘܼܪܐ. ܘܐܢ ܒܓܘ ܟܘܼܪܐ ܠܐ ܡܬܼܦܫܪ ܙܐܦܗ ܠܡܕܡ ܠܐ ܚܿܫܚ. ܗܿܟܢܐ ܠܡ ܐܦ ܥܡܐ
                    ܗܿܢܐ ܟܕ ܒܕܡܘܼܬ ܣܐܡܐ ܕܟܝܐ ܐܝܼܬܝܗܘܿܢ ܗܼܘܘ ܡܼܢ ܩܕܝܼܡ ܘܐܬܟܼܬܡܘ ܘܐܬܚܼܠܛܘ ܒܪܘܼܫܥܐ
                    ܘܥܘܠܐ. ܘܡܛ݀ܠ ܕܒܡܪ̈ܕܘܬܐ ܡܡܫ̈ܚܬܐ ܠܐ ܐܬܕܟܝܼܘ. ܡܟܝܼܠ ܠܚܘܪܒܐ ܓܡܝܼܪܐ ܡܿܫܠܡ ܐܢܼܐ ܠܗܘܿܢ
                    ܐܟܡܿܢ ܕܡܼܪܕܘ ܠܗܘܿܢ ܡܼܢ ܬܘܼܪܨܐ. ܘܐܡܿܪ ܥܠ ܕܐܬܠܛܬܘܿܢ ܟܠܟܘܿܢ ܘܗܼܘܝܬܘܿܢ ܚܕ ܡܿܐܢܐ
                    ܡܣܠܝܐ. ܗܿܐ ܡܟܿܢܫ ܐܢܿܐ ܠܟܘܿܢ ܠܓܘ ܐܘܿܪܫܠܡ ܐܝܟ ܕܠܟܘܼܪܐ ܘܢܿܦܚ ܐܢܼܐ ܒܟܘܢܿ. ܢܘܼܪܐ
                    ܕܥܩ̈ܬܐ ܕܚܪܒܐ ܘܕܟܦܼܢܐ ܘܐܝܟ ܕܒܢܘܼܪܐ ܒܝܕ ܒܒܿܠܝܐ ܡܦܿܫܪ ܐܢܼܐ. ܐܢܬܝ ܐܪܥܐ.. ܡܛܪܐ ܗ̄
                    ܗܿܦܟܬܐ ܠܡ ܕ݀ܝܡܢ ܥܡܘܿܪ̈ܝܗܿ ܕܐܪܥܐ ܕܡܘܼܠܟܢܐ: ܠܐܝܿܠܝܢ ܕܠܓܡܿܪ ܠܛܒ̈ܬܗ ܕܐܠܗܐ ܠܐ
                    ܐܫܼܬܘܝܼܘ. ܘܠܐ 
            
            
                 ܢܚܼ̈ܬܝ ܥܠܝܗܘܿܢ ܒܢ̈ܬ ܩ̈ܠܐ ܕܐܠܗܐ ܕܒܝܕ ܢܒ̈ܝܐ ܫܪܝܼܪ̈ܐ ܗ݀ܘ ܕܡܿܫܕܪ ܗܼܘܐ
                    ܠܘܿܬܗܘܿܢ ܕܢܓܘܢܿ ܐܢܘܿܢ ܠܡܬܼܠ ܦܐܪ̈ܐ ܕܕܚܼܠܬ݀ ܐܠܗܐ ܐܠܐ ܟܿܠܗܘܿܢ ܐܬܟܬܼܡܘ ܠܗܘܿܢ ܒܪܘܼܫܥܐ
                    ܘܒܥܘܠܐ. ܢܒܝ̈ܝܗܿ ܗ̄ ܢܒ̈ܝܐ ܬܢܢ ܥܠ ܕܓ̈ܠܐ ܪܡܿܙ. ܛܪܝܐ ܕܛܪܘ ܠܗܿ ܥܠ ܗܿܝ ܕܒܡܼ̈ܠܐ ܕܫܠܡܐ
                    ܡܬܟܠܝܼܢ ܗܼܘܘ ܠܥܡܐ ܕܢܡܼܪܕ ܥܠ ܢܒܘܼܟܕܢܨܪ ܡܼܢ ܕܡܘܬܐ ܕܐܝܿܢܐ ܕܛܿܪܐ ܐܣܬܐ ܡܚܝܼܠܬܐ ܕܡܼܢ
                    ܠܒܪ ܫܿܐܠ ܠܗܿ ܕܬܩܘܼܡܝ ܩܕܡ ܡܠܐܐ ܘܪ̈ܘܼܚܐ. ܬܪ̈ܬܝܢ ܢܫ̈ܝܼܢ ܗ̄ ܗܿܪܟܐ ܨ݀ܒܐ ܕܢܟܣ ܐܢܘܿܢ ܥܠ
                    ܩܕܡ̈ܝܬܐ ܘܐܚܪ̈ܝܬܐ. ܘܙܢܿܝ ܒܡܨܪܝܢ ܗ̄ ܡܛ݀ܠ ܕܐܬܼܦܠܓ ܥܡܐ ܠܬܪܬܝܢ ܟܢܘܼܫ̈ܬܐ ܒܙܒܢ ܒܘܪܒܥܡ.
                    ܥܠܗ݀ܝ ܦܚܡ ܐܢܝܢ ܒܬܪܬܝܢ ܢܫ̈ܐ. ܐܡܐ ܩܿܪܐ ܠܟܢܘܼܫܬܐ ܕܢܦܩܼܬ݀ ܡܼܢ ܡܨܪܝܢ ܘܛܠܝܘܼܬܐ ܠܗܿܘ
                    ܙܒܼܢܐ ܩܿܪܐ ܡܛ݀ܠ ܕܬܡܿܢ ܩܢܼܘ ܥܝܕ̈ܐ ܒܝܼܫ̈ܐ ܕܚܢܦܘܼܬܐ. ܐܬܡܼܪܣܘ ܬܕ̈ܝܗܝܢ ܗ̄ ܡܼܢ ܫܐܕ̈ܐ.
                    ܘܬܡܿܢ ܐܬܢܣܼܒܘ ܒܬܘܼܠ̈ܝܗܝܢ ܗ̄ ܡܼܢ ܦܬܟܪ̈ܐ ܕܡܨܪܝܢ ܨ܆ ܕܟܓ̄ ܐܗܠܐ ܫܡܗܿ ܕܐܚܪܬܐ ܗ̄ ܗܿܠܝܢ
                    ܢܫܼ̈ܐ ܗܼܘ̈ܝ ܪ̈ܝܼܫܬ ܙܢܝ̈ܬܐ ܕܡܨܪܝܢ. ܘܐܕܟܪ ܠܫܡܗ̈ܝܗܝܢ ܘܕܡܝܼܪ ܐܢܝܢ ܠܐܝܼܣܪܐܝܠ
                    ܘܠܝܼ̈ܘܼܕܐ. ܘܩܼܪܐ ܩܫܝܼܫܬܐ ܠܒܢ̈ܝ. ܡܛ݀ܠ ܣܓܝܐܘܼܬ ܥܣܪ̈ܐ ܫܒ̈ܛܐ ܐܘܿ ܡܛ݀ܠ ܕܣܿܓܝܼ ܚܼܛܘ
                    ܘܣܓܼܕܘ ܠܬܦܟܪ̈ܐ. ܘܙܢܝܬ݀ ܐܗܠܐ ܡܢܼܝ ܗ̄ ܒܥܓܼܠܐ ܒܒܥܠܐ ܘܠܐ ܣܦܼܩܘ ܠܗܿ ܗܿܠܝܢ ܐܠܐ
                    ܐܬܢܩܼܦܬ݀ ܠܐܬܘܼܪ̈ܝܐ ܕܩܪܝܼܒܝܼܢ ܗܼܘܘ ܠܗܿ ܘܢܣܼܒܬ݀ ܡܢܼܗܘܿܢ ܕܡ̈ܘܬܐ ܕܦܬܟܪ̈ܐ ܕܠܒܝܼܫܝܼܢ
                    ܐܝܟ ܐܣܟܡܐ ܕܦܠ̈ܚܝܗܘܿܢ ܘܡܪ̈ܘܬܐ ܘܫܠ̈ܝܼܛܢܐ ܚܫܼܒܬ݀ ܐܢܘܿܢ. ܘܐܪܡܝܬ݀ ܙܝܢܘܼܬܗܿ ܗ̄ ܕܗܝܼ
                    ܚܒܼܨܬ݀ ܥܠܝܗܘܿܢ ܘܠܘ ܗܼܢܘܿܢ ܥܨܼܐܘܗܿ ܒܛܩܝܼܪܐ. ܘܚܙܬ݀ ܚܿܬܗܿ ܐܗܠܝܼܒܐ ܗ̄ ܡܪܕܘܼܬܗܿ
                    ܕܣܒܼܠܬ݀ ܚܒܼܠܬ݀ ܢܩܦܼܗܿ ܝܬܝܼܪ ܡܢܼܗܿ ܒܗܿܝ ܕܐܦ ܠܪ̈ܚܫܐ ܘܠܒܥܝܼܪܐ ܘܠܕܡ̈ܘܬܐ ܕܐܪܒܥ ܐܦ̈ܝܼܢ
                    ܣܓܕܬ݀. ܘܬܘܼܒ ܢܩܦܼܬ݀ ܠܒ̈ܢܝ ܐܬܘܿܪ ܘܠܦܬܟܪ̈ܝܗܘܿܢ ܚܫܼܒܬ݀ ܡܪ̈ܘܬܐ ܘܫܠ̈ܝܼܛܢܐ ܟܕ ܡܬܼܚܬܚܬܐ
                    ܒܿܬܪ ܐܣܟܼ̈ܡܐ ܕܬܘܼܩ̈ܢܝܗܘܿܢ ܘܙܢܝ̈ܐ ܕܣܘܼܥܪ̈ܢܝܗܘܿܢ. ܘܒܿܬܪ ܗܿܠܝܢ ܐܬܢܩܼܦܬ݀ ܐܦ ܠܒܒܠ̈ܝܐ.
                    ܘܚܼ̈ܙܝ ܓܒܪ̈ܐ ܕܨܝܼܪܝܼܢ ܒܐܣܼܬܐ܆ ܘܡܚܙܩ̈ܬܐ ܒܚܨ̈ܝܗܘܿܢ ܗ̄ ܡܚܙ̈ܩܬܐ ܩ݀ܪܐ ܠܩܡܪ̈ܐ.
                    ܘܐܬܢܩܼܦܬ݀ ܠܗܘܿܢ ܗ̄ ܩܕܡܝܬ݀ ܒܚܼܙܬܐ ܕܥܝ̈ܢܐ ܘܟܢ ܫܕܪܬ݀ ܒ݀ܬܪܗܘܿܢ ܐܝܙܓ̈ܕܐ ܠܐܬܪܐ
                    ܕܟ̈ܠܕܝܐ. ܒ݀ܥܐ ܕܢܘܕܥ ܒܗܿܠܝܢ ܕܡܼܢ ܐܝܿܟܐ ܢܣܒܬ݀ ܫܘܼܪܝܐ ܒܝܼܫܬܐ ܕܒܢܦܼܫܗܘܿܢ ܟܕ ܩܕܡܝܬ݀
                    ܒܨܘܼܪ̈ܬܐ ܕܒܣܡ̈ܡܢܐ ܚܙܼܬ݀ ܕܡܘ̈ܬܐ ܕܦܬܟܪ̈ܝܗܘܿܢ. ܘܒܿܬܟܢ ܫܕܪܬ݀ ܠܪܘܼܚܩܐ ܕܬܼܝܬܐ ܦܬܟܪ̈ܐ
                    ܕܬܣܓܘܼܕܝ ܠܗܘܿܢ ܟܕ ܡܫܼܬܦܪܐ ܟܐܡܬ݀ ܒܗܿܕܐ ܠܐܬܘܼܪ̈ܝܐ ܘܠܒܒܠ̈ܝܐ ܒܣܓܕܬܐ ܕܦܟܪ̈ܝܗܘܿܢ
                    ܘܒܫܘܼܥܒܕܐ ܕܬܚܘܼܬܝܗܘܿܢ. ܘܐܬܕܟܪܬ݀ ܝܘܡ̈ܬܐ ܗ̄ ܕܐܬܥܗܕ ܐܡܿܪ ܠܐܡܗܿ ܩܕܡܿܝܬܐ ܕܐܦ ܗܼܝ
                    ܒܡܨܪܝܢ ܘܒܡܕܒܪܐ ܩ݀ܠܚܐ ܗܘܬ݀ ܠܦܬܟܪ̈ܐ. ܘܐܬܢܩܼܦܬ݀ ܠܥܒܿܕ̈ܝܗܘܢܿ ܗ̄ ܦܬܟܪ̈ܝܗܘܿܢ ܐܚܪ̈ܢܐ
                    ܥܒܕ̈ܝ̈ܗܘܿܢ 
            
            
                 ܗ̄ ܕܫܘܝܐܝܼܬ ܪܓܬ݀ ܕܬܙܼܢܐ ܒܥܡ̈ܡܼܐ ܪܘܪ̈ܒܐ ܘܙܥܘܿܪ̈ܐ ܗ̄ ܠܡܨܪ̈ܝܐ
                    ܕܐܝܼܬܝܗܘܿܢ ܥܒ̈ܕܐ ܕܐܬܘܼܪ̈ܝܐ܀ ܕܒܣܼܪܗܘܿܢ ܐܝܟ ܀ ܘܚܢܝ̈ܗܘܿܢ ܗ̄ ܗܿܕܐ ܡܛ݀ܠ ܕܙܥܘܿܪܐ ܗܿܘ
                    ܒܢܝ̈ܢܝܗܘܿܢ ܪܘܼܫܥܗܘܿܢ ܩܕܡܝܐ ܥܦܼܘ ܗܼܘܘ ܥܠܘܝܗ ܦܘܼܠ̈ܚܢܐ ܕܦܬܟܪ̈ܝܐ ܕܡܨܪ̈ܝܐ ܐܝܿܠܝܢ
                    ܕܗܿܢܐ ܟ݀ܠܗ ܪܘܪ̈ܒܝܼܢ ܒܚܼܙܬܗܘܿܢ ܘܒܗܕ̈ܡܝܗܘܿܢ ܕܫܘܬܦܘܼܬܗܘܿܢ ܐܟܡܿܢ ܕܡܬܼܚܙܝܢ ܕܪܘܪ̈ܒܝܼܢ
                    ܗܕ̈ܡܐ ܕܒܥܝܼܪܐ ܡܼܢ ܗܕ̈ܡܐ ܕܒܪܢܫܐ. ܟܕ ܡܼܢ ܗܿܠܝܢ ܕܦܓܪܐ ܪܡܿܙ ܥܠ ܣܢܝܘܼܬܐ ܕܢܦܼܫܐ ܘܐܝܟ
                    ܪܒܘܼܬܐ ܕܚܢ̈ܝܗܘܿܢ ܐܝܼܬܝܗܿ ܡܫܪܬܼܚܘܼܬܐ ܕܦܬܟܪ̈ܝܗܘܿܢ. ܘܦܩܼܕܬܝ ܥܘܠܐ ܗ̄ ܒܥܝܼܬܝ ܘܪܓܼܬܝ
                    ܕܬܬܼܦܢܝܢ ܨܝܼܕ ܥܘܼܠܐ ܕܛܠܝܘܼܬܟܝ ܩܕܡܝܬܐ. ܡܛܿܠܗܿܕܐ ܐܗܠܝܼܒܐ ܡܥܝܼܪ ܐܢܼܐ ܥܠܝܟܝ ܠܟܿܠܗܘܿܢ
                    ܒܒܠ̈ܝܐ ܪ̈ܚܡܿܝܟܝ ܩܕܡ̈ܝܐ ܕܢܕܬ݀ ܢܦܫܼܟܝ ܡܢܼ̈ܘܿܢ ܗ̄ ܗܿܫܐ ܕܐܬܦܼܢܝܼܬܝ ܨܝܕ ܡܨܪ̈ܝܐ..
                    ܘܐܬܿܠ ܒܟܝ ܛܢܼܢܝ ܗ̄ ܒܗܿܝ ܕܗܿܢܘܢܿ ܚܠܼܦ ܛܿܐܢܝܢ ܘܬܒܿܥܝܼܢ ܡܢܼܟܝ ܥܘܠܟܝ. ܟܿܣܐ ܕܚܿܬܟܝ ܗ̄
                    ܐܡܿܪ ܕܝܢ ܠܪܘܓܙܐ ܗ݀ܘ ܕܡܐ ܕܢܿܦܠܝܼܢ ܗܼܘܘ ܒܗ ܗܿܘܝܢ ܗܼܘܘ ܚܣܼܕܐ ܘܡܘܼܝܩܐ ܡܼܢ ܟܿܠܢܫ.
                    ܥܡܝܼܩܐ ܗ̄ ܠܦܘܼܬ ܣܿܓܝܐܘܼܬܐ ܕܥܘܠܐ ܐܡܿܪ ܒܗܿܝ ܕܟܿܠ ܕܫܿܬܐ ܟܿܣܐ ܕܥܡܝܼܩ ܘܪܘܝܼܚ ܪܘܐ
                    ܘܡܼܨܛܕܪ. ܟ݀ܣܐ ܕܬܡܼ̈ܐ ܗ̄ ܕܡܐ ܕܪ̈ܘܝܐ ܒܡܣܡܒܪܝܼܫܐ. ܬܡܿܗܐ ܐܝܿܟܢ ܐܬܚܒܼܠܬ݀ ܡܼܢܫܝܠܝ ܘܠܐ
                    ܩܡܼܘ ܠܗܿ ܠܐ ܦܬܟܪ̈ܐ ܘܠܐ ܡܨܪ̈ܝܐ. ܟܕ ܬܡܼܗܐ ܘܚܒܿܠܐ ܩܿܪܐ ܠܗܝܢ ܠܥܩ̈ܬܐ ܐܝܿܠܝܢ ܕܡܩܝܼ̈ܡܢ
                    ܠܗܘܿܢ ܒܬܼܡܗܐ ܘܒܚܒܠܐ. ܟ݀ܣܐ ܕܚܿܬܟܝ ܗ̄ ܐܟܡܿܢ ܕܟܿܠܗ ܬܛܪܐ ܕܪܘܓܙܐ ܥܠܝܟܝ ܡܣܼܬܦܩ.
                    ܘܣܥܼܪܟܝ ܬܓܼܙܝܼܢ ܗ̄ ܚܘܼܝܗܿ ܓܝܪ ܠܝܩܝܼܪܘܼ̄ܗ ܕܟܿܣܐ ܒܗܿܠܝܢ ܕܗܿܫܐ ܐܝܬܝܼ ܕܒܕܡܘܼܬܐ
                    ܕܢܫܼ̈ܐ ܐܝܿܠܝܢ ܕܡܼܢ ܥܩ̈ܬܐ ܓܙ̈ܢ ܣܥܪ̈ܝܗܝܢ ܘܡܩ̈ܛܥܢ ܬܕܝ̈ܝܗܢ ܘܒܗܿܕܐ ܡܘܕ̈ܥܢ ܕܦܣܝܼܩ ܗܼܘ
                    ܣܥܪܗܝܢ ܡܼܢ ܡܘܠܕܢܘܼܬܐ ܘܡܼܢ ܚ̈ܝܐ ܗܿܟܢܐ ܐܦ ܡܼܢ ܒܝܼܫ̈ܬܗܘܿܢ ܕܝܘ̈ܕܝܐ ܐܝܼܬܝܗܝܢ ܗܼܘ̈ܝ
                    ܕܦܣܼܩ ܣܼܒܪܐ ܘܕܠܐ ܒܘܼܝܐܐ. ܕܘܢܿ ܠܐܗܠܐ ܘܠܐܗܠܝܼܒܐ ܗ̄ ܘܗܿܕܐ ܕܝܼܢܐ ܗܘܬ݀ ܐܗܠܐ ܐܠܐ ܒܿܥܐ
                    ܕܢܚܼܘܐ ܕܫܿܡܪܝܼܢ ܟܐܢܐܝܼܬ ܚܪܒܬ܇ ܘܐܘܿܪܫܠܡ ܬܘܼܒ ܟܐܢܐܝܼܬ ܡܬܼܚܪܒܐ. ܕܝܼܢܐ ܕܝܢ
                    ܠܡܟܼܣܢܘܼܬܐ ܩܿܪܐ ܡܛ݀ܠ ܕܗ݀ܘ ܕܡܼܟܣ ܒܕܝܼܢܐ ܥܿܐܠ ܥܡ ܗ݀ܘ ܕܡܬܢܩܛܪܓ܀ ܘܟܕ ܢܟܼܣ̈ܝ ܗܼܘ̈ܝ܆
                    ܘܛܘܼܫܝܗܝ ܡܿܘܕܥ ܬܢܝܢ ܡܚܘܝܢܐܝܼܬ ܥܠ ܥܫܝܼܢܘܼܬܗܿ ܕܡܪܚܘܼܬܗܘܿܢ ܕܢܐܡܼܪ ܕܐܦ ܠܐ ܡܼܢ
                    ܩܪܝܼܒܘܼܬܐ ܕܝܪܠܝ ܕܒܓܘ ܒܝܬܝ ܒܗܼܬܘܘܐܬܟܼܚܕܘ ܡܼܢ ܛܢܼܦ̈ܘܬܐ ܕܥܿܒܕܝܼܢ. ܐܠܐ ܐܝܟ ܙܟ̈ܝܐ
                    ܘܡܝܬܪ̈ܐ ܠܒܝܬܝ ܒܓܠܝܘܼܬ ܐܦ̈ܐ ܥ̈ܐܠܢ ܗܼ̈ܘܝ ܠܡܬܼܚܙܝܘ ܩܕܡܝ ܒܒܼܗܬܬܐ ܘܒܿܬܪ ܕܐܟܣܼ ܐܢܘܿܢ
                    ܒܣܓ̈ܝܐܬܐ ܐܡܿܪ. ܐܦ ܓܒܪ̈ܐ ܕܐܬܼܘ ܡܼܢ ܫܒܼܝܐ ܘܡܼܢ ܡܕܒܪܐ ܗ̄ ܕܐܪܥܐ ܕܬܝܡܢܐ ܕܐܝܼܬܘܗܝ
                    ܦܬܟܪ̈ܐ. ܐܪܡܝܼܘ ܫܐܕ̈ܐ ܒܐܝܼܕ̈ܝܗܘܢܿ ܗ̄ ܥܠ ܐܝܼܩܪ̈ܐ ܘܕܫ̈ܢܐ ܕܡܫܬܕܪܝܢ ܗܼܘܘ ܠܗܘܿܢ ܡܼܢ
                    ܡ̈ܠܟܐ ܕܥܡ̈ܡܐ ܕܐܦ ܕܐܬܢܩܼܦܘ ܒܛܥܝܘܼܬܗܘܿܢ. ܘܡܐܿܪܬ ܗ̄ ܐܢܼܐ ܢܒܝܐ. 
            
            
                 ܕܒܗܿܠܝܢ ܓܼܪܘ ܘܥܿܐܠܝܼܢ ܗܼܘܘ ܠܘܿܬܗܘܿܢ ܫܐܕ̈ܐ ܒܝܕ ܚ̈ܠܡܼܐ ܘܚܼ̈ܙܘܐ
                    ܕܓ̈ܠܐ ܐܝܟ ܕܥܿܐܠܝܼܢ ܓܒܪ̈ܐ ܙܕܝܼ̈ܩܐ ܒܦܚܼܡܐ ܕܝܘܼ̈ܕܝܐ ܘܐܝܟ ܦܘܼܩܕܢܐ ܕܐܠܗܐ ܐܫܬܼܒܩܘ
                    ܕܢܕܘܿܢܘܿܢ ܠܥܡܐ. ܬܘܼܒ ܓܒܪ̈ܐ ܙܕܝܼ̈ܩܐ ܢܒ̈ܝܐܕܐܟܣܼܘ ܒܢܒܝܘܼܬܗ ܘܕܢܼܘ ܠܥܡܐ ܕܟܕ ܚܕ ܥܡܐ
                    ܐܝܼܬܝܗܘܿܢ ܗܼܘܘ ܒܿܬܪܟܢ ܐܬܦܼܠܓܘ ܠܬܪܝܢ ܚܕ ܫܩܼܝܐ ܚܿܫܒ ܠܗܘܿܢ. ܗ݀ܘ ܕܫܪܝܼ ܒܐܬܪ̈ܘܬܐ
                    ܒܥܣܼܪܐ ܫܒ̈ܛܝܼܢ ܘܫܠܼܡ ܒܒܒ̈ܠܝܐ ܒܬܪܝܢ ܫܒ̈ܛܝܼܢ܆ ܨ. ܕܟܕ̄ ܟܬܘܿܒ ܠܟ ܫܡܗ ܗ̄ ܦ݀ܩܕ ܠܗ
                    ܕܢܟܼܬܘܿܒ ܘܢܼܪܫܘܿܡ ܫܡܗ ܕܝܘܡܐ ܗܿܢ ܕܣܿܡܟ ܡܠܟܐ ܕܒܿܒܝܠ ܠܐܘܿܪܫܠܡ. ܒܗ ܒܝܘܡܐ ܗܿܢܐ ܟܕ
                    ܫܢܬ݀ ܬܫܥ ܕܡܠܟܘܼܬܗ ܕܨܕܩܝܐ ܒܥܣܪܐ ܒܝܪܚ ܫܒܛ ܣܡܼܟ ܘܫܼܪܐ ܢܒܘܼܟܕܢܨܪ ܥܠ ܐܘܿܪܫܠܡ ܘܟܬܼܪ ܟܕ
                    ܐܿܠܨ ܠܗܿ ܥܕܡܐ ܠܫܢܬ݀ ܚܕܥܣܪܐ ܕܝܼܠܗ ܕܨܕܩܝܐ. ܬܦܝܼ ܩܕܣܐ ܗ̄ ܩܕܣܐ ܠܡܕܝܼܢܬܐ ܩܿܪܐ. ܡ̈ܝܐ
                    ܠܥܩ̈ܬܐ ܕܒܗܝܢ ܢܦܠ ܗܼܘܐ ܥܡܐ ܘܡܫܼܬܩܠܝܼܢ ܒܩܪܒܐ. ܢܩܼܣ̈ܐ ܐܘܟܝܼܬ ܩܼܛ̈ܥܐ ܡܫܿܡܗ ܠܐܝܿܠܝܢ
                    ܕܒܥܩ̈ܬܐ ܕܩܪ̈ܒܐ ܡܬܼܒܫܠܝܼܢ ܗܼܘܘ ܐܝܟ ܕܒܩܕܪܐ ܛܒ̈ܐ ܫܡ̈ܝܼܢܐ ܫܡܼܗ ܠܢܩܼܗܣܼܐ ܐܝܟ ܕܢܒܕܩ ܥܠ
                    ܪܘܪ̈ܒܢܐ ܘܡܠ̈ܟܐ ܕܝܼܠܗ ܕܥܡܐ. ܟܬܦܐ ܕܫܡܝܼܛ ܗ̄ ܟܬܦܐ ܩܿܪܐ ܠܡܫܼܡ̈ܗܐ ܕܒܗܘܿܢ ܗܿܢܘܿܢ
                    ܕܝܬܝܼܪ ܡܼܢ ܫܪܟܐ ܡܨܡ̈ܚܝ ܚܝܠܐ ܣܒܝܼܪܝܼܢ ܗܼܘܘ. ܕܐܝܟ ܗܿܟܢܐ ܐܝܼܬܝܗ ܿܟܬܦܐ ܘܬܘܼܩܢܗܿ.
                    ܓܒ̈ܝܐ ܕܥ̈ܢܐ ܗ̄ ܥ̈ܢܐ ܠܟܿܠܗ ܥܡܐ ܩܿܪܐ. ܘܓܪ̈ܡܐ ܬܚܝܬ ܗ̄ ܡܘܕܥ ܒܝܕ ܗܿܐ ܕܟܿܠܗܘܿܢ ܕܒܐܝܿܢܐ
                    ܕܗܘܼ ܬܓܡܼܐ ܕܚܝ̄ܠܬܢܘܼ ܕܩ݀ܝܡܝܼܢ ܗܼܘܘ ܒܗ ܒܓܘܗܿ ܕܡܕܝܼܢܬ ܩܿܛܠܐ ܣ݀ܝܦܝܼܢ ܗܼܘܘ. ܗܕܡ ܗܕܡ
                    ܗ̄ ܡܿܘܕܥ ܥܠ ܚܪܒܐ ܐܝܿܕܐ ܕܠܗܘܿܢ ܐܝܟ ܗܕܡܐ ܕܝܼܠܗܿ ܕܡܕܝܼܢܬܐ ܩ݀ܛܠܐܗܼܘܬ݀ ܘܡܚܒܠܐ. ܘܦܣܼܐ
                    ܠܐ ܢܦܼܠ ܗ̄ ܒܗ݀ܝ ܕܦܣܼܐ ܡܿܘܕܥ ܥܠ ܚܪܒܐ ܓܡܝܼܪܐ ܕܟܿܠܗܘܿܢ ܘܕܠܐ ܐܫܼܬܚܪ ܒܗܘܿܢ ܐܢܫ ܕܠܐ
                    ܝܼܩܕ ܒܢܘܼܪܐ ܕܩܪܒܐ܀ ܡܛ݀ܠ ܕܕܡܗܿ ܒܓܘܗܿ. ܥ̄ܠܘ ܥܦܪܐ ܗ̄ ܐܡܿܪ ܕܓܠܝܐܝܼܬ ܦ݀ܠܚܝܼܢ ܗܼܘܘ
                    ܒܝܼܫܬܐ ܟܕ ܠܐ ܡܼܣܬܕܪܝܢ ܗܼܘܘ ܡܼܢ ܕܝܢܼܐ ܐܠܗܿܝܐ ܘܠܘ ܒܛܘܼܫܢܐ ܣܿܥܪܝܼܢ ܗܼܘܘ ܥܘܠܐܐܝܟ
                    ܐܝܿܢܐ ܕܡܐ ܕܩ݀ܛܠ ܠܚܒܪܗ ܡܟܿܣܐ ܠܕܡܗ ܒܥܦܪܐ ܕܠܐ ܢܬܼܚܙܐ ܠܐܚܪ̈ܢܐ. ܗܼܢܘܢܿ ܕܝܢ ܝܟ ܡܕܡ
                    ܕܣܝܼܡ ܥܠ ܟܐܦܐ ܪܡܬܐ ܗ݀ܟܢܐ ܓܿܠܐܼ ܘܝܼܕܝܼܥ ܪܘܼܫܥܗܘܿܢ ܠܥܝܼܢ ܟܿܠ. ܘܗܿܕܐ ܐܝܿܟܢܐ ܕܬܣܼܩܝ.
                    ܚܡܼܬܗ ܕܐܠܗܐ ܥܠܝܗܿ ܘܢܦܪܼܥܝܼܗܿ ܟܐܢܐܝܼܬ. ܝܗܿܒܬ ܕܡܗܿ ܥܠ ܟܐܦܐ ܫܥܝܼܥܬܐ ܗ̄ ܬܒܥܼܬܐ ܠܡ
                    ܓܠܝܼܬܐ ܐܦ ܐܢܿܐ ܐܠܗܐ ܡܿܝܬܐ ܐܢܼܐ ܥܠܝܗܿ ܕܠܚܡܐ ܠܥܘܠܐ ܓܠܝܐ ܕܣܥܼܪܬ݀. ܟܐܦܐ ܫܥܝܼܥܬܐ ܩܿܪܐ
                    ܠܗܿܝ ܕܠܐ ܡܿܨܐ ܠܕܡܐ ܐܠܐ ܡܟܼܬܪ ܥܠܝܗܿ ܢܘܓܪܐ܆ ܐܘܿ ܡܕܝܼܢܬܐ ܕܕܡܐ܆ ܘܓܪ̈ܡܝ ܩܘܛܘܿܠܬܐ
                    ܘܐܫܕܬ݀ ܕܡܐ ܕܒܢܝܢ̈ܫܐ. ܐܢܿܐ ܐ݀ܥܒܕ ܡܢܼܟܝ ܕܝܢܼܐ ܘܬܒܥܼܬܐܕܙܕܿܩܐ ܠܡܪܚܘܼܬܟܝ ܟܕ ܡܿܘܪܒ
                    ܐܢܼܐ ܘܡܿܪܘܚ ܐܢܼܐ ܕܘܼܟܬܐ ܠܝܩܕܢܟܝ. ܘܗܿܟܢܐ 
            
            
                 ܐܣܿܓܝܗܿ ܠܢܘܼܪܐ ܗܿܝ ܕܚܿܪܒܐ ܕܡܝܬܐ ܐܢܼܐ ܥܠܝܟܘܿܢ ܥܕܡܐ ܕܠܟܿܠܟܘܢܿ
                    ܬܓܡܼܪܝ ܒܓܘܗܿ ܕܡܕܝܢܬܐ܆ ܐܢܫ̈ܝܼܢ ܠܡܣܟ̈ܢܐ ܡܦܿܫܩܼܝܢ ܓܪ̈ܡܐ. ܘܐܩܿܝܼܡܝܼܘܗ ܪܬܚܐ ܥܠ
                    ܓܘܼܡܪ̈ܐ ܐܡܿܪ ܕܠܘ ܒܠܚܘܼܕ ܠܟܘܿܢ ܐܟܿܠܐ ܘܡܦܿܪܫܐ ܢܘܼܪܐ ܕܫܒܼܝܐ ܐܠܐ ܐܦ ܠܡܕܝܼܢܬܟܘܢܿ
                    ܡܛܿܠܩܐ. ܢܚܫܐ ܘܩܕܣܐ ܠܡܕܝܢܼܬܐ ܡܫܿܡܗ ܘܐܟܙܢܐ ܕܩܕܣܐ ܕܢܚܫܐ ܕܡܬܼܬܣܝܼܡ ܥܠ ܢܘܼܪܐ
                    ܡܼܬܛܠܩܝܼܢ ܡܘ̈ܗܝ ܘܒܿܬܪܟܢ ܚܿܐܡ ܘܡܫܼܬܪܐ ܪܘܼܟܒܗ ܗܿܟܢܐܐܦ ܐܘܪܫܠܡ ܡܼܢ ܒܝܼܫ̈ܬܐ ܕܣܿܒܠܐ
                    ܡܼܢ ܒܒܠ̈ܝܐ ܥܡ ܥܡܘܪ̈ܝܗܿ ܐܝܟ ܕܒܢܘܼܪܐ ܝܿܩܕܐ܆ ܘܢܫܠܼܡ ܦܘܼܪܥܢܗܿ܆ ܢܗܼܘܐ ܦܘܼܪܥܢܗܿ ܗ̄
                    ܕܗܿܟܢܐ ܡܬܼܡܣܝܐ ܗܝܼ ܡܕܝܼܢܬܐ ܘܝܬܒ̈ܝܗܿ ܒܥܩ̈ܬܐ ܘܒܢܘܼܪܐ ܗܿܕܐ ܕܟܝܿܢܐ ܘܡܫܼܬܪܝܐ ܡܼܢ
                    ܪܘܼܟܒܗܿ ܘܨܒܬܼܗܿ ܘܡܬܼܚܒܠܐ ܠܓܡܪ ܒܕܒܡܘܼܬܐ ܕܬܐܢ̈ܐ ܟܪ̈ܝܼܗܬܐ ܘܗܿܠܝܢ ܗܘ̈ܝܢ ܨܝܕܝܟܝ ܥܠ
                    ܕܐܬܼܛܢܦܬܝ ܒܙܢܝܘܼܬܐ ܘܥܠ ܕܕܟܝܼܬܝ ܘܠܐ ܐܬܕܟܝܼܬܝ.. ܬܘܼܒ ܠܐ ܬܬܕܟܝ ܗ̄ ܐܡܿܪ ܥܠ ܗܿܢܐ
                    ܐܬܼܛܢܦܬܘܢܿ ܒܙܢܝܘܼܬܐ ܘܒܓܘܪܐ ܘܟܕ ܣܿܓܝܼ ܝܨܦܿܬ ܕܬܼܬܕܟܘܢܿ ܘܬܬܫܝܼܓܘܼܢ ܡܼܢ ܛܡܐܘܼܬܟܘܢܿ
                    ܘܠܐ ܐܬܬܼܦܝܼܣܬܘܢܿ ܠܡܼܠ̈ܝ ܠܡܬܼܕܟܝܘܼ ܬܘܼܒ ܠܐ ܝܿܨܦ ܐܢܼܐ ܕܬܕܟܝܼܬܬܟܘܢܿ ܐܦ ܕܦܘܼܢܝܟܘܢܿ
                    ܡܼܢ ܒܝܼܫ̈ܬܐ ܠܛܒ̈ܬܐ ܘܠܐ ܫܒܩ ܐܢܼܐ ܠܟܘܢܿ ܒܐܝܼܕܐ ܕܫܒ̈ܝܐ ܕܐܬܿܝܢ ܥܠܝܟܘܢܿ. ܐܚܪ̈ܢܐ ܗܿܝ
                    ܕܕܟܝܼܬܝ܆ ܥܠ ܕܘܼܟܝܐ ܕܡܼܢ ܛܒ̈ܬܐ ܐܡܿܪ ܥܠ ܕܕܟܝܼܬܝ ܠܡ ܡܼܢ ܟ݀ܠܗܝܢ ܛܒ̈ܬܐ ܘܡܼܢ ܥܘ̈ܠܝܟܝ
                    ܠܐ ܨܒܝܼܬܝ ܠܡܼܬܕܟܝܘܼ. ܡܟܝܼܠ ܠܐ ܬܬܕܟܝܢ ܢ݀ܣܒ ܐܢܼܐ ܡܢܼܟܝ ܪܓܼܬܐ ܗ̄ ܪܓܼܬܐ ܕܥ̈ܝܢ̈ܘ ܩ݀ܪܐ
                    ܠܐܢܬܬܗ. ܠܘ ܓܝܪ ܒܡܣܡ ܒܪܝܫܐ ܡܝܼܬܬ݀ ܐܠܐ ܒܟܘܼܪܗܢܐ ܕܟܝܿܢܐ. ܐܠܗܐ ܕܝܢ ܕܡܦܣ ܗܼܘܐ ܓܠܼܐ ܠܗ
                    ܠܢܒܝܐ. ܘܦܩܼܕܗ ܕܠܐ ܢܬܼܬܥܝܼܩ ܥܠܝܗܿ ܕܒܝܕ ܗܿܕܐ ܢ݀ܨܘܪ ܛܘܼܦܣܐ ܠܗܿܢܘܢܿ ܕܒܐܘܿܪܫܠܡ ܕܟܕ
                    ܚܿܙܝܢ ܡܿܘܬܐ ܕܒܢ̈ܝܗܘܿܢ ܘܕܢܫ̈ܝܗܘܿܢ ܡܕܡ ܡܼܢ ܕܥܝܕܿܐ ܠܐ ܡܫܼܟܚܝܼܢ ܠܡܫܼܡܠܝܘܼ ܠܘܿܬܗܘܿܢ
                    ܡܼܢ ܐܢܢܩܐ ܕܫܒܼܝܐ ܕܡܕܪܟ ܠܗܘܿܢ ܕܪܓܼܬܐ ܕܥܝ̈ܢܐ ܩ݀ܪܐ ܠܐܢܬܬܐ ܡܛ݀ܠ ܕܝܬܝܼܪ ܡܼܢ ܟ݀ܠܗܝܢ
                    ܪ̈ܓܝܓܬܐ ܝܩܝܼܪܐ ܘܪܚܝܼܩܡܐ ܐܢܬܬܐ ܥܠ ܓܒܪܐ. ܕܬܫܬܼܢܩ ܒܕܡܐ ܗ̄ ܡܠܦ ܕܫܘܼܢܩܐ ܗܿܘ ܪܒܐ
                    ܕܢܙܼܢܐ ܐܢܫ ܠܚ̈ܫܐ ܕܟܝ̈ܢܐ ܒܙܒܼܢܐ ܕܬܒܿܥܝܼܢ ܫܘܼܡܠܝܐ. ܗ݀ܝ ܕܒܕܡܐ ܗ̄ ܟܕ ܡܫܬܼܢܩܐ ܥܩܼܬܐ
                    ܒܓܘܟ ܘܛܡܝܼܪ̈ܢ ܕܡ̈ܥܼܝܟ ܒܦܓܪܟ ܘܠܐ ܡܬܼܚ̈ܙܝܢ ܠܒܪ ܡܼܢܟ. ܐܝܟ ܕܨܡܝܼܕ ܕܡܐ ܕܡ̈ܝܼܬܐ ܘܠܐ
                    ܡܬܼܚܙܐ ܠܒܪ ܡܼܢ ܫܠܕܐ ܡ̈ܐܢܝܟ ܗ̄ ܟܬܼܪ ܒܗܘܿܢ ܘܠܐ ܬܠܒܼܫ ܡܗܐܢܐ ܨ̈ܐܐ. ܡܥܿܕܝܢ ܗܼܘܘ
                    ܕܒܐܒܼܠܐ ܢܠܒܼܫܘܢܿ ܡ̈ܐܢܐ ܨ̈ܐܐ. ܡܥܿܕܝܢ ܗܼܘܘ ܕܒܐܒܼܠܐ ܢܠܒܼܫܘܿܢ ܡ̈ܐܢܐ ܐܘܼܟ̈ܡܐ
                    ܘܡܗܿܠܟܝܼܢ ܝܼܝܼܦܝܼܝܼ ܘܡܿܟܣܝܢ ܪܝܼܫܗܘܿܢ ܘܡܬܼܥܛܦܝܼܢ ܥܠ ܣܦܼܘ̈ܬܗܘܿܢ. ܠܚܡܐ ܕܒܢܝ̈ܢܫܐ ܗ̄
                    ܕܐܦ ܠܐ ܗܿܘ ܡܐ ܕܗܿܘܐ ܒܐܒܼܠܐ ܬܩܒܼܠ ܡܼܢ ܐܢܫ܆ ܘܐܡܿܪܬ ܒܨܿܦܪܐ ܗ̄ ܓܠܝܢܐ ܕܩܒܿܠܬ ܡܼܢ
                    ܐܢܬܬܝܿ ܘܡܝܼܬܬ݀ ܗܼܝ ܒܪܡܫܐ. ܘܡܼܢ ܕܐܫܿܬܠ ܡܼܢ ܥܡܐ ܕܠܡܿܢܐ ܠܐ ܥܿܒܕ ܗܿܠܝܢ ܕܥܝܕ̈ܐ ܐܡܼܪ
                    ܠܗܘܿܢ. ܗܿܐ ܡܛܘܫ ܐܢܫܐ ܘܡܚܼܒܠ ܐܢܼܐ 
            
            
                 ܠܗܝܟܠܝ ܒܝܕ ܒܒܠ̈ܝܐ ܕܗܘܼܘܝܘܼ ܕܝܩܝܼܪ ܘܫܒܝܼܚܐ ܡܢ ܟܿܠ ܕܠܘܿܬܗܘܿܢ ܐܝܟ
                    ܐܢܬܬܐ ܕܪܚܝܼܡܐ ܥܠ ܒܥܠܗܿ ܘܡܢܼܗ ܕܗܝܟܠܐ ܣܿܒܪܝܼܢ ܐܢܬܘܿܢ ܕܪܕܐ ܠܟܘܿܢ ܚܘܼܣܝܐ ܕܚܛ̈ܗܐ
                    ܘܥܘܼܫܢܐ ܕܚܝܠܐ ܠܘܼܩܒܠ ܒܥ̈ܠܕܒܒܐ. ܒܝܘܡܐ ܕܢܿܣܒ ܐܢܼܐ ܡܢܼܗܘܿܢ ܗ̄ ܘܡܛ݀ܠ ܕܡܡܿܝܩܝܢ ܗܼܘܘ
                    ܥܡܐ ܒܢܒܝܐ ܕܐܝܟ ܗ݀ܘ ܕܠܐ ܗܼܘܐ ܡܕܡ ܕܡܡܿܠܠ ܘܣܿܥܪ ܡܠܿܒܒ ܐܠܗܐ ܠܢܒܝܐ ܘܐܡܿܪ ܕܒܝܘܡܐ
                    ܕܡܬܼܥܩܪ ܗܝܟܠܐ ܘܡܣܼܬܚܦܝܼܢ ܝܘܼܕ̈ܝܐ ܢܐܼܬܐ ܠܘܿܬܟ ܡܬܼܦܨܝܢܐ ܒܗ ܒܝܘܡܐ. ܘܢܫܡܼ݁ܟ ܒܐܕ̈ܢܝܟ
                    ܐܝܿܟܢܐ ܕܝܬܝܼܪ ܬܬܠܼܒܒ ܘܬܬܬܼܟܠ ܒܝܕ ܡܣܒܪܢܐ ܕܡܿܣܒܪ ܠܟ ܥܠ ܚܘܼܪܒܐ ܕܡܕܝܼܢܬܐ ܘܫܒܼܝܐ
                    ܕܥܡܐ. ܐܟܡܿܢ ܕܢܒܝܘܼܬܟ ܠܐ ܐܬܕܓܠܬ݀ ܘܟܕ ܡܢܼܗܘܿܢ ܕܣܘܼܥܪ̈ܢܐ ܬܣܼܒ ܓܠܝܘܼܬ ܐܦ̈ܐ ܬܡܠܼܠ
                    ܠܒܝܼܒܐܝܼܬ ܘܠܐ ܬܕܚܼܠ ܡܢܼܗܘܿܢ. ܘܬܘܼܒ ܠܐ ܬܚܼܪܫ. ܐܠܐ ܕܡܼܢ ܗ݀ܘ ܝܘܡܐ ܕܗܿܠܝܢ ܒܣܘܼܥܪ̈ܢܐ
                    ܡܬܼܚ̈ܙܝܢ. ܒܦܪܗܣܝܐ ܟܿܠܡܕܡ ܥܿܒܕ ܐܢܬ. ܐܢ ܐܬܘ̈ܬܐ ܕܪܫܿܡ ܐܢܬ ܒܩܢܘܿܡܟ. ܘܐܢ ܡ̈ܠܼܐ
                    ܕܢܒܝܘܼܬܐ ܕܥܠܝܗܘܿܢ ܒܬܘܼܟܠܢܐ ܡܡܿܠܠ ܐܢܬ ܕܠܐ ܕܚܠܼܬܐ ܕܡܢܼܗܘܿܢ. ܡܫܿܪܐ ܕܝܢ ܐܝܟ ܥܝܿܕܐ
                    ܕܢܒܝܐ ܕܢܬܼܢܒܐ ܥܠ ܥܡ̈ܡܼܐ ܐܚܪ̈ܢܐ ܕܣܢܼܘ ܠܥܡܐ܀ ܨ̄܆ ܕܟ̄ܗ ܘܩܕܡܐܝܼܬ ܡܬܼܢܒܐ ܥܠ ܥܡܘܼ̈ܢܝܐ
                    ܕܡܫܼܬܒܝܢ ܡܼܢ ܒܒܠ̈ܝܐ ܥܠ ܣܢܼܐܬܗܘܿܢ ܕܠܘܿܬ ܥܡܐ. ܘܢܐܼܠܦܘܿܢ ܬܘܼܒ ܝܘܼܕ̈ܝܐ ܕܡܛ݀ܠ
                    ܚܛܗ̈ܝܗܘܿܢ ܐܫܼܬܒܝܼܘ. ܘܠܘ ܡܼܢ ܣܢܼܐܬܐ ܕܐܠܗܐ ܕܠܘܿܬܗܘܿܢ. ܥܠ ܕܐܡܼܪܬܘܿܢ ܐܚܼܢ ܥܠ ܡܩܕܫܝ
                    ܗ̄ ܥܠ ܐܦ̈ܝ ܠܡ ܕܒܕܘܼܟܬ݀ ܚܕܘܼܬܐ ܘܒܘܼܝܐܐ ܐܬܚ̈ܫܼܒܝ ܠܟܘܿܢ ܥܩ̈ܬܐ ܕܥܡܐ ܕܝܠܝ ܘܐܦܠܐ
                    ܚܫܼܬܘܿܢ ܥܠ ܗܝܠܟܐ ܕܝܼܩܕ ܘܐܬܼܛܘܫ ܡܼܢ ܫܒ̈ܝܐ. ܡܛ݀ܠܗܿܕܐ ܗܿܐ ܝܿܗܒ ܐܢܼܐ ܠܟܘܿܢ ܠܒܢ̈ܝ
                    ܡܕܢܚܐ ܕܐܝܼܬܝܗܘܿܢ ܒܒܠ̈ܝܐ ܠܝܘܼܬܪܢܐ. ܐܚܼܢ ܗܿܪܟܐ ܥܠ ܚܕܘܼܬܐ ܪܡܿܙ. ܥܠ ܕܐܡܼܪ ܡܘܼܐܒ ܗ̄
                    ܡܬܼܢܒܐ ܥܠ ܡܘܼ̈ܐܒܝܐ ܠܝܬܒ̈ܝ ܣܿܥܝܼܪ ܟܕ ܡܣܿܒܪܝܼܢ ܠܚܕ̈ܕܐ ܚܕܘܼܬܐ ܕܗܘܼܬ݀ ܠܗܘܿܢ ܒܫܼܒܝܐ
                    ܕܒܢ̈ܝ ܝܼܗܘܼܕܐ. ܗܿܐ ܬܒܿܥ ܐܢܼܐ ܠܟܘܢܿ ܡܪܝܼܪܐܝܼܬ. ܡܛܿܠ ܕܐܫܼܬܒܗܪܘ ܟܕ ܚܙܼܘ ܠܬܒܿܪܗ
                    ܕܥܡܐ. ܗܿܐ ܡܿܪܬܥ ܐܢܼܐ ܟܬܦܗ ܗ̄ ܫܿܩܠ ܐܢܼܐ ܠܗܿ ܡܼܢ ܥܩܼܪܗܿ ܠܚܝܠܬܢܘܼܬܗ ܕܡܘܼܐܒ ܘܡܿܡܟܟ
                    ܐܢܼܐ ܠܡܕܝܼܢܬܗ ܘܡܚܪܒ ܡܼܢ ܟܿܠܗܘܿܢ ܚܕܪ̈ܝܗܘܿܢ.. ܫܘܼ̄ܒ ܕܐܪܥܐ ܗ̄ ܫܘܼ̄ܒ ܩܿܪܐ ܠܟܗܝܼܢܘܼܬܐ
                    ܘܐܡܿܪ ܕܐܟܚܕܐ ܡܿܚܝܒ ܐܢܼܐ ܠܟܿܠܗ ܫܘܼ̄ܒ ܕܐܪܥܗܘܿܢ ܕܢܩܝܼܦܐ ܒܬܚܘܼ̈ܡܝܗܿ ܒܪ̈ܝܐ ܠܡܕܒܪܐ ܗܿܘ
                    ܕܡܬܼܩܪܐ ܐܫܝܼܡܘܿܢ. ܥܠ ܕܥܼܒܪ ܐܕܘܼܡ ܗ̄ ܡܬܠܚܡ ܬܢܢ ܥܠ ܐܕܘܼ̈ܡܝܐ. ܘܿܐܠܡ ܐܠܡܼܐ ܗ̄ ܠܐ ܠܡ
                    ܣܦܼܩ ܠܗܘܿܢ ܠܐܕܘܼ̈ܡܝܐ ܚܣܿܡܐ ܘܐܟܬܐ ܕܿܩܢܝܢܼ ܗܼܘܘ ܠܘܿܬ ܥܡܐ ܐܠܐ ܐܦ ܗܿܫܐ ܐܝܟ ܒܒ̈ܠܝܐ
                    ܦܪܥܼܘ ܐܢܘܿܢ ܚܘܼܒ̈ܠܐ ܕܒܝܘ̈ܡܝ ܕܘܝܼܕ ܘܫܠܝܡܘܿܢ ܘܚܘܝܼܘ ܦܐܪ̈ܐ ܕܚܣܿܡܗܘܿܢ ܥܬܝܼܩܐ. ܡܪܝܼܡ
                    ܐܢܼܐ ܐܝܼܕܝ ܥܠ ܐܕܘܿܡ ܗ̄ ܗܿܫܐ ܒܝܕ ܒܒܠ̈ܝܐ ܘܠܚܪܬܐ ܒܝܕ ܝܘܼܕ̈ܝܐ ܒܦܘܼܢܝܐ ܡܼܢ ܬܝܡܢ ܗ̄
                    ܡܕܝܼܢܬܐ ܘܥܕܡܐ ܠܕܪܢ ܚܪ̈ܒܢ ܡܕܝܼ̈ܢܢܬܐ ܡܫܼܡ̈ܗܬܐ ܕܩܿܢܝܢܼ ܘܗܘ̈ܝܢ ܣܪ̈ܝܼܩܝ ܡܼܢ
                    ܬܘܼܟܠܢܗܘܿܢ. ܗܿܟܢܐ ܐܡܿܪ ܗ̄ ܡܬܼܢܒܐ ܥܠ 
            
            
                 ܦܠ̈ܫܬܝܐ. ܦܘܼܪܥܢܐ ܗ̄ ܡܼܢ ܝܼܗܘܼܕܐ. ܟܕ ܐܦ ܗܼܢܘܿܢ ܥܡ ܒܒܠ̈ܝܐ ܡܬܼܢܩܡܝܼܢ
                    ܡܢܼܗܘܿܢ ܐܝܟ ܪܓܼܬܗܘܿܢ. ܐܓܪܐ ܕܐܝܿܠܝܢ ܕܡܢܼܩܕܝܼܡ ܣܒܼܠܘ ܡܼܢ ܡ̈ܠܟܐ ܕܝܘܼ̈ܕܝܐ. ܕܢܚܒܼܠܘܢܿ
                    ܪܚܡܘܼܬܐ ܕܐܝܼܬ ܗܼܘܐ ܠܡ̈ܠܟܐ ܕܝܼܠܗܘܿܢ. ܥܡ ܕܝܘܼ̈ܕܝܐ. ܘܠܐ ܒܝܼܫ ܥܡ ܕܘܝܼܕ. ܡܛܿܠܗܿܢܐ ܐܦ
                    ܠܗܘܿܢ ܐܝܟ ܫܪܟܐ ܕܥܡ̈ܡܼܐ ܕܐ݀ܢ ܐܢܼܐ܆ ܘܡܬܼܦܢܐ ܡܼܬܠܚܡ ܥܠ ܨܘܼܪ̈ܝܐ܀ ܨ̄܆ ܕܟܘ̄ ܒܫܢܬ ܗ̄
                    ܫܢܬ݀ ܚܕܥܣܪ̈ܐ ܐܡܿܪܐ ܠܦܘܼܬ ܙܒܢܼܗ ܕܫܒܼܝܐ. ܥܠ ܕܐܡܼܪܬ݀ ܨܘܿܪ ܥܠ ܗ̄ ܗܿܝ ܕܐܡܪܬ݀ ܬܢܢ ܘܐܢ
                    ܒܕܘܼܟ ܐܚܪܝܢ ܠܘ ܥܠ ܡܠܼܬܐ ܐܡܿܪ ܐܠܐ ܥܠ ܛܘܼܝܒܐ ܕܪܥܝܢܐ ܕܚܿܕܝܢ ܗܼܘܘ ܒܒܝܼܫܬܗܿ ܕܐܘܿܪܫܠܡ
                    ܥܠ ܕܡܫܼܡܗܐ ܗܼܘܬ݀ ܘܝܼܕܝܼܥܐ ܡܼܢ ܟ݀ܠܗܝܢ ܡܕ̈ܝܼܢܬܐ. ܐܬܬܼܒܪܘ ܬܪ̈ܥܐ ܗ̄ ܚܿܕܝܢ ܗܼܘܘ ܒܢ̈ܝ
                    ܨܘܿܪ ܒܚܪܒܐ ܕܐܘܿܪܫܠܡ ܘܐܡܿܪܝܼܢ ܗܼܘܘ ܟܿܠܗܘܿܢ ܡܟܝܼܠ ܕܟܿܠܗܘܿܢ ܥܡ̈ܡܼܐ ܕܠܐܘܿܪܫܠܡ
                    ܐܙܿܠܝܼܢ ܗܼܘܘ ܡܛ݀ܠ ܬܓܘܼܪܬܐ ܨܿܝܕܝܢ ܦܿܢܝܢ ܘܐܬܿܝܢ. ܐܣܿܩ ܥܠܝܟܝ ܗ̄ ܥܡ̈ܡܼܐ ܕܡܼܢ ܒܒ̈ܠܝܐ.
                    ܘܐܥܿܒܕܝܗܿ ܡܿܢ ܟ݀ܠܗܝܢ ܫܒܝܼ̈ܚܬܐ ܘܝܩܝܼܪ̈ܬܐ ܕܝܼܠܗܿ ܘܕܥܡܘܿܪ̈ܝܗܿ. ܥܿܒܕ ܐܢܼܐ ܠܗܝܢ ܐܝܟ
                    ܟܐܦܐ ܫܢܝܼܢܬܐ ܗܿܝ ܕܡܢܼܗܿ ܠܓܡܿܪ ܠܐ ܝ݀ܥܐ ܘܠܐ ܢ݀ܦܩ ܘܐܦ ܠܐ ܡܬܼܚܙܐ ܒܗܿ ܬܘܼܒ ܒܢܝܿܢܐ܆
                    ܘܒܝܬ ܡܛܫ̈ܝܼܐ ܗ̄ ܗܿܟܢܐ ܠܡ ܬܗܼܘܐ ܠܗܘܿܢ ܚܪܒܐ ܐܝܿܟܢܐ ܕܨܝ̈ܕܐ ܘܐܝܿܠܝܢ ܕܪܕܝܢ ܒܝܡܐ ܐܝܟ
                    ܕܠܓܙܪܬܐ ܚܪܒܬܐ ܕܚܿܫܚܐ ܠܗܘܿܢ ܠܢܝܿܚܐ ܘܠܦܘܪܓܝܐ ܠܗܿ ܢܪܗܛܘܿܢ ܘܬܡܿܢ ܢܫܚܼܛܘܢܼ
                    ܠܡܨܝܼ̈ܕܬܗܘܿܢ. ܘܒܟ̈ܬܗܿ ܕܒܕܪܐ ܗ̄ ܕܐܝܼܬܝܗܝܢ ܡܕ̈ܝܼܢܬܐ ܕܬܚܝܬ ܫܘܼܠܛܢܗܿ ܒܚܪܒܐ ܢܬܼܩܛ̈ܠܢ.
                    ܡܟܝܼܠ ܡܿܘܕܥ ܪܒܘܼܬܗ ܕܢܒܘܟܕܢܨܪ ܗ݀ܘ ܕܠܗܿ ܘܠܫܪܟܐ ܕܡܕܝܼ̈ܢܬܐ ܫ݀ܒܐ ܘܡܚܪܒ ܘܟܕ ܐܬܿܐ ܥܠ
                    ܨܘܿܪ ܡܿܢܐ ܥܿܒܕ܀ ܘܢܩܝܼܡ ܥܠܝܟܝ ܕܘ̈ܩܐ ܗ̄ ܕܘ̈ܩܐ ܐܡܿܪ ܠܡܛܪܬܐ ܕܩܪ̈ܒܬܢܐ ܐܝܿܠܝܢ ܕܡܩܝܼܡ
                    ܗܼܘܐ ܥܠܝܗܿ ܠܡܩܼܪܒܘܼ ܥܡܗܿ܀ ܘܟܐܦܝ̈ܟܝ ܘܩܝܣ̈ܝܟܝ ܗ̄ ܠܘ ܕܝܢ ܒܥ̈ܠܕܒܒܐ ܫܿܕܝܢ ܗܼܘܘ ܠܗ
                    ܠܥܘܼܬܗ ܒܝܡܐ. ܐܠܐ ܥܠܝܗܿ ܟܒܼܪ ܐܡܿܪ ܕܒܥܠܼܬܗܘܿܢ ܕܒܥ̈ܠܕܒܒܐ ܗܿܘܝܐ ܗܘܬ݀ ܠܗܘܿܢ ܠܨܘܼܪ̈ܝܐ
                    ܟܕ ܥܿܪܩܝܼܢ ܗܼܘܘ ܒ̈ܐܠܦܼܐ ܡܼܢ ܩܕܡ ܒܥܠܕܒ̈ܒܐ ܘܐ̈ܠܦܐ ܕܥܪܩܼܘ ܒܗܝܢ ܛܒܼܥ̈ܝ ܒܝܡܐ. ܘܬܘܼܒ
                    ܠܐ ܬܬܒܼܢܝܢ ܗ̄ ܐܡܿܪ ܕܝܢ ܠܗܿ ܠܗܿܕܐ ܥܠ ܙܒܢܼܐ ܗ݀ܘ ܕܫܥܒܝܼܢ ܫܢ̈ܝܼܢ ܕܒܗ ܚܿܪܒܐ ܘܒܟܿܠܗܝܢ
                    ܕܝܼܠܗܿ ܡܨܒܼܬܐ. ܐܚܪܢܐܝܼܬ. ܕܡܼܢ ܐܝܿܠܝܢ ܕܝܼܠܝܼܕܝܼܢ ܗܼܘܘ ܒܗܿ ܩܕܡ ܫܼܒܝܐ. ܠܐ ܐܢܫ ܦ݀ܢܐ
                    ܘܡܬܬܘܬܒ ܒܓܘܗܿ܆ ܡܐ ܕܥܒܕܬܟܝ ܡܕܝܼܢܬܐ܆ ܡ̈ܝܐ ܣܓ̈ܝܐܐ ܗ̄ ܥܠ ܬܪ̈ܬܝܢ ܡܿܘܕܥ ܬܗܘܼܡܐ ܕܗܿܪܟܐ
                    ܚܕܐ ܥܠܝܗܘܿܢ ܕܚܝܠ̈ܘܬܐ ܕܒܒܠ̈ܝܐ ܗܿܢܘܿܢ ܕܣܿܠܩܝܼܢ ܗܼܘܘ ܥܠܝܗܘܿܢ ܐܝܿܠܝܢ ܕܡܼܢ
                    ܣܿܓܝܐܘܼܬܗܘܿܢ ܐܦ ܬܗܘܿܡܐ ܡܬܼܩܪܝܢ ܗܼܘܘ. ܘܐܚܪܬܐ ܥܠܘܝܗ ܕܝܡܐ ܫܪܝܼܪܐ. ܗܿܘ ܕܡܼܢ ܒܿܬܪ
                    ܚܘܼܪܒܗܿ ܕܡܕܝܼܢܬܐ ܘܡܦܘܼܠܬܐ ܕܫܘܼܪ̈ܝܗܿ ܣܿܠܩ ܗܼܘܐ ܥܠܝܗܿ ܝܡܐ ܘܠܣܘܓܐܗܿ ܒܡ̈ܝܐ ܡܚܿܦܐ
                    ܗܼܘܐ. ܥܡ ܢܚ̈ܬܝ ܓܘܼܒܐ ܗ̄ ܓܘܼܒܐ ܩ݀ܪܐ ܠܐܝܿܠܝܢ ܕܡܼܢ ܫܘܼܪܝܗܿ ܕܥܿܠܡܐ ܘܥܕܡܐ ܠܙܒܼܢܗ
                    ܕܢܒܝܐ ܗܿܢܘܢܿ ܕܒܥܼ̈ܠܬܐ ܐܝܿܠܝܢ ܕܗܼܘ̈ܝ ܡܝܼܬܘ ܘܢܚܼܬ ܠܒܝܬ ܡ̈ܝܼܬܐ. ܘܠܐ ܥܒܼܕܘ [] ܩܕܡܝܟܝ
                    ܗ̄ ܦܠܘܼܬ ܕܠܐ ܡܬܡܢܝܐ ܬܘܼܒ ܥܡ ܗܿܠܝܢ ܕܚܝܝܼܢ ܒܥܿܠܡܐ. ܐܘܿ ܕܠܐ ܬܘܼܒ ܡܩܝܼܡܐ 
            
            
                 ܩܝܿܡܐ ܠܥܡ̈ܡܐ ܘܢܐܬܘܢܼ ܘܢܬܬܼܓܪܘܢ ܨ̄܆ ܕܟܙܙ̄ ܐܠܝܼ ܐܘܼܠܝܼܬܐ ܗ̄ ܚܘܐ
                    ܕܚܫܝܼܫ ܐܢܬܥܠ ܨܘܿܪ ܡܛ݀ܠ ܟܗܝܼܢܘܼܬܗܿ ܘܚܿܕܐ ܐܢܬ ܒܐܒܕܢܗܿ ܡܛ݀ܠ ܥܘܠܗ ܕܒܥܡܐ. ܕܝܿܬܒܐ
                    ܒܡܥܠܢܐ ܕܝܡܐ ܗ̄ ܗܿܕܐ ܐܝܟ ܬܪܥܐ ܠܡ ܕܝܡܐ ܪܒܐ. ܡܼܢ ܡܕܢܚܐ ܕܝܼܠܗܿ ܝܡܐ܆ ܒܗܿܝ ܕܡܼܢ
                    ܟܿܠܗܘܿܢ ܐܝܿܠܝܢ ܕܡܼܢ ܦܢܝ̈ܬܐ ܪ̈ܚܝܼܩܬܐ ܐܝܼܬܝܗܘܿܢ ܐܘܿ ܐܝܿܠܝܢ ܕܩܪ̈ܝܼܒܢ ܠܗܿ ܠܘܿܬܗܿ
                    ܡܨܛܝܒܝܼܢ ܠܬܓܘܪܬܐ. ܬܓܘܪܬܐ ܕܥܡ̈ܡܼܐ ܗ̄ ܕܗܿܠܝܢ ܕܢܐܡܼܪ ܒܐܘܼܠ̈ܝܬܗ. ܐܡܿܪ ܥܪ̈ܩܐ ܘܕ̈ܦܐ ܗ̄
                    ܒܗܿܠܝܢ ܬܢܿܐ ܥܠ ܫܘܼܦܪܐ ܕܟܗܝܼܢܘܼܬܗܿ ܥܪ̈ܩܐ ܕܫܓܼܐ ܐܝܼܬܘܗܝ ܕܡܢܼܗ ܡܬܬܼܩ̈ܢܢ ܐ̈ܠܦܐ
                    ܘܐܪ̈ܙܐ ܡܼܢ ܠܒܼܢܢ ܕܢܥܼܒܕܘܢ ܗ̄ ܡܼܢ ܡܢܿܬܐ ܕܐܝܿܠܝܢ ܕܚܫܼܒ ܥܠ ܬܘܼܩܢܐ ܕܐܠܦܝ̈ܗܘܢ ܡܫܼܬܥܐ
                    ܥܠ ܐܝܿܠܝܢ ܕܠܐܠ̈ܦܼܐ ܡܕܒܪ̈ܢ ܡܼܢ ܠܒܪ ܒܚܕܪ̈ܝܗܝܢ ܒܓܘ ܝܡܐ ܕܠܗܘܿܢ ܩܿܪܐ ܠ̈ܝܼܩܐ ܘܥܕܪ̈ܐ܆
                    ܐܚܪ̈ܢܐ ܥܕܪ̈ܐ ܠܡ ܩܝܣ̈ܐ ܐܢܘܿܢ ܕܡܢܼܗܘܿܢ ܡܫܼܬܪ̈ܝܢ ܐ̈ܠܦܐ ܘܡܬܼܢܛܪ̈ܢ. ܕܫܢܐ ܗ̄ ܕ̈ܦܐ
                    ܕܫܼܢܐ ܕܦܝܼܠܐ. ܐܝܟ ܕܠܬܨܒܝܼܬܐ ܕܐ̈ܠܦܼܐ. ܒܝܬ̈ܝܐ ܗ̄ ܡܩܕܘܼ̈ܢܝܐ ܐܘܟܝܼܬ ܝܘܢ̈ܝܐ. ܕܢܗܼܘܐ
                    ܠܟܝ ܐܬ݀ܐ ܗ̄ ܗܿܠܝܢ ܠܡ ܟ݀ܠܗܝܢ ܐܬ݀ܐ ܗܼܘ̈ܝ ܕܫܘܼܒܚܟܝ ܘܕܝܼܕܝܼܥܘܼܬܟܝ ܕܡܼܢ ܕܫܪܟܐ. ܕܒܪ̈ܝ
                    ܠ̈ܝܼܩܐ ܡܠ̈ܚܐ ܐܢܘܿܢ ܒܕ̈ܩܝ ܒܕ̈ܩܐ ܗ̄ ܐܝܿܠܝܢ ܕܒܿܕܩܝܼܢ ܘܡܚܕܿܬܝܼܢ ܘܡܬܼܩܢܝܼܢ ܐ̈ܠܦܐ
                    ܥܬܝܼ̈ܩܬܐ. ܐܠܣ ܗ̄ ܐܝܼܬܝܗܿ ܗܠܣ܀ ܡܫܝܡ ܡܘܣܝܐ܆ ܝܘܢ ܗ̄ ܝܘܢ̈ܝܐ. ܬܘܒܝܼܠ ܗ̄ ܐܘ̈ܢܝܐ. ܫܠ̈ܛܐ
                    ܗ̄ ܩܛܝܼܪ̈ܩܐ. ܦܬܼܟܐ ܠܢܚ̈ܬܐ ܙܩܝܼܪ̈ܝ ܡܼܢ ܓܘ̈ܢܐ ܡܫܼܚܠ̈ܦܐ ܩܿܪܐ. ܦܬܘܬܼܟܐ ܗ̄ ܕܝܒܐܓ.
                    ܩܝ̈ܣܐ ܘܩܢ̈ܝܐ ܗ̄ ܩܢ̈ܝܐ ܠܗܿܢܘܿܢܕܡܢܼܗܘܿܢ ܗܿܘܝܢ ܪ̈ܘܼܡܝܐ. ܘܩܝܣ̈ܐ ܗܿܢܘܿܢ ܕܥܒܕܝܼܢ
                    ܡܢܼܗܘܿܢ ܢܝܙ̈ܟܐ. ܪܘܼܚܐ ܕܫܘܒܐ ܗ̄ ܐܡܿܪ ܕܝܢ ܠܗܿܝ ܕܟܕ ܐܬܼܘ ܠܘܿܬܗܘܿܢ ܒܒܠ̈ܝܐ ܟܢܼܫܘ
                    ܟܿܠܡܕܡ ܕܩܿܢܝܢܼ ܗܼܘܘ ܘܣܡܼܘ ܒܐ̈ܠܦܼܐ ܘܥܪܩܼܘ ܘܩܡܼܘ ܥܠܝܗܘܿܢ ܡܚܫ̈ܘܼܠܐ ܘܛܒܥܼܘ ܗܼܢܘܿܢ
                    ܘܥܘܼܬܪܗܘܿܢ ܒܝܡܐ ܗ̄ ܦܿܩܕ ܠܗ ܕܢܟܼܣ ܐܦ ܠܡܠܟܐ ܕܨܘܼܪ̈ܝܐ. ܪܒܐ ܠܡܠܟܐ ܕܐܫܼܬܥܠܝܼ ܥܠ ܐܠܗܐ
                    ܘܥܡܗ ܘܚܝܐ ܬܠܬ ܡܐܐ ܫܢ̈ܝܼܢ ܘܐܣܒܼܪ ܕܠܐ ܡܿܐܬ. ܐܚܪ̈ܢܐ ܠܐ ܡܩܒܠܝܼܢ ܠܗܿܐ ܨ: ܕܟܚ̄ ܡܘܬܒܐ
                    ܕܐܠܗܐ ܗ̄ ܡܣܒܪ ܗܼܘܐ ܟܐܡܬ݀ ܕܡܛ݀ܠ ܕܒܡܨܥܬ݀ ܝܡܐ ܡܘܬܒܗ ܠܐ ܦܫܝܼܩ ܕܢܬܼܚܣܢ ܘܡܼܢ ܦܘܼܪ̈ܣܐ
                    ܐܢܫ̈ܝܐ ܡܪܕ. ܕܠܡܐ ܚܟܝܼܡ ܐܢܬ ܒܚܟܼܡܬܟ ܗ̄ ܘܡܢܼܗܿ ܡܼܢ ܚܟܡܼܬܟ ܩܢܼܝܬ ܠܟ ܚܝܠܐ ܘܟܢܫܼܬ ܠܟ
                    ܥܘܼܬܪܐ ܐ݀ܦܢ ܕܝܢ ܗܿܕ ܗܿܝ ܡܣܒܢܘܼܬܟ. ܕܒܣܘܓܐܐ ܕܚܟܼܡܬܟ ܘܕܬܓܘܼܪܬܟ ܐܣܓܝܼܬ ܥܘܼܬܪܟ ܐܠܐ
                    ܒܿܬܪ ܩܠܝܼܠ ܙܒܢܼܐ ܥܬܝܼܕ ܐܢܬ ܕܬܕܥ ܝܿܬܟ ܒܡܣܡ ܒܪܝܼܫܐ ܕܡܿܩܒܠ ܐܢܬ ܕܡܚܝܼܠ ܐܢܬ ܘܫܝܼܛ ܐܢܬ
                    ܡܼܢ ܟܿܠ ܐܢܫ ܘܠܝܬ ܠܟ ܚܟܡܼܬܐ ܐܝܟ ܚܕ ܡܼܢ ܩܕܡ̈ܝܐ ܘܠܐ ܟܣܝ̈ܬܐ ܐܫܼܬܘܝܼܬ ܠܡܚܼܙܐ
                    ܐܟܘܿܬܗܘܿܢ ܘܐܦܿܠܐ ܐܝܟ ܕܢܝܐܝܠ ܕܐܝܼܬܘܗܝ ܒܙܒܼܢܟܐܬܼܒܕܩܝ ܠܟ ܟܣܼܝ̈ܬܐ. ܒܗ݀ܘ ܙܒܢܼܐ ܢܨܿܚܼܝ
                    ܗܼܘܐ ܕܢܝܐܝܠ ܩܕܡ ܒܒܠ̈ܝܐ. ܘܒܐܝܼܕܐ ܕܥܘܼܪ̈ܠܐ ܗ̄ ܠܒܒܠ̈ܝܐ ܩܿܪܐ ܥܘܼܪ̈ܠܐ ܘܟܒܪ ܗܿܢܐ ܡܠܟܐ
                    ܓܙܝܼܪ ܗܼܘܐ ܐܝܟ 
            
            
                 ܕܝܼܠܦ ܡܼܢ ܚܝܼܪܐܡ ܪܚܡܐ ܕܕܘܝܼܕ. ܘܟܕ ܥܪܩܼ ܡܼܢ ܒܒܠ̈ܝܐ ܩܼܡ ܥܠܘܗܝ
                    ܡܚܫܘܼܠܐ ܘܛܒܼܥ. ܘܐܡܿܪ ܕܒܐܝܪܕܐ ܕܒܒܠ̈ܝܐ ܡܿܐܬ. ܡܛ݀ܠ ܕܒܥܠܼܬܗܘܿܢ ܥܼܪܩ ܘܡܝܼܬ.ܐܢܬ ܛܒܥܐ
                    ܐܢܬ ܗ̄ ܡܬܼܦܩܕ ܢܒܝܐ ܕܒܐܘܼܠܝܼܬܐ ܢܬܚܼܫܚ ܨܝܕ ܡܠܟܐ ܟܕ ܬܢܿܐ ܟܗܝܼܢܘܼܗ ܫܘܼ̄ܒܗ. ܐܢܬ ܠܡ
                    ܛܒܥܐ ܐܢܬ ܗ̄ ܡܛ݀ܠ ܗܿܠܝܢ ܟ݀ܠܗܝܢ ܙܕܿܩ ܗܼܘܐ ܠܟ ܠܡܼܕܥ ܕܟܿܠܗܝܢ ܕܝܼܠܟ ܡܼܢ ܨܝܕܝܢ
                    ܐܝܼܬܝܗܝܢ ܒܗ݀ܝ ܕܐܢܬ ܛܒܥܐ ܐܢܬ ܕܕܡܘܼܬܐ ܕܡܿܘܕܥ ܥܠ ܚܟܼܡܬܐ ܕܗ݀ܘ ܕܛܒܼܥܗܿ. ܘܟܠܝܼܠܐ ܕܫ̄ܘܼ
                    ܗ̄ ܐܟܙܼܢܐ ܕܠܡ ܕܫܘܼܦܪܐ ܕܐܝܼܠ̈ܢܝ ܦܪܕܝܣܐ ܥܠ ܒܪܘܿܝ ܡܬܼܩܨܨܝܼܢ ܘܠܘ ܥܠܝܗܘܿܢ. ܗ݀ܟܢܐ ܐܦ
                    ܫܘܼܒܚܟ ܕܝܪܠܟ ܘܕܟܿܠܗܘܿܢ ܡ̈ܠܟܐ ܡܿܢ ܐܝܼܬ̄ܘ. ܥܕܢ ܦܪܕܝܣܐ ܩܿܪܐ ܠܥܿܠܡܐ ܕܐܝܼܬܘܝܗ ܒܪܝܼܬܐ
                    ܒܕܡܘܼܬ ܦܪܕܝܣܐ ܕܐܬܢܼܨܒ ܡܼܢ ܩܕܝܼܡ ܒܥܕܢ. ܟܿܠܗܝܢ ܟܐܦ̈ܐ ܝܩܝܼܪ̈ܬ ܕܡ̈ܝܐ ܘܡܪ̈ܓܢܝܬܐ ܕܒܗܝܢ
                    ܡܦܪܓ ܐܢܬ. ܐܢܿܐ ܒܪܝܬ ܐܢܝܢ ܒܐܪܥܐ ܘܡܢܼܗܝܢ ܒܝܡܐ. ܡܼܢ ܝܘܡܐ ܕܐܬܒܪܝܼܬ ܗ̄ ܗܿܠܝܢ ܠܡ ܛܒ̈ܬܐ
                    ܝܬܝܼܪ ܐܬܬܘ̈ܣܼܦܝ ܠܟ ܡܛܾ݀ ܪܚܡܘܼܬܐ ܕܗܘܬ݀ ܠܟ ܠܘܿܬ ܥܡܝ ܒܙܒܼܢܐ ܕܕܘܝܼܕ. ܟܪܘܼܒܐ ܗ̄
                    ܟܪܘܼܒܐ ܠܕܘܝܼܕ ܩܿܪܐ ܡܛ݀ܠ ܚܝܠܬܢܘܼܬܗ ܕܒܩܪ̈ܒܐ. ܕܡܫܼܝܚ ܕܝܢ ܐܡܿܪ ܒܗܷܿ ܕܒܡܫܼܚܐ ܕܩܘܼܕܫܐ
                    ܡܫܝܼܚܐ ܗܼܘܐ ܠܡܠܟܘܼܬܐ ܘܒܚܝܠܐ ܕܡܫܝܼܚܘܼܬܗ ܘܥܘܼܕܪܢܗ ܕܢܩܝܼܦ ܗܼܘܐ ܠܗ ܡܨܐ ܗܼܘܐ ܕܐܦ
                    ܠܐܚܪܢܐ ܢܼܗܘܐ ܡܥܕܪܢܐ. ܘܐܬܒܪܝܼܬ ܒܣܿܓܝܐܘܼܬ ܙܢ̈ܝܐ ܡܬܼܐܡܪܐ ܡܼܢ ܝܘܡܐ ܠܡ ܕܗܘܼܝܬ ܪܚܡܐ
                    ܠܥܡܝ. ܒܪܝܼܬܐ ܩܿܪܐ ܠܗܘܢܐ ܫܪܝܼܪܬܐ ܘܠܥܡܘܼܪܘܼܬܐ ܠܒܝܬܝܘܼܬܐ. ܘܥܠ ܡܥܕܪܢܘܼܬܐ ܘܥܠ ܚܒܪܘܼܬܐ
                    ܘܫܘܬܦܘܼܬܐ ܘܥܠ ܢܩܝܼܦܘܼܬܐ ܘܐܝܼܩܪܐ ܕܫܘܼܠܛܢܐ ܘܝܗܒܿܬܟ ܒܛܘܼܪܐ ܗ̄ ܐܥܒܿܕܬ ܒܟ ܕܬܗܼܘܐ ܢ݀ܩܦ
                    ܒܪܥܝܢܐ ܠܐܝܿܠܝܢ ܕܥܿܡܪܝܼܢ ܒܛܘܼܐ ܩܕ̄ܝܼ ܕܨܗܝܘܿܢ ܗ݀ܘ ܕܒܗ ܗܝܟܠܐ ܠܐܝܼܩܪܐ ܒܿܢܐܼ. ܘܗܼܘܝܬ
                    ܒܝܢܬ݀ ܟܐܦ̈ܐ ܥܡ ܪܘܪ̈ܒܢܐ ܘܡܝܬܪ̈ܐ. ܐܬܬܘܝܿܬ ܠܟ ܒܚܘܼܒܐ ܥܡ ܒܝܬ̈ܝܝ ܐܝܿܠܝܢ ܕܡܼܢ ܟܐܦ̈ܐ
                    ܕܢܘܼܪܐ ܝܬܝܼܪ ܚܝ̈ܠܬܢܝܼܢ ܗܼܘܘ ܘܕܚܝܼܠܝܼܢ ܥܠ ܟ݀ܠܢܫ ܘܗܿܠܝܢ ܕܐܡܼܪ ܕܝܠܼܢܐܝܼܬ ܥܠ ܚܕ
                    ܦܪܨܘܼܦܐ ܐܟܙܼܢܐ ܕܚܝܼܪܡ ܠܘ ܥ̄ܠܘ ܐܢܝܢ ܐܠܐ ܥܠܘܗܝ ܕܫܘܼܠܛܢܐ ܕܡܠܟܘܼܬܐ ܕܨܘܼܪ̈ܝܐ..܀
                    ܘܗܠܿܟܬ ܕܠܐ ܡܘܼܡ܆ ܥܘܠܐ ܗ̄ ܡܢܼܩܕܝܼܡ ܡܼܢ ܥܢܝܿܢܐ ܘܝܘܼܠܦܢܐ ܕܪܕܐ ܗܼܘܐ ܠܘܿܬܟ ܡܼܢ ܥܡܐ
                    ܕܠܐ ܡܘܿܡ ܘܕܠܐ ܪܫܝܿܢ ܡܕܒܪ ܗܼܘܝܬ ܣܘܼܥܪ̈ܢܝܟ ܡܼܢ ܝܘܡܐ ܕܝܢ ܕܐܫܬܼܚܠܦܬ ܥܠ ܚܘܼܒܗܘܿܢ
                    ܘܐܬܢܟܼܠܬ ܥܠܝܗܘܿܢ ܐܦ ܡܼܢ ܐܠܗܐ ܐܬܥܼܬܕ ܠܟ ܗܿܢܐ ܓܙܪ ܕܝܼܢܐ. ܘܩܛܿܠܬܟ ܗ̄ ܐܦ ܐܢܿܐ ܠܡ
                    ܩܿܛܠ ܐܢܼܐ ܠܟ ܒܕܐܣܟܼܠܬ ܒܥܡܐ ܗܿܘ ܕܥܿܡܪ ܗܼܘܐ ܒܛܘܼܪܐ ܕܐܠܗܐ ܐܝܿܟܢܐ ܕܐܦܿܠܐ ܕܬܚܼܐ
                    ܘܐܦܿܠܐ ܕܬܬܗܼܦܟ ܒܩܕܝܼܫܘܼܬܐ ܕܛܘܼܪ̈ܐ ܕܩܘܼܕܫܝ ܬܫܼܟܚܢܝ܆ ܘܐܘܒܕܟ ܟܪܘܼܒܐ ܗ̄ ܐܡܿܪ ܕܡܛ݀ܠ
                    ܠܡ ܥܡܐ ܕܡܼܢ ܩܕܝܼܡ ܡܡܠܟ ܗܼܘܐ ܥܠܝܗܘܿܢ ܕܘܝܼܕ. ܒܥܓܠ ܗܼܘܐ ܐܒܕܢܟ ܒܕܠܐ ܟܬܪܬ ܒܬܢܘܝ ܕܣܡܼܬ
                    ܥܡ ܕܘܝܼܕ ܘܫܠܝܡܘܿܢ ܙ݀ܕܩ ܕܝܿܕܥ ܕܐܢ 
            
            
                 ܒܦܪܨܘܿܦ ܕܘܝܼܕ ܐܡܿܪ ܢܒܝܐ ܥܠ ܥܡܐ ܗܿܟܢܐ ܐܦ ܒܦܪܨܘܼ ܚܝܼܪܡ ܥܠ ܡ̈ܠܟܐ
                    ܕܒܿܬܪܟܢ ܐܡܿܪ. ܛܢܦܼܬ ܡܩܕܫܟ ܗ̄ ܡܩܕܫܐ ܩܿܪܐ ܠܒܝܬ ܡܠܟܘܼ̄ܗ ܕܚܪܼܒ ܐܘܿ ܠܒܝܬ ܦܬܟܪ̈ܘܗܝ
                    ܕܢܦܼܠ. ܨܝܕܢ ܗ̄ ܡܬܢܒܐ ܥܠ ܨܝܕ̈ܢܝܐ. ܘܐ݀ܫܬܒܚ ܒܟܝ ܗ̄ ܠܥܝܢ ܟܿܠ ܐܢܫ. ܡܐ ܕܥܒܕܿܬ ܒܟܝ.
                    ܕܝܼܢܐ ܟܐܢܐ ܒܝܕ ܒܒܠ̈ܝܐ܀ ܨ܆ ܕܟ̄ܛ ܒܫܢܬ݀ ܥܣܪ ܗ̄ ܡܫܿܢ ܡܠܼܬܗ ܨܝܕ ܡܨܪ̈ܝܐ ܘܡܬܼܠܚܡ ܐܦ
                    ܠܡܠܟܗܿܘܢ ܐܝܟ ܕܙ݀ܕܩ ܥܠ ܕܐܬܟܼܠ ܠܥܡܐ ܕܢܡܼܪܕ ܥܠ ܒܒܠ̈ܝܐ. ܩܕܝܼܡ ܕܝܢ ܗܿܢ ܓܠܝܢܐ ܕܥܠ
                    ܦܪܥܘܢܿ ܠܓܠܝܢܐ ܕܨܘܼܪ̈ܝܐ ܐܟܡܼܐ ܕܡܼܢ ܪܘܼܫܡܐ ܥܠ ܬܪ̈ܝܗܘܿܢ ܡܬܚܼܥܐ. ܬܢܝܼܢܐ ܪܒܐ ܗ̄
                    ܠܦܪܥܘܿܢ ܩܿܪܐ ܬܢܥܼܢܐ ܡܛ݀ܠ ܥܫܝܼܢܘܼܬܗ ܘܡܕܪܡܘܼܬܗ ܢܗܪ̈ܘܬܐ ܠܡܠܟܘܼܬܗ ܩܿܪܐ. ܘܢܘܼ̈ܢܐ
                    ܠܚܝ̈ܠܘܬܗ.. ܐܢܿܐ ܐ݀ܪܡܐ ܒܠܒܡܐ ܗ̄ ܐܢܿܐ ܠܡ ܐܣܿܩܟ ܡܼܢ ܓܘ ܢܗܪܐ ܟܕ ܪܡܐ ܐܢܼܐ ܒܝܿܠܡܐ
                    ܒܦ̈ܟܝܟ ܐܝܟ ܒܠܘܿܥ ܒܢܘܿܢܐ. ܘܦܿܠ̈ܚܐ ܗܿܢܘܿܢ ܕܬܚܘܼܬܟ. ܐܝܟ ܒܕܓܼܦ̈ܐ ܡܣܼܬܬܪܝܼܢ ܗܼܘܘ ܒܟ
                    ܐܦ ܗܼܢܘܢܿ ܡܫܼܬܩܠܝܼܢ ܥܡܟ ܘܡܫܼܬܕܝܢ ܒܐܪ̈ܥܬܐ ܕܒܥ̈ܠܕܒܒܐ. ܡܛ݀ܠ ܕܗܼܘܝܬ ܚܘܼܛܪܐ ܗ̄ ܘܗܿܕܐ
                    ܣܿܒܠ ܐܢܬ ܠܘ ܡܛ݀ܠ ܐܚܪ̈ܢܝܬܐ. ܐܠܐ ܥܠ ܐܦ̈ܝ ܒܝܼܫ̈ܬܐ ܕܣܥܼܪܬ ܒܥܡܼܝ ܗ݀ܘ ܟܕ ܐܛܥܝܼܬ ܒܗ.
                    ܕܢܬܼܬܟܿܠ ܥܠܝܟ ܡܣܼܬܡܟ ܥܠ ܫܘܼܠܛܢܟ ܐܝܟ ܕܥܠ ܚܘܼܛܪܐ ܥܫܝܼܢܐ ܗܼܘܝܬ ܠܗ ܒܕܡܘܼܬ ܩܢܝܐ
                    ܪܥܝܼܥܐ ܕܡܐ ܕܐܫܬܼܡܟ ܥܠܘܗܝ ܐܢܫ ܡܛ݀ܠ ܡܚܝܼܠܘܼܬܗ ܡܬܬܼܒܪ ܘܒܝܕ ܫܦ̈ܝܐ ܘܠ̈ܛܝܐ ܕܢ݀ܦܩܝܼܢ
                    ܡܼܢ ܬܒܪ̈ܘܗܝ. ܡܚܒܠ ܠܐܝܼܕܐ ܕܐܚܘܿܕܗ ܗܿܟܢ ܗܼܘܝܬ ܐܦ ܐܢܬ ܬܘܼܩܠܬܐ ܠܥܡܐ. ܘܒܙܥܼܬܐ
                    ܐܝܼܕ̈ܝܗܘܿܢ ܒܗ݀ܝ ܕܡܛܿܠܬܟ ܝܬܝܼܪ ܐܬܡܪܡܼܘ ܒܒܠ̈ܝܐ ܥܠܝܗܘܿܢ. ܡܼܢ ܡܓܕܠܐ ܕܣܘܼܢܐ ܗ̄ ܡܼܢ
                    ܚܘܼܪܒܐ ܣܿ̃ܝܐܐ ܕܗܿܘܐ ܒܗ. ܣܘܼܢ ܠܣܝܼܢ ܩ݀ܪܐ ܕܐܝܼܬܘܗܝ ܣܗܪܐ ܕܣܿܓܕܝܢ ܗܼܘܘ ܠܗ. ܐܘܿ ܕܫܡ
                    ܐܢܫ ܐܝܼܬܘܗܝ ܕܒܢܼܐ ܡܓܕܠܐ ܐܘܿ ܫܡ ܢܛܘܿܪܐ ܕܡܓܕܠܐ ܣܘܼܢܐ ܗܼܘܐ. ܒܫܢܬ ܥܣܪܝܼܢ ܘܫܒܥ. ܗ̄
                    ܐܢܫ̈ܝܼܢ ܐܡܿܪܝܼܢ ܕܕܓܠ ܗܿܢܐܡܢܝܿܢܐ ܡܛ݀ܠ ܕܒܥܣܪܝܼܢ ܘܚܡܫ ܫܢ̈ܝܼܢ ܐܬܬܚܼܡܬ݀ ܢܒܝܘܼܬܗ. ܘܗ݀ܘ
                    ܕܦܫܼܩ ܠܟܬܒܐ ܛܥܼܐ ܘܟܬܼܒ ܝܬܝܼܪܐ. ܐܚܪ̈ܢܐ ܐܡܿܪܝܼܢ ܕܒܿܬܪ ܙܒܢܼܐ ܕܢܒܝܘܼܬܗ ܚܙܐ ܠܗܿܢܐ
                    ܓܠܝܢܐ ܘܗܿܢܘܿܢ ܕܟܢܫܼܘ ܠܢܒܝܘܼܬܗ ܚܕܘܼܗܝ ܠܗܿܠܝܢ ܕܐܬܐܡܼܪ̈ܝ. ܠܘ ܓܝܪ ܒܚܕܐ ܫܢܿܬܐ ܥܡ
                    ܐܘܿܪܫܠܡ ܠܟܿܠܗܘܿܢ ܫܥܒܼܕ ܒܒܿܠܝܐ. ܐܠܐ ܒܫܘܼܪܝܐ ܠܐܘܿܪܫܠܡ ܘܒܿܬܪ ܠܪܒܬ ܕܒܢ̈ܝ ܥܡܘܿܢ
                    ܘܒܐܝܼܕܐ ܠܫܪܟܐ ܕܥܡܼ̈ܡܐ ܡܛ݀ܠ ܕܒܫܢܬ݀ ܚܕܥܣܪ̈ܐ ܕܫܒܝܼܬܗ ܐܬܥܼܩܪܬ݀ ܐܘܿܪܫܠܡ ܕܐܝܼܬܝܗܿ
                    ܫܢܼܬ݀ ܝܛ̄ ܕܒܒܠ̈ܝܐ ܘܐܪܒܥܝܼܢ ܘܐܪܒܥ ܐܡܼܠܟ. ܘܡܼܢ ܿܗܠܝܢ ܡܬܼܝܕܥܐ ܕܠܘ ܕܓܠܐ ܗܿܘ ܡܢܝܿܢܐ
                    ܕܟܙ̄ܙ܆ ܒܥܣܪܝܼܢ ܘܫܒܥ ܫܢ̈ܝܼܢ ܒܝܪܚܐ ܩܕܡܝܐ ܒܚܕ ܒܗ ܟܕ ܡܼܢ ܟܕܘ ܐܘܿܪܫܠܡ []ܩܝܼܪܐ ܗܘܬ݀
                    ܘܡܨܪܝܢ ܥܕܟܝܠ ܩܝܿܡܐ.. ܐܡܼܪ܆ ܫܥܼܒܕ ܠܟܿܠܗ ܚܝܠܗܿ ܗ̄ ܒܗܿܕܐ ܓܝܪ ܫܥܼܒܕ ܠܚܝܠܗܿ ܒܗܿܝ
                    ܕܝܘܡ̈ܬܐ 
            
            
                 ܝܼܬܒ ܥܠ ܨܘܪ ܘܒܥܡܠܐ ܪܒܐ ܟܒܫܼܗܿ. ܒܟܿܠ ܪܝܼܫ ܗ̄ ܒܟܿܠ ܡܿܐܢ̈ܝ ܩܪܒܐ
                    ܚܝܠܬܢܐܝܼܬ ܐܬܟܼܬܫ ܥܡܗ ܕܢܒܘܼܟܢܕܨܪ ܒܟܬܦܐ ܚܠܝܼܨܬܐ ܕܓܒܪ̈ܐ ܚܝܠ̈ܠܬܢܐ ܕܥܡܗ ܐܝܿܠܝܢ
                    ܕܟܿܠܝܘܿܡ ܡܼܢ ܫܘܼܪܐ ܘܐܦ ܡܼܢ ܡܠܟܐ ܒܿܠܥܝܼܢ ܗܼܘܘ ܘܠܐ ܡܼܙܕܟܝܢ.. ܘܐܓܪܐ ܗ̄ ܨܘܼܪ̈ܝܐ ܣܡܼܘ
                    ܠܥܘܼܬܪܗܘܿܢ ܒܐ̈ܠܦܼܐ ܘܥܪܼܩܘ ܘܛܒܼܥܘ ܒܝܡܐ ܘܒܒܠ̈ܝܐ ܐܣܼܬܪܩܘ ܡܼܢ ܐܪܓܐ ܘܥܘܼܬܪܐ. ܗܿܐ ܝܿܗܒ
                    ܐܢܼܐ ܠܢܒܘܟܕܢܨܪ ܗ̄ ܐܪܥܐ ܕܡܨܪܝܢ ܚܠܦ ܦܥܠܘܼܬܗ ܕܒܨܘܿܪ܆ ܐܕܢܚܼ ܩܪܢܐ ܗ̄ ܕܦܘܼܪܩܢܐ ܠܥܡܐ ܠܡ
                    ܥܡ ܫܒܼܝܐ ܕܡܨܪ̈ܝܐ ܦܢܿܝܢ ܐܡܿܪ. ܐܠܐ ܝܘܡܐ ܚܠܦ ܙܒܢܼܐ ܐܡܿܪ. ܘܐܦܿܚ ܦܘܼܡܟ ܗ̄ ܕܝܼܠܟ ܢܒܝܐ
                    ܐܝܼܬܝܗܘܿܢ ܐܟܡܿܢ ܕܟ݀ܠ ܕܐܬܼܢܒܝܼܬ ܥܠ ܥܡܐ ܘܥܡ̈ܡܼܐ ܢܦܼܩ ܠܥܒܿܕܐ. ܘܠܐ ܐܬܕܓܼܠ ܐܝܟ
                    ܡܣܼܒܪ̄ܢܘܼ ܕܝܘܼܕ̈ܝܐ܀ ܨ܆ ܕܬܠܬܝܢ ܘܬܐܬܐ ܚܪܒܐ ܗ̄ ܥܠ ܡܨܪ̈ܝܐ. ܘܢܗܼܘܐ ܒܘܼܠܗܝܐ ܒܟܘܿܫ
                    ܢܿܦܠܝܼܢ ܓܝܪ ܥܡ ܡܨܪ̈ܝܐ ܟܘܼܫ̈ܝܐ ܘܦܘܼ̈ܛܝܐ ܘܠܘܼܕ̈ܝܐ ܕܡܥܕܪܝܼܢ ܗܼܘܘ ܠܗܘܿܢ. ܥܪܒܝܐ ܘܟܘܒ
                    ܗ̄ ܐܦ ܕܗܿܠܝܢ ܐܬܪ̈ܘܬܐ ܕܩܪܝܼܒܝܼܢ ܐܢܘܿܢ ܠܡܨܪ̈ܝܐ. ܘܒܢ̈ܝ ܐܪܥܐ ܕܩܝܿܡܐ ܗ̄ ܝܘܼ̈ܕܝܐ
                    ܕܐܙܼܠܘ ܐܬܬܘܬܼܘ ܒܚܪܐ ܢܦܼܠܘܢ ܥܡܼܗܘܿܢ ܥܠ ܕܡܼܪܕܘ ܥܠ ܩܝܿܡܐ ܩܕ̄܀ ܘܢܦܼܠܘܢܼ ܣܡܟܗܝܗܿ ܗ̄
                    ܣܡ̈ܟܐ ܠܦܬܟܪ̈ܐ ܩܿܪܐ ܐܘܿ ܠܫܒ̈ܝܗܘܿܢ ܕܬܟܝܼܠܝܼܢ ܗܼܘܘ ܕܡܥܕܪܝܼܢ ܠܗܘܿܢ. ܢܦܼܩܘܢܼ ܡ̈ܠܐܟܐ
                    ܗ̄ ܐܡܾܿܪ ܥܠ ܡܠܐܟ̈ܐ ܡܕܒܪ̈ܢܐ ܕܡܠܟܘܼܬܐ ܕܒܒܠ̈ܝܐ ܡܛ݀ܠ ܕܡ̈ܠܐܟܐ ܦܩܝܼܕܝܼܢ ܥܠ ܡܠܟܘܼܬܐ
                    ܘܒܢܝ̈ܢܫܐ ܐܘܿ ܠܒܒܠ̈ܝܐ ܡܒܿܢܐ ܡ̈ܠܐܟܐ ܐܟܡܿܢ ܕܡܫܿܡܫܝܼܢ ܠܦܘܼܩܕܢܐ ܐܠܗܿܝܐ. ܢܬܕܠܚܼ ܣܝܼܢ
                    ܕܒܗ ܣ݀ܝܡܝܼܢ ܐ̈ܠܗܐ ܡܫܼܬܒܝܐ ܗܝܼ ܘܐܠܗ̈ܝܗܿ. ܣܝܼܢ ܦܬܟܪܐ ܐܘܟܝܼܬ ܣܗܪܐ. ܒܝܕ ܗܿܢܐ ܥܠ
                    ܟܿܠܗܘܿܢ ܦܬܟܪ̈ܐ ܪܡܿܙ. ܡܨܪ̈ܝܐ ܠܣܝܼܢ ܣܿܓܕܝܼܢ ܗܼܘܘ ܘܡܕܒܚܝܼܢ. ܕܪܥܗ ܕܦܪܥܘܢܿ ܗ̄ ܬܒܿܪ
                    ܐܢܼܐ ܠܗ. ܡܠܓܡܐ ܗ̄ ܥܨܿܒܐ ܘܡܠܓܡܐ ܩ݀ܪܐ ܠܥܘܼܕܪܢܐ ܕܡܼܢ ܥܡ̈ܡܼܐ ܕܬܚܝܬ ܫܘܼܠܛܢܗ ܡܠܓܡܐ ܗ̄
                    ܡܪܗܡ. ܒܫܢܬ݀ ܚܕܥܣܪ̈ܐ ܗ̄ ܓܠܝܢܐ ܐܚܪܢܐ ܡܿܩܒܠ ܥܠ ܦܪܥܘܿܢ ܘܡܛ݀ܠ ܕܐܬܘܪܝܐ ܡܼܢ ܟܿܠܗܘܿܢ
                    ܡܥܠܝ ܗܼܘܐ ܒܗ݀ܘ ܙܒܢܼܐ܆ ܠܗ ܡܝܬܐ ܬܚܘܝܼܬܐ ܠܒܘܼܝܐܐ ܕܡܪܕܘܼܬܗ ܕܦܪܥܘܿܢ ܕܐܦ ܗܼܘ ܩܒܼܠ ܡܣܡ
                    ܒܪܝܼܫܐ ܡܛܜܠ ܪܘܼܥܗ ܕܒܐܠܗܐ ܘܥܠܗ݀ܝ ܪܫܼܡ ܠܙܒܢܼܐ ܕܒܗ ܩܒܼܠ ܓܠܝܢܐ. ܨ̄܆ ܕܠܐ̄܆ ܠܡܿܢ ܕܡܝܼܬ
                    ܗ̄ ܡܼܢ ܦܪܨܘܿܦ ܐܠܗܐ ܐܡܿܪ ܢܒܝܐ ܠܦܪܥܘܢ. ܒܪܒܘܼ̄ ܗ̄ ܕܣܒܼܪܬ ܕܠܐ ܡܼܙܕܟܐܐܢܬ. ܗܿܐ ܐܬܘܼܪܝܐ
                    ܗ̄ ܗܿܐ ܠܡ ܐܬܘܿܪܝܐ ܕܚܝܠܬܢ ܗܼܘܐ ܡܢܼܟ. ܘܕܡܿܐ ܗܼܘܐ ܠܐܪ̈ܙܐ ܕܠܒܼܢܢ. ܒܦܚܼܡܐ ܕܡܠ̈ܟܐ
                    ܕܥ݀ܠܡܐ. ܠܐ ܐܫܼܟܚ ܠܡܩܡ ܩܕܡ ܒܒܠ̈ܝܐ. ܣܘܟ̈ܘܗܝ ܩ݀ܪܐ ܠܚܝܠ̈ܘܬܗ. ܛܠܠܗ ܠܫܘܼܠܛܢܗ. ܕܒܗ ܡܛܠ
                    ܗܼܘܐ ܥܠ ܥܡ̈ܡܼܐ ܕܠܗܿ ܡܫܥܼܿܒܕܝܼܢ ܗܼܘܘ. ܘܪܘܡܐ ܕܩܘܡܬܗ ܒܗ݀ܝ ܕܝܼܕܝܥ ܒܫܘܼܠܛܢܗ ܡܼܢ
                    ܟ݀ܠܗܘܿܢ ܡܩ̈ܠܡܼܐ ܕܐܪܥܐ. ܘܒܝܢܬ݀ ܥܒܝܼ̈ܕܐ ܗ̄ ܒܗ݀ܝ ܕܟܕ ܒܥܿܠܡܐ ܒܡܨܥܬ݀ ܡܠܟܘܼܬܐ ܐܝܼܬܘܗܝ
                    ܗܼܘܐ ܝܬܝܼܪ ܗܼܘܐ ܟܿܠܗܘܿܢ ܡ̈ܠܟܐ ܐܬܚܼܙܝܬ݀ ܡܘܥܝܼܬܗܿ ܕܪܡܐ ܘܡܫܼܩܠܐ 
            
            
                 ܗ̄ ܡܕܒܪܢܘܼܬܗܿ. ܡ̈ܝܐ ܪܒܝܼܘܗܝ ܗ̄ ܩܢܐ ܗܼܘܐ ܬܘܼܩܦܐ ܡܼܢ ܣܘܓܐܐ ܕܚܝܠ̈ܘܬܗ
                    ܕܕܡܝܢ ܗܼܘܘ ܠ̈ܡܝܐ ܣܓ̈ܝܐܐ ܘܪܡ ܗܼܘܐ ܒܫܘܼܠܛܢܗ ܡܛ݀ܠ ܥܡܐ ܥܫܝܼܢܐ ܕܐܝܼܬ ܒܡܠܟܘܼܬܗ ܗ̄
                    ܕܐܝܼܬܘܗܝ ܗܼܘܐ ܐܝܟ ܬܗܘܡܐ ܪܒܐ. ܫܠܝܼܛ ܗܼܘ ܕܝܢ ܥܠ ܟܿܠܗܘܿܢ ܢܗܪ̈ܘܬܐ ܐܝܠܝܢ ܕܐܝܼܬܝܗܘܿܢ
                    ܥܡܡ̈ܐ ܣܓ̈ܝܐܐ ܘܡܠ̈ܟܐ ܕܥܿܠܡܐ ܐܝܠܝܢ ܕܒܟܢܝܼܫܘܼܬܗܘܿܢ ܠܝܡܐ ܕܡܠܟܘܼܬܗ ܟܿܠܝܘܿܡ ܬܗܘܼܡܐ ܪܒܐ
                    ܥܿܒܕܝܢ ܗܼܘܘ. ܘܣܘܟܘ̈ܗܝ ܐܪܡܝܼ ܗ̄ ܦܠ̈ܚܘܗܝ ܕܒܗܘܿܢ ܡܫܥܒܕ ܗܼܘܐ ܠܟܿܠ ܡܠ̈ܟܝܼܢ. ܘܣܓ̈ܝ
                    ܣܪ̈ܥܝܦܝܬܗ ܗ̄ ܣܓܝܼܘ ܚܠ̈ܘܬܗ ܘܐܬܼܡܬܚ ܫܘܼܠܛܢܗ. ܦܪܚܬܐ ܕܫܡܿܝܐ ܘܚܝܘܼܬܐ ܗ̄ ܥܡܡ̈ܐ ܐܢܘܢܿ
                    ܕܚܝܼܘ ܒܓܘܣܐ ܕܛܠܠܗ. ܘܕܘܼܠ̈ܒܐ ܕܐܝܼܬܝܗܘܿܢ ܪܘܪ̈ܒܢܐ ܕܥܡܡ̈ܐ. ܠܐ ܐܝܼܬܝܗܘܿܢ ܐܝܟ ܥܘܦܘ̈ܗܝ
                    ܗ̄ ܐܡܿܪ ܕܠܐ ܕܡܝܢ ܗܼܘܘ ܠܪܘܪ̈ܒܢܐ ܕܡܠܟܘܼܬܗ. ܘܟܿܠ ܐܝܼܠܢ ܗ̄ ܐܝܠ̈ܢܐ ܠܒܢܝܢ̈ܫܐ ܡܫܿܡܗ.
                    ܦܪܕܝܣܐ ܠܥܿܠܡܐ ܘܫܘܼܦܪܐ ܠܡܦܪܓܘܼܬܐ ܕܫܘܼܠܛܢܗ. ܥܠ ܕܐܬܬܼܪܝܼܡ ܒܫܘܼܡܬܗ ܗ̄ ܒܫܘܼܠܛܢܗ.
                    ܡܘܥܝܼܬܗ ܝܬܝܼܪ ܡܼܢ ܟܠܿ̈ܘܿܢ ܒܢܝܢ̈ܫܐ. ܘܠܐ ܝܿܕܥ ܠܡܿܢ ܕܐܪܝܼܡܗ. ܐܫܿܠܡܝܘܗܝ ܒܝܕ ܗ̄
                    ܐܫܿܠܡܬܗ ܒܝܕ ܒܒܠܝܐ ܕܬܩܝܼܦ ܡܢܼܗ ܘܡܼܢ ܟ݀ܠܗܘܿܢ ܥܡܡ̈ܐ. ܘܬܚܝܬ ܗ̄ ܬܚܝܬ ܣܪ̈ܥܝܼܦܝܬܐ
                    ܕܐܝܼܠ̈ܢܐ ܘܕܛܘܼܪ̈ܐ ܕܐܪܥܐ. ܬܬܟܼܢܫܝ ܟܿܠܗܿ ܚܝܘܼܬܐ ܕܕܒܪܐ ܠܡܼܐܟܠ ܒܣܼܪܐ ܕܫܠܕܗ. ܘܗܿܕܐ
                    ܥܒܕܿܬ ܘܕܠܐ ܢܬܼܬܪܝܼܡܘܢ ܒܩܘܡܬܗܘܿܢ ܗ̄ ܗܿܢܐ ܠܡ ܡܣܡ ܒܪܝܼܫܐ ܐܝܬܝܿܬ ܥܠ ܐܬܘܼܪܝܐ ܐܝܿܟܢܐ
                    ܕܢܕܚܠܘܢܼ ܟܿܠܗܘܿܢ ܒܢܝܢ̈ܫܐ ܘܠܐ ܢܬܼܬܪܝܼܡܘܢܼ ܒܫܘܼܛܠܢܐ ܐܟܘܿܬܗ. ܘܠܐ ܢܗܼܘܘܿܢ ܗ̄ ܐܟܘܿܬܗ
                    ܟܿܠ ܕܩܿܢܝܢܼ ܐܝܼܩܪ̈ܐ ܘܫܘܼܠ̈ܛܢܐ ܝܬܝܼܪ ܡܼܢ ܚܒܪ̈ܝܗܘܿܢ ܐܝܟ ܐܝܼܠ̈ܢܐ ܕܢܨܝܼܒܝܼܢ ܥܠ ܡ̈ܝܐ.
                    ܒܝܘܡܐ ܕܢܚܼܬ ܗ̄ ܒܝܘܡܐ ܓܝܪ ܕܢܚܼܬ ܐܬܘܼܪܝܐ ܠܫܝܘܿܠ ܥܒܿܕܬ ܐܢܿܐ ܐܠܗܐ ܐܒܼܠܐ ܐܟܡܿܢ ܕܐܠܗܐ
                    ܐܬܼܐܒܠ ܥܠܘܗܝ. ܐܠܐ ܐܒܼܠܐ ܐܡܿܪ ܠܚܘܼܒܠܐ ܕܝܼܠܗ ܘܕܡܠܟܘܼܬܗ. ܡܿܘܬܗ ܓܝܪ ܐܒܼܠܐ ܐܝܼܬ ܥܠ
                    ܡܠܟܘܼܬܗ. ܬܗܘܼܡܐ ܥܘܼܡܩܐ ܕܫܝܘܿܠ ܗܿܝ ܕܠܗܿ ܢܚܼܬ. ܘܟܡܼܪܬ݀ ܥܠܘܗܝ ܗ̄ ܠܡܠܟܘܼܬܗ ܗܿܝ
                    ܕܣܿܓܝܼ ܟܗܝܼܢܐ ܗܘܬ݀ ܐܠܒܫܬܗܿ ܟܡܝܼܪܘܼ̄ ܒܝܕ ܚܪܒܐ ܕܐܝܬܝܼܘ ܒܥ̈ܠܕܒܒܐ ܥ̄ܠܘ ܐܬܼܥܝܦܘ
                    ܘܟܿܠܗܘܿܢ ܡܼܢ ܕܚܠܼܬܗ ܕܡܦܘܼܠܬܗ ܪܥܠܼܘ܆ ܐܝܟ ܐܝܼ̈ܠܢܐ ܕܥܿܒܐ ܕܡܬܼܥܦܦܝܼܢ ܘܡܬܼܟܦܦܝܼܢ ܡܼܢ
                    ܪܘܼܚܐ. ܐܬܥܼܝܦܘ ܘܐܬܬܙܝܼܥܘ. ܘܙܪܥܗ ܝܼܬܒܘ ܗ̄ ܐܡܿܪ ܕܐܬܘܼܪܝܐ ܕܡܢܼܩܕܝܼܡ ܟܿܠܗܘܿܢ ܥܡ̈ܡܼܐ
                    ܒܛܠܠܼܐ ܕܝܼܠܗ ܝܿܬܒܝܼܢ ܗܼܘܘ ܠܗܿܕܐ ܟܿܠܗܿ ܒܨܝܼܪܘܼܬܐ ܐܬܢܚܼܬ ܕܙܪܥܐ ܕܝܼܠܗ ܘܐܝܿܠܝܢ ܕܦܼܫܘ
                    ܡܼܢ ܝܘܼܒܠܗ ܒܛܠܠܐ ܕܐܚܪ̈ܢܐ ܝܼܬܒܼܘ ܐܝܟ ܫܪܟܐ ܕܥܡ̈ܡܼܐ. ܠܘ ܓܝܪ ܕܒܢ̈ܘܗܝ ܕܐܬܘܼܪܝܐ ܬܚܝܬ
                    ܒܛܝܼܠܘܼܬܗ ܡܣܼܬܬܪܝܼܢ ܘܝܿܬܒܝܼܢ ܐܠܐ ܬܚܝܬ ܡܠܟܘܼܬܐ ܕܒܒ̈ܠܝܐ ܒܫܒܼܝܐ ܡܫܼܬܥܒܕܝܢ. ܠܐܝܿܢܐ
                    ܡܼܢ ܗ̄ ܐܢܬ ܦܪܥܘܿܢ ܠܐܝܿܢܐ ܡܼܢ ܐܝܼ̈ܠܢܐ ܐܬܕܡܝܼܬ. ܠܡܿܢܘܼ ܐܬܕܡܝܼܬ ܒܫܘܼ̄ܒ ܘܒܪܒܘܼܬܐ ܡܼܢ
                    ܟܿܠܗܘܿܢ ܪܘܪ̈ܒܢܐ ܘܡ̈ܠܟܐ ܕܥ݀ܠܡܐ. 
            
            
                 ܐܝܟ ܕܐܦ ܐܢܬ ܒܕܡܘܼܬܗܘܿܢ ܢܚܼܬܬ ܠܒܝܬ ܡܝܼ̈ܬܐ. ܠܐܪܥܐ ܬܚܬܝܬܐ ܗ̄ ܐܡܿܪ
                    ܕܠܘ ܒܠܚܘܼܕ ܠܐܬܘܼܪܝܐ ܠܐ ܦܚܼܡܬ݀ܐ ܡܠܟܘܼܬܟ ܘܪܒܘܼܬܟ ܐܠܐ ܐܦܿܠܐ ܠܗܿܢܘܿܢ ܕܣܿܓܝܼ ܡܬܚܬܝܼܢ
                    ܗܼܘܘ ܡܢܼܗ. ܒܝܢܬ݀ ܥܘܼܪ̈ܠܐ ܗ̄ ܡܿܘܕܥ ܒܗܿܕܐ ܕܐܦ ܡܨܪ̈ܝܐ ܓܙܝܼܪܝܼܢ ܗܼܘܘ ܕܝܼܠܦܘ ܡܼܢ
                    ܝܥܩܘܿܒ ܘܝܘܣܦ ܨ܆ ܕܠܒ̄ ܠܐܪܝܐ ܕܥܡ̈ܡܼܐ ܗ̄ ܡܘܬܒܟ ܘܡܣܼܬܬܘܼܬܟ ܕܒܡܠܟܘܼܬܟ ܘܐܦ ܠܬܢܝܼܢܐ.
                    ܕܩܼܪܬ ܒܢܗܪ̈ܘܬܐ ܗ̄ ܢܗܪ̈ܘܬܐ ܠܚܝܠ̈ܘܬܗ ܩܿܪܐ ܕܒܗܘܿܢ ܫܿܒܐ ܗܼܘܐ ܘܒܿܐܙ ܠܥܡ̈ܡܼܐ ܕܠܗܘܿܢ
                    ܩܿܪܐ ܡܝ̈ܐ. ܘܐܟܿܣܐ ܒܕܥܟܟ ܗ̄ ܡܼܢ ܚܼܠܐ ܘܝܩܕܢܐ ܕܡܕܝܼܢܬܐ ܚܫܼܟ ܢܘܼܗܪܐ. ܐܘܿ ܕܗܿܟܢܐ
                    ܡܣܼܬܒܪ ܗܼܘܐ ܠܗܘܿܢ ܒܥܕܢܐ ܕܢ݀ܦܠܝܼܢ ܘܕܥܟܝܼܢ ܡܼܢ ܚܝ̈ܐ ܐܝܟ ܗ݀ܘ ܕܠܝܬ ܢܘܼܗܪܐ ܠܢܗܝܼܪ̈ܐ
                    ܒܗܿܝ ܕܐܚܿܕܝܼܢ ܠܗܘܿܢ ܨܘܪ̈ܢܐ ܘܡܫܼܬܩܠܐ ܡܢܼܗܘܿܢ ܪܓܫܼܬܐ ܕܚܙܬܗܘܿܢ. ܘܐܘܿܒܕ ܒܥܝܼܪܗ ܗ̄
                    ܘܐܡܿܪ ܕܬܘܼܒ ܠܐ ܡܫܼܬܒܩܐ ܐܪܥܐ ܗܿܕܐ ܕܡܠܝܐ ܡ̈ܝܐ ܣܓ̈ܝܐܐ ܕܒܗܘܿܢ ܪܥܝܐ ܘܡܬܼܦܪܦܥܐ ܗܘܼܬ݀
                    ܒܥܝܼܪܐ ܘܪ̈ܟܫܐ ܕܡܨܪ̈ܝܐ. ܗܿܝܕܝܢ ܐܬܩܼܢܘ ܡܝܝ̈ܗܘܿܢ ܐܝܟ ܡܫܼܚܐ ܗ̄ ܕܠܐ ܒܢܝ̈ܢܫܐ ܐܦܿܠܐ
                    ܒܥܝܼܪܐ ܕܠܚܐ ܠܗܘܿܢ ܒܝܕ ܦܘܼܠܚܢܐ ܘܗܠܟܼܬܐ. ܐܘܼܠܝܼܬܢܐܝܼܬ ܠܡ ܕܪܟܼܒܬܗ ܘܗܿܟܢܐ ܐܦ ܥܡ̈ܡܼܐ
                    ܐܿܠܝܢ ܠܗܿ ܠܡܨܪܝܢ. ܒܿܥܐ ܗܿܫܐ ܕܢܐܼ ܠܐ ܠܚܝܠܗ ܕܦܪܥܘܢ ܕܡܬܼܚܪܒ܆ ܐܠܝܼ ܐܘܼܠܝܬܐ܀ ܥܡ ܢܚ̈ܬܝ
                    ܓܘܼܒܐ܆ ܠܘ ܢܒܝܐ ܡܚܬ ܗܼܘܐ ܠܗܿ ܠܡܨܪܝܢ ܘܠܚܝܠܗ ܠܒܝܬ ܡܝܼ̈ܬܐ. ܐܠܐ ܡܩܿܕܡ ܡܬܼܢܒܐ ܕܗܿܘܝܢ
                    ܗܿܠܝܢ ܨܝܕܝܗܘܿܢ ܒܚܪܒܐ ܕܒܒܠ̈ܝܐ܆ ܡܼܢ ܡ̈ܝܐ ܒܣܝܼ̈ܡܐ ܗ̄ ܡ̈ܝܐ ܩܿܪܐ ܠܚܝ̈ܐ ܘܛܒ̈ܬܐ ܕܥܿܠܡܐ.
                    ܚܘܼܬ ܠܡ ܡܼܢ ܦܘܼܪ̈ܦܥܐ ܕܒܗܘܿܢ ܐܝܟ ܕܒܡ̈ܝܐ ܣܿܚܐ ܗܼܘܝܬ. ܘܕܡܼܟ ܫܢܼܬܗ ܕܡܿܘܬܐ ܥܡ ܥܘܼܪ̈ܠܐ
                    ܕܕ݀ܡܝܢ ܠܟ ܘܥܡ ܩܛܝܼ̈ܠܝ ܣܝܦܐ ܕܡܝܼܬܘ ܩܕܡܝܟ. ܘܢܥܪܓܘܼܢܗ ܗ̄ ܢܥܪܓܠܘܼܢܗ ܘܢܙܥܙܥܘܼܢܗ
                    ܒܒܠ̈ܝܐ ܠܦܪܥܘܿܢ ܘܠܟܿܠܗ ܚܝܠܗ ܢܒܣܼܒܣܘܢܼ ܒܣܝ̈ܦܐ ܡܪܝܼܪܐܝܼܬ ܘܒܿܬܪ ܡܿܘܬܗ ܡܫܼܬܕܪ ܠܫܝܘܿܠ
                    ܡܨܥܪܐܝܼܬ. ܘܢܫܼܟܒܘܢܿ ܥܘܼܪ̈ܠܐ ܗ̄ ܚܝܠ̈ܘܬܐ ܕܐܓܼܪܘ ܡܨܪ̈ܝܐ ܕܐܝܼܬܝܗܘܿܢ ܥܘܼܪ̈ܠܐ ܥܡ
                    ܡܨܪ̈ܝܐ ܡܬܼܩܛܠܝܼܢ ܼܡܢ ܒܒܠ̈ܝܐ. ܬܡܿܢ ܡܫܟ ܗ̄ ܚܿܠܛ ܬܢܢ ܥܡ ܐܝܿܠܝܢ ܕܥܒܼܪ̈ܝ ܐܦ ܐܝܿܠܝܢ
                    ܕܥܬܝܼ̈ܕܢ. ܬܘܼܒ ܡܫܟ ܘܬܘܒܝܼܠ ܗ̄ ܬܘܼܒ ܨܝܕܝܟ ܠܡ ܦܪܥܘܿܢ ܢܚܿܬ ܡܫܟ ܘܬܘܼܒܝܠ ܪ̈ܝܫܝ ܥܡ̈ܡܼܐ
                    ܓܪ̈ܒܝܝܐ ܥ݀ܡܪ̈ܝ ܓܙܪ̈ܬܐ. ܠܐ ܕܝܢ ܢܫܟܼܒܘܢܼ ܥܡ ܗ̄ ܕܠܘ ܡܼܢ ܐܝܼܕ̈ܝ ܓܢܣܼ̈ܐ ܒܝܕ ܣܝܦܐ
                    ܘܩܪܒܐܢ݀ܦܠܝܼܢ ܐܝܟ ܐܚܪ̈ܢܐ. ܠܐ ܢܚܼܬܘܢܿ ܠܫܝܘܿܠ ܒܡܐܢ̈ܝ ܩܪ̈ܒܝܗܘܿܢ ܒܗܿܝ ܕܡܼܢ ܪܘܓܙܐ
                    ܐܠܗܿܝܐ ܢ݀ܦܠܝܼܢ ܐܝܟ ܐܬܘܪ̈ܝܐ. ܘܣܡܼܘ ܣܝ̈ܦܝܗܘܿܢ ܗ̄ ܒܗܿܝ ܕܟܕ ܩܝܿܡܝܼܢ ܥܠ ܪ̈ܓܠܝܗܘܿܢ
                    ܡܬܼܡܣܝܢ ܘܢܦܠܝܼܢ ܡܢܼܫܝܠܝ. ܗܿܐ ܥܘܠܗܘܿܢ ܒܩܢܘܿܡܗܘܿܢ. ܟܕ ܡܬܝܼܕܥ ܠܟܿܠ ܥܘܠܗܘܿܢ. ܒܝܕ
                    ܓܪ̈ܡܝܗܘܿܢ ܕܫܿܕܝܢ ܘܡܿܒܕܪܝܼܢ ܚܕܪ̈ܝ ܐܘܿܪܫܠܡ. ܬܒܪܐ ܒܐܪܥܐ ܗ̄ ܕܡܘܼܠܟܢܐ ܕܚ̈ܝܐ ܩܪܼܗܿ
                    ܡܛ݀ܠ ܚ̈ܝܐ ܕܕܚܠܼܬ݀ ܐܠܗܐ ܕܩܿܢܝܢܼ ܗܼܘܘ ܥܡܘܪ̈ܝܗܿ. ܗܿܠܝܢ 
            
            
                 ܥܠ ܕܒܝܬ ܓܘܿܓ ܐܡܿܪ. ܘܗܥܠܝܗܘܿܢ ܬܘܒ ܩܿܪܐ ܫܠ̈ܝܼܛܛܢܐ ܕܓܪܒܝܐ ܨ̄܆ ܕܠ̄ܓ
                    ܐܪܥܐ ܥܡ ܗ̄ ܨ݀ܒܐ ܕܢܙܗܪ ܠܡܐ ܕܐܢ ܬܝܿܒܝܼܢ ܡܬܼܦܪܩܝܼܢ . ܘܠܕܝܬ ܠܐܠܗܐ ܨܒܝܿܢܐ ܒܐܒܕܢܐ
                    ܕܚܛ̈ܝܐ. ܢܕܒܪܘܿܢ ܠܥܡ ܕܐܪܥܐ ܗ̄ ܠܘ ܓܝܪ ܟܕ ܦܩܿܕ ܕܗܿܟܢܐ ܢܥܼܒܕܘܢܼ ܐܡܼܪ ܗܿܠܝܢ ܠܘ ܓܝܪ ܟܕ
                    ܦܩܿܕ ܕܗܿܟܢܐ ܢܥܼܒܕܘܢܼ ܐܡܼ ܗܿܠܝܢ ܐܠܐ ܗܿܝ ܕܡܥܕܐ ܠܡܼܗܪܐ ܡܼܢ ܒܢܝ̈ܢܫܐ ܒܙܒܢ ܕܫܒܼܝܐ
                    ܡܫܼܬܥܝܐ. ܐܝܿܟܐܢ ܕܡܼܢ ܕܡܘܼܬ ܗܿܕܐ ܕܕܘܩܐ ܢܚܼܘܝܼܘܗܝ ܠܢܒܝܐ ܕܡܿܢܘ ܣܘܼܥܪܢܗܿ ܘܐܝܿܠܝܢ ܢܚܒ
                    ܕܢܥܼܒܕ.ܐܟܙܼܢܐ ܠܡ ܕܡܐ ܕܡܿܝܬܐ ܐܢܼܐ ܚܪܒܐ ܥܠ ܐܪܥܐ ܡܛܠ ܥܘܠܐ ܕܥܿܡܘܪ̈ܝܗܿ ܚܝܒܝܼܢ ܐܢܫ̈ܐ
                    ܕܒܓܘܿ ܕܣܝܼܡܘܼ ܐܢܫ ܥܝܼܪܐ ܕܩܿܐܡ ܥܠ ܕܘܼܟܬܐ ܕܪܡܐ ܘܕ݀ܐܩ ܠܪܘܼܚܩܐ. ܘܐܡܼܬܝ ܕܚܿܙܐ ܠܓܝܿܣܐ
                    ܡܢܝܼܦ ܐܝܼܕܗ ܐܘܿ ܡܕܠܩ ܢܘܼܪܐ ܕܢܥܪܼܩܘܿܢ ܐܢܫ̈ܐ ܟܕ ܚܿܙܝܢ ܠܐܬ݀ܐ ܐܢܕܝܢ ܐܢܫ ܡܒܣܪ ܘܠܐ
                    ܥܿܪܩ ܐ݀ܒܕ ܒܨܒܝܿܢܗ. ܐܢܕܝܢ ܕܘܩܐ ܢܗܼܡܐ ܘܠܐ ܢܫܼܘܕܥ ܠܥܡܐ ܘܥܡܐ ܢܐܼܒܕ ܐܦܿܢ ܟܿܠ ܚܕ
                    ܒܚܛܗ̈ܘܗܝ ܐ݀ܒܕ ܐܠܐ ܕܡܗܘܿܢ ܡܼܢ ܐܝܼܕ̈ܝ ܕܘܩܐ ܡܬܼܬܒܥ ܗܿܟܢ ܐܠܡ ܐܦ ܐܢܬ ܐܘܿ ܢܒܝܐ ܡܛ݀ܠ
                    ܕܡܛܝܒܼ ܐܢܼܐ ܠܡܝܬܝܘܼ ܚܪܒܐ ܥܠ ܝܘܼܕ̈ܝܐ ܡܛ݀ܠ ܥܘܠܗܘܿܢ ܕܘܩܐ ܝܗܒܿܬܟ ܠܗܘܿܢ. ܐܢܕܝܢ ܐܢܬ ܟܕ
                    ܦ݀ܩܕ ܐܢܼܐ ܠܟ ܕܬܐܡܼܪ ܡܗܿܡܐ ܐܢܬ ܡܼܢ ܒܝܼܫܘܼܬܐ ܐܘܿ ܡܼܢ ܩܢܼܛܐ ܕܥܡܐ. ܗ݀ܘ ܥܘܿܠܐ ܒܥܘܠܗ
                    ܗ̄ ܡܛ݀ܠ ܕܠܘ ܟܕ ܠܐ ܝܿܕܥ ܐܪܫܥ. ܡܛ݀ܠ ܕܩܢܼܐ ܦܘܼܪܩܢܐ ܕܛܒܿܬܐ ܘܕܒܝܼܫܬܐ. ܐܢܬ ܕܝܢ ܬܘܼܒ
                    ܡܬܼܬܒܥ ܐܢܬ ܡܛ݀ܠܬܗ. ܐܢܕܝܢ ܠܘ ܡܼܢ ܠܘܿܬܟ ܗܼܘܐ ܥܠܬ݀ ܡܿܘܬܗ ܐܠܐ ܡܼܢ ܗ݀ܝ ܕܠܐ ܗܝܡܼܢ
                    ܠܡܠ̈ܝܟ ܗ݀ܘ ܟܐܢܐܝܼܬ ܒܥܘܠܗ ܡܿܐܬ. ܐܢܬ ܕܝܢ ܫܘܙܒܼܬ ܟܐܢܐܝܼܬ ܒܥܘܠܗ ܡܿܐܬ. ܐܢܬ ܕܝܢ ܫܘܙܒܼܬ
                    ܢܦܼܫܟ. ܕܥܘܠ̈ܝܢ ܘܚܛܗ̈ܝܢ ܥܠܝܢ ܐܢܘܿܢ ܗ̄ ܒܗܿܕܐ ܡܠܿܒܒ ܠܥܡܐ ܕܐ݀ܦܢ ܗܿܟܢ ܣܿܓܝܐܝܢ
                    ܚܛܗܝ̈ܗܘܿܢ ܐܝܿܟܢܐ ܕܡܼܢ ܝܘܼܩܪܗܘܿܢ ܢܬܡܼܣܘܿܢ ܘܢܬܚܼܒܠܘܢܿ ܒܡܣܡ ܒܪܝܼܫܐ ܒܪ ܠܐ ܢܩܼܢܛܘܢܼ
                    ܘܐܢܗܘܼ ܕܪܥܝܢܐܐܝܼܬ ܠܗܘܿܢ. ܕܝܨܝܼܦ ܕܬܝܿܒܘܼ̄ ܡܛ݀ܠ ܕܠܐ ܨ݀ܒܐ ܐܢܼܐ ܒܡܿܘܬܗ ܕܚܛܝܐ. ܡܿܕܝܢ
                    ܬܘܼܒܘ ܘܐܬܦܼܢܘ ܡܼܢ ܒܝܼ̈ܫܬܐ. ܘܐܝܟ ܕܠܫܘܼܪܪܐ ܕܗܿܠܝܢ ܕܡܼܢ ܠܥܼܠ ܐܬܐܡܼܪ̈ܝ ܘܠܒܘܼܛܠܐ
                    ܕܬܪܥܝܼܬܐ ܝܘܼܕܝܬܐ ܕܠܐ ܡܫܪܝܢ ܕܡܬܼܥܕܪܝܼܢ ܡܼܢ ܬܝܿܒܘܼܬܐ ܐܟܚܕܐ ܕܝܢ ܘܠܙܘܼܗܪܐ ܕܙܕ̈ܝܼܩܐ
                    ܘܠܘܼܒܒܐ ܕܚܛ̈ܝܐ ܪܫܡ ܙܒܢܼܐ ܕܒܗ ܐܣܬܼܒܪ ܥܠ ܚܘܼܪܒܗܿ ܕܐܘܿܪܫܠܡ ܡܼܢ ܐܝܿܢܐ ܕܐܬܼܢܛܪ
                    ܘܐܫܼܬܘܙܒ ܡܿܢ ܥܠܝܗܿ ܥܠܗܿܕܐ. ܕܡܿܝܐ ܓܝܪ ܕܗܿܢܐ ܓܒܪܐ ܡܝܬܪܐ ܗܼܘܐ ܘܒܪ ܪܥܝܢܐ ܕܢܒ̈ܝܐ
                    ܘܒܕܓܘܢܼ ܐܡܿܪ. ܥܕܠܐ ܢܐܼܬܐ ܠܘܿܬܝ. ܒܨܦܪܐ ܗ̄ ܒܓܠܝܢܐ ܐܡܿܪ ܕܐܠܗܐ ܕܡܢܼܗ ܕܪܡܫܐ ܩܒܼܠܬ
                    ܝܼܕܥܬܐ ܕܝܼܠܗܝܢ ܕܗܿܠܝܢ. ܠܗܿܕܐ ܓܝܪ ܩܿܪܐ ܐܝܼܕܐ ܕܐܠܗܐ ܘܐܬܢܒܝܼ ܩܕܡ ܟܿܠܢܫ ܕܟܢܝܼܫ ܗܼܘܐ
                    ܠܘܿܬܗ. ܕܒܨܦܿܪܐ ܠܡ ܐܬܿܐ ܠܘܿܬܝ ܐܢܫ ܕܬܦܼܨܝ ܡܼܢ ܐܘܿܪܫܠܡ. ܘܡܣܿܒܪ ܠܟܘܢܿ ܥܠ ܚܘܼܪܒܗܿ.
                    ܐܬܦܼܬܚ ܦܘܼܡܝ ܗ̄ ܒܗܿܕܐ ܡܿܘܕܥ ܥܠ ܓܠܝܘܼܬ ܐܦ̈ܐ ܕܗܘܼܐ ܠܗ ܡܛ݀ܠ ܫܪܪܐ ܕܡ̈ܠܘܗܝ ܕܐܫܬܼܡܠܝܬ݀
                    ܒܣܘܼܥܪܢܐ. ܐܝܿܠܝܢ 
            
            
                 ܕܥ݀ܡܪܝܼܢ ܗ̄ ܡܬܼܦܢܐ ܕܢܟܼܣ ܠܚܘܼ̈ܫܒܐ ܒܝܼܫ̈ܐ ܕܿܩܢܝܢܼ ܗܼܘܘ ܗܿܢܘܿܢ
                    ܕܒܐܘܿܪܫܠܡ ܩܕܡ ܚܘܼܪܒܗܿ ܗ̄ ܕܐܢ ܐܒܪܗܡ ܕܚܕ ܗܼܘܐ ܗ̄ ܩܒܼܠ ܫܘܼܘܕܝܐ ܕܝܘܼܬܪܢܐ ܕܐܪܥܐ ܗܿܕܐ
                    ܟܡܼܐ ܝܬܝܼܪܐܝܼܬ ܚܢܢ ܕܣܓܝ̈ܐܐ ܚܢܢ ܒܢ ܗܼܘ ܡܬܓܼܡܪܝܼܢ ܕܠܘܿܬ ܐܒܗ̈ܬܐ ܒܩܢܝܿܢܗܿ ܕܐܪܥܐ. ܘܠܘ
                    ܒܐܚ̈ܝܢ ܕܩܕܡܼܘ ܐܫܼܬܒܝܼܘ. ܥܠ ܕܡ̈ܐ ܗ̄ ܡܟܣ ܠܗܘܿܢ ܕܩܕܡ ܦܬܟܪ̈ܐ ܚܝܘ̈ܬܐ ܕܡܝܼܝܼܬ̈ܢ ܥܡ
                    ܕܡܗܝܢ ܐܟܿܠܝܼܢ ܐܢܬܘܿܢ ܒܐܪܙܐ ܕܚܪܫܘܼܬܐ. ܫܿܬܝܢ ܐܢܬܘܢܿ ܗ̄ ܒܐܪܙܐ ܕܫܐܕ̈ܐ ܐܝܟ ܕܥܿܒܕܝܼܢ
                    ܦܠ̈ܚܝ ܦܬܟܪ̈ܐ ܘܨ݀ܒܝܢ ܐܢܬܘܿܢ ܠܡܐܪܬ ܐܪܥܐ. ܩ݀ܝܡܝܼܢ ܗ̄ ܥܠ ܕܡܐ ܙܟܝܐ ܕܡܣܼܟ̈ܢܐ ܘܕܒܿܝܫ̈ܐ
                    ܕܐ݀ܫܕܝܼܢ ܗܼܘܘ ܪܡܿܙ܀ ܨ܆ ܕܠ̄ܕ ܐܬܢܒܐ ܥܠ ܪ̈ܥܘܬܐ ܗ̄ ܡܟܣ ܠܡܕܒܪܢܐ ܘܕܝܿܢ̈ܐ ܐܘܟܝܼܬ ܪ̈ܥܘܬܐ
                    ܗ̄ ܕܥܡܐ. ܐܘܿ ܪ̈ܥܘܬܐ ܗ̄ ܒܪܬ݀ ܩܿܠܐ ܕܐܘܿ ܡܥܝܼܪ ܠܐܢܫ ܡܼܢ ܫܢܼܬܐ. ܘܐܢ ܣܼܛܐ ܡܼܢ ܐܘܼܪܚܐ
                    ܩ݀ܢܝܐ ܠܗ ܕܢܦܢܼܐ. ܫܡ̈ܝܼܢܐ ܗ̄ ܠܥܬܝܼܪ̈ܐ ܐܝܟ ܕܒܫ̈ܢܐ ܐܟܿܠܝܼܬܘܿܢ ܘܟ݀ܠܡܐ ܕܩܿܢܝܢܼ
                    ܢܣܒܝܼܬܘܿܢ ܐܟܼܙܢܐ ܕܠܒܘܼܫܐ ܘܬܟܣܝܼܬܐ. ܘܬܒܝܼܪܐ ܗ̄ ܒܝܕ ܡܟܣ̄ܢܘܼ ܘܡܓܙܝܘܼܬܐ ܠܐ ܥܨܒܼܬܘܿܢ
                    ܒܝܕ ܥܘܼܬܪܟܿܘܢܿ. ܘܕܛܥܿܝܐ ܗ̄ ܘܦ݀ܗܝܐ ܒܛܘܼܪ̈ܐ ܠܡܕܒܼܚܘܼ ܠܦܬܟܪ̈ܐ ܠܐ ܐܗܦܼܟܬܘܿܢ. ܗܿܐ
                    ܬܒܿܥ ܐܢܼܐ ܠܥܢ̈ܝ ܘܣܿܥܪ ܐܢܼܐ ܠܗܝܢ ܘܡܛ݀ܠ ܕܠܐ ܐܟܫܼܪܘ ܪ̈ܥܘܬܐ ܐܢܿܐ ܪܥܐ ܐܢܼܐ ܠܗܿ. ܐܝܟ
                    ܕܣܿܥܪ ܪܥܝܐ ܟܫܝܼܪܐ ܠܓܙܪܗ. ܒܝܘܡܐ ܕܢ݀ܫܒ ܡܫܒܐ ܩܪܝܼܪܐ ܘܬܩܝܼܦܐ ܗܿܟܢܐ ܐܦ ܐܢܿܐ ܒܐܡܝܼܢܘܼ
                    ܐܨܿܦ ܕܥܢ̈ܝ. ܙܝܼܩܐ ܬܢܢ ܠܪܘܼܚܐ ܩܿܪܐ. ܡܛ݀ܠ ܓܝܪ ܕܥܢ̈ܐ ܩܼܪܐ ܐܢܘܿܢ ܗ݀ܝ ܕܥܿܒܕܝܼܢ ܥܪ̈ܒܐ
                    ܚܝܠ̈ܬܢܐ ܠܡܚܝܼ̈ܠܐ ܒܐܘܼܟܠܐ ܘܫܩܼܝܐ ܐܡܿܪ ܐܦ ܥܠܝܗܘܿܢ. ܕܐ݀ܢ ܐܢܼܐ ܒܝܬ ܢܩܼܝܐ ܗ̄ ܐܡܿܪ ܕܐܦ
                    ܠܗ ܠܥܡܐ ܕܐ݀ܢ ܐܢܼܐ ܥܠܗ݀ܝ ܕܒܚܕ̈ܕܐ ܡܣܟܠܝܼܢ ܗܼܘܘ ܓܒܪ̈ܐ ܐܦ ܢܫ̈ܐ. ܟܪ̈ܝܼܗܬܐ ܕܝܢ
                    ܕܡܼܬܕܩܪ̈ܢ ܗܼܘ̈ܝ ܘܡܣܼܬܚ̈ܦܢ ܡܣ̈ܟܼܢܐ ܐܢܘܿܢ ܕܡܬܼܒܙܙܝܼܢ ܗܼܘܘ ܡܼܢ ܚܝܠ̈ܬܢܐ ܕܒܥܡܐ.
                    ܘܐܦܿܪܩܝܗܿ ܠܥܢ̈ܝ ܗ̄ ܡܼܢ ܪ̈ܥܘܬܐ ܒܝܼܫ̈ܐ. ܘܢܼܪܥܐ ܐܢܘܿܢ ܕܘܝܼܕ ܗ̄ ܗ݀ܘ ܕܡܼܢ ܕܘܝܼܕ
                    ܡܬܼܝܒܠ ܕܐܝܼܬܘܗܝ ܙܘܼܪܒܒܝܠ ܠܗ݀ܘ ܡܩܝܼܡ ܐܢܼܐ ܥܠܝܗܘܿܢ ܒܦܘܼܢܝܐ ܡܠܟܐ ܘܫܠܝܼܛܐ ܘܢܥܡܼܪܘܢܼ
                    ܒܡܕܒܪܐ ܗ̄ ܡܕܒܪܐ ܕܝܢ ܘܥܿܒܐ ܠܗܿ ܠܐܥܗܘܿܢ ܩܿܪܐ ܗܿܝ ܕܡܼܢ ܩܕܝܼܡ ܚܪܒܐ ܗܘܼܬ݀ ܘܡܣܿܚܦܐ.
                    ܪܡܬܐ ܕܝܢ ܠܐܘܿܪܫܠܡ ܡܫܿܡܗ. ܫܢܼܬܐ ܕܝܢ ܠܢܝܿܚܐ ܡܟܿܢܐ. ܒܘܼܪ̈ܟܬܐ ܗ̄ ܠܫܦܝܼܥܘܼܬ ܛܒ̈ܬܐ
                    ܕܗܘ̈ܝܢ ܠܗܘܿܢ ܒܦܘܼܢܝܐ ܐܡܿܪ. ܘܐܩܿܝܼܡ ܠܗܘܿܢ ܢܨܒܼܬܐ ܗ̄ ܫܠܡܐ ܕܢܨܝܼܒ ܘܡܿܫܪܪ ܟܕ ܠܐ
                    ܡܬܼܥܩܪ܀ ܨ܆ ܕܠ̄ܗ ܛܘܼܪܐ ܕܣܥܝܼܪ ܗ̄ ܒܝܕܛܘܼܪܐ ܥܠ ܥܡܘܪ̈ܘ̄ ܪܡܿܙ ܐܘܟܝܼܬ ܐܕܘܼ̈ܡܝܐ. ܘܡܼܢ
                    ܚܕ ܥܠ ܟܿܠܗܘܿܢ ܛܘܪ̈ܐ ܘܡܕܝܼ̈ܢܬܐ ܕܐܕ̈ܘܼܡܝܐ ܐܡܿܪ. ܡܛ݀ܠܗܿܢܐ ܚܝ ܐܢܼܐ ܗ̄ ܗܿܕܐ ܕܚܝ ܚܠܼܦ
                    ܡܘܗ̈ܒܬܐ ܡܕܡ ܡܬܼܚܫܚ ܒܗܿ. ܕܠܡܼܐ ܐ݀ܥܒܕܟ ܗ̄ ܢܬܼܐܫܕ ܠܡ ܕܡܟ ܡܼܢ ܪܕܘܿܦ̈ܝܟ ܚܠܦ ܕܥܡܐ
                    ܕܐܫܼܕܬ. ܕܡܐ ܕܣܢܼܝܬ ܗܼܘ ܗ̄ ܐܡܿܪ ܕܡܛ݀ܠ ܕܣܢܼܝܬ ܠܡ ܠܗ݀ܘ ܕܐܝܼܬܘܗ ܒܣܼܪܟ ܘܕܡܟ. ܘܠܗ݀ܘ
                    ܕܡܼܢ ܚܕ ܐܒܐ ܘܐܡܐ ܐܝܼܬܝܟ ܐܢܬ ܗܼܘ ܗ̄ ܝܼܣܪܐܝܠ.. ܡܛ݀ܠܬܗܿ ܕܗܿܕܐ 
            
            
                 ܡܿܝܬܐ ܐܢܼܐ ܥܠܝܟ ܚܪܒܐ ܘܩܼܛܠܐ ܒܐܝܼ̈ܕܝ ܩܪ̈ܝܼܒܝܟ ܕܐܝܼܬܝܗܘܿܢ ܝܼܣܪ̈ܠܝܐ.
                    ܒܿܬܪ ܕܐܡܼܪ ܥܠ ܚܪܒܐ ܕܐܕܘܼ̈ܡܝܐ ܡܬܼܢܒܐ ܥܠ ܟܗܝܼܢܘܼܬܐ ܕܗܿܘܝܐ ܒܦܘܼܢܝܐ ܒܛܘܼܪܐ ܕܝܼܗܘܕ ܨ܆
                    ܕܠܘ̄ ܒܥܠܕܒܒܐ ܐܚܢ ܗ̄ ܡܛ݀ܠ ܕܚܕܘܼܬܐ ܐܬܼܚܫܒ ܠܗܘܿܢ ܚܘܼܪܒܐ ܕܝܼܠܟܘܿܢ. ܘܐܣܼܒܪܘ ܕܪ̈ܡܬܐ
                    ܕܝܼܣܪ̈ܠܝܐ ܗܼܢܝܢ ܝܿܪܬܝܼܢ ܠܗܝܢ. ܡܛܿܠܗܿܢܐ ܫܡܼܥܘ ܛܘܼܪ̈ܐ ܕܝܼܣܪܐܝܠ ܕܚܿܪܒܝܼܢ ̈ܿܫܐ
                    ܕܥܬܝܼܕܝܼܢ ܐܢܘܿܢ ܕܢܬܟܼܗܢܘܿܢ ܒܦܘܼܢܝܐ܆ ܥܠ ܕܐܡܿܪܝܼܢ ܠܟܝ ܗ̄ ܐܘܿ ܐܪܥܐ ܝܼܣܪܠܝܬܐ. ܐܟܠܬ݀
                    ܒܢܝ̈ܢܫܐ ܐܢܬܝ ܗ̄ ܠܦܘܼܬ ܬܪܥܝܼܬܐ ܡܚܝܼܠܬܐ ܕܐܝܿܠܝܢ ܕܡܼܢ ܣܘܼܥܪ̈ܢܐ ܓܕ̈ܫܼܝ ܡܡܿܠܠܝܼܢ ܗܼܘܘ
                    ܥܠܝܗܿ ܕܐܘܒܕܬ݀ ܠܡ ܠܟܢܥܢ̈ܝܐ ܥܡܘܪ̈ܝܗܿ ܩܕܡ̈ܝܐ ܒܝܕ ܝܼܣܪ̈ܠܝܐ. ܘܠܝܼܣܪ̈ܠܝܐ ܒܝܕ ܒܿܒܠܝܐ
                    ܘܗܼܘ ܠܡ ܚܠܩܗܿ ܘܓܕܗܿ ܡܓܪܣܢܐ ܗ݀ܘ ܕܥܡܘܪ̈ܝܗܿ ܘܠܘ ܒܚܛܗ̈ܝܗܘܿܢ ܐܒܼܕܘ. ܘܐܡܿܪ ܕܡܟܝܼܠ ܠܡ
                    ܠܐ ܣܿܟܠܝܼܢ ܥܡܘܿܪ̈ܝܟܝ ܗܿܠܝܢ ܕܡܼܬܐܡܪ̈ܢ ܥܠܝܟܝ. ܐܠܐ ܕܡܬܼܚܪܪܬܝ. ܡܼܢ ܚܼܣܕܐ ܘܨܥܪܐ
                    ܕܡܢܼܟܿܠ ܡܬܼܐܫܕ ܗܼܘܐ ܥܠܝܟܝ. ܡܐ ܕܐܬܩܕܫܬ ܒܟܘܿܢ ܗ̄ ܗܠܝܢ ܠܡ ܣܿܥܪ ܐܢܼܐ ܕܐܫܬܒܿܚܬ
                    ܒܬܕܡܪ̈ܬܐ ܕܣܿܥܪ ܐܢܼܐ ܒܦܘܼܢܝܟܘܿܢ ܘܐܬܩܕܿܫܬ ܒܥܡ̈ܡܼܐ ܗܿܢܘܿܢ ܕܐܬܬܫܿܝܼܛܬ ܠܥܝܢܝ̈ܝܗܘܿܢ
                    ܒܫܒܼܝܟܘܢܿ ܐܟܡܿܢ ܕܡܚܝܼܠܐ ܐܝܿܬܝ ܘܠܝܬ ܒܝܼ ܚܝܠܐ ܕܐ݀ܦܪܘܩܟܘܢܿ. ܘܐܬܿܠ ܠܟܘܿܢ ܠܒܼܐ ܐܝܟ ܗ̄
                    ܥܿܒܪܐ ܠܡ ܡܢܼܟܘܿܢ ܠܐ ܡܬܼܬܦܝܼܣܢܘܼܬܟܘܿܢ ܩܕܡܿܝܬܐ ܘܩܿܢܝܢ ܐܢܬܘܿܢ ܡܬܼܬܦܝܼܣܢܘܼܬܐ ܕܒܟܿܠ
                    ܡܕܡ. ܒܝܘܡܐ ܕܡܿܕܟܐ ܐܢܼܐ ܠܟܘܿܢ ܗ̄ ܡܼܢ ܥܠܘܠܟܘܿܢ ܗ݀ܘ ܕܗܼܘ ܗܼܘܐܥܠܼܬܐ ܕܬܫܬܼܒܘܿܢ. ܡܿܘܬܒ
                    ܐܢܼܐ ܡܕܝܼ̈ܢܐ ܗ̄ ܡܿܘܬܒ ܐܢܼܐ ܠܟܘܿܢ ܒܐܪܥܟܘܿܢ ܟܕ ܡܬܼܒܢܝܐ ܡܢܼܟܘܿܢ ܘܡܬܼܟܗܢܐ ܡܚܿܘܐ ܓܝ
                    ܒܝܕ ܣܓ̈ܝܐܬܐ ܕܐܝܿܕܐ ܟܗܝܼܢܘܼܬܐ ܡܿܠܐ ܠܗܿ ܠܐܪܥܗܘܿܢ ܒܦܘܼܢܝܐ ܘܕܐܝܿܟܢܐ ܡܫܪܬܚ ܠܥܡܐ ܘܥܿܒܕ
                    ܠܗܘܿܢ ܩܕܝܼ̈ܫܐ ܒܕܡܘܼܬ ܕܒܼܚ̈ܐ ܕܦܘܼܪ̈ܫܢܐ ܐܝܿܠܝܢ ܕܡܬܼܩܪܒܝܼܢ ܗܼܘܘ ܠܗ ܒܐܘܿܪܫܠܡ ܒܙܒܢ
                    ܥܕܥ̈ܐܕܐ ܕܒܗ݀ܘ ܙܒܢܼܐ ܕܟܗܝܼܢܘܼܬܗܿ܀ ܨ̄܆ ܕܠܙܙ̄ ܘܐܦܩܼܢܝ ܕܐܠܗܐ ܒܐܪܥܐ ܕܡܘܼܠܟܢܐ ܠܚܘܼܕ
                    ܥܿܡܪ ܘܬܡܿܢ ܝܬܝܼܪ ܡܚܿܘܐ ܚܝܠܗ ܘܠܐ ܡܿܨܐܼ ܕܢܫܼܘܙܒ ܐܢܘܿܢ ܡܚܿܘܐ ܐܠܗܐ ܠܢܒܝܐ ܒܝܕ ܓܠܝܢܐ
                    ܦܩܼܥܬܐ ܕܡܠܝܐ ܓܪ̈ܡܐ ܐܝܿܟܢܐ ܕܒܡ̈ܠܼܐ ܘܒܣܘܼܥܪ̈ܢܐ ܢܠܦ ܐܢܘܿܢ ܥܠ ܦܘܼܢܝܐ. ܘܕܐܢ ܠܓܪ̈ܡܐ
                    ܝܒܝܼ̈ܫܐ ܝܗܼܒ ܚܝܘܼܬܐ ܟܡܼܐ ܝܬܝܼܪܐܝܼܬ ܠܐܝܿܠܝܢ ܕܚܝܝܼܢ ܘܐܝܼܬܝܗܘܿܢ ܒܫܼܒܝܐ ܡܦܢܐ
                    ܠܝܼܗܘܿܕ. ܘܗܿܠܝܢ ܒܓܠܝܿܐ ܘܒܥܝܢܐ ܕܪܘܼܚ ܚܼܙܐ ܢܒܝܐ. ܚܿܐܝܢ ܓܪ̈ܡܐ ܗ̄ ܡܫܿܐܠ ܠܢܒܝܐ ܐܝܿܟܢܐ
                    ܕܢܝܬܝܼܘܗܝ ܠܡܪܓܼܫܢܘܼܬܐ ܕܬܗܼܪܐ ܕܐܝܿܕܐ ܕܡܣܼܬܥܪܐ. ܐܢܬ ܗܼܘ ܝܿܕܥ ܗ̄ ܐܢܬ ܗܼܘ ܠܡ ܝܿܕܥ
                    ܗܿܕܐ ܐܦ ܡܿܨܐܼ ܠܡܣܼܥܪ. ܬ݀ܝ ܪܘܼܚܐ ܗ̄ ܬ݀ܝ ܢܦܼܫܐ ܡܼܢ ܐܪܒܥ ܦܢܝ̈ܬܐ. ܠܘ ܕܙܕܝ̈ܩܢ ܢܦܫܼ̈ܬܐ
                    ܐܡܿܪ ܐܠܐ ܠܦܘܼܬ ܗ݀ܘ ܡܐ ܕܡܼܬܚܙܐ ܗܘܐ ܠܢܒܝܐ ܒܠܚܘܼܕ ܡܬܼܦܩܕ ܗܼܘܐ ܕܢܬܼܢܒܐ ܥܠܘܗܝ ܐܡܿܪ.
                    ܐܦ ܪܘܼܚܐ ܐܦ ܦܢܝ̈ܬܐ ܐܝܿܠܝܢ ܕܡܢܼܗܝܢ ܚܿܙܐ ܗܼܘܐ ܠܢܦܼܫ̈ܬܐ 
            
            
                 ܕܡܬܼܟ̈ܢܫܢ ܠܡܥܼܠ ܠܦܓܪ̈ܐ ܕܝܼܠܗܝܢ. ܩܡܼܘ ܥܠ ܪ̈ܓܠܝܗܝܢ ܟ ܕܐܝܼܬܝܗܘܿܢ
                    ܣܓ̈ܝܐܝ ܒܡܢܝܿܢܐ ܗܿܐ ܦ݀ܬܚ ܐܢܼܐ ܩܒܪ̈ܝܟܘܿܢ ܗ̄ ܠܥܩ̈ܬܐ ܕܫܒܼܝܐ ܩ݀ܪܐ ܩܒܪ̈ܐ ܘܡܿܘܬܐ ܗܿܠܝܢ
                    ܕܡܫܼܬܘܕܐ ܕܡܣܩ ܠܗܘܿܢ ܡܢܼܗܘܿܢ ܒܝܕ ܢܘܼܚܡܐ ܗ̄ ܒܝܕ ܦܘܼܢܝܐ. ܗܿܘ ܕܥܿܒܕ ܗܼܘܐ ܠܗܘܿܢ.
                    ܐܝܿܢܐ ܕܒܗ ܐܝܟ ܕܡܼܢ ܡܿܘܬܐ ܕܒܝܼܫ̈ܬܐ ܡܢܿܚܡ ܗܼܘܐ ܘܡܿܦܢܐ ܠܗܘܿܢ ܠܚ̈ܝܐ ܨ݀ܝܪ̈ܢ ܗܿܠܝܢ
                    ܠܒܪܝܼܬܢ ܩܕܡܝܬܐ ܘܩܝܡܬܐ ܕܥܬܝܼܕܐ. ܡܿܕܝܢ ܠܘ ܚܝܬ݀ ܡܝܼ̈ܬܐ ܒܫܪܪܐ ܚܙܼܐ ܢܒܝܐ ܐܠܐ ܦܠܐܼܬܐ
                    ܕܐܝܿܠܝܢ ܕܐܝܼܬܝܗܘܿܢ ܒܛܘܼܪܦܐ ܕܫܒܼܝܐ ܘܦܘܼܪܩܢܐ ܗ݀ܘ ܕܗܼܘܐ ܠܗܘܿܢ ܠܚܪܬܐ.. ܣܒ ܠܟ ܩܝܣܐ ܗ̄
                    ܐܡܿܪ ܥܠ ܐܘܝܘܼܬܐ ܕܗܿܘܝܐ ܒܝܢܬܗܘܿܢ ܒܦܘܼܢܝܐ ܕܡܕܒܪܢܘܼܬܐ ܕܙܘܼܪܒܒܝܠ ܟܕ ܠܐ ܡܣܼܬܕܩܝܼܢ
                    ܠܬܪܝܢ ܡ̈ܠܟܘܢ ܐܝܟ ܕܒܙܒܼ̈ܢܐ ܩܕܡ̈ܝܐ ܘܚܘܝܗܿ ܠܗܿܕܐ ܒܣܘܼܥܪܢܐ ܟܕ ܡܣܿܟܐ ܕܬܪܝܢ ܩܝܣ̈ܐ ܐܝܟ
                    ܬܪܝܢ ܥܡ̈ܡܼܐ ܘܥܠ ܚܕܐ ܢܟܼܬܘܿܒ ܫܡܐ ܕܝܼ̈ܘܼܕܐ ܘܕܐܝܿܠܝܢ ܕܡܫܥܒܕܝܼܢ ܠܗ ܘܥܠ ܐܚܪܢܐ ܝܘܣܦ
                    ܘܥܣܼܪܐ ܫܒ̈ܛܐ ܕܒܫܘܼܠܛܢܗ. ܟܕ ܓܝܪ ܐܚܝܼܕ ܢܒܝܐ ܠܩܝܣܐ ܕܝܼܗܘܼܕܐ ܒܝܡܝܼܢܗ ܘܠܕܝܘܣܦ ܒܣܡܼܠܗ
                    ܘܩܪܒܼ ܠܐܝܼܕ̈ܘܗ ܘܠܩܝܣ̈ܐ ܠܘܿܬ ܚܕ̈ܕܐ ܗܼܘܘ ܚܕ ܩܝܣܐ ܒܐܝܼܕܗ ܕܝܡܝܼܢܐ ܒܬܕܡܘܼܪܬܐ ܐܝܟ
                    ܕܠܫܘܼܪܐ ܕܢܒܝܘܼܬܐ. ܠܘ ܓܝܪ ܩܕܡ ܕܢܫܼܬܐܠ ܥܠܝܗܘܿܢ ܢܒܝܐ ܐܬܚܼܝܕܘ ܐܠܐ ܩܕܡܐܝܼܬ ܢܣܼܒ ܐܢܘܢܿ
                    ܟܕ ܟܬܝܼܒ ܥܠܝܗܿܢ. ܘܢܦܼܩ ܒܿܬܪܟܢ ܠܘܿܬ ܥܡܐ ܘܟܕܐܫܼܬܐܠ ܡܼܢ ܥܡܐ ܥܠ ܐܦ̈ܝ ܗܿܕܐ ܐܡܼܪ ܗܼܘܐ
                    ܐܝܿܠܝܢ ܕܐܬܦܼܩܕ ܘܗܿܝܕܝܢ ܩܕܡܝܗܘܿܢ ܩܪܒܼ ܗܼܘܐ ܠܩܝܣ̈ܐ ܨܝܕ ܚܕܕ̈ܐ ܘܗܘܼܘ ܚܕ܀ ܨ܆ ܕܠ̄ܚ܆
                    ܣܝܼܡ ܐܦܝ̈ܟ ܗ̄ ܡܬܼܢܒܐ ܥܠ ܓܘܿܓ ܕܣܠܼܩܘ ܥܠܝܗܘܿܢ ܒܿܬܪ ܦܘܼܢܝܐ. ܬܦܼܢܐ ܠܡ ܚܘܪܐ ܕܢܦܼܫܟ
                    ܘܐܬܢܒܼܐ ܥܠ ܓܘܿܓ ܘܥܠ ܐܪܥܐ ܕܝܼܠܗ. ܗ݀ܘ ܕܡܡܠܟ ܘܫܠܝܼܛ ܥܠ ܐܪܥܐ. ܕܡܬܼܩܪܐ ܡܓܘܿܓ. ܐܝܼܬܘܗܝ
                    ܕܝܢ ܐܦ ܡܕܒܪܢܐ ܘܪܝܼܫܐ ܐܦ ܕܡܫܟ ܘܬܘܒܝܼܠ. ܐܬܪ̈ܘܬܐ ܕܓܪܒܝܐ. ܡܫܟ ܘܬܘܒܝܼܠ ܒܢ̈ܝ ܝܦܬ ܐܢܘܢܿ
                    ܘܥܠ ܫܡܗ̈ܝܗܘܿܢ ܐܬܼܟܢܝܼܘ ܐܪ̈ܥܬܗܘܿܢ. ܡܫܟ ܡܘܣܝܐ܆ ܬܘܒܝܼܠ ܒܝܬܘܢܝܐ. ܓܡܼܪ ܓܘܼ̈ܬܝܐ ܡܓܘܿܓ
                    ܓܠ̈ܛܝܐ܀ ܐܟܿܢܫܟ ܘܐܪܿܡܐ ܗ̄ ܫܿܒܩ ܐܢܼܐ ܠܟ ܕܬܬܟܼܢܫ ܐܝܿܟܢܐ ܕܐܝܟ ܣܘܼܣܝܐ ܒܦܓܘܕܬܐ. ܕܡܣܿܡ
                    ܒܪܝܼܫܐ ܐܬܿܟܣܝ ܒܝܕ ܡܪܕܘܼܬܐ ܕܡܼܢܫܝܠܝ. ܡܼܢ ܝܘܡ̈ܬܐ ܩܕܡ̈ܝܐ ܗ̄ ܪܡܿܙ ܥܠ ܢܒܝܘܼܬܐ ܕܗܘܼܬܜ
                    ܥܠܘܗܝ ܡܼܢ ܩܕܡ ܫܢ̈ܝܐ ܕܢܐܼܬܐ. ܘܠܘ ܐܟܡܿܢ ܕܐܠܗܐ ܦܩܼܕܗ. ܐܟܘܿܬܗܿ ܕܗܿܕܐ ܐܝܼܬܝܗܿ ܗܿܝ
                    ܕܐܡܼܪ ܩܕܡ ܗܿܟܢ. ܕܐ݀ܦܩܟ ܡܼܕܡ ܐܬܪܟ ܗ̄ ܒܗܿܠܝܢ ܡܿܐܪܙ ܕܠܘ ܐܠܗܐ ܐܦܩܼܗ ܐܠܐ ܥܠ ܡܗܡܝܿܢܘܬܐ
                    ܘܫܘܼܒܩܢܐ ܕܡܼܢ ܐܠܗܐ ܐܡܝܼܪ̈ܢ.. ܡܛܪܐ ܕܓܿܪܦ ܘܟܐܦ̈ܐ ܘܫܪܟܐ ܗ̄ ܒܗܿܠܝܢ ܕܐܡܼܪ ܕܡܝܼܝܼܬ
                    ܥܠ̄ܘ ܪܡܿܙ ܥܠ ܩܫܝܘܼܬܐ ܕܡܚܘܼܬܐ ܕܐܬܿܝܐ ܗܘܼܬ ܥܠܝܗܘܿܢ ܘܠܘ ܕܣܘܼܥܪܢܐܝܼܬ ܗܼܘܘ܀ ܨ܆ ܕܠ̄ܛ
                    ܐܫܿܝܢܟ ܘܐܟܿܢܫܟ ܗ̄ ܒܗܿܢܐ ܠܡ ܢܝܼܫܐ ܫܿܒܩ ܐܢܼܐ ܠܟ ܕܬܬܟܢܼܫ ܘܬܐܼܬܐ ܕܒܗ݀ܝ ܩܿܢܐܼ ܐܢܬ
                
            
            
                 ܡܣܒܪܢܘܼܬܐ ܕܫܝܢܐ ܥܠ ܢܦܼܫܟ ܕܐܢܫ ܠܐ ܙ݀ܟ ܐܠܟ. ܘܐܦܕ ܩܫܼܬܟ ܗ̄ ܕܟܕ ܠܡ
                    ܡܙܝܼܥ ܐܢܬ ܕܪ̈ܥܝܟ ܠܘܿܬ ܩܪܒܐ ܢܬܼܪ̈ܫܠܢ ܡܼܢ ܪܘܓܙܐ ܐܠܗܿܝܐ܀ ܘܬܦܼܠܝ ܩܫܼܬܟ ܡܼܢ ܫܡܼܠܟ
                    ܘܓܐܪ̈ܝܟ ܡܼܢ ܝܡܝܼܢܟ܆ ܐܦܕ ܗ̄ ܐܦܿܠ. ܒܢܘܼܪܐ ܫܒܥ ܫܢ̈ܝܼܢ ܗ̄ ܠܘ ܟ݀ܠܗ ܓܘܐ ܐܠܐ ܥܠ ܢܘܼܪܐ
                    ܕܕܒܚܼ̈ܐ ܕܩܘܼܪ̈ܒܢܐ ܡܛ݀ܠ ܕܪܒܘܼܬܐ ܕܬܕܡܘܼܪܬܐ ܕܗܘܬ݀ ܒܡܿܘܬܐ ܕܒܝܬ ܓܘܿܓ ܡܬܼܢܛܪܝܼܢ ܗܼܘܘ
                    ܩܝܣ̈ܐ ܕܙܝ̈ܢܐ ܘܕܡܫ̈ܟܢܐ ܐܝܟ ܕܢܗܼܘܘܿܢ ܠܕܒܚ̈ܐ ܒܫ̈ܢܝܐ ܕܐܡܼܪ ܢܒܐ. ܘܠܘ ܐܡܝܼܢܐܝܼܬ
                    ܡܿܘܩܕܝܼܢ ܗܼܘܘ ܒܗܘܿܢ ܐܠܐ ܒܝܘܡ̈ܬܐ ܕܥܕܥ̈ܐܕܐ ܘܪ̈ܝܼܫܝ ܝܪ̈ܚܐ ܐܝܟ ܕܠܥܘܼܗܕܢܐ ܘܕܢܚܼܙܘܿܢ
                    ܥܡ̈ܡܼܐ ܕܐܬܿܝܢ ܠܗܝܟܠܐ ܠܡܼܨܠܝܘܼ. ܘܒܿܬܪ ܫܒܥܐ ܝܪ̈ܚܝܼܢ ܗ̄ ܐܡܿܪ ܥܠ ܗܿܢܘܿܢ ܕܒܛܘܼܪ̈ܐ
                    ܘܒܢܚ̈ܠܐ ܕܥܿܪܩܝܼܢ ܘܡܿܝܬܝܢ ܗܼܘܘܘܡܣܼܬܚܦܝܼܢ ܐܟܡܿܢ ܕܡܛ݀ܠ ܣܿܓܝܐܘܼܬܗܘܿܢ ܠܐ ܐ݀ܚܕ ܗܼܘܐ
                    ܠܗܘܿܢ ܐܬܪܐ ܕܚܕܪ̈ܝ ܡܕܝܼܢܬܐ. ܘܢܨܘܐ ܥܠ ܓܒܗ ܨܘܝܐ ܗ̄ ܐܝܟ ܕܢܬܝܼܕܥ ܡܼܢ ܪܘܼܩܐ ܠܗܿܢܘܿܢ
                    ܕܦܪܝܼܫܝܼܢ ܠܗܿܕܐ ܕܡܼܢ ܟܿܠܕܘܿܟ ܢܟܢܫܘܢܼ ܓܪ̈ܡܐ ܘܢܘܒܠܘܢܼ ܠܢܚܠܐ ܐܝܿܟܐ ܕܩܒܝܼܪ. ܨܘܿܝܐ
                    ܐܘܿ ܡܼܢ ܟܐܦ̈ܐ ܐܘܿ ܡܼܢ ܩܝ̈ܣܐ ܡܬܼܥܒܕ ܠܝܼܕܝܼܕܥܘܼܬܐ ܕܫܠܕܐ ܐܘܿ ܕܓܪܡܐ. ܗܿܕܐ ܕܝܢ
                    ܥܿܒܕܝܼܢ ܗܼܘܘ ܕܕܠܡܼܐ ܡܛܟ݀ܠ ܣܿܓܝܐܘܼܬܐ ܕܓܪ̈ܡܐ ܢܬܼܛܡܘܢ ܟܕ ܦ݀ܠܚܝܼܢ ܘܙܪܥܝܼܢ ܘܥܠܗܿܕܐ
                    ܟ݀ܠ ܝܘܿܡ ܡܣܼܬܢܩܝܼܢ ܥܠ ܡܣܼܝܚܘܼܬܐ ܐܝܟ ܢܡܘܿܣܐ. ܘܒܿܬܪ ܕܐܡܼܪ ܣܓܝ̈ܐܬܐ ܥܠ ܦܘܼܢܝܐ
                    ܘܐܘܝܘܼܬܐ ܘܙ݀ܟܘܼܬܐ ܕܩܿܢܝܢ ܒܚܪܬܐ ܡܬܼܕܒܪ ܡܼܢ ܓܠܝܢܐ ܘܪܫܿܡ ܒܟܬܒܐ ܥܠ ܒܢܝܿܢܐ ܕܡܕܝܼܢܬܐ
                    ܘܕܗܝܟܠܐ܀ ܨ܆ ܕܡ̄ ܒܫܢܬ ܚܡܫ ܘܥܣܪܝܼܢ ܕܫܒܝܼܬܢ ܗ̄ ܪܫܿܡ ܠܙܒܼܐ ܕܒܗ ܚܙܼܐ ܠܚܼܙܘܐ. ܐܝܼܕܗ
                    ܕܡܪܝܐ ܗ̄ ܥܠ ܡܥܒܕܢܘܼܬܗ ܡܿܘܕܥܐ. ܐܝܼܕܗ ܕܡܪܝܐ ܗ̄ ܥܠ ܡܥܒܕܢܘܼܬܗ ܡܿܘܕܥܐ. ܘܐܝܬܝܼܝܢܝ
                    ܠܐܪܥܐ ܗ̄ ܒܚܼܙܘܐ. ܘܐܫܪܝܢܝ ܥܠ ܛܘܼܪܐ ܗ̄ ܪܘܡܐ ܕܛܘܼܪܐ ܫܪܪܐ ܘܡܣܬܬܘܼܬܐ ܕܐܝܿܠܝܢ
                    ܕܡܬܼܚ̈ܘܝܢ ܠܗ ܡܒܿܕܩ ܕܥܠܘܗܝ ܗܝܟܠܐ ܕܐܠܗܐ ܥܬܝܼܕ ܕܢܬܼܒܢܐ ܕܐܝܼܬܘܗܝ ܛܘܼܪܐ ܕܨܗܝܘܢܿ.
                    ܘܚܙܝܿܬ ܓܒܪܐ ܗ̄ ܡܠܐܟܐ ܡܕܒܪܢܐ ܕܥܡܐ ܘܐܬܚܼܙܝܼ ܒܐܣܟܡܐ ܕܢܚܫܐ ܕܢܘܕܥ ܥܠ ܚܝܠܬܢܘܼܬܐ ܘܥܠ
                    ܫܘܼܚܠܦ ܡܣܼܬܬܐ ܕܢ݀ܣܒ ܒܐܝܼܕܗ ܡܼܢܕܪܝܼܫ ܗܝܟܠܐ ܘܡܕܝܼܢܬܐ. ܫܘܝܬܐ ܕܟܬܢܐ ܘܩܢܝܐ ܬܚܘܝܼܬܐ
                    ܕܠܘ ܐܝܟ ܕܐܬܿܝܐ ܢܣ̈ܒܢ ܬܘܼܪܨܐ ܗܿܠܝܢ ܕܥܡܐ ܐܠܐ ܒܒܛܝܼܠܘܼܬܐ ܕܐܠܗܐ ܐܟܙܼܢܐ ܕܒܢܝܐ ܠܘܼܩܕܡ
                    ܡܿܫܚ ܒܩܢܝܐ ܘܡܚܼܕܐ ܡܿܬܚ ܚܒܠܐ ܘܥ̄ܠܘ ܒܿܢܐ. ܚܙܝܿܬ ܫܘܼܪܐ ܗ̄ ܫܘܼܪܐ ܕܟܪܝܼܟ ܠܗܝܠܟܐ
                    ܘܠܕܪܬܗ ܣܝܦܐ ܩ݀ܪܐ ܠܕܗܠܝܼܙ ܕܩܕܡ ܬܪܥܐ ܕܕܪܒܣ ܦܪ̈ܘܼܣܬܕܐ ܩܝܡ̈ܐ ܕܬܪ̈ܥܐ ܕܢܩܝܼܦܝܼܢ ܠܐܣܼܬܐ
                    ܡܼܢ ܬܪ̈ܝܗܘܿܢ ܓܒ̈ܝܗܿ. ܘܐܣܟܘܼܦܬܗ ܕܬܪܥܐ ܘܬܠܬܐ ܡܟܐ ܗ̄ ܒܡܥܠܢܗ ܕܬܪܥܐ ܒܗ ܒܡܪܒܥܐ ܬܠܬܐ
                    ܬܪ̈ܥ ܩܝܿܡܝܼܢ ܗܼܘܘ ܒܗ ܐܝܿܠܝܢ ܕܚܕܐ ܗܘܼܬ݀ ܡܫܘܼܚܬܐ ܕܝܼܠܗܘܿܢ. ܠܗܿܕܐ ܓܝܪ ܕ݀ܡܝܐ ܕܐܡܿܪ
                    ܬܢܢ ܘܠܘ ܕܬܠܬܐ ܩܢ̈ܝܐ ܕܡܫܘܼܚܬܐ ܗܿܘܐ ܗܼܘܐ ܡܥܠܢܗ ܕܬܪܥܐ܆ ܘܗ݀ܟܢܐ ܗܿܝ ܕܬܠܬܐ ܡܟܼܐ 
            
            
                 ܥܦܝܼܦܘܼܬܐ ܗܿܝ ܕܡܥܼܠܬܐ ܘܠܘ ܕܫܬܐ ܬܪ̈ܥܐ ܡܚܿܘܐ ܕܐܝܼܬ ܗܼܘܘ ܠܗ ܠܡܥܠܢܐ.
                    ܘܡܫܼܚ ܦܬܼܝܐ ܕܡܠܥܢܗ ܝܓ̄ ܐܡܝܼܢ ܗ̄ ܡܿܘܕܥ ܓܝܪ ܕܐܝܿܟܢܐ ܕܗܼܘ ܡܢܝܿܢܐ ܡܬܼܬܪܝܼܡ ܗܼܘܐ ܩܕܡ
                    ܚܙܼܬܗ ܕܢܒܝܐ. ܗܿܟܢܐ ܐܦ ܗܼܢܘܿܢ ܬܪ̈ܥܐ ܡܬܼܪܘܚܝܼܢ ܗܼܘܘ ܘܡܬܼܬܪܝܡܝܼܢ ܠܥܼܠ ܐܝܿܟܢܐ ܕܡܼܢ
                    ܡܫܘܼܚܬܐ ܕܚܕ ܩܢܝܐ ܡܬܼܪܒܐ ܗܼܘܐ ܬܪܥܐ ܬܡܢܐ ܐܡ̈ܝܼܢ ܘܬܘܼܒ ܝ̄ܓ ܘܒܿܬܪܟܢ ܒܐܝܼܕܐ ܠܐܝܿܠܝܢ
                    ܕܣܓ̈ܝܐܢ ܡܼܢ ܗܿܠܝܢ. ܘܬܚܘܼܡܐ ܕܩܕܡ ܗ̄ ܐܡܿܪ ܠܗ݀ܘ ܡܕܡ ܕܩܕܡ ܐܣܟܘܼܦܬܐ ܣܝܼܡ ܗܼܘܐ ܐܘܿ
                    ܟܐܦܐ ܐܝܼܬܝܗܿ ܗܼܘܬ݀ ܐܘܿ ܡܕܡ ܐܚܪܝܢ. ܐܡܬܐ ܚܕܐ ܐܝܟ ܕܡܼܬܟܪܟ. ܘܓܘܗܿ ܫܬ ܐܡ̈ܝܼܢ ܗ̄ ܥܠ
                    ܐܣܟܘܼܦܬܐ ܐܡܿܪ ܕܗܿܟܢܐ ܕܪܡܐ ܗܼܘܬ݀ ܡܼܢܟ݀ܠ ܓܒ̈ܝܼܢ ܫܬ ܐܡ̈ܝܼܢ. ܐܘܿ ܕܐܪܝܼܟܐ ܗܘܼܬ݀ ܝܒ̄
                    ܐܡ̈ܝܼܢ. ܐܝܟ ܦܬܝܗ ܕܬܪܥܐ ܫܬ ܐܡܝܼܢ ܡܼܢ ܓܒܐ ܚܕ ܕܬܚܘܼܡܐ ܕܩܕܡ ܐܣܟܘܼܦܬܐ ܘܫܬ ܐܡܝܼܢ ܡܼܢ
                    ܓܒܗܿ ܐܚܪܢܐ. ܡܫܼܚܗ ܠܬܪܥܐ ܡܼܢ ܐܓܪܗ ܗ̄ ܐܓܪܗ ܕܬܪܥܐ ܡܬܐܼܡܪ ܚ̈ܬܐ ܕܝܼܠܗ ܕܬܪܥܐ ܘܐܣܼܬܐ
                    ܕܠܥܼܠ ܡܢܼܗܝܢ ܗ̄ ܫܡܼ̈ܝ ܡܪܒܒܐ. ܡܼܢ ܐܓܪܐ ܠܐܓܪܐ ܗ̄ ܡܼܢ ܓܘܼܢܝܐ ܠܓܘܼܢܝܐ. ܬܪܥܐ ܠܘܼܩܒܠ
                    ܐܘܿ ܥܠܝܗܘܿܢ ܕܬܪ̈ܥܐ ܐܝܿܠܝܢ ܕܒܗ ܒܡܥܠܢܐ ܗܿܢܐ ܪܘܼܝܚܐ ܩܝܿܡܝܼܢ ܗܼܘܘ ܐܡܿܪ ܐܘܿ ܥܠ ܡܪ̈ܒܒܐ
                    ܐܚܪ̈ܢܐ ܕܗܝܟܠܐ ܡܚܿܘܚܐ ܗܿܟܢܐ ܐܝܼܬܝܗܘܿܢ ܒܕܡܘܼܬܗ ܕܬܪܥܐ ܗܿܢܐ ܕܐܫܼܬܥܝܼ ܥܠ̄ܘ ܘܚܕ ܠܘܼܩܒܠ
                    ܚܕ ܩ݀ܝܡܝܼܢ ܗܼܘܘ. ܘܥܒܼܕ ܩܕܡ ܐܦ̈ܝ ܬܪܥܐ ܫܬܝܼܢ ܐܡ̈ܝܼܢ ܚܡܫܝܢ ܐܡ̈ܝܼܢ ܗ̄ ܒܝܕ ܗܿܠܝܢ
                    ܡܿܘܕܥ ܥܠ ܫܛ̈ܚܐ ܪ̈ܘܝܼܚܐ ܕܐܝܼܬ ܗܼܘܘ ܩܕܡܝܗܘܿܢ ܬܪ̈ܥܐ ܕܐܝܿܠܝܢ ܕܚܿܫܚܝܼܢ ܗܼܘܘ ܟܐܡܼܬ݀
                    ܠܟܢܘܼܫ̈ܝܐ ܪܘܪ̈ܒܐ ܕܒܢܝ̈ܢܫܐ ܗܿܢܘܿܢ ܕܨ݀ܝܒܝܼܢ ܗܼܘܘ ܠܗܝܟܠܐ ܒܬܪ̈ܥ ܘܟܘ̈ܐ ܗ̄ ܡܼܢ ܠܓܘ
                    ܫܛ̈ܝܼܦܢ ܗܼܘ̈ܝ ܘܬܡܼܢ ܠܒܪ ܩܛܝܼ̈ܢܢ ܗܿܠܝܢ ܕܠܥܼܠ ܡܼܢ ܚ̈ܬܐ ܘܦܪ̈ܘܼܣܬܕܐ ܐܝܼܬܝܗܝܢ ܗܼܘ̈ܝ.
                    ܐܥܠܼܢܝ ܠܕܪܬܐ ܒܪܝܬܐ ܗ̄ ܟ݀ܠܗܝܢ ܗܿܠܝܢ ܕܐܫܼܬܥܝܼ ܥܠܝܗܝܢ ܥܕܡܐ ܠܗܪܟܐ ܕܬܪܥܐ ܒܪܝܐ ܕܝܪܠܗ
                    ܕܫܘܼܪܐ ܗ݀ܘ ܕܠܟܿܠܗ ܒܝܬܐ ܗ݀ܘ ܟܿܪܟ ܘܚܿܕܪ ܐܝܼܬܝܗܝܢ. ܘܡܼܢ ܕܫܠܼܡ ܬܫܥܝܼܬܗ ܕܗ݀ܘ ܐܡܼܪ
                    ܕܐܥܼܠܗ ܗܿܘ ܕܡܿܕܒܪ ܗܼܘܐ ܠܗܿ ܠܕܪܬܐ ܒܪܝܬܐ ܘܚܼܙ ܕܟܿܠܗܿ ܒܕܪ̈ܓܐ ܡܬܼܟܪܟܐ ܗܘܬ݀ ܐܝܿܠܝܢ
                    ܕܚܕ ܥܠ ܚܕ ܬܠܬܝܼܢ ܙܒ̈ܢܝܼܢ ܒܿܢܝܢܼܗܼܘܘ. ܦܬܝܗ ܕܝܢ ܕܡܼܢ ܩܕܡ ܬܪܥܐ ܗ̄ ܡܫܘܼܚܬܐ ܕܒܝܢܬܗܘܿܢ
                    ܕܡܼܢ ܬܪܥܐ ܠܬܪܥܐ ܐܡ̈ܐ ܡܐܐ. ܚܢܘ̈ܬܐ ܕܪܘܪ̈ܒܢܐ ܐܡܿܪ ܐܝܿܠܝܢ ܕܒܝܘܡ̈ܬܐ ܕܥܐܕ̈ܐ ܡܬܼܟܢܫܝܼܢ
                    ܗܼܘܘ ܒܗܝܢ. ܗܿܠܝܢ ܕܬܪ̈ܥܐ ܕܝܼܠܗܝܢ ܠܬܝܡܢܐ ܚܿܝܪܝܼܢ ܗܼܘܘ ܟܕ ܩܪܝܼܒܝܼܢ ܠܣܛܪܗ ܕܬܪܥܐ
                    ܡܕܢܚܝܐ ܗ݀ܘ ܕܚܿܐܪ ܗܼܘܐ ܠܦܢܝܼܬܐ ܕܓܪܒܝܐ. ܠܬܪܥܐ ܕܓܪܒܝܐ ܗ̄ ܐܦ ܗܿܢܐ ܫܿܘܐܼ ܒܟ݀ܠܗܝܢ
                    ܕܝܼܠܗ ܥܡ ܐܚܪ̈ܢܐ ܣܛܪ ܡܼܢ ܐܟܣܕܪ̈ܐ ܕܐܡܼܪ ܕܐܝܼܬ ܗܼܘܐ ܠܓܘ ܡܼܢ ܦܪ̈ܘܣܼܬܕܐ ܕܝܼܠܗ ܕܬܪܥܐ
                    ܘܡܼܢ ܗܿܢܐ ܬܪܥܐ ܘܡܼܢ ܗܿܢܐ ܦܬܘܿܪ̈ܐܗ ܕܟܐܦ̈ܐ ܐܝܼܬܗܼܘܘ ܬܡܢܝܐ. ܐܪܒܥܐ ܡܼܢ ܚܕ ܓܒܐ ܘܐܪܒܥܐ
                
            
            
                 ܒܓܒܐ ܐܚܪܢܐ. ܬܪܝܢ ܠܓܘ ܡܼܢ ܦܪ̈ܘܣܬܕܐ ܘܠܓܘ ܡܼܢ ܐܟܣܚܕܪ̈ܐ. ܘܬܪܝܢ ܡܼܢ
                    ܠܒܪ ܦܪ̈ܘܼܣܬܕܐ ܕܥܠܝܗܘܿܢ ܢ݀ܟܣܝܼܢ ܗܼܘܘ ܚܝܘ̈ܬܐ. ܐܟܣܕܪ̈ܐ ܠܐܣ̈ܛܘܐ ܩܿܪܐ ܐܘܿ ܠܒܘܼܣܠܝܼܩܐ
                    ܨ̄܆ ܕܡ̄ܐ ܘܐܥܠܼܢܝ ܠܗܝܟܠܐ ܘܡܫܼܚܗ ܗ̄ ܥܠ ܐܣܼ̈ܐ ܕܒܢܼܐ ܫܠܝܡܘܿܢ ܐܬܼܒܢܝܼ ܦܬܝܗ ܕܡܫܼܟܢܐ ܗ̄
                    ܥܠ ܐܣ̈ܐ ܕܒܢܼܐ ܫܠܝܡܘܿܢ ܐܬܼܒܢܝܼ. ܡܫܟܢܐ ܕܬܪܥܐ ܐܡܿܪ ܠܘܠܐ ܐܘܟܝܬ ܦܪܣܐ ܕܬܿܠܐܼ ܥܠ ܬܪܥܐ
                    ܡܛ݀ܠ ܕܝܢ ܕܐܡܼܪ ܠܥܠ ܕܦܬܝܗ ܕܐܦ̈ܝ ܬܪܥܐ ܘܡܥܠܢܗ ܕܬܪܥܐ ܥܣܪ ܐܡ̈ܝܼܢ ܗܿܘܐ ܗܼܘܐ. ܐܬܚܼܙܝܬ݀
                    ܠܗ ܕܠܗܿܠܝܢ ܢܦܠܓܼ ܠ̄ܒ ܣܕܪ̈ܝܢ ܚܡܫ ܚܡܫ ܐܘܿ ܠܦܘܼܬ ܬ̈ܥܐ ܬܪܝܢ ܬܐܡ̈ܐ ܕܒܗ ܒܡܥܠܢܐ ܩ݀ܝܡܝܼܢ
                    ܗܼܘܘ ܐܘܿ ܡܛ݀ܠ ܐܦܝ̈ ܬܪܥܐ ܬܿܠܝܢܼ ܗܼܘܘ ܒܗ ܒܿܬܪ ܕܡܫܼܚ ܠܗܝܟܠܐ ܐܝܟ ܗ݀ܘ ܕܫܠܝܡܘܿܢ ܐܡܿܪ
                    ܥܠ ܩܕܘܼܫܩܘܼܕ̈ܫܝܼܢ. ܘܡܫܚܗ ܠܬܪܥܐ. ܘܦܬܝܗ ܫܒܥ ܐܡ̈ܝܼܢ ܗ̄ ܬܪܬܝܢ ܐܡ̈ܐ ܦܬܝܗ ܕܬܪܥܐ
                    ܐܝܼܬܝܗܝܢ. ܫܬ ܕܝܢ ܦܬܝܐ ܕܐܣܼܬܐ ܕܬܪܥܐ. ܗܿܕܐ ܕܝܢ ܕܦܬܝܗ ܫܒܥ ܪܘܡܗ ܕܬܪܥܐ ܐܝܼܬ̄ܘ ܘܠܘ
                    ܦܬܝܗ ܘܛܥܘܼܢܐ ܘܦܘܕܐ ܕܟܬܘܿܒ̈ܐ ܗܼܘ. ܘܡܫܼܚ ܐܣܼܬܐ ܕܒܝܬ ܫܬ ܗ̄ ܐܡܿܪ ܥܠ ܕܦܢ̈ܬܐ ܕܠܒܪ ܡܼܢ
                    ܐܣܼܬܗ ܕܒܝܬܐ ܗ̄ ܟܐܦ̈ܐ ܐܝܿܠܝܢ ܕܡܼܢ ܐܣܼܬܗ ܕܗܝܟܠܐ ܢܦܩ̈ܢ ܗܼܘ̈ܝ ܘܡܛ̈ܠܠܢ ܘܐܝܼܬܝܗܝܢ
                    ܗܼܘ̈ܝ ܐܟܣܕܪ̈ܐ ܗ̄ ܐܝܟܐܣܼ̈ܛܘܐ. ܐܝܿܠܝܢ ܕܠܗ ܠܒܝܬ ܟܪ̈ܝܼܟܢ ܗܼܘ̈ܝ ܕܡܼܢ ܓܪܒܝܐ ܘܡܼܢ
                    ܬܝܡܢܐ. ܘܕܦ̈ܢܬܐ ܕܦܢܼܐ ܥܠ. ܘܬܠܬ ܙܒ̈ܢܝܼܢ ܗ̄ ܠܘ ܓܝܪ ܟܿܠܗܝܢ ܡܛ̈ܠܠܢ ܗܼܘ̈ܝ ܐܠܐ ܬܠܬ
                    ܒܠܚܘܼܕ ܚܕܐ ܠܥܼܠ ܡܼܢ ܚܕܐ. ܕܫܪܟܐ ܕܝܢ ܐܝܼܬܝܗܝܢ ܗܼܘ̈ܝ ܕܠܐ ܬܛܠܝܼܠܐ ܐܝܟ ܟܐܦ̈ܐ
                    ܝܼܚܝܼܕ̈ܝܬܐ ܗܿܠܝܢ ܕܐܦ ܓܕܢ̈ܦܐ ܘܬܝܼ̈ܟܐ ܡܥܿܕܝܼܟܢ ܠܡܩܼܪܐ ܐܢܝܢ. ܘܥܐܠ̈ܢ ܒܐܣܼܬܗ ܕܗܝܟܠܐ
                    ܢܦܩ̈ܢ ܗܼܘ̈ܝ ܐܚ̈ܕܢ ܠܐܣܼܬܗ ܕܗܝܟܠܐ. ܒܝܕ ܬܛܠܝܼܠܐ ܕܩܝܣ̈ܝܗܝܢ ܘܡܦܪ̈ܩܢ ܡܼܢ ܐܣܼܬܐ ܡܛ݀ܠ
                    ܗܿܝ ܕܠܘ ܒܗܿ ܒܐܣܼܬܐ ܕܗܝܟܠܐ ܥܐܠ̈ܢ ܗܼܘ̈ܝ ܡܢܼܗ ܕܒܝܬܐ ܡܬܼܬܣܝܼܡܝܼܢ ܗܼܘܘ. ܕܢܬܼܟܪ̈ܟܢ ܡܼܢ
                    ܠܥܼܠ ܕܢܪܘܚ ܒܝܬܐ ܗ̄ ܠܘ ܕܝܢ ܗܼܘ ܗܝܟܠܐ ܡܼܬܪܘܚ ܗܼܘܐ ܒܒܢܝܿܢܗܝܢ ܐܠܐ ܗܼܢܝܢ ܚܕܪ̈ܬܐ ܐܟܡܿܢ
                    ܕܠܘ ܒܗܿ ܒܐܣܼܬܗ ܕܗܝܟܠܐ ܐܠܐ ܥܠ ܟܐܦ̈ܐ ܕܝܼܠܗ ܡܬܼܛ̈ܠܠܢ ܗܼܘ̈ܝ. ܘܡܼܢ ܠܬܼܚܬ ܢܗܼܘܘܢܿ܀
                    ܠܥܠܝܼܬܐ ܗ̄ ܬܠܬ ܗܿܟܝܼܠ ܚܕܐ ܠܥܼܠ ܡܼܢ ܚܕܐ ܠܚܕܐ ܡܚܘܐ ܕܡܬܼܒ̈ܢܝܢ ܗܼܘ̈ܝ. ܘܗܿܟܢܐ ܡܼܢ ܚܕܐ
                    ܠܚܕܐ ܡܣܩ̈ܢܐ ܒܓܘܗܝܢ ܥܒܝܼܕܝܼܢ ܗܼܘܘ ܠܗܝܢ. ܘܚܙܝܿܬ ܪܘܡܗ ܕܒܝܬܐ. ܫܬ ܐܡ̈ܝܼܢ ܗ̄ ܡܿܘܕܥ ܥܠ
                    ܒܢܝܿܢܐ ܕܐܣ̈ܝܗܝܢ ܕܟܡܼܐ ܗܿܘܐ ܗܼܘܐ ܦܬܝܗܝܢ. ܘܕܟܡܐ ܬܘܼܒ ܦܬܝܐ ܕܐܟܣܕܪ̈ܐ ܕܠܗܝܢ ܩܿܪܐ
                    ܕܒܦܢ̈ܬܐ. ܟܕ ܩܿܪܐ ܕܦܢ̈ܬܐ ܠܓܝܼܣܪ̈ܐ ܕܢܿܦܩܝܼܢ ܡܼܢ ܐܣܼ̈ܐ ܕܡܩܼܒ̈ܠܢ ܗܼܘ̈ܝ ܒܢܝܿܢܐ
                    ܕܐܣܼ̈ܛܘܐ ܬܠܬܐ ܕܡܼܬܟܪܟܝܼܢ ܗܼܘܘ ܠܟܿܠܗ ܗܝܠܟܐ. ܒܿܬܪ ܗܿܠܝܢ ܐܡܿܪ ܥܠ ܒܢܝܿܢܐ ܕܫܘܼܪܐ
                    ܡܥܪܒܝܐ ܕܠܗ ܩܿܪܐ ܓܙܝܼܪܬܐ. ܕܟܡܼܐ ܗܿܘܐ ܠܟܿܠ ܦܢ̈ܝܢ. ܗܿܢܐ ܕܝܢ ܐܝܟ ܕܠܡܘܬܒܐ ܕܟܗ̈ܢܐ
                    ܡܬܼܦܪܫ ܗܼܘܐ ܒܗ݀ܝ 
            
            
                 ܒܕܩܪܝܼܒܘܼܬܐ ܕܗܝܟܠܐ ܡܬܼܦܩܕܝܢ ܗܼܘܘ ܠܡܥܼܡܪ. ܘܡܫܼܚܗ ܠܒܝܬܐ ܗ̄ ܡܐܐ ܕܝܢ
                    ܐܡ̈ܝܼܢ ܥܡ ܐܡ̈ܐ ܕܐܣܼܬܐ ܗܿܘܐ ܗܼܘܐ ܠܘ ܕܗܼܘ ܗܝܟܠܐ ܩܿܢܐܼ ܗܼܘܐ ܡܫܘܼܚܬܐ ܗܿܕܐ ܐܠܐ ܕܡܿܝܐ
                    ܕܠܕܪ̈ܬܐ ܡܥܪ̈ܒܝܬܐ ܘܡܕܢܚ̈ܝܬܐ ܕܝܼܠܗ ܕܒܝܬܐ ܐܡܿܪ. ܩܪܡ ܩܝܣ̈ܐ ܟܕ ܚܿܕܪܝܢ ܗ̄ ܩܪ̈ܡܐ ܠܘ
                    ܠܬܪ̈ܥܐ ܐܡܿܪ ܐܠܐ ܠܣܼܦܐ ܘܐܦ ܠܦܪ̈ܘܼܣܬܕܐ ܕܒܩܪ̈ܡܐ ܕܩܝܣ̈ܐ ܘܕܓܠ̈ܦܐ ܡܨܒܬܝܼܢ ܗܼܘܘ ܐܝܟ ܕܐܦ
                    ܡܼܢ ܠܓܘ ܟܿܠܗ ܒܝܬܐ ܩܝܣܐ ܩܪܝܼܡ ܗܼܘܐ ܘܐܘܼܪܟܗ ܥܕܡܐ ܠܟܘ̈ܐ. ܘܐܦ̈ܝ ܩܘܼܕ̈ܫܐ.. ܕܩܝܣܐ ܗ̄
                    ܕܡܕܒܚܐ ܠܡ ܕܡܬܼܚܙܐ ܗܼܘܐ ܬܡܿܢ ܕܡܿܐ ܗܼܘܐ ܠܐܝܿܢܐ ܕܡܪܟܼܒ ܡܼܢ ܩܝܣ̈ܐ. ܐܡܿܪ ܕܝܢ ܥܠ ܡܕܒܚܐ
                    ܗ݀ܘ ܕܡܬܼܬܣܝܼܡ ܗܼܘܐ ܥܠܘܗܝ ܒܠܚܡ ܐܦ̈ܐ. ܠܗܿܢܐ ܓܝܪ ܩܿܪܐ ܐܦܝ̈ ܚܙܼܘܐ ܕܩܘܼܕܫܐ. ܐܟܡܿܢ ܕܟܕ
                    ܒܩܘܼܕܫܐ ܣܝܼܡ ܗܼܘܐ ܗ̄ ܒܗܝܟܠܐ ܘܒܝܬ ܩܘܼ̄ܕ ܐܝܼܬ̄ܘ ܗܼܘܐ ܬܘܼܒ ܩܕܡ ܐܦܘ̈̄ ܕܐܠܗܐ ܣܝܼܡ
                    ܗܼܘܐ. ܐܝܟ ܦܬܘܿܪܐ. ܬܪܝܢ ܬܪ̈ܥܝܼܢ ܠܡܪ̈ܟܒܐ ܗ̄ ܬܐܡ̈ܬܐ܆ ܨ܆ ܕܡܒ̄ ܘܩܕܡ ܐܟܣܕܪ̈ܐ ܒܝܬ
                    ܗܠܟܬܐ܀ ܘܐܘܼܪܟܐ ܗ̄ ܘܬܪܥ ܕܒܝܬ ܗܠܼܟܬܐ ܠܓܪܒܝܐ. ܐܟܣܕܪ̈ܐ ܕܝܢ ܩ݀ܪܐ ܠܐܣܼ̈ܛܘܐ ܐܝܿܠܝܢ
                    ܕܠܓܪܒܝܐ ܡܢܼܗ ܕܡܿܬܐ ܐܝܼܬܝܗܝܢ ܗܼ̈ܘܝ ܘܐܡܿܪ ܬܘܼܒ ܥܠ ܐܬܪܐ ܕܒܝܬ ܗܠܼܟܬܐ ܕܟܗ̈ܢܐ ܕܩܕܡܝܗܝܢ
                    ܘܐܟܣܕܪ̈ܐ ܥܠ̈ܝܬܐ ܕܙܥܘܪ̈ܝܼܢ ܗܼܘ̈ܝ ܐܝܟ ܥܡܘܼ̈ܕܐ ܕܕܪܬܐ ܗ̄ ܡܛ݀ ܓܝܪ ܕܬܪܬ ܓܘܼ̈ܢܘܢܿ
                    ܐܝܼܬ̄ܘ ܗܼܘܐ ܬܘܼܩܢܗܝܢ ܕܗܿܠܝܢ ܐܟܣܕܪ̈ܐ ܙܥܘܪ̈ܝܼܢ ܗܼܘ̈ܝ ܡܼܢ ܬܚܬܝܬܐ ܘܡܼܢ ܡܨܥܝܬܐ ܒܗܿܝ
                    ܕܥܿܐܠܝܼܢ ܗܼܘܘ ܒܗܝܢ ܕܪ̈ܓܐ. ܫܚ̈ܝܼܡܢ ܗܼܘ̈ܝ ܕܝܢ ܐܦ ܡܼܢ ܨܒܼܬܐ ܕܥܡܘܼ̈ܕܐ ܐܝܿܠܝܢ ܕܠܕܪܬܐ
                    ܘܠܐܟܣܕܪ̈ܐ ܐܚܪ̈ܢܝܬܐ ܐܝܼܬ ܗܼܘܘ. ܡܿܘܕ ܕܝܢ ܒܝܕ ܗܿܠܝܢ ܕܒ݀ܬܪܟܢ ܥܠ ܡܫܘܼܚܬܐ ܕܐܟܣܕܪ̈ܐ
                    ܕܕܪܬܐ ܘܕܠܐܝܿܟܐ ܚܿܝܪܝܼܢ ܗܼܘܘ ܬܪ̈ܥܝܗܝܢ ܘܕܐܝܼܬܝܗܝܢ ܡܪ̈ܒܥܬܐ. ܘܕܐܝܼܬ ܠܚܕܐ ܡܢܼܗܝܢ
                    ܐܘܼܪܚܐ ܕܡܬܼܟܪܟܐ ܗܼܘܬ݀ ܥܠ ܓܒܗ ܕܢܚܠܐ ܡܕܢܚܝܐ. ܬܪܥ ܒܪܝܼܫ ܐܘܼܪܚܐ ܗ̄ ܠܬܪܥܐ ܕܫܘܼܪܐ ܒܪܝܐ
                    ܐܡܿܪ ܘܡܐ ܕܥܿܐܠ ܗܼܘܐ ܒܗ ܥܡܐ ܡܬܼܟܪܟ ܗܼܘܐ ܥܠ ܫܘܼܪܐ ܘܐܙܿܠ ܗܼܘܐ ܐܘܿ ܠܬܪܥܐ ܕܕܪܬܐ
                    ܓܪܒܝܝܬܐ ܐܘܿ ܠܬܪܥܐ ܕܕܪܬܐ ܬܝܡܢܝܬܐ. ܗ݀ܝ ܕܒܢܚܠܐ ܡܕܢܝܚܐ ܠܗܿܝ ܕܬܪܥܐ ܒܪܝܼܫ ܐܘܼܪܚܐ ܙ݀ܕܩ
                    ܕܢܩܼܦܝܗܿ ܗܿܝ ܕܐܘܼܪܚܐ ܒܐܦ̈ܝ ܐܣܼܬܐ ܗ̄ ܒܡܨܥܬܐ ܣܝܼܡܐ ܟܕ ܐܚܪܝܬܐ ܗܿܝ ܘܐܝܼܬܝܗܿ ܗܿܟܢ
                    ܕܬܪܥܐ ܒܪܝܼܫ ܐܘܼܪܚܐ ܕܡܼܢ ܬܪܥܐ ܘܥܕܡܐ ܠܕܪܬܐ ܕܗܝܟܠܐ. ܒܐܦ̈ܝ ܐܣܼܬܐ ܕܫܘܼܪܐ ܒܪܝܐ ܐܙܿܠܐ
                    ܗܼܘܬ݀. ܕܢܦܼܪܘܿܫ ܗ̄ ܓܿܠܐ ܠܥܠܼܬܐ ܕܒܢܝܿܢܗ ܕܫܘܼܪܐ. ܒܝܬ ܩܘܼ̄ܕ ܗ̄ ܒܝܬ ܐܬܪܐ ܩܕܝܼܫܐ
                    ܐܝܿܟܢܐ ܕܐܢܫ ܡܣܝܒܼܐ ܐܘܿ ܛܡܼܐܐ ܠܐ ܡܦܣ ܗܼܘܐ ܠܗ ܠܡܼܕܪܟ ܒܗ. ܘܒܢܝܿܢܐ ܕܝܢ ܕܗܿܢܐ ܕܩܢ̈ܝܐ
                    ܕܣܿܐܡ ܗܿܪܟܐ ܥܠ ܟܪܘܼܟܝܐ ܕܝܼܠܗ ܕܫܘܼܪܐ ܕܗܝܟܠܐ܆ ܐܢܓܝܪ ܗܼܘ ܩܢܝܐ ܫܬ ܐܡ̈ܝܼܢ ܘܦܠܓܗܿ ܗܿܘܐ
                    ܗܼܘܐ 
            
            
                 ܘܒܗ ܚܡܫܡܐܐ ܩܢܝ̈ܢ ܠܟܿܠ ܦܢܝܼܬܐ ܐܝܼܬܘܗܝ ܫܘܼܪܗ ܕܒܝܬܐ ܐܝܿܟܢܐ ܠܐ ܓܠܝܐ
                    ܕܝܬܝܼܪ ܐ̈ܠܦܐ ܬܠܬܐ ܕܐܡ̈ܐ ܗܿܘܝܐ ܗܘܬ݀. ܟܿܠ ܦܢܝܼܬܐ ܕܐܘܼܚܕܢܐ ܕܝܼܠܗ ܕܗܝܟܠܐ ܐܝܿܟܐ ܕܟܕ
                    ܐܢܫ ܢܥܩܼܒ ܥܠ ܗܿܠܝܢ ܡܕܡ ܕܙܥܘܿܪ ܡܫܟܼܚ ܕܒܨܝܼܪܐ ܡܫܘܼܚܬܐ ܗܿܕܐ ܕܗܝܟܠܐ ܡܼܢ ܗ݀ܝ ܕܟܿܠܗܿ
                    ܡܕܝܼܢܬܐ ܐܢܗܼܘ ܕܐܝܟ ܡܠܼܗ ܕܢܒܝܐ ܠܟܿܠ ܦܢܝܼܬܐ ܐܪܒܥܐ ܐ̈ܠܦܝܼܢ ܘܚܡܫܡܐܐ ܐܡ̈ܐ ܗܿܘܝܐ ܗܘܬ݀
                    ܡܿܕܝܢ ܐܡܿܪܝܼܢ ܕܟܒܼܪ ܡܫܘܼܚܬܐ ܗܿܕܐ ܕܐܡ̈ܐ ܗܘܬ݀ ܘܠܘ ܕܩܢ̈ܝܐ ܟܕ ܚܠܦ ܐܡ̈ܐ ܛܥܼܘ ܟܬܘ̈ܒܐ
                    ܘܪܫܡܼܘ ܩܢ̈ܝܐ ܟܕ ܚܠܦ ܐܡ̈ܐ ܛܥܼܘ ܟܬܘ̈ܒܐ ܘܪܫܡܼܘ ܩܢ̈ܝܐ. ܪܘܼܚܐ ܩܿܪܐ ܠܦܢܝ̈ܬܐ܀ ܨ܆ ܕܡܓ̄
                    ܘܗܿܐ ܫܘܼ̄ܗ ܕܐܠܗܐ ܗ̄ ܡܛ݀ܠ ܓܝܪ ܕܒܙܼܒܢܐ ܗ݀ܘ ܟܕ ܐܬܼܐ ܢܒܝܐ ܒܝܕ ܓܠܝܿܢܐ ܠܡܚܼܙܐ ܛܢܼܦܘ̈ܬܐ
                    ܕܡܕܝܼܢܬܐ ܕܒܗ ܒܗ݀ܘ ܬܪܥܐ ܚܙܼܝܗܝ ܠܓܠܝܿܢܐ ܕܫܘܼܒܚܗ ܕܐܠܗܐ ܕܫܢܼܝ ܘܢܦܼܩ ܡܼܢ ܗܝܟܠܐ
                    ܘܡܕܝܼܢܬܐ ܠܐܬ݀ܐ ܕܚܘܼܪܒܗܘܿܢ. ܗܿܟܢܐ ܐܦ ܗܿܫܐ ܕܐܬܼܚܘܝܼ ܠܗ. ܗܿܠܝܢ ܕܬܘܼܩܢܗܘܿܢ ܐܦ ܠܗ
                    ܠܦܘܼܢܝܐ ܕܫܘܼܒܚܗ ܕܐܠܗܐ ܕܠܗܝܟܠܐ ܐܫܼܬܘܝܼ ܕܒܗ ܒܬܪܥܐ ܢܚܼܙܐ. ܘܡܚܿܘܐ ܕܝܢ ܕܐܦ ܒܟܠܿܡܕܡ
                    ܕܡܿܐ ܚܙܼܘܐ ܕܐܚܪܝܐ ܠܩܕܡܝܐ ܐܟܡܿܢ ܕܗܘܼ ܐܝܼܬܘܗܝ ܗ݀ܘ ܕܐܬܚܼܙܝܼ ܠܗ ܗܿܝܕܝܟ. ܘܐܦ ܗܿܫܐ.
                    ܐܝܟ ܚܙܼܘܐ ܕܚܙܝܿܬ ܟܕ ܐܬܝܿܬ ܗ̄ ܕܢܒܼܕܩ ܕܠܘ ܐܚܪܢܐ ܗܿܘ ܗܿܢܐ ܕܡܦܿܢܐ ܠܗܘܿܢ ܠܗ݀ܘ ܕܐܫܼܒܝܼ
                    ܐܢܘܿܢ ܐܠܐ ܕܗܘܼܝܘܼ. ܗܿܝܕܝܟ ܐܝܼܬܝܗܿ ܠܢܒܝܐ ܕܢܬܼܢܒܐ ܥܠ ܚܘܼܒܠܗܿ ܕܡܕܝܼܢܬܐ ܘܗܿܫܐ
                    ܐܝܼܬܝܗܿ ܕܢܬܢܼܒܐ ܥܠ ܒܢܝܿܢܗܿ. ܘܫܡܿܥܬ ܡܕܡ ܕܐܡܼܪ ܠܝܼ. ܩܿܐܡ ܗܼܘܐ ܠܘܿܬܝ ܗ̄ ܠܗ ܓܝܪ
                    ܠܓܒܪܐ ܗ݀ܘ ܕܚܘܝܗ ܗܿܠܝܢ ܟ݀ܠܗܝܢ ܚܿܙܐ ܗܼܘܐ ܐܦ ܗܿܫܐ ܕܩܿܐܡ ܠܘܿܬܗ. ܩܿܠܐ ܕܝܢ ܠܘ ܡܢܼܗ
                    ܕܓܒܪܐ ܡܫܼܬܡܥ ܠܘܿܬܗ ܐܠܐ ܡܼܢ ܓܘ ܒܝܬܗ ܡܼܢ ܫܟܝܼܢܬܐ ܐܠܗܿܝܬܐ ܕܥܠܼܬ݀ ܠܗܿ ܠܬܡܿܢ. ܘܡܿܢܘ
                    ܕܐܡܿܪ܆ ܐܬܪܐ ܕܟܘܼܪܣܝ ܒܢ̈ܝ ܝܼܣܪܐܝܠ ܠܥܿܠܡ ܗ̄ ܝܼܠܦ ܘܐܠܼܦ ܠܒܢ̈ܝ ܝܼܣܪܐܝܠ ܕܒܝܬܐ ܗܿܢܐ
                    ܐܝܟ ܕܠܗܿܕܐ ܦܪܝܼܫ ܠܝܼ ܕܢܗܼܘ ܠܝܼ ܕܘܼܟܬܐ ܠܡܘܬܒܐ ܘܐܬܪܐ ܕܣܿܐܡ ܐܢܼܐ ܒܗ ܦܪ̈ܣܬܐ ܕܪ̈ܓܠܝ.
                    ܕܢܐܼܡܪ ܕܗܿܢܐ ܥܘܼܡܪܐ ܡܟܝܼܠ ܓܒܝܿܬ ܠܝܼ ܕܒܗ ܐܡܝܼܢܐܝܼܬ ܐܥܿܡܪ ܒܡܨܼܥܬ݀ ܒܢ̈ܝ ܝܼܣܪܐܝܠ
                    ܟܿܠܗܘܿܢ ܝܘܡ̈ܬܐ. ܘܬܘܼܒ ܠܐ ܢܬܼܛܢܦܘܿܢ ܒܢ̈ܝ ܝܼܣܪܐܝܠ ܟܿܠܗܘܿܢ ܝܘܡ̈ܬܐ ܗ̄ ܦܩܘܿܕܐܝܼܬ
                    ܐܡܿܪ. ܡܛ݀ܠ ܕܒܛܝܒܘܼܬܝ ܐܥܒܿܪܬ ܟ݀ܠܗܝܢ ܣܟܠ̈ܘܬܟܘܢܿ ܩܕܡ̈ܝܬܐ. ܚܝܿܒܝܼܢ ܐܦ ܗܼܢܘܢܿ ܕܠܐ
                    ܢܬܗܼܦܟܘܿܢ ܒܥܝܕ̈ܝܗܘܿܢ ܩܕܡ̈ܝܐ ܐܝܿܠܝܢ ܕܒܗܘܿܢ ܫܡܐ ܕܩܘܼܕܫܝ ܡܣܿܝܒܝܼܢ ܗܼܘܘ ܗܼܢܘܿܢ
                    ܘܒܢܝ̈ܗܘܿܢ ܘܡܠ̈ܟܝܗܘܿܢ. ܟܕ ܐܝܟ ܕܠܨܥܪܐ ܕܝܼܠܝ ܒܩܪܝܼܒܘܼܬܐ ܕܗܝܟܠܐ ܣܿܝܡܝܼܢ ܗܼܘܘ ܫܠ̈ܕܐ
                    ܕܡܠ̈ܟܝܗܘܿܢ ܘܡܥܦܝܢ ܗܿܕܐ ܓܝܪ ܡܿܘܕܥ ܒܗ݀ܝ ܕܥܿܒܕܝܼܢ ܼ̈ܘܘ ܬܪ̈ܥܝܗܘܿܢ ܥܠ ܓܢܒ ܬܪ̈ܥܝ
                    ܘܣܦ̈ܝܗܘܿܢ ܥܠ ܓܢܒ ܣ̈ܦܼܝ. ܘܐܣܼܬܐ ܗܘܼܬ݀ ܗ̄ ܕܗܿܟܢܐ 
            
            
                 ܒܩܪܝܼܒܘܼܬܐ ܕܒܝܬܝ ܟܿܠܗܘܿܢ ܒܝܼܫ̈ܬܐ ܐܟܚܼܕܐ ܦ݀ܠܚܝܼܢ ܗܼܘܘ ܕܠܐ ܟܘܼܚܕܐ.
                    ܙܢܝܘܼܬܐ ܕܦܓܪܐ ܘܓܘܪܐ ܕܥܡ ܦܬܟܪ̈ܐ ܘܩܒܘܼܪܬܐ ܕܫܠ̈ܕܐ ܕܡܠ̈ܟܝܗܘܿܢ ܐܝܿܟܢ ܕܒܠܚܘܼܕ ܐܣܼܬܐ
                    ܕܝܼܠܗ ܕܗܝܟܠܐ ܐܝܼܬ ܗܼܘܐ ܒܝܬ ܠܝܼ ܠܛܢܦ̈ܘܬܐ ܗܿܠܝܢ ܕܥ݀ܒܕܝܼܢ ܗܼܘܘ ܚܕܪ̈ܝ ܒܝܬܝ. ܗܿܢܘ
                    ܚܙܼܘܐ ܕܒܝܬܐ ܗ̄ ܠܘ ܓܝܪ ܗܝܟܠܐ ܐܝܼܬ̄ܘ ܠܚܘܼܕ ܩܕܘܼܫܩܘܕ̈ܫܝܼܢ. ܐܝܟ ܕܒܗ݀ܘ ܩܕܡܿܝܐ. ܐܠܐ
                    ܟܿܠܗܘܿܢ ܬܚܘܼ̈ܡܘܗܝ ܟܕ ܚܿܕܪܝܼܢ ܩܕܘܼܫܩܘܼ̈ܕܫܐ ܐܢܘܿܢ ܗ̄ ܩܘܼܕ̈ܫܐ ܐܢܘܿܢ ܗ̄ ܩܕܝܼ̈ܫܐ
                    ܘܦܪ̈ܝܼܫܝ ܠܐܠܗܐ ܡܩܕܫܢܐ ܕܩܕ̈ܝܼܫܐ ܕܐܢܫ ܛܡܼ̈ܐܐ ܠܐ ܫܠܝܼܓܛ ܠܡܕܪܟ ܠܓܘ ܡܼܢ ܬܚܘܼ̈ܡܐ
                    ܗܿܠܝܢ. ܒܿܬܪ ܗܿܠܝܢ ܡܫܼܬܥܐ ܥܠ ܡܕܒܚܐ ܗ݀ܘ ܕܒܕܪܬܐ ܕܝܼܠܗ ܕܗܝܟܠܐ ܕܡܛ݀ܠ ܕܒܚܼ̈ܐ ܡܬܼܬܣܝܼܡ
                    ܗܼܘܐ. ܗܿܠܝܢ ܡܘܼܫ̈ܚܬܗ ܕܗܝܟܠܐ. ܥܘܼܒܗܿ ܕܐܡܬܐ ܐܡܐ ܗ̄ ܐܡܿܪ ܕܗ݀ܟܢܐ ܗܼܘܬ݀ ܐܡܬܐ ܗܿܝ
                    ܕܡܬܼܡܫܚ ܗܼܘܐ ܒܗܿ ܡܕܒܚܐ. ܐܝܟ ܐܡܬܐ ܘܦܫܼܟ. ܗܿܟܢܐ ܘܗ݀ܝ ܕܥܘܼܒܗܿ ܕܐܡܼܬܐ ܕܐܡܼܪ ܥܠ
                    ܬܝܼ̈ܥܐ ܗ݀ܘ ܕܢ݀ܦܩ ܗܼܘܐ ܡܢܼܗ ܕܡܕܒܚܐ܆ ܐܝܿܢܐ ܕܐܡܬܐ ܗܿܘܐ ܗܼܘܐ ܠܟܿܠ ܦܢ̈ܝܢ. ܒܗ݀ܝ ܕܠܟܿܠ
                    ܐܢܫ ܓܠܝܐ ܕܐܢ ܗܝܼ ܐܡܬܐ ܚܕܐ ܐܡܐ ܐܝܼܬܝܗܿ ܗܘܬ݀ ܐܝܿܟܢܐ ܡܨܝܐ ܕܬܘܼܒ ܥܡܗܿ ܕܝܼܠܗܿ ܕܐܡܬܐ
                    ܐܡܐ ܢܗܼܘܐ ܐܠܐ ܝܼܕܝܼܥܐ ܕܡܼܢ ܕܡܘܼܬ ܕܥܘܼܒܐ ܗܿܢܐ ܕܠܘܿܬܢ ܠܗ ܠܓܕܢܦܗ ܕܡܕܒܚܐ ܗ݀ܘ ܕܩܿܪܐ
                    ܠܗ ܬܝܿܒܐ ܐܡܿܪ ܥܘܼܒܗܿ ܕܐܡܼܬܐ ܕܢܐܼܡܪ ܥܘܼܒܗ ܕܡܕܒܚܐ ܒܗ݀ܝ ܕܐܝܟ ܐܣܼܪ ܚܨ̈ܐ ܡܕܡ ܘܐܝܟ
                    ܣܦܼܬܐ ܚܿܕܪ ܗܼܘܐ ܠܗ ܡܼܢ ܟ݀ܠܗ. ܘܐܝܿܟܐ ܐܝܼܬ ܠܣܼܦܬܗ ܗ̄ ܗܿܢܐ ܬܝܿܟܐ ܕܐܝܼܬܘܗܝ ܗܼܘܐ
                    ܙܪܬܐ. ܡܬܼܚܙܝܐ ܕܥܠ ܗ݀ܘ ܥܠܝܐ ܕܡܬܼܟܪܟ ܗܼܘܐ ܥܠ ܪܝܼܫܗ ܕܡܕܒܚܐ ܐܡܿܪ ܐܟܡܿܢ ܕܗ݀ܘ ܕܒܓܒܗ
                    ܝܼܕܝܼܥܐ ܕܐܡܬܐ ܚܕܐ ܐܝܼܬܘܗܝܐ ܗܼܘܐ ܙܪܬܐ ܙܪܬܐ ܗܿܝ. ܘܦܫܼܟ ܨܒ̈ܥܼܬܐ ܟܕ ܟܦܝܼ̈ܦܢ ܥܕܡܐ
                    ܠܩܛܪܐ ܬܠܝܼܬܝܐ. ܘܟܕ ܡܢܗܪ ܠܡܠܼܬܗ ܐܡܿܪ. ܘܡܼܢ ܐܪܥܐ ܥܕܡܐ ܠܬܝܿܟܐ. ܘܦܬܝܐ ܐܡܐ ܗ̄ ܠܘ
                    ܒܠܚܘܼܕ ܚܘܝܼ ܗܿܪܟܐ ܬܝܿܟܐ ܐܝܟ ܕܐܡܼܪܢ ܐܠܐ ܐܦ ܕܬܪܝܢ ܬܝܟ̈ܝܼܢ ܗܿܘܝܢ ܗܼܘܘ ܗܿܢܘܢܿ ܕܐܝܟ
                    ܟܠܝܼܠܐ ܠܟܿܠܗ ܡܒܕܚܐ ܚܿܕܪܝܼܢ ܗܼܘܘ. ܟܕ ܪܚܝܼܩܝܼܢ ܚܕ ܡܼܢ ܚܕ܆ ܐܪܒܥ ܐܡ̈ܝܼܢ. ܦܬܝܐ ܕܝܢ
                    ܕܟܿܠ ܚܕ ܚܕ ܡܢܼܗܘܿܢ ܐܡܬܼܐ ܚܕܐ. ܘܗܕܐܝܠ ܗ̄ ܠܗ ܠܡܕܒܚܐ ܩܿܪܐ ܗܕܐܝܠ. ܐܘ ܗܼܘ ܢܒܝܐ ܩܼܪܝܗܝ
                    ܗ݀ܟܢ ܐܘܿ ܒܠܫܼܢܐ ܥܒܪܝܐ ܗܿܟܢ ܡܬܼܟܢܐ. ܘܬܝܿܟܗ ܝܕ̄ ܐܡܝܼܢ. ܣܛܪ̈ܘܗܝ ܗ̄ ܚܣܝܼܪܐ ܬܢܢ ܗܿܝ
                    ܕܥܡ ܠܘ ܓܝܪ ܬܝܿܟܐ ܕܝܪܠܢܐܝܼܬ ܗܿܘܐ ܗܿܟܢ. ܐܠܐ ܗܼܘ ܡܕܒܚܐ ܥܡ ܬܝܿܟܗ ܗ݀ܘ ܥܠܝܐ ܗܿܘܐ ܗܼܘܐ
                    ܠܟܿܠ ܦܢ̈ܝܢ ܝܕ̄ ܐܡ̈ܝܼܢ. ܘܬܝܿܟܗ ܘܬܚܘܼܡܐ ܗ̄ ܠܗ ܠܗ݀ܘ ܬܝܿܟܐ ܕܐܡܝܼܪ ܡܼܢ ܠܥܼܠ ܡܛܜܠܬܗ
                    ܕܗܿܘܐ ܗܼܘ ܙܪܬܐ ܠܗ ܐܡܿܪ ܐܦ ܗܿܫܐ ܦܠܓܘܼܬ ܐܡܐ ܗ݀ܝ ܕܥܠ ܪܝܼܫܗ ܕܡܼܕܒܚܐ ܟܪܝܼܟ ܗܼܘܐ ܣܛܪ
                    ܡܼܢ ܗ݀ܢܘܢܿ 
            
            
                 ܬܚ̈ܬܝܐ. ܗܿܢܐ ܕܐܦ ܚܫܚܬܐ ܝܼܚܝܼܕܝܬܐ ܐܝܼܬ ܗܼܘܐ ܠܗ ܕܐܝܿܟܢܐ ܗܿܢܘܿܢ ܬܪܝܢ
                    ܡܼܢ ܒܘ̈ܗܝ ܢ݀ܛܪܝܼܢ ܗܼܘܘ ܠܗ ܠܡܕܒܚܐ ܡܼܢ ܨܒܘ̈ܬܐ ܕܠܒܪ ܗܿܟܐ ܐܦ ܗܿܢܐ ܡܼܢ ܠܥܼܠ ܠܐܝܿܠܝܢ
                    ܕܡܬܼܬܣܝܼܡܝܼܢ ܗܼܘܘ ܥܠܘܗܝ ܐܢ ܩܝܣ̈ܐ ܘܐܢ ܕܒܼܚ̈ܐ ܕܝܿܩܕܝܢ ܗܼܘܘ ܚܿܡܠ ܗܼܐܘ ܘܟܿܢܫ ܗܼܘܐ
                    ܡܼܢ ܠܓܘ ܕܠܐ ܢܬܼܒܕܘܢܿ ܘܢܬܐܼܫܕܘܢ ܠܒܪ ܡܢܼܗ ܠܟܿܠ ܦܢܝܼܬܐ. ܗܿܠܝܢ ܢܡܘ̈ܣܘܗܝ ܗ̄ ܢܡܘܿܣܐ
                    ܕܝܢ ܕܡܕܒܚܐ ܐܡܿܪ ܠܗ݀ܘ ܡܕܡ ܕܡܛ݀ܠܬܗ ܡܬܥܼܬܩܢ ܗܼܘܐ ܗܼܘ ܡܕܒܚܐ܀ ܨ܆ ܕܡ̄ܕ ܘܐܗܦܼܟܢܝ
                    ܠܐܘܼܪܚܐ ܕܬܪܥܐ ܗ̄ ܠܘ ܥܠ ܬܪܥܐ ܕܗܝܟܠܐ ܐܡܿܪ ܐܠܐ ܥܠ ܬܪܥܐ ܕܕܪܬܐ ܓܘܿܝܬܐ ܕܩܪܝܼܒܐ ܗܘܬ݀
                    ܠܗܝܟܠܐ ܘܚܙܝܿܬܗ ܕܐܚܝܼܕ ܗ̄ ܥܠܼܬܐ ܕܡܿܝܩܪ ܠܗ ܠܬܪܥܐ ܗܿܢܐ ܕܚܿܐܪ ܠܡܕܢܚܐ ܠܘ ܡܛ݀ܠ ܕܗܘܼ
                    ܥܿܐܠ ܒܗ. ܗܿܐ ܓܝܪ ܐܦ ܒܗܿܠܝܢ ܒܪ̈ܝܐ ܐܬܚܼܙܝܼ ܕܥܠܼ ܘܦܐ ܦܩܼܕ ܕܢܬܬܼܚܕܘܢ ܐܠܐ ܪܡܿܙ ܒܗܿܕܐ
                    ܥܠ ܐܝܼܩܪܐ ܕܥܬܝܼܕܐ ܗܼܘܬ݀ ܡܕܢܚܐ ܕܬܬܝܼܩܪܝ ܒܗܿ ܬܬܦܪܫܝ ܣܓܼܕܬܐ ܕܐܠܗܐ ܡܛ݀ܠ ܕܐܠܗܐ ܗܿܘ.
                    ܡܕܒܪܢܐ ܢܬܼܒ ܗ̄ ܠܘ ܐܡܝܼܢܐܝܼܬ ܨ݀ܒܐ ܐܢܼܐ ܕܢܬܼܬܚܕ ܐܠܐ ܕܠܐܐܢܫ ܢܘܼܟܪܝܐ ܢܥܘܿܠ ܒܗ. ܐܠܐ
                    ܒܠܚܘܼܕ ܡܕܒܪܢܐ ܕܥܡܐ ܫܠܝܼܛ ܕܢܥܘܿܠ ܒܗ ܚܕܐ ܙܒܢ ܕܫܢܿܬܐ. ܐܝܿܟܢܐ ܕܒܝܕ ܗ݀ܕܐ ܬܬܝܼܕܥܝ
                    ܪܒܘܼܬܗ ܘܩܪܝܼܒܘܼܬܗ ܕܠܘܿܬܝ ܐܢܗܼܘ ܕܒܬܪܥܐ ܗܿܢܐ ܕܠܝܼ ܦܪܝܼܫ ܠܡܥܼܠܬܐ ܐܦ ܠܝܼ ܝܗܿܒܬ ܠܡܥܼܠ
                    ܘܠܡܼܦ ܡܫܠܼܐܝܼܬ. ܒ݀ܬܪ ܗܿܠܝܢ ܦ݀ܩܕ ܠܗ ܕܢܙܼܗܪ ܠܟܗ̈ܢܐ ܐܝܿܠܝܢ ܕܣܝܼܡܝܼܢ ܠܬܫܡܼ̈ܫܬܐ
                    ܕܕܒܼ̈ܚܐ ܘܩܘܼܪ̈ܒܢܐ ܕܥܡܐ ܕܢܙܕܗܪܘܢ ܒܕܘܼܒܪ̈ܝܗܘܿܢ ܐܝܿܟܢܐ ܕܐܦ ܠܐܚܪ̈ܢܐ ܢܩܕܫܘܢܼ ܘܠܐ
                    ܢܗܼܘܘܿܢ ܡܛܿܢܦܝܼܢ ܒܝܕ ܛܡܐܘܼܬܗܘܿܢ ܠܨܒܼ̈ܘܬܐ ܩܕܝܼ̈ܫܬܐ ܝܬܝܼܪܐܝܼܬ ܐܡܼܬܝ ܕܡܥܠܝܼܢ ܠܗܝܟܠܐ
                    ܠܐܝܿܠܝܢ ܕܐܝܼܬܝܗܘܿܢ ܥܘܼܪ̈ܠܐ ܘܡܣܝ̈ܒܼܐ ܒܦܓܪܐ ܘܒܢܦܼܫܐ ܟܕ ܬ݀ܒܥܝܼܢ ܘܚܿܛܦܝܼܢ ܠܢܦܼܫܗܘܿܢ
                    ܬܫܡܼܫܬܐ ܐܝܿܕܐ ܕܠܐܠܗܐ ܙ݀ܕܩܐ ܒܝܕ ܗ݀ܝ ܕܥ݀ܒܕܝܼܢ ܢܛܘܪ̈ܐ ܘܝܨܘܿܦ̈ܐ ܕܒܬܝ̈ܗܘܿܢ. ܠܐܝܿܠܝܢ
                    ܕܣܝܼܡܝܼܢ ܕܢܛܪܘܢܼ ܘܢܫܼܡܫܘܢܼ ܒܝܬܐ ܕܐܠܗܐ. ܗܿܕܐ ܗܿܝ ܓܝܪ ܗܿܝ ܕܥܒܼܕܬܘܢܿ ܢ݀ܛܪ̈ܝ ܡܛܪܬܐ
                    ܕܡܩܕܫܝ ܢܛܘܿܪ̈ܝܟܘܢ ܗ̄ ܕܡܿܝܐ ܓܝܪ ܕܠܘܿܬ ܪܘܪ̈ܒܢܐ ܕܥܡܐ ܚܿܝܪܐ ܡܠܼܬܗ ܡܟܝܼܠ ܠܘ ܡܼܢ ܒܢ̈ܝ
                    ܢܘܼܟܪ̈ܝܐ ܬܙܗܪ ܕܠܐ ܢܥܼܘܿܠ ܠܡܩܕܫܝ ܐܠܐ ܐܦܠܐ ܠ̈ܘܝܐ ܕܦܪܩܼܘ ܡܢܼܝ. ܗܿܝܢ ܕܛܥܼܘ ܥܡ ܒܢ̈ܝ
                    ܝܼܣܪܐܝܠ ܘܢܩܼܦ ܠܦܬܟܪ̈ܐ ܘܟܕ ܣܿܓܕܝܼܢ ܠܦܬܟܪ̈ܐ ܐܦ ܒܗܝܟܠܐ ܕܐܠܗܐ ܡܫܿܡܫܝܼܢ ܗܼܘܘ ܠܡܘܼܠܝ
                    ܣܘܼܢ̈ܩܢܝܗܘܿܢ ܘܥܠ ܐܦ̈ܝ ܗܿܠܝܢ ܩܒܼܠܘ ܥܘܠܗܘܿܢ. ܘܠܐ ܢܩܼܪܒܘܿܢ ܗ̄ ܥܠ ܐܦ̈ܝ ܡܣܛܝܢܘܼܬܗܘܿܢ
                    ܕܡܢܼܝ ܠܐ ܢܬܼܩܪܒܘܢܿ ܠܩܘܼܕܫ̈ܝ ܗ̄ ܠܡܕܡ ܕܦܪܝܼܫ ܠܝܼ ܐܠܐ ܐܢ ܠܘܼܩܕܡ ܢܩܒܼܠܘܢܼ ܟܿܠܗܿ
                    ܒܗܼܬܬܗܘܿܢ 
            
            
                 ܘܛܢܦܘܼܬܗܘܿܢ ܒܝܕ ܛܪܘܼܕܝܐ ܕܡܼܢ ܒܝܬܝ. ܘܡܼܚܕܐ ܐܢ ܢܬܘܼܒܘܿܢ ܐܥܿܒܕ ܐܢܘܢܿ
                    ܢ݀ܛܪ̈ܝ ܡܛܪܬܐ ܕܒܝܬܐ ܘܥܒ̈ܕܝ ܥܒܿܕܐ ܕܟܿܠ ܡܕܡ ܕܗܿܘܐ ܒܗ. ܟܗ̈ܢܐ ܒܢ̈ܝ ܨܕܘܿܩ ܗ̄ ܐܡܿܪ ܥܠ
                    ܒܢ̈ܝ ܨܕܘܿܩ ܕܢܼܛܪܘ ܩܝܡ̈ܘܗܝ. ܟܕ ܓܝܪ ܫܪ̈ܒܬܐ ܣܓܝ̈ܐܬܐ ܗܼܘ̈ܝ ܕܒܝܬ ܠܘܝܼ ܐܝܟ ܕܟܬܼܒ ܥܙܪܐ
                    ܘܣܦܪ ܒܢܝܿܡܝܢ ܠܙܪܥܗ ܕܨܕܘܿܩ ܐܦܣܼ ܕܢܒܼܥܘܢܿ ܐܝܟ ܕܦܣܼܩ ܒܝܘܡ̈ܝ ܥܝܼܠܝܼ ܘܫܡܘܿܐܝܠ. ܡܛ݀ܠ
                    ܕܗܼܢܘܢܿ ܐܬܚܼܙܝܼܘ ܒܚܝܼܪ̈ܐ ܒܬܫܼܡܫܬܗܘܿܢ ܗܿܟܢܐ ܨܕܘܿܩ ܘܟܗ̈ܢܐ ܐܚܪ̈ܢܐ ܡܟܿܗܢܝܼܢ ܗܼܘܘ
                    ܐܝܿܠܝܢ ܕܫܿܠܡܝܼܢ ܠܪܘܼܫܥܗ ܕܥܡܐ. ܡ̈ܐܢܐ ܕܟܬ̈ܢܐ ܗ̄ ܦ݀ܩܕ ܕܠܒܘܼܫ̈ܐ ܕܟܗ̈ܢܐ ܟܬܢ̈ܐ
                    ܢܗܼܘܘܢܿ. ܠܐܬ݀ܐ ܕܚܕܘܼܬܐ ܘܡܦܪܓܘܼܬܐ ܕܝܪܠܗܘܿܢ ܘܕܥܡܐ. ܕܠܐ ܢܩܼܕܫܘܼܢܗ ܗ̄ ܚܿܫܚܐ ܗܿܕܐ
                    ܠܙܗܝܼܪܘܼܬܐ ܘܐܦ ܠܐܝܼܩܪܐ ܕܝܼܠܗܘܿܢ ܕܡ̈ܐܢܐ ܩܕܝܼ̈ܫܐ. ܐܠܘܼ ܢ݀ܦܩܝܼܢ ܗܼܘܘ ܒܐܡܝܼܢܘܼ ܒܗܘܿܢ
                    ܒܡ̈ܐܢܐ ܠܘܿܬ ܥܡܐ. ܐܡܝܼܢܘܼܬ ܚܙܼܬܗܘܿܢ ܕܡ̈ܐܢܐ ܪܦܝܘܼܬܐ ܕܪܥܝܿܢܐ ܡܘܠܕܐ ܗܘܬ ܒܥܡܐ
                    ܘܡܒܼܣܪܢܘܼܬܐ ܕܥܠܝܗܘܿܢ ܕܡ̈ܐܢܐ. ܡܛ݀ܠ ܕܟ݀ܠ ܟܡܼܐ ܕܓܢܝܼܙܢ ܕܨܒܼ̈ܘܬܐ ܕܗܿܟܢܐ ܝܩܝܼܪ̈ܢ
                    ܒܥܝܢܗܝܢ. ܒܝܬ ܩܘܼܕܫܐ ܠܚܘܼܠܐ ܗ̄ ܚܘܼܠܐ ܐܡܿܪ ܠܗܿܢܝܢ ܕܫܪ̈ܝܢ ܠܢܡܘܿܣܐ ܐܟܙܼܢܐ ܕܣܘܼܝܒܐ
                    ܐܝܟ ܗܿ ܕܟܗ̈ܢܐ ܡܿܚܠܝܼܢ ܠܗܿ ܗ̄ ܫܿܪܝܢ ܠܗܿ ܠܫܒܼܬܐ. ܒܟܿܠܗܘܿܢ ܙܒ̈ܢܼܐ ܕܡܘܠ̈ܕܝ ܗ̄
                    ܕܟܢܘܼܫ̈ܝܝ. ܐܡܼܪ ܕܝܢ ܠܝܘܡ̈ܬܐ ܕܥܐܕ̈ܐ ܘܪ̈ܝܼܫܝ ܝܪ̈ܚܐ ܘܕܫ̈ܒܐ ܘܒܿܬܪ ܕܐܡܼܪ ܠܝܘܡ̈ܬܐ ܘܥܠ
                    ܟܿܠܗܝܢ ܐܝܿܠܝܢ ܕܠܟܗ̈ܢܐ ܙܕܩ̈ܢ ܘܡܦܿܩܕ ܠܥܡܐ ܕܡܐ ܕܡܦܠܓܝܼܢ ܐܪܥܐ ܢܦܼܪܫܘܢܼ ܡܼܢܗܿ ܦܘܼܪܫܢܐ
                    ܠܡܪܝܐ ܕܢܗܼܘܐ ܠܟܗ̈ܢܐ ܕܡܫܡܿܫܝܼܢ ܘܢܗܼܘܐ ܠܟܘܿܢ ܗܼܘ܀ ܨ܆ ܕܡܗ̄ ܘܡܩܕܫܐ ܠܡܩܕ̈ܫܐ ܗ̄ ܢܗܼܘܐ
                    ܡܬܼܚܫܒ ܐܬܪܐ ܗܿܢ ܐܡܩܕܫܐ ܕܡܩܕ̈ܫܐ ܘܐܬܪܐ ܩܕܝܼܫܐ ܕܟܗ̈ܢܐ ܩܕܝܼ̈ܫܐ܆ ܕܡܕܒܪܢܐ ܢܗܼܘ܀ ܒܫ̈ܒܐ
                    ܗ̄ ܗܿܢܐ ܡܕܒܪܢܐ ܐܡܿܪ ܬܢܢ ܠܗ݀ܘ ܕܡܼܢ ܬܪ̈ܝܗܘܿܢ ܫܘܼܠ̈ܛܢܐ ܕܟܗܢܘܼܬܐ ܘܕܡܠܟܘܼܬܐ ܐܚܝܼܕ
                    ܗܼܘܐ ܒܙܒܢܼܐ ܗ݀ܘ ܐܟܡܿܢ ܕܩܠܝܼܠ ܙܒܢܼܐ ܒܠܚܘܼܕ ܠܘܿܬ ܥܗܡܐ ܪܕܘ ܛܟ̈ܣܼܐ ܗܿܠܝܢ ܝܼܚܝܼܕ̈ܝܐ
                    ܕܟܗ̄ܢܘܼ ܘܕܡܠܟܘܼܬܐ ܡܼܢ ܒܿܬܪ ܦܘܼܢܝܐ ܘܒܿܬܪ ܐܬܚܼܠܛܘ ܒܚܕ̈ܕܐ ܒܝܕ ܡܣܼܟܐ ܕܢܫ̈ܐ ܘܬܘܠ̈ܕܬܐ
                    ܕܒܢ̈ܝܐ. ܘܡܟܝܼܠ ܚܕ ܓܢܼܣܐ ܘܛܘܼܗܡܐ ܡܫܼܬܟܚ ܗܼܘܐ ܕܐܝܼܬܘܗܝ ܕܬܪ̈ܬܝܗܝܢ ܫܪ̈ܒܬܐ. ܡܛ݀ܠܗܿܕܐ
                    ܗ݀ܘ ܕܠܪܝܼܫܢܘܼܬܗ ܕܥܡܐ ܡܫܼܬܘܐ ܗܼܘܐ ܒܝܕ ܕܡܼܢ ܬܪ̈ܝܗܘܿܢ ܝܘܼܒ̈ܠܐ ܐܝܼܬܘܗܝ ܗܼܘܐ ܡܕܒܪܢܐ
                    ܒܠܚܘܼܕ ܡܬܼܩܪܐ ܗܼܘܐ ܘܠܐ ܗܼܘܐ ܝܚܝܼܕܐܝܼܬ ܡܠܟܐ ܐܘܿ ܟܗܿܢܐ. ܐ݀ܦܢ ܡܢܼܒܿܬܪ ܙܒܢܼܐ ܐܘܿ ܡܼܢ
                    ܥܝܿܕܐ ܐܘܿ ܡܼܢ ܫܘܼܒܗܪܐ ܐܬܦܼܪܫ ܠܗܘܿܢ ܫܡܐ ܕܢܬܼܩܪܘܿܢ ܪ̈ܒܝ ܟܗ̈ܢܐ ܘܗܿܕܐ ܠܘܼܩܕܡ ܢܣܼܒܬ݀
                    ܫܘܼܪܝܐ ܡܼܢ ܫܡܥܘܢܿ ܪܒ ܟܗ̈ܢܐ ܐܚ̄ܘܼ ܕܝܼܗܘܼܕܐ 
            
            
                 ܡܩܒܝ ܗ̄ ܛܢܢܐ܀ ܨ̄܆ ܕܡܘ̄ ܬܪܥܐ ܕܕܪܬܐ ܓܘܿܝܬܐ ܕܡܕܒܪܢܐ ܠܚܘܿܕ ܢܥܘܿܠ
                    ܘܢܦܘܿܩ ܒܗ ܒܫ̈ܒܐ ܘܒܪܝܼܫܐ ܝܪ̈ܚܐ ܟܕ ܢܬܦܼܬܚ. ܡܿܢ ܕܥܐܠ ܒܬܪܥܐ ܗ̄ ܥܡܐ ܕܝܢ ܟܿܠ ܕܥܿܐܠ
                    ܒܬܪܥܐ ܕܓܪܒܐ ܒܬܝܡܢܐ ܢܦܘܿܩ ܘܡܿܢ ܕܥܿܐܠ ܒܬܝܡܢܐ ܢܦܘܿܩ ܒܓܪܒܝܐ. ܠܡܕܒܪܢܐ ܠܚܘܼܕ ܐܦܘܼܩ
                    ܕܒܬܪܥܐ ܕܒܗ ܥܿܐܠ ܢܦܘܿܩ ܟܕ ܡܠܦ ܒܗܿܕܐ ܫܘܼܠܛܢܐ ܘܚܐܪܘܼܬܐ ܕܡܕܒܪܢܐ ܘܫܘܼܥܒܕܐ ܕܥܡܐ ܡܛ݀ܠ
                    ܕܡܕܒܪܢܐ ܛܟܣܼܐ ܕܐܠܗܐ ܘܡܡܠܐ ܠܥܡܐ. ܘܗܿܠܝܢ ܕܡܫܼܥܒ̈ܕܐ ܐܢܘܿܢ ܐܠܗܐ ܘܠܡܕܒܪܢܐ. ܘܐܟܡܼܐ
                    ܕܠܒܪ ܡܫܼܥܒܕܝܼܢ ܗܿܟܢܐ ܐܦ ܒܗܝܟܠܐ܆ ܨ܆ ܕܡ̄ܙܙ ܡ̈ܝܐ ܕܢ݀ܦܩܝܼܢ ܡܼܢ ܬܚܝܬ ܐܣܟܘܼܦܬܐ ܗ̄
                    ܐܣܟܘܿܦܬܐ ܡܕܢܚܝܬܐ ܐܡܿܪ ܕܝܼܠܗ ܕܬܪܥܐ ܕܗܝܟܠܐ ܗ݀ܘ ܕܠܡܕܢܚܐ ܚܿܐܪ ܗܼܘܐ. ܡܼܢ ܣܛܪܗ ܕܥܩܼܪܗ
                    ܘܫܘܼܪܝܗ ܕܡܒܘܼܥܐ ܡܼܢ ܣܛܪܗ ܬܝܡܢܝܐ ܕܗܝܟܠܐ ܢ݀ܚܬ ܗܼܘܐ ܘܠܬܝܡܢܐ ܡܼܢ ܦܬܘܿܪܐ ܕܠܚܼܡ ܐܦ̈ܐ
                    ܘܟܢ ܐܬܿܐ ܘܥܿܒܪ ܬܚܝܬ ܐܣܟܘܼܦܬܐ ܕܬܪܥܐ. ܘܐܦܩܼܢܝ ܒܬܪܥܐ ܓܪܒܝܝܐ. ܘܡܼܢ ܬܝܡܢܝܗ ܕܬܪܥܐ.
                    ܡܛ݀ܠ ܓܝܪ ܕܕܫܥܬܐ ܐܠܐ ܐܦܼܘܩ ܗܼܘܐ ܠܗ ܡܠܐܟܐ ܕܚܘܝܼ ܠܗ ܗܿܠܝܢ. ܕܢܕܘܼܫ ܘܢܥܼܪܒܪ ܒܡ̈ܝܐ
                    ܒܗܿܝ ܕܠܐ ܥܕܟܝܼܠ ܢܦܼܩ ܗܼܘܐ ܡܼܢ ܕܪ̈ܬܐ ܩܕܝܼ̈ܫܬܐ ܐܠܐ ܐܦܩܖܼܗ ܒܬܪܥܐ ܡܕܢܝܚܐ ܘܐܟܪܟܗ
                    ܒܬܪܥܐ ܬܓܪܒܝܝܐ ܘܡܚܼܚܕܐ ܐܝܼܬܝܗܿ ܠܡܚܼܙܐ ܡ̈ܝܐ ܕܢ݀ܦܩܝܼܢ ܒܬܪܥܐ ܓܪܒܝܝܐ ܡܕܢܚܝܐ ܕܕܪܬܐ.
                    ܡܫܼܒܚ ܘܡܫܘܼܚܬܐ ܗ̄ ܚܿܕܐ ܗܼܘ ܘܪܘܙ ܥܠ ܐܦ̈ܝ ܬܘܼܪܨܐ ܕܩܒܼܠ̈ܝ ܗܿܢܝܢ ܕܝܼܣܪ̈ܠܝܐ ܕܠܗܘܿܢ
                    ܐܬܗܝܡܢ ܡܼܢ ܐܠܗܐ ܠܡܕܒܪܘܼ. ܘܒܕܓܘܢܼ ܟܕ ܢܦܼܩ ܡܼܢ ܕܪ̈ܐ ܟ݀ܠܗܝܢ ܕܗܝܟܠܐ ܡܫܼܚ ܐܘܪܟܗܿ
                    ܕܪܓܠܬܐ ܐܠܦ ܐܡ̈ܝܼܢ. ܘܐܥܼܒܪܢܝ ܒܡ̈ܝܐ ܥܕܡܐ ܠܒܘܼܪܗܟܐ ܗ̄ ܘܣܿܟܐ ܡܿܢ ܕܬܠܬ ܙܒ̈ܢܝܼܢ ܡܫܼܚܗ
                    ܠܪܓܠܬܐ ܘܒܟܿܠ ܙܒܢܬܐ ܐܥܒܼܪܗ ܠܢܒܝܐ ܡܼܢ ܗܿܢܐ ܓܒܐ ܠܗܿܢܐ. ܙܒܢܬܐ ܕܐܪܒܥ ܐܡܿܪ ܕܟܕ ܡܿܫܚ ܠܐ
                    ܐܬܥܼܒܪܬ݀ ܪܓܠܼܬܐ ܒܗ݀ܝ ܕܒܐܝܼܕܐ ܒܐܝܼܕܐ ܢܣܿܒܐ ܗܼܘܬ ܬܘܣܼܦܬܐ ܘܡܬܼܡܠܝܐ. ܡ̈ܝܐ ܓܝܪ ܒܟܬܒ̈ܐ
                    ܡܬܼܢܣܟܝܼܢ ܥܠ ܛܝܒܘܼܬܐ ܕܪܘܼܚܐ. ܐܝܿܟܢܐ ܕܗܿܪܟܐ ܡܿܠܦ ܕܡ̈ܝܐ ܒܐܝܼܕܐ ܒܐܝܼܕܐ ܡܬܼܬܘܣܦܝܼܢ
                    ܗܼܘܘ ܘܪܕܝܢ ܡܼܢ ܗܝܟܠܐ ܐܝܼܬܝܗܘܿܢ ܛܝܒܘܼܬܐ ܘܡܠܦܢܘܼܬܐ ܕܩܒܼܠܘ ܝܘܼܕ̈ܝܐ ܡܼܢ ܒܿܬܪ ܦܘܼܢܝܐ
                    ܘܐܘܠܼܕܘ ܘܐܬܟܗܼܢܘ ܬܘܼܒ ܒܒ̈ܢܝܐ ܘܥܘܼܡܪܐ ܘܡܘܗܒܬܐ ܕܡܼܢ ܗܝܟܠܐ ܘܛܝܒܘܼܬܐ ܡܬܼܡܬܚܐ ܗܘܬ݀
                    ܥܠܝܗܘܿܢ. ܟܿܠ ܟܡܐ ܕܒܕܚܼܠܬ݀ ܐܠܗܐ ܡܫܿܡܫܝܼܢ ܗܼܘܘ. ܘܒܝܕ ܡܫܘܼܚܬܐ ܗܿܝ ܕܐܠܦ ܐܡ̈ܝܼܢ ܕܐܡܼܪ
                    ܥܠܝܗܘܿܢ ܕܕܪ̈ܐ ܘܫܪ̈ܒܬܐ ܕܝܼܣܪܐܝܠ ܡܿܒܕܩ ܘܥܠܝܗܘܿܢ ܕܙܒܼ̈ܢܐ܀ ܪܓܠܬܐ ܩܿܪܐ ܠܗܿ ܡܛ݀ܠ
                    ܣܿ̃ܝܐܘܼܬܗܿ ܘܚܐܼܦܗܿ ܡܛ݀ܠ ܗܿܝ ܕܕܠܐ ܣܘܼܟܝ ܘܡܼܢܫܝܠܝ ܪܕܬ݀ ܠܘܿܬܗܘܿܢ. ܐܝܼܠ̈ܢܐ ܗ̄
                    ܐܝܼܠ̈ܢܐ ܕܥܠ ܓܿܒܗܿ 
            
            
                 ܕܪܓܠܼܬܐ. ܡܟܼܐ ܘܡܼܟܐ ܢܨܝܼܒܝܼܢ ܗܼܘܘ ܘܐܪܙ ܒܢܝܢ̈ܫܐ ܕܡܼܢ ܫܩܼܝܐ
                    ܕܡܠܦܢܘܼܬܐ ܐܝܟ ܕܡܼܢ ܡ̈ܝܐ ܡܼܬܬܪܣܝܢ ܗܼܘܘ. ܡ̈ܝܐ ܗܿܠܝܢ ܕܢܿܦܩܝܼܢ. ܘܒ݀ܣܡܝܼܢ ܡ̈ܝܐ ܗ̄
                    ܡܿܘܕܥ ܒܝܕ ܗܿܠܝܢ ܕܠܟܡܐ ܐܬܪ̈ܘܬܐ ܕܥܡ̈ܡܼܐ ܚܿܒܫܐ ܡܠܦܢܘܼܬܐ ܕܕܚܼܠܬ݀ ܐܠܗܐ ܠܓܘ ܡܢܼܗܿ.
                    ܐܬܪܐ ܕܓܠܝܼܠܐ ܠܡܕܢܚܐ ܗ݀ܘ ܡܼܢ ܥܡܐ. ܘܒܫܒܒܘܼܬܐ ܕܥܡ̈ܡܼܐ ܘܡܢܼܗ ܢ݀ܚܬܐ ܟܿܠ ܡܦܢܘܼܬܐ
                    ܠܓܪܒܝܐ ܘܠܡܥܪܒܐ ܘܟܢ ܢ݀ܦܠܝܼܢ ܐܦ ܒܡ̈ܝܐ ܕܝܡܐ ܕܐܝܼܬܝܗܘܿܢ ܥܡ̈ܡܼܐ ܕܣܿܪܝܢܼܒܚܢܦܘܼܬܐ. ܫܡܐ
                    ܕܝܢ ܗ݀ܘ ܕܓܠܝܼܠܐ ܐܬܓܠܝܼ ܠܗ ܗ݀ܘ ܡܐ ܕܒܦܪܨܦ ܥܡܐ ܛܡܝܼܪ ܗܼܘ ܕܫܘܼܡܠܝܗ ܒܥܡ̈ܡܼܐ ܐܬܚܼܙܝ
                    ܘܡܼܢ ܝܘܼܠܦܢ ܫܠ̈ܝܼܚܐ ܒܣܼܡܬ݀ ܣܪܝܘܼܬܗܘܿܢ. ܘܟܿܠ ܢܦܼܫܐ ܚܝܬܐ܆ ܢܘܼ̈ܢܐ ܣܓܝ̈ܐܐ ܗ̄ ܟ݀ܠ ܟܪ
                    ܕܢ݀ܦܠܐ ܗܘܬ ܡܠܦܢܘܼܬܐ ܠܛܥܡܗܿ ܢ݀ܓܕܐ ܠܒܢܝ̈ܢܫܐ ܩܿܪܐ ܗܿܢܘܿܢ ܕܡܼܢ ܙܥܘܿܪܘܼܬܐ ܠܪܒܘܼܬܐ
                    ܡܝܬܝܐ ܠܗܘܿܢ ܛܝܒܘܼܬܐ. ܘܩܝܿܡܝܼܢ ܥܠܘܗܝ ܗ̄ ܕܝܡܐ. ܨܝ̈ܕܐ ܡܼܢ ܥܝܢܓܕ ܗ̄ ܕܘܼ̈ܟܝܬܐ ܐܢܝܢ
                    ܗܿܠܝܢ ܒܐܬܪܐ ܕܓܠܝܼܠܐ܀ ܨܝ̈ܕܐ ܡ̈ܠܦܢܐ. ܝܡܐ ܥ݀ܠܡܐ܀ ܡܫܛ̈ܚܐ ܕܡܨܝܼ̈ܕܬܐ ܗ̄ ܢܦܼܫ̈ܬܐ
                    ܕܡܩܒ̈ܠܢ ܠܡܠܦܢܘܼܬܐ ܩܿܪܐ. ܘܠܟܢܘܼܫܝܐ ܘܒܝܬ ܨܘܡܐ ܕܒܢܝ̈ܢܫܐ ܕܚܿܒܨܝܼܢ ܠܡܫܡܼܥ ܘܠܡܬܼܐܣܝܘܼ.
                    ܘܡܦܩ̈ܢܘܗܝ ܗ̄ ܡܦܩ̈ܢܐ ܘܡܥܠ̈ܢܐ ܩܿܪܐ ܠܥܡܐ ܘܠܡܠܦܢܘܼܬܐ. ܗ݀ ܕܡܼܢ ܠܒܪ ܥܿܐܠ ܡܬܼܐܡܪ ܥܠܘܗܝ
                    ܡܥܠܢܐ ܕܬܪܥܐ ܕܡܕܝܼܢܬܐ. ܘܗܿܟܢܐ ܗܿܘ ܕܢܿܦܩ ܡܼܢ ܠܓܘ ܗܼܘ ܡܥܠܢܐ ܡܫܼܬܒܟܚ ܕܐܝܼܬܘܗܝ. ܠܗ
                    ܡܦܩܼܢܐ. ܒܗܿܕܐ ܕܡܘܼܬܐ ܐܢܘܿܢ ܐܝܿܠܝܢ ܕܥܿܐܠܝܼܢ ܠܕܚܠܬ݀ ܐܠܗܐ ܐܘܿ ܢܿܦܩܝܼܢ ܡܢܼܗܿ. ܠܐ
                    ܢܒܣܼܡܘܿܢ ܗ̄ ܐܝܿܠܝܢ ܕܢܿܦܩܝܼܢ ܡܼܢ ܝܘܼܠܦܢܐ ܡܛ݀ܠ ܕܡܬܼܟܫܠܝܼܢ ܒܗ ܠܐ ܐܝܼܬܝܗܘܿܢ ܒܣܝܼ̈ܡܐ
                    ܐܝܟ ܕܒܩܕܡܿܝܬܐ ܗ̄ ܫܪܝܼܪ̈ܐ ܕܠܐ ܡܬܼܚܒܠܝܼܢ ܘܡܣܼܬܠܝܢ ܘܐܝܿܠܝܢ ܬܘܼܒ ܕܥܿܐܠܝܼܢ ܠܘܿܬ
                    ܝܘܼܠܦܢܐ ܡܼܢ ܩܕܡ ܕܢܥܠܼܘܢ ܠܗ ܠܐ ܐܝܼܬܝܗܘܿܢ ܒܣܝܼ̈ܡܐ ܡܛ݀ܠ ܕܠܐ ܛܥܡܼܘܼܗܝ. ܬܘܼܒ
                    ܡܦܼܩ̈ܢܘܗܝ ܗ̄ ܥܡܐ ܕܡܼܢܗܘܿܢ ܐܢܘܿܢ ܡܦ̈ܩܼܢܐ ܘܡܥ̈ܠܢܐ ܘܐܝܿܠܝܢ ܕܡܟܪܙܝܼܢ ܣܒܼܪܬܐ ܕܡܫܝܼܚܐ.
                    ܠܐ ܡܬܼܥܕܪ ܡܼܢ ܡܠܦܢܘܼܬܐ. ܐܠܐ ܟܠܼܐ ܢܦܼܫܗ ܐܦ ܠܐܚܪ̈ܢܐ ܡܼܢ ܫܡܼܥܗܿ ܕܣܒܼܪܬܐ܀ ܘܒܗܿ
                    ܒܪܓܠܬܐ ܢܫܘܼܚܘܢܿ. ܢܗܼܘܘܿܢ ܡܒܟܪܝܼܢ ܗ̄ ܐܝܼܠ̈ܢܐ ܠܐܢ̈ܫܐ ܩܕܝܼ̈ܫܐ ܩܿܪܐ ܘܦܐܪ̈ܐ
                    ܠܕܘܼܒܪ̈ܝܗܘܿܢ ܘܛܪ̈ܦܐ ܠܡܦܢܘܼܬܗܘܿܢ. ܗܿܕܐ ܪܓܠܬܐ ܐ݀ܦܢ ܒܙܒܼܢܐ ܕܓܠܝܢܐ ܥܠ ܥܡܐ ܡܒܿܕܩܐ
                    ܗܘܬ݀ ܐܠܐ ܐܫܬܡܼܠܝܬ݀ ܒܚܿܕܬܐ. ܪܓܠܬܐ ܐܡܿܪ ܠܥܘܼܫܢܗܿ ܘܬܘܼܩܦܗܿ ܕܟܒܘܙܘܼܬܐ. ܡ̈ܝܐ ܗܝܡ̄ܢܘܼ
                    ܡܚܝܬ݀ ܟܿܠ ܐܟܙܢܼܐ ܕܡ̈ܝܐ ܡܩܝܼܡܝܼܢ ܚ̈ܝܐ ܕܟ݀ܠܒܣܪ. ܬܘܼܒ ܡ̈ܐ ܐܪܙ ܡܥ̄ܡ ܘܐܪܙ ܡܘܗܒܬܐ
                    ܕܪܘܼܚܐ ܐܝܟ ܗܿܝ ܕܟܿܠ ܕܡܗܿܝܡܢ ܒܝܼ ܢܗܪ̈ܘܬܐ ܢܪܕܘܢ ܡܢܼܗ. ܡܼܢ ܬܚܝܬ ܐܣܟܘܼܦܬܐ ܕܬܪܥܐ
                    ܕܡܕܢܚܐ ܡܛ݀ܠ ܕܠܗܿܕܐ ܦܢܝܼܬܐ ܥܬܝܼܕܝܼܢ ܗܼܘܘ ܠܡܣܼܓܕ ܟܪ̈ܝܼܣܛܝܢܐ. ܡܼܢ ܬܝܡܢܐ ܢ݀ܦܩܝܼܢ
                    ܗܼܘܘ ܡܼܢ ܬܚܝܬ ܗ̄ ܡܼܢ ܡܕܒܚܐ ܕܫܪܪܐ ܡܪܢ ܥܬܝܼܕܐ ܕܬܫܼܬܡܥܝ ܡܠܦܢܘܼܬܐ. ܗ݀ܝ ܕܬܠܬ ܙܒ̈ܢܝܼܢ
                    ܡܫܼܚܗܿ ܠܪܓܠܬܐ ܐܪܙ ܬܠܝܼܬܝܐ ܕܒܡ̈ܝܐ ܨܿܐܪ ܗܼܘܐ ܘܕܡܼܢ 
            
            
                 ܙܥܘܼܪ̈ܝܬܐ ܫܪܝܬ݀ ܟܪܘܙܘܼܬܐ ܘܥܫܼܢܬ݀ ܠܣܘܓܐܐ ܕܐܝܿܠܝܢ ܕܠܐ ܡܬܼܡܢܝܢ. ܗ݀ܝ
                    ܕܢܦܩ̈ܢ ܠܓܠܝܼܠܐ ܐܪܙ ܬܠ̈ܡܝܼܕܐ ܕܓܠ̈ܝܼܠܝܐ ܗܼܘܘ ܘܠܝܬ ܥܡ̈ܡܼܐ ܥܬܝܼܕܐ ܕܬܦܼܘܿܩܝ ܣܒܼܪܬܐ܀
                    ܡ̈ܝܐ ܣܪ̈ܝܐ ܢܡܘ̈ܣܐ ܕܚܢ̈ܦܐ ܕܡܼܬܒܣܡܝܼܢ ܒܡܠܦܢܘܼܬܐ ܕܫܠ̈ܝܼܚܐ. ܢܘܼ̈ܢܐ ܥܡܘܼ̈ܢܝܐ. ܐܝܼܠ̈ܢܐ
                    ܒܢܝ̈ܢܫܐ ܐܝܿܠܝܢ ܕܝܿܗܒܝܼܢ ܦܐܪ̈ܐ ܕܕܚܠܬ݀ ܐܠܗܐ. ܡܥ̈ܠܢܐ ܘܡܦܩ̈ܢܐ ܗ̄ ܐܝܿܠܝܢ ܕܢ݀ܦܩܝܼܢ ܡܼܢ
                    ܗܝ̄ܡ ܘܐܝܿܠܝܢ ܕܠܐ ܥܕܟܝܼܠ ܥܠܼܘ ܠܗܿ܀ ܦܐܪ̈ܝܗܘܿܢ ܗ̄ ܡܠܦܢܘܼܬܗܘܿܢ ܚܿܫܚܐ ܠܬܘܼܪܣܝܐ ܕܢܦܼܫܐ
                    ܐܝܟ ܡܐܟܘܼܠܬܐ ܟܝܼܬ ܠܩܘܼܝܡܐ ܕܦܓܪܐ܀ ܘܛܪ̈ܦܝܗܘܿܢ ܗ̄ ܘܢܪܗܼܛܘܢܼ ܣܓܝ̈ܐܐ ܠܫܡܼܥܐ
                    ܕܡܠܦܢܘܼܬܗܘܿܢ ܐܝܟ ܕܒܗܿ ܢܬܐܼܣܘܿܢ ܡܼܢ ܚܛܗ̈ܐ. ܗܿܟܢܐ ܐܡܿܪ ܗ̄ ܐܡܿܪ ܥܠ ܐܪܥܐ ܟܿܠܗܿ
                    ܕܡܘܼܠܟܢܐ ܘܕܐܝܿܟܢܐ ܕܐܬܼܦܠܓܝ ܠܗܿܢܘܢ ܕܦܿܢܝܢ ܐܝܟ ܕܒܝܘ̈ܡܝ ܝܫܘܿܥ ܒܪܢܘܿܢ܀ ܢܚ̈ܠܐ
                    ܕܬܚܘܼ̈ܡܐ܀ ܫܒ̈ܛܐ ܕܝܼܣܪܐܝܠ ܗ̄ ܐܡܿܪ ܕܝܢ ܕܠܦܠ̈ܓܘܬܐ ܐܝܿܠܝܢ ܕܝܢ ܕܒܝܕ ܬܚܘܼ̈ܡܐ ܡܼܬܦܪ̈ܫܢ
                    ܗܼ̈ܘܝ ܘܡܬܼܝ̈ܕܥܢ. ܕܠܐܝܿܢܐ ܫܒܼܛܐ ܙ݀ܕܩܐ ܟ݀ܠܚܕܐ ܡܢܼܗܝܢ. ܟܕ ܡܼܢ ܡܢܿܬܐ ܕܢܚ̈ܠܐ ܚܫܼܒ
                    ܠܟܿܠܗܿ ܐܪܥܐ ܟܕ ܚܿܕܪܐ. ܘܕܝܘܣܦ ܠܚܒܠܐ ܗ̄ ܕܐܦ ܗܼܘ ܐܝܟ ܚܕ ܡܢܼܗܘܿܢ ܢܐܪܬ݀. ܘܐܝܟ ܚܕܐ
                    ܝܪܬܘܬܐ ܒܠܚܘܿܕ ܢܣܼܒܘܿܢ ܬܪ̈ܝܗܘܿܢ ܫܒ̈ܛܐ ܕܒܝܬ ܝܘܣܦ ܥܠ ܫܡܐ ܕܡܢܫܐ ܗ݀ܘ ܕܐܝܼܬܘܗܝ ܗܼܘܐ
                    ܒܘܼܟܪܐ ܢܣܼܒܘܢܿ ܒܗ݀ܝ ܕܐܦܪܝܡ ܡܛ݀ܠ ܕܠܐ ܐܟܼܫܪ ܦܿܐܫ ܡܼܢ ܪܝܼܫܢܘܼܬܐ ܘܡܼܢ ܡܢܿܬܐ
                    ܝܼܚܝܼܕܝܬܐ ܕܢܦܼܫܗ. ܕܬܐܪܬܘܼܢܗܿ ܗ̄ ܝܪܬܝܼܢ ܗܼܘܘ ܠܗܿ ܓܝܪ ܡܼܢ ܐܒܗ̈ܝܗܘܿܢ ܒܗܿܝ ܕܟܕ ܥܡ
                    ܚܕ̈ܕܐ ܦ݀ܠܓܝܼܢ ܗܼܘܘ ܡܼܢ ܚܕܕ̈ܐ ܡܟܝܼܠ ܝܿܪܬܝܼܢ ܗܼܘܘ ܠܗܿ. ܗܿܟܢܐ ܕܝܢ ܘܡܼܢ ܐܚܝ̈ܗܘܿܢ
                    ܝܿܪܬܝܼܢ ܗܼܘܘ ܠܗܿ ܐܟܡܿܢ ܕܠܦܘܼܬ ܝܘܼܒܠܗܘܿܢ ܕܡܼܢ ܐܒܗܝ̈ܗܘܿܢ. ܐܪܥܐ ܐܝܿܕܐ ܕܝܼܠܗܘܿܢ ܗܘܬ݀
                    ܘܠܐܢܫ̈ܝܗܘܿܢ ܩܕ̈ܡܝܐ ܙ݀ܕܩܐ ܗܘܬ݀ ܩܿܥܝܢ ܗܼܘܘ܆ ܘܐܝܿܢܐ ܕܦ݀ܠܚ ܠܡܕܝܼܢܬܐ ܢܬܦܼܠܚ ܡܼܢ
                    ܟܿܠܗܝܢ ܫܪ̈ܒܬܐ ܕܝܼܣܪܐܝܠ ܗ̄ ܦܠ̈ܚܝ ܠܡܕܝܼܢܬܐ ܩܿܪܐ ܠܪ̈ܝܼܫܢܐ ܘܡܕܒܪ̈ܢܐ. ܗܿܢܘܿܢ ܕܩܝܿܡܝܼܢ
                    ܗܼܘܘ ܒܐܦ̈ܝ ܥܡܐ. ܡܢܿܬܗ ܕܡܕܒܪܢܐ ܬܗܼܘܐ ܒܡܕܝܼܢܬܐ ܒܝܢܬ݀ ܗ̄ ܕܐܟܙܼܢܐ ܕܐܝܼܬ ܡܢܿܬܐ ܠܗܝܟܠܐ
                    ܘܠܡܕܝܼܢܬܐ ܘܐ̈ܠܘܝܐ ܒܗܿ ܒܝܪܬܘܼܬܐ ܗܿܕܐ ܩܕܝܼܫܬܐ ܕܐܠܗܐ ܗܿܟܢܐ ܐܦ ܡܢܿܬܗ ܕܡܕܒܪܢܐ ܒܗܿ
                    ܬܗܼܘܐ܆ ܘܫܡܗܿ ܕܡܕܝܼܢܬܐ ܗ̄ ܐܡܿܪ ܐܦ ܫܡܗܿ ܕܡܕܝܼܢܬܐ ܕܐܝܼܬܘܗܝ ܐܘܿܪܫܠܡ. ܡܟܬܪ ܐܝܟ
                    ܕܐܝܼܬ̄ܘ ܐܘܼܪ ܢܘܼܗܪܐ ܫܠܝܼܡ ܫܠܡܐ. ܡܿܕܝܢ ܐܘܿܪܫܠܡ ܢܘܼܗܪܐ ܕܫܠܡܐ ܡܬܼܦܫܐ ܐܘܿܪ ܚܙܼܘܐ
                    ܕܫܝܢܐ ܗܿܟܢܐ ܓܝܪ ܐܫܼܬܡܗܬ݀ ܡܼܢ ܐܠܗܐ ܡܼܢ ܝܘܡ̈ܬܐ ܩܕܡ̈ܝܐ ܟܕ ܪܡܿܙ ܒܗܿܢ ܒܫܡܐ
                    ܕܠܟܗܝܼܢܘܼܬܐ ܘܪܒܘܼܬܐ ܡܫܼܬܘܫܛܐ ܐܝܟ ܫܘܼܘܕܝܗ ܕܐܠܗܐ. ܫܠܡ ܣܘܥܪܢܝܐ ܕܚܙܩܝܐܝܠ.