Ephrem the Syrian. “Nisibis 3.” Digital Syriac Corpus. Last modified June 12, 2019. https://syriaccorpus.org/261. Nisibis III ܒ ܒܰܪ ܩܳܠܶܗ ܩܰܒܥܳܗ̇ ܠܡܰܫܡܰܥܬܰܢ ܕܠܳܐ ܬܶܫܬܪܶܐ ܘܬܰܦܗܶܐ ܕܦܰܗܝܳܐ ܠܡܰܥܩܳܒܽܘ ܕܡܰܢܽܘ ܘܰܠܡܼܰܢ ܕܳܡ̇ܐ ܐܰܝܟܰܢ ܡܨܶܝܢ ܚܢܰܢ ܓܶܝܪ ܕܢܶܨܽܘܪ ܕܡܽܘܬܶܗ ܒܰܢ ܕܗܰܘ ܐܺܝܬܝܳܐ ܕܕܳܡ̇ܐ ܠܡܰܕܥܳܐ ܠܰܝܬ ܒܶܗ ܡܶܕܶܡ ܕܰܐܛܺܝܡ ܒܟܽܠܶܗ ܚܳܙܶܐ ܘܫܳܡܰܥ ܟܽܠܶܗ ܐܰܝܟ ܡܰܠܳܠܰܐ ܗ̱ܘ ܟܽܠܶܗ ܒܟܽܠ ܪ̈ܶܓܫܶܐ ܗܽܘ ܥܽܘܢܺܝܬܳܐ : ܫܽܘܒܚܳܐ ܠܚܰܕ ܐܺܝܬܝܳܐ ܕܠܳܐ ܡܶܬܒܨܶܐ ܡܶܢܰܢ ܠܳܐ ܡܶܬܡܺܝܫ ܚܶܙܘܶܗ ܕܢܶܬܨܺܝܪ ܒܪܶܥܝܳܢܰܢ ܫܳܡܰܥ ܕܠܳܐ ܐܶܕ̈ܢܶܐ ܡܡܰܠܶܠ ܕܠܳܐ ܦܽܘܡܳܐ ܥܳܒܶܕ ܕܠܳܐ ܐܺܝ̈ܕܶܐ ܘܚܳܙܶܐ ܕܠܳܐ ܥܰܝ̈ܢܶܐ ܠܳܐ ܟܳܝܫܳܐ ܢܰܦܫܰܢ ܘܫܶܠܝܳܐ ܨܶܝܕ ܡܶܢ ܕܗܳܟܰܢܳܐ ܗ̱ܘ ܠܒܶܫ ܗ̱ܘܳܐ ܒܛܰܝܒܽܘܬܶܗ ܐܶܣܟ̈ܺܡܶܐ ܕܐ̱ܢܳܫܽܘܬܳܐ ܘܟܶܢܫܰܢ ܒܕܶܡ̈ܘܳܬܶܗ ܢܺܐܠܰܦ ܕܰܐܝܟܰܢܳܐ ܕܺܐܝܬܝܰܐ ܗ̱ܘ ܪܽܘܚܳܢܳܐ ܘܶܐܬܚܙܺܝ ܐܰܝܟ ܦܰܓܪܳܢܳܐ ܘܗܳܟܰܢ ܐܳܦ ܫܶܦܝܰܐ ܗ̱ܘ ܘܶܐܬܚܙܺܝ ܐܰܝܟ ܚܰܡܬܳܢܳܐ ܘܗܳܠܶܝܢ ܠܥܽܘܕܪܳܢܳܐ ܐܺܝܬܝܳܐ ܒܕܶܡ̈ܘܳܬܰܢ ܠܰܢ ܕܳܡܶܐ ܕܰܚܢܰܢ ܢܕܰܡܶܐ ܒܶܗ ܚܰܕ ܗ̱ܽܘ ܕܠܶܗ ܕܳܡܶܐ ܝܰܠܕܳܐ ܕܰܢܦܰܩ ܡܶܢܶܗ ܕܰܛܒܺܝܥ ܒܕܶܡ̈ܘܳܬܶܗ ܢܨܺܝܒܺܝܢ ܫܡܼܰܥ ܗܳܠܶܝܢ ܕܰܒܥܶܠܬܶܟܝ̱ ܗܳܠܶܝܢ ܐܶܬܟܬܶܒ ܘܶܐܬܡܰܠܰܠ ܐܳܦ ܠܶܟܝ̱ ܐܳܦ ܠܰܐܚܪ̈ܳܢܶܐ ܗܘܺܝܬ ܥܶܠܬܳܐ ܒܬܺܒܶܝܠ ܠܩܺܐܪ̈ܣܶܐ ܘܰܠܬܽܘܪ̈ܓܳܡܶܐ ܦܽܘܡ̈ܶܐ ܥܠܰܝܟܝ̱ ܐܰܘ ܕܶܐܬܚܰܒܫܰܬܝ̱ ܦܽܘܡ̈ܶܐ ܥܠܰܝܟܝ̱ ܙܡܰܪܘ̱ ܕܰܢܨܰܚܬܝ̱ ܘܶܐܬܦܰܨܶܝܬܝ̱ ܒܶܟܝ̱ ܐܶܬܦܰܬܰܚܘ̱ ܦܽܘܡ̈ܶܐ ܠܺܐܠܝܳܐ ܘܰܠܩܽܘܠܳܣܳܐ ܨܠܽܘܬܳܐ ܕܥܳܡܽܘܪ̈ܰܝܟܝ̱ ܣܶܦܩܰܬ ܠܦܽܘܪܩܳܢܶܟܝ̱ ܠܳܐ ܗ̱ܘܳܐ ܕܙܰܕܺܝܩܺܝܢ ܐܶܠܳܐ ܕܬܰܝܳܒܺܝܢ ܟܡܳܐ ܕܨܳܥܪܺܝܢ ܗܳܟܰܢ ܪܳܗܛܺܝܢ ܬܚܶܝܬ ܫܰܒܛܳܐ ܒܚܽܘ̈ܒܶܐ ܘܰܒܢܶܨ̈ܚܳܢܶܐ ܡܡܰܙܓܺܝܢ ܕܰܥܫܶܢܘ̱ ܚܛܳܗ̈ܰܝܗܽܘܢ ܢܥܰܫܢܽܘܢ ܦܺܐܪ̈ܰܝܗܽܘܢ ܕܰܢܨܰܚܘ̱ ܒܣܳܩܰܝ̈ܗܽܘܢ ܢܰܨܰܚܘ̱ ܐܳܦ ܟܠܺܝ̈ܠܰܝܗܽܘܢ ܝܰܘܡܳܐ ܕܦܽܘܪܩܳܢܶܟܝ̱ ܡܰܠܟܰܐ ܗ̱ܘ ܕܟܽܠ ܝܰܘܡ̈ܺܝܢ ܫܰܒܬܳܐ ܣܶܚܦܰܬ ܫܽܘܪ̈ܰܝܟܝ̱ ܣܶܚܦܰܬ ܠܟܳܦܽܘܪ̈ܶܐ ܝܽܘܡ ܩܝܳܡܬܶܗ ܕܰܒܼܪܳܐ ܐܰܩܺܝܡܳܗ̇ ܠܡܰܦܽܘܠܬܶܟܝ̱ ܝܽܘܡ ܩܝܳܡܬܳܐ ܐܰܩܺܝܡܶܟܝ̱ ܐܰܝܟ ܫܡܶܗ ܩܰܠܣܶܗ ܠܟܽܘܢܳܝܶܗ ܫܪܳܬ ܫܰܒܬܳܐ ܢܰܛܪܳܗ̇ ܒܥܰܡܠܳܐ ܕܬܽܘܪ̈ܥܳܬܳܗ̇ ܗܺܝ ܟܰܐܪܰܬ ܢܰܫܦܳܗ̇ ܒܫܳܡܪܺܝܢ ܥܫܶܢ ܟܰܦܢܳܐ ܒܶܟܝ̱ ܕܶܝܢ ܥܫܶܢ ܣܰܒܥܳܐ ܠܫܳܡܪܺܝܢ ܓܣܼܳܐ ܥܰܠ ܠܳܗ̇ ܣܰܒܥܳܐ ܡܶܢ ܫܶܠܝܳܐ ܠܶܟܝ̱ ܕܶܝܢ ܢܗܼܰܡ ܥܰܠ ܠܶܟܝ̱ ܝܰܡܳܐ ܕܡܶܢ ܫܶܠܝܳܐ ܒܗܳܝ ܐܶܬܶܐܟܶܠ ܥܽܘܠܳܐ ܘܰܐܚܝܳܗ̇ ܒܶܟܝ̱ ܐܶܬܶܐܟܶܠ ܦܰܓܪܳܐ ܚܰܝܳܐ ܘܡܰܚܶܐ ܟܽܠ ܡܶܢ ܫܶܠܝ ܦܪܰܩ ܐܶܢܽܘܢ ܐܟܺܝܠܳܐ ܠܳܐܟܽܘ̈ܠܶܐ ܝܺܕܺܝܥܳܐ ܗ̱ܝ ܕܠܰܘ ܛܳܒܰܐ ܗ̱ܘ ܨܒܼܳܐ ܗ̱ܘܳܐ ܒܽܐܘ̈ܠܨܳܢܶܐ ܕܰܗܘܰܘ ܒܟܽܠ ܕܳܪ̈ܺܝܢ ܟܰܕ ܗܼܽܘ ܥܒܼܰܕ ܐܶܢܽܘܢ ܚܰܘܒܰܝ̈ܢ ܗܽܘ ܗܳܘܶܝܢ ܥܶܠܬܳܐ ܕܒܽܘܣܒ̈ܳܣܺܝܢ ܠܳܐ ܐ̱ܢܳܫ ܩܒܶܠ ܡܶܢܶܗ ܕܰܒܪܰܝܢ ܗܽܘܝܽܘ ܩܒܺܝܠ ܡܶܢܰܢ ܕܰܚܛܰܝܢ ܘܰܐܠܶܨܢܳܝܗ̱ܝ ܕܢܶܪܓܰܙ ܕܠܳܐ ܨܒܼܳܐ ܗ̱ܘܳܐ ܘܢܶܡܚܶܐ ܕܠܳܐ ܪܥܳܐ ܗ̱ܘܳܐ ܐܰܪܥܳܐ ܟܰܪܡܳܐ ܘܙܰܝܬܳܐ ܣܢܺܝܩܺܝܢ ܥܰܠ ܡܰܪܕܽܘܬܳܐ ܡܳܐ ܕܶܐܬܚܒܶܛ ܙܰܝܬܳܐ ܟܶܢ ܥܳܬܪܺܝܢ ܦܶܪ̈ܥܰܘܗ̱ܝ ܡܳܐ ܕܶܐܬܟܣܰܚ ܟܰܪܡܳܐ ܟܶܢ ܫܳܦܪܺܝܢ ܦܺܐܪ̈ܰܘܗ̱ܝ ܡܳܐ ܕܶܐܬܦܠܰܚ ܥܰܦܪܳܐ ܫܦܼܰܪܘ̱ ܐܶܕܫ̈ܰܘܗ̱ܝ ܡܳܐ ܕܶܐܬܪܕܺܝ ܝܰܡܳܐ ܒܠܺܐܩ̈ܶܐ ܐܳܫܬܺܝܢ ܠܶܗ ܢܚܳܫܳܐ ܟܶܣܦܳܐ ܘܕܰܗܒܳܐ ܡܳܐ ܕܶܐܣܬܩܶܠܘ̱ ܐܰܦܪܶܓܘ̱ ܐܶܢ ܗܽܘ ܕܒܰܪ ܐ̱ܢܳܫܳܐ ܪܳܕܶܐ ܘܡܰܫܦܰܪ ܟܽܠ ܘܶܐܢ ܗܽܘ ܕܰܒܣܼܳܐ ܘܰܐܗܡܺܝ ܡܣܰܬܢܳܐ ܘܡܳܪܶܕ ܟܽܠ ܒܡܶܕܶܡ ܕܪܳܕܶܐ ܗܽܘ ܢܺܐܠܰܦ ܠܗܰܘ ܕܰܪܕܳܝܗ̱ܝ ܟܰܕ ܗܼܽܘ ܐܶܢܗܽܘ ܕܪܳܕܶܐ ܕܢܶܬܗܢܶܐ ܟܽܠܶܗ ܕܪܳܕܶܐ ܓܶܝܪ ܥܰܒܕ̈ܰܘܗ̱ܝ ܕܢܶܩܢܶܐ ܐܶܢܽܘܢ ܛܳܒܳܐ ܪܕܳܐ ܠܥܰܒܕ̈ܰܘܗ̱ܝ ܕܗܶܢܽܘܢ ܠܗܽܘܢ ܢܶܩܢܽܘܢ ܢܶܗܘܽܘܢ ܐܽܘܠܨܳܢܰܝ̈ܟܝ̱ ܣܳܦܪ̈ܶܐ ܠܥܽܘܗܕ̈ܳܢܰܝܟܝ̱ ܚܒܺܝ̈ܫܶܐ ܬܠܳܬܳܐ ܓܶܝܪ ܣܳܦܩܺܝܢ ܕܢܶܗܘܽܘܢ ܠܶܟܝ̱ ܣܶܦܪ̈ܶܐ ܕܬܶܬܗܰܓܺܝܢ ܟܽܘܠ ܫܳܥ ܒܫܰܪ̈ܒܰܝܗܽܘܢ ܕܬܰܪ̈ܬܶܝܢ ܕܺܝܰܬܺܩ̈ܺܝܢ ܫܳܛܬܝ̱ ܗܘܰܝܬܝ̱ ܕܬܶܩܪܶܝܢ ܒܗܶܝܢ ܚܰܝ̈ܰܝܟܝ̱ ܒܰܕܓܽܘܢ ܟܬܼܰܒ ܗ̱ܘܳܐ ܠܶܟܝ̱ ܬܠܳܬܳܐ ܣܶܦܪ̈ܺܝܢ ܥܰܣܩ̈ܺܝܢ ܕܬܶܩܪܶܝܢ ܒܗܽܘܢ ܢܰܓ̈ܕܶܝܟܝ̱ ܢܶܒܼܛܰܠ ܒܡܳܐ ܕܰܗܘܳܐ ܡܶܕܶܡ ܕܬܽܘܒ ܗ̇ܘܶܐ ܢܶܬܪܕܶܐ ܒܗܰܘ ܕܶܐܬܳܐ ܕܢܶܬܟܣܰܗ ܠܗܰܘ ܕܳܐܬܶܐ ܢܶܥܗܰܕ ܠܗܰܘ ܕܰܥܼܒܰܪ ܕܢܶܫܪܶܝܘܗ̱ܝ ܠܗܰܘ ܕܰܥܬܺܝܕ ܕܩܰܕܡܳܝܬܳܐ ܡܚܽܘܬܳܐ ܛܥܰܝܢ ܗܘܰܝܢ ܡܶܨܥܳܝܬܳܐ ܬܟܰܒܬܰܢ ܕܡܶܨܥܳܝܬܳܐ ܛܥܰܝܢܰܢ ܬܠܺܝܬܳܝܬܳܐ ܥܡܰܠܬܰܢ ܡܰܢܽܘ ܕܬܽܘܒ ܢܶܛܥܼܶܐ