Ephrem the Syrian. “Nisibis 5.” Digital Syriac Corpus. Last modified June 12, 2019. https://syriaccorpus.org/263. Nisibis V ܥܳܠ ܩܳܠܳܐ ܕܥܳܢܳܟ ܚܢܺܝܓܳܐܺܝܬ ܐܰܫܡܰܥ ܒܛܰܝܒܽܘܬܳܟ ܛܶܒܳܐ ܕܦܽܘܪܩܳܢܳܐ ܕܰܗܘܼܳܬ ܡܰܫܡܰܥܬܰܢ ܐܽܘܪܚܳܐ ܕܡܰܥܒܰܪܬܳܐ ܕܰܫܘܳܗ̇ ܠܬܰܪܥܺܝܬܰܢ ܛܶܒ̈ܶܐ ܕܣܽܘܪܳܕܳܐ ܥܽܘܢܺܝܬܳܐ: ܬܶܫܒܚ̈ܳܢ ܠܙܳܟܽܘܬܳܟ ܫܽܘܒܚܳܐ ܠܡܳܪܽܘܬܳܟ ܒܰܝܰܐ ܒܝܽܘܬܪ̈ܳܢܶܐ ܙܥܽܘܪ̈ܶܐ ܘܕܰܠܺܝ̈ܠܶܐ ܠܰܐܝܠܶܝܢ ܕܶܐܬܬܰܓܰܪܘ̱ ܬܽܘܟܳܐ ܒܥܰܡ̈ܠܰܝܗܽܘܢ ܒܙܰܒܢܳܐ ܕܝܽܘܬܪܳܢܳܐ ܝܰܪܬܽܘܗ̱ܝ ܠܚܽܘܣܪܳܢܳܐ ܓܰܠܝܳܐ ܗ̱ܝ ܕܗܽܘ ܪܽܘܓܙܳܐ ܡܰܨܰܥ ܘܩܳܡ ܒܰܐܪܥܳܐ ܬܽܘܟܳܐ ܘܝܽܘܬܪܳܢܳܐ ܒܚܶܡܬܳܐ ܡܰܦܠܶܓ ܗ̱ܘܳܐ ܐܺܝܬ ܕܰܐܚܪܒܳܗ̇ ܡܶܢ ܫܶܠܝ ܘܺܐܝܬ ܕܰܐܚܬܪܳܗ̇ ܡܶܢ ܫܶܠܝ̱ ܕܢܰܠܶܦ ܕܡܶܫܟܰܚ ܗܽܘ ܪܳܕܶܐ ܒܟܽܠ ܦܽܘܪ̈ܣܺܝܢ ܕܰܚܼܙܳܐ ܕܪ̈ܳܕܽܘܦܶܐ ܕܚܺܝܠܺܝܢ ܩܕܳܡ ܥܰܝ̈ܢܰܝ ܦܰܫܛܰܢܝ̱ ܩܕܳܡ ܝܰܠܕ̈ܰܝ ܘܢܰܓܕܽܘܢܝ̱ ܚܰܒܺܝ̈ܒܰܝ ܗܳܐ ܐܰܠܦܰܢܝ̱ ܕܶܐܕܚܰܠ ܡܶܢܶܗ ܘܠܳܐ ܡܶܢ ܐ̱ܢܳܫ ܕܟܰܕ ܠܰܝܬ ܕܡܰܚܶܐ ܠܰܢ ܪܽܘܓܙܶܗ ܦܩܼܰܕ ܡܶܢ ܫܶܠܝ̱ ܘܟܽܠ ܐ̱ܢܳܫ ܡܬܼܰܚ ܢܰܦܫܶܗ ܘܗܼܽܘ ܠܶܗ ܡܢܰܓܶܕ ܗ̱ܘܳܐ ܘܳܐܦ ܠܶܗ ܠܒܳܒܠܳܝܳܐ ܕܢܰܓܼܶܕ ܠܟܽܠ ܡ̈ܰܠܟܺܝܢ ܟܰܕ ܐܶܬܬܟܺܝܠ ܘܰܣܒܼܰܪ ܕܠܰܝܬ ܡܰܢ ܕܢܰܟܶܐ ܠܶܗ ܥܼܰܒܕܶܗ ܕܗܼܽܘ ܒܺܐܝ̈ܕܰܘܗ̱ܝ ܢܰܦܫܶܗ ܢ̇ܢܰܓܶܕ ܗ̱ܘܳܐ ܙܺܝܘܶܗ ܘܪܶܥܝܳܢܶܗ ܡܶܢ ܫܶܠܝ̱ ܫܢܰܘ ܐܰܟܚܰܕ ܘܒܰܣܒܶܣ ܫܼܕܳܐ ܢܰܚ̈ܬܰܘܗ̱ܝ ܘܰܢܦܼܰܩ ܦܗܼܳܐ ܒܕܰܒܪܳܐ ܗܼܽܘ ܠܶܗ ܪܕܰܦ ܠܽܘܩܕܳܡ ܘܟܶܢ ܗܽܘ ܪܰܕܦܽܘܗ̱ܝ ܥܰܒܼ̈ܕܰܘܗ̱ܝ ܚܰܘܽܝ ܠܟܽܠ ܡ̈ܰܠܟܺܝܢ ܕܰܫܼܒܳܐ ܘܰܐܚܶܬ ܗ̱ܘܳܐ ܕܠܰܘ ܗܼܽܘ ܒܝܰܕ ܚܰܝܠܶܗ ܡܨܶܐ ܗ̱ܘܳܐ ܕܢܶܙܟܶܐ ܗ̱ܘܳܐ ܚܰܝܠܳܐ ܕܠܶܗ ܢܰܓܶܕ ܗܽܘܝܽܘ ܪܕܳܐ ܐܶܢܽܘܢ ܛܶܥܢܶܬ ܘܩܳܡܶܬ ܡܳܪܝ̱ ܢܶܓܕ̈ܶܐ ܕܦܳܪ̈ܽܘܩܰܝ ܡܨܶܝܬ ܗܽܘ ܒܛܰܝܒܽܘܬܳܐ ܕܬܰܛܐܶܒ ܒܢܳܟܽܘ̈ܝܶܐ ܡܨܶܝܬ ܗܽܘ ܒܟܺܐܢܽܘܬܳܐ ܕܬܰܪܕܶܐ ܒܥܳܕܽܘܪ̈ܶܐ ܝܰܘܡܳܐ ܕܰܣܥܼܳܐ ܘܰܣܠܼܶܩ ܥܰܠ ܫܳܡܪܺܝܢ ܚܰܝܠܳܐ ܣܰܒܥܳܐ ܘܦܽܘܢܳܩܳܐ ܓ̈ܰܙܶܐ ܘܩ̈ܶܢܝܳܢܶܐ ܐܰܪܫܶܠܘ̱ ܫܒܰܩܘ̱ ܘܰܥܪܰܩܘ̱ ܟܰܠܠܳܗ̇ ܒܪ̈ܳܕܽܘܦܶܝܗ̇ ܟܰܠܠܽܘܢܝ̱ ܚ̈ܰܒܺܝܒܰܝ ܘܣܰܥܪܽܘܢܝ̱ ܦܳܪ̈ܽܘܩܰܝ ܒܥܰܘܠܳܐ ܕܥܳܡܽܘܪ̈ܰܝ ܢܰܓܽܘܢܝ̱ ܥܳܕܽܘܪ̈ܰܝ ܐܰܫܩܳܢܝ ܡܶܢ ܓܽܘ̈ܦܢܰܝ ܟܳܣܳܐ ܕܒܽܘܝܳܐܳܐ ܠܫܶܒܠܳܐ ܘܠܰܓܦܶܬܳܐ ܛܰܪ ܡܳܪܝ̱ ܒܛܰܝܒܽܘܬܳܟ ܬܒܰܝܰܐ ܠܰܐܟܳܪܳܐ ܓܦܶܬܶܗ ܕܟܰܪܡܳܐ ܬܚܰܕܶܐ ܠܦܰܠܳܚܳܐ ܫܶܒܠܶܗ ܕܶܐܟܳܪܳܐ ܠܳܘܝܳܢ ܚܕܳܐ ܠܰܚܕܳܐ ܗܳܝ ܫܒܳܠܳܐ ܘܣܰܬܳܐ ܒܚܰܩܠܳܐ ܠܚܳܨ̈ܽܘܕܶܐ ܚܰܡܪܳܐ ܡܨܶܐ ܡܰܦܨܰܚ ܒܟܰܪܡܳܐ ܠܦܰܠܳܚ̈ܶܐ ܠܰܚܡܳܐ ܡܚܰܝܶܠ ܬܽܘܒ ܡܰܨܝܳܢ ܬܰܪ̈ܬܰܝܗܶܝܢ ܕܰܢܒܰܝܐܰܢ ܥܳܩ̈ܳܬܝ̱ ܬܠܺܝܬܳܝܳܐ ܡܰܨܝܳܐ ܕܰܬܒܰܝܐܰܢ ܝܰܬܺܝܪ ܕܰܐܘܕܶܐ ܕܡܶܢ ܫܶܠܝܳܐ ܦܶܠܛܰܬ ܒܛܰܝܒܽܘܬܳܐ ܡܰܢ ܕܶܝܢ ܕܢܶܬܢܰܛܪܶܐ ܢܰܦܫܶܗ ܒܛܰܝܒܽܘܬܳܐ ܐܶܢ ܐܳܙܶܠ ܕܢܶܬܪܥܰܡ ܒܬܽܘܟܳܐ ܕܩ̈ܶܢܝܳܢܰܘܗ̱ܝ ܛܰܠܡܳܗ̇ ܠܛܰܝܒܽܘܬܶܗ ܕܗܰܘ ܡܰܢ ܕܚܳܣ ܥܠܰܘܗ̱ܝ ܡܶܨܒܰܐ ܗ̱ܘ ܨܒܼܳܐ ܘܚܰܒܶܠ ܡܶܕܶܡ ܚܠܳܦ ܡܶܕܶܡ ܚܰܒܶܠ ܠܩ̈ܶܢܝܳܢܶܐ ܘܰܫܒܼܰܩ ܠܩܶܢܝ̈ܳܢܶܐ ܚܰܒܶܠ ܠܫ̈ܶܬܠܳܬܰܢ ܒܚܰܠܦܳܐ ܕܢܰܦܫ̈ܳܬܰܢ ܢܶܕܚܼܰܠ ܕܢܶܬܪܰܥܰܡ ܕܰܡ ܢܶܬܥܺܝܪ ܪܽܘܓܙܳܐ ܘܢܶܫܒܽܘܩ ܠܩܶܢܝ̈ܳܢܶܐ ܘܢܶܡܚܶܐ ܠܰܩ̈ܢܰܝܳܐ ܕܢܺܐܠܰܦ ܒܫܽܘܠܳܡܳܐ ܚܢܳܢܶܗ ܕܫܽܘܪܳܝܳܐ ܢܺܐܠܰܦ ܕܥܰܠ ܡܰܢܽܘ ܙܳܕܶܩ ܕܢܶܬܪܰܥܰܡ ܝܺܠܶܦ ܕܬܶܬܪܰܥܰܡ ܠܳܐ ܗ̱ܘܳܐ ܥܰܠ ܪܳܕܽܘܝܳܐ ܐܶܠܳܐ ܥܰܠ ܨܶܒܝܳܢܳܟ ܕܰܐܚܛܺܝܬ ܘܶܐܬܢܰܓܕܶܬ ܢܰܪܦܶܝܘܗ̱ܝ ܠܪܽܘܥܳܡܳܐ ܘܢܶܦܢܶܐ ܠܒܳܥܽܘܬܳܐ ܕܶܐܢ ܡܺܝܬ ܩܰܢܳܝܳܐ ܒܼܛܶܠ ܠܶܗ ܐܳܦ ܩܶܢܝܳܢܶܗ ܘܰܟܡܳܐ ܕܗܼܽܘ ܩܰܝܳܡ ܥܳܩܶܒ ܠܰܐܒ̈ܕܳܬܶܗ ܢܶܣܓܽܘܢ ܒܽܘ̈ܝܳܐܶܐ ܒܪ̈ܰܚܡܶܐ ܠܥܳܡܽܘܪ̈ܰܝ ܣܪܺܝܕܳܐ ܘܬܰܘܬܳܪܳܐ ܢܒܰܝܰܐ ܒܓܰܘ ܪܽܘܓܙܳܐ ܘܶܐܛܥܶܐ ܒܫܰܪܟܳܢܳܐ ܐܶܒܠܶܗ ܕܚܽܘܒܳܠܳܐ ܣܰܡܣܶܡ ܘܪܰܒܳܐ ܡܳܪܝ̱ ܦܺܐܪ̈ܶܐ ܕܰܐܘܬܰܪ ܪܽܘܓܙܳܐ ܕܶܡܽܘ ܠܺܝ ܐܰܝܟ ܠܰܟܪ̈ܺܝܗܶܐ ܕܰܦܠܰܛܘ̱ ܒܡܰܘܬܳܢܳܐ ܐܰܛܥܰܝܢܝ̱ ܒ̈ܕܰܠܺܝܠܶܐ ܚܰܫܳܐ ܕܣ̈ܰܓܺܝܐܶܐ ܥܰܡܳܗ̇ ܕܡܶܠܰܬܝ̱ ܡܳܪܝ̱ ܥܶܗܕܶܬ ܕܳܐܦ ܝܰܪܚܰܐ ܗ̱ܘ ܕܰܣܡܳܕܪܐ ܡܪܰܥ ܠܶܗ ܘܰܢܦܰܠ ܒܟܽܘܪܗܳܢܳܐ ܢܺܐܬܶܐ ܠܚܽܘܠܡܳܢܳܐ ܕܢܶܗܘܶܐ ܠܒܽܘܝܳܐܳܐ ܦܠܰܛܘ̱ ܓܶܝܪ ܒܡܰܘܬܳܢܳܐ ܕܰܕܒܰܪܘ̱ ܠܰܐܚܰܝ̈ܗܽܘܢ ܓܽܘ̈ܦܢܶܐ ܕܠܳܐ ܩܳܠܳܐ ܒܶܟܝ̱ ܕܰܩܕܳܡܰܝܗܶܝܢ ܓܕܺܝܕܺܝܢ ܪܡܶܝܢ ܪܳܒܰܬ ܐܺܝ̈ܠܳܢܶܐ ܪܚܽܘܡܰܝ̈ܗܶܝܢ ܨܰܘܬܳܐ ܕܢܶܨ̈ܒܳܬܳܐ ܗܳܐ ܒܳܥܝܳܐ ܐܰܪܥܳܐ ܥܶܩܳܪ̈ܶܐ ܠܦܳܠܚ̈ܶܐ ܒܳܟܶܝܢ ܐܳܦ ܡܒܰܟܶܝܢ ܫܽܘܦܪܳܐ ܦܪܰܣ ܘܰܐܛܶܠ ܘܩܰܦܠܽܘܗ̱ܝ ܚܕܳܐ ܫܳܥܳܐ ܩܪܶܒ ܢܳܪܓܳܐ ܘܰܦܣܰܩ ܘܦܰܣܩܶܗ ܠܦܰܠܳܚܳܐ ܦܣܳܩܳܐ ܠܺܐܝܠܳܢ̈ܶܐ ܘܚܰܫܳܐ ܠܦܰܠܳܚܳܐ ܟܽܠ ܢܳܪܓܳܐ ܕܰܡܚܰܘ ܗܽܘܝܽܘ ܛܥܶܡ ܚܰܫܶܗ