Ephrem the Syrian. “Nisibis 6.” Digital Syriac Corpus. Last modified June 12, 2019. https://syriaccorpus.org/264. Nisibis VI ܒ ܒܰܪ ܩܳܠܶܗ ܐܶܪܗܰܛ ܒܽܐܘ̈ܠܳܨܢܰܝ ܠܘܳܬ ܐܳܣܝܳܐ ܕܡܰܓܳܢ ܕܰܐܣܺܝ ܠܒܽܘܣ̈ܒܳܣܰܝ ܩܰܕ̈ܡܶܐ ܘܬܶܢܝ̈ܳܢܶܐ ܕܰܐܚܠܶܡ ܬܠܺܝ̈ܬܳܝܶܐ ܢܰܐܣܶܐ ܐ̱ܪ̈ܒܺܝܥܳܝܶܐ ܥܽܘܢܺܝܬܳܐ: ܐܰܣܳܢܝ ܒܪܳܐ ܒܽܘܟܪܳܐ ܒܢ̈ܰܝ ܡܳܪܝ̱ ܐܶܫܬܺܝܘ ܘܰܪܘܺܝܘ ܛܳܒܳܐ ܕܰܡܼܙܰܓ ܪܽܘܓܙܳܐ ܘܰܣܒܼܰܟܘ̱ ܒܬܰܨ̈ܒܝܳܬܰܝ ܘܰܫܠܼܰܚܘ̱ ܫܕܰܘ ܨܶܒ̈ܬܰܝ ܒܰܣܒܶܣ ܕܠܳܐ ܚܰܘܣܳܢ ܢܰܚ̈ܬܰܝ ܘܟܽܘ̈ܠܳܠܰܝ ܓܠܰܐܽܘܢܝ̱ ܘܶܐܬܦܰܪܣܺܝܬ ܕܶܐܬܢܰܟܦܶܬ ܩܰܠܺܝܠ ܡܶܢ ܗܰܘ ܦܽܘܪܣܳܝܳܐ ܩܰܕܡܳܐ ܘܬܶܢܝܳܢܳܐ ܕܶܐܬܢܰܟܦܶܬ ܕܰܬܠܳܬ ܗܳܐ ܦܰܪܣܝܽܘܢܝ̱ ܕܰܐܪ̈ܒܰܥ ܕܰܩܦܰܠܘ̱ ܫܼܩܰܠܘ̱ ܢܰܚ̈ܬܰܝ ܨ̈ܶܒܬܰܝ ܘܦܰܪ̈ܕܰܝܣܰܝ ܒܣܰܩܳܐ ܕܰܟܒܺܝܢ ܡܰܕܒܰܚܝ̱ ܚܽܘܪ ܡܳܪܝ̱ ܘܢܰܟܶܦܰܝܢܝ̱ ܣܰܩܶܗ ܢܗܶܐ ܠܺܝ ܡܳܪܝ̱ ܦܪܺܝܣܳܐ ܕܦܽܘܪܩܳܢܳܐ ܗܳܐ ܠܰܘ ܒܝܰܕ ܢܰܟܦܳܐ ܪܕܰܝܬܳܢܝ̱ ܪܰܒܽܘܠܺܝ ܕܗܳܐ ܒܶܗܬܬܶܗ ܩܕܳܡܽܘܗ̱ܝ ܘܡܶܢ ܒܶܣܬܪܶܗ ܚܶܣܕܶܗ ܗܽܘ ܓܶܝܪ ܙܽܘܘܳܓܶܗ ܓܰܘܪܳܐ ܦܫܺܝܚ ܡܶܢܶܗ ܗܳܐ ܐܰܢ̱ܬܬܶܗ ܒܰܪܬܶܗ ܘܫܰܘܬܳܦܬܶܗ ܚܳܬܶܗ ܘܶܐܡܳܐ ܕܰܢܦܼܰܩ ܡܶܢܳܗ̇ ܒܬܶܢܝܳܐ ܗܼܦܰܟ ܫܰܩܠܳܗ̇ ܫܡܰܝܳܐ ܬܡܼܰܗܘ̱ ܕܰܟܡܳܐ ܐܰܪܓܼܶܙ ܘܗܳܐ ܡܰܨܠܼܰܚ ܘܶܐܢ ܡܳܪܝ̱ ܣܓܺܝܘ ܥܰܘ̈ܠܰܝ ܗܳܟܰܢ ܥܫܶܢܘ̱ ܚܰܘ̈ܒܰܝ ܕܬܰܫܠܶܡ ܡܢܰܟܰܦܬܳܐ ܐܶܡܳܐ ܕܢܰܟ̈ܦܳܬܳܐ ܠܳܐܬܽܘܪ ܡܣܰܝܰܒܬܳܐ ܐܶܡܳܐ ܕܛܰܢ̈ܦܳܬܳܐ ܙܓܽܘܪܳܝܗ̱ܝ ܕܠܳܐ ܢܺܐܬܶܐ ܘܢܰܢܺܝܕ ܥܠܰܝ ܪܺܝܫܶܗ ܘܢܶܪܦܽܘܣ ܥܠܰܝ ܥܶܩܒܶܗ ܘܢܶܚܕܶܐ ܕܩܳܠ ܛܶܒܶܗ ܗܳܟܰܢ ܫܼܓܰܫ ܬܺܒܶܝܠ ܘܬܽܘܒ ܢܶܬܪܺܝܡ ܩܰܠܺܝܠ ܚܙܰܘ ܡܳܪܝ̱ ܒܢ݁̈ܰܝ ܦܽܘܪܳܣܝ ܐܳܦܶܢ ܦܰܪܣܝܽܘܢܝ̱ ܒܳܟܶܝܢ ܦܪܳܣܳܢܝ̱ ܩܕܳܡ ܝܰܠܕ̈ܰܝ ܕܟܳܐܶܒ ܠܗܽܘܢ ܡܶܢ ܟܺܐܒܝ̱ ܘܠܳܐ ܢܰܗܠܽܘܢ ܥܠܰܝ ܚܶܪ̈ܡܶܐ ܕܠܳܐ ܪ̈ܰܚܡܶܐ ܛܥܶܢ ܗܘܺܝ ܘܩܳܡ ܐܰܪ̈ܥܳܬܝ̱ ܦܺܐܪ̈ܶܐ ܘܦܽܘ̈ܢܳܩܶܐ ܛܽܘ̈ܒܶܐ ܒܓܰܘ ܟܰܪܡܳܐ ܣܰܒܥܳܐ ܒܚܰܩ̈ܠܳܬܳܐ ܘܟܰܕ ܐܶܢܳܐ ܒܗܺܝܠܳܐ ܐ̱ܢܳܐ ܡܶܢ ܫܶܠܝ ܨܦܼܰܚ ܪܽܘܓܙܳܐ ܛܠܺܝܡܺܝܢ ܐܰܟܳܪ̈ܶܐ ܐܰܣܺܝܢܺܝܢ ܒܳܙܽܘ̈ܙܶܐ ܕܺܝܙܶܦܘ ܙܪܰܥܼܘ̱ ܐܰܘܒܶܕܘ̱ ܥܰܡ ܚܰܘܒܬܶܗ ܟܰܦܢܶܗ ܛܳܟ ܐܳܦ ܛܘܳܬ ܒܳܐܶܬ ܕܠܰܚܡܶܗ ܚܛܺܝܦ ܡܶܢܶܗ ܛܠܺܝܡ ܡܳܪܝ̱ ܐܰܟܳܪܳܐ ܕܗܼܽܘ ܐܰܘܙܦܳܗ̇ ܠܰܐܪܥܳܐ ܫܩܰܠܬܶܗ ܠܓܽܘܥܠܳܢܳܐ ܘܝܰܗܒܬܶܗ ܠܢܽܘܟܪܳܝܳܐ ܝܺܙܶܦܬܶܗ ܕܰܐܟܳܪܳܐ ܦܪܰܥܬܳܗ̇ ܠܒܳܙܽܘܙܳܐ ܛܰܢ ܒܺܝ ܕܕܺܝܠܳܟ ܐ̱ܢܳܐ ܘܠܳܟ ܡܳܪܝ̱ ܡܟܺܝܪܳܐ ܐ̱ܢܳܐ ܫܠܺܝܚܳܐ ܕܡܰܟܪܰܢܝ̱ ܠܳܟ ܐܡܰܪ ܠܺܝ ܕܛܰܢܳܢܳܐ ܐܰܢ̱ܬ ܕܫܽܘܪܳܐ ܕܢܰܟܦ̈ܳܬܳܐ ܛܢܳܢܰܐ ܗ̱ܘ ܕܓܰܒܪ̈ܰܝܗܶܝܢ ܝܰܡ̈ܡܶܐ ܫܓܶܫ ܫܶܡܫܽܘܢ ܕܛܰܢ ܒܰܐܢ̱ܬܬܶܗ ܪܰܒܰܬ ܟܰܕ ܛܳܒ ܡܣܰܝܰܒܬܳܐ ܗ̱ܝ ܘܰܥܠܰܘܗ̱ܝ ܦܠܺܝܓܳܐ ܗܘܳܬ ܛܰܪ ܥܺܕܬܳܟ ܕܰܐܚܪܺܝܢ ܠܳܐ ܐܺܝܬ ܠܳܗ̇ ܥܰܡܳܟ ܟܽܠ ܡܰܢ ܕܠܳܐ ܛܳܐܶܢ ܒܰܡܟܺܝܪܬܶܗ ܫܺܝܛܳܐ ܗ̱ܝ ܛܢܳܢܰܐ ܗ̱ܘ ܡܨܶܐ ܡܰܘܕܰܥ ܚܽܘܒܳܐ ܕܒܰܡܨܰܥܬܳܐ ܐܶܬܩܪܰܝܬ ܛܰܢܳܢܳܐ ܕܚܽܘܒܳܟ ܬܚܰܘܶܐ ܠܺܝ ܟܝܳܢ ܐܰܢ̱ܬܬܳܐ ܗܳܢܰܘ ܡܚܺܝܠܳܐ ܘܡܰܪܳܚܳܐ ܛܢܳܢܰܐ ܗ̱ܘ ܣܳܐܶܡ ܠܳܗ̇ ܬܚܶܝܬ ܕܶܚܠܬܳܐ ܟܽܠܫܳܥ ܟܰܢܝܽܘܟ ܒܛܰܢ̈ܳܢܶܐ ܕܬܰܘܕܰܥ ܒܛܺܝܠܽܘܬܳܟ ܟܽܠ ܐ̱ܢܳܫ ܗܘܳܐ ܡܳܪܳܐ ܠܡܶܕܶܡ ܕܠܳܐ ܕܺܝܠܶܗ ܟܽܠ ܐ̱ܢܳܫ ܢܦܼܰܩ ܟܰܢܶܫ ܡܶܕܶܡ ܕܠܳܐ ܒܰܕܰܪ ܝܰܘܡܳܐ ܕܒܽܘܠܒܳܠܳܐ ܙܰܡܢܶܬ ܠܺܝ ܒܚ̈ܰܘܒܰܝ ܟܡܳܐ ܢܣܰܝܒܪܽܘܢ ܚܰܫܳܐ ܠܐܰܝ̈ܳܐ ܘܦܰܠܳܚ̈ܶܐ ܩܕܳܡܰܘܗ̱ܝ ܕܦܰܠܳܚܳܐ ܥܰܒܕ̈ܰܘܗ̱ܝ ܦܣܼܰܩܘ̱ ܘܰܛܥܼܶܢܘ̱ ܠܥܳܢ̈ܰܘܗ̱ܝ ܕܰܐܟܳܪܳܐ ܙܰܪ̈ܥܰܘܗ̱ܝ ܚܨܰܕܘ̱ ܘܰܣܼܒܰܠܘ̱ ܟܕܶܢܘ̱ ܗ̱ܘܰܘ ܙܪܰܥܼܘ̱ ܘܰܫܦܰܢܘ̱ ܘܰܦܠܼܰܚܘ̱ ܢܨܰܒܘ̱ ܪܰܒܺܝܘ̱ ܩܳܡܘ̱ ܡܶܢ ܩܒܽܘܠ ܘܰܒܟܰܘ ܘܰܣܠܼܶܩܘ̱ ܣܪܺܝܩ ܡܶܢ ܟܽܠ ܥܰܡܳܐ ܠܦܰܠܳܚ̈ܶܐ ܥܰܠܠܰܬ ܠܒ̈ܳܙܽܘܙܶܐ ܠܳܐ ܡܳܪܝ̱ ܥܒܰܕܘ̱ ܪ̈ܺܝܫܶܐ ܛܶܟ̈ܣܶܐ ܒܓܰܘ ܪܽܘܓܙܳܐ ܐܶܠܽܘ ܨܒܰܘ ܛܰܟܶܣܘ̱ ܠܳܐ ܕܶܝܢ ܫܒܼܰܩܘ̱ ܥܰܘܼܠܰܢ ܟܰܕ ܛܳܒ ܦܟܶܗ ܪܽܘܓܙܳܐ ܠܡܶܒܰܙ ܢܩܳܐ ܪܽܘܓܙܳܐ ܠܰܐܝܢܳܐ ܡܶܢ ܟܽܠ ܓܰܒ̈ܰܝ ܐܶܚܽܘܪ ܕܶܐܬܒܰܝܰܐ ܒܫ̈ܶܬܠܳܬܝ ܕܶܐܬܚܰܝܰܒ ܒܬܰܩ̈ܢܳܬܝ̱ ܕܶܐܬܚܰܒܰܠ ܛܳܒܳܐ ܕܩܳܠ ܫܰܝܢܳܐ ܟܰܪܝܽܘܬܝ̱ ܢܦܰܝܶܓ ܡܶܢܝ̱ ܠܳܐ ܬܰܫܠܡܰܢܝ̱ ܕܰܠܡܳܐ ܐܶܣܬܒܰܪ ܕܶܐܓܰܪܬܳܐ ܝܰܗܼܒܬ ܠܺܝ ܕܕܽܘܠܳܠܳܐ ܘܰܫܪܰܝܬ ܫܰܡܰܪܬܳܢܝ̱ ܠܳܐ ܡܳܪܝ̱ ܢܶܩܪܽܘܢܳܢܝ̱ ܫܒܺܝܩܬܳܐ ܘܰܡܨܰܥܰܪܬܳܐ ܠܳܐ ܐܺܝܬ ܠܺܝ ܡܶܕܶܡ ܕܶܐܬܕܟܰܪ ܩܕܳܡ ܥܰܝ̈ܢܰܝܟ ܕܰܒܟܽܠܝ̱ ܒܣܺܝܪܳܐ ܐ̱ܢܳܐ ܐܶܬܕܟܰܪ ܠܺܝ ܐܰܠܳܗܝ̱ ܗܳܕܶܐ ܠܚܽܘܕ ܕܰܐ̱ܚܪܺܝܢ ܠܳܐ ܣܺܝܡ ܠܺܝ ܥܰܡܳܟ ܡܰܢܽܘ ܕܠܳܐ ܢܶܒܟܶܝܢܝ̱ ܒܩܳܠܳܐ ܘܒܽܐܘܠܺܝܬܳܐ ܕܰܩܕܳܡ ܟܶܣܐܳܐ ܝܰܘܡܺܝ̈ܢ ܢܰܟܦܬܳܐ ܘܰܡܟܰܠܠܰܬܳܐ ܘܒܳܬܰܪ ܟܶܣܐܳܐ ܝܰܘܡܺܝ̈ܢ ܓܠܺܝܬܳܐ ܘܰܡܦܰܪܣܰܝܬܳܐ ܢܰܟ̈ܦܳܬܝ̱ ܕܬܰܘ̈ܳܢܶܐ ܦܳܗܶܝܢ ܒܚܰܩ̈ܠܳܬܳܐ ܕܪܽܘܓܙܳܐ ܕܰܠܟܽܠ ܡܰܪܘܶܐ ܐܶܙܰܠ ܠܝܰܩܺܝܪ̈ܳܬܝ̱ ܚܢܳܢܳܟ ܡܫܰܝܶܢ ܟܽܠ ܢܢܰܟܶܦ ܠܚܰܒܺܝ̈ܒܳܬܝ̱ ܣܳܒ̈ܳܬܝ ܘܝ̈ܳܠܽܘܕܳܬܝ ܗܳܐ ܓ̇ܳܥܶܝܢ ܩܽܘܕܡܰܝܟ ܕܛ̈ܰܠܝܳܢ ܒܩ̈ܳܠܰܝܗܶܝܢ ܕܣܳܒ̈ܳܢ ܒܕܶܡ̈ܥܰܝܗܶܝܢ ܒܬܽܘ̈ܠܳܬܝ ܒܨܰܘܡ̈ܰܝܗܶܝܢ ܢܰܟ̈ܦܳܬܝ ܒܣܰܩ̈ܰܝܗܶܝܢ ܥܰܝ̈ܢܰܝ ܠܟܽܠ ܫ̈ܽܘܩܺܝܢ ܫܶܩܠܶܬ ܘܗܳܐ ܨܳܕܶܝܢ ܦܳܫܘ̱ ܡܶܢ ܡܳܐܐ ܥܶܣܪܳܐ ܘܰܐܠܦܳܐ ܡܶܢ ܪܶܒܽܘܬܳܐ ܫܰܝܶܢ ܡܠܺܝ ܫܽܘܩ̈ܰܝ ܪܒܳܒܬܳܐ ܕܥܳܡܽܘܪ̈ܰܝ ܦܰܢܳܐ ܠܒܰܪ̈ܳܝܶܐ ܘܚܰܕܳܐ ܠܓܰܘ̈ܳܝܶܐ ܪܰܒܳܐ ܗܳܐ ܛܰܝܒܽܘܬܳܟ ܕܬܶܦܪܽܘܣ ܠܓܰܘ ܘܰܠܒܰܪ ܢܟܰܢܫܰܢ ܠܦܰܪ̈ܽܘܓܰܝ ܟ̈ܶܢܦܶܐ ܕܛܰܝܒܽܘܬܳܟ ܨܠܽܘܬܳܐ ܕܙܰܕܺܝ̈ܩܰܝ ܬܢܰܛܰܪ ܠܥܳܪ̈ܽܘܩܰܝ ܕܠܳܐ ܡܗܰܝܡܢܺܝܢ ܬܰܒܪܽܘܢܝ̱ ܘܕܰܡܗܰܝܡܢܺܝܢ ܣܰܡܟܽܘܢܝ̱ ܒܰܡܗ̈ܰܝܡܢܶܐ ܚܰܣܶܕ ܠܰܐܝܠܶܝܢ ܕܠܳܐ ܗܰܝܡܶܢܘ̱ ܩܪܶܒܘ̱ ܗ̱ܘܰܘ ܒܚܰܕ ܝܰܘܡܳܐ ܥܺܐܕ̈ܶܐ ܬܪ̈ܶܝܢ ܐܰܝܟ ܚܰܕ ܥܺܐܕܳܐ ܕܣܽܘܠܳܩܳܟ ܘܥܺܐܕܳܐ ܕܰܐܬܠܺܝ̈ܛܰܝܟ ܥܺܐܕܳܐ ܕܰܩܛܰܪ ܬܳܓܳܟ ܘܕܽܘܟܪܳܢ ܟܠܺܝܠ ܥܰܒܕ̈ܰܝܟ ܪܰܚܶܡ ܕܥܰܦܘ̱ ܗ̱ܘܰܘ ܠܰܢ ܥܺܐܕ̈ܶܐ ܒܚܰܕ ܝܰܘܡܳܐ ܘܥܰܦܘ̱ ܠܰܢ ܚܠܳܦܰܝܗܽܘܢ ܥܺܐܕ̈ܶܐ ܬܪ̈ܶܝܢ ܐܰܟܚܰܕ ܚܰܫܳܐ ܡܶܢ ܩܳܠ ܛܳܒܳܐ ܘܶܐܒܠܳܐ ܡܶܢ ܚܽܘܒܠܳܐ ܫܰܝܶܢ ܠܥܰܕܥܺܐܕ̈ܰܝ ܕܰܒܼܛܶܠܘ̱ ܬܪ̈ܶܝܢ ܥܺܐܕ̈ܰܝ ܘܰܚܠܳܦ ܪܽܘܓܪ̈ܳܓܶܐ ܣܪܺܝܕ̈ܰܝ ܒܥܰܕ̈ܥܺܕܶܐ ܓܽܘܢܳܚ̈ܶܐ ܘܚܽܘܒ̈ܠܶܐ ܦܓܰܥܼܘ̱ ܒܺܝ ܒܟܽܠ ܕܽܘܟܳܐ ܬܰܦܢܶܐ ܠܪ̈ܰܚܺܝܩܰܝ ܬܰܦܨܰܚ ܠܩܰܪ̈ܺܝܒܰܝ ܘܶܬܬܟܪܶܙ ܒܓܰܘ ܐܰܬܪܰܢ ܣܒܰܪܬܳܐ ܕܚܰܕ̈ܘܳܬܳܐ ܘܶܐܦܪܽܘܥ ܚܠܳܦ ܫܰܝܢܳܐ ܫܽܘܒܚܳܐ ܒܟܽܠ ܦܽܘ̈ܡܺܝܢ