[ܒ ܒܰܪ ܩܳܠܶܗ]
Line Missing
ܥܳܩ̈ܳܬܝ̱ ܐܰܝܟ ܕܺܐܝܽܘܒ ܦܪܰܩܬܶܗ ܟܺܐܢܽܘܬܳܟ
ܬܶܚܢܰܢܝ̱ ܛܰܝܒܽܘܬܳܟ
ܒܬܰܪ̈ܬܶܝܢ ܝܽܘܬܪܳܢܰܐ ܗ̱ܘ ܕܳܐܦ ܠܳܐ ܙܰܕܺܝ̈ܩܶܐ
ܢܶܠܐܽܘܢ ܠܡܶܒܥܳܐ ܐܳܦ ܠܳܐ ܡܳܪ̈ܽܘܕܶܐ
ܢܶܣܓܽܘܢ ܠܡܶܚܛܳܐ
ܒܰܒ̈ܢܰܝܳܐ ܥܶܡܠܰܬ ܕܬܶܪܕܶܐ ܘܰܬܥܰܕܰܪ
ܘܰܕܠܳܐ ܒܩܳܠ ܢܶܓܕܳܟ ܢܶܟܪܽܘܢ ܐܰܒܳܗ̈ܰܝܢ
ܫܰܒܩܽܘܢܝ̱ ܒܰܫܠܳܡܳܐ
ܒܥܳܒ̈ܰܝ ܒܰܪ̈ܳܝܶܐ ܚܽܘܪ ܡܳܪܝ̱ ܕܰܦܣܺܝܩܺܝܢ
ܠܥܽܘ̈ܒܰܝ ܓܰܘ̈ܳܝܶܐ ܚܙܺܝ ܡܳܪܝ̱ ܕܰܡܚܺܝܠܺܝܢ
ܕܶܐܛܥܰܢ ܚܰܒܺܝ̈ܒܰܝ
ܒܣܰܝ̈ܦܶܐ ܩܰܨܶܨܘ̱ ܗ̱ܘܰܘ ܓܶܦ̈ܰܝ ܒܰܪ̈ܳܝܶܐ
ܢܽܘܪܳܐ ܩܶܕܚܰܬ ܬܽܘܒ ܒܥܽܘܒ̈ܰܝ ܓܰܘ̈ܳܝܶܐ
ܠܒܽܘܢܬܳܐ ܕܣܰܘܬܳܐ
ܒܕܰܒܪܳܐ ܢܟܶܣܘ̱ ܠܰܒ̈ܢܰܝ ܣܳܓ̈ܽܘܕܰܝ ܫܶܡܫܳܐ
ܒܟܰܪܟܳܐ ܕܒܰܚܘ̱ ܬܰܘܪ̈ܰܝ ܦܳܠܚ̈ܰܝ ܒܰܥܠܳܐ
ܥܶܪ̈ܒܰܝ ܥܰܡ ܝ̈ܰܠܕܰܝ
ܒܚܰܩ̈ܠܳܬܝ̱ ܝ̈ܰܠܠܰܬܳܐ ܒܕܳܪ̈ܳܬܝ̱ ܡܰܪܩܽܘܕܬܳܐ
ܒܟܰܪ̈ܡܰܝ ܣܽܘܪܳܕܳܐ ܒܫܽܘ̈ܩܰܝ ܒܽܘܠܒܳܠܳܐ
ܡܰܢܽܘ ܢܶܣܦܼܰܩ ܠܺܝ
ܒܺܝܫܳܐ ܕܶܐܨܛܰܢܰܥ ܘܫܰܓܶܫ ܒܡ̈ܶܠܰܘܗ̱ܝ
ܬܘܳܗܬܳܐ ܥܒܰܕ ܡܶܢ ܓܰܘ ܕܬܶܕܡܶܐ ܓܰܘܳܝܽܘܬܝ̱
ܟܽܠܳܗ̇ ܠܒܰܪܳܝܽܘܬܝ̱
ܒܰܐܝܠܶܝܢ ܡܳܪܝ̱ ܐܰܦܰܝ̈ ܐܶܩܪܶܝܟ ܕܰܬܫܰܕܰܪ
ܡܰܫܪܺܝܬ ܩܰܕܺܝ̈ܫܶܐ ܕܰܬܢܰܛܰܪ ܥܽܘ̈ܒܰܝ
ܕܰܡܠܶܝܢ ܛܰܡܐܽܘܬܳܐ
ܒܰܚܡܺܝܪܳܟ ܚܰܕܬܳܐ ܢܓܰܕܬܶܗ ܠܰܒܪܺܝܬܳܐ
ܒܰܚܡܺܝܪܳܟ ܕܶܡ̇ܳܝ ܚܡܺܝܪܳܐ ܥܰܬܺܝܩܳܐ
ܕܰܫܕܰܠ ܘܰܡܢܰܚܶܦ
ܒܺܐܝܓܽܘܢܳܐ ܓܰܠܝܳܐ ܕܚܰܝܠܳܟ ܢܶܬܢܰܨܰܚ
ܕܠܳܐ ܟܺܝܬ ܬܟܰܠܶܠ ܛܽܘܥܝܰܝ ܠܰܐܬܠܺܝ̈ܛܰܝܟ
ܒܫܶܕܠܰܐ ܗ̱ܘ ܡܶܬܬܰܠܝܳܐ
ܒܙܰܒܢܰܢ ܐܶܢ ܢ̇ܰܨܶܕ ܕܳܡܶܐ ܗܽܘ ܠܙܺܐܦܰܢ
ܕܒܰܫ̈ܢܰܝ ܫܰܪܺܝܪܳܐ ܩܶܨܡ̈ܰܐ ܗ̱ܘ ܫܰܡܶܫܢ ܚܢܰܢ
ܒܟܶܣܝܳܐ ܙܰܟܰܪܢ ܐܢܚܢܰܢ
ܒܙܰܒܢܳܐ ܐܶܢ ܐܶܚܽܘܪ ܡܓܰܪܶܓ ܘܰܠܓܰܠܝܳܐ
ܡ̇ܰܝܬܶܐ ܟܰܣܝ̈ܳܬܳܐ ܕܢܶܬܟܰܐܰܪ ܙܺܐܦܰܢ
ܕܩܽܘܫܬܳܐ ܡܥܰܛܰܦ ܗ̱ܘܳܐ
ܒܫܰܪܺܝܪܳܐ ܐܺܝܬܰܘܗ̱ܝ ܩܽܘܫܬܳܐ ܙ̇ܟܶܐ ܟܽܠ
ܘܝܰܡܳܐ ܒܰܡܪܳܪܽܘܗ̱ܝ ܠܳܐ ܡܨܶܐ ܕܳܠܰܚ̇ ܠܶܗ
ܕܫܰܦܝܰܐ ܗ̱ܘ ܒܰܟܝܳܢܶܗ
ܒܚܶܟܡܳܐ ܥܒܰܕܬܶܗ ܡܳܪܝ̱ ܕܰܓܶܠܬ ܚܽܘܬܚܳܬܗ̇
ܕܫܰܒܪܳܐ ܢܶܬܪܰܦܶܐ ܘܰܕܠܳܐ ܢܶܬܠܰܒܰܒ
ܚܰܦܬܶܗ ܠܰܟܠܺܝܠܳܐ
ܒܫܽܘܪ̈ܶܐ ܪ̈ܰܥܺܝܠܶܐ ܕܰܒܗܽܘܢ ܢܰܨܰܚܬܳܢܝ̱
ܦܰܪܥܽܘܟ ܛܳܠܽܘܡ̈ܶܐ ܕܶܒܼܚܳܐ ܘܢܽܘܩܳܝܳܐ
ܕܡܰܪܓܶܙ ܓܰܠܝܳܐܺܝܬ
ܒܗܰܘ ܙܰܒܢܳܐ ܐܶܠܽܘ ܕܶܒܚ̈ܶܐ ܐܶܬܩܰܪܰܒܘ̱
ܠܛܽܘܥܝܰܝ ܐܳܦ ܐܰܬܪܳܐ ܐܺܝܬ ܗ̱ܘܳܐ ܠܡܰܣܒܳܪܽܘ
ܕܰܒܗܽܘܢ ܐܶܬܦܰܪܩܶܬ
ܒܣܽܘܓܳܐܐ ܕܦܽܘܪ̈ܩܳܢܶܐ ܐܰܟܣܶܬ ܠܬܰܪ̈ܬܶܝܢ
ܠܛܽܘܥܝܰܝ ܕܰܓ̈ܠܺܝܦܶܐ ܠܝܽܘܠܦܳܢ ܡܓܽܘ̈ܫܶܐ
ܕܒܳܟ ܡܳܪܝ̱ ܐܶܬܦܰܪܩܶܬ