Ephrem the Syrian. “Nisibis 10.” Digital Syriac Corpus. Last modified June 12, 2019. https://syriaccorpus.org/267.
    
        
            
                Nisibis X
            
            
                
                    ܓ ܕܥܰܠ ܐܶܢܙܺܝܛ ܚܶܣܢܳܐ ܒܰܪ ܩܳܠܶܗ
                
                
                    ܐܶܬܩܰܛܰܠܘ̱ ܝܰܠܕ̈ܰܝ   ܘܰܒܢ̈ܳܬܝ̱ ܕܰܠܒܰܪ ܡܶܢܝ̱
                    ܥܩܺܝܪ̈ܺܝܢ ܫܽܘܪ̈ܰܝܗܶܝܢ   ܘܕܳܪܶܝܢ ܝܰܠܕܰܝ̈ܗܶܝܢ 
                    ܘܕܺܝܫܺܝܢ ܩܽܘܫ̈ܰܝܗܶܝܢ
                    
                
                
                
                    ܥܽܘܢܺܝܬܳܐ: ܒܪܺܝܟܳܐ ܗ̱ܝ ܡܰܪܕܽܘܬܳܟ
                    
                
                
                    
                    ܓܦܰܘ ܗ̱ܘܰܘ ܨܰܝ̈ܳܕܶܐ   ܝܰܘ̈ܢܰܝ ܡܶܢ ܚ̈ܶܣܢܰܝ
                    ܕܰܫܒܼܰܩ ܩܰܢܳܝ̈ܗܶܝܢ   ܘܰܥܪܰܩܘ̱ ܠܰܓ̈ܦܺܝܦܶܐ 
                    ܒܓܽܘܦܳܐ ܨܳܕܘ ܐܶܢܶܝܢ 
                    
                
                
                    ܒܛܽܘܦܣܳܐ ܕܫܳܥܽܘܬܳܐ   ܕܰܫܚܰܬ ܡܶܢ ܢܽܘܪܳܐ 
                    ܫܳܚܘ̱ ܘܰܦܫܰܪܘ̱ ܦܰܓܪ̈ܶܐ   ܕܰܒ̈ܢܰܝ ܡܶܢ ܚܽܘܡܳܐ 
                    ܘܨܰܗܝܳܐ ܕܰܒܚ̈ܶܣܢܶܐ 
                    
                
                
                    
                    ܘܰܚܠܳܦ ܡܰܒ̈ܽܘܥܶܐ   ܕܚܰܠܒܳܐ ܕܪ̈ܳܕܶܝܢ ܗ̱ܘܰܘ 
                    ܠܰܒ̈ܢܰܝ ܘܰܠܫܰܒܪ̈ܰܝ   ܠܥܽܘ̈ܳܠܶܐ ܓܳܙ ܚܰܠܒܳܐ 
                    ܘܡ̈ܰܝܳܐ ܠܰܚܣ̈ܺܝܠܶܐ 
                    
                
                
                    
                    ܘܰܢܦܰܠ ܘܶܐܬܦܰܪܦܰܪ   ܥܽܘܠܳܐ ܡܶܢ ܐܶܡܶܗ
                    ܕܠܳܐ ܠܶܗ ܠܡܶܐܢܰܩ   ܘܠܳܐ ܠܳܗ̇ ܠܡܶܫܬܳܐ 
                    ܪܽܘܚܳܐ ܣܰܩܘ̱ ܘܡܺܝܬܘ̱ 
                    
                
                
                    
                    ܐܰܝܟܰܢ ܐܶܬܡܰܨܝܰܬ   ܕܬܶܐܚܽܘܕ ܛܰܝܒܽܘܬܳܟ
                    ܦܓܽܘ̈ܕܶܐ ܕܡ̈ܰܒܽܘܥܶܝܗ̇   ܕܠܳܐ ܡܨܶܝܢ ܡܶܬܬܰܟܣܺܝܢ 
                    ܫ̈ܶܦܥܶܐ ܕܢܶܒ̈ܥܰܝܗܽܘܢ 
                    
                
                
                    
                    ܘܰܐܝܟܰܢ ܟܰܝ ܐܶܚܕܰܬ   ܪ̈ܰܚܡܶܝܗ̇ ܛܰܝܒܽܘܬܳܟ
                    ܘܰܟܠܳܬ ܡܰܒ̈ܽܘܥܶܝܗ̇   ܡܶܢ ܥܰܡܳܐ ܕܰܓܥܳܐ 
                    ܕܢܰܪܛܶܒ ܠܶܫܳܢܶܗ
                    
                
                
                    
                    ܘܰܗܘܳܐ ܗ̱ܘܳܐ ܦܶܚܬܳܐ   ܒܶܝܬ ܠܗܽܘܢ ܠܰܐܚ̈ܰܝܗܽܘܢ 
                    ܒܰܕܡܽܘܬ ܥܰܬܺܝܪܳܐ   ܕܓܳܥܶܐ ܘܠܰܝܬ ܕܥ̇ܳܢܶܐ 
                    ܕܢܰܪܛܶܒ ܠܶܫܳܢܶܗ
                    
                
                
                    
                    ܘܰܐܝܟ ܕܰܒܓܰܘ ܢܽܘܪܳܐ   ܐܰܪܡܺܝܢ ܗ̱ܘܰܘ ܚܰܠܳܫ̈ܶܐ 
                    ܘܚܽܘܡܳܐ ܒܓܰܘ ܨܗ̈ܰܝܳܐ   ܢܽܘܪܳܐ ܢܳܫ̇ܶܡ ܗ̱ܘܳܐ 
                    ܘܰܒܗܽܘܢ ܕܳܠܶܩ̇ ܗ̱ܘܳܐ 
                    
                
                
                    
                    ܫܳܚܘ̱ ܗ̱ܘܰܘ ܓܽܘܫܡ̈ܰܝܗܽܘܢ   ܘܰܦܫܰܪܘ̱ ܡܶܢ ܚܽܘܡܳܐ 
                    ܘܰܗܦܼܰܟܘ̱ ܨܗ̈ܰܝܳܐ   ܕܢܶܫܩܽܘܢܳܗ̇ ܠܰܐܪܥܳܐ 
                    ܒܪܶܗܠܳܐ ܕܦܰܓܪ̈ܰܝܗܽܘܢ
                    
                
                
                    
                    ܘܚܶܣܢܳܐ ܕܰܩܛܰܠ ܗ̱ܘܳܐ   ܒܨܶܗܝܳܐ ܠܥܳܡܽܘܪ̈ܰܘܗ̱ܝ
                    ܗܼܦܰܟ ܠܶܗ ܕܢܶܫܬܶܐ ܗܽܘ   ܪܶܕܝܳܐ ܕܰܫ̈ܠܰܕܶܐ 
                    ܕܫܼܳܚܘ̱ ܗ̱ܘܰܘ ܡܶܢ ܨܶܗܝܳܐ 
                    
                
                
                    
                    ܡܰܢܽܘ ܚܼܙܳܐ ܥܰܡܳܐ   ܕܨܰܝܺܝܦ ܡܶܢ ܨܶܗܝܳܐ
                    ܘܟܳܪܶܟ ܠܶܗ ܫܽܘܪܳܐ   ܕܡ̈ܰܝܳܐ ܘܠܳܐ ܡܶܫܟܰܚ
                    ܕܢܰܪܛܶܒ ܠܶܫܳܢܶܗ 
                    
                
                
                    
                    ܒܕܺܝܢܰܐ ܗ̱ܘ ܟܰܝ ܕܰܣܕܽܘܡ   ܐܶܬܕܺܝܢܘ̱ ܚܰܒ̈ܺܝܒܰܝ
                    ܘܶܐܬܢܰܓܰܕܘ̱ ܝ̈ܰܠܕܰܝ   ܫܽܘܢܳܩܳܗ̇ ܕܰܣܕܽܘܡ
                    ܕܚܰܕ ܗ̱ܘܳܐ ܠܚܽܘܕ ܝܰܘܡܳܐ 
                    
                
                
                    
                    ܫܽܘܢܳܩܳܗ̇ ܕܢܽܘܪܳܐ   ܕܰܚܕܳܐ ܗ̱ܝ ܡܳܪܝ̱ ܫܳܥܳܐ 
                    ܒܨܶܗܝܳܐ ܢܰܓܺܝܪܳܐ   ܡܰܘܬܳܐ ܢܰܓܺܝܪܳܐ 
                    ܘܢܶܓܕܳܐ ܩܰܛܺܝܢܳܐ 
                    
                
                
                    
                    ܒܳܬܰܪ ܡܳܪܝ̱ ܐܶܒ̈ܠܰܝ   ܘܚ̈ܰܫܰܝ ܡܰܪ̈ܺܝܪܶܐ
                    ܗܳܢܰܘ ܒܽܘܝܳܐܳܐ   ܐ̱ܚܪܺܢܳܐ ܕܒܰܝܰܐܬܳܢܝ̱
                    ܕܰܐܣܓܺܝܬ ܐܰܟܡܰܪܬܳܢܝ̱
                    
                
                
                    
                    ܣܰܡܳܐ ܕܠܶܗ ܣܰܟܺܝܬ   ܟܺܐܒܰܐ ܗ̱ܘ ܚܰܬܺܝܬܳܐ 
                    ܥܶܨܒܳܐ ܕܠܶܗ ܚܳܪܶܬ   ܬܶܒܪܰܐ ܗ̱ܘ ܡܰܪܺܝܪܳܐ 
                    ܨܳܒܶܐ ܕܢܶܥܒܶܕ ܠܺܝ 
                    
                
                
                    
                    ܘܰܕܣܰܟܺܝܬ ܕܶܐܣܰܩ   ܡܶܢ ܓܰܘ ܡܰܚܫܽܘܠܳܐ 
                    ܒܐ̱ܢܳܫ ܠܺܝ ܡܰܚܫܽܘܠܶܗ   ܕܺܝܠܶܗ ܕܰܠܡܺܐܢܳܐ 
                    ܡܶܢ ܗܰܘ ܕܰܒܝܰܡܳܐ 
                    
                
                
                    
                    ܕܣܶܒܪܶܬ ܒܥܰܛܳܠܽܘܬܝ̱   ܕܣܶܒܟܶܬ ܐܳܦ ܣܶܠܩܶܬ 
                    ܡܶܢ ܓܰܘ ܓܽܘܡܳܨܳܐ   ܫܕܰܐܽܘܢܝ̱ ܚ̈ܛܳܗܰܝ
                    ܡܶܕܪܺܝܫ ܠܓܰܘܶܗ
                    
                
                
                    
                    ܚܙܺܝ ܡܳܪܝ̱ ܗܰܕܳܡ̈ܰܝ   ܕܣܰܝ̈ܦܶܐ ܣܒܺܝܣܺܝܢ ܒܺܝ 
                    ܘܨܳܝܪ̈ܺܝܢ ܒܰܕܪ̈ܳܥܰܝ   ܘܟܽܘܬܡ̈ܳܬܳܐ ܕܓܺܐܪ̈ܶܐ 
                    ܫܬܺܝܠܳܢ ܥܰܠ ܓܰܒ̈ܰܝ 
                    
                
                
                    
                    ܕܶܡ̈ܥܶܐ ܒܓܰܘ ܥܰܝ̈ܢܶܐ   ܘܒܶܐܕ̈ܢܶܐ ܕܰܫܡ̇ܽܘܥܬܳܐ 
                    ܘ̈ܳܝܶܐ ܒܓܰܘ ܦܽܘܡܳܐ   ܘܶܐܒܠܳܐ ܒܓܰܘ ܠܶܒܳܐ 
                    ܠܳܐ ܡܳܪܝ̱ ܬܰܘܣܶܦ ܠܺܝ