Ephrem the Syrian. “Nisibis 12.” Digital Syriac Corpus. Last modified June 12, 2019. https://syriaccorpus.org/269. Nisibis XII ܗ ܒܰܪ ܩܳܠܶܗ ܐܶܩܪܶܐ ܒܽܐܘ̈ܠܨܳܢܰܝ̱ ܠܚܰܝܠܳܐ ܚܳܣܶܢ ܟܽܠ ܕܗܽܘܝܽܘ ܡܨܶܐ ܚܳܣܶܢ ܠܫܰܒܳܝܳܐ ܕܪܽܘܓܙܳܐ ܐܰܝܟ ܕܰܥܼܨܳܐ ܠܠܶܓܝܽܘܢ ܥܽܘܢܺܝܬܳܐ: ܫܽܘܒܚܳܐ ܠܛܰܝܒܽܘܬܶܗ ܦܰܪܥܰܢܝ̱ ܐܰܚ̈ܰܝ ܒܺܝܫܳܐ ܚܰܘ̈ܒܶܐ ܕܠܳܐ ܝܺܙܶܦ ܡܶܢܝ̱ ܦܰܪܥܰܢܝ̱ ܐܳܦ ܛܳܒܳܐ ܪ̈ܰܚܡܶܐ ܕܠܳܐ ܐܰܘܙܶܦܬܶܗ ܬܰܘ ܬܡܰܗܘ̱ ܒܬܰܪ̈ܬܰܝܗܶܝܢ ܦܰܠܶܓ ܘܝܰܗ̱ܒ ܛܳܒܳܐ ܚܰܘ̈ܒܳܬܝ̱ ܠܛܰܝܒܽܘܬܶܗ ܛܠܺܝܡܽܘܬܝ̱ ܠܟܺܐܢܽܘܬܶܗ ܚܰܘ̈ܒܳܬܝ̱ ܥܛܳܐ ܚܢܳܢܶܗ ܛܠܺܝܡܽܘܬܝ̱ ܬܒܰܥ ܕܺܝܢܶܗ ܪܶܓܙܰܬ ܚܛܺܝܬܳܐ ܛܳܒ ܘܒܳܬܰܬ ܒܛܽܘܪܳܦܳܐ ܕܰܚܙܳܬ ܠܛܰܝܒܽܘܬܳܐ ܕܚܰܨܬܳܗ̇ ܠܚܺܐܪܽܘܬܳܐ ܕܬܶܙܟܶܐ ܠܫܳܪ̈ܥܳܬܳܐ ܪܬܰܚ ܡܳܪܝ̱ ܐܰܫܶܕ ܚܽܘܒܳܟ ܘܰܐܬܬܪܰܥ ܫܦܼܰܥ ܪܽܘܓܙܳܟ ܪܽܘܓܙܳܟ ܠܡܰܘܒܳܕܽܘ ܚܽܘܒܳܟ ܠܡܰܥܕܳܝܽܘ ܫܒܺܝܬܳܐ ܡܶܢ ܫܒܳܝܳܐ ܝܰܘ̈ܡܶܐ ܕܰܓܙܰܡ ܒܺܝܫܳܐ ܕܰܒܗܽܘܢ ܐܰܝܟ ܕܰܒܩܶܠܥܳܐ ܢܶܫܕܶܝܢܝ̱ ܠܰܐܒܕܳܢܳܐ ܒܗܽܘܢ ܨܼܳܪ ܢܛܰܪ ܛܳܒܳܐ ܢܰܦܫܳܐ ܒܰܨܪܳܪ ܚ̈ܰܝܶܐ ܡܠܺܝ̈ܠܶܐ ܕܠܳܐ ܫܳܠܶܝܢ ܕܢܰܘܕܽܘܢ ܒܟܽܠܥܶܕܳܢ ܕܢܰܛܪܽܘܢܝ̱ ܒܓܰܘ ܓ̈ܰܠܠܶܐ ܘܣܰܡܟܽܘܢܝ̱ ܕܠܳܐ ܐܶܦܶܠ ܢܰܘܕܽܘܢ ܚܠܳܦܰܝ ܡܳܪܝ̱ ܡܰܢ ܓܶܝܪ ܣܳܦܶܩ ܡܶܢ ܡܬܽܘܡ ܠܩܽܘܒܳܠ ܛܰܝܒܽܘܬܳܐ ܕܪ̈ܰܚܡܶܐ ܕܰܟܪܺܝܟܺܝܢ ܠܶܗ ܕܶܐܢܳܐ ܐܶܣܦܰܩ ܐܰܘܕܶܐ ܠܪ̈ܰܚܡܶܐ ܕܰܚܕܺܝܪ̈ܺܝܢ ܠܺܝ