Ephrem the Syrian. “Nisibis 13.” Digital Syriac Corpus. Last modified June 12, 2019. https://syriaccorpus.org/270. Nisibis XIII ܥܰܠ ܡܳܪܝ̱ ܝܰܥܩܽܘܒ ܘܥܰܠ ܚܰܒܪ̈ܰܘܗ̱ܝ ܥܰܠ ܩܳܠܳܐ ܕܬܶܗܪܳܐ ܐܶܢܶܝ̈ܢ ܡܳܪܝ̱ ܟܽܠ ܕܰܣܒܠܰܬ ܬܠܳܬܳܐ ܟܳܗ̈ܢܶܐ ܢܰܨ̈ܺܝܚܶܐ ܒܛܽܘܦܣܳܐ ܕܰܬܪ̈ܶܝܢ ܢܰܗܺܝܪ̈ܶܐ ܝܰܒ̇ܶܠܘ̱ ܘܰܐܫܠܼܶܡܘ̱ ܠܰܚܼ̈ܕܳܕܶܐ ܟܽܘܪܣܝܳܐ ܘܺܐܝܕܳܐ ܘܡܰܪܥܺܝܬܳܐ ܕܰܣܓܺܝ ܠܰܢ ܐܶܒܠܳܐ ܕܰܬܪ̈ܶܝܢ ܟܽܘܠܶܗ ܐ̱ܚܪܳܝܳܐ ܒܽܘܝܳܐܰܐ ܗ̱ܘ ܥܽܘܢܽܝܬܳܐ: ܠܳܟ ܫܽܘܒܚܳܐ ܕܰܓܒܰܝܬ ܐܶܢܽܘܢ ܗܰܘ ܕܰܒܪܳܐ ܬܪ̈ܶܝܢ ܢܰܗܺܝܪ̈ܺܝܢ ܓܒܼܳܐ ܠܶܗ ܬܠܳܬܳܐ ܢܰܗܺܝܪ̈ܶܐ ܘܰܩܒܼܰܥ ܐܶܢܽܘܢ ܒܰܬܠܳܬܳܐ ܚܶܫܽܘ̈ܟܶܐ ܚܒܺܝ̈ܫܶܐ ܕܰܗܘܼܰܘ ܕܰܕܥܶܟܼܘ̱ ܙܰܘܓܳܐ ܕܢܰܗܺܝܪ̈ܶܐ ܐ̱ܚܪܺܢܳܐ ܟܽܠܶܗ ܙܰܠܺܝܩܰܐ ܗ̱ܘ ܬܠܳܬܳܐ ܟܳܗ̈ܢܰܝܢ ܓܺܙܰܒܪ̈ܶܐ ܕܰܐܚܺܝܕܺܝܢ ܒܰܫܪܳܪܰܝܗܽܘܢ ܐܩܠܺܝܕܳܗ̇ ܕܰܬܠܺܝܬܳܝܽܘܬܳܐ ܬܰܪ̈ܥܶܐ ܬܠܳܬܳܐ ܦܬܰܚܘ̱ ܗ̱ܘܰܘ ܠܰܢ ܚܰܕ ܚܰܕ ܡܶܢܗܽܘܢ ܒܰܩܠܺܝܕܶܗ ܒܙܰܒܢܶܗ ܬܰܪܥܶܗ ܦܳܬܰܚ ܗ̱ܘܳܐ ܒܩܰܕܡܳܝܳܐ ܦܬܼܰܚ ܗ̱ܘܳܐ ܬܰܪܥܳܐ ܠܡܰܪܕܽܘܬܳܐ ܕܶܐܬܳܬ ܥܠܰܝܢ ܒܡܶܨܥܳܝܳܐ ܦܬܼܰܚ ܗ̱ܘܳܐ ܬܰܪܥܳܐ ܠܡܰܠܟܽܘܬܳܐ ܕܢܶܚܬܰܬ ܨܶܐܕܰܝܢ ܒܰܐ̱ܚܪܳܝܳܐ ܦܬܼܰܚ ܗ̱ܘܳܐ ܬܰܪܥܳܐ ܠܰܣܒܰܪܬܳܐ ܕܣܳܠܩܳܐ ܨܶܐܕܰܝܢ ܒܩܰܕܡܳܝܳܐ ܬܳܪܥܳܐ ܦܬܼܰܚ ܗ̱ܘܳܐ ܠܰܩܪܳܒܳܐ ܕܟܶܢܫ̈ܶܐ ܬܪ̈ܰܝܗܽܘܢ ܒܡܶܨܥܳܝܳܐ ܬܰܪ̈ܥܶܐ ܦܬܼܰܚ ܗ̱ܘܳܐ ܠܡ̈ܰܠܟܶܐ ܕܪ̈ܽܘܚܶܐ ܬܰܪ̈ܬܰܝܗܶܝܢ ܒܰܬܠܺܝܬܳܝܳܐ ܦܬܼܰܚ ܬܰܪܥܳܐ ܕܺܐܝܙܓܰܕ̈ܶܐ ܕܓ̈ܰܒܶܐ ܬܪ̈ܰܝܗܽܘܢ ܒܩܰܕܡܳܝܳܐ ܦܰܬܼܰܚ ܬܰܪܥܳܐ ܠܰܩܪܳܒܳܐ ܡܶܛܽܠ ܚܰܘ̈ܒܶܐ ܒܡܶܨܥܳܝܳܐ ܦܰܬܰܚ ܬܰܪܥܳܐ ܠܡ̈ܰܠܟܶܐ ܡܶܛܽܠ ܬܰܟܬܽܘܫܳܐ ܒܰܐ̱ܚܪܳܝܳܐ ܦܰܬܰܚ ܬܰܪܥܳܐ ܠܺܐܝܙܓܰܕ̈ܶܐ ܡܶܛܽܠ ܪ̈ܰܚܡܶܐ ܗܳܐ ܒܰܬܠܳܬܳܐ ܝܽܘ̈ܒܳܠܶܝܢ ܐܰܝܟ ܕܰܒܐ̱ܪܳܙܳܐ ܘܰܒܛܽܘܦܣܳܐ ܪܽܘܓܙܳܐ ܠܫܶܡܫܳܐ ܐܶܬ̇ܕܰܡܺܝ ܫ̇ܰܪܺܝ ܡܶܢ ܨܶܝܕ ܩܰܕܡܳܝܳܐ ܘܶܐܬܓܰܒܰܪ ܨܶܝܕ ܡܶܨܥܳܝܳܐ ܥܡܰܕ ܘܶܐܬܛܰܠܰܩ ܒܰܐ̱ܚܪܳܝܳܐ ܐܳܦ ܫܶܡܫܳܐ ܛܽܘܦܣ̈ܶܐ ܬܠܳܬܳܐ ܡܚܰܘܶܐ ܒܰܬܠܳܬ ܦܶܢܝ̈ܳܬܳܐ ܚܰܪܽܝܦ ܘܰܙܗܶܐ ܫܽܘܪܳܝܶܗ ܥܰܙܺܝܙܳܐ ܘܩܰܫܝܳܐ ܡܨܰܥܬܶܗ ܘܰܐܝܟ ܠܰܒܪܺܝܬܳܐ ܕܶܐܬܓܰܡܪܰܬ ܢܺܝܚ ܘܒܰܣܺܝܡ ܫܽܘܠܳܡܶܗ ܩܰܠܺܝܠ ܘܰܙܗܶܐ ܫܽܘܪܶܝܗ ܕܰܠܕܰܡ̈ܟܶܐ ܗ̱ܘ ܐܳܬܶܐ ܕܰܢܥܺܝܪ ܚܰܡܺܝܡܳܐ ܘܩܰܫܝܳܐ ܡܨܰܥܬܶܗ ܕܦܺܐܪ̈ܶܐ ܐܳܬܶܐ ܕܰܢܒܰܫܶܠ ܪܚܺܝܡ ܘܒܰܣܺܝܡ ܫܽܘܠܳܡܶܗ ܕܰܡܛܳܐ ܠܶܗ ܠܰܓܡܺܝܪܽܘܬܳܐ ܡܰܢ ܗܺܝ ܒܰܪܬܳܐ ܒܰܪ̱ܬ ܢܶܕܪ̈ܶܐ ܚܣܺܝܡܰܬ ܡܶܢ ܟܽܠ ܢܶܩܒ̈ܳܬܳܐ ܕܰܪܕܰܘ ܗܳܟܰܢ ܝܽܘܒ̈ܳܠܶܝܗ̇ ܘܰܣܓܺܝܘ ܗܳܟܰܢ ܛܽܘ̈ܟܳܣܶܝܗ̇ ܘܰܣܼܠܶܩܘ̱ ܗܳܟܰܢ ܕܽܘܪ̈ܳܓܶܝܗ̇ ܘܰܢܨܰܚܘ̱ ܗܳܟܰܢ ܪ̈ܰܒܳܢܶܝܗ̇ ܠܒܰܪܬܶܗ ܒܰܠܚܽܘܕ ܕܰܐܒܪܳܗܳܡ ܗܘܰܝ ܗ̱ܘܰܝ ܗܳܠܶܝܢ ܕܶܡ̈ܘܳܬܳܐ ܐܰܘ ܠܶܟܝ̱ ܒܰܪܬܳܐ ܢܶܕܪ̈ܶܐ ܕܠܽܘܩܒܰܠ ܫܽܘܦܪܳܗ̇ ܬܰܨܒܺܝܬܳܗ̇ ܐܰܝܟ ܙܰܒܢܳܗ̇ ܓܶܝܪ ܥܽܘܕܪܳܢܳܗ̇ ܘܰܐܝܟ ܥܽܘܕܪܳܢܳܗ̇ ܫܰܡܶܫܳܗ̇ ܠܽܘܩܒܰܠ ܚܽܘܣܪܳܢ ܣܽܘܢܩܳܢܳܗ̇ ܐܶܬܳܐ ܠܶܗ ܡܽܘܠܳܝ ܣܽܘܢܩܳܢܳܗ̇ ܐܰܒܳܗ̈ܶܝܗ̇ ܐܰܝܟ ܡܰܘ̈ܠܳܕܶܝܗ̇ ܘܪ̈ܰܒܳܢܶܝܗ̇ ܐܰܝܟ ܦܽܘܪ̈ܫܳܢܶܝܗ̇ ܬܰܪܒܺܝܬܳܗ̇ ܐܰܝܟ ܪܽܘܒܳܝܳܗ̇ ܘܰܠܒܽܘܫ̈ܶܝܗ̇ ܐܰܝܟ ܩܰܘܡ̈ܳܬܳܗ̇ ܬܶܩܠܰܬ ܝܶܗܒܰܬ ܛܰܝܒܽܘܬܳܐ ܟܽܠܗܶܝܢ ܐܰܝܟ ܕܰܒܡܰܣܰܐܬܳܐ ܣܳܡܰܬ ܐܶܢܶܝܢ ܒܦܽܘܚܳܡܳܐ ܕܢܶܗܘܶܐ ܡܶܢܗܶܝܢ ܥܽܘܕܪܳܢܳܐ ܢܰܓܕܰܬ ܐܶܢܶܝܢ ܒܝܽܘܒܳܠܳܐ ܕܢܶܗܘܶܐ ܡܶܢܗܶܝܢ ܫܽܘܟܠܳܠܳܐ ܒܝܰܘܡ̈ܳܬܶܗ ܕܗܰܘ ܩܰܕܡܳܝܳܐ ܣܓܺܝ ܫܰܝܢܳܐ ܘܰܓܡܰܪ ܫܰܝܢܳܐ ܒܝܰܘܡ̈ܳܬܶܗ ܕܗܰܘ ܡܶܨܥܳܝܳܐ ܢܚܶܬܘ̱ ܡ̈ܰܠܟܶܐ ܘܰܣܠܼܶܩܘ̱ ܡ̈ܰܠܟܶܐ ܒܝܰܘܡ̈ܳܬܶܗ ܕܶܝܢ ܕܰܐ̱ܚܪܳܝܳܐ ܬܟܶܒܘ ܓܰܝ̈ܣܶܐ ܘܰܦܣܰܩ ܓܰܝܣ̈ܶܐ ܒܩܰܕܡܳܝܳܐ ܥܰܠܘ̱ ܛܽܘܟܳܣ̈ܶܐ ܥܰܠܘ̱ ܥܰܡܶܗ ܘܰܢܦܼܰܩܘ̱ ܥܰܡܶܗ ܒܡܶܨܥܳܝܳܐ ܩܪܶܒ ܘܶܐܬܪܰܚܰܩ ܬܳܓܳܐ ܕܰܚܕܰܪ ܥܺܕ̈ܳܬܰܢ ܒܰܐ̱ܚܪܳܝܳܐ ܕܶܝܢ ܕܰܢܚܶܬ ܠܰܢ ܛܰܝܒܽܘܬܳܐ ܕܠܳܐ ܡܶܬܦܰܪܥܳܐ ܠܽܘܩܒܰܠ ܪܽܘܓܙܳܐ ܩܰܕܡܳܝܳܐ ܐܰܩܪܶܒ ܥܰܡܠܶܗ ܕܩܰܕܡܳܝܳܐ ܠܽܘܩܒܰܠ ܫܰܘܒܳܐ ܕܰܒܛܰܗܪܳܐ ܩܳܡ ܛܶܠܳܠܶܗ ܕܡܶܨܥܳܝܳܐ ܠܽܘܩܒܰܠ ܫܰܝܢܳܐ ܛܳܠܽܘܡܳܐ ܐܰܣܓܺܝ ܐ̱ܚܪܳܝܳܐ ܙܽܘܗܳܪܳܐ ܠܰܚܒܳܫܳܐ ܩܰܕܡܳܐ ܐܰܪܥܶܗ ܟܳܗܢܳܐ ܩܰܕܡܳܐ ܘܢܰܨܺܝܚܳܐ ܠܰܚܒܳܫܳܐ ܕܰܬܪ̈ܶܝܢ ܐܰܪܥܶܗ ܟܳܗܢܳܐ ܕܰܬܪ̈ܶܝܢ ܪܰܚܡܳܢܳܐ ܨܠܰܘ̈ܳܬܶܗ ܕܶܝܢ ܕܰܐ̱ܚܪܳܝܳܐ ܣܳܓ ܬܽܘܪ̈ܥܳܬܰܢ ܟܰܣܝܳܐܺܝܬ ܢܨܺܝܒܺܝܢ ܢܨܺܝܒܰܬ ܥܰܠ ܡ̈ܰܝܳܐ ܡ̈ܰܝܳܐ ܟ̈ܣܰܝܳܐ ܘܰܓ̈ܠܰܝܳܐ ܢܶܒ̈ܥܶܐ ܚ̈ܰܝܶܐ ܠܓܰܘ ܡܶܢܳܗ̇ ܢܰܗܪܳܐ ܓܰܐܝܳܐ ܠܒܰܪ ܡܶܢܳܗ̇ ܢܰܗܪܳܐ ܕܰܠܒܰܪ ܕܰܓܶܠ ܒܳܗ̇ ܡܰܒܽܘܥܳܐ ܕܰܠܓܰܘ ܢܰܛܪܳܗ̇ ܟܳܗܢܳܐ ܩܰܕܡܳܐ ܦܰܠܳܚܳܗ̇ ܣܰܘ̈ܟܶܝܗ̇ ܪܰܒܺܝ ܒܰܫܡܰܝܳܐ ܗܳܐ ܡܺܝܬ ܘܰܩܒܺܝܪ ܒܓܰܘܳܗ̇ ܗܘܼܳܐ ܠܶܗ ܦܺܐܪܳܐ ܒܓܰܘ ܥܽܘܒܳܗ̇ ܒܰܕܓܽܘܢ ܕܶܐܬܰܘ ܦܳܣ̈ܽܘܩܶܐ ܦܺܐܪܳܐ ܕܰܒܓܰܘܳܗ̇ ܢܰܛܪܳܗ̇ ܡܛܳܐ ܗ̱ܘܳܐ ܙܰܒܢܳܐ ܕܰܦܣܳܩܳܗ̇ ܥܰܠ ܗܰܘ ܕܰܒܪܶܗ ܠܦܰܠܳܚܳܗ̇ ܕܠܳܐ ܢܶܗܘܶܐ ܥܠܶܝܗ̇ ܒܰܥܳܝܳܐ ܪܶܗܛܰܬ ܗܼܺܝ ܒܰܨܢܺܝܥܽܘܬܳܗ̇ ܣܳܡܬܶܗ ܒܥܽܘܒܳܗ̇ ܠܦܰܠܳܚܳܗ̇ ܕܬܶܬܦܰܨܶܐ ܒܝܰܕ ܦܰܠܳܚܳܗ̇ ܕܳܡܝܳܝܳܢ ܡ̈ܰܠܳܠܳܬܐ ܒܢ̈ܳܬ ܢܨܺܝܒܺܝܢ ܠܰܢܨܺܝܒܺܝܢ ܕܣܳܡܰܬ ܦܰܓܪܳܐ ܠܓܰܘ ܡܶܢܳܗ̇ ܘܰܗܼܘܳܐ ܫܽܘܪܳܐ ܠܒܰܪ ܡܶܢܳܗ̇ ܣܺܝܡܺܝܢ ܒܟܶܝܢ ܦܰܓܪܳܐ ܚܰܝܳܐ ܕܢܶܗܘܶܐ ܫܽܘܪܳܐ ܠܚܰܝ̈ܰܝܟܺܝܢ