Ephrem the Syrian. “Nisibis 15.” Digital Syriac Corpus. Last modified June 12, 2019. https://syriaccorpus.org/272.
    
        
            
                Nisibis XV
            
            
                
                    ܒܰܪ ܩܳܠܶܗ ܕܰܐܠܳܗܳܐ ܕܰܪܚܶܡܬܽܘܢܳܝܗ̱ܝ
                
                
                    1
                    ܐܶܠܽܘ ܠܳܐ ܕܰܬܪܺܝܨ ܪܺܝܫܳܐ   ܐܰܟܒܰܪ ܪܶܛܢܰܘ ܗܰܕܳܡ̈ܶܐ 
                    ܕܡܶܛܽܠ ܪܺܝܫܳܐ ܕܰܡܥܰܩܰܡ   ܡܕܰܘܕܳܐ ܡܰܪܕܺܝܬ ܗܰܕܳܡ̈ܶܐ 
                    ܥܶܠܬܳܐ ܒܪܺܝܫܳܐ ܬܰܠܝܳܢ ܗ̱ܘܰܘ
                
                
                    ܥܽܘܢܺܝܬܳܐ: ܒܪܺܝܟ ܕܰܓܒܳܟ ܚܽܘܬܪܶܗ ܕܥܰܡܰܢ
                    
                
                
                    2
                    ܐܶܢ ܗܳܫܳܐ ܕܰܦܐܶܐ ܟܽܠܶܗ   ܒܶܗ ܬܳܠܶܝܢ ܚܢܰܢ ܣܰܢܝ̈ܳܬܰܢ
                    ܟܡܳܐ ܟܰܝ ܐܶܠܽܘ ܣܰܢܝܳܐ ܗ̱ܘܳܐ   ܐܳܦ ܐܰܠܳܗܳܐ ܟܰܕ ܒܰܣܺܝܡ
                    ܐܶܬܥܰܕܰܘ ܒܶܗ ܡܰܪ̈ܺܝܪܶܐ
                    
                
                
                    3
                    ܒܪܺܝܫܳܐ ܕܶܡܽܘ ܗ̈ܰܕܳܡܶܐ   ܩܢܰܘ ܫܶܠܝܽܘܬܳܐ ܒܫܰܦܝܽܘܬܶܗ
                    ܘܒܰܣܺܝܡܽܘܬܳܐ ܒܢܺܝܚܽܘܬܶܗ   ܒܩܰܕܺܝܫܽܘܬܶܗ ܙܰܗܝܽܘܬܳܐ 
                    ܘܰܒܚ̈ܶܟܡܳܬܶܗ ܝܽܘܠܦܳܢܳܐ 
                    
                
                
                    4
                    ܩܢܰܘ ܛܰܥܡܳܐ ܒܰܪܡܺܝܣܽܘܬܶܗ   ܘܢܰܟܦܽܘܬܳܐ ܒܝܰܩܺܝܪܽܘܬܶܗ
                    ܘܫܽܘܘܚܳܕܳܐ ܒܡܶܣܟܺܢܽܘܬܶܗ   ܕܫܰܦܽܝܪ ܗ̱ܽܘ ܒܡܶܠܶܐ ܟܽܠܶܗ 
                    ܢܶܫܦܰܪ ܟܽܠܰܢ ܥܰܡ ܟܽܠܶܗ
                    
                
                
                    5
                    ܚܙܰܘ ܕܟܰܝܠܳܐ ܘܡܰܬܩܳܠܳܐ   ܐܺܝܬ ܠܡ̈ܶܠܰܘܗ̱ܝ ܘܰܥܒܳܕ̈ܰܘܗ̱ܝ
                    ܣܺܝܡܘ̱ ܒܳܠܳܐ ܕܳܐܦ ܗ̈ܰܠܟܳܬܶܗ   ܡܽܘܫ̈ܚܳܬܳܐ ܕܫܶܠܝܳܐ ܩܳܢܶܝܢ
                    ܐܰܚܺܝܕ ܟܽܠܶܗ ܦܓܽܘ̈ܕܶܐ ܕܟܽܠܶܗ
                    
                
                
                    6
                    ܗ̱ܘܳܐ ܠܳܗ̇ ܡܳܪܳܐ ܠܛܰܠܝܽܘܬܶܗ   ܟܰܕܢܳܗ̇ ܒܢܺܝܪܳܐ ܕܢܰܟܦܽܘܬܳܐ 
                    ܠܳܐ ܐܶܙܕܰܠܰܠܘ̱ ܗܰܕܳܡܰܘ̈ܗ̱ܝ   ܕܰܬܚܶܝܬ ܫܰܒܛܳܐ ܣܺܝܡܺܝܢ ܗ̱ܘܰܘ
                    ܨܶܒܝܳܢܶܗ ܩܛܺܝܪܳܐ ܗ̱ܘܼܳܐ ܠܶܗ 
                    
                
                
                    7
                    ܩܰܕܶܡ ܓܶܝܪ ܒܳܟܰܪ ܕܰܪܓܶܗ   ܕܰܩܕܳܡ ܒܳܟܰܪ ܕܽܘܒܳܪܶܗ 
                    ܕܣܳܡ ܫܶܬܶܐܣܰܘ̈ܗ̱ܝ ܬܰܩܢܳܐܺܝܬ   ܗ̱ܘܳܐ ܪܺܝܫܳܐ ܒܰܙܥܽܘܪܽܘܬܶܗ 
                    ܕܟܳܪܽܘܙܳܐ ܠܥܰܡܳܐ ܥܰܒܕܽܘܗ̱ܝ 
                    
                
                
                    8
                    ܢܰܨܺܝܚ ܗ̱ܘܳܐ ܒܶܝܬ ܟܳܪ̈ܽܘܙܶܐ   ܘܰܣܦܺܝܪ ܗ̱ܘܳܐ ܒܶܝܬ ܩܳܪ̈ܽܘܝܶܐ 
                    ܘܰܡܠܺܝܠ ܗ̱ܘܳܐ ܒܶܝܬ ܚܰܟܺܝ̈ܡܶܐ   ܢܰܟܦܳܐ ܗ̱ܘܳܐ ܒܰܝܢܳܬ ܐܰܚ̈ܰܘܗ̱ܝ
                    ܘܝܰܩܺܝܪܳܐ ܒܶܝܬ ܚܰܒܺܝ̈ܒܰܘܗ̱ܝ
                    
                
                
                    9
                    ܒܰܬܪ̈ܶܝܢ ܥܽܘܡܪ̈ܺܝܢ ܐܺܝܬܰܘܗ̱ܝ ܗ̱ܘܳܐ   ܝܺܚܺܝܕܳܝܳܐ ܡܶܢ ܝܰܘܡܰܘ̈ܗ̱ܝ
                    ܕܩܰܕܺܝܫܳܐ ܗ̱ܘܳܐ ܒܓܰܘ ܦܰܓܪܶܗ   ܘܝܺܚܺܝܕܳܝܳܐ ܒܓܰܘ ܒܰܝܬܶܗ
                    ܒܟܰܣܝܳܐ ܘܓܰܠܝܳܐ ܢܰܟܦܳܐ ܗ̱ܘܳܐ 
                    
                
                
                    10
                    ܐܳܦܶܢ ܕܶܝܢ ܚܢܰܢ ܐܰܚ̈ܰܝܢ   ܕܰܘܶܕܢ ܐܶܢܶܝܢ ܡܽܘܫ̈ܚܳܬܳܐ 
                    ܘܰܐܘܒܶܕܢܳܗ̇ ܠܛܰܥܡܳܢܽܘܬܳܐ   ܘܰܗܘܰܝܢ ܚܢܰܢ ܠܰܢ ܝܳܠܽܘ̈ܦܶܐ 
                    ܠܰܓܡܺܝܪܽܘܬܳܐ ܕܰܩܪܳܬܰܢ 
                    
                
                
                    11
                    ܐܶܠܳܐ ܗܺܝ ܡܽܘܫܚܰܬ ܩܽܘܫܬܳܐ   ܢܳܛܪܳܐ ܢܰܦܫܳܗ̇ ܒܡܺܐܢܶܗ
                    ܓܒܳܬܶܗ ܥܰܠ ܕܰܚܙܳܬ ܕܰܓܒܳܗ̇   ܢܶܛܪܰܬ ܒܶܗ ܪܺܝܚܶܗ ܘܛܰܥܡܳܗ̇
                    ܡܶܢ ܫܽܘܪܳܝܳܐ ܠܫܽܘܠܳܡܳܐ 
                    
                
                
                    12
                    ܪܺܝܫܳܐ ܘܢܰܟܦܳܐ ܘܝܰܩܺܝܪܳܐ   ܕܠܳܐ ܐܶܬܚܰܡܰܬ ܘܶܐܬܩܰܫܺܝ
                    ܠܳܐ ܐܶܫܬܰܪܓܰܠ ܐܰܟܘܳܬܰܢ   ܣܰܝܶܟ ܘܢܰܛܰܪ ܡܽܘܫ̈ܚܳܬܶܗ
                    ܘܰܐܪܡܺܝ ܦܓܽܘ̈ܕܶܐ ܒܪ̈ܶܥܝܳܢܰܘܗ̱ܝ
                    
                
                
                    13
                    ܝܰܗ̱ܒ ܬܰܚܘܺܝܬܳܐ ܒܰܩܢܽܘܡܶܗ   ܕܰܐܝܟ ܕܢܶܛܰܪ ܡܽܘܫܚܰܬ ܙܰܒܢܶܗ 
                    ܘܳܠܶܐ ܗ̱ܘܳܐ ܕܢܶܕܰܥ ܙܰܒܢܰܢ   ܚܢܰܢ ܗ̱ܽܘ ܠܙܰܒܢܰܢ ܐܶܬܢܰܟܪܶܝܢܰܢ
                    ܕܰܦܟܶܗܢܰܢ ܒܰܙܒܰܢ ܛܰܥܡܳܐ 
                    
                
                
                    14
                    ܠܦܺܐܪܳܐ ܒܥܽܘܙܶܗ ܪܳܕܶܐ ܠܶܗ   ܒܫܽܘܪܳܝܳܐ ܢܶܫܒܳܐ ܕܪܽܘܚܳܐ 
                    ܘܒܰܡܨܰܥܬܳܐ ܥܽܘܙܳܐ ܕܫܶܡܫܳܐ   ܘܡܳܐ ܕܥܶܒܪܰܬ ܥܰܙܺܝܙܽܘܬܶܗ
                    ܟܶܢܫܳܐ ܚܰܪܬܶܗ ܠܚܰܠܝܽܘܬܳܐ 
                    
                
                
                    15
                    ܚܢܰܢ ܕܶܝܢ ܪܕܰܐܽܘܢ ܩܰܕܡ̈ܳܝܶܐ   ܘܰܟܐܰܘ ܒܰܢ ܐܳܦ ܡܶܨ̈ܥܳܝܶܐ 
                    ܐܰܘܣܶܦܘ̱ ܚܰܠܝܽܘܢ ܐ̱ܚܪ̈ܳܝܶܐ   ܘܟܰܕ ܡܰܛܝܰܬ݀ ܛܰܥܡܳܢܽܘܬܰܢ
                    ܣܶܓܝܰܬ݀ ܠܳܗ̇ ܦܰܟܺܝܗܽܘܬܰܢ
                    
                
                
                    16
                    ܐܶܬܰܝܢ ܓܶܝܪ ܠܰܓܡܺܝܪܽܘܬܳܐ   ܕܢܶܚܣܽܘܠ ܫܰܒܪ̈ܶܐ ܡܶܢ ܫܶܥܝܳܐ 
                    ܕܢܰܝܬܶܐ ܐܶܢܽܘܢ ܠܝܰܩܺܝܪܽܘܬܳܐ   ܐܶܣܬܰܢܩܰܬ ܠܳܗ̇ ܣܰܝܒܽܘܬܰܢ
                    ܕܰܢܟܰܐܽܘܢ ܒܰܢ ܐܰܝܟ ܒܰܛܠܳܝ̈ܶܐ
                    
                
                
                    17
                    ܒܰܕܓܽܘܢ ܥܰܙܺܝ ܒܰܣܺܝܡܳܐ   ܘܠܳܐ ܐܶܬܚܰܫܰܚ ܒܰܩܛܺܝܪܳܐ 
                    ܕܢܶܣܓܶܐ ܢܝܰܩܰܪ ܣܰܝܒܽܘܬܰܢ   ܘܶܐܢ ܗܺܝ ܠܳܐ ܝܶܕܥܰܬ ܕܰܪܓܳܗ̇
                    ܢܺܐܪܰܒ ܗܽܘ ܕܝܳܕܥܳܐ ܙܰܒܢܳܗ̇
                    
                
                
                    18
                    ܘܶܐܢ ܐ̱ܢܳܫ ܢܺܐܡܰܪ ܕܰܠܩܽܘܛܢܳܐ   ܩܛܺܝܪܳܐ ܘܫܰܒܛܳܐ ܡܕܰܒܰܪ ܠܶܗ
                    ܘܰܠܓܰܢܳܒܳܐ ܕܽܘܚܠܳܐ   ܘܰܠܒܳܙܽܘܙܳܐ ܠܽܘܚܳܡܳܐ 
                    ܘܰܠܫ̈ܳܛܰܝܳܐ ܦܽܘܪܣܳܝܳܐ 
                    
                
                
                    19
                    ܐܶܠܽܘ ܥܰܡ ܪܺܝܫܳܐ ܩܰܕܡܳܐ   ܪܗܶܛܘ̱ ܗܰܕܳܡ̈ܶܐ ܬܶܢܝ̈ܳܢܶܐ 
                    ܢܳܓܕܺܝܢ ܗ̱ܘܰܘ ܠܰܬܠܺܝܬܳܝܳܐ   ܘܟܽܠܶܗ ܓܽܘܫܡܳܐ ܡܶܢ ܣܳܟܶܗ
                    ܒܳܬܪܗܽܘܢ ܗܽܘ ܐܳܙܶܠ ܗ̱ܘܳܐ 
                    
                
                
                    20
                    ܒܣܰܘ ܬܶܢܝ̈ܳܢܶܐ ܒܩܰܕܡ̈ܳܝܶܐ   ܘܰܬܠܺܝ̈ܬܳܝܶܐ ܒܬܶܢܝ̈ܳܢܶܐ
                    ܐܶܬܫܺܝܛܘ̱ ܕܰܪ̈ܓܶܐ ܚܰܕ ܡܶܢ ܚܰܕ   ܕܒܰܚ̈ܕܳܕܶܐ ܒܣܰܘܓܰܘ̈ܳܝܶܐ 
                    ܕܳܫܘ̱ ܐܶܢܽܘܢ ܐܳܦ ܒܰܪ̈ܳܝܶܐ