Ephrem the Syrian. “Nisibis 18.” Digital Syriac Corpus. Last modified June 12, 2019. https://syriaccorpus.org/275.
    
        
            
                Nisibis XVIII
            
            
                
                    ܒܰܪ ܩܳܠܶܗ 
                
                
                    1
                    ܐܳܘ ܕܟܰܗܶܢ ܒܳܬܰܪ ܪܰܒܶܗ   ܙܰܗܝܳܐ ܒܳܬܰܪ ܢܰܨܺܝܚܳܐ 
                    ܢܰܟܦܳܐ ܒܳܬܰܪ ܝܰܩܺܝܪܳܐ   ܫܰܗܪܳܐ ܒܳܬܰܪ ܨܰܝܳܡܳܐ 
                    ܪܰܒܳܟ ܡܶܢܳܟ ܠܳܐ ܫܰܢܺܝ   ܒܚܰܝܳܐ ܚܙܰܝܢܳܝܗ̱ܝ ܠܥܰܢܺܝܕܳܐ 
                    ܕܗܳܐ ܒܳܟ ܨܺܝܪ̈ܳܢ ܕܶܡܘ̈ܳܬܶܗ   ܘܰܪ̈ܫܺܝܡܳܢ ܒܳܟ ܥܳܩ̈ܒܳܬܶܗ
                    ܘܰܨܡܰܚ ܟܽܠܶܗ ܡܶܢ ܟܽܠܳܟ   ܒܪܺܝܟ ܕܰܚܠܳܦܰܘܗ̱ܝ ܝܰܗܒܳܟ ܠܰܢ
                    
                
                
                    2
                    ܦܺܐܪܳܐ ܕܨܺܝܪ ܒܶܗ ܐܺܝܠܳܢܶܗ   ܟܰܕ ܡܰܟܪܶܙ ܥܰܠ ܥܶܩܳܪܶܗ
                    ܠܳܐ ܓܰܪܕܺܝ ܡܶܢܰܢ ܥܕܰܟܺܝܠ   ܛܰܥܡ̈ܳܬܳܐ ܕܒܰܣܺܝܡܽܘܬܶܗ 
                    ܡܶܠܰܘ̈ܗ̱ܝ ܚܰܘܺܝܬ ܓܽܘܫܳܡܳܐܺܝܬ   ܕܰܓܡܼܰܪܬ ܐܶܢܶܝ̈ܢ ܒܥܰܒܕܳܐ 
                    ܒܕܽܘܒܳܪܳܟ ܨܺܝܪ ܝܽܘܠܦܳܢܶܗ   ܘܰܒܣܽܘܥܪܳܢܳܟ ܦܽܘܫܳܩܶܗ
                    ܘܒܰܓܡܽܝܪܽܘܬܳܟ ܬܽܘܪܓܳܡܶܗ   ܒܪܺܝܟ ܗܽܘ ܕܢܰܨܰܚ ܙܰܗܝܽܘܬܳܟ
                    
                
                
                    3
                    ܥܶܠܳܢܳܐ ܐ̱ܚܪܳܝܳܐ ܕܺܝܪܶܒܼ   ܘܰܗܼܘܳܐ ܪܺܝܫܳܐ ܠܗܰܕ̈ܳܡܰܘܗ̱ܝ 
                    ܙܥܽܘܪܳܐ ܕܰܫܩܼܰܠ ܒܽܘܟܪܽܘܬܳܐ   ܠܳܐ ܒܰܕ̈ܡܰܝܳܐ ܐܰܝܟ ܝܰܥܩܽܘܒ
                    ܘܠܳܐ ܒܰܛܢܳܢܳܐ ܐܰܝܟ ܐܰܗܪܽܘܢ   ܕܰܛܢܰܘ ܒܶܗ ܐܰܚܰܘ̈ܗ̱ܝ ܠܶܘܳܝ̈ܶܐ 
                    ܒܚܽܘܒܳܐ ܫܰܩܠܳܗ̇ ܐܰܝܟ ܡܽܘܫܶܐ   ܟܰܕ ܩܰܫܺܝܫ ܗ̱ܘܳܐ ܡܶܢ ܐܰܗܪܽܘܢ 
                    ܚܕܺܝܘ ܒܳܟ ܐܰܚܰܝ̈ܟ ܐܰܟܘܳܬܶܗ ܒܪܺܝܟ ܗܽܘ ܕܰܓܒܳܟ ܒܰܐܘܳܝܽܘܬܳܐ 
                    
                
                
                    4
                    ܠܰܝܬ ܚܣܼܳܡܳܐ ܘܰܛܢܳܢܼܳܐ   ܒܶܝܬ ܗܰܕܳܡ̈ܶܐ ܕܰܒܓܽܘܫܡܳܐ 
                    ܕܰܒܚܽܘܒܳܐ ܠܶܗ ܡܶܫܬܰܡܥܺܝܢ   ܒܪ̈ܰܚܡܶܐ ܡܶܢܶܗ ܡܶܣܬܰܥܪܺܝܢ 
                    ܕܰܘܩܰܐ ܗ̱ܘ ܪܺܝܫܳܐ ܠܗ̈ܰܕܳܡܶܐ   ܕܰܠܟܽܠ ܓܰܒ̈ܺܝܢ ܗܽܘ ܚܳܐܰܪ
                    ܪܳܡ ܗܽܘ ܘܡܰܟܺܝܟ ܒܰܚܢܳܢܶܗ ܥܕܰܡܳܐ   ܠܥ̈ܶܩܒܶܐ ܡܶܬܬܰܚܬܶܐ 
                    ܕܢܶܣܰܒ ܡܶܢܗܶܝܢ ܢܶܟܝܳܢܳܐ   ܒܪܺܝܟ ܗܽܘ ܕܚܽܘܒܳܟ ܡܰܙܶܓ ܒܰܢ 
                    
                
                
                    5
                    ܒܨܺܝܪܳܐ ܗܘܳܬ ܗܳܕܶܐ ܟܶܐܼܡܰܬ   ܕܰܒܣܳܒܳܐ ܬܶܚܽܘܒ ܚܰܢܦܽܘܬܳܐ 
                    ܒܛܰܥܡܳܗ̇ ܫܶܟܒܼܰܬ ܣܰܝܒܽܘܬܳܐ   ܒܙܰܒܢܳܗ̇ ܢܰܨܚܼܰܬ ܛܰܠܝܽܘܬܳܐ 
                    ܕܰܐܬܠܺܝܛܳܐ ܥܠܰܝܡܳܐ ܛܰܥܢܶܗ   ܠܰܐܓܽܘܢܳܐ ܣܰܢܝܳܐ ܕܰܣܥܼܳܐ 
                    ܩܛܺܝܪܳܐ ܕܰܡܠܶܐ ܚܰܢܦܽܘܬܳܐ   ܕܰܐܝܟ ܬܶܢܳܢܳܐ ܥܰܙ ܘܰܥܒܼܰܪ
                    ܥܰܡ ܫܽܘܪܶܝܗ ܫܽܘܠܳܡܶܗ   ܒܪܺܝܟ ܕܰܢܦܰܚܼ ܒܶܗ ܘܶܐܬܛܰܠܰܩ
                    
                
                
                    6
                    ܩܳܠܳܐ ܕܩܰܪܢܳܐ ܡܶܢ ܫܼܶܠܝܳܐ   ܐܰܬܘܰܗ ܘܰܩܪܳܟ ܠܰܩܪܳܒܳܐ 
                    ܥܰܠܬ ܐܰܝܟ ܕܰܘܺܝܕ ܚܰܕܬܳܐܺܝܬ   ܚܳܒ ܡܶܢܳܟ ܓܽܘܠܝܰܕ ܕܰܬܪܶܝܢ 
                    ܠܳܐ ܗܶܕܝܽܘܛ ܗ̱ܘܳܐ ܬܰܟܬܽܘܫܳܟ   ܕܰܩܪܳܒܳܐ ܟܰܣܝܳܐ ܟܽܠ ܝܽܘܡ
                    ܠܽܘܩܒܰܠ ܒܺܝܼܫܳܐ ܣܳܕܰܪ ܗܘܰܝܬ   ܡܥܳܕ ܗ̱ܽܘ ܕܽܘܪܳܫܳܐ ܟܰܣܝܳܐ 
                    ܕܰܟܠܺܝܠܳܐ ܓܰܠܝܳܐ ܢܰܝܬܶܐ   ܒܪܺܝܟ ܗ̱ܽܘ ܕܰܓܒܳܟ ܫܽܘܒܗܳܪܰܢ 
                    
                
                
                    7
                    ܡܶܢ ܩܕܳܡ ܢܶܣܝܽܘܢܳܐ ܕܰܪܺܝܫ   ܐܺܝܽܘܒ ܦܰܓܪܶܗ ܘܪܶܥܝܳܢܶܗ 
                    ܘܰܒܢܶܣܝܽܘܢܳܐ ܐܶܬܢܰܨܰܚ   ܘܝܰܘܣܶܦ ܙܟܼܳܐ ܒܩܰܝܛܽܘܢܳܐ 
                    ܕܒܶܝܬ ܚܰܢܰܢܝܳܐ ܒܰܐܬܽܘܢܳܐ   ܘܰܒܓܰܘ ܓܽܘܒܳܐ ܕܳܢܺܝܐܶܝܠ
                    ܣܟܰܠ ܣܳܛܳܢܳܐ ܕܟܰܕ ܢܰܣܺܝ   ܚܺܝܠ ܙܳܟܽܘܬܗܽܘܢ ܟܰܣܝܳܐܺܝܬ
                    ܐܰܘܣܶܦ ܕܢܶܚܽܘܼܒ ܓܰܠܝܳܐܺܝܬ   ܒܪܺܝܟ ܗ̱ܽܘ ܕܰܐܣܓܺܝ ܟܽܘܐܳܪܶܗ 
                    
                
                
                    8
                    ܘܰܐܟܳܪܳܐ ܕܰܐܚܢܶܦ ܘܰܐܩܶܦ   ܙܳܪܰܥ ܗ̱ܘܳܐ ܟܽܘܒ̈ܶܐ ܒܣܶܡܳܠܶܗ 
                    ܛܰܢ ܒܶܗ ܐܰܟܳܪܳܐ ܟܺܐܢܳܐ   ܘܰܓܕܰܡ ܦܰܣܩܳܗ̇ ܠܣܶܡܳܠܶܗ 
                    ܡܼܶܠܶܐ ܗ̱ܘܳܐ ܝܰܡܺܝܢܶܗ ܘܰܙܪܰܥ   ܒܠܶܒܳܐ ܡ̈ܶܠܶܐ ܚ̈ܰܝܳܬܳܐ 
                    ܘܗܳܐ ܡܶܬܦܰܠܚܳܐ ܬܰܪܥܺܝܬܰܢ   ܒܰܢܒܺܝ̈ܰܘܗ̱ܝ ܐܳܦ ܒܰܫܠܺܝܚ̈ܘܰܗ̱ܝ
                    ܒܳܟ ܢܶܬܦܰܠܚ̈ܳܢ ܢܰܦܫ̈ܳܬܰܢ   ܒܪܺܝܟ ܗ̱ܽܘ ܕܰܓܒܳܟ ܐܰܟܳܪܰܢ
                    
                
                
                    9
                    ܘܶܐܢ ܗܽܘ ܕܡ̈ܶܠܰܝܟ ܙܥܽܘܪܰܢ   ܦܠܽܘܚܶܝܗ̇ ܠܰܐܪܥܰܢ ܒܰܥܒܳܕܳܐ 
                    ܕܰܒܓܰܘ ܦܽܘܠܚܳܢܳܐ ܪܰܒܳܐ   ܢܶܥܫܰܢ ܩܰܢܝܳܐ ܘܥܶܩܳܪܳܐ 
                    ܛܳܒ ܗܽܘ ܥܰܒܕܳܐ ܫܰܦܺܝܪܳܐ   ܡܶܢ ܫܶܡܼܥܳܐ ܕܪܶܒܽܘ ܡܶܠܺܝ̈ܢ 
                    ܙܰܪܥܳܟ ܢܺܐܬܶܐ ܚܰܕ ܒܰܡܐܳܐ   ܘܰܠܩܺܝܫܳܝܳܐ ܚܰܕ ܒܶܐܫܬܶܝܢ 
                    ܐܳܦ ܟܳܬܳܐ ܚܰܕ ܒܰܬܠܳܬܺܝܢ   ܒܪܺܝܟ ܗ̱ܽܘ ܕܰܐܣܓܺܝ ܥ̈ܰܠܠܳܬܳܟ
                    
                
                
                    10
                    ܢܽܘܗܪܳܐ ܕܢܶܥܡܼܰܛ ܠܳܐ ܘܳܠܶܐ   ܡܶܠܚܳܐ ܕܬܶܦܟܰܗ ܠܳܐ ܙܳܕܶܩ
                    ܛܽܘܠܫܳܐ ܠܪܺܝܫܳܐ ܠܳܐ ܝܳܐܶܐ   ܐܳܦ ܠܳܐ ܨܳܐܬܳܐ ܠܡܰܚܙܺܝܬܳܐ 
                    ܕܶܐܢ ܣܰܡ̈ܡܳܢܶܐ ܦܰܟܺܝܗܺܝܢ   ܐܳܦܠܳܐ ܟ̈ܺܐܒܶܐ ܡܶܬܚܰܠܡܺܝܢ 
                    ܘܶܐܢ ܗܽܘ ܕܰܫܪܳܓܳܐ ܥܰܡܽܘܛ   ܐܳܦ ܬܽܘ̈ܩܠܳܬܳܐ ܣ̈ܰܓܺܝܐܳܢ
                    ܢܽܘܗܪܳܟ ܢܶܪܕܽܘܦ ܚܶܫܽܘܟܰܢ   ܒܪܺܝܟ ܗ̱ܽܘ ܕܥܰܒܼܕܳܟ ܠܰܡܦܺܐܕܰܢ
                    
                
                
                    11
                    ܥܒܶܕ ܠܳܟ ܣܳܦܪ̈ܶܐ ܘܕܰܝ̈ܳܢܶܐ   ܐܳܦ ܬܳܒܽܘ̈ܥܶܐ ܘܝܳܗܽܘ̈ܒܶܐ 
                    ܐܳܦ ܩܳܝ̈ܽܘܡܶܐ ܘܝܳܨܽܘ̈ܦܶܐ   ܠܚܰܕ ܚܰܕ ܐܰܫܠܶܡ ܣܽܘܥܪܳܢܶܗ
                    ܕܰܠܡܳܐ ܒܦܶܬܳܐ ܢܶܫܚܶܬ ܠܶܗ   ܘܰܒܪܶܢܝܳܐ ܢܶܨܛܝܳܐ ܠܶܗ 
                    ܪܥܺܝܙܳܐ ܥܰܡ ܠܶܫܳܢܳܐ   ܕܒܶܗ ܡܩܰܪܶܒ ܐܰܢ̱ܬ ܒܳܥܽܘܬܳܐ 
                    ܠܚܽܘܣܳܝܳܐ ܕܟܽܠܶܗ ܥܰܡܳܐ   ܒܪܺܝܟ ܕܰܡܙܰܗܶܐ ܬܶܫܡܶܫܬܳܟ 
                    
                
                
                    12
                    ܟܡܳܐ ܕܢܶܫܬܰܦܶܐ ܪܶܥܝܳܢܳܐ   ܘܢܶܨܛܰܠܰܠ ܐܳܦ ܠܶܫܳܢܳܐ 
                    ܟܡܳܐ ܕܢܶܬܡܰܪ̈ܩܳܢ ܐܺܝ̈ܕܰܝܳܐ   ܘܢܶܙܕܰܗܶܐ ܟܽܠܶܗ ܓܽܘܫܡܳܐ 
                    ܙܥܽܘܪ ܗܽܘ ܠܟܳܗܢܳܐ ܘܟܽܘܢܳܝܶܗ   ܕܰܡܩܰܪܶܒ ܦܰܓܪܳܐ ܚܰܝܳܐ 
                    ܢܶܨܛܰܠܰܠ ܟܽܠܶܗ ܟܽܠܫܳܥ   ܕܗܽܘ ܩܳܐܶܡ ܐܰܝܟ ܡܶܨܥܳܝܳܐ 
                    ܒܶܝܬ ܐܰܠܳܗܳܐ ܠܐ̱ܢܳܫܽܘܬܳܐ   ܒܪܺܝܟ ܗܽܘ ܕܨܰܠܶܠ ܫܰܡܳܫܰܘ̈ܗ̱ܝ