Ephrem the Syrian. “Nisibis 19.” Digital Syriac Corpus. Last modified June 12, 2019. https://syriaccorpus.org/276.
    
        
            
                Nisibis XIX
            
            
                
                    ܡܶܢܶܗ ܒܰܪ ܩܳܠܶܗ
                
                
                    1
                    ܫܠܶܡ ܠܰܫܡܶܗ ܐܰܒܪܳܗܳܡ   ܕܰܗܘܰܝܬ ܐܰܒܳܐ ܠܣ̈ܰܓܺܝܐܶܐ
                    ܕܠܳܐ ܕܶܝܢ ܐܺܝܬ ܠܳܟ ܒܰܪ̱ܬ ܙܰܘܓܳܐ   ܒܰܕܡܽܘܬ ܣܰܪܳܐ ܠܰܐܒܪܳܗܳܡ 
                    ܗܳܐ ܡܰܪܥܺܝܬܳܟ ܒܰܪ̱ܬ ܙܰܘܓܳܟ   ܪܰܒܳܐ ܠܰܒܢܶܝ̈ܗ̇ ܒܰܫܪܳܪܳܟ 
                    ܝܰܠܕ̈ܶܐ ܕܪܽܘܚܳܐ ܢܶܗܘܽܘܢ ܠܳܟ   ܘܰܒܢܰܝ̈ܳܐ ܒܢܰܝ̈ ܡܽܘܠܟܳܢܳܐ 
                    ܕܢܶܗܘܽܘܢ ܒܥܶܕܳܢ ܝܳܪ̈ܽܘܬܶܐ   ܒܪܺܝܟ ܗ̱ܽܘ ܕܨܳܪܳܟ ܒܰܐܒܪܳܗܳܡ
                    
                
                
                    2
                    ܦܺܐܪܳܐ ܦܰܐܝܳܐ ܕܢܰܟܦܽܘܬܳܐ   ܕܟܳܗܢܽܘܬܳܐ ܒܳܟ ܐܶܨܼܛܰܒܝܰܬ݀
                    ܙܥܽܘܪ ܐܰܚ̈ܰܘܗ̱ܝ ܐܰܝܟ ܒܰܪ ܐܺܝܫܰܝ   ܩܰܪܢܳܐ ܪܶܬܚܼܰܬ ܘܰܡܫܰܚܬܳܟ
                    ܐܺܝܕܳܐ ܪܰܚܦܰܬ ܘܰܓܒܳܬܳܟ   ܥܺܕ̱ܬܳܐ ܣܶܘܚܼܰܬ ܘܰܪܚܼܶܡܬܳܟ 
                    ܡܰܕܒܚܳܐ ܕܰܟܝܳܐ ܠܬܶܫܡܶܫܬܳܟ   ܟܽܘܪܣܝܳܐ ܪܰܒܳܐ ܠܺܐܝܩܳܪܳܟ 
                    ܘܟܽܠܗܶܝܢ ܐܰܟܚܰܕ ܠܰܟܠܺܝܠܳܟ   ܒܪܺܝܟ ܗ̱ܽܘ ܕܰܐܣܓܺܝ ܟܽܘܠܳܠܳܟ
                    
                
                
                    3
                    ܗܳܐ ܡܰܪܥܺܝܬܳܟ ܛܽܘܒܳܢܳܐ   ܩܽܘܡ ܘܰܣܥܽܘܪܶܝܗ̇ ܟܰܫܺܝܪܳܐ
                    ܓܙܳܪ̈ܶܐ ܝܰܥܩܽܘܒ ܛܰܟܶܣ ܗ̱ܘܳܐ   ܛܰܟܶܣ ܥܶܪ̈ܒܶܐ ܡ̈ܰܠܳܠܶܐ 
                    ܘܙܰܗܳܐ ܒ̈ܬܽܘܠܶܐ ܕܰܟܝܳܐܺܝܬ   ܘܰܒܬܽܘ̈ܠܳܬܳܐ ܢܰܟܦܳܐܺܝܬ
                    ܐܰܩܺܝܡ ܟܳܗ̈ܢܶܐ ܙܰܗܝܳܐܺܝܬ   ܠܪ̈ܺܝܫܳܢܶܐ ܡܰܟܺܝܟܳܐܺܝܬ 
                    ܘܰܠܩܽܘܛܢܳܐ ܙܰܕܺܝܩܳܐܺܝܬ   ܒܪܺܝܟ ܗ̱ܽܘ ܕܰܡܠܳܟ ܣܽܘܟܳܠܳܐ
                    
                
                
                    4
                    ܢܶܩܝܳܐ ܕܰܚܠܺܝܡܳܐ ܢܰܛܰܪ   ܘܰܣܥܽܘܪ ܠܰܐܝܕܳܐ ܕܰܟܪܺܝܗܳܐ 
                    ܘܰܥܨܽܘܒ ܠܰܐܝܕܳܐ ܕܰܬܒܺܝܪܳܐ   ܘܰܦܩܽܘܕ ܠܰܐܝܕܳܐ ܕܰܐܒܺܝܕܳܐ 
                    ܪܥܺܝܳܗ̇ ܒܡܰܪ̈ܓܶܐ ܕܰܟܬܳܒ̈ܶܐ   ܘܰܐܫܩܳܗ̇ ܢܶܒܥܶܐ ܕܝܽܘܠܦܳܢܳܐ 
                    ܫܪܳܪܳܐ ܫܽܘܪܳܐ ܢܶܗܘܶܐ ܠܳܟ   ܨܠܺܝܒܳܐ ܚܽܘܛܪܳܐ ܢܶܗܘܶܐ ܠܳܟ
                    ܘܩܽܘܫܬܳܐ ܫܠܳܡܳܐ ܢܶܗܘܶܐ ܠܳܟ   ܒܪܺܝܟ ܗ̱ܽܘ ܕܰܐܣܓܺܝ ܢܶܨ̈ܚܳܢܰܝܟ
                    
                
                
                    5
                    ܢܶܗܘܶܐ ܥܰܡܳܟ ܒܰܓܙܳܪܳܟ   ܚܰܝܠܳܐ ܕܰܗܼܘܳܐ ܥܰܡ ܕܰܘܺܝܕ
                    ܕܶܐܢ ܗܰܘ ܠܶܐܡܪܳܐ ܥܳܒܽܘܪܳܐ   ܡܶܢ ܦܽܘܡܳܐ ܕܰܐܪܝܳܐ ܚܰܛܦܶܗ
                    ܟܡܳܐ ܘܳܠܶܐ ܠܳܟ ܢܰܨܺܝܚܳܐ   ܕܬܶܛܰܢ ܬܰܥܕܶܐ ܡܶܢ ܒܺܝܫܼܳܐ 
                    ܢܰܦܫܳܐ ܕܡܶܢ ܟܽܠ ܝܰܬܺܝܪܳܐ   ܕܰܒܡܶܕܶܡ ܠܳܐ ܡܶܙܕܰܒܢܳܐ
                    ܐܶܠܳܐ ܒܰܕܡܶܗ ܕܰܡܫܺܝܚܳܐ   ܒܪܺܝܟ ܕܶܐܙܕܰܒܰܢ ܘܰܙܒܰܢ ܟܽܠ 
                    
                
                
                    6
                    ܠܡܽܘܫܶܐ ܝܶܫܽܘܥ ܫܰܡܶܫ ܗ̱ܘܳܐ   ܘܰܚܠܳܦ ܐܰܓܪܳܐ ܕܬܶܫܡܶܫܬܶܗ
                    ܝܰܡܺܝܢܳܐ ܩܰܒܶܠ ܡܶܢܶܗ   ܕܰܠܣܳܒܳܐ ܗܕܺܝܪܳܐ ܫܰܡܼܫܰܬ
                    ܝܰܡܺܝܢܳܐ ܝܰܗ̱ܒ ܠܳܟ ܐܳܦ ܗܽܘ   ܡܽܘܫܶܐ ܠܝܶܫܽܘܥ ܐܰܫܠܼܶܡ ܗ̱ܘܳܐ 
                    ܓܙܳܪܳܐ ܕܦܶܠܓܶܗ ܕܺܐܒ̈ܶܐ ܗ̱ܘܳܐ   ܘܠܳܟ ܐܶܬܓܰܥܠܼܰܬ ܡܰܪܥܺܝܬܳܐ 
                    ܕܪܽܘܒܥܳܗ̇ ܘܬܽܘܠܬܳܗ̇ ܩܰܕܺܝܫܳܐ ܗ̱ܝ   ܒܪܺܝܟ ܗ̱ܽܘ ܕܨܰܒܼܶܬ ܡܰܪܥܺܝܬܳܟ
                    
                
                
                    7
                    ܚܽܘܒܶܗ ܕܡܽܘܫܶܐ ܢܰܫܼܪܶܐ ܒܳܟ   ܕܚܽܘܒܶܗ ܚܽܘܒܳܐ ܕܦܽܘܪܫܳܢܳܐ 
                    ܛܼܢܳܢܶܗ ܛܢܳܢܳܐ ܕܒܽܘܝܳܢܳܐ   ܩܽܘܪܰܚ ܘܕܳܬܰܢ ܕܰܣܕܰܩܘ̱ ܗ̱ܘܰܘ 
                    ܣܼܕܰܩ ܐܰܪܥܳܐ ܕܰܬܚܽܘܬܰܝܗܽܘܢ   ܒܣܼܶܕܩܳܐ ܣܶܕܩܳܐ ܒܰܛܶܠ ܗ̱ܘܳܐ 
                    ܒܶܐܠܕܳܕ ܘܡܺܝܕܳܕ ܐܰܘܕܰܥ ܗ̱ܘܳܐ   ܕܨܶܒܝܳܢܶܗ ܟܽܠܶܗ ܗܳܢܰܘ 
                    ܕܟܽܠܶܗ ܥܰܡܳܐ ܢܶܬܢܰܒܶܐ   ܒܪܺܝܟ ܕܶܐܬܪܰܥܺܝ ܒܨܶܒܝܳܢܶܗ
                    
                
                
                    8
                    ܠܡܶܣܟܺܢܽܘܬܶܗ ܕܶܐܠܺܝܳܐ   ܪܚܶܡ ܐܶܠܺܝܫܳܥ ܡܶܢ ܥܽܘܬܪܳܐ 
                    ܝܰܗ̱ܒ ܡܶܣܟܺܢܳܐ ܠܡܶܣܟܺܢܳܐ   ܡܰܘܗܒܰܬܳܐ ܕܡܶܢ ܟܽܠ ܪܰܒܳܐ 
                    ܕܰܪܚܶܡܬܳܗ̇ ܠܰܨܪܺܝܟܽܘܬܶܗ   ܕܪܰܒܳܟ ܥܰܬܺܝܪܳܐ ܟܰܣܝܳܐ 
                    ܡܥܺܝܢ ܡܶܠܰܘ̈ܗ̱ܝ ܬܶܓܣܶܐ ܡܶܢܳܟ   ܠܪܽܘܚܳܐ ܕܬܶܗܘܶܐ ܟܶܢܳܪܳܐ 
                    ܘܬܶܙܡܼܰܪ ܠܳܟ ܒܳܟ ܨܶܒܝܳܢܶܝ̈ܗ̇   ܒܪܺܝܟ ܗ̱ܽܘ ܕܥܰܒܼܕܳܟ ܓܺܝܙܰܒܪܶܗ 
                    
                
                
                    9
                    ܠܰܝܬ ܕܚܰܣܳܡ ܒܰܓܒܺܝܬܳܟ   ܕܡܰܟܺܝܟܳܐ ܗ̱ܝ ܪܺܝܫܳܢܽܘܬܳܟ
                    ܠܰܝܬ ܕܰܪܓܶܙ ܒܰܟܐܳܬܳܟ   ܕܫܰܝܢܳܐ ܙܳܪܰܥ ܦܶܬܓܳܡܳܟ
                    ܠܰܝܬ ܕܩܳܢܶܛ ܡܶܢ ܩܳܠܳܟ   ܕܒܰܣܺܝܡܳܐ ܗ̱ܝ ܦܳܩܽܘܕܽܘܬܳܟ
                    ܠܰܝܬ ܕܡܶܬܪܰܥܰܡ ܥܰܠ ܢܺܝܪܳܟ   ܕܗܽܘܝܽܘ ܠܳܐܶܐ ܚܠܳܦ ܨܰܘܪܰܢ 
                    ܘܡܰܩܶܠ ܝܽܘܩܪܳܐ ܕܢܰܦܫ̈ܳܬܰܢ   ܒܪܺܝܟ ܗ̱ܽܘ ܕܰܓܒܳܟ ܠܰܢܝܳܚܰܢ 
                    
                
                
                    10
                    ܠܳܐ ܬܶܩܠܶܐ ܠܽܘܩܒܰܠ ܪܰܒܳܐ   ܠܳܐ ܬܰܘܚܶܠ ܥܰܠ ܚܰܠܳܫܳܐ 
                    ܪܰܓܳܐ ܘܰܐܠܶܦ ܥܰܬܺܝܪ̈ܶܐ   ܓܰܪܶܓ ܘܰܩܢܺܝ ܡ̈ܶܣܟܺܢܶܐ 
                    ܠܩܰܫܝܳܐ ܐܰܙܘܶܓ ܡܰܬܺܝܢܳܐ   ܘܢܰܓܺܝܪ ܪܽܘܚܳܐ ܠܚܶܡܬܳܢܳܐ 
                    ܠܒܺܝܼ̈ܫܶܐ ܒܛܳܒ̈ܶܐ ܨܽܘܕ ܐܶܢܽܘܢ   ܘܰܠܒܳܙܽܘ̈ܙܶܐ ܒܝ̈ܳܗܽܘܒܶܐ 
                    ܘܰܠܛܰܡ̈ܐܶܐ ܒܝܰܕ ܩܰܕܺܝ̈ܫܶܐ   ܒܪܺܝܟ ܗ̱ܽܘ ܕܰܓܒܳܟ ܨܰܝܳܕܰܢ 
                    
                
                
                    11
                    ܣܰܒ ܠܳܟ ܪ̈ܶܒܽܘ ܣܰܡ̈ܡܳܢܺܝܢ   ܘܩܽܘܡ ܗܰܠܶܟ ܒܰܝܢܳܬ ܡܰܪ̈ܥܶܐ 
                    ܠܕܰܟܪܺܝܗ ܣܰܡܳܐ ܐܰܣܼܪܰܚ ܠܶܗ   ܘܠܰܐܝܢܳܐ ܕܰܚܠܺܝܡ ܢܽܘܛܳܪܳܐ 
                    ܠܰܘ ܚܰܕ ܣܰܡܳܐ ܬܰܣܼܪܰܚ ܠܶܗ   ܠܟܺܐܒܳܐ ܕܰܠܡܳܐ ܠܳܐ ܥܳܗܶܢ
                    ܐܰܣܓܼܳܐ ܩܰܪܶܒ ܥܽܘܕܪ̈ܳܢܶܐ   ܕܟܺܐܒܳܐ ܢܶܩܢܼܶܐ ܚܽܘܠܡܳܢܳܐ 
                    ܐܳܦ ܐܰܢ̱ܬ ܬܺܐܠܰܦ ܢܶܣܝܳܢܳܐ   ܒܪܺܝܟ ܗ̱ܽܘ ܕܰܠܐܺܝ ܒܡܰܚ̈ܘܳܬܰܢ
                    
                
                
                    12  
                    ܢܶܗܘܶܐ ܐܰܪܥܳܐ ܕܨܶܒܝܳܢܳܟ   ܢܶܗܘܶܐ ܟܰܪܡܳܐ ܕܦܽܘܠܚܳܢܳܟ
                    ܢܶܗܘܶܐ ܓܙܳܪܳܐ ܒܓܰܘ ܕܰܝܪܳܟ   ܘܥܼܶܪ̈ܒܶܐ ܚ̈ܠܺܝܡܶܐ ܬܚܶܝܬ ܚܽܘܛܪܳܟ
                    ܬܶܗܘܶܐ ܐܰܢ̱ܬ ܪܺܝܫܳܐ ܪܰܒܳܐ   ܘܰܚܢܰܢ ܛܰܒ̈ܥܶܐ ܕܰܟܠܺܝܠܳܟ
                    ܢܶܫܼܦܰܪ ܒܳܟ ܐܳܦ ܬܶܫܼܦܰܪ ܒܰܢ   ܕܰܦܐܶܝܢ ܐܶܢܽܘܢ ܠܰܚܕ̈ܳܕܶܐ
                    ܥܰܡܳܐ ܘܟܳܗܢܳܐ ܡܳܐ ܕܐܳܘܶܝܢ   ܒܪܺܝܟ ܕܰܙܪܰܥܼ ܒܰܢ ܐܰܘܝܽܘܬܳܐ 
                    
                
                
                    13
                    ܫܡܼܰܥ ܠܰܫܠܺܝܚܳܐ ܟܰܕ ܐܳܡܰܪ   ܠܗܳܕܶܐ ܒܬܽܘܠܬܳܐ ܕܰܡܟܼܰܪ ܗ̱ܘܳܐ 
                    ܛܳܐܶ̇ܢ ܐ̱ܢܳܐ ܒܟܽܘܢ ܒܰܛܢܳܢܼܳܐ   ܒܰܛܢܳܢܳܐ ܠܰܡ ܕܰܐܠܳܗܳܐ 
                    ܠܳܐ ܕܒܶܣܪܳܐ ܐܶܠܳܐ ܕܪܽܘܚܳܐ   ܛܰܢ ܒܳܗ̇ ܐܳܦ ܐܰܢ̱ܬ ܕܰܟܝܳܐܺܝܬ 
                    ܕܬܶܕܰܥ ܕܡܶܢܝ̱ ܗ̱ܺܝ ܘܰܕܡܰܢ ܗ̱ܺܝ   ܒܳܟ ܬܼܶܪܚܰܡ ܐܳܦ ܒܳܟ ܬܰܚܶܒ
                    ܠܝܶܫܽܘܥ ܚܰܬܢܳܗ̇ ܕܰܫܪܳܪܳܐ   ܒܪܺܝܟ ܕܰܛܢܳܢܶܗ ܩܰܕܺܝܫܰܐ ܗ̱ܘ 
                    
                
                
                    14
                    ܐܰܝܟ ܪ̈ܰܒܳܢܶܝܗ̇ ܕܽܘܒܳܪ̈ܶܝܗ̇   ܕܥܰܡ ܪܰܒܳܐ ܕܰܪܦܶܐ ܪܰܦܝܳܐ ܗ̱ܝ
                    ܘܥܰܡ ܗܰܘ ܕܰܙܗܶܐ ܢܰܨܺܝܚܳܐ ܗ̱ܝ   ܥܺܕ̱ܬܳܐ ܕܳܡܝܳܐ ܠܡܰܚܙܺܝܬܳܐ 
                    ܕܰܐܝܟ ܦܰܪܨܽܘܦܳܐ ܕܚܳܐܰܪ ܒܳܗ̇   ܗܳܟܰܢ ܠܒܺܝܫܳܐ ܕܶܡܘ̈ܳܬܶܗ
                    ܕܰܐܝܟ ܡܰܠܟܳܐ ܐܳܦ ܡܰܫܪܺܝܬܶܗ   ܘܰܐܝܟ ܟܳܗܢܳܐ ܐܳܦ ܡܰܪܥܺܝܬܶܗ 
                    ܐܰܟܘܳܬܗܽܘܢ ܒܗܽܘܢ ܡܶܬܼܛܰܒܥܳܐ   ܒܪܺܝܟ ܗ̱ܽܘ ܕܛܰܒܥܳܗ̇ ܒܰܕܡܽܘܬܶܗ
                    
                
                
                    15
                    ܕܠܳܐ ܕܺܝܰܬܺܩܺܐ ܥܢܼܰܕܘ̱ ܗܶܢܽܘܢ   ܬܠܳܬܳܐ ܟܳܗ̈ܢܶܐ ܢܰܨ̈ܺܝܚܶܐ 
                    ܕܰܒܕܺܝܰܬܺܩܺܐ ܗܳܓܶܝܢ ܗ̱ܘܰܘ   ܗܳܠܶܝܢ ܬܰܪܬܶܝܢ ܕܰܐܠܳܗܳܐ 
                    ܝܽܘܬܪܳܢܳܐ ܪܰܒܳܐ ܫܒܼܰܩܘ̱ ܠܰܢ   ܗܰܘ ܛܽܘܦܣܳܐ ܕܡܶܣܟܺܢܽܘܬܳܐ
                    ܕܠܳܐ ܩܼܢܰܘ ܡܶܕܶܡ ܛܽܘܒ̈ܳܢܶܐ   ܥܰܒܕܽܘܢ ܠܰܢ ܩܶܢܝܳܢܰܝ̈ܗܽܘܢ 
                    ܗܼܘܳܬ ܥܺܕܰܬܗܽܘܢ ܣܺܝܡܰܬܗܽܘܢ   ܒܪܺܝܟ ܕܰܩܢܼܶܐ ܒܗܽܘܢ ܩܶܢܝܳܢܰܘ̈ܗ̱ܝ
                    
                
                
                    16
                    ܟܳܗܢܳܐ ܝܰܥܩܽܘܒ ܢܰܨܺܝܚܳܐ   ܥܰܡܶܗ ܢܼܶܨܚܰܬ̇ ܐܰܟܘܳܬܶܗ 
                    ܕܫܰܘܬܶܦ ܚܽܘܒܶܗ ܠܰܛܢܼܳܢܶܗ   ܕܶܚܠܳܐ ܘܚܽܘܒܳܐ ܐܶܬܥܼܰܛܦܰܬ 
                    ܒܒܳܒܽܘ ܪܳܚܶܡ ܙܶܕܩ̈ܳܬܳܐ   ܒܟܶܣܦܳܐ ܦܳܪܩܰܬ ܠܰܫܒܰܝ̈ܳܐ 
                    ܒܽܘܠܓܰܫ ܣܦܰܪ ܢܳܡܽܘܣܳܐ   ܠܶܒܳܗ̇ ܦܶܬܚܼܰܬ ܠܰܟܬܳܒ̈ܶܐ
                    ܒܳܟ ܕܶܝܢ ܢܶܣܓܽܘܢ ܥܽܘܕܪ̈ܳܢܶܝܗ̇   ܒܪܺܝܟ ܗ̱ܽܘ ܕܰܐܘܪܶܒ ܬܰܓܳܪ̈ܶܝܗ̇