Ephrem the Syrian. “Nisibis 20.” Digital Syriac Corpus. Last modified June 12, 2019. https://syriaccorpus.org/277. Nisibis XX ܡܶܢܶܗ ܒܰܪ ܩܳܠܶܗ 1 ܐܳܘ ܒܬܽܘܠܳܐ ܕܰܗܼܘܳܐ ܚܰܬܢܳܐ ܐܰܛܶܢ ܩܰܠܺܝܠ ܪܶܥܝܳܢܳܟ ܨܶܐܕܶܝܗ̇ ܕܰܐܢ̱ܬܰܬ ܛܰܠܝܽܘܬܳܟ ܬܶܦܼܣܽܘܩ ܢܳܩ̈ܦܼܶܐ ܕܰܗܘܰܘ ܠܳܗ̇ ܒܫܰܒܪܽܘܬܳܗ̇ ܨܶܝܕ ܣ̈ܰܓܺܝܐܶܐ ܟܼܐܺܝ ܒܳܗ̇ ܘܰܟܢܽܘܫ ܪܶܥܝܳܢܳܗ̇ ܕܬܶܕܰܥ ܕܡܰܢܝ ܘܰܕܡܰܢܝ ܒܳܟ ܬܶܬܚܰܦܰܛ ܐܳܦ ܬܰܚܶܒ ܠܰܡܫܺܝܚܳܐ ܚܰܬܢܳܐ ܕܩܽܘܫܬܳܐ ܒܪܺܝܟ ܗ̱ܽܘ ܕܡܰܟܪܳܗ̇ ܠܺܝܚܺܝܕܶܗ 2 ܛܰܢ ܐܰܟܳܪܳܐ ܒܙܺܝܙܳܢ̈ܶܐ ܕܣܰܪܥܶܦܘ̱ ܘܰܣܒܼܰܟܘ̱ ܒܶܝܬ ܚ̈ܶܛܶܐ ܦܫܺܝܚ ܗ̱ܽܘ ܝܰܥܪܳܐ ܠܥܶܩܳܪܳܐ ܕܡܶܢ ܒܰܣܝܳܢܳܐ ܗ̱ܝ ܡܽܘܥܝܳܬܶܗ ܩܰܠܺܝܠ ܐܳܐܰܪ ܐܶܢ ܫܳܩܶܠ ܙܰܪܥܳܐ ܡܰܚܨܶܦ ܙܳܟܶܐ ܠܶܗ ܕܰܐܟܳܪ̈ܶܐ ܬܠܳܬܳܐ ܙܰܪܥܽܘܗ̱ܝ ܒܰܬܠܳܬܳܐ ܐܰܥ̈ܦܺܝܢ ܢܺܐܬܶܐ ܒܰܬܠܳܬܺܝܢ ܘܰܫܬܺܝܢ ܘܰܡܳܐܐ ܒܪܺܝܟ ܗ̱ܽܘ ܕܡܰܥܬܰܪ ܥ̈ܰܠܠܳܬܳܟ 3 ܪܳܥܝܳܐ ܚܰܕܬܳܐ ܙܳܕܶܩ ܠܶܗ ܕܢܶܣܥܽܘܪ ܥܢܳܐ ܚܰܕܬܳܐܺܝܬ ܘܢܶܕܰܥ ܕܰܟܡܳܐ ܗܰܘ ܡܶܢܝܳܢܳܗ̇ ܘܢܶܚܙܶܐ ܕܰܐܝܢܰܘ ܣܽܘܢܳܩܢܳܗ̇ ܥܢܳܐ ܗܳܝ ܕܰܙܒܺܝܢܳܐ ܒܰܕܡܶܗ ܕܗܰܘ ܪܰܒܳܐ ܕܪ̈ܳܥܰܘܳܬܳܐ ܩܪܺܝ ܘܰܐܥܒܰܪ ܥܶܪܒܳܐ ܒܰܫܡܶܗ ܕܡܰܪܥܺܝܬܳܐ ܗܳܝ ܕܰܟܬܺܝܒ ܫܡܳܗ̇ ܘܚܽܘܫܒܳܢܳܗ̇ ܒܰܣܼܦܰܪ ܚ̈ܰܝܶܐ ܒܪܺܝܟ ܗ̱ܽܘ ܕܬܳܒܰܥ ܡܶܢܝܳܢܳܗ̇ 4 ܗܳܐ ܡܟܺܝܪܰܬ ܡܳܪܳܟ ܥܰܡܳܟ ܢܰܛܰܪܶܝܗ̇ ܡܶܢ ܟܺܠ ܢܶܟܝܳܢ ܘܡܶܢ ܐ̱ܢܳܫܳܐ ܕܫܰܚܶܛܘ̱ ܘܰܩܪܰܘ ܟܢ̈ܽܘܫܳܬܳܐ ܒܰܫܡܳܗܰܝ̈ܗܽܘܢ ܫܡܶܗ ܕܰܡܟܺܝܪܳܗ̇ ܣܺܝܡ ܥܠܶܝܗ̇ ܠܳܐ ܬܶܙܢܶܐ ܒܰܫܡܳܐ ܐ̱ܚܪܺܢܳܐ ܕܠܳܐ ܥܶܡܕܰܬ ܒܰܫܡܳܐ ܕܐ̱ܢܳܫ ܒܰܫܡܳܗ̈ܶܐ ܕܥܶܡܕܰܬ ܬܰܘܕܶܐ ܕܰܐܒܳܐ ܘܰܒܪܳܐ ܘܪܽܘܚ ܩܽܘܕܫܳܐ ܒܪܺܝܟ ܗ̱ܽܘ ܕܒܰܫܡܶܗ ܐܶܬܩܼܰܪܝܰܬ 5 ܫܠܺܝܚܳܐ ܡܳܟܽܘܪܳܗ̇ ܛܰܢ ܒܳܗ̇ ܕܠܳܐ ܬܶܫܬܰܚܰܛ ܒܰܫܡܳܗ̈ܶܐ ܠܰܘ ܒܰܫܡܳܗ̈ܶܐ ܙܺܐܦܳܢ̈ܶܐ ܐܶܠܳܐ ܐܳܦܠܳܐ ܒܫܰܪ̈ܺܝܪܶܐ ܠܳܐ ܒܟܺܐܦܳܐ ܐܳܦܠܳܐ ܒܕܺܝܠܶܗ ܕܡܰܟܪ̈ܶܐ ܗܘܰܘ ܫܰܪ̈ܺܝܪܶܐ ܫܡܶܗ ܕܰܡܟܺܝܪܳܗ̇ ܣܳܡܼܘ̱ ܥܠܶܝܗ̇ ܙܺܐܦܳܢ̈ܶܐ ܐܰܝܟ ܙܰܢܳܝ̈ܶܐ ܫܡ̈ܳܗܰܝܗܽܘܢ ܣܳܡܼܘ̱ ܥܰܠ ܥܳܢܳܐ ܫܽܘܒܚܳܐ ܠܰܫܡܳܟ ܒܳܪܽܘܝܰܢ 6 ܪܽܘܫܡܳܐ ܕܚ̈ܰܝܘܳܬܳܐ ܐܰܚܰܝ̈ ܠܳܐ ܐ̱ܢܳܫ ܡܚܰܒܶܠ ܓܰܠܝܳܐܺܝܬ ܘܰܫܡܳܐ ܒܰܫܛܳܪܳܐ ܕܰܚܬܺܝܡ ܠܳܐ ܐ̱ܢܳܫ ܐܰܘܣܶܦ ܐܰܘ ܚܰܠܶܦ ܕܰܣܪܰܚ ܪܽܘܫܡܳܐ ܓܰܢܳܒܰܐ ܗ̱ܘ ܘܕܰܫܡܳܐ ܡܚܰܠܶܦ ܙܺܐܦܳܢܰܐ ܗ̱ܘ ܫܡܶܗ ܕܰܡܫܺܝܚܳܐ ܐܶܬܚܰܠܰܦ ܫܡܳܗ̈ܶܐ ܕܙܺܐܦܳܐ ܗܳܐ ܣܺܝܡܺܝܢ ܠܰܟܢܽܘ̈ܫܳܬܳܐ ܕܶܐܫ̇ܬܰܚܰܛ ܒܪܺܝܟ ܕܰܩܪܳܐ ܠܥܳܢܶܗ ܒܰܫܡܶܗ 7 ܚܽܘܪ ܒܰܢܒ̈ܺܝܶܐ ܘܒܰܫܠܺܝ̈ܚܶܐ ܕܰܟܡܳܐ ܕܳܡ̈ܝܳܢ ܠܰܚ̈ܕܳܕܶܐ ܢܒ̈ܺܝܶܐ ܫܡܶܗ ܗܽܘ ܕܰܐܠܳܗܳܐ ܣܳܡܘ̱ ܥܰܠ ܥܳܢܶܗ ܕܰܐܠܳܗܳܐ ܘܰܫܠܺܝ̈ܚܶܐ ܫܡܶܗ ܕܰܡܫܺܝܚܳܐ ܣܳܡܘ̱ ܥܰܠ ܥܺܕ̱ܬܶܗ ܕܰܡܫܳܚܳܐ ܠܰܚ̈ܕܳܕܶܐ ܕܡܰܘ ܙܺܐܦܳܢ̈ܶܐ ܕܒܰܫܡܳܗ̈ܰܝܗܽܘܢ ܡܶܬܩܪܶܝܢ ܟܢܽܘ̈ܫܳܬܳܐ ܕܰܒܗܽܘܢ ܙܰܢܺܝ ܒܪܺܝܟ ܗ̱ܽܘ ܕܒܰܫܡܶܗ ܐܶܬܩܰܕܫܰܢ