Ephrem the Syrian. “Nisibis 26.” Digital Syriac Corpus. Last modified June 12, 2019. https://syriaccorpus.org/280.
    
        
            
                Nisibis XXVI
            
            
                
                    [ܒ ܒܰܪ ܩܳܠܶܗ]
                
                
                    1
                    -----   -----
                    -----   -----
                    ܕܒܳܟ ܐܰܪܓܙܽܘܢܳܝ ܒܳܟ ܬܽܘܒ   ܡܶܫܟܚܺܝܢ ܡܪܰܥܶܝܢ ܠܺܝ
                    
                
                
                    2
                    ܘܶܐܗܘܶܐ ܡܟܰܠܰܠܬܳܐ   ܟܢܺܝܟܳܬܳܐ ܘܡܰܟܢܺܝܬܳܐ 
                    ܕܰܒܢܶܝ̈ܗ ܒܓܰܘ ܥܽܘܒܳܗ̇   ܣܢܳܐܝ̈ܶܗ̇ ܠܒܰܪ ܡܶܢܳܗ̇
                    ܕܰܟܪܺܝܗ ܫܦܶܐ ܘܕܰܟܶܐ   ܡܶܢܗܽܘܢ ܕܙܺܝ̈ܙܳܢܶܐ 
                    
                
                
                    3
                    ܐܰܘ ܐܳܣܝܳܐ ܚܰܘܳܐ   ܚܶܟܡܬܳܟ ܒܗ̈ܰܕܳܡܰܝ 
                    ܘܕܶܐܬܦܰܣܰܩܘ̱ ܡܶܢ ܓܽܘܫܡܝ̱   ܪܰܟܶܒ ܩܒܽܘܥ ܐܶܢܽܘܢ 
                    ܘܰܐܝܟ ܗܰܘ ܕܠܳܐ ܦܣܺܝܩܺܝܢ   ܢܶܗܘܽܘܢ ܠܚ̈ܰܙܳܝܶܐ 
                    
                
                
                    4
                    ܕܒܺܝܫܳܐ ܚܕܺܝ ܒܡܽܘ̈ܡܰܝ   ܘܶܐܗܰܠ ܒܗ̈ܰܕܳܡܰܝ
                    ܐܰܘܣܶܦ ܠܗܽܘܢ ܫܽܘܦܪܳܐ   ܕܰܡܥܺܝܩ ܠܣܰܢܝܽܘܬܶܗ
                    ܢܶܬܬܘܶܐ ܒܰܫܩܳܠ ܛܰܥܢܶܗ   ܕܰܚܙܳܐ ܟܡܳܐ ܫܶܦܪܰܬ 
                    
                
                
                    5
                    ܢܰܦܠܰܢܝ̱ ܒܢܶܣܝܳܢܶܗ ܚܰܫܳܐ   ܕܠܳܐ ܢܰܬܢܺܝܘܗ̱ܝ 
                    ܠܺܝ ܟܐܶܒ ܕܶܐܬܓܰܙܪܶܬ   ܘܕܶܐܬܦܰܣܰܩܘ̱ ܗܶܢܽܘܢ 
                    ܢܶܙܕܰܗܰܪ ܒܚܽܘܠܡܳܢܳܐ   ܐ̱ܚܪܳܝܳܐ ܕܠܳܐ ܢܺܐܒܳܐ 
                    
                
                
                    6
                    ܘܶܐ̱ܢܳܐ ܘܗܼܶܢܽܘܢ ܠܳܟ   ܢܰܘܕܶܐ ܒܟܽܠ ܝܰܘܡ̈ܺܝܢ 
                    ܕܰܐܪܫܶܠܬ ܘܰܐܠܶܦܬܳܢܝ̱   ܚܰܫܳܐ ܒܢܶܣܝܳܢܳܐ 
                    ܘܟܰܢܶܫܬ ܘܰܐܩܢܺܝܬܳܢܝ̱   ܚܽܘܒܳܐ ܒܒܽܘܩܝܳܢܳܐ 
                    
                
                
                    7
                    ܘܥܠܰܝ ܥܰܠ ܚܰܠܳܫܳܐ   ܐܳܘ ܥܺܕ̱ܬܳܐ ܨܰܠܳܝ
                    ܕܚܳܫܶܬ ܒܦܽܘܠܳܓܶܟܝ̱   ܐܶܚܕܳܐ ܒܪܽܘܟܳܒܶܟܝ̱
                    ܘܥܰܡܶܟܝ̱ ܠܡܰܠܟܽܘܬܳܐ   ܐܶܥܽܘܠ ܒܣܶܬܳܪܶܟܝ̱