Ephrem the Syrian. “Nisibis 27.” Digital Syriac Corpus. Last modified June 12, 2019. https://syriaccorpus.org/281.
    
        
            
                Nisibis XXVII
            
            
                
                    ܓ ܒܪ ܩܠܗ 
                
                
                    1
                    ܠܳܐܣܝܳܐ ܦܫܺܝܩܳܐ ܡܳܪܝ̱   ܕܢܶܦܣܽܘܩ ܠܗܰܕܳܡܶܐ 
                    ܠܳܐ ܕܶܝܢ ܕܠܺܝܠܳܐ ܠܶܗ   ܕܬܽܘܒ ܢܩܰܒܥܺܝܘܗ̱ܝ ܒܰܐܬܪܶܗ
                    ܠܳܟ ܡܳܪܝ̱ ܬܰܪ̈ܬܰܝܗܶܝܢ   ܕܠܺܝܠܳܢ ܕܰܐܠܳܗܐ ܐܰܢ̱ܬ 
                
                
                    ܥܽܘܢܺܝܬܳܐ: ܫܡܰܥ ܩܳܠ ܓܥܳܬܝ̱ ܝ̈ܰܠܕܰܝ
                    
                
                
                    2
                    ܫ̈ܢܰܝܳܐ ܬܰܪ̈ܬܶܝܢ ܘܰܥܣܰܪ   ܦܰܪܣܽܘܗ̇ ܐܳܣ̈ܰܘܳܬܳܐ 
                    ܠܗܳܝ ܐܰܢܬܬܳܐ ܕܰܕܡܳܗ̇   ܦܰܪܣܺܝܘ ܘܠܳܐ ܥܰܕܰܪܘ̱
                    ܐܶܠܽܘ ܐܰܣܺܝܘ ܨܰܥܪܰܐ ܗ̱ܘ   ܟܡܳܐ ܟܺܝܬ ܕܠܳܐ ܐܰܣܺܝܘ
                    
                
                
                    3
                    ܟܡܳܐ ܕܦܰܪܣܘܝܗ̇  ܗܼܶܢܽܘܢ   ܢܰܟܶܦܬ ܘܰܐܣܺܝܬܳܗ̇
                    ܕܶܐܬܚܰܦܝܰܬ ܩܶܪܒܰܬ   ܠܢܰܚܬܳܟ ܘܠܳܐ ܠܓܽܘܫܡܳܟ 
                    ܠܒܽܘܫܳܐ ܡܢܰܟܶܦ ܟܽܠ   ܐܳܣܝܳܐ ܗܘܳܐ ܗ̱ܘܳܐ ܠܳܗ̇
                    
                
                
                    4
                    ܟܡܳܐ ܟܺܝܬ ܬܢܰܟܶܦ ܡܳܪܝ̱   ܠܥܺܕܬܳܟ ܕܗܳܐ ܙܳܠܰܬ 
                    ܕܳܐܦ ܥܳܒܪ̈ܰܝ ܐܽܘܪܚܳܐ   ܐܶܣܛܺܝܘ ܚܙܰܘ ܨܰܥܪܳܗ̇
                    ܠܥܳܒܽܘܪܬܳܐ ܢܰܟܶܦܬ   ܘܠܰܡܟܺܝܪܬܳܟ ܦܰܪܣܺܝܬ 
                    
                
                
                    5
                    ܐܳܦ ܠܳܐ ܦܚܶܡ ܢܽܘܓܪܳܐ   ܕܰܡܚܽܘܬܝ̱ ܠܗܰܘ ܢܽܘܓܪܳܐ 
                    ܒܪ̱ܰܬ ܫܶܬ ܫܢܺܝ̈ܢ ܐܺܝܬܶܝܗ̇   ܦܶܠܓܽܘܬ ܫ̈ܢܶܝܗ̇ ܕܗܳܝ 
                    ܟܺܐܒܳܐ ܕܚܰܕ̱ܬ ܐܰܣܳܐ   ܕܰܐܣܺܝܬ ܥܰܬܺܝܩܳܐ 
                    
                
                
                    6
                    ܘܶܐܢ ܕܶܐܣܬܰܢܺܝܬ ܩܰܠܺܝܠ   ܐܰܪܫܶܠܬ ܘܰܫܒܰܩܬܳܢܝ̱
                    ܐܰܝܟܰܢ ܣܢܶܐ ܠܳܟ ܡܳܪܝ̱   ܕܫܳܛ ܐܰܢ̱ܬܬܶܗ ܕܣܰܢܝܳܐ 
                    ܣܰܢܝܽܘܬܝ̱ ܪܚܰܡ ܘܰܐܠܶܦ   ܕܢܰܚܶܒ ܠܒܰܪ̱ܬ ܙܰܘܓܶܗ
                    
                
                
                    7
                    ܠܺܠܝܳܐ ܕܣܰܢܝܳܐ ܗܘܳܬ   ܐܰܢ̱ܬ ܗ̱ܽܘ ܕܰܐܫܦܰܪܬܳܗ̇
                    ܥܰܝ̈ܢܶܝܗ̇ ܢܣܽܝ̈ܣܳܢ ܗܘܰܝ   ܘܝ̈ܰܠܕܶܝܗ̇ ܦܐܶܝܢ ܗ̱ܘܰܘ ܛܳܒ
                    ܐܶܢܳܐ ܡܳܪܝ̱ ܕܦܰܐܝܐ ܐܰܢ̱ܬ  ܝ̈ܰܠܕܰܝ ܡܓܰܢܺܝܢ ܠܺܝ
                    
                
                
                    8
                    ܐܰܢ̱ܬ ܗ̱ܽܘ ܒܰܠܚܽܘܕ ܘܶܐܡܳܟ   ܕܡܶܢ ܟܽܠ ܦܐܶܝܢ ܐܢ̱ܬܽܘܢ ܛܳܒ
                    ܕܡܽܘܡܳܐ ܒܳܟ ܡܳܪܝ̱ ܠܳܐ ܐܺܝܬ   ܘܠܳܐ ܟܽܘܬܡ̈ܳܬܳܐ ܒܶܐܡܳܟ
                    ܡܶܢ ܒܶܝܬ ܬܶܪ̈ܝܢ ܫܽܘܦܪ̈ܺܝܢ   ܝ̈ܰܠܕܰܝ ܠܡܰܢ ܕܳܡܶܝܢ 
                    
                
                
                    9
                    ܐܰܒܽܘܟ ܟܰܕ ܫܰܩܠܳܗ̇   ܠܰܟܢܽܘܫܬܳܐ ܣܢܺܝܬܳܐ 
                    ܕܙܰܢܝܰܬ ܒܗܰܘ ܥܶܓܠܳܐ   ܘܥܰܠ ܗܰܘ ܣܢܳܐ ܝܰܠܕܳܗ̇
                    ܕܟܶܐܡܰܬ ܒܛܽܘܦܣܶܗ ܗܽܘ   ܛܒܺܝܥܺܝܢ ܕܢܽܘܟܪܳܝܳܐ 
                    
                
                
                    10
                    ܗܳܐ ܓܶܝܪ ܒܪܳܙܶܗ ܗܽܘ   ܕܩܳܪܶܝܢ ܠܫܰܪ̈ܺܝܪܶܐ 
                    ܠܡܽܘܫܶܐ ܘܠܰܢܒ̈ܺܝܶܐ   ܕܰܩܪܰܘ ܒܟܽܠ ܙܰܒ̈ܢܺܝܢ 
                    ܐܰܢ̱ܬ ܡܳܪܝ̱ ܝܳܕܰܥ ܐܰܢ̱ܬ   ܡܳܢܳܐ ܥܒܰܕܘ̱ ܗ̱ܘܰܘ ܒܳܟ
                    
                
                
                    11
                    ܫܠܺܝܚܳܐ ܠܳܟ ܡܳܪܝ̱ ܡܰܟܪܰܢܝ̱   ܠܰܒܬܽܘܠܬܳܐ ܕܟܺܝܬܳܐ 
                    ܥܶܓܠܳܐ ܕܰܐܒ̈ܳܗܰܝ   ܣܢܺܝܬ ܡܳܪܝ̱ ܘܰܐܚܶܒܬܳܟ
                    ܠܳܐ ܢܕܰܩܪܽܘܢ ܝ̈ܰܠܕܰܝ   ܥܶܪ̈ܒܶܐ ܠܰܐܚܰܝ̈ܗܽܘܢ
                    
                
                
                    12
                    ܡܶܢ ܐܶܡܪܳܐ ܐܶܢܽܘܢ   ܕܶܐܬܕܺܝܢ ܘܠܳܐ ܡܰܠܶܠ
                    ܐܶܬܢܼܟܶܣ ܘܠܳܐ ܒܰܓܶܢ   ܐܶܙܕܩܶܦ ܘܠܳܐ ܪܰܛܶܢ
                    ܘܕܰܚܝܳܐ ܗܦܰܟ ܠܳܐܶܐ   ܕܢܰܚ̇ܶܐ ܠܩ̈ܳܛܽܘܠܰܘܗܝ
                    
                
                
                    13
                    ܠܰܘ ܐܕܝܡ ܐܰܘܠܶܕܟܘܢ   ܕܰܐܡܪܰܚ ܕܠܳܐ ܒܙܶܕܩܳܐ 
                    ܘܰܒܪܶܗ ܕܠܳܐ ܒܕܺܝܢܼܳܐ   ܡܰܓܳܢ ܩܛܰܠ ܐܰܠܚܽܘܗܝ
                    ܒܢܰܝ̈ܳܐ ܕܪܽܘܚܐ ܐܰܢ̱ܬܽܘܢ   ܘܝ̈ܰܠܕܶܐ ܒ̈ܢܰܝ ܡ̈ܰܝܳܐ 
                    
                
                
                    14
                    ܐܺܡܰܪ ܠܟܽܘܢ ܐܳܦ ܕܺܝܠܝ   ܕܪܰܓܡܽܘܢܝ̱ ܘܠܳܐ ܪܶܓܙܶܬ
                    ܙܰܩܦܽܘܢܝ̱ ܘܠܳܐ ܨܰܚܺܝܬ   ܐܰܘܩܕܽܘܢܝ̱ ܘܠܳܐ ܠܳܛܶܬ
                    ܠܗܰܘ ܡܳܪܟܽܘܢ ܕܰܡܰܘ   ܘܰܠܶܐܡܟܽܘܢ ܡܰܪܰܘ
                    
                
                
                    15
                    ܝܰܠܕܳܐ ܕܰܚ̈ܘܰܘܳܬܳܐ   ܐܶܬܩܪܺܝܘ ܒ̈ܢܰܝ ܐ̱ܢܳܫܳܐ 
                    ܠܳܐ ܗܘܼܳܐ ܒܰܟܝ̈ܳܢܰܝܗܽܘܢ   ܐܶܠܳܐ ܒܰܥ̇ܒ̈ܳܕܰܝܗܽܘܢ
                    ܕܥܳܠܒܳܐ ܗ̱ܝ ܠܕܳܐܟܶܕܢܳܐ   ܡܶܪܬܳܗ̇ ܕܚܺܐܪܽܘܬܳܐ 
                    
                
                
                    16
                    ܗܳܟܰܢ ܐܳܦ ܐܰܠܳܗ̈ܶܐ   ܐܶܬܩܪܺܝܘ ܒ̈ܢܰܝ ܐ̱ܢܳܫܳܐ 
                    ܠܳܐ ܗܘܼܳܐ ܒܺܐܝܬܽܘܬܳܐ   ܐܶܠܳܐ ܒܛܰܝܒܽܘܬܳܐ 
                    ܠܟܽܘܢ ܕܶܝܢ ܐ̱ܚܝܳܢܽܘܬܳܐ   ܥܶܒܕܶܬ ܠܟܽܘܢ ܥܰܡܳܗ̇
                    
                
                
                    17
                    ܬܶܗܪܰܐ ܗ̱ܘ ܕܰܐܠܳܗܳܐ   ܢܰܦܫܶܗ ܠܟܽܘܢ ܚܰܝܶܢ
                    ܘܰܐܢ̱ܬܽܘܢ ܦܣܰܩܬܽܘܢܳܗ̇   ܡܶܢܟܽܘܢ ܐ̱ܚܝܳܢܽܘܬܶܗ 
                    ܕܶܐܢܗܼܽܘ ܕܰܒܪܺܝܬܰܐ ܗ̱ܘ ܓܶܝܪ   ܠܥܰܒܕܰܐ ܗ̱ܘ ܐܬܚܰܝܰܢܬܽܘܢ
                    
                
                
                    18
                    ܠܳܟ ܬܶܫ̈ܒܚܳܢ ܐܰܠܳܗܝ̱    ܕܠܳܐ ܗܼܘܳܐ ܥܰܡ ܒܶܪ̈ܝܳܬܳܐ 
                    ܥܒܰܕܬ ܠܰܢ ܐ̱ܚܝܳܢܽܘܬܳܐ   ܐܶܠܳܐ ܥܰܡܳܟ ܕܺܝܠܳܟ
                    ܡܳܪܳܐ ܕܟܽܠ ܒܶܪ̈ܝܳܢ   ܫܽܘܒܚܳܐ ܠܚܽܘܠܛܳܢܳܟ
                    
                
                
                    19
                    ܠܰܘ ܓܶܝܪ ܬܶܕܡܽܘܪܬܳܐ ܗ̱ܝ   ܐܶܢ ܗܼܽܘ ܕܒܶܪ̈ܝܳܬܳܐ 
                    ܡܳܬܚܺܝܢܰܢ ܐܰܟܚܰܕ   ܕܰܚܕܳܐ ܗ̱ܝ ܥܰܒܕܽܘܬܳܐ 
                    ܒܪܺܝܟ ܗ̱ܽܘ ܡܳܪܳܐ ܕܥܰܒ̈ܕܰܘܗ̱ܝ   ܐ̱ܚܝ̈ܳܢܰܘܗ̱ܝ ܨܼܒܳܐ ܕܢܶܗܘܽܘܢ