Ephrem the Syrian. “Nisibis 28.” Digital Syriac Corpus. Last modified June 12, 2019. https://syriaccorpus.org/282. Nisibis XXVIII ܕܡܶܢܶܗ ܒܰܪ ܩܳܠܶܗ 1 ܐܶܢܗܽܘ ܕܰܟܝ̈ܳܢܶܐ ܡܳܪܝ̱ ܣܢܶܝܢ ܐܶܢܽܘܢ ܒܟܺܐܒܰܝ̈ܗܽܘܢ ܫܟܺܝܪ̈ܺܝܢ ܒܚܰܫܰܝ̈ܗܽܘܢ ܢܕܺܝܕܺܝܢ ܒܡܽܘ̈ܡܰܝܗܽܘܢ ܪ̈ܓܺܝܓܶܐ ܒܦܺܐܪ̈ܰܝܗܽܘܢ ܘܰܦܐܶܝܢ ܒܫܽܘܦܪ̈ܰܝܗܽܘܢ ܥܽܘܢܺܝܬܳܐ: ܫܰܝܶܢ ܒ̈ܢܰܝ ܒܰܥܓܰܠ 2 ܟܡܳܐ ܟܺܝܬ ܒܢܰܝ̈ܢܳܫܳܐ ܢܶܪܓܫܽܘܢ ܒܟܺܐܒܰܝ̈݁ܗܽܘܢ ܘܢܰܟܪܽܘܢ ܒܶܐܒܠܰܝ̈ܗܽܘܢ ܘܢܶܒܗܬܽܘܢ ܒܡܽܘܡܰܝ̈ܗܽܘܢ ܕܰܗܘܰܘ ܚܛܳܗ̈ܰܝܗܽܘܢ ܥܶܠܬܳܐ ܠܢ̈ܶܓܕܰܝܗܽܘܢ 3 ܣܰܘ̈ܟܶܐ ܕܶܐܬܦܰܫܰܚ ܚܒܳܪ̈ܳܬܗܶܝܢ ܣܰܢܝܳܢ ܘܣܶܕܩ̈ܶܐ ܣܢܶܝܢ ܐܶܢܽܘܢ ܡܳܐ ܕܛܳܒ ܐܶܬܡܰܠܺܝܘ ܟܡܳܐ ܟܺܝܬ ܢܕܺܝܕܺܝܢ ܡܳܪܝ̱ ܐܶܢ ܦܳܝܫܺܝܢ ܗܳܟܰܢ 4 ܢܰܚܬܳܐ ܣܼܕܶܩ ܢܰܦܫܶܗ ܘܰܗܦܰܟܬ ܡܰܠܺܝܬܳܝܗ̱ܝ ܘܰܗܼܦܰܟ ܬܢܳܐ ܣܶܕܩ̈ܰܘܗ̱ܝ ܘܰܐܘܣܶܦܬ ܘܰܐܬܩܶܢܬܳܝܗ̱ܝ ܒܕܰܡܳܟ ܐܬܦܰܠܦܰܠ ܡܳܪܝ̱ ܘܶܐܬܡܣܺܝ ܡܼܪܰܕ ܡܶܢܳܟ 5 ܐܺܝܬ ܗ̱ܽܘ ܕܰܥܕܰܟܺܝܠ ܣܰܒܪܳܐ ܠܣܶܕܩ̈ܰܝ ܕܢܶܬܡܰܠܽܘܢ ܕܳܐܦܶܢ ܫܘܺܝܪ̈ܺܝܢ ܡܳܪܝ̱ ܠܳܟ ܡܳܝܫܺܝܢ ܒܳܥܶܝܢ ܘܳܐܦܶܢ ܫܼܪܰܥܘ̱ ܘܰܢܦܼܰܠܘ̱ ܠܘܳܬܳܟ ܣܒܰܪܘ̱ ܕܰܫܼܪܰܟܘ̱ 6 ܚܰܘܳܐ ܠܗܽܘܢ ܢܰܦܫܳܟ ܢܽܘܗܪܰܢ ܕܒܳܥܶܝܢ ܠܳܟ ܘܕܰܫܼܪܰܥܘ̱ ܢܦܼܰܠܘ̱ ܘܰܣܒܰܪܘ̱ ܕܟܶܐܡܰܬ ܡܩܳܡ ܗܽܘ ܩܳܡ ܐܶܬܪܟܶܢ ܘܰܚܘܳܐ ܡܳܪܝ̱ ܕܨܶܝܕ ܢ̈ܳܦܠܶܐ ܗ̱ܘ ܪܰܟܶܢܬ 7 ܘܕܳܫܬ ܫ̈ܳܢܺܝܢ ܝ̈ܰܠܕܰܝ ܦܪܰܫܘ̱ ܡܶܢܝ̱ ܘܠܰܝܬ ܐܶܢܽܘܢ ܢܶܫ̈ܰܝ ܩܒܼܰܪ ܘܰܛ̈ܥܰܝ ܐܶܒ̈ܠܶܐ ܕܝܰܠܕܰܝ̈ܗܶܝܢ ܠܳܐ ܐܶܬܛܥܺܝܘ ܝ̈ܰܠܕܰܝ ܕܠܳܐ ܐܶܬܩܒܰܪܘ̱ ܡܺܝ̈ܬܰܝ 8 ܠܳܐ ܢܰܗ̇ܠܽܘܢ ܒܺܝ ܡܳܪܝ̱ ܥܰܒܼ̈ܕܰܝܟ ܛܰܢܳܢ̈ܶܐ ܠܳܐ ܢܶܥܕܠܽܘܢ ܕܶܐܒܟܶܐ ܠܡ̈ܺܝܬܰܝ ܒܚܰܝ̈ܰܝܗܽܘܢ ܕܰܠܘܰܝ ܚܠܳܦ ܚ̈ܰܝܶܐ ܒܡܰܘܬܳܐ ܦܪܰܫܼܘ̱ ܗܘܰܘ ܡܶܢܝ̱ 9 ܠܘܰܝ ܪܶܚܦܶܬ ܣܳܡܶܬ ܐܺܝ̈ܕܰܝ ܥܰܠ ܥܰܝܢܰܝ̈ܗܽܘܢ ܘܰܠܘܺܝܬ ܒܡܰܙܡܽܘܪ̈ܶܐ ܘܶܐܬܓܰܥܠܶܬ ܠܡܰܚܶܐ ܟܽܠ ܕܠܺܝ ܬܽܘܒ ܒܢܽܘܚܳܡܳܐ ܢܰܦܢܶܐ ܕܶܐܚܙܶܐ ܐܶܢܽܘܢ 10 ܘܠܳܐ ܡܳܪܝ̱ ܕܗܳܐ ܒܬܰܪ̈ܬܶܝܢ ܥܠܰܝܗܽܘܢ ܐܰܒܺܝܠܳܐ ܐ̱ܢܳܐ ܕܰܐܝܢܳܐ ܕܡܺܝܬ ܒܽܐܘܪܚܳܐ ܐܶܬܩܒܰܪ ܒܰܐܟܣܶܢܝܳܐ ܘܰܕܡܺܝܬܘ̱ ܒܥܽܘܡܪ̈ܰܝܗܽܘܢ ܐܶܬܢܕܶܕܘ̱ ܒܟܶܕ̈ܟܰܝܗܽܘܢ؟ 11 ܥܒܶܕ ܡܳܪܝ̱ ܠܚܰܝ̈ܰܝܗܽܘܢ ܢܽܘܚܳܡ ܬܝܳܒܽܘܬܳܐ ܘܰܐܣܓܳܐ ܠܡ̈ܰܘܬܰܝܗܽܘܢ ܗܽܘܠܳܠ ܙܡܺܝܪ̈ܳܬܳܐ ܢܶܚܼܕܶܐ ܒܚܰܝ̈ܰܝܗܽܘܢ ܢܙܰܝܰܚ ܫܠܰܕܰܝܗܽܘܢ 12 ܒܩܳܠ ܬܽܘܪܬܳܐ ܘܢܶܩܝܳܐ ܢܰܐܠܶܦ ܠܡܰܟܪܳܝܽܘ ܕܓܳܥܶܝܢ ܕܠܰܝܬ ܐܶܢܽܘܢ ܒܢܰܝ̈ܗܶܝܢ ܕܰܐܒܺܝܕܺܝܢ ܘܰܐܝܟ ܗܰܘ ܕܗܶܢܶܝܢ ܡܳܪܝ̱ ܐܳܒܕܳܢ ܒܰܐܒܺܝ̈ܕܶܐ 13 ܘܶܐܢ ܐܶܫܬܟܰܚܘ̱ ܘܰܦܢܰܘ ܬܽܘܒ ܐܶܬܦܨܰܚ ܘܰܣܘܼܰܚ ܘܰܐܝܟ ܗܰܘ ܕܗܶܢܶܝܢ ܡܳܪܝ̱ ܬܽܘܒ ܐܶܫܬܟܰܚ ܘܰܦܼܢܺܝ ܡܳܐ ܕܳܚܠܳܢܝ̱ ܕܰܠܡܳܐ ܬܚܰܣܕܳܢܝ̱ ܒܚ̈ܰܝܘܳܬܳܐ 14 ܠܰܟܢܽܘܫܬܳܐ ܣܰܟܠܳܬܳܐ ܚܶܣܕܶܬ ܡܳܪܝ̱ ܣ̇ܰܓܺܝ ܒܚܽܘܪܒܳܐ ܘܰܣܢܽܘܢܺܝܬܳܐ ܕܰܡ̈ܛܰܟܣܳܢ ܙܰܒ̈ܢܶܐ ܕܢܶܒܗܰܬ ܠܚܺܐܪܽܘܬܳܐ ܩܰܠܶܣ ܠܦܳܪܰܚܬܳܐ