Ephrem the Syrian. “Nisibis 33.” Digital Syriac Corpus. Last modified June 12, 2019. https://syriaccorpus.org/287.
    
        
            
                Nisibis XXXIII
            
            
                
                    ܓ ܒܰܪ ܩܳܠܶܗ 
                
                
                    1
                    ܟܽܘ̈ܒܶܐ ܘܙܺܝ̈ܙܳܢܶܐ   ܘܗ̈ܶܛܛܶܐ ܕܚܰܢܦܽܘܬܳܐ 
                    ܕܰܪܘܺܝܘ ܒܢܽܘܩ̈ܳܝܶܐ   ܕܢܶܫܒܰܬ ܒܗܽܘܢ ܛܽܘܥܝܰܝ
                    ܘܰܫܘܰܚܘ̱ ܒܓܰܘ ܓܳܪܳܢ   ܒܗܰܘ ܢܰܘܣܳܐ ܕܫܺܐܕ̈ܶܐ 
                
                
                    ܥܽܘܢܺܝܬܳܐ: ܒܳܟ ܢܶܬܰܐܘܽܘܢ ܝ̈ܰܠܕܰܝ 
                    
                
                
                    2
                    ܘܶܐܢܗܼܽܘ ܕܳܐܕܳܡ ܐܰܘܥܺܝ   ܟܽܘܒ̈ܶܐ ܕܒܰܟܝܳܢܳܐ 
                    ܕܰܥܒܼܰܪ ܒܚܺܐܪܽܘܬܶܗ   ܬܚܽܘܡܳܐ ܕܦܽܘܩܕܳܢܳܐ 
                    ܒܨܶܒܝܳܢܗܽܘܢ ܟܽܘ̈ܒܶܐ   ܐܺܝܥܰܘ ܒܓܰܘ ܚܳܪܳܢ 
                    
                
                
                    3
                    ܐܰܟܳܪܳܐ ܢܚܼܶܬ ܠܰܐܪܥܳܐ   ܡܶܛܽܠ ܒ̈ܢܰܝ ܐ̱ܢܳܫܳܐ 
                    ܕܰܗܘܰܘ ܠܗܽܘܢ ܟܽܘ̈ܒܶܐ   ܕܢܶܗܘܽܘܢ ܠܗܽܘܢ ܚܶܛ̈ܶܐ
                    ܟܽܘ̈ܒܶܐ ܓܕܰܠܘ̱ ܟܽܘܒ̈ܶܐ   ܠܪܺܝܫܶܗ ܕܰܐܟܳܪܳܐ 
                    
                
                
                    4
                    ܠܳܐ ܕܶܝܢ ܐܶܒܰܕ ܙܰܪܥܳܗ̇   ܕܗܳܝ ܦܶܠܳܐܬܳܐ ܕܰܪܫܰܡܼܘ̱ 
                    ܕܗܳܐ ܐܶܬܗܼܦܶܟܘ̱ ܟܽܘ̈ܒܶܐ   ܠܘܰܪܕܳܐ ܘܫܽܘܫ̈ܰܢܶܐ 
                    ܟܠܺܝܠܳܐ ܠܦܰܠܳܚܳܐ    ܕܣܰܝܒܰܪ ܟܠܺܝܠ ܟܽܘܒ̈ܶܐ 
                    
                
                
                    5
                    ܘܰܠܗܰܘ ܐܰܟܳܪܳܐ   ܕܰܠܐܺܝ ܒܓܰܘ ܚܳܪܳܢ 
                    ܒܟܽܘܒ̈ܶܐ ܕܢܶܗܘܽܘܢ ܚܶܛ̈ܶܐ   ܢܶܗܘܽܘܢ ܒܛܰܝܒܽܘܬܳܟ
                    ܒܳܪܽܘܬܳܐ ܘܰܐܣܳܐ ܦܰܩ̈ܚܶܐ   ܟܠܺܝܠܳܐ ܠܰܐܬܠܺܝܛܳܟ
                    
                
                
                    6
                    ܕܳܡܶܐ ܗ̱ܘ ܥܶܠܳܢܳܟ   ܠܳܟ ܡܳܪܝ̱ ܒܟܽܠ ܡܶܕܶܡ
                    ܘܰܐܝܟܰܢ ܕܕܰܡܺܝ ܡܳܪܝ̱   ܨܰܥܪܶܗ ܒܡܽܘܟܳܟܳܟ
                    ܢܕܰܡܶܐ ܒܪܽܘܡܪܳܡܳܟ   ܕܥܰܠ ܟܽܘܪܣܝܶܗ ܢܺܐܪܰܒ
                    
                
                
                    7
                    ܘܽܐܘܪܚܳܐ ܕܬܰܪܥܽܘܬܳܐ   ܘܰܫܒܺܝܠ ܚ̈ܰܕܘܳܬܳܐ 
                    ܡܶܢ ܐܽܘܪܗܳܝ ܢܶܡܬܽܘܚ   ܥܕܰܡܳܐ ܠܓܰܘ ܚܳܪܳܢ 
                    ܘܡܶܢ ܥܺܕ̱ܬܳܐ ܠܥܺܕ̱ܬܳܐ   ܢܶܪܕܽܘܢ ܒܰܐܘܝܽܘܬܳܐ 
                    
                
                
                    8
                    ܡܶܢ ܐܽܘܪܗܳܝ ܣܳܒܳܐ   ܢܣܰܥܪܺܝܗ̇ ܠܗܳܝ ܚܳܪܳܢ 
                    ܒܺܪܬܳܐ ܕܪܰܒܺܝ ܗ̱ܘܳܐ   ܘܒܰܪ ܐܰܘܗܺܝ ܢܶܣܥܽܘܪ
                    ܠܶܐܡܶܗ ܘܬܽܘܒ ܢܰܦܢܶܐ   ܨܶܝܕ ܡܟܺܝܪܬܶܗ ܚܳܪܳܢ
                    
                
                
                    9
                    ܡܰܠܳܝܗ̱ܝ ܒܛܰܝܒܽܘܬܳܟ   ܠܦܶܚܬܳܐ ܕܰܥܒܼܰܕ ܒܺܝܼܫܳܐ 
                    ܦܣܳܩܳܐ ܦܣܰܩ ܪܰܒܳܐ   ܕܢܶܦܣܽܘܩ ܬܪ̈ܶܝܢ ܓܰܒܺܝ̈ܢ 
                    ܒܦܶܚܬܶܗ ܫܕܺܝܘܗ̱ܝ ܘܰܥܒܶܕ   ܐܽܘܪܚܳܐ ܠܥܶܠ ܡܶܢܶܗ
                    
                
                
                    10
                    ܘܢܰܘܕܶܐ ܠܛܰܝܒܽܘܬܳܟ   ܕܰܢܩܰܠܬ ܘܫܰܦܝܽܘܬܶܗ 
                    ܠܽܐܘܪܚܳܐ ܩܕܳܡ ܟܶܢܫ̈ܶܐ   ܕܳܐܬܫܳܢ ܠܥܰܕܥܺܐܕܳܐ 
                    ܕܰܪܕܰܘ ܕܠܺܝܠܳܐܺܝܬ   ܢܰܘܕܽܘܢ ܫܦܺܝܥܳܐܺܝܬ 
                    
                
                
                    11
                    ܘܢܰܘܕܽܘܢ ܚܠܳܦܰܝܗܽܘܢ   ܝܰܥܩܽܘܒ ܘܺܐܝܣܚܳܩ ܘܰܐܒܪܳܡ 
                    ܕܶܐܢ ܠܣܳܓܕ̈ܰܝ ܥܶܓܠܳܐ   ܥܰܕܰܪܘ̱ ܫܡܳܗ̈ܰܝܗܽܘܢ 
                    ܥܰܡܰܢ ܒܦܰܕܳܢܳܐ   ܒܕܽܘܟܪܳܢܗܽܘܢ ܢܶܚܼܕܽܘܢ 
                    
                
                
                    12
                    ܘܰܐܝܟܰܢ ܕܒܰܚܡܺܝܪܶܗ   ܟܰܣܝܳܐ ܕܰܐܒܪܳܗܳܡ 
                    ܐܶܬܢܓܶܕܘ̱ ܠܓܰܘ ܐܰܬܪܰܢ   ܟܽܠܗܽܘܢ ܐܰܒܳܗ̈ܳܬܳܐ 
                    ܗܳܟܰܢ ܒܕܰܫ̈ܠܺܝܚܶܐ   ܚܡܺܝܪܗܽܘܢ ܢܓܰܕ ܘܰܐܝܬܺܝ
                    ܫ̈ܠܺܝܚܶܐ ܒ̈ܢܰܝ ܓܰܒܶܗ
                    
                
                
                    13
                    ܒܓܰܪ̈ܡܰܘܗ̱ܝ ܕܝܽܘܚܰܢܳܢ   ܕܡܶܢܗܽܘܢ ܒܓܰܘ ܐܰܬܪܰܢ 
                    ܢܒ̈ܺܝܶܐ ܐܶܬܰܘ ܠܰܐܪܥܰܢ   ܒܓܽܘܪܝܳܐ ܘܒܰܫܡܽܘܢܳܐ 
                    ܘܰܒܚܳܒܗܽܘܢ ܚܰܒܺܝܒ   ܐܶܬܰܘ ܣܳܗ̈ܕܶܐ ܣܥܰܪܽܘܢ