Ephrem the Syrian. “Nisibis 43.” Digital Syriac Corpus. Last modified June 12, 2019. https://syriaccorpus.org/297. Nisibis XLIII ܥܰܠ ܩܳܠܳܐ ܕܒܰܝܰܐܘ ܒܡܽܘܠܟܳܢܳܐ 1 ܫܽܘܪܳܐ ܗ̱ܘܳܐ ܝܰܘܣܶܦ ܠܢܰܦܫܶܗ ܒܓܰܘ ܫܰܝܢܳܐ ܡܽܘܫܶܐ ܛܥܶܢ ܓܰܪ̈ܡܰܘܗ̱ܝ ܕܢܶܗܘܽܘܢ ܠܡܰܫܪܺܝܬܶܗ ܫܽܘܪܳܐ ܒܓܰܘ ܕܰܒܪܳܐ ܕܰܚܙܳܝܗ̱ܝ ܠܗܰܘ ܥܰܡܳܐ ܕܡܺܝܬ ܗܽܘ ܒܰܦܬܰܟܪ̈ܰܘܗ̱ܝ ܠܰܒܪܶܝܗ ܓܰܪ̈ܡܶܐ ܛܥܶܢ ܡܺܝ̈ܬܶܐ ܕܢܶܗܘܽܘܢ ܚܠܳܦ ܚܰܝ̈ܶܐ ܦܺܝܪܡܳܐ ܕܚܽܘܣܳܝܳܐ ܣܢܺܐܓܪܳܐ ܕܬܰܪܥܽܘܬܳܐ ܥܽܘܢܺܝܬܳܐ: ܠܳܐ ܢܶܬܛܰܠܰܡ ܦܰܓܪܳܐ ܕܟܺܐܢ̈ܶܐ ܕܗܰܝܡܶܢܘ̱ ܒܳܟ 2 ܝܰܘܣܶܦ ܒܬܰܘܢܳܐ ܚܙܳܝܗ̱ܝ ܗ̱ܘܳܐ ܠܚܳܙܶܐ ܟܽܠ ܐܰܝܟܳܐ ܕܣܰܒܰܪ ܐ̱ܢܳܫ ܕܠܳܐ ܐܺܝܬ ܕܚܳܙܶܐ ܠܶܗ ܐܰܪܡܺܝ ܒܛܰܠܝܽܘܬܶܗ ܦܓܽܘ̈ܕܶܐ ܕܢܰܟܦܽܘܬܳܐ ܡܽܘܫܶܐ ܛܥܶܢ ܓܰܪ̈ܡܰܘܗ̱ܝ ܕܰܢܒܰܣܪܽܘܢ ܠܥܰܡܳܐ ܕܓܰܠܝܳܐܺܝܬ ܫܰܒܚܳܝܗ̱ܝ ܒܢ̈ܳܬ ܡܳܕܶܝܢ ܩܰܛܪܰܓ ܠܙܰܢܳܝ̈ܶܐ ܒܓܰܪ̈ܡܰܘܗ̱ܝ ܕܢܰܨܺܝܚܳܐ 3 ܡܽܘܫܶܐ ܫܒܰܩ ܚܰܝ̈ܶܐ ܪܗܶܛ ܠܶܗ ܠܘܳܬ ܡܺܝ̈ܬܶܐ ܦܳܥ̈ܠܶܐ ܗ̱ܘܰܘ ܥܰܡܶܗ ܘܰܣܓܰܘ ܬܽܘܪ̈ܥܳܬܶܗ ܕܥܰܡܳܐ ܟܰܪܡܰܐ ܗ̱ܘ ܕܰܬܪܰܥ ܗ̱ܘܳܐ ܣܝܳܓܶܗ ܠܕܺܝܽܘ̈ܫܶܐ ܗܳܝ ܕܶܝܢ ܛܽܘܛܺܝܬܳܐ ܒܪܺܝܟܬܳܐ ܥܶܙܝܰܬ ܒܓܰܘ ܓܽܘܦܢ̈ܰܘܗ̱ܝ ܓܶܢܒܰܬ ܘܰܐܦܰܩܬܳܗ̇ ܡܶܢ ܒܶܝܬ ܚܪ̈ܽܘܒܶܐ ܒܽܘܪܟܬܳܐ ܠܒܶܝܬ ܥܰܡ̈ܡܶܐ 4 ܓܰܪ̈ܡܰܘܗ̱ܝ ܕܶܐܠܺܝܫܰܥ ܣܰܒܪܳܐ ܙܪܰܥܘ̱ ܒܰܫܝܽܘܠ ܚܰܝܠܳܐ ܕܰܟܣܶܐ ܒܓܰܪ̈ܡܶܐ ܠܡܺܝ̈ܬܶܐ ܡܒܰܝܰܐ ܗ̱ܘܳܐ ܡܰܘܬܳܐ ܚܙܳܐ ܠܡܺܝܬܶܐ ܕܰܪܚܶܫ ܘܶܐܣܬܰܪܰܕ ܡܰܢܽܘ ܚܼܙܳܐ ܚܶܙܘܳܐ ܕܦܶܠܳܐܬܳܐ ܕܡܺܝܬܳܐ ܡܶܢ ܦܽܘܡ ܡܰܘܬܳܐ ܫܠܰܕܶܐ ܚܛܰܦ ܘܰܐܚܺܝ ܩܒܺܝܪܳܐ ܠܩܳܒܽܘܪ̈ܰܘܗ̱ܝ ܠܒܰܝܬܳܐ ܡܰܠܘܳܐ ܗ̱ܘܳܐ 5 ܡܶܫܰܬ ܫܝܽܘܠ ܓܰܙܳܗ̇ ܐܰܘܨܪ̈ܶܐ ܕܟܽܠ ܦܰܓܪ̈ܰܝܢ ܬܰܪ̈ܥܶܝܗ̇ ܘܳܐܦ ܡܽܘܟܠܶܝ̈ܗ̇ ܫܪܪܬ ܘܶܐܬܬܰܟܠܰܬ ܠܳܐ ܓܶܝܪ ܚܙܳܬ ܡܶܢ ܡܬܽܘܡ ܓܰܪܡܳܐ ܕܰܪܚܶܫ ܗ̱ܘܳܐ ܩܳܠܶܗ ܕܚܰܙܩܺܝܐܶܝܠ ܐܬܘܗܗ̇ ܓܰܪ̈ܡܶܐ ܪܚܰܫܘ̱ ܘܰܒܥܰܘ̱ ܚܰܕ ܠܚܰܕ ܘܶܐܬܪܰܟܰܒܘ̱ ܒܪܽܘܟܒܗܽܘܢ ܥܶܦܰܬ ܗܺܝ ܫܝܽܘܠ ܘܶܐܫܬܰܪܝܰܬ ܀܀܀ 6 ܡܰܘܬܳܐ ܡܶܢ ܩܳܠ ܓܰܪ̈ܡܶܐ ܒܢܶܩ̈ܥܰܘܗ̱ܝ ܥܪܰܩ ܘܰܛܫܳܐ ܐܶܬܟܪܶܗ ܡܶܛܽܠ ܡܺܝ̈ܬܶܐ ܣܒܰܪ ܗ̱ܘܳܐ ܕܰܐܘܦܺܝ ܠܶܗ ܩܼܪܳܐ ܦܰܩܕܳܗ̇ ܠܰܫܝܽܘܠ ܘܰܐܘܪܬܳܗ̇ ܦܣܰܩ ܣܰܒܪܳܐ ܐܰܨܰܚ ܕܺܝܬܩܳܐ ܒܙܰܘܰܥܬܶܗ ܐܰܘܕܺܝ ܕܥܳܒܽܘܪܰܐ ܗ̱ܘ ܘܰܐܟܬܶܒ ܕܡܶܣܟܺܢܰܐ ܗ̱ܘ ܕܰܥܬܺܝܕ ܕܓܽܘܥܠܳܢܳܐ ܢܶܦܢܶܐ ܠܝܳܗܽܘܒܶܗ 7 ܡܺܝ̈ܬܶܐ ܠܚܰܝ̈ܶܐ ܩܳܡܘ̱ ܩܒܺܝܪ̈ܶܐ ܠܰܩܒܽܘܪ̈ܶܐ ܪ̈ܡܰܝܳܐ ܠܗ̈ܶܠܟܶܐ ܫܠܰܝ̈ܳܐ ܠܡ̈ܰܠܳܠܶܐ ܕܰܘܺܝܕ ܠܚܶܙܰܩܝܳܐ ܒܩܰܒܪܶܗ ܢܼܛܰܪ ܟܰܪܟܶܗ ܘܓܰܪ̈ܡܶܐ ܠܝܽܘܫܺܝܳܐ ܐܰܦܺܝܣܘ̱ ܗ̱ܘܰܘ ܘܠܳܐ ܩܰܪܶܒܘ̱ ܠܗܰܘ ܣܳܒܳܐ ܒܓܰܪ̈ܡܶܐ ܢܛܰܪܘ̱ ܓܰܪ̈ܡܰܘܗ̱ܝ ܕܰܢܟܼܰܠ ܩܼܛܰܠ ܘܰܩܒܼܰܪ ܘܗܰܝܡܶܢ ܛܦܰܣ ܘܰܦܠܰܛ 8 ܐܶܢ ܓܶܝܪ ܗܰܘ ܣܳܒܳܐ ܐܰܛܥܺܝܗ ܠܬܰܡܺܝܡܳܐ ܘܗܰܝܡܶܢ ܕܡܳܐ ܕܰܣܼܛܳܐ ܡܶܬܩܛܰܠ ܘܦܳܠܶܛ ܒܶܗ ܬܶܡܗܰܐ ܗ̱ܘ ܕܟܰܕ ܩܰܛܠܶܗ ܗܰܝܡܶܢ ܕܢܶܛܦܽܘܣ ܒܶܗ ܡܰܢܽܘ ܚܼܙܳܐ ܬܶܗܪܳܐ ܒܓܰܘ ܫܝܽܘܠ ܩܛܺܝܠܳܐ ܠܩܳܛܽܘܠܶܗ ܀܀܀ ܒܩܰܒܪܳܐ ܡܢܰܛܰܪ ܗ̱ܘܳܐ ܟܡܳܐ ܢܶܛܪܽܘܢ ܐܰܚ̈ܰܝ ܩܛܺܝ̈ܠܶܐ ܕܒܰܡܫܺܝܚܳܐ 9 ܬܽܘܒ ܣܳܡ ܐܶܠܺܝܫܰܥ ܐܺܝܕ̈ܰܘܗ̱ܝ ܟܪ̈ܺܝܗܳܬܳܐ ܥܰܠ ܐܺܝܕ̈ܶܐ ܚܠܺܝ̈ܡܳܬܳܐ ܕܡܰܠܟܳܐ ܕܰܢܚܶܬ ܣܰܥܪܶܗ ܚܰܝܠܳܐ ܩܢ̈ܰܝ ܘܰܫܕ̈ܰܝ ܓܶܐܪܳܐ ܕܦܽܘܪܩܳܢܳܐ ܠܡܶܬܗܰܪ ܒܟܽܘܪܗܳܢܳܐ ܕܟܶܫܪ̈ܶܐ ܕܢܶܒܥܶܐ ܗܽܘ ܕܚܽܘܠܡܳܢܳܐ ܠܦܰܓܪܳܐ ܕܣܳܥܽܘܪ̈ܰܘܗ̱ܝ ܠܣܽܘܥܪܳܢܗܽܘܢ ܐܰܫܘܳܢܝ̱ ܣܳܥܰܪ ܠܣܳܥܽܘܪ̈ܰܘܗ̱ܝ 10 ܟܽܘܪܗܳܢܗܽܘܢ ܗܳܟܺܝܠ ܠܡ̈ܰܠܟܶܐ ܝܰܗ̱ܒ ܚܰܝܠܳܐ ܬܠܳܬܳܐ ܫܡܳܗܰܝ̈ܗܽܘܢ ܠܫܶܬܡܳܐܐ ܐܰܠܦܺܝ̈ܢ ܥܰܕܰܪܘ̱ ܒܥܶܠܕܰܪܝ̱ ܣܳܛܳܢܳܐ ܒܗܽܘܢ ܢܶܣܬܟܰܪ ܦܽܘܡܶܗ ܕܣܢܺܐܓܪ̈ܰܝ ܛܳܒܺܝ̈ܢ ܘܡܰܚܨܦܺܝܢ ܡܠܺܝ̈ܠܺܝܢ ܘܣܰܓܺܝ̈ܐܺܝܢ ܘܰܡܨܶܝܢ ܕܒܶܝܬ ܕܺܝܢܼܳܐ ܢܫܰܗܽܘܢ ܒܥܶܠ ܕܺܝܢܼܳܐ ܘܢܺܚܽܘܢ ܠܚܰܝܳܒܳܐ 11 ܢܶܬܗܰܪ ܒܗܽܘܢ ܐܰܚ̈ܰܝ ܕܗܽܘ ܙܰܝܢܗܽܘܢ ܫܶܬܩܰܐ ܗ̱ܘ ܒܫܶܬܩܰܐ ܗ̱ܘ ܡܦܺܝܣܺܝܢ ܠܶܗ ܠܫܳܡܰܥ ܠܫܰܬܺܝܩ̈ܶܐ ܫܶܬܩܳܐ ܕܦܽܘܪܫܳܢܳܐ ܨܠܽܘܬܰܐ ܗ̱ܘ ܠܝܳܕܰܥ ܟܽܘܠ ܒܩܰܠܺܝܠ ܡܶܬܰܐܓܪܺܝܢ ܣܢܺܐܓܪ̈ܰܝ ܘܰܣܓܺܝ ܗܽܘ ܡܶܫܬܰܚܩܺܝܢ ܒܒܶܟܝܳܐ ܫܚܺܝܕܺܝܢ ܠܺܝ ܒܕܶܡ̈ܥܶܐ ܐܰܓܺܝܪܺܝܢ ܠܺܝ ܕܐܫܶܦܥܶܬ ܥܰܠ ܩܰܒܪ̈ܰܝܗܽܘܢ 12 ܢܶܪܗܰܛ ܠܩܰܒܪ̈ܰܝܗܽܘܢ ܕܢܺܚܶܐ ܒܡ̈ܰܘܬܰܝܗܽܘܢ ܓܰܪ̈ܡܰܘܗ̱ܝ ܕܶܐܠܺܝܫܰܥ ܣܳܗܕܺܝܢ ܠܓܰܪ̈ܡܰܝܗܽܘܢ ܕܚܰܝ̈ܶܐ ܝܰܗ̱ܒ ܕܰܒܗܽܘܢ ܡܰܘܬܳܐ ܕܚܶܠ ܘܺܝܠܶܦ ܘܰܫܪܺܝ ܡܝܰܩܰܪ ܗ̱ܘܳܐ ܒܓܰܘ ܫܝܽܘܠ ܠܓܰܪ̈ܡܶܐ ܕܙܰܕܺܝ̈ܩܶܐ ܕܰܢܟܶܣ ܠܟܳܦܽܘܪ̈ܶܐ ܕܠܳܐ ܚܰܫܘ̱ ܒܢܽܘܚܳܡܳܐ ܕܳܐܦ ܫܝܽܘܠ ܪܓܺܝܫܳܐ ܒܶܗ 13 ܠܳܐ ܓܶܝܪ ܐܺܝܬ ܡܶܕܶܡ ܕܡܺܝܬܰܐ ܗ̱ܘ ܠܡܰܚܶܐ ܟܽܠ ܐܶܠܳܐ ܐܶܢ ܗܰܘ ܡܰܘܬܳܐ ܕܝܰܡܳܐ ܥܠܰܘܗ̱ܝ ܘܶܐܡܰܪ ܕܠܳܐ ܐܶܨܛܒܺܝ ܡܶܡܬܽܘܡ ܒܡܰܘܬܶܗ ܕܚܰܛܳܝܳܐ ܘܟܰܕ ܟܽܠ ܠܡܳܪܳܐ ܟܽܠ ܦܫܺܝܩ ܗ̱ܽܘ ܥܛܰܠ ܗ̱ܽܘ ܠܰܡܰܚܳܝܽܘ ܡܰܘܬܳܐ ܕܚܺܐܪܽܘܬܳܐ ܕܡܺܝܬܶܐ ܒܨܶܒܝܳܢܶܗ ܡܰܘܬܳܐ ܕܒܰܚܛܳܗܶܐ 14 ܐܳܦ ܓܶܝܪ ܗܽܘ ܦܰܓܪܳܐ ܡܳܐܢܳܐ ܕܚܰܝܘܳܬܳܗ̇ ܗܺܝ ܩܛܰܠܬܶܗ ܗܘܳܬ ܒܪܺܝܫܺܝܬ ܒܦܰܪܕܰܝܣܳܐ ܕܰܫܪܳܬ ܒܫܽܘܠܛܳܢܳܗ̇ ܣܝܳܓܶܗ ܕܢܳܡܽܘܣܳܐ ܠܳܐ ܓܶܝܪ ܨܒܼܳܐ ܟܺܐܢܳܐ ܕܰܐܡܠܟܳܗ̇ ܕܢܶܥܨܳܝܗ̇ ܒܰܩܛܺܝܪܳܐ ܠܗܳܕܶܐ ܡܫܰܠܰܛܬܳܐ ܕܰܫܪܳܬ ܠܨܶܒܝܳܢܶܗ ܘܡܺܝܬܰܬ ܒܨܶܒܝܳܢܳܗ̇ 15 ܣܰܓܺܝ ܗܽܘ ܚܰܒܺܝܒܳܐ ܫܶܢܬܳܐ ܠܡܰܢ ܕܠܳܐܶܐ ܘܰܠܡܰܢ ܕܨܳܐܶܡ ܘܫܳܗܰܪ ܡܰܘܬܳܐ ܪܚܽܘܡܶܗ ܗܽܘ ܠܳܐ ܩܳܛܠܳܐ ܠܕܰܡ̈ܟܶܐ ܫܶܢܬܳܐ ܕܒܰܟܝܳܢܳܐ ܐܳܦ ܠܳܐ ܫܝܽܘܠ ܩܶܛܠܰܬ ܘܩܳܛܠܳܐ ܫܶܢܬܳܐ ܕܒܽܘܣܳܡܳܐ ܗ̱ܝ ܐܳܦ ܫܝܽܘܠ ܕܢܽܘܚܳܡܳܐ ܗ̱ܝ ܠܡܰܘܬܳܐ ܗܰܘ ܬܶܢܝܳܢܳܐ ܕܠܳܐ ܐܺܝܬ ܠܶܗ ܦܽܘܪܣܳܐ 16 ܠܳܐ ܟܺܝܡܳܐ ܡܶܢ ܡܬܽܘܡ ܫܶܢܬܳܐ ܕܥܰܪ̈ܣܳܬܳܐ ܥܰܠ ܡܰܢ ܕܢܳܡ ܘܰܕܡܼܶܟ ܕܬܽܘܒ ܡܶܬܬܥܺܝܪ ܒܰܥܓܰܠ ܐܳܦ ܠܳܐ ܫܝܽܘܠ ܟܶܡܰܬ ܐܰܘ ܟܺܝܡܳܐ ܐܰܚ̈ܰܝ ܗܳܐ ܫܶܢܬܳܐ ܠܰܫܝܽܘܠ ܡܟܰܣܶܐ ܕܨܰܦܪܳܐ ܡܥܺܝܪ ܕܰܡ̈ܟܶܐ ܘܩܳܠܳܐ ܡܩܺܝܡ ܡܺܝ̈ܬܶܐ ܡܰܘܬܰܐ ܗ̱ܘ ܕܚܺܐܪܽܘܬܳܐ ܕܒܺܐܝܕ̈ܰܘܗ̱ܝ ܦܣܼܰܩ ܣܰܒܪܶܗ ܀܀܀ 17 ܗܳܢܳܐ ܕܗܳܐ ܟܶܐܡܰܬ ܥܛܶܠ ܗ̱ܽܘ ܠܟܺܐܢܽܘܬܶܗ ܝܰܗܒܶܗ ܒܛܰܝܒܽܘܬܶܗ ܟܰܕ ܕܰܠܺܝܠ ܠܨܶܒܝܳܢܰܢ ܕܪܽܘܚܳܐ ܚܢܰܢ ܢܺܚܶܐ ܘܦܰܓܪܳܐ ܢܢܰܚܶܡ ܗ̱ܽܘ ܕܟܰܕ ܢܶܐܟܠܺܝܘܗ̱ܝ ܪܰܚܫܳܐ ܘܚܰܝܽܘܬܳܐ ܠܰܐܪܥܰܐ ܗ̱ܘ ܡܶܬܦܢܶܝܢ ܐܰܟܺܝ̈ܠܶܐ ܘܳܐܟܽܘ̈ܠܶܐ ܘܡܶܬܦܪܶܫ ܐܰܝܟ ܕܰܒܟܽܘܪܳܐ ܥܰܦܪܗܽܘܢ ܒܢܽܘܚܳܡܳܐ 18 ܐܶܢ ܓܶܝܪ ܬܶܫܦܰܪ ܠܶܗ ܗܳܕܶܐ ܠܽܐܘܡܳܢܳܐ ܕܢܶܫܚܽܘܩ ܘܢܶܫܕܶܐ ܬܽܘܒ ܕܰܗܒܳܐ ܒܓܰܘ ܐܰܪܥܳܐ ܦܪܰܫ ܘܰܫܩܰܠ ܠܶܗ ܡܶܢܳܗ̇ ܒܓܰܘ ܟܽܘܪܳܐ ܟܡܳܐ ܟܺܝܬ ܒܳܪܽܘܝܳܐ ܢܨܰܠܠܺܝܘܗ̱ܝ ܠܦܰܓܪܐ ܒܢܽܘܚܳܡܳܐ ܒܟܽܘܪܶܗ ܡܰܦܪܶܫ ܟܽܠ ܟܰܕ ܡܓܶܝܠ ܘܫܳܕܶܐ ܠܶܗ ܠܥܰܦܪܳܐ ܕܚܰܝ̈ܘܳܬܳܐ 19 ܗܳܐ ܓܶܝܪ ܒܬܰܪܥܺܝܬܶܗ ܕܺܝܠܶܗ ܕܰܥܒܽܘܕܳܢ ܡܰܦܪܰܫ ܪܫܺܝܡ ܗ̱ܘܳܐ ܒܳܗ̇ ܥܰܦܪܶܗ ܕܒܰܪ ܐ̱ܢܳܫܳܐ ܦܪܰܫ ܫܩܼܰܠ ܥܰܦܪܶܗ ܕܳܐܕܳܡ ܘܓܰܒܠܶܗ ܗ̱ܘܳܐ ܗܳܟܰܢ ܦܪܺܝܫ ܘܰܪܫܺܝܡ ܒܡܰܕܥܶܗ ܥܰܦܪܳܗ̇ ܕܐ̱ܢܳܫܽܘܬܳܐ ܘܠܶܗ ܗܼܽܘ ܡܩܺܝܡ ܒܰܠܚܽܘܕ ܘܰܚܙܰܘ ܠܫܽܘܪܳܝܳܐ ܕܣܳܗܶܕ ܠܫܽܘܠܳܡܳܐ 20 ܢܚܳܫܳܐ ܕܥܳܒܽܘܪܰܐ ܗ̱ܘ ܦܪܺܝܫ ܗ̱ܽܘ ܒܓܰܘ ܥܰܦܪܶܗ ܘܰܩܕܳܡ ܕܢܶܫܬܰܠܰܚ ܡܶܬܚܙܶܐ ܠܽܐܘܡܳܢܶܗ ܘܶܐܢ ܦܼܢܳܐ ܢܦܼܰܠ ܒܰܐܪܥܶܗ ܕܢܺܝܚ ܗܽܘ ܒܓܰܘܳܗ̇ ܬܽܘܒ ܟܡܳܐ ܟܺܝܬ ܠܝܳܕܰܥ ܟܽܠ ܦܪܺܝܫ ܟܽܠ ܟܽܠ ܥܦܰܪ ܠܓܶܢܣ̈ܳܢܰܘܗ̱ܝ ܘܡܶܢ ܟܽܠܗܽܘܢ ܪܰܒ ܠܶܗ ܥܰܦܪܶܗ ܕܒܰܪܢܳܫܳܐ ܕܶܐܣܛܠܰܐ ܗ̱ܘ ܕܚܰܒܺܝܒܶܗ 21 ܠܦܰܓܪܳܐ ܥܛܺܝܦ ܒܽܘܟܪܳܐ ܦܪܺܝܣܰܐ ܗ̱ܘ ܕܬܶܫܒܽܘܚܬܶܗ ܚܰܬܢܳܐ ܕܠܳܐ ܡܳܐܶܬ ܒܗܳܝ ܐܶܣܛܠܳܐ ܡܦܰܪܶܓ ܙܡ̈ܺܝܢܶܐ ܒܶܐܣܛܰܠܗܽܘܢ ܠܗܳܝ ܐܰܣܛܠܶܗ ܢܶܕܡܽܘܢ ܦܰܓܪ̈ܶܐ ܠܒܽܘܫܰܝ̈ܟܽܘܢ ܢܦܰܪܓܽܘܢ ܕܰܦܟܪܽܘܗ̱ܝ ܠܗܰܘ ܓܰܒܪܳܐ ܕܦܰܓܪܶܗ ܡܟܰܬܰܡ ܗ̱ܘܳܐ ܚܽܘܪ ܒܡܶܫܬܽܘܬܳܟ ܟܽܘܬܡ̈ܳܬܝ̱ ܒܙܰܠܺܝܩ̈ܰܝܟ 22 ܚܙܰܘ ܕܶܝܢ ܟܡܳܐ ܥܽܘܒܺܝ̈ܢ ܦܰܓܪܳܐ ܨܪܳܐ ܘܰܢܦܰܩ ܠܟܰܪܣܳܐ ܒܡܰܘܠܳܕܶܗ ܠܩܰܒܪܳܐ ܒܢܽܘܚܳܡܶܗ ܠܓܽܘܒܳܐ ܕܚܰܝ̈ܘܳܬܳܐ ܙܟܼܳܐ ܗ̱ܘܳܐ ܘܠܰܐܬܽܘܢܳܐ ܢܽܘܢܳܐ ܕܒܰܠܥܶܗ ܬܽܘܒ ܦܰܢܝܶܗ ܗܰܠܶܟ ܒܓܰܘ ܝܰܡܳܐ ܘܰܦܼܪܰܚ ܘܛܳܣ ܒܳܐܐܰܪ ܝܺܬܶܒ ܥܰܠ ܝܰܡܺܝܢܳܐ ܡܟܰܠܰܠ ܒܬܶܫܒܽܘܚܬܳܐ 23 ܡܰܢܽܘ ܕܰܚܒܰܫ ܠܶܗ ܡܰܢܽܘ ܕܶܐܣܰܪ ܠܶܗ ܐܰܝܢܰܘ ܟܰܝ ܥܽܘܒܳܐ ܕܡܶܫܟܰܚ ܡܣܰܝܒܰܪ ܠܶܗ ܐܶܢ ܗܽܘ ܕܥܰܠ ܟܰܪܣܳܐ ܠܳܐ ܚܳܣ ܕܺܝܠܶܕܬܶܗ ܒܚܶܒܠܰܘ̈ܗ̱ܝ ܬܼܪܰܥ ܘܰܢܦܰܩ ܘܰܐܪܦܝܳܗ̇ ܘܗܳܐ ܨܶܕܝܳܐ ܡܶܢܶܗ ܕܠܳܐ ܬܽܘܒ ܦܢܳܐ ܥܰܠ ܠܳܗ̇ ܟܡܳܐ ܢܶܚܪܒܶܝܗ̇ ܠܰܫܝܽܘܠ ܡܰܦܩܶܗ ܘܢܽܘܚܳܡܶܗ 24 ܠܰܡܗܰܝ̈ܡܢܶܐ ܡܰܠܶܦ ܡܰܣܩܶܗ ܕܶܐܠܺܝܳܐ ܕܰܐܟܚܰܕ ܣܠܶܩܘ̱ ܗ̱ܘܰܘ ܒܳܗ̇ ܬܪ̈ܰܝܗܽܘܢ ܒܡܰܪܟܰܒܬܳܐ ܦܰܓܪܳܐ ܐܳܦ ܢܰܦܫܳܐ ܠܗܰܘ ܡܰܥܡܪܳܐ ܕܰܠܥܶܠ ܘܰܕܠܳܐ ܫܠܰܚ ܦܰܓܪܶܗ ܫܕܳܐ ܒܕܽܘܟ ܓܰܒܪ̈ܶܐ ܕܰܢܦܼܰܩܘ̱ ܘܰܒܥܰܘ̱ ܕܠܳܐ ܐܶܫܟܚܽܘܗ̱ܝ ܐܰܠܶܦܘ̱ ܕܟܽܠܶܗ ܣܠܼܶܩ ܒܦܰܓܪ ܕܩܰܕܺܝܫ ܗ̱ܘܳܐ ܒܦܰܓܪ 25 ܘܳܐܦ ܗܼܽܘ ܥܰܦܪܶܗ ܬܽܘܒ ܡܰܠܶܦ ܕܶܐܠܺܝܳܐ ܕܶܐܬܦܪܶܫ ܘܦܳܫ ܡܶܢܶܗ ܫܐܺܝܠܳܐ ܘܥܳܒܽܘܪܳܐ ܘܶܐܬܟܣܶܣ ܦܼܪܰܫ ܘܰܢܦܼܰܠ ܕܺܐܝܬܰܘܗ̱ܝ ܠܒܽܘܫ ܙܰܒܢܳܐ ܕܰܢܦܺܝܣ ܥܰܠ ܦܰܓܪܳܐ ܕܶܐܬܚܛܰܦ ܕܰܗܘܳܝܶܗ ܠܒܽܘܫ ܩܽܘܫܬܳܐ ܕܰܠܘܳܐ ܠܰܠܒܽܘ̈ܫܰܘܗ̱ܝ ܥܰܦܪܳܐ ܦܼܪܰܫ ܘܰܢܦܼܰܠ ܘܦܰܓܪܳܐ ܦܼܪܰܚ ܘܰܣܼܠܶܩ 26 ܐܳܦ ܝܽܘܪܕܢܳܢ ܐܰܪܡܺܝ ܦܓܽܘ̈ܕܶܐ ܒܡܰܪܕܺܝܬܶܗ ܢܰܦܫܗܽܘܢ ܬܟܰܣܘ̱ ܡܰܝ̈ܳܐ ܚܰܕ ܠܚܰܕ ܛܥܶܢܘ̱ ܫܶܦܥܰܘ̈ܗ̱ܝ ܫܰܒܩܳܗ̇ ܠܡܰܪܕܺܝܬܶܗ ܫܪܺܝܬܳܐ ܕܒܰܟܝܳܢܶܗ ܘܰܪܕܳܐ ܕܠܳܐ ܟܝܳܢܶܗ ܠܒܶܣܬܪܶܗ ܕܰܢܦܺܝܣ ܟܰܕ ܣܳܒܶܟ ܘܣܳܠܶܩ ܒܦܽܘܩܕܳܢܳܐ ܕܦܰܓܪܳܐ ܒܢܰܨ̈ܺܝܚܶܐ ܠܪܰܘܡܳܐ ܦܼܳܪܚܳܐ ܘܰܣܼܠܶܩ 27 ܐܶܢ ܕܶܝܢ ܥܼܛܰܠ ܕܰܢܩܽܘܡ ܦܰܓܪܶܗ ܕܢܽܘܚ ܕܰܒܠܺܝ ܣܰܓܺܝ ܥܣܶܩ ܕܰܚܢܽܘܟ ܕܠܳܐ ܐܶܫܬܪܺܝ ܦܰܓܪܶܗ ܕܡܺܝ̈ܬܶܐ ܒܐ̱ܪܳܙ ܚܰܢܽܘܟ ܐܰܠܦܰܢ ܕܚܰܝܰܝܢ ܠܶܗ ܒܡܽܘܫܶܐ ܘܒܶܐܠܺܝܳܐ ܕܶܐܬܚܙܺܝܘ ܐܰܟܶܣ ܠܟܳܦܽܘܪ̈ܶܐ ܕܚܰܝܰܝ̈ܢ ܕܡܶܬܩܰܒܪܺܝܢ ܘܦܳܪܚܺܝܢ ܕܡܶܫܬܰܚܪܺܝܢ ܐܰܫܘܳܢܝ̱ ܠܡܶܐܬܺܝܬܳܟ [ܫܠܶܡ]