Ephrem the Syrian. “Nisibis 45.” Digital Syriac Corpus. Last modified June 12, 2019. https://syriaccorpus.org/299. Nisibis XLV ܓ ܒܰܪ ܩܳܠܶܗ 1 ܐܶܢ ܐܳܟܠܳܐ ܢܰܦܫܳܐ ܘܨܰܝܳܡܳܐ ܘܡܶܬܦܰܪܥܳܐ ܙܳܕܶܩ ܕܳܐܦ ܦܰܓܪܳܐ ܢܶܬܦܪܰܥ ܕܨܳܡ ܥܰܡܳܗ̇ ܘܶܐܢ ܗܽܘ ܕܺܝܕܺܝܥܳܐ ܗ̱ܝ ܕܦܰܓܪܰܐ ܗ̱ܘ ܐܶܟܰܠ ܘܳܐܦ ܨܳܡ ܡܰܟܶܣ ܠܛܳܥܰܝ̈ܳܐ ܟܡܳܐ ܛܥܰܘ ܕܢܰܦܫܳܐ ܕܠܳܐ ܨܳܡܶܬ ܗܺܝ ܬܶܣܒܺܝܘܗ̱ܝ ܠܰܐܓܪܳܐ ܘܢܶܗܘܶܐ ܕܠܳܐ ܐܰܓܪܳܐ ܦܰܓܪܳܐ ܕܨܳܡ ܘܰܠܐܺܝ ܥܽܘܢܺܝܬܳܐ: ܢܩܰܒܶܠ ܒܢܽܘܚܳܡܳܟ ܦܰܓܪܳܐ ܠܒܰܪ̱ܬ ܙܰܘܓܶܗ 2 ܐܰܠܺܝܨܳܐ ܗ̱ܝ ܠܰܡ ܐܳܦ ܗܺܝ ܒܨܰܘܡ̈ܰܘܗ̱ܝ ܘܒܽܐܘܠܨ̈ܳܢܰܘܗ̱ܝ ܘܶܐܢ ܠܳܗ̇ ܛܶܐܒܽܘ ܚ̈ܰܫܶܐ ܫܐܺܝ̈ܠܶܐ ܕܡܶܢ ܨܶܐܕܰܘܗ̱ܝ ܟܡܳܐ ܟܺܝܬ ܢܺܚܰܐ ܗ̱ܘ ܒܢ̈ܶܓܕܶܐ ܕܗܰܕܳܡ̈ܰܘܗ̱ܝ ܗܳܝ ܓܶܝܪ ܥܰܘܠܳܐ ܗ̱ܝ ܠܡܰܫܡܥܳܗ̇ ܕܶܐܢ ܗܽܘ ܕܗܺܝ ܝܶܪܒܰܬ ܒܗܰܘܦܳܐ ܕܢܶܨ̈ܚܳܢܰܘܗ̱ܝ ܟܡܳܐ ܟܺܝܬ ܢܺܐܪܰܒ ܗ̱ܽܘ ܒܰܐܓܪܳܐ ܕܡܰܪ̈ܗܳܛܰܘܗ̱ܝ 3 ܣܰܢܝܳܐ ܗ̱ܝ ܕܗܰܘ ܥܡܰܠ ܘܗܺܝ ܢܳܣܒܳܐ ܐܰܓܪܳܐ ܣܰܢܝܳܐ ܗ̱ܝ ܕܠܶܗ ܢܽܘܪܳܐ ܘܠܳܗ̇ ܡܰܘܕܝܳܢܽܘܬܳܐ ܣܰܟܠܳܐ ܗ̱ܝ ܕܠܶܗ ܣܰܝܦܳܐ ܘܠܳܗ̇ ܬܽܘܒ ܟܠܺܝܠ ܚ̈ܰܝܶܐ ܗܳܢܳܐ ܩܛܺܝܠ ܡܶܛܽܠ ܒܶܪܝܶܗ ܚܰܝ̈ܰܘܗ̱ܝ ܬܢܳܢ ܐܰܘܒܶܕ ܘܢܽܘܚܳܡܬܶܗ ܕܰܠܗܰܠ ܐܰܘ ܡܳܐ ܦܬܺܝܠ ܟܽܠܶܗ ܫܰܪܒܗܽܘܢ ܕܛܳܥ̈ܰܝܳܐ 4 ܕܦܰܓܪܰܐ ܗ̱ܘ ܓܶܝܪ ܟܰܦܢܳܐ ܫܰܗܪܳܐ ܘܳܐܦ ܨܰܗܝܳܐ ܡܠܽܘܐܳܐ ܕܒܶܠܥܳܕܰܘܗ̱ܝ ܠܳܐ ܥܳܬܪܳܐ ܢܰܦܫܳܐ ܛܠܰܡܬܶܗ ܠܬܰܓܳܪܳܐ ܩܰܪܢܳܐ ܘܰܪܒܺܝܬܳܐ ܕܗܳܐ ܥܳܬܪܳܐ ܒܝܽܘܬܪܳܢ ܟܰܟܪ̈ܰܘܗ̱ܝ ܘܰܚܠܳܦ ܝܽܘܬܪ̈ܳܢܰܘܗ̱ܝ ܫܛܳܪܳܐ ܕܚܰܘܒ̈ܳܬܳܐ ܟܬܰܒܘ̱ ܒܳܬܪܶܗ ܣ̈ܰܟܠܶܐ ܕܥܰܒܕܽܘܗ̱ܝ ܕܠܳܐ ܢܽܘܚܳܡ 5 ܥܰܘܠܰܐ ܗ̱ܘ ܕܗܰܘ ܟܦܶܢ ܘܡܶܫܬܰܒܗܪܳܐ ܒܨܰܘܡܶܗ ܥܽܘܠܰܐ ܗ̱ܘ ܕܗܰܘ ܨܐܺܝܦ ܘܡܶܬܩܰܠܣܳܐ ܒܨܶܗܝܶܗ ܐܰܓܰܪ ܦܳܥ̈ܠܰܘܗ̱ܝ ܫܶܩܠܰܬ ܘܠܶܗ ܫܶܡܪܰܬ ܫܶܒܩܰܬ ܘܰܐܝܟ ܕܳܐܡܪܺܝܢ ܒܢܽܘܪܰܐ ܗ̱ܘ ܡܶܬܦܪܶܫ ܛܰܠܡܽܘܗ̱ܝ ܠܰܐܟܳܪܳܐ ܕܢܰܫܶܦܘ̱ ܫܩܰܠܘ̱ ܙܰܪ̈ܥܰܘܗ̱ܝ ܘܠܶܗ ܐܰܘܪܬܰܘܗ̱ܝ ܥܽܘܪܳܐ ܘܬܶܒܢܶܐ ܕܢܺܐܩܰܕ ܒܶܗ 6 ܟܺܐܢܳܐ ܗ̱ܝ ܕܗܽܘ ܒܫܽܘܒܚܳܐ ܘܳܐܦ ܗܺܝ ܒܬܶܫܒܽܘܚܬܳܐ ܟܺܐܢܳܐ ܗ̱ܝ ܕܗܽܘ ܒܚ̈ܰܝܶܐ ܘܳܐܦ ܗܺܝ ܒܚܰܝܽܘܬܳܐ ܟܺܐܢܳܐ ܗ̱ܝ ܕܗܽܘ ܒܥܶܕܳܢ ܐܳܦ ܗܺܝ ܒܦܰܪܕܰܝܣܳܐ ܗܳܝ ܓܶܝܪ ܥܰܘܠܳܐ ܗ̱ܝ ܕܳܐܡܪܺܝܢ ܕܦܠܓܶܗ ܕܒܰܪ ܐ̱ܢܳܫܳܐ ܢܺܚܳܐ ܒܡܰܠܟܽܘܬܳܐ ܘܦܰܠܓܶܗ ܕܠܳܐ ܣܟܰܠܘ̱ ܢܶܫܬܕܶܐ ܠܫܽܘܢܳܩܳܐ ܀܀܀ 7 ܥܘܺܝܪܺܝܢ ܒ̈ܢܰܝ ܛܽܘܥܝܰܝ ܠܰܡܚܳܪ ܒܺܐܝܓܽܘܢܳܐ ܕܶܐܢ ܗܽܘ ܕܙܳܟܽܘܬܳܐ ܗ̱ܝ ܩܪܰܐܘܳܗ̇ ܒܫܶܡ ܢܰܦܫܳܐ ܘܶܐܢ ܗܽܘ ܕܟܽܘܐܳܪܰܐ ܗ̱ܘ ܬܰܠܐܽܘܗ̱ܝ ܒܫܶܡ ܦܰܓܪܳܐ ܘܳܐܦ ܠܳܐ ܐܰܝܟ ܚ̈ܰܙܳܝܶܐ ܕܥܳܠܡܳܐ ܕܒܰܙܒܰܢ ܠܕܳܒܽܘܪܳܐ ܡܰܘܪܒܺܝܢ ܕܡܰܪܟܰܒܬܳܐ ܘܒܰܙܒܰܢ ܠܪ̈ܶܟܫܳܐ ܬܽܘܒ ܡܰܘܪܒܺܝܢ ܕܶܐܬܢܰܨܰܚܘ̱ 8 ܐܶܢ ܗܽܘ ܕܡܰܢ ܐܺܝܬܝ̈ܳܐ ܗ̱ܝ ܫ̈ܦܰܝܳܐ ܘܫܰܦܺܝܪ̈ܶܐ ܦܰܓܪܰܐ ܗ̱ܘ ܣܢܶܐ ܡܳܕܶܝܢ ܘܠܳܐܶܐ ܕܢܶܨܛܒܰܬ ܐܶܢ ܐܶܣܬܢܺܝ ܘܳܝ ܠܶܗ ܘܶܐܢ ܫܦܰܪ ܬܪ̈ܶܝܢ ܘܳܝ̈ܝܳܢ ܘܟܰܕ ܗܽܘ ܛܥܶܝܢ ܝܽܘܩܪܳܐ ܕܪܶܓܬܳܐ ܕܢܰܦܫܳܐ ܗ̱ܝ ܒܬܽܘܠܽܘܬܳܐ ܘܰܐܓܪܳܐ ܕܢܰܟܦܽܘܬܳܐ ܐܺܬܝܳܐ ܘܪܳܡ ܩܳܠܳܗ̇ ܒܰܚܕܰܥܣܰܪ ܫ̈ܳܥܺܝܢ 9 ܘܶܐܢ ܗܽܘ ܕܕܺܝܠܳܗ̇ ܗܺܝ ܪܶܓܬܳܐ ܘܝܰܥܢܽܘܬܳܐ ܦܰܓܪܳܐ ܩܒܺܝܠ ܡܶܢܳܗ̇ ܕܶܐܬܚܢܶܩ ܒܣ̈ܰܢܝܳܬܳܗ̇ ܐܶܢ ܟܺܝܬ ܗܺܝ ܫܓܺܝܫܳܐ ܦܰܚܙܳܐ ܘܙܰܠܺܝܠܳܐ ܠܡܳܐ ܐܶܬܥܰܫܰܩ ܦܰܓܪܳܐ ܒܪܶܓܬܳܗ̇ ܀܀܀ ܝܰܘܣܶܦ ܥܫܺܝܩ ܘܰܫܠܶܐ ܘܩܳܠ ܡܳܪܬܶܗ ܥܰܙܺܝܙ ܠܢܳܒܽܘܬ ܡܼܛܳܐ ܝܰܓܪܳܐ ܘܠܺܐܝܙܒܶܠ ܟܰܪܡܳܐ 10 ܘܰܐܝܟܰܢ ܡܼܨܶܐ ܦܰܓܪܳܐ ܡܶܬܫܺܝܓ ܒܟܽܠ ܦܽܘܪ̈ܣܺܝܢ ܐܶܢ ܗܽܘ ܕܰܡܦܰܠܦܶܠ ܗܽܘ ܒܬܶܛܪܳܐ ܕܺܐܝܬܽܘܬܶܗ ܘܰܐܝܟܰܢ ܕܠܰܚ ܫܰܦܝܳܐ ܟܝܳܢܳܗ̇ ܕܗܳܝ ܢܰܦܫܳܐ ܠܳܐ ܓܶܝܪ ܡܨܶܐ ܦܰܓܪܳܐ ܕܢܶܕܠܚܶܝܗ̇ ܕܠܳܐ ܡܶܬܕܰܠܰܚ ܢܽܘܗܪܳܐ ܡܶܢܗܽܘܢ ܕܛܶܠܳـ̈ܠܶܐ ܐܶܠܳܐ ܕܰܡܪܰܩ ܠܶܗ ܒܕܶܢܚܶܗ ܠܛܶܠܳܠܳܐ 11 ܣܰܟ̈ܠܶܐ ܕܗܳܦܟܳܝܺܝܢ ܗܦܰܟܽܘܗ̇ ܠܫܽܘܥܺܝܬܳܐ ܕܚܶܫܟܰܐ ܗ̱ܘ ܠܰܡ ܐܰܚܨܶܦ ܘܕܰܠܚܶܗ ܠܢܰܗܺܝܪܳܐ ܦܫܺܝܩܳܐ ܗ̱ܝ ܕܢܶܬܟܰܣܣܽܘܢ ܡܶܢ ܣܳܗ̈ܕܶܐ ܕܐܰܝܬܺܝܘ ܬܪ̈ܰܝܗܽܘܢ ܓܶܝܪ ܥܰܡܰܢ ܡܗܰܠܟܺܝܢ ܘܠܳܐ ܡܶܨܛܒܰܥ ܡܶܡܬܽܘܡ ܢܽܘܗܪܳܐ ܒܚܶܫܽܘܟܳܐ ܐܶܠܳܐ ܕܨܳܒܰܥ ܠܶܗ ܒܕܶܢܚܶܗ ܠܽܐܘܟܳܡܳܐ 12 ܚܕܳܐ ܗ̱ܝ ܓܶܝܪ ܡܶܢ ܬܰܪ̈ܬܶܝܢ ܢܶܓܒܽܘܢ ܒ̈ܢܰܝ ܛܽܘܥܝܰܝ ܕܶܐܠܳܐ ܡܨܶܐ ܦܰܓܪܳܐ ܀܀܀ ܕܢܶܫܦܰܪ ܘܢܶܬܚܰܠܶܠ ܚܢܺܝܩܳܐ ܗ̱ܝ ܒܰܣܝܳܢܶܗ ܢܰܦܫܳܐ ܕܫܳܪܝܳܐ ܒܶܗ ܘܺܐܝܩܺܐ ܗܽܘ ܡܶܫܬܰܚܩܳܐ ܕܬܶܬܡܪܶܩ ܘܶܐܢ ܕܶܝܢ ܗܽܘ ܦܰܓܪܳܐ ܟܝܳܢܰܐ ܗ̱ܘ ܕܡܶܫܬܰܦܶܐ ܒܺܝܫܳܐ ܕܠܰܚ ܐܶܢܽܘܢ ܕܥܰܒܕܽܘܗ̱ܝ ܕܠܳܐ ܢܽܘܚܳܡ 13 ܢܫܰܐܶܠ ܠܟܳܦܽܘܪ̈ܶܐ ܕܡܶܕܶܡ ܕܡܺܝܬܳܐ ܗ̱ܘܳܐ ܡܰܢܽܘ ܪܟܶܒ ܗ̱ܘܳܐ ܥܶܠܬܳܐ ܠܚܰܝܽܘܬܶܗ ܒܗܳܝ ܥܶܠܬܳܐ ܕܚܰܝܳܐ ܡܨܶܐ ܗ̱ܘܳܐ ܕܢܺܚܳܐ ܒܳܗ̇ ܘܶܐܢ ܕܶܝܢ ܕܫܳܪܽܘܬܶܝܢ ܐܰܚܝܶܗ ܝܰܬܺܝܪ ܡܢܰܚܶܡ ܠܶܗ ܕܰܐܛܥܶܡ ܒܚܰܝܽܘܬܳܐ ܢܶܒܗܬܽܘܢ ܒܥ̈ܶܛܳܠܳܬܳܐ ܟܳܦܪ̈ܰܝ ܒܰܕܦܫ̈ܺܝܩܳܢ 14 ܗܰܘ ܕܰܐܚܝܶܗ ܩܰܠܺܝܠ ܠܳܐ ܡܚܺܝܠ ܕܳܐܦ ܣܰܓܺܝ ܘܕܰܩܪܳܝܗ̱ܝ ܡܶܢ ܩܰܒܪܳܐ ܠܳܐ ܠܐܺܝ ܕܬܽܘܒ ܢܶܩܪܶܝܘܗ̱ܝ ܘܰܕܛܳܒ ܒܬܽܘܩܳܢܶܗ ܟܡܳܐ ܟܐܺܝܢ ܒܢܽܘܚܳܡܶܗ ܕܶܐܢ ܐܰܚܝܶܗ ܡܰܓܳܢ ܡܶܢ ܩܕܺܝܡ ܟܡܳܐ ܟܰܝ ܡܢܰܚܶܡ ܠܶܗ ܟܺܐܢܳܐ ܕܦܳܪܰܥ ܠܶܗ ܐܶܬܟܣܶܣܘ̱ ܒܛܰܝܒܽܘܬܳܐ ܓܰܠـ̈ܙܰܝ ܠܟܺܐܢܽܘܬܳܐ ܀܀܀ 15 ܐܶܢ ܕܶܝܢ ܗܰܘ ܦܰܓܪܳܐ ܟܝܳܢܰܐ ܗ̱ܘ ܕܠܳܐ ܡܶܫܟܰܚ ܕܢܺܐܬܶܐ ܠܢܽܘܚܳܡܳܐ ܢܫܰܐܶܠ ܩܕܳܡ ܗܳܕܶܐ ܕܰܐܝܟܰܢ ܗ̱ܘܳܐ ܦܽܘܪܣܳܐ ܕܢܺܚܳܐ ܒܝܰܕ ܢܰܦܫܳܐ ܗܰܘ ܓܶܝܪ ܨܶܒܝܳܢܳܐ ܕܰܐܚܝܶܗ ܐܰܝܟܰܢ ܣܦܰܩ ܐܰܚܺܝ ܠܡܶܕܶܡ ܕܠܳܐ ܚܝܳܐ ܐܶܙܕܰܟܺܝܘ ܒܚܰܝܽܘܬܶܗ ܟܳܦܪ̈ܰܝ ܒܢܽܘܚܳܡܶܗ 16 ܐܳܦ ܗܰܘ ܓܰܝܳܣܳܐ ܕܰܐܪܓܶܫ ܒܰܣܺܝܡ̈ܳܬܳܟ ܣܢܺܐܓܪܳܐ ܗܳܘܶܐ ܗ̱ܘܳܐ ܠܶܗ ܠܫܶܬܩܳܟ ܡܰܙܟܶܐ ܟܽܠ ܘܰܥܬܰܪ ܒܝܰܡܺܝܢܳܐ ܕܰܐܟܣܳܗ̇ ܠܣܶܡܳܠܳܐ ܚܽܘܢ ܡܳܪܝ̱ ܠܚܰܛܳܝܽܘܬܝ̱ ܕܗܰܡܢܶܬ ܘܰܐܟܣܶܬ ܠܟܳܦܽܘܪ̈ܶܐ ܩ̈ܳܝܡܰܝ ܒܣܶܡܳܠܳܐ ܗܳܢܰܘ ܐܰܓܰܪ ܡ̈ܶܠܰܝ ܕܠܳܐ ܬܶܬܒܥܰܢܝ̱ ܚܽܘܒܝ