Ephrem the Syrian. “Nisibis 48.” Digital Syriac Corpus. Last modified June 12, 2019. https://syriaccorpus.org/302. Nisibis XLVIII ܘ ܒܰܪ ܩܳܠܶܗ 1 ܐܰܦܪܰܥ ܘܐܬܶܥܰܠܰܡ ܫܰܒܛܶܗ ܕܠܶܘܳܝܳܐ ܕܨܶܒܝܳܢ ܥܶܠܳܝܳܐ ܢܰܚܡܶܗ ܕܢܳܟܶܣ ܒܶܗ ܐ̱ܪܳܙܳܐ ܕܢܽܘܚܳܡܳܐ ܠܚܶܫ ܠܰܢ ܒܫܰܠܝܽܘܬܶܗ ܦܺܐܪ̈ܶܐ ܐܳܦ ܛܰܪ̈ܦܶܐ ܠܒܶܫ ܗܘܳܐ ܒܦܶܪ̈ܥܰܘܗܝ ܡܝܰܒܶܒ ܗܘܳܐ ܕܠܰܐܗܪܽܘܢ ܐܙܶܕܰܕܰܩܘ ܠܒܽܘ̈ܫܶܐ ܕܟܽܘܡܪܽܘܬܳܐ ܀܀܀ ܙܶܕܩ̈ܶܐ ܕܬܶܫܡܫܬܳܐ ܥܽܘܢܺܝܬܳܐ: ܬܒܰܥ ܡܳܪܝ ܛܠܺܝܡܽܘܬܶܗ ܕܦܰܓܪܳܐ ܒܢܽܘܚܳܡܳܟ 2 ܥܰܠܘ ܐܶܬܐܣܺܝܡܘ ܫ̈ܰܒܛܶܐ ܟܽܠܗܽܘܢ ܒܐ̱ܪܳܙ ܦܰܓܪܳܐ ܘܟܰܕ ܢܦܰܩܘ ܘܐܶܬܦܪܶܫܘ ܚܰܕ ܗܽܘ ܡܟܰܠܶܠ ܗܘܳܐ ܘܟܽܠܗܽܘܢ ܫܠܺܝܚܺܝܢ ܗܘܰܘ ܘܚܶܣܕܳܐ ܛܥܺܝܢܺܝܢ ܗܘܰܘ ܒܫܰܒܛܳܐ ܚܙܰܝ ܐ̱ܪܳܙܳܐ ܕܚܰܪܬܳܐ ܕܦܰܓܪ̈ܶܐ ܕܙܰܢܳܝ̈ܶܐ ܩܳܝܡܺܝܢ ܒܟܽܘܐܳܪܳܐ ܘܰܡܦܰܪܶܓ ܒܬܶܫܒܽܘܚܬܳܐ ܦܰܓܪܽܗܘܢ ܕܩܰܕܺܝܫ̈ܶܐ 3 ܗܽܘ ܕܶܝܢ ܗܰܘ ܫܰܒܛܳܐ ܐܶܬܣܺܝܡ ܒܐܪܽܘܢܳܐ ܘܰܟܡܳܐ ܕܬܰܡܳܢ ܗܘܳܐ ܡܗܰܒܶܒ ܘܪܳܘܶܙ ܗܘܳܐ ܪܳܐܙܰܐ ܗ̱ܘ ܕܦܰܪܕܰܝܣܳܐ ܕܒܶܗ ܪܳܘܙܺܝܢ ܦܰܓܪ̈ܶܐ ܡܢܢܳܐ ܢܦܺܝܣ ܥܠܰܘܗܝ ܕܠܳܐ ܚܳܡܝ ܕܟܰܕ ܗܽܘ ܒܓܰܘ ܩܶܣܛܳܐ ܠܳܐ ܣܪܺܝ ܕܰܣܪܳܐ ܗܘܳܐ ܐ̱ܪܳܙܰܐ ܗ̱ܘ ܕܡܳܝܽܘ̈ܬܶܐ ܕܠܳܐ ܡܰܝܬܶܝܢ ܒܰܥܕܶܢ 4 ܚܽܘܛܪܶܗ ܕܒܰܪ ܥܰܡܪܰܡ ܥܰܝ̈ܢܶܐ ܩܢܳܐ ܡܶܢ ܫܶܠܝ ܘܐܶܢ ܗܰܘ ܕܠܳܐ ܟܝܳܢܶܗ ܩܢܳܐ ܨܽܘܪܬܳܐ ܘܚ̈ܰܝܶܐ ܀܀܀ ܦܰܓܪܳܐ ܟܡܳܐ ܬܶܫܦܰܪ ܨܽܘܪܬܳܐ ܕܒܰܟܝܳܢܶܗ ܚܽܘܛܪܳܐ ܚܰܝܳܐ ܘܰܪܚܶܫ ܒܡܶܠܬܳܐ ܘܐܶܢܗܽܘ ܕܠܳܐ ܥܝܳܕܶܗ ܩܢܳܐ ܗܘܳܐ ܕܠܳܐ ܕܺܝܠܶܗ ܦܰܓܪܳܐ ܟܡܳܐ ܢܶܦܢܶܐ ܠܕܺܝܠܶܗ ܒܢܽܘܚܳܡܳܐ 5 ܡܽܘܫܶܐ ܢܛܰܪ ܓܰܪ̈ܡܶܐ ܘܰܬܒܰܪ ܫܕܳܐ ܠܽܘ̈ܚܶܐ ܝܰܬܺܝܪ ܡܶܢ ܠܽܘ̈ܚܶܐ ܫܠܰܕܳܐ ܡܙܰܝܰܚ ܗܘܳܐ ܠܽܘ̈ܚܶܐ ܚܠܳܦ ܠܽܘ̈ܚܶܐ ܓܠܰܦ ܗܘܳܐ ܕܢܰܠܶܦ ܗܘܳܐ ܕܠܳܐ ܗܘܳܐ ܠܢܽܘܚܳܡܳܐ ܡܙܰܡܢܰܢ ܠܰܘ ܕܶܝܢ ܐܚܪܺܝܢ ܦܰܓܪܳܐ ܚܠܳܦ ܗܰܘ ܕܠܳܥܳܙܳܪ ܢܦܰܩ ܗܘܳܐ ܕܢܰܘܕܰܥ ܗܘܳܐ ܕܗܳܢܰܘ ܕܡܶܬܢܰܚܰܡ 6 ܐܶܢ ܐܢܳܫ ܩܰܪܶܒ ܗܘܳܐ ܠܓܰܪ̈ܡܶܐ ܒܓܰܘ ܕܰܒܪܳܐ ܟܬܰܒ ܛܰܡܐܶܗ ܡܽܘܫܶܐ ܕܠܳܐ ܛܰܡܐܽܘܗܝ ܓܰܪ̈ܡܶܐ ܐܰܪ̈ܒܥܺܝܢ ܫ̈ܢܺܝܢ ܗܰܠܶܟ ܡܺܝܬܳܐ ܒܡܰܫܪܺܝܬܳܐ ܐ̱ܪܳܙܰܐ ܗ̱ܘ ܨܳܪ ܬܰܡܳܢ ܠܥܺܕܬܳܐ ܕܒܳܗ̇ ܡܶܬܟܪܶܙ ܟܽܠܝܘܢ ܡܰܘܬܶܗ ܕܡܰܚܶܐ ܟܽܠ ܨܠܺܝܒܰܐ ܗ̱ܘ ܕܚܰܝܽܘܬܳܐ ܕܗܰܠܶܟ ܒܡܰܫܪܺܝܬܳܐ 7 ܒܨܶܒܥܳܐ ܕܨܰܝܳܪܳܐ ܀܀܀ ܘܥܽܘܬܪܳܐ ܕܣܰܡ̈ܡܳܢܶܐ ܡܶܬܬܨܺܝܪ ܨܠܶܡ ܡܰܠܟܳܐ ܘܡܶܛܽܘܠ ܕܰܒܠܳܐ ܠܶܗ ܡܶܬܚܫܶܠ ܒܐܽܘܡ̈ܳܢܶܐ ܨܰܠܡܳܐ ܕܠܳܐ ܒܳܠܶܐ ܡ̈ܰܠܟܶܐ ܠܨܰܠܡ̈ܰܝܗܽܘܢ ܡܪܰܡܪܡܺܝܢ ܡܰܢܽܘ ܚܙܳܐ ܡܰܠܟܳܐ ܕܐܶܬܡܙܰܓ ܒܓܰܘ ܨܰܠܡܶܗ ܠܒܶܫ ܝܽܘܩܢܶܗ ܝܺܬܶܒ ܕܒܶܗ ܢܶܣܬܓܶܕ ܨܰܠܡܶܗ 8 ܐܚܪܺܢܳܐ ܥܒܰܕ ܨܰܠܡܳܐ ܕܶܫܬܺܝܢ ܘܫܶܬ ܐܰܡ̈ܺܝܢ ܘܟܰܕ ܗܽܘ ܙܥܽܘܪܳܐ ܗ̱ܘܳܐ ܒܨܰܠܡܳܐ ܨܒܳܐ ܕܢܺܐܪܰܒ ܟܰܢܶܫ ܠܗܰܘ ܨܰܠܡܶܗ ܣܶܓܕܬܳܐ ܕܶܐܬܟܣܰܣܬ ܡܳܪܰܢ ܥܒܰܕ ܬܶܗܪܳܐ ܒܡܰܐܬܝܶܗ ܕܟܰܕ ܗܽܘ ܕܠܳܐ ܣܰܟܰܐ ܗ̱ܘ ܒܨܰܠܡܳܐ ܙܥܰܪ ܫܺܝܛܳܐ ܘܟܰܢܶܫ ܒܗܰܘ ܨܰܠܡܳܐ ܣܶܓܕܬܳܐ ܡܒܰܕܰܪܬܳܐ 9 ܐܳܕܳܡ ܗܦܰܟ ܠܐܰܪܥܶܗ ܘܰܥܒܰܕ ܕܝܰܬܩܺܐ ܟܬܰܒ ܚܳܒ ܠܶܗ ܣܰܓܺܝ ܠܡܰܘܬܳܐ ܘܠܰܚܛܺܝܬܳܐ ܒܰܥܒܳܪ ܦܽܘܩܕܳܢܳܐ ܛܰܒܥܶܗ ܠܡܰܫܟܢܳܐ ܡܳܪܰܢ ܐܶܬܳܐ ܦܰܪܩܶܗ ܘܢܰܚܡܶܗ ܡܰܘܬܳܐ ܗܦܰܟ ܘܰܟܬܰܒ ܘܥܶܪܒܰܬ ܫܝܽܘܠ ܥܰܡܶܗ ܀܀܀ ܕܟܽܠ ܡܳܐ ܕܒܰܙܘ̱ ܘܰܚܛܰܦܘ̱ ܢܶܦܢܽܘܢ ܒܢܽܘܚܳܡܳܐ 10 ܐܶܠܥܳܐ ܕܚܰܘܳܐ ܬܽܘܒ ܡܶܢܳܗ̇ ܘܒܳܗ̇ ܣܶܓܝܰܬ ܓܰܪܡܳܐ ܓܣܳܐ ܓܰܪ̈ܡܶܐ ܘܪ̈ܶܓܫܶܐ ܘܫܰܪ̈ܝܳܢܶܐ ܫܒܶܫܬܳܐ ܗ̱ܝ ܕܡܶܢ ܐܳܕܳܡ ܕܒܳܗ̇ ܗܽܘ ܟܣܶܐ ܫܽܘܦܪܶܗ ܕܒܰܝܬܳܐ ܕܗܳܐ ܥܰܦܪܳܗ̇ ܒܓܰܘ ܫܝܽܘܠ ܟܡܳܐ ܟܰܝ ܕܠܺܝܠܳܐ ܠܶܗ ܠܰܐܪܕܺܟܠܳܐ ܕܟܽܠܳܐ ܕܡܶܢܶܗ ܘܒܶܗ ܢܶܒܢܶܝܘܗ̱ܝ ܒܪܶܡܙܳܐ ܕܡܶܐܬܺܝܬܶܗ 11 ܡܰܘܠܕܺܝܢ ܒܓܰܘ ܡܰܝ̈ܳܐ ܢܽܘ̈ܢܶܐ ܕܠܳܐ ܪ̈ܰܚܡܶܐ ܘܝܰܡܳܐ ܕܩܳܛܽܘܠܰܐ ܗ̱ܘ ܒܥܽܘܡܩܰܘ̈ܗ̱ܝ ܠܗܽܘܢ ܡܰܚܶܐ ܘܟܰܕ ܛܳܒ ܡܰܪܺܝܪܰܐ ܗ̱ܘ ܒܥܽܘܒܰܘ̈ܗ̱ܝ ܠܗܶܝܢ ܡܰܝܢܶܩ ܟܽܠܗܶܝܢ ܠܡܳܪܳܐ ܟܽܠ ܡܩܰܠܣܳܢ ܕܢܽܘ̈ܢܶܐ ܒܓܰܘ ܝܰܡܳܐ ܕܳܝܨܺܝܢ ܒܡܺܝܬܽܘܬܶܗ ܘܶܐܢ ܗܽܘ ܕܰܣܠܶܩܘ̱ ܠܳܐܐܰܪ ܐܶܬܚܢܶܩܘ̱ ܒܚܰܝܽܘܬܳܐ 12 ܠܳܐ ܟܺܝܬ ܢܶܦܗܽܘܢܳܟ ܩ̈ܳܠܶܐ ܕܠܳܐ ܣܰܒܪܳܐ ܕܚܰܕ ܗܽܘ ܕܶܐܢ ܦܩܰܕ ܠܚ̈ܰܝܶܐ ܡܰܡܺܝܬܺܝܢ ܠܳܟ ܘܗܽܘܝܽܘ ܕܶܐܢ ܪܳܡܶܙ ܠܡܰܘܬܳܐ ܡܢܰܚܶܡ ܠܳܟ ܒܓܰܙܳܐ ܕܨܶܒܝܳܢܶܗ ܫܟܺܝܚ ܟܽܠ ܡܰܘܬܳܐ ܠܙܰܕܺܝ̈ܩܶܐ ܫܶܢܬܰܐ ܗ̱ܘ ܒܩܰܒܪ̈ܰܝܗܽܘܢ ܘܚܰܝ̈ܶܐ ܠܚ̈ܰܛܳܝܶܐ ܩܳܛܠܺܝܢ ܒܓܺܗܰܢܳܐ