Ephrem the Syrian. “Nisibis 49.” Digital Syriac Corpus. Last modified June 12, 2019. https://syriaccorpus.org/303. Nisibis XLIX ܙ ܒܰܪ ܩܳܠܶܗ 1 ܚܽܘܪ ܒܶܪܝ̱ ܒܟܺܐܢܽܘܬܳܗ̇ ܕܰܐܪܥܳܐ ܕܫܳܕܶܝܢ ܒܳܗ̇ ܚܶܛܬܳܐ ܡܫܰܠܰܚܬܳܐ ܫܒܶܫܬܳܐ ܡܦܰܪܣܺܝܬܳܐ ܙܽܘ̈ܳܕܶܐ ܐܳܦ ܢܰܚ̈ܬܶܐ ܡܰܛܥܢܳܐ ܠܬܰܪ̈ܬܰܝܗܶܝܢ ܣܓܽܘ̈ܠܶܐ ܕܠܳܐ ܝܶܙܦܰܬ ܦܶܪܥܳܐ ܩܰܪܢܳܐ ܘܪܰܒܰܝܬܳܐ ܦܶܪܥܳܐ ܠܶܐܟܳܪܳܐ ܟܡܳܐ ܦܶܪܥܳܐ ܠܡܳܪܳܗ̇ ܙܰܪ̈ܥܽܘܗ̱ܝ ܕܠܳܐ ܪܰܒܺܝ ܥܽܘܢܺܝܬܳܐ: ܫܪܳܪܳܟ ܕܒܰܢ ܢܶܗܘܶܐ ܚܡܺܝܪܳܐ ܕܢܳܓܶܕ ܠܰܢ 2 ܠܰܘ ܓܶܝܪ ܚܰܕ ܦܰܓܪܳܐ ܡܶܙܕܪܰܥ ܘܣܰܓܺܝ̈ܐܶܐ ܐܰܝܟ ܚܶܛܬܳܐ ܡܶܢܶܗ ܢܳܒܥܺܝܢ ܒܢܽܘܚܳܡܳܐ ܚܰܕܽ ܗ̱ܘ ܢܦܰܠ ܘܰܐܩܺܝܡ ܫܶܒܠܳܐ ܕܫܰܪ̈ܒܳܬܰܢ ܕܢܰܟܶܣ ܠܟܳܦܽܘܪ̈ܶܐ ܟܡܳܐ ܟܦܰܪܘ̱ ܀܀܀ ܕܶܐܠܳܐ ܠܒܶܫ ܦܰܓܪܰܢ ܐܰܝܟܰܢ ܛܥܶܡ ܡܰܘܬܰܢ ܘܶܐܠܳܐ ܩܛܺܝܠ ܦܰܓܪܶܗ ܒܙܺܐܦܰܐ ܗ̱ܘ ܩܨܳܐ ܠܰܚܡܶܗ 3 ܐܰܪܥܳܐ ܕܳܐܦ ܪܰܚܫܳܐ ܡܰܘܠܕܳܐ ܒܦܽܘܩܕܳܢܳܐ ܥܽܘ̈ܩܣܶܐ ܕܢܶܟܝ̈ܳܢܶܐ ܡܪܰܚܫܳܐ ܒܚܰܝܽܘܬܳܗ̇ ܟܡܳܐ ܚܳܕܝܳܐ ܒܰܒܪܳܗ̇ ܕܢܺܚܶܐ ܘܢܶܬܢܰܚܰܡ ܕܰܒܥܶܠܬܶܗ ܝܶܪܒܶܬ ܕܶܐܬܓܒܶܠ ܕܺܐܝܕܶܗ ܕܒܳܪܽܘܝܳܐ ܝܰܩܪܰܬ ܠܕܰܚܺܝܚܳܗ̇ ܘܰܒܥܶܠܬܶܗ ܡܳܪܰܢ ܐܰܬܪܟܶܢ ܘܗܰܠܶܟ ܒܳܗ̇ 4 ܒܺܝܫܳܐ ܗ̱ܝ ܥܰܩܪܽܘܬܳܐ ܡܶܢ ܫܝܽܘܠ ܒܦܽܘܚܳܡܳܐ ܙܰܪܥܳܐ ܕܚܰܝܽܘܬܳܐ ܡܶܬܚܢܶܩ ܒܓܰܘ ܥܽܘܒܳܗ̇ ܒܰܫܝܽܘܠ ܓܶܝܪ ܡܶܡܬܽܘܡ ܠܳܐ ܡܶܬܩܒܰܪ ܚܰܝܳܐ ܦܰܓܪܰܐ ܗ̱ܘ ܥܳܐܶܠ ܠܳܗ̇ ܡܳܐ ܕܡܺܝܬ ܐܶܢ ܟܺܝܬ ܥܰܩܪܽܘܬܳܐ ܦܰܢܝܰܬ ܒ̈ܢܰܝ ܐ̱ܢܳܫܳܐ ܟܡܳܐ ܦܶܪܥܳܐ ܟܰܪܣܳܗ̇ ܕܰܐܪܥܳܐ ܒܢܽܘܚܳܡܳܐ 5 ܩܰܫܝܳܐ ܗ̱ܝ ܐܳܦ ܢܽܘܪܳܐ ܡܶܢ ܫܝܽܘܠ ܒܢܶܣܝܳܢܳܐ ܕܚ̈ܰܝܶܐ ܐܳܦ ܡܺܝ̈ܬܶܐ ܀܀܀ ܒܶܠܥܳܐ ܒܟܰܦܢܽܘܬܳܗ̇ ܠܦܰܓܪܳܐ ܒܓܰܘ ܥܽܘܒܳܗ̇ ܢܶܛܪܰܬ ܒܦܽܘܩܕܳܢܳܐ ܛܠܽܘܡܬܳܐ ܝܶܗܒܰܬ ܘܰܐܣܓܝܰܬ ܩܰܪܢܳܐ ܘܪܰܒܰܝܬܳܐ ܦܶܢܝܰܬ ܠܚ̈ܰܙܳܝܶܐ ܕܰܚܠܳܦ ܬܠܺܝ̈ܬܳܝܶܐ ܚܰܘܝܰܬ ܐ̱ܪ̈ܒܺܝܥܳܝܶܐ 6 ܢܽܘܪܳܐ ܗ̱ܝ ܕܣܰܓ̈ܺܝܐܶܐ ܓܶܪܣܰܬ ܒܝܰܥܢܽܘܬܳܗ̇ ܬܠܳܬܳܐ ܢܦܰܠܘ̱ ܗ̱ܘܰܘ ܒܳܗ̇ ܘܰܣܓܺܝܘ ܒܓܰܘ ܥܽܘܒܳܗ̇ ܢܽܘܪܳܐ ܕܟܶܡܰܬ ܗ̱ܘܳܬ ܥܰܠ ܟܽܠ ܕܶܐܟܠܰܬ ܗ̱ܘܳܬ ܦܪܰܥܬܶܗ ܠܗܰܘ ܕܰܨܒܳܐ ܕܢܶܬܛܠܶܡ ܕܰܐܘܙܶܦ ܕܢܰܘܒܶܕ ܗ̱ܘܳܐ ܘܟܰܕ ܠܳܐ ܬܳܒܰܥ ܦܶܪܥܰܬ ܐܰܣܓܺܝ ܢܣܰܒ ܘܰܒܗܶܬ ܘܶܐܬܦܪܰܥ ܘܶܐܬܟܰܐܰܪ 7 ܕܳܡܶܐ ܗܽܘ ܠܣܳܛܳܢܳܐ ܕܡܰܘܙܶܦ ܘܠܳܐ ܬܳܒܰܥ ܟܶܣܦܶܗ ܡܛܰܒܰܥ ܠܶܗ ܠܘܳܬܶܗ ܕܝܙܦܳܐ ܡܰܘܙܶܦ ܘܡܰܣܶܩ ܠܶܗ ܩܨܳܨܳܐ ܘܪܰܒܰܝܬܳܐ ܢܽܘܪܳܐ ܠܒܰܪ ܛܽܘܗܡܳܗ̇ ܦܰܢܝܰܬ ܡܶܕܶܡ ܕܠܳܐ ܬܰܒܥܳܗ̇ ܟܡܳܐ ܦܳܪܥܳܐ ܐܰܪܥܳܐ ܚܰܘܒܬܳܗ̇ ܒܢܽܘܚܳܡܳܐ ܠܟܺܐܢܳܐ ܕܬܳܒܰܥ ܠܳܗ̇ ܀܀܀ 8 ܦܰܓܪܳܐ ܕܡܺܝܬ ܡܰܘܠܶܕ ܬܽܘ̈ܠܥܶܐ ܕܠܳܐ ܙܽܘܘܳܓ ܘܶܐܢ ܗܽܘ ܕܡܺܝܬܽܘܬܳܐ ܐܰܘܠܕܰܬ ܠܚܰܝܽܘܬܳܐ ܟܡܳܐ ܟܺܝܬ ܡܰܚܶܐ ܟܽܘܠ ܢܺܚܶܝܗ̇ ܠܡܺܝܬܽܘܬܳܐ ܦܰܓܪܳܐ ܕܡܺܝܬ ܡܰܘܠܶܕ ܒܓܰܘ ܫܝܽܘܠ ܘܶܐܢܗܽܘ ܕܡܺܝܬܽܘܬܳܐ ܪܶܦܬܰܬ ܒܚܰܝܽܘܬܳܐ ܟܡܳܐ ܪܳܦܬܺܝܢ ܓܰܪ̈ܡܰܘܗ̱ܝ ܒܩܳܠܶܗ ܕܡܰܚܶܐ ܟܽܠ 9 ܢܒܺܝܳܐ ܕܒܰܦܩܰܥܬܳܐ ܢܰܠܦܳܟ ܕܰܐܝܟܰܢܳܐ ܓܰܪ̈ܡܶܐ ܕܠܳܐ ܙܰܘܥܳܐ ܪܦܰܬܘ̱ ܗ̱ܘܰܘ ܒܦܽܘܩܕܳܢܳܐ ܒܰܝܬܳܐ ܒܢܳܐ ܢܰܦܫܶܗ ܕܰܐܪܕܺܟܠܶܗ ܦܩܰܕ ܠܶܗ ܘܡܰܘܬܳܐ ܕܡܰܠܟܳܐ ܗ̱ܘܳܐ ܒܓܰܘ ܫܝܽܘܠ ܦܳܥܠܳܐ ܗ̱ܘܳܐ ܡܶܢ ܫܶܠܝ̱ ܕܓܰܪ̈ܡܶܐ ܡܩܰܪܶܒ ܗ̱ܘܳܐ ܘܰܬܥܶܫ ܒܒܶܢܝܳܢܶܗ ܕܗܰܘ ܗܰܝܟܠܳܐ ܕܰܐܪܡܺܝ 10 ܣܰܬܘܳܐ ܕܠܳܐ ܪ̈ܰܚܡܶܐ ܒܛܽܘܦܣܳܐ ܕܓܰܝܳܣܳܐ ܢܦܰܩ ܘܢܰܚ̈ܬܰܝܗܽܘܢ ܡܰܫܠܰܚ ܕܺܐܝ̈ܠܳܢܶܐ ܡܰܟܡܰܪ ܠܗܽܘܢ ܥܰܪܛܶܠ ܕܡܰܥܕܳܐ ܠܒܽܘܫ̈ܰܝܗܽܘܢ ܕܽܘܡܝܳܐ ܗ̱ܘܳܐ ܠܡܰܘܬܳܐ ܒܟܽܠܗܶܝܢ ܢܺܝܣܳܢ ܡܰܦܪܰܥ ܠܳܟ ܘܐ̱ܪܙܶܗ ܕܡܰܚܶܐ ܟܽܠ ܠܦܰܩ̈ܳܚܶܐ ܘܠܺܐܝ̈ܠܳܢܶܐ ܡܰܦܢܶܐ ܠܒܽܘܫ̈ܰܝܗܽܘܢ 11 ܠܥܶܣ̈ܒܶܐ ܘܥܶܩܳܪ̈ܶܐ ܘܦܰܩܳܚ̈ܶܐ ܘܗܰܒ̈ܳܒܶܐ ܡܢܰܚܶܡ ܒܫܽܘܦܪ̈ܰܝܗܽܘܢ ܘܨܳܒܰܥ ܠܓܰܘ̈ܳܢܰܝܗܽܘܢ ܛܳܒܳܐ ܕܥܰܠ ܦܰܩ̈ܳܚܶܐ ܕܠܳܐ ܐܰܘܙܦܽܘܗ̱ܝ ܡܶܕܶܡ ܒܛܺܝܠ ܠܳܗ̇ ܠܛܰܝܒܽܘܬܶܗ ܒܟܽܠܗܶܝܢ ܚܳܣ ܠܳܗ̇ ܠܟܺܐܢܽܘܬܶܗ ܕܰܛܠܶܡ ܘܛܳܥܶܐ ܗ̱ܘܳܐ ܠܦܰܓܪ̈ܶܐ ܕܚܰܒܺܝ̈ܒܰܘܗ̱ܝ ܒܫܽܘܒܚܳܐ ܕܡܶܐܬܺܝܬܶܗ 12 ܡܰܢܽܘ ܡܛܰܫܶܐ ܠܶܗ ܠܫܶܡܫܳܐ ܒܓܰܘ ܥܽܘܒܶܗ ܡܰܢܽܘ ܡܟܰܣܶܐ ܠܶܗ ܠܛܽܘܪܳܐ ܒܟ̈ܶܢܦܳܬܶܗ ܡܰܢܽܘ ܡܚܰܦܶܐ ܠܶܗ ܠܩܽܘܫܬܳܐ ܒܚܶܪܝܳܢܶܗ ܗܳܘܶܐ ܗܽܘ ܓܶܝܪ ܣܰܒܪܳܐ ܠܰܫܟ̈ܺܝܒܶܐ ܡܰܢܽܘ ܡܕܰܓܶܠ ܠܶܗ ܠܟܶܢܫܳܐ ܕܢܶܣܝܳܢܳܐ ܛܳܒܳܐ ܕܪ̈ܰܗܒܽܘܢܰܘܗ̱ܝ ܣܳܗܕܺܝܢ ܠܢܽܘܚܳܡܶܗ 13 ܐܶܢ ܚܳܕܝܳܐ ܣܰܪܳܐ ܕܬܰܩܒܶܠ ܠܰܐܒܪܳܗܳܡ ܘܢܶܗܘܽܘܢ ܒܡܰܠܟܽܘܬܳܐ ܬܪ̈ܰܝܗܽܘܢ ܒܕܰܟܝܽܘܬܳܐ ܟܡܳܐ ܚܳܕܝܳܐ ܢܰܦܫܳܐ ܀܀܀ ܕܬܰܩܒܶܠ ܠܫܰܘܬܳܦܳܗ̇ ܦܽܘܪܫܳܢܗܽܘܢ ܣܳܗܶܕ ܠܚܽܘܒܗܽܘܢ ܕܡ̈ܶܥܶܐ ܢܦܺܝܣܳܢܳܟ ܕܡܳܐ ܕܦܳܪܫܺܝܢ ܒܳܟܶܝܢ ܕܬܽܘܒ ܚܰܕ ܠܚܰܕ ܨܳܒܶܝܢ ܕܢܶܚܙܽܘܢ ܒܢܽܘܚܳܡܳܐ 14 ܠܦܰܓܪܳܐ ܩܪܺܝ ܕܢܶܗܘܶܐ ܣܳܗܕܳܐ ܕܢܽܘܚܳܡܶܗ ܕܟܰܕ ܐܶܬܓܒܰܠ ܐܳܕܳܡ ܡܰܢ ܗܳܝ ܫܚܺܝܡܽܘܬܳܐ ܡܥܺܝܢܳܐ ܕܦܽܘܪ̈ܫܳܢܶܐ ܢܣܰܟ ܒܶܗ ܒܕܰܚܺܝܚܳܐ ܥܰܦܪܰܐ ܗ̱ܘ ܕܶܐܫܬܰܚܠܰܦ ܠܟܽܠ ܨܒܽܘ ܕܡܰܠܶܠ ܚܙܳܐ ܘܰܫܡܰܥ ܘܰܐܪܺܝܚ ܘܓܰܫ ܘܰܛܥܶܡ ܘܰܐܪܡܰܚ ܚܛܳܐ ܘܰܢܦܰܠ ܘܶܐܬܚܢܶܢ ܚܝܳܐ ܘܰܣܠܶܩ 15 ܫܽܘܥܳܐ ܘܛܰܪܢܳܐ ܕܶܐܣܬܕܶܩ ܒܦܽܘܩܕܳܢܳܐ ܕܰܒܠܰܥ ܕܠܳܐ ܐܰܣܟܶܠ ܘܶܐܬܬܒܰܥ ܕܠܳܐ ܩܰܒܶܠ ܘܟܰܕ ܠܳܐ ܝܺܙܶܦ ܡܶܢ ܐ̱ܢܳܫ ܠܟܽܠ ܐ̱ܢܳܫ ܦܪܰܥ ܫܰܩܝܳܐ ܡܰܘܬܳܐ ܕܶܐܬܝܰܥܶܢ ܡܶܣܬܪܶܩ ܒܦܰܩܥܳܐ ܕܡܶܢ ܫܶܠܝܳܐ ܘܪܰܥܡܳܗ̇ ܕܗܳܝ ܩܰܪܢܳܐ ܕܗܺܝ ܩܰܪܢܳܐ ܡܺܝ̈ܬܶܐ ܠܽܐܘܪܥܶܗ ܕܒܰܪ ܡܰܠܟܳܐ 16 ܘܰܐܝܟܰܢ ܕܶܐܢ ܡܶܢ ܫܶܠܝ̱ ܀܀܀ ܒܓܰܘ ܠܺܠܝܳܐ ܢܶܓܕܰܫ ܪܰܥܡܳܐ ܕܛܳܒ ܥܰܙܺܝܙ ܘܦܰܩܥܳܐ ܕܛܳܒ ܚܰܣܺܝܢ ܡܰܬܘܰܗ ܡܥܺܝܪ ܕܰܡ̈ܟܶܐ ܘܰܡܢܳܕ ܠܰܛܒܺܝ̈ܥܶܐ ܗܳܟܰܢ ܒܗܳܝ ܩܰܪܢܳܐ ܐ̱ܚܪܳܝܬܳܐ ܩܳܠܳܗ̇ ܡܩܺܝܡ ܡܺܝ̈ܬܶܐ ܠܳܐ ܗ̱ܘܳܐ ܕܥܰܙܺܝܙܰܐ ܗ̱ܘ ܐܶܠܳܐ ܕܦܽܘܩܕܳܢܳܐ ܫܪܳܐ ܒܳܗ̇ ܒܢܽܘܚܳܡܳܐ 17 ܘܡܳܐ ܕܶܐܬܬܥܺܝܪܘ̱ ܡܶܢ ܫܶܠܝ̱ ܬܽܘܗܶܝܢ ܘܡܶܬܪܰܗܒܺܝܢ ܕܚܰܕ ܡܶܬܕܟܰܪ ܥܰܘܠܶܗ ܐ̱ܚܪܺܢܳܐ ܠܛܰܡܐܽܘܬܶܗ ܗܳܝ ܫܳܥܬܳܐ ܛܽܘܒܰܘܗ̱ܝ ܠܰܐܝܢܳܐ ܕܶܥܗܰܕ ܠܳܗ̇ ܕܒܳܗ̇ ܙܳܝܥܺܝܢ ܬܰܡܳܢ ܘܢܳܝܕܺܝܢ ܕܰܚܒ̈ܳܠܰܐ ܗ̱ܘ ܡܚܶܝܢ ܒܳܗ̇ ܕܪܽܘܓܙܳܐ ܠܥܰܘ̈ܳܠܶܐ ܢܶܒܥܽܘܢ ܥܰܠܝ̱ ܟܺܐܢ̈ܶܐ ܟܽܠܗܽܘܢ ܒܗܰܘ ܥܶܕܳܢ