Ephrem the Syrian. “Nisibis 50.” Digital Syriac Corpus. Last modified June 12, 2019. https://syriaccorpus.org/304. Nisibis L ܥܰܠ ܩܳܠܰܐ ܕܰܐܢ̱ܬ ܡܳܪܝ̱ ܐܰܟܬܰܒܬܶܗ 1 ܐܰܘܕܶܐ ܥܰܕ ܐܰܝܬܺܝ ܠܳܐ ܐܶܗܘܶܐ ܐܰܝܟ ܠܰܝܬܰܝ ܐܰܘܕܶܐ ܒܚ̈ܰܝܰܝ ܠܳܐ ܐܶܗܘܶܐ ܡܺܝܬܳܐ ܒܚܰܝ̈ܰܝ ܕܳܐܦ ܒܰܛܝܠܐ ܡܝܬܰܐ ܗ̱ܘ ܕܰܬܪܶܝܢ ܕܰܐܪܥܐ ܕܟܳܡܰܬ ܠܰܐܟܳܪܳܗ̇ ܛܶܠܡܰܬ ܥܽܘܢܺܝܬܳܐ: ܒܳܟ ܡܳܪܝ̱ ܢܰܦܪܶܐ ܦܽܘܡܝ̱ ܬܶܫܒܽܘܚܬܳܐ ܡܩܰܒܰܠܬܳܐ ܀܀܀ 2 ܒܳܟ ܡܳܪܝ ܢܶܬܶܠ ܦܽܘܡܝ̱ ܫܽܘܒܚܶܐ ܡܶܢ ܓܰܘ ܫܶܬܩܳܐ ܠܳܐ ܢܶܗܘܶܐ ܦܽܘܡܰܢ ܥܰܩܪܳܐ ܡܶܢ ܬܶܫܒܽܘܚܬܳܐ ܘܠܳܐ ܢܶܬ̥ܓܰܙ̈ܝܳܢ ܐܳܦ ܣܶܦܘ̈ܳܬܰܢ ܡܶܢ ܬܰܘܕܺܝܬܳܐ ܫܽܘܒܚܳܟ ܢܶܪܦܰܬ ܒܰܢ 3 ܓܒܺܝ̈ܠܶܐ ܓܒܰܠܘ̱ ܥܰܦܪܳܐ ܘܰܐܪ̈ܥܳܢܶܐ ܬܥܶܫܘ̱ ܒܰܐܪܥܳܐ ܪܚܺܝܡ ܗ̱ܽܘ ܠܰܢ ܦܰܓܪܳܐ ܕܰܐܚܝܰܢ ܐܰܝܟ ܒܰܪ ܛܽܘܗܡܳܐ ܕܰܚܺܝܚܰܐ ܗ̱ܘ ܓܶܝܪ ܗܽܘ ܥܰܩܪܰܢ ܘܦܺܐܪ̈ܶܐ ܕܥܰܡ̈ܠܰܘܗ̱ܝ ܣܰܘ̈ܟܰܝܢ ܛܥܺܝ̈ܢܳܢ 4 ܕܝܰܘܡܳܐ ܠܳܐ ܬܺܐܨܰܦ ܘܕܰܫܢܰܝ̈ܳܐ ܝܰܨܺܝܦܺܝܢܰܢ ܠܰܙܩܳܪ̈ܳܬܳܐ ܒܫܽܘܫܰܢ̈ܶܐ ܒܣܰܪ ܡܰܠܒܶܫ ܟܽܠ ܒܥܽܘܪ̈ܒܶܐ ܝܰܥܢ̈ܶܐ ܠܝܰܥܢܳܐ ܐܰܟܶܣ ܗܰܘ ܙܳܐܶܢ ܟܽܠ ܕܰܠܟܽܠ ܟܽܠ ܝܰܗ̱ܒ 5 ܕܳܪܰܢ ܐܰܝܟ ܛܰܪܦܰܐ ܗ̱ܘ ܘܕܰܢܬ̥ܰܪ ܗܳܐ ܙܰܒܢܶܗ ܕܟܰܪܝܳܐ ܕܶܝܢ ܡܽܘܫܚܰܬ ܚܰܝܰܝ̈ܢ ܢܰܘܪܶܟ ܫܽܘܒܚܳܐ ܕܰܟܡܳܐ ܓܶܝܪ ܕܰܐܪܺܝܟ ܡܶܬܚܶܗ ܕܚܰܘܒܰܢ ܒܶܗ ܩܢܰܝܢ ܚ̱ܢܰܢ ܚܰܝ̈ܶܐ ܕܠܳܐ ܡܽܘܫܚܳܐ 6 ܕܰܒܡܳܪܰܢ ܡܛܰܥܰܡ ܫܶܪܫܳܐ ܕܗܰܝܡܳܢܽܘܬܰܢ ܐܳܦܶܢ ܪܰܚܺܝܩ ܩܰܪܺܝܒ ܗ̱ܽܘ ܠܰܢ ܒܡܽܘܙܳܓ ܚܽܘܒܳܐ ܫܶܪ̈ܫܶܐ ܕܚܽܘܒܰܢ ܒܶܗ ܢܶܬܐܰܣܪܽܘܢ ܘܒܰܢ ܢܶܬܡܰܙܓܽܘܢ ܡܶܬܚ̈ܶܐ ܕܰܚܢܳܢܶܗ ܀܀܀ 7 ܗܰܝܟܠܳܐ ܡܳܪܝ ܢܶܗܘܶܐ ܗܽܘ ܦܰܓܪܳܐ ܠܒܰܢܳܝܶܗ ܠܰܐܪܕܺܝܟܠܳܗ̇ ܬܶܗܘܶܐ ܢܰܦܫܳܐ ܒܺܝܪܰܬ ܫܽܘܒܚܳܐ ܠܳܐ ܡܳܪܝ̱ ܢܶܗܘܶܐ ܦܰܓܪܰܢ ܢܶܩܥܳܐ ܐܳܦ ܠܳܐ ܢܰܦܫܰܢ ܠܡܺܐܢܳܐ ܕܚܽܘܣܪܳܢܳܐ 8 ܘܰܕܛܰܦܛܶܦ ܢܽܘܗܪܳܐ ܕܗܳܕܶܐ ܢܶܫܡܰܬ ܙܰܒܢܳܐ ܫܪܳܓ̥ܳܐ ܕܰܕܥܶܟ ܡܶܢ ܪܰܡܫܳܐ ܒܫܰܦܪܳܐ ܢܗܰܪ ܐܶܬܳܐ ܫܶܡܫܳܐ ܒܪܰܬܚܳܐ ܕܕܶܢܚܶܗ ܡܩܺܝܡ ܩܰܪ̈ܺܝܪܶܐ ܘܡܰܢܗܰܪ ܕܰܥܺܝ̈ܟܶܐ 9 ܙܳܕܶܩ ܗ̱ܽܘ ܕܢܰܘܕܶܐ ܠܗܰܘ ܢܽܘܗܪܳܐ ܡܰܢܗܰܪ ܟܽܠ ܕܰܒܫܰܦܪܳܐ ܫܪܳܓܳܐ ܕܳܥܶܟ ܕܣܳܠܶܩ ܫܶܡܫܳܐ ܫܶܡܫܳܐ ܚܰܕ̱ܬܳܐ ܚܰܕ̱ܬܳܐ ܥܳܒܶܕ ܕܒܰܫܝܽܘܠ ܡܰܢܗܰܪ ܕ̈ܰܥܝܟܶܐ ܫܪ̈ܳܓܶܐ 10 ܚܠܳܦ ܡܰܘܬܳܐ ܕܰܒܟܽܠ ܐܰܦܺܝܚ ܪܺܝܚ ܡܺܝܬܽܘܬܶܗ ܪܺܝܚܳܐ ܚܰܝܳܐ ܡܳܚܶܐ ܟܽܠ ܒܰܫܝܽܘܠ ܦܳܐܰܚ ܡܺܝ̈ܬܶܐ ܣܳܝܩܺܝܢ ܡܶܢ ܚܰܝܽܘܬܶܗ ܚܰܝ̈ܶܐ ܚܰܕ̱̈ܬܶܐ ܕܡܰܘܬܳܐ ܒܗܽܘܢ ܡܳܐܶܬ 11 ܛܽܘܦܣܰܐ ܗ̱ܘ ܕܰܠܡܺܝܬܳܐ ܡܳܚܶܐ ܪܺܝܚܶܗ ܕܰܩܒܺܝܪܳܐ ܡܺܝܬܳܐ ܕܝܰܘܡܳܐ ܣܳܩ ܚܰܝ̈ܶܐ ܡܶܢ ܥܰܬܺܝܩܳܐ ܪܺܝܚܳܐ ܚܰܝܳܐ ܦܳܚ ܡܶܢ ܓܰܪ̈ܡܶܐ ܘܥܰܠ ܒܰܫܠܰܕܳܐ ܐ̱ܪܳܙܶܗ ܕܡܰܚܶܐ ܟܽܠ 12 ܝܶܫܽܘ̇ܥ ܬܰܪܓܶܡ ܠܰܢ ܐ̱ܪ̈ܳܙܶܐ ܕܰܗܘܰܘ ܒܰܫܝܽܘܠ ܕܡܶܢ ܗܰܘ ܕܰܥܺܝܟܳܐ ܫܪܳܓܳܐ ܫܪܳܓܳܐ ܢܳܗܰܪ ܗ̱ܘܳܐ ܘܟܰܕ ܗ̱ܽܘ ܐܰܪܡܺܝ ܗ̱ܘܳܐ ܐܰܩܺܝܡ ܡܰܦܽܘܠܬܳܐ ܦܳܫ ܘܫܰܕܰܪ ܣܳܗܕ̈ܶܐ ܠܡܶܐܬܺܝܬܶܗ 13 ܟܡܳܐ ܡܳܪܝ ܕܶܐܡܽܘܫܳܟ ܠܰܘ ܠܳܟ ܗ̱ܽܘ ܓܳܐܶܫ ܐ̱ܢܳܐ ܡܶܕܶܡ ܓܶܝܪ ܠܳܐ ܓܰܫ ܡܰܕܰܥܝ̱ ܡܶܢ ܟܰܣܝܽܘܬܳܟ ܨܰܠܡܰܐ ܗ̱ܘ ܓܰܠܝܳܐ ܘܳܐܦ ܕܰܢܺܝܚܳܐ ܚܙܺܝܬ ܒܐ̱ܪܳܙܳܟ ܕܰܟܣܶܐ ܗ̱ܘ ܗܽܘ ܥܽܘܩܳܒܳܟ