Ephrem the Syrian. “Nisibis 52.” Digital Syriac Corpus. Last modified June 12, 2019. https://syriaccorpus.org/306.
    
        
            
                Nisibis LII
            
            
                
                    ܥܰܠ ܣܳܛܳܢܳܐ ܘܡܰܘܬܳܐ 
                    ܥܰܠ ܩܳܠܳܐ ܕܰܐܘ ܡܰܘܬܳܐ ܠܳܐ ܬܶܫܬܰܥܠܶܐ 
                
                
                    1
                    ܠܡܰܘܬܳܐ ܘܣܳܛܳܢܳܐ ܫܶܡܥܶܬ ܩܳܠܳܐ ܟܰܕ ܢܳܨܶܝܢ ܗ̱ܘܰܘ
                    ܕܰܐܝܢܳܐ ܚܰܣܺܝܢ ܡܶܢ ܚܰܒܪܶܗ ܨܶܝܕ ܒܰܪܢܳܫܳܐ 
                    
                    ܥܽܘܢܺܝܬܳܐ : ܠܳܟ ܫܽܘܒܚܳܐ ܒܰܪ ܪܳܥܶܐ ܟܽܠ ܕܰܦܪܰܩ ܥܳܢ̈ܶܗ
                    ܡܶܢ ܕܺܐܒ̈ܶܐ ܟܣܰܝ̈ܳܐ ܕܒܰܠܥܽܘܗ̇ ܒܺܝܫܳܐ ܘܡܰܘܬܳܐ 
                    
                
                
                    2
                    ܡܰܘܬܳܐ ܚܰܘܺܝ ܫܽܘܠܛܳܢܶܗ ܕܰܠܟܽܠ ܙܳܟܶܐ 
                    ܣܳܛܳܢܳܐ ܚܰܘܺܝ ܢܶܟܠܶܗ ܕܰܠܟܽܠ ܡܰܚܛܶܐ 
                    
                
                
                    3
                    ܠܳܟ ܒܺܝܫܳܐ ܐܰܝܢܳܐ ܕܨܳܒܶܐ ܠܚܽܘܕ ܫܳܡܰܥ ܠܳܟ 
                    ܠܺܝ ܕܨܳܒܶܐ ܘܰܕܠܳܐ ܨܳܒܶܐ ܨܶܐܕܰܝ ܐܳܬ̇ܝܢ 
                    
                
                
                    4
                    ܠܳܟ ܡܰܘܬܐ ܩܛܺܝܪܰܐ ܗ̱ܘ ܒܰܠܚܽܘܕ ܕܰܛܪܽܘܢܽܘܬܳܐ 
                    ܠܺܝ ܕܶܝܢ ܦܰܚ̈ܶܐ ܐܳܦ ܢܶܫ̈ܒܶܐ ܕܰܥܪܺܝܡܽܘܬܳܐ 
                    
                
                
                    5
                    ܫܡܰܥ ܒܺܝܫܳܐ ܕܰܐܝܢܳܐ ܕܰܥܪܺܝܡ ܢܺܝܪܳܟ ܬܒܳܪܶܗ
                    ܠܳܐ ܕܶܝܢ ܐܺܝܬ ܐܰܝܢܳܐ ܕܡܶܫܟܰܚ ܡܳܪܶܕ ܡܶܢ ܢܺܝܪܝ̱
                    
                
                
                    6
                    ܐܰܢ̱ܬ ܡܰܘܬܳܐ ܒܰܐܝܢܳܐ ܕܰܟܪܺܝܗ ܚܰܝܠܳܟ ܒܳܩܶܝܬ 
                    ܐܶܢܳܐ ܕܶܝܢ ܒܚܶܠܡ̈ܶܐ ܝܰܬܺܝܪ ܡܶܬܓܰܒܰܪ ܐ̱ܢܳܐ 
                    
                
                
                    7
                    ܒܺܝܫܳܐ ܠܳܐ ܫܰܠܺܝܛ ܥܰܠ ܟܽܠ ܕܰܡܨܰܚܶܐ ܠܶܗ
                    ܠܺܝ ܕܠܳܛܰܢܝ̱ ܘܰܕܠܳܐܶܛ ܠܺܝ ܠܺܐܝܕ̈ܰܝ ܐܳܬܶܝܢ 
                    
                
                
                    8
                    ܐܰܢ̱ܬ ܡܰܘܬܳܐ ܡܶܢ ܐܰܠܳܗܳܐ ܚܰܝܠܳܐ ܩܰܒܶܠܬ
                    ܠܺܝ ܒܰܠܚܽܘܕ ܕܠܳܐ ܡܥܰܕܰܪ ܠܺܝ ܟܰܕ ܡܰܚܛܶܐ ܐ̱ܢܳܐ 
                    
                
                
                    9
                    ܐܰܢ̱ܬ ܒܺܝܫܳܐ ܐܰܝܟ ܚܰܠܳܫܳܐ ܦܰܚ̈ܶܐ ܨܳܠܶܝܬ
                    ܘܰܐܝܟ ܡܰܠܟܳܐ ܐ̱ܢܳܐ ܒܫܽܘܠܛܳܢܳܐ ܡܶܬܚܰܫܰܚ ܐ̱ܢܳܐ 
                    
                
                
                    10
                    ܣܟܰܠ ܐܰܢ̱ܬ ܗ̱ܽܘ ܡܰܘܬܳܐ ܠܡܶܕܰܥ ܕܰܟܡܳܐ ܪܰܒ ܐ̱ܢܳܐ
                    ܕܰܠܚܺܐܪܽܘܬܳܐ ܡܫܰܠܰܛܬܳܐ ܣܶܦܩܶܬ ܕܶܐܨܽܘܕ
                    
                
                
                    11
                    ܐܰܢ̱ܬ ܒܺܝܫܳܐ ܐܰܝܟ ܣܳܪܽܘܚܳܐ ܗܳܐ ܚܳܕܰܪ ܐܰܢ̱ܬ 
                    ܐܶܢܳܐ ܐܰܝܟ ܐܰܪܝܳܐ ܬܳܒܰܪ ܐ̱ܢܳܐ ܘܠܳܐ ܩܳܢܶܛ ܐ̱ܢܰܐ 
                    
                
                
                    12
                    ܠܳܟ ܡܰܘܬܳܐ ܠܰܝܬ ܕܦܳܠܰܚ ܐܳܦ ܠܳܐ ܕܣܳܓܶܕ 
                    ܠܺܝ ܒܕ̈ܶܒܚܶܐ ܡܰܠܟ̈ܶܐ ܦܰܠܚܽܘܢܝ̱ ܐܰܝܟ ܠܰܐܠܳܗܳܐ 
                    
                
                
                    13
                    ܠܡܰܘܬܳܐ ܣܰܓܺܝ̈ܐܶܐ ܩܳܪܶܝܢ ܐܰܝܟ ܕܰܠܛܳܒܳܐ 
                    ܠܳܟ ܒܺܝܫܳܐ ܠܳܐ ܐܺܝܬ ܕܰܩܪܳܟ ܐܰܘ ܩܳܪܶܐ ܠܳܟ
                    
                
                
                    14
                    ܠܳܐ ܪܓܺܝܫ ܐܰܢ̱ܬ ܡܰܘܬܳܐ ܒܗܳܕܶܐ ܕܰܟܡܳܐ ܐܶܢܽܘܢ 
                    ܕܒܶܐܣܟܺܝܡ ܐܶܣܟܺܝܡ ܩܳܪܶܝܢ ܠܺܝ ܘܰܡܢܰܩܶܝܢ ܠܺܝ
                    
                
                
                    15
                    ܣܢܶܐ ܗ̱ܘ ܫܡܳܟ ܐܳܘ ܣܳܛܳܢܳܐ 
                    ܠܳܐ ܬܰܫܦܰܪܳܝܗ̱ܝ ܠܰܫܡܳܟ ܟܽܠ ܠܳܐܶܛ ܠܶܗ ܟܰܣܳܐ ܨܰܥܪܳܟ
                    
                
                
                    16
                    ܐܶܕܢܳܟ ܡܰܘܬܳܐ ܝܰܩܺܝܪܳܐ ܕܠܳܐ ܫܳܡܰܥ ܐܰܢ̱ܬ 
                    ܕܟܽܠ ܐ̱ܢܳܫ ܥܠܰܝܟ ܗ̱ܽܘ ܥܰܘܳܐ ܛܰܫܳܐ ܢܰܦܫܳܟ
                    
                
                
                    17
                    ܀܀܀
                    ܓܰܠܝ̈ܳܢ ܐܰܦܰܝ̈ ܒܰܒܪܺܝܬܳܐ ܠܳܐ ܓܶܝܪ ܢܶܟܠܶܬ ܐܰܟܘܳܬܳܟ
                    ܕܰܕܠܳܐ ܢܶܟ̈ܠܶܐ ܠܳܐ ܒܳܐܶܬ ܐܰܢ̱ܬ
                    
                    
                
                
                    18
                    ܠܰܘ ܡܶܕܶܡ ܝܰܬܺܝܪ ܐܶܫܟܰܚܬ̊ ܐܰܝܟ ܫܰܪܺܝܪܳܐ 
                    ܕܰܣܢܶܝܬ ܗ̱ܽܘ ܐܳܦ ܐܰܢ̱ܬ ܐܰܟܘܳܬܝ̱ ܠܰܒ̈ܢܰܝ ܐ̱ܢܳܫ̈ܳܐ 
                    
                
                
                    19
                    ܡܶܢܝ̱ ܡܶܕܚܰܠ ܕܳܚܶܠ ܟܽܠ ܐ̱ܢܳܫ ܐܰܝܟ ܕܡܶܢ ܡܳܪܳܐ
                    ܠܳܟ ܕܶܝܢ ܡܶܣܢܰܐ ܗ̱ܘ ܣܳܢܶܝܢ ܠܳܟ ܐܰܝܟ ܕܰܠܒܺܝܫܳܐ 
                    
                
                
                    20
                    ܠܳܟ ܡܰܘܬܳܐ ܣܳܢܶܝܢ ܠܰܫܡܳܟ ܐܳܦ ܠܰܥܒܳܕܳܟ
                    ܫܶܡܝ ܕܺܝܠܝ ܣܢܶܐ ܘܰܐ̱ܪ̈ܓܺܝܓܳܬܝ̱ ܣܰܓܺܝ ܐ̱ܪ̈ܚܺܝܡܳܢ
                    
                
                
                    21
                    ܠܡܶܪܰܬ ܫܶܢ̈ܶܐ ܡܶܬܗܰܦܟܳܐ ܗܳܝ ܚܰܠܝܽܘܬܳܟ
                    ܬܘܳܬ ܢܰܦܫܳܐ ܠܰܘܝܳܐ ܟܽܠܫܳܥ ܠܰܪ̈ܓܺܝܓܳܬܳܟ
                    
                
                
                    22
                    ܫܝܽܘܠ ܣܰܢܝܳܐ ܕܠܰܝܬ ܒܓܰܘܳܗ̇ ܐܳܦ ܠܳܐ ܬܘܳܬܳܐ
                    ܗܰܘܬܳܐ ܕܒܶܠܥܰܬ ܐܳܦ ܟܳܡܰܬ ܥܰܠ ܟܽܠ ܙܰܘ̈ܥܺܝܢ 
                    
                
                
                    23
                    ܫܝܽܘܠ ܨܳܡܰܪܬܳܐ ܡܶܬܢܰܚܰܡ ܟܽܠ ܕܰܢܦܰܠ ܒܳܗ̇
                    ܚܛܺܝܬܰܐ ܗ̱ܘ ܣܰܢܝܳܐ ܕܰܦܣܰܩܬܶܗ ܣܰܒܪܶܗ ܕܐ̱ܢܳܫܳܐ 
                    
                
                
                    24
                    ܐܳܦܶܢ ܟܰܪܝܳܐ ܠܺܝ ܒܬܰܝܳܒ̈ܶܐ ܝܶܗܒܶܬ ܐܰܬܪܳܐ 
                    ܦܣܰܩܬܳܝܗ̱ܝ ܣܰܒܪܶܗ ܕܚܰܛܳܝܳܐ ܕܡܺܝܬ ܒܰܚܛܳܗܰܘ̈ܗ̱ܝ
                    
                
                
                    25
                    ܡܰܢ ܨܶܐܕܰܝܟ ܗ̱ܽܘ ܡܩܰܕܶܡ ܗ̱ܘܳܐ ܘܰܦܣܺܝܩ ܣܰܒܪܶܗ
                    ܕܶܐܠܽܘ ܐܰܢ̱ܬ ܠܳܐ ܐܰܚܛܺܝܬܳܝܗ̱ܝ ܫܰܦܺܝܪ ܥܳܢܶܕ
                    
                
                
                    26
                    ܀܀܀
                    ܒܪܺܝܟ ܕܰܐܪܡܺܝ ܐܶܢܽܘܢ ܒܰܚܕܳܕ̈ܶܐ ܠܥܰܒܕ̈ܶܐ ܠܺܝ̈ܛܶܐ 
                    ܕܢܶܚܙܶܐ ܒܗܽܘܢ ܐܰܝܟ ܕܰܚܙܰܘ ܒܰܢ ܐܳܦ ܐܰܗܶܠܘ̱ ܒܰܢ
                    
                
                
                    27
                    ܪܰܗܒܽܘܢܰܐ ܗ̱ܘ ܗܳܢܳܐ ܐܰܚܰܝ̈ ܕܰܚܙܰܝܢ ܒܗܽܘܢ 
                    ܕܬܽܘܒ ܐܺܝܬ ܠܰܢ ܕܰܒܗܽܘܢ ܢܶܚܙܶܐ ܡܳܐ ܕܶܐܬܢܰܚܰܡܢ