Ephrem the Syrian. “Nisibis 53.” Digital Syriac Corpus. Last modified June 12, 2019. https://syriaccorpus.org/307.
    
        
            
                Nisibis LIII
            
            
                
                    ܒ ܒܰܪ ܩܳܠܶܗ 
                
                
                    1
                    ܬܰܘ ܢܶܫܡܰܥ ܟܰܕ ܡܶܬܟܰܬܫܺܝܢ ܥܰܠ ܙܳܟܽܘܬܳܐ
                    ܚܰܝܳܒ̈ܶܐ ܕܠܳܐ ܙܟܰܘ ܡܶܢ ܡܬܽܘܡ ܐܳܦ ܠܳܐ ܙܳܟܶܝܢ 
                    
                    
                    
                
                
                    2
                    ܡܰܘܬܳܐ ܠܒܺܝܫܳܐ ܐܳܡܶܪ ܠܶܗ ܠܚܰܪܬܳܐ ܗ̱ܝ ܙܳܟܽܘܬܝ̱
                    ܕܡܰܘܬܰܐ ܗ̱ܘ ܐܰܚܺܝܕ ܫܽܘܠܳܡܳܐ ܐܰܝܟ ܙܰܟܳܝܳܐ 
                    
                
                
                    3
                    ܡܰܘܬܳܐ ܫܰܪܺܝܪܳܐ ܗܶܢܽܘܢ ܐܶܢ ܡܶܫܟܰܚ ܐܰܢ̱ܬ
                    ܕܰܬܡܺܝܬܺܝܘܗ̱ܝ ܠܐ̱ܢܳܫ ܟܰܕ ܚܰܝ ܒܰܪ̈ܓܺܝܓܳܬܳܐ 
                    
                
                
                    4
                    ܐܶܢܳܐ ܕܡܺܝܬܺܝܢ ܗܳܐ ܚܳܙܶܐ ܐ̱ܢܳܐ ܛܳܒ̈ܶܐ ܘܒܺܝ̈ܫܶܐ 
                    ܙܰܕ̈ܺܝܩܶܐ ܕܒܰܣܪܽܘܟ ܒܺܝܫܳܐ ܠܺܝ ܠܳܐ ܒܰܣܪܽܘܢܝ̱
                    
                
                
                    5
                    ܗܳܕܶܐ ܡܺܝܬܽܘܬܳܐ ܕܦܰܓܪܳܐ ܫܶܢܰܬ ܙܰܒܢܳܐ ܗ̱ܝ
                    ܠܳܐ ܬܶܣܒܰܪ ܡܰܘܬܳܐ ܕܡܰܘܬܳܐ ܐܰܢ̱ܬ ܕܰܐܝܟ ܛܶܠܳܠܳܐ ܐܰܢ̱ܬ
                    
                
                
                    6
                    ܠܳܟ ܒܺܝܫܳܐ ܙܟܰܐܽܘܟ ܟܺܐܢ̈ܶܐ ܐܳܦ ܙܳܟܶܝܢ ܠܳܟ 
                    ܐܰܢ̱ܬ ܕܶܝܢ ܠܰܐܝܠܶܝܢ ܕܰܙܟܰܐܽܘܟ ܗܳܐ ܙܳܟܶܐ ܐ̱ܢܳܐ 
                    
                    ܀܀܀
                
                
                    7
                    ܐܳܦ ܠܟܺܐܢ̈ܶܐ ܕܰܡܡܺܝܬ ܐܰܢ̱ܬ ܠܰܘ ܕܺܝܠܳܟ ܗ̱ܝ
                    ܒܥܶܠܰܬ ܐܳܕܳܡ ܗܰܘ ܕܰܙܟܺܝܬ ܐܶܫܬܺܝܘ ܟܳܣܳܐ
                    
                
                
                    8
                    ܗܳܐ ܫܝܽܘܠ ܡܰܠܝܳܐ ܣܕ̈ܽܘܡܳܝܶܐ ܘܳܐܬܽܘܪ̈ܳܝܶܐ 
                    ܘܓܰܢ̱ܒܳܪ̈ܶܐ ܕܰܒܛܰܘܦܳܢܳܐ ܡܰܢܽܘ ܕܰܐܟܘܳܬܝ̱
                    
                
                
                    9
                    ܗܳܠܶܝܢ ܟܽܠܗܽܘܢ ܐܳܘ ܡܰܘܬܳܐ ܠܺܝ ܗ̱ܽܘ ܩܛܺܝܠܺܝܢ
                    ܐܶܢܳܐ ܐ̱ܢܳܐ ܕܚܰܛܺܝܬ ܐܶܢܽܘܢ ܐܰܝܟ ܕܰܢܣܽܘܦܽܘܢ 
                    
                
                
                    10
                    ܝܰܘܣܶܦ ܕܰܙܟܳܟ ܙܟܺܝܬܶܗ ܐܳܘ ܣܳܛܳܢܳܐ 
                    ܒܬܰܘܳܢܳܐ ܙܟܳܟ ܘܰܒܩܰܒܪܳܐ ܙܟܺܝܬ ܘܰܐܪܡܺܝܬܶܗ
                    
                
                
                    11
                    ܡܽܘܫܶܐ ܕܰܙܟܳܟ ܐܳܘ ܡܰܘܬܳܐ ܒܰܪܣܳܣ ܕܡܳܐ 
                    ܙܟܳܟ ܒܡܶܨܪܶܝܢ ܘܥܰܠ ܟܺܐܦܐ ܡܰܢܽܘ ܕܰܙܟܳܝܗ̱ܝ
                    
                
                
                    12
                    ܐܶܠܺܝܳܐ ܕܠܳܐ ܕܚܶܠ ܡܶܢܳܟ ܐܳܘ ܣܳܛܳܢܳܐ 
                    ܡܶܢ ܩܕܳܡ ܐܺܝܙܒܶܝܠ ܥܪܰܩ ܗ̱ܘܳܐ ܕܒܺܝ ܕܶܚܠܬܶܗ
                    
                
                
                    13
                    ܐܰܗܪܽܘܢ ܕܰܟܠܳܟ ܐܳܘ ܡܰܘܬܳܐ ܒܥܶܛܪܳܐ ܕܒܶܣ̈ܡܶܐ 
                    ܩܰܕ̈ܶܫܐ ܕܕܰܗܒܳܐ ܝܶܗܒܶܬ ܠܶܗ ܘܰܚܫܰܠ ܥܶܓܠܳܐ 
                    
                
                
                    14
                    ܠܰܐܓܽܘܢܳܐ ܢܚܶܬܬ ܥܰܡ ܐܺܝܽܘܒ ܘܰܙܟܳܟ ܘܰܣܠܶܩ
                    ܐܶܢܳܐ ܕܶܝܢ ܡܶܢ ܒܳܬܰܪ ܕܰܙܟܳܟ ܟܶܢ ܗ̱ܽܘ ܙܟܺܝܬܶܗ
                    
                    
                
                
                    15
                    ܕܰܘܺܝܕ ܕܰܟܠܳܝܗ̱ܝ ܒܣܰܩܶܗ ܠܗܰܘ ܡܰܘܬܳܢܳܐ 
                    ܥܰܠ ܐܶܓܳܪܳܐ ܙܟܺܝܬ ܠܗܰܘ ܕܰܙܟܳܐ ܠܓܽܘܠܝܰܕ 
                    
                
                
                    16
                    ܝܰܗܽܘ ܕܰܥܩܰܪ ܒܶܝܬ ܒܰܥܠܳܐ ܗܰܝܟܰܠ ܒܺܝܫܳܐ
                    ܕܢܶܥܩܽܘܪ ܠܰܫܝܽܘܠ ܠܳܐ ܐܶܫܟܰܚ ܒܺܝܪܰܬ ܡܰܠܟܽܘܬܝ̱
                    
                
                
                    17
                    ܫܠܶܝܡܽܘ̇ܢ ܕܰܐܥܕܺܝ ܡܶܢ ܦܽܘܡܳܟ ܛܰܠܝܳܐ ܒܕܺܝܢܳܐ 
                    ܦܳܥܠܳܐ ܥܒܰܕܬܶܗ ܒܣܰܝܒܽܘܬܶܗ ܠܰܥܠܰܘ̈ܳܬܐ 
                    
                
                
                    18
                    ܫܡܽܘ̇ܐܶܝܠ ܕܰܒܕܰܗܒܳܐ ܒܰܣܪܳܟ ܐܳܘ ܣܳܛܳܢܳܐ 
                    ܐܶܢܳܐ ܙܟܺܝܬܶܗ ܠܗܰܘ ܙܰܟܳܝܳܐ ܙܟܳܐ ܫܽܘܚܕܳܐ 
                    
                
                
                    19
                    ܫܶܡܫܽܘ̇ܢ ܕܰܒܓܽܘܪܝܳܐ ܕܰܐܪܝܳܐ ܒܰܣܪܳܟ ܡܰܘܬܳܐ
                    ܒܕܰܠܺܝܠܳܐ ܡܳܐܢܳܐ ܕܠܺܝܠܳܐ ܒܪܰܚܝܳܐ ܟܕܰܢܬܶܗ
                    
                
                
                    20
                    ܝܽܘܫܺܝܳܐ ܡܶܢ ܛܰܠܝܽܘܬܶܗ ܫܛܳܟ ܒܺܝܫܳܐ 
                    ܠܺܝ ܕܶܝܢ ܐܳܦܠܳܐ ܒܣܰܝܒܽܘܬܶܗ ܐܶܫܟܰܚ ܚܰܣܢܰܢܝ̱
                    
                
                
                    21
                    ܚܶܙܰܩܝܳܐ ܚܰܣܢܳܟ ܡܰܘܬܳܐ ܕܰܙܟܳܐ ܠܩܶܨܳܐ 
                    ܕܰܘܶܕܬܶܗ ܕܰܫܒܰܩ ܬܶܗܪܳܐ ܘܚܰܘܺܝ ܓܰܙܰܘ̈ܗ̱ܝ
                    
                
                
                    22
                    ܝܽܘ̇ܚܰܢܳܢ ܕܰܙܟܳܟ ܒܺܝܫܳܐ ܘܚܰܣܺܝ ܘܰܐܥܡܶܕ
                    ܐܰܕܥܶܟܬܶܗ ܠܗܰܘ ܫܪܳܓܳܐ ܕܠܳܟ ܦܰܪܣܺܝ ܗ̱ܘܳܐ
                    
                
                
                    23
                    ܫܶܡܥܽܘ̇ܢ ܙܟܳܟ ܕܰܐܚܺܝ ܗ̱ܘܳܐ ܠܛܽܘܒܳܢܺܝܬܳܐ 
                    ܒܰܐܢ̱ܬܬܳܐ ܙܟܳܟ ܘܰܒܝܰܕ ܐܰܢ̱ܬܬܳܐ ܙܟܰܝܬ ܘܰܐܟܦܰܪܬܶܗ
                    
                
                
                    24
                    ܫܠܺܝ̈ܚܶܐ ܘܰܢܒܺܝ̈ܶܐ ܐܰܟܚܰܕ ܠܳܛܽܘܟ ܡܰܘܬܳܐ 
                    ܕܰܐܝܟܳܐ ܗ̱ܝ ܙܳܟܽܘܬܶܗ ܕܡܰܘܬܳܐ ܘܥܽܘܩܣܳܗ̇ ܕܰܫܝܽܘ̇ܠ
                    
                
                
                    25
                    ܠܡܳܪܳܟ ܒܰܫܝܽܘܠ ܚܒܰܫܬܳܝܗ̱ܝ ܥܰܒܕܳܐ ܠܺܝܛܳܐ 
                    ܀܀܀
                    ܣܢܳܟ ܐܰܠܳܗܳܐ ܐܳܦ ܐ̱ܢܳܫܳܐ ܫܰܠܳܐ ܢܰܦܫܳܟ
                    
                
                
                    26
                    ܨܶܒܝܳܢܶܗ ܗ̱ܽܘ ܕܡܰܚܶܐ ܟܽܠ ܚܰܒܫܶܗ ܒܰܫܝܽܘ̇ܠ
                    ܐܰܢ̱ܬ ܗ̱ܽܘ ܩܪܰܝܬܳܝܗ̱ܝ ܠܗܳܕܶܐ ܕܠܳܐܕܳܡ ܐܰܚܛܝܰܬ
                    
                
                
                    27
                    ܟܢܳܬܶܗ ܕܰܢܟܰܠ ܕܰܒܕܰܒܪܳܐ ܨܰܥܰܪ ܡܳܪܶܗ 
                    ܚܪܶܡ ܦܽܘܡܳܟ ܗܰܘ ܕܶܐܡܰܪ ܠܶܗ ܕܦܶܠ ܘܰܣܓܽܘܕ ܠܺܝ