Ephrem the Syrian. “Nisibis 54.” Digital Syriac Corpus. Last modified June 12, 2019. https://syriaccorpus.org/308.
    
        
            
                Nisibis LIV
            
            
                
                    ܓ ܒܰܪ ܩܳܠܶܗ
                
                
                    1
                    ܫܡܰܥܝ̱ ܚܺܐܪܽܘܬܳܐ ܡܰܨܽܘܬܳܐ ܕܰܬܪ̈ܶܝܢ ܥܰܒܕ̈ܺܝܢ 
                    ܟܰܕ ܒܰܚܕܳܕ̈ܶܐ ܡܶܬܟܰܣܣܺܝܢ ܕܰܡܚܺܝ̈ܠܶܐ ܐܶܢܽܘܢ 
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܒܡܽܘܟܳܟܳܟ ܐܶܬܬܪܺܝܡ ܐܳܕܳܡ
                    ܘܰܒܡܺܝܬܽܘܬܳܟ ܐܶܬܢܰܚܰܡ ܘܰܦܢܳܐ ܠܰܥܕܶܢ
                    
                
                
                    2
                    ܐܶܢ ܗܳܟܺܝܠ ܢܶܙܟܶܝܟܝ̱ ܒܺܝܫܳܐ ܪܰܒ ܟܽܘܐܳܪܳܐ 
                    ܡܰܘܬܳܐ ܟܢܳܬܶܗ ܡܰܟܶܣ ܠܶܗ ܕܰܡܚܺܝܠܳܐ ܗ̱ܘܳܐ 
                    
                
                
                    3
                    ܘܶܐܢ ܬܽܘܒ ܡܰܘܬܳܐ ܡܬܰܚܶܒ ܠܶܟܝ̱ ܗܳܐ ܓܽܘܢܳܝܳܐ 
                    ܕܒܺܝܫܳܐ ܟܢܳܬܶܗ ܒܣܰܪ ܠܶܗ ܕܰܐܝܟ ܛܶܠܳܠܰܐ ܗ̱ܘ 
                    
                
                
                    4
                    ܡܰܨܽܘܬܗܽܘܢ ܠܶܟܝ̱ ܡܰܚܙܺܝܬܳܐ ܗ̱ܝ ܕܒܳܗ̇ ܗ̱ܽܘ ܬܶܚܙܶܝܢ 
                    ܕܰܬܪ̈ܰܝܗܽܘܢ ܐܰܝܟ ܥܽܘܪܳܐ ܐܶܢܽܘܢ ܠܡܰܦܽܘܚܺܝܬܶܟܝ̱
                    
                
                
                    5
                    ܘܐܳܦ ܢܒܺܝ̈ܶܐ ܘܰܫܠܺܝ̈ܚܶܐ ܒܡܽܘܠܟܳܢܰܝ̈ܗܽܘܢ
                    ܡܰܠܦܺܝܢ ܠܶܟܝ̱ ܕܰܐܝܟ ܗܰܒܳܒ̈ܶܐ ܒܕܶܢܚܶܟܝ̱ ܚܳܡܶܝܢ 
                    ܀܀܀
                
                
                    6
                    ܐܰܢ̱ܬ ܗ̱ܽܘ ܡܰܘܬܳܐ ܕܣܳܢܶܝܢ ܠܳܟ ܚܰܝ̈ܶܐ ܘܡܺܝ̈ܬܶܐ 
                    ܠܟܽܠ ܪ̈ܽܘܟܳܒܺܝܢ ܫܳܪܶܐ ܐܰܢ̱ܬ ܘܰܡܚܰܒܶܠ ܐܰܢ̱ܬ 
                    
                
                
                    7
                    ܠܰܘ ܡܰܘܬܳܐ ܓܰܠܝܳܐ ܩܳܛܶܠ ܐܰܘ ܣܳܛܳܢܳܐ 
                    ܡܰܘܬܳܟ ܗ̱ܽܘ ܟܰܣܝܳܐ ܩܳܛܶܠ ܠܰܒܢܰܝ̈ ܐ̱ܢܳܫܳܐ 
                    
                
                
                    8
                    ܠܳܐ ܗܳܐ ܣܢܶܐ ܫܶܡܝ̱ ܐܰܝܟ ܕܺܝܠܳܟ ܕܰܒܣܳܛܳܢܰܐ ܗ̱ܘ
                    ܡܰܠܰܐܟܳܐ ܐܰܡܬܶܠ ܢܰܦܫܶܗ ܒܽܐܘܪܚܳܐ ܠܒܶܠܥܰܡ
                    
                
                
                    9
                    ܡܳܐ ܕܳܡܶܐ ܠܺܝ ܫܡܳܟ ܗܳܢܳܐ ܐܳܘ ܣܳܛܳܢܳܐ 
                    ܕܡܶܢ ܐܽܘܪܚܳܐ ܣܛܰܝܬ ܐܳܦ ܐܰܣܛܺܝܬ ܠܳܐܕܳܡ ܫܰܒܪܳܐ
                    
                
                
                    10
                    ܠܳܐ ܬܶܦܗܶܐ ܐܰܝܟ ܗܶܕܝܽܘܛܳܐ ܘܬܰܘܒܶܕ ܫܰܪܒܳܟ 
                    ܕܪܽܘܫ ܡܰܘܬܳܐ ܐܶܢ ܣܳܦܶܩ ܐܰܢ̱ܬ ܠܰܗ̈ܦܳܟܳܬܳܐ 
                    
                    
                    
                
                
                    11
                    ܝܳܕܰܥ ܐܰܢ̱ܬ ܕܰܨܢܺܝܥ ܐܰܢ̱ܬ ܗ̱ܽܘ ܐܳܘ ܣܳܛܳܢܳܐ 
                    ܠܡܰܬܩܳܢܽܘ ܡܶܢ ܚܶܠܳܐ ܡܰܚܢܽܘܩܺܝܬܳܐ 
                    
                
                
                    12
                    ܐܰܘܦܺܝ ܠܶܗ ܕܪܳܫܳܟ ܡܰܘܬܳܐ ܕܰܐܝܢܳܐ ܕܚܳܐܶܒ
                    ܡܳܐ ܕܰܓܡܰܪ ܘܰܐܘܦܺܝ ܡܶܠܰܘ̈ܗ̱ܝ ܫܰܪܺܝ ܡܨܰܥܰܪ
                    
                
                
                    13
                    ܨܶܝܕ ܟܽܠ ܐܺܝܬܰܝ ܙܰܟܳܝܳܐ ܘܒܳܟ ܚܳܐܶܒ ܐ̱ܢܳܐ 
                    ܢܦܺܝܣܳܟ ܐܳܕܳܡ ܕܰܙܟܺܝܬܶܗ ܐܳܘ ܣܳܛܳܢܳܐ 
                    
                
                
                    14
                    ܐܶܢܳܐ ܐ̱ܢܳܐ ܕܦܶܟܪܶܬ ܘܰܫܕܺܝܬܶܗ ܠܳܐܕܳܡ ܩܽܘܕܡܰܝܟ
                    ܒܓܰܢ̱ܒܳܪܳܐ ܕܰܦܟܰܪ ܨܶܢܥ̈ܳܬܝ̱ ܐܶܬܺܝܬ ܐܶܬܢܰܨܚܶܬ
                    ܀܀܀
                
                
                    15
                    ܐܶܢܳܐ ܐ̱ܢܳܐ ܕܩܶܛܪܶܬ ܚܰܕ̱ܬܳܐܺܝܬ ܬܳܓܳܐ ܒܬܺܐܒܶܝܠ
                    ܕܠܳܐܕܳܡ ܪܺܝܫ ܓܰܢ̱ܒܳܪ̈ܶܐ ܚܶܒܫܶܬ ܒܰܫܝܽܘ̇ܠ
                    
                
                
                    16
                    ܐܶܢܳܐ ܩܛܰܠܬܶܗ ܒܡܰܘܬܳܐ ܟܰܣܝܳܐ ܠܳܐܕܳܡ ܕܰܚܛܳܐ 
                    ܐܰܢ̱ܬ ܡܰܘܬܳܐ ܠܡܺܝܬܰܐ ܗ̱ܘ ܐܰܡܺܝܬܬ ܕܰܩܛܺܝܠ ܗ̱ܘܳܐ ܠܺܝ
                    
                
                
                    17
                    ܟܰܕ ܨܒܰܝܬ ܒܺܝܫܳܐ ܠܡܶܙܟܳܐ ܢܰܦܫܳܟ ܐܰܣܢܺܝܬ
                    ܕܰܐܢ̱ܬ ܡܰܘܬܳܐ ܘܰܐܢ̱ܬ ܣܳܛܳܢܳܐ ܘܰܙܥܽܘܪ ܗ̱ܽܘ ܠܳܟ
                    
                
                
                    18
                    ܗܘܰܝܬ ܫܳܠܶܐ ܡܳܕܶܝܢ ܡܰܘܬܳܐ ܐܰܝܟ ܚܰܠܳܫܳܐ
                    ܕܠܳܐ ܒܡ̈ܶܠܶܐ ܘܠܳܐ ܒܰܥܒܳܕ̈ܶܐ ܥܰܙܺܝܬ ܠܰܡܩܳܡ
                    
                
                
                    19
                    ܠܒܺܝܫܬܳܟ ܗ̱ܽܘ ܙܟܺܝܬ ܒܺܝܫܳܐ ܐܶܢ ܦܳܪܶܫ ܐܰܢ̱ܬ
                    ܟܠܺܝܠܳܟ ܟܽܠܶܗ ܟܽܘܐܳܪܰܐ ܗ̱ܘ ܐܶܢ ܪܳܓܶܫ ܐܰܢ̱ܬ
                    
                
                
                    20
                    ܐܶܢܳܐ ܐܶܚܽܘܒ ܘܰܐܢ̱ܬ ܐܶܨܛܰܚܳܐ ܐܳܘ ܣܳܛܳܢܳܐ 
                    ܛܳܒ ܠܺܝ ܕܶܐܗܘܶܐ ܗܶܕܝܽܘܛܳܐ ܘܠܳܐ ܣܳܪܽܘܚܳܐ 
                    
                
                
                    21
                    ܒܪܺܝܟ ܟܺܐܢܳܐ ܕܦܰܠܶܓ ܐܶܢܽܘܢ ܕܳܐܘܶܝܢ ܗ̱ܘܰܘ ܛܳܒ
                    ܒܪܺܝܟ ܛܳܒܳܐ ܕܰܡܐܰܘܶܐ ܠܰܢ ܕܰܦܠܺܝܓܺܝܢ ܚ̱ܢܰܢ
                    
                
                
                    22
                    ܐܶܙܟܶܐ ܠܒܺܝܫܳܐ ܒܫܽܘܒܩܳܢܳܟ ܐܳܘ ܚܳܐܶܢ ܟܽܠ
                    ܘܶܐܙܟܶܐ ܠܡܰܘܬܳܐ ܒܢܽܘܚܳܡܳܟ ܐܳܘ ܡܰܚܶܐ ܟܽܠ