Ephrem the Syrian. “Nisibis 55.” Digital Syriac Corpus. Last modified June 12, 2019. https://syriaccorpus.org/309.
    
        
            
                Nisibis LV
            
            
                
                    ܕ ܒܰܪ ܩܳܠܶܗ
                
                
                    1
                    ܒܺܝܫܳܐ ܠܡܰܘܬܳܐ ܗܳܐ ܡܨܰܥܰܪ ܘܳܐܦ ܡܶܨܛܰܥܰܪ
                    ܡܶܢܗܽܘܢ ܘܰܒܗܽܘܢ ܐܳܦ ܠܗܽܘܢ ܩܽܘܠܩܳܠܰܝ̈ܗܽܘܢ 
                    
                    ܥܽܘܢܺܝܬܳܐ : ܠܳܟ ܫܽܘܒܚܳܐ ܒܰܪ ܡܳܪܶܐ ܟܽܠ ܕܡܺܝܬ ܡܶܛܽܠ ܟܽܠ
                    ܘܶܐܬܢܰܚܰܡ ܕܰܠܟܽܠ ܢܰܚܶܐ ܒܝܽܘܡ ܡܶܐܬܺܝܬܶܗ
                    
                
                
                    2
                    ܝܰܘܢܳܢ ܕܰܙܟܳܟ ܘܰܦܢܳܐ ܗܘܳܐ ܡܶܢܳܗ̇ ܕܰܫܝܽܘ̇ܠ
                    ܣܢܺܐܓܪܳܐ ܗܘܳܐ ܠܺܝ ܕܰܠܡܳܢܳܐ ܚܝܰܘ ܚܰܛܳܝ̈ܶܐ 
                    
                
                
                    3
                    ܠܳܐ ܬܶܥܫܽܘܩܳܝܗ̱ܝ ܐܳܘ ܒܺܝܫܳܐ ܠܗܰܘ ܒܰܪ ܡܰܬܰܝ
                    ܦܰܪܨܽܘܦܳܐ ܕܚܶܡܬܳܐ ܚܰܘܺܝ ܕܢܰܣܓܽܘܢ ܢܰܘܕܽܘܢ
                    
                
                
                    4
                    ܛܳܒ ܦܰܚܺܝܚ ܟܽܠܶܗ ܦܝܳܣܳܟ ܡܰܘܬܳܐ ܛܪܽܘܢܳܐ 
                    ܠܳܐ ܓܶܝܪ ܒܣܶܡ ܠܺܝ ܡܶܕܶܡ ܡܶܢ ܟܽܠ ܕܶܐܡܰܪܬ 
                    
                
                
                    5
                    ܐܶܡܰܬܝ̱ ܗ̱ܽܘ ܓܶܝܪ ܒܶܣܡܰܬ ܠܳܟ ܡܶܠܰܬ ܩܽܘܫܬܳܐ 
                    ܦܰܚܬܰܐ ܗ̱ܘ ܒܶܝܬ ܠܳܟ ܠܰܫܪܳܪܳܐ ܐܳܘ ܟܰܕܳܒܳܐ 
                    
                
                
                    6
                    ܟܺܐܢܳܐ ܐܺܝܬܰܝ ܡܶܢ ܝܰܘܡܰܝ̈ ܠܰܘ ܬܰܝܳܒܳܐ 
                    ܐܶܢܳܐ ܐ̱ܢܳܐ ܕܡܰܥܕܶܐ ܐ̱ܢܳܐ ܡܶܢܳܟ ܠܰܒܢܰܝ̈ ܐ̱ܢܳܫ̈ܳܐ
                    
                
                
                    7
                    ܩܰܕܳܐ ܬܝܳܒܽܘܬܳܟ ܡܰܘܬܳܐ ܫܰܦܺܝܪ ܐܶܬܰܝܬ
                    ܗܳܐ ܐܳܦ ܫܳܐܽܘ̇ܠ ܒܰܢܒܺܝ̈ܶܐ ܥܰܝܛܳܐ ܪܰܒܳܐ 
                    
                
                
                    8
                    ܐܶܢ ܐܰܢ̱ܬ ܡܰܘܬܐ ܬܶܙܕܰܕܰܩ ܐܳܦ ܠܳܐ ܥܰܠ ܢܰܦܫܝ̱
                    ܣܰܒܪܳܐ ܡܳܕܶܝܢ ܦܳܣܶܩ ܐ̱ܢܳܐ ܕܠܳܐ ܬܳܐܶܒ ܐ̱ܢܳܐ
                    
                
                
                    9
                    ܦܬܰܟܪܳܐ ܥܰܡ ܡܳܪܝ̱ ܠܳܐ ܥܶܒܕܶܬ ܣܳܢܶܐ ܡܳܪܶܗ
                    ܒܰܦܬܰܟܪ̈ܶܐ ܡܺܝ̈ܬܶܐ ܠܚܰܝ̈ܶܐ ܗܳܐ ܩܳܛܶܠ ܐܰܢ̱ܬ
                    ܀܀܀
                
                
                    10
                    ܕܰܦܠܶܓܝ̱ ܐܰܢ̱ܬ ܡܰܘܬܳܐ ܝܳܕܰܥ ܐ̱ܢܳܐ ܘܶܐܢܳܐ ܦܶܠܓܳܟ
                    ܦܠܶܓܝ̱ ܗ̱ܽܘ ܬܳܐܶܒ ܐܶܢ ܬܳܐܶܒ ܬܳܡܰܗ ܐ̱ܢܳܐ ܕܶܝܢ 
                    
                
                
                    11
                    ܫܰܘܬܳܦܳܟ ܐܰܢ̱ܬ ܒܰܡܢܳܬܳܐ ܘܠܳܐ ܒܰܚܛܺܝܬܳܐ 
                    ܠܺܝ ܩܛܺܝ̈ܠܶܐ ܘܠܳܟ ܩܳܛܽܘ̈ܠܶܐ ܕܰܐܚܛܺܝܬ ܐܶܢܽܘܢ 
                    
                
                
                    12
                    ܬܶܒܟܶܐ ܥܪܺܝܡܽܘܬܝ̱ ܥܰܠ ܢܰܦܫܳܗ̇ ܕܥܰܡܳܟ ܕܪܰܫܬ
                    ܨ̈ܶܢܝܳܬܝ̱ ܥܠܰܝ ܢܶܬܐܰܒ̈ܠܳܢ ܕܡܰܛܺܝܬ ܨܶܐܕܰܝܟ
                    
                
                
                    13
                    ܩܶܨܡ̈ܶܐ ܘܰܢܚܳܫ̈ܶܐ ܘܙܳܟܽܘܪ̈ܶܐ ܥܰܡ ܟܽܠ ܚܰܘ̈ܒܺܝܢ
                    ܢܽܘܪܳܐ ܕܰܐܣܶܦܬ ܒܬܺܐܒܶܝܠ ܒܰܫܝܽܘ̇ܠ ܕܶܥܟܰܬ
                    
                
                
                    14
                    ܬܰܝܳܒܳܐ ܕܨܰܠܶܠ ܒܳܩ̈ܶܐ ܘܰܒܠܰܥ ܟܺܐܢ̈ܶܐ 
                    ܢܶܨܪܽܘܢܳܟ ܢܰܟ̈ܦܶܐ ܕܓܳܥܶܝܢ ܡܶܢ ܓܰܘ ܟܰܪܣܳܟ
                    
                
                
                    15
                    ܒܶܝܬ ܓܰܙܰܐ ܗ̱ܘ ܢܛܺܝܪܺܝܢ ܠܺܝ ܟܽܠ ܙܰܕ̈ܺܝܩܶܐ 
                    ܢܽܘܚܳܡܗܽܘܢ ܠܳܟ ܡܶܬܠܰܚܰܡ ܕܰܪܕܰܦܬ ܐܶܢܽܘܢ 
                    
                
                
                    16
                    ܝܰܥܢܳܐ ܕܰܠܟܽܠܳܗ̇ ܒܪܺܝܬܳܐ ܚܰܡܠܳܗ̇ ܒܰܡܥܰܘ̈ܗ̱ܝ
                    ܗܳܐ ܡܰܗܶܠ ܒܺܝ ܕܶܐܫܬܰܠܚܶܬ ܡܶܢ ܩܶܢܝܳܢܰܝ̈
                    
                
                
                    17
                    ܩܕܳܡ ܢܶܓܕܳܐ ܠܳܐ ܬܶܬܪܰܥܰܡ ܠܳܐ ܓܶܝܪ ܡܛܳܟ
                    ܢܺܐܬܶܐ ܝܰܘܡܳܐ ܕܰܬܒܰܓܶܢ ܘܶܐܫܡܰܥ ܘܶܐܚܕܶܐ 
                    
                
                
                    18
                    ܬܺܐܬܶܐ ܢܽܘܪܳܐ ܕܳܐܦ ܡܶܫܟܳܟ ܡܶܢܳܟ ܬܶܫܽܘܛ
                    ܐܰܝܟ ܕܰܢܫܰܛܬܳܝܗ̱ܝ ܒܝܰܕ ܚܶܨܦܳܐ ܡܶܫܟܶܗ ܕܺܐܝܽܘ̇ܒ
                    
                
                
                    19
                    ܀܀܀
                    ܪܺܝܚܳܐ ܕܫܰܦܠܽܘܬܳܐ ܫܰܪܺܝ ܕܰܐܝܟ ܢܶܦܪܰܚ ܒܺܝ
                    ܚܶܠܡܰܐ ܗ̱ܘ ܟܰܝ ܕܶܐܢܳܐ ܒܰܛܠܶܬ ܛܽܘܪܳܐ ܙܥܽܘܪܳܐ 
                    
                
                
                    20
                    ܠܳܐ ܗ̱ܘܳܐ ܡ̈ܶܠܶܐ ܚܣܰܪ ܗ̱ܘ̈ܰܝ ܠܺܝ ܘܥܰܠ ܗܰܘ ܫܶܬܩܶܬ
                    ܥܰܠ ܥܶܕܳܢܰܐ ܗ̱ܘ ܟܶܪܝܰܬ ܠܺܝ ܕܰܢܦܰܩ ܡܰܓܳܢ 
                    
                
                
                    21
                    ܬܽܘܟܶܗ ܕܡܰܡܠ̱ܠܳܟ ܛܳܒ ܣܰܓܺܝ ܠܘܰܝ ܠܳܐ ܫܡܰܥܬܶܗ
                    ܕܪܶܥܝܳܢܝ ܟܽܠܶܗ ܐܺܝܬܰܘܗ̱ܝ ܗ̱ܘܳܐ ܨܶܝܕ ܣܽܘܥܪܳܢܝ̱
                    
                
                
                    22
                    ܗܳܕܶܐ ܐ̱ܢܳܫܽܘܬܳܐ ܕܶܐܒܕܰܬ ܦܶܗܝܳܐ ܣܰܪܚܳܗ̇
                    ܒܶܛܠܳܢܳܐ ܥܰܡ ܒܶܣܝܳܢܳܐ ܒܢܺܝܪܳܐ ܟܰܕܢܽܘܗ̇
                    
                
                
                    23
                    ܗܰܕܝܳܐܳܐ ܕܪܶܓܬܳܐ ܡܳܡܽܘܢܳܐ ܣܰܦܣܺܪ ܙܰܒܢܳܗ̇
                    ܚܶܪܝܳܢܳܐ ܥܰܡ ܫܽܘܒܗܳܪܳܐ ܗܘܰܘ ܥܰܪ̈ܳܒܶܐ 
                    
                
                
                    24
                    ܒܰܐܡܺܝܢܽܘܬܳܐ ܚܠܳܦ ܚܰܝܠܳܐ ܡܶܬܟܰܬܰܫ ܐ̱ܢܳܐ 
                    ܘܶܐܢ ܗܽܘ ܕܒܳܣܶܐ ܐ̱ܢܳܐ ܩܰܠܺܝܠ ܠܰܝܬܰܘܗ̱ܝ ܫܽܘܠܛܳܢܝ̱
                    
                
                
                    25
                    ܒܢܽܘܛܦ̈ܳܬܳܐ ܐܰܡܺܝ̈ܢܳܬܳܐ ܫܽܘ̈ܥܶܐ ܒܶܙܥܶܬ
                    ܕܫܰܕܳܠܳܐ ܐܰܡܺܝܢܳܐ ܐܳܦ ܛܽܘܪܳܐ ܡܶܫܟܰܚ ܫܳܪܶܐ 
                    
                
                
                    26
                    ܥܝܳܕܳܐ ܐܳܦ ܠܶܗ ܠܰܟܝܳܢܳܐ ܡܳܪܳܐ ܗܳܘܶܐ 
                    ܡܰܠܶܦ ܢܳܓܶܕ ܐܳܦ ܠܰܐܪܝܳܐ ܐܰܝܟ ܠܰܒܥܺܝܪܳܐ 
                    
                
                
                    27
                    ܥܝܳܕܳܐ ܢܺܝܚܳܐ ܘܝܽܘܬܪܳܢܳܐ ܘܰܐܡܺܝܢܽܘܬܳܐ 
                    ܒܗܽܘܢ ܡܶܙܕܰܟܝܳܐ ܚܺܐܪܽܘܬܳܐ ܩܰܫܝܰܬ ܡܶܢ ܟܽܠ
                    
                
                
                    28
                    ܐܶܢ ܡܶܬܥܰܙܰܙ ܨܶܒܝܳܢܳܗ̇ ܣܽܘܛܡ̈ܶܐ ܬܳܒܰܪ
                    ܀܀܀
                    ܘܶܐܢ ܒܳܣܶܐ ܢܶܫܒܳܐ ܡܚܺܝܠܳܐ ܡܨܶܐ ܨܳܐܶܕ ܠܳܗ̇
                    
                
                
                    29
                    ܐܶܢ ܗܽܘ ܕܢܶܗܡܰܬ ܚܺܐܪܽܘܬܳܐ ܐܶܬܒܰܕܰܪܢܰܢ 
                    ܘܶܐܢ ܕܶܝܢ ܒܶܗܠܰܬ ܟܶܢܫܰܢ ܚܢܰܢ ܠܰܢ ܕܰܢܒܰܙܰܚ ܒܳܗ̇
                    
                
                
                    30
                    ܠܳܐ ܢܰܣܓܶܐ ܢܡܰܠܶܠ ܕܰܠܡܳܐ ܢܰܣܓܶܐ ܢܶܒܛܰܠ
                    ܒܚܽܘܒܳܐ ܢܰܩܪܶܒ ܥܰܡ ܫܽܘܪܳܐ ܘܗܳܐ ܐܶܬܬܰܪܰܥ
                    
                
                
                    31
                    ܙܶܠ ܐܰܢ̱ܬ ܘܰܣܥܽܘܪ ܟܽܘܪ̈ܗܳܢܶܐ ܘܶܐܢܳܐ ܦܰܚ̈ܶܐ 
                    ܕܠܺܝ ܚܰܘ̈ܒܶܐ ܘܠܳܟ ܡܰܘܬܳܢܳܐ ܢܝܳܚܳܐ ܪܰܒܳܐ 
                    
                
                
                    32
                    ܘܳܐܦܶܢ ܒܶܛܠܶܬ ܠܳܐ ܒܛܰܠܬ ܡܶܢ ܡܰܪܢܺܝܬܳܐ 
                    ܕܨܶܒܝܳܢܝ̱ ܡܶܢ ܡܬܽܘܡ ܠܳܐ ܒܛܶܠ ܕܰܡܛܰܝܒ ܗ̱ܽܘ