Ephrem the Syrian. “Nisibis 56.” Digital Syriac Corpus. Last modified June 12, 2019. https://syriaccorpus.org/310.
    
        
            
                Nisibis LVI
            
            
                
                    ܗ ܒܰܪ ܩܳܠܶܗ
                
                
                    1
                    ܥܰܡ ܚܺܐܪܽܘܬܳܐ ܐܰܓܽܘܢܳܐ ܐܺܝܬ ܠܳܟ ܒܺܝܫܳܐ 
                    ܒܠܳܡܳܐ ܡܰܨܝܳܐ ܕܬܰܪܡܶܐ ܒܳܟ ܐܶܢ ܫܳܦܰܪ ܠܳܗ̇
                    
                    ܥܽܘܢܺܝܬܳܐ : ܠܳܟ ܫܽܘܒܚܳܐ ܕܰܒܙܳܟܽܘܬܳܟ ܐܶܬܚܰܝܰܠܢ ܚ̱ܢܰܢ
                    ܘܰܒܢܽܘܚܳܡܳܟ ܐܰܡܣܰܪܢ ܚ̱ܢܰܢ ܐܳܦ ܥܰܠ ܡܰܘܬܳܐ
                    
                
                
                    2
                    ܗܶܢܽܘܢ ܠܗܽܘܢ ܬܽܘܒ ܗܳܐ ܦܰܪܣܺܝܘ ܕܰܡܚܺܝ̈ܠܶܐ ܐܶܢܽܘܢ
                    ܡܰܘܬܳܐ ܠܒܺܝܫܳܐ ܐܰܕܟܰܪ ܠܶܗ ܓܰܢ̱ܒܳܪܽܘܬܶܟܝ̱
                    
                
                
                    3
                    ܢܽܘܪܳܟ ܒܩܶܢܳܟ ܐܳܘ ܡܰܘܬܳܐ ܘܠܳܐ ܪܳܓܶܫ ܐܰܢ̱ܬ
                    ܗܰܝܡܳܢܽܘܬܳܐ ܕܥܰܢܺܝܕ̈ܶܐ ܠܳܟ ܛܽܘܠܩܳܐ ܗ̱ܝ
                    
                    ܀܀܀
                
                
                    4
                    ܗܳܐ ܡܰܘܬܳܐ ܘܒܺܝܫܳܐ ܐܰܟܪܶܙ ܓܰܢ̱ܒܳܪܽܘܬܶܟܝ̱
                    ܐܳܦ ܗܽܘ ܒܺܝܫܳܐ ܐܰܕܟܰܪ ܠܶܗ ܗܰܝܡܳܢܽܘܬܶܟܝ̱
                    
                
                
                    5
                    ܐܶܢ ܕܶܝܢ ܗܶܢܽܘܢ ܕܰܠܩܽܘܒܠܶܟܝ̱ ܢܶܗܘܽܘܢ ܚܽܘܠܳܦܰܝܟܝ̱
                    ܗܳܕܶܐ ܪܰܒܳܐ ܗ̱ܝ ܕܪܳܕ̈ܽܘܦܶܐ ܗܘܰܘ ܟܳܪ̈ܽܘܙܶܐ 
                    
                
                
                    6
                    ܐܶܢܳܐ ܡܰܘܕܶܐ ܐ̱ܢܳܐ ܐܳܘ ܒܺܝܫܳܐ ܕܰܐܝܟ ܪܰܒܰܝܬܳܐ 
                    ܢܳܛܰܪ ܐ̱ܢܳܐ ܓܰܙܰܝ̈ ܡܰܠܟܳܐ ܥܰܕ ܡܶܐܬܺܝܬܳܐ 
                    
                
                
                    7
                    ܐܶܢܳܐ ܡܰܘܬܳܐ ܛܳܒ ܟܳܦܰܪ ܐ̱ܢܳܐ ܕܠܰܘ ܕܰܐܠܳܗܰܐ ܗ̱ܘ 
                    ܗܳܢܳܐ ܓܰܙܳܐ ܕܨܶܢܥܬܳܐ ܕܰܡܟܰܢܰܫ ܠܺܝ
                    
                
                
                    8
                    ܛܰܒܥܳܟ ܡܳܕܶܝܢ ܕܙܺܐܦܰܐ ܗ̱ܘ ܐܳܘ ܣܳܛܳܢܳܐ 
                    ܕܒܶܝܬ ܣܺܝ̈ܡܳܬܶܗ ܕܰܐܠܳܗܳܐ ܠܳܐ ܡܶܬܩܰܒܰܠ 
                    
                
                
                    9
                    ܛܰܒܥܳܐ ܚܰܕ̱ܬܳܐ ܛܳܒܰܥ ܐ̱ܢܳܐ ܒܰܕܡܽܘܬ ܡܰܠܟܳܐ 
                    ܗܳܐ ܬܰܓܳܪ̈ܰܝ ܒܰܒܪܺܝܬܳܐ ܬܽܘܟܳܐ ܡܰܝܬܶܝܢ 
                    
                
                
                    10
                    ܐܰܠܳܗܳܐ ܡܶܢ ܠܳܐ ܡܶܕܶܡ ܒܪܳܐ ܟܽܠ ܡܶܕܶܡ
                    ܘܶܐܢܳܐ ܒܪܺܝܬ ܡܶܢ ܠܳܐ ܡܶܕܶܡ ܥܰܘܠܳܐ ܪܰܒܳܐ 
                    
                
                
                    11
                    ܣܟܺܝܪ ܘܰܣܛܺܝܡ ܦܽܘܡܳܟ ܒܺܝܫܳܐ ܕܰܟܡܳܐ ܡܰܪܳܚ 
                    ܕܦܽܘܚܳܡܳܟ ܨܶܝܕ ܒܳܪܽܘܝܳܐ ܗܳܐ ܡܶܬܩܰܪܰܒ
                    
                
                
                    12
                    ܠܺܝ ܡܰܘܬܳܐ ܫܰܠܺܝܛ ܗ̱ܽܘ ܠܺܝ ܕܰܐܡܪܰܚ ܘܺܐܡܰܪ
                    ܠܶܫܳܢܳܟ ܕܺܝܠܳܟ ܥܰܒܕܰܐ ܗ̱ܘ ܕܰܬܚܶܝܬ ܩܶܢܛܰܐ ܗ̱ܘ 
                    
                
                
                    13
                    ܀܀܀
                    ܦܰܚܬܰܐ ܗ̱ܘ ܡܶܟܺܝܠ ܒܰܝܢܳܬܰܢ ܐܳܘ ܣܳܛܳܢܳܐ 
                    ܦܰܩܪܳܐܺܝܬ ܓܶܝܪ ܒܡܳܪܳܟ ܗܳܐ ܣܳܒܶܟ ܐܰܢ̱ܬ 
                    
                
                
                    14
                    ܡܰܘܬܳܐ ܠܡܳܢܳܐ ܐܶܬܦܰܠܰܓܬ ܥܰܠ ܫܰܘܝܽܘܬܰܢ
                    ܗܘܺܝ ܠܺܝ ܚܰܒܪܳܐ ܘܗܰܕܳܡܳܐ ܘܗܳܐ ܐܰܡܠܶܟܢ ܚ̱ܢܰܢ
                    
                
                
                    15
                    ܬܳܐ ܢܶܫܡܽܘܛ ܙܰܘܓܳܐ ܕܣܰܝ̈ܦܶܐ ܥܰܠ ܐ̱ܢܳܫܽܘܬܳܐ
                    ܐܶܢܳܐ ܒܟܶܣܝܳܐ ܘܰܐܢ̱ܬ ܒܓܶܠܝܳܐ ܘܗܳܐ ܓܰܡܰܪܢܳܗ̇
                    
                
                
                    16
                    ܚܛܺܝܬܳܐ ܘܰܫܝܽܘ̇ܠ ܝܰܗ̱ܒ ܡܰܠܟܳܐ ܬܰܪ̈ܬܶܝܢ ܠܰܬܪ̈ܰܝܢ 
                    ܕܶܐܢ ܗܽܘ ܠܰܡ ܕܶܐܬܦܰܠܰܓܬܽܘܢ ܐܶܬܛܰܠܰܩܬܽܘܢ
                    
                
                
                    17
                    ܚܙܰܘ ܡܰܝ̈ܳܐ ܕܶܐܢ ܐܶܬܒܰܕܰܪܘ ܘܐܳܦ ܐܶܫܬܰܦܰܠܘ̱ 
                    ܘܶܐܢ ܐܶܬܟܰܢܰܫܘ̱ ܐܶܬܥܰܫܰܢܘ ܐܰܝܟ ܕܳܐܦ ܐܰܢ̱ܬܽܘܢ 
                    
                
                
                    18
                    ܐܶܬܦܰܠܰܓܬܽܘܢ ܐܰܘܦܺܝܬܽܘܢ ܐܰܝܟ ܚܰܠܳܫ̈ܶܐ 
                    ܘܶܐܬܡܰܙܰܓܬܽܘܢ ܐܰܡܠܶܟܬܽܘܢ ܐܰܝܟ ܚܰܣܺܝ̈ܢܶܐ 
                    
                
                
                    19
                    ܚܽܘܒܳܐ ܠܣܰܓܺܝ̈ܐܶܐ ܢܳܣܶܟ ܐܰܝܟ ܕܰܠܟܽܘܪܳܐ 
                    ܘܥܳܒܶܕ ܚܰܕ ܓܽܘܫܡܳܐ ܪܰܒܳܐ ܕܰܠܟܽܠ ܙܳܟܶܐ 
                    
                
                
                    20
                    ܒܶܗ ܚܶܟܡ̈ܳܬܳܐ ܘܨܶܢܥ̈ܳܬܳܐ ܚܰܝܠܳܐ ܘܥܽܘܫܢܳܐ 
                    ܡܶܢ ܨܰܠܡܳܐ ܕܶܐܫܬܺܝܢ ܐܰܡܺܝܢ ܪܰܒ ܗ̱ܽܘ ܣܰܓܝ
                    
                
                
                    21
                    ܐܶܬܪܰܥܰܘ ܢܶܟܢܽܘܫ ܢܺܐܙܰܠ ܥܰܠ ܗܰܘ ܕܰܓܒܳܐ 
                    ܕܰܟܡܳܐ ܕܳܐܘܶܐ ܠܰܝܬ ܦܪܽܘܣ ܕܰܢܚܽܘܒ ܡܶܢ ܡܬܽܘܡ
                    
                
                
                    22
                    ܗܳܠܶܝܢ ܡܰܠܶܠܘ̱ ܙܺܝ̈ܥܶܐ ܘܟܰܢܶܫܘ̱ ܘܶܐܬܰܘ 
                    ܀܀܀
                    ܝܰܘܡܳܟ ܡܳܪܝ̱ ܢܶܟܢܽܘܫ ܐܶܢܽܘܢ ܨܶܝܕ ܓܺܗܰܢܳܐ 
                    
                
                
                    23
                    ܒܰܚܢܳܢܳܟ ܠܳܟ ܡܳܪܝ̱ ܐܶܣܓܽܘܕ ܟܰܕ ܐܶܬܢܰܚܰܡ
                    ܒܫܺܝܦܽܘܪܳܟ ܠܰܒܪܳܟ ܐܰܘܕܳܐ ܟܰܕ ܐܶܬܚܰܣܶܐ