Ephrem the Syrian. “Nisibis 57.” Digital Syriac Corpus. Last modified June 12, 2019. https://syriaccorpus.org/311. Nisibis LVII ܘܡܶܢܶܗ ܒܰܪ ܩܳܠܶܗ 1 ܨܽܘܬܘ̱ ܐܰܚ̈ܰܝ ܟܰܕ ܡܰܗܠ ܒܶܗ ܡܰܘܬܳܐ ܒܒܺܝܫܳܐ ܥܰܠ ܕܰܐܚܛܺܝ ܠܗܰܘ ܪܺܝܫ ܛܽܘܗܡܰܢ ܘܰܠܝܳܠܶܕܬܶܗ ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܒܡܽܘܟܳܟܳܟ ܚܳܒ ܣܳܛܳܢܳܐ ܘܠܳܐܕܳܡ ܕܶܐܫܬܰܦܰܠ ܗ̱ܘܳܐ ܪܰܡܪܶܡ ܫܰܦܠܳܟ 2 ܢܶܚܙܽܘܢ ܦܽܘܪܣܝܳܟ ܪܰܒܳܐ ܝܰܠܕ̈ܰܘܗ̱ܝ ܕܳܐܕܳܡ ܐܰܝܟ ܕܰܐܗܠܶܬ ܒܦܽܘܪܣܳܝܶܗ ܟܰܕ ܐܰܚܛܺܝܬܳܝܗ̱ܝ 3 ܬܶܫܒܽܘܩ ܚܰܘܳܐ ܠܗܰܘ ܚܶܘܝܳܐ ܘܒܳܟ ܬܶܬܓܪܶܐ ܕܰܐܢ̱ܬ ܗ̱ܽܘ ܢܟܰܠܬܳܗ̇ ܠܫܰܒܪܽܘܬܳܐ ܐܰܘ ܬܰܢܺܝܢܳܐ 4 ܢܶܚܙܶܝܘܗ̱ܝ ܗܳܒܶܝܠ ܠܩܰܐܺܝܢ ܕܰܥܠܰܝܟ ܐܶܬܳܐ ܒܪܰܒܳܐ ܟܦܺܝܪܳܐ ܡܶܬܥܰܕܰܠ ܬܰܠܡܺܝܕ ܪܽܘܓܙܳܐ 5 ܢܽܘܚ ܕܰܙܟܳܐ ܗ̱ܘܳܐ ܠܡܳܡܽܘܠܳܐ ܐܰܝܟ ܕܰܠܡܰܘܬܳܐ ܒܦܽܘܡܶܗ ܕܚܳܡ ܓܶܚܟܰܬ ܥܠܰܘܗ̱ܝ ܕܰܙܟܳܝܗ̱ܝ ܚܰܡܪܳܐ 6 ܠܰܘ ܢܽܘܚ ܐܶܣܬܓܶܦ ܐܶܠܳܐ ܡܳܐܢܳܟ ܕܺܝܠܳܟ ܠܒܶܫ ܠܰܘ̈ܛܳܬܳܐ ܕܰܠܒܶܫܬܳܝܗ̱ܝ ܘܰܗܘܳܐ ܥܰܒܕܳܐ 7 ܠܽܘܛ ܕܰܙܟܳܐ ܪܽܘܓܙܳܐ ܕܺܐܝܬܰܘܗ̱ܝ ܛܽܘܦܣܳܟ ܡܰܘܬܳܐ ܠܰܒܢ̈ܳܬܶܗ ܡܶܠܟܰܬ ܡ̈ܰܠܟܶܐ ܕܰܫܦܰܪܘ̱ ܗ̱ܘܰܘ ܠܺܝ 8 ܘܰܐܢ̱ܬܰܬ ܠܽܘܛ ܫܶܡܥܰܬ ܡܶܠܟܳܟ ܕܡܳܐܢܳܟ ܗܘܳܬ ܦܶܠܓܳܟ ܢܺܐܒܰܫ ܕܺܝܒܶܫ ܗ̱ܘܳܐ ܟܽܠܶܗ ܡܳܐܢܳܟ 9 ܗܘܳܬ ܡܶܬܗܰܦܟܳܐ ܓܺܗܰܢܳܐ ܠܥܶܠ ܡܶܢ ܪܺܝܫܳܟ ܕܪܽܘܫܥܳܟ ܗ̱ܽܘ ܗܰܦܟܳܗ̇ ܠܣܳܕܽܘܡ ܥܰܠ ܝܰܬܒܶܝ̈ܗ̇ 10 ܓܰܠܠܰܝ̈ ܢܽܘܪܳܐ ܒܢܽܘܚܳܡܳܐ ܢܶܬܰܓܪܽܘܢ ܒܳܟ ܕܰܒܡܽܘܫܶܐ ܘܒܶܐܠܺܝܳܐ ܥܰܡܳܐ ܓܶܪܝܰܬ 11 ܢܰܗܠܽܘܢ ܒܳܟ ܟܺܐܢ̈ܶܐ ܒܚܰܪܬܳܐ ܘܢܶܚܕܶܐ ܝܰܘܣܶܦ ܗܰܘ ܕܰܐܚ̈ܰܘܗ̱ܝ ܐܰܗܶܠܘ̱ ܗ̱ܘܰܘ ܒܶܗ ܕܫܶܓܫܰܬ ܐܶܢܽܘܢ 12 ܥܶܛܪܳܐ ܕܬܶܢܳܢܳܐ ܢܶܥܽܘܠ ܢܶܚܢܽܘܩ ܪ̈ܶܓܫܰܝܟ ܐܰܝܟ ܕܚܰܢܶܩܘ̱ ܡܰܝ̈ܳܐ ܕܝܰܡܳܐ ܪ̈ܶܓܫܰܝ ܥܰܘ̈ܳܠܶܐ 13 ܢܰܗܠܰܢ ܒܳܟ ܐܳܦ ܢܰܟ̈ܦܳܬܳܐ ܕܰܒܝܰܕ ܡܶܠܟܳܟ ܒ̈ܢܳܬ ܡܳܕܶܝܢ ܐܰܗܶܠ ܗܘܰܝ ܒܶܗ ܒܥܰܡܳܐ ܣܰܟܠܳܐ 14 ܓܰܘܙܰܠܬܳܐ ܒܪܺܝܫܳܟ ܬܶܣܰܦ ܡܶܛܽܘܠ ܫܶܡܫܽܘܢ ܕܰܒܐܰܢ̱ܬܬܳܐ ܓܪܰܥܬܳܝܗ̱ܝ ܣܰܥܪܶܗ ܕܰܐܪܝܳܐ ܕܚܺܝܠܳܐ 15 ܫܳܐܽܘܠ ܕܰܙܟܺܝܬ ܒܰܚܣܳܡܳܐ ܒܩܰܨܡܳܐ ܚܰܣܢܳܟ ܕܫܰܐܶܠ ܘܰܐܣܶܩ ܠܰܫܡܽܘܐܶܝܠ ܡܶܢ ܓܰܘ ܩܰܒܪܶܗ 16 ܠܳܐ ܬܨܰܥܰܪ ܡܺܝܬܳܐ ܚܰܝܳܐ ܠܳܐ ܓܶܝܪ ܣܠܶܩ ܐܰܢ̱ܬ ܗ̱ܽܘ ܣܠܶܩܬ ܒܙܳܟܽܘܪܳܐ ܫܰܘܺܝܬ ܗܽܘ ܓܶܝܪ 17 ܥܰܠ ܓܰܘܙܰܠܬܳܐ ܦܽܘܩܕܳܢܳܐ ܢܶܬܠܝܳܟ ܒܺܝܫܳܐ ܕܒܳܟ ܗ̱ܽܘ ܬܰܠܐܽܘܗ̱ܝ ܥܰܠ ܩܰܝܣܳܐ ܠܰܐܒܫܽܘܠܳܡ 18 ܒܢܽܘܪܳܐ ܬܶܚܙܶܐ ܡܽܘܟܳܟܳܟ ܒܶܝܬ ܛܰܡ̈ܐܳܬܳܐ ܕܰܫܠܶܝܡܽܘܢ ܒܳܟ ܐܶܫܬܰܦܰܠ ܒܶܝܬ ܚ̈ܰܢܦܳܬܳܐ 19 ܬܶܬܠܰܚܰܡ ܠܳܟ ܟܺܐܢܽܘܬܳܐ ܐܰܝܟ ܕܰܫܓܰܪܬܳܗ̇ ܠܺܐܝܙܒܶܠ ܕܶܐܟܠܰܬ ܠܰܢܒܺܝ̈ܶܐ ܐܰܢ̱ܬ ܐܰܣܶܦܬܳܗ̇ 20 ܒܢܽܘܪܳܐ ܬܺܐܩܰܕ ܟܺܐܢܳܐܺܝܬ ܕܰܐܪܘܝܰܬ ܐܶܢܽܘܢ ܠܰܬܪ̈ܶܝܢ ܕܰܐܘܩܶܕ ܐܶܠܺܝܳܐ ܕܓܰܙܶܡܘ̱ ܘܰܣܠܶܩܘ̱ 21 ܥܠܰܝܟ ܐܳܦ ܓܽܘܡܪ̈ܶܐ ܢܶܬܟܰܫܺܝܢ ܢܶܚܙܶܐ ܘܢܶܚܕܶܐ ܗܰܘ ܢܒܽܘܬ ܕܰܟܫܺܝܬ ܥܠܰܘܗ̱ܝ ܝܰܓܪܳܐ ܕܟܺܐܦ̈ܶܐ 22 ܬܰܠܒܶܫ ܒܶܙܚܳܐ ܒܝܽܘܡ ܕܺܝܢܳܐ ܩܕܳܡ ܚ̈ܰܙܳܝܶܐ ܕܰܐܠܒܶܫܬܳܝܗ̱ܝ ܓܰܪܒܳܐ ܠܶܓܚܙܺܝ ܒܓܰܢܳܒܽܘܬܳܟ 23 ܒܒܰܪܩܳܐ ܚܠܳܦ ܓܶܐܪܳܐ ܬܶܒܠܰܥ ܐܳܘ ܣܳܛܳܢܳܐ ܕܒܰܠܒܶܗ ܕܗܰܘ ܝܽܘܫܳܝܳܐ ܓܺܐܪ̈ܶܐ ܩܰܒܥܰܬ 24 ܒܬܰܛܪܳܗ̇ ܕܓܺܗܰܢܳܐ ܬܶܛܒܰܥ ܐܳܘ ܣܳܛܳܢܳܐ ܕܒܰܣܝܳܢܶܗ ܕܓܽܘܒܳܐ ܛܰܒܰܥܬ ܠܗܰܘ ܐܶܪܰܡܝܳܐ 25 ܣܠܶܩ ܕܳܢܺܝܐܶܝܠ ܡܶܢ ܓܽܘܒܳܐ ܕܒܶܗ ܐܰܪܡܺܝܬܳܝܗ̱ܝ ܢܶܬܒܰܝܰܐ ܕܒܐܕܽܘܓܳܐ ܠܥܳܠܰܡ ܢܶܚܙܶܝܟ ܀܀܀ 26 ܢܶܗܦܽܘܟ ܥܰܘܠܳܟ ܥܰܠ ܪܺܝܫܳܟ ܣܢܳܐ ܐ̱ܢܳܫܳܐ ܐܰܝܟ ܕܰܗܦܰܟ ܥܰܘܠܶܗ ܒܪܺܝܫܶܗ ܕܗܳܡܳܢ ܚܰܒܪܳܟ 27 ܟܰܠܰܬ ܡܰܠܟܳܐ ܬܒܰܙܰܚ ܒܳܟ ܒܰܕܡܽܘܬ ܐܶܣܬܺܝܪ ܬܶܒܥܶܐ ܡܶܢܳܗ̇ ܒܝܽܘܡ ܕܺܝܢܳܐ ܕܰܬܦܺܝܣ ܥܠܰܝܟ 28 ܫܪܳܬ ܗܘܳܬ ܢܽܘܪܳܐ ܠܙܰܕܺܝ̈ܩܶܐ ܗܳܢܽܘܢ ܕܦܶܟܪܰܬ ܦܟܳܪܳܐ ܪܰܒܳܐ ܢܶܗܘܶܐ ܠܳܟ ܕܶܠܩܳܐ ܕܢܽܘܪܳܐ 29 ܬܶܬܒܰܣܒܰܣ ܘܰܐܚ̈ܶܐ ܫܰܒܥܳܐ ܢܶܚܙܽܘܢ ܫܶܦܠܳܟ ܒܶܢܝ̈ܳܗ̇ ܕܰܫܡܽܘܢܺܝ ܡܶܢ ܕܺܐܒܰܝ̈ܟ ܐܶܬܒܰܣܒܰܣܘ̱ ܗ̱ܘܰܘ 30 ܬܒܰܙܰܚ ܢܽܘܪܳܐ ܒܩܰܪܩܰܦܬܳܟ ܐܰܝܟ ܕܶܐܫܬܰܥܺܝܬ ܒܰܬܪ̈ܶܝܢ ܪ̈ܺܝܫܰܝܢ ܕܰܢܙܺܝܪ̈ܶܐ ܒܢ̈ܰܝ ܥܰܩܪ̈ܳܬܳܐ 31 ܬܶܫܬܥܶܐ ܢܽܘܪܳܐ ܒܪܺܝܫܳܟ ܕܶܐܡܳܐ ܘܒܰܪܬܳܗ̇ ܒܪܺܝܫܶܗ ܕܝܽܘܚܰܢܳܢ ܒܰܙܰܚ ܕܶܐܫܬܰܢܝܰܬ ܐܶܢܶܝܢ 32 ܫܰܠܗܶܒܺܝܬܳܐ ܬܒܰܙܰܚ ܒܶܗ ܒܪܺܝܫܳܟ ܒܺܝܫܳܐ ܕܥܰܠ ܦܺܝܢܟܳܐ ܒܪܺܝܫܶܗ ܒܰܙܚܰܬ ܕܝܽܘܚܰܢܳܢ