Ephrem the Syrian. “Nisibis 58.” Digital Syriac Corpus. Last modified June 12, 2019. https://syriaccorpus.org/312.
    
        
            
                Nisibis LVIII
            
            
                
                    ܙ ܒܰܪ ܩܳܠܶܗ 
                
                
                    1
                    ܗܳܐ ܡܰܘܬܳܐ ܩܰܕܶܡ ܒܟܰܪ ܕܰܢܒܰܙܰܚ ܒܶܗ 
                    ܒܣܳܛܳܢܳܐ ܕܰܥܬܺܝܕ ܕܰܢܗܶܐ ܒܶܙܚܳܐ ܠܚܰܪܬܳܐ 
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܒܰܙܩܺܝܦܽܘܬܳܟ ܠܒܺܝܫܳܐ ܙܟܰܝܬܳܝܗ̱ܝ
                    ܀܀܀
                    ܘܰܒܢܽܘܚܳܡܳܟ ܫܩܰܠܬ ܙܳܟܽܘܬܳܐ ܘܳܐܦ ܥܰܠ ܡܰܘܬܳܐ
                    
                
                
                    2
                    ܘܰܚܠܳܦ ܡܳܪܰܢ ܐܶܡܰܪ ܗ̱ܘܳܐ ܟܰܕ ܠܳܐܶܛ ܠܶܗ 
                    ܠܗܰܘ ܕܰܗܘܳܐ ܥܶܠܰܬ ܨܰܥܪܶܗ ܘܰܙܩܺܝܦܽܘܬܶܗ
                    
                
                
                    3
                    ܐ̱ܕܽܘܓܳܐ ܢܗܶܐ ܠܳܟ ܩܰܒܪܳܐ ܐܳܘ ܣܳܛܳܢܳܐ 
                    ܕܓܰܕܶܦܬ ܥܰܠ ܩܳܠܳܐ ܩܒܺܝܪܳܐ ܕܨܳܪܝ̱ ܩܰܒܪ̈ܶܐ 
                    
                
                
                    4
                    ܠܡܳܪܝ̱ ܝܳܕܰܥ ܐ̱ܢܳܐ ܘܰܠܒܰܪ ܡܳܪܝ̱ ܐܳܘ ܣܳܛܳܢܳܐ 
                    ܟܶܦܪܶܬ ܒܡܳܪܳܟ ܘܙܰܩܶܦܬܳܝܗ̱ܝ ܠܒܰܪ ܡܳܪܳܟ
                    
                
                
                    5
                    ܗܳܢܰܘ ܫܡܳܐ ܝܳܐܶܐ ܠܳܟ ܩܳܛܶܠ ܡܳܪܶܗ 
                    ܕܩܰܛܠܬܳܝܗ̱ܝ ܒܓܶܠܝܳܢܶܗ ܗܰܘ ܩܛܰܠ ܠܳܟ
                    
                
                
                    6
                    ܥܠܰܝܟ ܢܢܺܝܕ ܟܽܠܢܳܫ ܪܺܝܫܶܗ ܕܒܳܟ ܪ̈ܺܝܫܳܢܶܐ 
                    ܪ̈ܺܝܫܰܝܗܽܘܢ ܐܢܺܝܕܘ̱ ܥܰܠ ܗܰܘ ܡܳܪܳܐ ܕܚ̈ܰܝܶܐ 
                    
                
                
                    7
                    ܩܰܢܝܳܐ ܪܥܺܝܥܳܐ ܬܚܶܝܬ ܪ̈ܶܓܠܶܐ ܕܟܺܐܢ̈ܶܐ ܬܶܗܘܶܐ 
                    ܕܒܳܟ ܐܰܘܚܶܕܘ̱ ܩܰܢܝܳܐ ܒܺܐܝܕܶܗ ܕܰܣܡܳܟ ܟܽܘܠܳܐ 
                    
                
                
                    8
                    ܒܟܠܺܝܠ ܟܽܘܒ̈ܶܐ ܐܶܬܟܰܠܰܠ ܐܰܝܟ ܕܰܢܒܰܕܶܩ 
                    ܕܬܳܓܳܐ ܕܡܰܠܟܽܘܬܳܐ ܫܰܩܠܶܗ ܡܶܢ ܒܶܝܬ ܕܰܘܺܝܕ
                    
                
                
                    9
                    ܒܰܟܠܺܝܠ ܟܽܘ̈ܒܶܐ ܐܶܬܟܰܠܰܠ ܡܰܠܟܳܐ ܕܡ̈ܰܠܟܶܐ 
                    ܘܰܕܨܰܥܪܽܘܗ̱ܝ ܫܰܩܠܶܗ ܬܳܓܳܐ ܡܶܢ ܡ̈ܰܠܟܰܝܗܽܘܢ 
                    
                
                
                    10
                    ܒܢܰܚ̈ܬܰܝ ܒܶܙܚܳܐ ܕܝܰܗ̱ܒܘ̱ ܠܶܗ ܒܗܽܘܢ ܒܰܙܰܚ ܗ̱ܘܳܐ 
                    ܕܫܰܩܠܶܗ ܠܰܠܒܽܘܫ ܬܶܫܒܽܘܚܬܳܐ ܕܟܽܘܡܪ̈ܶܐ ܘܡ̈ܰܠܟܶܐ 
                    ܀܀܀
                    
                
                
                    11
                    ܠܚܶܠܳܐ ܡܰܚܶܝܢ ܕܽܘܟܪܳܢܳܟ ܐܳܘ ܣܳܛܳܢܳܐ 
                    ܕܰܚܠܶܐ ܩܶܪܒܰܬ ܠܨܰܗܝܶܗ ܕܡܰܒܽܘܥ ܚ̈ܰܝܶܐ 
                    
                
                
                    12
                    ܐܺܝܕܳܐ ܥܠܰܝܟ ܢܪܺܝܡ ܟܽܠܢܳܫ ܕܐܺܝܕܳܐ ܚܺܝܠܰܬ
                    ܕܰܡܚܳܬܶܗ ܠܗܰܘ ܕܒܺܐܝܕܶܗ ܩܳܡ ܒܶܪ̈ܝܳܬܳܐ 
                    
                
                
                    13
                    ܒܠܰܥ ܒܺܐܝܕܳܐ ܘܦܰܣܩܳܗ̇ ܠܺܐܝܕܳܐ ܡܶܢ ܩܰܝܳܦܳܐ 
                    ܐܺܝܕܳܐ ܕܟܳܗܢܽܘܬܳܐ ܦܶܣܩܰܬ ܕܰܦܣܰܩ ܡܶܫܚܳܐ 
                    
                
                
                    14
                    ܥܰܠ ܥܳܡܽܘܕܳܐ ܬܽܘܒ ܡܰܬܚܽܘܗ̱ܝ ܐܰܝܟ ܕܰܠܢ̱ܓܰܕܳܐ 
                    ܠܗܰܘ ܕܶܐܙܰܠ ܗ̱ܘܳܐ ܥܳܡܽܘܕܶܗ ܩܕܳܡ ܫܰܒ̈ܛܰܝܗܽܘܢ 
                    
                
                
                    15
                    ܥܰܡܽܘܕܳܐ ܥܰܠ ܥܰܡܽܘܕܳܐ ܡܶܬܢܰܓܰܕ ܗ̱ܘܳܐ 
                    ܫܩܼܰܠ ܢܰܦܫܶܗ ܡܶܢ ܓܰܘ ܨܶܗܝܽܘܢ ܘܶܐܬܳܬ ܢܶܦܠܰܬ
                    
                
                
                    16
                    ܕܰܬܪ̈ܶܝܢ ܩܰܝ̈ܣܺܝܢ ܪܰܟܶܒܘ̱ ܠܶܗ ܐܰܝܟ ܠܰܨܠܺܝܒܳܐ 
                    ܬܒܰܪ ܐܶܢܽܘܢ ܠܰܬܪ̈ܶܝܢ ܚܽܘܛܪ̈ܺܝܢ ܢܳܛܽܘܪ̈ܰܝܗܽܘܢ 
                    
                
                
                    17
                    ܪܰܟܶܒ ܚܰܙܩܺܝܐܶܝܠ ܩܰܝ̈ܣܶܐ ܬܪ̈ܶܝܢ ܒܰܐܘܝܽܘܬܳܐ 
                    ܒܰܬܪ̈ܶܝܢ ܩܰܝ̈ܣܺܝܢ ܕܰܨܠܺܝܒܳܐ ܒܰܛܶܠܘ̱ ܚܽܘܛܪ̈ܰܝܗܽܘܢ
                    
                
                
                    18
                    ܬܪ̈ܶܝܢ ܩܰܝ̈ܣܺܝܢ ܒܐ̱ܪܳܙܳܐ ܕܓܶܦ̈ܶܐ ܠܥܰܡܳܐ ܛܰܥܢܽܘܗ̱ܝ
                    ܬܪ̈ܶܝܢ ܚܽܘܛܪ̈ܰܘܗ̱ܝ ܗܳܐ ܐܶܬܬܰܒܰܪܘ̱ ܒܰܕܡܽܘܬ ܓܶܦܰܘ̈ܗ̱ܝ
                    
                
                
                    19
                    ܟܶܢܦܽܘ̈ܗ̱ܝ ܘܓܶܦܰܘ̈ܗ̱ܝ ܕܰܨܠܺܝܒܳܐ ܦܫܰܛ ܒܰܚܢܳܢܳܐ 
                    ܪܟܶܢܘ̱ ܐܶܒܪ̈ܰܘܗ̱ܝ ܘܰܛܥܶܢܘ̱ ܥܰܡ̈ܡܶܐ ܕܢܺܐܙܰܠ ܠܰܥܕܶܢ 
                    
                    ܀܀܀
                
                
                    20
                    ܕܰܐܚܝܳܢܰܐ ܗ̱ܘ ܕܰܐܝܠܶܝܢ ܚ̈ܰܝܶܐ ܘܨܶܝܕ ܒܰܪ ܛܽܘܗܡܶܗ 
                    ܡܰܘܒܶܠ ܪ̈ܰܚܡܰܘܗ̱ܝ ܕܥܰܠ ܣܰܘ̈ܟܰܘܗ̱ܝ ܦܺܐܪ̈ܰܘܗ̱ܝ ܢܶܪܥܽܘܢ 
                    
                
                
                    21
                    ܙܶܠܝ̱ ܐܶܠܺܝ ܘܒܶܟܝ̱ ܒܺܝܫܳܐ ܥܠܰܝ ܘܰܥܠܰܝܟܽܘܢ 
                    ܕܚܰܕ ܡܶܢܰܢ ܠܳܐ ܥܳܐܶܠ ܠܳܗ̇ ܠܰܓܢܰܬ ܚ̈ܰܝܶܐ 
                    
                
                
                    22
                    ܗܳܫܳܐ ܕܰܐܘܕܺܝܬ ܐܳܘ ܡܰܘܬܳܐ ܬܳܐ ܐܺܡܰܪ ܠܳܟ
                    ܕܗܳܢܳܐ ܟܽܠܶܗ ܬܽܘܪܓܳܡܳܐ ܠܺܝ ܒܰܛܠܳܢܰܐ ܗ̱ܘ 
                    
                
                
                    23
                    ܐܶܙܰܠ ܐܰܕܺܝܩ ܥܰܠ ܦܰܚ̈ܶܐ ܗܶܢܽܘܢ ܕܨܰܠܺܝܬ
                    ܘܳܐܦ ܐܰܢ̱ܬ ܡܰܘܬܳܐ ܦܪܰܚ ܘܰܣܥܽܘܪ ܟܽܠ ܕܰܟܪ̈ܺܝܗܺܝܢ
                    
                
                
                    24
                    ܡܳܪܰܢ ܒܰܛܶܠ ܠܰܬܪ̈ܰܝܗܽܘܢ ܒܰܬܪ̈ܶܝܢ ܓܰܒ̈ܺܝܢ 
                    ܒܺܝܫܳܐ ܢܶܬܒܰܛܰܠ ܗܳܪܟܳܐ ܘܡܰܘܬܳܐ ܬܰܡܳܢ